مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت💖بقلم سولييه نصار💖

- انا بحبك يا احمد 

قولتها بسرعة ...من غير تفكير ..من غير تردد ...وبصيت ليه بخوف ...ضحكته اختفت ...وبان الغضب علي وشه ...

-احمد 

قلت بخوف 

-اخرسي يا جهاد ....اخرسي خالص ...ايه اللي انتي بتقوليه ده فهميني ازاي بش تفكري في ده ...ازاي عقلك يسمحلك تفكري كده 

-مش عقلي ده قلبي يا احمد ...قلبي بيحبك ..

وانت عارف ...حاولت انساك  مقدرتش ...سافرت واشتغلت ومليت يومي عشان ابطل افكر فيك بس برضه مقدرتش ...قولي اعمل ايه 

بصلي بقرف وقال:

- انتي لو كنتي اخر واحدة في العالم مش هبصلك حتي ....شروق اعتبرتك اختها ..تقومي تحطي عينك علي جوزك ...مشوفتش حقارة بالشكل ده .

دموعي نزلت وزعقت بقهر:

-هي كانت عارفة اني بحبك ورغم كده وافقت عليك عشان تقهرني ....شروق عمرها ما حبتني....شروق وافقت عليك عندا فيا 

-احترمي نفسك واتكلمي عن بنت خالتك عدل ...بس الحق مش عليكي الحق عليا اني بتعامل مع واحدة زيك ....ات....اتفضلي اطلعي برة ومن هنا ورايح تعاملنا مع بعض في حدود الشغل بس ...انسي في يوم انك كنتي صديقتي او جارتي ....حتي متتعامليش مع شروق تاني مش عايزك تقربي من عيلتي فاهمة ولا لا ....انا واحد متجوز وبحب مراتي 

مسحت دموعي ورفعت راسي وقولت :

-تمام يا فندم 

وطلعت من المكتب بتاعه وانا ببكي علي غبائي...ليه اعترفتله ...ليه قللت من نفسي بالشكل كده....احمد هو حب طفولتي السري ...انا وهو كنا جيران وأصحاب اووي ...كان الكل متوقع اننا بما نكبر هنتجوز بعض ...حتي ماما دايما بتقولي هتتجوزي احمد لحد ما الفكرة دخلت دماغي وحبيته...حبيته اووي كان الكل عارف اني بحبه حتي شروق ...استنيت بفارغ الصبر انه يتقدملي ...بس اتصدمت صدمة عمري لما خطب شروق وبعدين اتجوزها...حياتي وأحلامي اتحطمت ...كنت بعيط دايما ...سافرت وبعدت عشان انسي ...بس مقدرتش وبعدين رجعت والقدر قرب بينا واشتغلت في شركته ....حاولت اعامله زي اخويا بش حبه جوايا كان بيزيد لحد ما قررت اني اعترفله وياريت ما اعترفتله...مكسبتش حاجة الا ان كرامتي اتبهدلت علي ايده !!

.....

روحت البيت وانا عيوني حمرا ...وقفت قدامها وقولت :

-انا موافقة علي العريس يا ماما 

ابتسمت براحة وقالت :

-ربنا يكملك بعقلك يا بنتي ...اخيرا فوقتي لنفسك....انا هكلم ابوكي اخليه يتصل بيه يجي النهاردة. .

هزيت راسي. دخلت اوضتي....دفنت راسي في المخدة وقعدت ابكي !!

.........

بالليل ....

كنا قاعدين مع العريس وأهله بنقرا الفاتحة ..في الوقت ده قررت انسي احمد نهائي واركز في حياتي الجديدة وبمجرد ما الاقي شغل هستقيل من الشركة ...

.......

-جهاد اتقرت فاتحتها 

قالتها شروق وهي حاسة براحة ان اخيرا جهاد شافت حياتها ...من ناحية شعورها بالذنب خف لما اتجوزت احمد ومن ناحية جهاد هتشيل احمد من دماغها ...بصلها احمد بصدمة ...شعور غريب جواه ...مكانش حاسس بالراحة ان البنت اللي اعترفتله بالحب من ساعات بيتقري فاتحتها دلوقتي ...

