 |
دار الايتام
البارت الاول والثاني
في صباح يوم غريب
صحيت تمارا وزهره على صوت صراخ عشق
تمارا... عشق عشق قومي
زهره.. هزتها بعنف عشان تصحي عشق قومي
عشق صحيت وعلى وشها حبات عرق اشهد ان لا إله إلا الله
تمارا... الله يخربيتك ياشيخه كل يوم تصحينا على الرعب ده ايه في ايه.
عشق كابوس ياتمارا كويس أنكم صحتوني.
تمارا الله يخربيت تمارا عاليوم اللي شافتك فيه تمارا يابنتي انا هقطع الخلف بسببك قريب.
زهره.حلمتي بأيه ياعشق.
تمارا...لا والنبي بلاش تقول احسن دي احلامها مبتقعش الارض بلاش احسن يتفسر انتي مش شايفه شكلها عامل ازاي اكيد حلم زي وشها.
زهره. ضحكت طب ياريت يكون زي وشها دي عشق قمر.
عشق..لتمار ماشي ياكلبه البحر لولا ان الكابوس مأثر عليا كنت روقتك بس انا مش فيقالك.
تمارا.حلمتي بأيه يا اخرت صبري.
عشق..والله ما عارفه حلم غريب وملغبط وطول الحلم بجري وخايفه ومش لاقيه مكان اروحله وكلاب بتجري ورانا.
تمارا.. قطعت كلامها ورانا ايه يعني احنا معاكي
مش بقولك يازهره انها بومه خدتينا معاكي ليه يابعيده
عشق انتو لازقين في حياتي اصلا انا بروح مكان من غيركم
تمارا الله يرضي عنك لما تروحي بعد كده في اي مكان خدينا بس اي حلم سبينا ياستي انا اللي بقولك
زهره.سيبك منها كملي
عشق.انا مش فاكره الحلم بس طول الحلم احنا التلاته بنجري وخايفين وأبله حنان واقفه مكشره وماسكه في ايدها حبل زي بتاع المشنقه وواقفه بيه عالباب بتاع الدار عشان مندخلش وفنفس الوقت خايفين نمشي عشان الكلاب
تمار...اللهم صلي عالنبي حنان بوز الاخس فالحلم وماسكه حبل مشنقه وكلاب لا كده بان خلاص صباحك الفل
عشق.. ربنا يستر
فاللحظه دي خبط الباب.
عشق..ادخل
دخلت داده من اللي بيشتغلوا فالدار.
فاطمه.. صباح الخير يابنات.
البنات...صباح الخير يامس فاطمه.
فاطمه..ابله حنان عيزاكم فالمكتب
بصوا البنات لبعض
عشق..بارتباك في حاجه
فاطمه.. معنديش خبر هي قالت انها عيزاكم
عشق...طيب هنغير ونيجي
فاطمه.. طيب بسرعه عشان الساعه الوقت 8والفطار كمان ساعه.
تمارا..ماشي يامس فاطمه.
خرجت فاطمه وسابتهم.
تمارا..استر يارب كده بانت يا بومه
عشق..تفتكروا عيزانا ليه.
تمارا..هو عموما مش خير هي دي يجي من وراها خير ابدا
زهره..انا خايفه
تمارا..مين دي يابت اللي تخوفك وانا موجوده هتعمل ايه يعني طب خليها كده تيجي جنبك والله اموتها.
عشق..الطيب احسن تعالوا يلا نغير ونصلي ركعتين الصبح ونروحلها.
زهره... يلا واهو بالمره ندعي..
غيروا البنات لبسهم وصلوا فرضهم خرجوا وراحوا على مكتب حنان.
بعد دقايق وصلو ادام باب المكتب.
عشق. وقفت عشان تخبط لكن متردده.
زهره...والنبي ماتخبطي حاسه ان في مصيبه فاصله بينا وبين الباب ده.
تمارا..اوعي كده انتي وهي هي موته ولا اكتر خبطت تمارا
جالهم صوت حنان من جوه ادخل
فتحت تمارا الباب ودخلوا
صباح الخير يا ابله حنان.
حنان..وهي باصه في الورق ولابسه نضارتها من غير ما تبصلهم صباح الخير وشاورتلهم بأيدها أعدوا
اعدو البنات عالكنبه اللي فالمكتب ادامها..
رفعت. حنان عينها ليهم وعدلت النضاره بصباعها.
عشق. خير يا ابله حنان.. مس فاطمه قالت ان حضرتك عيزانا.
حنان..ايوه عندي ليكم خبر
بصوا البنات لبعض.
تمارا..خير يا ابله حنان.
