 |
جاريتي
الفصل الثالث والرابع
مدونة #موسوعة_القصص_والروايات
كان سفيان يجلس بمكتبه بمقر شركة الحراسه ويجلس أمامه إحدى أفراد الحارسات يتفق معه على العمل الجديد حين رن هاتفه برقم شريكه وصديقه القديم
-أهلاً بالأستاذ إللى مختفى من أمبارح ومعرفش عنه حاجه
ليجيبه صديقه بصوت مرهق
- آسف يا سفيان بس ليا صديق ولدته اتوفت وكنت معاه
ليقف سفيان وهو يقول
- البقاء لله قولى أنت فين واجيلك لو محتاج حاجه
ليجيبه صديقه بامتنان
- تسلملى يا صاحبى أنا فى بلد (...) وجاى بكره ان شاء الله
ليغلق سفيان الهاتف بعد أن طمئن صديقه على العمل وأن لا يقلق على شىء ويركز مع صديقه
جلس مكانه من جديد وأكمل حديثه
كان يجلس فى منزله يضع رأسه بين كفيه وهو يشعر بالخواء فقدان والدته لشئ مؤلم كان زين ينظر إليه بألم على حال صديقه ولكنه يتفهم مشاعره واحساسه فمن يوم أمس وهو معتكف فى بيته ورفض أن يذهب إلى شركته رغم أتصال السيد خالد وسكرتيرته ولكنه لا يجيب على أحد فكان يجيب هو بدل عنه وأخبرهم بحالة الوفاه وأن رئيسهم لن يستطيع الحضور
قال زين بهدوء محاولا إفاقة صديقه مما هو فيه
- أيمن إللى أنت فى ده مينفعش وميرضيش طنط أمل .
ليرفع أيمن نظره إليه ليجد عينيه محتقنه بشده بسبب منع نفسه من البكاء
وقال بصوت ميت
- يرضيها ... وهى لما تسبنى ده يرضيها .... أنا تعبان اوووى يا زين
ليربت زين على قدمه وهو يقول
- أكيد فراقها مش سهل وأنا محترم حزنك .. وخد وقتك بس أنت لازم ترجع لحياتك وتكملها وتنجح ... وتنتقم .
ليقول الأخيره بطريقه موحيه يعلم جيداً ما تأثيرها على صديقه .
لينظر أيمن له بتحدى وقوه .
كانت تجلس بجانب السيد خالد تستمع لكل ما يقوله بتركيز شديد تسأل عما يصعب عليها فهمه والسيد خالد يجيبها بكل هدوء ورويه ... حضرت فرح إليها فى وقت الإستراحه حتى تطمئن عليها
- ملوكه حبيبتى أخبار الشغل أيه
لتنظر لها ملك بحزن ووجه طفولى قائله
- ده أنا نحس من يومى .. أول يوم شغل أم المدير تموت شوفتى نحس أكتر من كده
لتضحك فرح بخفوت فليس من اللائق أن تضحك فى تلك الظروف وقالت
- يا حبيبتى كل واحد فينا وله معاد ... وأنتِ ملكيش دعوه ده عمرها وخلص .
لتلوى ملك فمها وقالت
- ماشى يااختى ... ربنا يستر و مايرفدنيش
لتضحك فرح مره أخرى وقالت
- طيب أيه دلوقتى معاد الإستراحه مش هتروحى تتغدى
لتهز ملك رأسها بلا وهى تقول
- أنتِ عارفه مش باكل غير مع بابا وماما .
لتهز فرح رأسها وقالت
- هعديهالك المرادى علشان لسه جديده بكره ضغط الشغل هيخليكى زومبى
لتضحك ملك وهى تقول
- طيب يلا يا حلوه الحقى روحى أتغدى قبل الوقت ما يخلص وتتحولى أنتِ لزومبى .
لترفع فرح يدها وهى تتحرك لتغادر وقالت
- هبقا أجبلك سندويتش .
