 |
#اسكريبت♥️.
_ بتحبيه!
بصيت لماما اللي قعدت جنبي بهدوء وانا سرحانة ورديت....
_ بحبه.
_ وهو بيحبك!
بصيت ليها بتركيز .. ازاي مجاش في بالي السؤال دا .. مالك يبقا ابن صاحبة ماما وجارتنا في العمارة .. نعتبر متربين مع بعض .. النهاردة عرفت من زغاريط والدته في البيت انه هيخطب .. عارفة ان عمره ما فكر فيا بالطريقة دي بس .. بس انا بحبه.
فوقت من سرحاني على ايد ماما بطبط على رجلي وبتقول...
_ متعلقيش نفسك يا ملك بأوهام .. مالك مش بيحبك يابنتي .. نصيحة شيلي حبه من قلبك عشان متتوجعيش.
بصتلها والدموع اتجمعت في عيني غصب عني وقولت...
_ بس انا بحبه.
_ وهو مش بيحبك.
_ هو بإيدي .. مش بإيدي يا ماما .. مش بإيدي احط حبه ومش بإيدي اشيل حبه.
_ لا بإيدك .. قومي .. قومي اتوضي وصلي واخرجي اتفسحي اعملي اي حاجة تشغلك.
قومت وقفت ودموعي نزلت...
_ مش هقدر يا ماما مش هقدر .. انا .. انا قلبي واجعني انا وحشة ليه هو محبنيش لييييه.
سبتها ودخلت الأوضة وقفلت على نفسي .. اترميت ع السرير ودفنت راسي في المخدة وبكيت .. بكيت على مجرد امال ببني فيها من وقت ما وعيت .. بكيت على شخص حبيته وهو م معبرني .. ليه مش بإدينا نحب ونكره وقت ما نحب! ليه!
بليل وانا لسة قاعدة في الاوضة ماما خبطت ودخلت قالتلي انه برة ومعاه مامته .. مالك برة! ودا عايز ايه دا بروج خالته! .. لبست العباية وطرحة وخرجت قعدت وسطهم .. كنت معاهم بس سرحانة فيه .. قاعد مخنوق .. باين عليه بيبص حواليه مخنوق من المكان .. بينفخ كل دقتين.
_ عاملة اي يا ملوكة.
بصيت لطنط وابتسمت نص ابتسامة .. باهتة ورديت...
_الحمد لله يا طنط بخير .. نورتينا.
_ دا نورك يا حبيبتي .. نخش في الجد بقا يا مالك.
يكش يخش فيه قطر البعيد دا .. اتحمحم كدا وبعدين بص لماما...
_ انا طالب ايد ملك يا طنط.
لا طالعة باردة معجبتنـ .. ايه هو قال اي .. ملك انا صح .. ايوة وعهد الله انا .. فوقت من صدمتي مع الذات على صوت زغروطة من طنط .. بتزغرطي ع ايه يا حاجة بس.
_ ها اي رأي العروسة.
بصيت لمالك بعد سؤال طنط .. كان شكله متضايق .. مش متقبل اللي بحصل دا .. زي ما يكون .. مغصوب!! معقولة!
_ وافقت هيكون عملت اي يعني يا منة.
_ انتي هبلة يا ملك يقول اي هو عليكي الوقتي كنتي مستنية.
ابتسمت ببلاهة وقولت...
_مانا فعلاً كنت مستنية.
_ لا لا انتي مش طبيعية.
_ اومال انا ايه مرئية!
_ دمك سم متهزيش تاني.
عملنا خطوبة صغيرة كدا على قدنا في البيت .. هي هي نفس ملامح الوش .. زي الصنم يدوب ابتسامة .. ابتسامة دا ايه دا يدوب تمن ابتسامة لو حد قاله مبروك.
عدا شهرين ع الخطوبة وهو في حالة برود يعني مثلا..
_ مالك تيجي تتغدا عندنا.
_ معلش يا ملك مش فاضي.
او...
_ مالك تيجي نخرج.
_ معلش يا ملك مش فاضي.
او...
_ مالك اي رأيك في كذا.
_ اه حلو.
تصرفاته كلها بتدل على شئ واحد .. انه مش بيحبني .. معلش يابت الحب بكرة يجي بعد الجواز .. لكن هو اصلا مفيش قبول من نحيته ليا .. قرفان مني مش طايقني.
اكتشفت اني بكدا بهين نفسي .. استأذنت ماما اني راحة عند طنط ام مالك شوية وانا عارفة انه هناك .. دخلت طنط تعرفه اني برة فطلع كنت انا قاعدة على الكنبة.
