يومين في الحرام
الجزء السابع
للكاتبة..حنان حسن
بعدما هجم عليا فرغلي ...
وكان خلاص... هيفترسني
وبعدما كنت قربت استسلم...
فجاءة
النور اتطفي
ولقيت جسم فرغلي..
بيبعد عني
وبعدها ...سمعت ضربة قوية
وشوية..وحاجة وقعت ع الارض
وفهمت في الوقت ده طبعا
ان الجن العاشق
هو الي بعد فرغلي عني..
فا انتفضت من مكاني...
وبسرعة اخدت الموبيل
الي كان جنبي ع المخدة...
وفتحت الكشاف
عشان اتفاجئ ادامي
ب..ابراهيم
او( هيما الخواجة)
وشوفت كمان فرغلي ...
وهو واقع جنبة علي الارض... ومغمي علية
فا صرخت
وسالتة
وقلت...انت بتعمل ايه هنا؟
ودخلت هنا ازاي؟
وبعدما ركزت شوية
لقيتني بقول..
ايوه...ايوه..
يبقي انا فهمت دلوقتي ...
انك انت ورا كل الحاجات الغريبة
الي كانت بتحصل في البيت ده قبل كده.... صح؟؟؟
فا سكت هيما الخواجة
وحط راسة ف الارض
بمعني ان الاجابة
هي.... (ايوه)
فا ضربت علي صدري
وقلت..
يا مصيبتي السودة؟
يعني انت الي كنت بتيجي كل ليلة لاوضتي و........
وقبل ما اكمل..
بصلي هيما بدون ما يرد عليا
ونزل بجسمة وسحب فرغلي من رجلية
وخرجة بره البيت خالص
وبعدما رمي فرغلي ادام البيت
قفل الباب..
وبعدها ..
اخدني من ايدي ...
وراح بيا علي الاوضة تاني
وقفل الباب عليا انا ...وهو
وفضل يبصلي اوي
فا وقفت ابصلة ..
وانا بترعش
ومكنش في حاجة في ايدي اعملها
غير اني اهدده
فا قلت..
لو قربت مني...
هصرخ ...والم البلد كلها عليك
لكن هيما مهتمش بتهديدي
ولقيتة بيقولي..
اسمعي الي هقولهولك وافهمية كويس
انا بعدما ما قابلتك عند القطر...
وانقذت حياتك
وعرفت انك حامل
قررت اني اعترفلك بالحقيقة كلها..
عشان مترجعيش لفرغلي
وكمان عشان انبة عليكي
ان فرغلي
ميدخلش البيت تاني
قلت...حقيقة ايه ؟ونيلة ايه؟
انت مين بالظبط؟
رد هيما الخواجة
وقالي
انا مكدبتش عليكي
لما قولتلك ان اسمي هيما الخواجة
بس الي حصل
اني اخترعت موضوع الجن العاشق
عشان احميكي من اهل البلد
لانك كنتي عايشة لوحدك
والكل كان هيطمع فيكي..
واولهم رفاعي... وامة
قلت...ازاي الكلام ده ؟
.. انا كنت بشوف قط اسود في البيت...
والشيخ جلال كمان
قالي
ان في جن عاشق في بيتي فعلا؟
رد هيما الخواجة
وقالي
لا مفيش جن عاشق ولا حاجة
انا سمعت فعلا
كلام الشيخ جلال
فا استغليت ان الناس كلهم صدقوا الاشاعة دي
واضطريت اتقمص شخصية الجن العاشق
الي بيحكوا عنها
عشان احميكي مش اكتر
لان فرغلي... و اهل البلد مكنوش هيعتقوكي ويسيبوكي في حالك
غير لما يتاكدوا ان بيتك مسكون بالعفاريت
وقفت مزهولة وانا بسمعة
وبعدها...
سالتة
وقلت..
