 |
مابين الحلم والحقيقة (دار الايتام 2)
البارت الرابع....والخامس
عشق....🖋️🖋️
رجعنا البيت وكل حاجه كانت ماشيه تمام كنت تعبانه اوي بعد ما خدوا مني الدم وكنت واخده دور برد شديد بس كنت بقاوح كنت منتظره اوصل عند باب البيت ويغمَ عليا زي ماحلمت بالظبط بس الغريب ان محصلش كده بعد ما وصلونا طلعنا الشقه عادي يادوب غيرنا هدونا وكلنا كنت بحاول على اد ما اقدر اني اتحامل على نفسي عشان مقعش منهم كنت عايزه اكون كويسه واحافظ على طاقتي على اد ما اقدر لبكره كنت مستغربه ازاي موقعتش طب ازاي الحلم متحققش ويمكن تكون دي كانت اول حاجه متتحققش من حلمي فضلت طول الليل صاحيه جمب نور اقرألها قران عشان تهدي شويه الصدمه كانت شديده عليها سؤالها ليا عن موت بابا وجعني اوي اكيد محدش فينا يقدر يدخل في قدر ربنا بس يمكن اكون كنت مصدقه لان حلمي كان بيتحقق بالحرف كل تفصيله كل كلمه لدرجة اني مش ناسيه اي حاجه اوقات كتير كنت بحلم بحاجات مختلفه كتير منها كان بيتحقق بس كنت بقوم مش فاكره الحلم اوي كان ممكن افتكره لما الاقيه اتحقق بس الغريبه في الحلم ده اني من اول ما صحيت وانا فكراه من قبل حتى ما يبتدي يتحقق وكل يوم كان بيتعاد ادامي كنت بخاف اكتر الغريبه ان الحلم اللي حلمته تفاصيله حصلت في شهور وانا منمتش كتير ازاي قادره افتكر كل حاجه يمكن يكونوا مش مصدقين اللي انا قولته بس لازم اخليهم يصدقوا لاني خايفه عليهم يمكن عدم وقوعي واني متعبش ريحني شويه وحسسني ان ممكن في حاجات كتير متتحققش في حلمي ولو في حاجه اتمنى من ربنا انها متتحققش فاهو موت بابا الراجل ده يستاهل انه يتحب لاني شوفت معاه حب وحنيه واحتواء مشوفتهمش من اهلي نفسهم اللي معرفش عنهم اي حاجه نور متستاهلش انها تتكسر ولا تتوجع عليه عمري فيوم ما حسيت اني خايفه من اي حاجه بس اول مره احس بخوف جوايا بالشكل ده اصله احساس وحش اوي لما يبقى جواك خوف من حاجه ومش قادر حتى تتكلم لكن اللي مطمني شويه ان جوايا احساس كبير اوي ان بابا مش هيجراله حاجه وده في حد ذاته مطمني لاني بصدق أحساسي ..بالرغم من كل اللي حصل انهرده واني اعيش يوم صعب زي ده للمره التانيه لكن المرادي كان ليه طعم مختلف لاني بشوفه وهو ليل جمبي بشوفه وانا بحبه عكس اول مره شوفته كان بردو اول يوم شوفت فيه ليل ولاول مره احس معنى الحب في المواقف اللي زي دي بتحسي بسند وضهر الحب طلع اعظم حاجه في الدنيا عشان كده لما اتكرر ادامي كلام نور وتمارا وزهره عن الحب معترضتڜ ولا نصحتهم ولا قولتلهم عيب ولا حتى حرام وقتها انا مكنتش جربت الحب لكن لما اتعاد ادامي الكلام كان حب ليل جوايا ودي كمان كانت حاجه من ضمن الحاجات اللي متحققتش و يمكن وقتها مقدرتش اقول لنور ان نوح بيحبها لكن كل اللي قولتهولها امشي ورا احساسك حبي وعيشي واستني عوض ربنا كنت بحاول اطمنها بس خوفت اعشمها ...جوايا احاسيس كتير عكس بعضها منتظره بكره جدا وفنفس الوقت مش عيزاه يجي خايفه اوي على بابا في الوقت اللي احساسي بيقولي انه هيبقى كويس مستنيه اتكلم مع ليل واحكيله مع اني خايفه ميصدقنيش وبردو مش عارفه ابتدي معاه الكلام ازاي واقوله اي أسوء حاجه في الدنيا التفكير احساسه مميت.....
سابت عشق القلم من ايدها وشالت الكشكول بتاعها ورجعت تاني عشان تحاول تنام شويه
.................
وصل ليل الڤيلا وكلهم وراه بعربياتهم....
دخلو اعدوا في جنينة الڤيلا ساكتين
جاسر...ايه وحدووووه
الجميع...لا إله إلا الله
جاسر...مالكم ساكتين ليه
نوح...يعني بعد كل اللي حصل انهرده ده بتسأل
ادم....انا مش قادر اصدق حاسس اني دماغي هتقف
جاسر...صراحه وانا كمان بس صدقت لما قالتلنا عن رد نور وليل ده اللي قالته بالحرف
نوح....دي ملبوسه ياعم وربنا
ادم...ياعم ملبوسه ايه بس...هو في حاجه غريبه بس ايه هي معرفش بس لازم نعرف هي عرفت ازاي اصلا
جاسر...ساكت ليه يا ليل وايه حوار التليفون اللي جالك ده
نوح...اه صح مين اللي كلمك
ليل....ده الواد اللي كنت مخليه يجبلي كل حاجه عن تمارا....وابتدا ليل يحكي كل حاجه حصلت في المكالمه.
جاسر....نعم يعني هما متربين في دار ايتام
ادم...طيب بردو ايه اللي جمعهم بحاج محمد
ليل...مش عارف السؤال ده اجابته عند عم محمد والبنات
نوح..طيب عشق قالت لما جت ان العربيه قاصده تخبط تمارا يمكن حد تبعهم هما من دار الايتام دي عملو حاجه مثلا وهربوا وده حد بينتقم منهم مش انت بتقول ان الراجل بيقولك خرجوا بطريقة مش مفهومه وان المفروض لو حابين يفضلوا حتى لو لسه متموش 21سنه يفضلوا
ادم....ممكن بردو
جاسر...طيب ودول هيكونوا عملوا ايه عشان حد ينتقم منهم كده في حاجه غريبه
ليل...كان ممكن يكون كلامكم صح بس الاغرب من ده انها قالت ان العربيه قاصده تمارا بس هي هتخبط عم محمد وده اللي حصل
جاسر...ايوه صح
ليل...انا دماغي هتنفجر مش قادر افكر ولا انا عارف تفسير للي بيحصل ده
نوح..والغريب ان هي عرفت ان كلنا مش نفس فصيلة عم محمد طيب لو عارفه فصيلة البنات هتعرف ان احنا مش متوافقين معاه ازاي.
