مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت❤بقلم سولييه نصار❤

-مراد انت بتحبني ؟

قولتها بحزن ...وبصيت ليه لقيته مشغول بالموبايل 

...اتعصبت وانا بسحب منه التليفون وزعقت :

-خلي عندك دم واسمعني

بصلي بغضب وسحب تليفونه وهو بيزعق :

-مالك يا سلمي علي الصبح ...فيه ايه 

بلعت ريقي وانا بقول بإنكسار :

-انت بتحبني ؟!

-عاملة الدوشة دي كلها علي السؤال التافه ده مالك يا سلمي شاربة حاجة يا حبيبتي !!!!

-رد عليا لو سمحت بتحبني 

-لا .

قالها ببساطة ...ببرود  ومن غير ندم متجاهل قلبي اللي اتكسر ....عيوني دمعت بس سيطرت علي نفسي وقولت:

- طيب ليه اتجوزتني ؟!

بصلي  ورد بعملية:

-انتي مثقفة...جميلة ومنظمة ...طبخك يجنن والأهم اخلاقك عالية اقدر اخليكي تربي عيالي وانا مغمض عيني.

-والحب 

ضحك بسخرية وقال:

-الحب خرافة يا حبيبتي مش بيدوم لكن الاحترام بيدوم وانا بحترمك ومش مقصر صح ..انا مش مقتنع  بالحب خالص ...وبعدين يا لولو ما خلينا كويسين مع بعض ...حب ايه ووجع دماغ ايه 

دموعي نزلت ...فابتسم بشفقة وقال:

-مشكلة الستات انهم ورديين زيادة عن اللزوم ...بس اعمل ايه ...قولتلك قبل كده انا مش هديكي قلبي هديكي احترامي .

متحملتش كلامه وقومت ودخلت الأوضة وقفلت عليا الباب وانا بنهار علي السرير ..كنت ببكي بإنهيار....شعور صعب انك تحب واحد بكل مشاعرك وتعمل المستحيل عشانه وتكتشف انك مش في قلبه حتي ولا علي باله...تكون علاقتكم مجرد حقوق وواجبات بس ....فجأة قومت  ومسحت دموعي وقررت اني مستسلمش ...انا هحصل علي قلب مراد  وهخليه  يحبني  ...

طلعت من الأوضة وانا مبتسمة ابتسامة عريضة ...لقيته قاعد في الصالة ...بصلي بتوتر وندم وقال:

-سلمي انا 

-تحب احضرلك الغدا يا حبيبي 

-ها؟!

-الغدا ...الغدا احضرهولك 

هز رأسه فروحت بسرعة عشان احضر الغدا ...بص مراد عليها لما مشيت وقال:

-عوض عليا عوض الصابرين دي اتجننت ولا دي هرمونات ولا ايه !!!

.....  

مرت الايام وانا بحاول اكسب قلب مراد للاسف فترة خطوبتنا كانت صغيرة اووي ملحقناش نعرف بعض كويس وقررت اعوض ده دلوقتي ...كنت بتكلم معاه كتير ...حتي لما يكون حابب يمسك التليفون باخده منه وبجبره يسمعني ....اهتميت بيه وشاركته كل حاجة بيحبها ...خرجنا وهزرنا ...مكناش زوج و زوجة  وبس ...كنا اصحاب كمان ...كان بيحكيلي علي مشاكلة بأريحية وانا وانا كنت بسمعه...فجأة حالة اتغير ...بقا متفائل اكتر ...بيهتم بنفسه اكتر وبيبصلي بنظرات غريبة ...كنت طايرة من الفرحة اكيد هو حبني ..

في يوم ..

طلب يقعد معايا ويكلمني ...

-خير يا مراد معطلني عن شغلي ومخليني جمبك كده ليه ؟!

-سلمي انتي مش بس مراتي ...انتي صاحبتي وعايزاكي تسمعيني دلوقتي زي ما سمعتيني دايما 

قلبي دق ...اخيرا هيعترف بحبه ...بصتله بإهتمام وعيوني لمعت وقولت:

-قول 

ابتسم وقال :

-سلمي انا بحب واحدة  وعايز اتجوزها !!!

