 |
حلقة السابعه
فارس -: هتعمل ايه
أسامه -: هتجوز ساندي
فارس على الرغم من اللي حصل لساندي إلا أن فكره أنها تتجوز غيره كان بالنسبه له ضرب من الخيال لا يمكن كان يستوعب فكره أنه يشوفها بالفستان الأبيض غير ليه هو وبس .حاول يفوق من صدمته وقاله
فارس -: ....تمام انا هتكلم مع ساندي وهبلغك عن اذنك وبينا تليفون
فارس كان بيسوق عربيته و مش عارف يقول ايه .. تفكيره كله مشلول
فارس لنفسه -: بقولك ايه فوق كده ولا زم تبقى قوي ..دي محنه انت فيها وهتعدي ذي ما موت بابا كان بالنسبه لي كسره ضهر .بس عدي كل الحزن و الحياه كملت ..انا فعلا مش بس بحب ساندي دي عشقي من سنين طويله .لكن الحياه و القدر ليه كلمته .و مش كل حاجه بنتمناها لازم بالضروره تكون هي الافضل لحياتنا ....انا لازم ابقي اقوي من كده و اقف جنبها و نعدي الوقت الصعب ده ..و بعدين اسامه باين عليه انه انسان عنده ضمير ..ممكن هو ماحبش ساندي قدي ولا هى حبيته بس لما يتجوزوا تكون حياتها معاها احسن بكتير من حياتها معايا ..تدبير ربنا لينا فيها الخير دايما حتي لو بانت لينا في البدايه أنها قاسيه .لكنه سبحانه هو اللى عارف الصح و الأفضل لعباده
فارس وصل لفيلا نهله و كان باين جدا علي وشه الحزن و الإرهاق
نهله -: اهلا يا فارس ...خير ولو ان تعبيرات وشك بتقول حاجه تانيه
ساندي هتموت من القلق و الخوف مش عارفه هي خايفه من فارس و لا خايفه عليه...بس الاكيد هي خايفه علي زعله جدا ما كنتش تتمني ابدا تشوف فارس في مكسور و نظراته حزينه كده
فارس بعيون حمرا وصوت مبحوح-: اسامه مصورش حاجه ..وهو بيعتذر علي اللي حصل و ماكنش معاوز ابدا ان الوضع بينكم يوصل لكده و......
نهله بنرفزه '-:: ايييه يعتذر نعععععم ....هي كوبايه ولا فازه اتكسرت منه غصب عنه ..و ياحرام هنطبطب عليه و نقوله خلاص ماشي متزعلش نفسك .فداك يا حبيبى.....ده شرف و سمعه انسانه بنت ناس محترمه ...
فارس رفع عينه و بيبص بدموع لساندي اللي هي كمان كانت دموعها كانت بتنزل منها بصمت و ضامه رجليها و حاسه انها بقت رخيصه اوي و خصوصا قدام فارس
فارس -: أسامه عاوز يتجوزك يا ساندي
نهله مكملتش كلامها و برقت من الخضه...اما ساندي وقفت فاجاه و كأنها مستعده تتكلم لكن وقعت مغمي عليها
فارس حضن ساندي و شالها علي الكنبه أمة نهله فجريت علي اوضتها وجابت البرفيوم تفوق صحبتها.. بعد شويه ساندي فاقت و كانت في لسه في حضن فارس وفاجاه شدته من هدومه وقالت ...
