مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

البارت الحادي عشر 

#ملاك_في_رداء_الشيطان 

#إيزيس 

وانجل جالها اتصال من مجهول 

ردت ... الو مين 

المجهول ... ازيك يا (تالية ) ليكي وحشة يا بت .. لحظة من الصمت انجل ماردتش من الصدمة  هي من زمان ما سمعتش حد بيناديها بالاسم دا حتي أنها نسيت اصلا أن اسمها تاليا 

تابع  المجهول ... ايه يا بت اطرشيتي ولا مش فاكراني رغم اني ماتنسيش  انا حماصة الوَحش ، بقولك ايه انتي  وحشتيني يا هرابة ووحشتني بو*ستك ااااخ لوز يا ناس ، عايز اشوفك يا بت ولو ..... قبل ما يكمل كلامه قفلت انجل الفون ورمته ع السرير وجسمها بدأ يرتعش كانت مرعوبة حرفيا لما افتكرت حماصة وتصرفاته القذ*رة معاها ولمسا*ته اللي لا تمت للأبوة بأي صلة 

قعدت انجل ع الأرض وحضنت نفسها  وفضلت تعيط وفجأة وصلت رسالة 

(مش هاسيبك في حالك انتي طاقة القدر بالنسبة لي اهلك الصعايدة لو عرفوا انك لسة عايشة هيجوا ياخدوكي بالعافية ، سلام يا مُزتي )

انجل رمت الفون وطلعت تجري علي اوضة مارد وفريدة كانت مراقباها وشافتها لما خرجت وابتسمت بخبث وهي بتبص لمذاكرات انجل اللي في أيدها وبتفتكر حاجة 

فلاش باك 

قبل اسبوع 

فريدة دخلت اوضة انجل تدور فيها عشان تعرف ايه المفاجأة اللي بتخطط لها انجل لعيد ميلاد المارد وفجأة وهي بتدور تقع في أيدها مذكرات انجل الفضول قت*لها عشان تعرف هي كاتبة ايه فتحت اول صفحة 

«عمري الان خمسة عشر عاما 

حياتي غريبة بعض الشئ لذا قررت أن أكتب مذكراتي لعلي في يوم انسي  فتذكرني بأن ذلك المارد هو طوق النجاة بالنسبة لي ، لم اتذكر كثيرا عن حياتي قبل أن أقابله لم اتذكر سوي اسمي تاليا احمد الاسيوطي   كنت أعيش في قرية السنانية في محافظة دمياط ، هذا فقط ما تعلمته حينما كنت في الصف الثاني الابتدائي كانت حياتي هادئة بعض الشئ الي أن اقتحمها ذلك الشيطا*ن الذي يدعي حماصة الوحش كنت أعيش مع والدتي كانت كل العالم بالنسبة لي مازلت اتذكر وجهها الجميل صوتها الناعم رغم كرهها لي و بعدها عني في آخر أيام بيننا ولكني مازلت اتذكر حينما مرضت تلك الليلة لقد بللت وجههي من كثرة دموعها اشتاق اليها حد الجنون ولكن لا اريد رؤية ذلك الشيطا*ن الذي فرق بيننا »

عودة من الفلاش باك 

فريدة فاقت من شرودها علي خبط انجل علي باب اوضة مارد فاستخبت عشان ماحدش يلاحظ وجودها 

 كان مارد ماسك ورقة وبيصمم سلا*ح جديد والسيجارة في بقه قال ... ادخل ، دخلت انجل باندفاع ورمت نفسها في حضنه وقالت بصوت مرعوب ... اوعي تسيبني يا مارد اوعي تتخلي عني وعيطت 

مارد كان هيتجنن لانه فاكر زعلها بسبب خطوبته طبطب علي ضهرها وقال .. اهدي يا حبيبتي وفجأة قلبه دق جامد لما اخيرا قدر ينطق الكلمة اللي مش راضي يعترف بيها حتي قدام نفسه 

اتنحنح وقال ... فيه ايه مالك 

انجل خافت تقول لمارد علي حماصة لانه بديهددها ، سكتت وبعدها بصت لمارد وكانت لسة في حضنه وقالت .. هو انت ممكن تسيبني لو حد من اهلي ظهر 

مارد بسخرية .. اهلك ؟!  انا اهلك انتي بنتي انا وبس مالكيش أهل غيري فاهمة 

انجل هزت راسها وسندت راسها علي صدر مارد وغمضت عينيها لحد مانامت 

ولما أتأكد هو أنها  نامت شالها وحطها علي سريره وغطاها وكمل تصميمه لحد ما خلصه وبعدها نام ع الكنبة 

**************

في الصبح 

انجل صحيت لقت نفسها لسة في اوضة مارد وهو نايم قامت من ع السرير وخرجت وراحت اوضتها 

مسكت فونها لقت ريكورد ع الواتس 

(تحضري ١٠٠ الف جنيه مبدئيا وتيجي بعد  بكرة  ع المكان دا ******* ولو فكرتي تفكير انك تقولي للمارد هتندمي فاهمة يا مزتي )

حطت أيدها علي بقها وفضلت تحرك عينيها يمين وشمال وفضلت تفكر ياتري هتتصرف ازاي 

مارد صحي مالقاش انجل قلق راح لها الأوضة اول ما دخل هي اتخضت 

و مارد لاحظ  توترها قرب عندها وقال 

... مالك ؟ ايه اللي حصل امبارح خلاكي تفكري في اهلك 

انجل بتحاول تبتسم وبتجاهد نفسها عشان ما تقلش لمارد حاجة ، لأنها عمرها ما خبت عنه أي حاجة بتحصل معاها 

انجل ردت .. مافيش مجرد تفكير  مش اكتر 

مارد بشك .. اممم هنشوف ، المهم جهزي نفسك عشان فريدة هانم بكرة هتعمل حفلة بمناسبة الخطوبة *قال الكلمة الأخيرة من بين أسنانه كأنه مضايق * 

انجل بصت ولوت بقها وقالت .. حاضر 

سابها وخرج وهي كانت هتموت من الغيرة عليه كل ما تتخيل أنه هيكون ل لمار مش ليها 

*عدي اليوم دا طبيعي من غير احداث إلا أن انجل ما وقفتش تفكير في حماصة اللي رجع بعد تمن سنين يأرق يفكيرها 

ومارد بيحاول يشغل نفسه في مصنعه علي اد ما يقدر عشان ينسي ام الخطوبة اللعينة دي بالنسبة له 

وفريدة كانت متحمسة جدا وبترتب لخطوبة ملكية لأنها بتموت في المظاهر وجميلة مضايقة عشان عارفة أن مارد لو اتجوز لمار هيبعد عنها اكتر واكتر وهيقرب لفريدة وعيلتها وعزيز كان بيتعاقد علي صفقة كبيرة جدا في نفس اليوم دا 

