مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

#البارت_التاسع

#ما_في_قلبي

_علشان بحبك يا نور..

نور بصدمه:اي بتحبني ازاي..

فارس:هوا اي اللي ازاي هوا في حد بيسأل حد بيحبه ازاي بكل بساطه من زمان يا نور وانتى كنتي بتكبري قدام عيني اليوم اللي مشيتي فيه حسيت أن روحي بتتسحب منى وقلبي راح معاكي انا كنت بموت حرفيا ورافض اي حاجه وشغفى راح كنت بطلع كل همى في المذاكره مكنتش بنام لحد ما في يوم وصلنا خبر وفاة عمى وجدي كان خايف عليكي وانا كنت خايف عليكي اكتر فضلت ادور عليكي في كل حته مكنتش لاقيكي لحد ما عرفت انك بتدرسي في الكليه اللي احمد بيدرس فيها لما جه وقالي انو في بنت ساعدته في الامتحان والا كان هيضيع وقال إن اسمك زي اسمه مع اختلاف اسم الاب ..

وقتها شكيت انو انتى وفعلا روحت وشوفتك قلبي كان طاير من الفرحه كنت باخدلك صور عشوائيه زي مانتى شايفه مكنتش متخيل في يوم انك تقفى قدامى كدا واقولك كل اللي في قلبي..

نور قلبها كان بيدق مع كل كلمه بيقولها معقول يكون فارس بيحبها الحب دا كلو وكان مخبي..وحتى محاولش انو يبينلها ولا يكلمها..

فارس وهوا عارف هى بتفكر فى اي

_انا مكلمتكيش علشان كنت عارف كل اللي بتمري بيه

_فعلا ولما أنكرت انك ابن عمي كنت خايف على مشاعري فعلا وكان باين الحب في عنيك وانت بتسيبني وتمشي وانت مخلى الكل يتكلم عليا ومنطقتش وأحمد اللي قالهم انك ابن عمى بجد الحب كان ظاهر في عنيك ...

فارس :نور انتى متعرفيش حاجه..

_فعلا انا معرفش حاجه طيب عرفني انت لى كنت بتعمل معايا كدا

_مينفعش اقولك حاجه دلوقتي

_طيب يا فارس ...

وخرجت وسابته وأحمد كان واقف برا ودخله

_انت لي مقولتلهاش الحقيقه

_اقولها اي يا احمد اكرهها في امها اقولها انى كنت شاكك انها تبقى زيها..

_فارس انت لسه شاكك انها زيها..

فارس سكت ومتكلمش..

احمد بعصبيه:تصدق بالله فعلا نور خساره فيك وتستاهل واحد احسن منك يا فارس عن اذنك..

احمد خرج ..

وفارس قعد مكانه وحط رأسه بين أيديه وهوا حاسس بصداع جامد في دماغه وحاسس أن الدنيا بتلف بيه ..

وفجاه قام وخرج من الأوضه..

خبط على اوضه نور..

نور خرجت وكان على وجهها عبارات صغيره..

_نور انتى لي بتعملى كدا..

_لو سمحت انا مش عوزا اتكلم معاك سيبني ..

_مش هسيبك يا نور انتى بتاعتي انا بحبك افهمي بقى

_لا مش هفهم حاجه..

وعن اذنك اتفضل من هنا مش عوزا اتكلم معاك..

فارس ببرود:طيب بصي بقى انتى لو موافقتيش عليا هخلى جدي يكمل جوازك انتى وأحمد وابقى شوفي هتمنعيه ازاي واه صحيح هتقولى اي لصحبتك يا عيني..

نور بدموع:انت لى بتعمل كدا

_دا اللي عندى...

نور اتعصبت وقفلت الباب في وشه...

وقعدت تعيط خايفه من رد فعل جميله وخايفه على مشاعرها هى وأحمد بيحبوا بعض مستحيل تفرقهم عن بعض ..

قررت انها مش هتستسلم ولازم تربي فارس...

قامت مسحت دموعها ووقفت بتحدي ..

_طيب يا فارس..

خرجت من الأوضه بتاعتها..

كان احمد واقف

_نور

_نعم..

احمد بترجي:ارجوكي يا نور توافقي على جوازك من فارس والله فارس بيحبك بس هوا حمار ومعندوش دم ومبيعرفش يعبر عن مشاعره انا عارف وواثق انك لو قربتي منه هتحبيه..