ساندي بصوت ضعيف اوى-: ارجوك متخليهوش ياخدني منك ...مش هقدر ..والله مش هقدر
فارس ابتسم ابتسامه صغيره و حط ايده علي راس ساندي و كان بيمسح علي شعرها من غير ما يتكلم
نهله شافت كل ده قدامها وانسحبت وهي بتبكي علي الحب اللي بيضيع قدامها و حقيقي مابقتش عارفه هو ليه القدر بيلعب بينا كده ...و لحد امتي فارس و ساندي هيفضلوا في العذاب ده
فارس -: قومي يا ساندي و اقعدي و تعالى نطلع شويه في الجنينه نشم شويه هوا فريش ...و نهله تعملنا عصير فراوله ...انتي بتحبي الفراوله انا عارف
ساندي ابتسمت ووقفت جنب فارس و راحوا الجنينه ذي ما قلها ..كانت ماسكه ايده و بتبص في عينه و بتمشي معاها و كأنها مسحوره
ساندي -: انا عارفه اني طول عمري حِمل عليك ..من واحنا صغيرين ...عمرك ما سبتني .دايما انا اللى ببعد لكن لما برجع بلاقيك دايما مستنيني...انا اسفه ...ارجوك سامحني
فارس -: ششششش .،!! ساندي ماتفكريش في اللي فات ..خلينا نشوف الحياه عملت فينا ايه ...لازم نكمل الحياه..لازم نفكر بالعقل ...بلاش تخلي العواطف هي اللى توجهك ...دلوقتى في الوضع اللي انتي فيه ..وللأسف انتي اللي حطيتي نفسك فيه ...انا كنت رايح علشان أجبره يصلح غلطه ..بس الحمد لله كان ضميره حي .وهو اللي قرر يتجوزك بإرادته لانك تستحقي انك تكوني انسانه و زوجه محترمه مش واحده رخيصه
.ساندي صرخت بكل صوتها لدرجه ان نهله من خضيتها وقعت صنيه العصير
ساندي-: لا يمكن اتجوزه حتى لو اموت لا يمكن أسمح ليه انه يلمسني تاني
فارس بهدو..-: ليه لا هو انتي عاوز ايه بعد اللي حصل لازم يصلح غلطته
ساندي بتصرخ بشكل هستيري-: لا يمكن اابدا ابدا انا عمري ما هتجوز ولا هو ولا غيره ...ارجوكم سيبوني في حالي ..ابعدوا عني ..مش عاوزه حد يساعدني ..امشي يا فارس امشي ..خلاص انا بقيت غلطه و عار ليك .ابعد عني و ارتاح وإنساني
نهله ..-: الحقها يافارس متسبهاش دي ممكن تأذي نفسها خليك ماسكها....انا هكلم الدكتوره تيجي علشان تديها حقنه مهدئه
فارس .-: .أيوه كلميها بسرعه يا نهله
ساندي ..-:.لا انا مش عاوزه دكاتره انا كويسه ..
وابتدت تتكلم بصوت واطي شويه وتستعيد نفسها ووقفت قدام فارس بعيون كلها دموع
ساندي ...-:.فارس انا بجد متشكره على كل شي واسفه على كل شي ...( اتنهدت و اخدت نفسها بصعوبه )....اسفه علي الجروح اللي سببتهالك
.فارس لسه هيتكلم .ساندي حطت ايديها على شفايفه ودي أول مره ساندي تلمس وتكون بالقرب ده منه وحس أنه بيتكهرب وفضل واقف قدامها يسمعها
ساندي بصوت حزين مكسور مقهور مش علشان اللي حصل وبس لكن الأهم أنها ضيعت من ايديها أغلى شي في الوجود (الحب الصادق)....
ساندي .-: .فاكر يا فارس آخر حوار لينا لما كنت فى الاصطبل بتلعب في شعر ساندي الفرسه وكنت بكلمك. وانت واقف ومش بتبصلي وسالتك هو انت هتفضل مخاصمني كتير فكان ردك ايه .قولتلي انك سألتني سؤال ومستني الرد وساعتها قولتلك بغبائي الاجابه الغلط أو بمعنى أصح ابتديت بالاجابه الغلط قولتلك ساعتها .لو كان ردي لأ ساعتها قولتلي هحترم قرارك بس كان المفروض اقولك وقتها لو كان رادي أيوه موافقه بس غبائي اللي خلاني ابتديت غلط وجبت سيره السفر لأمريكا ولأني ابتديت غلط كانت النهايه غلط ...