مارد وهو ماشي من المصنع قال لاسلام 

... بدل ما تزعل وتقول اني ماقلتلكش بكرة خطوبتي علي لمار 

اسلام ضرب علي صدره زي الستات وقال ..يا مصيبتي 

مارد بص له من فوق لتحت وقال .. ما تنشف يااض ايه دا 

اسلام بغضب ... اصلي بصراحة مالقيتش انسب من التعبير دا للموقف اللي احنا فيه دا 

مارد ... وماله الموقف اللي احنا فيه 

اسلام ... انا صاحب عمرك ابقي اخر واحد  يعرف انك خطبت ، طب بلاش دي وبتقولي بكل سهولة بدل ما تزعل يعني من باب العلم بالشئ ، والأدهي من كل دا انك هتخطب لمار اللي انت مش بتطيقها من الأساس دي فزورة صح 

مارد وهو بيدخن السيجارة ماكانش مركز في كلامه ف قال .. ولا فزورة ولا حاجة ، أنا هاخطب لمار عشان انجل ....وسكت 

اسلام ... مالها انجل ، مارد انت بتحب انجل أنا متأكد 

مارد حب يهرب لانه عارف ان اسلام اكتر واحد حافظه ومش هيقدر يضحك عليه بكلمتين فقال .. انا هامشي عشان مانتخانقش وركب عربيته وانطلق 

اسلام وهو حاطط ايديه في جيوبه وبيبص للعربية قال ... طب عليا الطلاق بتحبها 

***********

تاني يوم قبل  الحفلة 

مارد كان بيلبس انجل دخلت وكانت لابسة فستان روز هادي وسيمبل وميك خفيف جدا وفاردة شعرها بس كانت قمر  

مارد فضل باصص لها لحظات وهي انحرجت من نظراته ونزلت عينيها في الأرض وبعدين رفعت وشها وقالت ... ايه حلوة 

مارد وهو مش في وعييه همس .. قمر 

انجل ابتسمت وهو لاحظ ف اتنحنح بسرعة وقال .. ايه اللي جابك عايزة حاجة 

انجل باحراج ..  ع عايزة انا أصلي كنت عايزة احم ١٠٠ الف جنيه 

مارد عقد حواجبه .. ليه عايزة مبلغ زي دا 

انجل ... مارد لو أنا بنتك بجد اديني الفلوس من غير ما تسألني 

مارد فتح الدرج وطلع الكريديت بتاعته  وقال لها ... خدي اللي انتي عايزاه ، الرقم السري تاريخ ميلادك 

انجل بصت لمارد بدهشة وقالت من غير ما تحس بنفسها .. مارد ما تخطبش لمار 

مارد ركز في عينيها وكان علي وشك الاستسلام لصوت قلبه اللي بيقله اعترف لها بحبك وليذهب كل شئ الي الجح*يم بس سيطر علي نفسه وقال .. انتي صغيرة ما تتدخليش في اللي مالكيش فيه يلا علي اوضتك 

خرجت انجل وهي متغاظة من بروده و رد فعله وقررت انها تردله الكف 

في الحفلة كان مارد جمب لمار 

وانجل قاعدة هي واياد وجميلة علي طرابيزة واحدة وبتضحك مع اياد عشان تغيظ مارد 

مارد كانت عينه بتطلع نار م الغيرة وكل تركيزه علي انجل 

اشتغلت موسيقي هادية وفريدة احرجت مارد قدام الناس طلبت منه بصوت واضح  أنه يرقص مع لمار سلو 

ابتسم ابتسامة صفرا وهز راسه يعني اوك 

انجل بقت تهز رجلها من كتر الغيظ وقالت لاياد .. تحب ترقص 

اياد ... ياريت 😍

انجل مسكت ايد اياد ومارد بقي بيتنفس بسرعة من شدة الغضب ومش مركز ابدا مع لمار ومن غير ما يحس اعتصر وسط لمار لدرجة أنها اتألمت 

انجل بدأت ترقص مع اياد وبتبتسم رغم أنها كانت مرعوبة لأنها شايفة شكل مارد عامل ازاي 

وفجأة ومن غير مقدمات ينسي كل المعازيم ويشد انجل لحضنه من بين ايدين اياد ويحضنها جامد ويبدأ يرقص وهو بيقول لها ... عقابك عسير ع اللي حصل دلوقتي ، انتي عارفة أنه ممنوع حد يحضنك غيري

انجل حبت تكمل لعبتها لأنها كانت مستمتعة وهي شايفاه بيغير عليها فقالت بدلع ... آسفة يا بابا مش هعمل كده تاني 

مارد بغضب ... اعتذارك مرفوض وهتتعقبي 

لمار كانت واقفة بصدمة وتقريبا الكل كان مستغرب للي حصل 

انجل كانت هتبعد عنه بس هو شدها تاني وقال .. أنا لسة ماقتلش الرقصة انتهت 

فضلوا يرقصوا وانجل كانت هتموت م الفرحة ، خلصت الرقصة والكل صقف لهم ع الرقصة الرائعة دي 

راحت قعدت تاني مكانها وهي بتبتسم ومش قادرة تسيطر علي ابتسامتها وفجأة توصلها مسج تغير مودها نهائي فتحت المسج لقت رساله 

مستنيكي في المكان اللي اتفقنا عليه اترعشت وقلبها انقبض بس ما قدمهاش حل تاني طلعت اوضتها اخدت الكريديت وخرجت وقفت تاكسي وطلبت منه يوصلها ع البنك سحبت الفلوس وبعدها طلبت من السواق يوصلها المنطقة اللي في المسج 

وصلت وفضلت تبص حواليها مافيش حد وفجأة تسمع اكتر صوت بتكرهه  

.

... نورتي يا موزتي ! ...... يتبع 

*************

البارت انتهي اتمني يعجبكم ❤️

البارت الثاني عشر 

#ملاك_في_رداء_الشيطان 

#إيزيس 

انجل خرجت وقفت تاكسي وطلبت منه يوصلها ع البنك سحبت الفلوس وبعدها طلبت من السواق يوصلها المنطقة اللي في المسج 

وصلت وفضلت تبص حواليها كانت حتة مقطوعة ع النيل و مافيش حد هناك تقريبا غيرها ندمت لأنها ماقالتش لمارد وفجأة تسمع اكتر صوت بتكرهه  

.

... نورتي يا موزتي !

لفت وشها واول ما شافت حماصة رجعت خطوتين لورا وكورت ايديها الاتنين من التوتر نسيت تماما أنها انجل حست أن الزمن رجع بيها لورا وهي دلوقتي تالية الطفلة أم عشر سنين بس بسرعة فضلت تطمن نفسها ان مارد مدربها علي القتال وتعرف تدافع عن نفسها كويس اوي وكل الأفكار دي كانت بتدور في دماغها في اقل من دقيقة وفجأة قطع شرودها حماصة وهو بيقرب ناحيتها بخطوات هادية ومزبهل من شكلها اللي اتغير شوية وبقي اجمل 

حماصة بيتفحصها بنظرات و*قحة ... انا زعلان منك يا موزتي كده تبعد عن بابا حماصة ولسة هيحضنها بعدت بسرعة وقالت بصوت واضح عليه التوتر الشديد 

.. ا ا ابعد عني ، لو  بس فكرت تقرب لي أنا ممكن اقت*لك ، بابا مارد مش هيسيبك في حالك 

حماصة رفع أيديه علامة الاستسلام وقال ... الشهادة لله أنا خفت كده ، وبعدين نبرته اتغيرت للغضب وقال .. هاتي الفلوس 

انجل مسكت الشنطة كويس وقالت ... الفلوس دي انت هاتخدها وتختفي من حياتي للابد مش عايزة اعرفك ولا اشوفك تاني

حماصة شد أيدها بالفلوس وحاول يحضنها وهو بيقول ... لييه ليه يا حلوة مانا هاخدك معايا عشان تشوفي امك ونشبع من بعضنا 

انجل كانت بتضر*ب فيه بالشنطة وتصرخ .. ابعد عني يا حيوا*ن 

وفجأة رصا*صة تختر*ق بط*ن حماصة انجل صرخت وبصت ناحية اللي ماسك المسد*س لقيته المارد برقت وفضلت مبرقة لحظات حماصة وقع ع الأرض وقال .. أنا قلتلك هتندمي لو عرفتيه ،  وفقد الوعي 

انجل جريت بسرعة ناحية مارد وهي بتقول بهستريا 

...ق*تلته لييييه ، انت قتا*ل قت*لة يا مارد هتتعدم  هتتعـــ.... 

