 |
البارت السادس والسابع
عشق اقتحم كياني
#موسوعة_القصص_والروايات
اياد اتصدم من كلامها فقرب منها لحد ما بقي واقف قصادها وقالها:
-كدة انا فهمت يبقي انتي مش واثقة فيا ودي اهم حاجة قي علاقتنا يا رهف لازم تتبني عالثقة وطالما مش عارفة تثقي فيا يبقي مينفعش نبقي مع بعض وبصلها بنظرة حزن وعتاب ومشي .
وهيا قعدت عالمكتب وحطت ايديها علي وشها وفضلت تعيط واتأكدت انها خسرت اياد .
.........
رؤي بصت لاسر بفرحة وعيونها لمعت وقالتله:
- بجد طيب يلا بينا وهو فرح انها بقت مبسوطة بسرعة تضحك وفي ثانية تزعل زي الطفلة ومشيو سوا لقاعة الرقص وهو قرب منها و حط ايده علي و*سطها وهيا حطت ايدها علي رقبته بص في عينها وتاه في جمالهم وهيا بصتله بخجل واتفاجأت بيه وهو بيقؤلها:
- تعرفي انك جميلة اووي
رؤي اتكسفت وبصت في الارض واسر رفع وشها بايده وقالها متتكسفيش اوي عشان بتحمري وبيبقي شكلك حلو اووي
رؤي اتوترت من كلامه وبقت تبص بعيد عن عينه وقالتله بخجل:
- بطل كلامك ده بيخليني متوترة اووي احم اسر هو ممكن اسالك سؤال
اسر حرك راسه وقالها طبعا اسألي براحتك
رؤي سألته بتردد:
-هو انت بتحبها خطيبتك يعني ؟
اسر اتنهد وقالها وهو بيحط ايده علي شعره بحيرة:
- تعرفي انا لحد دلوقتي مش عارف او مش متأكد
بس اللي اعرفه اني مش عارف انا عايز ايه سعات احس اني بحبها وسعات لا بس تصرفاتها بتخليني هتجنن والعند بتاعها برضه فظيع ببقي خلاص واخد الخطوة وارجع في قراري بس انا اكيد بحبها والا مكنتش استحملت تصرفاتها دي كلها ولا ايه
رؤي حست انها اضايقت اووي متعرفش ليه وقالتله وهي بتبعد عنه:
-عندك حق ربنا يسعدكو سوا اسر هو احنا ممكن نمشي ؟
اسر استغرب تغيرها المفاجئ وقالها:
- ليه زهقتي ولا ايه ؟
رؤي قالتله بحزن وهي بتتجنب تبص في عينه:
- لا بس انا عايزة اروح ياريت نمشي
اسر حس انها اضايقت فمشي جمبها وهو بيقؤلها:
- طيب يلا بينا، وهو بيكلمها فجأة بص لقي رانيا في الفرح مع بنات علي ترابيزة
وشه احمر وقالها استني هنا يا رؤي جايلك وراح ناحية رانيا
اللي اول ما شافته وشها جاب الوان وقامت وقفت
وراح نحيتها وشدها من ايدها وخدها وطلعو برة
ورؤي كل ده حاسة انها محرجة من الموقف واضايقت عشانه برضه وهو جارر رانيا وراه لحد برة ووقف وهيا عمالة تقؤله طب استني والله هفهمك انت فاهم غلط يا اسر وبكل عصبية وقف مرة واحدة وزعقلها :
-تفهميني ايه هو ده المول والشوبنج هه انتي مفكرة انك بتستغفليني انا اللي غلطان اني صدقتك ووثقت فيكي انا تعبت وخلاص و ده اخر اللي ما بينا يا رانيا
رانيا مسكت ايده واترجته وقالتله بدموع مزيفة:
-لا يا اسر انت بس عشان متعصب وبعدين مش هتتكرر تاني اوعدك دي اخر مرة انا بحبك متعملش فيا كدة
اسر مسح وشه بغضب مكتوم وقالها وهو بيشاور قدامه:
-قدامي يا رانيا اروحك ومش عايزك تكلميني دلوقتي خالص فاهمة
