 |
دار الايتام
البارت السابع والثامن
وصل حاج محمد البيت دخل لقى البيت هادي
حاج محمد..يا اهل الدار انتو فييين
اتفتح باب الاوضه
عشق..احنا هنا يابابا حضرتك جيت امته
حاج محمد..انا لسه جاي اهو انتو اللي فين
عشق..كنا بنذاكر
نور..اهلا بأحلى حاج محمد فالدنيا
حاج محمد..اهلا بأكبر بكاشه فالدنيا
نور..ديما ظالمني كده
زهره..ازيك يابابا حمدالله عالسلامه
حاج..محمد الحمد لله يازهره الله يسلمك امال فين تمارا
تمارا..خرجت انا هنا مين بيسأل عليا
حاج محمد..تعالي ياستي انا اللي بسأل عليكي وعندي ليكي مفجأه كمان
تمارا..مفجأة ليا
حاج محمد..جهزي نفسك عشان بكره هتنزلي معايا الصبح عشان تستلمي شغلك في شركه السيوفي
تمارا..اتصدمت احلف
حاج محمد..والله العظيم
تمارا..وقفت تتنطط وتصوت والبنات يتنططوا معاها ويحضنوها
عشق..اخيرا مبروك ياقلبي
زهره..احلى حاجه سمعتها اخيرا هتنزل عن دماغنا كل شويه مكتئبه واتخنقت وفقدت الامل وعايزه شغل لما طلعت عنينا
تمارا..بحزن مصطنع اخس عليكي انا بعمل كده
نور..مبروك يا قلبي
تمارا..الله يبارك فيكو انا فرحانه اوي وبصت لحاج محمد
تمارا..انا مش عارفه اقولك ايه بجد ربنا يخليك لينا يا احلى واحن اب فالدنيا
وحضنته.
طبطب..حاج محمد عليها ويخليكو ليا يا احلى اربع بنات ربنا رزقني بيهم
المهم بقى الوقت تحضري نفسك بكره هنقابل ليل واول ما يمضي بتعيينك رسمي هتستلمي شغلك بس مش هتشتغلي معاه
هتشتغلي مع ابن عمه جاسر
تمارا..انشالله اشتغل فالبوفيه انا راضيه
ضحكو عليها كلهم
حاج محمد..بوفيه انا بناتي يشتغلو في احسن مكان بصي انتي مؤقتا كده هتشتغلي معاه سكرتيرته الخاصه تنظميلو مواعيده تظبطي مواعيد الاجتماعات باختصار هتكوني انتي المسؤوله عن شغله هتنظميله كل حاجه
وخلي بالك هو هيحطك تحت التمريين ولازم تبيضي وشي عشان هو لسه ممشي سكرتيرته امبارح لانها كانت مبوظاله كل حاجه
تمارا.اطمن يابابا والله هرفع راسك وهشرفك
عشق..ياخوفي
تمارا..بت اتلمي تعرفي عني كده
عشق..صراحه طول ما لسانك في بوئك الدنيا هتبقى تمام ابوس ايدك بلاش طولة لسان
حاج محمد..اه والنبي ياتمارا انتي في وشي وعموما متقلقيش ياعشق دي هتشتغل مع واحد من مربع الرعب
عشق وتمارا مع بعض ايه مربع الرعب ده
نور..بضحك ايه صدى الصوت ده
تمارا..لا بجد يعني ايه
نور.. مربع الرعب دول يبقوا ليل ونوح وادم وجاسر بيسموهم كده يعني عشان ديما الاربعه مع بعض في شغلهم في اي مكان بيروحوا الكل بيخاف منهم وبيعملهم حساب صح ياحاج ايه رأيك فيا مذاكره
حاج محمد..شاطره اهو زي ما نور قالتلك كده يعني باختصار دول بتوع شغل وفهمتك قبل كده دول فالشغل ميعرفوش ابوهم
تمارا..وليه التوتر بس عموما متقلقش بردو هشرفك احنا جامدين اوي على فكره
حاج محمد اما نشوف
تمارا..طيب حضرتك قولتلهم انا ابقى مين
حاج محمد..قولتلهم انك قريبتي ومتقلقيش ان شاء الله خير وعرفت ليل انك بتدرسي
تمارا..احسن حاجه اني انا انتساب يعني مش محتاجه اروح الجامعه غير لو في سيكشن
حاج محمد..ان شاء الله خير وعموما اي وقت تحبي تجيبي ورق حد من البنات يجبهولك ولو ضروري انك تروحي الجامعه استأذني من جاسر مش هيقولك حاجه
تمارا تمام اشتغل بس الاول وكله يتحل
عشق..ان شاء الله
حاج محمد..طب ايه مش ناويين تعشونا بقى ولا ايه
تمارا..لا سيبولي بقى انا الطالعه دي بالمناسبه الحلوه دي انا اللي هحضر الاكل
حاج محمد..طب يلا ورينا شطارتك
دخلت تمارا تحضر الاكل وهي طايرة من الفرح
وبعد مدة خلصو اكل ودخل عم محمد ينام
تمارا..بقولكم ايه انا مش عارفه البس ايه بكره
عشق..انتي رايحه فرح ده شغل
تمارا..ايوه بس مش اي مكان دا في شركه السيوفي يابنتي يعني عالاقل لازم يبقي شكلي حلو اول يوم
عشق..طب تعالي يلا نختار مع بعض
دخلو البنات يختارو لبس لتمارا عشان تروح بيه اول يوم
وبعد وقت طويل من الاختيار اخيرا اختارت تمارا بنطلون رمادي وعليه شميز ابيض وفوقيه جاكت طويل رمادي وطرحه رمادي واخيرا نامو كلهم وفضلت تمارا صاحيه تفكر في حياه جديده هتبتدي من بكره بفرحة وسعادة واخيرا غلبها النوم ونامت
في صباح يوم جديد مليئ بالنشاط والتفاؤل خصوصا على تمارا اللي صحيت اول واحده وتقريبا منامتش صحيت خدت شاور واتوضت وخرجت وصلت وحضرت الفطار
حاج محمد..صباح الفل على القمر ايه النشاط ده كله لا انا كده هصدق انك هترفعي راسي
تمارا..بابتسامه جميله لسه انت شوفت حاجه صباح العسل يلا اغسل وشك وتعالى افطر
حاج محمد..تسلم ايدك فين البنات
بيصلو الصبح وجايين
حاج محمد..ماشي هغسل وشي والبس واجيلكم
تمارا..يلا بسرعه عشان الفطار ميبردش وعشان منتأخرش عالشغل وكملت بابتسامه مش بنتدلع احنا
حاج محمد..بابتسامه كلها طيبه تمام يا افندم
خرجت عشق..في ايه يابت انتي بتعلي صوتك كده ليه مفيش حد اشتغل غيرك
نور..بضحك ده باينه هيبقي مرار طافح وهتزل اهلنا كل شويه عشان اشتغلت
عشق..انتي لسه شوفتي منها حاجه دي تمارا
تمارا لنور..بصوت واطي مابلاش انتي ده انا كنت ناويه اعمل معاكي واجب واجبلك حبيب القلب لحد عندك
جريت عليها نور..دي تمارا دي السكر بتاعت البيت دي تعمل اللي هي عيزاه
عشق..لا والله بقى كده ياست نور بتدافعي عنها الوقت عشان بترشيكي طب اسمعي مني ده لو في واحد فالميه بس ان حبيب القلب يجي زي ما بتقولك ادام تمارا حطت دماغها فالموضوع يبقى مش هيتم
نور..يالهوي بجد
تمارا..بغضب بت ياعشق اخفي عن وشي بدل ما اضربك متسمعيش كلامها يانور بكره تشوفي
عشق..ياخوفي
خرج عم محمد وزهره واخيرا اعدو يفطرو وبعد ما خلصو
تمارا..بت انتي وهي انا حضرت الفطار تقومو تشيلو عشان انا نازله رايحه الشغل..ارجع الاقي الدنيا نضيفه وتنضفو الاطباق مش عايزه الاقي طبق فالحوض وبعدها يلا عشق وزهره على شغلكم وانتي ياست نور على جامعتك
نور..حاضر ياست هانم
عشق..بضحك بتسمعي كلامها يامرتشيه
زهره..بابتسامه ابتدينا
تمارا..بتقولو ايه ياعيال
حاج محمد..مبيقولوش يلا هنتأخر يا ام لسان طويل انتو جايبنها منين البت دي عايزه خناقه وتشبع فيها لطم
عشق..دي تمارا يابابا المفروض تتعود
حاج محمد..ربنا يسترها ويعديها على خير يلا يابنات سلامو عليكم
البنات وعليكم السلام
عشق..تمارا
تمارا..نعم
عشق..خلي بالك من نفسك واوعي تتوتري او ثقتك بنفسك تتهز انتي احسن واحده فالدنيا ديما خليكي عارفه كده وعيزاكي ترجعيلي وانتي متعينه في شركه السيوفي
تمارا..بحب ربنا يخليكي ليا يا احسن اخت فالدنيا متقلقيش هرفع راسك وهنفضل ديما عالوعد واحنا التلاته الكل هيفتخر بينا
عشق..بحبك
تمارا..وانا كمان حضنتها وقلبت مره واحده بت انتي انتي ناويه تأخريني
عشق..بضحك حسبي الله
نور..سلام يامجنونه
تمارا..بااي
....
