 |
سكريبت❤بقلم سولييه نصار❤كامل
#قلب_معذب
#سولييه_نصار
-مبروك جاتلك بنت .
قالتها الممرضة وهي مبتسمة فصرخ بصدمة :
-ايه بنت !!!!
وشه احمر لدرجة أن الممرضة خافت منه وقالت:
-تقدر دلوقتي تشوف مراتك ..
دخل حسين عليا الأوضة اللي حطوني فيها بعد ما ولدت ...وشه كان احمر من الغضب وانا كنت مرعوبة منه اووي ..بص لبنتنا بعصبية وبصلي انا
...كنت عارفة نفسه في ايه دلوقتي ...نفسه يق*تلني ويق*تل بنته ...بس متكلمش ...
مرت الساعات والدكتور كتبلي خروج وخرجت وانا مرعوبة من اللي هيحصل في البيت ....
اول ما دخلت بيتي ...اختي دلال حضنتني وقالت:
-مبروك يا وعد
حضنت اختي وانا خايفة
-معلش يا دلال عايز اقعد مع مراتي شوية ....انزلي عند امي تحت عشان تجيبي الاولاد والحاجة وتطلعوا
بصتلي دلال بتوتر فهزيت راسي فخرجت ....سيب البنت علي السرير بتاعها وانا متوترة
-انتي كدبتي عليا
زعق جامد
- البنت يا حسين بقلم سولييه نصار
-طظ فيها
مسكني من ايدي جامد وقال:
-قولتي ان الدكتورة قالت ولد مش بنت !!
- خوفت ..خوفت منك قولت لما تيجي هتحبها
-احب ايه مش كفاية خلفتك كلها بنات جيبالي اربع بنات اعمل بيهم ايه
-استغفر ربك يا حسين انت راجل متعلم وعارف أن ده مش بإيدي وكل اللي يجيبه ربنا كويس
مسك شعري وصرخ :
-انتي فاشلة يا هانم ...فشلتي تجيبي الولد اللي اتمنيته وطلبته من ربنا ...حاجة زي دي فشلتي فيها وكمان بجحة كدبتي عليا وعايشتيني في أوهام ان اللي في بطنك واد
- انا كنت
-كنتي ايه يا شيخة ...قرفتيني كان يوم اسود يوم ما اتجوزتك ...لا نافعة ولا شافعة ...انا بكرهك يا وعد ...بكرهك وبندم علي اليوم اللي اتجوزتك فيه ...
وبعدين زقني ...مسكت بطني وانا بعيط وقعدت علي الأرض
-يارب تم*وتي يا شيخة عشان ارتاح منك ومن قرفك حتة واد مش قادرة تجيبه يا فاشلة ...هتفضلي طول عمرك فاشلة...زوجة فاشلة وام فاشلة وست فاشلة ...احمدي ربنا اني عارف ربنا ومش هطلقك ....
الباب خبط جامد ...فتح حسين الباب ولقي امه ودلال مخضوضين
طلع من البيت من غير كلام ...جريت امه علي البنت ودلال جات حضنتني وهي بتبكي ...
.......
مرت الايام وحسين رافض يتكلم معايا ...حتي رافض يشيل بنته ...بس في يوم جه بعد ما مشيت دلال وقال:
-اعملي حسابك بكرة تلبسي كويس وتيجي معايا مشوار
بصيتله بحيرة وانا بقول بخوف انه يطلقني:
-مشوار ايه يا حسين ...اوعي تكون ناوي تطلقني انا ...
-لا مش هطلقك طبعا
-اومال ايه اجي فين وانا لسه والده من ايام وتعبانة
بان في عينيه الغضب وبصلي وقال:
-هتيجي معايا عند بيت استاذ فكري هخطب بنته سها وانتي هتكوني حاضرة!!!!
يتبع
الجزء التاني ❤شكرا على تفاعلكم السكر❤بقلم سولييه نصار❤
-انت اتجننت صح ؟!!
قولتها وانا منهارة وبعيط ....جسمي كان بيترعش بش هو كان بيبصلي ببرود شديد وكأن انهياري ميعنيهوش اصلا ....
-ها خلصتي مناحة
بصتله بإنكسار فقال :
-انا هنزل اجيب علبة شوكلاتة وجاتوه عشان عيب ندخل علي الناس وايدينا فاضية وانتي جهزي لبس كويس عشان نروحلهم بكرة من غير تأخير ...
