 |
دار الايتام
البارت الخامس..والسادس
نزلت هايدي من عربيتها بفزع جريت على تمارا بعد ما الناس اتلمت
احد الماره بغضب مش تخلي بالك
هايدي..والله هي اللي طلعت ادامي مره واحده
احد من الماره اسعاف بسرعه
هايدي..هاتها العربيه انا هوديها المستشفي
ساعدوها الناس وركبوها بسرعه وادو لهايدي شنطت وتليفون تمارا
ركبت عربيتها وساقت بسرعه على المستشفي.
واتصلت بجاسركان لسه فالشركه اعد مع ليل ونوح وادم وعم محمد
حاج محمد اتفضل بقي ياليل يا ابني الورق ده معايا من الصبح
ليل عملت ايه صحيح انهرده طول اليوم مشغول وكان في كذا اجتماع مفضتش خالص
حاج محمد.كله تمام سجلت الورق خلاص في اي حاجه تانيه عايزها مني
ليل... تسلملي يا راجل ياطيب انا بس كنت عايزك بكره تروح لعمي الشركه في ورق مهم عايزك تجيبه منه
حاج محمد عيني حاضر اجيبه الصبح قبل ما اجي ولا عايزه امته
ليل. لا انا محتاجه الصبح ضروري عشان نوح هيخلص بكره صفقه واحتمال يسافر
حاج محمد ماشي يا ابني
فاللحظه دي رن تليفون جاسر وعم محمد مع بعض
ابتسمو لبعض
نوح بضحك ايه السنترال اللي احنا اعدين فيه ده
حاج محمد هستأذنكم ارد على اخره صبري
جاسر وانا هرد على هايدي
حاج محمد ايوه يانور
جاسر ايوه ياهايدي
حاج محمد ايه بتقولي ايه
جاسر ايه انتي كويسه طيب
ليل وادم ونوح بيبصو لبعض باستغراب
جاسر طيب انتي فين انا جايلك حالا
حاج محمد طيب اقفلي يانور اقفلي وانا هاجي
نوح.بتهريج هو غريبه ان يجي تليفون في نفس الوقت ماشي صدفه بس يجي فالاتصال مصيبه دي استحاله تكون صدفه
ليل.بصله بغضب
نوح.سكت يابوص
ليل في حاجه ولا ايه
جاسر انا لازم امشي الوقت هايدي عملت حادثه
ليل.هي كويسه
جاسر...اه كويسه بس خبطت حد انا مش فاهم منها هروحلها بسرعه
ليل..هبقي اكلمك
جاسر..ماشي يلا سلام
حاج..محمد معلش يا ليل يا ابني انا كمان لازم امشي
ليل في ايه يا حاج محمد
حاج محمد والله ما انا عارف بس نور بتقول ان تمارا كانت بتكلمها وفجأه صوتت وسمعت صوت فرامل ربنا يستر ومتكنش عملت حادثه
ليل..تمارا مين
حاج محمد بتوتر ملحوظ جدا
دي دي واحده قريبتنا يعني موضوع طويل
ليل طيب مش محتاج حاجه
حاج محمد لا شكرا يا ابني بعد اذنكم
خرج بسرعه من المكتب
اما نوح فا فضل مركز عالباب ورجع بصلهم هو في ايه
ادم..انا لا عارف ولا فاهم
نوح..هو انا ليه حاسس بحاجه غريبه يعني يجيلهم تليفون مع بعض وفجأه اللاتنين يجلهم خبر مش حلو وجاسر بيقول هايدي عملت حادثه وعم محمد يقول قريبته عملت حادثه وبعدين غريب رد فعل حاج محمد اوي هو ليه ارتبك واتلغبط كده ومين تمارا قريبته دي احنا طول عمرنا عارفين ان حاج محمد ملوش حد غير بنته وتقريبا محدش بيجيله
ادم.انا كمان مستغرب ولا ايه ياليل
ليل بشرود مش عارف هي الصدفه مش حاجه غريبه اوي بالنسبالي عادي بتحصل يعني ممكن فعلا تكون صدفه بس اللي لفت نظري فعلا ان حاج محمد ليه قرايب وبيجوله وقلقان عليهم كده انا اعرف حاج محمد من يوم ما اتولدت واول مره من 32سنه اعرف انه ليه قرايب انا عارف انهم فالبلد بتاعتهم بس تقريبا منقطعين عن بعض نهائي اول مره اعرف ان ليه حد وبيجي وبيزورهم وارتباكه لوحده من سؤالي ليه خلاني مستغرب اكتر.
ادم..فعلا عندك حق رد فعله غريب
نوح..يعني انا صح عم محمد طلع جاسوس وجاسر شكله معاه.
ليل. يا ابني تفكيرك علي طول تفكير عصابات كده انا ولا شاغلني الصدفه دي عشان هي اكيد صدفه بس انا بتكلم علي نقطه قرايبه وارتباكه حاسس ان في حاجه غير كده او في مشكله عند بنته فهمتني ياللي تموت فالمصايب
ادم...وهو بيشاور لليل طب قابل بقي ياعم اهو حاج محمد نسي شنطته بتاعت الشغل والورق اللي كان هيوديه لعمك
ليل.الله كملت وبص لنوح
نوح...ايه بتبصلي كده ليه اوعي تقولي خد الورق وديه الصبح لعمك
ليل..لا والله مش هقولك كده
نوح..امال
ليل...انت زي الشاطر كده هتروح الوقت لحاج محمد تديله شنطته وتديله الورق
نوح..نعمم اشمعني انا
ليل...ماهو ياحضرتك تروح الوقت يا تروح زي الشاطر الصبح بدري تديه لعمك.
نوح..طب ادم يروح.
ليل...ادم وجاسر من الصبح وهما معايا في اجتماعات وشغل بره حضرتك انهرده باشا.
نوح..حرام عليك يا ليل عايزني اروح الخان وسط الزحمه بام العربيه اللي مبصوصلي فيها دي
ليل..بضحك ليه ماهي ماشيه تمام.
نوح..اهي عنيكم دي اللي هتجبني ورا...
