 |
أبوس إيدك خليني جنبك حتي لو هشتغل خدامة المهم البنت تتربي قدام عينك
- مينفعش يا فاطمة إنتي عاوزة تفضحيني قدام الكل
فاطمة بصدمة: جوازك مني بقي فضيحة يا محمود ؟ طب كنت حطيني في حساباتك اتجوزتني ليه طلما مستعر مني .. خليتني أخلف منك ليه ؟
محمود بجمود: كانت غلطة و هفضل أدفع ثمنها طول عمري
فاطمة: غلطة ؟ جوزنا كان غلطة و البنت مصيرها ايه قولي لا راضي تعترف بيها ولا تكتبها باسمك المفروض أعمل فيها ايه ا'قتلها
محمود بهلع: لا إنتي بتقولي ايه انتي لو فكرتي تيجي نحية بنتي أنا هفرمك انتي فاهمة ؟
انتي هتيجي تعيشي في القصر خدامة و دي بنتك انا متجوز و عندي عيال و مراتي لو شمت بس خبر إني اتجوزت عليها هتفتح عليا أبواب جهنم
فاطمة: روح يا شيخ الله يسامحك انا حبيتك من كل قلبي و انت مرمط فيا بقيت إنت و الزمن عليا .. هشتغل خدامة يا محمود عشان خاطر بنتي مش اكتر تكون جمب أبوها حتي لو مش معترف بيها و مسجلها بإسم حد تاني مش عاوزاه في يوم تجيب الحق عليا في أي حاجة
محمود بغيظ: ماشي يا فاطمة اتفضلي و هاتي فتون معاكي
فاطمة شالت فتون و محمود كان هياخدها منها فرجعت لورا و قالت: مش من حقك من ساعة ما سجلتها بإسم حد تاني من ساعة ما اتخليت عنها و عني فقد الحق دا يا محمود بيه
محمود بألم: هتحرميني منها يا فاطمة
فاطمة: عندك اللي هيعوضك لكن أنا معنديش غيرها و كملت بوجه خالي من التعابير اتفضل و أنا هحصلك بتاكسي مهو أصل الخدمة مينفعش تركب مع البيه في عربيته
محمود : إنتي لسه مراتي على فكره
فاطمة: لو تقدر تقولها للكل لو تقدر تقف في وش أبوك و مراتك و تقولها بعلو صوتك إني مراتك و دي بنتك و كملت بسخرية انت أخترت المال و السلطة على حساب بنتي السبب الوحيد اللي مش هيخليني أطلق منك و اخدها و امشي هو إنك عارف إن مرات أبويا مقوية أخواتي عليا و مقسية قلوبهم يلا يا محمود بيه
محمود في نفسه: سامحيني يا فاطمة والله ما في ايدي حاجة انا بحبك بس بحب الفلوس اكتر مهو محدش هيكره الفلوس
-------- اذكروا الله ---------
محمود دخل القصر و معاه فاطمة اللي حاضنة بنتها أوي كانها بتتحامي فيها بصت لمحمود و دمعة من عنيها فرت منها فجأ لقت اللي بيجري عليه و بيحضنه و بيقول بصوت طفولي بابا جه
بصت للولد و بصت لبنتها بحسرة و متكلمتش
محمود بفرحة: سليم حبيبي عامل ايه
سليم : انت اتاخرت أوي المره دي يا بابا جبت معاك حاجة حلوه ليا و لـ شاهي
محمود: جبت ليك لوحدك شاهي مش بتعرف تاكل لسه فين جدو
سليم : جدو جوه مستنيك
محمود دخل و فاطمة وراه لقي أبوه قاعد و ملامح الحده على وشه
محمود باس على ايده والده و قال: اذيك يا حاج
سالم : لسه فيا الصحة يا محمود و بص على فاطمة و جابها من فوق لتحت و قال بصرامة: مين دي
محمود بلع ريقة بصعوبة و قال: دي دي الخدامة الجديدة
فاطمة غمضت عنيها و دمعة من عنيها نزلت مسحتها بسرعة كانها بتحاول ترتب على قلبها النار اللي فيه
سالم: إحنا مش محتاجين خدامين جداد مشي يا بنتي من هنا الله يسهلك
فاطمة في نفسها: هروح فين أنا و بنتي لو رجعت بيت أبويا مراته و اخواتي مش عارف هيعملوا فيا إيه
محمود : هي مش خدامة بمعني خدامة يا بابا دي هتبقي الدادة لسليم و شاهي انت عارف إن مدام مني مش فاضية تربي و البنت محتاجة لبن طبيعي فـ فاطمة هترضعها طبيعي مع بنتها
الكلام نزل على ودان فاطمة زي الرصاص بقي هي هتربي و ترضع بنت ضرتها اللي جوزها اتخلي عنها عشان خاطرها يلا سخرية القدر
سالم بص لفاطمة من فوق لتحت و قام وقف و بقي يدور حوليها و قال بقسوة: تمام تربيهم و أول ما يشدو حيلهم هتمشي من هنا و منشوفش وشك تاني هتقعد في الاوضة اللي بره في الجنينه جمب اوضة الكلـ.ـب
فتون بدأت تعيط كأنها حاسة بظلمها هي و امها محمود خدها وداها الاوضة و كان لسه هيتكلم فاطمة شاوتله يسكت و اديته ظهرها
محمود بص عليها بحزن و مشي فاطمة بصت عليه و هو ماشي من ظهره و قالت : بنتي اللي مرديتش تعترف بيها دي صدقني هتحتاجها في يوم و هترفضك زي ما رفضتنا
قعدت ترضع بنتها و تمسح دموعها
بعد ست سنين..