نزلوا ركبو مواصله توصلهم للشركه
وبعد وقت طويل اخيرا وصلوا
نزلت تمارا..وقفت ادام الشركه بأنبهار وإعجاب أدام الصرح العظيم بتاع المبني كان مبني كبير وشكله لوحده يخض
حاج محمد..ايه واقفه كده ليه
تمارا..بابا انا خايفه اوي
حاج محمد..انا عارف ان الشركه تخض بس انتي ادها وانا بنتي متخافش ابدا ولا ايه
خدت تمارا نفس كبير حاضر يلا
دخلت تمارا مع حاج محمد وهي من جواها الف شعور فرحانه وطايره من السعاده خايفه ومتوتره بتدعي من جواها انها تتقبل وفنفس الوقت شعور الخوف والتوتر ملازمها طلع عم محمد وقال للسكرتيره بتاعت ليل انها تبلغه انهم بره دخلت السكرتيره وخرجت على طول
السكرتيره.اتفضلو مستر ليل في انتظاركم
خبط حاج محمد وتمارا وراه ميته في جلدها
جالهم صوت ليل من ورا الباب
ليل..ادخل
فتح حاج محمد الباب السلام عليكم
ليل..وهو باصص عالورق عليكم السلام ياراجل ياطيب
اتفضل دقيقه وهكون معاك
فضل ليل يمضي الورق اللي ادامه وخلص اخيرا رفع عينه اللي ترعب وهيئته اللي تخوف اي حد وبطريقه جاده جدااا مش تعرفنا يا حاج محمد
حاج محمد دي تمارا اللي قولتلك عليها
ليل..اهلا يا انسه تمارا
تمارا..بارتباك احمم اهلا بحضرتك
ليل..ها عرفيني عن نفسك
تمارا..بخوف بصت لحاج محمد
حاج محمد بابتسامه مطمئنه هزلها دماغه
تمارا..انا اسمي تمارا عندي عشرين سنه طالبه في كليه تجاره جامعه القاهره في سنه تالته
ليل..تمارا ايه؟
تمارا..وهي بتبلع ريقها تمارا احمد الوكيل
ملحوظه ده الاسم اللي اتكتب بيه شهاده الميلاد
ليل..اشتغلتي قبل كده ياتمارا
تمارا..فالحقيقه مشتغلتش في اي مكان
ليل..وايه السبب اللي مخليكي عايزه تشتغلي خصوصا انك لسه بتدرسي
تمارا..اولا انا حابه اني اشتغل وانا بدرس عشان حجات كتير اولهم اني اتدرب عشان لما اتخرج اقدر اشتغل بسرعه
خصوصا ان دايما اول شرط فأني اشتغل يكون عندي خبره ثانيا اني اشتغل في مجموعه السيوفي دي حاجه كبيره وبتهيألي مش هقدر اكتسب خبره من اي مكان اد ما هكتسب في مجموعه السيوفي
حاج محمد بص لتمارا بابتسامه عشان يحسسها انها ماشيه صح
ليل..باعجاب من ردها طيب وبالنسبه للماده
تمارا..مفيش حد مش بيشتغل عشان الفلوس اكيد عايزه اثبت نفسي وابقى في مكان بحلم بيه واتقدم في شغلي بس ده ميمنعش اني بردو بشتغل عشان الماده
ليل..تمام يا انسه تمارا عموما انا عادتآ مش بقبل اي حد جايلي بواسطه بس انتي جايه من طرف حد غالي عندي اوي ومبدأيا انا موافق وهمضي قرار تعيينك حالا عايزك ترفعي راس الراجل الطيب ده تثبتيلي انك اد الشغل
تمارا..بفرحه ان شاء الله
ليل..رفع تليفون مكتبه اتصل على جاسر
ليل..جاسر تعلالي على مكتبي
جاسر..حالا
ليل..بصي يا انسه تمارا انتي هتشتغلي مع مستر جاسر هتكوني سكرتيرته الخاصه وهيفهمك كل حاجه ويعرفك طبيعه الشغل
تمارا..تمام يامستر ليل
دقايق وكان جاسر بيخبط..عالباب تمارا كانت اعده ادام ليل وضهرها للباب وعم محمد اعد ادامها ووشه للباب
جاسر..صباح الفل ازيك يا راجل ياطيب
حاج محمد..ازيك ياجاسر يا ابني
جاسر..وهو واقف ومش شايف وش تمارا..خير ياليل
ليل..تعالى ياجاسر استلم ياسيدي السكرتيره الجديده بتاعتك الانسه تمارا
جاسر..قرب اكتر اهلا يا انسه تمارا
وقفت تمارا عشان تسلم عليه وهي بتبص اهلا بحض. قطعت كلامها اول ما شافته وبرقت من الصدمه
جاسر..بصدمه انتي
استغرب ليل وحاج محمد
ليل..انتو تعرفو بعض
حاج محمد...في ايه يا ابني..
تمارا..بصوت واطي يانهااار اسود كده باظت
ليل..في ايه ياجاسر مالك متنح كده ليه انتو تعرفو بعض
جاسر..يعني مش بالظبط كده
ليل..هي فزوره
جاسر..لا خالص بس صدفة غريبة يعني الانسة تمارا هي نفس البنت اللي هايدي خبطتها بالعربيه
ليل..نعم
حاج محمد.ايه
تمارا..واقفه مبتنطقش
جاسر...بضحكه استغراب اه والله زي ما بقولكم كده
ليل..صدفه غريبه
حاج محمد..فعلا عموما الحمد لله انها عدت على خير
تمارا..اخيرا اتكلمت انا هستأذن اسفه يامستر ليل ضيعت وقت حضرتك
ليل..بأستغراب من رد فعلها مش فاهم
تمارا..يعني همشي كده تقريبا الموضوع اتعقد بعد الصدفه دي وبيتهيألي مش هينفع اشتغل
جاسر..استني هنا مين قال ان مش هينفع تشتغلي
تمارا..اصل يعني اقصد بعد اللي حصل بيني وبين خطيبة حضرتك اكيد طلبي للشغل مرفوض وانا بوفر على حضرتك وعليا الاحراج
ليل..استني هنا انتي في شركه السيوفي يعني مش لعب عيال
تمارا..عارفه يامستر ليل وطبعا انا اسفه لحضرتك انا مقصدش كده خالص وشرف ليا اني اكون بشتغل ضمن مجموعه السيوفي بس حضرتك اكيد شايف الموقف ومحبش اني اكون موجوده في مكان مش مرغوبه فيه
جاسر..بطريقه جاده جداااا ومين قال كده اولا زي ما قالك مستر ليل انتي في شركه السيوفي يعني احنا هنا مش بنلعب ثانيا وده الاهم احنا هنا بنعرف نفصل تماما بين الشغل وحياتنا الشخصيه ولو بيشتغل معايا شخص فالمجموعه ابويا نفسه بيكرهه مش همشيه لو شغله معايا يعني متقلقيش الموقف اللي حصل بينك وبين هايدي ولا يعنيلي بأي شئ وبيتهيألي اني مش هرفض انك تشتغلي معايا عشان خاطرها
تمارا..بارتياح داخلي يعني ايه
ليل..زي ما قالك يعني حضرتك تروحي يلا مع مستر جاسر عشان تشوفي مكتبك فين وتعرفي منه طبيعة الشغل..ويلا بقى عشان نبتدي شغل احنا هنا مش بنلعب
تمارا..بصت لجاسر بترقب
جاسر..اتفضلي ورايا يا انسه تمارا عن اذنكم ياجماعه
تمارا..بصت لحاج محمد
حاج محمد..يلا واقفه ليه روحي وراه
جاسر..هفضل واقف كتير يلا ورانا شغل
تمارا...شكرا يامستر ليل
ليل... اكتفي ليل بالابتسامه وهز دماغه
اما تمارا قربت لحاج محمد وباسته من راسه ربنا يخليك ليا ومشيت بسرعه ورا جاسر
...........