وببرود لف وكان هيمشي لما صرخت وقولت:
-لو اتجوزت يبقي تطلقني انا مش هقبل بضرة
بصلي بإستغراب بعدين قعد يضحك .....كنت مصدومة وانا بشوفه بيضحك بهيستيرية شديدة ...بلعت ريقي وجسمي بيترعش ...قرب مني وقال بتريقة:
-لا والنبي متبينيش...وعد انا هم*وت لو طلقتك....حياتي هتقف...
بعدين ضحك تاني وزعق:(بقلم سولييه نصار)
-ما في داهية يا حبيبتي ...ده يوم المني يوم ما اطلقك والله واخلص من واحدة زيك
رجعت لورا وانا ببكي فقال :
-بس يا تري عندك استعداد تترمي في الشارع انتي وبناتك ...عندك القدرة المادية انك تبعدي وتبقي مسؤولة عن البنات ...انا هديكي حقك ...هأجرلك شقة عشان زي ما انتي عارفة ان دي بتاعة اخويا وهديكي نفقة ومؤخر مبلغ ٢٠٠٠جنية وده مقدرتي ...انتي بقا تتشالي وتتدقي وتحاولي تتدبري نفسك ...بس يا تري الفلوس دي هتكفي ايه ولا ايه ...هتكفي الاكل ولا الشرب ولا المدارس ولا ايه ...وانتي يا عيني يتيمة ملكيش حد ده انتي حتي مجبتيش قشاية في البيت انا اللي صارف ومكلف ...لميتك وسترتك ومدفعتيش مليم بدل ما تشكريني بتعامليني كده ...
مسكني جامد وقال:
-انتي ناكرة للجميل....عايزة تغوري خدي بناتك وغوري وهتكتفي باللي هرميهولك وتخرسي خالص وانا هعيش مع مراتي الجديدة ...واحدة تقدر تجيب الواد ....قوليلي يا وعد ها نبدأ إجراءات الطلاق ولا لا
دموعي نزلت انا وحيدة اهلي ماتوا مليش حد ...دماغي حسيتها هتنفجر ....كنت بفكر في عيالي ...انا معييش شهادة يعني مش هقدر اشتغل ...٢٠٠٠ جنية دي مش هتكفي ابدا ...عيالي هيجوعوا...وانا مش هقدر اعمل فيهم كده ...بصيت لحسين بكره ...اول مره اكرهه بالشكل ده ....هو مسكني من ايدي اللي بتوجعني وهما ولادي....مسحت دموعي وهزيت راسي وقولت:
-عقبال ما تيجي هكون جهزت اللبس وكويتلك هدومك
ابتسم بنصر وقال :
-بحبك لما تكوني مطيعة يا حبيبتي
وبعدين سابني ومشي ...انهارت علي الأرض وانا بعيط جامد ...قلبي كان واجعني ...متخيلتش يعمل فيا كده ...ك*سرني ودمرني...بس لا انا مش هستسلم هلاقي طريقة اتطلق مستحيل ابقي علي ذمة واحد زيه
........
تاني يوم ...
كنت واقفة قدام المرايا بضبط نفسي ....كانت ملامحي باردة ...مفيش دموع في عيني ...جه حسين من ورايا ومسك كتفي وقال:
-صدقيني يا وعد مش هيتغير حاجة انتي هتبقي حبي. الاول حتي لو فيه غيرك ...صحيح قاسي معاكي بس بحبك ....
ابتسمت ببرود وقولت:
-عادي ولا يهمك .
رجع وحسيته استغرب بس معلقش...لسه هيتكلم سبقته وقولت :
-يالا عشان منتأخرش علي الناس
........
في بيت سها
كنا قاعدين مع سها واهلها....كانوا بيبصولي من فوق لتحت بس انا كنت باردة ...كان لازم اكمل للاخر...
اتكلمت ام سها :
- انا طبعا موافقتش علي حسين الا لما قالي انك موافقة علي ضرة ليكي...صحيح بنتنا مش ناقصة عشان تدخل علي زوجة اولي بس القلب وما يريد...