نور بهدوء:متقلقش يا احمد انا مش هسمح أن خطوبتي منك تتم حتى لو هتجوز فارس..

_لا مش قصدي كدا قصدي أن حرام يكون فارس بيحبك وانتى متديلوش فرصه حتى يعبرلك عن مشاعره حاولى تدى نفسك فرصه وانا متاكد انك هتحبيه.

نور بابتسامه:حاضر يا احمد هحاول..

نزلت تحت وكان الكل متجمعين ...

نور قربت من فارس ..

_ممكن تقوم معايا..

فارس يصلها باستغراب:في اي..

_معلش ممكن تقوم معايا..

فارس قام معاها ..

وهى خدته من أيده وراحت ناحية جدها اللي حاسس ان في حاجه..

نور:جدو أنا وفارس بنحب بعض وهنتجوز...

الكل:اي!!

#يارا_عبد_السلام

#البارت_العاشر

#ما_في_قلبي

نور:جدو أنا وفارس بنحب بعض وهنتجوز...

الكل:اي!!

نور:ايوا يا جدو انا مش بحب احمد انا بحب فارس وهوا كمان بيحبني..

بصت لفارس:صح يا فارس..

فارس فاق من شروده وقال:اه ..

الجد:طيب انا كدا هكسر بقلب احمد يا حرام

فارس:ميتكسر ولا يولع بجاز مهى قالتلك انها بتحبني اهى

الجد:منا مش مصدق 

فارس:واي يثبتلك

الجد:أن يوم الخميس بدل ما هى خطوبه تبقى جواز..

نور :لا لا انا انا مش جاهزه لجواز دلوقتي

الجد:واي مش مخليكي جاهزة في يومين كل حاجه هتكون جاهزة متقلقيش وبعدين انتى مش مبسوطه انك هتكونى مع حبيبك

نور بقلة حيله على اللي عملته في نفسها:اه مبسوطه عن اذنكو..

نور طلعت وهى حاسه انها عوزا تنهار عوزا حد ياخدها في حضنه محتاجه جميله اوووي ...

احمد:انتى لي عملتي كدا

_علشان جميله وبعدين هى موته ولا اكتر عادى انا كدا كدا مت من وقت ما بابا مات ولو قولت لا كنت انا وأنت هتجبر على حاجه مش عاوزنها وهنكسر قلب جميله فاحسن حاجه اللي انا عملته دا وبعدين يا سيدي انا هدى نفسي فرصه يمكن احب اخوك مش هوا قال انو بيحبني

احمد:انتى جميله اووي يا نور وخسارة فيكي كل اللي بيحصل دا بس انا حاسس انك انتى وفارس هتتفقوا قريب وهتبقوا اسعد اتنين

نور بابتسامه:أن شاء الله..

عن اذنك..

دخلت الأوضه بتاعتها وقعدت على السرير وعيطت 

*انا مش عارفه انا لي عملت كدا انا كنت نازله اهزقه قدامهم ونازله اقول لجدي على اللي قالهولى وأنه بيحبني وعاوزني اتجوزه غصب عني مش عارفه لي قولت اني بحبه وأننا هنتجوز ...

قامت من مكانها اتوضت وقعدت على سجادة الصلاة وفضلت تدعى ربنا وتعيط ربنا هوا ملجأنا الوحيد في اي ظروف واي وقت..

لحد محست بتعب ونامت مكانها...

.....

فارس كان في الاوضه بتاعته..

مستغرب كل حاجه بتحصل حواليه 

*هوا انا لي وحش كدا انا بايدي أحببها فيا انا بايدي اخليها تعشقني لكن انا لى دائما بدبش معاها وبنكر وجودها انا محتاج اكلمها وتخليها تطمنلي عن كدا هي اكيد ملهاش علاقه بأمها ولا ليها ذنب في كل اللي حصل ولا كل اللي شوفته ...

Flash.back..

فارس كان في الكليه وكان قاعد في الجنينه بيذاكر وقاعد مندمج في المذاكره وكانت الساعه ١٢بليل ..

في اليوم دا كان عمه عبدالله مسافر في شغل ..

