 |
#إنسان #سافل #بس #محترم
#رانيا #محمود
الحلقه الثانيه عشر والثالث عشر
أمينه عندها حاله من الملل وخصوصا بعد ما انتهت إجراءات الطلاق بهدوء ذي ما هي طلبت .حسيت بفراغ في حياتها وأنها محتاجه تشغل وقتها بحاجات كتير
اتقدملها 3 عرسان كويسين وكانوا طبعا عارفين موضوع عدم قدرتها على الإنجاب بس هي مش عوزه الارتباط دلوقتي في جواها مشاعر ثانيه عاوزها أكثر ....مشاعر الأمومه مسيطره عليها وكانت عاوزه تتكلم عن مشاعرها دي وطبعا ما كنش فيه غير شله الأنس 🤗 ....
نهى ..:_طيب يا ميمي ايه رأيك لو تقضي كل يوم اجازه في ملجأ أيتام وتعقدي مع الأطفال وتجبيلهم حاجات حلوه وتقضي وقت لطيف معاهم أو اقولك ايه رأيك تعملي حضانه مشروع مربح وفي نفس الوقت تشوفي أطفال كتير
أمينه :_..انا ماليش في المشاريع وبعدين مش عاوزه أطفال انا عاوزه طفل
سلمى .:_بصي يا ميمي بغض النظر عن الهبل اللي قالت له نهى بس فيه شي من الصح
نهى بغضب طفولي :_..مين دى اللي هبله يا ست سلمى الله يسامحك ده انا ست العاقلين ده انا .......
ندى ضحكت :_..بس بقى انتوا الاثنين كفايه ...بليز يا سلمى وضحى كلامك
سلمى .:_حاضر يا ندى علشان خاطرك انتي وأمينه .شوفوا نهى قالت إن أمينه تروح ملجأ أيتام وتقعد مع الأطفال هناك وامينه عاوزه طفل واحد ..يبقى نعمل ايه
ندى .:_يبقى تتبنى طفل يا بيه ....
سلمى صقفت لندي ..:_👏👏برافو يا ندى برافو
أمينه بصتلهم باستغراب بس بعد شويه علامات التعجب اللي اترسمت على وشها راحت واتبدلت بعلامات الجديه وكان فيه أكثر من سؤال أمينه ابتدت تسالهم لصحابها
1_طيب هقول لبابا وماما ايه
2_وبعدين التبني حرام
3_وهعمل ايه مع الليبي دي وكمان....
سلمى :_.بس بس كفايه أسأله ارحمي نفسك بس الأول انتي موافقه علي الفكره
لسه أمينه هترد سلمى قطعتها .:_.قبل ما تجوبي وتتسرعي فكري كويس واتكلمي مع باباكي ومامتك ولما تقتنعي وتوفقي بعد كده نبقى نقعد مع بعض ونجاوب على باقي الأسئلة
ندي :_صح قبل ما نفكر هنعمل ايه لازم تقرري اولا انتي عاوزه تاخدي الخطوه دي ولا لأ
نهي :_ياسلام عليكي يا بنت يا نهى عليك شويه افكار انما ايه اللوز اللوز
سلمي:_ افكار ايه يا حبيبتي ده انا اللي قلت الفكره دي
نهي:_ بس انا الاساس انا اللي زرعت الفكره في دماغكم وقلت لامينه تروح مالجا ايتام وتقعد وسط اطفال وكده هتستمتع بوجودها مع أطفال كتير وتمارس الامومه معهم
سلمي 🤨:_نعم هو اي كلام وخلاص انتي قولتي تروح ملجأ تزور الأطفال بس انا قولت تتبنى طفل معلش بقي انا اللي صاحبته الفكره
ندى :_استهدوا بالله يا اخونا انا باقول ايه كل واحده تروح بيتها وسيبكم من خناقه الاطفال دي لما اساسا امينه تقتنع بالفكره يبقى ساعتها نشوفه مين فيكم صاحب الفكره واللي هتكسب ليها عندي حته جائزه شوب عصير قصب😂 يلا يا ماما بيتك بيتك انت وهي.