حنان...اخر الاسبوع جايلنا كذا طفل جداد اتسلموا للقسم امبارح طبعا بيخلصو اجراءاتهم وطبعا انتو عارفين بيتحولو علي دار مؤقته لحد ما يتأكدو فالقسم ان ملهمش اهل ولا في حد مبلغ عن اختافئهم او خطفهم وبعدها بيجوا عندنا وهما خلاص اتأكدو انهم ملهمش اهل ولا حتى حد مبلغ عنهم زيكم كده يعني
تمارا وعشق بصولها بغضب وزهره عينها اتملت دموع
حنان..المهم هما خمس بنات 4 سنهم من خمس لسبع سنين و بنت مولوده كانت في كيس زباله بنت حرام يعني ابتسمت بسخريه.
اما عشق فاللحظه دي كانت هتنهار مسكت نفسها عشان متبينش ضعفها ادامها.
تمارا.. بجمود...ايوه مفهمناش يعني ده خبر يخصنا احنا في ايه..
حنان..يخصكم انكم عارفين ان الدار مليانه وللاسف معندناش مكان يقدر ياخدهم غير الاوضه بتاعتكم.
عشق..ايوه يعني احنا نروح انهي اوضه.
حنان..لا ماهو مفيش ليكم مكان معانا للاسف.
تمارا...بغضب بسيط يعني ايه مش فاهمه ايه هنام فالطرقه اللي بين الاوض.
حنان.. وطي صوتك يابت انتي انتوا خلاص ملكوش مكان فالدار معانا وخلال ساعه لازم تخرجوا من هنا انتوا كبرتوا خلاص كلها شهور بسيطه وكل واحده فيكم هتم 21سنه وهتبقو مسؤولين عن نفسكم خلاص منتوش قٌصر.
عشق...بس اللي اعرفه يا ابله حنان ان المفروض ان اي بنت تحب تخرج وقت ماتتم 21سنه هي حره ولو معندهاش مكان تروحه بتطوع للخدمه فالدار.
حنان...والله المفروض ده انا اللي اقوله مش انتي وبعدين انا جبت موافقه خلاص بأنكم تخرجوا من الدار عشان نقدر نبلغ الدار التانيه اننا جاهزيين لاستلام الاطفال وانتوا هنا اكبر تلاته مظنش ينفع نمشي حد غيركم واحمدوا ربنا ان انهرده اول يوم في اجازه نصف السنه..يعني ادامكم حوالي اسبوعين تلاته تدبروا حالكم لحد الترم التاني مايبدأ.
تمارا.. هو القرار ده جه فجأه
حنان..لا بقاله حوالي اسبوع بس انا مرضتش اشغلكم عشان الامتحانات قولت مع اول يوم اجازه افرحكم بالخبر
تمارا...بتريقه لا فيكي الخير والله.
حنان..اتعدلي ياتمارا بدل ما اقلب عالوش التاني.
تمارا...بصوت مرتفع قامت وقفت هو ايه اللي اتعدل انتي عارفه انتي بتقولي ايه انتي عيزانا نخرج من الدار وتقولي خبر حلو طب نخرج نروح فين انتي عارفه اننا ملناش حد هو عادي كده اللي يكبر يترمي فالشارع ويبات عالارصفه.
حنان..خبطت عالمكتب بغضب وطي صوتك والزمي ادبك.
تمارا...انتي خليتي فيها ادب طب يا شيخه اعتبرينا بناتك جايه في يوم وليله تقوليلنا ملكوش مكان ولازم نمشي انتي معندكيش قلب
حنان..كلمه تانيه وهتشوفي انا ممكن اعمل فيكي ايه.
عشق...هو انتي ازاي كده ليه بتكرهينا بالشكل ده طول عمرك بتسممينا بكلامك ومفيش في بوئك غير ولاد حرام ولاد حرام هو احنا اخترنا نبقي ولاد حرام. بس اقولك حاجه انا مش مضايقه منك إذا كان ابويا وامي محنوش عليا ورموني فالشارع انتي هيبقى في فقلبك رحمه.
حنان..انا سكتلكم كتير ومعنديش وقت ليكم ادامكم ساعه بالكتير تكونو طلعتو فضيتو الاوضه عشان الدادات يطلعو ينضفوها ويجهزوها للاطفال الجديده
تمارا...بقوه ساعه مش هتنفع استحملينا شويه ساعتين ونكون خلصنا عشان نلم كتبنا وكل حاجتنا
حنان.. ماشي ياست تمارا الساعه الوقت 8ونص عشره ونص تكونو علي باب الدار واه صحيح ده ظرف لكل بنت فيكم دي تبرعات جات اول امبارح عشان الدراسه وبما انكم مش هتكونو معانا الترم الجاي فاده مبلغ بسيط لكل واحده فيكم الفين جنيه يعني تقدروا تسندو بيهم نفسكم لحد ما تلاقو مكان يلمكم.. عشان بس تعرفو ان قلبي طيب
عشق.. بغضب مش عايزين حاجه شكرا كتر خيرك.
حنان.. براحتكم وقبل ما ترجع ايدها كانت تمارا شدتهم منها
تمارا..هاتي الفلوس.
