 |
سكريبت❤
-لا معلش عيد الكلام تاني عايزني اتجوز مين؟!
بصيت لبابا وانا مش مصدق... ما هو لإما أنا سمعت غلط لإما هو اكيد بيهزر.
-عايزك تتجوز ميرال ايه الغريب في كده يا جاسر.
ضحكت وانا ببصله وقولت:
-بطل هزار بقا يا بابا.
-أنا بتكلم جد
-بابا أنت أكيد بتهزر صح أصل ملهاش معني إلا كده.... أنت عايزني أنا الدكتور جاسر رضوان اتجوز ميرال دي
-مالها ميرال بنت عمك وزي القمر.
-بابا ميرال ميكانيكية عايزني اتجوز واحدة بيقولولها يا أسطى .... واحد بتصلح عربيات... ودي لما ادلعها أقولها ايه؟! يا ذردية!! .
-يا بني ميرال مهندسة بس....
-أيوة ما ده يدل أنها غير متزنة عقليا يا بابا أصل مفيش حد طبيعي يسيب الهندسة ويشتغل ميكانيكي ده يبقي جنان رسمي.
-وأنت مالك بشغلتها المهم أخلاقها ورقتها
-رقتها ايه يا عم... ده أنا آخر مرة بكلمها قالتلي يا اسطا ... دي متنتميش لجنس الستات اصلا ولا الرجالة والله دي نوع تاني غريب ليه مكتشفهوش... بني آدمة بدماغ كلب.
-من غير كلام كتير يا جاسر أنت هتتجوز ميرال وخلاص انتهي الموضوع.... لإما تتجوزها لاما مش هتشم مليم من فلوسي وخلي الطب يأكلك يا دكتور.
......
-بطلي ضحك يا ميرال.
-آسفة يا اسطا والله بس كلامك ضحكني... دي نكتة الموسم دي ولا كدبة أبريل واحنا في شهر يناير؟
-مش كدبة ولا حاجة يا ميرال انتي هتتجوزي ابن عمك جاسر... أنا وعمك اتفقنا علي كل حاجة.
-خلاص ما دام اتفقت معاه اتجوزه أنت ليه تبليني أنا بيه
-بنت عيب دي طريقة كلام.... طبعا واحدة شغالة في ورشة هتتكلم ازاي...أنا سكتلك كتير يا ميرال بس دلوقتي لا انتي اللي هتسمعي كلامي.
-اللي هو؟
-هتتجوزي جاسر والا هاخد منك الورشة وهرميكي برة البيت.
عيونها دمعت وقالت :
-كل ده عشان الخرع جاسر.... وأنت ملقيتش غير واحد خرع زي كده اتجوزه .
-ما الخرع ده هو الوحيد اللي راضي بيكي وبأسلوبك الغريب ده.... قصره ألبسي هدوم أحسن من كده عمك وابنه جايين بعد شوية.
.......
بعد ساعتين. (بقلم سولييه نصار )
كنت قاعد جمب عمي وبابا ومستني عروسة الندامة تظهر وديني لأندمها علي اليوم اللي وافقت عليا فيه... طبعا دلوقتي فرحانة وهي هتلاقي في وسامتي فين.... بس لا مش جاسر الدنجوان اللي يتجوز ميكانيكية.
.....
كانت ميرال واقفة قدام القهوة وهي بتقول:
-أنا هندم عريس الندامة علي اليوم اللي فكر يتجوزني فيه.
بعدين مسكت علبة الملح وهي بتبتسم بخبث.
....
طلعت ميرال فبصتلها بصدمة.... حسيت عينيا وجعتني بسبب التلوث اللي هي لابساه... مشجر علي مشجر في شرع مين ده .... دي جريمة في حق الموضة..... بصتلها بقرف وهي بتقدم القهوة....
لسه هشرب القهوة لما لقيت أبويا كب كل القهوة اللي في بوقه وقال:
-ليه القهوة فيها ملح؟!
حطت ميرال ايدها علي بوقها وقالت:
-لا مؤاخذة يا عمي أصل حطيت ملح بدل سكر
-ولا يهمك يا حبيبتي.... يالا هنسيبكم سوا عشان تتكلموا وتتفاهموا.
ابويا اخد عمي ومشي وسابني مع عروسة الندامة.
بصتلها بقرف وقولت:
-افتكرتي أنك هتقدري تعملي موقفك السخيف فيا.