مارد حضنها وهو بيقول ... اهدي ، ف أغمي عليها في حضنه 

قام حضنها جامد وبعدها شالها ورجع بيها علي عربيته وهو بيقول لواحد من رجالته ... خدوه بسرعة مش عايزه يموت عايز اعرف مين دا 

حطها في العربية وساق بسرعة ع القصر .

وصل القصر وكانت فريدة ولمار هيتجننوا  بكل معني الكلمة ، والمعازيم بدأت تمشي 

فريدة شافت مارد شايل انجل وبصت لهم نظرة قا*تلة وقالت لمارد .. فيه حد يسيب حفلة خطوبته ويمشي انت خليت رقبتي اد السمسمة قدام عيلة اختي بس لينا حساب كبير مع بعض يا مارد 

مارد كان طالع السلم ومش مركز ولا منتبه لاي كلمة قالتها فريدة لأن كل اللي كان شاغل تفكيره يا تري مين دا وازاي انجل تخبي عنه حاجة خطيرة زي دي ولو ماكانش لمحها وهي خارجة كان ممكن يكون ايه مصيرها دلوقتي،

 افتكر هو ازاي لحقها 

فلاش باك 

كان قاعد جمب لمار في الحفلة غصب عنه طبعا  وكل تركيزه علي انجل شافها لما طلعت اوضتها ولبست بالطو طويل علي فستانها ونزلت بحذر تتسحب عمل نفسه مش واخد باله بس كان متابع كل خطواتها شافها وهي بتخرج من البيت وكأنها عاملة عاملة 

بص ل لمار وقال لها .. هاروح اشرب سيجارة في الجنينة وراجع 

لمار ... اجي معاك 

مارد وهو مستعجل قال لها .. امم تمام بس روحي ظبطي الميك اب بتاعك وحصليني 

 لمار فرحت اوي من الكلمة دي حست أنه بيهتم بيها وبتفاصيلها هزت راسها يعني اوك 

وخرج هو بخطوات سريعة وركب عربيته واستغرب اكتر لأن انجل ما طلبتش من سواقها انه يوصلها وفضل متتبع خط سيرها لحد ما وصل وانقذها 

نهاية الفلاش باك 

مارد حط انجل ع السرير بهدوء وفضل يضر*ب علي خدها برفق ويفوقها وجميلة خبطت ع الباب لقته مقفول بالمفتاح 

مارد قال لجميلة بصوت عالي ... جميلة مش هافتح الباب امشي وانا هاطمنك عليها 

انجل فاقت وافتكرت ان مارد ق*تل حماصة  وفضلت تترعش وتعيط وجسمها كله بيتهز من العياط وقالت .. ا انت قتلت الشرطة هتيجي تاخدك وتتسجن ، وانا ما اقدرش اعيش من غيرك ولا لحظة 

مارد باصص لها بكل برود وقال ..  مين دا  

انجل وهي بتمسح وشها بضهر أيدها قالت ... دا دا حماصة 

مارد بغضب جحيمي .. نهار ابوكي اسود انتي بتقابلي الراجل دا من أمتي احكيلي كل حاجة والا اقسم بالله يا انجل لاحبسك في اوضتك زي عزيز ما مانع جميلة أنها تعتب برا القصر *قال جملته الأخيرة وبعدها لعن نفسه وهو عقله بيقوله هيجي يوم وتتحول لعزيز أنا واثق *

غمض عينيه بعنف وقال ... لااا مش هيحصل 

وبعدين اخد نفس طويل وقعد جمب انجل بهدوء وحضنها عشان يطمنها وقال .. انجل ما تقلقيش الضر*بة اللي ضر*بتهاله مش بتموت أنا مش علمتك ازاي تضر*بي حد ضر*به ماتموتوش ، أنا اصلا عايزه حي ، وبعدها مسح بإيده علي شعرها ورجع خصلة منه ورا ودنها وقال احكيلي يا انجل كل حاجة 

انجل هزت راسها وبدأت تحكيله كل حاجة بالتفصيل 

************

فريدة وهي بتدخن السيجارة وتهز رجلها بعنف من الغضب وبتقول ... لحقها ازاي ، أنا ما لحظيتش هو خرج امتي ، كل اللي خططتله باظ ، بس مافيش قدامي الا الخطة التانية ، بصت حواليها ما لقتش عزيز فقالت بعصبية ... وفين عزيز مختفي فين دا كمان ، امم اكيد عند ست الحسن اروح اطلع غضبي عليهم عشان اعرف انام في الليلة السودة دي 

خرجت فريدة وخبطت علي باب اوضة جميلة كان عزيز فعلا عندها بس بيتكلموا عن اللي حصل في الحفلة 

جميلة .. أنا واثقة أن مراد بيحب انجل بس بيبعد عنها مخصوص عشانك انت عشان مايبقاش شبهك يا عزيز ، أنا لازم اعرف ابني الحقيقة 

عزيز ... وتفتكري هيصدقك ، أنا خايف عليكي يا جميلة فريدة لو عرفت ... قبل ما يكمل كلامه الباب انفتح باندفاع اتخضوا هما الاتنين وبصوا لفريدة اللي كانت في قمة غضبها 

فريدة ... الله الله سايب مراتك بعد الكارثة اللي عملها ابنك وقاعد مع عاشيقتك منتهي الوفاء والله 

جميلة لفت وشها الناحية التانية واتأففت 

فريدة ... ايه مش عاجبك يا ست جميلة 

عزيز بضيق ... فريدة مالك متعصبة كده ليه 

جميلة بصت ل عزيز بصدمة اللي هو انت ازاي سمحت لها تهينني من غير ما تتكلم 

عزيز بص وغمض عينيه يعني اسف 

فريدة ... عزيز رد عليا انت قاعد هنا بتعمل ايه في نص الليل 

جميلة بغضب ... كنا بنتناقش في حوار يخص ابننا 

فريدة بتحدي ... قصدك ابني أنا ولا نسيتي ، أنا سايباكي عايشة لحد النهاردة بس لو فكرتي تلعبي معايا وصوتك يعلا عليا تمنك كلمة واحدة مني للكينج  وتكوني ميتة 