حاج محمد..شكرا ياليل يا ابني
ليل..على ايه بس يا راجل ياطيب انا معملتش حاجه عموما لو قدرت تثبت نفسها في وقت قليل هتتعين رسمي وهتكون ضمن المجموعه كمان
حاج محمد ..ان شاء الله يا ابني طيب تؤمرني بحاجه
ليل..شكرا اتفضل انت
خرج حاج محمد
اما ليل..فا فضل اعد بشرود وبنظرة غامضة وبيفكر في حاجه
دخل جاسر مكتبه وتمارا وراه وقفت جمب الباب
جاسر..وهو مديها ضهره ورايح مكتبه اقفلي الباب وتعالي اعدي
قفلت تمارا الباب وراحت وراه من سكات اعدت ادامه وهي من جواها توتر جامد
جاسر..بجديه وتجاهل الموقف تماما
بصي يا انسه تمارا انتي من انهرده اعتبري نفسك في فتره تدريب لمده 3شهور قدرتي تثبتي نفسك وده طبعا بشغلك ومجهودك هتفضلي معايا وهتتعيني رسمي انتي هتكوني سكرتيرتي الخاصة وهتكوني مسؤوله عن اي حاجه تخص شغلي تنظيم مواعيدي تجهيز اي ميتنج في اوقات ممكن احتاجك معايا في ميتنج خارج الشركه او ميتنج بليل يعني تقدري تقولي عشاء عمل احنا شغلنا بيبتدي الساعه 8صباحا وبيخلص 3 بس في ايام ممكن تطولي معايا شويه لو في ضغط شغل اوقات كتير بنخلص 9و10بليل وطبعا لازم تكوني عارفه ده كويس والساعات الزياده فالشغل بتتحسبلك over time
عرفت من حاج محمد..انك بتدرسي بجانب الشغل طبعا اتمنى ميكنش في اعتذارات وفنفس الوقت انا هراعي انك بتدرسي يعني الوقت اللي لازم تروحي فيه الجامعه تقدري تبلغيني قبلها بيوم واكيد هنظبطها مع بعض انتي انتساب ولا انتظام
تمارا..احممم انا انتساب
جاسر..تمام جدا يعني مش هتحتاجي تروحي كتير عموما بردو زي ما قولتلك الوقت اللي ضروري تروحي فيه تبلغيني قبلها بيوم
وعايز اقولك بس انا لحد امبارح كان معايا سكرتيره بس للاسف مكملتش معايا لانها مشافتش شغلها كويس واحنا هنا مبنلعبش زي ما انتي محتاجه الشغل احنا هنا كمان محتاجين موظفين يكونو جاديين وشايفين شغلهم كويس اساس شركه السيوفي النظام والجهد والنشاط قدرتي تثبتي نفسك هتكوني ضمن مجموعه السيوفي مقدرتيش للاسف مش هتقدري تكملي واتمنى الحماس اللي شوفته في عم محمد وهو بيتكلم عنك تكوني اده مبدأيا كده انا خلصت كلامي ومد ايده اداها دوسيه
الفايل ده في كل حاجه حابه تعرفيها المكتب بتاعك هيكون المكتب اللي جمبي على طول واداها ورقه كمان دي ورقه فيها مواعيد اجتماعات الفتره الجايه فيهم مواعيد للاسف داخله في بعض ياريت توريني شطارتك في تنظيم المواعيد خصوصا ان كل الاجتماعات اللي في ايدك دي مهمه جدا ومينفعش اجتماع فيهم يتلغي وفاخر الورقه مكتوب الاماكن اللي ديما بعمل فيها الاجتماعات شوفي المكان الانسب لكل معاد فيهم يعني في يوم فيهم اللي هو بكره تقريبا عندي اجتماع معاده الساعه 7مدته 30دقيقه وفي معاد تاني الساعه 8 مدته45دقيقه كل شركه فيهم مختاره مكان من اللي معاكي والمده بين المكانين تقريبا تلت ساعه شوفي بقي هتعملي ايه ظبطيها مع نفسك وبلغيني معاكي لاخر اليوم اتمني تقدري تظبطي اللغبطه اللي ادامك دي
تمارا وهي باصه عالورق وحاسه انها تاهت ومش مستعوبه نص كلامه
جاسر..بمشاكسه عشان يخليها تتحمس شكلك متوتره وحاسس كده انك متلغبطه اكتر من الورقه اللي في ايدك
تمارا..بتحدي تمام يامستر جاسر ان شاء الله هظبطها وقبل ما اليوم يخلص هكون عامله لحضرتك ملخص كامل بتنظيم المواعيد
جاسر..وهو مش مصدق اتمنى
تقدري تتفضلي على مكتبك الوقت وفي عندك جهاز لاب توب تقدري تظبطي المواعيد من خلاله وتطبعيلي ورقه بالملخص اللي قولتي عليه
تمارا..حاضر بعد اذن حضرتك
جاسر..اتفضلي
وقفت تمارا..مستر جاسر ممكن اسأل حضرتك سؤال
جاسر..بجديه طبعا
تمارا..بارتباك يعني هو لو خطيبة حضرتك عرفت اني بشتغل هنا حضرتك يعني .
قاطعها جاسر..بجديه وتجاهل مقصود لسؤالها انسه تمارا مبروك عالشغل ومستني اشوف شغلك اخر اليوم
تمارا..حست بغضب من جواها
بعد اذنك
خرجت تمارا..على مكتبها وهي مش طيقاه بني ادم بارد ومغرور زي خطيبته
اما جاسر فا ابتسم اول ماتمارا خرجت
جاسر..لنفسه كده حلو اوي
.....
عدي كذا ساعه وتمارا مندمجه فالشغل وجاسر بيراقبها من الكاميرا اللي متوصله باللاب توب بتاعه
وبعد وقت شافها قايمه وبتتحرك ناحيته قفل الشاشه ثواني وكانت بتخبط
جاسر..بتصنع الشغل ادخل
دخلت..تمارا وهو باصص في الورق
تمارا..احممم
جاسر وهو باصص فالورق خير
تمارا..مستر جاسر انا تقريبا ظبطت كل مواعيد الاسبوع بس معاد بكره في مشكله كبيره
جاسر وهو بيرفع وشه اتفضلي اعدي خير
تمارا..بجديه حضرتك معاد اول ميتنج بكره الساعه 7هيخلص سبعه ونص وده مكانه في المهندسين والميتنج التاني معاده الساعه 8 ومكانه في وسط البلد علميا التوقيت بينهم حوالي تلت ساعه وده كويس لاكن عمليا استحاله انك توصل فالوقت ده خصوصا ان التوقيت ده بيبقي صعب جدا مش بعيد تاخد ساعه ان مكانش اكتر
جاسر..والعمل
تمارا..العمل ان مفيش اي حل ادام حضرتك غير ان الميتنج التاني يتأخر نص ساعه عالاقل او يتغير المكان لنفس مكان الميتنج الاول او انهم يختارو مكان تاني يكون فالمهندسين بردو
جاسر..والله لو الميتنج الاول كان مكان التاني كان ممكن ينفع لاكن للاسف الشركه بتاعت الميتنج التاني مبتغيرش مكانها ابدا تحت اي ظرف
تمارا..حضرتك اولا تقدر تسبها عليا ثانيا وده الاهم انهم هما اللي محتاجينكم مش العكس يعني اكيد هيوافقوا
جاسر..بسخريه انتي جايبه الثقه دي منين اولا مفيش الكلام ده ثانيا مفيش حاجه اسمها هما اللي محتاجينا او العكس احنا الاتنين محتاجين بعض الشغل مفيهوش اللي عاوزني يجيني
تمارا..مع حضرتك جدا بس يمكن ده من وجهه نظر حضرتك سبني اجرب واكيد هثبت لحضرتك انهم هيوافقو
جاسر.. باصصلها ومركز وجواه اعجاب من تحديها وفنفس الوقت مش راضي يبينلها
تمارا..قولت ايه يا مستر جاسر
جاسر..بصي ياتمارا انا خليني امشي وراكي بس قبل اي حاجه عايز بس اقولك ان الشركه دي صارمه شويه فالتعامل ومحبش صورت الشركه تتهز خصوصا ان احنا معروف عننا واحد الالتزام بالمواعيد اتنين اننا بنحترم قرارات اي منافس لينا يعني معروفين بالديمقراطيه فالشغل فا اننا نغير مكان دي اول مره تحصل جربي بس عايزك تبقي عارفه ان الميتنج ده مينفعش نخسره عشان فالميتنج ده هيتم التعاقد علي ثفقه ب20مليون جنيه
تمارا..بصتله بصدمه لكن كملت باصرار اديني وقتي وهرجع لحضرتك تاني
جاسر..معاكي كل الوقت
خرجت تمارا..وفضلت حوالي ساعه إلا ربع جوه مكتبها رايحه جايه بتوتر وهو شايفها ومبتسم وعارف انها هترجع في كلامها بعد ما عرفت الرقم واخيرا شافها راحت مسكت التليفون
جاسر..بصدمه يابنت المجنونه
وفاللحظه دي جه لجاسر تليفون معرفش يسمع تمارا
فضلت تتكلم حوالي عشر دقايق
وخلصت وراحت لجاسر على المكتب
جاسر..ادخل
تمارا..تمام يا مستر كله تمام
جاسر..اللي هو ايه
تمارا..بكره الميتنج الاول والتاني هيتعملو في نفس المكان فالمهندسين
جاسر..بصدمه وافقوا
تمارا..بغرور طبعا
جاسر..ازاي
تمارا..دي بتاعتي بقى المهم ان المشكله اتحلت
جاسر..وهو رافع حواجبه لا والله طيب تمام
طب سؤال ليه مطلبتيش ان المعاد يتأخر
تمارا..كنت هطلب كده بس حبيت بدل ما حضرتك تخلص ميتنج وتمشي بسرعه عالتاني في وسط زحمه الطريق وياتوصل بسرعه او لا وفالحالتين هتبقى مجهد واكيد هتكون فاصل يعني حبيت انه يكون في نفس المكان حضرتك هتخلص الميتنج الاول 7ونص يعني ادام حضرتك 30دقيقه تفصل فيهم..لحد الميتنج التاني
جاسر..بابتسامه اعجاب براڤو يا تمارا قدرتي تعدي اول اختبار
تمارا..بابتسامه ارتياح شكرا
عدت الايام من غير اي جديد يوم ورا يوم فات حوالي 10ايام كل يوم تمارا بتحاول على اد ماتقدر تثبت نفسها اكتر بتحاول ترفع راس عم محمد بتحاول تكون اد ثقه جاسر بتحاول تحقق حلمها بتحاول تعوض النقص اللي في حياتها بأنها تنجح اكتر واكتر.
لاكن مش كل اللي بنتمناه بيمشي زي ما احنا عايزين
دار الايتام
البارت الثامن..