حنان...جدعه مش زي صاحبتك
عشق.. يلا يا بنات..
زهره.. اخيرا اتكلمت استنوا احنا هنروح فين يا ابله حنان طيب ادينا فرصه كام يوم
حنان... انا مش فاضيه للكلام الفارغ ده يارب نخلص
سحبتها تمار وعشق من ايدها وخرجو راحوا على اوضتهم
فضلت عشق وتمارا ماشيين بكل قوه وثبات...لحد ما وصلو اوضتهم دخلوا وقفلوا الباب
وفاللحظه دي انهارت عشق وتمارا وزهره
خدتهم عشق في حضنها
وبعد فتره بسيطه بعد ما خرجوا كل شحنه الحزن والغضب خرجتهم عشق براحه من حضنها يلا بنات مفيش وقت حضروا شنطكم بسرعه
تمارا..استني بس ياعشق هنروح فين احنا ملناش حد منعرفش مخلوق بره احنا قضينا فالمكان ده عشرين سنه والدراسه كانت مدارس تابعه للدار ويعتبر لما خرجنا شويه كان فالجامعه ومكناش بنروح ديما ومش بنحتك بأي حد احنا حتي مفيش اوضه تلمنا
عشق..بثبات اللي ليه رب مبيغلبش يا تمارا واحنا عمرنا ماعملنا حاجه وحشه وحياتنا اللي اتفرضت علينا ملناش ذنب فيها عمرنا مأذينا حد اكيد ربنا مش هيتخلي عننا مش يمكن ربنا مخبيلنا حاجه احسن وبعدين هيحصل ايه اوحش من اللي حصلنا طول حياتنا أهل رمونا مديره بتعذب وتضرب وتكرهنا من غير سبب بنسمع اسوء الكلام هيحصل ايه اكتر من كده
زهره.. هيحصل اننا هننام عالرصيف عالاقل هنا كنا بنام في مكان حتى لو كان بيحصل فينا ايه بس فالاخر بنتلم في اوضه مع بعض
عشق..ماهو احنا هنفضل مع بعض سواء هنا او بره وهنام فين دي بقى بعد ما نخرج ربنا هيدلنا صدقوني
تمارا..اكيد ربنا مش هيسيبنا بس انتي ليه بتتكلمي بثقه كده كأننا خارجين عالجنه عشق احنا فاصل بيننا وبين المجهول باب لو خرجنا منعرفش هنلاقي ايه ورا الباب ده
عشق...اللي بيسيبها علي ربنا عمره ما بيتخذل يا تمارا وانا ثقتي فالله كبيره...يلا قوموا حضروا شنطكم بسرعه
تمارا..طيب خدي انتي وهي كل واحده فيكم الظرف بتاعها
عشق..بغضب انتي خدتيهم منها ليه
تمارا..كنتي عيزاني اعمل ايه أينعم انا مش عايزه حاجه من وشها بس عالاقل يكون معانا حاجه نصرف منها الايام الجايه وده مبلغ هينفعنا كل واحده الفين يعني دول 6الاف جنيه مش كفايه ان مفيش مكان ده يمكن تكون المره الوحيده اللي عملت فيها خير وكملت بضحك والله تلاقيها مش في وعيها اخلصو بسرعه احسن تفتكر وترجع في كلامها
زهره.. مسحت دموعها تمارا عندها حق اكيد الفلوس هنحتاجها
تمارا..يلا خدو الفلوس وابوس راسك ياعشق حاولي متحلميش تاني ولو حبيتي تحلمي متاخدنيش انا والبت الغلبانه دي معاكي
عشق..بضحك مش هنام تاني ياستي خلي الفلوس معاكي
تمارا..لا كل واحده تاخد الظرف وتشيله عشان لو حاجه وقعت ولا ضاعت يبقي مش كلهم مع بعض
عشق..تمام خدت منها الظرف وخدت زهره هي كمان الظرف وابتدوا يحضروا الشنط وبعد وقت مر كانوا جهزوا شنطهم وقفوا على باب الاوضه يبصو عليها بحزن الاوضه اللي فيها ذكرياتهم كلها...
وخرجوا كانت حنان واقفلهم تحت ومعاها دادات ومس فاطمه وقفوا الدادات ودعوهم وهما بيعيطوا محدش يقدر يتكلم مع حنان الظالمه
حنان بخبث..هتوحشونا يابنات بصولها البنات بكرهه سلموا على الجميع وخرجوا قفلت حنان وراهم الباب
وقفو على الطريق
تمارا...هنروح فين
زهره..باصه وساكته
عشق..مركزه في الطريق وباصه على العربيات وهي ماشيه بسرعه عنيها بتبص شمال ويمين وقفت تاكسي وقالتله.
دار الايتام
البارت التاني
في مكان تاني وصل ليل الشركه ركن عربيته ونزل بكل هيبه وخطوات ثابته دخل الشركه قام الموظفين بأحترام يلقوا عليه تحيه الصباح وسط انبهار واعجاب وحقد وحسد.