جميلة بصت لها بتحدي اكبر ماعدتش خايفة منه ولا منك عارفة ليه لاني ام المارد 

روحي قولي لماركو  اني لسة عايشة لاني خلاص زهقت من حياة الجبن والخوف *قالت جملتها الأخيرة وهي مركزة نظرها علي عزيز لأنها تقصده هو بالكلام دا * 

عزيز من غير تفكير قام حاضن جميلة قدام فريدة وقال ... دا مش هيحصل وانا مش هاسمح لحد يئيذيكي 

فريدة برقت من جرأة عزيز ازاي يحضن جميلة قدامها ومش عاملها اي احترام 

قامت بسرعة شدت عزيز من دراعه عشان يبعد عن جميلة وهو فاق لنفسه وبعد عنها واتنحنح وقال ...  اللي حصل دلوقتي دا ما يحصلش مرة تانية والأسرار اللي بينا احنا التلاتة ماتحكوش فيها حتي لو بينكم وبين نفسكم ، يلا يا فريدة قدامي خرجت فريدة ووراها عزيز وهو بيقفل الباب بص لجميلة نظرة اعتذار ومشي 

**********

*في الصبح 

انجل صحيت ولقت المارد نايم وهو قاعد جمبها ع السرير اتعدلت وقعدت جمبه وافتكرت ليلة امبارح لما كانت تحكيله وعيطت بهستريا فضل حاضنها لحد ما نامت فابتسمت لمجرد التفكير في حضن مارد 

قربت من وشه وقالت بهمس ... انا بحبك 

ياريت اقدر اقولها لك وانت صاحي ، ياريت اقدر اقولك ما تتجوزش غيري 

قامت من جمبه وخرجت راحت اوضتها 

مارد فتح عينيه وقال في نفسه  .. كلام فريدة هانم صح انجل بتحس بالامتنان ناحيتي كل ما اعمل حاجة كويسة عشانها دا مش حب 

بس انا اللي بحسه ناحيتها دا ايه أنا ليه كل ما أشوفها ببقي عايز اخدها في حضني واخبيها عن العالم كله ، ليه لما حد بيقرب لها ببقي عايز انهيه أنا مش هسمح لها تتجوز هي بنتي وهتفضل معايا العمر كله 

قام اخد شاور 

******

فريدة راحت المستشفي متنكرة عشان تتطمن علي حماصة ولما سألت قالوا لها أنه دخل في غيبوبة 

اطمنت شوية وقررت تعجل فرح المارد ولمار عشان عارفة أنه المارد مش هيسيب حماصة الا لما يعترف بكل حاجة ومين ساعده أنه يوصل لانجل ، وكمان كلمت شخص تاني في الفون 

فريدة .... موجودة في الحفظ والصون ، استني مكالمة مني وهاقولك تيجي تاخدها امتي 

رجعت البيت لقيتهم بيتغدوا قعدت تاكل  وقالت لمارد ... جهز نفسك خلال اسبوع عشان ماما جولنار هانم قررت انها تجوزكم يوم الخميس اللي جاي 

مارد بص بدهشة وقال ... بالسرعة دي 

انجل اللقمة وقفت في زورها وجميلة فضلت تضربها علي ضهرها ومارد قلق عليها وفضل مركز معاها لحد ماخفت

قامت انجل من ع الاكل وجميلة وراها 

طلعوا اوضة انجل 

وجميلة قالت لها ... ما تستسلميش كده خليكي قوية ،

انجل بدموع ... اعمل ايه يعني هو خلاص هيتجوز يا ماما جميلة أنا مش هقدر اعيش هنا تاني واشوفه بيتجوز واحدة تانية ،انا ممكن اروح فيها 

جميلة... اسمعي أنا متأكدة أن مارد بيحبك عشان كده لازم تثيري غيرته يعني اوهميه ان فيه حد في حياتك وشوفي هيعمل ايه اتفقنا 

انجل  وهي بتمسح دموعها .. اتفقنا 

جميلة باست خدها وقالت ... مش عايزة اشوف العيون الجميلة دي بتعيط تاني 

*

انجل نزلت لقيت مارد في صالة التدريب بتاعته دخلت عنده شافها كان بيلعب ضغط قام ومسك الفوطة وهو بيمسح وشه قال ... مالك فيه حاجة 

انجل بتمثل الكسوف ... اصل يا بابا فيه واحد معجب بيا وعايز يخطبني  

مارد مسك دراعها بغضب وقال ... نعم ياروح امك  

انجل بدلع  ... اه اه دراعي يا بابا 

مارد بغضب  ... ومين دا بقي سعيد الحظ اللي يتجرأ ويعجب ببنت المارد 

انجل بتحاول تخفي ابتسامتها ولسة مكملة في دور الدلع ... اياد يا بابا قولت ايه يا بابا 

المارد بغضب .. بابا بابا بابا ايه فيه ايه

انجل بتمثل الزعل والدلع في نفس الوقت ... انت زعلت يا بابا

مارد نسي نفسه وقرب انجل اوي له وقال من بين أسنانه ... وانتي رأيك ايه 

انجل كانت مرعوبة من نظرته بس اتشجعت هي يا قا*تل يا مقتو*ل في معركة حبها للمارد .. بصت لتحت وقالت الله بقي يا بابا ما تكسفنيش 

مارد برق عينيه وقال بصدمة  ... امتي دا حصل يا ست انجل ، انتي ليا انا وبس وبعدين كمل بهدوء  ا... ا ...قصدي انتي بنتي  بنتي فاهمة يعني ايه ولسة صغيرة كمان 

انجل بعند ... لا يا بابا أنا مش صغيرة ع الخطوبة 

مارد قال من بين أسنانه ... سيبيني افكر بس والله يا انجل لحد ما افكر لو لمحتك بس بتكلمي اياد دا ولا تيجي جمبه لهعقبك عقاب عمرك ما هتتوقعيه فاهمةةة

انجل بخوف ... امم فاهمة 

خرج وهو بيرمي ام الفوطة ع الأرض وهي فضلت تتنطط وتضحك م الفرحة عشان قدرت تخليه يغير 

فضلت تقول ... yes , yes 

*مر الأسبوع بسرعة  

وجه يوم الفرح وانجل لبست فستان ابيض وكانت حزينة وعينيها دبلانة من العياط لأنها حاولت بكل الطرق أنها توقف جواز مارد بس فشلت 

وصل القاعة وبدل ما يبص لعروسته اللي وصلت بص لانجل اللي كانت فعلا انجل بفستان ابيض اختارته لها  جميلة وقرب لها قدام كل الناس وقال بيهام .. لبستي ابيض ليه 

انجل والدموع في عينيها ... مش النهاردة فرحك يا بابا والبنت يوم فرح باباها بتلبس ابيض 

مارد من غير ما يحس بنفسه قرب من انجل وطبع بوسة هادية علي جبينها وهي غمضت عينيها لأنه كان نفسها تكون مراته في اللحظة دي 

بدأ الفرح والمأذون وصل وبدأ مراسم كتب الكتاب فجأة جميلة كلمت مارد وهي في القصر وقالت له حاجة 

قام مارد من ع الكرسي بغضب واتجه ناحية انجل مسك أيدها واخدها وركب العربية وساق بسرعة ......... يتبع 

************

البارت انتهي اتمني يعجبكم ❤️

#معلش النت كان قاطع عندي امبارح بالليل ماوصلش الا الصبح ، بعتذر عن التأخير يا جماعة🥺

