مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت ❤

-أنت بتعمل ايه هنا؟ 

اتصدمت لما لقيت إسراء قدام بيتي أنا ومنار. 

-إسراء! 

-انطق يا عامر بتعمل ايه في بيت واحدة غريبة وأنت لابس هدوم البيت. 

جات منار من ورايا وهي خايفة وقالت:

-طيب ممكن تدخلي البيت ونتكلم بلاش فضايح أبوس ايديكي. 

-ايه خايفة علي سمعتك.... تجيبي راجل غريب بيتك وخايفة من الفضيحة ده انتي بجحة ورخيصة. 

-إسراء احترمي نفسك منار تبقي مراتي يعني زيها زيك. (بقلم سولييه نصار )

اتصدمت ورجعت لورا... عينيها دمعت وحسيتها مش قادرة تتكلم... خفت عليها... خفت اخسرها.... إسراء الوحيدة اللي مقدرش اخسرها.... شفتها بتبعد وبتجري برة العمارة. 

-الحقها يا عامر بسرعة لأحسن تعمل في نفسها حاجة 

جريت وراها وانا خايف عليها.... كانت بتجري وسط العربيات زي المجنونة.... وكان عربية هتدوسها بس ربنا ستر وبعدت بسرعة... ساعتها قدرت امسكها وجرتها ورايا بالعافية ودخلتها عربيتي ورحنا علي بيتنا. 

..... 

بعد ما وصلنا البيت 

-طلقني... بقولك طلقني. 

-إسراء اعقلي 

-لا مش هعقل يا عامر. 

بكت وقالت :

-أنا من تلات سنين لما عرفت اني مستحيل أخلف  قولتلك  اتجوز لأن ده حقك بس برضه قلتلك بشرط تطلقني لاني مش هستحمل تبقالي ضرة... مستحيل  اقدر اشوفك متجوز  حد غيري أو تحب حد غيري وقدامي فكان الأحسن إني هبعد بس انت اللي رفضت صح... قلتلي أنك بتحبني ومش مهم الأولاد... قلتلي أنك عمرك ما هتتجوز غيري... انت وعدتني يا عامر ازاي تكسرني بالشكل ده! 

حطيت وشي في الأرض.... كلامها كان صح... هي طلبت إني أطلقها واتجوز عشان متظلمنيش بس أنا اللي رفضت... بس برضه من حقي يكون عندي ابن... 

بصيت لإسراء وحاولت أهديها :

-والله وانا بحبك... بحبك أكتر من أي حاجة في حياتي.... أنا اتجوزت منار بس عشان أخلف وصدقيني يا إسراء مش هقصر معاكي ولا هفضلها عليكي... بالعكس انتي دايما هتبقي الاولوية ليكي... 

مردتش عليا وطلعت موبايلها واتصلت بحد :

-بابا لو سمحت تعالي خدني دلوقتي. 

كنت زي المربوط وأنا بشوفها بتجهز هدومها بحاول اكلمها مبتردش... اترجيتها تديني فرصة تاني بس برضه مفيش أمل.... جه باباها ومن غير كلام اخدها معاه.... حسيت إني روحي بتتسحب مني لما طلعت من البيت.... انهرت علي الكرسي وعيني دمعت... معقول كده خلاص خسرتها!!! 

....... 

-أنا هروح اكلمها واترجاها كمان. 

اتصدمت لما عرضت عليا منار  كده.... كنت لسه هرد  بس منار  مسكت أيدي وقالت :

-أنت بتحبها يا عامر ومستحيل اخليك تخسرها فأنا هكلمها متقلقش بس اديني عنوانها. 

-بس يا منار ممكن اسراء تتخانق معاكي وتهينك وانتي حامل في الشهور الأولي والإجهاد والتوتر غلط عليكي. 

-متقلقش إن شاء الله مش هيحصل حاجة. 

..........

في بيت إسراء 

-انتي بتعملي ايه في بيتي اطلعي برة 

-لو سمحتي اسمعيني وبعدين لو حابة تطرديني اطرديني. 

سكتت اسراء شوية فاستغلت منار  الفرصة وبدأت تتكلم:

-صدقيني يا إسراء عامر بيحبك... هو اتجوزني بس عشان يخلف وأنا اتجوزته عشان مبقاش وحيدة لكن هو لا حب ولا هيحب زيك. 

إسراء بتريقة :لا يا شيخة 

-والله العظيم بتكلم بجد.... حرام تدمري حياتك وتخسري واحد بيعشقك كده.... عامر محتاجك وصدقيني مش هتحسي بإختلاف في حياتك.... مش هيبات عندي ولا هيقعد معايا كتير.. انا وعامر مستعدين نعمل أي حاجة عشان تبقي مبسوطة وسعيدة. 

-اطلعي برة. 

-إسراء 

-بقولك اطلعي برة... يالا. 

..... 

عرفت أن كلام منار مجابش نتيجة فرحتلها أنا. 

-لا إله إلا الله هو أنا مش هخلص منكم ولا ايه... قولتلك يا بني آدم أنت طلقني واعتقني لوجه الله 

-مقدرش والله ما أقدر.... اطلبي أي حاجة غير الطلاق... 

-يعني أنت عايزني ارجعلك 

-أيوة يا ريت. 

-تمام هرجعلك بس بشرط. 

-اشرطي براحتك. 

-طلق منار. 

