 |
((((أقدار الحب)))) بقلم ريحانة الجنة
الحلقة (١٦)(١٧)
تاني يوم راح أكمل وشوكت ومايا المستشفي علشان تحليل DNA وفعلا مايا عملت التحليل بس النتيجة كانت لسة كمان اسبوعين . ورجعوا البيت بس أكمل راح الشركة علشان يطمن علي تسنيم .
في الشركة في مكتب تسنيم
تسنيم قاعدة بتفكر في الوضع اللي هي فيه وايه الحل لكل اللي بيحصل ده وازاي حتقدر تعيش وهي شايفة أكمل كل يوم حياته بترتبط بمايا. في الوقت ده الباب خبط
تسنيم : ادخل .
طارق : فتح الباب ودخل . مفاجأة مش كدة .
تسنيم : ابتسمت وقامت تسلم عليه . اهلا طارق هي فعلا مفاجأة تعالي اتفضل .
طارق:اممم بس يا تري بقي مفاجأة حلوة ولا وحشة .
تسنيم : ههههه والله ده يتوقف علي عدد المرات اللي حتعاكسني فيهم واحنا قاعدين .
طارق : هههههههه لا ده انا كدة ممكن تطلبيلي الامن .
تسنيم : هههههههه والله انت بجد مش ممكن مبتعرفش تتكلم جد . هاه قولي كنت جاي ليه
طارق : اصل بصراحة من وقت ماكنا في السخنة وانا مش عارف اشوفك . حتي التليفون مرة تردي وكتير لا.
تسنيم : احمم معلش يا طارق كنت مشغولة بفرح أكمل ومايا ما انت عارف .
طارق : ايوة عارف . انا حتي لما عزمتيني يومها جيت بس دورت عليكي في الفرح كله وملقتكيش وبعدين سلمت علي أكمل ومايا ومشيت .
تسنيم : افتكرت هي قضت الليلة دي ازاي . معلش ياطارق اصلي يومها تعبت فجأة وروحت البيت .
طارق : طيب بصي بقي . انا عايزك في موضوع مهم ولازم نتكلم فيه بسرعة .
تسنيم : خير قلقتني قول.
طارق : قرب من مكتب تسنيم. تؤتؤ مينفعش هنا احنا نروح نتغدا برا وانا حقولك كل حاجة ممكن .
في الوقت ده الباب اتفتح ودخل أكمل
أكمل : بغيظ . ايه ده بقي ده انشاء الله.
طارق : اتعدل في وقفته . احممم ازيك يا أكمل .
أكمل : اهلا انت كنت واقف عندك بتعمل ايه
تسنيم : اهدي يا أكمل طارق معملش حاجة هو بس بيتكلم معايا .
أكمل : كلام؟ كلام ايه ده بقي اللي موقفه قريب منك كدة . اسمع يا طارق. ملكش دعوة بتسنيم انت فاهم
طارق: وانت مالك انت انت يا دوب ابن عمها وهي بس اللي تقرر اذا كنت اكلمها ولا لا .
تسنيم : يا جماعة لو سمحتم كفاية كدة . طارق ممكن تنزل تستناني تحت وانا جاية وراك .
طارق: وهو بيبص لأكمل بغيظ وأنتصار ان تسنيم حتخرج معاه . حاضر يا سمسمة حستناكي بس متتأخريش .
أكمل : وهو خارج . متفرحش اوي كدة مش حتخرج معاك .
