 |
الحلقة الثانيه عشر من الجزء الثاني
المشوة
ادهم خرج وهو مش مصدق كلامها هو عارف ومتاكد انها بتقول كده علشان تمنعه ياخدها غصب بس كون انها مستعده تجرحه بالشكل ده علشان شيئ لسه في علم الغيب ده واجعه
الجزء الوحيد اللي صح في كلامها انها فعلا اختارت ابنها وما اختارتوش هو
ليلي كل يوم بيعدي بتتعب اكتر واكتر وابوها وامها جنبها وتقريبا وقتها اغلبه في المستشفي
في يوم كانت تعبانه قوي نفسيا وجسديا ابوها مش عارف يعمل ايه لانه عارف انها محتاجه جوزها جنبها وده اكتر شيئ واجعها
اتصل بيه يقنعه يجي بس ادهم رفض وقاله ان ده اختيارها هيا يبقي تتحمل نتيجته وانه معدش عنده اي شيئ يقدمهولها
اخر ما ابوها فقد الامل انه يقنعه لعب باخر ورقه في ايده اللي عارف ان ادهم بعدها هيجي غصب عنه
عم محمود: طيب بما انك مش عايز تيجي ممكن تيجي بس تدفع حساب المستشفي انا اخر فلوس معايا خلصت وهبعت اجيب من البلد بس حاليا لازم ندفع الفاتوره
ادهم: وانت حضرتك بتدفع ليه الفواتير انا هدفعها ثواني واكون عندك
قفل السكه وابوها ابتسم ان خطته نجحت كل اللي مطلوب بقي انه يعرف قد ايه هيا محتاجاه
ادهم فعلا جه ودفع فاتوره المستشفي ويدوب هيمشي ناداه عم محمود
عم محمود: ادهم استني
ادهم: افندم الفاتوره اتدفعت خلاص وشوف حساب الحاجات القديمه وانا هدفعهم لك
عم محمود: سيبك من الفواتير القديمه ممكن دلوقتي توقفلنا تاكسي نروح بيه
ادهم: انا هوصلكم يالا
عم محمود: يعني لو انت مشغول شوفلنا تاكسي وخلاص
ادهم: عمي محمود انجز قولت هوصلكم
ابتسم عم محمود لان خطته ماشيه زي ماهو عايزوابتسم لان ادهم اول مره يقول عمي
ادهم: انت مبتسم ليه كده؟
عم محمود: دي اول مره تقول عمي
ادهم: اسف مش
قاطعه: لا لا متتاسفش ده انا ما صدقت تقولها هروح اجيبهم
ابوها راح يجيب ليلي ومراته
ليلي: جوزك اهوه جيبتهولك حاولي تخليه جنبك رجعيه ليكي
ليلي: مش عا رفه ازاي؟
عم محمود: زي ما بترجعيه كل مره
ليلي: كل مره بيبقي في سبب باعدنا عن بعض خارج عن ارادتنا مش انا اللي بعداه لكن المره دي انا جرحته بنفسي
عم محمود: هو بيحبك وهيقدر انتي عملتي كده ليه وهيسامحك
امها: اعملي زي ما عملتي ساعت فرحك المهم تخليه جنبك والباقي بيجي واحده واحده
جاب ليلي ومسندها هو وامها وهيا واقفه بالعافيه لحد ما شافت ادهم وقربت منه راحت واقعه منهم فطبعا ادهم جري عليها ولحقها وشالها
ادهم: انت هتروح بيها كده؟
عم محمود: هيا كده كويسه بس بتدوخ بسرعه وعلشان كده بتنام في السرير يالا نروحها
ادهم شالها لحد العربيه ودخلها ووصلها لحد البيت نزلوا من العربيه وليلي سانده علي العربيه مش قادرة تتحرك
عم محمود: ممكن تساعدنا لحد فوق؟
ادهم: اكيد
شالها ادهم تاني ودخل بيها العماره وساب ابو ليلي ومامتها يجيبوا حاجتها من العربيه
ادهم دخل شقته ودخل ليلي لحد سريرها وحطها ويدوب هيقوم فضلت ماسكه في رقبته واتقابلت عنيهم
ليلي: ارجوك خليك انا محتجالك
ادهم: ما انا سبق وخلتني استفدت ايه؟
ليلي: ادهم انا محتجالك
ادهم: لا انتي محتاجه للبيبي اللي في بطنك وسيبتيني علشانه ( شد نفسه بعيد عنها) خليه هو ينفعك وسيبيني انا اتعود علي عدم وبعدين انتي بتشمإزي مني ولا نسيتي؟ وجودك بعد اذنك
ما ادهاش اي فرصه تتكلم وسابها ومشي قابل باباها بره
عم محمود: انت ماشي؟
ادهم: وانت كنت فاكر ايه؟ هفضل جنبها واراقبها بتموت بالبطئ لا شكرا سايبلك انت الدور ده انت اقنعتها يبقي انت تفضل معاها لحد ما تموت بين ايديك
عم محمود: انا ما اقنعتهاش انا سيبتها تاخد قرارها ووقفت جنبها والمفروض انت تعمل كده تقف جنبها وتساندها مهما كان قرارها صح او غلط زي انا ما عملت ساعت ما اتجوزتك واهو دلوقتي
ادهم: ساعت ما اتجوزتني؟؟؟؟ هههههه انت عارضتها بكل طريقه تقدر عليها وكنت بتبعدنا عن بعض كل شويه ليه ما عملتش كده دلوقتي؟
عم محمود: عارضتها وهيا اصرت وفضلت معاك وانا ندمت اني عارضتها لانها كانت صح وانا كنت غلط مش يمكن المره دي برضه تبقي هيا الصح؟
ادهم: يمكن بس لو هيا غلط هيكون التمن حياتها مستعد تخسرها
عم محمود: لا مش مستعد بس حتي لما اتجوزتك كانت التمن برضه حياتها
ادهم: لا طبعا لو احنا فشلنا كانت ايوه هتتعب بس نفسيا والخساره نفسيه لكن بنتك لسه موجوده وقدامها الحياه لكن دلوقتي التمن حياتها هتموت انت مش فاهم
عم محمود: محدش يا ابني بيموت ناقص عمر لو عمرها انتهي يبقي حتي لو نزلته برضه هتموت باي طريقه ان كانت
ادهم: معني كده انه ينفع اروح انتحر واقول عمري كده؟
عم محمود: لا ده حاجه ودي حاجه هيا ما بتنتحرش هيا بتحاول تجيب حياه هيا بتحاول تبقي ام هيا محتاجه ده انت واجبك تقف جنبها حتي لو كان التمن حياتها
ادهم: انا اسف مش قادر افهم منطقك ده كل اللي فاهمه اني كنت مبسوط وفجأه كل حاجه بتتهد ومراتي نفسها بتروح مني وانا المفروض ااقف اتفرج اسف مقدرش
سابه ومشي وهو مش عارف يعمل ايه
ادهم فعلا فضل بعيد بيروحلهم ويشوف كل متطلباتهم وبيوديهم المستشفي ويجيبهم بس من بعيد لبعيد ومهما ليلي تعمل مش بيقرب منها ولا بيسامحها
وصلت ليلي للخامس وصحتها في اسوأ ما يكون وهيا في المستشفي
عم محمود اتصل بادهم
عم محمود: ارجوك تعال اتخلي شويه عن كبريائك وتعال
ادهم: هو انت متخيل ان اللي مانعني كبريائي؟؟
لو موضوع كبرياء كنت سيبت بنتك من زمان قوي الموضوع اني مش عارف اقف اتفرج عليها كده
عم محمود: طيب انا اب وبترجاك حاليا تيجي ارجوك يا ادهم انا مستعد ابوس ايدك لو تحب؟
ادهم: حاضر يا عم محمود هاجي
جه ادهم وقابل الدكتور بتاعها
الدكتور: اللي بيحصل حاليا ده انتحار سياده المقدم احنا لازم ننهي الحمل ده ويمكن يمكن نقدر ننقذ حياتها
ادهم: ده مش قراري
الدكتور: امال قرار مين؟ انت جوزها وحتي لو اجبرتها من حقك لان هيا حاليا ما ينفعش تاخد قرارات مصيريه
ادهم: انا وهيا تقريبا منفصلين فمعدش من حقي هيا اختارت ده هيا حره
سابه ادهم محتار وابوها واقف متابع بصمت
الدكتور: طيب حضرتك ابوها اعمل حاجه
عم محمود: فضلت تلات سنين احاربها في اختيارها لجوزها وفي الاخر ندمت واخدت عهد علي نفسي اني عمري ما هقف ضدها تاني مهما يكون اختيارها
الدكتور: بس الوضع مختلف دي حياتها
عم محمود: فعلا دي حياتها زي ما حضرتك قلت تعيشها زي ما تحب هيا مش عايزه تعيش من غير اطفال وربنا اداها فرصه بتستغلها محدش يعلم الغيب مش يمكن يكون ربنا كاتبلها تبقي ام وتعيش مبسوطه بعدها مع جوزها!؟!؟!؟
ادهم دخل لليلي واللي استغرب شكلها قوي ضعيفه وهزيله وتعبانه جدا
قرب منها وابتسم
ادهم: مش كفايه كده
ليلي: انت هنا ولا انا بيتهيألي
ادهم: انا هنا جنبك اهوه
ادهم مسك ايديها وباسها
ادهم: ارجوكي يا ليلي خليكي جنبي وما تسيبينيش لوحدي مش عايز اعيش لوحدي تاني
ليلي: انت اللي سايبني انا لو عليا افضل عمري كله تحت رجليك
ادهم: طيب يبقي خلينا مع بعض
ليلي: يبقي خليك جنبي