شاف (لبنى)جايه مع واحد في عربيه من حظه أنه كان قاعد في الجنينه من ورا وشافها وهي بتسلم عليه وبتبوسه..

المشكله ان الكل كان نايم في الوقت دا وفارس اكتفى بالصمت ومتكلمش ومقالش لحد ..

حس نفسه وقتها انو ضعيف اووي انو يقف قدامها بس خاف ليحصل مشاكل بين أبوه وعمه ويطلع هوا الغلطان في الاخر ساب الموضوع أن ربنا يكشفه مع الوقت...

End...

*هى اكيد نور مش وحشه انا واثق في كدا بس انا خايف لامها تظهر في حياتنا وتخريبها زي مخربت بيتنا زمان وخدت عمى من هنا ومعاها نور واتخلت عنها...

في صباح يوم جديد ..

البيت كله بدأ في تحضيرات الفرح اللي هيحصل فجاه دا وجدهم بدأ يعزم أعيان البلد وكل الناس اللي يعرفهم اللي هم تقريبا البلد كلها اللي هم استغربوا الموضوع...

نور صحيت من النوم ..

لقت نفسها مكانها قامت دخلت الحمام واتوضت وصلت وخرجت من الاوضه بتاعتها..

شافت التحضيرات 

*انتو لو بتحضروا لجنازتى مش هتبقوا بالحماس دا..

تليفونها رن..

كانت جميله

جميله بمرح:الندله اللي نسيتني هوا الجو حلو عندك ولا اي انا عارفه أن فارس قمر بس مش لدرجه تنسي صحبتك

نور:يشيخه اتنيلي فارس اي ونيلة اي دانا في مصيبه

جميله:اي في اي

_اصل فرحي يوم الخميس

جميله: لولولوولولوي اخيرا هفرح بيكي امال يبت تعالى هنا ازاي متقوليليش

نور:خلصتي الهليله مش لما تعرفي مين الاول

جميله:اه صحيح مين اللي أمه داعيه عليه

نور:فارس

جميله:فارس مين 

نور:فارس يما 

جميله:الدكتور ابو عضلات المز القمر دا 

نور:اي يما انتى في سويقه اي اللي مو وقمر قال 

_اي دا انتى بتغيري من دلوقتي

_انا اغير تعالى خديه

_لا يختي انا بحب احمد

_ماشي يختى اعملى حسابك هتيجي تقضى اليوم معايا هنا 

_ماشي يا زمكس سلام بقى يا عروسه

_برضو هتقوليلي عروسه

_امال اقول اي

_مش عارفه يلا سلام...

_صباح الخير يا عروسه..

نور بصت لمصدر الصوت لقته فارس واقف بنفس ثقة النفس وبنفس البرود ..

_صباح الزفت على دماغك..

_نور متغلطيش

_هوا انت لسه شوفت غلط انت معندكش دم اعملك اي

_متعمليش أنا اللي هعمل 

وغمزلها...

قرب من ودنها

_على فكره انا بحبك اكتر لما تكونى متعصبه بيبقى شكلك جميل..

نور بارتباك:ها ..

وزقته من قدامها..

وبصتله:انت قليل الادب ..

ونزلت تحت ..

مديحه مرات عمها:صباح الخير يا مرات ابني دائما كان قلبي حاسس انك انتى وفارس هتتجوزوا

نور باستغراب:لي يعني

_اصلكوا يا بنتى طول عمركوا كنتوا ناقر ونقير بس انتى اول ما اتولدتي فارس كان بيحبك اووى ومكنش بيرضى حد يجي ناحيتك مع أن اخوه برضو كان مولود بس كان بيحب يلعب معاكى انتي..

بس لبنى امك للاسف كانت بتبعدكوا عن بعض فضلت تعمل جفى بينكوا وتبعدكوا ويشاء السميع العليم انكوا برضو ترجعوا وتبقوا من نصيب بعض اقدار والله..

_فعلا يا طنط

_طنط اي بقى قوليلي يا ماما 

_حاضر يا ماما..

_عسل يا مرات ابني ..انا هروح بقى للبنات في المطبخ وجهزي نفسك علشان بكرا الحنه ..

_جنه!؟

_ايوا يبنتي انتى لازم يتعملك كل حاجه امال اي انتى مش اقل من بنت العمده..