ادم....دي غريبه بردو مع ان ممكن اللي عايز يعرف حاجه بيعرفها
جاسر....ميتهياليش يا ادم البنات دي شكلهم مش كده خالص ولا بالدماغ دي
ادم...طيب حد فيكم لاحظ طريقتها لما نور سالتها بابا هيعيش؟؟
نوح...فعلا ارتبكت
ليل....ولما انا سألتها قالت غير كده
جاسر...يعني ايه
ليل...واحنا ماشين وقفتها وسالتها قالتلي يمكن اكون عايزه ده اللي هيحصل يعني معناه ان عم محمد هيجراله حاجه
جاسر....انت بتقول ايه؟؟؟في حد يدخل في علم ربنا
ليل...ماهو عشان كده سبت هناك جاردين عشان يكون تحت عينهم
ادم...انت شاكك فيها انها ممكن تموته؟؟
ليل...معرفش ومعرفش ليه عملت كده..صحيح نسيت أسألكم هو عم محمد يعرف ان مهره حامل انا مش فاكر اني قولت ادامه
نوح...والله ما اعرف يا ليل
ادم...وانا معرفش بس يمكن تكون قولت ادامه انت بتتكلم على مهره اكتر ما بتتكلم عن نفسك
جاسر...اشمعنى
ليل..بضحكه سخريه..اصل من ضمن اللي قالته ان مهره هتولد بكره وفتحي هيكلمني عشان يعرفني ويقولي ان الدكتور مبيردش خالص وانا هتصل الاقي موبايله مقفول.
جاسر....ايه الهبل ده لا كده في حاجه غلط
ليل...مش بقولك
نوح...بتريقه ومقالتلكش مين اللي هينول شرف ولادتها ولا ناويه تموتها هي كمان
ليل....لا مقالتش قالتلي بكره تعرف وخليها كده تقرب منها عشان امحيها من على وش الدنيا🤨
جاسر....الطيب احسن بقول ايه انا هقوم انا بقى وناموا متفكروش كتير بكره مش بعيد
ليل...ماشي خلي بالك من الطريق
جاسر... ربنا يستر
نوح...بضحك ولا ياجاسر خلي بالك احسن تطلعلك في العربيه
جاسر....تبقى جابته لنفسها😉
نوح....صراحه وقتها بس هحسدك البت زي القمر
ليل...ماتحترم نفسك
ادم....مين ده نوح تبقى بتحلم😏
نوح....ماشي ياعم المحترم بقول ايه انا كمان طالع مش قادر خلاص فصلت
جاسر...يلا تصبحوا على خير سلام
الجميع سلام
نوح....انا طالع اعدين لسه
ادم...لا انا كمان مش قادر عايز انام مش هتطلع يا ليل
ليل...لا هروح ابص على مهره الاول وبعدين اطلع
نوح...روح ياخويا لمراتك😏
ليل...اطلع عشان مبوظش خلقتك
نوح....لا وعلى ايه تصبح على خير يا مفتري😁😁
ادم...تصبح على خير ياليل
ليل...وانتو من اهل الخير
طلع ادم ونوح....
وراح ليل عالجاردات..
الجارد...ليل باشا تؤمرني بحاجه
ليل....عايز تبلغ الجارد اللي هنا مفيش مخلوق يدخل غير بأذن مني وبكره عايز اتنين يفضلوا هنا ميتحركوش وانت والباقي معانا على المستشفى
الجارد...تمام ياباشا
ليل...تصبح على خير
جارد...وانت من اهل الخير
سابه ليل وراح على مهره لقاها بتاكل
ليل...بابتسامه...وحشتيني اوي مشوفتكيش من الصبح
فضلت مهره تعمل صوت يعبر عن فرحتها
ليل...ايه خلاص قربتي ولا ايه بس انتي شكلك كويسه مش زي ما قالت شكلك لسه ادامك وقت..
بكره الجارد هيفضلوا معاكي عشان محدش يدخل وانا مش هنا يعمل فيكي حاجه..ايه بتبصيلي كده ليه...اول مره تشوفيني خايف صح😏😏..فضل ليل يلمس على راسها بحنيه وكمل كلامه يمكن اكون خايف بس مش على نفسي عليكي وعلى عم محمد تفتكري بتكدب بس هي شكلها ميقولش كده...بس كمان اللي بتقوله ده غريب اوي وميدخلش عقل وانا لسه متجننتش عشان امشي ورا كلام المجنونه دي..عموما بكره نشوف ايه اللي مستخبيلنا يا مهره ومش عايزك تقلقي انا مش هخلي اي حاجه تحصلك.....هطلع انام بقى والصبح هعدي عليكي تصبحي على خير....
خلص اليوم على الطالنا جميعا...فيهم اللي عرف ينام رغم توتره وعدم استيعابه لكل اللي اتقال وفيهم اللي النوم فارق عنيه....
في صباح يوم جديد صحيوا ابطالنا جميعا عشان بجهزو ويروحو المستشفي...
ليل...بقول ايه هبص على مهره قبل ما نمشي واجيلكم
نوح.طيب اسمع انا هطير انا عشان هروح اجيب نور والبنات
ليل...طيب تمام عينك عليهم كويس
نوح...متقلقش يلا سلام
راح ليل وادم عند مهره كانت كويسه جدا رايحه جايه مش باين عليها اي تعب ولا فيها اي حاجه....
اتصل ليل بالدكتور....