#الفيديو دا صممته  لمشهد مارد لما يضرب حماصة بالنار اتمني يعجبكم انتوا

البارت الثالث عشر 

#ملاك_في_رداء_الشيطان 

#ايزيس 

بدأ الفرح والمأذون وصل وبدأ مراسم كتب الكتاب فجأة جميلة كلمت مارد وهي في القصر وقالت له حاجة 

قام مارد من ع الكرسي بغضب واتجه ناحية انجل مسك أيدها وخرجوا م القاعة واخدها وركبوا  العربية وساق بسرعة وإسلام جري وراه عشان يسأله بس مالحقهوش حتي عزيز كان عايز يعرف ايه اللي حصل بس ما قدرش يلحق مارد عشان كان لازم يقعد يبرر اللي حصل للمعازيم وخاصة ( الكينج )

*مارد وصل الفيلا في وقت قياسي وطول الطريق مافتحش بقه ولا قال اي حاجة لانجل بس كان شكله غضبان 

انجل وهي بتنزل من العربية ... طب فاهمني فيه ايه ازاي تسيب فرحك كده 

بصت لقت عربية جيب ، فقالت .. ودي عربية مين دي كمان 

مارد بص للعربية و مسك أيدها ودخلوا القصر لقي خمس رجالة صعايدة فيهم رجل عجوز وابنه وشاب تقريبا حفيده واتنين تقريبا حراسة كانوا قاعدين وجميلة معاهم واول ما دخلت انجل قام الراجل العجوز وقف ومشي ناحيتها وقال ... تالية بت الغالي الله يرحمه 

مارد في نفسه ... تالية بنت الغالي 

تالية فضلت لحظات تبص للراجل دا ايوا هي فاكراه دا جدها اللي كان بيجي يزورها كل شهر مرة ويديها فلوس ويمشي 

الراجل قرب من انجل عشان يحضنها وهي عينيها اتملت دموع قام مارد شد انجل وراه وقال ... انجل بنتي وماحدش هيقدر ياخدها مني 

قام الشاب وقف بكل عصبية وقال ... شيل يدك م علي بت عمي 

مارد ... بنت عمك دي كانت زمان لما كانت تالية ، هي دلوقتي  انجل بنت المارد 

عمها ... انت بتخترف تقول ايه چدع انت كيف يعني ابوها انت اصلا لساتك شاب 

جميلة قاطعته ... علي فكرة يا عم الحاج مارد فعلا من لحظة ما شاف انجل واخدها رباها كأنها بنته بالظبط ، 

انجل بصت لجدها برجاء وقالت ...... لو كنت بتحبني بجد ويهمك سعادتي سيبني اعيش مع بابا المارد 

جدها ... برضو بتجول بابا ، انتو هتجننوني ولا ايه ،

مارد ...انتوا عرفتوا مكان انجل ازاي ، وليه سكتوا  السنين دي كلها ومسألتوش عنها 

جد انجل ... حماصة الله يجحمه قالنا أنها ماتت ،عشان أكده سكتنا ، بس لما عرفنا أنها عايشة چينا عشان ناخدها ، يلا يا تالية هنمشي

انجل بصت لمارد بحزن وخوف  يعني اعمل حاجة 

مارد مسك ايد انجل وقال ... انجل مش هتخرج من هنا 

ابن عم انجل سحب سلا*حه ووجهه علي مارد وقال ... بت عمي هاتروِح معانا ، أنا المقدم ساليم عاصم الاسيوطي اوعي من طريجي 

مارد ... أنا مابخافش يا سيادة المقدم ولو هنتواجه بالسلا*ح فأنا عندي سلا*ح يقت*لكم انتوا الخمسة بطل*قة واحدة 

سليم ... لا دانت و*قح بجي ، يلا يا جدي وهناخد بت غني بالذوق أو بالعافية 

وفجأة يجي صوت من وراهم ... ماحدش يقدر ياخد العروسة يوم فرحها ولا ايه يا بلدينا 

كلهم بصوا ناحية اسلام بدهشة حتي مارد 

اسلام ... في الحقيقة يا عم الحج مارد ربي انجل احسن تربية وحبها وانهاردة كان فرحهم انت مش شايف انها لابسة فستان ابيض وقمر 

جدها بص لها وقال ... الكلام ده صح يا تالية 

انجل هزت راسها  ... ايوا يا جدي 

مارد ....😲😲

ابن عم انجل ... لا دي بت عمي وانا أولي بيها من الغريب 

اسلام ... طب أنا  راضي زمتك يا سيادة المقدم مش الرسول عليه افضل الصلاة والسلام نهانا عن أن حد يخطب واحدة مخطوبة فمابالك بقي لو انهاردة كتب كتابها ، أنا بقول نروح كلنا ع القاعة نكمل الفرح وناخد سيلفي مع بعض للذكري عشان توريها لقرايب تالية ، قلت ايه يابا الحاج 

جد انجل شاف لمعة في عينيها حس انها فعلا بتحبه 

بس عاصم كان له رأي تاني 

... يابا مش احنا اتفاقنا  أن تالية لساليم 

جد انجل ... انا كل اللي يهمني سعادة تالية بينا ع القاعة يا ولدي 

مارد لسة تحت الصدمة اللي هو ولا فرحان ولا زعلان مصدوم وبس 

انجل كانت مبسوطة لانها شايفة معجزة بتحصل قدامها هي طول الفرح تدعي أن الفرح ما يكملش ومارد ما يتجوزش لمار 

قربت من مارد وعلقت أيدها ف أيده وهو لسة مش مصدق اللي بيحصل 

جميلة كانت بتراقبهم من بعيد وهتطير من الفرحة عشان ربنا استجاب دعائها ومارد هيتجوز انجل بس كانت حزينة لانها مش هتقدر تروح معاهم الفرح 

ركبوا العربيات و وصلوا القاعة ودخل المارد وانجل في أيده ، لمار كانت طلعت الجناح بتاعها في الفندق لان شكلها بقي وحش من غير العريس  وفريدة كانت معاها 

اخيرا المأذون انهي مراسم  كتب كتاب مارد وانجل في حضور أهلها  

وبدأ صوت الموسيقي يعلا ، فريدة سمعت صوت الاغاني وقالت بفرحة ... حبيبتي لمار مارد وصل ، أنا هانزل اشوفه 

نزلت فريدة لقت مارد وجمبه انجل رغم أنها ماكانتش لابسة طرحة بس كانت لابسة فستان ابيض جميل فريدة ماكانتش فاهمة حاجة فسألت اياد .

اياد كان متعصب وحكي لفريدة كل حاجة 

فريدة مسكت راسها ووقعت أغمي عليها جري عزيز بسرعة شالها وخرج بيها  

واياد أخد والدته  وجدته جولنار هانم وخرجوا من القاعة ، طلعوا جناح لمار اخدوها  ومشيوا وكانوا فضبانين وبيتوعدوا لمارد  ولمار ما كانتش فاهمة اي حاجة بس مشت معاهم 

اسلام كان هيطير م الفرحة لانه عارف ان مارد بيحب انجل بس عمره ما هيعترف ب 

دا عشان كده حب يدبسه أحلي تدبيسة 

وهو بيفكر وبيبتسم لقي عزيز واقف قدامه بيقوله ... عايز تبرير حالا للي حصل 

اسلام اتنحنح وقال ... حاضر يا عزيز باشا اتفضل اقعد وانا هاحكيلك 

*خلص الفرح وجد انجل بارك لها وقال لها أنه هيزورها من وقت للتاني .