قعد ع الكنبة اللي قصادي وطلع تلفونه ومتكلمش .. مقليش حتى ازيك .. اكتشفت ان اللي انا جياله هو الصح .. ابتسمت بهدوء وطلعت علبة الشبكة وقلعت الخاتم وحطيتهم قصاده على الترابيزة اللي فاصلة بينا بكل ووقفت وقولت بصوت عالي عشان يوصل لطنط في المطبخ ...
_ عن اذنك يا طنط
لقيتها خرجت بتنشف ايدها مبتسمة...
_ ما بدري يا ملوكة خلـ
قطعت كلامها لما شافت الحجات ع الترابيزة فمشيت بكل هدوء وروحت بيتنا وانا عايزة اطلع شحنة العياط اللي جوايا .. هو فعلا ميستهلنيش .. سيبت طنط بتنادي عليا وروحت شقتنا ودخلت اوضتي وتجاهلت ماما اللي بتنادي .. تجاهلت كل حاجة .. انا مش وحشة .. انا احسن بنت في الدينا دي كلها .. هو هو الخسران وبس كدا.
قومت غسلت وشي وبصيت لنفسي في المرايا...
_انا مش ضعيفة.
... عدا بالظبط اسبوعين .. اسبوعين وانا بتظاهر بالقوة .. انا هاشة بس ببين اني جميلة وان مش فارقة معايا .. وانا مش جوايا بموت طول الأسبوعين .. الباب خبط قومت فتحته فكان هو واقف ع الباب واول ما شافني اتوتر وقال...
_ نادي طنط.
_ مش موجوده يا بشمهندس مالك.
ارتبك وبص بعيد ومد ايده...
_ دي دعوة لخطوبتي يا ملك ..
#ملك_ومالك
#الثاني_والاخير ♥️.
ارتبك وبص بعيد ومد ايده...
_ دي دعوة لخطوبتي يا ملك ..
قطعت كلامه وسحبت منه الكارت بهدوء وابتسمت بطصنع...
_الف مبروك يا بشمهندس مالك.
لف وشه ومشى وانا اترميت ورا الباب .. هيخطب يعني بيقولها صريحة انه كان مستنيني اخلع .. عمر ما كان بنا كل المظاهر دي حتى من قبل ما يتقدملي كنا بنهزر مع بعض بس الوقتي في حاجز كبير بنا وصعب جدا .. صعب يتهد.
خطب وماما راحت الخطوبة ومع اصراري اني مروحش وافقت وراحت لوحدها .. كانت مستنية مني اسألها شكلها اي مستنية اني اسألها عنه او عنها بس انا معملتش كل دا .. وحطيت في دماغي شئ واحد بس .. "مالك كان فترة وعدت".
عدت الايام عادي وبدأت ارجع لحياتي القديمة مع جزء بسيط مع حبي ليه لسة في قلبي .. الإنسان مستحيل يقدر يتخطى حبه الأول .. ولو اتخطاه معنى كدا انه مكنش بيحب بجد .. ومالك هو حبي الاول.
وفي يوم كانت خطيبته دي عندهم في البيت .. وانا في البيت عندي مع منة .. سمعنا صوت خبط ع الباب وكانت طنط هي اللي ع الباب .. مشت وبعدها ماما دخلت تقولي انها عازمانا النهاردة.
_ لا يا ماما مش راحة في حتة .. بعدين طنط ناوية تقهرني ولا ايه.
_ عيب كدا يا ملك هي الست طلبت نتغدى عندها واصرت.
_ لا برضو.
وقفت منة قصاد ماما...
_ طب يا طنط روحي انتي وانا هتكلم مع ملك.
قعدت منة وشدتني اقعد جنبها...
_ اترزعي كدا .. هبلة انتي .. مش عايزة تروحي.
_ اه يا منة مش راحة وكلمة اخيرة انا مش مهزقة للدرجادي.
وقفت قدام باب شقة مالك وجنبي ماما ومنة .. اصلي مهزقة وكلمة من منة ع كلمة من ماما خلوني أوافق .. دخلنا وقعدنا كلنا ع الترابيزة .. دي اي البت المبقعة دي.
لقيت مالك خرج من اوضته واول ما شافني ابتسم .. يمكن انا بتخيل .. وقالي...
_ ازيك يا ملك.
رديت وانا وشي في الطبق...
_ كويسة.
قعد ع كرسي جنب هدير خطيبته وقال وعلى وشه لسة الابتسامة...
_ اخبارك اي.
ما قولنا كويسة ولا هو اي لك والسلام...
_ كويسة.