ادهم: خلاص اتفقنا هنادي الدكتور واقوله انك وافقتي تنهي الحمل ده وبعدها
قاطعته: انهي الحمل؟؟؟؟ بعد كل ده؟؟؟؟ دي هانت
ادهم: ليلي علشان خاطري انا
ليلي: لا علشان خاطري انا خليك جنبي مش هقدر اضيع الفرصه دي
ادهم: مفيش فايده ديما بكون اخر اختياراتك
ليلي: طول عمرك اول اختياري عارضت الدنيا كلها علشانك ممكن اكون غلطت وقصرت في حاجات بس ديما انت اختياري انت حبيبي ورفيقي وصاحبي ودنيتي كلها وسيبت الدنيا كلها وجيتلك اعيش معاك بس حلمت يكون عندي عيال منك....... ده غلط؟؟؟
وبعدين اوعي تكون صدقت كلمه من اللي قلتها انا قلت كده بس من خوفي لتجبرني انزله لكن انا بعشقك وبعشق ملامحك وكل حاجه فيك فارجوك خليك جنبي لحد ما الحمل يكمل ساعدني اقف جنبي
ادهم: ولو ربنا مش رايد
ليلي: لو مش رايد مكنتش ابقي حامل ويكمل معايا لدلوقتي مش يمكن ده اختبار من ربنا
البيبي كويس يا ادهم وصحته كويسه عايزني ازاي اقتله؟؟
ادهم: بس هو بيقتلك
ليلي: هو بيحاول وبيحارب علشان يشوف النور وانا بحارب معاه
ادهم: وانا؟
ليلي: انت المفروض تقف جنبنا مش تتخلي عنا
ادهم: مش قادر اشوفك بتموتي علشان
قاطعته: انا اسفه بس انا عايزه اكون ام مهما يكون التمن بحبك اه بس مش هقدر اكمل كده محتاجه البيبي ده يا ادهم
مسكت ايده وحطتها علي بطنها في الوقت اللي البيبي بيتحرك فيه
ادهم حس بحركته ومكنش عارف يحس بايه
ليلي: اهو بيتحرك وعايز ابوه جنبه ارجوك ما تتخلاش عننا ارجوك
ادهم سحب ايده ووقف
ادهم: عايزاني اعمل ايه؟
ليلي: تفضل جنبي وجودك بس كفايه
ادهم: حاضر يا ليلي هفضل جنبك بس لو حياتك كانت التمن اوعي تتخيلي للحظه واحده اني هكون اب ليه وده وعد مني
ليلي: ادهم
قاطعها: ده اخر كلام عندي يا اما همشي دلوقتي ومش هتشوفي وشي تاني
ليلي: لا ما تمشيش ارجوك هنسيب الحكم للايام
ادهم رجع معاها البيت وهيا اتحسنت شويه برجوعه لانه اهتم هو باكلها كان ليه طريقته انه ياكلها ويهتم بيها
عم محمود: متشكر علشان رجعت
ادهم: انا رجعت علشانها مش علشانك
عم محمود: وده كفايا
ادهم رجع لليلي معاها وبينام جنبها بس حاطط حدود بينهم يمكن لانها تعبانه او يمكن لانه برضه من جواه مش قادر يسامحها
ادهم كان بيأكلها بايده وبيعملها كل حاجه بنفسه ورجع نوعا ما صفو الحياه بينهم
كان بيكلم البيبي ويتحاور معاه وكل ما يحس بابوه كان بيتحرك جوا بطن مامته
بس علي الرغم من كل ده ادهم مازال حاطط حدود بينه وبين مراته
مش عارف يرجع لطبيعته معاها ولا قادر يقعدوا مع بعض قعده صفي لوحدهم
ليلي في مره بتاخد شاور وتعبت وداخت فنادت عليه
جالها ولبسها برنص الحمام وشالها لحد السرير وفضل جنبها
طلبت منه يساعدها وفعلا نشفلها شعرها وسرحهلها حاولت ليلي تقرب منه اكتر
باسته في رقبته ولسه هتقرب اكتر فقام وقف بعيد عنها
ليلي: ادهم ارجوك
ادهم بصلها وهو واقف
ادهم: سبق وقولتلك واحنا في شهر العسل ان انا مش من النوعيه دي ومش ده اللي هيغريني
ليلي: انا مش بغريك انا بقولها صريحه وحشتني ومحتاجاك
ادهم: وانا قولتهالك برضه صريحه انا بعود نفسي علي عدم وجودك لما تموتي وتسيبيني
ليلي: انا مش هموت
ادهم: بجد؟؟ توعديني بده
ليلي: انت وعدتني تفضل جنبي
ادهم: وانا جنبك اهوه وعند وعدي بس اكتر من كده اسف لأ
انتي طلبتي مني افضل معاكي فتره الحمل وده اللي انا هعمله بعد الحمل ده شيئ في علم الغيب
سابها ومشي وهيا فضلت تعيط وتعيط
ادهم سابها وخرج وحس انه زودها معاها قوي فكر يرجعلها يتاسفلها هيا برضه تعبانه كان علي الاقل ياخدها في حضنه
رجع علي البيت واول ما دخل لقي البيت فاضي.. قلبه اتقبض فاتصل بابو ليلي
ادهم: انتو فين؟
عم محمود: انت اللي فين؟ اتصلت بيك ما ردتش المهم احنا في المستشفي
ادهم: التليفون كان صامت سوري خير انا كنت سايبها كويسه؟
عم محمود: تعبت جامد وتقريبا كده خلاص
ادهم: خلاص ايه بالظبط؟
عم محمود :ادهم تعال بسرعه
ادهم قفل ووقف مكانه مش قادر يتحرك اصلا
بسرعه كده؟ هو الوقت عدي بسرعه كده؟ وبقت تقريبا في الشهر السادس
فاق من افكاره وجري علي المستشفي
وطلع لليلي وكان الدكتور عندها والدكتور صبري كمان موجود وحتي مصطفي موجود
الدكتور: الحمد لله انك وصلت لازم ندخلها العمليات حالا
ادهم: هو ايه اللي حصل؟ كانت كويسه؟
ليلي: وانا لسه كويسه
الدكتور: لا مش كويسه المشيمه انفصلت والبيبي لازم ينزل حالا مراتك بتولد
ليلي: لا هخليه جوه مش هولد دلوقتي هخليه
الدكتور: مش بمزاجك هيتخنق جوه ده اولا لان الميه اللي عليه نزلت والمشيمه انفصلت عن الرحم واكتر من كده حياتك وحياته في خطر
ليلي: طيب هيبقي كويس؟
الدكتور: دي حاجه في علم الغيب المهم دلوقتي انتي....، جهوزها للعمليات
ليلي: ادهم خليك جنبي تعال معايا
ادهم: انا جنبك اهوه ليلي انا اسف اني اتنرفزت عليكي حقك عليا
ليلي: انت خايف اني اموت وفاكرني زعلانه؟؟
ادهم: هشسشش ما تجيبيش سيره الموت خالص دلوقتي انتي هتكملي معايا المشوار
ليلي: ومعانا ابننا صح وهنسميه زياد ايه رايك؟
ادهم: هنسميه زياد اتفقنا بس انتي اطلعيلي بسرعه ما شي
ليلي بتتكلم بالعافيه وبتتنطق بالعافيه من التعب وادهم ماسك ايديها وخايف انها تموت بين ايديه من كتر تعبها
دخلوها العمليات وهووابوها وامها وقفوا مستنينها بره وحاله من الرعب سيطرت علي الكل وطال الانتظار بره
خرج الدكتور اخيرا من اوضه العمليات وكلهم جريو عليه
الدكتور: انا اسف بس مراتك عندها نزيف ومش عارفين نسيطر عليه
ادهم: وبعدين ايه العمل؟
الدكتور: لازم نستأصل الرحم علشان نقدر ننقذها
ادهم: ومستني ايه؟ اعمل المطلوب المهم هيا
الدكتور: حاجات زي دي لازم ناخد موافقه الاهل الاول
ادهم: اعمل اي حاجه المهم مراتي تطلعلي
ابوها: استني البيبي حالته ايه؟
الدكتور: هو حاليا طفل خديج يعيش او يموت دي حاجه في علم الغيب لانه صغير جدا هو هيتحط في حضانه ودكاتره الاطفال هيتابعوه بس متحطوش امل كبير
عم محمود: يبقي ما تشيلش رحم بنتي سيبلها فرصه انها تخلف تاني
ادهم: انت اتجننت رسمي صح؟؟؟ بيقولك انها بتنزف وان ده الحل وانت تقوله سيبها تموت
عم محمود: انا بقول يحاول ينقذها وما يشلش الرحم
ادهم: انت استحاله تكون عاقل او بتحبها اصلا حبك غريب ( بص للدكتور) سيبك منه اعمل المطلوب وشيل الرحم لو ده هينقذها
الدكتور: انا اسف بس مراتك ماضيه علي اقرار ان المسؤل عنها هو ابوها وانه لو حصل حاجه ناخد برأي ابوها وبس ف اسف
ادهم مسك الدكتور من هدومه
ادهم: انت بتقول ايه واقرار ايه؟
ابوه صبري: ادهم سيطر علي نفسك ده مش قراره ده قرار مراتك والوقت بيضيع واحنا بنتكلم ادخل يا دكتور اعمل المطلوب وحاول تنقذها من غير ما تشيل الرحم خليه حل اخير
الدكتور: تمام بعد اذنكم
ادهم: مراتي لو جرالها حاجه هقتلك فاهم ( وبص لابو ليلي) وهقتلك انت كمان
سابهم وطلع بره
" ياه يا ليلي للدرجه دي انا مهمكيش وكل اللي يهمك هو الخلفه وبس!!!