مارد ركب العربية ومعاه انجل اللي مش قادرة تسيطر علي نفسها م الفرحة والإبتسامة مش مفارقة  وشها .. مارد بص لها بدهشة وقال ... بتضحكي ليه 

انجل اتنحنحت وقالت ... ها لا مافيش 

وبصت الناحية التانية وابتسمت اكتر 

وصلوا القصر 

كانت جميلة في استقبالهم وفرحانة اوي بس مارد بص لها بعتاب وحزن لأنها ماحضرتش فرحه 

جميلة حضنت مارد بس هو ماحضنهاش فضل واقف ثابت همست في ودنه ..  مبروك يا قلب ماما أنا فرحانة لأنك اتجوزت البنت اللي بتحبها 

بعدت عنه وحضنت انجل وقالت لها  ... مبروك يا حبيبة ماما .. وبالتوفيق في اللي جي 

طلع مارد اوضته ومعاه انجل 

اول ما دخلوا وقفل الباب بص لانجل وقال لها ... طبعا كل اللي حصل دا مش هيغير حقيقة انك بنتي وانا عملت كده بس عشان احميكي وتفضلي معايا ، حتي اهلك أنا مش هكون مطمن عليكي معاهم

انجل بصت له وتنحت وما اتكلمتش 

مارد اتنحنح وقال لها أنا هادخل اغير  هدومي وانتي كمان خدي راحتك 

انجل هزت راسها هو دخل الحمام  وهي فتحت الدولاب لقت جميلة جابت هدومها فيه فابتسمت وبعدها ضحكت وقالت ... اعااااا 

مارد من جوا الحمام  قال ...  انجل مالك 

انجل باحراج  ... احم لا مافيش يا مارد وبعدين حطت أيدها علي بقها وانكسفت ،اللي هو كده 🤭

بدلت هدومها وقعدت ع الكنبة وكانت بتقلب في كراسة رسم 

مارد خرج م الحمام بص للكراسة اللي بيصمم فيها أسلحة وجري بسرعة أخدها من انجل وهي اتخضت وبصت له هو ارتبك وقال لها ... مش هتنامي 

انجل هزت راسها يعني حاضر هنام  

قعد ع السرير وافتكر لما قرأ مذكراتها وكانت كاتبة أنها نفسها ترجع تنام في حضنه تاني ، قام فتح درعاته وقال لها... تعالي نامي ما وحشكيش حضن بابا 

انجل ابتسمت وقالت ... طبعا وحشني وجريت بسرعة اترمت في حضنه بس كانت متوترة اوي من فكرة أنها خلاص مارت المارد مش بنته وبس ، مانامتش الا قرابة الفجر ، أما هو بمجرد ما أخدها في حضنه   ابتسم وكان حابب اوي إحساسه في اللحظة دي حضنها ونام بسرعة 

*************

فريدة كانت هتتجنن بكل معني الكلمة وعزيز بيهدي فيها 

فريدة  بغضب ... مارد يعمل كده مع لمار يعمل كده في بنت من بنات عيلة عثمان اغا 

عزيز ... اهدي يا فريد دا مش كويس عشان صحتك ضغطك عالي اوي 

فريدة ... يتجوز انجل البنت اللي لقاها في الشارع ، أنا مش هاسكت 

عزيز بص لفريدة وقال ... ليه عايزة تعاقبي مارد علي غلطتي أنا ،ليه بتشوفيني في مارد 

فريدة عيطت ... لانك مش حاسس بحاجة

من يوم ما اتجوزتني عمري ما حسيت انك بتحبني وكنت ساكتة وراضية ، كان نفسي اجيبلك طفل يمكن تحبني بس مع الاسف الدكتور قال مستحيل اني اخلف ، بس اكتر حاجه بجد كسرتني حبك لجميلة جميلة قدرت تاخد كل حاجة تخصني حبك و ابنك كل حاجة كانت من حقي بقت ليها ، وبتسألني أنا بعمل كده ليه انا عمري ما قدرت احب مراد لاني بشوف جميلة فيه ، كان نفسي بس احسر جميلة عليه واكرهه فيها عشان كده قدرت اخليه يتحول من مراد ل مارد 

عزيز كان باصص لفريدة بشفقة هو فعلا عمره ما حبها قلبه وروحه وعقله كله مِلك جميلة 

مسك فريدة قربها منه وحضنها وقال ... اششش كفاية كده ونامي 

*********

رغد وهي بتلم شعرها قدام المرايا وباصة لاسلام 

...أنا تقريبا كده حاسة اني جاية من مسلسل هندي ، فهمني بالراحة الله يخليلك عيالك ايه اللي حصل ازاي مارد يدخل القاعة عشان يتجوز لمار يخرج منها متجوز انجل بنته !

اسلام مبسوط أوي باللي حصل فقال لها ... بصي يا روحي اللي حصل دا اسمه القدر يعني زي مثلا تكوني رايحة السوبر ماركت عشان  تشتري اريال للغسالة بتاعتك ف بالصدفة الباحتة فونك يرن بدل ما تاخدي اريال تاخدي برسيل ولما تراوحي تكتشفي دا وتبتسمي بس كده 

رغد بهبلها المعتاد ... يعني انجل هي برسيل اممم اجرب برسيل يمكن بينضف اكتر 

اسلام بيجاريها .. هو دا اللي انا كنت أقصده تعالي بقي كفاية بص في المرايا أنا مش هتعرّف عليكي لأول مرة يا حبي 

رغد وهي بتحط كريم مرطب علي أيدها الله بقي يا ايسو مش لازم اكون حلوة في عينك 

اسلام مسك أيدها وقعدها ع السرير وقال ... انتي أحلي هابلة ف عيني يا قلب ايسو قرب منها يبو*سها واذا بصوت ...

.... ابعد عنها انت  بتعملها  ايه 

اسلام خبط علي وشه بغضب ... حضرتك شرفت يا أخرة صبري ، كنت بحطلها قطرة 

ادم بغضب طفولي رفع صوباعه السبابة قدام وش اسلام وقال ... دي ماتحاولش تيجي جمبها عشان ما ازعلكش وقال لمامته ... تحالي (تعالي ) انا احطلك قطلة (قطرة )وباس خدها ، اسلام كور أيده وعض صوباعه من شدة الغيظ , ورغد ميته ضحك 

************

* في الصبح 

مارد صحي كانت انجل لسة نايمة لأنها مانامتش الا الفجر 

فضل يتأمل ملامحها اللي بتخطف قلبه منه , وغمض عينيه للحظات بيتمني لو ماكانتش بنته ، أو بمعني اصح بيتمني أنه يقتنع أن هو وانجل مش اب وبنته فتح عينيه ومشاعره خا*نته للمرة التانية واتغلبت عليه قرب من شفايفها وطبع قبل*ة طويلة عليهم لدرجة أن انجل بدأت تفوق وتتحرك بين حضنه بعد عنها بسرعة ومثل أنه بيقوم من السرير 