رانيا قالتله بدلع وهي بتحط ايدها في ايده:
-حاضر يا حبيبي يلا بينا وخدها ودخلو تاني وراح لرؤي اللي كانت واقفة محرجة وعمالة تبص حواليها ولقت اسر جاي مع رانيا وهيا ايدها في ايده ورؤي اضايقت اووي لما شافتهم كدة واول ما جم ناحيتها رانيا بصتلها من فوق لتحت وشاورت عليها بغرور وهيا بتسأل اسر:
-مين دي بقي ومعاك بتعمل ايه فهمني؟؟
اسر بصلها ورد بضيق:
-دي رؤي بنت خالتي
رانيا بصت لرؤي بغيظ وقالتلها وهيا بتحط ايدها في و*سطها:
-وانتي بقي ايه اللي جابك مع خطيبي الفرح وبصت لاسر بغضب وقالتله دي معاك بتعمل ايه هنا ؟فهمني دلوقتي حالا
رؤي عنيها دمعت وحست انها محرجة من طريقتها وخصوصا انا قصدت تعلي صوتها وتسمع الناس
اسر بص لرانيا بغضب وشدها من ايديها وهو بيزعقلها:
- انتي اتجننتي انتي مالك اصلا بيها هيا جاية معايا انتي اللي كنتي جاية لوحدك اعتقد طالما كدة يبقي تروحي لوحدك ومسك رؤي من ايديها وخدها ومشي ورانيا كانت واقفة هتتجنن ازاي يسيبها ويمشي وياخد البنت دي معاه وبقت تتوعدلها
..........
حور كانت في الشركة وخبطت علي مكتب ياسين ودخلت المكتب وياسين بصلها ولقي عنيها وارمة من العياط وباين عليها التعب وهي شافت نظراته وتجاهلته ومدت ايديها بالملف وقالتله:
- دي ملفات شركة العقاد محتاجة توقيع حضرتك
ياسين قام وراح وقف قدامها وقالها بهدوء:
-بكلمك طول الليل مش بتردي عليا
حور تجاهلت كلامه وده غاظه اكتر وقالتله:
- حضرتك العقود انا راجعتها وواقفة علي امضاءك بس
ياسين بصلها بغموض وخبث وقالها:
-انتي بتتجاهليني وقرب منها وهيا بقت ترجع بضهرها لورا لحد ما لزقت في الحيطة وبقي هو محاوطها بايده وعينه قي عينها
حور اتوترت من قربه وقالتله:
- لو سمحت ابعد كدة شوية ميصحش وزقته عشان يبعد
ياسين بصلها وابتسم بمكر وهو بيقؤلها:
- ماهو لو مش هتسمعيني برضاكي هتسمعيني غصب عنك ، وقرب اكتر عليها
حور اتوترت اكتر وقالتله بلغبطة:
- ياسين ععيب كدة لو سمحت بقي سبني امشي
ياسين بصلها بتوهان وقالها بعشق :
-ممكن تقؤلي اسمي تاني كدة حلو اوي منك بجد يا حور
حور قلبها دق جامد بس افتكرت اللي حصل فقالتله بحزن:
- لو مفكر اني هضعف تبقي غلطان انت زيه مفيش فرق بينك وبينه هو كداب وخاين وانت كمان سبني امشي بقي وبقت تعيط بحرقة
ياسين قلبه وجعه عليها فمسح دموعها بايده وقالها بحزن:
-والله انتي ظالماني يا حور وخدها من ايديها وقعدها علي الكرسي وقعد قدامها وقالها:
-لازم تسمعي مني وبعدين احكمي عليا
مسحت دموعها وقالتله بعتاب:
-وانا سألتك وانت قولتلي انك تعرفها يعني كلامها صح يا ياسين انا هفضل علطول كدة التجربة اللي مريت بيها هتاثر عليا دايما هشوفك حسام احنا مننفعش لبعض صدقني وقامت وقفت وسابته وخرجت من المكتب ومن الشركة كلها وياسين اضايق وحس انه قلبه وجعه عليها وانها لسة متاثرة بحكايتها القديمة
...........