انا سالتك سؤال ومجاوبتنيش عليه
وهعيدهولك تاني
انت الي كنت بتيجي كل ليلة عندي الاوضة و.......؟
رد هيما الخواجة
بعدما بص في الارض
وقالي.. ايوه انا
و بعترف كمان اني ابو الطفل الي في بطنك
ومستعد اكتبلك اقرار علي نفسي بكدة
بصيتلة بذهول
وفضلت اعيط ... والطم
وبعدها سالته
وقلت...
اقرار ايه ؟
الي عايز تكتبة؟
دنا لسة علي زمة راجل تاني؟
يعني الاقرار بتاعك
مش هيحلني من الذنب ادام ربنا
ولا هينقذني من كلام الناس
لما بطني تبان....
واتفضح..
هينفعني باية الاقرار بتاعك؟
وفضلت..الطم علي وشي
وانا بقول..
ينهار اسود..يا نهار اسود
في اللحظة دي
رد هيما الخواجة
وقالي...
انا مهما دافعت عن نفسي
عارف انك مش هتسامحيني
ولا هتفهمي... انه كان غصب عني
لكن...
انا اهم حاجة عندي دلوقتي
انك تسمعيني... وتصدقي الي هقولهولك
انا عملت كل ده
عشان احميكي
وبكره الايام هتثبتلك كلامي
قلت..تحميني ايه حرام عليك؟
دنتا ضيعتني
وسودت الدنيا في وشي...
وحكمت علي الي في بطني بالفضيحة
ولقيتني فكرت شوية
وبعدين رجعت
اقول...
وليه اجيب الي في بطني علي وش الدنيا
عشان افضحة بعاري طول العمر؟
انا هنزلة
رد هيما بغضب
وقالي..
اوعي تعملي كده
انا عارف ان فرغلي مدخلش عليكي
والمشكلة كلها هتتحل
بمجرد ما قضية الخلع يتحكم فيها
وتاخدي حريتك
وبعد ما تنقضي ايام العدة
علي طول
ساعتها
هنتجوز انا وانتي
والعيل الي في بطنك
هنسبة ليا
يعني خلاص مش هيبقي في فضايح ولا حاجة
بعدما سمعت كلام هيما
الخواجة
قعدت علي الارض وفضلت افكر في كلامة
وبعدها ..
سالتة..
قلت...انت طلعتلي منين؟
ما كنت عايشة في حالي من يوم ما امي ولدتني ..
ومحدش لمس طرفي ؟
انا مش مسمحاك ..حسبي الله ونعم الوكيل
رد هيما بحزن
وقالي..لا
ارجوكي متدعيش عليا ...ولا تصدري حكمك في حقي
قبل ما تعرفي حكايتي
وبدء هيما الخواجة يعرفني حكايتة
وقال..
انا زيك بالظبط
الدنيا بهدلتني...وظلمتني
بس انا بقي مكنتش يتيم زيك
بالعكس
دا انا ابويا عايش... وغني... وعنده فلوس ملهاش عدد
وسالني هيمة
وقالي..عارفة ابويا يبقي مين؟
بصيتلة بغضب ....
ومردتش عليه
فاكمل كلامة
وقالي..ابويا يبقي المعلم فراج
المقاول الكبير
صاحب العمارات الجديدة
الي في البلد دي
والبلاد المجاورة كمان
لكن ابويا برغم كل الي عنده ده
بخيل موت
ومش بيهون عليه الجنية
وبالرغم كمان من اني انا ابنه الوحيد
الا ان ابويا كان حارمني... ومضيقها عليا..
لما كان خانقني ببخلة
وانا كنت عايش معاه لوحدي
اصل امي ماتت من زمان
وبعدما زاد في بخلة
قررت اسافر ايطاليا...
عن طريق البحر
مع شوية شباب من البلد
( هجرة غير شرعية )
ولما طلبت منه فلوس رفض
فا سرقت صيغة امي الله يرحمها
الي ابويا كان مخبيها
وجهزت فلوس السفر..
