 |
سكريبت❤كامل
تائهة
مدونة #موسوعة_القصص_والروايات
-يعني مش هتتجوزني يا عبد الرحمن؟!
بصلي وضحك وقال :
-اتجوز مين يا نسور فوقي يا ماما انتي يدوب أمشي معاكي.. اتسلي بيكي لكن جواز لا
عيوني دمعت وقولت:
-يعني أنت مبتحبيش
مسك أيدي وقال؛؛
-طبعا بحبك... بس مش لدرجة اتجوزك يعني... أصل صعب رجولتي تتقبل واحدة مشيت معايا وكانت بتخليني أمسك ايديها... انتي تقبليها علي اخوكي.
شلت ايديا بسرعة وقولت :
-أنا عملت كده عشان بحبك... مرضتش ازعلك... أنا وثقت فيك
-وأنا مش واثق فيكي.... أيش ضمني أنك مش هتمشي مع راجل غيري لما نتجوز.... أيش ضمني أنك مش هتكلميه وتخونيني... قوليلي ايه الضمان؟
بصتله بصدمة... مكنتش قادرة اصدق أن عبد الرحمن يفكر فيا بالطريقة دي... معقول هو شايفني كده.... نزلت دموعي وقولت :
-أنت شايفني كده يا عبد الرحمن؟!! أنت شايف أن أنا نسور ممكن اخونك... طب ازاي... ازاي تشك في أخلاقي. (بقلم سولييه نصار )
-أخلاق مين يا أم أخلاق.. إذا كان خنتي ثقة ابوكي اللي رباكي عشاني... كنتي بتكدبي عليه عشان تقابليني ما بالك أنا... واللي ملوش خير في أهله ملوش خير في حد
كنت مصدومة من تفكيره وبعيط وضميري وجعني.... هو ده اللي كدبت علي أبويا ميت مرة عشانه.... معقول يكون شايفني بالسوء ده معقول أنا رخصت نفسي للدرجادي... بصيت لعبد الرحمن وقولت:
-مكنتش اتخيل أن أنت بالذات تفكر فيا بالشكل ده... بس أنا اللي غلطانة إني اديتك الأهمية الكبيرة دي.. أخدت شنطتي وقولت :. -مش عايزة أشوف وشك تاني ولا تتصل بيا .
وبعدين مشيت... أخدت طول الطريق وأنا أبكي... قلبي كان واجعني مش مصدقة إني اتنازلت بالطريقة دي عشانه.... اغضبت ربي وكدبت علي أبويا... أبويا اللي حبني اكتر من حياته وعمل المستحيل عشان يفرحني عشان خاطر واحد زي كده... اتمنيت اووي أن أمي تكون لسه عايشة.... أمي هي ..... وصلت البيت وأنا منهارة.... دخلت اوضتي وفضلت اعيط جامد... أنا مش هكدب علي بابا تاني... مش هخدعه تاني.. دخل بابا اوضتي وقال وهو مخضوض :
-نسور مالك يا بنتي؟
حضنته وأنا ببكي... طبطب عليا وقال:
-طمنيني يا حبيبتي فيه حاجة... فيه حد زعلك... طب أنا زعلتك في حاجة
هزيت رأسي وقولت بكدب وأنا بمسح دموعي:
-اتخانقت بس مع صاحبتي وشدينا شوية فزعلت
-هتتصالحوا إن شاء الله... يالا تعالي أنا عملتلك مكرونة بالبشاميل إنما ايه حكاية... وبالمناسبة أنا رفضت العريس اللي اتقدملك..
بصيتله بصدمة فقال :
-أنا مستحيل اجبرك علي حاجة يا نسور وانتي قولتي أنك مش مرتاحة فأنا رفضته.... اهم حاجة عندي سعادتك
كنت هبكي.... ازاي هو يحبني الحب ده وانا أكون ثقته.... اتمنيت إني أقدر احكيله الحقيقة بس خوفت صورتي تتهز قدامه... مسكني من أيدي... وروحنا عشان ناكل.
......
الأيام اللي بعدها عدت بملل... كنت بروح الكلية واذاكر.... احيانا كنت بشوف عبد الرحمن من بعيد بس مفكرتش أكلمه ولا هو فكر يكلمني.
.....
في يوم بابا قالي:
-متقدملك عريس يا نسور
-موافقة اقابله..
بصلي بابا بصدمة وقال:
-بتقولي ايه؟
ابتسمت وقولت :
-انا موافقة أقابل العريس.