.رمت نفسها في حضنه وهي بتبكي ومش قادره تاخد نفسها خالص ..
ساندى-: .انا اسفه وأنا عارفه ان كلمه اسفه مش هترجع اللي راح ..
فضلت في حضنه تبكي وتمسك فيه وهو واقف وماحضنهاش ..جزء منه بيقول خدها في حضنك اللي حصل غصب عنها دي تم اغتصبها..يعني مش بمزاجها... وجزء بيقول مش قادر عاوز وقت بس مش قادر...وقفت عن البكاء واخدت نفس عميق وباسته في خده وقالت له
ساندي-: انا مسافره أمريكا الأسبوع الجاي تصبح على خير
وجريت على اوضتها كالعاده ترمي نفسها تحت السرير تبكي بوجع
أما فارس سكت و معرفش يعمل ايه ولا يقول ايه..خرج من الفيلا و قرر انها يرجع المزرعه فورا ولم يذكر لأحد أي شئ حتى أمه ...وقالهم قرار ساندى أنها هتسافر أمريكا وده قرارها النهائي
(((في فيلا اسامه المصري ))))
اسامه:بابا انا عاوز اتكلم مع حضرتك
عيسى :_قبل أي حاجه عملت ايه مع بنت عبد الحميد
اسامه :_ماهو ده الموضوع.. عبد الحميد مختار
عيسى :_الله يحرقه مترح ماراح.؟ ماله بقى ؟
اسامه :_مش هو اللي سرق فلوس القرض... انا عرفت الحقيقه انت اللي طلبت منه يضمنك وطبعا مسدتتش الفلوس واتحجز عليه و مات من الحسره و المرض
عيسي :_مين قالك الكلام ده
اسامه :_ من البنك..المهم قبل أي حاجه عاوز اعرف الحقيقه
عيسي -: حقيقه ايه..ما انت خلاص عرفتها
اسامه -: حقيقه اللى حصل ..ليه عملت كده مع صديقك ..ليه غدرت بيه و خنت ثقته فيك و موته فقير و مقهور
عيسى :_انت جاي هنا تحاسبني يا ولد...و بعدين لو عاوز تعرفي ليه ده حصل..هقولك ....علشان تبقى رجل أعمال ناجح لازم تعرف ان الحياه فرص...والدنيا دي ذي المحيط الواسع ..الكبير لازم ياكل الصغير علشان الحياه تستمر ...لو مأكلتش غيرك و كبرت ..هتتاكل انت ...والشاطر اللي يدور على مصلحته ..
اسامه :_يعني اللي قولته كان صح انت سبب تدمير عبد الحميد وخلتني كمان سبب تدمير بنته... ليه هي عملت فيك ايه
عيسى :_ماعملتش بس كانت هتعمل. الهانم كانت ناويه تتجوز حضرتك وانت ابني الوحيد يعني كل حاجه هتكون ليك وبما أنها هتبقى مراتك فكل حاجه ترجع ليها
اسامه :_ولو فرضنا كلامك صح.. مش اساس ثروتك فلوس ابوها يعني ابوها صاحب الخير الحقيقي في اللي احنا فيه
عيسى :_كسر حقك.. انت بتقول ايه انا السبب انا اللي عملت كل ده بدماغي وذكائي
اسامه :_مقدرش اقول غير الله يسامحك
عيسي -: و دلوقت بعد ما سيادتك عرفت ناوى علي ايه بقى..هتسجني و تقدمني للمحاكمه
اسامه -: لا ابدا يا عيسي بيه ..انا بس برجوك ترجع فلوس الراجل اللى مات من قهرته .لبنته ..علشان ربنا يخفف عنا عذابه
عيسي -: انتي بتدعي عليا يا ولد انت اتجننت ....و يكون في علمك الكلام اللي فى دماغك ده مش هيحصل وده آخر كلام عندي ..و اتفضلي امشي من قدامي
