مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

البارت الثالث والرابع من رواية نشأت وانا متزوجه

بصيت لقيت راجل بعباية واقف عند الباب الكبير وبيبصلنا بإبتسامة بشوشة ولما قربنا منه أخدني في حضنه جامد مع أني أول مرة أشوفه بس حسيت براحة غريبة وأتأكدت من كلامهم عنه 

محمد(والد سليم وعمها):-أخر مرة شفتك كنتي في اللفة وكنت بعزك زي ملك بنتي بالظبط وتعدي السنين وتكوني عروسة قصاد عيني بنفس ملامح الطفلة البريئة ومعزتك في قلبي حتي الآن متغيرتش

 

كنت فرحانه بكلامه ولما دخلنا وزوجته وحضنها ليا والمحبة اللي لقيتها من أول ما دخلت من الباب خلتني أنسي كل التوتر اللي كنت حاسة بيه وبتعامل معاهم بتلقائية كأني قاعدة وسط بابا وماما وشوية وملك جت عرفت أنها هي من نظرات أدهم ليها كانت بشوشة زي باباها بالظبط وضحكتها وروحها جميلة كفيلة تحببك فيها وكان عنده حق أدهم لما حبها وأخدت عليها بسرعة وقاعدين بنهزر وفجأة قالت

ملك: -سليم تعالي أنت واقف عندك ليه كده

قلبي دق بشكل غبي وصوت دقاته واصل لحد السما، كنت خايفة من المواجهة دي أكتر من أي حاجة في الدنيا وأخدت نفس بالراحة عشان أهدي وقررت أتعامل عادي علي أنه إبن عمي مش اكتر وأن مفيش حاجة وزيه زي أي شخص وأتلفت عشان أسلم 

إيه ده؟!

أنا عيلة أصلاً وبرجع في كلامي طول عمري

عيني خبطت في عيون كحيلة ولونها عسلي صدمت خلايا مخي 

هو كمان عامل دقنه بالطريقة اللي بحبها مصّر يخليني أندم أني مجتش هنا من زمان 

يا زين ما عملتوا من وأنا صغيرة حقيقي جوزتوني قمر ما شاء الله وحاجة شيك كده، أنا جوزي قمر يا أخواتي

إيه اللي أنا بقولك ده؟! أجمدي يا مي كده مش هنضعف من أول مقابلة إيه اللي حصل 

وطيت علي ودن ملك أخته 

مي:-هو القمر ده أخوكي بجد والنبي؟

فضحكت وأتكلمت بهمس هي كمان

ملك:-متقوليش قمر بس قدامه عشان مياخدش قلم في نفسه

مي:-‏حقه بصراحة

كان بيقرب علينا وحركة إيده بتبين قد إيه هو متوتر، كنت مركزة معاه اوي ومش عارفه أبعد عيني عنه، أيوه أول مرة أشوفه بس حاسة أنه مألوف ليا أوي، وقلبي اللي عمال يدق جامد ده عشان هو كمان مش بيبعد عينه 

وجه وسلم علي أدهم جامد وحضنوا بعض

ادهم:-وحشتني يا كبير

سليم:-‏وأنت والله يا دكترة 

وبعدها بعدوا وهو وقف يبصلي كنت شيفاه متردد جدا يمد إيده ومنتظر ردة فعلي فمديت إيدي أنا وأبتسمت 

مي:-أهلاً أنا مي 

لقيته بص لإيدي بصدمة ومد إيده هو كمان وحسيت بكهربا من لمسته وأبتسم إبتسامة جميلة هو ليه كل اللي في البيت ده ضحكتهم جميله؟ 

سليم: -نورتي البيت

مي:-‏ البيت منور بأهله حقيقي

كان ماسك إيدي جامد وبيبصلي وبس وأنا أتحرجت ووطيت راسي وبحاول أسحب إيدي

سليم:-عينك زي ما هي متغيرتش من ١٧سنة 

وأتكلمت ملك بحماس

ملك:-أيوا عينيها خضرا وجميلة زي تيته بالظبط

هو أزاي فاكر عيني من ١٧ سنة؟ معقولة يكون لسه فاكرني كل ده أصلاً؟ فبعدت عن الفكرة وسحبت إيدي وأنا محرجة ولقيت ملك كملت