للدرجه دي ابوكي بتثقي فيه اكتر مني!!! ""
ابوه صبري خرجله
صبري: ما تزعلش من مراتك يا ادهم
ادهم: مراتي؟؟؟ وهيا فين مراتي دي؟؟
صبري: الامومه يا ادهم حاجه فطريه في البنات حاجه بيحسوا بيها من وهما بنات صغيرين بتلاقي البنت ماسكه عروسه وعملاها بنتها فما بالك لما تكبر وتتجوز وتحب جوزها بيبقي كل همها انها تخلف منه ولو اتحرمت من الموضوع ده مفيش شيئ بيعوضها ابدا فما بالك لو الفرصه جتلها وبعدين هرمونات الحمل بتاثر علي القرارت
ادهم: طالما هرمونات الحمل بتاثر يبقي ما تاخدوش بيها
صبري: القانون بيعترف بالحاله العقليه مش الهرمونات ان شاءالله مراتك وابنك هيخرجولك بالسلامه
ادهم: ولو مخرجتش هعمل ايه؟ هكمل ازاي؟
انت عارف ان ليلي هيا كل شيئ بالنسبالي
هيا عيلتي
صبري: عارف انها كل عيلتك بس انت كنت عايش قبلها
ادهم: كنت عايش؟؟؟؟ انت بتسمي اللي انا عيشته ده عيشه ده مجرد اني مكنتش ميت لكن برضه مش عايش فيه فرق
انا حياتي بدات يوم ما حبتني
صبري: ربنا بيختار للانسان الخير
وعسي ان تكرهوا شيئا ويجعل اللي فيه خيرا كثيرا
سيبها لربنا وهو هيختار الافضل ليك واحسن ظنك بيه وهو هيبقي عند حسن ظنك
ادهم: ربنا؟؟؟؟ كان فين ربنا لما اتظلمت في حياتي وفين لما اتعذبت وفين لما اتشوهت وفين لما اتطردت هو ده اختياره الافضل
صبري: استغفر الله يا ادهم ربنا ديما بيبتلي العبد المؤمن وبيمتحنه
كل الانبياء كانو مبتلين المهم نصبر
سيدنا يعقوب لما اتعلق بابنه يوسف وخاف عليه ربنا اخده منه ولما اتعلق اكتر باخوه بنيامين اخده منه برضه وابتلاه واتعمي ولما سلم امره لربنا وامن بقضاؤه رجعله عياله الاتنين يوسف وكان عزيز مصر وبنيامين ورجعله بصره
لازم تسلم امرك لربنا وبطل تحسبها ولما تؤمن بقضاؤه هتلاقي خيره كله
لو اتطلعتم علي الغيب لاخترتم الواقع
ادهم: استغفر الله العظيم من كل ذنب عظيم
سلمت امري كله ليك يا الله
صبري: بالظبط كده تعال معايا اتوضا ونصلي مع بعض ركعتين وندعي ربنا يخرجهملك بالسلامه يالا
راحو صلوا وجالهم ابو ليلي يصلي معاهم ويدعوا ربنا يزيح الغمه
خرجت ليلي من العمليات وهما راحو للدكتور يعرفوا الاخبار ايه؟
الدكتور: انا عملت كل اللي اقدر عليه بس النزيف كان شديد والسيطره عليه كانت صعبة ومع حالتها واجهادها قلبها كان ضعيف
ادهم: انت بتقول مقدمات كتير هات من الاخر
الدكتور: قلبها وقف كام دقيقه لحد ما انعشناها تاني ودلوقتي دخلت في غيبوبه
ادهم: وبعدين ماهيا ممكن تفوق من الغيبوبه صح؟ وهتبقي كويسه؟ صح ولا ايه؟
ادهم بص لصبري لانه مش فاهم او مش عايز يفهم
صبري: ادهم معني ان القلب وقف يعني الاكسجين اتمنع عن المخ وده بيعمل ضرر كبير للمخ يعني ممكن لا قدر الله انها لما تفوق متبقاش مراتك اللي انت عارفها
عم محمود: امال تبقي ايه؟
صبري: تبقي مجرد شيئ نايم مكانه ولا بيتحرك ولا بينطق ولا فيه مخ ولا اي شيئ تفضل مكانها احنا بنغذيها
ادهم: برضه ممكن مع الوقت تفوق
صبري: المخ لو اتضرر ما بيتعالجش هتفضل كده لحد ما كل اعضائها تتضرر وبعدها،.....
ادهم: تموت صح كملها سكت ليه؟ ( بص لابوها) افرح انت بقي بالرحم اللي انقذته ولا بالشيء اللي في الحضانه
سابهم ادهم ومشي فضل ماشي علي رجليه،، بيمشي وخلاص
_______#__________#____________#________
حنان قاعده علي سجاده الصلاه وبتصلي ورافعه ايديها لفوق
"يارب ابني يارب فرج همه وزيح عنه يارب
انا استودعك ابني وانت يارب بتحميه طول عمره يارب زيح عنه اللي تاعبه يارب وريح قلبه وارزقه السعاده اللي يستحقها وارزقه باللي يعوضه عن كل لحظه حزن عاشها
يا حنان يا منان يا بديع السموات والارض "
حسين دخل وواقف علي الباب وسامعها وهيا مش واخده بالها منه
حسين: معرفش انك بتحبي احمد كل الحب ده؟ ولا ده مش لاحمد؟ وياتري انا ماليش دعوه ولا ما استاهلش
حنان: انا بدعيلك بدعوه واحدة ان ربنا يشيل الغشاوه من علي عنيك وتشوف
حسين: اشوف ايه؟ ان ادهم ابني؟؟
حنان: ايوه ابنك
حسين: الظاهر انك مش ناويه تجيبيها لبر قلتلك مش عايز اسمع اسمه والفتره دي علي طول اسمه بيتردد الظاهر اني كان لازم انفذ تهديدي ليكي واقتله واخلص
حنان: لأ انت وعدتني افضل معاك وانت تسيبه في حاله
حسين: واتفقنا ان اسمه ما يتذكرش تاني وانتي بتخلي بوعدك يبقي انا ما اخلش بوعدنا ليه وهما اتنين عربجيه وشويه فلوس وديتها رصاصه واحده
حنان: لألألأ ارجوك لأ مش كفايه انك حرمتني منه
حسين: يبقي ما اسمعش اسمه تاني
حنان: في يوم الحقيقة هتبان عايزه اشوفك ساعتها هتعمل ايه؟ ؟ ؟
حسين: انا جاي اقولك جهزي نفسك علشان هنسافر انا وانتي
حنان: هنسافر فين وليه؟ ؟
حسين: هنهاجر بره في فرع جديد للشركه في امستردام هنسافر نتابعه واحمد هيمسك الشغل هنا جهزي نفسك
حنان: انا مش عايزه اهاجر
حسين: طيب تحبي اقضيلك علي السبب اللي مش عايزه تهاجري علشانه
حنان: ربنا يسامحك مش هقول غير كده
___________#_______--_#_______----_____----_
ليلي في الغيبوبه ومش بتفوق وادهم قاعد جنبها في حاله من الصمت
ابنهم في الحضانه بيصارع الموت
دكتور الاطفال جه عند ادهم ونادي عليه بره الاوضه
كلهم واقفين الاب والام وادهم
الدكتور: لو سمحت يا سيادة المقدم
ادهم: سبق وقلتلك لأ عايز ايه تاني؟؟؟
عم محمود: لأ لايه بالظبط دكتور في ايه؟
الدكتور: البيبي حالته بتتدهور
عم محمود: وعايز ايه من ادهم هو في ايده ايه يعمله؟
الدكتور: مش يعمل حاجه بس بس ياخد ابنه في حضنه
ام ليلي: حضنه؟؟؟ وده يفيد بايه؟
الدكتور: في حالات بسيطه جدا في العالم الحضن بيفيد معاها بينشط الدوره الدمويه وبيرفع المؤشرات الحيويه وفي عيال بعد ما قلبها بيقف بيشتغل تاني لما امه تضمه اول ما البيبي بيحس بنبض قلب امه بيتنشط معاها ايوه الحالات دي بتنفع مع الام بس لان الام مش متاحه فالاب موجود
عم محمود: يعني يضمه وبس وهو ممكن يتحسن؟؟؟
الدكتور: ايوه ده بس المطلوب منه واهي تجربه مش هنخسر حاجه
عم محمود: وانت رافض ليه؟
ادهم: رافض ليه؟ انت عايزني بجد اجاوبك
الدكتور: سياده المقدم اهدي
ادهم كان هيهجم علي ابو ليلي
ادهم: حاضر هجاوبك
اولا لاني بكرهه فوق ما تتخيل
ثانيا لان هو اخد مني اغلي حاجه بملكها
ثالثا لاني لو دخلت عنده هقتله
هاه تحب ادخل عنده؟؟؟؟؟
عم محمود: ما تقدرش مفيش اب بيأذي عياله
ادهم ضحك بصوته كله ضحكه كلها مرار
ادهم: بجد؟؟؟؟؟ مفيش اب بيأذي عياله؟؟؟؟ ده مين ضحك عليك وقالك كده؟؟؟ امال انت عملت ايه في بنتك؟؟؟ بنتك مين اللي خلاها تتطلق ومين فرقها عن جوزها ومين ساعدها تكمل الحمل ومين دخلها في غيبوبه؟؟؟؟ مش انت ابوها ولا ايه؟ ؟
بلاش كل ده يمكن يكون ده بالنسبولك حب تحب اقولك انا ايه اللي خلاني مشوه كده؟؟ مش ده اكتر سؤال محيرك
اجاوبك
