مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت جديد❤بقلم سولييه نصار

-حاسبي يا حمارة انتي هنتمسك 

زعق معتز  في دعاء لما وقعت الفاظة 

-بتشتم ليه يا بغل انت

مسكتها مي وقالت:

-وطي صوتك يا دعاء هيمسكونا يخربيتك 

-ما انتوا عارفين يا جماعة إني أول مرة اسرق 

-قولتلك يا مي بلاش نجيب البغلة دي معانا هتفضحنا 

-أحترم نفسك يا معتز  وإلا والله أصرخ وكلنا نتمسك عادي... انا اصلا ضميري واجعني ومي اللي زنت عليا عشان اشترك معاكم... لولا إني محتاجة مكنتش أيدي علي الحرام. 

-ايه شغل الهنود ده يا دودو بس انتي هتعملي دراما هنا يالا يامه عايزين نقلب الشقة قبل ما الراجل يجي.. 

وبعدين ابتدي معتز  ياخد الفلوس والانتيكات واي حاجة تيجي في طريقة ومي ساعدته أما دعاء فهي كانت بتمشي في الأوضة وهي فاتحة الكشاف... كانت بتتأملها... عمرها ما شافت مكان بالرقي ده فجأة صرخت ووقعت الكشاف 

-اتفضحنا... اتفضحنا... الله يخربيتك الله يخربيتك 

-الله يخربيت أمك يا معتز ده طلع ضابط 

جه معتز جمبها وقال :

-مين ده اللي طلع ضابط 

شاورت دعاء علي صورة وقالت :

-اللي بنسرق شقته حاليا ضابط... يالهوووي هنتمسك ونتحبس.... 

-يا لهووي 

لطم لؤي 

بصت دعاء للصورة وقالت:

-بس تصدق شكله قمر تحسه ابن ناس ونضيف كده 

-انتي بتقولي ايه؟ 

مسكت الكشاف وقربته علي الصورة وقالت:

-عينيه خضرا يا واد يا معتز شبه الممثلين الاتراك بس علي رجالي شوية... شايف العضلات ده يا بخت اللي هتتجوزه 

قربت مي وهي بتتأمل الصورة وقالت :

-يارب يتجوزني أنا يارب وانا أهو حلوة وبنت حلال وحرامية قد الدنيا هقدر اسرق قلبه واتجوزه ووعد يا دودو هسلفهولك سبت وتلات . 

ضحكت دعاء وقالت:

-مسم شغل السرقة برضه ليه فوايد يختي... ياريت أقدر اسرق قلبه ووعد يا مي يا أختي هديهولك خميس وجمعة. 

زعق معتز :

-هو فردة شراب بتتقاسموا فيها... بعدين انتوا مش ناسيين حاجة. 

بصتله دعاء وقالت 

-أنا حاسة برضه اننا ناسيين حاجة معرفش هي ايه!  

بصتله مي وقالت :

-وأنا كمان 

زعق معتز فيهم وقال :

-احنا بنسرق شقة ضابط يا ست منك ليها 

-آه صح يالهووي 

جريت دعاء وكانت هتنط من البلكونة لولا مي مسكتها وصرخت :

-بتعملي ايه يا مجنونة هتموتي نفسك 

-سيبيني يا مي مش عايزة اتحبس.... أنا لسه مدخلتش دنيا هتودوني الآخرة ليه 

مسكها معتز وقال :

-خليني انط أنا الأول عشان اساعدكم. 

نط معتز... وقدرت مي تنط وراه 

بص معتز لدعاء وقالها:

-يالا انتي مستنية ايه 

-أنا خايفة 

-نعم يختي بقولك يالا أنا هتلقفك. 

-هو أنا كيس بصل يا أخويا لا أنا خايفة... 

فجأة سكتت لما سمعت صوت الباب بصت لمعتز وقالت:

-الحقوني باين أنه جه... إطلع يا معتز ساعدني

-مع نفسك 

-ايه؟! 

