 |
الحلقة الخامسة
المشوة
صبري اتنرفز قوي من سكوته ده وراح ضاربه بالقلم لدرجه ان ادهم كان هيوقع من قوته
صبري: اطلع بره بيتي بره
وهنا فاق ادهم علي الباب بيخبط قام جري ده معاد ليلي اخيرا رجعتله تاني واكيد هيكون عندها سبب لبعدها
فتح الباب بس اتفاجئ بواحدة اول مره يشوفها
كان فاتح بتيشيرت نص كم واول ما فتح البنت اتخضت من شكله وخصوصا الجرح اللي بطول دراعه كلها لحد كف ايده وتنحت عليه
ورجعت لورا خطوتين
ادهم لاحظ نظرتها فخبي ايديه وطبقهم علي صدره
ادهم: افندم حضرتك مين؟؟؟
البنت: انا... انا......
ادهم: انتي نسيتي اسمك؟؟
اابنت: لا انا اسمي مني وليلي بعتتني
طاقه امل اهي من طرفها واكيد هتبلغه رساله
ادهم: خير في حاجه حصلت؟؟؟
مني: لا ابدا خير بس هيا بعتالك الفطار ده
ادهم اتصدم فطار ايه؟ هو مش مستني فطار
ادهم: افندم،؟؟ فطار؟؟ بس مبلغتكيش اي حاجه تانيه؟؟
مني: لا. هو في حاجه المفروض تبلغهالي؟؟
ادهم: لا ابدا بس بلغيها اني متشكر علي اهتمامها وشكرا مش محتاج فطارها بعد اذنك علشان ورايا شغل
قفل ادهم الباب وقعد علي سريره وحط راسه بين ايديه
عقله: مش قلتلك دي نزوه وهتعدي استفدت ايه بقي
قلبه: يمكن يكون عندها عذر؟؟
عقله: تاني انت مش بتحرم ابدا وكان ايه عذر امك اللي محبتكش ولا عذر ابوك اللي شوهك وطردك في الشارع ولا اخوك اللي عمره ما اعتبرك في يوم اخ هتفضل تحط اعذار للناس كده ويجرحوك وبرضه مش بتحرم
مالها وحدتنا ما احنا خلاص اتعودنا عليها
ادهم: الظاهر ان الوحده عمرها. ما هتفارقني ابدا. ليه يا ليلي كده ما انا كنت في حالي تعشميني وتسيبيني بس ارجع واقول انا اللي غلطان انا اللي سمحتلها تدخل حياتي
عدي يوم واتنين وتالت يوم ادهم بابه خبط الصبح بدري فتح واتفاجأ بليلي علي بابه
ليلي: ازيك اخبارك ايه؟
ادهم: وتهمك في ايه اخباري؟؟
ليلي: عندك حق بس مش وقته، قابلني العصر الساعه 5 عند المنتزه اللي في المدينه وانا هفهمك كل حاجه هستناك
ولسه هتمشي
ادهم: مش هاجي فمتروحيش
ليلي: ارجوك اديني فرصه اشرحلك ولو كلامي معجبكش امشي هستناك انا لازم امشي بسرعه
سابته وجريت في حاله مش عارف يحددها
يروح ولا لأ؟ لا مش لازم يروح احنا لسه علي البر ابعد عنها وانت قادر تبعد
خلاص مش هروح
والساعه 5 بالدقيقه ادهم كان واقف علي باب المنتزه وهو بيقدم رجل ويأخر رجل ودخل شافها مستنياه
ايه في الجمال شعرها طويل والهوا بيطيره
جسمها جميل مفيهوش غلطه كلها علي بعضها حلم اي حد
ادهم: انت جاي ليه؟ فوق بقي انت مره واحده عايز تدخل الجنه؟؟ طب تيجي ازاي ومين هيسمحلك؟
ولسه هيمشي لمحته وندهت عليه
ليلي: ادهم انا هنا
راح ناحيتها ووقف قصادها لابس نظاره شمس واكله معظم وشه ورافع ياقه القميص تغطي جزءمن وشه وحاطط زنط علي راسه
ليلي: تعال بس الاول بعيد عن الباب
شدته من ايده وسحبته وراها
هو مستغرب هو ليه مغيب كده معاها؟ وليه ما بيعترضش او يقول اي حاجه؟ بيسبها هيا تتحكم في كل شيئ
دخلو وقعدو في مكان هادي
ليلي: انت متخفي كده ليه؟
ادهم: مش متخفي
ليلي: طيب عايزه اشوفك
قربت منه وشالت الزنط ونزلت ياقه قميصه واخدت النظاره من علي وشه وهو ولا عارف ينطق اصلا
ليلي: كده احلي
ادهم: احلي؟؟؟ انت اكيد مش طبيعيه يا اما نظرك ضعيف جدا
ليلي: ليه بقي؟ انا علي فكره نظري سته علي سته
ادهم: مش باين
ليلي: كل ده علشان الكام جرح اللي في وشك وايه يعني؟
ادهم باستغراب: كام جرح؟؟؟؟؟هههههه
( ضحك ضحكه حزينه)
ليلي: مالك؟
ادهم: بسبب الكام جرح اللي انتي بتقولي عليهم انا اتطردت من بيتي وعشت في بيت تاني مع ناس مش طايقيني وفي كل لحظه بيوضحولي ده واخدت الثانويه منازل والامتحان كنت بقعد في مكان لوحدي علشان الطلبه اعترضوا علي وجودي
وحتي في الكليه عشت لوحدي عمر ما حد قرب مني او عرفني وده كله بسبب الكام جرح اللي انتي بتقولي عليهم
ليلي اتاثرت جدا بكلامه وكان نفسها في اللحظه دي تضمه وتقوله انها هتفضل جنبه بس هو يسمحلها
ادهم: المهم افندم عايزه ايه؟
ليلي: ايه عايزه ايه دي؟
ادهم: عايزاني اقولك ايه؟؟ مره واحده ظهرتي وبعدها اختفيتي
لأ وباعتالي صحبتك بفطار يا شيخه ملعون ابو الفطار علي اللي هياكله
ليلي: اهدي بس وبراحه اولا انا ما اختفتش
ادهم: اه كنتي بتيجي بس ما كنتش باخد بالي
ليلي بنرفزه: ماتهدي بقي وتسمع واسكت شويه،
ادهم: سكت اتفضلي
ليلي: في ناس شافوني اخر مره وانا معاك وماشيه من عندك وقالو لابويا
ادهم: بس خلاص ما تكمليش فهمت الباقي
بعد اذنك
ليلي: استني يا ادهم فهمت ايه؟ لو سمحت اسمعني للاخر
ادهم: اسمع ايه؟ هاه ان ابوكي منعك وان غصب عنك بعدتي ومش بايدك
ليلي: فعلا ده حصل
ادهم: طيب خلاص وانا معترضتش
ليلي: طيب ممكن اكمل كلامي وتسمع من غير ما تقاطعني لحد ما اخلص خالص لو سمحت
ادهم: قولي كل اللي عندك وانا سامعك بس ما تستنيش مني اي رد فعل
ليلي: مش هستني... المهم لما روحت ابويا سألني اذا كنت شفتك ولا لأ ولاني عمري ما كدبت عليه قلتله ايوه واني جيبتلك فطار كزا مره وانت رفضت وبعدها اخدته مني المهم هو سمعني لحد ما خلصت وبعدها انفجر فيا وقالي ما اقابلكش تاني لاي سبب وخلاني ما انزلش الشغل يومين وبعدها بقي يوديني بنفسه
ادهم: والنهارده قولتيله ايه وانت جايه تقابليني؟
ليلي: الحقيقه اني خارجه مع اصحابي اللي فعلا خرجت معاهم وهما بيشتروا شويه حاجات وهقابلهم ونروح مع بعض
ادهم: ودي الحقيقه؟؟؟ وكده ما كدبتيش؟؟؟
ليلي :طيب كنت عايزني اقوله ايه؟؟ اني جايه اقابلك؟؟؟
ادهم: ما اعرفش تقوليله ايه اللي اعرفه اني دي مش هتكون اخر كدبه لو فضلتي مصره علي صداقتنا وهو عمره ما هيتقبل حتي معرفتنا العابره ببعض
ليلي: وبعدين حلها ايه عندك؟
ادهم: انك تسمعي كلام ابوكي وتبعدي عني نهائي
ليلي: يا سلام وده حل؟؟؟
ادهم: ده الصح
ليلي: انت كده ليه؟ هو انا ما اعنيلكش اي حاجه نهائي؟؟؟ هتفضل ترخص فيا لحد امتي؟؟؟
ادهم: انا؟؟؟؟ انا برخصك؟؟؟؟ انا لو برخصك هقولك طنشي ابوكي وتعاليلي كل يوم لكن علشان انتي مش رخيصه فبقولك اسمعي كلامه وما تخسرهوش ابدا
ليلي: مش هخسره
ادهم: لو عاندتيه هتخسريه
ليلي: وانا مش هبعد عنك ومش هسمحلك تبعدني انا اكتر واحده في الدنيا بكره التضحيات في الحب بحس انها غباء اتنين يحبوا بعض ويضحو علشان بعض وقال ايه بيضحي علشان سعاده حبيبه ماهو حبيبه عمره ما هيكون مبسوط او سعيد من غيره
ادهم: ولا هيكون مبسوط مع حبيبه لو خسرتي ابوكي بسببي عمرك ما هتكوني مبسوطه معايا فاشتري ابوكي ورضاه
ليلي: ممكن مالكش دعوه بابويا ممكن تخلينا في حالنا دلوقتي وسيب ابويا
ادهم: انا مش موافقك ومش عارف ايه اللي في دماغك عايزه توصليله
ليلي: عايزه اوصلك انت كل ده مفهمتش يا ادهم عايزه اقرب اكتر
ادهم: وبعد ما تقربيلي هاه هتعملي ايه؟؟؟ فوقي بقي واختاري حد يناسبك
ليلي: ادهم انا...