رهف في مكتبها وحاسة ان اياد بيتجاهلها بس هيا في نفسها عارفة ان ده الصح لان مش ممكن هتأمنه عليها وهيا عارفة ان ليه علاقات كتير بس مش بايدها حاجة قلبها حبه وطالما القلب حب مستحيل يشوف عيوب الشخص اللي بيحبه
وهيا بتفكر دخل اياد عليها فرحت اووي وابتسمت وقامت وقفت بسرعة وقالتله:
-اهلا مستر اياد خير في حاجة ؟
اياد اتجاهلها وقالها ببرود:
-ايوة فين ملف شركة العقاد
رهف اضايقت من تجاهله ليها وتغيره في معاملتها وانه مبقاش يتكلم معاها زي الاول وانتبهت علي صوته وهو بيقؤلها:
-احم بكلمك علي فكرة
رهف بصتله بحزن وقالتله:
-اسفة يا فندم هو مع سكرتيرة مستر ياسين
اياد بصلها بغضب وزعق وهو بيخبط بايده الاتنين عالمكتب وقالها:
- ازاي توديه لرئيس مجلس الادارة من غير ما تعديه عليا مش المفروض تراجعي الحسابات وتجبيهولي اراجع عليه وبعدين يروحله
رهف عنيها دمعت من صوته العالي وقالتله:
- اسفة يا فندم انا افتكرت عدي علي حضرتك الاول
اياد اضايق انه زعلها وكان هيضعف لما شاف دموعها بس تماسك وقالها:
-مفيش مشكلة لو سمحتي بعد كدة الغلط دع ميتكررش
رهف حاولت تمسك دموعها قدامه فمسحت دمعة هربت منها بايديها وردت عليه:
- حاضر يا فندم حاجة تاني ؟
اياد قالها وهو بيلف عشان يخرج:
- لا مفيش وسابها وخرج وهو بيأنب نفسه علي قسوته عليها ورهف اول ما خرج قعدت عالمكتب وحطت وشها بين ايدها وفضلت تعيط وهيا صعبان عليها اسلوبه معاها
...........
اسر كان في العربية ورؤي قاعدة جمبه وهو سايق بس عقله مشغول باللي عملته رانيا واحراجها لرؤي بالطريقة دي فبصلها وقالها:
-انتي زعلانة مني عشان يعني الخطوبة معرفتيش تحضريها
رؤي حاولت تهون عليه فابتسمت وقالتله:
-لا يا اسر هزعل ليه اصلا حد يعمل خطوبة بالنهار ايه ده وضحكت وبعدين قالتله انا بس مضايقة لانكو متخانقين بسببي
اسر كشر وبص قدامه وهو سايق وقالها:
- لا طبعا انتي مش السبب ولو كنت جيت لوحدي وشفتها هناك كنا هنتخانق برضه
رؤي قالتله ببراءة:
- لا بس كنتو هتتصالحو لو مكنتش هيا شافتني معاك وهيا عندها حق انا لو مكانها وشوفت خطيبي بيكلم واحدة وواخدها معاه مناسبة اكيد هتضايق
اسر بصلها وابتسم وقالها باعجاب:
- انتي قلبك جميل اووي يا رؤي يعني رغم انها ضايقتك بالكلام وانتي برضه بتدافعي عنها وواخدة صفها
رؤي بصتله بخجل وقالتله وهيا بتعدل حجابها:
-انا بقؤل كلمة حق بصرف النظر عن انها عملت معايا مشكلة او زعلتني
اسر وقف العربية ولفلها وقالها بحماس:
-طيب ايه رايك بقي اعوضك عن الخطوبة والمناسبة اللي باظت واخرجك
رؤي سقفت بفرحة وقالتله :
- بجد طيب هتوديني فين ؟
اسر ابتسم علي براءتها و طفولتها دي وقالها:
- تحبي تروحي انتي فين؟
رؤي فضلت تخبط بصباعها علي عقلها بتفكير وقالتله:
-امممم طيب بص احنا نروح عالكورنيش نتمشي
اسر استغرب وكشر وقالها:
- بس كدة عايزة تروحي عالكورنيش
رؤي ردت ببراءة وقالتله وهي بترفع كتافها لفوق:
-اه بس كدة واه طبعا تعزمني علي درة وحمص الشام شفت بقي انا طماعة اووي ازاي
اسر حب بساطتها وتخيل لو رانيا مكانها وبيسألها تروح فين كان هيبقي ردها طبعا تروح تعمل شوبنج وتاكل في مطعم غالي زي صحباتها ياااه في فرق كبير بين رؤي ورانيا فضل يفكر لحد ما رؤي قاطعت افكاره
لما افتكرت معهوش فلوس ومحرج منها يعني فقالتله:
-ايه يا اسر لو مش معاك فلوس عادي خلينا نتمشي بس انا اصلا مليش نفس لحاجة
اسر ابتسم وبص في عنيها الفيروزي اللي سحرته وقالها:
- انتي مفيش زيك يا رؤي بجد لو لفيت العالم مش ممكن هقابل بنت زيك
رؤي اتكسف وخدودها احمرت وبصت بعيد عنه وحاولت تغير الموضوع انت هتضحك عليا ومش هتخرجني ولا ايه
اسر عرف انها بتغير الموضوع وقالها وهو بيدور العربية:
-ماشي يا رؤي يلا بينا
.............
