 |
رواية غرام في الظلام
الجزء الرابع
للكاتبة/حنان حسن
مدونة #موسوعة_القصص_والروايات
بعدما اتاكدت ...
ان الصوت الي سمعتة
هو ...
صوت ابني سمسم فعلا
قبلت بالشروط
بدون ما اعرف ايه هي
لكن اتصدمت...
لما لقيت الراجل الملقب
با الميت
بيقولي...
ان شرطة التاني
هو ..اني اقتل الست الكبيرة
ولما اتفزعت من الشرط الفظيع ده
لقيت الميت
بيقولي
اصبري علي الفزع
لما تسمعي الشرط الثالث
قلت..ايه هو الشرط الثالث؟
قال...تعملي فضيحة لعزيز
قلت..مش فاهمة؟
قال..عايزك تدعي ان عزيز اغتصبك
وفضيحتة تبقي علي كل لسان
استغربت من شروطة الغريبة
وقولتلة...
الشروط الي انت بتطلبها مستحيلة
انا ممكن اقبل بالشرط الاول فقط
لكن موضوع...
اني اقتل الست الي فتحتلي بيتها ...
وعالجتني... واكرمتني لا استحالة ده يحصل طبعا
وبالنسبة للشرط التاني
فا ده اصعب ...واصعب
لان عزيز بيه
راجل معروف عنة
انه شخصية جادة ...
وطبعة صعب.. ومحدش بيقدر يقرب منه
يعني لو ادعيت عليه انه
اغتصبني...
محدش هيصدقني
رد الميت
وقالي...
تصدقي عندك حق فعلا؟
الشروط صعبة... ومستحيلة
وانا لو منك مش هنفذها
يلا... سلاموا عليكم
قلت...استني انت رايح فين؟
قال..همشي
قلت...هتمشي قبل ما تجيبلي ابني؟
رد الميت
وقال..اجيبلك ابنك علي اساس ايه؟
هو انتي مش رفضتي الشروط؟
قلت..ابوس ايدك ترحمني
انا هنفذ الشروط الي انت طالبها ازاي بس؟
انا واحدة ست كفيفة
يعني لا هشوف اقتل...
ولا هعرف اعمل فضايح لحد
في ظروفي دي
ساد الصمت
قليلا
وسكت الميت شوية
وبعدين
قالي
طيب اسمعي
بما انك صعبتي عليا
فا انا مستعد اساعدك
قلت..هتساعدني ازاي؟
هتقتل بدالي؟
قال..لا
انا ممكن امدك بالمعلومات... وبعض الحيل
الي هتساعدك علي تنفيذ
الشروط
المطلوبة منك
وده عشان ...ظروفك بس
لكن انا عمري ما عملت كده مع حد خلي بالك
قلت...طيب متكملش جميلك
وتشوفلي شروط غير دي
رد الميت مهددا
وقال...هااااااه امشي؟
قلت...لا لا استني
قال..يعني وافقتي علي الشروط؟
قلت...هو انت سيبتلي مجال للاختيار
قال...
طيب وهتبدئ بتنفيذ انهي شرط؟
حطيت ايدي علي راسي
وبكيت
وقلت..مش عارفة
رد الميت..
وقال...اقولك؟
ابدئي في الشر واحدة واحدة
يعني الاول
اتبلي ...وافتري بالكدب علي عزيز
واتهمية انه اغتصبك
وبعد كده
ادخلي علي القتل... واقتلي الست الكبيرة
قلت...هو انت مش قولتلي هتساعدني.
ممكن اعرف ازاي
هقدر اورط واحد زي عزيز ؟
واتهمة بالتحرش... والاغتصاب؟
رد الميت
وقال..هقولك
عزيز بيه
متعود كل ليلة يشرب خمور... مع الرجالة بتوعة
ويرجع البيت علي الساعة ٢
باليل
وهو مش دريان بالدنيا
ممكن انتي تستغلي حالة السكر...
وعقلة الي بيبقي غايب
في التوقيت ده
وتروحي تنامي في سريرة
وبمجرد ما تجمعكم غرفة واحده
وسرير واحد
افضلي صرخي...