قاطعها: انا سمعتك للاخر ودلوقتي بعد اذنك ارجعي لاصحابك ومتكدبيش علي ابوكي بسببي
سابها ومشي وهيا دموعها نزلت كانت متخيله انه هياخدها في حضنه ويضمها بس شكلها بتحلم كتير
راحت لاصحابها وروحوا وفي البيت مني فضلت معاها
مني: مش هتقوليلي مالك وزعلانه ليه؟؟
ليلي: مرضيش يسمعني او سمعني بس سابني
مني: طب كويس واحد فيكم بيفهم
ليلي: انتي بتقولي ايه؟ مني ادهم بالنسبالي بقي.....
مني: بقي ايه هاه؟ فوقي بقي
ليلي: انتي هتعملي زيه وتقوليلي فوقي
مني: لانه هو واقعي وشكلي كده هبدا احترمه
ليلي: انا بحبه يا مني بحبه
مني: انتي بس مهووسه بحاجه جديده وبكره تنسيه وتنسي اسمه اصلا
ليلي: تعرفيني من كام سنه؟ امتي كنت من النوع اللي بتهوس في حاجه او بتعلق بيها او بغير رايي بعد شويه؟؟؟؟
مني: عمرك
ليلي: بالظبط عمري. طول عمري ببقي عارفه عايزه ايه وانا عايزاه وبحبه ومعرفش ليه
لما ببصله مش بشوف الجروح دي بتبقي حاجه باهته كده بشوفه هوه ببقي نفسي ارمي نفسي في حضنه واقوله خليني ديما في حضنك ومتبعدنيش ابدا بس هو عمال يحسبها ابويا.. الناس.. الكل هيرفض
مني : هو اتعود يكون واقعي فبيتكلم بواقعيه
ليلي: وانا وراه ومش هسيبه غير لما يسلم
ادهم روح وعمال يلوم نفسه انه سابها ويرجع يقول لا كده صح وحرب جواه ملهاش اول من اخر واخيرا نام ورجع لكوابيسه
صبري اتنرفز قوي من سكوته ده وراح ضاربه بالقلم لدرجه ان ادهم كان هيوقع من قوته
صبري: اطلع بره بيتي بره
ولسه ادهم هيخرج بره البيت قابله مصطفي داخل
مصطفي: ايه رايح فين؟ هتخرج اخيرا هتخرج تعال وانا هخرجك
صبري: سيبه يا مصطفي يمشي
مصطفي: يمشي؟؟ يمشي فين؟؟؟ ادهم بصلي هنا
ادهم بصله
ادهم: خلاص مالوش لازمه الكلام
مصطفي: ايه الدم اللي في بقك ده؟؟
ادهم مسح الدم اللي نزل من قوة القلم واداله ظهره وهيكمل طريقه
مصطفي: مش هتمشي غير لما افهم في ايه
ساره: الباشا لقينا في اوضته دول
وورته المجلات
مصطفي مسكهم وعرف ان دول بتوعه
مصطفي: وبعدين ايه المشكله؟؟
صبري: يعني ايه ايه المشكله هاه؟ انا بيتي تدخله حاجات زي دي؟
مصطفي: وعلشان كده مديت ايدك عليه وضربته؟؟؟ مسالتش نفسك جابهم منين؟ امتي شوفته خرج بره البيت هاه؟ ولا امتي حد فيكم عطاله فلوس يشتري بيها حاجه؟ ردوا عليا
صبري سكت هو فعلا مفكرش كده نهائي
مصطفي: وانت يا سي ادهم ما اتكلمتش ليه؟
ادهم: كنت عايزني اقول ايه؟
مصطفي: تقول اللي حصل تقول ان انا اللي جبت المجلات دي وانهم بتوعي
صبري وساره اتفاجؤا
ساره: انت بس بتقول كده علشانه؟
مصطفى: ليه مشفتيش معايا مجلات زي دي وانا في سنه؟؟؟ ولا نسيتي
متبصليش كده يا بابا ايوه حاولت اخرجه يسهر معايا او اعرفه علي بنات بس هو رفض وفي الاخر جبتله المجلات دي علشان يحس انه شاب طبيعي ما ارتكبش جريمه يعني وبرضه رفض المجلات وانا سيبتهاله غصب عنه في اوضته
انا اسف يا ادهم علي المشكله اللي سببتهالك بس انت كان المفروض تدافع عن نفسك
ادهم: ادافع عن نفسي واتهمك انت؟ انت جميلك انت ووالدك عمري ما هنساه عايزني ارد الجميل باني أسوأ صورتك قدام باباك ومامتك؟ ده الصح؟ وبعدين حتي لو قلت هما كانوا هيصدقوني؟؟ هما مستنين مني غلطه علشان يطردوني وانا عارف ان وجودي مش مرغوب فيه فهفرض نفسي ليه؟؟
صبري: لا لا لا متقولش كده انت مش فارض نفسك انا اتبنيتك بارادتي محدش فرض عليا ده ولما اخدت القرار ده اخدته انا محدش عرف بيه لا مصطفي ولا مراتي وانا مسؤل عنك لحد ما تتخرج وتقف علي رجليك وسامحني اني اتهمتك سامحني انا اسف
ادهم: لا العفو حضرتك اكبر من انك تعتذرلي
صبري: طيب اطلع بقي اوضتك ولو سمحت ياريت تدافع عن حقك وطالما ليك حق خده متتنازلش عنه
صحي ادهم من ذكرياته اللي عايش فيها مش عارف يخرج منها زي ما تكون ذكرياته دوامه بلعاه ولا عارف يخرج ولا بيموت ويرتاح
تاني يوم اخر النهار وليلي خارجه من المدرسه من حصص التقويه اخر النهار لمحت ماكس ماشي ندهتله وهو راحلها
ليلي: وحشتني ياتري صاحبك فين؟؟؟
بصلها وانتبه
ليلي: انت فاهمني؟؟؟
الظاهر اني اتجننت وبتكلم مع بكلب
لو فاهمني خدني عند ادهم فاهم ادهم
هز الكلب ديله ومشي كام خطوه وبصلها
ليلي: ايه مش فاهمه انت هتاخدني؟؟
رجع الكلب ليها وشدها من هدومها
وهيا مشيت معاه
دخل وسط الشجر اترددت وخافت لانها جبانه جدا والنهار في اخره وشويه والشمس هتغيب افرض الكلب جري منها ترجع ازاي؟؟
وقفت متردده والكلب مستنيها وفي الاخر حسمت ترددها ومشيت وراه ومسكت ديله علشان ميبعدش عنها
واخيرا لمحته قاعد بعيد وساند علي شجره ومديها ظهره
ادهم: اخيرا ظهرت يا ماكس
ما اخدش باله من ليلي اللي وقفت مكانها تبصله من بعيد
واخيرا نطقت
ليلي: ديما بتختار مكان بعيد وتقعد فيه
ادهم اتفاجئ بصوتها وقام وقف وبصلها نظره طويله وبيفكر جديا يجري ياخدها في حضنه او يخطفها من البلد دي خالص واخيرا عرف ينطق
ادهم: انتي بتعملي ايه هنا؟
ليلي: وحشتني قلت اجي اشوفك فماكس جبني
ادهم: اممم وبعدين
ليلي: بس يا سيدي قلتله ما ينفعش الكلام ده بس هو اصر
ادهم ضحك وهيا ضحكت
ليلي: ايوه كده محدش واخد منها حاجه
ادهم رجع قعد مكانه وهيا جت وقعدت قصاده
ادهم: ولو حد شافك وقال لابوكي؟
ليلي: سيبك من ابويا دلوقتي
ادهم: وبعدين؟؟
ليلي: مكنتش اعرف انك جبان قوي كده؟
ادهم: جبا.... جبان ايه؟ انتي متخيله اني خايف من ابوكي او اهل البلد دي كلها؟ انا خايف عليكي انتي مش عايزك تتخانقي معاه او تزعلو من بعض بسببي
ليلي: ولو اتخانقنا بسببك فيها ايه؟؟
ادهم: مش عايز ده انتي متعرفيش قيمه الاب ومعشتيش من غيره فحاسه انه عادي انك تزعليه بس لو جربتي الحرمان مكنتيش قولتي كده
ليلي: عارفه يا ادهم قيمه الاب كويس بس ده ما يمنعش اني يكون ليا حياه خاصه
ادهم: اختاري حد مناسب ليكي
ليلي: القلب اللي بيختار مش احنا
قربت منه قوي ومسكت وشه باديها الاتنين
وهو قلبه كان هيقف من قربها ده
ليلي: ادهم حاول توقف عقلك شويه مش كل حاجه بتتحسب بالعقل فكر بده واديله فرصه يدق
حطت ايدها علي قلبه
ادهم: انا معنديش قلب علشان يدق
ليلي: بجد؟؟ هتاكد بنفسي
وحطت راسها علي صدره واخيرا جت اللحظه اللي بتتمناها واتمنت لو تفضل كده علي طول او هو يضمها باديه او هيا تلف ايديها حواليه بس حاليا اكتفت بكده وهو قلبه مش كان بيدق قلبه كان هيخرج من مكانه ومعرفش يتحكم في انفعالاته
ليلي: امم فعلا انت معندكش قلب خالص
ادهم: ليلي انا ما انفعش
ليلي: وليه متنفعش؟ ومتقولش ابوكي
ادهم: بعيد عن ابوكي انا معرفش اصلا يعني ايه حب وعمري ما حبيت ولا اتحبيت قبل كده وعايش في عزله انا راضي بيها لكن لو حبيت وجربت الحب وجربت الاهتمام من حد وبعدها ارجع لوحدتي تاني مش هستحملها لاني دوقت طعم الحب.. لكن قبل كده ايوه عارف اني مفتقد الحب في حياتي.. اي حب مش شرط حب حبيبه.. حب اب او ام او اخ او صاحب بس مجربتوش فمتحمل وحدتي وراضي بيها لكن لما اجرب واعرف طعمه مش هرضي بالوحده تاني وهتعذب فوق عذابي..