نور خرجت برا في الجنينه اللي كانت بتتزين بالورد وكمان الورد اللي هي بتحبه والألوان اللي بتحبها كانت مبسوطه اوووي وهى شايفه الحاجات دي وحاسه بفرحه غير مبرره..

لقت اسراء قاعده بتقرا كتاب..

نور قربت منها:اي دا انتى بتحبي الكتب

_اه جداا انا باخد من مكتبة فارس بالعافيه كل اسبوع كتاب

_اي دا هوا فارس عنده مكتبه

_اها دي اوضه لوحدها ومحدش بيتجرأ يدخلها

_للدرجادي اصلو حريص عليهم اووي وكان ناوي يعمل مكتبه أن الناس تقرا فيها ويبقى فيها استعارات وكدا بس حصلت ظروف منعته..

_ظروف اي..

_انه يدور عليكي فارس انا اول مره اشوفه بيناقر حد كدا او ممكن يكون بيتكلم مع حد زيك كدا ..

يعني من زمان وهوا كان مكتفي بالدراسه بس مبيخرجش ومبيكلمش حد حتى معندهوش صحاب..

_يااه للدرجادي

_اها..

نور في بالها:الله الواد طلع بيحبني بجد وانا مش عارفه شكل هواه هيغيرني وبنار حبه هيوقعني ولا اي...

*لا نور اجمدي كدا مش فارس اللي يوقعك..

عدى اليوم دون إحداث تذكر..

تانى يوم كان الكل بيجهز للحنه ونور خلت جميله تيجي تقضي معاها اليوم نور كانت خايفه ومتوتره وحاسه أن اليوم مش هيعدي على خير..

جه وقت الحنه والبيت كان مليان ناس ومعازيم وبنات ..

ونور كانت متألقه بالفستان الزهري اللي لبسته وجميله كانت جنبها طول الوقت..

واحمد كان مبسوط جدا أن جميله كانت موجوده والاتنين كانوا معظم الوقت باصين لبعض وبس وجميله كانت فرحانه..

فارس كان من جواه مبسوط وسرح في جمال نور ورقتها..

نور كانت واقفه مع جميله..

سمعت صوت من وراها..

_بتتجوزى من غير ما تعزمي امك يا نور

نور بصدمه:ماما!!

#يارا_عبد_السلام

#البارت_الحادي_عشر

#ما_في_قلبي

_بتتجوزي من غير متقولى لامك يا نور

نور:ماما..انتى جيتى هنا ازاي وعرفتي منين انى هنا

فارس شافهم وجه..

لبنى:مفكره انى مش هعرف أن جدك عاوز يجبرك عالجواز من ابن محمد علشان ينتقم منى فيكي من اللي عملته زمان

نور شافت فارس قربت منه ومسكت ايديه..

فارس اتفاجأ من رد فعلها بس فرح انها عملت كدا حتى لو كذب..انا 

نور:انا جدو مأجبرنيش على حاجه أنا وفارس بنحب بعض وبعدين انتى عملتى اي زمان ..

لبنى:عرف يضحك عليكي ابن مديحه..عملت اي عملت انى خدت ابوكي ومشينا من هنا بعد اللي عمك عملوا فيا و..

الجد جه بعصبيه ومعاه.محمد وأحمد وجميله واقفه مش فاهمه اي حاجه..

الجد:انتى اي جابك هنا يا لبنى جايه تخربي على بنتك..

لبنى:اهلا بالراجل الكبير زعيم العصابه اللي عاوز يعصي بنتي عليا ويجوزها من ورا ضهرى لابن ابنه علشان يستولو على حقها في الميراث..

الجد:انتى بتخرفي  تقولى اي مفيش الكلام دا انتي طول عمرك هتفضلي تفكري في مصلحتك بس والقرف اللي بتعمله

لبنى:انت عاوز تجوز بنتى غصب عنها وتقولى قرف دا القرف اللي انت بتعمله انت والعصابه اللي معاك عاوزين تاخدوا بنتى منى وكمان مقسينها عليا..وبصت لنور...

تعالى معايا يا حبيبتي وانا هبلغ عنهم واوديهم في داهيه..

ولسه جايه تمسك ايديها..

نور شدت أيدها منها بقوه..

لبنى انصدمت..