كلهم في صوت واحد.. (تصبحي على خير يا ميمي)
امينه ضحكت منهم جامد 😂:_وانتم من اهل الخير يا شله مجانين 😂
بعد ما الكل روح. أمينه قعدت مع نفسها مش عارفه تعمل ايه تفكر في الموضوع ده ولا تنساه اساسا... قامت صلت ودعتةربنا أنه يقدرها على اتخاذ القرار
...............................................
أحمد بعد مقابلته لمى حس أنه مش زعلان بالعكس مبسوط وطبعا كلم ندى بس في في الوقت ده ندي قررت أنها تقطع علاقتها مع احمد بشكل نهائي بعد ما اتاكدت أنها فعلا بتحبه لكن ماعدش ينفع الوقت خلاص انتهى
أحمد بعد محاولاته الكتير يتصل بندي حتى عن طريق ليلى معرفش يوصل لندي. وكان مستغرب جدا وقلقان جدا من أن ندى تبعد عنه لأن مكالمتها بالنسبه له أصبحت إدمان مايقدرش يستغنى عنها أو مش عاوز ..كان بيسترجع كل كلامه مع ندى الفتره اللي فاتت علشان يشوف هو زعلها في ايه بس ماوصلش لحاجه أو نقدر نقول ماكنش عاوز يفكر في احتمال يخص ندى لأنه شايفها أفضل منه بكثير و ما ينفعش الورد يتحط غير في اجمل واغلى فازه بس هو بالنسبه لها مقلب زباله((ده رأيه في نفسه ماليش دعوه ))
وفي وسط افكار احمد الملخبطه يجي تليفون يغير من حياه احمد بشكل هو نفسه ماتخيلهوش
أحمد :_ كالعاده يا صديقي العزيز بيكون تليفونك هو طوق النجاه كل مره تتصل بي بكون في اكثر وقت انا في ازمه و انت الوحيد اللي تعرف تخرجني منها.. ازيك يا صديقي عامل ايه يا مروان وجدو اخباره ايه يا رب تكونوا بخير
مروان :_هلا اخويا الغالي... شكرا صدق علي الكلام الطيب ده وحشتنا كتير والله وجدي دايما يسألني كل يوم كلمت أحمد النهارده.. خلاص ياعم انت بقيت حفيده رسمي
أحمد :_الحمدلله. ده فضل ربنا عليا
مروان :_فعلا الحمدلله دائما وابدا شوف يا صديقي العزيز لا اقولك يا اخي العزيز انا عندي ليك مشروع هام جدا وبصراحه ده حلم كنت بتمني يتحقق واقدر اوفرله السيوله المطلوبه لكن ماكان معي المال الكافي لكن بفضل ربنا سبحانه وتعالى ثم انت اتوفرت الفلوس بشكل ماكنت اتوقعه
أحمد :_ ازاي مش فاهم ليه هو انا طلعتلك في البخت ولا ايه
مروان-: ايوه يا سيدي واحلى بخت كمان..شوف يا سيدي انا كنت باحلم بشركه سياحه تكون بين جده و اوروبا كلها اوروبا الشرقيه و اوروبا الغربيه وبالاخص اوروبا الشرقيه لان فيها اماكن حلوه كثير قوي قوي للسياحه و بالنسبه للعرب ارخص كتير من أوربا الغربيه لكن كان دائما العيله عندي يعترضوا ويقولوا ما شغلتنا احنا شغلنا التجاره والصناعه بس ما لنا بالسياحه في شيء لكن بعد ما جدي شافك يا احمد و عارف قد ايه انت شاطر في مهنتك وكمان عندك خبره بالسياحه لا يستهان بها غير الكاريزما اللي ربنا ادهالك قال لي لو عايز شركه السياحه اللي بتتمناها انا هسعدك بس بشرط احمد زيدان يكون شريك معك
احمد :_انا اكون شريك معاك في شركه سياحه.... منين؟
مروان:_ منين ايه يا احمد هو انت ما سمعتني ولا الشبكه عندك منها مضبوطه باقول لك جدي هو اللي هيمولها بس انت تكون موجود معايا بالشركه
أحمد :_انت عارف اللي انت بتقوله ده معناه ايه يا مروان
معناه انها اسيب مصر واقدم استقالتي وتبقى حياتي تقريبا في اوروبا ما بين جده و اوروبا و لكن اكثر الوقت تكون بره في اوروبا