ليلي انا مش حمل رفاهيه الحب يارب تكوني فهمتيني
ليلي: فهماك بس ليه مفترض ان بعد الحب هترجع لوحدتك تاني هو انا مش كفايه عليك؟
ولا انت عندك استعداد تحب بس مش انا وانا فارضه نفسي عليك؟ ولا ايه يا ادهم؟؟
ادهم: تاني فارضه نفسك دي؟؟؟ ليلي انتي حلم معنديش الجراه اني احلمه افهمي
ليلي: ليه؟؟ انا اهو ماده ايديا الاتنين انت اللي رافض تمسكهم
ادهم: لاني زي الغريق اللي بيموت وخلاص تقبل موته ده بس فجاه تتمد له ايدين فتديله امل واول ما هيمد ايده هتختفي الايدين دي
ليلي: مش هتختفي امسك انت بس ايدي وانا مش هسيب ايدك ابدا
ادهم: همسكها وهتسيبيها وده شيئ اكيد
ليلي: بطل تاخد قراراتي نيابه عني لو سيبت ايدك يبقي انت اللى سيبتها مش انا...طول عمري ببقي عارفه عايزه ايه وواثقه منه وانا عايزاك انت وبس..لكن انت اللي خايف تقرب
ادهم: لانك هتكوني جرح جديد يتضاف وده شيئ انا واثق منه وهتكوني اكبر جرح في حياتي
ليلي: يعني ايه؟؟؟ عايزني ابعد عنك
ادهم: لا يا ليلي مش عايزك تبعدي عايزك تفضلي وعايز حاجات كتير بس مش ده المهم
ليلي: لا ده المهم عايزني ولا لأ؟؟
ادهم: عايزك
ليلي ابتسمت ومسكت ايده
ليلي: يبقي ما تسيبش ايدي واستحمل اي حاجه علشاني
ادهم: مش هسيبها
ليلي: الدنيا ليلت انا لازم اروح قوم بقي خرجني من هنا لاني جبانه جدا وبخاف من الظلمه موت ومن الشجر والحاجات دي بالليل
ادهم: بتخافي من الشجر ليه بالليل؟؟
ليلي: بسمع حاجات كتيره عن الاماكن دي بالليل مش حلوه
ادهم: وايه اللي مش حلو؟؟
ليلي: لا مش هنتكلم عن حاجات زي كده دلوقتي قوم روحني
قام ومشي قدامها خطوه يدوب
ليلي: ادهم امسك ايدي
ادهم: متخافيش يا ليلي انا معاكي
مسك ايدها ومشيت جنبه وهتموت من الخوف من الضلمه والشجر وكل حاجه حواليها متخيلاها اشباح وفي لحظه حاجه شبكت في شعرها فصرخت
ليلي: اه في حاجه مسكتني يا ادهم
ادهم: مفيش حاجه يا ليلي اهدي ده فرع شجره مش اكتر ليلي خايفه كده ليه؟؟
خبت راسها في صدره
ليلي: مش قلتلك جبانه انا عايزه امشي انا قدامك مش وراك
طلعها قدامه خافت اكتر
ليلي: لا برضه
ادهم حط ايده حواليها وضمها وخبي راسها في صدره ومشاها جنبه ومخبيه وشها وماكس ماشي جنبها لحد ما خرجوا من الجناين وهيا اتشاهدت
ادهم: للدرجادي
ليلي: واكتر
ادهم: انا مش هينفع امشي معاكي اكتر من كده
ليلي: لا طالما خرجنا من الضلمه الباقي عادى
ادهم: ماكس هيمشي وراكي لحد ما توصلي ماشي
ليلي: ماشي هشوفك بكره بس في النهار انا ممكن ازوغ من الشغل ساعه في النص كده
ادهم: مش عايز مشاكل
ليلي: يووووووه بص كل واحد يهتم باموره سيبني انا ادبر اموري وانت بس قولي هتكون فاضي ولا
ادهم: علشان خاطرك افضي
ليلي: خلاص ابعتلي ماكس ياخدني لعندك
ادهم: اتفقنا من عشره هيستناكي بره المدرسه
ليلي: ماشي خلي بالك من نفسك سلام
مشيت خطوتين ورجعت جري تاني
ادهم: ايه مالك؟
ليلي رمت نفسها في حضنه وضمته جامد بس المره دي هو كمان ضمها للحظات وبعدها بعدها عنه براحه
ادهم: احنا في النور وممكن اي حد يشوفنا
ليلي: مفيش فايده فيك سلام
ادهم: سلام
مشيت وسابته وهو قرر انه يكمل معاها مهما تكون النتيجة هو عارف انها حلم بس علي الاقل يبقى عنده الذكريات يعيش عليها
ادهم اول ما روح اتفاجئ بناس مستنياه واول ما شافوه
عم محمود: سيادتك كنت فين؟؟؟
قلب ادهم وقع ممكن يكون حد شافه مع ليلي؟؟ ممكن يسببلها مشاكل؟ طب يرد يقول ايه؟ ويدافع عنها ازاي
للمتابعه اترك تعليق
الحلقه السادسه
المشوه
ادهم رجع علي الكرفان وكان في انتظاره مجموعه من ضمنهم عم محمود ابو ليلي
عم محمود: انت كنت فين؟
ادهم ارتبك ومعرفش يرد وخاف علي ليلي
مدير الشرطه: واحنا هيهمنا في ايه هو كان فين؟
عم محمود: مش المفروض يكون علي طول موجود علشان لو حاجه حصلت ولا هو فاكر نفسه جاي يستجم هنا؟
ادهم: انا علي طول موجود وتليفوني معاكم وممكن تتصلو بيا اكيد مش هفضل هنا ال 24 ساعه ولا ايه؟
مدير الشرطه: المهم احنا اخيرا اقنعنا اهالي البنات اللي اتخطفو قبل كده انهم يتكلمو معاك ومن بكره هتقابلهم بس خلي بالك الموضوع ده حساس والكلام يكون بحساب كفايه اللي هما اتعرضوله
ادهم: خلاص مفيش مشكله وهخلي بالي في الكلام معاهم وبعدين انا عايز اي معلومات عن مكانهم فمش هتكلم خالص عن اغتصابهم او اي حاجه تجرح. بس الموضوع ده هيكون امتي؟
مدير الشرطه: بكره بإذن الله
ادهم: ايوه فهمت انه بكره بس بسال امتي؟
عم محمود: اي وقت ولا سيادتك وراك ايه غير شغلك؟؟؟؟
ادهم مسيطر علي اعصابه بالعافيه
ادهم: مش فاضي فتره الصبح عندك مانع يا عم محمود؟؟؟
محمود: انا مش عمك ومتقولش عمي انا ميشرفنيش اكون عم واحد زيك
الكل اتصدم من كلام عم محمود الجارح اللي من غير سبب بس عم محمود كان متضايق ان ادهم بيقبل فطار من بنته وانه وافق انها تجيله مكانه فكان عايز يعرفه حدوده
ادهم كمان اتصدم من كلامه دي تالت مره يسمع الجمله دي
اول مرة كان ابوه
تاني مره ابوه اللي اتبناه
تالت مره ابو حبيبته
ومش فاهم ايه الغلط اللي بيرتكبه في حقهم علشان يعاملوه كده
مدير الشرطه: معلش يا ابني هو مش يقصد احنا متاسفين
ادهم: ولا يقصد مش مهم انا قلتها من باب الاحترام مش اكتر مش قصدي انك تكون عمي بس الكل بيندهلك كده ما علينا المفروض اقول لحضرتك ايه؟؟
عم محمود: متقوليش متوجهليش كلام اصلا
كلامك يا مع العمده او مدير الشرطه
ادهم: خلاص المهم بكره هقابلكم وقت صلاه العصر واقابل الناس ودلوقتي بعد اذنكم
سابهم ومشي
عم محمود: قليل الذوق يمشي كده
العمده: والله انت اللي زودتها قوي معاه وكويس اصلا انه مستحملك ولسه قاعد في البلد
عم محمود: ياريته يغور من هنا انا اصلا مش طايقه ولا طايق شكله
مدير الشرطه: هو انت هتناسبه؟؟ هو هيقضي مهمته ويتكل علي الله وساعاتها هنكون مديونين له
عم محمود: شكله ولا هيعمل حاجه
مشيوا كلهم وبعد ما مشيوا طلع ادهم وماكس يتمشوا في البلد والكل بيشوفهم بيوسع خالص خوفا منهم الاتنين وادهم دماغه في ابو ليلي وعلاقته بليلي كان نفسه يواجهه ويقوله ان بنته بتحبه وسكت بالعافيه وبيفكر يروح لليلي ويعمل معاها كل اللي ممكن يتعمل بين شاب وبنت علشان بس يخلي ابوها يتلم وهو بيكلمه وفعلا قرر انه اول ما يشوف ليلي الصبح ميعملش حساب لا لاخلاق ولا لاي حد
طلع النهار وفعلا ماكس وقف استني ليلي واخدها لمكان ادهم مكان برضه وسط الجناين مقطوع واول ما شافها قلبه اتخطف
ليلي: صباح الخير
ادهم: صباح النور في اي مشاكل قابلتك؟؟
ليلي: لا ابدا، قدامي ساعه معاك
ادهم: ساعه بس؟؟
ليلي: كفايه عليك متبقاش طماع
ادهم: عمري ما كنت طماع تعالي نقعد
قعدوا تحت شجره علي الارض
ليلي: عملت ايه امبارح بعد ما سيبتك؟؟
ادهم: مفيش رجعت كان ابوكي والعمده والمدير مستنيني
ليلي: ومالك متضايق ليه؟؟؟
ادهم: ابوكي مش طايقني وامبارح تقريبا كنا هنشد مع بعض
ليلي: استحمله علشان خاطري هو بس يعرفك وكل حاجه هتتغير
ادهم: ههههههه يعرفني؟!؟! ابوكي عمره ما هيتغير من ناحيتي
ليلي: ليه بس بتقول كده؟؟؟
ادهم بص للارض وساكت
ادهم: امبارح ضايقني قوي وقالي مقولوش يا عمي وانه ميشرفوش إنه يكون عمي اتضايقت منه قوي لدرجه......