وقفت أمام المصعد ولكنه تأخر إذا ظلت فى انتظاره لن تتناول شىء اليوم فقررت نزول السلالم كانت تسير فى الدور الأول للشركه حين لمحت شخص يدخل من البوابه عريض المنكبين وطويل بشكل مبالغ به .... وقفت مكانها للحظات سارحه فى طوله وهيئته المميزه .... وفجاءه تذكرت الطعام فتحركت سريعاً فى نفس اللحظه الذى اقترب منها ذلك الضخم وصدمها لتترنح فى مكانها وكادت أن تسقط لولا يديه القويتين أمسكت بمعصمها ظلت تنظر إليه بصدمه وهو لا يظهر على ملامحه أى شىء وكأنه جماد فاقت من شرودها فى تأمله واعتدلت فى وقفتها ليترك يدها ويقف أمامها بطوله المهيب دون اكتراث لتشعر كم هى قصيره أمامه ولكنها قالت بشجاعه مزيفه .
- مش تفتح يا أستاذ
لينظر لها وهو يرفع حاجبه الأيسر بعد أن خلع نظارته الشمسيه وهو يقول
- مش لما تبقى تبانى من الأرض أبقا أخد بالى
لتشهق بصوت عالى وقد جحظت عينيها وهى تراه يرتدى نظارته من جديد ويمر من جانبها دون إهتمام
لتعض شفتها السفليه وهى تقول
- يخربيت جمال أمك ... وعسل لون عينيك .
موووووز مووووووووز
ليبتسم هو لسماع تلك الكلمات فمن صفاته أنه يمتلك حاسه سمع حاده
وقف أمامها بهيبته التى جعلت اوصالها ترتعش وقال
- أنا جاى من طرف أيمن بيه
لتقول له بصوت ضعيف
- آأمر حضرتك
ليبتسم لها إبتسامه خفيفه حتى يطمئنها أنها شبه الصيصان الصغيره بذلك القصر تشبه تلك المجنونه التى قابلها بالأسفل وقال
- أيمن مش هيقدر يجى الكام يوم الجاين .. بس بعد ما يعدوا عايزك تتصلى بيه وتطلبى منه أنه لازم يرجع الشغل علشان فى حاجات كتير متعطله
تنظر له بتقطيبه جبين ثم قالت بعدم فهم
- ليه .. انا مش فاهمه
ليلوى فمه وهو يشعر أنها من تلك الكائنات الغبيه الذى يكره التعامل معها
وقال بحده
- أيه إللى ليه ... انا بقولك كده علشان ينزل الشغل بدل ما هو حابس نفسه فى البيت
لتبتعد خطوه للخلف بسب صوته العالى وقالت بهدوء
- يا أستاذ أنا بس مش فاهمه حضرتك جاى تقولى أطلبه بعد يومين وانزله الشغل بأى حجه
صمتت قليلاً ثم قالت
- ااااه حضرتك عايزه يخرج برى حزنه ويرجع الشغل .
ليلوى فمه بامتعاض وهو يقول
- اه تمام كده
لتقول له باندفاع
- خلاص متقلقش أنا هخليه ينزل الشغل ومن كتره ميلقيش وقت يروح .
ليضع زين نظارته مره أخرى على عينيه وهو يقول بامتعاض
-كويس ... سلام
لتنظر له ببلاهه ثم حركت كتفيها للأعلى والأسفل وجلست فى مكانها تكمل عملها
كان يجلس فى منزله لليوم الثالث على التوالى فبعد رحيل زين بعد أن ألقى عليه كل تلك المعلومات عن راجى الكاشف وهو يجلس فى غرفة أمه يفكر ماذا عليه أن يفعل هو يريد أن يجد المدخل لكى يكون وجوده شئ طبيعى عليه أن يضع خطه محكمه .... كان عقله يعمل ويرتب الأحداث ويضع كل الاحتمالات ... حتى رن جرس هاتفه ليقطب جبينه بحيره ولكنه اهمله ليعود للصمت من جديد
وبعد عدة دقائق عاد الرنين ليزعجه من جديد أمسك بهاتفه وهو يتوعد من يتصل به
أجاب الهاتف بعصبيه وقال.
- ايوه مين معايا
ليسمع صمت لثوانى ثم نحنحه نسائيه ثم صوت ناعم يقول
- أيمن بيه .
ليقطب جبينه وهو يقول بعصبيه
- مين ؟
ليسمع نحنحه مره أخرى وهى تقول
- أنا ملك سكرتيرة حضرتك
لترتسم إبتسامه ناعمه على شفتيه وهو يتذكر تلك القصيره
التى لم يراها سوى مره واحده .. ولكن تركت أثر كبير به قال بصوت أراده أن يبدو هادئا ولكنه خرج حاد وعصبى
- ايوه يعنى عايزه أيه
ليستمع لصوت الصمت مره أخرى ..وبعد عدة ثوانى استمع لصوتها الهادئ وهى تقول
- أنا آسفه جداً لو ازعجت حضرتك ... بس فى شغل كتير متعطل ....
