 |
كاملة✋
- ماما قولتلك انا مش عايزة أتجوز دلوقتي وبعدين يوم ما تجوزوني ، تجوزوني واحد كان متجوز ومراته توفت ، وكمان معاه ولد، ولك أن تتخيل المفاجأه انه مؤذن في المسجد ، بصي كده عليا يا ماما ، هي دي منظر واحده تتجوز مؤذن ؟
- ده قرار باباكي انا مقدرش اقف قدام قرار من قراراته
- ماما تسمحي تقوليلي هو بابا يعرف عني ايه عشان يقرر قرار زي ده لوحده ؟
- بنت اتكلمي كويس ع باباكي ، انتِ ازاي بتتكلمي بأسلوب ده
- آخر كلام عندي مش هتجوز الشخص ده يعني مش هتجوزه ، انا بحب واحد تاني
- يا خسارة تربيتي فيكِ يا ياقوت ، ايه الجراءه اللي انتِ فيها دي !
- بسخريه :- ع اساس اني كده متربيه؟انتوا اللي وصلتوني لكده ، انا مش عايزة اتكلم في القديم ، انا قولتلك يا ماما انا بحب حد تاني ومش هتجوز الانسان ده ، عن اذنك
- استني عندك ، انا مش مصدقه انك بالوقاحه دي يا ياقوت ، انتِ خسارة فيكِ واحد زي سُفيان ، انتِ لازم تتزوجي واحد من أشكالك، انا مش مسمحاكِ يا ياقوت وعمري ما هسامحك الا اما تتغيرى وتطلعي من الزفت اللي انتِ فيه ده
- اتكلمت ببرود :- عن اذنك يا ماما انا خارجه مع صحابي
- عوض عليا في بنتي يارب، يارب اهديها يارب
- كلمتي بنتك في الموضوع
- ايوة كلمتها ورفضت
- رفضت ازاي يعني ؟ هي كانت شافته ولا تعرفه عشان ترفض ؟ مفيش الكلام ده هتقابله غصب عنها وهتوافق ، الراجل جاي بكرة ، مش عايز مسخرة وقله ادب، قوليلها الكلام ده مفهوم ؟
- بقلق:- مفهوم
- هاي
- هاي ، اتأخرتي كده ليه
- موضوع كده كنت بخلصه
- موضوع ايه ده
- بخنقه:- مفيش بابا قرر يخلص مني ويجوزني
- ضحكوا كلهم :- انتِ تتجوزي
- ايوة ، وخدوا المفاجأه هيجوزوني واحد متدين ومؤذن في المسجد
- ضحكوا اكتر :- يا عيني ، انتِ اللي هتتجوزي كده
- بصتلهم بضيق :- هو اه مشبهش اني اتجوز واحد زي ده ، بس الموضوع مش مضحك للدرجه دي
- اوبا ، مش اللي واقف هناك مع البنت ده مازن ؟
- ايه ده صحيح بصي كده يا ياقوت
- بصت بصدمه :- طيب مع السلامه دلوقتي
- انت انسان خاين وغشاش وحقير
- ياقوت ! ايه اللي جابت هنا
- أمر ربنا عشان اكشفك ع حقيقتك
- بصلها بسخريه واستهزاء:- ربنا ! ع اساس انك تعرفي ربنا ؟
- كتمت دموعها وقالت :- انا بكرهك " وسابتهم ومشيت"
" رجعت قعدت في اوضتها تبكي بحُرقه ويتكلم نفسها ، معاه حق كلهم معاهم حق انا انسانه بشعه ، كل حاجه فيا بشعه ، لبسي ، وشكلي ، وصحابي، وكلامي ، ومنظرى ، اللي بعمله كله بشع " جمله واحده بتتردد في دماغها " ربنا ! ع اساس انك تعرفي ربنا ؟ فضلت تبكي لغايه ما نامت "
- انا موافقه اقابل العريس
- ده شئ كويس ليكِ
- ماشي " ودخلت اوضتها"
- انا هقوم اشوف مالها
- قومي يا أختي ما انتِ اللي عامله فيها كده