حسيت منة بتقرصني من تحت الترابيزة ومالت عليا شوية من غير ما حد ياخد باله...
_ راكبك عفريت اسمه كويسة متفرضي بوزك.
_ اهو يستي بوزي بقا وانا حرة فيه.
_ يا هبلة متحسسيسهمش انك زعلانة.
صح البت منة دي صح .. حطت طنط الاكل قدامي فشمرت ايدي وقولت بهزار...
_ يلا استعنى ع الشقى بالله.
_ اي دا انتي بتعملي اي.
بصيت لهدير وقولت وانا مبتسمة بانشكاح كدا...
_ هاكل.
_ بايدك.
بصيت لتحت وبعدين قولت...
_ اي دا نسيت رجلى استنى اطلعها اكل بيها.
_ مش قصدي بس دا اسلوب بيئة اوي يا ملك.
بصيت في طبقي وكلت من سكات .. مطولتش في الأكل وقومت بسرعة غسلت ايدي وروحت بيتنا.
_ فضلتي تقوليلي متبينيش متبينيش لما جابت بكرامتي الأرض .. والبيه ساكت اللي ينشك في بطنه .. بس براحة يعني.
_ شوف المهزقة .. كرامتك يعني منقحتش عليكي غير لما قلتلك كدا ومنقحتش لما هو سكت.
_ يوووه متفكرنيش بقا.
**********
_ملك بت يا ملك.
_ جيت يا ماما.
خرجت لماما اللي بتنادي عليا .. ولقيته قاعد برة .. بروح خالته عايز اي دا.
وقفت قصاد ماما فقالت...
_ مالك عايزك في كلمتين.
_ ماشي.
قعدت قصاده فتكلم.
_ انا بعتذر جدا بالنيابة عن هدير يا ملك بجد أ....
قطعت كلامه...
_ ولا يهمك يا بشمهندس.
_ ملك انا عايز ارجعلك.
قالها فجأة .. انا اتصدمت بس مبينتش .. وقفت وبصيت لماما...
_ انتي معرفتيش بشمهندس مالك ولا ايه.
لفيت بصتله وقولت.
_ اصلي متقدملي عريس والله .. يلا ربنا يرزقك ببنت الحلال.
حسيته زعل واتكسر .. بس خليه يدوق شوية .. مفيش حاجة اسمها "مفيش كرامة في الحب" لو الجملة دي صحيحة مكنش حد عاش .. الكرامة والثقة هما أساس الحب .. لو وافقت ارجعله كان هيعرف اني سهلة .. كلمة توديني وكلمة تجبني .. لازم يبقى شوية عناد .. ولازم هو يشرب من نفس الكاس.
... بعد شهرين ...
خرجت مع منة شوية .. قعدنا في مطعم وهي قامت تغسل ايديها .. بمجرد ما هي قامت بدقتين حسيت بحد قعد قصادي .. كان هو مالك.
- ازيك يا لوكا.
- انت بتعمل اي .. قوم من هنا لو سمحت.
- ممكن تسمعيني.
- لا مش ممكن.
- ملك انا بحبك وشاريكي وعارف أن حوار العريس دا لعبة منك وانا والله اتعلمت ومستحيل الاقي زيك .. كفاية عليا كدا.
اخدت نفسي...
- مالك انت هنتني .. سواء فترة الخطوبة او بعد الخطوبة .. مفيش حد يقدر يغصبك على جوازك مني .. كان ممكن ببساطة ترفض لكن مش تخطبني وبعدين تعاملني احسن من الغريب .. بمجرد ما اتخطبنا اتغيرت من مالك اللي كان صديق ليا ومتربين سوا .. لمجرد واحد انا مفروضة عليه .. مكنتش بتكلف نفسك حتى ولو لمرة وتكلمني .. حتى الإبتسامه كنت بشحتها منك ويارتها كانت بتطلع .. يوم ما مامتك عزمتنا والحيزبونة هدير دي شتمتني منطقتش حتى .. هرجعلك ع اساس اي.
بصلي وقال بنبرة رجاء...
- ملك انا والله من بعد الموقف دا فسخت معاها .. انا نفسي متحملتش انها تهينك .. ومامتك قالتلي حوار اللعبة بتاعتك .. ملك انا محستش بقيمتك غير لما بعدتي .. ارجوكي اديني فرصة.
- فرصة !
ابتسم - فرصة.
ابتسمت - فرصة.
"حبيت وأخيراً جاني اللي سنين اتمنيته ❤️✨"
اعملوا متابعه علشان يصلكم كل الاسكريبات من هنا
تمت
تعليقات
إرسال تعليق