الدكتور....الوووو ازيك ياليل باشا
ليل...اهلا يا دكتور
الدكتور...خير مهره فيها حاجه
ليل...لا تمام بس كنت عايزك تيجي تبص عليها كده
الدكتور...هي تعبانه ولا ايه انا لسه شايفها اول امبارح وقولت لحضرتك ادامها حوالي اسبوعين
ليل...لا هي تمام بس معلش ياريت تيجي اي وقت يعجبك حابب اطمن عليها اول بأول
الدكتور...تمام بس لو كده هاجي متأخر شويه يعني مش قبل 9او 10بليل لان انهرده انا اجازه وكنت مأجل مشاوير كتير لازم تتعمل انهرده.
ليل...لا عادي الوقت مناسب جدا اكون انا كمان رجعت
الدكتور...تمام يا ليل باشا
ليل...مع السلامه
الدكتور...سلام..
ادم....ايه هتجيبه ليه
ليل....معرفش بس هي قالت ان الدكتور مش هيرد وقافل موبايله وادي كل حاجه تمام
ادم...اول مره الاقيك تصدق اي حاجه بسهوله كده
ليل....انا نفسي مستغرب حاسس اني هتجنن اصلا بس خلينا نشوف اخرتها يلا بينا عشان منتأخرش
ادم...يلا
راحوا عالعربيات.
ليل...فتحي...
فتحي البواب...ايوه يا باشا
ليل...عينك على مهره لو تعبت او فيها اي حاجه تبلغني انهرده تفضي نفسك من اي حاجه إلا مهره تجيب كرسي وتأعد ادامها تمام لو حسيتها تعبانه كلمني او اقولك قبل ما تكلمني تكلم الدكتور تبلغه عشان يلحقها وتكلمني بعدها
فتحي...في عنيا يا باشا تحت امرك
ليل...رقمه معاك صح
فتحي...ايوه يا باشا معايا ماتقلقش
ليل...يلا سلام
فتحي...مع الف سلامه ياباشا..
ادم...كويس ان نوح مشي وإلا كان مسكك تريقه عاللي انت عامله ده
ليل....😡هو كويس انه مشي عشان مقتلهوش زي ما شكلي هقتلك
ادم...لا وعلى ايه سلام ياعم😂😂...
......
عدى الوقت بسرعه وصل الجميع المستشفى اطمنوا على عم محمد كانت كل حاجه تمام
لكن الحزن كان باين على وشوش الجميع...
كل حاجه كانت بتمشي في عيون عشق زي ماشافت في حلمها كانت اعده مستسلمه تماما لاي حاجه هتحصل حاسه انها عاجزه ومفيش حاجه في ايدها تعملها فقررت انها تسكت وهي جواها امل في ربنا انه يغير حلمها بواقع هي بتتمناه...
راح...ليل للجارد..
في حد دخل او خرج عند عم محمد
الجارد...لا يا باشا مفيش غير الدكتور دخل الصبح وطبعا الممرضين داخلين خارجين عليه وانا كل شويه ابص عليه هو كويس مفيهوش حاجه خالص
ليل...متأكد ان مفيش حد جه
الجارد...اه والله متأكد ياباشا
ليل...ولا حتى بنت من البنات اللي هناك دول
الجارد...لا مفيش صدقني انا واقف ادام الاوضه من امبارح منمتش ولا حتى روحت اي مكان
ليل...تمام.
سابه ليل ولمح الدكتور راح عليه
ليل...يادكتور
الدكتور...اهلا ليل باشا
ليل...طمني على عم محمد مفيش جديد
الدكتور...لا والله هو لحد الوقت حالته مستقره لسه منتظرين ال24ساعه يمروا ادعوله ربنا معاه يارب
ليل...يارب
الدكتور...بعد اذنك لو احتجتني انا في المكتب بتاعي
ليل...شكرا يا دكتور
راح ليل وقف ادام نور اللي مقتوله من العياط
ليل...نور..ممكن تهدي شويه بلاش عياط من فضلك انتي عارفه عم محمد بيحبك اد ايه وميحبش انه يشوفك كده اجمدي وادعيله هو محتاج دعاكي الوقت
نور...انا خايفه عليه اوي خايفه يروح ويسبني انا مليش غيره
ليل...هيقوم منها وهيبقى زي الفل ده مش ابوكي لوحدك يا نور ده ابونا كلنا وصدقيني انا اول مره احس اني عاجز لو كان في ايدي اي حاجه كنت عملتها اديكي سمعتي الدكتور امبارح لما طلبت منه انه يسافر قال انه ممنوع
نور...عارفه والله انك مش مأثر بس صدقني غصب عني انا مرعوبه عليه
ليل...صدقيني هيبقى بخير
نور...يارب
فضلوا كلهم واقفين ادام الازاز اللي فاصل بينهم وبين عم محمد في صمت تام مفيش غير صوت بسيط لدموع البنات...اما ليل فكان عينه على عشق بغموض وبالرغم من انها حاسه بخيال لنظراته اللي بتخترقها إلا انها قررت تتجاهله ليل من اول ما وصل وهو عينه عليها مش عايزها تغفل عنها مراقب كل تحركاتها لكن حس بخيبه امل لما لقاها متحركتش ولا حتى مسكت موبايلها ومبتعملش اي حاجه غير انها بتقرأ في القرآن بهدوء وبتحاول تمسح اي دموع تخونها بسرعه....
واثناء الصمت الرهيب فجأه رن موبايل ليل...واتصدم😳😳 اول مالاقى اسم فتحي البواب علة شاشة موبايله فضل مبرق للشاشه 😳
ابتسمت عشق بهدوء قاتل وهي مش بصاله..
ليل....الووو🙄
فتحي...ايوه ياليل باشا..الحقني مهره تعبانه اوي شكلها بتولد
بص ليل لعشق من غير ولا كلمه
فتحي...ليل باشا حضرتك معايا
الووووو...الوووووو
ليل...احممم معاك
فتحي....طيب حاول توصل للدكتور بتاعها عشان كلمته مبيردش لو معاك رقم تاني ليه
كلمه بسرعه
ليل....اقفل انا هتصرف
بصله جاسر وادم ونورح
جاسر..في ايه
ليل....وهو باصص لعشق اللي متجاهلاه تماما
ده فتحي بيقول ان مهره بتولد
بصوا الشباب كلهم بزهول على عشق
جاسر...انت بتقول ايه
اتصل ليل بسرعه على الدكتور لقاه مغلق حاول مره واتنين وتلاته بردو مغلق
ادم...ايه مبيردش
ليل...تليفونه مقفول
نوح...طب وبعدين هتعمل ايه
ليل...فضل يمرر ايده في شعره بارتباك مش عارف فجأه وقف وبص لعشق من غير ولا كلمه
اخيرا بصتله عشق وحبت تخلص ارتباكه وتوتره وتوقف الاسئله اللي حاليا بتدور في دماغه.