-كتر خيركم طبعا وانا بحترم امانتكم دي
حسين استغرب...انا كنت باردة ورسمية اووي معاهم ...مكانش باين عليا القهرة ولا الحزن وده جننه...اي راجل بيحب يحس انه محور الكون ...حزني وضيقي وغيرتي بيغذي غروره بس انا قررت أن احر*قه بنفس النار اللي كان عايز يحرق*ني بيها
ابتسمت وقولت؛
-طبعا انتوا عارفين احنا جايين هنا ليه ...حسين هو جوزي وحب حياتي وانا اتمناله الخير حتي لو كان علي حسب سعادتي...وانا طبعا مش هلاقي اجمل من سها بنتك تبقالي ضرة عشان كده انا ونيابة عنه بطلب ايد سها لجوزي ...
كان حسين مصدوم ....كملت وانا برمي سهمي الاخير:
-وبما أننا ناس بنفهم في الاصول والعدل فنتكلم عن المهر ...حسين جوزي هيدفعلكم مهر ١٥٠ الف جنية
-اييييييييه ؟!
قالتها ام سها بصدمة فلطم حسين فتكلمت بسرعة وقولت :
- لو سمحتي يا مدام ده اخر كلام احنا مش هنزود مليم تاني ..ايوة انا زوجة أصيلة ومرضاش ان جوزي يدفع كتير مش كفاية يا حبة عيني الشبكة ام خمسين ألف اللي هيجيبها للمحروسة!!!
لطم حسين وقال:
-يالهوي يالهوي اتخرب بيتي !!!!
يتبع
الجزء التالت ❤شكرا على تفاعلكم السكر❤بقلم سولييه نصار❤
ميل حسين عليا وقال بصوت خايف :
-اهدي يا وعد عليا وحيات عيالك
-بتقول ايه مؤخر نص مليون مش شايفه كتير شوية ....
وشه احمر واتوتر...اهل سها بصوله بطمع فضحكت وانا عاملة نفسي مكسوفة وقولت:
-اكيد مش قصدي اقلل من بنتكم سها بس نص مليون مبلغ كبير. شوية نخليها ربع مليون حلو اووي وكمان سها بنتنا مش مطلوب انها تجيب قشاية في البيت ....
طبطبت علي كتف حسن وقولت:
-حسين الله يباركله عمل كده معايا مخلنيش اجيب حاجة بالعكس البيت وتجهيزه حتي هدوم العروسة عليه...وسها مش اقل مني ولا هسمح ان ضرتي تبقي اقل مني انا ست اعرف ربنا كويس
ابتسم أبو سها وقال :
-واحنا موافقين علي كل حاجة في الاول والآخر بنشتري راجل بقلم سولييه نصار
ابتسمت بحماس وقولت:
-يبقي نقرا الفاتحة
-نقرا الفاتحة
فجأة سمعت خبطة ولقيت حسين اغمي عليه
-يالهووي ماله
قالتها ام سها وهي بتلطم
-مفيش يا حاجة ده مات....قصدي اغمي عليه من الفرحة !!
.........
في بيتنا ...كنت قاعدة علي السرير وحسين كان بيلف حوالين نفسه وبيزعق:
-بتورطيني يا وعد بتلوي دراعي
بصتله وقولت ببراءة :
- انا يا حسين اخص عليك بجد ...الحق عليا اني رفعت من قيمتك قدام ناس خطيبتك ...انا روحت رغم حرقة قلبي واتقدمت لواحدة ...طلبت واحدة تاني لجوزي غيري ...مين ترضي بكده وفي الاخر ابقي غلطانة...
-عاملة نفسك بريئة يختي انتي خربتي بيتي مهر ايه ده اللي ١٥٠ الف انطقي...انا ادفع المبلغ ده كله في دي
-الله مش هي انسانة وهتتجوزها يبقي ادفع مش قد الجواز متتجوزش
-انتي بتلوي دراعي يعني ايه رايك بقا هكمل في الجوازة دي لا انا لا انتي بقا ...
-براحتك .
قولتها وانا بهز كتفي ...بعدين قعدت العب في تقي بنتي الصغيرة ...قرب مني وقال:
-بس كنت محتاج الشبكة بتاعتك ابيعها عشان تساعد في مصاري الفرح وكده ووعد اجيبلك احسن منها بعدين
- كان علي عينننني يا حسين معرفتش انت
-عرفت ايه
-اصلي بعتها
-ايه ...بعتي شبكتك بعتيها ليه وازاي تبعيها من غير اذني ...جوزك انا يا هانم ولا كيس درة
- لا انت كيس دره
-ايه ؟!!!