وسيبت البلد ..وسافرت في مركبة صغيرة
عليها عدد كبير من الشباب
وكان عددنا اكبر من الحمولة المسموح بيها للمركب
وفي البحر كنت هغرق انا والي معايا ..
وربنا نجاني باعجوبة
لغاية ما وصلت
لكن ...لما سافرت ملقتش شغل
هناك
وفضلت نايم في الشوارع
وباكل طقة واحدة في اليوم عشان اوفر اي فلوس
ولما فلوسي خلصت
اكلت من الزبالة
لغاية ما اتقابلت بشوية شباب من البلد من هنا
سابوني اعيش معاهم في السكن بتاعهم مؤقتا
لغاية ما الاقي شغل
وعشان كنت باكل ...وبشرب معاهم
فضلت اخدمهم...
واعملهم الاكل.. واغسلهم هدومهم... وانظف مكانهم
لغاية ما يرجعوا من شغلهم..
وعشان كنت باكل ...وبشرب معاهم
فضلت اخدمهم...
واعملهم الاكل.. واغسلهم هدومهم... وانظف مكانهم
لغاية ما يرجعوا من شغلهم..
يعني كنت عايش خدام بلقمتي... ونومتي
معاهم
المهم.. فضلت علي كده فترة
لغاية ما لقيت شغل في مطعم...
وساعتها...
طلبوا مني اشاركهم في السكن
وكانت شغلتي
اني اغسل صحون
لكن برضوا الشغل مكنتش فلوسة مكفية السكن والاكل
والمعايش
ده غير البهدلة الي كنت بشوفها
فا دورت علي شغل غيره
وفضلت اتبهدل في كل شغلانة شوية
وفضلت علي الحال ده سنين
لغاية ما....
تعبت و رجعت انا وواحد صاحبي
لبلدي تاني
عشان كده
الناس هنا اطلقوا عليا هيما الخواجة
المهم..بعدما رجعت
اشتغلت علي التروسيكل بتاع صاحبي
وصاحبي ده مش من بلدنا
من البلد الي جنبنا
الي هي بلد العمدة الي انتي اتجوزتي ابنة
كنا بننقل علي التروسيكل كل حاجة
وفضلت شغال معاه كام شهر لغاية...
ما في يوم....
كنت بنقل الحاجة الساقعة
و لوازم الفرح
بتاع ابن عمدة
...
وشوفتك هناك ...وانقذتك و.....
وسكت هيما عن الكلام
فا بصيتلة
وقلت..كمل؟
بتقول ... من يومها ايه؟
قال..
ومن يومها ...
وانا ...وانا...بفكر فيكي
ليل نهار
لدرجة اني بقيت بحلم بيكي...
ومكنتش قادر اخرجك من دماغي...
فا روحت عند بيتك مكان ما وصلتك
وسالت عنك
وعرفت حكايتك...
وعرفت كمان...
انك اتجوزتي من فرغلي
بس ديما علي خلاف معاه
ولما عرفت انك عايزة تسيبي فرغلي...
وبتدوري علي بيت عشان تشترية
سعيت انك تشتري البيت الي احنا فيه ده بالزات
عشان البيت ده
كنت عايش فيه انا و امي الله يرحمها
و انا كان معايا مفاتيح البيت كلها
من قبل ما اسافر
وكمان اعرف كل ركن في البيت
ومن يوم ما حطيتي رجلك في البيت
وانا خدت عهد علي نفسي
اني احميكي من اي حد
قلت..انت لو كنت شخص كويس
زي ما بتحاول تفهمني
كنت قدرت تحميني من نفسك الاول
لكن...انت ....
وقبل ما اكمل كلامي
رد هيما
وقالي..ارجوكي تسامحيني
وانا اوعدك
اني همشي ومش هتشوفي وشي تاني
غير لما المحكمة تحكم بالخلع
ولما توفي العدة بتاعتك ..