لتصمت قليلاً حتى شعر بتوترها وكأنها تقف أمامه ثم قال ببرود
- أنا جاى .
وأغلق الخط دون كلمه وعلى وجهه إبتسامه غابت لكثير من الوقت
نظرت إلى الهاتف باندهاش لقد أغلق الهاتف فى وجهها دون كلمه سلام حتى لوت فمها بامتعاض جلست مكانها من جديد ترتب الأوراق التى تحتاج إلى توقيع
مرت ساعه واحده وجدته يدلف إلى المكتب بهيبته وطوله الفارع وقفت سريعاً لينظر لها قليلاً أجلت صوتها وقالت
- حمد لله على السلامه يا أيمن بيه والبقاء لله
ليعتدل فى وقفته ويواجهها وقال
- البقاء والدوام لله وبعدين أيه أيمن بيه دى تقولى باشمهندس أيمن أنتِ مش بتشتغلى عندى فى البيت
لم ينتظر منها رد ودخل إلى مكتبه وهو يقول
- تعالى ورايا
وقفت سريعاً وهى تمسك مفكرتها والأوراق التى تحتاج توقيعه وقفت أمامه
ظل ينظر إليها ثم قال
- كل الورق ده عايز توقيع
لتهز رأسها بنعم ليمد يده لها فوضعت الأوراق بين يديه ليقول لها
- فى مواعيد النهارده
لتهز رأسها بلا
ليضرب على المكتب برفق وقال
- فى مواعيد النهارده
لتقول بصوت ضعيف
- لا يا باشمهندس بس لو تحب اظبط المواعيد من بكره ان شاء الله
ليهز رأسه بنعم وقال
- تمام همضى الأوراق دى وهمشى ومن بكره كل حاجه هتكون زى الأول
ثم اعتدل بجلسته ليسند ظهره لظهر الكرسى وقال
- الأستاذ خالد فهمك كل جاجه
لتبتسم إبتسامه صادقه لذلك الرجل الذى كان طويل البال معها ولم يبخل عليها بمعلوماته وخبرته لتقول
- بصراحه أستاذ خالد مبخلش عليا بأى حاجه ... ويارب أكون عند حسن ظن حضرتك
ليبتسم هو الآخر وقال
- تقدرى تتفضلى دلوقتى على ما أراجع الورق ده وامضى عليه
خرجت سريعاً لتتسع ابتسامته وهو يشعر بداخله بشئ مختلف لم يختبره من قبل
كان يجلس أمام صديقه بعد غياب ثلاث أيام كان سفيان ينظر إليه بتركيز ثم قال
- صاحبك عامل أيه .
لينظر له زين بنظره يفهمها سفيان جيداً .. هو يتعاطف مع صديقه.. وأيضاً يشعر به كما انه يفهم جيداً أن ما حدث جعله يتذكر وفاة والدته هو الأن زين القديم فاقد الحياه بعد وفاة والدته بسببه وكان هذا سبب تركه العمل فى الداخليه تنهد وهو يتحرك من خلف مكتبه ليجلس أمامه وهو يربت
على قدمه قائلاً
- طمنى عليك يا صاحبى
ليغمض زين عينيه وهو يقول بصوت يقطر ألماً
- كويس متقلقش ... لسه عايش بالذنب مموتنيش .
ليقول سفيان بصدق
- زين صدقنى ده عمرها حتى لو إللى حصل وقتها محصلش كانت برضوا هتموت دى كانت ساعتها المكتوبه عند ربنا
ليضرب زين الطاوله التى أمامه بيده وهو يقول بصوت عالى وعصبيه
- ايوه بس تموت موته عاديه يا سفيان ... مش مدبوحه وبسببى .
قال كلماته وهو يلهث بشده وينظر لسفيان بعيون حمراء اثر حبس الدموع ثم وقف على قدميه وقال
- أنا ماشى .