حور روحت البيت لقت امها قاعدة في الصالة فقربت منها وقعدت جمبها وحضنتها وفضلت تعيط وامها خافت عليها اول ما لقتها منهارة كدة وقالتلها:
- بسم الله مالك يا روحي فيكي ايه احكيلي
حور حضنتها جامد واتكلمت وهيا بتعيط:
-تعبانة اووي يا امي وخايفة وحاسة اني تايهة
امها طبطيت عليها وقالتلها بحنان:
-طب فضفضيلي وانا هسمعك ونفكر سوا بصوت عالي ايه رأيك؟
حور خرجت من حضن امها ومسحت دموعها وحكت لامها كل حاجة من ساعت ما قابلت ياسين لحد انهاردة والكلام اللي دار بينهم
امها ابتسمت وقالتلها:
-بصي انتي حاسة كل حاجة حصلت بسرعة وده اللي مخوفك خايفة يطلع حسام لا يا نور عيني مش كلهم حسام طليقك في رجالة بجد يستاهلو اننا نعيش عشانهم ويخطفو قلوبنا بحنيتهم وواضح من كلامك
ان ياسين ده من الرجالة دي وبعدين انتي مش هتغلطي غلطتك مع حسام لا انتي سعتها فكرتي بقلبك بس وده غلط لازم في ايه علاقة هندخلها نحكم قلبنا وعقلنا كمان عشان منخسرش زي ما خسرنا وانا متاكدة انك المرادي هتختاري صح
حور ابتسمت وباست ايد امها وقالتلها:
-عندك حق يا ست الكل ربنا يخليكي ليا وميحرمنيش منك ابدا
مسحتلها امها دموعها وهيا بتقؤلها :
-ولا يحرمني منك يا حبيبتي ويهديكي للصالح وينور طريقك يارب
............
خرجت رهف من الشركة وكانت ماشية في الشارع وهيا بتفكر في اياد وانه ازاي جرحها وهل ده بسببها وانها السبب في انه يبقي كدة ولا كان لازم تديله فرصة وكانت بتعدي الشارع ومش واخدة بالها من العربية الي جاية بسرعة لحد ما سمعت شخص بيقؤلها حاااسبي وشدها وهيا صوتت وغمضت عنيها جامد وسمعت صوته بيزعق.......... يتبع
البارت السابع
- انتي مجنونة مش تاخدي بالك ايه عايزة تموتي نفسك
فتحت عنيها براحة لقيته هو اياد حست ان الدنيا وقفت في اللحظة دي وفضلت بصاله وهو باصصلها وكانت اول مرة تبقي قريبة منه اوي كدة تقريبا جوة حضنه و رهف فضلت بصاله وتنحت مش عارفة هو جه امتي وازاي بقت في حضنه كدة
وكانت سامعة دقات قلبه من كتر ما هيا قريبة منه
واياد قالها بصوت واطي:
-مش تخلي بالك
رهف كانت مكسوفة من قربه وقالتله: مخدتش بالي
اياد بعدها عنه بالعافية غصب عنه وقالها:
- يلا عشان اوصلك واتكلم تاني بجدية زي الاول
رهف بصتله بحزن وقالتله وهي بتسيبه وبتمشي:
-لا متتعبش نفسك
اياد مسكها من ايديها وخلاها وقفت وقالها:
-بلاش عند ويلا بينا وهما ماشين رهف بتبص لقت قدامها نادر وده يبقي زميل ليها من ايام الكلية اول ما شافها ابتسم بس هيا اتوترت لانه كان معجب بيها واعترفلها بحبه وهيا تجاهلته وقالتله انها مش بتبادله نفس الشعور بس هو كان ملح ولازقلها جامد
قرب منها نادر وقالها:
-رهف ازيك وحشتيني متوقعتش اشوفك هنا
اياد وشه احمر من الغضب وضغط علي ايدها جامد وقاله:
- ايوة ايه السؤال ؟
رهف ايديها وجعتها وبصت لنادر وقالتله بتوتر:
- ازيك يا نادر عامل ايه
نادر مد ايده عشان يسلم عليها وهو بيقؤلها:
-تمام انتي عاملة ايه وفينك كل ده
اياد بصلها بحدة وقالها بصوت واطي:
-اياكي تسلمي يا رهف احسن هزعلك
رهف اتوترت وبصت لايد نادر وقالتله:
-انا موجودة اهو انت فينك