- كفايه بقا كده حرام عليك ، ايه القسوة دي
- روحي روحي شوفيها
- ياقوت
- ايوة يا ماما
- مالك يا حبيبتي
- عيونها دمعت :- مفيش يا ماما، هو العريس جاي امتي
- بكره ، قوليلي مالك يا حبيبتي
- بكت بحُرقه ورمت نفسها في حضن مامتها :- تعبانه اوي يا ماما، قلبي واجعني ، انا وحشه اوي يا ماما انا بشعه ، انا عمرى ما حاولت اعمل حاجه كويسه ، انا حتي مصاحبتش حد نضيف ، حتي صحابي كانوا بشعيين ، مليش صُحاب يشرفوا يا ماما
- لا يا نور عيني انتِ مش وحشه ، احنا اسفين والله اسفين ع كل حاجه وصلناكي ليها
- بكائها زاد :- انا اسفه ليكِ يا ماما ع كل حاجه عملتها
- ششش بس خلاص انا مسمحاكي اهدي ونامي عشان بكرة يوم طويل
- اهلاً وسهلاً نورتونا
- بنورك يا حاج ، امال فين العروسه
- مامتها:- العروسه اهي
" خرجت لاقيته قاعد ومعاه طفل صغير ، وباباه راجل وشه في القبول جداً ، لطيف ، ومعاهم بنوته شكلها قمر جداً ، لبسها محتشم بصيت للبسها ولبسي " انا ليه مش زيها " بس هي تبقي مين، يمكن اخته ، نفسي اكون زيك مش مكنش مُجبرة اني اعمل كل حاجه غصب عني ، انا عايزة اعمل كل حاجه برضا، اما نشوف الاستاذ سُفيان ده هيعمل فيا ايه "
- بسم الله ماشاء الله قمورة
- بصيت لها لاقيتها مبتسمه ابتسامه لطيفه جداً وحتي نظرتها ليا وللبسي اللي يكاد يكون مش لبس اصلًا قدامها مش وحشه ابداً بالعكس دي حتي معلقتش تعليق بايخ:- تسلمي ، عيونك اجمل
سمعت ابنه بيهمسله :- بابا انا عايز اروح اسلم ع ماما
" ماما ؟ هز رأسه في ما معناه انه يجيلي "
- جه وهو مبتسم:- السلام عليكم ورحمة الله وبركاته
- ابتسمتله بلُطف قد ايه هو جميل :- عليكم السلام
- انا اسمي زين وانتِ
- انا ياقوت
- اسمك حلو زيك
- ابتسمتله:- ده انت اللي قمر
- هو ينفع اقولك يا ماما
- بصيت لماما ، لاقيتها شاورتلي ب أه بصتله ببتسامه :- أه يا حبيبي
- رفع صوته وقعد يتنطيط بفرحه :- بقا عندي ماما ، بقا عندي ماما
- زين ، تعالي معانا وخلي بابا وماما قاعدين مع بعض لوحدهم شويه
- قرب منها وهمس :- هجيلك تاني
- السلام عليكم ورحمة الله وبركاته
- و ع عليكم السلام
- بصلي وابتسم:- عامله ايه
- انا كويسه وانت
- انا الحمد لله ، انا هديكي نصيحتين اولًا يُفضل وانتِ بتردي السلام تقوليه كامل ، والتانيه الأفضل تقولي الحمد لله ، أو نحمد الله، افضل من انا كويسه دي
" هو ماله ده ، هيبدألي مواعظ من اولها "
- ردت بضيق نوعاً ما :- حاضر