اما ليل فاكمل طريقه بكل غرور وثبات وهيبه إلى ان وصل مكتبه
مسك ليل تليفون مكتبه شاهي ابعتيلي القهوه بتاعتي وبلغي مستر ادم ومستر جاسر ومستر نوح والمدير التنفيذي ان في إجتماع بعد نص ساعه
شاهي ..تمام يا افندم حالا بس مستر ادم ومستر نوح موصلوش
ليل..طيب اقفلي وانا هشوفهم
قفل معاها ليل وكلم ادم.
أدم...ايوه يابوص
ليل...انت فين.
ادم...انا تحت بركن العربيه
ليل...مش ملاحظ انك متأخر انت والزفت نوح
أدم..هو اللي مأخرني على فكره عربيته عطلت وجبته معايا اهو
ليل..طيب تعالولي عالمكتب وهاتو جاسر معاكم.
ادم..تمام.
قفل ليل...وثواني وخبطت شاهي السكرتيره حطت القهوه وخرجت من غير اي كلام.
دقايق بسيطه كان الشباب بيخبطوا ودخلوا
جاسر..صباحو يابوص
ليل.صباح الخير بص لنوح عربيتك مالها يانوح.
نوح...معرفش والله مش راضيه تدور واتصلت بالتوكيل
ليل..دي لسه بعد بكره هتكمل شهر هي لحقت
نوح...والله ما اعرف مالها تقريبا كده مش حباني
ادم..والله بتفهم العربيه دي وهو في حد بيطيقك
نوح...شكرا ياذوق
جاسر....مالك يا ليل شكلك مش فايق
ليل..وهو بيمرر كفه على وشه مش عارف مصدع ومش فالمود
نوح..بغمزه السهره شكلها كانت جامده
ليل... إتلم يالا.
نوح...حط ايده على بوئه
ليل....مهره منكده عليا كمان
جاسر..ليه مالها
ليل... مش عارف مش راضيه تاكل بقالها يومين قلقان عليها لانها قربت تولد.
جاسر..وفين الدكتور
ليل..موجود بس مبيفهمش بيحاول يقنعني انه عادي عشان قربت تولد ميبقاش ليها نفس للاكل وانا مش عارف لان هي اول مره هتولد مش عارف ده بيحصل ولا لا.
نوح.مش فاهم محسسني ليه انها مراتك
ليل.انت بتقول فيها والله لو مراتي مكنت هبقي قلقان كده بس دي مهره يالا
ادم...ياعم هي اكيد زي ما قالك كده.
ليل..هنشوف المهم عندنا اجتماع بعد عشر دقايق عايز ورق المناقصتين اللي ماسكهم يا ادم انت وجاسر
جاسر..انا جاهز ادم..وانا كمان
ليل..تمام يلا روحو حضروهم ونتقابل بعد عشر دقايق
مر وقت بسيط دخل ليل لاوضه الاجتماعات وكان الجميع في انتظاره ابتدوا الاجتماع وبعد مده الاجتماع خلص...
ليل..مسك التليفون الو
حاج محمد..ايوه يا ليل يا ابني
ليل..معلش ياراجل ياطيب هتعبك معايا عايزك في اوضه الاجتماعات.
حاج محمد..تعبك راحه يا ابني حالا جاي
حاج محمد.موظف في مجموعه السيوفي من وقت ما كانت شركه صغيره من ايام ما كان والد ليل عايش كان ديما معاه وبيعتبره مش مجرد موظف عنده كان قريب منه جدا وكان ديما لما بيبقي مضايق يروح يأعد معاه في اي قهوه بسيطه ليل اتولد على ايده ومن يومها وليل بيعتبره شخص من العيله وميقدرش يبعده عنه.
ثواني وخبط الحاج محمد ودخل
ليل..تعالى ياراجل ياطيب اعد
الحاج محمد...خير يا ابني
ليل..خير طبعا الورق ده عايزك تاخده تروح بيه لعمي فالفرع التاني بتاع الشركه وتاخد امضته معلش هتعبك معايا وشاور على جاسر معلش عشان البيه ابنه عنده معاد مع خطيبته مش هينفع يروح
الحاج محمد.. بس كده ده انا عيوني ليك ولجاسر باشا.
جاسر..والنبي انت اللي باشا ياراجل ياطيب.
الحاج..محمد طيب هقوم انا بقي عشان الحق
ليل.. استني بس رايح فين خد دي كمان معاك وصلها لعمي
الحاج محمد ايه الشنطه دي
ليل..دي فيها خمسه مليون جنيه ادهملو وهو عارف الباقي.
الحاج محمد بتوتر طب ما بلاش انا يا ليل يا ابني هركب ازاي مواصلات بالمبلغ ده اخاف يتسرق مني ولا يجرالي حاجه محدش ضامن عمره.