ليل...طب يلا اتكل انت روح علي طول عشان الوقت ميتأخرش عن كده
نوح...استني صحيح اروح فين هو مش قال لبنته انه رايحلها عشان يروح لقريبته يعني هو اكيد مش فالبيت
ليل... لا هتلاقيه فالبيت اكيد انا اصلا مش مقتنع بحوار قريبته ده اكيد في حاجه غلط يمكن بنته عندها مشكله يمكن اي حاجه بس حوار انه ليه واحده قريبته ده لا
نوح...طيب يا سيدي هات ام الشنطه والورق ده يارب نخلص
ليل... انجز عشان لسانك ده متزعلش عليه
نوح...لا وعلي ايه يلا سلام
ادم..وليل سلام
وصلت هايدي اخيرا المستشفي. ساعدوها بسرعه الممرضين ودخلوها الطوارئ عشان يتم الكشف عليها
فضلت هايدي واقفه بره
مر وقت بسيط وكل ده تمارا مخرجتش وصل جاسر لهايدي
جاسر..هايدي
هايدي.جريت عليه الحقني ياجاسر
جاسر..متخافيش انتي كويسه
هايدي.ايوه انا كويسه بس البنت اللي خبطتها خايفه يكون جرالها حاجه دي مش بتفوق
جاسر..هو اي اللي حصل
هايدي..انا سايقه فجأه لقتها طلعت ادامي وملحقتش افاديها بس خبطت فيها هي مش خبطه جامده والله انا متأكده بس هي مغم عليها من ساعتها
جاسر طيب اهدي ياحبيبي ان شاء الله الوقت الدكتور يطمنا
اما عند حاج محمد وصل البيت
حاج محمد نور يانور
نور ايوه يابابا
حاج محمد ايه يابنتي مجتش
نور بدموع لا يابابا وبحاول اكلمها موبايلها مقفول
حاج محمد خبط ايده في بعض طيب هي لما كلمتك مقالتلكيش هي فين
فاللحظه دي كانت طلعت زهره
زهره السلام عليكم في ايه واقفين كده ليه عالباب مالك يانور بتعيطي ليه في حاجه حصلت
نور..تمارا يازهره
زهره بخوف.مالها تمارا
نور...حكتلها اللي حصل
زهره..ايه انتي بتقولي ايه
حاج محمد يابنتي اهدي ان شاء الله محصلش حاجه اتفائلو خير
زهره دي تليفونها مقفول
نور...انا جربت كتير وللاسف مقفول
زهره..الكلام ده حصل من امته
نور..من ساعه تقريبا
حاج محمد طيب قالتلك كانت فين يابنتي عشان اروح ادور عليها فالمكان او اسأل اي حد
نور... مقالتش يابابا بس واضح انها مكنتش بعيد اوي
حاج محمد طيب انا رايح ادور عليها
زهره..انا جايه معاك.
حاج محمد لا خليكي هنا مع نور يمكن ترجع وعشان عشق كمان
زهره... لاانا جايه يعني جايه مش هقدر اعد وانا قلقانه عليها
نور انا كمان هاجي معاكم
حاج محمد لا طبعا انتي هتفضلي هنا عشان لو حد رجع يلا يازهره يابنتي
نزلت زهره وحاج محمد. وكلمت زهره عشق وهي منهاره تقولها
عشق.. بخوف بس حاولت تكون هاديه عشان تطمن زهره متخافيش يازهره ان شاء الله خير انا خرجت من الشغل وهبقي معاكم عالتليفون جيالكم
زهره متتأخريش.
عشق..حاضر يلا سلام انا جيالكم حالا
حاج محمد ليه يابنتي قلقتيها وهي فالشارع كده
زهره..انا خايفه علي تمارا يابابا
حاج محمد والله قلبي بيقولي انها كويسه
زهره يارب
مر وقت وخرج الدكتور من عند تمارا
جاسر وهايدي جريوا عليه
جاسر. خير يادكتور
الدكتور...خير اطمنو الحمد لله الحاله بسيطه
عندها شرخ في ايدها بسيط عملنلها جبيره وتقدر تفكها بعد اسبوعين تكون اتحسنت
جاسر طيب هي فاقت
الدكتور فاقت بس كان عندها ضيق تنفس حطناها علي جهاز الاكسچين وان شاء الله نص ساعه او ساعه بالكتير تقدر تروح
جاسر. يعني مفيش اي حاجه خطر
الدكتور..لا خالص اطمنو
جاسر..طيب نقدر نطمن عليها
الدكتور..ايوه طبعا اتفضلو
خبط جاسر براحه ودخل كانت تمارا نايمه علي السرير ولسه مش فايقه اوي حاسه بصداع وجسمها واجعها من الوقعه وايدها فيها الم وكانو فكنلها الطرحه بعد ما دخلت عشان ضيق التنفس كان شعرها مكشوف كان مفرود علي المخده بطريقه مغريه ورغم ان عيونها باين عليها التعب لكن لونها العسلي كان محتفظ بجاذبيته
دخل جاسر وهايدي تمارا مكانتش واخده بالها وفدنيا تانيه
جاسر..وقف بلم من الجمال اللي ادامه
وقطع شروده وشرود تمارا هايدي
هايدي انتي كويسه
رفعت تمارا عيونها ليهم واول ما لمحت جاسر اتخضت وقامت بلهفه تاخد طرحتها من فوق المخده بسرعه وحطتها بطريقه عشوائيه خلت شكلها احلي واجمل شعرها نازل من جمب الطرحه وهي بتحاول تداريه.
كل ده تحت زهول جاسر
تمارا..انا انا كويسه انتو مين
جاسر.. اسف اننا دخلنا كده بس انا خبطت قبل ما ندخل
تمارا حصل خير انا مكنتش سامعه
هايدي بسماجه ما انتي كويسه اهو وبتتكلمي امال وقعتي قلبي ليه وعطلتيني عالفاضي
تمارا.. بصتلها باستغراب
انتي اللي خبطتيني ولا الاستاذ
هايدي.. انا اللي خبطك بس دي غلطتك انتي اللي ظهرتي ادامي من غير ما تبصي وكنتي بتتكلمي فالموبايل شكلك لسه متعلمه المشي جديد وبعدين لو حياتك مش مهمه عندك يبقي عالاقل متأذيش حد انا بسبب اهمالك كان ممكن اروح في داهيه
جاسر..اضايق من طريقه هايدي هاايدي خلاص
هايدي هو ايه اللي خلاص هي اللي غلطانه مش انا وهي ادامك اهي بسبع ارواح مخدتش منها غير رعب وعطله وبس
جاسر..قولتلك خلاص
تمارا..بجرأه انتي تعرفي طول عمري اسمع عن كلمه بجح عمري ماعرفت معناها غير الوقت انتي فعلا بجحه يعني انتي اللي خبطاني وكسرتي دراعي وكمان زعلانه عشان عطلت سعادتك عن مشوارك.
هايدي انتي قليله الادب
تمارا..انا مش هرد عليكي عشان انا لو رديت ردي مش هيعجبك ومش بعيد اخليهم يجبولك سرير جمبي هنا من اللي هعمله فيكي
كل ده بيحصل تحت نظرات جاسر اللي واقف ساكت ومتابع ومعجب بطريقه تمارا رغم مظهرها اللي باين عليه البساطه إلا انها جريئه
هايدي..انتي اتجننتي مش عارفه بتكلمي مين
تمارا..لا مش عارفه ومحبش اني اعرف
هايدي..مش عارفه عشان جاهله وبعدين الاشكال اللي زيك هتعرف اللي زيي انا ازاي انتي مش شايفه منظرك عامل ازاي
جاسر...بغضب هايدي قولتلك خلاص
تمارا..سبها يا استاذ بس هي واضح انها هي اللي مش شايفه بتتكلم مع مين وبعدين منظري ومنظرك ايه اكيد مفيش مقارنه وميشرفنيش اني اتحط مع واحده زيك في مقارنه منظري ده اللي مش عاجبك عاجبني جدا كفايه اني مش بغضب ربنا وساتره نفسي دوريلك علي مرايه ياشاطره وشوفي جسمك اللي باين من كل مكان
هايدي..انتي واحده مش محترمه وديني انا هوريكي انا هعمل فيكي ايه
تمارا..بابتسامه اعلى مافي خيلك اركبيه.