يتبع

#غفراني_صعب 

الجزء التاني ❤شكرا على تفاعلكم السكر زيكم❤بقلم سولييه نصار❤

- ايه ...حبيت واحدة غيري ...

كنت مصدومة ...عينيا دمعت وانا ببصله ...يوم ما يحب يحب غيري ...

اتوتر مراد وهو بيبصلي فجأة دموعي نزلت وبدأت ابكي ...

-سلمي ...سلمي اهدي ابوس ايديكي...

بس انا مبطلتش بكا....بالعكس بكايا زاد ...كنت حاسة قلبي هيتفتت من الالم ...بعد اللي عملته يحب غيري ...ليه يكسر قلبي بالشكل ده ...

قعد علي الأرض ومسك ايدي وقال:

-والله العظيم مش قصدي اكسر قلبك ..

بس انا حبيتها بجد ...كنت فاكر اني عمري ما اقدر احب حد ...كنت فاكر الحب للمراهقين بس ...بس فجأة هي جات وغيرت طريقة تفكيري ....

حطيت ايدي علي ودني وانا بصرخ وبعيط:

-اسكت ...اسكت 

سكت وهو متوتر فبصتله بكره وقولت :بقلم سولييه نصار

- اطلع برة ...برة مش عايزة اشوفك دلوقتي 

من غير كلام قام وطلع من البيت ....

بكيت اكتر وانا هتجنن ...انا عملت كل حاجة عشان يحبني يروح قلبه يروح لغيري...ناقصة ايه انا عشان يحب غيري....ناقصة ايه !!! التفكير كان هيجنني ....حاسة دماغي هتتفرتك ...

.......

بعد ساعتين كنت خلصت بكا ودماغي فضيت ....معرفتش ساعتها هعمل ايه ...محبتش انهي جوازي بالسرعة دي ...قررت افكر لو لقيت اني هجي علي نفسي اكتر من كده هسيبه وانا هقدر انساه عاجلا ام اجلا ....

بعد شوية جه وقعد جمبي 

-سلمي انا اسف مكنش قصدي آذيكي...

مردتش عليه ...حتي مبصتش عليه...مقدرتش ...قلبي كان واجعني لدرجة اني مش متقبلاه

-سلمي ردي عليا .

بصتله وقولت:

-ليه حبيتها

- مش فاهم 

مسكت دموعي بالعافية وقولت :

-ليه حبيتها هي محبتنيش انا ...فيها ايه زيادة عني حابة افهم 

-مكانش قصدي ومكنتش عايز بس هي اهتمت بيا اووي ...قدرت توصل لقلبي وتغير تفكيري

-كفاية متكملش

مسك ايدي وقال:

-انا مش عايزك تبعدي عني ...مقدرش اكون مثالي واقولك انك لو مش هتتقبليها يبقي هطلقك...انا مش عايز اطلقك بس بردة عاوزها 

-عايزة اشوفها 

قولتها بغموض ...عايز اشوف الست اللي قدرت تلف عليه وتوصل لقلبه !!!

..........

تاني يوم قالي مراد انه اتفق مع ميرا هنتقابل في مطعم ونتكلم ....استقبلت الخبر ببرود ....

علي الساعة تمانية كنت جاهزة...بصيت لنفسي في المرايا بثقة بس من جوايا كنت مهزوزة ...ةعلي قد فضولي عشان اشوف الست اللي قدرت توصل لقلب جوزي وتفوز بيه ....

........