ليل.اولا بعد الشر عنك وفي داهيه الفلوس المهم انت ثانيا بقي هبعت معاك السواق بتاع الشركه يوصلك لحد هناك ويرجعك تاني.
الحاج..محمد طيب يا ليل يا ابني تأمرني بأي حاجه تاني يا ابن الغالي.
ليل بابتسامه حنونه..الامر لله يا راجل يا طيب عايز سلامتك لما تخلص ابقى ارجعلي تاني في ورق عايزك تقدمه بعد بكره بما ان بكره الجمعه اجازه عايز افهمك تعمل ايه عشان تروح تظبط كل حاجه قبل ما تيجي عالشركه فا لازم افهمك انهرده.
الحاج محمد.. تمام مسافه السكه وراجع.
خرج عم محمد وراح كل واحد فيهم علي مكتبه يشوفو شغلهم
...........
بعد ما وقفت عشق التاكسي وقالتله الحسين؟؟
السواق..أركبوا
طلبت منه عشق يفتح شنطه العربيه عشان يحطوا الشنط
تمارا..الحسين ليه انتي عارفه حد هناك
عشق..لا معرفش
زهره..امال رايحين هناك ليه
عشق..مش عارفه بس انا زرته مره واحده في حياتي المسجد ده مريح جدا وبحبه اوي ومن فتره حلمت اننا روحناه مع بعض احنا التلاته وصراحه كده بما اننا خرجنا خلاص فا ده اول مكان جه في بالي ونفسي نروحه سوا
تمارا..انا عمري ماروحته
زهره..ولا انا
تمارا...بس بردو مش كنا اجلناه لحد ما نشوف هنعمل ايه
عشق...مش هنخسر حاجه تعالو نروح واهو بالمره نصلي الضهر فيه وبعد كده نشوف
بعد مرور ساعه ونص من زحام الشوارع واشارات المرور وصلو اخيرا
دفعوا الفلوس للسواق وخدو الشنط ونزلو.
تمارا وزهره وعشق وقفو بره ادام المسجد بأبتسامه جميله يتأملو المسجد
تمارا...الله المسجد جميل اوي ومريح
عشق..فعلا مريح اوي انا جيت مره واحده بس بجد من وقتها وانا نفسي اجي تاني
زهره.. فعلا شكله والروح اللي فالمكان جميله اوي.
عشق... طيب تعالو يلا ندخل
تمارا... الضهر اذن وخلص من شويه ياخساره لولا الزحمه كنا صلينا فيه.
عشق..احنا فيها ندخل نرتاح شويه ونستني العصر
تمارا... انا خايفه بس الوقت يعدي من غير مانشوف اي مكان نأعد فيه
عشق.. تعالو بس ندخل ونصلي و لما نخرج نحاول نشوف سمسار في المكان هنا يمكن يكون في اوضه او شقه صغيره نأجرها
زهره..المكان هنا كل الشقق فيه شكلها قديمه والي ساكنين فالمكان الجميل ده ميتهيأليش يسبوه.
تمارا.. فعلا ياعشق البيوت القديمه دي كانت بتراب الفلوس وصحابها مش هيسبوها دي تعتبر تمليك
عشق..يا ستي اهو نجرب مش هنخسر حاجه يمكن نلاقي حد عنده شقق حتى لو في مكان ابعد شويه اهو ناخدها فتره بسيطه لحد ما نظبط حالنا نشوڤ شغل حاجه تقدر تساعدنا.
تمارا...طيب يلا ندخل
دخلو البنات وكل واحده فيهم ماسكه شنطتها اتوضو وصلو ركعتين
عشق..وهي ساجده وبتدعي ودموعها نازله علي سجاد المسجد يارب اقف معانا احنا ملناش غيرك يارب تعبنا من البهدله احنا راضين بكل حاجه في حياتنا حصلت بس يارب احمينا من اي حاجه وحشه احنا ملناش ضهر انت ضهرنا وسندنا احمينا من المجهول وابعد عننا شر البني ادمين يارب احنا خرجنا وملناش لا اهل ولا مكان ولا بيت انت ملجأنا الوحيد يارب دبرلنا حالنا فأنت خير المدبرين بعد مرور الوقت صلوا العصر.
زهره...بقولكم ايه انا جعانه اوي احنا مفطرناش.
تمارا.انا كمان جعانه
عشق.. يلا نخرج نشوف الاول سمسار وبعد كده نشوف اي مكان نجيب منه اكل
تمارا..تمام
خرجوا البنات من المسجد
عشق..تعالو نشوف فالقهوه اللي هناك دي اي حد من اللي شغالين نسأله اذا كان يعرف سمسار
راحو وراها وقفو قريبين من القهوه
عشق..لصبي القهوه لوسمحت
صبي القهوه.أمريني يا حلوه شاي قهوه حاجه ساقعه شيشه.
عشق....لا لا انا بس كنت عايزه اسأل حضرتك سؤال.
