 |
#سيدرا
#البارت_الثاني والثالث
قال يزن جملته واختفي من قدامهم وسيدرا وملك قاعدين وفاتحين بوقهم من الصدمه معقوله هو فعلا وافق بالسهوله ديه ومتمسكش بيها؟!
سيدرا لنفسها: هيئ فكرك يعني هيبقي عليكي ما هو سابك زمان واتخلي عنك في اكتر وقت انتي محتاجاه في ...هو اصلاً مش بيحبك عمره ما هيحبك واللي عمله امبارح ده عشان يرضي غروره مش اكتر ..
اتنهدت تنهيده طويله وكلها وجع وهي بتقوم تقف وتاخد شنتطها وملك قامت وراها لانهم مع بعض في نفس الكليه ...
بعد ما خرجوا سيدرا كانت ماشيه ومنطقتش ولا كلمه وملك لسه مش مستوعبه اللي حصل .
ملك: هو اللي حصل ده بجد ؟!
سيدرا وهي بتضحك بسخريه: اه بجد مش جديده عليه ياملك ما هو سابني زمان
ملك وهي بتحرك رأسها بنفي: تؤ تؤ انا عارفه ان يزن المره ديه عايزك بجد يزن ناوي علي نيه سوده للعريس اللي قولتيله عليه شكل خطتنا هتودينا في داهيه
سيدرا وبدأ الخوف ينهش في قلبها وهي بتفتكر شكله امبارح والغيره هتحرق البيت باللي في ...فعلا المره ديه يزن مختلف نظرته ليها غيرته اللي كانت ممكن تخليها في قبرها هو شكله فعلا حبها ملك عندها حق
سيدرا وهي بتبلع ريقها: ط طب والعمل انا خايفه
ملك ايضا: انا مش خايفه انا مرعوبه
مرعوبين من ايه ؟!
لفوا الاتنين بخضه ولون وشهم بقي اصفر هما مش ناقصين رعب يعني
ملك وهي بتاخد نفسها : اخس عليك ياادم احنا ناقصين رعب ؟!
سيدرا بأستغراب: مين ده ؟!
ملك : ده ادم صاحب يزن
سيدرا : اه طب يالا ياملك هنتأخر
ادم وهو مكشر من قله ذوقها: طب حتي قوليلي ازيك قوليلي اتشرفنا اي حاجه متبقيش دبش كده
سيدرا بعصبيه: دبش في عينك ما تحترم نفسك يابني ادم انت ...اه هتحرم نفسك ليه مانت زي صاحبك تلاقيك مش محترم كتكم القرف ...
قالت جملتها بعصبيه كالعاده ووشها احمر وشويه وكانت هتطبق في رقبته مكانتش ناقصاه هو كمان مش كفايه اللي حصل من الزفت التاني ...
ادم : هي ديه سيدرا ؟!
ملك بأستغراب: اه عرفت منين ؟!
ادم بتوتر: ها لا يعني يزن تقريباً كان قايلي ان عندكوا بنت عم اسمها سيدرا فأنا بخمن
ملك بشك : اممم طيب عن اذنك عشان عندي محاضرات
ادم بغموض: اوك باي
ملك : باي
راحت ملك عند سيدرا ولقتها واقفه في مكان بعيد عن الناس وميته عياط ..جرت عليها بخضه وهي بتحضنها وبتسألها بلهفه :
مالك ياسيدرا مالك حد كلمك ؟!
سيدرا وهي بتحضنها وبتعيط اكتر: لا ب بس انا تعبانه وافتكرت ماما الله يرحمها
ملك بتأثر : الله يرحمها.. طب تعالي نرجع البيت مش مهم المحاضره طيب
سيدرا وهي بتمسح دموعها: لا لا يالا نروح
بعد شو راحوا ا الكليه واكتشفوا ان المحاضره اتلغت ..
ملك : يادي النيله
سيدرا بحزن: تعالي نقعد في اي كافيه
ملك :يالا
راحوا قعدوا في كافيه في الكليه وسيدرا قاعده سرحانه وبتفكر في الف حاجه شاغله دماغها نفسها ترتاح بقي نفسها تلاقي اجابه واضحه في عنيه بيحبها ولا بيكرهها...
ملك وهي بتقطع وصله شرودها: صحيح ياسيدرا مين العريس اللي قولتي لعمي عليه هنجيب منين واحد يمثل ؟!
سيدرا : كريم
ملك بخضه : لا متهزريش
سيدرا وهي بتبصلها من فوق لتحت بقرف: لا مبهزرش ..انا كلمت كريم امبارح واتس وهو وافق ..