-لا كنت هعمل بس في آخر لحظة افتكرت أنك خرع ومش هتستحمل...
-لما أنا خرع ليه عايزة تتجوزيني؟!
غمزتلي وقالت :
-معلش أصل الرجالة قلت اووي في مصر وده سبب أزمة لينا... فهضطر أقبل بيك.
-لا ما هو بشنبك ده مصر مش محتاجة رجالة تاني كفاية انتي عليهم....
كانت هتتكلم لما عينيها فجأة لمعت وقالت:
-لحظة لحظة هو انت بتقول أنا اللي عايزة اتجوزك
-أيوة... أبويا جابني هنا بالعافية وقالي لأما اتجوزك لاما مش هشم مليم من فلوسه.
-وأبويا كمان هددني أنه هياخد مني الورشة لو ما وافقتش.
بصتلي بصدمة وكملت :
-يعني أهلنا خدعونا محدش فينا عايز التاني... أنا هتكلم معاهم.
لسه هتقوم مسكت ايديها وقولت :
-انتي هبلة مفهمتيش لسه هما مصممين علي الجوازة دي ولو موفقناش هنتبهدل.
-وأنا مستحيل اتجوزك.
ولسه هتقوم تاني... سحبتها فوقعت علي الانتريه....بصيتلي بصدمة وحاولت تقوم بس أنا ثبتها.... مشوفتش الرعب اللي في عينيها مني.. كل اللي اخد عقلي عينيها.... أول مرة اخد بالي من لونهم.. عينيها كانت رمادي وواسعة... بتجذبني بشكل طبيعي... محسيتش بنفسي وقربت منها و...
يتبع
الجزء الثاني ❤شكرا لتفاعلكم السكر❤
-جاسر بتعمل ايه؟!!
لقيت بابا بيزعق فيا قومت بسرعة وأنا بقول :
-اعذرني يا بابا مقدرتش أقاوم جمال عيونها أنا بقول نسرع في الجواز شوية!
أبتسم عمي وأبويا وقال أبويا :
-ماشي يا سيدي نسرع في الجواز ايه رأيك نعمل الخطوبة بكرة (بقلم سولييه نصار )
-أنا محدش اخد رأيي ليه ولا أنا كيس جوافة.
قربت منها وبقول ايه يا ميمي بس يعني مش كفاية الوضع اللي شافونا بيه اتنين غيرهم كانوا قطعوا راسنا ما هو باين أننا بنموت في بعض.
حطيت أيدي علي كتفها وقولت:
-ماشي يا بابا نعمل الخطوبة بكرة.
-بس انا لسه مجهزتش حالي لا الفستان ولا الميكب.
-يا حبيبتي انتي لو لبستي العفريتة هتبقي قمر... ودي خطوبة يعني متحبيكهاش.
ابتسمت بخبث وقالت:
-بقا كده.... ماشي.
........
تاني يوم بالليل كنا عاملين حفلة خطوبة علي الضيق في البيت ومعزمناش إلا المقربين بس.. بصيت لميرال بغيظ وقولت:
-انا لما قولتلك أن حتي العفريتة هتطلع عليكي حلوة كنت اقصد اجاملك يا غبية! فيه حد عاقل يحضر خطوبته بعفريتة.
-إن كان عاجبك يعني... بعدين انت استغليتني عشان مصلحتك وده كفيل إني أقلب حياتك جحيم يا دنجوان عصرك....
خلصت الخطوبة علي خير وبابا وعمي تقبلوا أي تصرفات طلعت مني أنا أو ميرال... هما كل همهم أننا نتجوز وانا هلعب معاهم اللعبة دي.
........
-خير علي فين؟
-وانتي مالك انتي صدقتي أنك خطيبتي... وبعدين ايه اللي جابك هنا.
-عمي بعتلي قالي عايزني في حاجة مهمة. بيقول أن فرح بنت خالتك النهاردة وعايزني أروح معاك.
-بلبسك ده؟ لا شكرا. ده انتي هتعريني بالشكل ده
-ومفكرتش إني هعرك ليه قبل ما تجبرني اتخطبلك...
بصيتلها وضحكت وقولت:
-ليه هو انتي فاكرني إني بجد بحب وهموت عليكي... فوقي يا ماما أنا الكلية اللي اتخرجت منها أصحابي الولاد فيهم أنوثه عنك.