اسامه -: تمام يا عيسي بيه بما ان حضرتك مش موافق انك ترجع فلوس ابو ساندى...فأنا للأسف مشي و مش هقدر اعيش في البيت ده تاني و اكل من مال حرام
عيسي -: انت بتهددني كمان ...لا و بتتحداني...طب اطلع بره بيتي و ابقى و ريني هتعرف تعيش اذاي و انت مطرود من امبراطوريه عيسي المصري..انت من غيرى ولا حاجه ...اطلع بره
خرج اسامه من بيت أبوه..ماكنش زعلان وكل اللي حصل كان متوقعه .فكان الحل من وجهه نظر ه أنه يبيع أي حاجه مكتوبه باسمه ويدي ساندي اي فلوس حتي لو بمثابه تعويض علي اللي عمله والده في والدها.. وفعلا قدر يجمع 2مليون جنيه... طبعا والده اتجنن لكن اسامه عمل اللي هو شايفه صح وأنه يريح ضميره بيه وحط الفلوس في البنك وفتح حساب باسم ساندي و اتصل بفارس
اسامه:_مساء الخير باشمهندس فارس
فارس :_مساء الخير يا اسامه
أسامه :_انا اتأكدت من كلامك وفعلا بابا اعترفي انه كان السبب المباشر في اللي حصل لعبدالحميد بيه والد ساندي
كل اللي اقدر اعمله اني احاول ارجع ولو جزء بسيط من اللي والدي اخده وطبعا بابا رفض فأنا عندي أصول مكتوبه باسمي قدرت ابيع منها وجمعت مبلغ 2 مليون جنيه للاسف المبلغ صغير جدا بالنسبه للي بابا اخده من والد ساندي..لأن على ما جمعت أوراقي علشان ابيع. كان والدي عرف و لاغي كل التوكيلات اللى عملهالي و مقدرتش غير اني اجمع المبلغ ده للأسف وفتحت حساب لساندي في البنك....واسمحلي اشوفك علشان اديك الأوراق الخاصه بحسابها فى البنك والفيزا كمان
فارس :_شي محترم منك يدل علي انك بني آدم عندك ضمير لكن للاسف يا أسامه ساندي مسافره أمريكا خلال أيام
اسامه :_مسافره؟!!!!!...اعتقد انها بتهرب من كل اللي حصل .... لكن علي العموم ممكن تكون دي فرصه كويسه ليها جايز تقدر تخفف عنها اللي حصل مع ان مافيش شي يقدر يعوضها ولا ينسيها
فارس :_علي العموم انا هبلغها باللي قولته
اسامه :_لا من فضلك اكيد هترفض حضرتك بس قابلني النهارده وخد الأوراق والفيزا ولازم تقنعها انها تاخدهم.. انا بجد اسف علي كل حاجه
في فيلا نهله
ساندي :_لا طبعا انا مش ممكن اخد من الحيوان ده حاجه هي الجريمه اللي عملها ينفع اخد تعويض عنها
فارس :_لا يا ساندي انتي فاهمه غلط ده جزء من فلوس خالي اللي ابوه نصب علي البنك وخالي هو اللي ضاعت ثروته بسببه... وبعدين تفتكري اني كنت هقبل الفلوس دي لو حسيت انها جايه كاتعويض هو انا هقبل العوض في شرفي
(وسبهم وخرج)
نهله :_ساندي فارس عنده حق ده جزء من فلوس والدك الله يرحمه يعني ميراثك من ابوكي وده حقك وخلي بالك اننا مسافرين وانتي مش معاكي فلوس كفايه و دي حكمه ربنا ان الفلوس تيجي في التوقيت ده... اقبليها علشان حتي تريحي عمو عبدالحميد في تربته
اسامه -: الو صباح الخير يا عم حسن ..