ملك : سيدرا كريم مش سهل خدي بالك ...ده ممكن ياخدها حجه ويكمل الموضوع شهر ولا اتنين اوحتي سنه وخصوصاً انه بيحبك وانتي عارفه كده كويس !
سيدرا : حبه شيئ في صالحي
ملك : بمعني؟!
سيدرا: لما هيطلب ايدي ونتخطب احب اشوف الفرحه اللي في عنيه وفرحته وحبه ليا هيقهر اخوكي
ملك بتوتر : ده لو حصل واتخطبتي
سيدرا: يعني ايه !
ملك: يعني سكوت يزن ده وراه مصيبه سوده علي دماغنا
سيدرا بتسليه: وماله خلينا نتسلي شويه
ملك : ربنا يستر
بليل علي الساعه ٧ كانت واقفه سيدرا قدام المرايه وبتلبس احلي حاجه عندها ولأول مره تحط ميك اب هي قررت تنتقم منه علي اللي حصل قررت تديله درس عمره ما هينساه ...
ملك : يخرب عقلك ايه اللي انتي لابساه وعملاه في وشك ده انتي عايزه يزن يقتلك بجد
سيدرا وهي بتلوي بوقها وبتتكلم بغرور: اخوكي ملهوش دعوه بيا انا حره ...
قالت جملتها وخرجت لقت يزن قاعد وجمبه باباها وفي وشهم كريم قاعد متوتر وشكله مرعوب من هيئه يزن وعضلاته وتعبيرات وشه اللي كلها عباره عن غضب زاد لما رفع وشه وشافها بالمنظر ده وهي حاطه وشها في الارض خايفه تبصله بس متأكده ان هو متعصب ولو يطول يقتلها ويقتل كريم هيعملها بالتأكيد
محروس : تعالي ياسيدرا اقعدي
راحت سيدرا عشان تسلم علي كريم وهو هيمان فيها ومشلش عينه من عليها ....ولسه هتسلم اتشعلقت ايدها في الهواء وهي سامعه يزن بيقول بزعيق :
معندناش بنات تسلم علي ولاد غريبه
كريم بحرج: احم ونعم التربيه يااستاذ يزن
يزن بحده: اتفضلي ياسيدرا هانم اقعدي
قعدت سيدرا ووشها احمر وضربات قلبها سريعه ومرعوبه من اللي هيحصل ...
يزن وهو بيحط رجل علي رجل بغرور وبيبص لكريم: طلب حضرتك ايه ؟!
كريم وهو بيبتسم بتوتر: ا انا كنت جاي طالب القرب من حضرتكوا
يزن بسخريه : اه في مين ...تكونش قصدك علي ملك ؟!
كريم بسرعه : لا لا انا اقصد الانسه سيدرا
يزن وهو بيقوم مره واحده وبيقرب منه ببطئ ومال بجسمه وشده من طرف قميصه وهو بيضغط علي سنانه : في مين ياروح ماما ؟!
كريم وهو بيبلع ريقه واتكون عرق علي جبينه: ف في انسه سيدرا في حاجه حضرتك ؟!
يزن وهو بيضربه بوكس في وشه وبيقول : لا مفيش اصلك جاي تطلب ايد مراتي مش حاجه يعني !!
كريم : م مراتك ازاي يعني
يزن وهو بيخبط علي كتفه وبيجز علي سنانه: ميخصكش يالا اتكل بدل ما اموتك
مفاتش ثواني وكريم اختفي وهو مرعوب من يزن واللي ممكن يعمله في ...
سيدرا وهي بتزعق بعد ما كريم مشي: انت اتجننت انت ليه بترفض كريم انا موافقه عليه
يزن وهو بيحط ايده في جيبه ببرود: لانه مينفعش واحده متجوزه تتجوز تاني
سيدرا بعصبيه وهي بتروح نحيته وبتضربه علي صدره بغيظ:متقولش زفت مراتك ديه كدبه اخترعتها عشان ترفض بيها كريم مش اكتر ..
محروس بحده: سيدرا احترمي نفسك يزن مكذبش هو فعلا جوزك ....
😳😳😳😳نهار ملهوش الوان منين يودي علي فين
#سيدرا
#البارت_الثالث
ثانيه اتنين وسيدرا واقفه متنحه وفاتحه بوقها زي الهبله ....
مال يزن برأسه نحيتها وهو بيقول جمب ودنها: اقفلي بوقك عشان الدبان .( بني ادم براس بخاخه ياأخي🙄)
هنا استوعبت سيدرا ايه اللي حصل واتكلمت بتوتر وقلبها بيدق بسرعه وخوف ان الكلام يبقي حقيقه
بابا انت بتهزر صح ؟!