جاسر..بغضب وتحول خوف تمارا وهايدي انا قولت خلاااااص خلصت
هايدي..فعلا خلصت انا ماشيه
جاسر..راحه فين
هايدي... راحه لصحابي اللي اتأخرت عليهم بسبب البتاعه دي
جاسر.. احسن بردو يلا روحي
هايدي. متقلقيش هخلص سهرتي وافوقلك انا هوريكي مقامك وادت لجاسر موبايلها وشنطتها اتفضلل بتوعها
تمارا بسخريه ماشي منتظراكي يلا روحي عشان تلحقي نمرتك
كتم جاسر ضحكته
هايدي بغضب زباله
تمارا... ببرود من بعض ما عندكم
مشيت هايدي وفضل جاسر باصص لتمارا بغموض
تمارا..ايه بتبصلي كده ليه على فكره بقي هي اللي مستفزه
جاسر.. ياراجل لا وانتي الشهاده لله ملاك
تمارا..طبعا لازم تدافعلها مش اختك ولا قريبتك
جاسر..دي خطيبتي
تمارا..حتي لو خطيبتك هي اللي غلطت وصدقني انا كلمه زياده كنت هخليك تترحم عليها بس احترمت وجودك.
فضل جاسر يضحك
تمارا..هو انت بتضحك على ايه
جاسر..علي احترمت وجودك دي حلوه عجبتني طب انا راضي زمتك انتي احترمتي وجودي امال لو ماحترمتيش وجودي كنتي عملتي فيها ايه
تمارا..والله العظيم احترمت وجودك وكان فاضلي ثواني واقوم اقتلها
جاسر..خلاص ياستي قلبك ابيض اهي مشيت خلاص
تمارا...ممكن سؤال
جاسر...اتفضلي
تمارا...هو انا ليه حاسه انك مش مضايق اني روقتلك خطيبتك
جاسر.. بضحك لا مين قال كده بس يعني عادي انتي مخبوطه بالعربيه فاكفايه عليكي التعب
تمارا...اممم ماشي
ممكن تديني شنطتي وموبايلي.
جاسر...اتفضلي
تمارا... هو انا المفروض امشي امته
جاسر..لو قادره تقومي ممكن الوقت لو حبيتي
تمارا..ايوه ياريت عشان بابا واخواتي زمانهم قلقانين عليا
جاسر... طب اتفضلي معايا انا ممكن اوصلك
تمارا لا لا انا همشي لوحدي انا كويسه
جاسر..مش هينفع تروحي لوحدك
تمارا لا شكرا انا كويسه
جاسر.برفعه حاجب اسمعي الكلام مش هينفع تروحي لوحدك
تمارا بعند قولت لحضرتك شكرا مبركبش مع حد غريب ممكن بس تناديلي الممرضه او الدكتور عشان اعرف حساب المستشفي
جاسر.الحساب اتدفع خلاص
تمارا...هو ايه اللي ادفع انا محدش يدفعلي حاجه انت تدفعلي بتاع ايه اصلا
بصلها جاسر بصدمه من لسانها
تمارا. عرفني الحساب كام من فضلك.
جاسر...ششش ايه انتي اتسحبتي من لسانك وانتي صغيره وبعدين ادفعلك حساب بتاع ايه لان الغلطه من خطيبتي مش غلطتك ومتجادليش كتير عشان مش هاخد حساب حاجه ويلا عشان متتأخريش على اهلك
تمارا..شكرا.
جاسر...العفو مش هوصلك برده.
تمارا..بغضب قولت لا
جاسر...طب يلا حتي اوقفلك تاكسي..واظن دي مفهاش حاجه
تمارا..ماشي
خرج.جاسر وتمارا وقفلها تاكسي شكرته ومشي التاكسي وفضل جاسر باصص بغموض عليها
اما عند نور فضلت راحه جايه فالشقه من كتر القلق وكل شويه تكلم والدها و عشق و زهره
وفجأه الباب خبط
نور كانت لابسه فستان بيتي قصير باللون الروز ورافعه شعرها ذيل حصان كان شكلها جميل وجذاب اول ماسمعت الباب جريت بسرعه ومن غير ماتسأل مين جريت فتحت
واول ما فتحت وقفت كأنها اتكهربت لما شافت نوح ادامها ومن صدمتها معرفتش تتكلم ولا حتي جريت تلبس
نور بتحب نوح جدا بس عارفه ان ده حلم مستحيل توصله هو عارفها وشافها كذا مره بس نور متابعه كل حاجه تخصه وكل حاجه والدها بيحكيهالها هي مش بتشوفه غير صدفه كل مده كبيره بس بتحبه جداا
نوح..انا اسف يا انسه نور اني جيت من غير معاد
نور...ساكته
نوح....انتي كويسه
نور...ساكته
نوح..بقلق هو في ايه فين عم محمد
نور...لسه ساكته
نوح...بمرح طب هو في حد اتقتل جوه
نور...ساكته
نوح...نووووور
فاقت نور علي صوته عاااااااااااا وصوتت وطلعت تجري على اوضتها وسط زهول نوح
ثواني وخرجت بسرعه وهي لابسه الاسدال بتاعها وباين عليها الاحراج ووشها محمر ومش عارفه تقول ايه
نوح.هو في ايه وفين عم محمد
نور..بابا مش هنا راح لتمارا
نوح...تمارا مين
نور..قريبتنا هو حضرتك جاي بنفسك ليه هو في حاجه
نوح..انا مش عارف اه صح وخبط علي جبهته اصل عم محمد نسي شنطتي
نور باستغراب شنطتك
نوح...بضحك اقصد شنطته لغبطيني عم محمد نسي شنطته والورق اللي المفروض يوديه الشركه التانيه الصبح
نور.. وهي بتضحك عليه انا اسفه اني لغبطتك
نوح..وهو مبتسم على ضحكتها ياستي ولا يهمك المهم اديهم لعم محمد لما يجي ضروري
نور..حاضر
نوح..بعد اذنك
نور..اتفضل
نوح..اداها ضهره وخد خطوه ووقف وبصلها تاني وقرب تاني عندها
نور..في حاجه تاني
نوح..مره تانيه متفتحيش من غير ماتعرفي مين اللي بره عشان متخرجيش بالمنظر ده تاني
نور. اتصدمت نور وسكتت
نوح..ماشي
نور....هزتله دماغها من غير ولا كلمه
ابتسم نوح يلا ادخلي واقفلي
اول ما خلص جملته كانت نور قفلت في وشه.
نوح..يابنت المجنونه
نزل نوح روح
عدي حوالي نص ساعه
وصلت تمارا البيت
نور..مين
تمارا..بتعب افتحي يانور انا تمارا
نور....تمارا ايه ده يانهار اسود ايه اللي حصلك انتي كويسه
تمارا دخليني بس
دخلت تمارا واعدت بتعب فين بابا وعشق وزهره
نور..بيدورو عليكي استني اكلمهم.
تمارا...اه والنبي احسن موبايلي فصل ولا باظ مش عارفه
كلمتهم نور طمنتهم وقفلت معاهم بعد ما قالولها انهم راجعين حالا
نور...ايه اللي حصلك
تمارا..لا استني عليا لما يجو مش قادره احكي ميت مره.