نور:انا مش هاجى معاكى في حته انا النهارده الحنه بتاعتى على ابن عمى لو عوزا تحضري زيك زي اي حد معزوم اهلا وسهلا بس لو جايه تعملى مشاكل اتفضلي من هنا ...

_انتى بتطرديني يا نور

نور:ههههه مانتى طردانى من حياتك من زمان فاكره ولا افكرك انتى لي مش عوزا تشوفيني مرتاحه ومبسوطه لي دائما بتيجي عليا لي مش بتحبي الا نفسك ومصلحتك لي ها ..لى عوزا تاخديني من وسط الناس اللي بتحبني عوزاني ارجع اعيش لوحدي تاني عوزاني احلم بكوابيس تاني وانا عايشه لوحدي عوزانى انام مفتحه عين ومغمضه عين تاني ..

انا اول مره احس بالامان وانام وانا قلبي مرتاح مش قلقانه ولا خايفه من العالم اللي برا بعد لما لقيت الامان والحنيه عوزاني اروح معاكى وتسبيني تاني لا يا ماما لا يا مدام لبنى ياللي بعد اسبوعين بالظبط من موت بابا روحتي اتجوزتي ولا كأن في كلبه اسمها بنتك خالص تسالي عنها ...

انا مكنتش اتخيل في يوم انى اقف قدامك كدا اعاتبك على اللي بتعمليه انا كنت بكتفى بالصمت والعياط وانا لوحدي بليل..

جايه دلوقتي تقوليلي انا امك وعوزاني اسيب عيلتي اللي كانو بيدوروا عليا علشان يحتووني مش يسيبونى لوحدي ..

للاسف مش انتى الام اللي اتمنتها ولا الام اللي يشرفني انها تبقى امي..

عن اذنك..

نور دخلت ومديحه خدتها في حضنها وجميله وقفت جنبها تطبطب عليها

الجد بص. للبنى:عوزا تسمعى اي اكتر من كدا اتفضلي يلا من غير مطرود..

لبنى:انا مش هسيبكوا وبصت لفارس لعبتها صح يا ابن محمد انا بقى هوريك هعمل فيك اي..

فارس بكل غل:اللي عندك اعمليه انا منتظر من واحده زيك كتير اووي وقرب من ودنها

_بس اعملى حسابك انا عندي ليكي صور دلوقتى وقبل كدا فل اووي عليكي هتخليني افتح في حاجات مش عاوز اعملها لكن شكلك انتى اللي هتخربي على نفسك ووحشك البرش ولا اي..

لبنى بصدمه وارتباك :برش اي

الجد:هوا انتى مفكره أن احنا مش عارفين انك كنتي مسجونه في قضيه دعارة قبل كدا ولفيتي على عبد الله ابني الغلبان وورطيه معاكى انو يتجوزك..

فمن غير كلام كتير اتفضلي من هنا انتى غير مرغوب فيكي .

لبنى مشيت..

الكل دخل ..

الجد:نور تعالى..

نور راحت ناحيته والجد خدها في حضنه..

فارس قرب من ودنه..

فارس:انا محترمك بس علشان انت جدي بس متسوقش فيها .

الجد بصله بتسليه..

الجد:تعالى يا نور عاوزك في حاجه جوا ..

خدها فارس لسه هيتحرك من مكانه..

_الجد:قولت نور بس ...

الجد خدها جوا في المكتب..

_تعالى اقعدى يا نور..

_في اي يا جدو..

_الجد ادالها ورقه

_اي دي

_دي حقك في الميراث أنا عمرى ما هاكل حقك يا بنتى والورقه دي فيها تنازل منى عن حقك اعملى بيها اللي انتى عوزاه..

_بس انا مش عوزا حاجه يا جدو كفايه انى معاكوا وفي وسطكوا كفايه احساسي بالأمان

_معلش يا بنتى محدش عارف بكرا في اي دي برضو علشان تحفظى حقوقك علشان لما اموت اكون مرتاح

_متقولش كدا يا جدو بعد الشر عنك..

الجد:على فكره الواد فارس بيحبك واويي كمان وبيغير عليكي منى انا عارف انك لسه محبتيهوش وحاسس انو عملك حاجه خلاكي توافقي على الجواز بس انا عارف ومتأكد انك هتحبيه انا لو كنت شايف انو مش بيحبك مكنتش جوزتكوا لبعض..

