 |
سكريبت♥️بقلم سولييه نصار♥️كامل
سيدة قلبي
-تتجوزيني يا بسمة ؟!!
كانت بتشرب العصير زي المفجوعة فجأة بعدت الكوباية وبخت العصير كله في وشي
-ايه ده يخربيت قر*فك
زعقت فيها وانا بمسح وشي
-قولت ايه يا احمد بيه ...أنا اتجوزك انت
-ايوة ايه الغريب يعني
-ده أنا الخدامة ...
ابتسمت وقولت بفخر:
-انا راجل متواضع مبفرقش بين سيد وخدام
ضحكت بتريقة وزعقت لدرجة الناس اللي في المطعم بصوا علينا. قالت:
-نعم يا حيلتها انت هتهزر؟!!!ده انت كنت ماسح بكرامتي الأرض وبتقر*ف مني كأني جر*بانة
-اقعدي يا جرب*انة انتي ووطي صوتك فض*حتينا أنا جايبك مطعم محترم ...عمرك ما فكرتي تدخليه
قعدت بسمة وهي بتبصلي بقرف وبتقول :
-انجر عايز تتجوزني ليه
بصيتلها بصدمة وقولت:
-يا بت اتلمي أنا ولي نعمتك يا بت ده انتي شغالة عندي !
ضحكت بتريقة وقالت:
-يا عم انت طردتني من شهرين فوق
-الله انتي اللي اكلتي من البيتزا بتاعتي ..
-كان شكلها حلو اوووي وانا كان نفسي فيها
-بس دي كانت بتاعتي
صرخت فيها وبعدين لما حسيت الناس بصت عليا هديت شوية وقولت:
-يا حبيبتي البيتزا كانت بتاعتي وانا مبحبش حد ياكل من حاجتي
بصتلي وقالت؛
-اعتبرها زكاه عن صحتك ياخي
-مبعتبرش
-خلاص خلاص المهم عايز تتجوزني ليه
-يمكن حبيتك مثلا
-انت معندكش قلب وبعدين انت بتاع ستات ده أنا اللي كنت بداري علي مصايبك فقول ليه عايز تتجوزني
البت طلعت ذكية بصراحة وهتتعبني ...مشكلة بسمة انها رغم إنها مجرد خدامة عندي لكن عرفاني اكتر من ابويا وامي وعيلتي كلها ...وده طبيعي لانها كانت الخدامة بتاعتي لاكتر من تلات سنين لما كنت عايش في الفيلا لوحدي واهلي مسافرين برة ...كانت عارفة كل نزواتي وكانت بتساعدني وتداري عليا ...لقيت اني خلاص مقدرش اكدب عليها اكتر من كده وقولت بصراحة تامة
-ابويا
ابتسمت بإنتصار وقالت:
-ايوة يا حلو قر بكل حاجة الحكاية طلع فيه استاذ عامر اللي ان شاء الله هيطلع عينيك ويمشيك علي عجين متلخبطهوش
-ما تحترمي نفسك بقا
صرخت بغضب ...بصتلي ببرود ومسكت صباع محشي بإيديها ...من غير شوكة وقالت:
-ماله بقا حمايا المستقبلي قول يا اخويا طلب منك تتجوزني
-لا هو بصراحة طلب مني اتجوز قبل ما يخلص الشهر ده والا هيحرمني من الميراث
بصتلي بحيرة وقالت:
-طب اشمعنا أنا ما تتجوز أي واحدة من اللي كنت بتمشي معاهم
-يا بسمة يا حبيبتي دول لازقة ما يصدقوا ممكن يرفضوا الطلاق ويبدؤا يبتزوني لكن انتي كده كده مبتطقيش امي فعادي ....
سكتت للحظة وبعدين قالت:
-جوازنا هيكون
-صوري
كملت بسرعة ...وقولت:
-صحيح شرعي بس أنا مش هلمسك وهتبقي معززة مكرمة في بيتي لحد ما يكتبلي ثروته وهديكي من الثروة مليون جنية
-موافقة
قالتها بسرعة
.......
مر يومين وكنا خلصنا كل الإجراءات واتجوزنا بوجود عم بسمة ..وروحت علي البيت مع بسمة
-انت ماسك الخدامة ليه كده يا ولد
قالها ابويا فابتسمت في وشه وقولت:
-احب اعرفك يا بابا ان بسمة بقت مراتي خلاص ...