في صباح يوم جديد
صحيت تمارا نزلت على شغلها مع حاج محمد كالعاده وقدرت تمارا تثبت نفسها بصوره مشرفه وفي 10ايام اثبتت جدارتها فالشغل اما جاسر مكانش حابب يبينلها ده بالرغم من انه معجب بطريقه شغلها جدا
جاسر..تمارا تعاليلي عالمكتب
تمارا..حالا يامستر جاسر
ثواني وكانت تمارا بتخبط
جاسر..ادخل
تمارا..تحت امر حضرتك
جاسر..اعدي يا تمارا
تمارا..شكرا
جاسر..انهرده عندي ميتنج الساعه 9ونص
تمارا..ايوه عارفه حضرتك والمعاد مظبوط انا مظبطه كل حاجه
جاسر..عارف ياتمارا بس انتي انهرده هتكوني معايا فالميتنج ده
تمارا..انا ليه اقصد يعني
جاسر..اظن اننا متفقين ان في ايام هحتاجك معايا وانتي وافقتي عالنظام
تمارا..ايوه حضرتك وافقت بس يعني الميتنج ده تقريبا اكبر ميتنج ظبطه لحد الوقت ده مدته ساعه ونص يعني هيخلص الساعه11
جاسر..ايوه عارف وفين المشكله
تمارا..مفيش مشكله بس انهرده انا هفضل موجوده لحد الساعه 9تقريبا عشان في ضغط شغل وعشان اروح الميتنج لازم امشي بدري عشان الحق وطبعا زي ما قولت لحضرتك انهرده في ضغط شغل بتهيألي مش هينفع امشي بدري وانا هخلص 9والميتنج معاده 9ونص ده انا على بال ما اخلص و امضي انصراف واخرج من الشركه واحاول اشوف تاكسي او مواصله توديني مكان الميتنج هتكون النص ساعه فاتت والميتنج بدأ
جاسر..بس بس بس ايه كل ده
اولا انتي لا هتروحي في تاكسي ولا هتروحي في مواصله انتي هتمشي معايا من هنا
تمارا..نعم
جاسر..هو ايه اللي نعم
تمارا..لا مقصدش بس مش هقدر مش هينفع خالص
جاسر..هو ايه اللي مش هتقدري ومش هينفع
تمارا حست انها في ورطه مش قصدي ياريت متزعلش مني بس يعني انا مش متعوده اركب مع حد غريب عربيته
جاسر..وهو مستغرب وبيكلم نفسه هو في كده
اولا انا بتهيألي اني مش حد غريب ثانيا وده الاهم احنا مش رايحيين نتفسح ده اجتماع شغل ومهم جدا وضروري وجودك معايا لان باختصار حضرتك السكرتيرة الخاصه بتاعتي ثالثا مش هينفع اروح واستنى جنابك تيجي بعدي او العكس رابعا وده الاهم انتي فالبدايه عارفه ان ده نظام الشغل ووافقتي عليه وعايزك بس تعرفي ان دي مش المرة الاولي والاخيره و تعملي حسابك ان الفتره الجاية هيكون في اجتماعات بره الشركه كتير وانتي هتكوني معايا قولتي ايه
تمارا..طيب يعني ممكن استأذن من بابا
جاسر..هو مش المفروض ان بباكي متوفي
تمارا..انا يعني اقصد بابا محمد
جاسر..تقصدي حاج محمد
تمارا..ايوه
جاسر..باستفسار هو انتي ليه بتقوليله بابا هو انتي تقربيله ايه
تمارا..بارتباك مش عارفه ترد يعني هو في مقام والدي والراجل ده مهم في حياتي اوي يمكن عمل اللي والدي معملهوش معايا
جاسر..حس بتوترها مرضيش يضغط عليها اه ماشي رفع تليفون المكتب الوو
حاج محمد..ايوه ياجاسر يا ابني
جاسر..انت فين ياراجل ياطيب
حاج محمد..انا تحت فالمكتب
جاسر..طيب لو مش هعطلك ينفع تطلعلي المكتب ثواني بس
حاج محمد..ياسلام ولو هتعطلني طالعلك حالا
جاسر..تسلملي ياراجل ياطيب
قفل جاسر وفضل اعد باصص على تمارا..وهو بيشرب سيجارته اما تمارا فاكانت شيفاه بطرف عينها مركز معاها حبت تتلاشاه وفضلت باصه ادامها عشان تهرب من اي اسئله خاصه بصلتها بحاج محمد
دقايق وكان الباب بيخبط
دخل حاج محمد سلام عليكم
جاسر..عليكم السلام تعالي ياحاج محمد
دخل اعد ادام تمارا
حاج محمد بقلق خير ياجاسر يا ابني بعتلي ليه تمارا مزعلاك ولا ايه
جاسر..يعني
بصتله تمارا وهي مبرقه
حاج محمد..عملتي ايه يا اخرت صبري اخلص من نور تطلعيلي انتي
تمارا..معملتش حاجه يابابا والله
جاسر..لا متقلقش هي مش حاجه كبيره اوي انت طبعا عارف نظام الشغل هنا
حاج محمد طبعا
جاسر..المفروض تمارا سكرتيرتي الخاصة واي حاجه في شغلي متوقفه عليها باختصار هي اللي بتظبط وانا بمشي وراها والمفروض ان انهرده عندي ميتنج بره ووجودها معايا مهم عشان لو حصل وأطلب مني تحديد معاد تاني فاهي عارفه مواعيدي وهتقدر تساعدني
حاج محمد كل ده عارفه فين المشكله
جاسر..المشكله انها بتقول انها مش هينفع تركب مع حد غريب وحاولت اقنعها تقريبا اقتنعت بس طالبه انها تستأذن من حضرتك
حاج محمد بابتسامه لتمارا ده شغلك يابنتي وزي ما انتي بتحاولي طول الكام يوم دول انك تشوفي شغلك فا الاجتماعات دي بردو جزء من شغلك وبعدين مين اللي غريب بس ده مديرك وانتي معاه في امان
تمارا..يعني حضرتك موافق
حاج محمد طبعا يا بنتي
تمارا..بس الاجتماع هيخلص 11وعلى بال ما ارجع هتبقي الساعه داخله على 12او اكتر
حاج محمد ياستي ولا تقلقي هكون معاكي عالتليفون هتخرجي تلاقيني مستنيكي ونروح سوا
جاسر..لا ياراجل ياطيب زي ما هخدها من هنا هرجعهالك لحد باب البيت
حاج محمد..لا يابني وعلى ايه التعب انا هخدها
جاسر..تعب ايه بس وبعدين انت مش لسه قايلها ان ده جزء من الشغل انا كمان هشوف شغلي للاخر وهوصلها لحد البيت
حاج محمد ماشي يا ابني اللي تشوفه
جاسر..عايزه تقولي حاجه تاني ولا اطمنتي خلاص
تمارا..لا مفيش
حاج محمد..متقلقيش ياتمارا جاسر وليل وادم ونوح دول اضمنهم برقبتي ومعاه انا مطمن عليكي
جاسر تسلم ياراجل ياطيب
حاج محمد..هقوم بقى اشوف شغلي واسيبكم تكملو شغلكم
جاسر..اتفضل
خرج حاج محمد
جاسر..كده احنا خلاص على معادنا
تمارا..باحراج اسفة ياريت حضرتك متضايقش مني
جاسر..بابتسامه جميله متتأسفيش ياتمارا بالعكس انا مش زعلان حاجه و كويسه انك تكوني بتحترمي كبيرك وانا مش مضايق
تمارا شكرا يامستر جاسر حضرتك محتاج حاجه مني
جاسر..شكرا تقدري تتفضلي
خرجت تمارا وعدى وقت اكتر من ساعه وباقي على معاد الميتنج حوالي ساعه إلا ربع
دخل نوح..على مكتب تمارا اللي بيوصل لمكتب جاسر
نوح..بمرح اهلا اهلا
تمارا..بابتسامه اهلا بحضرتك مستر نوح
نوح..جاسر عنده حد
تمارا..لا لوحده
نوح...طيب انا داخله وبقولك ايه الله يكرمك بلاش مستر نوح وحضرتك دي عشان بتخنق منهم قولي نوح عادي والله وزي الفل
تمارا بضحك معلش بقي اصلي مش متعوده وبعدين عشان احنا في شغل وكده
نوح..خلاص ياستي بصي اي وقت نكون في ادام الموظفين انا مستر نوح غير كده نوح وبعدين ده انتي من ريحه الراجل الطيب عم محمد
تمارا..ماشي اتفقنا
نوح...يا ايه؟
تمارا..بابتسامه يانوح
نوح..هو ده
انا هدخل بقي يلا سلام
تمارا..سلام
دخل نوح عند جاسر دقايق وجاسر مسك التليفون تمارا نوح عندي فالمكتب بنتكلم في شغل ياريت اي تليفون يجيلي متحوليهوش ليا مهما كان مين قولي اني في ميتنج مهم واي حد غير مستر ليل ومستر ادم متدخليهوش واجهزي عشان هخلص مع نوح ونتحرك بسرعه
تمارا..تمام يامستر جاسر
قفلت تمارا وابتدت تقفل في شغلها وتجهز للميتنج فات حوالي ربع ساعه ولسه نوح جوه
وفاللحظه دي اتفتح باب اوضه المكتب بتاع تمارا
وكانت هايدي
تمارا...اتصدمت لما شافتها
هايدي..من غير ماتبص على تمارا كان معاها تليفون بلغي جاسر اني هنا وكملت فالموبايل