بس ابتسم وقال لشروق:

-الف مبروك ليها بإذن الله بكره نروح ونباركلها 

......

تاني يوم 

دخلت مكتبه وانا متوترة وقولت :

-اتفضل حضرتك ده الورق اللي طلبته 

بصلي وقال :

-الخطوبة امتي 

-بعد اسبوعين يا فندم 

-يااه بالسرعة دي ده انتي لسه امبارح كنتي بتقولي بتحبيني

حطيت الورق علي المكتب وقولت :

-عن اذنك يا فندم 

ولسه هطلع مسك ايدي وزعق:

-كلامك كدب صح ....وحبك كان كدب 

-انت عايز ايه دلوقتي مش فاهمة 

-تنجوزيني !

-ايه ؟

-بقولك تتجوزيني؟!

-هتطلق مراتك؟

-لا انا بحبها مستحيل اتخلي عنها ....احنا هنتجوز في السر !!!

#زواج_سري

#سولييه_نصار

تفاعل قوي عشان انزل كمان بارت 💖

الجزء التاني 💖بقلم سولييه نصار💖

بصتله وانا مش مصدقة ..ازاي يعرض عليا عرض زي ده ....دموعي نزلت وقولت بغضب :

-انت انسان رخيص ...

كنت همشي بس مسك دراعي وقربني منه وقال :

-اعترفي يا جهاد...انتي بتحبيني ...مش هتقدري تحبي ولا تتجوزي حد غيري ...انا بعرض عليكي فرصة العمر اهي ...هنتجوز في السر وههتم بيكي زي شروق هديكي الحب اللي انتي عايزاه مني ...

كنت همشي بس مسكني جامد وقال :

-فكري يا جيجي انتي مش هتكوني مبسوطة مع حد غيري ....هتتجوزيه وهتفكري فيا دي مش خيانة بالنسبالك !!

زقيته وهربت من مشاعري وانا ببكي ...طلعت من باب الشركة وروحت علي البحر ...انا خطوبتي بعد اسبوعين بس حاسة الدنيا اتحطمت من حواليا ...انا مش هسرق جوز قريبتي وبس انا هفضح نفسي واقل من اهلي لما اقبل الجواز منه  ...قررت اني هستقيل ايوة هستقيل وطظ في الشغل 

....

قعد احمد علي الكرسي وهو مصدوم من كلامه وطلبه ...هو حتي مفكرش ...طلبها علطول ...هو مبيحبهاش هو متأكد من ده ....هو مبيحبش الا شروق لكن جهاد بترضي غروره ان واحدة تقل من نفسها وتعترف بحبها ليه ده ارضي غروره كراجل بش اللي كسر غروره شوية انها في نفس اليوم قرأت فاتحتها !!...حاسس انه هيتجنن حياته مثالية مع شروق ليه عايز يخربها بالشكل ده ؟!هو ذات نفسه مش عارف بس عارف انه مش عايز يضيعها من ايده ...ومش هي اللي ترفضه مفروض هو اللي يرفضها ....غمض عينيه وهو بيفكر في خطوته التانية .

.........

تاني يوم 

-ايه دي يا جهاد 

-دي ورقة استقالتي يا احمد انا مش هشتغل هنا تاني 

ابتسم ....ابتسامته خطفت قلبي...معرفش انا ليه ضعيفة بالشكل ده قصاده ....ايه مش قادرة اخرجه من قلبي ....ليه مش قادرة احب غيره ....قام احمد وقرب مني وقال :

-انتي عايزة فعلا تبعدي ...هتقدري تنسيني ...فكري يا جهاد انا بعرض عليكي فرصة العمر ...احنا نتجوز في السر لحد بس ما اتكلم مع شروق وبعدين نعلن جوازنا ...ايه رايك ....

كنت عايزة ارفض ...اصرخ في وشه بس انا كنت أضعف منه بكتير ....انا كنت بحبه ...حبه كان مسيطر عليا....دموعي نزلت وقولت :

-انت بتستغل حبي ليك 

-انتي اللي خليتيني احطك في دماغي يا جهاد مش ذنبي 

بعد وقولتله :

-لو وافقت توعدني في اسرع وقت تعلن جوازنا 

-اوعدك 

غمضت عيني ودموعي نزلت وقولت :

-موافقة .