عم حسن اللي مربي اسامه من سنين بعد ما أمه و أبوه أطلقوا
عم حسن-: أسامه حبيبي يا بنى..كده تمشي و متسالش على عمك حسن ..هانت عليك العشره و تربيتي فيك
اسامه -: انا اسف يا عم حسن ..بس كان لازم امشي انت عارف اني مقدرش اقعد اكتر من كده ...بابا هو اللي طردني
عم حسن -: انت ناسى انك قولته هتمشي
اسامه -: انا كنت بهدده بس و بعدين متوقعتش أنه هيكون بالقسوه دي معايا ..ده انا ابنه الوحيد ...انت عرفت انه لاغي التوكيلات و قفل الفيز بتاعتي ..يعني حرمني من كل شي ....وعلي العموم مالوش لزوم الكلام ده ..انا بكلمك علشان تجهزلي شنطي و هقولك علي كام حاجه في مكتبي تحطها مع الشنط و لما تجهز كلمني اجي اخد حاجاتي من غير ما بابا يعرف علشان مسافر ..
عم حسن -: مسافر ليه و فين ..هتسبني و تمشي يا أسامه
اسامه -: لازم امشي ..عاوز اعمل نفسي بعيد عن امبراطوريه عيسي المصري ..محتاج ابقي حاجه تانيه غير اني ابن عيسي المصري ....ارجوك يا عم حسن مالوش لازمه اي كلام هتقوله انا اخدت قراري و كمان حجزت و هسافر بعد 4ايام
عم حسن -: حاضر يا ابني ..انا بس كنت بقول .انك ترجع لحضن ابوك و تستسمحه ..وانت لسه قايل انك ابنه الوحيد..وياسيدي لو علي اللي عمله معاك فى الشغل ..اعتبرها قرصه ودن ..ماهو بردوا ابوك و من حقه يقسى عليك شويه
اسامه -: من فضلك يا راجل يا طيب ..اعمل اللى طلبته منك ..و بعدين انا مش مهاجر ..انا بس محتاج ابعد شويه و اعافر مع الحياه و اعمل نفسى بنفسي و اكيد هرجع تاني و عمري ما هنساك يا عم حسن ..
سافر اسامه وبعد عن والده كان عاوز بدايه جديده في كل شي .اسامه بعد التجربه اللي عاشها كان شايف نفسه إنسان مقزز جدا وكان كاره نفسه بشكل كبير .منظر ساندي وهي بتبصله بنظره احتقار وبتقوله أنه حيوان مشهد مش عاوز يخرج من دماغه وكان السفر فعلا بالنسبه له فرصه كويسه لعلها بدايه جديده .
ساندي -: خلاص يا نهله الشنط جهزت ..اطلبي أوبر يجي يوصلنا
نهله -: ليه هو مش فارس جاي يوصلنا
ساندي -: يا نهله ...ماخلاص بقى كل حاجه خلصت ..بالله عليكي ماتقلبيش عليا المواجع ..انا خلاص مابقتش قدره اتكلم فى اى حاجه تخص الماضي
نهله -: وهو فارس بالنسبه لك ماضي
ساندي بلهفه -: عمره ما هيكون ماضي ابدا ...فارس هيفضل لحد اخر نفس في عمري هو بكره بالنسبه هو الأمل و الحياه..في حد يقدر يعيش من غير امل ولا حياه...انا بس مش عاوزه اتكلم عن اللي فات لأني هفضل فاكره وجع وكسره فارس وده بالنسبه لي منتهى الألم
نهله-: خلاص ياحبيبتي مش هنتكلم في امبارح تاني ...معدش ليه لازمه الكلام ..احنا خلاص هنبتدي حياه جديده..ربنا ادانا فرصه جديده..لازم نعيشها صح
وفي النهايه سافرت تلك الفتاه الجميله الحزينه ..تركت قلبها وسافرت ...يقولون فى السفر 7فوائد لعلها تجد فيه ولو فائده ..لعلها تستعيد توازنها أو تستطيع حتي ان تبني نفسها من جديد.....