ابويا اللي شوهني كده عملت حادثه وانا صغير بسبب اخويا الكبير كنا احنا الاتنين في عربيه وهو سايق وانا جنبه وكان سكران وابويا بيحب اخويا ده وطلب مني ما ارجعش من غيره وكان سكران وعلشان خفت عليه فكيت حزامي علشان اعرف اطول حزامه واربطهوله ويدوب ربطته العربيه اتقلبت بينا وانا طرت من العربيه ودخلت في قزاز وبدال ما يعالجوني ابويا ادي فلوس للدكتور علشان يخليني مشوه واهوه انا قدامك اهوه مشوه ولولا مصطفي وابوه كان زماني متربط علي ترابيزه بيشرحو فيه كل يوم او ميت
وبعد ما شوهني كده رماني بره البيت وقالي ماليش مكان لولا ان دكتور صبري اتبناني كان زماني في الشارع عربجي ولا قتال قتله ولا حرامي بشكلي المشوه ده
هاه لسه بتقول ان مفيش اب بيأذي عياله؟؟؟
صمت سيطر علي الكل
اول مره ابو ليلي يعرف الكلام ده واخيرا ام ليلي قطعت الصمت ده
ام ليلي: حقك يا ابني في كل كلمه بتنطقها وحقك تكره ابوها بس ليلي في غيبوبه وربنا اللي يعلم امتي هتفوق ولو مش....... (بتعيط)
لو مش هتفوق فانا عايزه ابنها عايزاه يعوضني عن غيابها ارجوك يا ادهم
ادهم: ارجوكي انتي ما تطلبيش مني حاجه فوق طاقتي انتي بالذات ما بحبش ارفضلك طلب
ام ليلي: يبقي ارجوك انت انا عايزه حفيدي وبعدين لو ليلي فاقت وعرفت ان انت اتخليت عن ابنها ومعملتش كل اللي تقدر عليه بعد كل تعبها ده فاكر هيا تعبت قد ايه علشانه؟؟؟ كلنا تعبنا قد ايه؟ هتقدر يا ادهم تواجهها وتقولها ان انت ما قدرتش تيجي علي نفسك للحظه وتحضنه لو مش علشان خاطري يبقي علشان ليلي حبيبتك علشان ليلي يا ادهم مش علشان حد تاني
ادهم سكت بس دار في عقله كل الايام اللي فاتت وكل التعب اللي ليلي عاشته
وده اقل شيئ ممكن يعمله لمراته
راح مع الدكتور لحد الحضانات
الممرضات لبسوه لبس معقم ودخلوه عنده
ادهم داخل قلبه هيخرج من مكانه مليان غيظ وغضب وكره للكائن الصغير ده
بيحاول يسيطر علي اعصابه علشان ما يقتلوش
بيحاول يفكر في اي لحظه عشق عاشها مع مراته يمكن تهديه بس مش عارف
غيظ. غضب. كره. حرمان
مشاعر كتير بتحارب علشان تخرج
واخيرا شافه قدام عنيه وجواه رغبه انه يخنقه لحد ما يموت في ايده
للمتابعه اترك تعليق
الحلقة الثالثه عشر من الجزء الثاني
المشوة
ادهم داخل عند الحضانه قلبه هيخرج من مكانه مليان غيظ وغضب وكره للكائن الصغير ده
بيحاول يسيطر علي اعصابه علشان ما يقتلوش
بيحاول يفكر في اي لحظه عشق عاشها مع مراته يمكن تهديه بس مش عارف
غيظ. غضب. كره. حرمان
مشاعر كتير بتحارب علشان تخرج
واخيرا شافه قدام عنيه كائن صغير جدا تقريبا طول كف ايده موصل باسلاك كتير
لا حول له ولا قوه
مش عارف يحس بايه؟ كل اللي عارفه ان كل احاسيسه اتلخبطت اختفي الغضب والكره والغيظ واتبدلوا بحاجة تانيه
حاجه جديده عليه
حاجه مش عارف يفسرها بايه؟ ؟ ؟
الدكتور: هاه قرب
ادهم: اعمل ايه؟؟؟
الدكتور: تفتح قميصك
ادهم: افندم قميصي؟؟؟؟؟
الدكتور: التفاعل بيمكم بيزيد اكتر لو الجلد علي الجلد مباشره وقلبه فوق قلبك يحس بنبضك انا هساعدك
ادهم فتح قميصه وقرب والدكتور قعده علي كرسي جنب الحضانه
مسك البيبي وحطه علي صدر ادهم فوق قلبه بالظبط وغطوه في حضن ابوه
ادهم مش عا رف يسيطر علي احاسيسه ومشاعره
الدكتور: بص لنبضات قلبه علي الشاشه ومؤشراته الحيويه ابتدت تعلي اهي
ادهم: المفروض افضل كده قد ايه؟
الدكتور: ده يتوقف علي ابنك؟
ادهم: ابني؟؟؟؟
الدكتور: اه ابنك!! كلمه جديده عليك بس هتتعود عليها
ادهم من جواه خايف ودعي جواه
" يا الله ما تعلقنيش بيه وتاخده مني يا الله
انا مش حمل عذاب تاني لو هتاخده خده دلوقتي يارب ""
وفي اخر النهار ادهم الدكتور قاله انه ممكن يقوم يريح شويه ويرجع تاني مش شرط يفضل علي طول
ادهم خرج يمشي رجليه شويه
قابله عم محمود
عم محمود: تعال كل انت ما اكلتش حاجه من الصبح
ادهم: ما تخافش عليا مش هيجرالي حاجه وليلي تتهمك انت
عم محمود: هو انت ليه مش مصدق ان انا اتغيرت وبحبك زي ابني؟؟؟
ادهم: بتحبني؟؟؟ حبك غريب
بتحب تعذب الناس اللي بتحبهم
مش قادر افهم حبك
عم محمود: بكره الايام هتفهمك... هتاخد قرارات صعبه لابنك.. ابنك هيبقي شايفها غلط او قسوه لكن انت هتشوفها حب وخوف
ادهم: الايام!!!! سيبها للايام
عم محمود: حاسس بايه دلوقتي؟؟؟
ادهم: حاسس بايه في ايه بالظبط؟
عم محمود: كرهك لابنك ورغبتك انك تقتله؟؟
ادهم: اتغيرت
عم محمود: ومالك بتقولها كده ليه وكان ده شيئ مش كويس
ادهم: لاني.... لاني..... لاني في الاول كنت اخيرا قدرت اتقبل كره ابويا ليا واتقبل فكره ان في اب يكره ابنه او ياذيه وده نوعا ما خلاني متقبل لحياتي وحاطط عذر لابويا علي اللي عمله لكن اول ما ضميت ابني واخدته في حصني انتهي اي عذر انتهي تقبلي للوضع
واقتنعت ان مفيش اب يقدر يكره ابنه او يعمل فيه ربع اللي ابويا عمله وده وصلني لشيئ واحد
عم محمود: ايه هو؟
ادهم: ان انا مش ابنه
قالها وسابه ومشي لوحده في افكاره الجديده
اخيرا لقي اجابه لسؤاله
ايه الذنب اللي ارتكبه خلي ابوه يكره؟؟
اجابته انه مش ابوه يبقي الاحتمال التاني
ان امه خانت ابوه وهو كان النتيجه وعلشان كده ابوه مقدرش ابدا يتقبله لان كل ما بيشوفه بيفتكر خيانت مراته
بس ممكن يكونوا اتبنوه؟؟؟
لا هيتبنوه ليه ما هما سبق وخلفوا احمد وخلفوا بعده آيه اخته يبقي هيتبنوه ليه؟؟
ممكن يكونوا لقوه في الشارع؟؟ طب ابوه وامه مين؟؟؟ ممكن يكون عنده اهل بيحبوه ويتبنوه؟؟؟ لألأ هو امه خانت ابوه وعلشان كده فضل معاهم وعلشان كده ابوه بيكرهه لانه مش ابنه؟؟؟؟
بس يا ادهم كفايه هتجننن!! كفايه تفكير
كفايه تفكير كفايه كفايه كفايه
فكر في النهارده وكفايه تفكير في امبارح
هدي ادهم نفسه وطلع لمراته يفعد جنبها شويه
اخيرا عدي اسبوع وصحه البيبي بتتحسن يوم عن يوم
الصبح ادهم قاهد علي الكرسي جنب مراته نايم
وفجأه سمع صوت ضعيف جدا بينادي عليه
فتح عنيه وبصلها
اخيرا فتحت عنيها
ادهم: ليلي حبيبتي انتي سمعاني؟؟؟ ليلي
ادهم جري ونادي علي ابوه صبري
صبر ي بيكشف عليها
صبري: ليلي حاولي تقولي اي حاجه اي اشاره او كلمه تعرفنا انك سمعانا
ليلي: _________
ادهم: ليلي قولي اي حاجه علشان خاطري اي حاجه
ليلي بتقول حاجه بصوت محدش سامعه
الدكتور: وضحي بتقولي ايه؟
ليلي: ا ا ا ا
الدكتور: ابنك؟
ليلي بتشاور لأ بدماغها
الدكتور: وضحي اتكلمي حاولي
ليلي: ا ا ادهم ااانا
ادهم: انتي ايه سامعك
ليلي: بحبك انت....... و....بس
ليلي اغمي عليها تاني
ادهم بص لصبري
ادهم: ايه مالها؟؟ ما تقولش انها دخلت في غيبوبه تاني
صبري: لا ما تخافش هيا مجهده وتعبانه وهتاخد فتره لحد ما تتحسن بس احب اطمنك ان مرحله الخطر عديت مراتك كويسه وهتتحسن ان شاءالله وقريب هتاخد ابنك ومراتك بيتك
ادهم: انت بتتكلم بجد؟؟؟ مش بتقول كلام يريحني وخلاص
صبري: بتكلم بجد يا ادهم...