فجأة ابويا اغمي عليه ...
صرخت بسمة وقالت:
-الحق يا عم ابوك ما*ت وخلاص هتورث يا ابن المحظوظة
يتبع
الجزء التاني♥️شكرا علي تفاعلكم السكر♥️بقلم سولييه نصار♥️
-يخربيتك اسكتي
قولتها وانا بجري علي بابا وبحاول افوقه ....
جات امي واتخضت وقالت:
-مال ابوك يا احمد
بصتلها وقولت بخوف :
-اغمي عليه لما عرف انني اتجوزت بسمة ...
أمي اتصدمت وبصتلي أنا وبسمة وبعدين اغمي عليها جمب ابويا
ضحكت بسمة وقالت :
-اهو بقوا جث*تين يا معلم
-ممكن تخرسي وتيجي تساعديني
صرخت فيها بعصبية جات جري وبدأت تساعدني عشان اوديهم اوضتهم ....
.....
-يا بابا فوق ابوس ايديك
قولتها وانا بهز فيه وبسمة بتهز في ماما ...
بصيت لبسمة وقولت:
-انا هتصل بالدكتور ...
ولسه هروح مسكت بسمة ايدي وقالت :
-علي ايه يا اخويا المصاريف الكتير دي استني
بعدين مسكت كوباية المية وكبتها عليهم وهي بتقول:
-قوم يا حج شوف فضي*حة ابنك
قام ابويا وهو مصدوم وقال:
-عمل ايه تاني عمل ايه تاني
ابتسمت بسمة وقالت:
-اتجوزني ...
قربت من بسمة وانا بقول :
-اسكتي لاحسن يجراله حاجة واخفي دلوقتي لحد ما اكلمهم ...
-اخفي اروح فين
-اي حتة يا بسمة ...عايز اتكلم مع أهلي شوية .
-يا راجل ما احنا شركا في الجر*يمة فطمني
بصيت لها بصدمة وقولت:
-شركا ايه اللي يخربيتك انتي ناوية توديني في دا*هية ...غوري دلوقتي
هزت راسها وقالت بصوت واطي:
-طيب هروح المطبخ
-روحي
-واد يا احمد
بصيت لها بصدمة وقولت:
-ايه واد ده انا ولي نعمتك يا بت
-لا يا اخويا كان زمان أنا دلوقتي وارثة مليون جنية .المهم بقولك فيه اكل في المطبخ
-ايوة كنا عاملين ورق عنب امبارح روحي اطفحي.
-حالا يا ابو حميد
وراحت مشيت بسرعة ولسا هلف عشان ابص علي اهلي لقيتهم في وشي ...
امي مسكت قلبها وقالت:
-انت صحيح اتجوزت الكائن ده يا احمد
-ايوة يا امي تحبي اوريكي ورقة الجواز ..
حطت ايديها علي قلبها فمسكها ابويا وقال:
-ارتاحي انتي يا حياة لحد ما اشوف الكارثة دي ...
وبعدين شدني وقال بغضب :
-تعالي يا آخر صبري
وداني علي المكتب بتاعة واول ما قفل الباب بصلي بغضب وقال وهو مصدوم:
-ملقيتش الا بسمة عشان تتجوزها ؟!
هويت كتفي وقولت:
-مالها بسمة يعني مش إنسانة ولا هي سمكة مثلا...وبعدين انت قولت اتجوز عشان تاخد الثروة محددتش اتجوز بسمة ولا كارمن دي غلطتك ....
ضحك ابويا وقال:
-انت فاكرني غبي يا واد انت ...فاكرني مش عارف ان الجواز ده مسرحية بينكم عشان الثروة وهطلقها بعدين ..بس لا يا احمد ..ده انا ابوك عيب حافظك وكنت متوقع حاجة زي كده عشان كده انا غيرت الاتفاق ..
اتصدمت وزعقت:
-انت مستحيل تعمل حاجة زي كده انت وعدتني ...
-اسمع للاخر شرطي عشان اديك الفلوس
-اتفضل قول ...
........
بعد ساعة كنت في اوضتي أنا وبسمة عشان نجهز وننام شوية ...كنت قاعد بفكر في شرط بابا ...
وقفت قدامي بسمة وقالت بقلق :
-ايه وافق يديك الفلوس ؟!!
ابتسمت وهزيت راسي وقولت:
-ايوة بس شرط عليا شرط تعجيزي
-ايه هو
-اني اجيبله حفيد!!!