مروان :_أحمد فكر كويس وفيها ايه يعني ما اعتقدش ان في مصر شيء مخليك متمسك بها لكونها يعني بلدك كل انسان بلده عزيز عليه لكن يا احمد يا اخي انت ماعندك حد في مصر حتى الاصدقاء ما اعتقد انك عندك اصدقائك فكر في مستقبلك وهعتمل فلوس كويسه و تشوف كمان ناس مختلفه ثقافات مختلفه والاهم من ده كله لعلها فتحه خير كبيره لك انت ما تعرف
أحمد :_انا فاهم كويس قوي الكلام اللي انت بتقوله واكثر كمان و اي حد يشوف العرض بتاعك يقول فرصه ما تتعوضش وانا على فكره مش رافض العرض كل اللي باقوله اني بفكر معك بصوت عالي على العموم يا مروان انا هفكر
مروان -: احمد .ماتضيعش الفرص .اعتقد في الكام شهر اللي فاتوا انت اتغيرت كتير و اكيد انك حاسس بده وانا متاكد ان التغير ده كان في مصلحتك ...اعتقد ان ربنا سبحانه وتعالي عاوز منك انك تبتدي من جديد بشكل مختلف عن حياتك اللي فاتت .بص انا مش هتكلم كتير ولا هضغط عليك ..انت ناضج و واعي كفايه واكيد هتعمل اللي في مصلحتك ..سلام مؤقت يا صديقي
أحمد.-: .سلام...
احمد متحدثا لنفسه-: فكر كويس في العرض ده وشوف ان دي فرصه مناسبه من كل النواحي كمان معدش ليه لزوم لوجودك في مصر ..... أن هسافر بس لازم ابعت فيديو لندي و حكالها فيه عن كل شئ عن مي وعن السفر للسعوديه والشركه الجديده .وهطلب منها أنها تتكلم معايا تاني لأني محتاجها كصديقه وأني بصراحه لما بكون عاوز حد يسمعني واكلمه بتكون دايما موجوده بس يارب تشوف الفيديو و ماتجهلش رسالتي
كان احمد ابتدي يجهز نفسه للسفر ويخلص تقريبا كل متعلقاته الماديه و اي حاجه ليه في مصر و دايما بيحاول يوصل لندي .بس كان بيوصله منها التجاهل ومع ذالك ماكنش ابدا زعلان منها بالعكس ساعات شايف ان عندها حق و مش ممكن يزعل منها . بس هي وحشاه و مش عارف يعمل ايه
ندي شافت فعلا الفيديو بس الغريب ان قرارها متغيرش و فضلت متجاهله الرد علي أحمد تماما..ساعات كانت بتحن تكلمه بس معملتش كده ..
ندى كانت مختفيه طول الفتره اللي احمد كان بيحهز نفسه للسفر من مصر بشكل نهائي
و بعد ما تأكدت ان احمد سافر فعلا كلمته في الأول كانت بتتكلم voice
ندي :_الو اذيك يا احمد
احمد:_يااااه ياندي اخيرا ظهرتي انتي كنتي مختفيه ليه انا زعلتك في ايه
ندي :_انا ماكنتش مختفيه ولا حاجه
احمد :_يا ندي انا مش بلومك ولا بعاتبك ابدا ومتدوريش علي اعزار.. انا عاوز اطمن عليكي عاوز اتأكد انك مش زعلانه مني.. ندي انتي متعرفيش قد ايه انا محتاج اتكلم معاكي محتاج اطمن انك لسه عاوزه تسمعيني
ندي :_احمد انت ليه بتقول كده؟
احمد ::_قبل أي حاجه عاوز اشوفك ارجوكي هنخلي المكالمه فيديو كول من فضلك ماترفضيش
ندي :_حاضر يا احمد
احمدكان سعيد انه هيشوف ندي بس اول ماشافها لاقاها حزينه ووشها شاحب
أحمد :_يااه ياندي اخيرا شوفتك بس انتي مالك ليه تعبانه
ندي :_انا كويسه الحمد لله.. انت بقي عامل ايه عايش اذاي
أحمد😔 :_ انا كنت بخير قبل ماتختفي بس دلوقتي ما ظنش اني كويس.. يا ندي وجودك في حياتي بيطمني اني مش لوحدي ولما اختفيتي مش عارف اوصف احساسي كان ايه انا حسيت اني تهت من نفسي ولا بقيت عارف اعمل ايه.... ندي انا مخنوق اوي اوي 😔
ندى ..:-.انا معاك يا احمد ولو انت كنت مخنوق انا كمان كنت ذيك ويمكن اكتر
أحمد :_طيب ليه يا ندي البعد حصل ليه؟
ندي :_مش انت قولت ولا لوم ولا عتاب.