......
بعد يومين كان جه العريس وأهله.... ارتحت ليه... بعدين صليت استخارة ووافقت عليه
قررنا نعمل خطوبة بسيطة في بيتنا... كنت قاعدة جمب ماهر عشان نلبس الدبل ولأول مرة أكون فرحانة بالشكل ده... لبسني الدبلة في أيدي وقال بصوت واطي :.
-مبروك لينا
ابتسمت بكسوف ولسه هلبسه الدبل لما جرس الباب رن
راح بابا وفتحه ولقيت عبد الرحمن دخل وقرب مننا وهو مصدوم... حسيت أن دي خلاص نهايتي... أكيد عبد الرحمن جاي يفضحني... أبتسم ماهر وقالي :.
-أحب أعرفك يا نسور.... ده عبد الرحمن أخويا!!!!
#تائهة
#سولييه_نصار
تفاعل حلو بقا
الجزء الثاني❤شكرا لتفاعلكم السكر يا حلوين😍😍
اتصدمت وأنا ببص لعبد الرحمن... كنت مرعوبة ليتكلم أو يقول حاجة.... عبد الرحمن كان بيبصلي بحقد وبغيظ.
-معلش يا جماعة عبد الرحمن أخويا مجاش معانا المرة اللي فاتت كان بيقضي كام يوم في شرم وتوي جاي... وجه علي خطوبتي علطول.... قرب منه وحضنه وقال:
-عبد الرحمن ده احسن أخ ممكن تشوفه في حياتك.... صمم ينزل علي خطوبتي وجه علطول.... بصلي وابتسم وقال:
-أنا واثق يا نسور أنكم هتتفاهموا مع بعض وهو هيعتبرك أخته....
حسيت نفسي هبكي... مش معقول الحظ اللي عندي ده... أنا لازم أنهي الخطوبة دي... بس انهيها ازاي.... حسيت عقلي وقف.... بصيت علي عبد الرحمن اللي كان بيبصلي بكره وعرفت إني لو كملت في العلاقة دي أنا اللي هخسر.... عشان مستحيل حد فيهم يخسر التاني عشاني.
رجعني بابا علي الكرسي عشان نكمل تلبيس الدبل.
......
تاني يوم بالليل... أهل ماهر عزموني علي العشا أنا وبابا... حاولت اتحجج بس فشلت... كنت عارفة ايه مستنيني... عبد الرحمن مش هيرحمني... واكيد هيفضحني
روحنا بيتهم... كانوا ناس طيبين اووي ومعاملتهم كويسة... بس عبد الرحمن هو اللي كانت معاملتهم معايا باردة...
كنا قاعدين حوالين السفرة لما قال ماهر:
-تعرفي يا نسور أن عبد الرحمن في نفس كليتك بس في الفرقة الرابعة.
بصيت لعبد الرحمن بتوتر فقال بابا :
-يعني خلاص هتتخرج شد حيلك بقا عشان تحصل أخوك ونفرح بيك. (بقلم سولييه نصار )
بصلي عبد الرحمن وقال بتريقة :
-إن شاء الله يا عمي... بس بدور علي بنت الأصول المحترمة اللي تصون بيتي.. أنت شايف حال البنات دلوقتي.... تلقي الواحدة فيهم تمشي مع ده وتتجوز ده جيل مهبب.
اتضايق ماهر من كلامه وقال:
-اعذرني يا عبد الرحمن بس كمان الفلط مشترك كمان عشان الرجالة دلوقتي بتعمل كده مش البنات بس فربنا يصلح حال الجميع..
-بس الرجالة غير يا ماهر... اهم حاجة عن البنت شرفها لكن احنا نعمل اللي احنا عايزينه مفيش حاجة هتعيبه (بقلم سولييه نصار )
-غلط يا عبد الرحمن البنات والرجالة غلطهم واحد عند ربنا فمين احنا عشان نفرق منهم.... متطلبش واحدة تكون ملاك وأنت عاصي.
بصلي عبد الرحمن بغيظ وقال فجأة :
-يعني لو خطيبتك دي كانت مقضياها كنت هتقبل بيها
وقف بابا وقال:
-ايه قلة الأدب دي؟
زعق أبو عبد الرحمن فيه فقام وهو متعصب... بصلي ماهر بكسوف وقال :
-متزعليش يا نسور عبد الرحمن عصبي شوية واحيانا ميعرفش ايه بيقول.
ابتسمت بتوتر وأنا عارفة إني لو كملت أكيد هتبهدل.