ملك:-علي فكرة أنتي عندي علي الفيس هو أنا معرفش بس هتلاقي صوره البروفايل جميله زيك عشان كده قبلت ‏أيوا وبالحق كمان آخر بوست كان من كام يوم وكنتي كاتبة أسوأ شعور لما تجيلك الطعنة من أقرب الناس ليك

لقيت أدهم مات ضحك وأنا بحاول أكتم بوقه عشان ميتكلمش وهما بيبصوا ومش فاهمين فيه إيه 

مي:-وحياة عيالك يا أدهم ما تتكلمش

ادهم:-‏والله أبداً لازم يعرفوا سر البوست ده يا جماعة كنت جايبلها حاجات حلوة كالعادة وكان فيه شوكلاتين فـ هي أكلت واحدة وحطت التانية في التلاجة فـ تاني يوم كنت جعان بقولها هاتيلي أكل قالتلي كل نفسك فدخلت أكلت الشوكلاته اللي في التلاجة ومن ساعتها وكأني كلت إبنها 

هو خلص كلامه وكان سليم وملك ميتين علي الأرض من الضحك وأنا مخبية وشي محرجة لحد ما عمي ومراته دخلوا وأتكلم عمي بإبتسامة 

محمد:-كويس أنكم أتقابلتوا يا ولاد ويالا عشان هنحط الاكل

يتبع...

البارت الرابع من رواية نشأت وانا متزوجه

محمد:-كويس أنكم أتقابلتوا يا ولاد ويالا عشان هنحط الأكل 

وأتكلمت مراته بحنان 

:-سهير قالتلي أن مي بتحب المحشي فعملت لعيونك كل الأنواع 

فحضنتها بسعادة

مي:-سلميلي يا مرات عمي يا قمر

تاج:-‏متقوليش يا مرات عمي قوليلي يا خالتو عشان سهير أمك في مقام أختي أو قوليلي يا تاج زي ما كلهم بيقولولي عادي 

مي:-‏الله أنتي أسم حضرتك تاج؟

فلقيت عمي جه وضمّها لصدره وباس راسها وقال بحب

محمد:-أيوا دي تاج قلبي وتاج البيت ده كله اللي ملوش معني من غير حسها فيه 

فأبتسمت بسعادة علي حبهم

مي:-الله أنتو جمال أوي اللهم بارك

فقامت ملك محوطاني 

ملك:-أهو أحنا عايشين دايماً مع روميو وجوليت دول كده علي طول والله لو لقيت حد يحبني ربع الحب اللي بابا بيحبه لتاج لهيبقي كده فل أوي والله ورضا الحمدلله

فضحكت جامد علي كلامها وتاج أتحرجت وخبت وشها في حضن عمي

 

ادهم:-ان شاء الله تلاقيه وقريب جدا كمان ومعلش يا تاج يا حبيبة قلبي أنا لازم أرجع بسرعة عشان يدوب أوصل المستشفى ضروري فمش هعرف أتغدي معاكم

 

-تاج:-لا إزاي طب كُل لقمة سريعه بس حتي متكثفنيش

 

وقعدت تحايله وأكلته معلقتين بالعافية وشيّلته أكل كمان عشان يتسلي طول الطريق وجه قرب مني وهو بيضمّني لصدره كعادته وأبتسم بحنان

ادهم:-هتوحشيني يا أنثي القرد

مي:-وأنت كمان يا رجل الغابة هفتقدك أوي

 

ادهم:-البيت هيكون هادي يا عيني والحمدلله فلوسي مش هتخلص علي الحاجات الحلوة

كنت ببصله وعيني مدمعة مش عوزاه يمشي أول مرة هنبعد عن بعض فترة طويلة وأنا مبعرفش أعمل حاجة من غيره فلقيته حاوط وشي وأبتسم بمرح ووجهلهم الكلام