ليلي رفعت راسه علشان يبصلها ويكمل كلامه وقربت منه اكتر
ليلي: لدرجه ايه؟؟؟ كمل
ادهم: لدرجه اني فكرت اضايقه بيكي وانتقم منه باني
ليلي: بانك ايه؟؟؟ تغلط معايا مثلا وتحط راسه في الارض؟؟؟
ادهم: مثلا....
ليلي: ودلوقتي بتفكر ازاي؟؟؟ لسه عايز تعمل ده؟؟؟
ادهم: لو لسه عايز اعمله مكنتش هقولك ولا ايه؟؟ انا تعبت... تعبت من كل اللي بيحكم عليا من غير ما يعرفني.... اعرفوني الاول وبعدها احكموا.... ادوني فرصه
ادهم سكت واتنهد تنهيده طويله حزينه
ليلي: سيبك من الناس كلها هو انا مش كفايه عليك؟ اديني اهوه جنبك وبحبك وهفضل جنبك
ادهم مسك ايدها وباسها هيا حطت وشها في الارض.
ادهم: جنبي بس لحد امتي؟؟؟
ليلي: لحد ما تبعدني انت
ادهم: عمري ما هبعدك ابدا ابدا... ليلي انا ما صدقت لقيتك
ضمها جامد لحضنه وكأنه عايز يدخلها جواه وهيا استكانت بين ايديه وكأن ده مكانها الطبيعي حضنه كان اجمل حاجه حصلتلها
بعدت عنه براحه وبصتله بحب
كانت محرجه جدا فغيرت الجو والموضوع كله
ليلي: قولي بقي؟
ادهم تقبل تغيرها
ادهم: اقولك ايه؟
ليلي: انت خريج ايه؟؟
ادهم بابتسامه: اقتصاد منزلي
ليلي ضربته: انت بتتريق؟؟
ادهم: مقدم ادهم هكون خريج ايه يعني؟؟؟
ليلي: مش قصدي يا فصيح.. قصدي يعني شرطه حربيه اكادميه عسكريه ولا دخلت الجيش واستمريت ايه بالظبط؟؟؟
ادهم: امم اولا خريج الحربيه بيشتغل في الجيش بس وبتوع الاكادميات مبيوصلوش للمخابرات ابدا اما اللي في الجيش فده هيكون بيشتغل تبع الجيش اه بس في مجاله
ليلي: يجري ايه لو قلتلي شرطه وبس
ادهم ضحك: مش بفهمك الفرق بينهم اسف يا ستي انا خريج شرطه
ليلي: طب الحادثه حصلتلك قبل ما تدخل الكليه ولا بعد؟؟
ادهم: قبلها بكتير الحادثه حصلتلي وانا 15 سنه كنت في ثانوي وبعدين ضيعت سنتين سنه الحادثه واللي وراها ذاكرت في البيت وبعدها دخلت الكليه
ليلي: طب قبلوك ازاي وانت.....
مكملتش لانها خافت تجرحه
ادهم: وانا مشوه صح؟
ليلي: مش قصدي بس اسمع ان بتوع شرطه في كشف هيئه ومش بيقبلو اي حد
ادهم: هنا خدمني الحظ ودي المره الوحيده اللي خدمني فيها
ليلي: ازاي؟
ادهم: الراجل اللي اتبناني كان دكتور كبير وله وزنه في البلد وساعتها كان وزير الداخليه عنده وعمله عمليه وانقذ حياته وصدفت ساعتها اني فاتحته اني عايز ادخل شرطه وطلبت يساعدني فكلم الوزير وقاله ان ابنه عايز يدخل شرطه بس خارج من حادثه ووشه فيه كام جرح والوزير طبعا مشفنيش فوافق انه يساعده وعملي توصيه انهم يقبلوني فورا وفعلا مع اعتراضتهم عليا الي انهم قبلوني غصب وبس يا ستي
ليلي: وطبعا كانو بيعاملوك ملك ده انت واسطتك وزير الداخلية نفسه صح؟
ادهم ابتسم بحزن وافتكر عذابه في الكليه
ادهم: ملك؟؟؟ وانهي ملك!!! كنت فعلا ملك لدرجه اني لما دخلت العنبر اللي هستقر فيه كل الطلبه خرجت ونادوا القائد واعترضوا علي وجودي والقائد لما شافني استغرب هما ازاي اصلا قبلوني ونادوا علي عميد الكليه لان اكيد في لبس في الموضوع بس العميد قال انهم مضطرين يقبلوني ويحطوني في اي مكان فاختارولي اوضه صغيره علشان محدش يتضايق مني
ليلي: اوضه خاصه احسن من عنبر كامل علي الاقل تبقي براحتك
ادهم: اوضه كانت مخزن صغير لعده تنضيف يدوب تكفي واحد بالعافيه
ليلي: وعاملوك ازاي؟؟؟
ادهم: كنت مميز وكانو رافضيني فعايزين يطفشوني فكانت ليا معامله خاصه
ليلي: ازاي؟؟
ادهم: يعني صحياني مثلا قبل الكل لو الصف هيجري 2 كيلو مثلا كتمارين يبقي انا 3 كيلو، لو يعملو الضغط 50 مره يبقي انا اعمل 100 كل حاجه كانت بتتضاعف عليا علي اساس اتعب واستسلم
ليلي: عمرك ما استسلمت؟؟؟
ادهم: مكنش ينفع استسلم اصلا،، كنت هروح فين؟؟؟ لبيت ناس رافضيني وكتر خيرهم قوي انهم اتبنوني وساعدوني اني ادخل الكليه دي،، بكل المقاييس كان لازم استحمل واكمل بس المشكله اني كل ما استحمل واعمل المطلوب كانوا بيزودوا الضغط عليا ويمكن ده اللي خلاني حاليا ظابط ليا وضعي اني مهما اقابل حاجات صعبه فانا عديت بالاصعب
ليلي: طيب الاجازات كنت بتعمل فيها ايه؟
ادهم: مكنتش باخد اجازات ياما لاني انا مش عايز يا اما هما بيخترعولي اي حاجه علشان يمنعوني من الاجازه بس لما اخدوا بالهم اني اصلا مش عايز اجازات بطلو يمنعوني بس برضه مكنتش بنزل
ليلي: ليه؟؟
ادهم: هنزل لمين وليه؟؟؟
ليلي: وزمايلك محدش صاحبك ابدا؟؟
ادهم: في اول سنه لأ الكل كان واخد جنب مني وبعدها اتعرفت علي كام واحد ساعدتهم فاضطروا يتعاملوا معايا
ليلي: احكيلي اتصاحبت عليهم ازاي؟؟
ادهم: اول واحد اسمه رائد وده في يوم كان عندنا اختبار للتحمل فطلبو نجري مسافه طويله ولازم نكمل للاخر وزي ما قولتلك انا بيطلب مني اكتر ساعتها كان مطلوب منهم يجروا 3 كيلو وانا 5 كيلو
ليلي: وهو في حد يقدر يجري المسافه دي؟
ادهم: بالتدريب اه واكتر كمان وبعدين محددوش وقت المهم بس تكمل للاخر
ليلي: وبعدين
ادهم: وانا بجري لقيت رائد ده علي الارض ورجله مكسوره او مجزوعه وطبعا لان اصحابه لازم يكملو الاختبار سابوه علي اساس لما يوصلو يبعتوله مساعده فلما شوفته وقفت واتكلمت معاه
بدا يحكيلها
ادهم: محتاج مساعده؟؟
رائد: شكرا اصحابي هيبعتولي مساعده
ادهم: لو عايز انا ممكن اساعدك؟
رائد : متشكر اتفضل
ادهم: انت حر بس خلي بالك لما تجيلك المساعده هنا هتعتبر سقطت في الاختبار
رائد: عارف انت فاكرني مش عارف
ادهم: واصحابك ما ساعدوكش ليه معاهم
رائد: ومين هياخر نفسه علشان خاطر حد
ادهم: انا مستعد اشيلك لحد ما توصل انت خلاص فاضلك كيلو وتوصل
رائد: وهتستفاد ايه؟؟
ادهم: مش شرط استفاد عادي
رائد: ايوه هتعمل ده مقابل ايه؟؟؟
ادهم: مقابل؟؟؟ انت محتاج مساعده وانا اقدر مقابل ايه اللي بتتكلم عليه علي العموم انت حر سلام انا لسه فاضلي 2 كيلو بعد اذنك خليك مستني
ولسه هيكمل جري
رائد: استني ارجوك ساعدني لو تقدر
ادهم قرب عليه وركبه علي ظهره ومشي بيه لحد ما وصله والكل استغرب انه عمل كده لانهم كلهم ديما بيحبوا يضايقوه حتي القائد استغرب من تصرفه وصله ونزله ونجحه في اختباره
القائد: هو نجح انت لسه؟
ادهم: هكمل تمريني للاخر
ادهم نزل حمله من علي ظهره وكمل المسافه اللي فاضله
مهما كان التحدي كان بيقبله
بعدها بفترة قابل رائد اللي اتشكره لانه ساعده
رائد: ده جميل مش هنساه بس اسف انا مش هقدر اكون صاحب ليك اسف مش نداله بس الكل و... منظري.... و
ادهم: انا مطلبتش منك انك تكون صاحب ومعملتش ده علشان اقرب من حد بعد اذنك
ادهم متعود انه لوحده ومش عايز حد
ليلي: لا بقي دي اسمها نداله
ادهم: مش نداله بس لو هو صاحبني اصحابه هيسيبوه
ليلي: ما هما اصلا سابوه مرمي ومحدش فكر يعمل زيك
ادهم: تفكيرهم ساعتها كان في الامتحان وانهم ينجحوا وبس