- يحضرلك الخير دايما ، انا عايزك تعرفي اني عمرى ما هجبرك ع حاجه واخليكي تعمليها غصب عنك ، دايما هقولك الحاجه اي ان كانت ايه هي لو اقتنعتي نفذيها فوراً ، مقتنعتيش ، هنتكلم مرة واتنين وتلاته هسمعك وتسمعيني وان شاء الله في الاخر هتقتنعي وهتعمليها، متفكريش عشان انا مؤذن او شيخ أو متدين ، هبقي مُعقد او مِقفل ، بالعكس ومع الايام هتعرفي ، وبالنسبه لزين طبعاً هيفضل معانا ، هو مؤدب جداً ومش هيعمل اي حاجه تضايقك وانا في الأصل قررت اتزوج عشان خاطره ومش فارق معايا مين العروسه ، و لانك بنت صاحب والدي انا وافقت ومعترضتش ، ومازلت معنديش اعتراض عليكِ ، زي ما انتِ عارفه والدة زين متوفيه اتوفت وهي بتولده ، ف اللي بطلبه منك تعامليه بحنيه ده اذا وافقتي ع الزواج ، وليكِ مني المعامله بالموعد والرحمه والتفاهم زي ما قولتلك ، اتفقنا ؟
- دماغي لفت من كتر الكلام لدرجه اني نسيت اوله بصتله وقولت :- حاضر
- ابتسم بخفه:- حاضر ايه بالظبط
- اقصد اتفقنا
- يجوز بردو
- مش عايز تسأل في حاجه تخصني ؟
- انا معرفش الا اسمك
- انا ياقوت عندي 23 سنه ولسه متخرجه من الكليه
- بس كده ؟
- اعتقد ده المهم ، سألته بقلق :- ولاحابب تسأل عن حاجه في حياتي الماضيه
- الماضي ليكِ مش ليا وعدي وفات ، كل واحد له ماضي
- تمام
- انا سُفيان عندي 28 سنه ، و... تقريباً انتِ عارفه الباقي
- ايوة
- طيب تمام هستني قرارك
لو وافقتي هيبقي كتب كتاب ع طول ان شاء الله ده لو معندكيش مانع ، هديكي رقم خديجه اختي تكلميها في الفترة دي وتبلغيها بقرارك ، ولو تم القبول عني تمام هتكلمك بدالي لغايه يوم كتب الكتاب ان شاء الله
- بصتله بذهول :- هو احنا مش هنتكلم
- ابتسم :- لا ، انا لسه مش حلالك ولا انتِ حلالي عشان نتكلم
- مفهوم ،مفهوم
- يلا احنا هنمشي، وتبقي افهم خديجه كل حاجه
- تمام
" دخلت اوضتي بعد ما مشيوا ، كنت مرتاحه ، كلامه كله كان بيتردد في دماغي ونوعًا ما كنت مبسوطه ، وكنت مرتاحه راحه تقريبا اول مرة احسها ،
عدي يومين ع زيارتهم ومكلمتوش ولا شوفته ، لكن كنت بتكلم مع خديجه ، طلعت طيبه و لطيفه بشكل وحبيتها جداً "
- قررتي ايه يا قلب امك
- انا موافقه يا ماما
- عيونها دمعت :- هتمشي وتسيبني يا روحي
- ابتسمت :- آن الأوان يا ماما
- حضنتها :- ربنا يهنيكِ يا روحي ، هقوم اقول لباباكي ونبلغهم
" وقامت واتصلت بخديجه "
- السلام عليكم ورحمة الله وبركاته
- وعليكم السلام ورحمة الله وبركاته، اللهم بارك بتتعلمي بسرعه
- خديجه ، انا كنت عايزة اقابلك ضرورى
- عينيا حاضر ، انا عندي درس قرأن في المسجد ، هخلص و اجيلك
- هستناكي
- ماشي
" قفلت معاها وقلبت دولابي كله ع الارض وفضلت ابص ع هدومي اللي كلها مترضيش ربنا اصلا وفضلت مستانيه خديجه "
- عروستنا الحلوة عامله ايه
- قومت حضنتها:- الحمد لله يا حبيبتي وانتِ
- نحمد الله ، قوليلي بقا في ايه ، وايه الكركبه دي
- دي هدومي هرميها ، او هولع فيها
- ليه!