يتبع
الجزء التالت♥️شكرا علي تفاعلكم السكر♥️بقلم سولييه نصار♥️
-وانت هتجيبله حفيد من فين ؟!
سألت بغب*اء بصتلها وقولت:
-ما شاء الله علي ذكاء اهلك يا بسمة شكله ورق العنب كبس علي خلايا التفكير عندك ...مفروض احنا الاتنين نجيبله حفيد
-نجيبله ازاي
-عوض عليا عوض الصابرين يارب
قولتها وانا بهز راسي بيأس ...
بعدين قومت ومسكتها وقعدت اهزها...:
-فوقي يا حبيبتي فوقي هي العيال بتيجي ازاي مش معقول تكوني بق*رة للدرجادي
استوعبت اللي بقوله ووشها حمر واتكسفت
ضحكت بتريقة وقولت:
-ايوة كده فوقي معايا شوية عشان نفكر في حل للمصيبة دي
حاوطت نفسها بحماية وقالت:
-حل ايه ...أو تفتكر انك هخليك تلمس شعرة مني يا احمد بيه أنا ولية شريفة عفيفة مبعملش الح*رام
-يا ست أنا جوزك اتهدي بقا وبعدين متقلقيش مش هنوصل للمرحلة دي ابدا ...اقعدي بقا عشان نلاقي حل ...
قعدت أنا وقعدت هي جمبي ...كنت بجد متضايق ...ابويا لعبها صح ...من فين اجيب له حفيد أنا من فين ...لو فعلت جوازي من بسمة أنا كده بد*مر حياتها وحياتي وهيبقي بيننا طفل ملوش ذن*ب ...كانت بسمة بتبصله بحزن علي حاله وقررت تساعده
-اهدي بس هنلاقي حل بإذن الله
هزيت راسي وقولت:
-ابويا صعب يا بسمة هو قاصد يعمل كده عشان اتجوز ...فاكر اني كده هتعدل
-طيب ما تتجوز
بصتلها فقالت:
-شوفلك بنت مناسبة ليك وحبها واتجوزها
ضحكت وقولت:
-ها وبعدين اكتشف انها مختلفة كتير عني ونبقي نسخة تانية من بابا وماما وبعدين نجيب طفل ونرميه لوحده وننشغل عنه عشان نوفرله مستقبل بدل ما نوفرله حب واحتواء ؟!!!انتي عايزاني اجيب طفل ويتعامل زيي يبقي شايف أهله مجرد بنك مركزي ومفيش بيننا مشاعر ...لا مقدرش اعمل كده في طفل برئ ...هو مش عايز يديني ثروته هو حر خلاص ....استني فترة وبعدين هطلقك وهديكي فلوس متقلقيش ده حقك بس طبعا مش مليون أنا مش معايا المبلغ ده ...
-ايه رايك نخ*طف طفل ؟!
قاطعتني بسرعة وهي بتقول الكلمة اللي كانت هتجيبلي صدمة عصبية
-بتقولي ايه يا حجة ؟!!
-نخ*طف طفل يا احمد ...أنا أعمل نفسي حامل وعلي الولادة نخ*طف طفل ونقول أنه أبننا
-انتي مسجلة خط*ر صح
-لا ليه ...
-يبقي اكيد مجنونة ...لاني دلوقتي لاما هبلغ عنك البو*ليس أو هوديكي مصحة ...
-الله مش بساعدك ..
-تقومي تلبسينا ته*مة خ*طف .....انتي المنطقية ما وردتش في حياتك ...يا حبيبتي فكري شوية مش كده انتي حرفيا بترمي حلول كارثية قادرة توصلنا لحبل المشن*قة ...انتي اللي هيتجوزك أمه هتكون داعية عليه ليل نهار
-يعني مش نافع الحل ده ...
نفخت بضيق وقولت:
-لا مش نافع ...ولو سمحتي متفكريش تاني ابوس ايديكي خليني انا أفكر ....
سكتت شوية وبعدين صرخت لحد ما فزعتني وقالت:
-لقيت الحل خلاص
-ايه هو
-نخطف طفل من أمه
-يالهووووووي
يتبع
الجزء الرابع♥️شكرا علي تفاعلكم السكر♥️بقلم سولييه نصار♥️
-يا بت اتهدي انتي علقتي علي الخ*طف ولا ايه ...ايه سبب ميولك للخ*طف يعني ..انتي من ما*فيا تجارة الأعضاء وانا معرفش
زعقت فيها من غلبي ومن غبا*ئها ...