عدى وقت ورجع الحاج محمد وعشق وزهره اللي اول ما شافوها جريو عليها وفضلو يعيطو
تمارا.. بس بقي في ايه انا كويسه والله
حاج محمد نشفتي دمي يا بنتي ايه اللي حصل
حكتلهم تمارا كل اللي حصل
عشق..الحمد لله انها جت على اد كده
حاج محمد الحمد لله يابنتي طب حاسه بأي حاجه
تمارا..لا والله انا احسن كتير
زهره.كنت هتجنن عليكي
تمارا خدتها في حضنها ولله انا بخير بس تليفوني فصل وللاسف مش حافظه اي رقم كنت كلمتكم
حاج محمد الحمدلله يابنتي انك بخير
دار الايتام
البارت السادس
حاج محمد..قومي يانور حضريلنا العشا
نور..حاضر يابابا اه صحيح أتفضل الشنطه بتاعتك والورق ده حضرتك نسيته فالشركه
حاج محمد ايوه صح انا مشيت ونسيت خالص الشنطه من لخمتي بس جبتيه ازاي ده
نور..بلخمه فالكلام اه ماهو اصل نوح جابهولك هنا قال يعني عشان الورق اللي حضرتك هتوديه الشركه التانيه بكره.
حاج..محمد ياخبر جه كل المشوار ده طب لما سألك عليا قولتيله ايه
نور..قولتله انك مع واحده قريبتنا بس صحيح ازاي رايح الشركه بكره وحضرتك اجازه
حاج..محمد ايوه صح تصدقي نسيت وشكل ليل كمان نسي هو كمان قالي بكره
عشق..طب كلمه اكد عليه
حاج..محمد صح هكلمه المهم يلا قومو غيرو هدومكم وحضرولنا العشا لحد ما اكلم ليل
نور..ماشي يابابا دخلت نور تحضر العشا..ودخلو البنات يغيرو هدومهم ورجعو يساعدو نور
حاج محمد..الوو
ليل..ايوه ياحاج محمد
حاج محمد..معلش يا ابني اني بتصل بيك
ليل..لايا راجل ياطيب انت تتصل اي وقت خير
الحاج محمد...انت يا ابني بتقولي اودي الورق بكره لسراج باشا هو مش المفروض بكره الجمعه اجازه ولا تقصد اوديهمله الڤيلا معلش انا مركزتش غير الوقت
ليل..والله ولا انا ركزت فعلا بكره اجازه خلاص يبقي السبت
حاج محمد..ماشي يا ابني
ليل..صحيح قريبتك اللي عملت حادثه بخير لو محتاج حاجه يعني
حاج محمد..بتقفيل فالكلام لا يا ابني شكرا كله تمام الحمد لله تسلم يا ليل يا ابني يلا مش هعطلك بقي
ليل..رفع حواجبه باستغراب ماشي يا راجل ياطيب تصبح على خير
حاج محمد..وانت من اهل الخير
قفل ليل وهو سرحان
ادم..في ايه
ليل..والله ما انا عارف بس في حاجه مش مظبوطه
ادم..ياعم عادي بكره كله يبان المهم ايه مش هنخرج ولا ايه
ليل..انا طالع البس لحد ما نوح يخلص وكلم جاسر قوله يجلنا على هناك لو خلص
ادم..تمام
مر حوالي ساعه راحوا المكان اللي بيسهرو فيه وجاسر كان حصلهم على هناك
ليل..ايه ياجاسر خير ايه اللي حصل
جاسر..مفيش خبطت بنت بالعربيه
ادم..البنت حصلها حاجه
جاسر..لا شرخ بسيط في دراعها
نوح..مش غريبه ان الوقت اللي هايدي تكلمك فيه وتقولك عملت حادثه عم محمد نور تكلمه وتقوله قريبتهم عملت حادثه
جاسر..باستغراب عم محمد وقريبته طب ازاي هو عم محمد ليه قرايب
ليل..مانا مستغرب
جاسر..غريبه طب قالكم ايه
ليل..ولا حاجه بيقول ان بنته كلمته وقالتله ان قريبتهم عملت حادثه واستأذن ومشي ونسي شنطته والورق اللي هيوديه لعمي نوح راحله وفعلا مش لقاه ولما سأل نور عنه قالتله نفس الكلام وبعدها كلمني يسألني هيودي الورق بكره ازاي عشان اجازه لما سألته تاني عن قريبته قفل فالكلام وقفل بسرعه انا اللي مستغربه فالحوار كله ان عم محمد ليه قرايب وتوتره غريب
جاسر..غريبه فعلا عموما اكيد هنعرف
ليل..ياسيدي ولا منعرفش بقولكم ايه قفلو عالحوار ده يمكن فعلا يكون حد من قرايبه جم واعد معاهم عادي يعني
ليل... قفل معاهم الكلام وحسسهم انه مش في باله بس كان باله مشغول ومش عارف ايه السبب وابتدت سهرتهم
.....
تمارا ..الحمد الله تسلم ايدك يانور
نور..الله يسلمك ياعشق بالف هنا
حاج محمد..لتمارا ايه يابنتي احسن الوقت
تمارا..بحزن اه يابابا الحمد لله
حاج محمد..مالك يابنتي
تمارا..مفيش انا كويسه
الحاج محمد..كويسه ايه انتي شكلك مضايق
تمارا..تعبت من كتر اللف عالشغل مش لاقيه حاجه كويسه اما الفلوس قليله جدا على المواصلات او صاحب المكان مش مريح او اروح مكان يطلب شهاده وانا لسه بدرس او اروح مكان ويوافقو ويطلع الشغل في فرع تاني بعيد مش عارفه اعمل ايه حاسه انها عماله تتقفل
حاج محمد..يابنتي متفقديش الامل لسه ربنا مبعتلكيش رزقك
عشق...بابا عنده حق يا تمارا وكل الشغل اللي شوفتيه ومتوفقتيش فيه اكيد ده سبب من عند ربنا مش يمكن مش فيهم خير ليكي
تمارا...انا عارفه والله بس تعبت ومحتاجه احس اني استقريت
حاج محمد..يابنتي انتو بقالكم معانا حوالي شهر تقريبا اوشهر ونص يعني لسه الدنيا بتبدي تمشي معاكم وبعدين اغلب الناس مش لاقيين شغل يعني متستعجليش اكيد هيجيلك الشغل المناسب
نور..انا عندي فكره بس معرفش هتنفع ولا لا
حاج محمد..فكرت ايه
نور..تحاول تشوفلها شغل مع مستر ليل
تمارا..بفرحه ايه ده الله ينفع ياريت
حاج محمد..هي فكره بس مش عارف ليل مبيشغلش حد معاه غير لما بيعرف اصله من فصله وانا قايله انهرده ان اللي عملت الحادثه قريبتنا واخاف يدور وراها
نور..وانا كمان لما نوح جه قولتله كده
عشق..طيب مش حضرتك بتقول انك تعرفه من زمان وحضرتك اللي مربيه وشغال معاه من ايام بباه يعني اكيد بيثق فيك ولو قولتله انها قريبتك مش هيدور وراها