ليلي: هو انت علي طول كده؟؟
ادهم: كده ازاي يعني؟
ليلي: بتحط اعذار؟
ادهم: للأسف ايوه
ليلي: وبعدها اتصاحبتوا بقي
ادهم: مش اتصاحبنا بالمعني اللي انتي فاكراه انا ماليش اصحاب اصلا بس علي فترات كان ممكم نتكلم
ليلي: اتعرفت علي حد تاني؟
ادهم: واحدتاني كان اسمه طارق كان هو واصحابه بيلعبوا كوره وانا واقف بعيد وهما بيلعبوا طارق شات كوره جامده حبتين جت في عربيه القائد نزلتله قزاز العربيه في الارض
كلهم اتجمعوا وخافوا لانه بيعشق عربيته دي والمشكله ان طارق كان عنده فرح اخوه جاي ولازم ينزل اجازه وطبعا بعد اللي حصل هيتجازي طلب من اصحابه حد يشيل الليله عنه محدش رضي كل واحد عنده ظروفه وجه القائد واول ما شاف عربيته اتجنن
القائد: مين فيكم اللي شات الكوره كده؟؟؟
الكل ساكت وخايف يرد
ادهم: انا اللي شتها انا اسف بس جت في العربيه غصب عني
كلهم بصولو باستغراب لانه اتدخل لتاني مره يساعد حد ميعرفوش
حتي القائد كان عارف انه مش هو لانه استحاله يكون بيلعب معاهم بس حب يعاقبه علي تدخله
القائد: انت؟؟؟ كنت بتلعب معاهم؟؟؟
ادهم: لا بس شوتلهم الكوره واتحولت شويتين فجت في العربيه
ادهم كان ممتاز في النشان والقائد عارف ده
القائد: امم طبعا انا مش هحرمك من اجازتك لان انت اصلا مبتهتمش بالاجازات انت هتتجازي بطريقه مبتكره
ادهم: انا مستعد للي حضرتك تقرره
ادهم كان القائد بيتعبه النهار كله واخر النهار بدل ما يرتاح يبدأ ينفذ عقابه بحيث يستمر لحد الساعه 3 فجرا في اي شغل يخترعه القائد مره يخليه ينضف العربيات ويغسلها ومره يطلب منه ينضف الاسلحه كلها ومره طلب منه ينضف اسطبل احصنه التدريب وكل يوم يرهقه لحد الساعه3 الفجر ومطلوب يصحي 6 لتمارينه
طبعا الطلبه كلهم بدا يصعب عليهم وخصوصا طارق اللي بفضله حضر فرح اخوه
مده العقاب المفروض شهر بس بعد أسبوعين طارق راح للقائد واعترفله بالحقيقه فاضطر انه يعفي عن ادهم ومرضيش يجازي طارق
ليلي: وبقيتو اصحاب؟؟
ادهم: ما انا قولتلك معنديش اصحاب بس زمايل ممكن نتكلم بس وبطلو يضايقوني بالكلام كلهم عدلوا معاملتهم معايا وبقم بيعاملوني باحترام وده كان كفايا
ليلي:والقائد؟؟
ادهم: معاملته ما تغيرتش ابدا بس لما اتخرجت كان عارف اني اكفأ واحد في الدفعه فهو اللي رشحني في مجال المخابرات وخلاهم قبلوني وده وصلني للي انا فيه دلوقتي واشتغل معايا رائد وطارق ومازلنا زمايل بس برضه مش اصحاب لكن لو طلبت منهم اي طلب ما بيتاخروش ابدا
ليلي: حياتك كانت صعبه قوي.... طب انت كنت في ملجأ والراجل الجراح ده اتبناك طب اتبناك ليه لو مش عايزك ؟؟؟
ادهم: لا يا ليلي أنا مكنتش في ملجأ
ليلي: امال ايه؟
ادهم: علي فكره الساعه خلصت والمفروض ترجعي شغلك
ليلي: انت بتوزعني؟؟؟ ماشي ماشي
ادهم: مش بوزعك بس خايف عليك لحد يضايقك لو اتاخرتي
ليلي: امم علي العموم وقت ما تثق فيا كفايه ابقي احكيلي وانا هسمعك
ادهم: مش موضوع ثقه انا مش مستعد اتكلم مش اكتر دي كلها جروح متفتحه والكلام هيتعب مش هيريح
ليلي: عايزه اعرف كل حاجه عنك. كل حاجه... عايزاك كتاب مفتوح قدامي
ادهم: وهو انا مش كتاب مفتوح؟؟
ليلي: لا انت مكتوب بطلاسم مش عارفه اقراها
ادهم: ما انا بقراهالك اهوه
ليلي: وانا معاك لحد ما تكون مستعد تكمل قرايه المهم هشوفك امتي؟؟
ادهم: مش عارف شوفي ظروفك ايه وبلغيني
عطاها تليفونه علشان تعرف تكلمه
وقام معاها يوصلها لحد ما يخرجوا من الجناين
ليلي: خلاص كده
ادهم: طب يالا بقي علي شغلك
ليلي: خلي بالك من نفسك
ادهم: وانتي
ولسه هتمشي بس ادهم شدها وحضنها ضمها جامد ومكنش عايز يسبها تمشي ولا هيا عايزه تمشي عايز يشبع منها من ريحتها من كل حاجه فيها واخيرا قدر يرخي ايديه من حواليها وهيا بعدت شويه واتقابلت العيون في نظره طويله كلها حب ووعود
ليلي قربت منه تاني وكانها بتقوله مسموحلك تقرب وهو للحظه قرب قوي ويدوب هيلمس شفايفها الي انه بعد وقالها تمشي علشان متتاخرش
مشيت وقلبها حاسه ان صوته الكل سامعه
كانت في قمه سعادتها مش عايزه اي شيئ غير انها تكون معاه وبس
وادهم فرحان بيها وطاير بس ديما حاسس ان الفرحه دي مش هتستمر
استمرت مقابلاتهم يوم ورا يوم وكل يوم بيحكيلها اكتر عن حياته وعن ابوه وامه وتقريبا ليلي عرفت كل حاجه عن ادهم وكل ما تعرف اكتر كل ما تتعلق بيه اكتر وتحبه اكتر
بس طبعا الحياه مش ورديه والمشاكل ما بتخلصش وخلص وقت الحب وجه وقت اختبار الحب هيواجه المشاكل ولا هيفشل؟؟؟
مين فيهم هيستسلم الاول ادهم ولا ليلي؟؟!
للمتابعه اترك تعليق
الحلقة السابعة
المشوة
استمرت مقابلات ادهم وليلي في السر وتقريبا ليلي عرفت كل حاجه عن ادهم
حكالها عن ابوه ورفضه ليه وامه وموقفها السلبي منه ديما واخوه وكرهه ليه واخته الوحيده اللي حبته
حكالها ازاي عمر ما ابوه شاله او باسه او قاله كلمه كويسه بالعكس كان ديما يهد فيه حتي لما كان ينجح مثلا في المدرسه بيتنرفز عليه اما احمد علي الرغم انه كان ضعيف الي انه لو نجح بس كان يعمله حفله
كان ديما مضطهد ومش عارف سبب للاضطهاد ده وحكالها عن ابوه لما جلده وخرجه من المدرسه وان رد فعل امه انها من ساعتها بطلت تكلمه نهائي وليلي استغربت ازاي ام تقاطع عيل عمره عشر سنين وتفضل خمس سنين كامله ما تكلمهوش وازاي تقبل كل ده
حكالها عن الحادثه واللي حصله في المستشفي وكل الظروف وازاي ربنا بعتله مصطفي ده علشان يخلصه بس كرهت مصطفي علشان الجرح الطويل اللي في ايد ادهم بس قالها انه لولا الجرح ده الله اعلم كان هيحصله ايه
حكالها عن رفض ساره ام مصطفي ليه
سالته لما دخل الكليه كان بيقضي اجازاته ازاي
قالها انه كان بينضم لمعسكرات تبع الكليه وبيستمر فيها وبدأ يدرب كونغفو وكارتيه وتايكوندو وبدأ يدرس لغات وكان بيروح البيت في اوقات بسيطه جدا
سألته امتي ساب البيت
قالها في اخر سنه ليه في الكليه مصطفي كان خطب وهيتجوز بس خطيبته اتخانقت معاه بسبب ادهم لان مصطفي كان عايز يقعد مع ابوه وامه وهيا وافقت بس رفضت نهائي وجود ادهم
وهنا طلب من صبري انه يساعده في انه يشوف شقه صغيره ايجارها بسيط يقعد فيها
وفعلا صبري كان عنده شقه صغيره خلي ادهم يقعد فيها لحد ما يستلم شغله ويقف علي
رجله وبعد كده استقل بحياته
وفي شغله وضعه اختلف مع كل نجاح في مهمه كان بيكسب احترام الكل وخوف الجداد وحاليا الغموض مغلفه محدش ابدا يعرف عنه حاجه وسمعته انه مبيرحمش ابدا لانه جد جدا في شغله ومبيهزرش ولا عنده اصحاب فالكل بيعمله الف حساب
علاقته اتقطعت نهائي باهله ومازلت مستمره مع صبري ومصطفي بس في اضيق الحدود
ليلي كانت مع ادهم وكالعاده ادهم معاها بيكون انسان تاني
ليلي: وبعدين يا ادهم هنفضل كده لحد امتي؟
ادهم: لو مش عايزه تقابليني .....