تمارا..من جواها وحست انها فرصتها وجت لحد عندها واقسمت من جواها ان لو ده اخر يوم ليها فالشركه لازم ترجع حقها
هايدي اوك يابنتي انا هخلص مع جاسر وهاجي على طول مش هتأخر ياروحي يلا بقي هكلمك تاني باي
بصت هايدي على تمارا وهي لسه مش مركزة جاسر معاه حد
تمارا..وهي بترفع وشها اسفه مستر جاسر مشغول مش هينفع تدخليلو
هايدي بصدمه وغضب انتي بتعملي ايه يابت انتي هنا
تمارا..اولا انا مسميش بت انا اسمي تمارا..ثانيا بعمل هنا ايه بلعب اصل حسيت اني زهقانه شويه فجيت العب هنا شويه
هايدي..نعم يا اختي بتلعبي
تمارا..اصل انتي داخله وشيفاني اعده عالمكتب هكون بعمل ايه اكيد مش بشوف شغلي لا طبعا ودي تيجي طبعا بلعب
اه ونسيت اقولك بعد كده ياريت قبل ما تدخلي تخبطي اظن الذوق بيقول كده
هايدي وابتدا الغضب يعميها انتي ازاي يابت انتي تتكلمي معايا كده وانتي ازاي بتشتغلي هنا اصلا مين اللي سمحلك
تمارا..بابتسامه مستر جاسر
هايدي..وهي بتروح علي مكتب جاسر انا لازم احط حد حالا للمهزله دي وانا هعرفك ازاي تتكلمي معايا كده تلمي حاجتك حالا عشان ثواني وهتكوني بره الشركة
تمارا..وقفت ادامها ببرود استني هنا قولتلك ممنوع مش هينفع تدخلي هو قرب يخلص اصل انا ومستر جاسر عندنا ميتنج بره الشركه
ولما يخرج ابقي حطي حد للمهزله دي براحتك بس ياريت بسرعه قبل ما نمشي
هايدي..وصوتها خلاص جاب اخر الشركه
قسما بالله لو ممشيتي من وشي يا زباله انتي لاكون مرتكبه فيكي جريمه حالا ويا انا يا انتي هنا انهرده والله ماهسيبك
تمارا..بابتسامه وببرود اعلى مافخيلك اركبيه بس بردو مش هتدخلي
هايدي..وهي بترفع ايدها على تمارا انتي شكلك عايزه تتربي فاللحظه دي نوح وجاسر خرجو جري عالصوت
ولسه هتضرب تمارا
جاسر..بصوت يرعب هايدي
مسكت تمارا ايدها قبل ما تضربها وبكل جرأه وتجاهل لجاسر ونوح وتجاهل لشغلها اللي خلاص مهدد انه ميكملش ايدك دي لو فكرتي ترفعيها تاني هكسرهالك وساعتها انتي اللي هتندمي انك فكرتي تيجي ناحيه تمارا ونطرت ايدها وخبطت على كتف هايدي اوك ياشاطره
نوح وجاسر كانوا مصدومين
هايدي..انتي ازاي ياحيوانه انتي تتكلمي معايا كده انتي مش عارفه انا ابقى مين ولا بنت مين مش عارفه ممكن اعمل فيكي ايه
تمارا..بسخريه ولا حتى سمعت عنك في طبق اليوم
نوح...كتم ضحكته
هايدي لجاسر المهزله دي لازم تقف حالا والزباله دي تطرد فورا
جاسر..بغضب ممكن اعرف ايه اللي بيحصل هنا بالظبط
جه صوت ليل من وراهم اللي جه على صوتهم
ليل..انا اللي عايز اعرف ايه اللي بيحصل هنا فالشركه
هايدي..اتسمرت مكانها من صوت ليل لانها بتخاف منه وعارفه انه مبيحبهاش
نوح..منعرفش يا ليل احنا كنا جوه بنخلص شغل وخرجنا زيك بالظبط عالصوت
جاسر..بغضب في ايه ياهايدي وايه اللي جابك الشركه
هايدي..ايه اللي جابني ده اللي همك مش همك اللي الزباله دي عملته فيا
جاسر..هايدي كلمه زياده وهفقد اعصابي
هايدي..ماشي ياجاسر براحتك بس اولا ازاي البت دي تشتغل معاك من غير ما اعرف
ليل..وهو بيكلم جاسر بطريقه تخوف ايه ياجاسر هو المفروض لما نعين حد هنا ناخد الاذن من الانسه هايدي
هايدي..بارتباك لا ياليل باشا مقصدش بس البنت دي في بينا حساب قديم
ليل..الحسابات متتصفاش في شركه السيوفي يا انسه هايدي وبعدين اللي اعرفه انك تقريبا خبطيها بالعربيه قبل كده يعني هي اللي ليها حساب معاكي
هايدي..حساب ايه دي طولت لسانها عليا بعد ما ودتها المستشفي حتى اسأل جاسر والوقت جيت ادخل لجاسر منعتني وبتتكلم بطريقه زباله وبتقولي مش هدخل واعلى مافخيلك اركبيه
ليل..الكلام ده حصل يا انسه تمارا
تمارا بكل ثقه حصل يامستر ليل
بس هي لو تقدر تقول السبب تقوله بس مظنش ان عندها الجرأه عموما انا هقول لحضرتك اللي حصل
اولا الانسه دخلت المكتب عليا مره واحده من غير ماتستأذن واظن ان ده مش من الذوق
هايدي..بغضب ذوق مين يا
قاطعها جاسر بصوته هااايدي خلصت كملي ياتمارا
تمارا..الانسه طلبت تشوف مستر جاسر وطبعا هي مكانتش شافتني لانها كانت بتتكلم فالموبايل ومش مركزه ولما قفلت قالتلي مستر جاسر معاه حد قولتلها اسفه مستر جاسر مشغول مش هيقدر يقابلك ولما وركزت وعرفت اني انا نفس اللي خبطتها قالتلي
انتي بتعملي ايه يابت انتي هنا
قولتلها بلعب اصل سؤال غريب داخله عليا مكتبي وشيفاني بشتغل واعترضت على كلمه بت واعترضت عشان مخبطتش قبل ما تدخل فضلت تزعأ وتتعصب وقالتلي تلمي حاجتك عشان هتترمي بره الشركه ومش هسيبك وكلام غريب كده وراحت على مكتب مستر جاسر ولما منعتها كانت هترفع ايدها عليا وطبعا انا ممنعتهاش مني لنفسي مستر جاسر طلب مني اني محولش اي مكالمه ليه واي حد يحب يدخل مدخلهوش واقول انه في ميتنج مهم طبعا بأستثناء حضرتك ومستر ادم
ليل..انت طلبت من تمارا كده
جاسر..ايوه
ليل..يعني هي كده بتعمل شغلها
جاسر..اسف ياليل عاللي حصل واسف يا انسه تمارا عالموقف السخيف اللي اتحطيتي فيه
هايدي..نعمم انت بتتأسف للزباله دي
جاسر..كلمه زياده وهتشوفي مني تصرف مش هيعجبك انا ماسك نفسي بالعافيه وانتي مصممه تخلي منظري ومنظرك زي الزفت
هايدي..ده بدل ما تجبلي حقي
جاسر.حقك انتي اللي غلطي مش وكفايه انك جايه مكتبها ترفعي ايدك عليها
هايدي..هي اللي استفزتني
جاسر..بصوت عالي الكلام خلص
هايدي..ماشي ياجاسر بس وديني ما هسكت والزباله دي انا هعرف اربيها بطريقتي وسابتهم ومشيت
ليل..بجديه اللي حصل ده لازم تحطله حد واول واخر ومره اشوفها تجيلك هنا احنا هنا في شركه محترمه واظن مش ظريف ان الموظفيين يتلموا على صوت خطيبتك
تمارا..وهي بتحاول تهدي الموقف مستر ليل ممكن اقول حاجه
ليل..اتفضلي
تمارا..مستر جاسر ملوش ذنب هو خرج من مكتبه في نفس الوقت اللي حضرتك جيت فيه ومستر نوح كان معاه جوه تقدر تسأله وبعدين انا مش عايزه اكون سبب في اي مشكله او لغبطه اللي حصل ده كله بسببي انا من البدايه قولت لمستر جاسر ان ممكن يحصل مشكله واللي حسبته طلع صح بس مكنتش عارفه ان المشكله ممكن تكبر كده فا بعد اذنك مستر جاسر ملوش ذنب وانا ممكن امشي حالا لو وجودي هيسيب مشكله بينكم او بين مستر جاسر وخطيبته
ليل..اولا مفيش بيني وبين جاسر مشكله خالص ولا اي حد يقدر يخلي في بينا مشكله ثانيا انتي ملكيش دعوه
هي اللي غلطت
ثالثا..وده الاهم مينفعش انك تتنازلي عن شغلك بسهوله كده ده مش صح
تمارا..انا مش بتنازل عن شغلي بس مش حابه اكون سبب مشاكل فالمكان اللي بشتغل فيه
جاسر..وهو على اخره ليل الكلام خلص واللي حصل من شويه ده مش هيتكرر تاني تحت اي ظرف حتى لو كانت ايه نتيجته
ليل..بحزم اتمنى وخرج من غير ولا كلمه
جاسر..تمارا جاهزه
تمارا..ايوه يامستر جاسر
جاسر..طب يلا مفيش وقت الميتنج فاضل عليه ربع ساعه
تمارا..تمام
نوح..لجاسر براحه فك حوار وخلص
جاسر..ماشي يانوح يلا سلام
خرج جاسر ووراه تمارا من غير ولا كلمه
راح نوح وادم..مكتب ليل
ادم ايه بوص روق كده
ليل..اروق ليه مانا زي الفل اهو مفيش حاجه.