صبي القهوه..اتفضلي يا ابله
عشق..متعرفش اي سمسار هنا.
صبي القهوه باستغراب سمسار اعرف
عشق..طيب ممكن تقولي الاقيه ازاي
صبي.القهوه طب الاول انتي عايزه ايه يعني محل ولا ايه.
عشق.. لا محل ايه انا بدور على شقه انا وصحابي اصلنا من محافظه تانيه يعني وبندرس هنا فالقاهره فا كنا عايزين نشوف شقه.
صبي القهوه.. بصي هو صعب تقرببا في المكان هنا مفيش شقق بس مش هنخسر حاجه هكلمه واشوفه فين يمكن تلاقي.
عشق..شكرا جدا
بعد حوالي عشر دقايق كان وصل السمسار.
وبعد ما عشق سألته وفهمته انها عيزاها للسكن.
السمسار.بصي هو هنا صعب بس عندي شقتين في خان الخليلي هنا قريب لو تحبو تشوفوهم هما 3 اوض وصاله
عشق..لو في اصغر من كده يبقي ياريت خصوصا زي ما قولت لحضرتك احنا مش محتاجين غير ان يكون في مكان ننام فيه ونذاكر فيه
السمسار..تعالو بس شوفوهم يمكن يعجبوكم.
عشق.. طيب ممكن نسيب الشنط في اي مكان بدل ما نفضل ماشيين بيهم.
السمسار..طبعا استني.
السمسار....بندق.بندق
بندق... ايوه يا عم سيد.
السمسار.. معلش خد الشنط من الانسات لحد ما افرجهم عالشقق
بندق.. طيب تمام بس متتأخروش والنبي مش عايز كلام من صاحب القهوه
السمسار.. مسافه السكه
خدهم السمسار.وابتدي يفرجهم على اول شقه كانت كبيره اوي ومن بيوت زمان الواسعه
زهره.الله دي حلوه اوي خبطتها تمارا في كتفها
تمارا..دي بكام يا ريس فالشهر
السمسار.. دي ب3 ونص بس.
تمارا...اللي هو ايه يعني 350تقصد
السمسار... 350ايه يا ابله اقصد 3500.
تمارا.. لا دي غاليه اوي
السمسار..طب تعالو اوريكم التانيه.
خدهم وراهم الشقه التانيه.
وكانت تقريبا قريبه من الشقه الاولي بس اقل حاجه بسيطه.
عشق..دي بكام يا حاج سيد
السمسار.. دي عامله 3000
عشق.. هو كل الاسعار كده.
السمسار.. تقريبا مش هتلاقي اصلا اقل من كده المكان هنا غالي ده ان لقيتي هنا اصلا
تمارا.. طيب معندكش شقق تانيه حتى لو في مكان تاني.
السمسار.. للاسف لا انا معنديش غير الشقتين دول والباقي اللي عندي محلات
عشق.. طيب شكرا لحضرتك واسفين تعبناك.
السمسار.. تعبكم راحه عموما دورو براحتكم ولو ملاقتوش اكيد انتو عارفين هتلاقوني ازاي
تمارا..ماشي ياحاج شكرا
نزلو البنات بخيبه امل وراحو خدو الشنط وفضلو يدورو ويسألو
.........
مرت كذا ساعه رجع عم محمد الشركه طلع لمكتب ليل خبط كان الشباب كلهم جوه
ليل..تعالى ياعم محمد اعد
الحاج محمد..اتفضل يا ابني الورق وامضة سراج باشا عليها
ليل.. تمام بس دي بقى خليها معاك وبعد بكرة تطلع تقدم الورق ده فالشهر العقاري ومعاها الورقتين دول كمان وطبعا الباقي انت عارفه
الحاج.. محمد طبعا اتفضل دي ورقه بأمضة سراج باشا انه استلم الفلوس
ضحكو الشباب بصوت مرتفع ليل. مضيت عمي يجي جاسر يشوف ابوه وهو بيمضي على الاستلام🤣
ادم..مش هتبطل ياراجل ياطيب الحركه دي انا عايز اعرف ازاي بتقدر تقنع سراج باشا.
حاج محمد الحق حق يا ابني انا ادتله الفلوس هو بقي يدني ورقه انه استلم وبعدين اطلعو انتو بس منها هو عارف دماغي وده نظامنا من قبل ما انتو تتولدوا
نوح....والله انت عسل ياحاج محمد ده احنا لو روحنا لعمي بفلوس وقولناله امضي هيقطعنا.
الحاج محمد..ده انتو بقى يا نوح باشا.
نوح...والله انت اللي باشا بس اقولك انت صح.
الحاج محمد ده حق يا ابني وده مبلغ مش بسيط ولو حصل اي حاجه انا هتدبس فيه وطبعا محيلتيش اقل من ربعه يادوب المبلغ اللي معايا لجهاز نور.