فتحت انجل عينيها وبصت لمارد وقالت بتوهان .. انت عملت حاجة دلوقتي 

مارد اتنحنح وقال ... حاجة ايه ماجيتش جمبك علي فكرة 

انجل بإصرار ... لا أنا حسيت انك ... قاطعها مارد 

....اكيد كنتي بتحلمي 

ردت بإحباط ... بحلم بس ازاي ... دا كان كأنه حقيقي ..اتنهدت بصوت عالي وقالت ... اممم س كان حلم حلو اوي 

مارد قام من السرير واداها ضهره وكان مبتسم اوي 

دخل اخد شاور ولبس خرج كانت نامت تاني 

خرج وقفل الباب وراه بهدوء و نزل تحت 

لقي عزيز في قمة غضبه 

مارد قال بدهشة ... صباح الخير يا عزيز باشا 

عزيز بص لمارد وقال ... سؤال وترد عليه ، انجل قدمت في  كلية الشرطة ولا لا 

مارد اتأفف ... ايوا قدمتلها 

عزيز بغضب اكبر ... تبقي اتجننت رسمي وقدامك اختيار من اتنين 

أما تسحب ورقها من هناك أو تتشاهد علي روحها قلت ايه ......... يتبع 

***************

البارت انتهي اتمني يعجبكم❤️

#البارت دا تعويضا عن امبارح بس ماتنسوش اللاڤ علي البارت ١٢ بالله عليكم 😊

البارت الرابع عشر 

#ملاك_في_رادء_الشيطان 

#إيزيس

عزيز بص لمارد وقال ... سؤال وترد عليه ، انجل قدمت في  كلية الشرطة ولا لا 

مارد اتأفف ... ايوا قدمتلها 

عزيز بغضب اكبر ... تبقي اتجننت رسمي وقدامك اختيار من اتنين 

إما تسحب ورقها من هناك أو تتشاهد علي 

روحها قلت ايه

مارد بص لعزيز بصدمة ، بعدها اتحولت نظرته لتحدي وقال ... ومين بقي اللي هيق*تلها 

عزيز ... الكينج 

مارد بسخرية  ... الكينج بتاعك دا اللي انت بتعمله الف حساب مايهمنيش لا رأيه ولا تهديداته  للسببين السبب الأول هو اني أنا المارد اللي ما بيتلويش دراعه ولا بيخاف من حد ، والسبب التاني انت عارفه كويس هو اني عمري ما اشتركت في الشغل القذ*ر اللي انتوا بتشتغلوه مع بعض 

عزيز بسخرية .. وهو لما تفتح مصنع حديد وصلب قدام الحكومة وتصّنع فيه سلا*ح ، وأسل*حة محذ*ورة وتبعيها لاكبر عصابات المافيا في العالم دا شغل نضيف في نظرك 

المارد مسك سيجارة وحطها في بقه وهو بيقول  .. عارف ببيعها للمافيا ليه عشان يمو*توا بيها بعض ، قام من مكانه وهو بيقول بسخرية  .. أنا رايح مصنع الحديد والصلب بتاعي عندي صفقة حديد محرم دوليا هاصّنعه 

عزيز بإحباط ... مارد 

مارد لف وشه ناحيته 

عزيز .. لو كنت بتحب انجل بجد أبعدها عن كلية الشرطة ، أنا عشان بحب جميلة عملت حاجات كتير عشان احافظ علي حياتها واولهم اني حارمها أنها تخرج برا البيت حتي 

مارد بيتنفس بسرعة من الغضب وقال ... حبك لجميلة هو حب امتلاك استعباد وانا عمري ماهكون كده مع انجل ، سابه وخرج 

عزيز مسك فونه وكلم الكينج 

.... حاولت بكل الطرق بس انت عارفه عنيد ، ارجو انك تفهمه غلطه بهدوء قبل ما تاخد اي قرار ، وارجو أن تمن غلطه ما يكونش حياة انجل 

الكينج ضحك بسخرية وقال .. أزيز (عزيز )أنا شايف انك بتتكلم أن (عن)جميلة الله يرهمه (يرحمه)، بس انت اريف(عارف) اني مش بيرهحم هد (بيرحم حد )قفل في وشه 

عزيز فضل باصص للفراغ وهو بيفتكر اليوم اللي حكم علي جميلة بالاختباء طول عمرها 

فلاش باك

من حوالي ٣٣ سنة 

عزيز واقف قدام الكينج باحترام .. وايه ممكن اعمله  عشان يغفر لها اللي عملته انت عارف انها لسة طفلة يا كينج

الكينج .. أنا مش يهمني سنها ، هي غلط وهيتئاقب(هيتعاقب) ، أزيز اق*تل جميلة قدامي 

عزيز بزهول وصدمة ، اق*تل جميلة

الكينج هز رأسه وقال .. اممم ، هاستني منك فيديو لايڤ لق*تل جميلة أنا هايمشي 

عودة من الفلاش باك 

عزيز فاق علي صوت جميلة وهي بتقول لعزيز بابتسامتها الحلوة .. صباح الخير يا عزيز .

عزيز بص لجميلة شوية وبعدين وقف حضنها كأنه بيقول لها أنا هافضل احميكي 

فريدة كانت نازلة ع السلم فضلت واقفة وباصة لعزيز وجميلة والنار كانت بتاكل قلبها حرفيا 

**************

مارد راح المستشفي لحماصة وعرف منه أن فريدة هي اللي كانت ورا كل اللي حصل وبعدها طلب من الحراسة برضو يفضلوا عنده ، وهو خرج م المستشفي وركب عربيته  وراح هو  المصنع وصل المصنع وراح يتفقد الآلات 

 وقف عند ماكينة شغالة وكل تفكيره ان انجل حواليها خطر كتير  فهل اللي عمله صح ولا لا ، ياتري يسيبها تكمل في كلية الشرطة ويكون طول الوقت خايف عليها ولا يسحب ورقها ويتحجج بأي حاجة عشان يقنعها ما تكملش بس ، المشكلة انه ماكانش لاقي اي حجة 

فجأة الماكينة كانت هتق*طع أ*يده وهو سرحان ، اسلام كان داخل يدور عليه واول ما شافه صرخ ماااااااارد شيل ايدك من ع الآلة علي اخر لحظة مارد شال أيده فانجرحت جرح كبير بس ما انقط*عتش  اسلام جري عليه بقلق و بغضب وخوف كانت أعصاب اسلام تقريبا كلها بايظة وعينيه مدمعة فقاله ...ايه الأهمال دا انت ازاي مستهتر كده ايدك كانت ثانية وهتتقطع انت ايه يا اخي 

مارد كانت أيده بتنز*ف د*م كتير بص لاسلام وابتسم  وقاله ... لسة عينيك بتدمع لما اتئِذي أو انجرح 

اسلام بص له بغيظ وقال ... تصدق انك بارد ، أنا حارق نفسي عشانك وانت بتضحك ، يلا ع مكتبتك هاطهرلك الجرح دا ونوقف النزيف وبعدها هاوصلك ع البيت 