نوح...انت مش شايف نفسك ده انا ذات نفسي اترعبت منك بس انت جيت على جاسر اوي يا ليل
ادم..صراحه اه
ليل..كان لازم يحصل كده جاسر لازم يفوق شويه ويركز
في كل الاحوال هايدي مش هتنفعه
ادم..انت صح بس هو بيحبها
ليل ..بعصبيه خبط عالمكتب مفيش حاجه اسمها حب كلهم زي بعض اخرهم معانا سهره وبس عايز يخطبها وخطبها عادي حتى لو عايز يتجوزها بردو عادي هو حر بس لما يكون اللي بيحبها زباله يبقى لازم افوقه
نوح..اهدى كده بس ياعم خلاص حصل خير هو كمان اصلا شكله ميطمنش وشكله قلب عليها وليلتها سوده معاه
سيبك انت البت قريبت حاج محمد شكلها ايه نمره وجدعه
ادم..صراحه اه واقفه تتكلم بثقه انا حسيت لاخر لحظه انها مستبيعه ومهمهاش الشغل يطير منها رغم انها عارفه انها خطيبة مديرها
نوح..بضحك امال لو كنت شوفتها وهي ماسكه ايد هايدي وبتقولها ادامي انا وجاسر لو ايدك اتمدت هكسرهالك
ليل..جدعه كويس انها مسابتش حقها
المهم خلصتو شغلكم
ادم...انا لسه ادامي ساعه
نوح..انا كمان لسه
ليل..طب يلا يا اخويا انت وهو لما لسه عندكم شغل جايين تحكو ليه
نوح لادم يلا بدل ما يتحول علينا
ادم..انا بقول كده
خرج ادم ونوح بسرعه من ادام ليل
اما ليل فا كان دماغه لسه مشغوله بحاجه ولسه نظرت الغموض مفارقتهوش
في عربيه جاسر كان ساكت طول الطريق وتمارا كمان كان سايق بسرعه تخوف
اما تمارا..فكانت اعده جمبه بتتشاهد على روحها
وصلو اخيرا المكان فالوقت المناسب
وابتدا الاجتماع كانت تمارا كل فتره تبص عليه وهو كان مندمج فالشغل جدا وكأن مفيش حاجه حصلت
هو كمان كان كل فتره والتانيه يبص على تمارا ويبعد عينه بعد فتره
خلص الاجتماع الساعه 11ونص
ركب جاسر وتمارا كانت حاسه بتعب وصداع من اليوم الطويل
جاسر..معلش ياتمارا الاجتماع طول نص ساعه عارف اني اخرتك
تمارا..لا خالص يامستر جاسر بابا عارف خلاص
جاسر..عموما الطريق الوقت رايق ان شاء الله مش هأخرك
تمارا..هو ممكن حضرتك تسوق براحه شويه
جاسر..انتي مش عايزه توصلي بسرعه
تمارا..ايوه بس مش عايزه اموت
جاسر..بابتسامه جذابه انا هموتك
تمارا..بنفس الابتسامه لا مش قصدي بس حضرتك واحنا جايين كنت سايق بسرعه اوي وبصراحه انا بخاف
جاسر..انا كنت سايق بسرعه بس عشان الميتنج كان قرب كفايه الوقت اللي ضاع بس عموما ياستي حاضر هسوق براحه
تمارا..مستر جاسر
جاسر..نعم
تمارا..انا اسفه
جاسر..علي ايه
تمارا..عاللي حصل انا عارفه ان بسببي حضرتك وخطيبتك اتخانقتو بس والله انا نفذت اللي حضرتك طلبته
جاسر..اولا متتأسفيش انت مش غلطانه انا اللي اسف عاللي هي عملته ثانيا بقي وده الاهم مش معنى ان هايدي خطيبتي وبحبها اني اوافقها عالغلط هي غلطت والمفروض تتحمل نتيجة غلطها ومش معني انها خطيبتي اني اجي عليكي انا مش كده عموما متقلقيش هبقى اصالحها بس لما تحس انها غلطت
تمارا..حست انها اضايقت من كلمه بحبها لكن مش عارفه ليه ان شاء الله
لمح..جاسر تحول على ملامحها
جاسر..انتي كويسه
تمارا..ايوه صداع بسيط مش اكتر
جاسر..طب يلا بينا اتحرك جاسر بالعربيه
اما تمارا..كانت باصه من الشباك بتكلم نفسها هو انا اضايقت ليه عشان قال بحبها ماهي خطيبته ولازم يكون بيحبها انا بقي ليه مضايقه ليه حاسه اني غيرانه
تمارا.بصدمه غيرانه انا قولت غيرانه لا لا لا اكيد انا بخرف بس لا انا مش بخرف انا اتعمدت اني اضايقها لا بس هي اللي بدأت من يوم ما خبطتني بالعربيه وانا كنت باخد حقي منها بس لا انا مجاش في بالي يوم ما خبطتني انا كان جوايا شعور اني اضايقها وبس خصوصا انها كانت عايزه تدخله فوقي لنفسك ياتمارا اللي انتي حساه ده مينفعش تحسيه انتي مش زي هايدي ولا زي اي بنت عاديه انتي ظروفك متنفعش تخليكي تحبي وترتبطي تمارا بس ليه محبش فوقي ياتمارا انتي نسيتي انك بنت حرام
تمارا..بحزن بس انا مليش ذنب حتى لو مليش ذنب هتحاسب بذنبهم
ايوه بس جاسر مش كده
تمارا تاني جاسر فوقي ياتمارا جاسر خاطب وبيحب خطيبته
جاسر..حمدالله عالسلامه
تمارا ساكته ومش معاه
جاسر..تمارا
تمارا.شارده خالص
جاسر..هزها من كتفها تمارا انتي نمتي
تمار..بعدت بسرعه اول مالمسها
جاسر...اهدي اسف مقصدش بس بنادي عليكي ومش بتردي فكرتك نمتي
تمارا..لا مفيش حاجه انا منمتش بس كنت سرحانه
جاسر..انتي كويسه
تمارا..بحزن ايوه
جاسر..متأكده
تمارا..ايوه انا تمام
جاسر..ماشي احنا وصلنا يلا انزلي عشان حاج محمد ميقلقش
تمارا..بحزن باين على عنيها حاضر لسه هتفتح الباب وتنزل
جاسر..تمارا
تمارا..بصتله نعم
جاسر..خلي بالك من نفسك
تمارا..شكرا يامستر جاسر
جاسر..على فكره تقدري تقوليلي جاسر احنا هنا مش فالشغل
تمارا..كمان اقولك جاسر حضرتك عايز خطيبتك تولع فيا
جاسر..ضحك لا وانتي وش خوف ده انتي كنتي هتاكليها
تمارا..بابتسامه رغم الحزن اللي في عنيها ده انا غلبانه
جاسر..اوي الحقيقه
تمارا..حضرتك بتتريق
جاسر..وهو بيرفع ايده لا ابدا أنا اقدر
تمارا..بابتسامه تصبح على خير
جاسر..وانتي من اهل الخير يلا اطلعي..وانا واقفلك
تمارا..ايه هتخطف
جاسر..بيتهيألي اللي هيحاول هيندم
تمارا..بضحك ابتديت تعرفني
جاسر..طب يلا اطلعي
تمارا..سلام
جاسر..سلام
طلعت تمارا اما جاسر فا اول ما اختفت من ادامه واطمن انها طلعت مشي
واتصل بحاج محمد فنفس الوقت كان باب الشقه بيخبط رد حاج محمد وهو رايح يفتح الباب
حاج محمد..ايوه ياجاسر يا ابني
جاسر..ايوه ياراجل ياطيب تمارا طلعت
حاج محمد..ايوه ياابني لسه فاتحلها اهي ادامي
جاسر..طيب تمام واسف عالتأخير
حاج محمد..ياخبر اسف على ايه يا ابني شكرا انك جبتها لحد هنا وتعبت نفسك
جاسر..تعب ايه بس ياراجل ياطيب يلا مش هطول عليك
حاج محمد..مع السلامه يا ابني
جاسر..مع السلامه
تمارا..منمتش ليه كل ده
حاج محمد..هنام قبل مطمن عليكي
تمارا..ربنا يخليك ليا يابابا البنات فين
حاج محمد..جوه في اوضتهم ملهمش صوت شكلهم نامو
تمارا..طيب يلا ادخل نام وانا كمان هدخل اشوفهم وانام
حاج محمد..طب مش هتاكلي حاجه قبل ما تنامي
تمارا..لا يابابا انا الحمد لله كلت عايزه بس ارتاح عشان اقدر اصحر للشغل
حاج محمد..طيب يابنتي يلا ادخلي
تمارا..تصبح على خير
حاج محمد..وانتي من اهل الخير يابنتي
دخلت تمارا لقتهم نامو خدت هدومها وراحت خدت شاور دافي وخرجت عالسرير فضلت تفكر فاحداث اليوم كله لحد ما النوم غلبها
.........