ليل..نور جهازها محفوظ ياراجل ياطيب هي بس تخلص دراستها ويجي العريس وكل اللي هتشاور عليه هيجي انا في مقام اخوها ولا ايه
الحاج محمد ودموعه في عينه ربنا يخليك ليا يارب ياليل يابني وطبعا انت في مقام اخوها مش انت بس كلكم والله
ادم.. هي في سنه كام صحيح الوقت ياحاج محمد
الحاج محمد..نور الوقت في تالته جامعه بتدرس حقوق القاهره.
ادم...ماشاء الله ربنا يخليهالك وتفرح بيها وتبقي اكبر محاميه فالبلد
الحاج محمد يارب يا ادم يا ابني...فاللحظه دي رن تليفونه
الحاج.محمد..اهي بتتصل جبنا في سيره القط جه ينط. الو
نور... الو ايه بس ياحج محمد انت فين كده..
الحاج محمد.انا فالشركه يانور في حاجه ولا ايه.
نور... في اني ميته من الجوع. وعملتلك صينتين مكرونه بشاميل انما ايه يستاهلو بوئك لو مجتش صدقني هاكلهم انا ميته من الجوع ومش قادره اقاوم الريحه.
الحاج...محمد بضحك صنيتين مكرونه ليه انتي عازمه الشارع هو في غيري انا وانتي.
نور...لا ما انت هتاكل حته صغيره وانا هقوم بالباقي متقلقش.
الحاج..محمد بضحك يابت الاكل ده بيروح فين انتي حتى رفيعه.
نور.بمشاكسه قل اعوذ برب الفلق انت هتحسدني ولا ايه يا سي بابا وبعدين انهرده الخميس وانت بكره اجازه يعني السهره صباحي ومتقلقش هيخلصو
الحاج محمد..طيب ياستي يلا روحي بقي وانا هاجي.
نور...استني بس اروح فين هو سلق بيض.
الحاج محمد..عايزه ايه تاني يا اخرت صبري..
نور... بكره اجازه وانهرده سهره يعني افلام ومسرحيات وسهره صباحي.
الحاج محمد. والمطلوب.
نور.... شويه حجات بسيطه تجبلنا شويه فاكهه وتعدي علي اي مقله تجبلنا شويه تسالي وشويه شبسي وشوكلاتات يعني دلعنا كده مش كفايه دلعتك وعملتلك صنيتين مكرونه
الحاج محمد بضحك..يعني عشان بكره اجازه وعشان حضرتك عملتيلي صنيتين مكرونه عيزاني ادلعك واروح اجبلك فاكهه وتسالي من المقله وشويه شوكلاتات وشيبسي مااجبلك السوبر ماركت احسن اقولك ماتدلعنيش تاني وانا بكره ياستي نازل الشغل انا متنازل عن اجازتي ماشي يا ليل يا ابني اعمل حسابك اني جاي بكره.
نور... يانهار اسود انت بتتكلم ادام ليل
الحاج محمد ايوه وفضيحتك بقت بجلاجل.
نور.. خلاص ياعم مش عايزه حاجه
الحاج محمد بضحك ماشي ياستي هجبلك كل اللي انتي عيزاه يلا بقي بلاش رغي
نور.. بضحك سلام
الحاج محمد سلام هتجنني البت دي
ليل. بابتسامه ربنا يخليهالك ويخليك ليها يارب.
الحاج محمد..طيب انا خلصت شغل هتحتاجني تاني ولا اروح انا
ليل.. استني عايزك يا حاج محمد وبص لنوح وادم استنوني بره ياشباب شويه
ادم ونوح فهموا تمام بعد اذنكم
الحاج محمد لليل..خير يا ليل يا ابني.
طلع ليل من الخزنه ظرف اتفضل ياراجل ياطيب
الحاج محمد ايه ده
ليل.. ده مبلغ بسيط كده
الحاج محمد ..ليه كده ياليل يا ابني انت خيرك مغرقني وانا مش محتاج والله.
ليل... خير ايه بس ياراجل ياطيب انت مش عارف انت بالنسبالي ايه دي حاجه بسيطه عشان اي حاجه نور تحتاجها وكمل بابتسامه وهاتلها كل اللي هي نڤسها فيه بدل ما تيجي تاكلنا.
ضحك..حاج محمد ربنا يخليك ليا يا ابني يا اصيل يا ابن الغالي هروح انا بقي احسن على قولتك تيجي تاكلنا الطفسه دي
ليل بضحك اتفضل ياراجل يا طيب وابعتلها سلامي
الحاج محمد. تسلم يا ابني بعد اذنك
خرج محمد ودخل الشباب
ادم.. ايه مش ناوي نمشي بقى
نوح.. احنا مش هنسهر ولا ايه.
ليل.. هنسهر يلا نروح نغير بس وبعد كده نكلم جاسر يجيلنا على المكان بتاعنا.