ومكنتش هجوزك لاحمد لانى عارف انو بيحب جميله صحبتك اللي معاكى برا انا خلاص كدا اتطمنت على احفادي ..

نور:يعنى يا جدو انت عارف كل دا وساكت طيب قدر انا محبتهوش

_لكن انا متاكد ان حبه ليكي هيحببك فيه والا مكنتيش وقفتى جنبه قدام امك النهارده 

دا دليل أن في شعور من ناحيتك تجاهه وهيظهر مع الوقت ..

نور لكسوف:هوا من ناحية في شعور فهوا فيه..

_ايوا مش انا قولتلك وبعدين فارس دا مش اي حد كفايه انى جده

_شكلك كنت مدوخ تيته

_لا يختى هي اللي كانت مدوخانى بس تعرفي وحشتني اووي عاوز اروحلها بقى كفايه كدا..

_عاوز تسيبني يا جدو 

_يستى بعد متتجوزي مش هيبقى في حياتك حد غير فارس متقلقيش..

يلا قومي الكلام خدنا روحي شوفي حنتك واقعدى وسط البنات..

_طيب خلي معاك الورقه دي ولما يجي وقتها ومتقلقش انا واثقه فيكوا كلكوا..

_ماشي يا حبيبتي..

نور خرجت من الأوضه..

ومشيت في الطرقه وفجاه لقت اللي بيسحبها في اوضه ...

و.....

#يارا_عبد_السلام

#البارت_الثاني_عشر

#ما_في_قلبي

نور خرجت من الأوضه..

ومشيت في الطرقه وفجاه لقت اللي بيسحبها في اوضه ...

نور بصدمه:انت 

ولسه هتصوت حط أيده على بقها..

وبص في عينيها..

نور كانت بتحاول تتملص من أيده..

فارس:نور أهدى واستنى متخلنيش ازعلك ..

انا جايبك هنا علشان اقولك حاجه ..

نور سكتت..

_هشيل ايدي بس متصوتيش

اومأت برأسها ..

وفارس شال أيده وبدأ يتكلم..

_بصي انا عاوز اقولك 

وفجاه بدأ يتحول..

لو شفتك يا نور بتتمرقعى مع حد تاني ولا بتحضني جدك انتى حرة انا عاوز اقولك كمان انك ملكي انا وبس لما تحضني تحضنيني انا بس تمسكي ايدي انا ابقى اشوفك بس بتعملى اللي بتعمليه دا ومتحاوليش تستفزيني علشان مزعلكيش تمام..

نور مستغربه من طريقته وهدوءه وزهقه وعصبيته في نفس الوقت ..

نور:انت مجنون دا جدو..

فارس:ولو عمى كان عايش كنت هقولك كدا برضو

نور:وانت مين أن شاء الله علشان تتحكم فيا دانت يا حيا الله هتبقى جوزي ومؤقتا انا عارفه انك باسلوبك دا مش هتخليني احبك ولا نيله انت عاوز تتحكم فيا وانا مبحبش اسلوبك دا..

فارس:هنبقى نشوف ..

وبعدين ابتسم ..

_بأمارة مانتى جيتي مسكتى ايدي ولجأتيلي لما حسيتي انك بتواجهى امك وكمان انا كنت حاسس انك كلمه بتقولها صادقه ومن قلبك وكمان متاكد انك لو مش بتحبيني عالاقل انتى معجبه بيا والا مكنتيش عملتى كدا..

_انا انا انت رخم ووسع كدا عوزا اخرج..

_نور انا بقول كلامى مره واحده ومتخالفيش كلامى علشان متزعليش تمام يلا اخرجي..

اه وعلى فكره ..

انتى زي القمر النهارده..

نور بتوتر:انت انت اوووف..

وخرجت بسرعه..

وفارس قعد يضحك عليها ويضحك على نفسه لانه عارف أن نور هتعلمه الادب باسلوبها دا ..

*ماشي يا نور هنشوف اخرتها معاكي..

نور خرجت وشافت جميله 

جميله:مالك يا بت محمره كدا لى..

وغمزتلها..شوفتي فارس وانتى جايه ولا اى..