قاطعته ليلي وحطت ايدها علي بقه علشان ميكملش
ليلي: اوعي تكمل.. اوعي تقول اني مش عايزه اقابلك.. انا عايزه اكتر من اني اقابلك. عايزه افضل معاك علي طول مش عايزه اسيبك ابدا ولا عايزه ابعد عنك عايزه انام واصحي في حضنك فاهم؟؟؟؟
ادهم: وده نفس اللي انا عايزه يا ليلي؟؟
ليلي: طيب وبعدين؟؟؟
ادهم: وبعدين ايه؟؟؟ مش فاهمك
ليلي: ادهم ممكن أسألك سؤال غريب؟؟؟؟
مسك ايدها وباسها
ادهم: اسالي يا حبيبه قلبي في اي شيئ
ليلي بتردد: انت ليه عمرك...
ادهم: عمري ايه كملي
ليلي: ليه عمرك ما حاولت تبوسني ابدا؟؟؟
ادهم ساب ايدها وبص للارض وبيدور علي اجابه يقولها
ادهم: انتي عايزاني ابوسك؟؟؟؟
ليلي: ما تجاوبش علي سؤالي بسؤال
ادهم وقف واداها ضهره وبعد عنها شويه
وهيا راحتله ووقفت قدامه
ليلي: ماتهربش مني
ادهم: مش بهرب منك انا بس مش عارف اقولك ايه
ليلي: انت بتحبني صح؟؟
ادهم: انا تخطيت الحب من زمان انا بعشقك يا ليلي مش بحبك
ليلي : وعايزني افضل جنبك صح؟؟
ادهم: طبعا انتي بتسالي اسئله غريبه قوي
ليلي: طيب مستني ايه؟؟؟
ادهم: ليلي انا مش فاهمك خالص ومش عارف انتي عايزه توصلي لايه وسبق وقولتلك اني لاعمري حبيت قبلك ولا اتحبيت وكل اللي بيحصلي وبعيشه معاكي جديد عليا
ليلي: يعني ايه؟؟؟
ادهم: يعني متتوقعيش مني تصرف معين ومتستنيش اني افاجئك بحاجه رومانسيه او اعمل حاجه من الاخر متتوقعيش مني
اللي انتي عايزاني اعمله اطلبيه او عرفيني انتي مستنيه ايه
عارف ان ده مش حاجه حلوه وممله انك تكوني مرتبطه بواحد مش عارف مطلوب منه ايه بس معلش استحمليني انا حكتلك كل ظروفي علشان تفهميني... فاهماني؟؟؟
ليلي: فهماك ومقدره كل ظروفك وبحبك بالرغم من كل ده
ادهم: يبقي قوليلي صراحه بتلفي وتدوري علي ايه؟؟؟
ليلي: عايزه..... عايزه... عايزاك يعني....
ادهم: عايزه عايزه وبعدين قولي علي طول
ليلي: عايزه افضل معاك علي طول
ادهم: والمطلوب مني ايه؟
ليلي: نتجوز يا ادهم اديني قولتها صراحه اهوه عايزه نتجوز
ادهم اتصدم ده كان اخر شيئ بيفكر فيه حاليا الجواز عمره ما كان في حساباته ابدا
وليلي كمان اتصدمت من رد فعله ده ودموعها اتجمعت في عنيها
ليلي: مكنتش متخيله انك هتتصدم كده..
ادهم: مش حكايه صدمه الحكايه اني مفكرتش اني ممكن اتجوز في يوم
ليلي: امال تخيلت ايه هتسلي بيها طول ما انا في بلدهم وبعدها اسافر وهيا تولع ولا ايه؟؟؟
الظاهر اني حكمت عليك غلط بعد اذنك
ولسه هتمشي مسكها من ايديها الاتنين
ادهم: انا عمري ما اتسليت بيكي وانتي عارفه كده كويس وعمري ما تخطيت اي حدود معاكي ومفيش اي شيئ عملناه مع بعض يخليكي تخجلي او تندمي انك معايا
ليلي: كده انا عرفت ليه عمرك ما حاولت تبوسني او تقرب مني حتي لما كنت بحاول اقرب كنت بتحط حد بينا علشان لما تيجي تمشي تقولي انا ما لمستش شعره منك ومش مديونلك بحاجه
ادهم: ايه اللي بتقوليه ده؟ فجاه انا بقيت انسان اناني للدرجه دي انا بحبك وانتي عارفه ده كويس واكيد حسيتيه
ليلي: اللي بيحب حد بيبقي عايزه جنبه علي طول
ادهم: وانا مش عايزك جنبي في كل لحظه وثانيه كمان؟؟؟؟ انتي خليتيني لاول مره احس اني انسان واعيش واني من حقي اتنفس زي الناس انا كنت اقتنعت اني مسخ زي ما بيسموني واني سفاح ومعنديش قلب واكتشفت اني عندي قلب بيحب وبيدق زي كل الناس انتي خليتيني لاول مره اعيش ولاول مره احب واتحب
ليلي: وعلشان كده عايز تسيبني؟؟؟
ادهم: انا عايز اسيبك؟؟؟؟؟ انا عايز افضل جنبك لاطول فتره ممكنه عايزك معايا
ليلي: وعلشان عايزني معاك مش عايز تتجوزني؟؟؟ بجد انا مش فاهماك انت بتفكر ازاي؟ بتحبني بس من بعيد لبعيد
ادهم: انتي متخيله اني عمري ما حلمت انك تكوني شريكه حياتي واننا نعيش ونكبر مع بعض واني اعيش عمري في حضنك؟؟؟
ليلي: ولما انت حلمت بده اتصدمت ليه لما قلتلك نتجوز؟؟؟
ادهم: لانك كده بتنهي الحلم الجميل اللي انا عايشه وهتصحيني علي كابوس الواقع
ليلي: قصدك ايه؟؟؟جوازك مني هيكون كابوس؟؟؟
ادهم: جوازي منك ده هيكون اجمل شيئ ممكن يحصلي؟؟؟
ليلي: امال ليه بتقول هصحيك من الحلم؟؟؟
ادهم: انتي بجد مش فاهمه؟؟؟؟
ليلي: مش فاهمه اي حاجه
ادهم: في اللحظه اللي هتفتحي فيها سيره الجواز هتنتهي علاقتي بيكي وده اللي انا خايف منه
ليلي: يعني ايه؟؟
ادهم: يعني مين هيسمحلنا نتجوز هاه؟؟؟؟ ابوكي هيوافق؟؟؟ عيلتك هتوافق؟؟؟ مجتمعك ده هيوافق؟؟؟؟
ليلي: طظ فيهم كلهم ميهمنيش حد غيرك
ادهم ضحك بحزن
ادهم: هتقاطعيهم علشاني؟؟؟؟
ليلي: هقاطع الدنيا كلها وكفايه انت
ابتسم ادهم بحزن
ادهم: وكفايه عليا قوي اني اسمع الكلام ده منك
ليلي: انت ليه مفترض انهم هيرفضوا؟؟؟
ادهم: ابوكي مش بيطقني ادافع عن بلده هيوافق عليا جوز بنته
ليلي: انا هقنعه
ادهم: مش هيقتنع ومش هيوافق
ليلي: انا وراه لحد ما يوافق انت مش متخيل هو بيحبني قد ايه
ادهم: لا انا عارف انه بيحبك وعلشان بيحبك عمره ما هيوافق ابدا ابدا... عمره ما هيوافق يجوز بنته لواحد شايفه شيطان او مسخ
ابوكي قال ان ابليس لو شافني يستعيذ مني متخيله ده فهل ممكن يجوز بنته لشخص شايفه أسوأ من ابليس نفسه؟؟؟
ليلي: هخليه يشوفك زيي ما انا شايفاك يشوفك بعيوني
ادهم: مش هيسمعك ... ابويا نفسه معرفش يشوفني هو هيشوفني؟؟؟
ليلي: هتجوز غصب عنه واخليه يوافق غصب
ادهم: وعلي اساس اني وافقت نفترض انه اتبري منك وطردك من بيتك وعيلتك هجرتك بسبب خروجك عن طوعه،؟؟؟؟
ليلي: هتكون انت معايا وده اللي يهمني
ادهم: وانتي متخيله اني ممكن اتجوزك بالطريقه دي؟؟؟؟ واكون سبب طردك من بيتك
ليلي: لو بتحبني ايوه؟؟؟
ادهم: لو بحبك؟؟؟؟ علشان بحبك عمري ماهرضي ابدا بده ولاني عارف طعم الطرد من البيت عمري ماهرضي ابدا تدوقيه انتي مش عارفه قد ايه بتوجع انك تتطردي من بيتك وتتكرهي من اقرب الناس ليكي وانك تتمني بس حضن او حتي مجرد كلمه
انا كان اقصي امل ليا ولحد دلوقتي اسمع من امي كلمه واحده يا ليلي تخيلي اقصي امنياتي اسمعها تقولي كلمه
انت عارفه انا لحد دلوقتي بغيب واكلمها في التليفون علشان اسمع منها بس كلمه الووو لانها مبتقولش غيرها وبعد ما بتعرف انه انا بتسكت تخيلي تكون اقصي امنياتك كلمه؟؟؟ عمري ماهرضي ابدا اعيشك ده
ليلي: انت ناسي انك هتكون جنبي؟؟؟
ادهم: مش هعوضك ابدا عنهم وخصوصا ان انتي جربتي حضنهم وخوفهم وحنانهم فهتفتقديه وبعدها مع الوقت هتكرهي اللي بعدك عنهم
ليلي: يعني انا مش معوضاك عنهم؟؟
ادهم: علي الرغم من اني عمري ما دقت طعم حضنهم الي اني بتمناه ايوه انتي مليتي حياتي وعوضتيني عن كتير وغيرتيني بس برضه بتمني حضنها ولو بس مره
ليلي: يبقي خلاص نفضل وراهم لحد ما يقتنعوا وهيقتنعوا بس المهم ان انت متتخلاش عني
ادهم: انا عمري ما هبطل احبك ابدا وده وعد مني
ليلي: صدق الوعد ده
ادهم: اصدقه ازاي؟؟؟؟
ليلي: انك تبوسني زي اي عاشق بيبوس معشوقته
ادهم بعد عنها وعطاها ضهره وبص للارض
ليلي: ممكن اعرف انت بتفكر في ايه بالظبط وليه رافض ده؟ المفروض انك تتمني ده؟؟؟
ادهم: وانا بتمناه في كل لحظه
ليلي: وانا بقولك اهوه انا ملكك
ادهم: ياريت
ليلي: ادهم حبيبي( مسكت وشه بايديها) بتفكر في إيه؟
ادهم: اقولك بفكر في ايه وما تزعليش؟؟؟
ليلي: قول ومش هزعل
ادهم: مش عايز ابوسك علي الرغم اني ممكن ادفع حياتي تمن لده بس مش عايز لاني مش عايزك يجي يوم تتجوزي فيه وجوزك ما يكونش اول راجل باسك
ليلي ودموعها نازله: انت هتكون جوزي واول
راجل تبوسني واخر راجل فاهم
ادهم: مش هنضحك علي بعض.... انا عمري ما هكون جوزك وجوزك من حقه انه يكون اول راجل يلمسك