.......
بعد ما رجعنا البيت قولت لبابا :
-أنا مش عايزة اكمل الخطوبة دي؟
مسك بابا أيدي وقال:
-ليه يا بنتي ماهر كويس لو علي أخوه متتعامليش معاه... أنا حاسس أن ماهر هيحطك في عينيه ويحافظ عليكي.
-بس يا بابا
-من غير بس آدي لنفسكم فرصة عشان خاطري.
هزيت رأسي وأنا بقول :
-حاضر يا بابا.
...
بعد شوية
لقيت تليفوني بيرن مسكته واتصدمت لما لقيت نمرة عبد الرحمن... مرضتش أفتح فبعتلي رسالة :
-أنا تحت بيتك انزلي قابليني وإلا وديني يا نسور هفضحك.
عيوني دمعت وأيدي اترعشت وروحت اخترعت أي حجة عشان انزل
شوفته فمسك أيدي بسرعة وراح في مكان فاضي شوية وقال:
-اسمعيني يا بت انتي تفسخي خطوبتك من أخويا مش أنا أخلص منك عشان أخويا يبتلي فيكي... أخويا محترم ويستاهل واحدة محترمة مش زيك.
كنت هضربه بالقلم بس مسك أيدي وقال بتهديد:
-بكرة يا نسور جايين أنا واهلي واخويا عندكم... عايزكم قدامنا كلنا تنهي علاقتك بيه والا والله هفضحك فضيحة عمرك ما تتخيليها... بعدين سابني ومشي وأنا جريت علي بيتي
كنت منهارة وبعيط بس قررت حاجة واحدة إني اسمع كلامه وانهي علاقتي بماهر...
.....
تاني يوم جه عندنا وكان عبد الرحمن كل شوية يبصلي بتهديد كنت بهرب من عيونه وابص لماهر... معرفش ليه قلبي وجعني إني هسيبه صحيح مدة ارتباطنا قليلة بس رغم كده كنت حزينة بطريقة محزنتش علي عبد الرحمن لما سابني بيها.
لسه هتكلم وانهي كل حاجة... قال ماهر بصوت عالي :
-أنا واهلي قررنا قرار وحابب اخد رايكم فيه...
بصلي وقال :
-أنا قررت أن مدة خطوبتي أنا ونسور تكون تلات أشهر وبعدين نتجوز علطول
اتصدمت أنا وعبد الرحمن فقام بغضب وقال :
-مش هسمحلك تتجوزها.
بصله ماهر فكمل عبد الرحمن :
-مش هسمحلك تتجوز واحدة كانت مقضياها معايا!!!
يتبع
#تائهة
الجزء الاخير ❤شكرا لتفاعلكم السكر زيكم❤❤
قعدت علي الكرسي بإنهيار.... دموعي كانت بتنزل لوحدها.... وقلبي كان واجعني... بصيت بخوف لماهر لقيته ساكت... بابا أول واحد قام وزعق وقال :
-بتقول ايه يا بني آدم انت؟
-ايه بنتك المحترمة مش قالتلك أنها بدل ما تروح الكلية كانت مقضياها معايا ولا كانت مقرطساك....
قام ماهر وزعقله :(بقلم سولييه نصار)
-عبد الرحمن أخرس...
بابا متكلمش تاني اخدني من أيدي ومشي.
ماهر اترجي بابا ميمشيش بس بابا مسمعش كلامه.
رجع ماهر لعبد الرحمن وقاله:
-عجبك كده... أنت متخلف يا بني!!
-الحق عليا عايزة انقذك من واحد حقي...
قبل ما يكمل كلامه ضربه ماهر بالقلم وقال:
-لما تتكلم عن خطيبة أخوك اتكلم عنها بالأدب
-أنا مش مصدق... أنت لسه متمسك بيها دي كانت...
-عارف
-عارف ايه؟!
-عارف إني قبل ما اخطبها أنت كنت واعدها بالجواز وخليت بيها.
-عشان دي متنفعش للجواز
-ليه؟!
-اللي هو ليه؟ بقولك كانت بتكدب علي أبوها عشان تقابلني ازاي هتأمن لواحدة زي دي.
-لو بمنطقك ده فأنت متنفعش للجواز عشان انت الراجل اللي وعدت وخلفت وانك تخلف وعدك ده معناه أنك مش راجل
-ماهر!