أحمد :_صح عندك حق. ولا لوم ولا عتاب.. المهم.
ندي :_ايوه المهم خالينا في المهم
أحمد :_ ماشي يا ندي ايه بقى المهم عندك انا بعتلك فيديو قولتلك فيه كل اللي حصلي في الفتره اللي فاتت
ندي :_ صح فعلا انا شوفت الفيديو وعندي سؤال.. هو انت ليه يا احمد مش زعلان انك مش هتتجوز مي؟
أحمد .:_لأني بصراحه مبحبهاش ايوه. يا ندى شوفي بعد ما مريت بتجربه الحج حسيت ان عندي قلب بيدق ويحس وبيتاثر تصوري يا ندى انا طلعت بقدر ابكى لما اسمع ايه قرآنيه بصوت عذب وجميل لما بشوف حد زعلان قدامي وبيبكي مش بقدر أمسك دموعي ..أحمد بيقدر يبكي ياندي. ..ولما سألت شيخ كان في الحرم النبوي ان اللي بيحصل معايا ده معناه ايه قالي ان طبقه الصدأ اللي على قلبي ابتدت تروح وأن نور ربنا ابتدى يدخل قلبي .....وكمان الرسول كان بيبكي ومش عيب أننا نظهر دموعنا كارجاله..الدموع مش من مظاهر الضعف بالعكس ده مظهر قوه أيوه .. قوه القلب أننا عندنا قلب قوي يقدر يشعر باحاسيس ومشاعر مش قلب ضعيف وميت ولان عندي قلب يقدر يحب فأنا ماحبتش مي ببساطه .انا بس كنت بستخدمها أيوه يا ندى وانتى عرفه انتي بالذات ما ينفعش اخبي عنها حاجه كل ما في الموضوع كنت بصلح غلطه لأني اذنبت وحسيت بذنبي أكبر بعد ما عرفت انها أطلقت من جوزها بس خلاص دلوقتي ..فتره وخلصت بكل تفاصيلها المهلكه بالنسبه لي
ندى ...يعني انت ناوي على ايه ???
أحمد......ناوي امشي على الصراط المستقيم واتجوز لما احب وربنا يقدرني الاقي بنت الحلال
ندى -:..انشالله يا احمد
أحمد :_ده بقي كان المهم عندك 😉
ندي :_🙂ندخل بقى علي الأهم.. ناوي تعمل ايه في شركتك الجديده وبعدين كده خلاص مش هترجع تاني يعني مش هعرف اشوفك خلاص كده 😔
أحمد :_ما انا كلمتك كذا مره واترجيتك في اكتر من رساله اني اشوفك اعمل فيكي ايه..