حاج محمد..يابنتي اللي بتقوليه ده صح بس ليل مش سهل زي مانتي فاكره ليل عنده الشغل شغل والقوانين بتاعته تمشي علي اي حد طب ده شغال معاه اخوه وابن خالته وابن عمه وعمه نفسه كلهم بيعملوله الف حساب وهما عارفين انه فالشغل شخص تاني يعني لو حصل وحد فيهم غلط مبيرحمش وبيتعمله إنذار زيه زي اي موظف
عشق..للدرجادي
حاج محمد..واكتر من كده
زهره..يعني من الاخر معندوش ياما ارحميني وبعدين ده باين من اسمه
عشق..صحيح يابابا ايه حكايه اسمه دي حضرتك قولت هتقولنا عليها
حاج محمد..ايوه صح عزام باشا والد ليل..اتجوز من مدام سهام واعدو فتره حوالي 3سنين من غير خلفه كانت مدام سهام بتحمل وللاسف الحمل مكنش بيأعد اسابيع وينزل وفمره حملت كانت المره الرابعه الدكتور قالهم انها مينفعش تتحرك خالص عشان الجنين يثبت وتفضل كده طول ال9شهور خصوصا ان دي المره الرابعه ينزل فيها الطفل سمعت الكلام وفضلت نايمه عدي اسبوع اتنين شهر اتنين وهي محافظه ومش بتتنقل من السرير فيوم صحيت من النوم حاسه بوجع جامد قام عزام باشا عشان يوديها المستشفي بسرعه وقبل ما يخرجو من البيت كان الطفل نزل انهارت وهو كمان كان حزين واعدت فتره مكتئبه وحست ان خلاص فرصتها فالحمل صعبه عدي حوالي 6شهور عزام باشا فيوم حلم انه بيصلي فالمسجد وشايف شيخ اعد لابس ابيض بيقرا قرأن وبيقول
((هو الذي جعل لكم الليل لتسكنوا فيه))
وفضل الشيخ يقول الايه دي بس ومش بيكمل القرآن خلص صلاه وفضل باصص علي الشيخ عايز يعرف هو ليه مش بيكمل صحي من النوم كان آذان الفجر بيأذن قام صلي ومحطش في باله..عده كام يوم وحلم تاني ان السما بتمطر وسامع صوت جاي من السماء مسمع الدنيا كأن في ميكرفون شغال في السما بيقول
بيقول نفس الايه
((هو الذي جعل لكم الليل لتسكنوا فيه))
وايه تانيه بتترد
(((والفجر وليال عشر)))
واخر الحلم شاف مدام سهام جايه من بعيد مبتسمه وباين علي بطنها انها حامل صحي من النوم علي صوت مدام سهام..بتبشره انها حامل وطايره من الفرح
حكالها الرؤيتين..وقالها لو جه ولد هنسميه ليل ولو جات بنت هنسميها فجر
وفضل يعدي شهر ورا شهر لحد ما الحمل كمل وعرفو انه ولد وولدت بالسلامه وفعلا سموه ليل
بس هي دي كل الحكايه
زهره..بس اسمه حلو جدا ومش منتشر
نور..تصدقو اني اول مره اعرف معني اسمه ماتقولنا بقي ياحاج بالمره نوح مين سماه
حاج محمد لا انتي شكلك رايقه انا هقوم انام عشان مش قادر
نور..ماتخليك شويه يابابا
حاج محمد..والله ما قادر انا جيت من الشغل علي ملا وشي وحاسس بصداع
عشق..خلاص ادخل ارتاح يابابا
حاج محمد..المهم ياتمارا مش عايزك تقلقي بصي انا هحاول اقوله وزي ماتيجي تيجي بس مش الوقت استني بس تفكي اللي في ايدك دي وتبقي كويسه عشان لو وافق وطلب يشوفك تكوني جاهزه للشغل
تمارا..بجد يابابا
حاج محمد..اه والله
تمارا..طيب هو لو مفيش ادامنا غير انه يعرف حكايتي لو عرف مش هيوافق
حاج محمد..بالعكس ليل مش كده بس انا اللي مش عايز اي حد مهما كان مين يستغل حياتكم
تمارا..ان شاء الله خير
حاج محمد..ان شاء الله اول ما تشدي حيلك بقي انا هفاتحه علي طول
تمارا..ماشي يا احلي بابا فالدنيا
حاج محمد..تصبحو علي خير يابنات
وحضرتك من اهل الخير
دخل عم محمد ينام ودخل البنات اوضتهم وفضلو يرغو شويه
تمارا..نور هو انتي مش مرتبطه بحد
نور..بمرح انا لا بس نفسي
تمارا..والله انا اللي نفسي
عشق..اتلمي يابت انتي وهي حرام على فكره
نور..هو ايه اللي حرام الحب
عشق..لاطبعا الحب مش حرام انا بس الارتباط عموما وانك تكلمي راجل وتخرجي معاه تسمحيلو انه يكون قريب منك يمسك ايدك يلمسك كل دي حجات حرام
نور..انا معاكي ان حرام اسمح لراجل يلمسني او يمسك ايدي بس ازاي هحب راجل من غير ما اكون اعرفه او اتكلم معاه
عشق..مقصدتش حرام بالمعني بس بردو مش معناه اننا اول مانعجب بحد نخرج ونتكلم والكلام ده في حب نضيف بجد واكيد الحب بيجي بعد الجواز الاهم من كل ده انه يكون بني ادم محترم بيتقي الله
نور..بصي هو انتي كلامك صح بس بصراحه انا استحاله اتجوز من غير ما احب
تمارا..وانا كمان مش متخيله اني اتجوز واحد وبعد كده افكر احبه انا ان مكنتش احبه قبلها استحاله اتجوزه
زهره..بصو هي عشق بتتكلم من ناحيه الدين انه شرعا حرام بس على فكره انا كمان استحاله ارتبط بحد وابني حياه من غير مااكون حباه لاني مش هقدر اعيش معاه وبعدين انا ايه ضمني اني احبه بعد الجواز مش يمكن اكتشف انه شخص وحش
عشق..امال هما عملو الخطوبه ليه ماهو عشان تعرفي شخصيته ويعرف شخصيتك ولو مفيش قبول اكيد مش هتكملو القبول بدايه الحب وبعدين مش كل الرجاله كويسه تضمني منين ان اللي ترتبطي بيه وتفضلي تكلميه يطلع راجل ومحترم اكيد فالاخر هتضطري تسبيه وتبقي غضبتي ربنا بمعرفتك براجل مبيربطكيش بيه اي حاجه ووقتها الموضوع هيبقي بالنسبالك عادي واللي يخليكي تعرفي راجل هيخليكي تعرفي اتنين وتلاته وعشره وصورتك ادام الناس اللي كل شويه يشفوكي مع حد هتتهز وسمعتك تبقي فالارض حتي لو انتي محترمه وبتحافظي علي نفسك بجد الناس مش هترحمك الناس ملهاش غير الظاهر يابنات