محروس وهو بيقرب منها وبيحاوط وشها بحنان : لا مش بهزر ياسيدرا انتي فعلا مرات يزن علي سنه الله ورسوله ...
سيدرا وهي بتبعد ايده ووقفت تصرخ فيهم هما الاتنين: يعني ايه ؟! يعني ايه انتي مرات يزن حصل امتي وازاي ...انتوا بتشتغلوووني
يزن بزعيق وهو بيشدها من دراعها : صوتك ميعلاش احترمي نفسك انتي مش واقفه تتكلمي مع طلاب احنا اكبر منك
زقته سيدرا بأقوي ما عندها وهي بتتكلم بعصبيه ودموع: انت متتكلمش فاهم مش طايقه اسمع صوتك انا محدش آذاني قدك محدش كرهني في نفسي وفي شكلي قدك انا بكررررهك ....
يزن وهو بيتنفس بحده وبيحاول يهدي نفسه عشان ميمدش ايده عليها هو مش عايز يوريها شخصيته الجامده عشان عارف انها كلام علي الفاضي وبتخاف من خيالها اصلاً
يزن بهدوء: ماشي اكرهيني
سيدرا بعصبيه :انا مراتك ازاااي
محروس: كانت وصيه مامتك قبل ما تموت ان يزن يكتب كتابه عليكي ويزن مقدرش يرفضلها طلب
سيدرا وهي بتقعد علي الكرسي ومصدومه وعنيها اتملت دموع ..
سيدرا : معقوله !! معقوله ماما عملت كده ...ماما اكتر حد عارفه اني اتأذيت من البني ادم ده ماما اكتر حد عارفه اني مبكرهش في حياااتي قده
قالت جملتها وهي بتصرخ من قلبها موجوعه قلبها عباره عن نصين نص بيحب يزن ومتعلق بيه والنص التاني مش قادر ينسي اللي حصل زمان مش قادر ينسي لما راحتله وهي عندها ١٨ سنه وقالتله انها بتحبه
فلاش باك
سيدرا : يزن انا بحبك
يزن وهو بيضحك وبيحاوط وشها: طب مانا كمان بحبك ياقطتي مش احنا اخوات
زقت سيدرا ايده وهي بتقول بعصبيه: لا يا يزن احنا مش اخوات احنا نجوز لبعض
يزن وابتسامته اختفت وحل محلها تكشيرته اللي بترعبها
يزن بهدوء وحده: قولتي ايه ؟! انتي واعيه للي قولتيه يابت انتي
سيدرا برعب: اه واعيه انا مبقتش صغيره انا كبيره وفاهمه كل حاجه ...
يزن وهو بيقرب منها وبينزل رأسه عشان يبصلها لانها اقصر منه بكتير اوي
يزن بثبات : طيب انا هعتبر نفسي مسمعتش كلامك وهعديها المره ديه ادخلي يالا جوا
سيدرا وهي واقفه وبتقوله بدموع: ط طب انت ليه رافض انا وحشه مثلا ...
يزن بقسوه : اه
سيدرا بصدمه : ع عشان كده انت مش بتحبني ؟!
يزن وهو بيفتح موبايله وبيوريها صوره بنت : اه وعشان ديه
مسكت سيدرا الموبايل وهي بتبص علي صوره البنت في الحقيقه كانت زي القمر احلي منها بكتير
سيدرا بشهقات : م مين د ديه
يزن وهو بيلف ويديها ظهره: حبيبتي من امريكا وانا هسافرلها الاسبوع الجاي عشان هتجوزها سلام
بااك
محروس: سيدرا يابنتي امك عملت كده عشان هي بتحبك وعارفه انك بتحبي يزن
سيدرا بوجع وهي بتقوم تقف: بس هو مش بيحبني ...هو بيحب مراته اللي من امريكا اللي احلي مني ....
لفت ليزن اللي واقف ببرود زي عادته وهي بتقرب منه وبتقوله بسخريه :
صحيح فين حبيبتك مجبتهاش معاك مصر ليه ؟!