عشق....بابتسامه هاديه وببرود قاتل لسه مش مصدق
ليل...انا سالتك امبارح هيحصل ايه في مهره انتي قولتيلي بكره هتعرف
عشق....وانا جاهزه يلا بينا
ليل...على فين
الكل كان باصص على الحوار اللي داير بين عشق وليل بذهول وحاسيين انهم مش فاهمين اي حاجه.
عشق...انا اللي هولدها
ليل...انتي
عشق...متقلقش انا بدرس طب بيطري متخافش
زهره...متقلقش يا مستر ليل عشق شاطره اوي وكانت بتنزل عملي كتير مع دكاتره كبار وعملتها قبل كده
تمارا....ايوه بس عشق عمرها ما ولدت فرسه بيتهيألي ده صعب عليها.
ليل..بص لعشق بارتباك من كلام تمارا..وخاف على مهره
عشق...على فكره وقفتنا دي مش صح ياريت نمشي بسرعه عشان نلحقها
هز ليل راسه بقلة حيلة لانه باختصار مفيش في ايده اي حاجه...
ليل....جاسر خلو بالكم من البنات هنروح بسرعه وهكلمك اعرف انتو فين تمام
جاسر...تمام متقلقش..
مشيت عشق ورا ليل وراحو الڤيلا وطول الطريق في صمت رهيب بينهم....
وصلت عشق...وخدت وقت لحد ما مهره ولدت. اعدت جمبها على الارض بتعب
ليل..بابتسامه..شكرا
عشق...على ايه انا المفروض اللي اشكرك عشان عرفت تساعدني
ليل....كويس اصلا اني عرفت انا عمري ما توقعت اني اتحط في الموقف ده...
عشق...كل واحد فينا عمره ما بيتوقع الموقف اللي بيتحط فيه.
ليل.....واضح غير كده اظن انتي كنتي عارفه ان مهره هتولد من قبل ما تولد حتى ده انا شكيت في اللي فتحي قاله لاني الصبح كلمت الدكتور وقاللي ان لسه ادامها اسبوعين
عشق ...عادي بتحصل هي خلاص جه معاد ولادتها وكان لازم تولد..المهم هتسمي المهره الصغيره ايه
بص ليل عليها وهو مبتسم....مش عارف ورجع بص على عشق
طيب بما انك بتعرفي كل حاجه مم قبل ما تحصل انا جه في بالي اسم تقدري تتوقعيه...
ابتسمت..عشق...هو انت ليه مصمم انك تتريق اولا انا مش بتوقع لاني باختصار مش بقرا الغيب انا لو بقول على حاجه وبتحصل ده لاني متاكده انها هتحصل
ليل...عايزه تقنعيني ان في حد بيبقى عارف اللي هيحصل ايه مخاويه
عشق...لا بس قولتلك هتعرف كل حاجه
ليل...امته؟؟
عشق ..انهرده لو تحب بس خلينا نطمن على بابا ونعدي اليوم ده يلا نرجعلهم بقى
ليل...ماشي طب ايه مش ناويه تقوليلي انا عايز اسميها ايه.
بصتله عشق بابتسامه بسيطه وهي بتقوم من الارض
عشق....عشق...هتسميها عشق
ليل...😳😳😳😳😳
مشيت عشق...خدت شنطتها وراحت على العربيه وهو وراها مصدوم
ركب العربيه بعد ما قال لفتحي ياخد باله منها....وراحو على المستشفى
وصلوا بعد مده بسيطه
ليل...يلا وصلنا كلهم فوق
عشق..... .....
ليل...انتي كويسه
عشق.كانت بتاخد نفسها بسرعه وحاسه ان قلبها هيقف وعكس طول الفتره اللي عدت كانت بتتعامل مع كل موقف يتكرر بهدوء واستسلام لكن اول ما قربت من المستشفى حست كأن روحها بتروح منها والخوف اتضاعف على عم محمد
ليل....عشق انتي كويسه حاسه بحاجه
عشق....بابا
ليل...😳😳تقصدي ايه
عشق...يلا نطلع بسرعه
طلع ليل هو وعشق بسرعه
لاقوهم كلهم اعدين
عشق..وهي بتنهج بابا كويس
تمارا....ايه مالكم بتجروا كده ليه
عشق...مفيش بابا كويس
تمارا....انتي عرفتي ازاي
عشق....😳😳جراله حاجه
تمارا.. لا مفيش بس الممرضه خرجت جرب من شويه وقالت انه فاق ودخل الدكتور ليه بسرعه كان تعبان وبعدها مبقاش دريان باي حاجه
جاسر...بس الدكتور بيقول عادي وان ده من مضاعفات العمليه بس لما فاق سأل عليك وعلى البنات ياليل
عشق... الحمد لله يارب الحمد لله يارب الحمد لله يارب
تمارا...عشق انتي كويسه
عشق...اه اه اه بخير
عدي الوقت بينهم وعشق في ذهول ان حاج محمد عايش 🙈
مكانتش مصدقه وكل ما الوقت يعدي وهو عايش تحس براحه ودموعها مبتقفش..