خرج من المكتب بسرعه شديده وكأن الشياطين تركض خلفه ظل سفيان ينظر فى أثره وهو يشعر بالأسى على صديقه المقرب .... ويتمنى أن يجد ما يريحه ويخرجه من تلك الحاله المتبلده التى يعيش فيها
تنهد بصوت عالى وهو يدعوا الله أن يعين صديقه على حاله .. ويرزقه بمن تخرجه مما هو فيه
كان يجلس أمامها فى عاده جديده اكتسبها بعد ما أصبحت له بالكامل
كان دائماً يجلس أرضا ويضع رأسه على فخذها ويظل يتحدث ... ثم يعتدل ليرى عينيها فيرى فيها سعاده كبيره لم تكن موجوده سابقا
ربتت مريم على رأسه وهى تقول
- أنت كويس
ليرفع رأسه وهو ينظر بحب قائلاً
- طول ما انا جمبك كويس .
لتبتسم بسعاده وحب وعشق يزيد كل يوم لا يقل
نظر لها وهو يعتدل فى جلسته ليجلس على ركبتيه وقال
- مريم انا نفسى أسافر معاكى نفسى أعمل شهر عسل
لتنظر له باندهاش وقالت بهدوء
- وأنا كمان نفسى جداً يا عادل
لتصمت قليلاً وهى تجد ملامحه ترتسم عليها السعاده ولكنها لا تستطيع أن تفعل ذلك خديجه ستتألم بشده لتقول بصوت هادئ
- بس قبل ما نعمل كده فكرت فى خديجه ... احساسها هيكون أيه وأنت واخدنى علشان نعمل شهر عسل .
ليظل الصمت بينهم هو سيد الموقف حتى قال
- أنا عارف أنك خايفه على شعورها .. لكن كمان من حقك تخرجى وتتفسحى أنتِ من أكتر من عشرين سنه مخرجتيش.... ولا شفتى الشارع ولا طلبتى حاجه لنفسك .... حتى أنا كنتى مكتفيه منى بساعه واحده فى اليوم ..... حتى البيت شوفى شقه خديجه فوق ... وشوفى شقتك.
لتضع يدها على فمه تمنعه من أن يكمل كلماته التى تألمه بشده ... وابتسمت وقالت
- كل ده مش مهم قدام أنى أكون معاك وجمبك .... وفى حضنك .
ليبتسم بحب وهو يقول
- أنا عايز أسعدك يا مريم .. أنتِ اتظلمتى كتير
لتقبل جبينه بأحترام وحب وهى تقول
- وأنت أحلى عوض عن كل الظلم ده ... ومش عايزه غيرك.
ليحنى رأسه يقبل يديها بعشق خالص لم ينتهى يوماً ولن ينتهى ثم رفع عينيه إليها قائلاً
- مكانك فى قلبى ..... أنتِ سر روحى ... نبض قلبى ... دمى إللى بيجرى فى وريدى .
ثم أمسك يدها ليضعها على قلبه قائلاً
- قلبى ده بيدق بأسمك ويوم ما أموت هيفضل يدق بردوا بأسمك
لتحضتنه بقوه وهى تقول
- ربنا يخليك ليا .. متقولش كده مقدرش أعيش من غيرك ... وبعدين أنت ناسى الولاد .... محتاجينك يا عادل .
ليبتسم وهو يقول
- ديما سيرتهم بنا عمرك ما بتنسيهم هما عندك أهم من نفسك ... أنتِ قلبك كبير اووووى يا مريم ... بس بمناسبه قلبك الكبير ده تعالى جوه لما اقيسه كده واشوفه بقا قد أيه .
قال الأخيره بمشاغبه وغمز لها لتضحك بشقاوه وهى تسير خلفه وقلبها ينبض بأسمه مع كل نبضه .
الفصل الرابع
عاد إلى منزله بعد أن أنتهى من توقيع على تلك الأوراق وهو يبتسم كم هى مرتبه ومنظمه
وشعر كم هى تفهمه وشعر أيضاً بمجهود السيد خالد معها وتفهمها السريع لكل أوامره
حين قرر المغادره وقف على باب مكتبه ينظر إليها وهى منهمكه مع مكالمات كثيره لتحديد مواعيده ابتداء من الغد وقف أمامها وطرق على المكتب لتنهى المكالمه وهى تقف أمامه تنظر إليه قال
- أنا عايز المواعيد الأسبوع ده بس ونبقا نشوف الأسبوع الجاى أيه إللى هيحصل
لتهز رأسها بنعم ليقول لها
- مش سامع ..... أنا مش بحب أتعامل مع ناس خرس
لتقول بخفوت
- حاضر يا أيمن بيه
ليرفع حاجبه لتقول سريعاً
- يا باشمهندس .