يزن : عشان هي اصلا في مصر
سيدرا: ميخصنيش ...انا اللي يخصني اني خلاص مبقتش احبك ولا عايزه اكمل معاك ...لما قولتهالك زمان كنت لسه صغيره وهبله انا دلوقتي كبرت خلاص ومبقتش احبك ولا احب اسمع صوتك ....طلقني يايزن
يزن وهو بيقرب وشه من وشها وبيبتسم ببرود: بعينك ياروح يزن ...مفيش طلاق
سيدرا وهي بتبتسم ببرود وبتربع ايدها الاتنين : تمام مبقاش انا لو مخلتكش تيجي بنفسك وتقولهالي " انتي طالق" هتقولها صدقني
يزن وهو بيبتسم بتحدي: متتعبيش نفسك عشان مش هيحصل يانجمتي
سيدرا بعصبيه: متقولش الاسم ده بكرهه زي ما كرهتك
يزن : مش بمزاجك انا اقول اللي انا عايزه
دخلت سيدرا اوضتها ودخلت ملك اللي كانت واقفه ومصدومه من اللي حصل زيها زي سيدرا ويمكن اكتر سيكا😂
ملك وهي بتقعد جمب سيدرا الشارده : انا مش مصدقه
سيدرا: ولا انا
ملك. : متنكريش انك فرحانه ياسيدرا
سيدرا وهي بتبصلها وبتتكلم بدموع: انا طايره من الفرحه بس مش قادره انسي اللي اخوكي عمله زمان ياملك ....رغم اني موجوعه بس نفسي اروح احضن ماما انها جوزتني ليزن حب عمري ( عديمه كرامه اوي 🙄)
ملك : تعرفي ياسيدرا انا حسيت قد ايه يزن بيحبك النهارده
سيدرا: اللي بيحب مش بيجرح
ملك: ماهو ده اللي محيرني ليه هو عمل كده زمان ...ولا يهمك يابت مش انتي عايزه تنتقمي منه ؟!
سيدرا: اه
ملك : السبب بتاع زمان انك مش حلوه صح؟!
سيدرا: اه
ملك وهي بتقوم وتفتح الدولاب بتاعها: يبقي اول خطوه تغير الاستايل المعفن بتاع العواجيز ده
سيدرا بحزن: اخوكي السبب هو اللي خلاني اكره نفسي
ملك : وهو اللي هيخليكي تحبي نفسك
سيدرا: يعني ايه ؟!
ملك : يعني انتي عندك لبس حلو كتير اول خطوه توقع اخويا انك تهتمي بنفسك وتبقي انثي مش جعفر يانيله
سيدرا: اه عندك حق
ملك بغموض: انا هخليه يقول حقي برقبتي الواد اخويا اللي معندوش نظر ده ...
بعد شويه كانت واقفه سيدرا قدام المرايه وهي لابسه سلوبته جينز وتحتها تيشرت ابيض وفارده شعرها علي ظهرها وحاطه ميك اب وكان شكلها زي القمر ...
ملك وهي بتصفر: اوووي بقي ايه الجمال ده
سيدرا بغباء: جمال ايه انا لابسه دول عشان انا في اوضتي اكيد مش هنزل كده الشارع يعني
ملك وهي بتشد في شعرها: ياختاااي هتشلي امي يابعيده يااغبي خلق الله اطلعي كده اتلحلحي في الشقه بهدومك وشعرك المفرود ده تعالي وروحي قدامه اومال هتوقعيه ازاي يافالحه هانم ؟!
سيدرا بشهقه: نهار اسود هطلع قدامه كده لا لا مش هينفع حرام
ملك بعصبيه : حرام ايه يحررق معرفتك ده جوزك يامتخلفه
سيدرا وهي بتفتكر: اه صح بس لا لا برضو انا بتكسف
ملك وهي بتفتح الباب وبتزقها عشان تحطها قدام الامر الواقع ...
سيدرا وهي بتغمض عنيها برعب وبتشتم ملك في سرها : منك لله ياملك منك لله ...
فتحت عنيها لقت يزن قاعد لوحده قدام التلفزيون وباباها نام ويزن بيبصلها من فوق لتحت وباين في عنيه نظره اعجاب بس هو اتعود يداري مشاعره
رفعت سيدرا راسها بغرور وهي ماشيه ورايحه نحيه المطبخ وحاسه بعينه بتتبعها لحد ما دخلت ....
سيدرا وهي بتتنفس بسرعه ووشها كله بقي احمر راحت نحيه التلاجه عشان تشرب يمكن تهدي شويه ...
شربت وبتلف عشان تدخل تاني خبطت في جسم صلب رفعت راسها لقته هو واقف وبيبصلها بثبات ...
سيدرا: افندم
يزن ببرود: عايز اقولك علي حاجه
سيدرا بقرف: قول
مال يزن براسه وهو بيقول جمب ودنها : حبيبتي اللي في مصر اسمها سيدرا ياسيدرا ❤
وحياه النبي محمد البت ديه معندها كرامه😂😂🙄
بم اني حبيت التفاعل واتبسطت جدا جدا قولت انزل البارت التالت وبكده فاضل بارتين والروايه تخلص لانها قصيره 😂❤️
#ايمان_شلبي
البارت الرابع والخامس الأخير من هنا
تعليقات
إرسال تعليق