نوح.. قشطه يلا بينا
بعد مرور وقت طويل كانت الساعه 9بليل
اعدو البنات على الرصيف
تمارا .ااه مش قادره رجلي تعبتني من اللف مش قادره
زهره.. وانا هموت مش قادره رجلي ورمت من كتر اللف
تمارا. هنعمل ايه ياست عشق هنبات فالشارع ولا ايه
عشق..بتعب انا كمان تعبت بس اديكم شايفين مش لاقين حاجه وكل اللي لقيناه غالي اوي ده تقريبا الشقه هتاخد نص فلوسنا في شهر واحد
تمارا..طب والعمل
زهره.. بدموع الوقت اتأخر وشويه وهنلاقي الشارع هدي اكتر والناس هتقل هنعمل ايه
تمارا...منك لله ياحنان الكلب كان هيحصل ايه لو قالتلنا وسابتنا كام يوم نخرج وندور على شقه ونرجع لحد ما نلاقي مكان ونسبلها الدار
عشق..اللي حصل حصل خلاص
زهره..ابتدت تعيط
خدتها عشق في حضنها ممكن بلاش عياط
زهره... انتي حاسه بالمصيبه اللي احنا فيها احنا هنبات فالشارع وياعالم هيحصلنا ايه
عشق.. ابتدت دموعها تنزل ان شاء الله ربنا مش هيخذلنا ربنا كريم اوي اكيد مش هيسبنا نتبهدل فالشارع كده
تمارا..ابتدت هي كمان تعيط خدتهم عشق في حضنها ورفعت وشها للسما وهي بتعيط يارب انت عالم بحالنا الوقت مر وبقينا بليل يارب انجدنا من الشارع وبهدلته انت احن علينا من اي حد دلنا يارب وأقف معانا احنا ملناش حد غيرك
وفاللحظه دي وكأن ابواب السما اتفتحت وربنا سمع نداها
ظهر طوق النجاه
اسف يابنتي انا ممكن اساعدكم.
عشق. وتمارا وزهره بفزع انتبهوا للصوت.
عشق.. مين حضرتك
انا اسف.. سمعتكم غصب عني والله مش قاصد اني اسمعكم بس دموعكم وكلامكم ودعاكي يابنتي خلاني اقف غصب عني واسمعكم
عشق..حضرتك مين
انا اسمي حاج محمد ولو تقبلو انكم تيجو معايا بيتي لحد ما تتصرفو انا تحت امركم.
تمارا.. بغضب نيجي معاك فين انت فاكرنا ايه.
عشق.. شكرا لحضرتك ومسكت شنطتها يلا يابنات.
الحاج محمد استنو يا بنات وبص لعشق انتي دعيتي ربنا واظن انه استجاب انا باجي من شغلي ديما بدري بس انهرده اتأخرت ويمكن يكون اللي اخرني هو ربنا عشان اشوفكم واقابلكم واساعدكم انا ساكن هنا في خان الخليلي هي شقه بسيطه بس اكيد احسن من الشارع وعشان اطمنكم انا اعد فيها مع بنتي هي تقريبا نفس سنكم
وقفو البنات واثار الدموع لسه على وشهم فضلو يبصو لبعض وهما ساكتين.
كمل الحاج محمد اسمها نور
مراتي متوفيه ومحيلتيش فالدنيا غيرها ورن تليفونه فاللحظه دي اهي جت عالسيره وفتح الاسبيكر ورد عليها ادامهم الو
نور...ايوه يا سي بابا ايه اللي اخرك كل ده والله ادامك خمس دقايق لو مجتش هاكل المكرونه كلها لوحدي واخلص بقى في فيلم هيبتدي يلا عشان السهره هتحلو ياحاج محمد انا مصدقت انك بكره اجازه.
حاج محمد خلاص يانور انا داخل عالبيت
نور..اوعي تكون نسيت الفاكه والحجات الحلوه
حاج محمد بضحك لا ياستي منستش جبتلك كل اللي طلبتيه يانور وجايبلك كمان معايا مفجأه.
نور... والنبي بجد ايه هي
الحاج محمد لما اجيلك هتعرفي يلا اقفلي بقى
نور.. ماشي ياسي بابا اما نشوف اخرتها معاك
قفل الحاج محمد وبصلهم بابتسامه كلها طيبه وحنيه اطمنتو انا فتحت الخط مخصوص عشان تتأكدو بنفسكم.
فضلو البنات يبصو لبعض.
عشق.. بس يعني حضرتك متعرفناش مش يمكن نسببلك اذي
الحاج محمد.اللي بيعمل خير يابنتي عمر ما ربنا بيخذله وانتو باين عليكم انكم مش وش اذيه يلا بينا بقي
عشق بابتسامه بصت للبنات هزتلهم دماغها ورجعت بصت تاني لحاج محمد. يلا بي
يتبع
البارت الثالث والرابع من هنا هنا
تعليقات
إرسال تعليق