فتون و شاهي بيلعبوا في الجنينه و مني أول ما شافتهم اتعفرتت و جريت عليهم
مسكت فنون و ضر.بتها بالقلم و قالت:-
انتي متلعبيش مع بنتي إنتي هنا خدامة انتي و أمك يعني تخدمي بنتي مش تلعبي معاها
فتون جريت حضنت أمها اللي سمعت كلام و نزل على قلبها زي الملح على الجرح
فاطمة: حسبي الله ونعم الوكيل في يا مرات أبويا انتي السبب في دا كله
فلاش باك...
قومي يلا عريسك مستني تحت هتوافقي تتجوزية و ياخدك و تغوري من هنا مش عاوزه أشوف وشك هنا تاني
فاطمة بصدمة: ....
كومنت رأيكم أكمل وإلا لا 👀
خادمة بقصر أبي ٢
قومي يلا عريسك مستني تحت هتوافقي تتجوزية و ياخدك و تغوري من هنا مش عاوزه أشوف وشك هنا تاني
فاطمة بصدمة: عريس ايه و جواز إيه يا مرات أبويا إنتي واعية للكلام اللي بقولية دا
- واعية يختي الراجل ميعبوش حاجة أخلصي كتب كتابك دلوقتي
فاطمة: لا اللي بيحصل دا هبل فين أخواتي يشوفوا أكيد مش هيوافقوا على المهزلة دي
فاطمة طلعت على باب الاوضة و نادت بعلو صوتها: يا عمرو يا عمرو عوزاك ثواني
عمرو طلع و قال: في إيه يا فاطمة و ايه صوتك العالي دا مش عارفه إن فيه ضيوف تحت
فاطمة: عمرو كويس إنك جيت اتفضل شوف الست والدتك بتقول ايه عريس ايه و جواز مين انتوا محدش عرفني ليه هو ايه اللي تيجي تقولي كتب كتابك دلوقتي
عمرو بهدوء: بصي يا فاطمة من الآخر كدا الراجل اللي تحت دا جمايلة مغرقانا شافك صدفه عجبتيه و اتقدم و أنا وافقت و مش قولت ليكي عشان عارف إنك هترفضي و من الآخر انا محتاج الشقة هتجوز فيها
فاطمة بصدمة: على حسابي و أخوك التاني موافق على كدا ؟!