نور..طيب و تضمني منين ان حتي لو في خطوبه انك تقدري تعرفي كل حاجه عنه الرجاله مبتبنش غير الكويس وبس وبعد كده بتعرفي الشخص علي حقيقته ساعتها لو شخصيته معجبتكيش هتضطري تعملي حاجه من الاتنين يااما هتكملي وتقولي ده نصيبي واعيش وخلاص خصوصا لو في اولاد بينكم او هتطلقي وتبقي حصلتي على لقب مطلقه وبردو ساعتها الناس مش هترحمك لان المطلقه في مجتمعنا الناس بيبصولها بنظره تانيه
تمارا..فعلا نور عندها حق الراجل بيقدر يعرفك بس اللي هو عايزك تعرفيه ولما بتتجوزو بتكتشفي شخص تاني خالص غير اللي انتي كنتي تعرفيه
نور..وبعدين ياعشق يعني معني كلامك ده انك من اول عريس يتقدملك هتوافقي عليه وتقولي هحبه بعد الجواز
عشق..مش شرط يانور ماانا ممكن حد يتقدملي ومن قبل ما اعد معاه او أتخطبله اقفل منه او احس اني قلبي مقبوض او جوايا رفض من ناحيته وممكن شخص تشوفيه تحسي انك متقبلاه مبدأيا وتدي لنفسك فرصه تأعدي معاه وفالاعده دي بتحددي انك ممكن تديله فرصه انك تتخطبيله او لا ولو وافقتي عالخطوبه فالفتره دي اكيد بيحصل بينكم مواقف تبين اذا كان هو ده الشخص اللي تكملي معاه حياتك او لا واكيد ربنا مش هيخذلك زي مانتي حافظتي علي نفسك ومخذلتيهوش
زهره..يعني ياعشق انتي مش ممكن تحبي او تتعلقي بشخص او حتي تعجبي بحد
عشق...بصو انا مش عارفه انا اولا عمري ماحصل اني اعجبت بحد اواتشديت لحد لاني ديما خايفه اغضب ربنا ويمكن بردو اكون ملاقتش الشخص ده خصوصا ان انا متعاملتش مع ولاد الدار بتاعتنا كانت بنات حتي المدارس ويوم ماابتديت احتك بالولاد كان فالجامعه وطبعا ده استحاله لان كلهم طلاب ومن سني يعني لسه صغيرين بيتصرف عليهم وميقدروش يتحملو مسؤوليه اه في شباب بتشتغل فالجامعه معايا بس اغلبهم بتوع هزار وضحك واللي جاي من الاول عشان يصاحب ويتسلي وانا مش كده
نور..طيب مفيش ولد قبل كده قالك انه معجب بيكي او حتي مثلا مفيش في صحابك ولا ولد
عشق...لا في بس وقتها اتكلمت بكل احترام وقولتله اني مليش فالكلام ده ومن وقتها خلاص الموضوع خلص
ومن ناحيه في في صحابي ولاد اه في بس هما مش اكتر من زمايل والحقيقه ربنا كرمني باتنين محترمين بيعتبرونا كلنا زي اخواتهم يعني اللي عايزه افهمهولك اني مش مقفله اه عارفه ديني كويس بس مش متزمته ومش ضد الحب خالص والله بالعكس انا نفسي احب واتحب بس مش عايزه اغضب ربنا وخصوصا يانور ان احنا ظروفنا مختلفه شويه ممكن اي حد يعرف ظروفنا يطمع فينا لان باختصار احنا ملناش اهل
نور..علي فكره ياعشق انا عجباني شخصيتك جدا حساكي كده عاقله وقويه وتقدري تمشي حياتك صح
عشق..الدنيا علمتني كتير يانوروالحياه اللي عيشتها ممكن تخليني ابقي عكس كده اخرج واروح واجي علي كيفي اعمل الغلط والحرام مهتمش بالدراسه ماهو انا مليش اهل ولا كبير بقي وهقول اهلي السبب وهما اللي وصلوني لكده وهما السبب في ضياعي من البدايه بس انا حبيت اثبت عكس كده علي اد ما المديره بتاعتنا كانت قاسيه علي اد ماهي اثرت فيا من غير ماتحس انها عملت معايا جميل حنان دي مكنش في علي لسانها غير كلمه بنت حرام بنت حرام الكلمه دي علي اد ما كانت بتقتلني وبتوجعني وبتهينني وكانت ممكن تخليني اوحش بني ادمه فالكون علي اد ماكانت حافز ليا اني اثبتلها هي وغيرها ان انا احسن من اهلي نفسهم ومش شرط اني اهلي شياطين اطلع زيهم بالعكس اهلي ميعرفوش يعني ايه ربنا لاكن انا اعرف اتربيت في ظروف قاسيه مفيش طفل يقدر يعيش اللي احنا عيشناه بس عيشنا وقدرنا واتعلمنا وبقينا زينا زي اللي عنده اهل
نور..وهي عينها مدمعه انا بحبك اوي ياعشق
عشق..وهي بتحضنها وانا بحبك اوي يانور
تمارا..عشق عندها حق يانور ولولا عشق في حياتنا كان زمانا ممكن نبقي من البنات دي هي اللي فضلت ورانا عشان نصلي ونقرا قرأن ونحفظه هي اللي خلتنا نلبس الحجاب وديما كانت بتكلمنا بعقل عشق مش بس اختنا عشق كانت لينا الام
عشق..خلاص بقي هعيط على فكره
زهره..طيب نور انتي قولتي ان عمرك ما ارتبطتي طيب محبيتيش
نور..ارتبكت انا لا مفيش انا لا لا
تمارا..ايوه ادام اتلخمتي كده يبقي حبيتي
نور. بضحك انتو بعد اللي عشق قالته ده عايزيني اتكلم عشان يقام عليا الحد
زهره..وتمارا في نفس واحد خوافه
عشق..احنا اتفقنا بقي ان الحب مش عيب بس في حجات لازم نمشي عليها
نور..بصو هو حب ومش حب
عشق..ايه دي فزوره.
نور..مش فزوره ولا حاجه بس تقدري تقولي كده الحب المستحيل
تمارا..ايه يابنتي الالغاز دي حب مستحيل ليه
نور..انا هحكيلكم وهتعرفو ليه انا فتحت عيني عالدنيا مكنش ليا غير ماما وبابا هما كل حاجه في حياتي وماما بعد كده اتوفت مبقاش ليا غير بابا هو بيخاف عليا جداا مليش صحاب يعني ممكن اكون عارفه جيرانا والشارع كله بس مليش صحاب عيشت انا وبابا المدارس اللي كنت فيها كانت خاصه وكان معايا ولاد عادي ودخلت الجامعه معايا ولاد عادي بس عمر ماحد شدني غير واحد بس
زهره..مين هه
تمارا..وهي بتخبطها على راسها يعني هي لو قالت مين هتعرفيه
زهره..بضحك لا
نور..نوح
عشق..نوح مين هو ده اللي قولتي عليه لبابا انه جابله ورق اخو ليل
نور..ايوه هو.