- شايفه شكلها
- احم، هي بصراحه مينفعش تتلبس نهائى
- شوفتي ، خديجه انا عايزاكي تساعدني اتغير بالله عليكِ
- ابتسمت بحب :- حاضر ، اللهم بارك عليكِ ، انا مبسوطه جداً من قرارك ده
- بصي بقا ، انا عايزة اغير لبسي كله ، وطريقتي ، عايزة اقرب من ربنا انا مقصرة معاه اوي ، وهو لسه بيسترني بكرمه، عايزة احفظ القرأن ، وعايزة البس الخُمار، عايزة " اشاحت وشها يخجل" اتعلم الصلاة
- بصيلي اوعي تتكسفي مني تاني ، انا هقف جنبك في كل حاجه وهنعمل كل اللي انتِ عايزاه لسه يومين عن كتب الكتاب هنكون غيرنا حاجات ، ولما تنورى بيتنا هنكمل
- بفرحه :- تمام هنبدأ بإيه
- بصي انا عندي فكرة ، دلوقتي هننزل نشترى لبس محتشم وخمارات ، وهنشترى دريس كتب الكتاب والخمار بتاعه ودي هتبقي اول مفاجأه لسُفيان ، ها ايه رايك
- موافقه ، يلا بينا
- يلا
" خرجنا واشترينا لبس كتير جداً ، وكل لبس فضفاض محتشم ، واشتريت خمارات كتير ، كنت وصلت لاعلي قمه من السعاده والراحه "
- هرجع البيت بقا وبكرة هنعمل تاني خطوة ، هعرفك حاجات مهمه في الدين
- خديجه
- نعم يا حبيبتي
- انتِ احسن حد عرفته في حياتي
- ياروحي ، انتِ تستاهلي كل خير " حضنتها ومشيت"
" تاني يوم"
- ياقوووت
- بنوم:- اممممم
- قومي يا عروسه حد كتب كتابه بكره وينام كده
- قامت بفزع :- ايه ، ايوة ايوة
- ضحكت :- اهدي اهدي ده لسه بكره ، بس قومي ورانا حاجات كتير
- حاضر
- يحضرلك كل خير
- يلا كلميني في الدين
- بصي يا حبيبتي ، ديننا دين الحق والأمان، دين جميل بيحفظ المرأه ، يعني مثلا لبسك اللي كنتِ بتلبسيه ده حرام لانه كان بيفسر ويظهر تفاصيل جسمك ، ربنا محرم اللبس ده وطبعاً الواجب علي النساء التستر والبعد عن المحاسن لقوم الله عز وجل في سورة الأحزاب (وَقَرْنَ فِي بُيُوتِكُنَّ وَلا تَبَرَّجْنَ تَبَرُّجَ الْجَاهِلِيَّةِ الْأُولَى ) ومعني التبرج :- هو اظهار المحاسن والمفاتن وواجب ع المرأه متسترة متحجبه ، بس انتِ الحمد لله تخلصتي منه معني كده انك توبتي عن لبس الملابس المحرمه ، بإذن الله توبتك اتقبلت، ربنا جميل وكريم وعفو غفور وطالما توبتي توبه نصوحه ومش هترجعي عنها تاني يبقي توبتك اتقبلت ان شاء الله ، بالنسبه للعطور ، حرام طبعاً انك تحطي بيرفيوم وانتِ خارجه، لأن ده يعتبر تزين، والتزين لا يجوز الا للزوج ، واللي بتحط عطر وهي خارجه تُعتبر زانيه الرسول عليه الصلاة والسلام قال: (أيُّما امرأةٍ استعطَرَت فمرَّت علَى قومٍ ليجِدوا من ريحِها ؛ فَهيَ زانيةٌ) ، يصح انك تحطيه في البيت بس . ده بالنسبه لوضع العطر والملابس
اكثرى الاستغفار يا حبيبتي وتوبي توبه نصوحه عن كل حاجه مش كويسه و مترجعيش فيها تاني وربنا بإذنه هيقبلها ،" الإنسان خطَّاء بطبعه ، وغير معصوم ، ومن ثَمَّ ، فلا بد أن يقوم بمراجعة أفكاره التي قد تكون معصيةً أو خطأ ، وعليه أن يتوبَ من المعصية ، ويتراجَع عن الخطأ : (كُلُّ ابْنِ آدَمَ خَطَّاءٌ وَخَيْرُ الْخَطَّائِينَ التَّوَّابُونَ ) "