طارق مشي ومردش عليه أكمل قفل الباب وراح لتسنيم وهو علي أخره
أكمل : ممكن اعرف يا هانم ايه حكاية طارق ده انتي مش ناوية تبطلي جنان بقي خلصنا التحليل يطلع بس وبعد كدة حطلق الزفتة دي . يعني ملوش لزمة اللي بتعمليه ده
تسنيم : أكمل انا حاسة ان البيبي ده ابنك وانا مش حينفع اكون السبب. ان يتربي بعيد عن امه وابوه . اناجربت الاحساس ده واتربيت بعيد عن امي والنتيجة انها مبتحبنيش بتحب مايا أكتر علشان كانت معاها . عشناطول عمرنا متفرقين انا وبابا وماما واختي . انسي يا أكمل احنا حكايتنا وقفت لحد كدة انت لازم تحاول تفهم مايا وتحبها وانا كمان لازم انسي واشوف حياتي
أكمل :مسكها من ذراعها انتي بتقولي ايه . مستحيل ده يحصل انتي ملكيش حياه بعيد عني انا حياتك ودنيتك انت فاهمة وطارق ده تنسيه خالص بدل ما والله اروح اقتله وتبقي انتي السبب .
تسنيم : عيطت لو سمحت كفاية انت لوبتحبني سيبني انسي انا خلاص مبقاش فيا مكان لجرح ووجع منك تاني سيبني يا أكمل سيبني أعيش وانسي
واخدت تسنيم شنتطها ومشيت واكمل كان واقف ماسك دماغه ومخنوق وقلب كل اللي علي المكتب .
أكمل : لا لا مستحيل يعني انا اتكتب عليا اتحرم منها لاخر العمر واعيش مع مايا لا. لا انا مش حستني اكتر من كدة انا لازم اكلم عمي واخلص موضوع الطلاق ده . وراح أكمل لعمه في مكتبه .
في مكتب شوكت
أكمل : خبط ودخل . ازيك يا عمي .
شوكت : اهلا تعالي انا لسة واصل دلوقتي كنت بوصل مايا . هاه مالك
أكمل : عمي انا عملت كل اللي طلبتوا مني لحد دلوقتي بس خلاص مبقتش متحمل ارجوك انا لازم اتطلق مايا .
شوكت : انا عارف اني ضغط عليك كتير بس علشان خاطري . استني لحد النيجة ما تطلع لو مطلعش ابنك حخليك تتطلقها في ساعتها. لكن لو ابنك حيهون عليك انك تتطلقها وتاخد ابنك يتربي بعيد عنك زي ما أمها اخدتها بعيد عني وربيتها واديك شايف النتيجة . حترضي ان ابنك ولا بنتك تتربي بنفس الطريقة
أكمل : مكنش مفكر في كلام عمه ده قبل كدة . بس حتي لو ابني انا حخده اربيه
شوكت : كنت عرفت انا اخد مايا من نسرين . هي من حقها حضانتها . اهدي يا اكمل اهدي واستني يا ابني معلش .
أكمل قام وراح مكتبه وخلص شغله ولسة تسنيم مرجعتش الشركة كلمها تليفونها مقفول . رجع علي البيت يشوفها .
في البيت أكمل بيدور علي تسنيم مش لاقيها .
مايا : ازيك يا كيمو مالك بتدور علي مين.
اكمل : هي تسنيم مرجعتش لحد دلوقتي .
مايا : لا لسة . عايز حاجة. ولا وحشتك
أكمل : اوففف ابعدي عني انا مش طايقك .
مايا : طيب اعملك ليمون يهديك.
أكمل : مايا امشي من وشي الساعة دي انا ممكن اصور قتيل
مايا : اوبس واضح ان الموضوع كبير اوي . طيب بص انا جبتلك ايه وانا راجعة مع بابي ايه رايك في التيشيرت دي .
أكمل : مش زوقي . ومتبقيش تتعبي نفسك تسنيم هي اللي عارفة انا بحب ايه وهي اللي بتختارلي كل لبسي
مايا : تسنيم تسنيم تسنيم . القهوة تسنيم اللي بتعرف تعملها الاكل تسنيم اللي عارفة انا باكل ايه اللبس تسنيم هي اللي عارفة زوقي
ايه انت مفيش في كلامك غيرها مبتعرفش تتكلم من غير ما تجيب اسمها علي لسانك . ربنا يخدها ويريحني منها .