............

كنت قاعدة قدام البحر وانا ببكي ....حاسه بجبل علي قلبي ...انا ليه وافقت معقول الحب يخلينا ضعاف بالشكل ده ...مفروض احمد كان يكون ليا امي كانت دايما تقول كده ...انا لاحمد واحمد ليا ...بس شروق هي اللي اخدته مني يبقي تستاهل ...انا ليه زعلانة ...هي اللي سرقته يبقي تستاهل ...مسحت دموعي وروحت للبيت 

............

وقفت قدام امي بشجاعة وقلت من غير تفكير :

-ماما انا مش عايزة اتخطب

-ايه !!!

-سمعتيني انا لغيت فكرة الخطوبة خلاص ...اتصلي بالناس وبلغيه...

وقبل ما اكمل كلامي نزل قلم قوي علي وشي 

يتبع 

#زواج_سري 

#سولييه_نصار

انا اسفة طبعا لاني خلفت بوعدي بس امبارح شوفت اعتراضات كتير علي القصة لدرجة خوفت أكملها اصلا وكنت همسحها و كل ما اكتب جزء امسحه ...بس قررت هنزل القصة زي ما انا مخططة ليها لاني حابة اوصل حاجة معينة وان شاء الله أوصلها...لا جهاد مظلومة ولا شروق ولا احمد بالمناسبة وكل واحد فيهم هياخد نهايته اللي يستحقها ..ومش لازم البطلة دايما تكون مسكينة صح😅

الجزء التالت شكرا لتفاعلكم السكر💖💖بقلم سولييه نصار💖

-تلغي ايه يا بت 

مسكتني امي من شعري وزعقت :

- هي  لعبة يا حبيبتي ...احنا اتفقنا مع الناس خلاص 

-مبحبهوش يا ماما مبحبهوش ...

-ووافقتي ليه من الاول .

شدت شعري جامد فصرخت وقالت هي بعصبية :

-قولي يا بت مين لعب في عقلك انطقي 

مقدرتش اتكلم وقعدت ابكي 

زقتني لحد ما وقعت علي الأرض وقالت :

- احمد لعب في عقلك مش كده ...انطقي 

-احمد عايز يتجوزني .

قربت وضربتني بالقلم وهي بتصرخ:

-يالهووي هتفضحينا منك لله ...ده جوز بنت خالتك انتي اتجننتي

- هي سرقته مني 

-افهمي يا حمارة هو محبكيش...حبها هي الحب مش بإيدينا...عايزة ترخصي نفسك!!!

-انتي السبب

- انا 

صرخت وقولت :

-ايوة انتي ....انتي اللي حطيتي في عقلي ان احمد هيكون ليا ...قولتيلي انه بيحبني وهيتجوزني...كل يوم كنتي انه هيبقي ليا....متوقعة حالتي هتكون ايه لما افوق من حلمي السخيف والقاه اتجوز  بنت خالتي اللي عارفة اني بعشقه ده ...انتي اللي ظلمتيني...انتي اللي عيشتيني في أوهام 

-ده كان من الماضي افهمي ...كنتي لسه عيلة انسي بقا 

-ايوة كنت عيلة بس بنيت احلامي معاه ...بسبب كلامكم خليته بطل احلامي ...بسبب كلامكم حبيته اكتر واتعلقت بيه أكتر...ودلوقتي عايزيني انساه طب ازاي...كه بقا حتة من روحي

كانت بتبصلي وهي مصدومة  قعدت تهز فيا ودموعها بتنزل:

-فوقي يا جهاد احمد مش ليكي احمد بيحب شروق مبيحبكيش انتي ....مش شايفاه بيبوصلها ازاي ده بيعشقها عشق متدخليش معركة انتي هتخسريها 

حطيت ايدي علي ودني وقعدت اصرخ :

-لا هيحبني....احمد هيحبني يا ماما ...اكيد هيحبني....هو قال انه عايز يتجوزني ...اكيد هيحبني متقلقيش في امل اننا نبني حياتنا سوا 

مسكتني من ايدي وقالت :

-يخربيتك وتبقي ضرة لبنت خالتك 

- مش مهم 

-ده مستحيل 

-وانا هتجوزه يا ماما لو حصلت حتي أهرب من البيت 

مسكتني امي بغضب وجرتني وحبستني في الأوضة وزعقت :

-ده لو عرفتي تطلعي من هنا اصلا ...انا هوريكي يا بنت بطني واعلمك الادب من جديد !!

