 |
أنتِ بتقربي كدا ليه؟
بتبص عليه وبتقرب، وهو بيرجع لورا
وقال بتوتر: مش معنى إننا اتجوزنا النهاردة يبقى الدنيا تبقى سايبة، اها في قانون ياما لتكوني ناسية
قربت عليه أكتر وهى بفستان فرحها بدون ولا كلمة لغاية ما لزق في الحيطة، وبسرعة كانت بتخبط عالحيطة
وهو اتخض وغمض عينه
هى ابتسمت وبتبص على إيدها اللي لزق عليها صرصار صغير ميت
فتح عينه بهدوء لقيها بتبص على إيدها، ميل رأسه يشوف إيه اللي على إيدها، ولكن بصلها بقرف وزقها وقال: بقى كل الجو دا عشان صرصار حرام عليكي أعصابي سابت
بصتله بقرف ونفخت عالصرصار وقع من على إيدها وقعدت على كرسي من بتوع السفرة
هو بتنهيدة قال: هو ليه ردك عليا مش الكلام ومخلياه بالنظرات اللي محسساني إني في فيلم رعب؟
يابنتي اتكلمي وردي عليا الكلام مش بفلوس
بقلم إسراء إبراهيم
بصتله بنص عين وقالت: عايز إيه؟ ما أنا حقيقي مش طايقاك ولا طايقة الوضع دا
هو بابتسامة مستفزة: قال يعني أنا اللي دايب فيكي وفي الوضع دا، ما أنا كمان مجبر عالوضع دا ياختي
بصتله بتفكير وقالت: أنا كدا هبقى أختك نعيش زي الأخوات يا باشا تمام، كل واحد يشوف حياته ويكمل اللي بيخططله لا تتدخل في حياتي ولا أدخل في حياتك تمام؟
بصلها بتفكير وقال: كلام كويس وكل حاجة بس مش داخل مزاجي يا أخت تالين
بصتله تالين بضيق وقالت: إيه اللي مش داخل مزاجك بالظبط يا أخ رضوان؟
رضوان: هو هنكون أخوات ماشي، لكن مادخلش في حياتك دي يبقى في المشمش أصل أنا مش كيس لب
تالين: بحبه أوي
رضوان باستغراب: مين دا؟
تالين: اللب أكتر من المشمش
مسح رضوان على وشه وقال: قومي غير يابت هدومك وامشي على هقولك عليه
تالين بعصبية: ليه هو أنا الجارية اللي جنابك جبتها ولا إيه؟
رضوان بسماجة: لأ الخدامة اللي جبتها، كلمة الجارية دي كان أيام العصر الجاهلي، لكن دلوقتي تطورنا وخلينا نقول خدامة
بصتله تالين بعصبية ودخلت الأوضة تغير الفستان وهى بتتوعدله
بعد ربع ساعة سمع رضوان صريخ تالين اتفزع ووقع من عالكنبة وقام بسرعة ويقول: هو التكييف وقع عليها ولا إيه؟
ياريت يكون دا صح بس مايكونش جراله حاجة وهى تكون اتكسرت ولا حاجة
وفتح الباب بسرعة ووقف مصدوم ومبرق وقال: *****
ياترى شاف إيه؟
#جبرونا_عالزواج
#بارت1
#إسراء_إبراهيم
دخل الأوضة بسرعة وهى صرخت وقالت: أنت إزاي تدخل عليا الأوضة؟
بصلها بغضب وقال: واحدة سامعها بتصرخ أقوم استأذن يعني قبل ما أدخل ولا إيه؟
تالين ببرود: أيوا افرض يعني مش لابسة الطرحة تشوف شعري؟
بصلها رضوان برفعة حاجب وقال: أنتِ هبلة صح؟ أنا جوزك يا ماما فوقي
تالين: بس أنت قولت إننا هنكون أخوات
رضوان وهو بيمسح على وشه بغضب قال: يعني كنتِ بتلبسي الطرحة قدام أخوكِ؟
تالين: لأ، لأنه كان أخويا من أبويا وأمي، لكن أنت أخويا كدا مش من دمي
رضوان وهو بيخبط إيد على إيد قال: الصبر يارب، بصي يابت أنتِ اعملي اللي تعمليه، المهم كنتي بتصرخي ليه قبل ما أجي؟
تالين بضيق: الدبوس وقع مني عالأرض وأنا بفك الطرحة ودوست عليه بالغلط
نزل بسرعة عند رجليها وقال: فين غزك فين؟
بعدت تالين رجليها بتوتر وقالت: ما خلاص مش غزني أوي يعني بس اتخضيت فصرخت
خد نفسه وبصلها كانت لسه بالفستان بس فكت الطرحة
خدت بالها من نظراته ليها وقالت: باشا ابعد عينك اللي تتخزق عني أصل بتكسف وإنا مبحبش كدا
بصلها بقرف وطلع
بقلم إسراء إبراهيم
ضحكت على عصبيته وقالت: أنت لسه شوفت حاجة
بقى تقولي إنك مجبور عالجواز مني وأنت أصلا بتموت فيا وعامل نفسك تقيل وبتاع ماشي يا رضوان
بعد نص ساعة راح يخبط رضوان عليها عشان يدخل يغير
رضوان ساند عالباب وهو نعسان وقال: أنتِ ياللي عاملة نفسك عروسة افتحي الباب خليني أغير وأنام
فتحتله الباب ومعها هدومه كلها ورمتهم قدامه عالأرض وقالت: هدومك كلها أهي روح حطها في أوضة الأطفال أصل الدولاب يدوب كان على قد هدومي ومفيش سنتي تحط فيه هدومك
بصلها بغباء وقال: هدوم مين اللي خدت الدولاب كله، دا الدولاب واخد أطول عرضة في الأوضة، وكمان هدوم إيه اللي جبتيها دا ماكانش عبايتين وطرحتين يا مفترية
تالين بضيق: حطيت كل حتة في رف يلا بقى خد هدومك وروح أوضتك، اومال هتنام معايا في نفس الأوضة ولا إيه؟
هدومك تبقى معك في المكان اللي هتنام فيه، اومال أسيبهم في أوضتي ودولابي يعملوا إيه وأنا مش عايزاهم ولا من كتر حبي فيك هخليهم يونسوني
عارفة لو كنت فايقلك كنت اديتك باللي في رجلي
تالين باستفزاز: ماتقدرش أصلا تعملها عشان أنت
رضوان بيجز على سنانه وقال: عشان أنا إيه؟
تالين بخوف: عشان أنت متربي وأهلك ناس محترمة وأكيد مش هتضيع أدبك واحترامك وتربيتك وأخلاقك في ثانية كدا وتهدر تعب أهلك عالأرض
رضوان بتفكير: كلامك صح يلا بقى هسيبك تنامي عشان شكلك مرهق بالهالات السودا اللي مخلياكي تخوف كدا
بصتله بغضب وقفلت الباب في وشه، وجريت عالمراية تبص على شكلها
وقالت: بقى تتريق عليا يا رضوان ماشي حسابك معايا تقل
في اليوم التالي صحي رضوان على صوت مرعب فتح عينه بسرعة لكن صرخ من الخضة وأغمى عليه
ياترى شاف إيه؟ وعملت إيه؟
#جبرونا_عالزواج
#بارت2
#إسراء_إبراهيم
تعليقات
إرسال تعليق