مارد انتهد ... اوك 

اسلام همس لمارد ... هو في عريس بينزل يوم صباحيته شكلك هيبقي عرة اوي هنا قدام مزز المصنع اللي هيموتوا عليك يا ابني ، ايه ما رفعتش راسنا ولا ايه 

مارد بص لاسلام بصدمة وقال بحدة ... انت اتجننت انت متخيل اني ممكن اقرب لبنتي 

اسلام ... وحياة ابوك الكلام دا تقولوا لحد غيري انا اصلا حافظك 🙄، وعلي فكرة أنت مش هتقدر تصمد كتير قدام جمال انچل 

مارد بحدة وعصبية قال بصوت جحيمي .. اسلاااام 

اسلام عمل حركة كأنه بيقفل سوستة بقه 🤐

وصلوا المكتب طهرلوا الجرح وبعدها اخدوا وراحوا القصر 

كانت انجل في الجنينة واول ما لمحت ايد مارد جريت حضنته وهي ماسكة أيده وهي بتقول .. مال ايدك

مارد اتنحنح باحراج وهو بيبعدها عنه وبيقول .. ما تقلقيش 

اسلام ... أحضنها احضنها دي زي مراتك 

مارد بص لمح فريدة في البلكونة بتاعتها قام مرة واحدة حاضن انجل ورفعها عن الأرض بايد واحدة وبا*س رقبتها وهي جسمها اترعش من الحركة دي وهو كان موجه نظره علي فريدة كأنه بيقولها (انق&لب الس*حر علي السا*حر )

 انجل تقريبا في اللحظة دي كان هيغمي عليها من المفاجأة ، مارد نزلها 

واسلام بيقول ... الصلاة ع النبي 

انجل كانت حاسة بدوخة ولسة هتقع قام اسلام سندها وهو بيقول .. اجمدي ما خفيا كان اعظم هههههههه

مارد سحبها منه بغضب وقاله ... تصدق انك بارد ، يلا اختفي من وشي وروح المصنع كمل الشغل 

اسلام غمز لمارد وقاله ... لا للصمود لا للمقاومة وهو بيضحك وركب عربيته وانطلق 

انجل بعدم فهم ... هو اسلام ماله بيقول كده ليه 

مارد بيبص علي عربية اسلام وهي بتبعد وقال ... ما تركزيش شكله طالع من مظاهره 

انجل بصت لايده المجروحة وقالت  ... مال ايدك 

مارد رفع أيده وكان مركز عليها وقال  ... جرح بسيط من الشغل 

انجل .. طب يلا هاخدك الأوضة ترتاح شوية 

مارد .... اوك 

طلعوا الأوضة وفضلوا قاعدين ساكتين وبيبصوا لبعض فمارد قالها انجل ... تعرفي اني معنديش حاجة اخاف عليها غيرك 

انجل ابتسمت وقالت له ... وانت تعرف انك كل عيلتي ومابحسش بالأمان الا وانت جمبي 

مارد قرب منها شوية ومسك وشها بين ايديه وقال ... لو طلبت منك ماتكمليش في كلية الشرطة عشان خايف عليكي هتزعلي 

أنجل مسك أيديه الاتنين وقالت ... انا عندي احلام كتير ،واول حلم منهم كان اني افضل جمبك طول عمري ودا اتحقق الحمد لله ، ولو اختياري لكلية الشرطة هيقلقك طول الوقت عليا خلاص مش هكمل ،انا عارفة انك لو خيروك بين مصلحتي ومصلحتك هتختار مصلحتي أنا بثق فيك لابعد الحدود يا مارد 

مارد كان تايه في كلامها ورقتها أخدها ف حضنه وقال ... انچل انتي اجمل وانقي حاجة ف حياتي 

انجل قالت في نفسها .. أنا بحبك اوي يا مارد ونفسي تحبني ك حبيبتك مش بنتك 

يارب يكون بيحبني 

فضل مارد حضنها كده كتير وبعدها قالت له ... نفسي نخرج نتعشي برا 

مارد باس راسها وقال ... الست انجل تؤمر شاوري انتي بس ع المكان اللي يعجبك ونروح 

انجل ابتسمت وقالت من بين أسنانها ... نفسي تعاملني كمراتك مش كأنجل بنتك  الصغيرة 

مارد بص لها برفعة حاجب وقال ...بس انتي مهما كبرتي هتفضلي بنتي 

انجل لوت بقها وقالت ... ماينفعش تختار اوبشن تاني 

مارد ابتسم بأمل وقال في نفسه( مش هيكون فيه اوبشن تاني يا انجل الا لما أتأكد انك بتحبيني حب حقيقي مش بتحبيني لاني ربيتك أو اتعودتي عليا ،يوم ما أتأكد انك بتحبيني هتشوفي العشق اللي مخبيه في قلبي ليكي  )

انجل ... مارد سرحت في ايه 

مارد بذكاء رد بسرعة .. بفكر يا تري هتدرسي ايه عشان خلاص الدراسة هتبدأ وعايز احول لك علي كلية تانية  

انجل ... اممم انا نفسي ادرس حاجة من الاتنين أما كلية هندسة قسم الذكاء الاصطناعي ، أو كلية تكنولوجيا الصناعة والطاقة 

مارد ... امم حلو بس اشمعني يعني 

انجل بابتسامة ... لاني حابة اشتغل معاك في مصنعك بعد ما اخلص دراسة 

مارد وهو بيلعب في خدها بإيده قال ... يا حبيبي انت تشتغل من غير شهادة ، وبعدين اتنحنح باحراج وقال .. احم يلا ننزل نتغدي 

انجل قربت باست خده وقالت ... اوك 

**********

جميلة كانت قاعدة وسرحانة في تراث القصر تحت عزيز جي من وراها وباس خدها وقال ... كل سنة وانتي اجمل جميلة في العالم كله 

جميلة بصت لعزيز بابتسامة حلوة وقالت ... انت فاكر أن انهاردة عيد ميلادي يا عزيز 

عزيز ... وعمري ماهنسي اليوم اللي اتولدت فيه أغلي إنسانة في حياتي ، قوليلي بقي أمنيتك ايه للسنة دي انتي عارفة أن كل سنة بحققلك أمنيتك 

جميلة بأمل ... امنيتي السنة دي ماتخصنيش  أنا ، تخص مراد نفسي اشوف احفادي من مراد وانجل ونشيلهم أنا وأنت ونلعب معاهم .. بس نفسي في الوقت دا يكون مراد عرف الحقيقة وأن احنا متجوزين علي سنة الله ورسوله 

فريدة سمعت الكلمة دي وحطت إيدها علي قلبها  وبقت بتتنفس بالعافية اتحاملت علي نفسها لحد ما وصلت أوضتها 

بكت كتير كانت حاسة أن قلبها انقسم نصين وبعدين مسحت دموعها وبصت بنظرة كلها شر طلعت فون من دولابها وقالت لازم انتقم من كل اللي الجرح اللي سببتهولي يا عزيز من وقت ظهور جميلة ف حياتك مسكت الفون جابت الواتس وبعتت رسالة ... عندي ليك خبر بمليون جنيه يا كينج عزيز كان بيخدعك طول السنين اللي فاتت .. جميلة لسة عايشة ......... يتبع 

***************

البارت انتهي اتمني يعجبكم ❤️

تكملة الروايه من هنا هنا