تمارا..يابنت الايه نوح السيوفي مره واحده
نور..لابس مش زي مانتي فاكره وكملت وهي عينها كلها دموع وبتحاول على اد ماتقدر انها متعيطش نوح انا اعرفه من وانا صغيره فالاول وهو صغير كنت بشوفه كتير كان ديما يجي مع باباه لما كان بيجي لبابا عمو عزام كان بيحب بابا جدا كان ديما يجيله هنا فالخان لما يحب يتكلم مع حد فاكان بيجي لبابا واوقات كان نوح بيشبط فيه وكان ديما يجي معاه كنت بحب العب معاه كان عندي 3سنين ونوح كان عنده 11سنه هو اكبر مني ب8سنين كان بيجي ياعد يلاعبني ويأكلني هو كان بيتعامل على اني بيبي بالنسباله وانا طبعا مكنتش افهم كنت بلعب وخلاص فضلت اكبر وهو يكبر مع الوقت بقى مش بيجي كتير لانه ابتدا يكبر وكل فين وفين كنت اشوفه مكنتش فاهمه ساعتها يعني ايه حب بس كنت متعلقه بيه بحكم اني مليش اخوات ولا صحاب ولا حتي قرايب من سني مكنتش بشوف غيره كنت لما بشوفه قلبي بيفضل يدق من الفرحه وكبر اكتر نوح وانا كبرت وبقيت في سن المراهقه وابتديت اعرف يعني ايه حب واتعلقت بيه اكتر ولاني مش بشوفه بقيت احاول اعرف عنه اي اخبار كان لمابابا يجي من الشغل اخليه يحكيلي يومه بالتفصيل وكل ده عشان اسمع اي حاجه عن نوح ورغم اننا بعيد عن بعض بقيت اعرف عن طريق بابا بيحب ايه بيكره ايه شخصيته ازاي بيحب الضحك ولا جد زي ليل وفضلت اجمع عنه معلومات لحد ماعرفت كل حاجه عنه خصوصا لما ابتدي ينزل الشغل معاهم كنت بتابع اي حاجه تخصه وصفحته عالفيس واي حاجه تخص شغلهم كنت ادخل وادور واشوف صوره وهو فالشغل وهو مع صحابه كل حاجه معرفش ليه كنت بعمل كده بس مكنش في اي حاجه في بالي غير اني عايزه اعرف كل حاجه عنه اطمن عليه اعرف اخباره
انتو تعرفو قبل ما ادخل الجامعه كان مره بابا بيحكيلي ان المحامي بتاع ليل في بينهم مشاكل وان ليل خلاه يسيب الشغل الخاص بالشركه وانه بيشوف محامي تاني الفكره جت في بالي وقررت ادخل كليه حقوق واكون محاميه عشان اشتغل معاهم وابقي ديما ادام نوح
ومن وقتها انا بحبه وهو ميعرفش اي حاجه اصلا ولا انا في باله
بصو..انا عارفه ان اللي انا في ده وهم واني ابعد كتير من اني اوصل لنوح نوح عرف بنات كتير وكلهم من عائلات معروفه عارفه انه اكيد مش هيبصلي ولا اجي في باله بس غصب عني بحبه ومش قادره اشيله من قلبي
انهرده لما شوفته فضلت واقفه مش بنطق هو بيكلمني وانا مش معاه مش قادره اصدق انه ادامي عارفين كان بقالي سنه بحالها مشفتهوش انا معايا دفتر صغير بكتب فيه تاريخ كل مره بشوفه فيها وانهرده تقريبا بقالي حوالي سنه وشهر
عرفتو بقي ليه بقولكم انه حب مستحيل لانه حب من طرف واحد
عشق...خدتها في حضنها بصي يانور كل اللي انتي بتقوليه ده يبين اد ايه انتي بتحبيه بس انا عايزه اقولك حاجه مش هكلمك في حرام وحلال لانك معملتيش حاجه حرام وحب الطفوله ده من انضف انواع الحب بس كل اللي هقولهولك حرام عليكي نفسك انتي ازاي قادره تعشمي نفسك بحد هو مش حاسس بيكي اصلا
نور..بدموع غصب عني ياعشق انا فتحت عيني عالدنيا لقيت نوح مش قادره اشيله من قلبي ولا قادره احب غيره ولا ينفع حتي اني احسسه بحبي ليه
عشق..بس انتي كده هتتعبي يانور هو شايف حياته لانه باختصار ميعرفش انك بتحبيه وفنفس الوقت بعيدا عن الهبل اللي انتي بتقوليه ده انه يعرف بنات وانهم من عائللات كبيره فامش هيبصلك الحب ميعرفش غني او فقير يانور يعني هو لوحبك مش هيهمه اي حاجه وهيحارب عشان يوصلك
لاكن اللي انتي فيه ده صعب اوي انتي الوحيده اللي خسرانه فيه طب تخيلي حب وارتبط واتجوز هتعملي ايه
نور..متقوليش كده انا ممكن اموت فيها
عشق..بعد الشر عنك يا نور متقوليش كده بس لازم تفكري شويه هو ملوش ذنب لانه ميعرفش
زهره..طب قدري عرف ورفض الحب ده
عشق..يبقي عالاقل كان صريح معاها وخلينا منضحكش علي بعض هو مش بيحبها اصلا هو ليه حياه تانيه خالص ميعرفش عن نور حاجه كل اللي بينهم بالنسباله انها بنت الراجل اللي بيشتغل معاهم وكان بيربطهم ببعض ايام طفوله انما هي اللي كملت الحكايه لوحدها
نور..طب قوليلي اعمل ايه
تمارا..هي بصراحه ملهاش حل يانور
عشق..انا بصراحه مش عارفه اقولك ايه بس عايزه اطلب منك انك تعيشي حياتك وتبطلي تفكري فيه او تخليه محور حياتك صدقيني يانور لو انتو الاتنين لبعض لو الدنيا دي اتقلبت عشان الواقع يتغير هتفضلو لبعض
نور..وهنكون لبعض ازاي وهو حتي ميعرفش اني بحبه انا حتي كل مره بشوفه مش بحسسه بده بتلخم وبتلغبط وبقفل معاه الكلام بسرعه وبختفي من ادامه يمكن دي اول مره انهرده اطول معاه فالكلام شويه غير كده مفيش فرصه
عشق..صدقيني يانور لوليكي نصيب في قلبه هتبقي ليه
نور.يارب ياعشق
تمارا..بحب هو يطول اصلا ده انتي قمر
نور..بضحك هو قمرين
تمارا.. لا ده انتي واقعه واقعه
فضلو يتكلمو شويه واخيرا ناموا
......
اما عند ليل..خلصت سهرتهم وروحوا ليل كان راجع سكران بعد ما شرب كتير
طلع خد شاور ونام عالسرير
وفضل باصص فالسقف وسرحان
فلاش..باك
ليل..الوو
ريما..ايوه ياحبيبي
ليل..وحشتيني
ريما..انت كمان وحشتني بس مخصماك
ليل..ليه بس
ريما...عشان بقالك فتره مشغول من يوم عيد ميلادك ومن وقتها مش شوفتك كل ما اكلمك مشغول ومش عارفه اشوفك ولااكلمك وبستني اليوم يعدي عشان تكلمني بالليل شويه قبل ما تنام
ليل..حقك عليا ياقلب ليل والله كان في شغل الفتره اللي فاتت كتير وانتي عارفه بابا تعبان جدا وانا اللي شايل الشغل الفتره دي
ريما..عارفه بس انت واحشني جدا وعايزه اشوفك وزهقانه جدا مش لاقيه حاجه اعملها وصحابي سافرو ومرضتش تخليني اسافر معاهم
ليل..حقك عليا عارف اني مقصر معاكي عشان كده بكلمك بكره انا اجازه وملكك اليوم كله
ريما..بفرحه بجد
ليل..بحب بجد ياقلب ليل هعدي عليكي بكره الساعه 9الصبح تكوني جاهزه
ريما..9الصبح ايه احنا هننزل نبيع لبن ولا عشان تخلص بسرعه الخروجه وترجعني بسرعه
ليل..انا قولتلك اني بكره انا ملكك اليوم كله صح بس انا عاملك مفجأه ولازم نلحق اليوم من اوله
ريما..ماشي 9بالدقيقه هكون مستنياك
ليل..وانا مش هتأخر عليكي ياعمري
عدت الساعات
والساعه 9كان ليل عند ريما خدها وركبو العربيه
ريما..احنا رايحين فين
ليل..عشر دقايق وتعرفي
وصل اخيرا ليل نزل ونزلت ريما
ريما..بصدمه ايه دي طياره
ليل..اه ياستي يلا نركب
ريما..نركب ايه وايه الطياره دي ده ناقص تقولي انك هتسوق
ليل..بضحك لا مش انا ياستي دي طياره خاصه انا اجرتها مخصوص عشانك انهرده وهوديكي بيها مكان تحفه
ريما..بجد
ليل..بجد يلا بقي عشان اليوم ميضعش مننا
ركبت ريما وليل ووصلو الغردقه قضو اليوم كله فالبحر ضحك وهزار ولعب في الملاهي المائي وبعد ما خلصو خدها علي مطعم فالبحر مكنش في غيرهم كان حاجزه كله ليهم هما الاتنين المكان كان كله مفروش بالورد اعدو اتعشو مع بعض وقضو وقت جميل كله حب ورومانسيه وبعد يوم طويل رجعو تاني
بااك.