وصلت المطعم ولقيتهم سوا ... كانوا بيتكلموا سوا  ...بس اول ما شافني قام وابتسم ...بصيتله ببرود وانا بسلم عليهم وقعدت...اتأملتها ...كانت جميلة جدا بس عينيها مش مريحة ...شكلها مش برئ ...طبعا لو قولت ده لمراد هيقول اني بغير بس لا ...في اللحظة دي شعور اكبر من الغيرة والقهر بقا جوايا ...البنت دي فيها حاجة غلط..الخبث والسواد اللي في عينيها مشوفتهوش قبل كده ...قعدنا سوا واتكلمنا ...كنت بتكلم وانا مركزة معاها...فجأة ابتسمت هي وقالت:

-انا رايحة التواليت يا مراد وهاجي فورا 

قامت بسرعة وراحت الحمام وانا قعدت مكاني ...

لسه مراد هيتكلم معايا ...تليفوني رن ...بصيت لقيته فارس ابن عمي ...

-مين اللي بيرن 

-ده فارس هفتح عليه واشوف ماله ...

حسيته اتعصب وقال:

-والزفت فارس عايز من مراتي ايه 

بصيتله بقرف وببرود وقومت ..مردتش علي فارس بس استغليت الفرصة وروحت الحمام وراها...تجمدت مكاني وانا بسمعها بتقول:

-متقلقش يا وليد كله ماشي حسب الخطة بالضبط ...فلوس مراد الورداني هتبقي لينا قريب ...فاضل بس اطرد مراته من البيت وانا هبقا الكل في الكل !!

يتبع

#غفراني_صعب

#سولييه_نصار

استنوا البارت الأخير❤

الجزء الاخير ❤شكرا على تفاعلكم السكر زيكم ❤بقلم سولييه نصار❤

اتصدمت وانا بسمع كلامها ...كنت حاسة انها مش كويسة ....كنت هدخل واجيبها من شعرها بس وقفت في اخر لحظة ...لا انا لازم اكون أذكي من كده ...قررت ارجع لمراد ...فارس رن عليا كمان فرديت عليه ...

-انت مصيبة يا فارس. بجد عملت ده كله 

ضحكت بإستفزاز وانا بشوف مراد وهو بيبصلي بغضب ...بقلم سولييه نصار❤

-طب يا فروسة هكلمك بعدين 

قعدت علي الترابيزة وانا بقول:

-هي مرمر مجتش

-مرمر مين 

قالها وهو بيكز عدلي اسنانه

-ميرا يا مراد مالك 

-سيبك منها دلوقتي ...عايزة اعرف ايه المسخرة دي 

- مش فاهمة .

ضرب بإيده علي الترابيزة وقال بغضب :

-سلمي متجننيش وبطلي استهبال ...شغالة تضحكي مع ابن  عمك ولا كأن في خروف متجوزك

-وفيها ايه انت ليه قافش كده ...ده زي اخويا 

-ده اللي اتقدملك تلات مرات قبل كده لانه بيحبك 

-ووللاسف رفضته

حسيته اتصدم وبعدين غضب اووي ...وقال:

-للاسف ...يعني كنت عايزة تتجوزيه

هزيت كتفي وقولت عشان استفزه :

-هو علي الاقل كان بيحب....

-اخرسيييييي

قاطعني وهو بيضرب بإيده علي الترابيزة ...خوفت منه 

شدني من ايده وقال بعصبية:

-اياكي تتكلمي عن راجل تاني ...فاهمة والا والله اد*فنك مكانك ...

-احم احم هو فيه حاجة 

قالتها ميرا ...ساب مراد ايدي وبصلي بغضب وقال من غير ما يبص عليها :

-لا مفيش 

خلصت العزومة علي خير وبقيت بعدها بتجاهل مراد تماما ...كان لازم اكشف ليه حقيقة ميرا بس بعد كده معرفش هعمل ايه ...هل هكمل ولا امشي ...حقيقي مش عارفة !

........

بعد يومين

-خير يا مدام سلمي طلبتيني

-ايوة يا ميرا فكرت اننا نبقي اصحاب بما اننا هنبقي ضراير

- بس احنا مش هنبقي ضراير حتي يا حبيبتي ...انا هشرط علي مراد انه يطلقك الاول 

رفعت حاجبي وانا ببتسم  وبفكر انها بجحة كمان ...فجأة جات علي تليفونها رسالة فتحت الرسالة وابتسمت وقالت:

-عن اذنك مضطرة امشي دلوقتي سلام 

ودي كانت فرصتي الدهبية ...