- بكت بحُرقه :- انا بعيد عن ربنا اوي يا خديجه ، انا كنت بعمل كل حاجه مترضهوش ، لبسي ، وشعرى، ومبصليش مبعرفش اصلي ، انا ازاي مكنتش حابه اقابل ربنا بالشكل ده ازاي كنت بعيده عنه بالشكل ده ، ورغم كل ده ربنا ساترني وكارمني برحمته ، سامحني يارب
- حضنتها :- ششش هنبدأ مع بعض حظوة خطوة ، وهتبقي احسن واحده ، افرحي بقا بكرة كتب الكتاب وهتنورى بيتنا وانا هقعد معاكي دايماً وهعملك كل حاجه وسُفيان مش هيسيبك
- بحزن:- سُفيان يستاهل واحده احسن مني
- انتِ ست البنات ، انسي كل اللي فات وتوبي عنه " خير الخطائين التوابون" قومي بقا نخلص اللي ورانا
" وقت كتب الكتاب "
- اين العروس
- والدتها:- موجوده يا شيخنا
- خرجت وبصلها بذهول وتمتمم- بسم الله ماشاء الله ، اللهم بارك
" بارك الله لكما وبارك عليكما وجمع بينكما في خير "
" بالبرفاء و البنين ان شاء الله "
- بابا هي ماما هتيجي معانا خلاص
- ايوة يا حبيبي ، روح عند جده اجرى، هتكلم مع ماما شويه
- مُبارك ، ومُبارك عليكِ الخُمار
- ردت بإحراج:- الله يبارك فيك
- ابتسم :- جميل اوي ، في حاجه عندك عايز اخدها بعد كتب الكتاب وبعد المفاجأه الحلوة بتاعتك دي
- ردت بإستغراب :- ايه هي
- حضنتها بقوة :- هو ده
- حد يشوفناا
- ابتسم :- انا تزوجتك ع فكرة ، لو مش فاكرة ، ممكن أنادي المأذون يفكرك هو جوه بياخد واجب الضيافه
- خلاص خلاص افتكرت
- ضحك :- طب الحمد لله
" هتمشي خلاص، وطبعاً الوداع مخلاش من الدموع "
- انا اسف يا بنتي ، محستش باللي عملته الا اما حسيت ان البيت هيفضي خلاص
- دموعها نزلت وحضنته :- هتفضل اول حب في حياتي واغلي شخص ع قلبي ، اللي مزعلني انك كنت حارمني من الحضن الجميل ده
- دموعه نزلت :- انا اسف
- بعدت ومسحت دموعه وأضافت بمرح :- لا مزيد من الدموع خلاص
- ربنا يهنيكِ ياروحي
- نورتي بيتك
- منور بصحابه
- بس ايه التغيير المُفاجئ ده
- بصتله بتردد:- ايه وحش ؟
- ده قمر
- ش شكراً ، هو زين فين
- قرب منها :- زين هينام مع عمته
- بعدت بسرعه :- اههه
- ادخلي الاوضه دي غيرى هدومك عشان نصلي
- ح حاضر
- اتوضيتي؟
- بكت وهما رأسها ب لا
- مسح دموعها :- ليه
- مبعرفش اتوضى ،" بكائها زاد ونزلت وشها للارض" ومبعرفش اصلي
- اخدها في حضنه:- طب بس بس متعيطيش انا هعلمك، ولو في اي حاجه تانيه هعملهالك
- شدت ع حضنه:- شكراً
- اتكلم بمرح:- يلا ياستي انجزى هتقعدي تشكريني طول الليل ، تعالي اتوضي يلا
" اتوضت وخلصت ولبست اسدال الصلاة "
- بصي ياستي انا هحفظك ال 3 سور الصغيرين دول تصلي بيهم لغايه اما احفظك غيرهم تمام؟
- تمام
" حفظها السور وصلوا سوا وخلصوا"
- هاتي ايدك بقا
- بتردد:- ليه
- بضحك:- هاكلها ، هاتي ايدك اسبح عليها
- ماشي
" قعد يسبح ع ايدها فترة"
- يومين كده وهنزلك مع خديجه تحفظي معاها قرأن في المسجد وتحضرى دروس الدين ، وانا هحفظك هنا