ليل..بوجع مبكرهش في حياتي حد ادك كلكم زباله كلكم زي بعض وبعد تفكير كتير اخيرا استسلم للنوم
عدي كذا يوم من غير اي جديد تمارا ابتدت حالتها تتحسن عشق وزهره زي ما هما في شغلهم لاكن عشق مش مرتاحه فالشغل بس مش عايزه تسيبه
حاج محمد بيحاول يتلاشي اي سؤال من ليل عن قريبته
واخيرا تمارا فكت ايدها وبقت احسن
ليل..خرج من اوضه الاجتماعات بتعب وارهاق
جاسر..اخيرا خلص الاجتماع ده
نوح..انا جعان اوي
ادم..ومين سمعك
ليل..اطلبوا أكل طيب عشان نتغدي
دخل ليل مكتبه وكلهم وراه
طلب ليل قهوه وغدا من السكرتيره
بعد مرور وقت خبط حاج محمد ودخل
ليل..ايه ياراجل ياطيب خلصت
حاج محمد..كله تمام مفيش اي حاجه تاني خلاص
ليل..طيب كويس الاجتماع ده كان تقيل عليا بشكل والصفقه دي لو كانت راحت كنا خسرنا كتير
جاسر..علي اساس انك بتخسر
ليل..لاطبعا بس الصفقه دي بالذات مكنش ينفع نخسرها
فالوقت ده خبط الباب ودخلت السكرتيره جيبالهم الاوردر اللي طلبوه وخرجت
طلعو الاكل وفضلو ياكلو ومعاهم حاج محمد
ليل..حد فيكم وراه شغل تاني
نوح...انا شويه ورق بسيط كده عايز بس اراجعه
ادم. انا خلصت
جاسر وانا كمان
الحاج..محمد انا كمان خلصت
ليل..طيب انا كمان لسه شويه اللي حابب يروح يرتاح يروح اليوم كان متعب انا عارف
حاج محمد انا عايز منك خدمه يا ليل يا ابني بس يعني اصل
ليل..في ايه ياحاج محمد انت محتاج فلوس او اي حاجه
حاج محمد..لا لا يا بني فلوس ايه مستوره الحمد لله
جاسر..لنوح وادم طب يلا ياشباب نسبهم لوحدهم شويه
حاج محمد..لا يا ابني خليكو انا بس طالب خدمه منك يا ليل يا ابني نفع نفع منفعش خلاص
ليل..لو اقدر مش هتأخر عنك يا راجل يا طيب
حاج محمد..يعني كنت بقول لوينفع تشوف شغل لي لي
ليل..لمين لنور
حاج محمد..لا لا مش نور دي يعني بنت قريبتي اعده معايا هنا من فتره بسيطه وبتدور على شغل
ليل...هي دي اللي تعبت قبل كده
حاج محمد..ايوه يا ابني هي
ليل..مفيش مشكله ياحاج محمد خليها تيجي واقابلها وتجيب السي ڤي بتاعها
حاج محمد..لا ماهو المشكله انها لسه بتدرس هي في جامعه القاهره في كليه تجاره سنه تالته يعني كنت بقول لو ينفع تشتغل اي حاجه تحت التدريب يعني حاجه تساعدها
ليل..هو في ايه ياراجل ياطيب انا سايبك براحتك بقالي فتره كده بمزاجي بس يعني مش ملاحظ ان غريبه حكايه قريبتك دي خصوصا اني عارف ان تقريبا علاقتك بأهلك وباهل مامت نور تعتبر مقطوعه وانت ملكش حد
الحاج..محمد وهو بيمسح عرقه بارتباك
لا بس يعني
ليل..قاطعه بص انا مش عايز اضغط عليك او اعرف حاجه انت مش حابب تقولها عموما ماشي هنشوفلها شغل خليها تيجي الوقت اللي يرحها بكره بعده اي وقت
جاسر..انا محتاج سكرتيره معايا خليني اشوفها تشتغل شويه تحت التدريب ولو عجبني شغلها هخليها تكمل معايا
حاج..محمد بفرحه ياريت
ليل.. طيب مبدأيا تمام وكمل كلام مع جاسر هو انت مش عندك سكرتيره
جاسر..كان عندي لحد امبارح وطيرتها
ليل..بأستغراب ليه
جاسر..كانت تحت التدريب بردو بس غبيه ولا فاهمه اي حاجه دخلتلي ميت معاد في بعض وكذا ميتنج يعني بوظتلي الدنيا وانت عارفني انا بحب كل حاجه تبقي Under control
ليل..اه طيب عالله اللي جايه دي شغلها يعجبك
حاج محمد..والله هتعجبك ان شاء الله المهم اجبها امته
ليل..انا معنديش مانع
ان شاءالله من الوقت
جاسر..ولا انا عموما لو تمام بكره خليها تيجي
حاج محمد..تمام جدا بكره تبقي هنا ان شاء الله
هستأذن انا بقي وهروح افرحها
ليل..ماشي ياراجل ياطيب
خرج عم محمد..اما ليل فا فضل يبص على أثر عم محمد بغموض
نوح..ليل ليل ليييييل
ليل..ايييييه
نوح..في ايه
جاسر..سرحت في ايه
ليل..عادي ولا حاجه
ادم...الراجل ده انا طول عمري بحبه لله فالله عشان جد ودوغري بس صراحه اول مره احس انه وراه حاجه
جاسر..وانا كمان على فكره انا ممشتش السكرتيره ولا حاجه اينعم شغلها زفت وفعلا همشيها بس حبيت اقوله كده عشان بصراحه الفضول هيقتلني عايز اعرف ايه حوار قريبته ده
نوح..والنبي طول عمرك بتبهرني
جاسر..بضحك من بعض ما عندكم
ليل..كله هيبان متستعجلوش رغم اني بطمنله جدا وعارف ان مفيش اي حاجه وحشه من ناحيته بس انا كمان عندي فضول جامد وكمل بغموض وهو بينفخ دخان سجايره
عموما بكره مش بعيد بصوله الشباب باستغراب
#يتبع
البارت السابع والثامن من هنا هنا
تعليقات
إرسال تعليق