عملت في احدي الشركات ..وكان يحوم حولها الكثير من الشباب فتلك الفتاه تستحق ان تحب ..بل تستحق ان تعشق ..لكن حكم القلب .وهل لنا يد فى احكام القلوب و هواها ..نحن فقط ننساق لما يأمر به القلب ..ننفذ رغباته فقط . فهو السيد .هو الأمر...يسظل قلب ساندي ينبض من أجل فارس فقط..فهو فارس الأحلام المنتظر
_____________________^^^^
فارس -: الو اهلا اسامه خير فيه حاجه
اسامه -: اهلا بيك يا بشمهندس فارس ..انا اسف لو بتصل في وقت غير مناسب
فارس-: لا ابدا بس انا مستغرب الاتصال
اسامه -: اصل عاوز اطمن علي ساندي و مش عارف اوصل لها ..
فارس بغضب مكتوم -: ليه ..عاوز منها ايه ..اظن انها صفحه و اتقفلت ..و بعدين انا قولتلك انها سافرت أمريكا...
اسامه -: ما انا عارف انها سافرت أمريكا و انا كمان سفرت قبلها ...انا بس عاوز اعرف هي في ولايه ايه
فارس غضب جدا لما عرف أن اسامه هو كمان في امريكا
فارس -: وانت سافرت أمريكا لساندي ولا ايه
اسامه حس بغضب فارس -: لا لا والله انا عملت مشكله كبيره مع والدي و تقريبا طردني و حرمني من كل حاجه فقررت ابعد عن سيطرته و اسافر اشتغل واعمل نفسى..والحمدلله قدرت ابتدي و انشالله الجاي هيكون افضل ..انا بس بسأل عن ساندي علشان لو هي محتاجه مساعده اقدر أقدمها لها ولو من بعيد و بشكل غير مباشر..
.يا بشمهندس فارس ..انا حقيقي مش عاوز حاجه من ساندي غير أنها تسامحني وبس وانا عارف ان حتي الطلب ده صعب انه يحصل و يمكن مستحيل. علشان كده قولت لنفسى اني لو قدرت اساعد ساندي في شي و من بعيد ..يمكن اقدر اسامح نفسي الاول وبعدين ابقى اطلب مسامحتها...
فارس -: علي العموم هو شعور جميل بس انا معرفش حاجه عن ساندي...
(( فارس كان يكذب علي اسامه ..هو يعلم عن ساندي كل شي منذ وصلها بأمريكا..لكنه يغير عليها لا يريد أن يراها اسامه أو حتي يكلمها .. علي الرغم من بعدها عنه و كل ما حدث ..الا أنها لازالت حبيته و ستظل هكذا لاخر العمر )))
اسامه لم يفقد الأمل واستطاع ان يعلم مكان ساندي بمساعده أصدقائه بأمريكا وتحديدا في القنصليه وعلم انها في نيويورك ..وعلم عنوان مكان عملها وبالفعل وصل لساندي وفي يوم بعد أن انهت عملهابالشركه كانت مفاجأه حينما رائها ذهب اليها بكل حماس ونادي باسمها
اسامه .-:.ساندي ساندي
ساندي التفتت ناحيه الصوت.!!!!!!!!! لم تصدق ما رائته أو لا تريد تصديقه
اسامه ...-:ازيك يا ساندي ....يا ساندي انا عاوز اتكلم معاكى
من فضلك ادينى فرصه ....
ساندي فاقت من الصدمه وبعدت عنه وكملت ماشى ووقفت تاكسي علشان تركبه اسامه فتح الباب الثاني بسرعه وركب هو كمان بصتله باستغراب شديد ولسه هتخرج مسكها من دراعها وقالها
اسامه .:_..ارجوكي في حاجات كتير عاوز اقولهالك وبعد كده اقسملك ما هوريكي وشي تاني ممكن نروح مكان نتكلم فيه
ساندي ...:_مافيش مكان ممكن يجمعنا من فضلك انزل .