ندي :_يعني كنت هتعمل ايه يعني كنت هتغير رايك وتفضل في مصر وماتسافرش
احمد :_معرفش كنت هعمل ايه بس اكيد كنا هنعمل حاجه كنا هنتكلم ونشوف
ندي :_علي العموم قدر الله وما شاء فعل وطالما ماحصلش اننا نتكلم قبل سفرك فأكيد ده اختيار ربنا وده افضل اختيار ليك وليا
احمد :_خلاص يا ندي مالهوش لازمه اننا نتكلم على اللي فات خلينا في النهارده
ندي :_طيب هتعمل ايه في الشغل الجديد
أحمد :_انا لسه بظبط اموري بصراحه الشركه عاوزه شغل كتير في أوراق كتير عاوزه تتظبط والدعايه وخطه الشركه تقدري تقولي انا ذي دكتور النسا وعندي حاله ولاده متعسره شويه بس متخافيش انشالله خير
ندي :_يارب.. هو انتم مش هتحتاجوا موظفين 😉
احمد:_ايوه طبعا ومكانك محجوز بس قولي ايوه وانا اقسملك ان خلال 72 ساعه تكوني هنا
ندي :_ياسلام وماما وليلي
احمد:_متخافيش هتصرف في كل ده بس قولي اااه
ندي:_😂واقول اه ليه هو انا تعبانه
احمد:_😂وحشتني ضحكتك جدا يا رمضان
ندي :رمضان يااه ده وحشني بشكل
احمد :_بقى رمضان وحشك 🤨وانا لا
ندي 😂لا سيدي انت كمان وحشتني. قصدي وحشت رمضان 😌
وانتهى الحوار على كده. ندى بتفكر ...ايه ياندي لو احمد قالك أنه عاوز يتجوزك هتقولي ايه هتقدري تتعيشي معاه. بعد. كل اللي سمعتيه معقول احمد اتغير. مش قادره أصدق .ده تلاقيه حلاه الإيمان في قلبه لسه جديده علشان في البدايه لكن ممكن يتغير
ويرجع للي كان فيه يبقى لازم. اقفل الباب ده قدامه ...بس هتقدري يا ندى انتي بتحبيه وانتى معترفه ....لا لا هقدر ما ينفعش يا ندى انتي بتحربي طواحين الهوا
و انتي يا امينه ناويه الدنيا توديكي لحد فين .هتقدري تواجهي لوحدك و لا لأ
#إنسان# سافل # بس#محترم
#رانيا #محمود
الحلقه الثالثه عشر
أمينه كانت بتحلم بحد بيديها غصن أخضر والغصن ده كانت فرحانه بيه اوى فضلت تحلم بنفس الحلم تقريبا كل يوم والحلم هو هو بيتكرر وبنفس التفاصيل وحست ان الحلم ده اشاره من ربنا في موضوع التبني وأن الغصن الأخضر يعني بيبي صغير وقررت تتكلم مع باباها و مامتها
الام :_طبعا لا والف لا الموضوع مش محتاج نقاش
الاب :_متبصوليش انا مش هقدر اعمل حاجه لان انا كمان مع مامتك.. مش موافق
امينه :_ليه اقنعوني انا ذهقت من حياه الوحده دي انا محتاجه اكون ام وياريت محدش يقولي ارجعي لطارق ولما يخلف ابقي ربي عياله
الام :_محدش طلب ده منك... وهقولك بصراحه انا مش موافقه على موضوع التبني ده ليه... لان ببساطه محدش هيتجوزك ولا انتي عاوزه تعيش كده
الاب :_فكري براحه يا امينه انا فعلا مع ماما في رفضها لفكره التبني بس اكيد مش هنفرض عليكي حاجه ولا هنغصبك احنا عمرنا ماغصبناكي علي حاجه حتي جوازك من طارق اساسا ماكنتش موافق عليه بس وافقت علشانك.. ارجوكي يا ميمي انا عاوز اطمن عليكي مش عاوزك تعيش كده وحيده
امينه :_ماعلشان كده بقولكم انا عاوزه طفل يكون في حياتي اربيه ويبقى ابني او بنتي
الام :_ابوكي قصده تتجوزي يا امينه وبعدين مين اللي هيرضي يتجوز واحده متبنيه طفل ده فيه رجاله بتشرط علي الست اللي هيتجوز ها انها تسيب عيالها علشان الجوازه تتم
امينه :_وده يتقال عليه راجل يا ماما
الام :_اكيد مقصدش واكيد اللي يطلب طلب ذي ده يبقى مش راجل ولا حتي انسان ده اناني ولو قلنا عليه حيوان يبقي ظلمنا الحيوان.. المهم يابنتي ارجوكي انا وابوكي مش هنعيش قد اللي راح من عمرنا... انا كل يوم كل لحظه بدعي ربنا يرزقك بابن الحلال اللي يصونك ويكون العوض عن اللي فات