ادهم:-أنا مش هوصيكم عليها يا جماعة هي مش محتاجه توصية أنا هدعيلكم ربنا معاكم بس علي اللي هيحصلكم 

فضربته بغيظ في بطنه فقام باس راسي بحنان

ادهم:-متعيطيش يا كلب البحر هو أنا مهاجر؟ لو وحشتك أديني ألو وهتلاقيني بعملك بلوك ساعتها وبعدين ما فيه أجازات هتزهقيني متخافيش

فضلت معاه لحد ما ركب العربية وأنا ماسكة عنيا أنها متعيطش بالعافية ولما مشي لقيت عمي حاوطني بحنان وقعدوا بحوارتهم مع بعض نسيت أني زعلانة كنت فرحانه معاهم أوي وكأني في بيتي وسليم كان أتغدي معانا وهو صامت وبعدها أختفي بس وعدي اليوم سريع وكانوا مجهزينلي أوضة لوحدي بس أنا طلبت من ملك تنام معايا عشان مش بعرف أنام لوحدي وشفت السطوح وقت الغروب وطلع أجمل من ما أدهم صورهولي وناموا كلهم عشان بكرة أول يوم كلية ليا أنا وملك وأنا سهرت أتفرج علي أفلامي لحد ما روحت في النوم في الآخر 

تاني يوم

ملك:-قومي يالا يا مي عشان الكلية

مي:-‏أبعد عني يا أدهم عشان معملش منك كفتة

ملك:-أدهم؟! قومي يا بنتي أنتي فقدتي الذاكرة ولا إيه مفيش أدهم هنا قومي أنا ملك

مي:-‏أبعد عني يا زفت مش هتصدعني بـ ملك بتاعتك في الحلم كمان

ملك:-يالا يا بنتي بالله عليكي عشان تلحقي الفجر حاضر وتاخدي دوش ونفطر وننزل

مي:-وحياة عيالك يا أدهم سيبني مزنوقة في حلم علي السريع هحضره وأصحي علي طول والله

ملك:-‏مزنوقة في حلم؟! يا بنت الحلال قومي الله يسترك

 

مي:-بالله عليك عيني لسه فيها حبة نوم أردهالك في عيالك يا شيخ سيبني في حالي أنا عيلة أصلاً أني بسهر كان لازم يعني أتفرج علي الفيلم ما البطل أنتحر في الآخر زي ما أنا هعمل كده بسببك 

ملك:-‏أنا فهمت أنك مبتجيش بالزوق 

كان الصوت اختفي وأستريحت أنه مشي وهيسيبني في حالي عشان أنام بس غريبة أدهم صوته بقا رقيق كده من أمتي؟! يالا مش مشكلة أما أصحي أبقي أتريق عليه براحتي

مي:-بغرق بغرق ألحقونييي 

قمت مفزوعة من علي السرير ووقفت عليه وخبطت في نفس العين بتاعت امبارح وهو واقف ماسك جردل ماية فاضي بعد ما دلقه كله عليا وبيبصلي بنصر وأنا واقفة غرقانة وببصله بصدمة هو وأخته اللي بتكتم ضحكتها بالعافية ولقيته أتكلم بخبث

سليم:-أظن الحلم اللي مزنوقة فيه يستني لتاني يوم عادي لكن الفجر ميستناش وبنفس جردل الماية ده لو ملقتكيش صاحية كل يوم هصبح عليكي بيه وأتمني تفهمي أني مبحبش أكرر كلامي مرتين وفي خلال خمس دقايق تكوني في الحمام وبتاخدي دوش عشان متبرديش سمعاني

يتبع...🦋

مستنيه رأيكوا في الكومنتات وتوقعاتكوا للي جاي

#رواية_نشأت_وانا_متزوجه

#بقلمي_ريم_متولي

تكملة الروايه بعد قليل