 |
رغبة ملعونة
الجزء الحادي عشر
للكاتبة..حنان حسن
بعدما دخلت الاوضة الملعونة
اكتشفت...
ان مفيش حد في الاوضة كا العادة
لكن المصيبة..
اني لقيت علي الحيطان كتابة
بالفحم
وكانت الكتابة عبارة عن رسالة
ومحتواها كا التالي
الجنين الي في بطنك بينتمي لينا...وهناخده
والخلاص...
مع الست العجوزة
بعدما قرات الرسالة
خوفت اوي...
لانها فيها نوع من التهديد
وخصوصا ان الي كاتب الرسالة
ذكر سيرة الجنين...
الي في بطني
وفضلت اسال نفسي
ياتري مين الي كتب الكلام ده
ع الحيطان؟
وازاي دخل
وكتبة؟
والبوليس مراقب الشقة؟
وجه منين صوت عياط الطفل...
والتسقيف
الي كنت بسمعة؟
اذا كان مفيش حد في الاوضة اصلا
وبعدما فكرت في الي حصل... والي بيحصل
لقيتني بقول..
يلهوي...ده يظهر ان الموضوع فيه عفاريت بجد
فا بسرعة بصيت علي الرسالة تاني
ولفت نظرى
الجملة الاخيرة
الي هي
(الخلاص مع الست العجوزة)
يعني ايه الجملة دي؟
وفين الست العجوزة؟
وحسيت اني مش هقدر افكر
طول منا في قمة القلق والرعب كده
ولقيتني برجع بضهري للخلف
وانا بحاول اخرج من الاوضة
الي انا اتاكدت حالا
ان فيها عفاريت فعلا
وبعدما خرجت من الاوضة
وانا تقريبا
مبقاش فيا نقطة دم
من شدة الرعب الي كنت فيه
قررت اروح لحضرة الضابط
واقولة...
اني هنسحب من المهمة الهباب دي...
والي يحصل يحصل
وبسرعة خرجت من العمارة
ووقفت تاكسي
فا وقفلي تاكسي فجاءة
وركبت فيه
وفي التاكسى
سمعت صوت بيقولي
اطلع علي فين؟
بس انا مردتش علي السؤال
لاني استغربت الصوت
الي جاي من ناحية السواق
اصلة كان صوت واحدة ست
فا بصيت ناحية السواق
واتعجبت اكتر
لاني لقيتها واحدة ست عجوزة
فا خوفت وقولتلها
انا عايزة انزل لوسمحتي
فا ردت بسؤال
وقالتلي...
هتنزلي؟
من غير متعرفي معني الخلاص؟
وفي اللحظة دي
افتكرت الرسالة
فسالتها بفزع
وقلت...هو انتي الست العجوزة الي...؟
قالت...اسمعي عشان مفيش وقت
الي في بطنك تبعهم
و هياخدوه بابشع طريقة ممكن تتصوريها
وهما قادرين علي كده
وانتي عارفة ده كويس
ولو عايزة الخلاص منهم...
ومن شبكتهم
فا الخلاص في( الفدو)
قلت...يعني اية فدو؟
قالت..يعني..
لازم تدفعيلهم فدية
عن الجنين
الي في بطنك
بدل ما يحسروكي عليه
قلت..ماشي
ممكن تقوليلي ايه هو الفدو
وادفعة ازاي؟
قالت..
(١٣ كريمة غرقانين في زيبق احمر)
ومعاهم سرهم
قلت...نعم؟
ايه الي انتي قولتية تاني معلش؟
عشان مخدتش بالي؟
عادت كلامها تاني
وقالت..
١٣ كريمة غرقانين في زيبق احمر..
ومعاهم سرهم
قلت..منا سمعت
لكن ....مفهمتش
قالت...هو ده الفدو
الي هتفدي بية الجنين الي في بطنك
ودي رسالتهم وانا وصلتها
وخلي بالك...