أكمل : ربنا بخدك انتي وكلنا نرتاح منك اوعي انا طالع أوضتي .
وطلع اكمل اوضته وقعد يستني تسنيم في بلكونة أوضته وكان بيسمع الاغنية دي ( ايوة انا عارف ان كلامي عليها كتير . اصل حكايتي معاها حكاية حب كبير . ده من يوم ماسابتني وقلبي ماهوش مرتاح اسكت ليه ده انا بس بقول اسمها برتاح)
في مطعم شيك جدا طارق وتسنيم قاعدين بعد ما اتغدوا .
طارق : هاه يا سمسمة قولتي ايه
تسنيم : شكلها قلقان وخايف . طارق انت فاجئتني . مش عارفة بصراحة اقولك ايه
طارق : بصي يا تسنيم انا عارف ان احنا منعرفش بعض لسة بس لما نتخطب حنقرب من بعض وتعرفيني كويس انا لو عليا اصلا اتجوزك دلوقتي حالا لكن عارف انك محتاجة وقت تعرفيني وتخدي عليا وانا بصراحة عايزك ليا بجد علشان كدة طلبت اخطبك يعني مقولتلكيش نتصاحب ولا نتقابل ارجوكي وافقي بس وانا حخليكي تحبيني .
تسنيم . خلاص يا طارق حفكر وارد عليك . بس دلوقتي انا لازم اروح اتأخرت
طارق : حاضر يا سمسمتي .
تسنيم : اتضايقت. علشان دي كانت دلع أكمل ليها ومش عايزة تسمعها من غيره . طارق ممكن متقوليش سمسمتي دي تاني لو سمحت
طارق : حاضر اللي يعجبك حقولك يا حبيبتي وياروحي ويا قلبي . بس وافقي انتي بس .
تسنيم : طيب يالا بينا علشان اروح
ورجعت تسنيم واكمل كان مستنيها في الجنينة . ولما وصلت .
أكمل : حمد علي السلامة يا هانم كل ده كنتي فين . كل ده مع طارق .
تسنيم : خاليك في حالك وملكش دعوة بيا انا اخرج مع اللي يعجبني فاهم .
أكمل : انتي يا عبيطة يا بتستعبطي . انسي انك تفكري حتي في حد غيري والله اموتك انتي فاهمة .
تسنيم : كدة طيب اسمع بقي طارق جاي يخطبني وانا وافقت وحقول لبابا . عن اذنك
أكمل : تعالي هنا مين ده اللي بخطبك ده يبقي أخر يوم في عمرك انتي وهو انتي مجنونة حتتجوزي ازاي
تسنيم : قلتلك ملكش دعوة انا حتصرف في حياتي خاليك انت مع مراتك وابنك اللي جاي .
وفعلا تسنيم كلمت شوكت وطبعا فرح جدا لانه كان نفسه اوي ان تسنيم تتجوز واخيرا واقفت . وحددوا معاد الخطوبة وطبعا اكمل كان بيموت وهو شايف طارق كل يوم مع تسنيم وكل يوم يتخانق معاها وكان نفسه يموتها ويموت نفسه . 😣😣😣
*******
الحلقة ١٧
وفي ليلة بالليل كان خلاص تاني يوم خطوبة تسنيم وطارق وأكمل كان راجع من برا متأخر مكنش بيطيق يقعد في البيت وهو شايف طارق داخل خارج . ولما رجع لقي تسنيم قاعدة بعيد في أخر الجنينه راحلها لقاها بتعيط .
أكمل :جه من وراها وحضنها . بلاش يا تسنيم . علشان خاطري بلاش
تسنيم : مسحت دموعها وحاولت تبعد عنه . أكمل ابعد .