ليهز رأسه بنعم ثم غادر سريعاً
آفاق من أفكاره على صوت هاتفه ليجده زين
أجابه سريعاً قائلاً
- طمنى أرجوك
ليستمع لصديقه لدقيقة كامله ثم قال
- خلاص الأسبوع الجاى هكون عندك .
كان السيد رشاد الشهاوى يجلس فى مكتبه ويقف أمامه إحدى موظفيه قائلاً
- بقول لحضرتك ده شخص داهيه ... دماغه سم ده غير أنه عبد القرش .... القرش أبوه وأمه
ليهز الشهاوى رأسه بنعم وهو يسأل
- وهيجيلى أمتى ؟
ليقول ذلك الموظف
- الأسبوع الجاى علشان فى إيده شغلانه كده بيخلصها .
ليقول له الشهاوى وهو يقف لينظر إلى النافذه
- تمام ... أتمنى يحققلى انتقامى وهديله كل إللى هو عايزه .
كان السيد راجى يجلس فى مطعم فخم حين جلس أمامه شخص ما نظر إليه السيد راجى باندهاش وتعالى .... وقال
- أنت مين وأزاى تقعد قدامى كده على طول من غير ما تاخد الإذن
ليضحك ذلك الشخص بصوت عالى ثم قال
- أنا جايلك برساله ... ياريت تسمعها وتفهمها .
لينظر له السيد راجى بغل وكره ولكنه رفع حاجبه بتعالى وقال
- قول إللى عندك وامشى
ليبتسم الآخر باستهزاء ثم قال
- الشهاوى باشا بيسلم عليك .. وبيقولك خاف على بنتك ...مش معنى أنك رمتها لكلبك أنها كده بعدت عن إيده ... لا ده كده قربت اوووى .
ليقطب السيد راجى حاجبيه بقلق ولكن ذلك الرجل رحل دون كلمه أخرى
لينقبض قلب السيد راجى خوفاً على ابنته .. أنها ما تبقت له ... يعلم أنه أهانها وألماها كثيراً لم يحبها كما ينبغى .. ولكنها ابنته الوحيده ... وهو والدها مهما فعل ليقف سريعاً ليصعد إلى غرفته ليتصل برؤوف الذى أجاب من فوره ليهدر به السيد راجى سائلاً عن ابنته
ليجيبه أن الأمور جميعها مستقره وهى لا تخرج بمفردها ابداً
ليهدء قليلاً ولكنه طلب منه أن يحاول الوصول لسفيان بأسرع وقت مع اندهاشه من عدم قدرته للوصول لسفيان
مر يومان كان أيمن يقوم بكل الأعمال المفترضه حتى يستطيع السفر الأسبوع القادم وكانت هى تركض فى كل الاتجاهات
كانت تشعر بالتعب ... ولكن لا وقت للراحه حين دلفت إلى المكتب بمرحها المعتاد وهى تقول
- وقت البريك يا قمر
لتنظر لها ملك بشر وهى تقول
- فرح ابعدى عنى أنا مش طايقه روحى
لتضحك بصوت منخفض وهى تقول
- خلاص يااختى أنا نازله رايحه اتغدى .
لتتحرك سريعاً لتغادر الشركه بمرح لتصطدم بشخص ما لتترنح من أثر الأصطدام وهى تقول بصوت عالى
- مش تفتح يا أعمى .
ليقول بصوت هادئ وبارد
- أعمى ده ليا أنا ..... أنتِ إللى المفروض تفتحى مش أنا
لتصرخ فى وجه بعصبيه وتقول
- يعنى غلطان وبتقاوح
لينظر لها بغضب وهو يقول
- متعليش صوتك عليا يا بت أنتى
لتحرك يدها فى الهواء وهى تقول بصوت عالى
- أنا أعلى صوتى براحتى مش كفايه راسى إللى جالها ارتجاج
لينظر لها بشر وهو يقول
- يا بنتى اتقى شرى ومتعليش صوتك عليا تانى
لتقول له بزدراء
- هتعمل أيه يعنى أنا ما بتهددش
ليخرج مسدسه و هو يقول بعد أن فتح صمام أمانه
- اتهدى بدل ما اخرسك للأبد
لتنظر له بصدمه وتقول وهى تضحك بسماجه
- هو حضرتك خلقك ضيق ليه بس يا باشا أنا ساكته أهو هو أنا اتكلمت أصلاً
لينظر لها باشمئزاز ورفع حاجبه قائلاً
- واضح أنك ساكته ناس جبانه .