-غدا القاكي 

وبعدين معتز مسك ايد مي بالعافية وجري بيها وهي بتزعقله عشان يرجع لدعاء 

-يا ابن الكلب يا معتز. 

شتمته دعاء وحطت ايدها علي بوقها لما سمعت الضابط بيقرب.... 

جريت واستخبت تحت السرير وكتمت بوقها ... 

دخلت البيت وأنا تعبان كانت مأمورية كبيرة... مفتحتش النور  حتي واتسطحت علي السرير... مسكت الموبايل وشوفت رسالة من أمي أنها بعتتلي خدامة موثوقة واديتها مفتاح بيتي... استغربت أنها مجتش لحد دلوقتي بس مهتمتش وقررت الصبح اكلم أمي وبسرعة رميت تليفوني جمبي وقلعت جزمتي  ونومت. 

...... 

تاني يوم... 

فتحت عيني وقومت بسرعة عشان اتشطف واجهز عايز أخلص شغلي قبل معاد مع العروسة اللي أمي جابتهالي وبالمر أسألها علي الخدامة 

بوطي تحت السرير عشان ادور علي الشوز بتاعي لقيت بنت ماسكة جذمتي ونايمة عليها 

-بس بس انتي يا حجة 

مرضتش تصحي فزقيتها بإيدي... فتحت عينيها بسرعة وصرخت جامد وآخر كلمة قلتها قبل ما يغمي عليها:

-يا فضيحتك يا دودي!!! 

يتبع 

#سرقت_قلبي 

#سولييه_نصار 

تفاعل حلو عشان انزل كمان بارت ❤

الجزء الثاني❤❤شكرا لتفاعلكم السكر❤بقلم سولييه نصار 

-ااااه 

قامت مفزوعة لما كبيت عليها كوباية ميا كبيرة -ايه يا عم أنت بتصحي جاموسة 

-انطقي انتي مين وكنتي نايمة تحت سريري ليه 

قامت مفزوعة وهي بتقول :

-حضرة الضابط... أنت ضابط صح 

-اومال هكون حرامي 

-لو سمحت متتنمرش علي الحرامية! حرام عليك 

-تنمر ايه بس انطقي انتي مين. 

سكتت شوية وهي بتبصلي بخوف وقالت :

-خدامة... عايزة اشتغل خدامة وهشيلك في عيوني والله بس سامحني 

-اسامحك علي ايه 

-سامحني وخلاص 

-لحظة لحظة... انتي الخدامة الجديدة اللي بعتتها أمي صح؟! 

-أيوة أيوة هي أنا... قصدي أنا هي 

ابتسمت وقولت:

-خلاص خلاص انتي خايفة ليه بس ليه كنتي نايمة تحت السرير 

-أصل.. أصل 

-خلاص مش مهم 

قلتها لما لقيتها مرتبكة... للحظة شكيت فيها رغم أن ملامحها بريئة وحسي كضابط محستش منها غلط بس رغم كده قولت اسأل أمي زيادة تأكيد.... 

-انتي اسمك ايه صح؟ 

-أسمي دعاء يا باشا. وأنت 

ضحكت وانا برد :

-أنا اسمي سامي يا ستي 

قومي اغسلي وشك وافطري الأول عشان اقولك هتشتغلي ازاي. 

...... 

بعد شوية كانت خلصت فطار فاتكلمت :

-بصي يا دعاء... زي ما شايفة أن البيت مش كبير اووي وكمان مش متبهدل لأني بالعادة إنسان منظم جدا فمش هتتعبي انتي بس أهم حاجة تعملي الأكل تمام 

-حاضر يا باشا 

-أنا همشي دلوقتي وانتي كملي شغلك

..... 

طلعت وكلمت أمي علطول 

-آه يا ماما حضرتك بعتي الخدامة صح.. 

-طيب هي موثوق فيها يعني أنا مرضتش اخد بطاقتها بما أنها من طرفك... تمام  يا حبيبتي... خلاص يا ماما قولتلك إني مرتاح لوحدي.... لا مش هسيب  بيتي أنا وحنين يالا سلام 

........ 