أكمل : لا مش حبعد انا وحشني حضنك انتي كلك واحشاني انا بموت من غيرك يا تسنيم . وانتي كمان عمرك ماحتقدري تنسي عمرك . ده انا حبيبك علشان خاطري استحملي بس لحد ما الزفته دي تولد ما انا خلاص اتدبست وعرفت انه ابني .
تسنيم : عيطها زاد. انا خلاص نفسي اموت وارتاح انا تعبت تعبت .
أكمل : لفها ليه وحضنها . مش اكتر مني. والله مش أكتر مني . انا عمري ماكنت اتخيل اني اتجوز واخلف من غيرك .
تسنيم : بس مايا ملهاش ذنب انت . حرمها من حقوقها . مش يمكن لما تديها فرصة تحبها .
أكمل : ملهاش ذنب اومال الذنب ذنب مين . مش بسببها انا وانتي في الموقف المهبب ده . انتي ازاي بتطلبي مني كدة انتي متعرفيش انا ندمان قد ايه علي الليلة السودا اللي قضتها معاها بس والله انا وقتها كان عقلي فيكي انتي كنت نازلك اشوفك وانا كلي غيرة ولهفة عليكي لما شوفت مروان وهو بيقرب منك .
تسنيم : اه علشان كدة نسيت كل ده وخرجت نمت في حضنها .
أكمل : ابدا والله هي بس اللي عملت حاجات مينفعش احكيها . بس والله انا كنت شايفك انتي . واول ما سيبتها . كنت عايز اموت نفسي . ومن يومها والله ما اقربتلها . صدقيني يا تسنيم
تسنيم : خلاص يا أكمل مبقاش ينفع . انت جايلك بيبي . ولازم تفكر فيه هو .
أكمل : يعني مصممه علي الخطوبة
تسنيم : ايوة. خلاص مفيهاش رجعة الخطوبة بكرة
أكمل : انا حسيبك تعملي خطوبة بس يا تسنيم علشان عمي ميلحش عليكي اكتر من كدة . بس حسك عينك يحط ايده عليكي . فاهمة
تسنيم : هو انا خلاص بقيت في نظرك سهلة كدة ممكن اي حد يعمل اللي هو عايزه معايا
أكمل : ضربها علي دماغها. غبية وحمارة انا مقصدش كدة . انا اقصد يمسك ايدك ولا يقرب منك . انا عارف ان مفيش حد غيري حيقبلك مش بس علشان انا ممكن اقتك واقتله ساعتها وده مش هزار . لا كمان انا عارف انك عمرك ما تستحملي تكوني مع حد غيري .
تسنيم : واثق اوي كدة ليه .
أكمل : حضنها . علشان حبيبك وملكيش حبيب غيري فاهمة. واوعي بكرة ترقصي معاه انا ممكن اكعبله واكسرله رجله .
تسنيم : ههههههه . طيب اوعي يا خويا خليني اطلع . ومشيت شوية ولفت . علي فكرة حنرقص سلو انا وهو وابقي وريني حتعمل ايه .
اكمل : كدة . وشال مخدة من اللي علي الكرسي اللي في الجنينة وضربها بيها وتسنيم جريت علي فوق .
أكمل : ههههه الله يخرب عقلك جننتيني بس اعمل ايه بحبك . وعمري ماكنت اتخيل اني ممكن اشوفك بتتخطبي لغيري . بس حقول ايه قدر ومفيش مفر منه . الله يخربيتك يا مايا ربنا يخدك ....
وجه تاني يوم اللي في خطوبة تسنيم وطارق في قاعة كبيرة شوكت ومايا ونسرين قاعدين وطبعا معازيم كتيييير وطارق بيرقص مع تسنيم وأكمل واقف مع مروان حيتجنن وحيموت من الغيرة
مروان : يا أكمل اهدي بقي الناس حتاخد بالها انت مش شايف انت بتبص لطارق ازاي
أكمل : اهدي ازاي انت مش شايف الحيوان حاضنها ازاي ده نفسي اجيب اجله دلوقتي .