الاب :_حبيبتي لو اتبنيتي طفل كده فرصه جوازك تاني هتنعدم تقريبا
امينه سكتت وماكملتش الحوار معاهم لأنها حست ان الكلام معاهم مش هيقدم ولا يأخر بس هي مستسلمتش وكلمت خالها مصطفى لأنه أقرب حد في عيلتها لباباها و مامتها
أمينه-: بس يا خالوا وده كل اللي حصل ..انا بقى غلطانه في موضوع التبني ده
مصطفى-: اممممم ...شوفي يا ميمي انتي صح جدا
أمينه بإستعجال-: الله الله ...ينصر دينك يا خالو كنت عارفه انك معايا
مصطفى-: ههههههه و بردوا بابا وماما صح جدا
أمينه-:: ليه كده ماكنا ماشين حلو يا درش ..ايه اللي حصل جبت ورا ليه
مصطفى-: يا بت اهدي شويه خليني اعرف اخد وادي معاكي في الكلام ولا انتي عاوزه تاخدي وبس ....المهم أنا قصدي ان وجهت نظركم صح جدا ..كل واحد فيكم عنده سبب مقنع .علشان كده لازم نتناقش و كلنا مع بعض كعيله ..لان المفروض يا استاذه أمينه لو هتتبني طفل هيبقى اختي وجوزها .هما جدوده ..ده طبعة لو وافقوا علشان لو مافيش موافقه الحياه بينكن هتبقي جحيم و لأنه مش هيتقبلوه وهيرفضوه وانتى هترفضي رفضهم و هتضطري يا تبعدي عن اهلك يا ترجعي الطفل للملجاء تاني و بكده هتكوني مش بس ظلمتيه لا كمان هتكوني قتلتيه بالحياه
أمينه-: خالو هو انا بتصل بيك علشان نلاقي حل لمشكلتي ولا علشان تسودها قدامي ..كل اللي قولته انا عارفاه كويس ايه الحب بقي يا ابودماغ الماظ..انا عارفه انك الوحيد اللي هتقنعهم
مصطفى-: مش لمة انا اقتنع الأول يابنتي ...أمينه فكري كويس في كلامهم انتي فعلا ممكن متعرفيش تتجوزي بسهوله لان مافيش حد مضطر يربي ابن ولا هو ابنه ولا ابن مراته حتي ..انتي ممكن تضيعي فرص حلوه كتير بسبب قرارك ده
أمينه بكسره في صوتها -: يعني افهم من كده انك اقتنعت بكلامهم ..كده يا درش بقيت ضدي
مصطفى-: احنا مش في حرب يا ميمي ولازم تتأكدي أننا كلنا بنحبك و بنتمني من قلبنا انك تعيشي مبسوطه و بس
أمينه-: وانا علشان اكون مبسوطه عاوزه ابقي ام هو ده عيب ولا حرام .عاوزه أملي الفراغ اللي جوايا ..والله يا خالوا انا مش معترضه علي امر الله .واكيد في حكمه لكده .مايمكن ربنا عاوز انا واللي ذي نربي و نحمي أطفال مالهمش ذنب في اليوم اللي عايشين فيه ..ارجوك يا خالوا وليك الأجر عند ربنا ..ابوس ايدك وافق ( وانهارت أمينه من البكا))
مصطفى ودموعه في عنيه بس مش عاوز يبن في صوته انه بيبكي-: حاضر من عنيا يا ست البنات كلهم انا هاجي عندكم النهارده بس من غير عياط و دراما الله يخليكي مش ناقصه
أمينه والفرحه مش سايعاها -: ربنا يخليك ليا يا احلي و اغلي درش فى الدنيا
مصطفى-: ماشي ياست البنات انا جاي الساعه ٦ يلا سلام
وفعلا خالها وافق لأنه شايف ان بنت أخته مش بتعمل حاجه لا عيب ولا حرام ...خالها فعلا اتكلم مع والد أمينه ووالدتها
خال أمينه مصطفى .....شوفوا انا مش هقول ليكم غير. حديث رسول الله صلى الله عليه وسلم(انا و كافل اليتيم كهاتين في الجنه وأشار بإصباعيه السبابه و الوسطى )
والد أمينه .....بس كده مين هيرضي يتجوزها
خال امينه ...انا عارف ان حرمان أمينه من الخلفه نصيب ولا اعتراض على قضاء ربنا واكيد ربنا ليه حكمه في كده .واللي هيحبها هيحب تصرفها وكمان وجود يتيم في بيتكم بركه و خير كبير أنتم مش مقدرينه والله انا كمان فكرت إني اتبني ولد واربيه وليه لأ أنا عندي ولدين يكونوا تلاته ومراتي موافقه واللي يرزق والدين يرزق تلاته. ياريت تفكروا صح. وبجد مافيش اجمل من الهديه دي اللي ربنا بعتهلكم ....