عمور بسخرية: مدحت لا دا أول ما سمع إن في عريس غني متقدم ليكي قال على البركة اهو مش هنتعب في فلوس جهاز ولا هندفع حاجة
فاطمة: انتوا بتبعوني كدا يا عمرو هي دي وصية بابا ليكم
سحر: يلا يا بت بلاش دلع بنات مرئ بلا وصية بابا بلا وصية ماما اتفضلي اجهزي و انزلي تحت الراجل قاعد مستني و حسك عينك يحس بحاجة
فاطمة بدموع: مش مسمحاكم انتوا بتكرشوني من ملك بابا يا عمرو
عمرو: يووووه بقي مش هنخلص من اليوم دا
سحر مسكت فاطمة من شعرها و جرتها على جوه و قالت: يمين بعظيم لو ما لبستي و نزلتي دلوقتي لكون قتلا.كي عملتها قبل كدا و مستعدة أعملها تاني و سابتها و مشيت
فاطمة اتصدمت من كلامها عن الـ. ـقتل كانها بتتكلم عن فرخة مش روح لبست و نزلت لقت شاب تلاتيني وسيم قاعد و قدامة المأذون
محمود بابتسامة: اذيك يا فاطمة
فاطمة بسخرية: كويسه
مدحت: ابدأ يا شيخنا يلا
المأذون كتب الكتاب و بص لفاطمة و قال امضي هنا يا بنتي
فاطمة مسكت القلم كانها بتمضي على ورقة إعد.امها مش جوازها
محمود: مش يلا بقي يا فاطمة علي بيتنا
فاطمة بجهل : بيت ايه هو مش المفروض فيه فرح و قاعة و معازيم
محمود بجمود: انتوا معرفتوهاش وإلا ايه
سحر : تعيشي و تاخدي غيرها يا قطة العريس متجوز و مخلف مش عاوزه اشوف وشك هنا تاني و خدي شنطة هدومك أهي
فاطمة وقفت قدام أخواتها و قالت: بابا لو كان عايش دلوقتي و شافكم و انتوا بتعملوا فيا كدا كان قتـ'ـلكم و انا مش مسامحة يا عمرو و افتكر إنك جيت على يتيمة و بصت لمدحت و قالت: يا اللي المفروض تعوضني عن حنان أبويا بعتني عشان تاخد ورثي كنت قولي كنت اتناول لك بيه كنت عاوزه حضنك مش عاوزه ورث بصت لمحمود اللي أتأثر بدموعها و شال شنطتها و خرج وراها
بااك
فتون: ماما انا بكره مدام مني دي كل شويه تزعقلي و كمان ضربتني النهارده أنا والله مش عملت ليها حاجة كنت بلعب مع شاهي
فاطمة طبطبت عليها و قالت: معلش يا قلب امك استحملي شوية كمان و هنمشي من البيت دا خالص
فتون : لا يا ماما انا بحب عمو محمود و سليم هما دول بيحبوني و بيجبولي كل حاجه حلوة لكن مدام منى دي وحشة زي ساحرة شريرة
الباب خبط و دخل سليم و هو معاه شكولاتة و قال: تعالي العبي معايا يا فتون
فتون: لا عشان مدام مني هتضر'بني تاني
سليم : انا آسف يا دادة فاطمة علي اللي ماما عملته تلقيها كانت متعصبة بس
فاطمة: أنت ملكش دخل يا حبيبي باللي هي بتعمله تعال العب معاها هنا و متخرجوش من الاوضة دي
فاطمة خرجت و سابتهم مسكت تليفونها و اتصلت على محمود
محمود: عارف هتقولي ايه قوليلي بايدي ايه أعمله
فاطمة: بايدك كتير أوي انت سبتها تمد اديها على بنتي و انت واقف تتفرج لو كانت شاهي كنت عملت ايه هي مش دي بنتك و دي بنتك
محمود: اقصري الشر يا فاطمة و انا هراضي فتون
فاطمة بسخرية: معلش ما فتون بنت الخدامة تاخد على دماغها و تسكت لكن شاهي و سليم ولاد بنت الزوات لكن لا يا محمود حق بنتي يرجعلها وإلا
محمود بغضب : انتي بتهدديني
فاطمة لسه هترد عليه سمعت صراخ فتون حاي من الاوضة
فاطمة جريت تشوف فيه ايه و اتصدمت لما لقت ..
يتبع
خادمة بقصر أبي ٣
محمود بغضب : انتي بتهدديني
فاطمة لسه هترد عليه سمعت صراخ فتون حاي من الاوضة
فاطمة جريت تشوف فيه ايه و اتصدمت لما لقت فتون دراعها محر'وق
فاطمة بصراخ:- بنتي و بصت لسليم و قالت: لي كدا يا سليم أختك يا حبيبي تعمل فيها كدا
فتون كان بتصرخ من الوجع راحت عن فاطمة و قالت: ماما واوا سليم
فاطمة حضنت فتون و اخدتها و خطت دراعها تحت الماية الساقعة
سليم بصلها بغضب و سابهم و مشي
محمود علي الخط بيزعق و بيقول: الو فاطمة فتون مالها فاطمة ردي عليا
فتون بتعيط و بتقول: ماما مش عملت حاجه سليم حط معلقه على نار و حطها على ايدي سليم وحش مش بحبه
فاطمة: اهدي يا فتون اهدي يا قلب ماما