مروان : خلاص بقي حتعمل ايه . مش في ايدك. حاجة
أكمل : بغيظ وتحدي لا في ايدي . وحتشوف . ومشي أكمل لتسنيم وطارق .
مروان : انت يا مجنون تعالي هنا..... الله يخرب بيتك حتودينا في داهية ده راحلهم فعلا ربنا يستر بقي
أكمل : خبط علي كتف طارق . ممكن ارقص مع اختي لو سمحت .
طارق : مش طايق أكمل . بس ده فرحي
أكمل : بإبتسامة صفرا . لو مرقصتش معاها دلوقتي انت مش حترقص معاها لاخر الفرح
طارق : اوففف منك. ان شاء الله قريب حتجوزها واخلص منك .
أكمل : ربنا يديك طولة العمر . عن اذنك . واخد أكمل تسنيم هو يرقص معاها.
تسنيم : انت اتجننت. ايه اللي عملته ده
أكمل : انتي السبب مش انتي اللي صممتي علي الخطوبة الزفت دي . خلاص اتحملي بقي
تسنيم : طيب ممكن بقي تبطل اللي انت بتعملو ده علشان مش عايزة مشاكل .
أكمل : مفيش مشاكل طول ما سي زفت ده بعيد عنك بس بقولك ايه انتي ايه الفستان اللي انتي لابساه ده انتي مش عارفة اني مبحبش الظهر العريان انتي متعمدة تغظيني صح.
تسنيم : وانا اغيظك ليه وبعدين هو انا لابساهولك . ده لطارق .
أكمل : كدة طيب استكملي بقي اللي حعمله. وحضنها اوي وحط ايده علي ظهرها .
تسنيم : الله يخربيتك . ايه ده اوعي الناس تقول ايه.
أكمل : انا خلاص مبقاش يفرق معايا حد وانتي السبب مش عايزة تتخطبي . اتحملي نتيجة قرارك
تسنيم : طيب علشان خاطري ابعد شوية كدة طارق ممكن يا خد باله ومايا اصلا شاكة مش عايزة فضايح يا اكمل علشان خاطري .
أكمل : اعتذري الاول .
تسنيم : انا اسفة . اوعي بقي .
أكمل : ابتسم وبعدها شوية بعد ما كان ضممها اوي . ايوة كدة خاليكي عاقلة. بقولك ايه انتي مش حترقصي معاه تاني فاهمة .
تسنيم : مينفعش دي خطوبتنا لازم نرقص .
أكمل : والله اجرك مش شعرك قدام الناس انا خلاص جبت اخري .
.
علي ترابيزة شوكت . قاعد ومايا ونسرين وطارق جه قعد جنب شوكت
شوكت : مالك يا طارق .
طارق : وهو مخنوق . حضرتك مش شايف أكمل واخد عروستي هو اللي يرقص معاها . وانا قاعد .
شوكت : ههههههه هو ده اللي مزعلك . لا بقولك ايه الا اكمل انت تغير عليها من اي حد في الدنيا الا اكمل ده مش بس ابن عمها واخوها ده كان بيعاملها اكنها بنته كمان ومدلعها علي الاخر . واحسنلك متتخلش بينهم حتتعب
طارق : طيب انا عايز ارقص مع خاطبتي اعمل ايه .
شوكت : ههههه روح قولوا عمو شوكت بيقولك خف شوية .
أكمل : وحشتيني وحشتني عنيكي بقالي كتير مشوفتهمش من قريب . كدة تحرميني منهم .
تسنيم : بتاخد نفاسها وبتحارب نفسها . هي لو عليها تتعلق في رقبته وتحضنه ووحشها اوي بس مينفعش
أكمل : ايه سرحتي في ايه. بس تعرفي انتي جميلة اوي النهاردة كان نفسي دي تكون خطوبتنا احنا. اه يا سمسمة انا بحبك اوي اوي
تسنيم : أكمل لو سمحت كفاية. انامش ناقصة. وبعدين طارق جاي
أكمل : تسنيم انتي بتاعتي انتى فاهمة! مفيش راجل غيري ممكن يقربلك. فمتهتميش اوي بزعل سي زفت ده .
