 |
دخلت زينب تتوضى وفتحت الحنفية انكسرت في ايدها والماية انفجرت في وشها
قالت الحقني يا سيييد بغرق اطلب الإسعاف أو النجدة
كان سيد لسه مكملش لبس جري عالحمام أول ما سمعها بتصوت
سيد بفزع: إيه في إيه يا زينب موتي ولا إيه
زينب وهدومها كلها مايه: لأ يا خويا كنت بغرق أنت جايب حنفيات بايظة
سيد: بايظة إيه ياختي أنتي اللي إيدك مش فيها البركة أنتي جاية تخربي البيت ولا إيه
دا أنتي لسه مكملتيش ساعة في البيت وكسرتي الحنفية
زينب بعصبية: أنت يالا بتزعقلي وأنا عروسة ما تعدي اليوم يا سيد على خير
أنت بتلزقها فيا يا أجرب ياللي جايب حنفيات رخيصة
سيد بذهول: نعم ياختي دا أنا شاري أغلى الحنفيات يا خراب أنتي
وإيه حكاية عروسة اللي ماسكاها ليا دي خلصي اتوضي خليني اتوضى عشان نصلي ونتخمد
زينب بقرف: طيب ياخويا براحة عليا
واتوضت زينب وبعدها هو دخل وصلوا
سيد: بصي خدي الأكل ده دخليه جوا وامسحي السفرة
زينب: نعم ياعنيا أنتي عايزاني أشتغل وأنا لسه عروسة
سيد: بت أنتي إيه يعني عروسة هما كاتبين عليا ضمان إنك متشتغليش طالما لسه عروسة ولا إيه
زينب: معرفش بس أنا عروسة روح أنت دخلهم
سيد: وأنا مالي ما أنا لسه عريس ولا هو حلال ليك وحرام ليا
زينب: خلاص أنا كمان مش هدخلهم
سيد بزهق: اومال يعني هنجيب حد من الشارع يدخلهم
زينب: يابني وأنت شاغل نفسك بالأكل ليه ولا هى رخامة وخلاص
سيد: مبحبش أشوف الحاجة مش مظبوطة
زينب: خلاص ياخويا ظبطها وسابته ودخلت تنام
دخل سيد وراها وهو متعصب وراح اتغطى ونام
تاني يوم صحيوا على صوت الجرس
قامت زينب مخضوضة وعمالة تصحي سيد وتقوله قوم في حريقة وده جرس الإنذار قوم هنموت
قام سيد مفزوع وقال فين الحريقة أنتي لحقتي تولعي في البيت
زينب: لا والله لسه مدخلتش المطبخ قوم خلينا نهرب
سيد: ده جرس الباب يا غبية خضيتيني وأنا شعري شاب من شوية وركبي سيبت من شوية وهتقطعيلي الخلف
وقام فتح الباب وكان أهلهم وبعض القرايب جايين يياركوا ليهم
أهل زينب: ربنا يسعدكم
زينب وسيد: يارب
وباركوا ليهم ومشيوا وبعدها أهل سيد مشيوا والقرايب
زينب بخضة: إيه ده يا سيد مين اللي بهدل الحتة دي وإيه البامبرز ده يع روح ارميه يا سيد
سيد: وأنا مالي ياختي مش أنتي فكرك عالجواز شغل البيت كنيس وغسيل وتنضيف أهي مهمتك اعمليها
وسابها وراح ياخد شاور عشان يفوق
دبدبت زينب برجليها في الأرض وراحت تنضف المكان وبعدها دخلت عالمطبخ وبدأت تشوف حاجة تأكلها
وعدى شهر على جوزاهم
زينب: بقولك يا سيد انزل هات فرخة عشان نطبخها
سيد: ماشي ياختي كل شوية انزل هات وروح كده وتعالى كده أنا كان مالي ومال الجواز
زينب: هو أنت بتجبلي أنا ما أنت بتتطفح معايا
سيد: مش هنخلص من زعيق كل يوم
زينب: معلش ياخويا استحملني أنا برضوا لسه عروسة
سيد:يادي عروسة ومحروسة أنتي هتفضلي عروسة لامتى
زينب: لسنتين قدام ياخويا ويلا عشان جعانة
سيد: ماشي ونزل يجيب فرخة بعد ربع ساعة كان جابها ودخل بيها
زينب: إيه ده انت جايب الفرخة صاحية ليه يابني هى هتعيش معنا ولا ايه
سيد: ما أنتي هتدبحيها
زينب بصدمة: أنت اتجننت عايزني أقتل يا سيد على آخر السنين أقتل وأدخل السجن بسبب فرخة
سيد: بس يابت أنتي وسعي كده هدبحها أنا
زينب:دا أنت قلبك مات بقى يا سيد أتت بقيت مجرم عايز تقتل فرخة
سيد:اها وملكيش دعوة
زينب: طب غمي عينها شوف بتبصلك إزاي بريئة خالص طب أنت هتقتلها إزاي
سيد: تحبي أجرب فيك واخليكي تشوفي إزاي
زينب : لأ جرب فيها هى
وفعلا دبحها ونضفوها وطبخوها وعملوا محشي وكلوا
زينب بعد لما ملت بطنها قعدت عالارض
سيد: اها الواحد شبع أوي طعم الأكل جميل قومي بقى اغسلي المواعين
زينب: مش قادرة اتحرك من مكاني قوم اغسلهم أنت
سيد: هو أنا متجوزك عشان اخدمك ولا إيه دا أنتي لفيتي المحشي بس وحشيتي بطنك
زينب: بطل قر يا سيد واتلم أنت باصصلي في صابعين المحشي اللي كلتهم
سيد:صابعين مين ياما دا انتي اديتيني صابعين في طبق وخدتي الحلة تاكليها لوحدك يا مفجوعة
زينب: بقى أنت باصصلي في اللقمة يا مفتري
سيد: اها وقومي اغسلي المواعين وروقي المطبخ خليه يبرق كده
زينب: مش عارفة ليه فجأة حسيتك أمي نفس الكلام بتقوله ليا بس مش هغسلهم
سيد: طب إيه رأيك بقى لو مقومتيش لهنزل بالعصاية دي فوقك
زينب: اهدى كده يا سيد فين التفاهم أنت طلعت العصاية دي منين
أنا هقوم اغسلهم اهو أهم حاجة أعصابك تهدى
بس تعالى اغسل معايا
سيد: زييييينب عالمطبخ
جريت زينب عالمطبخ وبدأت تغسل المواعين وهو راح قعد عالسفرة قصادها وماسك ليها العصاية
وهى هتعيط وكل شوية تبصله بغيظ وهو بيبتسم ليها ببرود
رأيكم كان غرضها شوية ضحك 😂💓
#تمت
#عروستي_زينب
#إسراء_إبراهيم
تعليقات
إرسال تعليق