يتبع 

#الحب_احيانا_لا_يكفي 

#سولييه_نصار 

تفاعل حلو عشان انزل كمان بارت❤

الجزء الثاني والأخير ❤شكرا لتفاعلكم السكر❤

-افندم... أنت سامعة نفسك بتقولي ايه يا إسراء.... منار حامل... ازاي جالك قلب تقوليها.... ازاي تكوني أنانية بالشكل ده...

بصتلي وعينيها مدمعة وقالت:

-وأنت ازاي تكون اناني بالشكل ده... عايز الولاد وأم الولاد ومراتك  الاولي ومش مهم أنا هحس بايه... هحس بإيه بعد ما يبقي ليك  ابن وأنا اتركن علي الرف.... بعد ما منار تجيبلك ولي العهد أنت حتي مش هتبص في وشي وهتركني علي الرف... هبقي مجرد واحدة بتديها ساعتين من وقتك وبعدين تجري لمراتك وابنك... مش صح؟! 

-أنا من حقي يكون ليا ابن!!! 

زعقت هي في وشي وقالت :

-وأنا من حقي مبقاش نمرة اتنين في حياتك.... حقي مكونش مجرد فازة... حقي اتجوز راجل يكون ملكي بس... حقي محسش بحرقة الدم وأنا بشوفك رايح عندها وأنا عارفة هتعمل ايه... 

قربت منها. وقولت :

-إسراء أهدي... 

-لا مش ههدي... مش ههدي يا عامر أنا قولتلك من الأول طلقني واتجوز براحتك..... أنت اللي اتمسكت بيا وقولت مش مهم العيال ما دام احنا مع بعض ايه اللي غير رأيك دلوقتي!! بصيت في الأرض فقربت مني وقالت:

-اقولك يا عامر أنت افتكرت إني هتنازل واستسلم لما مراتك تيجيني إني خلاص كده هتقبل الواقع. 

دموعها نزلت وكملت :

-ولما مراتك تولد وأنت تنشغل بيها وبإبنك أو بنتك وتركني هتقبل الواقع....ولما حبك يبهت وابقي مجرد عبئ عليك هتقبل الواقع! لا يا عامر أنسي... أنا مش كده ولا عمري هكون كده ولو حبي ليه هيمس كرامتي أنا ادوس علي قلبي بالجذمة ولا اهين كرامتي. 

اتوترت وأنا ببصلها وقولت:

-قصدك ايه. 

رفعت رأسها وقالت:

-قصدي واضح يا عامر طلقني وروح لمراتك... ابقي جمبها مهما كان هتكون أم ابنك من حق ابنك أنه يتربي في وسط أسرة متماسكة... أنا مش هقدر أعيش معاك ولا اصطنع السعادة وسطك أنت وابنك... مستحيل أنسي خيانتك يا عامر  

اتعصبت وقولت:

-انا مخونتكيش أنا اتجوزت علي سنة الله ورسوله. 

-لا يا عامر أنت كدبت عليا خبيت موضوع جوازك عني... والكدب أكبر خيانة لأنها بتدمر الثقة... عارف لو أنا مخيرتكش من الأول كنت قولت ماشي  لكن انا قولتلك بلاش تتجوز وانا علي زمتك لأنك كده بتموتني بالحيا وأنت عارف كده روحت اتجوزت وقتلتني ومفكرتش فيا..

-يعني مفيش أمل. 

-أيوة مفيش أمل يا عامر... كل اللي بيننا انتهي. 

بصتلها ودموعي بتنزل لوحدها وقولت :

-انتي طالق. 

.. . ...... 

طلقت إسراء بس حسيت وكأن أخدت جزء من قلبي ومشيت كنت عامل زي الميت الأيام بتعدي وخلاص من غير أي جديد.... منار حاولت كتير تطلعني من اللي أنا فيه بس مقدرتش 

....... 

بعد سنة

وصلني خبر أنها هتتجوز.... قلبي اتحرق يوميها خصوصا إني كلمت ناس كتير عشان نرجع بس هي رفضت... ودلوقتي هتبقي ملك لحد تاني.... كنت زي المجنون يوميها اتمنيت لو أروح اخطفها من الفرح واحبسها.... عرفت أن اللي هتتجوزه دكتور ارمل مراته ماتت وهي بتولد بنته.. وهو رباها لحد ما بقي عندها تلات سنين.... 

..... 

مرت الشهور وأنا بحاول انساها لحد ما في يوم قابلتها في المستشفي لما كنت جايب ابني يكشف.... كانت حامل...... 

-إسراء 

بصتلي بلطف وقالت:

-عامر ازيك بتعمل ايه هنا. 

-جاي اكشف علي كريم ابني وانتي 

-جاية لعماد جوزي أشوفه... هو دكتور هنا 

-أيوة ما أنا عارف. 

بصيت لبطنها فهي فهمت وجاوبت :

-ربنا كريم اووي يا عامر... اتمنيت طفل وربنا اداني اتنين بنت عماد اللي بعتبرها بنتي وأكتر... واكتشفت بعد جوازي من عماد بست شهور إني حامل ومعرفش ازاي..... معجزة صح. 

-فعلا. 

قولتها وأنا حزين وبعدين سيبتها ومشيت وانا حزين علي الحال اللي وصلت ليه... احنا الاتنين بعدنا بسبب رغبتي إني أكون أب... بس احيانا الحب مبيكونش كافي... ويظهر أن حبنا مكانش كافي أننا نكمل 

تمت 

#الحب_احيانا_لا_يكفي 

#سولييه_نصار 

وبكده يكون انتهي الاسكريبت