-اقصد يعني ان دي كانت هدية منك صح وانا من حقي اتصرف فيها ...بصراحة اتزنقت وبعتها
-اتزنقتي في ايه ان شاء الله
-اونلاين
-نعم يختي
-جيبت حاجات اونلاين ...كتيرة اووي وتافهة والمبلغ كان كبير خوفت اقولك
-قوليلي حاجات ايه اللي جيبتيها بالمبلغ ده انطقي
-جيبت هدوم كتير لتقي لما عرفت انها بنت ...وجيبت غسالة أطباق ....وجيتلي اربع فساتين للمناسبات وسرير لتقي وبطاطين ليها والصبارة الراقصة
-الصبارة اييييييه
-الراقصة يا بيبي
-صرفتي فلوسك علي الصبارة الراقصة ...
-حاجة بتبسطني
-انتي عايزة تفهميني يعني ان الصبارة الراقصة دي بتبسطك
-متعرفش انت الصبارة الراقصة دي بتعدل مودي ازاي
-ماشي يا وعد هسيبك تلعبي براحتك بس وديني هيجي يوم واقفشك وساعتها قولي علي نفسك يا رحمان يا رحيم....وبعدين سابني ومشي
..........
تاني يوم روحت عند اختي واخدت منها علبة دهب شبكتي وقولت:
- مش عارفة اشكرك ازاي
-انتي هبلة يا وعد احنا اخوات يا بت المهم هتعملي ايه مع النطع جوزك هتبوظي جوازته
- لا خليه يفرح هو كده كده مبقاش يهمني انا بس عايزة طريقة أقف علي رجلي بسرعة بيها عشان اخلع منه
- طيب هتعملي ايه
-هقولك!!
.......
بعد شهرين كان حسين جاب شبكة لسها وعملوا خطوبتهم وطبعا انا حضرتها افتكرت اني لما احضر خطوبة جوزي هبقي مقهورة بس العكس انا مكنتش حاسة بحاجة كل اللي قلقانة منه ايه اللي هيحصل بكرة ...
......
تاني يوم ....
الباب خبط فقلبي خفق بسرعة ...فتح حسين فلقي ساعي المحكمة
-خير
- انت حسين السيد
-ايوة انا
-اتفضل ده طلب خلع مقدم فيك من مدام وعد مراد
-خلع!!!!
يتبع
الجزء الاخير❤شكرا على تفاعلكم السكر زيكم❤بقلم سولييه نصار❤
اخد منه الورقة وهو مصدوم بعدين قرب مني وقال:
-ايه دي يا وعد
-ورقة خلع
-وحيات امك
جريت فجري ورايا
-اعقل يا حسين
-انتي خليتي فيا عقل ....عايزة تخلعيني
-طيب ما انت عايز تتجوز عليا ولا هو حلال ليك وحرام ليا ...انا مبقتش احبك ومش عايزة اعيش معاك انا حرة يا اخي هو ايه عافية
- من امتي الكلام ده
- من وقت ما بعتني يا حسين ...انا اخدت قراري خلاص مش عاوزاك لا انا ولا بناتي
ضحك بتريقة وقال :
-خلع يعني تنازل عن حقك
-تغور الفلوس اللي تيجي منك مش عاوزها
-ايه هتشحتي انتي وبناتك
-اشحت مش مشكلة بس مش هخضع ليك يا حسين ...متقلقش هلم شنطة هدومي واطلع من هنا ومش هتشوف وشي وانت اتجوز اللي هتجيبلك الواد
لسه همشي من قدامه مسك ايده وقال:
-انتي شايفلك شوفه تانية ولا ايه
بصتله من فوق لتحت وقولت:
-مش كل الناس زيك يا حسين ...وخف ايدك شوية احنا. دلوقتي بينا قواضي اكيد مش عايز ان بدل قضية الخلع يبقي جناية ...
سابني فابتسمت ومشيت ....
جهزت هدومي وهدوم بناتي ومشيت...روحت علي بيتي اللي اتأجرته واللي اشرفت دلال عليه
-حلو اووي يا دلال تسلم ايديكي قوليلي لو دفعت حاجة من جيبك عشان اردها
-بطلي هبل يا بت بعدين ما شاء الله يختي الفلوس اللي اديتهاني فضل منها كمان ...ما شاء الله يا حبيبتي مشروعك بيكسب اووي احنا في فترة بسيطة قدرنا نأجر بيت ولو استمرينا كده هنشتري شقة كمان
-الحمدلله يا دلال ...مكنتش غلطانة لما بعت دهبي واشتريت محل للحلويات الشرقية والجاتوهات.