وبفضل كلام خال أمينه وكمان اصرارها وقبل كل ده الفضل لله واحده
اضطر والد أمينه و والداتها الموافقه على الفكره وبعدين فعلا حسوا ان التصرف ده هايكون ليه مردود رائع على حياتهم ....أمينه ماقدرتش تستنى للصبح وكلمت شله الأنس واتجمعوا في بيتها وكان السؤال الأهم (هنعمل ايه دلوقتي )
سلمى:_ ...بصي يا أمينه انا اعرف صديقه ليا في الشئون الاجتماعية هاخد منها عناوين الملاجئ اللي في المنطقه عندك وياستي كل واحد فينا تفضى يوم وتروح معاكى
ملجأ ملجأ لحد ما تلاقي الطفل اللي يشدك وتحبيه
ندى .:_.خلي بالك يا ميمي انك مش هتكتبي البيبي باسمك لأنه حرام انتي هتكوني أمه بالتبني و بس
أمينه :-..أيوه طبعا ما انا عارفه
نهى :_...خلاص يا ماما أمينه قوليلي انتي عاوزه ولد ولا بنت
أمينه أول مره تحس بكلمه ماما وفضلت ترددها على لسانها (يا لها من كلمه حقا أنها اجمل من كلمه بحبك حينما ينطقها الحبيب لحبيبه ) فاقت أمينه من شرودها على صوت نهى .:_ايه يا بنتي روحتي فين بقولك عاوزه ولد ولا بنت
أمينه .:_مش عارفه
سلمى :-..لما تشوفي الاطفال قلبك هيقولك و هتعرفي لوحدك سيبيها لله هو اللي هيرمي حب الطفل في قلبك من غير ما تحسي
ندى .:_صح يا سلمى احنا نتعاهد أننا نصلي صلاه الحاجه علشان ماما أمينه وندعلها ربنا يوفقها
أمينه كانت سعيده جدا بوجود شله الأنس في حياتها
___________________________________________________
ندي كلمت احمد ودردشوا شويه وفي وسط الكلام قالت له أن فيه شخص متقدملها وأنه كويس و مش بطال. أحمد كان مش مستوعب وسألها
أحمد :_نعم متقدملك عريس. وده مين واسمه ايه
ندى ردت بتلقائية عجيبه وكانها حفظه .:_..اسمه احمد
أحمد ضحك ..:-..اسمه احمد طيب و بيشتغل ايه مرشد سياحي
ندى اتكسفت جدا وحست قد ايه هى غبيه .:_..لا يا سي احمد مش بيشتغل مرشد سياحي .هو عنده شركه استيراد في بورسعيد
أحمد ّ.:-وليلى موافقه
ندى.:-..لسه ما عرفتش بس هو كويس
أحمد بجديه شديده وبهدو .:_.انت عاوزه تتجوزي يا ندى
ندى اتهزت من السؤال وكان جواها مشاعر كتير :_...ايه السؤال ده يا احمد وبعدين ليه لأ هو انا مش من حقي
أحمد .٪-اوك يا ندى ربنا يوفقك تصبحي علي خير
--------------------::::--:-:----------------
ندى بعد المكالمه ...هو انا ليه قولت كده (وحست نفسها غبيه)
أحمد كان هينفجر من الغيظ وبردوا مش عارف ليه-:
كان رايح جاي في اوضته وبيتكلم نفسه -"-: يا ترى فعلا يا احمد بتحبها للدرجه دي يا ترى هي حاسه بيك ولا علشان بتقولها يا رمضان حست أنها رمضان فعلا
وحتى لو هو ماينفعهاش طب ليه بقى الغيظ ده
هو كان واضح معاها من الأول ودي نقطه في صالحه وبعدين تاب عن الهلس وهي كانت معاها وهو بيكتب بايده شهاده ميلاد جديده لحياه جديد وبردوا دي نقطه في صالحه
طيب يصرحها بمشاعره ويتركلها حريه الاختيار
وثاني يوم اتصل بيها .........