سرهم لو خرج لاي حد
هتموتي
بمجرد ما تبلعي ريقك
يعني مش هتخسري الجنين الي في بطنك بس
لا...دا انتي هتخسري عمرك كلة
كمان
وكنت عايزة احاول معاها تاني
واقولها ...
توضح اللغز الي هي قالتة..
عشان اعرف اية المطلوب مني بالظبط؟
لكن...قبل ما احاول اقنعها انها تسهلها عليا
لقيت الست العجوزة
بتصرخ فيا
وهي بتوقف العربية
وقالتلي..
عندك مهلة يومين ولو مجبتيش الفدو
هينفذوا فيكي حكمهم
قلت..يومين بس؟
طيب ازاي هجيبلهم الفدو في يومين؟
اذا كنت اصلا
مفهمتش ولا كلمة
من الي انتي قولتيهم
فا صرخت فيا
وقالتلي
خلص الكلام
اخرجي بسرعة من العربية
وفعلا نزلت...
ورجعت الطريق تاني
مشي
علي رجلي..
لغاية ما رجعت للعمارة
وطبعا لما دخلت للعمارة
مقدرتش ادخل شقة الباشمهندس المزيف
تاني
لاني كنت مرعوبة
فا قعدت علي السلم
عشان احاول افكر بهدوء
يمكن افهم حاجة من الي سمعتها
وفضلت افكر تاني
في معني الفدو ...والطلاسم
الي قالتهالي
الست العجوزة
ولقيتني بسال نفسي
وبقول...
طيب هعمل ايه دلوقتي بس ياربي؟
انا كل الي فهمتة
ان في حواليا شر كبير بيتربص بيا
وبالجنين الي في بطني
وعشان اخلص من كل الشر ده
يبقي لازم اجيب الفدو
والفدو هو...
١٣ كريمة غرقانين في زيبق احمر..ومعاهم سرهم
يعني ايه الكلام ده؟
ولما فشلت في حل اللغز
فضلت اعيط
واقول لنفسي...
ايه ياربي الحيرة الي انا فيها دي
انا حياتي انا والي في بطني في خطر
ومطلوب مني...اني افك لغز صعب و غريب
ومعنديش مهلة غير يومين بس
وانا دلوقتي مش فاهمة حاجة؟
طيب ايه الحل دلوقتي؟
واثناء ما كنت قاعدة علي السلم
وحاطة ايدي علي راسي و بعيط
شعرت ب ايد بتتمد علي كتفي وبتطبطب عليا
فا بصيت ادامي لقيته شهاب بية
بيسالني
وبيقولي...مالك قاعدة كده لية
قلت...انا خايفة ادخل الشقة
قال..لية؟
قلت..عشان.....
ولما افتكرت تحذير الست العجوزة
التزمت الصمت
وقلت...مفيش
خايفة ادخل الشقة وخلاص
فا رد شهاب بية
وقالي..طيب هتقعدي علي السلم كده؟
قلت..ايوه
فا قالي..لا
مينفعش تقعدي كده
تعالي ارجعي لشقتك
قلت ..انهي شقة؟
قال...شقتك الي انتي اجرتيها
قلت...هو مش انت رجعت العقد لصاحبها؟
فا هز شهاب بية راسة بالنفي
وقال...لا
مرجعتش حاجة
اصلي كنت حاسس انك هتحتاجيلها تاني
اطمني...
الشقة عقد ايجارها لسة باسمك
والمفاتيح اهية
وخرج المفاتيح من جيبه وادهالي
وفعلا رجعت معاه الشقة
ولما سالني تاني
وقالي..
مش ناوية تقوليلي كنتي بتعيطي لية؟
بصيت في الارض
وقلت...مفيش
...اصل غيبت الباشمهندس طولت
وانا قلقانة عليه
فا بصلي شهاب بية
وقالي...اه فهمت
عموما انا همشي دلوقتي
و في اكل في الثلاجة
لو جعانة
وهبقي اتصل بيكي ع التليفون الارضي
واشوفك لو عايزة حاجة
قلت..بجد والله...