بعد وقت طويل قرروا يروحوا
ليل...يلا الوقت اتاخر لازم تمشوا وبكره هنجيلوا
نزلوا كلهم مع بعض وعشق مش معاهم خالص
ليل....عشق
بصتله عشق بهدوء
ليل...اظن انتي قولتي نطمن على حاج محمد وهتقوليلي كل حاجه
عشق....وانا جاهزه
ليل...بكره هنتقابل بره في اي مكان ونعرف منك ايه اللي بيحصل
عشق...موافقه بس ليا طلب
ليل...اتفضلي
عشق....ياريت محدش تاني يكون معانا
ليل...اشمعنى
عشق....عشان في كلام مش لازم يعرفوه في حاجات هقولها تخص كل واحد فيهم اسمعه مني وبعد كده احكم بعد معرفتك بيه اذا كان ينفع يعرفوه ولا لا
ليل....مكنش عارف يرد يقولها ايه اكتفى بهز راسه
عشق..يمكن اللي هقوله ده غريب بس ارجوك حاول تصدقه لان مش هقدر احكي غير ليك ولاني محتاجه حد يسمع اللي هقوله
ليل...وانا هسمعك واحاول اصدقك ياعشق على فكره
عشق...نعم
ابتسم ليل بسخرية..عشان بس تصدقي اني هصدقك عايز اقولك اني فعلا قررت اسمي المهره الصغيره عشق
ابتسمت..عشق بهدوء ومشيت معاه على العربيه 🙂🙂🙂🙂
مابين الحلم والحقيقة (دار الايتام 2)
البارت الخامس..
في صباح يوم جديد على أبطالنا
كان مازال. الحزن مسيطر على ابطالنا كلهم إلا عشق اللي كانت مرتاحه إلى حد كبير عشان جزء مهم في حلمها متحققش وهو موت عم محمد..بس اللي كانت شايله همه هي اعدتها مع ليل مكنتش عارفه تبدأ منين حاولت ترتب كلامها بس مكنتش عارفه فقررت انها تسيب كل حاجه لوقتها....
صحيو البنات من النوم وكل واحدة كانت بتعمل حاجه قبل ما يروحو المستشفى...كانوا منتظرين الشباب يعدو عليهم عشان يروحوا سوا بما انهم اجازه انهرده كمان.
تمارا...صباح الخير يا عشق
عشق...صباح النور يا حبيبتي امال فين زهره ونور
تمارا...نور لسه اعده عالسرير وزهره بترتب الاوضه...
عشق...طيب كويس
تمارا...بتعملي ايه
عشق...مفيش قومت احضر الفطار وقولت اعمل الغدا بالمره عشان لما نرجع يبقى في اكل في البيت
تمارا...طيب مصحتنيش اساعدك ليه
عشق...يعني انا بعمل ايه بس يا تمارا اديني بتسلى وبعدين شكلك كنتي مرهقه جدا فسبتك تنامي
تمارا...ربنا يخليكي ليا
عشق...ويخليكي ليا انتي ونور وزهره
تمارا...طب ايه مش ناويه تقوليلي مالك وايه اللي مشقلب حالك كده وايه الحاجات الغريبه اللي بتحصل دي ومتقوليش مفيش حاجه عشان انا من يوم ما بابا شافنا في الشارع وانتي بتقولي حاجات غريبه وكل ما اسالك تقولي مفيش
عشق... تمارا صدقيني انا مش قادره اتكلم في اي حاجه ومتقلقيش انا تمام كل الحكايه حلم حلمته زي احلام كتير حلمتها واتحقق..
تمارا....ايوه بس انتي قولتي ان انا المقصوده بالحادثه كنتي تقصدي ايه وبعدين مين ده اللي يقصدني انا معرفش حد وبعدين حتى لو اعرف هيعمل كده ليه.
عشق...صدقيني معرفش انا حلمت ان حد عايز يخبطك بس العربيه خبطت بابا مين وليه معرفش انا كل همي بس ان امنع الحادثه.
تمارا...ماشي ياعشق هحاول اصدقك مع ان اول مره احس انك بتكدبي...
سكتت عشق وكملت تحضير الاكل حاولت تتجاهل تمارا لانها مكنتش عايزه تتكلم وتخوفهم.
خلصت عشق تحضير الاكل وخلصت الفطار كان البنات ظبطو نفسهم وجهزوا عشان يفطروا وينزلوا
عشق....نور..مالك ساكته ليه
نور..ابدا يا عشق مفيش
عشق..مفيش ايه انتي اعده باصه في طبقك وسرحانه ومكلتيش اي حاجه
نور...مش قادره اكل يا عشق حاسه ان دماغي واقفه خايفه على بابا اوي يجراله حاجه
عشق...متقوليش كده بعد الشر عليه ان شاء الله هيبقى كويس
نور...قوليلي يا عشق عشان خاطري عرفتي ازاي ليه مش عايزه تريحيني
عشق...صدقيني يا نور لو بأيدي اريحك اكيد مش هتأخر بس والله العظيم اللي قولته هو اللي حصل مجرد حلم وعشان كده جريت عليهم
نور...بس انتي قولتي حاجات كتير يا عشق مش الحادثه وبس يعني في حاجه تانيه انتي عرفاها ومش عايزه تقولي
عشق....صدقيني يا نور ده كان حلم طويل ومفتكرتش منه غير اللي حصل واللي انا قولته
نور....يعني مش مخبيه اي حاجه هتحصل لبابا
عشق..بابتسامه بذمتك في حد فينا يقدر يعرف الغيب اللي حصل واللي شوفته قولت عليه يلا بقي كلي عشان نروح لبابا
نور...صحيح نوح هيعدي علينا يودينا
زهره....هو مش عنده شغل
تمارا...شغل ايه يا مسطوله احنا اجازه جمعه وسبت
زهره...اه صح نسيت
عشق...انا كمان نسيت والله
تمارا...طيب يلا افطروا عشان لما يجي ننزل على طول واه صحيح انا بعد ما نطمن على بابا هروح مع مستر جاسر عندي ميتنج
زهره...ميتنج ايه مش بتقولي ان الشركه اجازه
تمارا...ايوه اجازه بس الميتنج ملهوش دعوه
بصتلها عشق بزهول وسكتت لان نفس اليوم ده بيتكرر من تاني وبردو تمارا وجاسر كان عندهم اجتماع مع هادي حاولت عشق تبان طبيعيه وكملت فطار في هدوء....
بعد فتره بسيطه اتصل نوح على نور بلغها انه تحت ونزلوا البنات مع بعض..سلموا على نوح وراحوا على المستشفى.
مكنش لسه حد من الشباب وصل
نور كانت واقفه ادام الازاز باصه على عم محمد بحزن
نور...هو هيفضل نايم كده مش هيفوق خالص
نوح....لا هيفوق طبعا ان شاء الله بس الدكتور بيقول انهم بيدوله منوم قوي عشان يفضل نايم ده احسن ليه
نور...ازاي احسن ان الواحد يفضل نايم كده.