بتعدي الايام وليلي فعلا بتتحسن يوم عن يوم وبدأت تتكلم واول حاجه طلبتها تشوف ابنها
ادهم رافض يحركها وابنها ما ينفعش يخرج ه من الحضانه
ليلي: ارجوك يا ادهم وديني عنده بقالي 3 اسابيع والداه وما شفتوش ولا ضميته لصدري
ادهم: اولا انتي تعبانه وثانيا هو كمان تعبان وفي حضانته ومش هتعرفي تشيليه
يبقي اتحسني الاول وبعدها براحتك
ليلي: لا يا ادهم علشان خاطري وحياتي عندك
ادهم خايف انها تتصدم لما تشوفه صغير قوي كده ومتوصل بالاسلاك دي كلها خايف عليها مش اكتر
واخيرا وداها عند ابنها واول ما شافته عيطت
ادهم: علشان كده مكنتش عايز اجيبك هنا
ليلي: هو صغير قوي كده ليه؟وكميه الاسلاك دي ايه؟
ادهم: ليلي ابنك كبر جدا عن ما اتولد والاسلاك قلت كتير واتحسن جدا وبعدين هو قوي واتحدي كل الصعاب اللي واجهته ما تخافيش عليه
ليلي: قوي زي ابوه يعني
ادهم: اقوي وان شاءالله يبقي حظه احسن من ابوه
ادهم ضمها ليه ووقفوا الاتنين يشبعوا من ابنهم الصغير اللي لسه مالوش ملامح
عدي شهر واخيرا ابنهم مستعد يخرج من الحضانه
الدكتور طمنهم انه كويس وانه ممكن ياخدوه معاهم
ليلي كانت مرعوبه وخايفه عليه جدا لانه صغير جدا بس امها طمنتها انها مش هتسيبها لحد ما تعرف تتعامل معاه
اخدوه والكل في البيت بيتعامل بحذر جدا معاه لانه صغير جدا بس شويه شويه بدؤا يتعودا علي حجمه وهو بدا يكبر
ابو ليلي طبعا سابهم وسافر علشان اشغاله وبعد شهر من خروجهم من المستشفي ام ليلي كان لازم ترجع بيتها وليلي رافضه انها تخليها تمشي لانها مش عارفه تتعامل مع ابنها الصغير
ومش عارفه تعمل ايه؟ امها خلاص قررت تسافر وترجع بيتها
اخر الليل سهرانه وجوزها اتاخر في الشغل واول ما رجع
ادهم: ايه اللي مسهرك لدلوقتي؟
ليلي: عادي زياد كان سهران ويدوب نام
ادهم: اخباره ايه النهارده؟
ليلي: احسن
ادهم: امال انتي مالك؟
قعد جنبها ومسك ايديها
ليلي: ماما ماشيه بكره
ادهم: طيب ماهو اكيد هتسافر ان مكنش بكره هيبقي بعده بيتها وعيالها وابوكي ده طبيعي
ليلي: وانا اعمل ايه؟ انا لسه تعبانه اولا ومش بعرف اتعامل مع زياد ولا بعرف احميه ولا اغيرله لسه محتاجه وقت مش هعرف انا اكيد ام فاشله
عيطت ليلي وادهم اخدها في حضنه
ادهم: انتي ابعد ما بكون عن الفشل انتي اتمسكتي بيه في الوقت اللي الكل قال اتخلي عنه وهو ظروفه مختلفه حجمه صغير كل حاجه فيه مختلفه وانتي كمان لسه تعبانه
فمحتاجه وقت تتعودي فيه مش اكتر ما تخافيش كده
ليلي: يعني نعمل ايه؟
ادهم: الحل تسافري مع مامتك وتاخدي وقتك ولما تكوني مستعده تيجي
ليلي: وانت؟
ادهم: وانا ايه؟
ليلي: هتعمل ايه لوحدك؟
ادهم: هعمل ايه يعني! ما تقلقيش عليا المهم تتحسنوا انتو الاتنين الاول
ليلي: وانت مش هتزعل لو انا سافرت؟؟؟
ادهم :وهو انا زعلي يفرق معاكي؟؟؟
ما علينا المهم سافري مع مامتك
ليلي: ادهم انا بحبك قوي
ادهم: عارف انك بتحبيني
ليلي: طيب انت بعيد عني ليه؟؟ وحشتني جدا بقالك قد ايه بعيد
ادهم: قبل كده كنتي حامل وتعبانه وبعدها الولاده يدوب يعني
ليلي: ادهم انا كنت بحاول اقرب منك في الحمل وانت كنت رافضني وولده بقالي اكتر من شهرين وبرضه بحاول اقرب وانت بتبعد
ادهم: مش وقته قومي ارتاحي علشان تعرفي تسافري مع مامتك
لسه هيقوم من جنبها راحت ما سكه ايده وشدته عليها وهمست " وحشتني قوي " باسته في رقبته وبتقرب لحد شفايفه وهو واقف مكانه مش بيتحرك او بيتجاوب معاها
ليلي: في ايه مالك؟
ادهم: ماليش
ليلي: مش واحشاك؟؟؟
ادهم: مش وقته قولتلك
مشي ودخل الحمام يغير هدومه وخرج كانت مستنياه غيرت هدومها ولبست قميص نوم مغري جدا لدرجه انه تنح لما شافها
ادهم: وده ايه؟
ليلي: ده بيقولك قرب
ادهم: وانا بقولك مش وقته تعبان تصبحي علي خير
ادهم نام علي السرير وعطاها ظهره
ليلي: ايه تصبحي علي خير دي؟؟
ادهم قام اتعدل وبصلها
ادهم: وبعدين؟؟؟
ليلي: بعدين عندك انت.... رفضتني وانا حامل ودلوقتي بترفضني تاني عايز ايه بالظبط؟
ادهم: حاليا عايز انام
ليلي: انا مش بهرج علي فكره
ادهم: وانت فاكراني انا بهرج؟؟؟ بقولك مش وقته وانتي مصره اعملك ايه؟
ليلي: مش وقته ليه؟
ادهم: بلاش يا ليلي
ليلي: لا يا ادهم قول اللي جواك
ادهم: مش عارف اكون معاكي اصلا
ليلي: يعني ايه مش عارف وليه؟؟
ادهم: لاني كل ما ببصلك بفتكر كلمتك اني مشوه وان انتي مستحملاني بالعافيه
ليلي: لا يا ادهم انت عارف انا قلت الكلام ده ليه
ادهم: عارف وبعدين؟؟؟
ليلي: يعني مش قصداه
ادهم: عارف انك مش قصداه بس قولتيه لانك عارفه انه هيجرحني كنتي عارفه وقولتيه علشان تجرحيني
كنتي عارفه كل جروحي فين وضغطي عليها علشان نفسك وعلشان رغبتك
تجاهلتيني وتجاهلتي رغباتي انا ومهتمتيش غير بنفسك وبس
وده انا مش عارف اسامحك عليه
ليلي: وكانت النتيجه زياد ابننا عملت كل ده علشانه ما تقوليش انك بتكرهه او ندمان ان انت بقي عندك ولد
ادهم: لا مش ندمان ولا مش بكرهه بس برضه مش عارف اسامحك انتي
ليلي: ادهم انا اسفه لو جرحتك بس كان غصب عني
ادهم: ايه اللي غصبك؟؟؟ انتي كنتي متخيله انك لو رفضتي تعملي الاجهاض ان انا هشيلك غصب واربطك واوديكي المستشفي غصب عنك صح؟؟ لان انا وحش هكتف مراتي واوديها تعمل عمليه غصب عنها فقلتي لما اجرحه واطرده بره حياتي وانتي عارفه كل اماكن جروحي ولما يعدي الوقت ابقي اناديله وهو طبعا هيسامحني علشان بيحبني وماهيصدق اصالحه
نفس تفكير ابوكي اشوف ايه اللي يوجع واقوله وهو عارف رد فعلي هيكون ايه وفي الاخر انا اللي اخدت القرار
حتي ساعت الولاده عملتي ابوكي هو المسؤل وكتفتيني لتاني مره
ما تتخيليش احساسي ايه لما الدكتور قال ابوكي المسؤل عنك
ليلي: ادهم انا ما فكرتش كده ابدا انا كل اللي فكرت فيه...
قاطعها: نفسك وبس ايه اللي انتي عيزاه! بغض النظر عن اي اعتبارات تانيه مفكرتيش فيا ولو للحظه
ليلي: فكرت فينا احنا الاتنين
ادهم: طيب قوليلي لو كان جرالك حاجه انا كان المفروض اعمل ايه علي حسب تفكيرك؟؟؟ احب تاني ولا اروح اتجوز واحده تانيه؟؟ ولا ارجع لوحدتي!؟
؟ فكرتيلي في ايه؟؟
ليلي سكتت ومردش
ادهم: سكتي؟؟ معندكيش رد
ليلي: كنت انا نيه!!! ده اللي عايز تقوله.. اقولهالك انا ايوه كنت انانيه من يوم ما اتجوزتك وانا انانيه عايزاك ليا لوحدي،، عايزه احبسك هنا في اوضتي وما اخرجكش منها ابدا ايوه انانيه،،، عايزاك طول الوقت جنبي بغض النظر عن اي اعتبارات تانيه،،، ايوه انانيه عايزه اخرج في كل مكان معاك واعرفك علي عيلتي كلها واحضر عزومات كتير معاك،،، ايوه انانيه عايزه اشيل ابنك جوايا واربيه انا وانت مع بعض ويبقي عندي بيت صغير مليان ضحك وحب ولعب وشقاوه عيال
فايوه يا ادهم انانيه ولو الزمن رجع هعيد كله من تاني... تقدر تقولي بقي ايه غلطي؟؟؟
ادهم: مش غلطانه بس انا كمان اناني المره دي
عايز ابقي انا رقم واحد في حياتك.... مش عايز اهم مني ولا تسمعي لحد غيري ولا تاخدي راي حد غيري ولا تكوني مسؤله من حد غيري
عايزك تهتمي بيا وبمشاعري وبكل حاجه تخصني ولو الدنيا كلها في كفه وانا في كفه تختاريني انا وانا اكون واثق من اختيارك ده
عايز ابقي اناني يا ليلي عايز ابقي اناني
المهم تصبحي علي خير ولما ترجعي من السفر يبقي يحلها المولي وعلي راي ابوكي سيب كل حاجه للايام
سافرت ليلي وادهم وصلهم وهو ماشي خرجت وراه
ليلي: ما تتاخرش عليا ممكن؟
ادهم: ان شاءالله شدوا حيلكم بس وانا اجيلكم
ولسه هيمشي فنادت عليه
ليلي: ادهم
ادهم بصلها
ليلي: هو انت لسه بتحبني؟ ؟
ادهم: عمر الحب ماكان مشكلتنا ما انتي بتحبيني بس اكتر واحده بتوجعيني
قرب منها ومسك ايديها
ادهم: مش معني اني مختلف معاكي او زعلان منك ان انا مش بحبك....... انا اللي جوايا ناحيتك تخطي الحب بمراحل مختلفه انا بعشقك بموت فيكي مش بحبك
بس ده ما يمنعش اني مجروح منك وحاليا مش مستعد اكون معاكي
المهم اشوف وشك بخير
سلم عليها سلام العشاق ومشي بيقدم رجل وياخر رجل
ادهم اتشغل جامد في شغله واتضطر يسافر مهمه جديد ه سريعه رجع منها بعد شهر
طول سفره ما كلمش ليلي نهائي وهيا هتجنن من عدم رده عليها
كل يوم تتصل وهو مش بيرد هو مش عارف يكلمها ولا عايز يكلمها
حتي لما سافر مقلهاش انه مسافر
اول ما رجع فتح تليفونه لقي رسايل كتير واتس وماسنجر من مراته
لفت نظره رساله منها كانت اغنيه واول ما سمعها حن لمراته وقرر انه يروحلها
Watch "Adele - Hello" on YouTube - https://youtu.be/YQHsXMglC9A
ونزل علي طول لمراته اللي اول ما شافته جريت عليه واتعلقت في رقبته
ليلي: جننتني عليك لما ما كنتش بترد عليا
ادهم: حقك عليا بس كنت مسافر واول ما سمعت اغنيتك رجعت وجيتلك بسرعه
الكل سلم عليه وكل واحد بيقوله ان ابنه زياد كبر وبقي واد عسله اجنبيه بعنين ملونه وشعر اصفر والكل مستغرب الشبه ده جايله منين
ادهم دخل يشوف ابنه واول ما شافه اتصدم
ليلي: في ايه يا ادهم مالك؟
ادهم :_________
ليلي: ادهم ايه رد عليا
ادهم: مفيش انا هروح البيت وهاجي اخر النهار سلام
ليلي: ادهم استني بس قولي في ايه؟
ادهم: مفيش تعبان من الطريق مش اكتر
ليلي: انت حتي ما شفتش ابنك
ادهم: ممكن تسيبيني دلوقتي وبعدين نتكلم
سابها ومشي وراح يتمشي راح المكان اللي دفن فيه ماكس وقعد جنبه كتير يفكر في كل اللي عدي عليه
شويه عدوا عليه وبعدها حس بحد جنبه بص لقاها ليلي
ادهم: انتي ايه اللي جابك هنا وجيتي ازاي؟
ليلي: ده مكانك المفضل وده المكان اللي كنا بنتقابل فيه كان ماكس علي طول بيجيبني
مالك بقي؟ ما تقولش انك لسه زعلان مني!؟
ادهم: لا يا ليلي مش زعلان منك
ليلي: امال في ايه؟
ادهم: مفيش
ليلي: ادهم بجد بقي ايه اللي ضايقك اول ما شفت زيزو
ادهم: زيزو؟ هو بقي زيزو
ليليلي : اهم وبعدين ده واد اجنبيه بعنيه الرمادي دي وشعره الدهبي ده هو انت كان عندك حد مز كده في عيلتك؟
ادهم: اه كان عندي...... ابويا يا ليلي
زياد نسخه منه نفس العنين نفس الشعر نفس الملامح
ليلي: ادهم انا اسفه
ادهم: اسفه علي ايه؟ هو ده حاجه بايدنا
ليلي: علشان كده اتضايقت انه شبه ابوك
ادهم: لا مش كده،،،
ليلي: امال ايه بقي؟
ادهم: وانتي حامل اديت عذر لابويا لان ممكن اب يكره ابنه وممكن يكون فعلا في سبب وبعد ما ولدتي وانا شفت زياد وحبيته شلت العذر ده وعرفت ان مفيش اب بيكره ابنه،،، مره واحده بس يشيله فيها كفيله بانها تخليه يحبه واقتنعت ساعتها ان انا مش ابنه ونوعا ما ده ريحيني نفسيا انه مش ابويا....