ليلي: انت هتكون جوزي والنهارده هكلم ابويا وهقوله وهتيجي تتطلبني منه فاهم؟؟؟
ادهم مسك وشها بايديه وبيبصله زي ما تكون دي اخر مره هيشوفها عايز يحفر ملامحها جواه
ادهم: يبقي النهارده اخر يوم هشوفك فيه عرفتي ليه اتصدمت لما قولتي نتجوز لاني عارف ان ده هيكون بدايه النهايه
ليلي ودموعها مغرقه وشها
ليلي: مش اخر مره وهتشوف بس انت ما تهربش بس
ادهم ضمها لحضنه وهيا عيطت بصوتها كله في حضنه وهو دموعه نزلت غصب كان نفسه الحلم يطول شويه بس كل حلم مهما يطول لازم يخلص
ادهم: انتي اتاخرتي
ليلي: مش مهم.... انا بحبك قوي يا ادهم
ادهم: وانا يا ليلي بحبك فوق ما تتخيلي
ليلي: يبقي حققلي اللي بتمناه عايزه ادوق طعم اول بوسه في حياتي من حبيبي حتي لو مش هنتجوز عايزاها منك انت
ادهم: انتي مش قلتي اننا هنتجوز يبقي لما نتجوز يالا علشان اروحك
ومسك ايدها وبدؤا يمشوا وهو في حرب جواه
لحد ما وصلو لاخر مكان ينفع يمشي معاها فيه
ادهم: هستني تليفونك تتطمنيني عملتي ايه ولو ما اتصلتيش هفهم اللي حصل
ليلي: هتصل واحدد معاك معاد تيجي البيت
ادهم ابتسملها لاحلامها الورديه
وساب ايدها ومشيت خطوه وقلبه بيصرخ متسبهاش تمشي مش هتشوفها تاني مش هتشوفها تاني مش هتشوفها تاني
ادهم: ليلي
جري عليها وباسها ملعون اي حاجه تانيه.. فى داهيه اي اعتبارات.. ده من حقه وهيا حبيبته علي الاقل تفضله الذكريات يعيش عليها
اديها حواليه وهو ضاممها وبوستهم كانت طويله جميله كل واحد خايف ان دي فعلا تكون اخر مره ليهم مع بعض
واخيرا بعدوا عن بعض وكل واحد حس ان روحه اتسحبت لما بعدوا زي ما يكونو عايزين يفضلوا كده العمر كله
سند دماغه علي دماغها وهيا لسه بين ايديه وانفاسهم مقطوعه ونفسهم عالي محدش قادر يتكلم او ينطق
ليلي رفعت راسها شويه وباسته تاني وهو بادلها البوسه بس المره دي كانت هاديه مش عنيفه وهيا متعلقه في رقبته زي الغريق اللي بيتعلق في اللي بينجده واخيرا بعد عنها
ادهم: امشي
ليلي: هشوفك تاني؟؟؟
ادهم: اتمني
ليلي: بحبك وهفضل احبك
ابتسم وسابها تمشي وقلبه نبضاته بتهدي واحده واحده وهيا بتبعد عن عنيه وتختفي من قدامه وعرف من جواه ان حلمه الجميل خلص ولازم يرجع للواقع بس واقعه قبل كده مكنش فيه حب دلوقتي واقعه المرير هيتضافله عذاب جديد وجرح 🆕
كان عارف من اول لحظه ان ليلي هتكون اكبر جروحه بس مش ندمان علي الاقل جرب طعم ان حد يحبه ولو لفتره بسيطه بس جرب.......
ليلي روحت وهيا اعصابها كلها مهزوزه اجمل لحظات عاشتها في حضنه بس خايفه ليكون عنده حق وتكون دي نهاية حبهم
لا ابوها عمره ما رفضلها طلب وهيسمعها
وبالليل ابوها كان قاعد وبيضحك وبهزر وقالت فرصه تتكلم معاه وهو هادي
قعدت وخلت اخوتها يفضولها الجو
قعدت هيا وابوها وامها
ابوها حس انها مش علي بعضها ومتلخبطه
محمود: مالك يا قلب ابوكي مش علي بعضك ليه؟؟؟
ليلي: لا ابدا بس كنت عايزه اكلمك في موضوع كده
ليلي ايديها في حجرها بتفركهم والتوتر باين عليها قوي وابوها فهم ان الموضوع فيه راجل وفرح لان اخيرا بنته المفضله هتتجوز لانها ديما بترفض اي حد يتقدم
محمود: مين هوه؟؟؟
ليلي ارتبكت: مين هوه ايه؟؟؟؟
محمود: سعيد الحظ اللي مخليكي مش علي بعضك... اخيرا حد دخل دماغك قولي يالا بقي متشوقنيش اكتر من كده
ليلي: هو انسان كويس بس انت اديله فرصه تعرفه وقرب منه وساعتها هتعرف قد ايه هو كويس
محمود: يا حبيبتي طالما انتي اخترتيه لازم يكون كويس طول عمرك عاقله وبتوزني امورك صح وعمري ما شكيت في اختياراتك قبل كده
ليلي: يعني انت عارف اهوه اني بختار صح واني مش متهوره وعاقله؟؟؟
محمود: ايوه يا بنتي عارف ده... قلقتيني بقي علي العموم لو هو فقير يعني عادي ما احنا ناس عاديين وعلي قد حالنا وعمري ما حكمت علي حد بفقره او غناه
ليلي: مش حكايه غني وفقير لأ
محمود: وبعدين بقي قولي بقي هو مين ومتحيرنيش معاكي
ليلي: هو يبقي يبقي يبقي..،
محمود: متنطقي يا بنتي
ليلي: يبقي ادهم صبري ظابط المخابرات اللي هنا في البلد
وهنا بقي ابوها............،
للمتابعه اترك تعليق
الحلقة الثامنة
المشوة
ليلي قالت لابوها ان ادهم هو العريس المنتظر واستنت رد فعل ابوها
لحظه طويله من الصمت عدت زي ما يكون ابوها مش مستوعب كلامها واخيرا قدر ينطق
عم محمود: افندم؟؟ انتي قلتي مين؟؟؟
ليلي: حضرتك سمعتني كويس
محمود: لا ما سمعتش!! لان ما ينفعش اسمع ده
ما ينفعش بنتي العاقله الرزينه تكون اتجننت
( علي صوته جدا في اخر كلمه وبدا جنونه يطلع عليها)
محمود: ادهم مين ده هاه؟؟؟ المشوه المسخ؟؟ طيب تيجي ازاي دي؟؟ طب نعقلها ازاي؟؟؟ انتي اتجننتي؟؟؟
ليلي: ايه عيبه؟؟؟
محمود: ايه عيبه؟؟ انتي فعلا اتجننتي او اتعميتي لكن استحاله تكوني طبيعيه؟؟؟
ليلي: اتجننت لمجرد اني عرفته كانسان ومحكمتش زيكم علي شكله؟؟؟
محمود: ايوه اتجننتي واتجننتي رسمي كمان
تعرفي ايه عنه؟؟؟ مين هو؟ جاي منين؟؟ ايه اللي شوهه كده؟؟؟ هاه ردي
ليلي كانت تعرف كل حاجه عن ادهم بس متقدرش تقول لابوها اي حاجه
ليلي: اللي اعرفه عنه مكفيني
محمود: مكفيكي؟ اممم مكفيكي؟؟؟ طيب بما انك بقيتي مجنونه رسمي فمعدش ليكي اي حق تاخدي قرار بنفسك
من هنا ورايح مفيش خروج من البيت ابدا
والبني ادم ده انا هعرف اوقفه ازاي عند حده
ليلي: قصدك ايه؟؟؟ بابا استني اسمعني
جريت ورا ابوها وهو خارج
محمود: سمعت جنون كفايه
ليلي: انا بحبه اسمعني
محمود: بكره تفوقي من وهمك ده
زقها بعيد لما حاولت توقفه وسابها وخرج
وهي فضلت تعيط وفهمت قصد ادهم لما قالها انه كان نفسه بس حلمه يطول شويه وعرفت ان الطريق هيكون طويل ان مكنش مستحيل
عم محمود خرج زي المجنون عايز بس يطول رقبه ادهم ونفسه لو يقتله
خرج مش شايف قدامه وقابل مدير الشرطه والعمده كانو جايين عنده بس سابهم ومشي في وشهه وهما نادو عليه مردش
ومشيوا وراه لما لقوه رايح ناحيه مكان ادهم وعرفو ان في حاجه حصلت
حاولو يهدوه بس مكنش بيرد عليهم لحد ما وصل وهناك زي المجنون بينادي علي ادهم
محمود: ادهم ادهم اخرج هنا اخرج لو كنت راجل
ادهم اول ما سمع صوته غمض عنيه لانه كان مستني مجيته دي بس مش بالسرعه دي
كان عنده امل ان ليلي تستني شويه او يشوفها مره تانيه حتي.. بس كل اماله انهارت وعرف ان ده وقت الصحيان من الحلم
قام وخرج واول ما خرج هجم عليه محمود ومسكه من هدومه وبدا يزعق ويهز فيه وادهم ساكت تماما ومستسلم نهائي
محمود: انت اتجننت؟ اكيد طبعا اتجننت ولا نسيت نفسك ولا ايه بالظبط هاه!؟ انت مين انت علشان تبص لبنتي هاه؟؟ انت ابليس نفسه يستعيذ منك عايز تبص لملاك زي بنتي؟؟؟ انت ايه؟؟؟
العمده والمدير بيحاولو يبعدوه عنه واخيرا قدرو يشدوه
المدير: اهدي يا عم محمود الكلام مش كده
محمود: وهو خلي فيها كلام
العمده: صلي علي النبي كده واهدي وفهمنا في ايه لده كله
محمود: عليه الصلاة والسلام... المجنون ده بيبص لبنتي
العمده: يعني ايه يبصلها؟؟
محمود: يعني اتجنن وعايز يتجوزها؟؟؟
كلهم سكتوا واتصدموا وادهم واقف وساكت مش بيتكلم او يرد
العمده: ايه؟ يتجوز ليلي بنتك؟؟؟
الكل استكترها عليه زي ما تكون جريمه انه بص لوحده وعايز يتجوزها
محمود: ايوه شفت الجنان؟؟ المسخ ده عايز يرتبط ببنتي انا؟؟؟ بليلي اللي تلات اربع شباب البلد هيتجننوا عليها في الاخر المسخ ده عايزها شوفتو بقي؟؟؟ يبقي من حقي اقتله واشرب من دمه كمان ولا لأ؟؟؟
المدير: اهدي يا عم محمود اهدي... سياده المقدم هو الكلام ده صح؟؟
ادهم :::...........