ومر من جانبها كالمره السابقه ولكن فضولها جعلها تتبعه لتجده يتجه إلى داخل الشركه و مباشراً لمكتب المدير
وقفت تفكر قليلاً وابتسمت بسعاده وقت اطمئنت الأن ستعرف عنه كل شىء .
عادت إلى مكتبها دون تناول الغداء وهى تفكر فى صاحب العيون الرماديه الغامضه... فرح فتاه بسيطه من عائله متوسطة .... تسكن فى حى قريب من الحى الذى تسكن به ملك ورغم ذلك حالهم أفضل من حال أسرة ملك بمراحل حيث الأب موظف حكومه درجه أولى والأم تعمل موظفه فى الشهر العقارى ...وليس لديهم سوى فرح وكان لها أخ أكبر منها ولكنه توفى على أثر حادث سياره كبير ولذلك أصبحت كل شىء لوالديها يخافان عليها بشده ... وهى دائما تتكلم بمرح حتى ترفه عنهم ..... فرح فتاه متوسطه الطول بيضاء بشعر بنى وعيون تشبه لون شعرها الطويل الذى يصل إلى ركبتيها .....ولكنها تخفيه أسفل حجابها
جلست على مكتبها وهى تفكر ....كيف ستتحدث إلى ملك بخصوص ذلك الشخص
كان يجلس أمام أيمن الذى يهز قدميه بتوتر وهو يقول
- يعنى حضرتك وصلتله معلومه أنى واد مخلص و لبط ومليش غير فى الشمال ... و أبويا القرش وأنا المفروض أعمل كل ده صح .
ليهز زين رأسه بنعم دون اكتراث
ليقف أيمن وهو يقول
- ولو طلب بقا منى حاجه غير قانونيه أعمل أنا أيه ساعتها .
ليتنهد زين بنفاذ صبر وهو يقول
- أنا وأنت هنكون على تواصل .. ولو حصل وطلب منك شىء غير قانونى أنا ليا اصحابى القدام فى الدخليه هنتواصل معاهم علشان كل حاجه تكون فى السليم
ليضع أيمن رأسه بين كفيه فى هم
ليربت زين على ركبة صديقه وهو يقول
- أيمن لازم تكون قوى بارد ... لازم تظهر حقدك و كل الغضب إللى جواك خليه هو إللى يحركك وأنا فى ظهرك متخافش
لينظر له أيمن وهو يقول
- شكراً يا زين ... مش عارف من غيرك كنت هعمل أيه ... صمت قليلاً ثم قال
- لسه معرفتش حاجه عن أختى
لتتوتر نظره زين للحظه لم يلاحظها أيمن ولكن زين أجابه ببرود
- لأ لسه ... بس متقلقش أنا مهتم بالموضوع .
عم الصمت على الصديقين وكل يفكر فيما يخصه
أيمن يشعر بالقلق من تلك الخطوه ... هل سينجح أن يقنع الشهاوى بنفسه ويجعله يثق به .. وهل سيستطيع أن ينتقم من الكاشف ويأخذ حق أمه
وزين كان عقله يدور فى كيفيه أخبار صديقه عن ما يعرفه عن أخته .... هو يخشى رد فعل أيمن .. ويخشى أكثر من رد فعل سفيان صديق دراسته الذى يحفظه ككف يده
كانت جالسه معه فى صالون منزلهم تمسك بكتاب ضخم وهى تقول
- هو أنا كان لازم أحبك يعنى وأحب أبقا مهندسه زيك ده أيه الغلب ده .
ليضحك بمرح وهو يقول
- أنتِ مهندسه فاشله ... كان المفروض تدخلى كليه بيت العدل لو كنت أعرف أنك واقعه كده كنت اتجوزتك من زمان وريحتك .
لتضربه على قدمه وهى تقول
- بقا كده يا صهيب ....ماشى أنا زعلانه منك على فكره
ليبتسم وهو يقول
- مقدرش على زعلك وأنتِ عارفه وبعدين بهزر معاكى أيه مابتهزرش يا رمضان
لتضحك بقوه وهى تقول
- الله يا صهيب أنت بقيت بتقلش .