_جميله بس بقى 

_ايوا بقى وقعت يا جميل اخيرا هفرح فيكي وبيكي يا عمري على فكره كان باين عليكي وانتى بتجري عليه وتمسكي أيده كانك بتستمدى القوة والأمان منه ...

انا استغربتك انك وقفتى قدام امك انتى طول عمرك ضعيفه قدامها..

نور:تصدقي انى نفسي معرفتش نفسي استغربت لما لقيت نفسي بتكلم واقول اللي جوايا يمكن فعلا علشان استمديت أالقوه والأمان من فارس وجدي وكمان لما لقيته مسك ايدي وتبت فيها كأنه بيقولى انا معاكى متخافيش انا كنت اول مره احس الاحساس دا ..

_شوفتي بقى انك قربتي تحبيه

نور:بس هوا رخم وانا مش بحبه بقولك تعالى نروح نقعد في الحنه بتاعتي اللي انا معرفش عنها حاجه دي ويلا نشهيص شويه قبل ما فارس يعتقلني..

جميله بضحك:يلا يختى..

راحوا في المكان اللي متجمعه الستات فيه ..

مديحه:تعالي يا بنتى ..

دي نور اللي هتبقى مرات ابني وبنت عبدالله الله يرحمه..

الستات بدأت تزغرط واللي تحضنها واللي تبوسها واللي تقول ما شاء الله قمر نور فرحت اووي وقعدوها وبدأوا يغنوا ويرقصوا حست فعلا انها يتتجوز وخلاص هتدخل في عش الزوجيه...

اليوم خلص وجميله كانت عوزا تروح..

ونور كانت عماله تقنعها انها تبات معاها علشان تفضل موجوده معاها بكرا طول النهارده..

احمد جه عليهم:في اي يا جماعه..

نور:جميله عوزا تروح وانا عوزاها تبات معايا حاول تقنعها انت..

جميله :نور..

نور:طيب انا عملت اي..

احمد ابتسم:نور عندها حق يا جميله خليكي معاها النهارده علشان تبقى معاها بكرا بما انكوا أصحاب اووي

جميله:بابا مش هيرضى ومش هينفع ابات هنا..

وبصتله بقلق..

احمد:يا جميله صدقيني انا اتغيرت ومستني فرح فارس ونور يخلص علشان هكلم جدو واجى اتقدملك انا قطعت علاقتي باي واحده اعرفها..

جميله بصتله بشك ونور أكدت 

_صدقيه يا جميله دا احمد نسمه ابن عمى وانا عارفاه .

جميله:طيب مين هيقنع بابا..

نور وأحمد:جدو اكيد..

وراحوا لجدهم وقالولوا واتصل على ابو جميله وأقنعه وجميله باتت معاهم..

واتجمعوا كلهم وقعدوا يلعبوا لحد الفجر وفارس كان معاهم وطول القاعده نور بصاله ومركزه في كل حاجه بيعملها ونظراته وطريقه كلامه وكل حاجه..

وقالت في بالها:انا شكلى وقعت ولا اي::!!

في مكان ما ...

لبنى دخلت شقه ..

يبدو أنها مقر معيشتها..

قابلها رجل يبدو أنه أربعيني وكان في إحدى يديه سيجارة والأخرى بها كأس به خمر...

رجب:عملتى اي

لبنى:اسكت دانا كنت هنفضح النهارده...

_ازاي يختى 

وحكتله كل اللي حصل..

_غبيه بقى معرفتيش تضحكى عالبت وتجبيها معاكى امال عملالى فيها شبح لي ..

_اعمل اي يا اخويا روحت لقيتهم كلهم معاها وهى متحاميه فيهم معرفش عملولها اي شكل ابن محمد لعب عليها صح..

_بقولك اي انتى تعملى اللي اقولك عليه علشان الفلوس دي تبقى من نصيبنا علشان نفتح الكباريه اللي عاوزينه بدل ما شغلنا في الأرض كدا..

_حاضر يخويا هعمل اللي هتقولى عليه..

_تمام اووي 

بصي يا ستي...

اعمل متابعه هنا👈 اضغط هناااااااا👉عشان يوصلكم كل الاجزاء الباقيه هتوصل للمتابعين فقط

#يارا_عبد_السلام

تكملة الروايه بعد قليل