-يا بني مش هنخ*طفه بالحرف ...اسمعني بس
-قولي وربنا يستر ....
........
في اليوم التاني روحنا بيت بنت عم بسمة .
-انتي اتجننتي يا بسمة ده انا هبلغ عنك البولي*س ..
صرخت بنت عمها فيها فهمست لبسمة:
-يالا يا ست حلويات دي هتس*جننا مش عايز فلوس تغور الفلوس ..
-اصبر يا عم
-يا سمسمة اسمعيني
قاطعتها سمية وقالت:
-بسمة أنا عارف انك لاسعة بس مش للدرجادي!!
ضحكت وقولت:
-الحمدلله العيلة كلها عارفة انك غير متزنة عقليا ...يالا يا ست نمشي من هنا ده شوية وهتضر*بنا بالشبشب
-استني يا عم بس
-ربنا يستر أنا راجل جذ*مة اصلا اني سمعت كلامك
قامت بسمة وقالت:
-يا سمسمة دي فيها مليووون جنية واحنا هناخد ابنك بعد ما تولديه واقول اني ولدته علي الشهر السابع وهاخده فترة صغننة بس وهرجعولك ...
بصتلها سمية وقالت:
-لحظة يا حبيبتي هجيب حاجة
-حاضر يا عمري
قالتها بسمة بفرحة ...دخلت سمية المطبخ فبصتلي بسمة وقالت:
-انا في الاقناع معنديش يما ارحميني
لحظة وخرجت سمية وهي بتصرخ وماسكة سا*طور :
-امشوا يا مجانين انتوا من هنا بدل ما اقط*عكم وارميكم لكل*اب الشوارع
-اجري يا بسمة دي طلعت مجنونة
صرخت ومسكت ايد بسمة وجرينا ...
....
بعد شوية كنا ماشيين في الشارع فبصتلها وقولت :
-انتوا عيلة مجنونة والله
ضحكت اوووي ...ضحكتها الصافية كانت احسن من ضحكتها اللي يشوفها في نوبات جنانها وغبائها وقالت :
-انت لسه شوفت حاجة ده عينة بسيطة كده
ضحكت وقولت :
-كمان
......
جه الليل كنت قاعد في الجنينة وانا بفكر هعمل ايه ...اظن ملهاش حل خلاص استسلم وارجع اعيش لوحدي اشتغل واكتفي باللي بيدهوني ابويا...
كانت بسمة بتبصله من البلكونة بحزن ...رغم كل حاجة زعلت عليه فقررت تروح تواسيه
...
حسيت بحد جمبي ببص لقيت بسمة بتبتسم بحزن وقالت:
-متزعلش هتلاقي حل
-لا خلاص
-يعني ايه ايه
ابتسمت بحزن وقولت:
-يعني مفيش داعي هننهي اللعبة دي وانا هرجع لحياتي
حسيتها زعلت بس محبتش تبين فقالت بهزار:
-ايوة عايز ترجع لحياة روميو اللي انت عايشة بنات وحركات وكل يوم تتقفش مع بنت شكل ...
ضحكت جامد وقولت:
-علي فكرة انتي لذيذة
وشها احمر من الكسوف فقولت :
-صندوق انت بتتكسف معقول !!! ده انا نسيت انك من سلالة النساء
ضربتني علي كتفي جامد فضحكت ...
......
اتفقت مع بسمة اني هطلقها بعد فترة عشان محدش يتكلم عليها ...واضطرت تعيش معايا الفترة دي وبفضلها قدرت اطلع من مود الحزن بتاعي كانت بتقدر بسهولة تخرجني من أي حالة حزن ...شوفتها ساعتها بمنظور تاني ...كانت بتنشر السعادة والطاقة الإيجابية حواليا ...نسيت هي هنا ليه ولا ايه هي خطتي كنت بسكت بس عشان اسمعها ...بس في يوم جات الفترة خلصت ومفروض نتطلق ...
....
-بتعملي ايه
قولتها بإستغراب
بصتلي وقالت:
،-المدة خلصت ومفروض نتطلق صح
سكت للحظة وحسيت قلبي انقبض بس قربت منها وقولت:
-بس أنا مش عايز نتطلق
-ايه
قالتها بصدمة فقولت بسرعة :
-انا بحبك
يتبع
الجزء الاخير♥️شكرا علي تفاعلكم السكر♥️بقلم سولييه نصار♥️
-لا
-ايه هو اللي لا ؟!