........

بعد نص ساعة كانت ام جهاد في بيت احمد وشروق

شروق :نورتينا اووي يا خالتي 

ابتسمت ام جهاد وقالت :

-ده نورك يا حبيبتي اعذريني جيت من غير معاد بس وحشتيني كنت حابة اشوفك 

- يا ستي البيت بيتك هقوم دلوقتي واعملك عصير الجوافة اللي بتحبيه

قامت شروق وسابتها مع احمد 

بصلها احمد بتوتر وقالت:

-عن اذنك...

-استني يا احمد حابة اتكلم معاك 

قعد بتوتر فقالت بإبتسامة هادية :

-ما شاء. الله يا احمد. مراتك كويسة وبتحبك...وفي الطريق جايلك بيبي. ...ظروفك كويسة وحياتك مستقرة حياة كويسة وشبه مثالية لكن الانسان بطمعه لازم يبوظ كل حاجة 

- انا ...انا 

-انت مفكرتش في حياتك دي وانت رايح توعد بنتي بالجواز ...مفكرتش ان شروق ممكن تسيبك وتخسر الانسانة اللي بتحبها ....عايز تخسر بيتك ومراتك واستقرارك عشان نزوه 

بصلها بصدمة فقالت:

-ايوة يا احمد انا عارفة انك مبتحبش بنتي ...بس انا غلطت لما اوهمتها بكده ..بس انت عاقل واكبر منها وفاهم ان دي نزوة وانت اللي هتندم في الاخر ...ابع....

صوت الكوبيات وهو بيتكسر قطع كلامها ...بصت ولقت شروق واقفة مصدومة والدموع بتنزل من عينيها !!

يتبع 

#زواج_سري

#سولييه_نصار

الجزء الاخير شكرا لتفاعلكم السكر💖بقلم سولييه نصار💖

قام احمد بخوف وهو شايف شروق بتبكي ...

- شروق استني متحكميش عليا 

- انت روحت طلبت من جهاد الجواز ...

- شروق 

-انطق يا احمد انت عملت كده ..انت روحت تتجوز عليا ومين ...بنت خالتي !!!

بص في الارض وقال :

-ايوة 

رجعت لورا وهي بتبكي وقالت :

-مستحيل ...ليه ...ليه تعمل فيا كده انا حبيتك !!!ليه تدمر حياتنا بالشكل ده ...انا قصرت معاك في ايه ...انا عملت المستحيل عشان أسعدك ...انا حبيتك ده جزائي ...انطق 

- انا اسف 

-طلقني يا احمد واتجوز اللي انا عاوزها

ام جهاد: أعقلي يا شروق احمد غلط بس الحمدلله هو دلوقتي اكيد عرف غلطه بلاش تخربي بيتك 

بصتلها شروق وهي بتبكي وقالت:

-بنتك كانت عايزة تسرق جوزي يا خالتي ...حطت عينيها عليه مصانتش العشرة 

بصتلها ام جهاد ببرود وقالت:

-جوزك هو اللي عرض عليها يا شروق. ...بنتي مسرقتش حد وانا عشان القرابة جيت احذره ...بعدين يا بنت اختي انتي اللي مصنتيش العشرة لما كنتي عارفة انها ميتة فيه ورغم كده بسهولة وافقتي عليه ...

- انا كنت بحبه يا خالتي ...وحتي لو رفضته مكانش هيتجوز بنتك ...وانا مش هضحي بسعادتي عشانها لان الحب مش عافية ...