في صباح يوم جديد ملئ بالاحداث
صحيو الكل على شغلهم ونور على جامعتها
اما بطلنا بعد ما صحي وخد الشاور بتاعه ولبس ونزل عشان يروح على شركته
كانت والدته محضره الفطار وادم ونوح اعدين عالسفره
نزل ليل عالسلم بخطوات ثابت لابس بدله سوده وقميص ابيض سايب اول كام زرار وريحة البرفيوم بتاعته ماليه المكان
ليل..بثقه صباح الخير
ادم ونوح صباح الخير
سهام..صباح الخير يا حبيبي
ليل..صباح الخير ياست الكل
ليل..هتسافري امته يا امي
سهام..الطياره كمان اربع ساعات يعني على 12الظهر كده
ليل..حضرتي كل حاجتك
سهام..اه يا حبيبي والله انا ما عارفه هسيبكم ازاي
لولا ان مني مرات عمك مفيش حد هيروح معاها مكنتش روحت
ليل..ايه يا امي هو احنا اطفال ماحنا ادامك اهو رجاله متقلقيش
سهام..طبعا يا حبيبي بس انت عارف انا مبطمنش غير وانا شيفاكم ادامي
ليل..معلش يا امي انتي عارفه ان مرات عمي اخوها الوحيد متوفي وعمي وجاسر الايام دي مطحونين فالشغل يعني محدش هيقدر يسافر معاها
وبعدين ده كلها اسبوعين تعمل التحاليل بتاعتها كلها وتطمن وترجعو
سهام..ان شاء الله
نوح..هو حد يجيله سفريه لندن ياسوسو ويرفض طب ياريت ابنك يرضي يديني اجازه واروح معاها انا
ادم..على فكره ماما رايحه معاها مش رايحه تتفسح
نوح..وايه يعني ما يطمنوا ويتفسحوا ياساتر اعداء الفرح
سهام..والنبي انت رايق يانوح الست رايحه تطمن على نفسها بعد عمليه استئصال الورم وانت تقول نتفسح
نوح..ياماما ماهي عامله العمليه من ست شهور وحالتها بقت احسن انتو بس رايحين تطمنو عليها وان مفيش اي ورم تاني وكله تمام ايه بقى اللي يمنع انكم تغيرو جو مش بقولكم انا جيت العيله دي غلط
ليل..على فكره بقى نوح عنده حق يا امي
نوح..ايوه بقى حد مره ينصفني
ليل..بس يالا
نوح..ملحقتش اتنصف حاضر سكت
سهام..يا ابني الست رايحه خايفه هقولها تعالي نخرج
ليل..وايه اللي يمنع غيرو جو ده حلو لنفسيتها وفنفس الوقت تغيري انتي كمان جو
سهام..حاضر يا حبيبي نطمن بس عليها وليكو عليا مش هاعد انا وهي
ليل..ان شاء الله تتبسطو ونطمن عليها انا هروح بقى عالشركه يلا ادامي منك ليه
سهام..طب اسلم عليكو بقي الوقت
ليل..قرب منها وخدها في حضنه توصلي بالسلامه يا امي السواق هيكون عندكم على 10ونص عشان تلحقو تروحو المطار وهناك انا مجهز كل حاجه في عربيه هتكون معاكم في كل مكان تحبو تروحوه لحد ما ترجعوا تاني
سهام..ماشي ياحبيبي اشوف وشكم بخير
نوح..هتوحشيني ياسوسو وهيوحشني اكلك
سهام..بقى هو ده بس اللي هيوحشك
ادم..وهو بيضربو على دماغه طفس
سهام..وهي بتحضن ادم هتوحشني يا دومي
ادم..وانتي اكتر يا امي هكلمك كل شويه
سهام..وانا كمان هكلمكم كل شويه
ليل..يلا ادامي منك ليه خليها تجهز نفسها لا إله إلا الله
سهام..لا إله إلا الله يا حبيبي
.......
وصل ليل وادم ونوح الشركه طلعو على مكاتبهم
دخل ليل مكتبه وطلب قهوته وأتصل على جاسر
جاسر..الو
ليل..تعلالي عالمكتب
جاسر...اوك يا ليل
دقيقه وكان جاسر عنده
جاسر..صباح الخير.
ليل..حابب يصالحه بس بطريقه غير مباشره
ليل..صباح الخير اعد مالك واقف ليه
اعد..جاسر خير ياليل
ليل..مالك يالا عامل كده ليه انت زعلان مني بقى
جاسر..لا خالص من امته وانا بزعل منك يا ليل
ليل..لا والله
جاسر..انا بس مضايق عشان ماما مش اكتر.
ليل..ومضايق ليه ماهي كويسه واحسن كتير عن الاول هي رايحه بس تطمن اكتر على نفسها
جاسر..عارف بس قلقان عليها مش اكتر
ليل..هتبقى زي الفل متقلقش
جاسر..يارب
ليل..المهم مش عايزك تبقي زعلان مني وعايزك تعرف ان اللي حصل ده مينفعش انت عارف احنا وضعنا ايه مش بس فالشركه ده فالبلد وبره البلد كمان احنا اسمنا لوحده يرعب يا جاسر ومش بعد كل ده يتقال ان خطيبة جاسر باشا بتتخانق مع سكرتيرته
جاسر..على فكره انا مش زعلان وقولتلك ان مينفعش اصلا ازعل منك وانت عندك حق اللي حصل امبارح مينفعش انه يحصل من البدايه
ليل..عملت ايه مع هايدي
جاسر..ولا حاجه مكلمتهاش من ساعة اللي حصل ولا ناوي اكلمها
ليل..بفرح بيحاول يداريه ليه بس
جاسر..لاوالله عليا طب اعملهم على حد غيري مش انا ياصاحبي
ليل..مش فاهم
جاسر..لا انت فاهم وانا فاهم وعارف انك مبتحبش هايدي ولا بتنزلك من زور وتتمنى اسيبها انهرده قبل بكره
ليل..جاسر انت عارف انت عندي ايه صح
جاسر..اكيد
ليل..انا مبكرهش هايدي بس انا واثق انها مش هتنفعك انت حر ويمكن دي اول مره اقولك كده بس طالما انت فتحت الكلام يبقى لازم اتكلم عايزك تعرف بس قبل ما اتكلم ان موضوعي مع ريما ملوش اي علاقه يعني متخافش انا مش معقد بس هايدي وريما ميختلفوش عن بعض كتير دي خاينه ودي ماديه هايدي كل اللي يهمها ان الفيزا بتاعتها تكون مليانه و اي حاجه تشاور عليها تكون عندها انت بالنسبالها خزنه وانت عارف ان ابوها عاجبه الموضوع لانه زيها مادي واهم حاجه عنده الفلوس هايدي كل اللي بتهتم بيه الفلوس الميكب اللبس الخروج السفر الشله دول رقم واحد في حياتها تقدر تقولي انت فين من حياة هايدي تقدر تقولي لو حبيت انت تحط نفسك في مقارنه مع كل الحاجات اللي هايدي متقدرش تستغني عنها دي كفة مين اللي هتتقل انت ولا شلتها والفلوس وخروجها طب لو انت مش معاك فلوس هايدي هتكمل تقدر تقولي امته حسيت انها محتاجاك لشخصك مش لفلوسك ومنصبك ومكانتك جاسر انت الف بنت تتمناك ولو شاورت بصباعك هتلاقي بدل البنت الف
بص يا صاحبي يمكن اللي بقوله ده يضايقك بس لو انا مفوقتكش ونصحتك يبقى مستاهلش اكون ابن عمك وصاحبك واخوك
جاسر..عندك حق فكل ده ياليل انا يمكن حبيت هايدي اكتر بكتير ماهي حبتني وعايز اقولك عمري ماحطيت موضوع طلبها للفلوس الدايم ده في دماغي بالعكس كنت ببقى مبسوط وعملت زي ما انت قولت قبل كده بس مع نفسي حاولت احط نفسي في مقارنه مع كل اللي هي بتحبه ده لقيت ان هي متقدرش تستغني لا عن الفلوس ولا عن شلتها ولا عن اي حاجه هايدي اهم حاجه عندها المظهر
ليل..افهم من كده ايه
جاسر..سبها عالله الفتره اللي جايه في حاجات كتير هتتغير ويا تمشي عاللي انا عايزه او كل واحد يروح لحاله
ليل..بص ياجاسر مش عايز الموقف اللي حصل او كلامي يسخنوك عليها عشان كده اديها فرصه وزي ما انت بتقول يا تمشي عاللي انت عايزه او تدور عاللي تستاهلك بجد
جاسر..هو ده اللي ناوي اعمله وهبدأ باني مكلمهاش لحد ما اشوف هفرق معاها ولا هتكلمني لما تحتاج حاجه
ليل..تمام والمهم تمارا متجيش عليها انا شايف انها مغلطتش هي اه لسانها طويل شويتين بس الغلط مش منها ومتنساش انها تبع عم محمد
جاسر..عارف ياليل اطمن هي فعلا ملهاش ذنب
صحيح..نسيت اسألك
ليل..خير
جاسر..غريبه يعني انك مجبتش قرارها دايما اي حد بيشتغل لازم تبقى عارف اصله وفصله ولا عشان هي من ريحة حاج محمد
ليل..عيب عليك ليل مبيتغيرش حتى مع امه وابوه اه حاج محمد بالنسبالي امان وثقه بس الشغل عندي شغل وادام ممكن تكمل معانا يبقى لازم اعرف كل حاجه عنها خصوصا ان انا مش داخل عليا حتت قريبته دي
جاسر..يعني ايه
ليل..مش عارف يعني ممكن تكون اي حاجه غير قريبته وعموما حتى لو قريبته حقي اني اطمن خصوصا ان هو اي وقت تيجي سيرتها احسه بيغير الموضوع
جاسر..وهي كمان على فكره
ليل.عشان كده بقولك اني مش ساكت
جاسر..وصلت لحاجه
ليل..انهرده او بكره بالكتير هجيب اصلها وفصلها من يوم ما اتولدت
جاسر..تمام
ليل..يلا روح شوف اللي وراك وجهز نفسك لاجتماع الساعه 3
جاسر..تمام
.......