وادعي انه اخدك بالغصب
لغرفتة
وحاول يغتصبك
وليكي عليا
اني اصحيلك البيت كلة
حتي لو اقتضي الامر..
اني اخبط علي اوضه... اوضه في الفيلا
عشان كلهم يشوفوه معاكي في السرير
واولهم الست الكبيرة
قلت...
طيب وانا هعرف اروح للغرفة بتاعة عزيز بيه ازاي؟
دنا حتي معرفش الغرفة بتاعتة فين في البيت بالظبط؟
رد الميت
وقال
الغرفة بتاعة عزيز بيه جنب غرفتك بالظبط
بس خلي بالك
غرفة عزيز بيه علي يمينك
اوعي تدخلي الغرفة الي علي
الشمال
لان دي غرفة البعبع
قلت...بعبع ايه؟
ما توضح كلامك؟
رد الميت
وقال...مفيش وقت اوضح حاجة
نفذي الي قولتلك عليه
ولما تحققي الشرط الاول...
هساعدك في الشرط التاني
وهخليكي
تقتلي الست الكبيرة
وبعدها هجيبلك ابنك
بس لازم تبدئي من الليلة
قلت..ايوه بس...
انا هعرف ازاي؟
ان كان عزيز رجع من بره
ولا مرجعش؟
وكمان هعرف منين ان الساعة بقت ٢ باليل؟
ما ترد يا اخ انت؟
يا اخ ...يا اخ...
يا ميت
وفضلت انادي عليه
لكن مردش عليا...
واستغربت..
ليه الشخص ده خطف ابني ؟
وازاي؟
وياتري مخبي سامي فين؟
وليه عايزني اقتل الست الكبيرة؟
وليه عايزني اعمل فضيحة لعزيز بيه .
وليه عايزني افضل في الفيلا مخرجش منها؟
واستغربت كمان من وجودة في البيت اصلا؟
وسالت نفسي
ازاي قدر يوصل لغرفتي من غير ما حد يشوفة؟
وياتري هو يقرب لعزيز بيه؟
والست الكبيرة ؟
ولا مجرد مجرم ماجور؟
ورجعت اقول لنفسي
ا مش لازم اعرف اجابة لكل ده
واهم حاجة لازم اركز فيها دلوقتي
اني انفذ شروطة
عشان اقدر اخد ابني وامشي من هنا
لكن هدخل غرفة عزيز ازاي؟
وحاولت افتكر وصف المكان
الي قالهولي الميت
ايوه افتكرت
هو قالي..
ان غرفة عزيز جنب غرفتي علي طول
وتفريبا ...
قال... ان غرفة عزيز علي الشمال
لا لا لا ......قال علي اليمين
ايوه قال ....علي اليمين
ده حتي حذرني...
وقالي...
اوعي تدخلي الاوضة الشمال احسن فيها البعبع
بعبع؟
ياتري يطلع ايه البعبع ده كمان؟
واثتاء ما كنت بفكر
سمعت صوت الباب بيتفتح
وبعدها ...
سمعت صوت الشغالة فضة
وهي بتسالني
عن حالي و صحتي
وطبعا كان لازم ادعي المرض عشان...
الاقي حجة اقعد بيها... ومخرجش من الفيلا
عشان ...احقق الشرط الاول
ولما سمعت فضة
بتقولي
ازيك دلوقتي يا ست مريم؟
قلت...تعبانة اوي يا فضة مش
عارفة ليه
تعبت تاني بعد ما كنت كويسة
ردت فضة
وقالت...
هو انتي بطلتي تاخدي الدواء ولا ايه؟
قلت..اه فعلا
بطلت اخد الدواء
قالت..
لازم تستمري في الدواء يا ست مريم ....ومتسيبهوش
لغاية ما تبقي كويسة
قلت..طيب ممكن اطلب منك خدمة؟
قالت..اؤمريني
قلت..ممكن تجيبيلي منبة هنا في غرفتي
وتظبطية علي الساعة ٢ باليل عشان...