-عندك حق يا بت اختي الحب مش عافية ...بس كمان بنتي مغصبتش جوزك علي حاجة هو اللي اتكلم يبقي الاولي تلوميه هو ...

بصتله شروق بكره وقالت :

-خلاص تاخده وتشبع بيه انا هتطلق منه 

- شروق انا بحبك...والله بحبك انتي ....اعتبريها لحظة غرور مني ...انا عمري ما حبيتها انا حبيتك انتي ابوس ايديكي متدمريش حياتنا ...عشان خاطر ابننا علي الاقل 

-جوزك عنده حق يا شروق هو غلط بس ملحوقة وبنتي منكرش غلطت ومش هتكرر غلطها تاني ...

بصت لاحمد وقالت :

-وانت هتبعد عن بنتي ...اعتبرها مستقيلة من الشركة وابعد عنها ...اظن دلوقتي انت عارف قلبك مع مين هل مستعد تضيع ده كله وتضيع بنتي عشان ترضي غرورك .

-اوعدك هبعد عنها 

ابتسمت وقالت :

-شكرا ليك انا همشي دلوقتي.

.......

كنت في الأوضة ببكي...كنت منهارة ...فجأة ماما فتحت الباب قربت منها وانا بعيط وبقول :

- ماما انا بحبه ...صدقيني هموت من غيره ...

-محدش بيموت من الحب يا جهاد 

- بس انا هموت ...صدقيني هموت ...هو طلب يتجوزني ...دي فرصتي ابقي سعيدة 

-وهتسرقي راجل من مراته 

- هي اللي سرقته مني الاول 

- بس هو محبكيش يعني مكنش بتاعك اصلا فازاي تسرق حاجة مش بتاعتك ...احمد حبها دي حقيقة ...بس انتي بترضي غروره هترضي علي نفسك تكوني طرف خاسر في علاقة زي دي 

-هو هيحبني 

-هو مش هيحب الا شروق ...انا شوفت ده في عينيه 

قعدت اعيط وقولت :

- انا عايزة انساه يا ماما 

ماما حضنتني وقالت:

-ده غلطي انا ...انا اللي خليتك تبني احلام معاه حقك عليا وانا هصلح الغلط ده ..وعد 

.......

وماما نفذت وعدها ...اول حاجة قدمت استقالتي وسافرت اشتغل بره مصر وعشت مع خالي ومراته ...كنت بصلي وبدعي ربنا انه يشيله من قلبي ....المرة دي كنت بجد ناوية انساه ومع انشغالي بطلت افكر فيه زي الاول ...الحاجة اللي خلتني اقتنع ان لازم انساه اني عرفت ان حصلت مشكلة كبيره بينه وبين شروق بسببي كانت هتوصل للطلاق ...وهو عمل المستحيل عشان يرجعها...وقتها عرفت انه عمره ما حبني ولا هيحبني ولو كنت اتجوزته كنت هموت بالحيا ...بحمد ربنا ان ماما اتصرفت وطردت الأوهام دي من مخي ...دلوقتي اقدر اقول ان احمد في الماضي ...بي الحاضر فيه انا وبس ...انسانة قررت متقلش من نفسها عشان خاطر الحب ...قررت انها تكون الوحيدة في قلب وحياة جوزها....وربنا كان حاسس بيا وكافئني علي صبري وقابلت حاتم  في نفس الشركة اللي بشتغل فيها ...واللي قرر ياخد اجازة بأقرب وقت وينزل مصر عشان يتقدملي ...انا دلوقتي سعيدة ..سعيدة لاني حاسة اني انسانة استحق الحب والاحترام مش طرف خاسر في علاقة سامة 

..وبكده تكون انتهت قصتنا القصة دي مختلفة شوية عن باقي القصص اللي كتبتها لاني وانا بكتبها مكنتش عارفة اتعاطف مع مين بالضبط ...كلهم كانوا غلطانين بطريقة ما بس لو سألتوني عن رايي فأنا شايفة غلط الام هو الأكبر ...لان مينفعش نعيش أولادنا في أوهام من هما وصغيرين ونيجي نشكي..رفقا بأولادكم لو سمحتوا💖

تمت

#زواج_سري

#سولييه_نصار