نوح....يانور حاج محمد في كسور كتير في جسمه ودي إلمها صعب اوي وكمان الدكتور قال انه عنده ارتجاج بسيط في المخ والحركه غلط عليه الكلام غلط عليه لازم يفضل فتره كده عشان حالته تستقر
زهره....ايوه يانور صح كده اريحله فعلا
تمارا...وبعدين انتي عارفه ان بابا مش بيحب الاعده لو صحي وشاف نفسه كده نفسيته هتتعب اكتر وممكن ده ميساعدش انه يقوم ويشد حيله
نوح...ده مش ممكن ده اكيد لو شاف نفسه بالمنظر ده هيحزن اكتر وهيحزن لو شافك كده يانور انتي عارفه هو بيحبك اد اي
نور...انا كمان بحبه اوي هو كل حياتي
نوح...طيب يبقى تدعيله كتير يانور..وحاولي تهدي شويه ممكن
نور...حاضر
صباح الخير لف الجميع على الصوت الرجولي المميز عند عشق بالاخص
نوح...صباح النور
ادم....صباح الخير ياجماعه
البنات....صباح النور
ليل...ايه الاخبار في جديد
نوح..احنا لسه جايين مفيش ربع ساعه و مشوفتش الدكتور
ليل...خليك انا هروح اشوفه واطمن منه
نور...مستر ليل ممكن اجي مع حضرتك
ليل...بابتسامه هاديه خليكي يا نور انا هطمن واجي اطمنك
نور ..ايوه بس
ليل....بس ايه متخافيش مش هكدب عليكي هاجي عل طول بعد اذنكم.. نوح استني ياليل انا جاي معاك
مشي ليل ونوح للدكتور وفضل معاهم ادم
خبط ليل عل مكتب الدكتور
الدكتور...ادخل
ليل....صباح الخير يا دكتور
دكتور...اهلا ليل باشا اتفضلوا
ليل....شكرا...كنت عايز اطمن على حاج محمد ايه اخباره يعني فات اكتر من 24ساعه المفروض كده مرحله الخطر عدت صح
الدكتور....هو احنا نقدر نقول حاليا ان حالته مستقره بس مش معناها انه عدى مرحلت الخطر طبعا حضرتك عارف ان الحادثه كانت جامده وطبعا واحد بصحته وبسنه ده كويس جدا انه لسه عايش الخبطه اللي اتخبطها كسرت اجزاء في جسمه زي الحوض رجله ايده وخبطه جامده في دماغه عملتله ارتجاج وطبعا هو عدي اكتر من 24ساعه ونقدر نطمن لكن هو بردو لسه ما فاقش منعرفش ممكن الحادثه تكون أثرت عليه ازاي
ليل...تقصد ايه يا دكتور هو ممكن يحصله ايه
الدكتور...بص انا مش هقدر اخبي عليك عشان تكون عارف اللي ممكن يحصل طبعا خبطه زي اللي اتخبطها في دماغه وأثرت عالمخ ممكن تسبب عمى ممكن تسبب فقدان ذاكره كسر الحوض ممكن يسبب شلل احنا مش عايزين نسبق الاحداث
نوح ..ايوه يادكتور بس حضرتك قولت ان العمليه نجحت
الدكتور...ده حقيقي بس احنا مهنتنا دي علمتنا نتوقع الاسوء مش معنى ان العمليات نجحت يبقى هو ميحصلوش مضاعفات فنتوقع الاسوء عشان اهل المريض ميتصدموش لو حصل العكس طبعا ده اللي بنتمناه عشان كده قولتلكم منسبقش الاحداث يمكن ربنا يخلف كل توقعاتنا...بس في حاجه عايز ابلغكم بيها
ليل..خير يادكتور
الدكتور...انهرده الصبح الممرضه بلغتني انه فاق طبعا روحت بسرعه وفحصته هو كويس بس راح في غيبوبه طبعا محدش يقدر يحدد معاد انه يفوق منها
ليل...طيب ودي ليها اي تأثير عليه
الدكتور...لا خالص ويمكن دي في صالحه هو عشان الكسور اللي في جسمه والاهم عشان الارتجاج اللي عنده ده محتاج راحه تامه
ليل...ربنا يستر
الدكتور...متقلقش ان شاء الله خير انا عدت عليا حالات يمكن تكون اصعب من كده كمان والحمد لله بقوا زي الفل.
ليل...يارب هنستأذن احنا
الدكتور...اتفضل وانا شويه وهاجي ابص عليه
نوح...تمام بعد اذنك
الدكتور...اتفضلوا
جاسر....ايه الاخبار
نوح...انت جيت امته
جاسر لسه مفيش عشر دقايق المهم طمني
ليل....مفيش طمنا عليه وقال ان مرحله الخطر عدت بس هيفضلوا شغالين معاه بالمنوم عشان ميتألمش
جاسر...طيب الحمد لله
نور....يعني بجد هيبقى كويس
ليل...هيبقى كويس يا نور اطمني
نور...يارب
جاسر...مالك عامل كده ليه
ليل..مفيش بس منمتش حاسس اني فاصل
جاسر....طيب انا شايف اننا الوقت اعدتنا دي مش هتعمل حاجه وملهاش لازمه روحوا ارتاحوا اصلا كلكم باين عليكم التعب وقلة النوم وانا وتمارا هنروح عالميتنج
ليل...انا مش هينفع انا محتاج عشق معايا عايز اتكلم معاها شويه..
عشق....وانا جاهزه
نور...معلش سيبوني انا هنا انا ملحقتش اعد معاه وبعدين انا مش ورايا اي حاجه خلوني معاه
زهره...وانا كمان هأعد مع نور مش هسيبها
ليل....طيب زي ما تحبوا نوح انت وادم وراكو اي حاجه
نوح...لا انا هفضل مع نور وزهره
ليل...وانت يا ادم
ادم....عادي انا كمان مش ورايا اي حاجه هفضل مع نوح والبنات
ليل..تمام هنمشي احنا بقى
جاسر...استنى خدنا معاك عشان نلحق الميتنج
ليل...يلا نوح ادم لو في حاجه بلغوني
ادم...تمام
عشق....سلام يانور خلي بالك من نفسك ومن زهره
نور...حاضر سلام ..