.وكانت نبره صوتها فيها اصرار شديد وحتى سواق التاكسي عرض عليها أنه يطلب البوليس لأنه شافها بتصرخ في اسامه بس هي رفضت واضطر اسامه أنه ينزل من التاكسي
وكان بيكرر محاولاته كل يوم من غير ما يزهق
----------------------!!!!!!
دخلت الفتاه من باب شقتها وهي غاضبه منزعجه بشده ...تلقي حقيبتها بعنف علي الاريكه..تريد ان تخرج شحنه الغضب في اي شئ...نظرت اليها صديقتها باندهاش. فهذه المره الاولي منذ وجودهم بأمريكا..تري تلك نوبات الغضب المتزايد
نهله -: مالك يا بنتي ..هو انتي كل يوم ترجعى متعصبه كده ..فيه ايه ؟؟
ساندي -: يوووه ما انا قولتلك ..الزفت اسامه كل يوم اخرج من الشركه الاقيه متنيل واقف مستنيني ..وبردوا يفضل يطاردني علشان اكلمه و انا أهرب منه ..اعمل فيه ايه؟ جبله مبيزهقش ..انا بكره لو شفته تاني و الله هطلب له البوليس..انا قرفت
نهله -: وليه ده كله ما تشوفي عاوزك فى ايه ما يمكن جيب لك فلوس تاني
ساندي -: يا سلام يا اختى..انا مش عاوزه من و شه حاجه ..وبعدين لو الموضوع فلوس هو اساسا اللي فتح لي حساب البنك يعني يقدر يحط الفلوس و من غير ما يشوفني ولا يكلمنى
نهله -: يعنى إيه مش عاوزه منه حاجه ..هو بيديكي صدقه ولا إحسان ..دي فلوسك يا عبيطه. فلوس ابوكي ...هو اللى هنعيده نزيده تاني ولا ايه ...وبعدين لو مش فلوس كاش ممكن يكون عقارات أو أصول..يعني حاجه ذي كده ..المهم بدل ما نعقد نحتار انتى الافضل توافقي تقبليه ..مش هتخسري حاجه...و لو مش عاجبك كلامه .ابقى بلغي البوليس عنه و ريحي دماغك و يا ستي ما تقلقيش انا هكون موجوده معاكي ..يعني مش هتقابليه لوحدك ...ايه رايك ؟
ساندي -: طيب ماشي وعلي رايك مش هخسر كتير المره ده ..مش هخسر اكتر من اللى راح ..للأسف
نهله تحضن صاحبتها -: متقوليش كده يا حبيبتي..اللي حصل كان غصب عنك ..و بعدين احنا اتفقنا على ايه ..مش قولنا صفحه و اتقفلت ..سيبك من وجع القلب ده و تعالي يلا نتغدى....ماما عزمنا..يلا بسرعه غيري هدومك
ساندي-: هو انتي بردوا لسه مصره متروحيش تعيشي مع اهلك ..
نهله -: لا ياستي مش رايحه في حته ..قاعده فوق دماغك ...انا مش عاوزه أعيش معاهم ..انا اتعلمت و عاوزه اشتغل و اثبت نفسى..مش عاوزه اقعد في البيت و استني العريس ذي ما هما عاوزين..و بعدين خلاص ماما و بابا رضيوا بلامر الواقع و خصوصا بعد ما شافوا اني ناجحه جدا فى شغلي
ساندي -: اتمنى لك كل خير و تحققي كل أحلامك.. يلا حبيبتي انا جاهزه ..و هموت من الجوع كمان...
..تاني يوم وكالعاده اسامه واقف مستنيهاساندي راحت لاسامه بنفسها و هو استغرب لكنها فاجاته بكلامها
ساندي ':_انا هستناك في البيت الساعه6 و نهله هتكون موجوده ...وأنا هسمعك وبس.... بعد كده ماشوفش وشك ولا اسمع صوتك تاني ابدا ..مفهوم ..