ما عارفة اردلك الجمايل دي كلها ازاي يا شهاب بية
فا رد بسخرية
وقالي..بكره الباشمهندس لما يرجع
يبقي يردلي الجمايل
وبعدما لقح عليا بالكلمتين دول
خرج وقفل الباب وراه بغيظ
وبعدما خرج شهاب بية
لقيتني
برزع نفسي علي الكنبة
الي في الصالة
ولما قعدت سندت راسي و فضلت سرحانة
في كل الي حصل..
وفضلت علي كدة لغاية ما روحت في النوم
وفجاءة
سمعت صوت بيصحيني
وبيقولي..
اصحي يا صابرين
فا فتحت عنيا
لقيت الصالة ضالمة..
فا خوفت وسالت صاحب الصوت
وانا في منتهي الرعب
وقلت...مين؟
قال..انا حد عايز يساعدك في حل اللغز
الي انتي محتارة فيه
لما سمعت الصوت تاني
استغربت...
لانة كان صوت
حد اعرفة كويس اوي
والغريبة ...انه كان صوت
شهاب بية
وكنت هسالة واقولة
انت قافل النور وبتعمل ليه كده يا شهاب بية؟
..بس انا عملت نفسي معرفتش صوتة
عشان اعرف هو عايز
ايه بالظبط ؟
وسالتة
وقلت..وايه هو حل اللغز؟
قال..حل اللغز
انا جيبتة وحطيتة في شوال
والشوال
هتلاقية تحت سريرك
لما تصحي من النوم
واول ما تلاقي الفدو...
خدية... وروحي بيه لشقة
الباشمهندس المزيف
وادخلي حطية في الاوضة المقفولة
واخرجي بسرعة بدون ما تبصي وراكي
قلت..حاضر
وبعد ما خلص كلامة
قالي..
ودلوقتي ارجعي لنومك تاني...
ومتفتحيش عينك غير الصبح
وفعلا غمضت عنيا
لكن طبعا مجانيش نوم من شدة الرعب الي كنت فيه
واول ما لمحت ضؤ النهار
قمت بسرعة ونزلت تحت السرير
ولما بصيت كويس
اتفزعت...لاني لقيت الشوال فعلا
واستغربت لاكتر من سبب
ولقيتني بسال نفسي
ياتري فيه ايه الشوال ده؟
واية معني
ال١٣ كريمة غرقانين في زيبق احمر ومعاهم سرهم؟
وياتري الي انا سمعتة كان صوت شهاب بية فعلا؟
ولو هو صوتة...
يبقي ايه علاقة شهاب بية بالي بيحصل ده كلة؟
وفضلت افكر وانا محتارة
واقول لنفسي...
هو في ايه بالظبط
انا كده مبقتش فاهمة حاجة
وبعدين هو شهاب بية
ايه الي عرفة بموضوع الفدو؟
انا اصلا لما سالني
وقالي مالك؟
قولتلة مفيش ومعرفتوش حاجة
يبقي ازاي عرف اللغز
الي قالتهولي الست العجوزة اصلا؟
ولقيتني بقول لنفسي
ينهار اسود
هو شهاب بية كمان تبع العفاريت ولا ايه؟
وبعدما فكرت شوية
لقيت نفسي
بقول..لا عفاريت اية؟
وجود الشوال تحت السرير
وصوت شهاب بية
الي سمعتة في الضلمة
بيقولوا ان ده شغل عصابات
واكيد كلهم مشتركين مع الباشمهندس
ومفيش عفاريت ولا حاجة
عشان كده
انا لازم اروح ابلغ
في قسم الشرطة
واقابل الظابط بنفسي
واقولة علي كل الي حصل
وهو بقي يشوف ايه حكاية الشوال والالغاز الي فيه ؟
وفعلا..
دخلت الشوال مكانة تحت السرير
بدون ما افتحة
ونزلت من البيت
وانا بجري باقصي سرعة
عشان اروح ع القسم
لكن قبل ما ااشاور لعربية اركبها
قابلني البواب الي كان في العمارة عند خالتي
وسالني
وقال..مالك بتجري كده ليه يا صابرين؟
بصيتلة بريبة وشك
وقلت...ابعد عني انت راجل لئيم وكداب
قالي..انا كداب؟
الله يسامحك
قلت..ايوه كداب ..