ودلوقتي الاقي ابني نسخه منه يبقي كده انا ابنه طيب بيكرهني ليه؟؟ هتجنن يا ليلي من كتر التفكير هتجنن
ليلي شدته في حضنها
ليلي: كفايه يا ادهم تفكير في الموضوع ده والماضي سيبه في حاله بقي بطل تنبش فيه
خلينا نعيش في بيتنا الصغير الجميل دلوقتي بقينا عيله واحمد ربنا وارمي الهم ده بعيد
اخد ادهم مراته وابنه بيته وبتعدي الايام جميله حلوه وابنهم بيكبر واحده واحده بينهم
فاتت سنه في سعاده وحب ولعب وضحك
وفي يوم وهما نايمين جنب بعض
ليلي: ادهم نمت؟؟
ادهم: لا لسه
ليلي: هو انت مبسوط معايا؟
ادهم: اكيد بس ليه بتسالي السؤال ده؟
ليلي: اصل انت بطلت تقولي بحبك
ادهم: انا؟؟؟ انا بطلت اقولهالك؟؟؟
ليلي: ايوه افتكر كده اخر مره قولتها امتي؟ بقيت بتيجي تلعب مع ابنك شويه وبتهملني انا خالص ركنتيني على الرف
ادهم عدل نفسه وبصلها وساند علي كوعه وقرب منها وبيلعب في شعرها وجه فوقها وباسها وكل كلمه بيقولها بيبوسها
ادهم: امال لما بصحي الصبح وابوسك قبل ما انزل بيبقي معناه ايه؟؟؟ ولما ارجع اخدك في حضني ده ايه؟؟ وقبل ما انزل تاني بضمك ده ايه؟ واول ما ارجع بالليل وارمي نفسي في حضنك وانام معاكي ده ايه؟؟؟ ولما اصحي تاني وافضل احفر ملامحك جوايا ده ايه؟
ليلي: ماشي بتحبني بس عايزه اسمعها من فتره للتانيه
ادهم: وطالما حاساها وعيشاها يبقي لازمتها ايه؟
ليلي: مهمه بالنسبالي
ادهم: طيب يا ستي هبقي اقولها
ليلي: طيب قولها
ادهم: ايه قولها قولها دي ماشي يا ستي بحبك
ليلي: لا ما تقولهاش كده ملهاش طعم
ادهم: ما ترسيلك علي بر قولها لا متقولهاش
ليلي: ملهاش طعم كده
ادهم: طبعا لازم يكون ملهاش طعم لانها ما بتتقالش كده اعملك ايه بقي؟
ليلي: يوووه تصبح علي خير
تاني يوم ادهم اخر النهار اتصل بيها
ادهم: ليلي حبيبي جهزي نفسك هنخرج نتعشي بره اوك قدامك ساعه واجيلك
ليلي: بجد اوك هجهز انا وزيزو
ادهم: لا يا قلبي انا وانتي وبس مرات عمي فتحي البواب هتاخد بالها من زيزو وهو كده كده هيبقي نايم هنسهر انا وانتي وبس
ليلي: اتفقنا البس ايه بقي؟ هنروح فين يعني
ادهم: افتحي دولابي كده
ليلي: دولابك؟؟؟ ثواني ____ فتحته اهوه
ادهم: في كيس من تحت كبير افتحيه
ليلي: اه جواه علبه ثواني ___ ايه ده؟ الفستان ده ليا
ادهم: اكيد ليك هيكون لمين يعني؟ اجهزي ساعه وهبقي عندك
ليلي جهزت ولبست الفستان كان طويل ومفتوح شويه وكانت زي الاميره حطت ميك اب واكتشفت انها بقالها فتره ما اهتمتش بنفسها
ادهم اتصل بيها وقالها انه تحت تنزل
نزلت وهيا نازله من السلالم العماره وهو ساند علي عربيته لابس بدله وشكله تحفه وهيا نازله زي الاميره بفستانها الطويل
قابلها وعطاها وره حمرا وباسها فتحلها باب العربيه وركبها واخدها للمكان اللي هيسهروا فيه
اتفاجئت ليلي بيخت كبير علي النيل مسك ايديها ودخلها
المكان كان فوق خرافه الانوار والشموع والورد كان اشبه بالحلم
ليلي: ايه كل ده؟
ادهم: ده علشان يليق بالاميره بتاعتي تعالي نرقص
رقصوا علي مزيكا سلو
ادهم: اوعي تتهميني تاني اني بطلت احبك او حبك قل جوايا انا بعشقك مش بحبك
ادهم بيتكلم بهمس في ودانها وهو ضاممها
ليلي: وانا كمان يا ادهم مش عارفه من غيرك كنت عايشه ازاي اصلا، عارف نفسي في ايه؟
ادهم: شاوري بس
شالت ايديها من حوالين رقبته ومسك وشه بايديها الاتنين وبصتله في عنيه
ليلي: نفسي اشبع منك.... نفسي تبطل توحشني كده ادهم حتي وانت معايا واحشني... نفسي ابقي زي باقي الستات اوصل لمرحله ان عادي لما انت تخرج
انت بتخرج الصبح بتشعبط فيك ولما بترجع الظهر يدوب تتغدي وحبه وتنزل وبالليل يدوب تقعد معانا شويه واليوم خلص علي طول واحشني مش عارفه اكتفي منك
ادهم: طيب وده شيئ كويس ان احنا علي طول في شوق ولهفه بينا
ليلي: بس بتوجع عايزاك تفضل ولو حتي شويه بلاش شغل
ادهم: ونعيش منين
ليلي: انت معاك فلوس
ادهم: ده مين ضحك عليكي وقالك كده؟ كان معايا واخده بالك من كان دي
ليلي: وبعدين؟
ادهم: انتي ناسيه مصاريف حملك والمستشفي اللي كنتي عايشه فيها ولا مصاريف الولاده وكله كوم والحضانه اللي ابنك فضل فيها كوم تاني انتي عارفه ان الليله الواحدة في الحضانه كانت 2000 جنيه ابنك فضل تقريبا شهر ونص فيها
انا خرجت من الموضوع ده تقريبا مفلس
ويمكن ده اللي خلاني اوافق تسافري عند باباكي ومن ساعتها انا مضغوط في الشغل
ليلي: ماشي بس برضه ده ما يمنعش انك تقعد معانا شويه
سهروا وقضوا ليله حب وفاجئها ادهم باسبوع اجازه اخدهم وسافروا فيه هما التلاته
بتعدي سنه كمان زياد بقي عمره فوق السنتين
ليلي: ادهم ايه رايك نخلف تاني؟ ؟
ادهم: انتي بتتكلمي جد ولا بتهزري
لي: لا مش بهزر انا حامل يا ادهم
للمتابعه اترك تعليق
الحلقه الرابعه عشر من الجزء الثاني
المشوة
بتعدي سنه كمان زياد بقي عمره فوق السنتين
ليلي: ادهم ايه رايك نخلف تاني؟ ؟
ادهم: انتي بتتكلمي جد ولا بتهزري
ليليلي : لا مش بهزر انا حامل يا ادهم
ادهم: انتي بتستعبطي بقي اوعي تتخيلي للحظه اني هعيش الفتره اللي فاتت دي تاني؟ هو انتي ايه ما بتتعبيش كل ما تعدي علينا فتره كويسه تخترعي حاجه تنغص علينا عيشتنا كفايه بقي
ليلي: بس الحمل حصل غصب عني ويدوب عارفه
ادهم: طيب خلاص هنروح النهارده ننزله
ليلي: بس يا ادهم
ادهم: كلمه زياده واقسم بالله هطلقك ومش هتعرفيلي طريق تاني والمره دي يا ليلي من غير رجعه فاهمه؟؟؟
سكتت وما ردتش عليه وهو اخدها للدكتور بتاعهم وكشف عليها كشف شامل وقعدوا تاني قدامه
ادهم: هاه هنعمل الاجهاض امتي؟
الدكتور: انتو مش عايزين البيبي ده؟ ؟
ادهم: انا مش عايز اعيش فتره الحمل اللي فاتت دي تاني
الدكتور: مفهوم بس يا ادهم الحمل طبيعي وكل الامور طبيعيه
ادهم: يعني ايه؟
الدكتور: يعني الله اعلم ايه اللي حصل او حصل حمل ازاي بس حاليا كل امور مراتك طبيعيه والحمل مفيهوش اي مشكله تستدعي الاجهاض بس في الاول والاخر ده شيئ يرجعلكم
ادهم: يعني مفيش خطر علي حياتها
الدكتور: الخطر العادي اللي بتواجهه اي ست في حملها لكن مفيش حاجه تستدعي القلق
ادهم: انت شفت الحمل اللي فات حاليا رايك ايه؟
الدكتور: رايي انكم تتكلو علي الله وتجيبوا لابنكم اخ او اخت
ادهم اخد مراته ومشي وهيا في حاله فرحه ملهاش اول من اخر وهو في حاله قلق وخوف
ليلي: ادهم افرح بقي وبطل خوف
ادهم: هفرح لما تقومي بالسلامه
ليلي: هجيب المره دي بنوته شبهك
ادهم: شبهي انا حرام عليكي