قولتها بإستغراب
قالتلي بهدوء :
-انت مش بتحبني
ضحكت وقولت:
-لا والله ...أنا صاحب الشأن وبقولك بحبك وانتي تقولي لا
عيونها دمعت. وقولت :
-انت عايز تست*غلني
-افندم
قولتها بإستغراب
بكت وقالت:
-ايوة انت عايز تفعل جوازنا ونجيب حفيد لابوك وتاخد الثروة ...فبتس*تغل مشاعري ...
-مشاعرك
سألت بشك ...فانفجرت في البكا وقالت:
-ايوة مشاعري ...انت اكيد عرفت اني بحبك
فرحت اووي وقولت:
-بجد حبتيني
بصتلي بصدمة وقالت:
-انت متعرفش
هزيت راسي وقولت:
-وانا اعرف من فين ؟!!
ابتسمت بحزن وقالت:
-انا بحبك من وقت ما كنت بشتغل عندك وكنت بغير اووي من البنات اللي بتمشي معاهم بس انت كنت زي البغ*ل
ضربتها علي كتفها وقولت:
-ايه بغ*ل دي ما تحسني ملافظك يا ست ؟!!
قربت منها وقولت:
-احم ..مكنتش اني مح*طم قلوب العذاري للدرجادي
-يا شيخ اتنيل أنا لو ببص للشكل مكنتش حبيتك
-لا يا حبيبتي احترمي نفسك ده انا اقول للقمر قوم وانا اقعد مكانك
-متقولش كده لاحسن القمر ينتحر لما يشوف انك بتتشبه بيه ...
-جرا ايه يا حبيبتي ما تشوفي شكلك الاول ...الواحد مش راضي يتن*مر ...
-مالي بقا يا حبيبي ده انا نص شارعنا بيجري ورايا ..
قالت بتكبر
قربت وانا ببتسم وقولت:
-عندهم حق والله
بصتلي بحذر وقالت:
-الله يا جدع انت بتقرب مني ليه كده ..
-مراتي الله
حاولت تزقني وقالت:
-ابعد يا احمد والا هلم عليك أمة لا اله الا الله ..
شيلتها وانا بلف بيها ...بصيتلي وعيونها مدمعة وقالت:
-متس*تغلش مشاعري يا احمد ...خليك صريح بتعمل لعبة عليا صح ...
هزيت راسي وقولت:
-لا والله ..ممكن جوازنا كان لعبة لكن حبي ليكي حقيقي ...فرحتي بوجودك في حياتي حقيقي وانا هثبتلك دلوقتي أن كل ده حقيقي ...
نزلتها ومسكت ايديها ونزلت عند اهلي ...
-كويس انكم كلكم موجودين عشان حابب اقول حاجة
-قول يا اخويا
قالها أبوه بتريقة
-انت صح جوازي ببسمة مسرحية عشان اخد الثروة
ضحك بابا وقال:
-كنت متوقع والله
ابتسمت بحزن وقولت:
-بس جايلك النهاردة وبقول أنا مش عايز الثروة دي ...وهطلع من البيت واشوفلي بيت علي قد فلوسي وهشتغل واعيش أنا وبسمة فيه وهنخلف عيال كتير ...عيال هديلهم الحب اللي انتوا حرمتوني منه ..
بصلي بابا وهو مصدوم فكملت وقولت :
-وعد مني هطلع اولادي يحبوني وميشوفنيش مجرد بنك
وبعدين اخدت ايد بسمة ومشيت ...
....
بعد ما طلعنا بصيتلها وقولت:
-مستعدة تبداي حياتك من الصفر معايا ونتشارك حزننا وفرحنا مع بعض
ابتسمت وقالت :
-بس اوعي بعد ما ربنا يكرمك ترميني وتتجوز حرباية بشعر اصفر اقت*لك والله
-لا متخافيش انتي الانثي الوحيدة اللي هتبقي في قلبي ♥️
-وانا في قلبي من زمان♥️
معرفش ايه هيحصل بعد كده بس اعرف ان تقبلها ليا بالحالة دي خلاني اسعد انسان في العالم وبقت هي سيدة قلبي♥️
تمت
#سيدة_قلبي
#سولييه_نصار
تعليقات
إرسال تعليق