- ردت بحماس :- اتفقنا ، وع فكرة يعني انا هحفظ بسرعه جداً وهختمه بسرعه ، عشان يبقي عندي حسناتك اكتر منك بكتير ، وهحفظ زين كمان
- ابتسم بحب :- وانا اتمني تبقي احسن مني
" بعد شهر "
- ياقوت
- حاضر جايه ، حمد الله ع السلامة
- باس جبينها:- الله يسلمك ، زين فين
- زين سمع السورة اللي عليه ونام
- الحمد لله ، وانتِ روحتي الدرس
- ايوة
وقالت بسعاده :- انا ختمت القرأن يا سُفيان
- بجد ، يا روح سُفيان انتِ ، مُبارك مُبارك
- حضنته:- الله يبارك فيك يا حبيبي
- وبالمناسبة دي انا جايبلك خبر هيفرحك
- ردت بحماس :- ايه هي
- انا حجزت عشان نروح عُمره
- بفرحه :- لا بجد
- اه والله
- الله انا فرحانه جداً
- حضنها:- الله يديم فرحتك
- ماما
- نعم يا حبيبي
- تعالي نامي جنبي واحكيلي حدوته
- بس كده ، عيوني يا سي زين
- ياقوت ، ياقوت، الله راحت فين دي
- دخل اوضته زين :- يااقو... ايه ده ان شاء الله
- بهمس :- ياقوت ، ياقوت
- بنعاس :- ايه ، في ايه
- تعالي يا هانم ورايا
- في ايه يا سُفيان
- انتِ ايه اللي نيمك جنب زين
- بإستغراب :- مش فاهمه فين المشكله
- ياقوتتتتت ، متعصبنيشش 100 مرة قولتلك متنميش جنب زين
- سُفيان انت بتغير من ابنك !
- انا بغير من نفسي شخصياً ، متكررهاش تاني
- بضحك :- حاضر يا سي سُفيان
- بضحك:- سي سُفيان بيحبك ع فكرة
- ضحكت :- حبيتك العافيه يا بيه
- يلا يا فصيله امشي من هنا
- بضحك:- طب بحبك يا بيه
" بعد سنه "
- ياقوت
- ايوة جايه اهو
- بغضب:- اه طول الوقت مشغوله مع الاستاذ زين والأستاذ حمزة وسيباني انا كده ، بقولك ايه انا غلطان اصلا ، انا ماشي
- تعالي بس انا جيت اهو
- بعد ايه بقا ؟
- خلاص يا حبيبي انا نيمتهم اهو تعالي نقعد في البلاكونه شويه
- بقمص:- لا ، صحيهم يقعدوا معاكي
- بضحك:- يعني بتغير من زين ، إنما بتغير من حمزة اللي مكملش سنه لسه ليه ؟
- سيباني ومطنشاني تمامًاومعاهم
- مسكت ايده وطبطبت عليها :- دول اطفال يا حبيبي محتاجين رعايه، و بعدين دول ولادنا ، تغير منهم ليه بقا
- قولتلك انا بغير عليكِ من الهوا حتي
- خلاص انا اسفه
- ابتسم :- بتعرفي تحتويني انتِ
- طبعاً ، ليا سحر خاص
- طب البسي يلا
- رايحين فين
- البلاكونه
- بذهول :- سُفيان انت مقفل البلاكونه كلها انا هظهر فيها منين ؟
- ولو ، ويا سلام لو تلبسي النقاب كمان
- لا لا لا انت الغيره جننتك ، تحب البس النقاب وانا نايمه كمان ؟
- ابتسم ابتسامه واسعه :- ياريت ، افرضي حد شافك في الحلم من غيره ؟
- بصتله بصدمه :- ايه رايك منامش خالص عشان محدش يشوفني في الحلم ولا في الحقيقه ، " وهي داخله الاوضه " لاحول ولا قوة الا بالله الراجل اتجنن
- سمعته من برا بيقول :- اتجنن بيكِ
- ضحكت :- مجنون ، بس بحبك
- حضنها من ضهرها:- ورب محمد بحبك
ثم قال لها : ضعي النقاب أثناء نومك، لأني أخشى أن يراكي أحدًا في أحلامك من غير النقاب، فإني ورب العالمين أغار
أميرة عبد الجواد | رَيْحانه
تعليقات
إرسال تعليق