اياد بصلها بغضب عاللي قالتله وقالها:
- مين حضرته ؟
رهف خافت من بصته ليها وقالتله:
-ده نادر يبقي زميلي ايام الكلية
نادر بصلها بتسبيل وقالها:
-بس كدة يعني مكناش بنحب بعض ولا حاجة ، اياد سمع كدة واتجنن وقالها بعصبية:
- افندم
يعني ايه بتحبو بعض
رهف حاولت تدوس علي الوتر بتاع الغيرة بتاعته وفرحت لما اتاكدت انه كان بيعاملها وحش كدة بس هو من جواه بيحبها لسة فبصتله وقالتله اه فعلا كنا بنحب بعض جدا مش كدة يا نادر
نادر قالها بهيام:
-عيونه ايوة طبعا بس الظروف بقي خليتنا نبعد واعتقد ان الصدفة دي ممكن تجمعنا تاني مش كدة ولا ايه يا رهف
اياد بصله بغضب ومسكه من لياقه قميصه وقاله:
-علي اساس انها ماشية مع سوسن مش كدة ياض انت
رهف حست ان اياد هيضر*ب نادر لو فضلو واقفين اكتر من كدة فقالت بسرعة:
-طيب فرصة سعيد يا نادر يلا بااي وشدت اياد ومشيت بسرعة قبل ما نادر يرد
اياد كان ماشي مش طايق نفسه متكلمش مع رهف طول الطريق واول ما وصلو للبيت بصلها وقالها:
- انا مش عاجبك عشان لية ماضي مع البنات لكن ده عاجبك عشان ماضيه نضيف بس للاسف الحاضر بتاعه معروف لو هو ده اللي هيسعدك ربنا يوفقك معاه واتمنالك السعادة من قلبي و سابها ومشي
ورهف فضلت باصة عليه بحزن......
.............
اسر ورؤي كانو قاعدين عالكورنيش ورؤي ماسكة الدرة في ايدها واسر بصلها وقالها:
- عجبتك الخروجة يا رؤي ؟
رؤي بصتله وقالتله بفرحة:
-ياااه بجد.اتبسطت اووي يا اسر انت مش عارف الخروجة دي فرقت معايا ازاي
اسر استغرب وقالها:
-للدرجادي ليه انتي اول مرة تخرجي
رؤي اتنهدت وبصتله وقالتله بحزن:
-عارف لما تبقي عايش مع اهلك اللي منك وتحس انك وحيد انا كنت كدة يا اسر ليا بابا دايما شايف اني كبرت ولازم اتجوز ومكنش ليه لزوم التعليم هو بس مش بيشوف غير بنت جارتنا اللي معرفش اتجوزت واللي اتخطبت واللي بقي معاها عيال ولمجرد اني تميت ال١٨ سنة ابقي كدة عنست ولازم اتجوز ميعرفش اني عندي طموح نفسي اتعلم واخد شهادة وابقي مهندسة قد الدنيا عارف سعات بحلم باليوم اللي اتخرج فيه واشوف ابويا وامي فخورين بيا ويقولولي اني كان عندي حق وان تعليمي اهم وان شهادتي هيا اللي هتنفعني وهيا اللي هتقويني بس الواقع غير كدة وبصتله سالته:
مش كدة يا اسر
اسر اتنهد وقالها
-عندك حق فعلا الواقع غير كدة
رجعت بصت قدامها وكملت كلامها وقالت:
-حتي لو اخدت شهادتي برضه هيفضلو شايفني البنت اللي اتخلقت عشان تتجوز وتخلف بس وبصت لاسر وسالته بتردد:
- طيب تفتكر انا غلط يا اسر؟
اسر كان سرحان فيها وفي كلامها اللي لمس قلبه ومن جواه بيسأل نفسه ليه دايما بيقارن بينها وبين رانيا خطيبته ورد عليها وهو بيقوم يقف وقالها:
- انتي صح اوعي تتأثري بكلام اهلك صدقيني لما توصلي هما سعتها هيبقو فخورين بيكي وهيتشرفو بيكي قدام الناس كلها ويعدين ما انتي برضه اكيد هتتجوزي هو انتي هتفضلي كدة لوحدك وعند الفكرة دي حس انه غيران ومضايق بس مش عارف ليه او جايز عارف بس بيكدب نفسه
فاتكلم بهدوء وقالها:
-يلا بينا نمشي
رؤي حست انه اتغير فجأة واستغربت بس قامت من مكانها ومشيت جمبه بهدوء من غير ما ترد
..............