طارق : خبط علي كتف أكمل. ممكن خطيبتي بقي لو سمحت عايز ارقص ده فرحي .
أكمل : بعد الاغنية دي ابقي تعالي .
طارق : ازاي يعني بقي؟ بقولك ايه عمو شوكت بيقولك خف شوية .
أكمل : عمي قالك كدة . طيب قولو التقيل جاي ورا .
طارق : لا والله انا بقي اسيب عروستي وفرحي واشتغلكم مرسال لا روح قولوا انت وسيبلي عروستي .
أكمل : انا قولت بعد الاغنية دي .
طارق : مشي مخنوق .
حازم : مالك يا بني متضايق ليه ده انت كنت حتموت علي اليوم ده
طارق : ولسة ميت يا خويا بس المتخلف اللي اسمه أكمل ده واخد تسنيم قوة واقتدار كدة وبيرقص معاها. تقولش فرحه هو!!
حازم : طيب بقولك ايه عايزه يسيبها .
طارق : ياريت
حازم : روح ارقص مع مراته وهو يسيب تسنيم ويجي ياخد مراته منك .
طارق : تصدق صح انا حربيه اوعي .. راح طارق لمايا .... مايا ممكن ترقصي معايا.
مايا : مصدقت اصلا . اوي اوي يا سلام تعالي . وراحت ترقص مع طارق .
طارق بيرقص مع مايا وأكمل شافهم ولا اتأثر عادي
تسنيم : طارق بيرقص مع مايا .
أكمل : هههههههه واخد بالي هو ناصح فاكر انه كدة حيخليني أغير علي مايا واسيبك واروح اخدها منه . عبيط ههههههههه.
تسنيم : بتكتم ضحكتها .
أكمل : والله الواد اهبل هو متخيل اني اسيب القمر واروح للنجوم بيستهبل . سيبك منهم وخليكي في حضني يا قطتي .
تسنيم : ياه يا أكمل انت عارف انا بقالي قد ايه مسمعتهاش منك .
أكمل : اتنهد . اعمل ايه بس ما انتي مقفلاها عليا ومش مخلياني حتي اخد راحتي معاكي
تسنيم : أكمل اللي بيحصل ده غلط والله غلط .
أكمل : حيتصلح الغلط ده لما اطلق مايا ونتجوز انا وانتي . بس قوليلي وحشتك .
تسنيم : نامت في حضنه اوي اوي يا أكمل
طارق بيرقص مع مايا .
طارق: عينه علي تسنيم وأكمل
مايا : واخدا بالها. الاتنين دول فظاع تحسهم متجوزين مش ولاد عم
طارق : بصراحة علاقة مختلفة مشوفتش كدة ده متهيألي يعني سوري . بيحبها اكتر منك
مايا: لا عادي بس اصلهم متربين مع بعض من زمان لكن انا لسة راجعة من لبنان ومش واخدة عليهم .
طارق : انتي مش بتغيري
مايا : ههههه من مين تسنيم . تؤتؤ انا أحلي كتير
طارق : هههههه لا بصراحة ان جيتي للحق سمسمة مفيش في جمالها .
مايا : كدة طيب ماتروح تخدها هي وترقص معاها. جايلي انا ليه
طارق : عادي انا قلت ارقص معاكي لحد لما جوزك يسبها شوية
مايا : يبقي حتقعد جنبي للصبح . عايزها روح خدها .
طارق ساب مايا . عندك حق عن اذنك وراح لاكمل وتسنيم اللي كانوا ناسين الدنيا والفرح وحضنين بعض وبيرقصوا
طارق : اظن كفاية كدة بقي علشان انا خلاص حنتحر.
