 |
سهى: ثقي بالله، وإن شاء الله هتحصلي عالمركز الأول
وبعد فترة دخلوا ليسمعوا النتيجة
مريم قلقانة من إنها ماتحصلش عالمركز الأول
طلع المقدم وقال: الحاصلة عالمركز الأول مريم محمد
وضعت مريم يديها على فمها من الفرحة، وذهبت لتسلم جائزتها
سهى بفرحة ضمتها وقالت: تستاهليه يا مريوم
إبراهيم: أنا فخور بيكي
مريم سعدت من كلامه وحست بفرحة أكتر، وقالت: شكرا
اتصلت على والدتها وأخبرتها وكانت فرحانة جدًا
رجعت إلى البيت، وكان والدها متعصب وقال: إيه دا يا محترمة اللي سمعته وشوفته
مريم بخوف: إيه اللي حصل يا بابا؟
محمد: الناس اللي عمالة تصورك وأنتِ بتقولي كلام أهبل مالهوش لازمة وتقولي موهبة وشغلي وبتاع احنا معندناش كدا، وعشان أخلص منك أول عريس هيتقدم هوافق عليه على طول مش ناقص قرف
مريم بدموع: ليه يا بابا بتعمل فيا كدا، تعرف أنا ماكنتش أعرف إني عندي الموهبة دي، واكتشفتها بالصدفة اللي حصلتلي عايز كمان تمنعني من دا بعد ما بقى حلمي
محمد: مش عايز كلام فاضي يا مريم، وبعدين هتعملي إيه بشغل الهبل دا في الأول والآخر مكانك المطبخ تطبخي لعيالك وجوزك وتشوفي طلباتهم
مريم: مش كل الناس بتفكر زيك يا بابا، في ناس عندها مفهومية وإنسانية وبتخاف على مشاعر الناس من إن تكسرها
محمد بنرفزة: قصدك إيه يابت، إني جاهل ولا إيه؟
مريم بخوف: مش قصدي حاجة بس بقولك اللي بيحصل
محمد بزعيق: اخفي من وشي بدل ما أقوم أمد إيدي عليكي
جريت مريم بخوف على غرفتها، ودخلوا أخواتها خلفها
مريم بتبكي ومنار بتطبطب عليها: ماتعيطيش يا حبيبتي
محمد أخوها وهو يمسح دموعها: خلاص بقى يا مريوم
مريم: أنا تعبت مش عارفة أعمل إيه عشان يفتخر بيا
منار: اعملي لنفسك قبل كل شئ يا مريم كل حاجة عشانك عشان تنفعي نفسك بيها وماتهتميش للكلام المحبط
مريم: هحاول، عايزة أنام
محمد: تمام يلا يا منار نطلع عشان ترتاح
في اليوم التالي ذهبت مريم للشغل والكل فخور بها، والمدير أيضًا يمدحهها
ذهبت مريم لمكتب إبراهيم وطرقت الباب وأذن لها بالدخول ومعها سهى
دخلوا وجدوا بنت تقف بجانبه وتمسك ورق فيه بعض القصايد
تضايقت مريم من اقترابها منه، ولم تعرف لماذا، ولكن فسرت هذا أنه لا يجوز هذا لأنه حرام
مريم لسهى: هى مالها شبه اللازقة كدا
سهى بضحك: معرفش تلاقيها معجبة بيه
مريم بغضب: أهو دا اللي كان ناقص
مريم لإبراهيم: حضرتك هنعمل إيه النهاردة
إبراهيم: اقعدوا بس الأول واقفين ليه؟ لغاية ما أخلص مع دعاء بتوريني قصايد لها وهى مبتدئة وبتدرب وعايزة أشوف لو فيها أي حاجة
سهى: اقعدي يا بنتي لما نشوف
إبراهيم كان يصحح لها بعض الأخطاء ويحذف أشياء ويضع المناسب، وهو بيأخذ القلم وقعت عينيه على مريم بالصدفة وجدها متضايقة وتنظر على دعاء، ابتسم عليها وكمل تصحيحه
مريم بضيق: هما مطولين ولا إيه يابنتي، أو نقوم نطلع لغاية ما يخلص ونروح نشرب حاجة تروق أعصابنا
سهى: أنا أعصابي كويسة ومتروقة، بس شوفي أنتِ أعصابك مالها
مريم: بتسلم عليكي ياستي مابحبش أنا شغل التلزيق دا
بقلم إيسو إبراهيم
سهى: وهى لازقة فيكي ولا فيه؟
مريم: ماشي لما نشوف آخرتها
سهى بهمس لمريم: أنتِ غيرانة ولا إيه؟
مريم بصدمة قالت: إيه؟! لا طبعا بس دا حرام يا بنتي وقوفها جنبه كدا
سهى: بس كدا؟
مريم: وهو في حاجة زيادة يعني؟
سهى: المفروض أنتِ اللي تجاوبي عالسؤال دا
إبراهيم كان خلص وواقف أمامهم ويديه في جيوبه ومستمع لحديثهم وهم مندمجين في الكلام
إبراهيم: خلصتوا نقاش؟
مريم وسهى اتخضوا وقالوا: إيه
إبراهيم: خلصت من خمسة دقايق لكن لقيتكم مندمجين جدًا ومالحظتوش خروج دعاء
مريم بدون تفكير: كويس إنها خرجت
إبراهيم: إيه؟
مريم بسرعة: قصدي أصلها طولت واحنا ملينا حقيقي يعني ومابنعملش حاجة كنت قولنا الشغل إيه وبعدين كمل معها ماتقعدناش جنبك يعني
إبراهيم ببسمة: اممم ماشي خدوا الورق دا واشتغلوا عليه
سهى: تمام
خرجوا من عند إبراهيم وسهى تهمس في أذن مريم: واضح إنك مش غيرانة
مريم بعصبية: ماتعصبنيش عليكي يا سهى إعجاب إيه دا كمان
بدأوا شغلهم، وفي آخر النهار كانت مريم انتهت من العمل
مريم: اليوم كان متعب النهاردة وأنا بحفظ الشعر دا
سهى: عشان ماكنيش مركزة النهاردة
مريم: معك حق أصل ماكلتش كويس
سهى: لا عشان مضايقة وغيرانة
مريم: كلمة كمان رخمة هقوم بالقلم دا مدخلاه في عينك أطلعه من ودانك
سهى: خلاص يا مريوم اهدي وروقي كدا غلط على صحتك
مريم: أنا ماشية ياختي
ذهبت مريم للبيت، ووجدت والدها يشاهد التلفاز
محمد: تعالي يا مريم
مريم: نعم يا بابا
محمد: في عريس هيجي بكرة المغرب
مريم بخضة: عريس!!!
ياترى هتوافق ولا لأ؟ ولو رفضت والدها هيجبرها عليه ولا إيه؟
#الشاعر_والطالبة
#بارت6
#إيسو_إبراهيم
تكملة الروايه من هنااااااا
تعليقات
إرسال تعليق