لاني لما سالتك عن الولد
الي كنت براعية في شقة الباشمهندس
انكرت انه موجود...
ولما سالوك عن الباشمهندس..برضوا انكرت
بالرغم من ان السكان كلهم بيشهدوا ...
انه كان موجود في العمارة
عموما انا رايحة لضابط المباحث دلوقتي..
وهقولة علي كدبك
عشان يشوف سبب كدبك ده ايه؟
وفي اللحظة دي
رد البواب
وقالي..استني بس يا صابرين
اوعي تتكلمي
لانك ممكن تتاذي
قلت..اتاذي ازاي؟
قال...الشقة دي مسكونة يا صابرين
وياما شوفت وسمعت جواها بلاوي
دنا حتي عمال احلم بكوابيس
من يوم ما اخدت العامود ورميتة في المنور
جنب شباك الاوضة بتاعتي
فسالتة
قلت..عامود اية؟
قال...
عامود كان الباشمهندس
طلب مني
اني اتخلص منه
وانا ركنتة في المنور لغاية ما اشوفلة صرفة
ومن يومها وانا بشوف وبسمع حاجات غريبة
عشان كده مبحبش اجيب سيرتهم
ربنا يجعل كلامنا خفيف عليهم
وفي اللحظة دي
افتكرت العامود الي كان في الاوضة المقفولة
فسالت البواب
وقلتلة...ممكن اشوف العامود ده؟
قالي..ممكن
تعالي معايا لغاية المنور
وانتي تشوفية
ودخلت معاه المنور فعلا
وشوفت العامود
ولقيتة هو نفس العامود
الي كانت الست المشوهة مربوطة فيه
فا قربت من العامود
ولما دققت فيه
لقيت اسمي مكتوب عليه
بالدم
فا اتحققت اكتر من الي مكتوب
واتفاجئت انها رسالة
وكان مكتوب فيها
الاتي
الحقيني يا صابرين...
احسن هيقتلني بسببك
روحي لصباح العارجة...
وقوليلها تبلغ بحقيقة سلوي وامها كلها
وخلصت الرسالة علي كده
وبرضوا مفهمتش منها حاجة
لكن ...لحسن الحظ
انها كانت كاتبة عنوان صباح العارجة في اخر الرسالة
والي فهمتة من الرسالة
انها من الست المشوهة..
وكانت بتستغيث بيا
لكن ليه بتقول انه كان عايز يقتلها بسببي؟
ومين صباح العارجة دي؟
وفضلت اسال نفسي
طيب اعمل ايه دلوقتي
اروح ابلغ ولا اعمل ايه
بس ابلغ ازاي؟
دي الرسالة الي علي العامود بتقول..
ان في حد هيقتلها بسببي
ومعني كده
اني متورطة في الجنان الي بيحصل ده كلة
ورجع ضميري يانبني
وقولت لنفسي
ازاي بس مبلغش ؟
ما ممكن تكون الست دلوقتي حياتها في خطر هي وابنها
وبعدما فكرت شوية
قلت لنفسي
لا.... الرسالة دي من قبل ما العامود يختفي
والست وابنها يختفوا كمان
يعني الرسالة بقالها كتير
ورجعت تاني اقول لنفسي
لا... انا مش هبلغ دلوقتي
...انا احسن حل
اني اروح علي العنوان
الي في الرسالة
واقابل الي اسمها صباح العارجة دي
لان واضح من الرسالة
ان صباح عارفة سر الست المشوهة
وفعلا
خرجت وروحت علي العنوان الي في الرسالة
وسالت عن صباح العارجة
ولما دلوني علي بيتها
روحت وقابلتها..
وكان واضح انهاست علي اد حالها..
لانها كانت ساكنة في اوضة بسيطة
في منطقة شعبية
واول ما شافتني
قالتلي...انتي عايزة مين؟
قلت...