في البيت... 

كانت دعاء محتارة  دي فرصة كويسة لها عشان تبدأ حياتها من جديد... بس  لو اتكشفت ايه اللي هيحصل فيها ده ممكن يحبسها.... فتحت الباب ولسه هتطلع بس اتراجعت... معرفتش ليه عملت كده بس حاجة قوية كانت منعاها... صحيح عاشت في الشوارع كتير وراحت كذا مأوي بس عمرها ما حست بالأمان زي هنا... قفلت الباب وراحت تشتغل 

........ 

-الأكل جميل يا دعاء تسلم ايديكي  

ابتسمت  بكسوف وقالت:

-بالهنا يا بيه 

بصتلي بتركيز وقالت:

-ألا قولي يا بيه هي عينيك دي لونها أخضر طبيعي ولا لينسيز 

ضحكت وقولت:

-لا أخضر طبيعي يا ستي 

-بس الله ما شاء الله يا باشا هما الضباط  كده حلوين 

-انتي بتعاكسيني يا دعاء 

اتكسفت وقالت:

-لا... لا والله مش قصدي أنا بجامل بس. 

ضحكت علي عفويتها.... بقالي كتير مشوفتش حد عفوي بالشكل ده.... من ساعة ما ماتت حنين... ابتسامتي اختفت لما افتكرت حنين وقومت من الأكل وقولت:

-أنا شبعت الحمد لله 

استغربت دعاء تغييره المفاجئ بس معلقتش وشالت الأكل 

...... 

مرت الأيام وبقيت بحس بحياة في بيتي الميت... دعاء كانت عاملة روح فيه... كانت بتقدر تضحكني من غير تكلف.... ولاول مرة من سنتين ارتاح مع واحدة بالشكل ده... تفكيري جنوني صح بس أننا نرتاح لشخص معين أو نحبه دي حاجة مش بإيدينا 

........ 

بعد شهر من شغل دعاء 

كنت بضحك جامد وأنا بقول :

-يخربيت عقلك يا دعاء انتي مصيبة... معرفش ازاي عندك قدرة تضحكيني بالشكل ده 

اتكسفت ولسه هترد الباب خبط.. 

قومت وفتحت الباب لقيتها أمي 

-ماما 

-بقالك أسبوع مجيتش عندي قولت أجي أنا. 

بصت لدعاء بحيرة وقالت:

-مين دي؟ أنت عندك ضيوف

-ضيوف ايه يا ماما انتي تعرفيها 

-اعرفها من فين يا بني وفين الخدامة اللي بعتها 

-أهي قدامك يا ماما... دعاء

-لا أنا مبعتش دي 

بصيت لدعاء اللي بتبكي وقولت:

-يعني ايه 

-يعني مش دي الخادمة اللي بعتها يا سامي... دي أكيد واحدة نصابة 

يتبع 

#سرقت_قلبي 

#سولييه_نصار 

تفاعل حلو عشان انزل البارت الأخير ❤❤

-

الجزء الأخير❤شكرا لتفاعلكم القمر زيكم❤بقلم سولييه نصار ❤❤

كنت ببصلها بصدمة وهي بتبكي حسيت بالغضب والحزن أنها خدعتني... قربت منها ومسكت ايدها جامد :

-انتي مين يا بت ومين زقك عليا... 

كانت مرعوبة وهي بتبصلي بس أنا مشفقتش عليها... كنت متعصب حاسس  إني مغفل. دوست علي ايدها جامد وزعقت :

-انطقي يا بت بدل  ما احبسك 

خافت وبصتلي برجاء بس أنا مكنتش عايز ارحمها.... أكتر ما في حياتي بكرهه الكدب خاصة من إنسانة أنا وثقت فيها وسلمتها قلبي.... أيوة قلبي أنا بعد موت مراتي مفكرتش أدخل ست حياتي هي الوحيدة... بس دي غلطتي إني مسألتش كويس اتعاملت بسذاجة 