اقوم اخد الدواء في ميعادة؟
ردت فضة بحماس
وقالت. بس كده؟
من عنيا يا ياست مريم
قلت..
عارفة يا فضة؟
انتي شخصية زي العسل
بس عيبك الوحيد انك بتدافعي عن عزيز بيه
ردت فضة متعجبة
وقالت...
غريبة اوي
انتي اول واحدة اشوفها تتكلم وحش علي عزيز بيه
رديت بسخرية
وقلت..
والله اسم عزيز ده خسارة فية
ردت فضة
وقالت..بالعكس
ده اسم علي مسمي
لانه فعلا... عزيز وابن اصل كمان
قلت ...يا شيخة؟؟؟
قالت..ايوه طبعا
عزيز بيه ابن عز
وشاب طول بعرض
ده كفاية شياكتة ووسامتة
والنبي لو شوفتية يا ست مريم
لا تقولي ...
بيمثل في السيما
قلت..المسالة مش مسالة وسامة
يا فضة
انا بتكلم علي شخصيتة
وانا معاملتة معايا
كانت كفيلة باني احكم عليه بانه شخصية زبالة
ردت فضة بغضب
وقالت..قولتلك مية مرة
يا ست مريم
متغلطيش في عزيز بيه لو سمحتي
رديت عليها بغيظ
وقلت..طيب انفضلي شوفي انتي رايحة فين
ومعدتيش تجيبي سيرة الشخص ده تاني
لان واضح ان كل ما سيرتة بتيجي بنختلف
وبالفعل ...
خرجت فضة
وسابتني لوحدي
وانا مستغربة من دفاعها الدائم عن عزيز بيه
لكن مركزتش مع فضة كتير
لاني كنت بفكر في الشروط
الي لازم انفذها
عشان اقدر ارجع سمسم ابني تاني لحضني
المهم.. بعدما جابتلي فضة المنبة
وظبطتة علي الساعة ٢
فضلت منتظرة الوقت...
الي المنبة هيرن فيه
عشان اترقب رجوع عزيز بيه من بره
وبعد مرور الوقت..
رن المنبه بالفعل
وفي اللحظة دي..
تسللت خارج غرفتي
وروحت علي غرفة عزيز
ونمت في سريرة
وفضلت منتظره انه يرجع
عشان اصرخ واعملة الفضيحة المتفق عليها
لكن الساعة عدت اكتر من ٢
ولسه عزيز بيه مرجعش من بره
فافضلت اتصنت علي الباب عشان ...
اسمع ..ان كان عزيز بيه رجع... وقاعد بره
ولا ايه؟
وكنت خايفة جدا
لا عزيز بيه ميشربش خمره الليلة
ويجي فايق
يلهوي لو ده حصل ؟
طيب هقولة ايه
لو رجه فايق ولقاني في سريرة؟
دي هتبقي وقعة طين
وخصوصا... ان عزيز ده رخم... وقليل الزوق
وبيشاكل دبان وشة اصلا
وقليل لو ما ما سيحلي وفضحني
ومش بعيد يرفع عليا قضية تحرش
طيب وبعدين؟
وقلت لنفسي
كل حاجة ليها حل اكيد
طيب لو اتقفشت هعمل ايه؟
اه ..انا ممكن اعمل نفسي اتلخبطت في الغرف
لان الغرفتين جنب بعض
ولو اتقفشت...
هقول كده وخلاص
وروحت علي سرير عزيز بيه
وانا واخده قرار
اني لو مشيت الخطة صح
وعزيز بيه رجع مسطول...
ودماغة رايحة منه
هصرخ وهلم عليه الدنيا
وهقول انه اغتصبني
وهبقي كده
حققت الشرط التاني
اما بقي لو..
لو اتقفشت ...
هقول اني تايهة..
واتلخبطت في الغرف والعتب ع النظر
المهم ...
قلعت فستاني وفضلت
با لقميص فقط
و نمت في السرير
وانا منتظرة اشوف اي سيناريوا هو الي هيحصل
وبعد شوية
سمعت صوت جلبة بره الغرفة
وكان الصوت لاقدام شخص بيمشي بالعافية
وبقيت محتارة
وبسال نفسي
ياتري هو ده عزيز بيه ولا حد تاني؟
ومفكرتش كتير..