قربتلها وأنا بقول بعصبية :
-ايه اللي انتي لابساه ده عايز افهم عاملة زي المهرجين.... شعرك باهت... ووشك باهت... عاملة زي العفريت... كلامك لوكال اووي ميليقش بمركزي كدكتور... قوليلي بقا مين اللي اتظلم في الجوازة دي أنا ولا انتي.
عيونها دمعت وقلبي وجعني مكنتش عايز اجرحها كده بس هي مستفزة وبتخرجني عن طوري
-ما دام أنا وحشة كده ليه صممت تتجوزني ليه.
-عشان الفلوس.. زي ما قولتلك أبويا هددني وأنا رضخت.
-أبوك فعلا راجل مش كويس عشان يعمل كده زيك بالضبط.
عينيا لمعت بغضب وقولت:
-أبويا كان بيعمل لابوكي خدمة عشان عارف أن محدش هيقبل بيكي فقال يدبس ابنه العبيط فيكي.
ضربتني بالقلم.. بصيت لقيت دموعها نزلت... ضميري انبني بسببها.... ياريت بس لو تسكت.... تسكت ومتطولش لسانها لكن هي مصممة تخرج مني أسوأ ما فيا.
جريت برة البيت وهي بتعيط.
-غبي يا جاسر... أنت غبي
زعقت لنفسي وبعدين اتخنقت وروحت الفرح بسرعة.
........
كانت ميرال واقفة قدام المرايا وهي بتعيط وبتفتكر كلام جاسر.
-هو فاكر نفسه ايه البني آدم ده.
بصيت علي الفستان الأحمر اللي طلعته وقالت:
-أنا هوريك مين اللي شبه صاحبك يا جاسر.
.......
في الفرح.
كنت واقف وانا متضايق... دموع ميرال مش سايباني... وقررت إني بعد ما أرجع من الفرح أعتذر منها وافسخ الخطوبة... فجأة عينيا اتجمدت وأنا شايفها من بعيد بالفستان الأحمر
-يا دين النبي يا جدعان كل دي كوباية كركديه! يتبع
الجزء الاخير ❤شكرا علي تفاعلكم السكر❤❤
كنت أول مرة أشوف ميرال بالشكل ده.... كانت جميلة اووي.... كانت أجمل بنت شوفتها في حياتي.... اللون الأحمر كأنه اتوجد عشانها وبس مكانش حد ينفع يلبس الأحمر بعدها لأنه مش هيكون بالجمال ده خالص.... بصتلي ببرود وتجاهلتني وراحت تسلم علي بنت خالتي.... بس أنا عينيا كانت عليها.... بسهولة ميرال أخدت علي الجو وقعدت تتكلم مع قرايبي... كانت عاملة زي الفراشة... بتتحرك كتير.... بتضحك وتهزر وكأني مش موجود.... عينيا لمعت بالغضب لما شوفت سامح ابن خالتي بيقرب منها وبيتكلم معاها وهي بتضحك.... قربت منهم وقولت:
-أجبلكم شجرة واتنين لمون!!
بصتلي ببرود فقالي سامح:
-ايه مالك يا جاسر زعلان ليه؟
-يعني شايفك واقف مع خطيبتي بتهزر عايزني اعمل ايه؟
-بتغيري يا بيضة؟! الله مش دي اللي قولتلنا أنك اتجبرت تتجوزها وأنها شبه سوكة.
عينيها دمعت وهي بتبصلي بصدمة وقالت:
-أنت إنسان مش محترم.... لو مش عايز تتجوزني أرفض بس متقللش مني... أنت فاكر نفسك مين؟
-علي أساس أنك مقولتيش لاصحابك إني زي البنات وخرع..
سكتت وقولت:
-ايه خرستي يعني؟!! قولي بقا ليه اتضايقتي من اهانتي وانتي في الرايحة واللي جاية بتهينيني وتقولي عليا خرع وشبه البنات.... يعني عشان مش همجي زيك ابقي خرع!
ضربتني بالقلم وبعدين مشيت.... مشيت وراها... طلعت برة القاعة ووقفت جمب البسين.... وقفت قدامها من جهة البيسين ومسحت دموعها وأنا بقول :
-أنا آسف.
بعدت أيدي وقالت:
متلمسنيش.