أكمل : بص له ولسة حيتكلم الاغنية خلصت. بإبتسامة اتفضل بس يا خسارة الاغنية خلصت . عن اذنكم
طارق : انا حخليهم يشغلوا واحدة تانية .
تسنيم : لا كفاية يا طارق انا تعبت وعايزة اقعد .
طارق : يرضي مين ده يعني هو اللي رقص معكي الاغنيتين اللي فاتوا وانا اول ما اجي ارقص معاكي تتعبي
تسنيم :هههههههه معلش لسة الليل طويل ارتاح شوية ونبقي نرقص.
طارق : ابتسم . حاضر ياروحي تحت أمرك اتفضلي تعالي نقعد ومسك ايديها وراحوا يقعدوا
أكمل : شايف يا مروان الحيوان ده ماسك ايديها ولازق فيها ازاي !
مروان : وبعدين يا أكمل كفاية يا بني ماانت اخدتها منه ورقصت معاها كمان .
أكمل انا مش متحمل انا ماشي
مروان : رايح فين ؟
أكمل : في ستين داهية !
ومشي اكمل وهو مش طايق نفسة من الغيرة والفرح خلص وطارق اخد تسنيم وكملوا سهرتهم بره لوحدهم . ولما رجعت تسنيم كانت متوقعة انها تلاقي أكمل مستنيها بس ملقتهوش . ولقت شوكت خارج من المكتب .
شوكت : اخيرا جيتي كنت عايز اطمن عليكي .
تسنيم : اسفة يا بابا اتأخرت .
شوكت : ولا يهمك الليلة فرحك افرحي وانبسطي . بس متنسيش الصبح تبقي تطمني علي أكمل .
تسنيم : قلبها دق جامد من الخوف . ماله أكمل يا بابا ؟
شوكت : ولا حاجة وهو راجع سايق بسرعة وطلعت في وشه عربية وهو مكنش رابط الحزام . اتخبط وكتفه اتخلع .
تسنيم : خافت وقلقت عليه . طيب هو بقي كويس؟؟
شوكت:الحمد لله بس لابس الحزام علشان ذراعه لسه واجعه . يالا تصبحي علي خير .
وطلعت تسنيم بسرعة علي اوضتها وخايفة تروح لاكمل اوضته بالليل كدة . اتصلت بيه مبيردش عليها . دخلت البلكونة لقته واقف وكتفه مربوط .
تسنيم : بلهفة. أكمل!!
أكمل : لفلها وهو بيبصلها بزعل وعتاب . نعم .
تسنيم : عامل ايه طمني عليك ؟
أكمل : يهمك تعرفي ؟ انتي مش كنتي مع الزفت ده ومبسوطة خلاص؟ بتسألي عليا ليه ؟
تسنيم : أكمل . بجد انا قلقانة عليك كتفك عامل ايه ؟
أكمل : ملكيش دعوة روحي اسألي علي سي طارق .
تسنيم : كدة طيب انا حدخل انام ودخلت .
أكمل : ههههه لا والله اناعارف انك مدخلتيش أوضتك ولسة في البلكونة ومش حيجيلك نوم وانتي خايفة عليا . اسمعي دي بقي علشان تسليكي وانتي قاعدة وشغلها اغنيه لعمرو دياب اسمها (مالك )(مالك مش خلاص حبيت ناس بقيت معاهم . ليه بتسال ليه عني من وراهم ....)
واكمل كان قاعد لحد ما تسنيم سمعتها وبعدين . غمزها وابتسم. وقالها
أكمل : تصبحي علي خير يا واجعة قلبي .
تسنيم:ابتسمت ودخلت تنام
*****
))) بقلم ريحانة الجنة الحلقة (١٦)(١٧) تاني يوم راح أكمل وشوكت ومايا المستشفي علشان تحليل DNA وفعلا مايا عملت التحليل بس الن…){kind=link}
تعليقات
إرسال تعليق