يومها هجيلك... ونتجوز
ولو عايزة نسافر من البلد كلها هنسافر
ونبدء حياتنا مع بعض بعيد عن الناس هنا وكلامهم
في اللحظة دي
بصيتلة..بحزن.. ...
وفضلت اعيط
وقلت..
علي ما المحكمة تحكم ...والعدة تخلص
اكون ولدت
وسيرتي بقت علي كل لسان
ولقيتني بصرخ في وشة
وقلت..
امشي من هنا
مش عايزة اشوفك ادامي
امشي ....منك لله
ربنا ينتقم منك
زي ما ضيعتني
وفعلا قام هيما ....وخرج
وانا فضلت اعيط طول الليل
لغاية ما نمت
وانا قاعدة مكاني
والصبح.... افتكرت كل الكلام الي قالهولي هيما
وفضلت احسبن فيه تاني
وانا مش عارفة اعمل ايه؟ واتصرف ازاي؟
وفكرت كتير
اني انزل الي في بطني
لكن...خوفت من ربنا
وفضلت علي الحال ده
كام يوم
ولاحظت ان الي اسمه هيما ده اختفي فعلا
ومبقاش له وجود
وقلت لنفسي ..
يظهر انه طلع صادق في وعده ليا ...
واختفي من حياتي بجد
وسالت نفسي
وقلت..
يكونش كان صادق معايا فعلا
في كل الي قالة؟
ورجعت اقول لنفسي
لا..ده انسان معندوش ضمير
واكيد كلامة كلة كدب
ولما شكيت انه كان بيكدب عليا
قررت اروح عند بيت ابوه..
المعلم فراج المقاول
عشان اتاكد من كلامة ..
واشوف الحكاية الي حكهالي صدق ولا كدب؟
وبالفعل..
روحت اشتريت نقاب ولبستة عشان محدش يعرفني
وخرجت اسال اهل البلد عن المقاول فراج
واشوف و اتاكد ان كان له ابن اسمة هيما اصلا ولا لا؟
وسالت واحدة بتبيع جبنة في السوق
وقلتلها..
والنبي يختي بدور علي شقة
ومش لاقية
متعرفيش فين بيت المقاول الي اسمة المعلم فراج؟
ردت الست بتاعة الجبنة
وقالت..ايوه طبعا اعرف
المقاول فراج
واعرف بيتة
الي عايش فيه
ده مش بعيد عن هنا
اطلعي كده علي اول البلد...
هتلاقي البيت
بس يخسارة مش هتقدري تقابلي الحاج فراج خلاص
فسالتها
وقلت... ليه؟
قالت..عشان مات من يومين
قلت..معقولة؟
المعلم فراج مات؟
قالت..ايوه
وابنة بياخد العزا فيه بقالة يومين
قلت...
ابنة ده اسمة اية؟
قالت..اسمة ابراهيم
بس الناس مسمينة هيما الخواجة
قلت..ولية سموه الخواجة؟
هو بيشتغل مع الخواجات ولا ايه؟
فا ردت بياعة الجبن
وصدمتني بالحقيقة المفجعة
وقالتلي..
بيشتغل مع خواجات ايه؟
لا يا حبيبتي ده واد صايع وفاشل
خرج عن طوع ابوه ...
وسافر بره
وبعدها رجع ملطوط
قلت..يعني ايه ملطوط؟
قالت..معرفش اهو طلع عليه اشاعة
بتقول ..انه كان مشية بطال
متعرفيش بقي
ان كان اتلم علي نسوان بطالة في بلاد بره ؟
ولا ايه؟
استغفر الله العظيم
المهم ان البلد كلها بتقول...انه
اتمرض هناك بمرض بطال
وبعدما جالة المرض البطال
رجع البلد
قلت..مرض ايه؟
قالت..والنبي يختي
ما اعرف
ايه المرض الي عندة بالظبط
بس البلد كلها
بتقول عنه كده
في اللحظة دي
بطني وجعتني من كلامها
وكان لازم اتاكد
اكتر
من الي سمعتة عن مرض هيما
لان معظم الاشاعات الي في بلدنا
بتبقي كدب او فيها تهويل
فا اخدت بعضي وروحت علي العزاء
وقلت اكيد في العزاء هعرف الحقيقة
اصل...عندنا في البلد
لو عايز تعرف تفاصيل حياة
اي شخص...