بصيت لعينيها وتوهت تاني...ربعت ايديها وقالت:
-أنا مش شبه سوكة علي فكرة أنا قادرة أكون أجمل من أي بنت لو حابة.
-أنا عارف كده كويس.
عيطت وقالت:
-ما دام عارف ليه بتهينني قدام قرايبك... مهما هنتك أنا انت متتكلمش عليا بالطريقة دي. (بقلم سولييه نصار)
-خلاص أنا اسف.
اعتذرت وقربت منها وحضنتها.... قعدنا لمدة دقيقتين كده لحد ما زقتني في البسين وجريت... طلعت من البسين وحطيت أيدي علي قلبي اللي بيدق جامد وقولت:
-جرا ايه يا دكتور أنت هتخيب ولا ايه؟!
.......
تاني يوم.
كنت بسوق عربيتي وأنا بحاول اطردها من عقلي بس مش قادر.... كنت حابب اشوفها بأي طريقة.... طلعت من العربية وأنا حاسس إني مخنوق اووي... كنت محتاج اشوفها بس معرفتش اعمل ايه.... هي بتكون في الورشة حاليا... بصيت لعربيتي وعرفت هعمل ايه....
.....
في ورشة ميرال....
كنت قريب من ورشة ميرال فطلبت من ناس يساعدوني يقطروا العربية في عربيتهم فساعدوني وقفولي عربيتي قدام ورشتها وطلعت وشوفتها كانت بتشتعل بس أول مرة ألاحظ أنها وحتي مليانة زيوت عربيات وشعرها مربوط كانت جميلة.... بصتلي فجأة وقربت وهي متعصبة :
-انت جاي ليه؟
--هكون جاي عشان اتأمل جمالك... جاي أصلح عربيتي.
بصيت العربية وراحت تشوف مالها...
-فيه حد شايل بطارية العربية.
طلعت البطارية من شنطتي وقولت:
-آه أنا شيلتها.... بصراحة لقيتها حجة عشان أشوفك واتكلم معاكي عن مشاعري.
-أنت اتهبلت يا حبيبي مشاعرك دي خليها لنفسك.
-الله حلوة كلمة حبيبي منك بتمني اسمعها كل يوم بعد فرحنا...
اتعصبت وكانت هتطلع من الورشة... مسكت ايديها وقربتها مني وقولت:
-تتجوزيني.... المرة دي أنا مش مجبور ولا هيكون جواز تمثيل... أنا عايزك تتجوزيني... تبقي نصي التاني وتحبيني.
-حبك برص يا بعيد.... ابعد كده سيبني .
-مش هبعد إلا أما توافقي وإلا...
-وإلا ايه....
قربت منها أكتر وأنا بقول :
-انتي اللي هتتفضحي هنا لما زباينك يشوفوكي في الحالة دي...
وفضلت أقرب أكتر.
-جاسر... أعقل يا مجنون.... سيبني خلاص
-موافقة ولا لا.
-موافقة اتجوزك وامري لله.
بوستها علي خدها وقولت:
-خطوبتنا الحقيقية النهاردة يا عروسة والله لو لبستي عفريتة لأعملك فضيحة في الخطوبة
...........
اتخطبنا أنا وميرال والمرة دي حقيقي... صحيح كانت جافة بس أنا مستسلمتش... غريب الحب اللي يدخل قلبك فجأة ويغيرك 120 درجة لو حد قالي إني هحب ميرال بجنون كده كنت فضلت أضحك عليه للصبح
........
-ادخلي برجلك اليمين يا عروسة.
دخلت ميرال وهي مكسوفة.
-الاه انتي بتتكسفي أهو زي البنات العادية يا اسطا.
-أنا... أنا
-ايه القط كل لسانك؟!
قربت منها فبعدت وقالت:
-أنت بتقرب ليه؟!
-يعني ليلة دخلتنا وانتي مراتي هكون بقرب ليه.
-جاسر أعقل.
-لا
-جاسر لا ابعد....
مسكتها وقربتها مني وقولت:
-قوليها.
-لا
قربت منها أكتر فقالت بسرعة :
-انا بحبك
ابتسمت وقولت:
-وأنا بحبك يا سوكة.
ضربتني علي كتفي وضحكنا احنا الاتنين.
تمت
#أحببت_ميكانيكية
#سولييه_نصار
تعليقات
إرسال تعليق