ليضحك هو الآخر وهو يقول
- بسبب معرفتك
قطع حديثهم رنين هاتفه ليمسك به وهو يستمع لصوت هاتفه ينطق أسم جواد
قال بمرح
- يا أهلا يا أهلا بصاحبى حبيبى
ليضحك جواد بقوه وهو يقول
- شكلى كده هتعلق على السقاله
ليضحك صهيب وهو يقول
- والله على حسب .. يعنى لو سبب غيابك مقبول يبقا خلاص سماح
ليقول جواد بصوت عالى
- بقيت عم يا صهيب وأنا بقيت أب .
لينتفض صهيب واقفا وهو يقول
- بجد يا جواد ميما ولدت ألف مبروك يا صاحبى
ليقول جواد بفخر
- الحمد لله الله يبارك فيك عقبال عندك .
ليضحك صهيب وهو يقول بصوت اجش
- امين يارب .... وياترى بقا بقيت عم لبنت ولا ولد
ليقول جواد بفخر .
- بقيت عم للأستاذ صهيب جواد الهاشم .
ليصمت صهيب لبعض الوقت لا يستطيع أن يتكلم مد يده لتمسكها زهره وهى ترى تقلب حالته وهى تقول بهلع
- مالك يا صهيب
ليقول لها بصوت متحشرج
- جواد بقا أب .... ربنا رزقه ب..... بصهيب جواد الهاشم
لتدمع عيناها سعاده وهى تجثوا أمامه على ركبتيها وهى تقول
- بجد ده خبر حلو اوووى ... ألف مبروك
لتستمع لصوت جواد على الهاتف وهو ينادى على صهيب
- يا ابنى أنت رحت فين
لتمسك الهاتف قائله بهدوء
- السلام عليكم أستاذ جواد
ليشعر جواد بالحرج قليلاً ولكنه اجابها
- وعليكم السلام .. هو صهيب راح فين .
لتقول وهى تربت على يد صهيب بحنو
-أولا ألف مبروك على البيبى وربنا يباركلك فيه قدامى أهو بس هو مش مصدق أنك سميت صهيب .
ليضحك جواد وهو يقول
- أولا الله يبارك فيكى وعقبالكم ان شاء الله وممكن تفتحى مكبر الصوت
لتنفذ زهره ثم تسمع صوته وهو يقول
- صهيب الصغير مستنى تأذن فى ودنه يا عمو أحنى فى مستشفى« ......» مستنيك.
وأغلق لتقول زهره سريعاً و توقفه على قدمه
- يلا بسرعه ... عايزه أروح أشوف النونو .
كان صهيب يمسك صهيب الصغير وهو يشعر أن قلبه يضرب بقوه لا يستطيع وصف شعوره الأن كانت زهره تنظر إليه بأبتسامه سعاده وهى تعرف جيداً ماذا يعنى له هذا الطفل وأن صديقه يسمى ابنه الأول بأسمه لشئ كبير بالنسبه له
اقتربت منه وامسكت يد الصغير وقبلتها وهى تقول
- ماشاء الله زى القمر ... ربنا يبركلكم فيه
لتقول ميما بارهاق واضح
- امين يارب عقبالكم ان شاء الله
لتأخذ زهره الصغير من صهيب وهى تقبل رأسه مره أخرى وتشم رائحته الرائعه لتضعه فى سريره وهى تقول
- حمد الله على سلامتك أنتِ والبيبى ويارب يكمل نفاسك على خير .
ثم اقتربت من صهيب وهى تقول
-خلينا نمشى علشان ميما ترتاح .
ليهز رأسه بنعم وهو يقول
- مبروك البيبى يا ميما و أتمنى تكون أب كويس لصهيب يا جواد .
ليقترب جواد وهو يقول
- مش هربيه لوحدى يا عمو
ليضحك صهيب ويربت على كتف صديقه ويغادر
حين اقترب جواد من زوجته وجلس بجانبها وضمها إلى صدره بقوه وهو يقول
- الحمد لله أنك أنتِ وهو بخير ربنا يخليكوا ليا .
لتغرق وجهها داخل صدره وهى تقول
- نفسى أنام
ليربت على ظهرها وهو يقول
- ارتاحى حبيبتى ارتاحى .
لتغمض عينيها وهى تخبئ وجهها فى صدره وتذهب فى نوم عميق ليبتسم فى سعاده
البارت الخامس من هنا هنا
تعليقات
إرسال تعليق