عدت الساعات بسرعه وجاسر متجاهل تمارا حتى تمارا متجاهلاه تماما..خصوصا انها حاسه ان جواها لغبطه بتحاول تسيطر على نفسها وتفوق نفسها من الشعور اللي هي حساه
خرج..جاسر من مكتبه كانت تمارا ماسكه في ايدها قلم وسرحانه في دنيا تانيه
جاسر..تمارا يلا الاجتماع هيبدأ في خلال عشر دقايق
تمارا..سرحانه
جاسر..تمارا
تمارا..بفزع قامت وقفت مستر جاسر اسفه
جاسر..ايه انتي فين
تمارا..اسفه بس كنت سرحانه
جاسر بجديه أظن احنا في شعل والسرحان ده مينفعش
تمارا..اسفه يامستر انا خلصت الورق وجهزته وكنت مستنيه معاد الاجتماع مش اكتر
جاسر..تمام يلا هاتي الورق وتعالي ورايا
تمارا..حاضر
.......
دقايق وابتدى الاجتماع اللي طال لمدة ساعتين
اما عند عشق كانت حاسه بتعب جامد وطول اليوم بتعطس وعنيها بتدمع من البرد اللي وخداه
الدكتور..عشق انتي كويسه
عشق..ايوه يادكتور الحمد لله
الدكتور..امال مالك اعده بتعطسي طول اليوم وشكلك مش مظبوطه
عشق..ابدا تقريبا اخدت برد امبارح وانا مروحه المطره كلها خدتها على دماغي
الدكتور..باين عليكي طب قومي خدي حاجتك وروحي كده كده مفيش شغل خلاص انهرده الجو بره مطر واليوم انهرده هادي خالص انا كمان هروح
عشق..حضرتك هتروح ولا بتقولي كده عشان امشي
الدكتور..لا والله هروح وزي ما انتي شايفه الولاد اعدين كل شويه يكلموني عشان اروح قال ايه وحشتهم
عشق..بابتسامه ربنا يخليهم لحضرتك صحيح هما عندهم اد ايه
الدكتور..كريم 8سنين وياسين6
عشق..ربنا يحفظهم ويخليك ليهم يارب
الدكتور..يارب اللهم امين يلا قومي بقى روحي شكلك تعبانه وكويس بكره اجازه عشان ترتاحي
عشق..شكرا جدا يادكتور
الدكتور..العفو ياعشق خلي بالك من نفسك وخلي بالك المطر شغال بره
عشق..ربنا يستر
خرجت عشق عشان تركب وتروح بصت في شنطتها تتأكد من المفتاح افتكرت انها مخدتهوش
كلمت..نور
نور..الو
عشق..نونه عامله ايه
نور...ايه ده مال صوتك
عشق..عندي برد جامد
نور..سلامتك ياقلبي اكيد خدتي برد جامد انتي امبارح كنتي جايه عدمانه من المطر
عشق..اه فعلا المهم انا مروحه الدكتور مشاني لما لقاني تعبانه وافتكرت ان المفتاح مش معايه انتي فين
نور...ياخبر نسيتيه انا فالجامعه ومش هاجي الوقت عندي محاضرات مهمه هخلص على 6 وفيها ساعتين على ما اجيب ورق والمطر ده يهدى واجي
عشق..خلاص يانونه هكلم البت زهره اكيد معاها المفتاح
نور..زهره ايه استني زهره هنا فالجامعه..انتي نسيتي انها قالت امبارح انها استأذنت من الشغل عشان تحضر السكشن وتجيب ورق ليها هي وتمارا وليكي انا قابلتها من شويه وطلعت تحضر السكشن وهنرجع سوا
عشق..ياخبر انا نسيت خالص طب والعمل
نور..كلمي تمارا ولا بابا
عشق..بس دول بيجو متأخر
نور..يمكن يروحو بدري انهرده
عشق..طيب انا هكلم تمارا
نور ماشي ياروحي ابقى طمنيني عملتي ايه
عشق..حاضر يا نونتي خلي بالك من نفسك انتي والبت زهره
نور..حاصر ياقلبي وانتي كمان سلام
عشق..سلام
عشق لنفسها بقى ياربي اليوم اللي اروح فيه بدري انسي المفتاح والكل مش فالبيت اتصلت على تمارا وفضلت ترن ترن مفيش اي رد اتصلت بحاج محمد
حاج محمد..الو
عشق.ايوه يابابا
حاج محمد خير يابنتي اول مره تكلميني وانتي في شغلك
عشق..خير يا بابا متقلقش انا خرجت مروحه عشان تعبانه وبكلم تمارا مش بترد قولت اشوفك
حاج محمد.تمارا في اجتماع واكيد سايبه موبايلها وانا بجيب حاجه من مكتبي وطالع تاني عالاجتماع كويس اني نزلت وشوفت التليفون مالك فيكي ايه
عشق..لا يابابا شويه برد والدكتور روحني بس بدور عالمفتاح مالقتهوش
حاج محمد..بردو مخدتيهوش
عشق..مانا بنساه يابابا والله وبعدين انا بروح متأخر بتكونو كلكم فالبيت بس كلمت نور لسه مش هتروح الوقت وزهره راحت انهرده الجامعه نسيت خالص انها رايحه فاقولت اشوفك او اشوف تمارا يمكن تكونو هتروحو بدري انهرده
حاج محمد.لا يابنتي لسه مش هنروح الوقت وبعدين ما زهره فعلا مستأذنه من شغلها عشان تروح الجامعه
عشق..خلاص متشغلش بالك ياحبيبي انا هتصرف
حاج محمد..مشغلش بالي ايه الدنيا بتمطر والليل خلاص هيليل هتعملي ايه
عشق..هلف كده شويه وبعدين اروح استناكم عالباب لحد ما تيجو
حاج محمد..تلفي ايه وانتي تعبانه كده الساعه داخله على خمسه خلاص بقولك ايه تعالي عالشركه الوقت حالا واهو الاجتماع شويه وخلاص هيخلص وعلى ماتيجي ان شاء الله نكون قربنا نخلص ونروح سوا
عشق..لا شركه ايه يابابا
حاج محمد..اسمعي الكلام يلا تعالي وهنروح انا وانتي وتمارا سوا
عشق..انا مش عايزه اعملكم مشكله خصوصا ان حضرتك بتقول صاحب الشغل شديد
حاج محمد..لا شديد على اي حد غير حاج محمد وكمل بطريقه مرحه انتي مستقليه بابوكي ولا ايه
عشق..بابتسامه مقدرش ياحبيبي
طب قولي العنوان
حاج محمد قالها العنوان اول ما تيجي كلميني لو مردتش ادخلي وبلغيهم تحت انك طلعالي فالمكتب
عشق..بضحك لا واصل
حاج محمد..انتي لسه متعرفنيش ده انا جامد اوي
يلا يابت اخلصي وتعالي بقى وسبيني عشان متأخرش عليهم
عشق..حاضر ياحبيبي بقولك ايه متقولش للبت تمارا اني جايه عشان اعملهالها مفجأه
حاج محمد..حاضر مش هقولها يلا سلام خلي بالك من نفسك
عشق..حاضر سلام
عدى حوالي ساعه وصلت عشق الشركه وكان انبهاراها ميقلش عن انبهار تمارا اول مره شافت فيها الشركه اتصلت على عم محمد مكنش بيرد
دخلت عالشركه وقفها موظف الامن
على فين يا انسه
عشق..طالعه لحاج محمد
موظف الامن..ايوه اتفضلي هو بلغني بس هو مش في مكتبه الوقت
عشق...عارفه هو قالي انه فاجتماع واستناه في مكتبه
موظف الامن..تمام اتفضلي هو عموما الاجتماع خلاص تقريبا هيخلص عارفه الدور
عشق..ايوه هو قايلي شكرا
موظف الامن العفو
طلعت عشق الدور اللي فيه مكتب حاج محمد واللي كان فيه نفس اوضه الاجتماعات
عشق..من اول ما دخلت وكل اللي يشوفها يتنح من جمالها وصلت عشق ادام المكتب وقفها موظف على فين يا انسه
عشق..انا داخله عند بابا
الموظف انتي بنت حاج محمد
عشق..ايوه
الموظف..طيب هو لسه في اوضه الاجتماعات
عشق..ادامه كتير
الموظف لا خلاص الاجتماع خلص بس هو لسه جوه انا عموما داخل اودي ورق تحبي اقوله
عشق.لو ينفع مش هينفع انا هستناه
الموظف..اسم حضرتك ايه
عشق..قوله عشق
الموظف دخل وسابها وهو متنح
خبط عالاوضه ودخل وهو ماسك الورق اداه لليل وفضل واقف
ليل...في ايه واقف متنح كده ليه اتفضل
الموظف..لا اصل في حد عايز حاج محمد
ليل..مين
الموظف..بتقول بنته
ليل..نور خليها تيجي الاجتماع خلص خلاص
حاج محمد..ياخبر انا ازاي نسيت
الموظف بس هي مقالتش اسمها نور
ليل..نعم امال مين اجري اندهلها
الموظف..حالا
حاج محمد وتمارا بيبصوا لبعض
ثواني ودخل الموظف ومعاه عشق
تمارا..بفرحه عشق
ليل ونوح وادم وجاسر تنحوااا
يتبع
تعليقات
إرسال تعليق