عم محمود: ايوه صح وانت لسه مستنيه يتكلم؟؟ هيقول ايه؟؟؟
ادهم: ايه الغلط اللي ارتكبته مضايق حضرتك قوي كده؟ ؟ اني حبيت بنتك؟
عم محمود: اخرس... اوعي تتكلم عن بنتي.. اوعي اسمها يجي علي لسانك ولا حتي طيفها يجي في خيالك نجوم السما اقربلك منها انت فاهم؟؟؟
أدهم: وليه؟؟
محمود: ليه!؟؟؟ انت بتسال ليه؟؟؟ انت مين انت؟؟ مين اصلك وفصلك؟؟ ولا علشان ظابط فاكرنا هنخاف؟؟؟ انت نسيت نفسك؟؟ بص لنفسك في مرايه وانت تشوف نفسك علي حقيقتك لاحسن تكون نسيت شكلك
ادهم: منسيتش شكلي ولا حاجه بس من امتي بيتحكم علي الراجل بشكله؟؟ انت متعرفنيش
محمود: ولا عايز اعرفك ولا عايز اشوف وشك المشوه ده في البلد دي كلها ما بالك ببيتي
المدير: مقدم ادهم حضرتك جيت البلد دي لمهمه معينه لو سمحت التزم بيها انت مش جاي هنا تحب
محمود: يغور بره البلد كلها
المدير: يكمل مهمته اللي جايلها الاول
سياده المقدم احنا هنا معندناش بنات في البلد دي للجواز فالتزم بمهتمك وبس
ادهم كلامهم كان بيجرحه وبيوجعه كل ده ليه يعني؟؟؟ ايه الغلط اللي ارتكبه؟؟؟؟
ادهم: حضراتكم جايين هنا وبتتخانقو... هو انا امتي كنت طلبت ايد حد من بنات البلد دي؟؟؟
كلهم بصو لمحمود:
المدير: هو طلب ايد ليلي؟؟
محمود: لا بس
ادهم قاطعه: يبقي لما اجي لحضرتك واطلبها ابقي تعال اتخانق معايا.. وبعدين اوعو تنسو انا هنا في البلد دي ليه وجاي ليه... وممكن اسيبها وامشي حالا بس انا هنا علشان في ناس فعلا محتاجه وجودي هنا وعلشان الحق ياخد مجراه فمتنسوش انتو ده... ولو كنت ساكت لحضرتك ومش برد عليك فده احترام ليك مش اكتر فياريت متفهمش سكوتي ده غلط ولما اجي اخبط علي بابك متبقاش تفتحلي.... بعد اذنكم
سابهم ومشي وعم محمود هيولع ورجع بيته كمل خناقه مع ليلي وقالها انه لو اخر واحد في الكون عمرها ما هتتجوزه ابدا
ادهم كان عارف ان هو ده اللي هيحصل بمجرد ما تتفتح سيره الجواز بس مكنش ينفع يقولها لأ مكنش بايده حاجه يعملها
الحياه رجعت صعبه تاني ويمكن اصعب قبل كده مكنش يعرف يعني ايه حب او اهتمام او ان حد يخاف او يسأل عليه. لكن دلوقتي جرب وداق طعم الحب ومفتقده ومستعد لو يدفع حياته ويلمحها حتي ولو من بعيد
كان ممكن يمشي من البلد خالص ويبعت اي حد مكانه وكان ممكن يوقف عم محمود او اي حد يضايقه عند حده بس مقدرش
دلوقتي بقي عنده قلب بيدق وبيتحكم في تصرفاته وبيعانده كمان
ده غير وعده لليلي انه مش هيهرب من البلد او يمشي
فضل كل يوم بيمشط البلد ومستني اي حاجه تحصل
وفي يوم وهو ماشي سمع دوشه وناس بتصرخ جري يشوف في ايه
كانت مطحنه الفلاحين بيطحنو فيها القمح وماكنه الطحين بتلف وتدور وتتطحن القمح
دخل شاف الماكنه شغاله وماسكه عيل صغير تقريبا 3 سنين شابك في التروس بتاعتها والكل بيصرخ ومحدش عارف يعمل ايه ولو فصلو الماكنه التروس هتقفل علي الواد وهتقتله خالص والواد دراعه تقريبا اتكسر ورقبته شبكت في الترس وبيدبح فيه
هنا دخل ادهم استوعب الموقف في لحظات مسك حديده طويله وحطها في التروس وقفها مؤقتا بس برضه بتتحرك ولو اتحركت اكتر هتفصل رقبه الواد خالص مد ادهم ايده ومسك التروس يوسعها شويه والماكنه بدأت تلف تاني وهو ماسكها بايديه علشان يوقفها او يحاول يوفقها وصرخ في اقرب واحد واقف جنبه انه يحاول يخرج الواد بسرعه لان التروس بتقطع ايديه ومش هيقدر يوقفها كتير
هنا راجل فاق واتحرك وبدأ يخرج الولد والماكنه بتحاول تلف وادهم ماسكها بكل قوته ومتجاهل ايديه اللي بتتقطع او كتفه اللي اتعور اللي ساند بيه كل همه ان الولد الصغير يطلع واخيرا طلعوا الولد وهو ساب ايديه
الولد كان خلصان خالص
وابو الواد واقف بيعيط ولسه هيشيله ادهم وقفه قاله لازم يوقفله النزيف علشان يوصل بيه للمستشفي وفعلا ربطله جروحه كانت الاسعاف وصلت واخدوه
الناس واقفه بتتفرج وبعد ما الاسعاف مشيت قالو لادهم علشان ايديه بس هو غطي دماغه كعادته ومشي وقالهم محدش يهتم بيه المهم الولد يبقي كويس
ادهم راح المستشفي يخيط ايديه وكتفه وهناك سأل الدكتور عن حالة الولد ايه
الدكتور قاله انه حالته حرجه لان السيور بهدلت جسم الواد ولانه صغير فمش عارفين يكملو اللحم المقطوع بايه ورقبته تقريبا مدبوحه بس الشريان الرئيسي ما اتصابش
ادهم وهو ماشي عدي يتطمن علي الولد
وهناك شافها واقفه ملاكه الجميل
وقف من بعيد يتأمل ملامحها الحزينه وكان نفسه لو يضمها مره اخيره وهو سرحان في تأملاته سمع صوت من وراه
::تقدر تقولي سيادتك واقف هنا بتعمل ايه؟؟؟
اتفاجئ ادهم بالصوت والتفتله وهنا جه حد واتدخل بينهم
ياتري مين اللي اتكلم ومين اللي اتدخل؟؟
ومين الولد الصغير ده؟
وهل ده هياثر في شيئ ولا لأ؟ ؟
ده اللي هنعرفه الحلقه الجايه
علي فكره حادثه الولد دي حقيقيه حصلت لابن بنت عمي وكان عنده 3 سنين وخرجوه من جوه الماكينه باعجوبه ولحد دلوقتي لسه بيتعالج
للمتابعه اترك تعليق
اعمل متابعه هنا👈 اضغط هناااااااا👉عشان يوصلكم كل الاجزاء الباقيه هتوصل للمتابعين فقط
تعليقات
إرسال تعليق