نزل ليل وجاسر وعشق وتمارا ادام العربيات
ليل....خلص الميتنج مع هادي وطمني عملت ايه
جاسر...حاضر اطمن
ليل...يلا سلام
جاسر...سلام
تمارا...سلام يا عشق
عشق...خلي بالك من نفسك
ركب جاسر وتمارا ومشيوا وركبت عشق مع ليل وهي حاسه بالاحراج رغم انها طايره من الفرحه انها راكبه معاه
ليل...كان فاصل خالص وباين عليه الارهاق وشكله عايز ينام فضل ساكت طول الطريق بيشرب في سجاير وبس
فضلت عشق باصه عالطريق وسرحانه فاقت على صوته
ليل....انتي نمتي
عشق....هااا لا
ليل...بكلمك ومش بتردي
عشق...اسفه بس سرحت في الطريق
ليل...طب ايه احنا وصلنا يلا
عشق...حاضر
ليل...استني
عشق....نعم
ليل...اظبطي طرحتك
بصت عشق بتلقائيه عالمرايه لقت شعرها نازل شويه من تحت الطرحه حست انها هتموت من الاحراج وبسرعه دخلت شعرها وظبطت طرحتها وبصتله وهي بتحاول تداري احراجها منه تمام انزل
ليل...تمام يلا
نزلت هي وهو دخلوا في كافيه طلبلها عصير وطلب لنفسه قهوه وولع سيجاره وبصلها هااااا سامعك..
عشق...في الوقت ده ارتباكها بقى اضعاف....فضلت تدعك ايدها في بعض مرعوبه ميصدقهاش لما يعرف ان اللي قالته ده مجرد حلم
ليل...ايه هتفضلي سرحانه ومرتبكه كده
عشق...انا مش مرتبكه
ليل...بسخريه امممم واضح طيب تحبي اسأل انا وانتي تجاوبي
عشق....خدت نفس طويل وهزت راسها ببطئ
ليل... عرفتي ازاي ان في عربيه هتخبط حاج محمد او تمارا
عشق....لا ده سؤال بدري اوي الاجابه عليه
ليل...بس احنا اعدين الوقت مخصوص عشان تجاوبي عليه
عشق...ما انا هجاوب عليه بس قبل ما اجاوب انت نسيت تقريبا تسألني عن حاجات كتير قبله.
ليل...زي ايه...
عشق...يعني زي المكالمه اللي جاتلك في المستشفي بتعرفك حقيقه تمارا او حقيقتنا معاها
ليل...صحيح دي كمان عرفتيها ازاي
عشق...هجاوبك على كل ده بس الاول اهم سؤال اني اعرفك على نفسي
ليل....وانا سامعك
عشق.....انا اسمي عشق احمد الوكيل تمارا وزهره واخدين نفس اسمي الثلاثي احنا ادام الناس وفكل الاوراق اخوات بس الحقيقه اننا مش اخوات.
ليل...مش فاهم
عشق....احنا طول عمرنا اللي فات كنا متربيين في دار ايتام محدش فينا عارف اهله تقدر تقول اننا اترمينا في الشارع من اول يوم جينا فيه الدنيا..لحد بالظبط من شهرين ونص بس خرجنا من الدار...طبعا احنا مكناش حابين نخرج لاننا باختصار منعرفش هنروح فين ولا مين احنا منعرفش غير بعض بس للاسف مديرة الدار كانت مبتحبناش فقررت انها تمشينا مع ان ده مش قانوني المفروض ان احنا اللي نقرر اذا كنا بعد ما تمينا السن القانوني حابين نخرج ولا لا في كتير من العاملين في الدار كانو متربين في الاساس فيه وقرروا انهم يشتغلوا فيه وده اللي احنا كنا ناوييين نعمله بس هي كان ليها رأي تاني وبعد ما بلغتنا ادتنا مهله ساعتين نلم فيهم حاجتنا ونخرج
ليل...ساعتين؟؟
عشق....اه والله العظيم ساعتين احنا عقلنا وقف مفيش مكان مفيش اهل مفيش معارف مفيش فلوس مفيش حاجات كتير اوي بس عشان مظلمهاش هي ادت لكل واحد فينا الفين جنيه لان اغلب التبرعات كانت بتيجي على حسنا احنا ودي كانت مصاريف لجامعتنا وطبعا احنا خرجنا كنا في اجازه نص السنه ويمكن دي افضل حاجه عملتها عشان نلحق نشوف مكان قبل الدراسه..خرجنا من الدار مش عارفين نروح فين وفجأه قررت اوقف تاكسي واروح الحسين..ليه متسألش بس كنت حلمت ان زورته انا وتماره وزهره ويمكن ده اول مكان جه في بالي وقتها لاني شوفته مره وحبيت المكان واتمنيت نروحه سوا فا حبيت احقق الحلم. دورنا كتير على شقق حوالين المكان للاسف كله كان غالي جدااا واحنا كل اللي كان معانا 6الاف جنيه وايجار الشهر في اقل شقه 3الاف او 3ونص يعني نص اللي معانا من غير اكل ومواصلات عشان ندور على شغل..تعبنا من اللف اعدنا عالرصيف ماسكين بعض وبنعيط وكل واحده فينا بتدعي ربنا انه يعدي الوقت بسرعه عشان النهار يطلع..وفضلنا عالوضع ده ونمنا واحنا ساندين على كتف بعض...لحد ما جه بابا او حاج محمد لقانا بنعيط فحاول يساعدنا وطلب مننا اننا نروح معاه وكلم نور ادامنا عشان نصدقه....وبما اننا معندناش بديل من نومة الشارع فا وافقنا ومن هنا بدأت الحكايه
ليل...حكايه ايه
عشق خدت نفس طوييييل وبعدت وشها عنه سرحت الحكايه ان كل اللي حصل كان مجرد حلم وابتدت تحكي كل حرف حصل....في الحلم
عدى وقت طويل وهي بتحكي وليل مركز معاها شويه يسمع عادي وشويه ريأكشانات وشه تتغير مع معلومة عشق تقولها...الصدمه كانت مسيطره عليه تماما
خلصت عشق كلام وبصتله.