وحياة اهلة
ما عليك الا انك تقعد بين النسوان
في العزاء بتاعة
وبالفعل..
قعدت بين النسوان
وهما بيتكلموا عن المقاول... وابنة
وسمعتهم فعلا بيتكلموا عن مرض هيما تاني
فا روحت قعدت جنب واحدة جارتنا متعلمة
كنت عارفة انها بتشتغل مدرسة..
وسالتها..
قلت.. بيقولوا....
ان ابن المقاول
متصاب بمرض خطير
الكلام ده صح ؟
ردت المدرسة
وقالت
ايوه بعيد عنك
ده متصاب بيه وهو في بلاد بره
فسالتها
وقلت...مرض ايه الي عنده يختي ؟
ردت المدرسة
وقالت..بعيد عنك
مرض اسمة (الايدز)
اصل الواد ابن المقاول كان عايش بره
وباين كان خاربها....
وبيعاشر النسوان الشمال
استغفر الله العظيم
عشان كده...
جالة المرض ده
بصيتلها بتعجب
وسالتها
وقلت...هو المرض ده معدي؟
بصيتلي بدهشة
وقالت..
الا معدي؟..
امال هو اتنقلة المرض ازاي؟
ده بعيد عنك
الايدز ده اخطر مرض بيعدي
والي بيتعدي منه
لابد يموت
في خلال ايام.... او شهور بالكتير
بعدما المدرسة خلصت كلامها
في اللحظة دي
انا حسيت اني جسمي اتجمد..
والهواء مبقاش يدخل لصدري
ولقيت الدنيا بتدور بيا
وفضلت متنحة وانا بفكر بيني وبين نفسي
يلهوي ياني علي المصايب
الي نازلة ترف عليا
يعني بدل ما كنت متهددة بالفضيحة..
بسبب الحمل بس
دلوقتي ممكن يبقي عندي ايدز..
وممكن الي في بطني يتعدي
ولما اموت
هسيب ابني مريض لوحده..
وموصوم بالفضيحة
يعني هسيبة مريض وموصوم بالعار
الي هيشيلة بعد موتي
وفضلت قاعدة مكاني
وبسال نفسي
طيب هعمل ايه ايه يا ولاد؟
اروح اسال ابراهيم؟
واتاكد منه؟
وهو يعني لو مريض هيقول الحقيقة؟
مهو اكيد هيكدب عليا؟
وبعدين مفيش دخان من غير نار
واكيد هو مريض فعلا؟
وفضلت ابص حواليا وانا ساكتة...
وببص لاهل البلد الي مبيرحموش ميت ولا حي بلسنتهم
وكنت حاسة اني في دوامة
من الصدمة الي انا فيها
وفي اللحظة دي
ملقتش ادامي في غير حل واحد
وهو الم....وت
عشان اخفي عاري
واخدت بعضي وقمت ...واتسندت
لغاية ما خرجت من بيت
المقاول
وبعدما بقيت في الشارع
ركبت توكتوك
وصلني لغاية بيتي
وبدات افكر
وانا في الطريق... في الوسيلة
الي هتخلصني من حياتي
وكنت مصممة وكلي اصرار علي الانت...حار
لكن...
بمجرد ما وصلت لبيتي
حصل شيئ مش هتصدقوة...
خلاني اصرف نظر عن الانتحار تماما...
عارفين حصل اية......؟
تكملة الروايه من هنا
تعليقات
إرسال تعليق