أحمد .:_ازيك ياندي عامل ايه
ندى .:_الحمد لله يا احمد انت عامل ايه النهارده
أحمد .:_..على فكره يا رمضان انا هخطب قريب
ندى بقالها كتير ماسمعتش كلمه رمضان من بعد ما احمد راح السعوديه. بس مااهتمتش غير بكلمه هخطب
ندى باهتمام .:_ايه هتخطب ومين بقى سعيده الحظ
أحمد .:-..بنت. شوفتها هنا وجميله جدا
ندى بغيظ :_.واسمها ايه
أحمد .:-.ندى اسمها ندى
ندى اتكسفت جدا ووشها احمر .:_.يا سلااااااااااام انت بتهزر
أحمد:_ واشمعني لما قولتى ان فيه واحد عاوز يتجوزك واسمه احمد انا ما قولتش... يا سلااااااااااام 😉😂
ندى :_.خلاص يا احمد كفايه هزار بقى
أحمد.:_..لا والله مش بهزر انا فعلا بحب ندى ..بحبك
انتي ....ندى انا عاوز اتجوزك
ندى بجد كان هيغمي عليها على الرغم انها كانت عارفه ان الحوار ده هيجي اليوم اللي هتسمعه .ّ.لكنها تمسكت وقامت من قدام اللاب توب ووقفت قدام شباك اوضتها احمد كان شايفها لأنهم بيتكلموا فيديو كول
أحمد :_.ايه يا ندى للدرجه دي طلبي صعب انا عارف ان متقدملك احمد تاني خلاص ياستي ماشيها احمدين ..(وضحك) .....نقي واختاري
ندي بعصبيه .:_...اختار ايه هو انا في محل و محتاره بين شنطتين
أحمد .:_خلاص يا ندى بلاش عصبيه انا قصدي قدامك عرضين وانتى عارفني كويس انا بالنسبه لك ذي ثلاجه السوبر ماركت واضح جدا وعارفه ايه اللي جوايا وعارفه ماضيا كويس ومش محتاج منك غير انك تكوني حضني واماني وفرحتي واتمنى لو تقدري تتعايشي مع ماضيا هكون أسعد راجل في العالم
ندى :-ومين يضمن لي أن الماضي يفضل ماضي وبس ..أحمد انت ممكن تكون اتغيرت بس لسه جواك احمد السافل بتاع زمان
((و دي أكثر حاجه غلط قالتها))) لكنها كملت -:
ندي :انت عاوز. واحده محترفه ترضى غرورك عاوز وحده تحت رجليك انت بنفسك.اللي قولت كده مش معنى انك ابتديت تصلي و روحت الحج بقيت خلاص شيخ لا كل ده زهوه إيمان جديده هتاخد وقتها وتروح بعد كده
((و دي. تاني حاجه غلط قالتها))
أحمد كان مصدوم من رأي ندى فيه و قالها .:_ يعني ربنا اللي انا غلطت في حقه وعصيته سامحني وهداني وكان رحيم بيا وتقبل توبتي .وانتى ياندي رافضه توبتي
ندى اتصدمت من كلام أحمد لأن ردها كان غبي ومش في مكانه .أيوه يا ندى انتي فاكره نفسك مين علشان تجلدي احمد بالطريقه دي ..
أحمد .:_..للدرجه دي طول الفتره اللي فاتت شيفاني زباله كده ....اخد نفس عميق وكأنه بيدور على الهوا......
وكمل :-
(انا ولا هلومك ولا هعتبك لأن ده مش غلطك انا اللي عملت كده في نفسي انا فعلا سافل وزباله..................................... مع. السلامه يا. ندى💔💔💔
توقعاتكم بلييييز
يتبع
تعليقات
إرسال تعليق