ليلي: وليه بقي ده انت مز
ادهم: انا مز الظاهر ان احنا محتاجين نروح لدكتور عيون
ليلي: علي فكره بقي انت لو تجاهلت الجرح اللي في وشك وده هتلاقي نفيك مز مز يعني
ادهم: ماشي يا عم
بتعدي ايام الحمل وادهم وليلي عايشين الحمل ده بحب وترقب ولهفه
وزياد معاهم متشوق للاخت الصغيره اللي هتيجي دي
واخيرا ليلي ولدت وجابت بنوته حلوه جميله هاديه ناعمه
ادهم مع ليلي بعد ما ولدت وابوها وامها موجوين وجابولهم البيبي يشوفوه
واول ما ادهم شافها ابتسم
ادهم: انتي بجد مستقصداني
ليلي: مستقصداك ليه اوعب تقول انها شبه باباك بس لو شبه حتبقي حلوه
ادهم: لا المره دي شبه امي مش ابويا
ليلي: وده مضايقك؟؟؟
ادهم: لا يا ليلي مش مضايقني
ليلي: هتسميها ايه؟
ادهم: آيه
ليلي: اتفقنا آيه
كبرت ايه وزياد وسط جو مليان حب وتفاهم وبقم عليه صغيره وجميله
النهايه
اتمني انها تكون عجبتكم
ههههه بضحك عليكم مش النهايه اكيد
ليلي جوزها مشغول عنها شويه في مهمه جديده واخده كل تركيزه
بنتها عندها سنتين وابنها عنده اربع سنين
ليلي: ادهم انا محتجالك انا عايزه اخرج انا والعيال زهقت من القعده في البيت
ادهم: اخرجي يا ليلي جبتلك عربيه وعملك استراك في النادي علشان تخرجي انتي والعيال وقت ما تحبي واسف يا قلبي بس بجد الفتره دي صعبه عليا انا كمان اخلص بس المهمه دي وافضالكم اتفقنا يا قلبي
ليلي: طيب تعالي نتغدي بره النهارده
ادهم: اتفقنا اسبقيني علي النادي وانا هجيلكم هناك اتفقنا يا قمر
ليلي: اتفقنا حبيبي بس ما تتاخرش
باسها وخارج بنوته جريت واتشعبطت في رقبته ومش عايزه تسيبه
ادهم: اخلص من امك تطلعيلي انتي ___ ليلي
ليلي: ماليش دعوه اتصرف معاها انت بتنزل قبل ما يصحو وترجع بعد ما بيناموا وانت واحشهم
ادهم: بقي المعامله كده ماشي.... بصي يا قمر بابي عنده شغل وماما هتاخدكم وتروح النادي وانا بسرعه بسرعه هاجي
آيه: معاك
ادهم: يا يا بنبونايه مش هينفع تيجيمعايا انا هاجي
آيه بتعيط
ادهم: ليلي بقي اتاخرت ومش عايز اسيبها بتعيط
ليلي: يوكا بابي هيروح يجيب شيكولاته ليوكا العسل ويجي النادي نلعب كلنا احنا هنلبس وهو هيجي اوك يا جميله مامي
آيه: ابس دوقتي
ليلي: اه ابس دلوقتي يالا
اخيرا سابته ويدوب بيقول لزياد باي مردس عليه
ادهم: زوزا باي
زياد: لا انا زعلان
ادهم: لا انتو اتفقتوا عليا كلكم النهارده لما ارجعلك بقي اشوف الموضوع ده
زياد ومردش بس وهو ماشي قال كلمه واحده وقفت ابوه مكانه
زياد: انت مبتحبنيش
ادهم اتسمر مكانه لان ده اخر شيئ عايز يسمعه من ابنه او يحسسهوله رجعله وقعد قدامه
ادهم: انت ليه بتقول كده؟
زياد: علشان انت ما بتحبنيش انت بتحب يوكا بتاعتك بس.... بتشيلها بتلعبها بتنام في حضنك بتضحك معاها لكن انا مابتحبنيش
ادهم افتكر كل لحظه عاشها مع ابوه وكان حاسس بحب ابوه لاخوه لكن هو لا واستغرب هو ممكن فعلا يكون وصل ابنه لنفس احساسه
اخده في حضنه
ادهم: لا زياد انا بحبك انت اكتر من اي حد في الدنيا دي كلها انت اول فرحتي انت كل حاجه في حياتي وبحبك انت واختك زي بعض
الفرق بس ان هيا لسه صغيره فبشيلها علشان ما توقعش لكن الحب انت زيها ويمكن اكتر شويه انت عمرك طلبت مني حاجه وانا معملتهالكش
زياد: لا بتعملي
ادهم: انت لازم تبقي متاكد من حب بابا وماما ليك ديما علي طول
زياد :يعني انت بتحبني؟
ادهم: طبعا واكتر من اي حاجه في الدنيا فهمت
زياد: طب مش بتلعب معايا ليه؟
ادهم: انت عارف شغلي والفتره دي مشغول افوق بس منها وهنسافر انا وانت ومامي ويوكا نقضي فتره كلها لعب وبس اتفقنا
زياد: ده وعد؟
ادهم: وعد
باسه وقام وليلي وقفت معاه على الباب
ادهم: انتي ليه سيباه يفكر كده؟
ليلي: اولا اول مره يتكلم كده وبعدين يا ادهم انت فعلا مشغول عننا تماما
ادهم: غصب عني يا ليلي والمفروض انتي اكتر واحده تفهمي ده والمفروض تبرري غيابي للعيال مش تسيبهم يفتكروا ان انا مش بحبهم
ليلي: حاضر يا ادهم بس انا كمان زيهم عايزه حبك
ادهم: وحبي موجود ديما انا همشي دلوقتي وزي ما قلت لزياد تخلص بس مهمتي دي ونسافر نغير جو
سابها ومشي وهيا نزلت النادي تلعب هيا والعيال
وقت الغدا قعدت واستنت ادهم اتصل بيها وقالها انه هبتاخر شويه وانها تاكل العيال
قاعده علي الترابيزه وايه علي حجرها وزياد عايزها تاكله وهيا مش عارفه تعمل ايه؟
فجأه جاتلها واحده
فجأه جاتلها واحده شكلها مريح
# تحبي اساعدك؟
ليلي: متشكره مش عايزه اتعب حضرتك
# لا مش تعب بالعكس دي حاجه تفرحني
ليلي: مش هقولك لأاتفضلي
# انا اسمي حنان
ليلي: وانا ليلي والقرده دي آيه والواد ده
قاطعها: انا زياد
حنان: اهلا بزياد باشا اهلا آيه السكره ممكن اشيلها؟ وانتي ساعدي زياد
ليلي: كان المفروض جوزي يجي بس اتاخر كالعاده
حنان: وانا برضه مستنيه جوزي بصره نيتني مع بعض
اكلوا العيال وانبسطواوليلي اخدت عليها جدا حتي العيال حبوها قوي وشويه كده
ليلي: في واحد كده طويل عريض شبه حسين فهمي كده بيتلفت وبيبص ناحيتنا ليكون جوزك؟؟؟
حنان: حسين فهمى مره واحده ( بصت ناحيته وشاورتله) هو فعلا جوزي بس حسين فهمي؟؟ هو علي فكره اسمه حسين
ليلي ضحكت: مش قولتلك
حنان: اتفضل يا حسين اعرفك دي ليلي كانت قاعده مستنيه جوزها واتاخر وكانت محتاجه مساعدة مع العيال وانا قلت اتسلي معاها لحد ما حضرتك تيجي
حسين: اهلا بيكي بس انا ما اتاخرتش يعني
حنان: لا ابدا دي هيا ساعه بس
حسين: بجد محسيتش بيها ابدا وبعدين الشغل حنان: من ساعه يا بنتي ما رجعنا من السفر وهو الشغل الشغل علي طول شغل
زياد: بابا برضه علي طول شغل كده
حسين: اهلا اهلا بالعسل ده انت اسمك ايه بقي؟
زياد: انا اسمي زياد ودي اختي آيه
حسين: اهلا بزياد واخت زياد
ليلي: لو عايزين تقعدوا لوحدكم اتفضلوا انا مش هعطلكم
حسين: لا لا نتغدي كلنا مع بعض ولا احنا متطفلين عليكي
ليلي: لا ابدا بالعكس
حسين: تعال هنا ياسي زياد قولي بقي
فضل يتكلم معاه ويدردش معاه وحنان شايله آيه وبتلعبها
وعدي الوقت وادهم مجاش وليلي قامت تروح
حسين: تعالي معانا نوصلك
ليلي: لا لا معايا عربيتي وبعدين انا ساكنه قريب من هنا
وصفتلهم عنوانها واتفقت هيا وحنان يتقابلو كل يوم هنافي النادي
روحت وبعد خناقه طويله مع جوزها ومحاولته يصالحها بتحكيله عن يومها
ادهم: اسمها ايه بقي البنت دي
ليلي: مش بنت دي ست كبيره واسمها حنان وجوزها اسمه
تليفونه رن وقام رد واضطر ينزل من البيت بسرعه
ليلي: وكالعاده انت مشغول