-ليه مصدوم يا عبد الرحمن أنا كنت شاكك أنك تعرفها لما وشك اتقلب يوم الخطوبة واتاكدت يوم ما عزمونا.... ففهمت الموضوع ساعتها... أنت وعدتها بالجواز صح ولا غلط.
بصله عبد الرحمن بتوتر وقال:
-صح... بس أنا
-واحنا اتعلمنا أن اللي ميوفيش بوعده مش راجل يا عبد الرحمن ومفيش واحدة هترضي تتجوزك.
-هما اللي
-هما ايه... أنت اللي لعبت بمشاعر البنات... كام بنت كسرت قلبها وأنا كنت بنصحك واتخانق معاك بسبب الموضوع ده كذا مرة... شوفت بقا وصلتنا لأيه أهو اللي هتبقي مراتي وقعت معاك.
-يعني أنا غلطان وهي ملاك.
-لا طبعا غلطانة بس مش لوحدها أنت مشارك كمان في الغلط وغلطتها دي مش مبرر أننا نحتقرها لأن كلنا بنغلط يا استاذ عبد الرحمن
سكت عبد الرحمن وقال:
-يعني أنت مصمم تكمل
-أيوة مصمم.... لو مكنتش مصمم كنت نهيت خطوبتي أول ما عرفت.
-براحتك يا ماهر أنا مش همنعك ولو حابب أعتذر منها هعتذر أنا معنديش اغلي منك.
......
في البيت
-حاطة وشك في الأرض ليه؟
قالها بابا
-مكسوفة منك يا بابا... مكسوفة ابص للإنسان اللي حبني أكتر من حياته وخذلني
-انتي فعلا خذلتيني
دموعي نزلت فكمل
-أكبر خذلان ليا منك لما خبيتي عليا الحقيقة يا نسور
-كنت خايفة
-ليه؟! خايفة اضربك مثلا! أنا عمري مديت أيدي عليكي.
هزيت رأسي بلا وقولت :
-كنت خايفة أسقط من نظرك
-وانتي كده مش سقطتي من نظري؟!!
كان هيقوم ومسكت ايده وقولت بكسرة :
-هتسامحني.
-سيبي ده للوقت يا نسور.
سابني ومشي وأنا قعدت أبكي.
.......
تاني يوم جه ماهر.
-أنا كنت هجهز حاجتك بس اعذرني نسيت خالص
-حاجة ايه؟
-الشبكة والهدايا وكده
-ليه بتجهزيها
-مش انت هتفسخ الخطوبة؟!
ضحك ماهر وقال:
-مين قال إني هفسخ الخطوبة؟
بصيت للأرض وقولت :
-أكيد بعد اللي سمعته امبارح مش هتقبل تتجوز واحدة زيي
-شوفي يا نسور حقيقي أنا زعلان بس مش منك عليكي... زعلان أن انتوا ببساطة بتثقوا بتخلوا شباب طايش يتحكم فيكم.... اللي يحبك بجد هيخبط علي باب بيتك.... عمري ما يفكر يهين كرامتك... هيخاف عليكي أكتر من نفسك غير كده بتبقي تسلية.
بكيت وقولت:
-عارفة وانا غلطانة
-كويس أنك معترفة بغلطك وده أول طريق تصحيح الغلط... بصي يا نسور أنا مليش دخل بالماضي بتاعك لأني مش ملاك... ليا دعوة بالحاضر والمستقبل موافقة المرة دي بجد تتجوزيني وتديني الحب اللي أنا استاهله وأنا كمان هديكي الحب والاحترام اللي تستاهليه وهحافظ علي كرامتك.
-بس عبد
-ملكيش دعوة بعبد الرحمن مش هيضايقك ابدا... ها موافقة.
جه بابا من ورايا وقال:
-لو وافقتي مستعد اسامحك.
ضحكت وعيطت وأنا ببصلهم ومن غير تردد وافقت مفيش حد عاقل تيجله السعادة لحد بابه ويرفض... ماهر علمني درس مهم اووي... علمني أن مخليش للشيطان سلطة عليا مغلطش وأرخص نفسي لأني اللي هخسر في الآخر... عرفت أن اللي بيحبني عمره ما هيخليني اعمل حاجة غلط بالعكس هيحافظ عليا... اللي بيحب مش بيأذي فسلاما علي قلوب ما زالت تعرف الحب في زمن كثر فيه الخداع
تمت❤
#تائهة
#سولييه_نصار
وبكده خلص الاسكريبت . ونلتقي في واحد جديد بإسم سندس ❤
تعليقات
إرسال تعليق