لاني سمعت خطوات الشخص ده بتقرب
وحاولت اداري نفسي تحت الغطا
عشان محدش يلاحظ وجودي علي السرير
وفضلت منتظرة الي هيحصل
لغاية ...
ما سمعت باب الغرفة بيتفتح
وسمعت اقدام دخلت من باب الغرفة
ورجع الباب اتقفل
وكان واضح ان في الشخص دخل وقفل الباب
عليا انا وهو في الاوضة
واتاكدت ان الشخص ده يبقي عزيز
لاني شميت ريحة البرفان المميز
بتاعة
وكمان سمعتة وهو بيغني
وواضح انه مخدش باله ...
ان في حد تحت الغطاء
لانه انشغل بحاجة تاني
وبعد شوية
سمعتة بيرمي فردة من الحذاء بتاعة علي الارض
وبعدها... رمي الفردة التانية
وفهمت انه كان مشغول في تيغير هدومة
وفضلت منتظرة وبترقب الي هيحصل ... وانا مرعوبة
ومن كتر ما كنت متوترة
كنت خايفة
يلاحظ ان السرير بيتهز من رعشة اطرافي
الي مكنتش قادرة اسيطر عليها
لكن واضح
ان عزيز
كان شارب خمور فعلا
ومسطول جدا
لانه مبطلش غني
من ساعة ما دخل الغرفة
ومخدش باله من ان في حد علي سريرة
والي زاد وغطي
كمان
انه نزل تحت الغطا ...
و نام جنبي فعلا
بدون ما يشعر ان في حد في سريرة
اما انا..
فا بمجرد ما اتاكدت ان عزيز معايا في السرير فعلا
فضلت اصرخ باعلي صوت
واقول ...
الحقوني....
الحقوني
وبالرغم من ان عزيز بيه
كان بيحاول...
يكتم في صوتي
ويمنعني عن الصراخ
لكن انا قدرت اصرخ
والم عليه الناس
الي في البيت كلهم
لدرجة... ان بعد دقائق معدودة
كان جميع من بالمنزل
علي باب الغرفة عندنا
و بيسالوا عزيز بيه ايه الي حصل؟
وفي اللحظة دي تحديدا
سمعت صوت الست الكبيرة
وهي بتسال عزيز بيه
وبتقول..
ايه الي جاب مريم في سريرك
يا عزيز؟
وفي اللحظة دي
كان لازم ارد عليها
عشان اكمل الي بداتة
فا قلت...
الحقيني يا حاجة واستري عرضي الله يسترك
ردت الست الكبيرة بغضب
وسالتني؟
قالت..ايه الي حصل يا مريم؟
وايه الي جابك في سرير عزيز بيه؟
قلت..
انا هقولك كل حاجة
من يوم ما جيت هنا ...
وعزيز بيه
كل يوم ...بيغصب عليا
عشان اروح معاه غرفتة
وانا عشان
كنت خايفة منه
مردتش اقول لحد
علي الي بيطلبة مني
لكن الليلة دي
لقيتة بياخدني بالعافية
من ايدي
وكان بيحاول......
مش قادرة اكمل
ردت الست الكبيرة
وقالت..
ايه ردك علي الكلام ده يا عزيز بيه؟
رد عزيز بيه بهدوء
وقال... بصراحة مريم عندها حق ..
انا من يوم ما شوفتها
في البيت ...
وانا هموت عليها..
بس الي هي نسيت تقوله..
او بمعني اصح
اتكسفت تقولة
هو .. اننا متجوزين عرفي
يعني... وجود مريم
في غرفتي
ده شيئ عادي..
وطبيبعي جدا
وفي اللحظة دي
تدخلت رحمة...
شقيقة عزيز بيه في الحديث
وقالت....
ايوه فعلا
انا شاهدة علي الكلام ده
حتي انا الي جيبتلهم المحامي.. والشهود
الي شهدوا علي العقد العرفي
ردت..الست الكبيرة
وقالت...