عدت ايام وشهور وحور زي ما هيا ياسين بيتقربلها وهيا بتصده او خايفة تخليه يقرب لتتجرح
ورهف اللي اياد كل يوم بيثبتلها بتصرفاته انه اتغير وانه جدير بيها ومع ان كلامهم قليل جدا وفي حدود الشغل الا انها مراقباه وعارفة اخباره كلها وعرفت انه مبقاش يسهر من يوم ما عرفها وبقي ملتزم في شغله وتعامله مع اي ست في حدود الشغل وبس وده خلاها تتعلق بيه اكتر واسر اللي تصرفات رانيا زي ما هيا بتثبتله انها مش هتتغير زي الانانية وحب الفلوس والمظاهر فقط وده خلاه يقرب من رؤي اكتر اللي خطفت قلبه وعقله ببساطتها وبرائتها وعفويتها اللي بتخليه هيتجنن من الغيرة عليها ومن جواه مش عارف ايه السبب بس اكيد كلنا عارفينه
........ .... ...........
في يوم ابو حور جه من الشغل وفتح باب الشقة ودخل ونادي علي اسر واسر كان في اوضته وخرج لما سمع ابوه بينده عليه ولقي ابوه قاعد في الصالة علي الكرسي فقعد قدامه وابوه اتكلم وقاله:
الاب / بص يا اسر يابني انا عايزك في موضوع يخص بنت خالتك رؤي
اسر قلق وحس بنغزة في قلبه وبص لابوه بخوف وقاله:
-خير يا بابا في حاجة ؟
ابوه قاله وهو بيقلع الجاكت بتاعه بتعب :
-خير يابني في عريس متقدم لبنت خالتك وكلمني انهاردة ومستني مني رد
اسر كشر و اضايق وقام بسرعة وهو مش حاسس بنفسه وقال لابوه:
- ايه لا طبعا مستحييييل ثم شافها فين وامتي واتكلم معاها ولا ايه بقي؟
ابوه استغرب جدا تصرفاته وبصله بغموض وقاله وهو بيرجع بضهره لورا عالكرسي:
- لا يابني ده حتي باين انه كويس ومحترم وقالي انه زميلها في الجامعة والبنت مش هتفضل كدة يعني مسيرها تتجوز
اسر اتعصب وضغط علي ايده جامد وحس انه غيران عليها لمجرد بس انه في حد شافها في الجامعة واعجب بيها وحاول ميبينش وقال بهدوء وهو بيقعد تاني عالكرسي:
-ايوة ايوة بس يعني هيا لسة بتتعلم
ابوه حط ايده علي دقنه وبصله بغموض وبعدين قاله بخبث:
-والله انا شايف طالما هو انسان كويس ومش هيمانع انها تكمل يبقي خلاص نعمل خطوبة وكتب كتاب بعد امتحانتها
اسر ملقاش مبرر لتصرفاته ولا لرفضه فقال بضيق:
- خلاص يابابا اللي تشوفه بس انا بصراحة مش موافق عشان هيا لسة صغيرة والمفروض تكمل تعليمها الاول والموضوع ده هيشغلها عن دراستها
ابوه بصله وحرك راسه شمال ويمين بيأس من ابنه ومن عنده وقاله:
-متقاطعش اما اشوف رأي البنت الاول مش جايز ترفض هنده عليها اسألها يا رؤي يا رؤي
رؤي طلعت من اوضتها وقعدت جمب جوز خالتها وقالتله خير يا خالي
محمود جوز خالتها قالها يا بنتي عايزك في موضوع:
اسر كان قاعد علي اعصابه وعمال يهز في رجله جامد وخايف لتوافق وعايزها ترفض باي طريقة وكان مستغرب نفسه كدة ازاي
محمود قالها وهو بيطبطب عليها:
-في عريس متقدملك يا رؤي وانا باخد رايك يا بنتي عشان لو كدة هكلم ابوكي وامك
روؤي اتفاجئت وبصت لاسر وابتسمت وافتكرت انه هو العريس بس اتصدمت والابتسامة اختفت اول ما محمود جوز خالتها قالها:
-ها يا بنتي ايه رأيك هو انسان كويس وبيقؤل انه زميلك في الجامعة يعني شاب كويس وقالي انه بيشتغل مع الدراسة وعنده شقة من تعبه وشقاه
رؤي كشرت بعد ما سمعت باقي الكلام وعرفت انه مش اسر وبصت لمحمود وقالتله:
- لو سمحت يا خالي انا مش موافقة
و مش بفكر في الموضوع ده دلوقتي خالص
اسر اتنهد بارتياح وابتسم وقالها:
- فعلا انتي عندك حق تعليمك اهم شوفت يا بابا مش قولتلك
ابوه بصله بقلة حيلة وبعدين بص لرؤي وقالها:
-اللي يريحك يا بنتي بس برضه فكري كويس وبعدين قرري وصلي استخارة وبلغيني ردك بكرة ان شاء الله واللي فيه الخير يقدمه ربنا
رؤي حركت راسها وقالتله:
-حاضر يا خالي بعد اذنكو وسابتهم وقامت دخلت اوضتها واسر متابعها بعينه
.....................
في الشركة ياسين كان قاعد علي مكتبه ومسك الفون وكلم حور وقالها:
-حور تعالي عايزك
حور دخلت وهيا بتتجنب عنيها تيجي في عينه وده اللي كانت بتعمله طول الفترة اللي فاتت، وقفت قدامه وقالتله:
- نعم يا افندم
ياسين بصلها بحزن وقالها:
-في سفرية تبع الشغل انا هسافر اسبوع هخلص الصفقة واجي عايزك تمشي كل حاجة كأني موجود لو في اي حاجة ضروري رني عليا وانا هقؤلك تعملي ايه
حور حست ان قلبها وجعها متعرفش ليه لمجرد انها عرفت انه هيسافر وهيبقي بعيد عنها واتكلمت بصوت مهزوز:
-تمام يا فندم
ياسين حس بيها وقام وقف قدامها ورفع بايده وشها ليه وقالها هتوحشيني
بصتله حور وعنيها دمعت و قالتله:
- متتأخرش لو سمحت
ياسين مسك ايديها وباسها وقالها: -مش عارف بتعملي فينا كدة ليه انتي متأكدة اني بعشقك يا حور متحرمنيش من اني اكون معاكي
حور بصتله برجاء وقالتله وهي بتمسح دمعة هربت من عنيها :
- سيبها للايام وهيا هتقربنا من بعض لو لينا نصيب سوا
ياسين اتنهد بضيق وقالها:
- ماشي يا حور اللي انتي عايزاه هعمله بس اوعديني لما ارجع تكوني فكرتي وقررتي ،
هزت دماغها بمعني حاضر لانها حاسة انها لو اتكلمت دموعها هتفضحها وهتبين حبها و اشتياقها ليه واتفاجأت بياسين بيحضنها جامد وهيا اتصدمت من رد فعله ورغم كسوفها الا انها كانت مبسوطة اووي وحاسة انها مش عايزة تخرج من حضنه فضلو كدة دقايق وبعدين بعد عنها وهيا بصتله وقالتله بصوت رقيق:
- هو لازم تسافر ؟
ياسين قالها وهو بيمسح دمعة من عنيها بايده:
-ايوة لازم وضروري دي صفقة كبيرة ولازم اكون موجود بنفسي بس افهم من كدة انك مش عايزاني اسافر ؟
حورهربت من السؤال وقالتله:
- تروح وترجع بالف سلامة بعد اذنك وسابته ومشيت وهو اتنهد وقال لنفسه واخرتها معاكي يا حور
...........