انا جاية وجييالك رسالة
من واحدة جوزها كان بيعذبها
واخر حاجة طلبتها مني
وهي بتموت...
هي اني اوصلك رسالة منها
فسالتني
وقالتلي..
هي مين الواحدة دي؟
قلت..الواحدة دي كانت جارتي
انا مكنتش اعرفها شخصيا
لكن هي كان وشها مشوة
ومعاها طفل صغير
وجوزها كان علي طول بيعذبها
وللاسف ..مره واحدة اختفت
ومعرفتش هي راحت فين
لكن قبل ما تختفي كتبتلي
رسالة بدمها
علي العامود الي هي كانت مربوطة فية
والرسالة كانت بتقول فيها
بلغي صباح العارجة...
وقوليلها...
تبلغ عن الي حصل لسلوي وامها
بعدما خلصت كلامي
لقيت صباح العارجة اتاثرت من
كلامي
وظهرت في عيونها الدموع
وقالتلي...
وهي فين دلوقتي؟
قلت..بقولك اختفت ومعرفش راحت فين؟
انا بمجرد ما شوفت العامود الي عليه الرسالة
قلت اجي اسالك
عن حكايتها..
يمكن لو طلعتي تعرفي حاجة عنها..
نقدر نلحقها ؟او نساعدها؟
وفي اللحظة دي
بصتلي صباح بحزن
وقالتلي...منه لله الظالم
اكيد زمانة قتلها
وسالتني
وقالتلي..
وانتي ليه محاولتيش تهربيها
لما هي كانت صعبانة عليكي اوي كده؟
قلت..والله حاولت ..
وعرضت عليها اني اساعدها وهي رفضت
فا ردت صباح
وقالت...
مسكينة اصلها كانت هتروح فين هي وابنها؟
قلت..هو يطلع مين الشخص ده؟
ولية كان حابس الست المشوهة دي
وليه الست مكنتش عايزة تهرب؟
فا التزمت صباح الصمت
ومجاوبتش
فا ميأ ستش
وسالتها تاني
وقلت..طيب حتي فهميني
لية كان مخبي مراتة عن الناس
ولية كان بيعذبها
فهميني بالله عليكي حكايتهم ايه بالظبط؟
فا ردت صباح العارجة بعد ما زهقت من الحاحي عليها
وقالتلي...اصبري شوية
وانا هحكيلك حكايتهم
وبالفعل...
بدات صباح العارجة في سرد المفاجئات
وقالتلي..
الراجل الي انتي شوفتية معاها ده
اسمة فؤاد الهجام
انسان سو ...
وبتاع مشاكل
والادهي من كده انه كان بيبرشم
وبيتعاطي كل انواع المخدرات
فؤاد كان عايش معانا هنا في الحارة
هو وبنتة ومراتة
وكان بيعاملهم بمنتهي القسوة والجبروت
وكان ديما يتخانق معاهم
ويضربهم...
لغاية ما في يوم
وهو بيتخانق معاهم
و اظاهر انه كان متقل العيار حبتين
فافجر انبوبة البوتجاز
و مراتة وبنتة ياعيني عليهم
واحدة ماتت
وواحدة اتشوهت
قلت...يا عيني
يعني سلوي بنتة ماتت
ومراتة هي الي اتشوهت؟
فا ردت عليا صباح
رد صادم
وقالتلي..
لا انتي فهمتي غلط
الي ماتت ودفناها هي مراتة...
فسالتها ...بدهشة
بعدما حسيت بالحول
الي اصاب عنيا...
وتفكيري
وقلت..
معناه اية الكلام ده؟؟؟
ردت صباح العارجة
وصدمتني للمرة التانية
وقالت..........؟
اعمل متابعه هنا👈 اضغط هناااااااا👉عشان يوصلكم كل الاجزاء الباقيه هتوصل للمتابعين فقط
لو عايز باقي احداث الرواية صلي علي رسول
تعليقات
إرسال تعليق