ومن امتي احنا عندنا حد في العيلة
بيتجوز عرفي؟
ردت رحمة
وقالت...فعلا يا عزيز
لازم تتجوزوا جواز شرعي
علي يد ماذون
رد عزيز
وقال...يا جماعة
انا الي اعرفة... ان الجواز ايجاب... وقبول... واشهار
وانا... عملت الثلاث حاجات دول
وعموما ماشي
من بكره الصبح
هنتزوج انا ومريم
زواج شرعي
ردت رحمة
وقالت...نفض ايدك انت يا عزيز انت ومريم
وانا هتولي امر كل شيئ
والصبح هتلاقي الشهود... والماذون...
وكل حاجة جاهزة
والف مبروك ليكم يا حبايبي
ردت الست الكبيرة
وقالت..
عموما مبروك يا عزيز بيه
مبروك يا مريم
وبارك لينا الجميع
وحتي فضة
كانت بتباركلنا علي الجواز
ومره واحدة
لقيت الكل بيهنيني بجوازي
من عزيز بيه
وطبعا قرروا يسيبونا لوحدنا
عشان ...
نبقي علي راحتنا
كا اي عريس وعروسة
وراح عزيز يقفل باب الغرفة وراهم
المهم ...
بعدما انصرف الجميع..
بقيت قاعدة مسهمة ..
ومش فاهمة ايه الي حصل ده ولا حصل ازاي؟
لكن.. كل الي كنت متاكدة منة
هو... ان عزيز بيه
هيشلوحني
وقليل ...لو ما مسكني سلوك الكهرباء العريانة
وكل ما افتكر الجملة الشهيرة بتاعتي
بتاعة..
من يوم ما جيت هنا
وعزيز بيه بيغصب عليا
اروح معاه غرفتة
لكن ...الليلة دي اخدني بالعافية
ازعل من نفسي اوي
واقول..
فعلا الانسان عدو نفسة
يعني كان لازم اعرضها اوي؟
واعمل فيها فتاة المعادي؟
واثناء ما كنت بفكر
وبسال نفسي
ياتري عزيز بيه هيبدء بانهي نوع من انواع العذاب؟
سمعت صوت عزيز بيه جنب ودني
وهو بيسالني
وبيقولي...
كنتي بتشتكي مني و بتقوليلهم ايه بقي؟
اترعبت من سؤالة
وقلت..نعم؟
قال..ايه اطرشتي؟
بقولك كنتي بتقولي لاهلي ايه؟ عليا من شوية؟
قلت...اسمع بس يا عزيز بيه
انا عايزاك
تصلي علي النبي كده
وتفهم الي حصل
رد عزيز بيه بغيظ
وسالني
قال..هو انا ؟
كنت كل يوم بطلب منك
تيجي معايا الاوضة بتاعتي؟
قلت..
لا ...مين قال كده؟
انا مقولتش كل يوم
قال....
امال قلتي ايه؟
قلت..
انا قلت... يوم بعد يوم
وبعدين...حضرتك فهمت غلط اصلا لان.......
وقبل ما اكمل وصلة الكدب
الي كنت هكدبه
رد عزيز بيه
وهو بيتوعدني
وقال...اخرسي خالص
دا انتي هتشوفي سواد
باقي حياتك الجاية كلها
قلت...لحظة واحدة بس
من فضلك اسمعني
انا ممكن
اصلح كل الي حصل ده
وممكن كمان
اخرج افهمهم الحقيقة و......
قاطعني عزيز بيه
وقالي...
بقولك اخرسي خليني افكر هعمل فيكي ايه؟
قلت..هارسووود
هتعمل فيا ايه؟
وفضلت اعيط ...واتحايل عليه...واقولة..
ارجوك ...ما تعملش فيا حاجة
انا اسفة
سامحني والنبي ...يا عزيز بيه
رد عزيز ساخرا
وقال..
دلوقتي بقيت عزيز بيه؟
ما كنت من شوية
(حمدي الوزير)
لما سمعت سخريتة مني..