دخلت رؤي قوضتها واترمت عالسرير وعيطت جامد مش عارفة هيا بتعيط عشان كان نفسها يكون اسر هو العريس ولا عشان هو مش حاسس بيها وبحبها ليه اللي باين في عنيها مسحت دموعها وبصت لنفسها في المراية وقالت:
- لا يا رؤي كدة غلط هو واحد مرتبط متوهميش نفسك وتعيشيها في حلم لازم تفوقي نفسك ومتمشيش ورا قلبك هو لو كان بيحبك كان حتي لمح ليكي لكن هو بيحب خطيبته حتي لو هيا متستهلوش بس بيحبها لازم تتقبلي الواقع واخددت قرار انها تحاول تبعد عنه ومتتقابلش معاه كتير عشان تعرف تنساه بس السؤال هنا هو الحب الحقيقي ينفع يتنسي ؟
..............
استأذن اسر من والده ودخل اوضته وفي نفس الوقت كانت خرجت امه نبيله وقعدت جمب محمود جوزها ولقيته بيفكر وسرحان فقالتله:
- مالك يا حج فيك ايه يا خويا
محمود حكالها علي العريس ورأي رؤي وتصرفات اسر ورأيه هو كمان وقالها:
-مش عارف ليه قلبي بيقؤلي ان اسر فيه حاجة بس مش عارف ماله
نبيلة ابتسمت وقالتله بفرحة انا بقي عارفة ماله
محمود استغرب وقالها ماله بقي قوليلي يمكن افهم منك
نبيلة قربت منه عشان محدش يسمع وقالتله:
- ابنك في محتار مع نفسه او بالظبط في خناقة بين عقله وقلبه
محمود مسح علي شعره وقالها:
- والله منا فاهم منك حاجة بقيتي تتكلمي بالالغاز وانا مش فاهم في ايه
ضحكت نبيلة وقالتله:
-هفهمك انا ابنك معجب برؤي قلبي بيقؤلي كدة وكمان تصرفاته انا ملاحظاها بس هو يا حبة عيني بيحب اللي ما تتسمي اللي معرفش اتحدفت علينا منين والله ما اعرغ هو بيحبها علي ايه لاهي من توبنا ولا احنا من توبها بت مغرورة وشايفة نفسها عليه وهو معمي ومش شايف غيرها بس لما شاف رؤي وانها متربية وبنت اصول بقي بيقارن بينهم بس مش قادر يعترف لنفسه انه محبش الز*فتة دي وانه حب رؤي بنت اختي
محمود ضيق عينه وبصلها وقالها:
- يا سلام كل ده عرفتيه من قلبك ومن تصرفات ابنك ده انتي علي كدة بقي نفتحلك مدرسة
نبيلة ضحكت وقالتله:
- اومال ايه ده انا افهمها وهيا طايرة بس تعرف هو صعبان عليا اووي يا عين امه نفسي اكلمه وافهمه بدل ما هو تايه كدة
محمود حذرها وقالها:
-لا اوعي تتكلمي في حاجة سبيه هو كبير وراجل وعارف دنيته ايه سبيه هو يجرب ويعرف لوحده
نبيلة حطت ايدها علي بؤها وقالتله بلهفة:
-عندك حق يا حج خلاص مش هتكلم ولا هفتح بوقي هقؤم بقي اعملك شاي يظبط مزاجك
محمود مسك ايديها وباسها وقالها؛:
-تسلميلي يا ام العيال
.............
عدي ١٥ يوم وياسين مرجعش وحور شايلة الشغل بس حاسة انها بنص عقل وقلبها كله مع ياسين واللي وجعها وقلقها اكتر انه مكلمهاش بقاله كتير وخايفة عليه وكانت حاسة انها ناقصها حاجة كبيرة اووي وكانت بتلهي نفسها بالشغل ومش بتدي نفسها فرصة تريح عشان الوقت يعدي بسرعة لحد.ما يرجعلها ، وفي يوم كانت بتبعت شغل بالفاكس وكانت مشغولة جدا وباصة في الورق بس وقفت عن اللي بتعمله لما شامت ريحة برفانه اللي عارفاها وحافظها صم........... يتبع
تفاعل جامد بقي عشان انزل البارت الثامن بسرعة ♥❤
رأيكم في البارت يهمني
#عشق_اقتحم_كياني
#بقلمي_اسراء_ابراهيم
تكملة الروايه بعد قليل
تعليقات
إرسال تعليق