ليل...ابتسم واترسمت ضحكه على وشه وهو باصصلها
عشق ..تقريبا شقة الزمالك ده لو في شقه في الحقيقه فعلا فالاكيد اني معرفش عنها اي حاجه بس انا اقدر اوصفهالك
تقريبا حبيبتك انا معرفش عنها اي حاجه مهره مكنتش اعرف عنها اي حاجه مامت جاسر مامتك عمك تفاصيل كتير حتى الميتنج اللي تمارا ومستر جاسر فيه انا معرفش عنه اي تفاصيل بس قولتلك اللي هيحصل فيه قولتلك عالسفر اللي هيسافروه وزي ما قولتلك ان موت بابا لحد الوقت الحاجه اللي محصلتش..
ليل...حط ايده على راسه وهو ماسك السيجاره وفضل باصص عالترابيزه من غير ولا كلمه
عشق....هو انت مصدقني ولا لا
ليل....رفع راسه وبصلها مش مهم اصدقك ولا لا الوقت الاهم ان اللي بتقوليه ده لو بجد تبقى كارثه انا مش عارف اذا كنت مصدقك ولا لا لو على ليل بتاع زمان كان ممكن اصدقك بسهوله لكن ليل اللي اعد ادامك الوقت فاصعب بس المشكله اني مش عارف اكدبك في تفاصيل قولتيها كتير يمكن يكون محدش يعرف عنها حاجه زي علاقتي بريما قولتي حاجات محدش يعرفها غيري انا وهي بس ممكن ارجع واكدبك واقول انك تعرفيها وهي اللي بعتاكي عشان اصدقك وترجعلي...وارجع افتكر لما قولتي عن شقة جاسر ودي تقريبا محدش يعرف مكانها غيري انا ونوح وادم قولتي علي حاجات بتحصل الوقت فالميتنج ودي هعرفها من جاسر لما يخلص وهشوف اتفقوا على ايه..بس ممكن اقول انك تبع هادي...مثلا مش قادر اصدق وجوايا حاجه مش مكدباكي.
والوقت بتقولي ان اللي عملت كده هايدي خطيبه جاسر بتنتقم من تمارا وبتديني رقم العربيه اللي عملت الحادثه بتقولي ان شيري سكرتيرتي هتتفق مع هايدي وريما و سامر هيفضحوا نور ونوح عمي هيتفق معاهم عليا والمفروض ان انتوا هيدخل عليكم شباب البيت وهيتهجموا عليكم
انتي فاهمه انتي قولتي ايه
عشق...اتجمعت الدموع في عينها فاهمه والله العظيم فاهمه ويمكن اكون نفسي اللي بقوله ده يطلع غلط اكتر منك ارتحت لما بابا عاش وعدى النقطه اللي مات فيها في الحلم...بس خايفه باقي الحاجات بتتحقق بالحرف.
ليل...طيب انتي بتقولي انك اشتغلتي عند دكتور ولما جيتي الشركه قولتي انك بتدوري على شغل مع دكتور
عشق...انا يمكن اكون روحت شوفت العياده تاني يوم روحنا فيه مع بابا وعرفت اروحها ولقيتها والدكتور كان طالب حد يشتغل معاه فعلا بس مقدرتش قررت اني افضل اراقبكم واراقب كل حد فيكم عشان امنع عنه كارثه قبل ما تحصل...خوفت انزل اشتغل بس مقدرتش امنع حادثه تمارا لان لو مكانتش حصلت مكنتش هعرف اوصلك ولا انبهك
ليل....هو انا ممكن أسالك
عشق...اتفضل
ليل...انتي حكتيلي حاجات كتير اوي قولتيلي ان جاسر وتمارا هيرتبطوا نور ونوح وزهره وادم حكيتي على كل حد في حياتي وحياتك قولتيلي كل واحد هيعمل ايه ويشتغل ايه بس مقولتليش انتي كنتي بتعملي ايه كنتي ايه في حياتي او حياتهم
انتي مين
عشق...ولا حاجه بعد اللي حصل واتنقلنا شقة الزمالك انت قررت ان كلنا نشتغل معاك في الشركه عشان نكون تحت عينك وتبقى مطمن علينا وبتنفذ وصية بابا.
ليل....بس
عشق....سرحت ثواني وكأنها عمر وكدبت عشق على ليل ومقدرتش تقوله انها كانت بتحبه وان هو حبها مقدرتش تقوله ان اليوم اللي قرر يلبسها فيه دبلته اتقتلت خبت حاجات كتير وقررت انها متقولش اهم حاجه وهي انهم حبوا بعض وسابت كل حاجه تمشي واحده واحده
ليل. سرحتي في ايه..
عشق..ولا حاجه صدقني مفيش غير اللي قوتهولك ويمكن الوقت اللي شاغل بالي هو اني مرعوبه من فكرة ان حد يدخل علينا من الشباب ويتهجموا علينا اللي حصل ده كان بعد سفر تمارا مع مستر جاسر وده قرب اوي فاانا مش هستنى الحلم يتحقق وهطلب منك انك تقنع نور وتاخدنا من الوقت على شقه الزمالك لحد ما بابا يفوق..
سكت ليل...ثواني وهو باصصلها وكأنها ساعات على عشق
وفجأه
ليل....بس انا معنديش يا عشق شقه في الزمالك ولا حتى عندي بيت في اي مكان غير الڤيلا اللي احنا عايشين فيها..🙂🙂👌
عشق....بتقول ايه🥺🥺
ليل..اللي سمعتيه حلمك مش كله بيتحقق يا عشق ده لو حلم فعلا وانتي صادقه...هقولهالك تاني
انا معنديش يا عشق شقه في الزمالك ولا حتى عندي بيت في اي مكان غير الڤيلا اللي احنا عايشين فيها..🙂🙂👌....
الي اللقاء في كارثه جديده 😁😁😁😁 🤭🤭🤭😝😝
 البارت الرابع....والخامس عشق....🖋️🖋️ رجعنا البيت وكل حاجه كانت ماشيه تمام كنت تعبانه اوي بعد ما خد…){kind=link}
تعليقات
إرسال تعليق