كل يوم ليلي بتتقابل مع حنان حتي حسين بيجي مخصوص يتغدي معاهم ويلعب مع زياد
وفي يوم وهو شايله عدي حد من اصحابه
@ حسين اول مره اشوف حفيدك اسمه ايه؟
حسين: حفيدي؟؟؟ لا ده مش حفيدي
@ اسف اصلي شفتك شايله مع الشبه اللي بينكم ده حتي المدام البنت اللي هيا شيلاها شبهها فقلت انهم احفادكم اسف لو ضايقتك
حنان: عنده حق صاحبك زياد شبهك قوي
ليلي: وايه شبهك انتيهو انتو مش عندكم اولاد واسفه لو بتدخل
حنان: لا يا حبيبتي عندنا ولد واحد وقبل كده كان عندي ولد وبنت كمان بس اتوفوا
ليلي: انا اسفه جدا ومفيش احفاد
حسين: ربنا مش رايد ومراتي مقتنعه ان ده عقاب من ربنا ليا
حنان: ربنا بقي هو اللي عالم بكل شيئ
ليلي: ليه بس كده حضرتك انسان كويس جدا واستحاله انك تكون عملت شيئ ممكن ربنا يعاقبك عليه
حسين: قوليلها والنبي
حنان: ولا تقولي ولا اقولها اقفلوا بقي الموضوع ده
حسين: المهم صح يا ليلي احنا عاملين حفله كبيره هنا في النادي عايزينك تيجي وجوزك يجي حتي نتعرف علي الظابط الغامض ده
حنان: اه يا ليلي محتاجاكي معايا تساعديني واهو صح نتعرف علي جوزك
ليلي: انا معنديش مانع وهو لو فاضي مش هيتاخر ربنا يسهل هقوله
ليلي قالت لادهم وهو وعدها انه هيحاول يفضي نفسه ويجي
ليلي راحت البيت عند حنان وبتساعدها للحفله وجوزها فضي نفسه من الشغل علشان بس يلعب مع العيال
وهما قاعدين دخل عليهم واحد
# ماما فين بابا
حنان: هناك اهو ___ ليلي ده احمد ابني
ليلي: اهلا وسهلا
احمد: اهلا بحضرتك دول عيالك اللي مخلين بابا اراجوز كده
احمد بص لابوه بصه طويله وبص للعيال نظره كره وحقد راح ناحية ابوه
احمد: من امتي انت بتلعب كده؟ كان نفسك يكون عندك احفاد صح وتلاقيك ندمت علي ابنك التاني؟؟
حسين: انا معنديش عيال تانيه المهم عملت ايه؟
اتكلموا في الشغل والعيال كل شويه يجوا يشدوا فيه
آيه: دادو يالا
احمد: دادو؟؟؟ هو انت بقيت دادو
حسين: عندك مانع؟؟
احمد: وانا مالي دادو دادو انت حر
قام يمشي بس كان شكله تعبان
حسين: هو انت لسه تعبان؟؟ مكشفتش ليه؟
حاول تبطل شرب بقي شويه
احمد: ربنا يسهل ما تشغلش بالك انت
حسين: ولو مش هشغل بالي بيك هشغله بمين
احمد: باللي بيقولولك دادو روحلهم
سابه ومشي وليلي كمان اهدت عيالها ومشيت حسين: كانوا عاملين حس في البيت
حنان: اكيد بس غريبه انك اتعلقت بيهم كده.
حسين: في حاجه فيهم شداني ليهم
حنان: ده بس علشان تشوف انت محروم من ايه؟
حسين: هو انتي ليه ديما بتحاولي تجرحيني؟؟
حنان: هو ده كده جرح؟؟؟ امال اللي انت عملته فيا كان اسمه ايه؟ انت حرمتني من ابني وحرمت نفسك منه ويمكن يكون عندك احفاد دلوقتي انت حارم نفسك منهم
حسين: احفاد منه مش عايزهم لانه هو مش ابني ولالف سنه هقول مش ابني
حنان: وانا بقول ان الايام هتثبتلك ومش عارفه انت هيجرالك ايه تاني اكتر من كده علشان تحس
حسين ؛ افضلي اشمتي فيا كده
حنان: هشمت في ايه؟ في ابني اللي راح مني ولا بنتي اللي ماتت
سابته ومشين
ليلي بتكلم ادهم وبتحكيله كل حاجه
ادهم: اخدت اجازه بكره علسان اروح معاكي الحفله واتعرف علي حنان ودادو ده
اللي كلكم بتموتو فيه
ليلي: دادو ده شخصيه كده عسله راجل لذيذ قوي
ادهم: ما تحترمي نفسك يا بت ايه راجل لذيذ دي
ليلي: ههههه انت بتغير
ادهم: اه اه بغير عندك مانع
ليلي ضحكت وقامت وبتمشي علي ايديها وركبها زي القطه وبتقرب عليه
ليلي: لا معنديش مانع
ادهم: انتي بتقربي كده ليه انا بحذركده نتيجته مش كويسه
ليلي قربت وبتبوسه في رقبته
ليلي: وريني النتيجه اللي مش كويسه دي
ادهم: هو العيال فين؟
ليلي: نايمين
ادهم: طب مش تقولي من بدري
(نسيبهم بقي في حالهم بطلوا تطفل)
.طلع النهار وليلي استعدت هيا والعيال وادهم وراحو النادي يحضروا الحفله وهما في الطريق ادهم جاله تليفون فبص لمراته
ليلي: لأ لأ مش هتعتذر
ادهم: ساعه بس وهاجي بجد
ليلي: لا يا ادهم انت بتقول كده ومش بتيجي
ادهم: ده يدوب ملف بس علي الكمبيوتر بتاعي في المكتب وهما محتاجينه ولا اكتر ولا اقل
ليلي: ما اي حد تقوله ياخده
ادهم: لا طبعا ما ينفعش حد يفتح جهازي عليه اسرار شغل ماينفعش ساعه بالكتير
ليلي: ساعه
ادهم: وحياتك انتي ساعه، هنزلك واروح واجيلكم
نزلها ومشي وهيا دخلت بالعيال واول ما حسين شافهم جري شالهم
حسين: ما تقوليش جوزك مش جاي؟؟
ليلي: جاي ساعه بالكتير وجاي علي طول
حسين: جوزك ده بيفكرني بنفسي وانا شباب زيه تعالي
دخلت واندمجت في الجو
احمد: يا اهلا
ليلي ما حبتش احمد ده نهائي
ليلي: اهلا بعد اذنك هشوف حنان فين
احمد: استني هو انتي ناويه علي ايه بالظبط؟
ليلي: ناويه علي ايه في ايه؟
احمد: اعملي عبيطه بقي افهمك،،، قولتي اتنين كبار وهبل خليني استغل حبهم للعيال ومين عارف
ليلي: اخرس انا ما اسمحلكش
احمد: تسمحي ولا ما تسمحيش بس احب اقولك انا سبق وخلصت من اخويا علشان ما بحبش شريك فمش هيكون صعب اخلص منك
هنا جت حنان اللي لاحظت ان ليلي متضايقه
حنان: ليلي بدور عليكي تعالي
اخدتها ومشيت
حنان: اهدي كده مالك
ليلي: ابنك بيقول كلام غريب
حنان: سيبك منه خالص ومن كلامه انسيه وما تركزيش في اي كلمه يقولها اتفقنا جوزك مش هيجي ولا ايه
ليلي اتصلت بيه
ليلي: هو هنا داخل اهوه ثواني هروح اجيبه
حنان: روحي حبيبتي
ليلي قابلت ادهم وباسها وداخل بيها
ادهم: فين العيال
ليلي بتشاورله عليهم
ليلي: آيه هناك اهي حنان شايلاها وزياد اهو راكب علي رقبته دادو
ادهم: دادو تاني
ليلي: عايز ايه بقي؟
ادهم: عايز زي ليله امبارح
ليلي: وقته ده؟
ادهم: ماهو العيال نسيبهم مع دادو ونروح انا وانتي نقول كلمتين
ليلي: اغراء بس لأ الناس مستنينك من بدري اجل الكلمتين بس خليك فاكرهم
ادهم: وهو انا عمري نسيت
داخلين الاتنين ايديهم في ايدين بعض بيضحكوا
حنان لمحتهم من بعيد قلبها كان هيقف وبصت لآيه اللي في حضنها وبصت لحسين جوزها وزياد شايله
ادهم قرب مع ليلي اكتر وواقف وري حسين
ليلي: دادو احب اعرفك بادهم جوزي
حسين لف وشه بابتسامه عريضه
حسين: اخيرا
وقطع الكلمه اول ما شافه وادهم كمان ملامحه كلها اتجمدت وبص ناحيه آيه
آيه: بابي
الكل اتجمد وبيبص لبعض وليلي محتاره هما مالهم في ايه؟
احمد من بعيد واقف بيتفرج
احمد: اهو ده اللي معملتش حسابه شكلها هتولع
للمتابعه اترك تعليق
اعمل متابعه هنا👈 اضغط هناااااااا👉عشان يوصلكم كل الاجزاء الباقيه هتوصل للمتابعين فقط
تعليقات
إرسال تعليق