عرفت انه حاقن في نفسة
ومش ناوي يسامح ولا ناوي يعديهالي
فا فضلت ابكي بحرقة ...
واقوله...
انا عارفة.... انها كانت غلطة
لكن... اقسملك انه كان غصب عني
وفي اللحظة دي
سمعنا صوت خبط علي باب الغرفة
فا سكت عزيز ..
وحط ايده علي بوقي عشان يسكتني انا كمان
ولما فتح الباب
سمعت فضة
بتقولة
ان الست الكبيرة عايزاه يروحلها حالا
وبعدما مشيت فضة
عزيز بيه ..قفل الباب
ورجع يقولي...
خليكي هنا
اوعي تتحركي من مكانك
انا رايح اشوف الحاجة عايزة ايه؟
وحسابي معاكي لما ارجع
وبعدما خرج عزيز بيه
وقفل الباب
حمدت ربنا
انه جتني فرصة تانية للهرب
وقلت هبلغ البوليس...
وهما الي يجيبوا ابني
وبسرعة ...
تحسست السرير
عشان اجيب الفستان
و البسة واهرب
لكن ...للاسف
ملقتش الفستان ...
فا قلت مش مهم ..
هحاول اخرج من غرفة عزيز وارجع لغرفتي ..
واخد اي حاجة استر بيها نفسي..
وكمان اخد الشنطة الي فيها الورق
وبعدها ...احاول اخرج من الفيلا كلها
عشان اهرب من عزيز
وبالفعل ...
خرجت من غرفة عزيز
ورحت علي الغرفة المجاورة
لغرفتة
وحطيت ايدي علي اوكرة الباب
لكن الباب مفتحش
فا حاولت احاول في اوكرة الباب تاني بكل قوتي
لغاية ماالباب اتفتح...
ولما دخلت لغرفتي
فضلت ادور علي اي حاجة البسها...
فا اتحسست طريقي للمكان
الي فيه السرير
والغريبة اني لما دورت علي الدولاب ملقتوش
فا فضلت ادور بايدي علي السرير
لكن ملقتوش مكانة هو كمان
وقلت في نفسي
غريبة...
السرير كان في المكان ده؟
ولقيتني بحط ايدي علي الهواء
وكنت هقع علي الارض
وكل حاجة كنت متعودة عليها في الغرفة ملقتهاش مكانها
وسالت نفسي
هي الاوضة بقت غريبة ليه؟
يادي النيلة
لاكون دخلت اوضه غلط؟
ايوه انا باين عليا دخلت اوضه غلط
ولازم ارجع للباب عشان خرج واروح لغرفتي
وفضلت اتحسس بايدي في الغرفة
عشان الاقي الباب ..واخرج
لكن..اثناء ما كنت بتحسس بايدي
علي مكان الباب
حسيت ان ايدي لمست جسم بني ادم
فا انتفض جسمي
وسحبت ايدي بسرعة
لاني شعرت بالذعر
وحاولت اهرب من المكان
لكن سمعت صوت الباب بيتقفل عليا جوه الاوضة
وانا بقيت حبيسة مع الشخص المجهول
الي لمس ايدي من شوية
فا حاولت تاني
اتحسس طريقي للخروج
وقبل ما اعرف طريق للخروج
سمعت صوت
شبية بانين مكتوم
فا وقفت اصطنت للصوت
عشان اعرف هو جاي من انهي اتجاه؟
وبعدها...
شميت رائحة قذرة
وحسيت بحد بيقترب مني
وصوت انفاسة الساخنة اقتربت من وداني
فا صرخت من الرعب
ولما صرخت ...
حسيت بايد
دفعتني بقوة علي الارض
ولما وقعت ...
شميت تاني الرائحة القذرة بتقترب مني
و بدات الرائحة ...
تقترب ....وتقترب...وتقترب
لغاية ما ..............
لو عايز باقي احداث القصة
صلي علي رسول الله
وطبعا مش هننسي نضع عشر ملصقات مع متابعة
تعليقات
إرسال تعليق