اسامه :_ انا موافق مش عاوز اكتر من انك تسمعيني وبس أنا عاوز أشيل جبل من الهموم على قلبي ..انتي متعرفيش حالتي بقت عامله اذاي ...علي فكره انا مابقتش عايش ما والدي ولا حتي بشتغل بفلوسه ...انا هنا بشتغل بنفسي و لنفسي من غير مساعده منه و لا من اي حد ...
سااندي-: وانا مالي بتحكيلي ليه ...المهم ما تنساش المعاد ولو اتاخرت متجيش احسن علشان انا مش هستقبلك
ذهبت ساندي وهي تشعر بعد الارتياح ..تشعر انها غير قادره علي التنفس ..بسبب تلك الدقائق الي اهدرتها مع اسامه..فهو لايستحق هذا الوقت ولا هذا الحوار منها فهو اصبح نكره ليس له تأثير في حياتها...وهي الان ستجد نفسها مرغمه لمقابلته مره اخري ..لكن ما يخفف عنها هذا الضيق. انها تري تلك المقابله ضروره لكي لاتري وجهه اسامه مره اخرى..او هكذا طمأنت نفسها
عندما سفرت الفتاه لأمريكا ومن اليوم الاول كانت تتحدث مع فارس كانت تصور فيديوهات وتظل تحكي له كل شئ بالتفاصيل كانت تصور يومها و ترسله له ..حينما تاكل أو وهي تشترى الطعام أو أي امر اخر تقوم به حتي وهي تسير بالشارع وهي في عملها وهي تستعد لتنام وبالبيجامه اوبتغسل سننها كل التفاصيل اليوميه تجعله يعيش معاها أيامها كانت تحاول تقترب من فارس و تذيب جبل التلج بينهما ولو قليل لكن فارس كان يري فيديوهاتها لكنه لم يكن يجيبها أو يرسل لها اي شيء ظل على هذا الوضع لمده 3شهور ..لكن في يوم قررت ارسال فيديو مميز و مختلف فقالت له ....
ساندي -: فارس انت طبعا مستغرب ان ديما ببعتلك فيديوهات تفاصيل يومي وحياتي هنا من ساعه ما وصلت لحد دلوقتي ممكن ابعتلك في اليوم أكثر من 20فيديو.وعارفه انك مش بترد ولا هترد عليا واتمنى إنك تسامحني واعترف إني ضيعت من أيدي اجمل واغلى وانقي قلب ممكن يحبني ويحافظ عليا واني عمرى ما هلاقي فارس أحلامي إلا فيك لأن مافيش فارس غيرك في حياتي انت فارسي
(كانت بتتكلم وهي بتبكي ومنهاره )
انا مش منتظره انك تسامحني لأني ماستهلش حتى انك تفكر فيا انا ضيعتك وعارفه إني مش هقدر ارجعك ...بحبك يا أغلى من نفسي بحبك وبقولهالك وعارفه أنها متاخره واتمنى يجي اليوم مش انك تحبني تاني لاني انا مستهلش حبك بس اتمنى تسامحني .خالي بالك من ساندي الفرسه
(اخدت نفس طويل مع دموعها وقالت له بكل حب وانكسار)......تصبح على خير
😥💔
و احنا بنقولك بكل الحب تصبحي على خير يا ساندي
فانزاتي ..تفتكروا ينفع ساندي و غيرها من البنات اللي في نفس ظروفها..تلاقي اللي يقف جنبها و يقدر فعلا ان مالهاش ذنب في اللي حصلها ..ولا هنفضل احنا كمجتمع .يدوس عليها ..و يتعامل مع المجني عليه .على أنه جاني ..و ننسى اننا بشر مش ربنا علشان نحاسب بعض
يتبع
تكملة الروايه من هنا
تعليقات
إرسال تعليق