-انتي طلعتي ذكية
-والله الموضوع جه صدفة يا دلال ....صديقة عملت ليها تورتة لعيد ميلاد بنتها وكانت حلوة والخبر انتشر وبقيت بعمل اوردرات كتير وطبعا حسين لانه مشغول بسها مخدش باله ...
-صحيح انتي هتخلعيه يا وعد
-ايوة يا دلال
-طيب اديله فرصة تانية
هزيت راسي وقولت:
-مبقتش قابلاه....ده كاره بناته في حد يكره نعم ربنا ده هما المؤنسات الغاليات مفروض يكون حامي ليهم مش العكس ...ده عايرني بحوجتي ليه حسسني انه متفضل عليا شخص زي ده ملوش امان ابدا يا دلال ...بس انا كسبت قدرت أقف علي رجلي وورطته ورطة حياته ...انا دلوقتي استقليت بنفسي معايا قرشي يبقي لا حسين ولا غيره يقدروا يذلوني
.......
مرت الايام وحسين بيحاول يصالحني بس زي ما قولت انا قفلت منه خلاص ...احيانا بنغفر لشخص اكتر من مرة لأننا بنحبه واللي بيحب بيسامح بس ممكن فجأة نقفل من الشخص ده ...حبه في قلبنا يروح ومعزته تختفي ...ساعتها بيبقي شخص عادي ...ومبنكونش اصلا لينا مشاعر ناحيته لانه ساعتها بيكون مش مهم لينا ومش شايفينه ...اسوا الأشخاص اللي بتستغل حبنا ليها بس هما اللي بيندموا في مكنتش زعلانة من حسين ولا مقهورة بالعكس كان عادي ...حسين أصبح بالنسبالي أب ولادي بس ودي حاجة ضايقته لما عرفها بس هو اللي دمر مشاعري ناحيته فيستحمل!
.......
جات جلسة الخلع قبلها جالي وهو ندمان وعيونه مدمعة...طلب السماح اكتر من مرة بس الموضوع كان انتهي نهائيا ...هو مبقاش مهم لدرجة اني حتي مش زعلانة منه عشان اسامحه بس طبعا مستحيل ادخل انسان زي ده تاني حياتي وحياة بناتي
تم الخلع وحسيت اني حرة اخيرا ...كملت في مجال الحلويات وركزت مع بناتي وبس ...كنت فرحانة وانا بشوفهم بيكبروا يوم بعد يوم ...مبسوطة وانا بشوفهم بينحجوا ....
.....
كبرت وكبرت بنتي ودخلت ثانوي عام وطلعت الاولي علي مدرستها وقدرت تدخل طب ...كان فرحتي بيها كبيرة ...طبعا حسين كان بيجي يزورهم وقدر يحبهم بعد خيبة املو في ابنه اللي خلفه من سها ...الولد اللي اتمناه طلع اخلاقه سيئة ...شرب سجاير في سن صغير وهرب من المدارس لحد ما فصلوه...مفيش مشكلة الا اما عملها ...ساعتها عرف حسين انه بناته نعمة وأنهم المؤنسات الغاليات❤❤
تمت
#قلب_معذب
#سولييه_نصار
بكده انتهي الاسكريبت ❤طبعا بشكركم اووي علي تفاعلكم السكر زيكم ❤ناس كتير كان نفسها حسين يخلف بنت عشان يندم علي اللي عمله في وعد بس لا ليه واخدين ان خلفة البنات عقاب ؟ انا لو عاقبته بأنه خلف بنت برسخ اكتر ان خلفة البنات حاجة وحشة والولاد العكس الموضوع مش متعلق بالنوع الموضوع تربية واخلاق ...بنات وعد طلعوا متربين لكن ابن سها لا رغم ان ده الولد اللي اتمناه حسين بس سبحان الله حس بغلطه في الاخر المشكلة دي مش مشكلة منطقة ده تفكير جيل بحاله ولحد دلوقتي للاسف ناس بتفكر بالطريقة دي وربنا يهديهم❤شكرا مرة تانية علي التفاعل ❤❤
تعليقات
إرسال تعليق