مشيت فمشيت وراها من غير ما تاخد بالها لقيتها راحت لكافية وقابلت واحد ...اتصدمت لما اتعرفت عليه ...مستحيل ده وليد نصار ....هي طلعت تبعه ...ابتسمت بخبث وطلعت موبايلي وصورتهم ...ده كنز ميرا طلعت تبع وليد ....مراد لما يعرف الكلام ده مش هيبص في وشها اصلا وهيطردها من حياته ....روحت اشتريت رقم جديد بدون اسم ونزلت الواتساب وبعت الصور وبعدين قعدت شوية علي البحر وغمضت عيوني ...بالصور اكون عملت اللي عليا وانقذت مراد من نصباية كبيرة ...ساعتها فكرت في الموضوع اللي كنت خايفة افكر فيه من البداية ...انا هكمل مع مراد بعد اللي حصل ....هرجع واكون استبن ...هرضي بالدور ده تاني وهحاول اكسب قلبه واتجرح تاني .أسئلة كتير كانت بتدور في راسي ومش لاقي ليها حل ...دون إرادة مني قومت وقررت اني ابعد ...هبعد عنه وساعتها هاخد قراري ...

مرت الايام وانا عايشة في بيت بنت عمي ...بيت ميتوقعش مراد اني اكون فيه ...سمعت انه بيدور عليا وقلب الدنيا بس مكنتش مستعدة اقابله ولا اشوفه ..جرحي كان كبير اووي ....

لحد في يوم كنت مستعدة اقابله...مستعدة انفجر فيه واقول اللي في قلبي ....

وقفت قدام البيت وانا بترعش سيطرت علي نفسي فجأة ورنيت الجرس ...فتح الباب ...كان خاسس...دقنه كبير ..وعلامات الحزن عليه ...اول ما شافني وشه نور ومن غير تردد حضني جامد وقعد يبكي ...حسيت ان قلبي بيدوب بس حاولت اسيطر عن نفسي وأبعد بس هو دخلني البيت ومسك ايدي وقال:

-كنتي فين يا سلمي ...انا من اول ما مشيتي وهتجنن ...ميرا طلعت خاينة ...طلعت بتحب وليد نصار ...عدوي اللي سرق شركتي وكان هيسجني

ودلوقتي رافع عليهم قضية لاني اكتشفت اننا سرقت أوراق مهمة مني ..

-يعني مبقتش تحبها صح 

-اكيد طبعا مبحبهاش ..انا 

-بتحبني انا صح 

-ايوة ...انا بحبك اووي يا سلمي عرفت ده متأخر يالا نرجع.

-هو انا الاستبن بتاع سيادتك صح ؟!

- ايه  

زقيته وانا بصرخ فيه ...

- انا مش استبن يا مراد ...انا انسانة ...انسانة حبتك وحاولت تكسب قلبك جيت علي كرامتي وعملت المستحيل عشانك

-وانا بقولك كفاية ...متجيش علي نفسك تاني ده دوري ...دوري اهتم....دوري احسسك اني بحبك 

- بس انا مش عايزة حبك 

-ايه ؟!

رفعت راسي وابتسمت وقولت :

- انا مبقتش عاوزاك يا مراد .

بعدها كنت هسيبه وامشي ...مسك ايدي وقال:

- بس انا بحبك وعايزك وهرجعك ليا بعد اسبوع شهر سنة...هترجعي يا سلمي .

بعد وسيبته ومشيت ...بصراحة لسه في جزء في قلبي مفتوح ليه ولسه بحبه  وممكن في يوم اسامحه بس انا قررت احب نفسي اكتر ...وعمري ما هجي علي نفسي عشان حد ...نفسي اولي بالحب❤

تمت 

#غفراني_صعب

#سولييه_نصار