التلفون فجأة رن بصت لقت محمود اللي بيرن ردت بغضب و قالت : مراتك و إبنك عاوزين من بنتي ايه أفهم عيلة صغيرة عملت فيكم ايه والله العظيم يا محمود لو مجبتش حق بنتي منهم لهندمك العمر كله
محمود بغضب: انتي بتهدديني يا فاطمة متخلنيش أجي اكـ.ـسر دماغك دي استهدي بالله عيل و غلط عيال مع بعض
فاطمة بتهكم: عيال مع بعض ؟ بنتي لما ضربت شاهي و راحت اشتكت لـ مامتها و مني هانم ضربت البنت فاكرها يا محمود مقولتش عيال مع بعض ليه ؟
محمود بلع ريقة بصعوبة و قال: خلاص بقي يا فاطمة إنتي عارفه إن لو أنا اتكلمت ايه اللي هيحصل عديها و خدي البنت للمستشفى
فاطمة بتوعد: طيب يا محمود و لكن ورحمت أبويا و أمي لهخليك تندم العمر كله صبرا و قفلت في وشه الخط
محمود: اااه يا فاطمة غصب عني والله لكني مش هقدر أواجه حد بجوازي منك كدا هتحرم من الميراث ابوايا طول عمره كلامه واحد و هو النسب يرفعك مكانة مش يهدمك ولا يقلل منك
----
فاطمة أخدت فتون و راحت لسالم خبطت و دخلت
فاطمة: مساء الخير يا سالم بيه
سالم بجمود: مساء الخير يا فاطمة خير
فاطمة: سالم بيه بص كدا على فتون متربيه تحت عينك من و هي لسه في اللفة يرضيك سليم بشا يعمل في دراعها كدا
مني هانم ضر"بتها عشان كانت بتلعب مع شاهي و أنا طبطبت عليها و قولت ليها متلعبش معاهم تاني سليم بيه يجي لحد الاوضة و يحر'ق اديها كدا
سالم : سليم هو اللي عمل كدا انتي بتستهبيلي يا فاطمة دا عيل لسه مكملش ١٣ سنين هيعمل كدا إزاي
فاطمة: والله يا سالم بيه زي ما بقول لحضرتك كدا أنا رضعت شاهي مع فتون و ربيت سليم لكن بنتي يعملوا فيها كدا
سالم بغضب: سليم سليم تعال هنا
سليم جه و وقف قدام سالم و هو مش خايف كأنه بيتحداه
سالم : أنت اللي عملت كدا في فتون يا سليم
سليم: ايوه انا عشان متلعبش مع شاهي تاني و مامي بتيجي تضربنا إحنا الاتنين
شاهي هانم البدوي تلعب مع بنت الشغالة عندهم
سالم بص لـ سليم بفخر بس محبش يبين دا إن هو ماشي على خطاه بص لفاطمة و قال: طب روحي انتي وانا هبعت معاكي السواق تودوها المستشفى
فاطمة بصت لبنتها بحسرة و اخدتها و مشيت بصت على الاوضة اللي كانت فيها و خدت القرار خلاص دخلت لمت حاجتها هي و فتون و مسكت الخط اللي في التلفون و كسرتة و قالت: من النهارده مفيش محمود ولا عيلة البدوي دي خالص في فتون محمد عدوي بصت لفتون و قالت: رحلتنا هتكملها مع بعض يا قلب امك و زي ما جه علينا هحرمه منك لانه ميستتهلش إنك تكوني بنته
فتون كانت لسه بتعيط فاطمة أخدت اديها و قالت: تعالي يا حبيبتي
أخدت فلوس مرتبها طول الست سنين دول كانت بتحوشهم عشان يوم زي دا و من حظها إن المرتب كان كبير فعمل معاها مبلغ
أخدت فتون و خرجت من البوابة و دموعها على خدها لقت فتون بتطبطب عليها و بتقول: متزعليش يا ماما انا مش هسيبك أبدا أبدا
......
سالم: بص يا سليم اللي عملته دا غلط مينفعش تحر' ق حد و خصوصاً لو عيلة صغيرة انت تزعقلها و تخوفها بس لكن مينفعش اللي عملته دا ماشي يا حبيبي
سليم: مامي اللي قالت ليا اعمل كدا يا جدوا وإلا هتحر'قتي أنا و شاهي
سالم: امممم ماشي يا سليم امشي أنت دلوقتي بمجرد ما سليم خرج سالم قال: حسابك زاد أوي يا مني لكن صبراً
------
محمود جايب هدايا لـ فتون و دخل الاوضة عندهم لكن ملقاش حد بص على الدولاب المفتوح صدفة ملقاش هدومهم اتجنن و جاي يخرج داس على بقايا الخط مسكة و اتصدم جري على القصر و هو بيقول: فاطمة فاطمة إنتي فين لا متعمليش فيا كدا و صرخ صرخة جمعت القصر كله : بنتااااااي
مش عارفه الفصل قد ايه لأن كتبته في النوت فمجبش عدد الكلمات المره الجايه هكتب على الواتباد باذن الله 😃
مستنية رأيكم و توقعاتكم في الكومنتات يا حلويات 🤍
يتبع
خادمة بقصر أبي
بقلم زهره عصام
تعليقات
إرسال تعليق