-انطقي يا دعاء بدل ما اجرجرك دلوقتي علي الحبس

-أنا هقولك علي كل حاجة يا باشا 

زقيتها لحد ما قعدت علي الكرسي وقولت :

-احكي يالا 

-أنا اسمي دعاء يتيمة اتربيت في ملجأ أنا ومي ومعتز كنا أصحاب مع بعض لما طلعنا لقينا أن الدنيا أصعب مما نتخيل.... الناس كانوا زي الوحوش.... قدرنا بالعافية بعد ما كنا بنام في الشارع أننا نلاقي بيت بالإيجار... صاحبه راجل طيب وشفق علينا ... حاولنا احنا التلاتة ندور علي شغل بس فشلنا لحد ما معتز اقنعنا اننا نسرق 

بكت وقالت :

-وجابنا شقتك هنا... بس صدقني معرفناش نسرق أول ما عرفنا أنك ضابط هربوا الاتنين وانا معرفتش 

-يعني انتي حرامية؟! 

-لا والله أنا مسرقتش حاجة. 

-بس اقتحمتي شقة ضابط وكدبتي عليا... عيشتيني في وهم 

قعدت تبكي وقالت:

-يا بيه أنا عشت هنا شهر... لقيت حاجة اختفت من البيت... أنا والله مش وحشة ولما لقيت فرصة ابقا كويسة بقيت... 

-اطلعي برة... انا مش هحبسك بس والله لو شوفتك تاني قدامي مش هرحمك. 

وقفت وهي بتبصلي بترجي فزعقت :

-قولت برة 

جريت برة... قعدت علي الكرسي وأنا حزين... حزين أنها كدبت عليا وحزين أكتر لأني طردها من حياتي... أنا صحيح شفقت عليها بس مستحيل اسامحها عشان كدبت عليا 

-سامي أنت كويس 

-لو سمحتي يا ماما حابب أكون لوحدي. 

معترضتش ماما ومشيت علطول. 

..... 

عدت الأيام وانا حاسس بفراغ في حياتي... نفس الفراغ اللي حسيته لما ماتت حنين كأن حياتي كانت مليانة وفجأة فضيت... ماما جابتلي خدامة جديدة لأن الخدامة اللي بعتتها قبل كده اضطرت ترجع بلدهم من غير ما تقولها... بس برضه كنت حاسس بنفس الفراغ... بس في يوم الحياة اديتني فرصة جديدة وقابلتها 

روحت مع صاحبي فرح قريبته.... فجأة سمعتها بتغني.... ده صوتها متأكد... دايما كانت بتحب تغني وأنا كنت دايما بحب أسمعها.... شفتها وشافتني... فرحت أن اخيرا قدرت اقابلها 

... 

بعد ما خلص الفرح

كانت واقفة مع اتنين شاب وبنت قربت منها فارتبكت وقالت :

-أهلا يا سامي بيه... دوول... دوول أصحابي مي ومعتز احنا والله جايين نشتغل مش نسرق عاملين فرقة صغيرة كده والحمد لله مشي الحال -يعني سامحتيهم بعد ما هربوا وسابوكي. 

مردتش فابتسمت وقولت :

-ممكن اتكلم معاكي عن انفراد 

هزت رأسها وجات معايا 

سألتني وهي خايفة:

-أنا عملت حاجة تانية يا باشا... والله مفكرتش اسرق تاني وبنشتغل أهو 

-انتي مقبوض عليكي يا دعاء 

-يا لهووي بتهمة ايه؟ 

ضحكت وقلت :

-بتهمة أنك سرقتي قلبي ومشيتي... وبتهمة أن حياتي بعدك بقت فراغ 

ضحكت بكسوف فكملت :

-وعقاب التهمة دي تتجوزيني وتدخلي سجني. 

ضحكت وبصت في الأرض وقالت:

-وأنا موافقة أدخل سجنك للأبد ❤

تمت 

#سرقت_قلبي

#سولييه_نصار