رواية بيت العيله البارت الثالث والرابع 3_4_بقلم محمد محمود في موسوعة القصص والروايات جميع الفصول كامله وحصريه
رواية بيت العيله الجزء الثالث والرابع 3_4_بقلم محمد محمود في موسوعة القصص والروايات جميع الفصول كامله وحصريه
 |
رواية بيت العيله البارت الثالث والرابع 3_4_بقلم محمد محمود في موسوعة القصص والروايات جميع الفصول كامله وحصريه
بيت العيلة الجزء الثالث
بس لاحظت حاجه غريبه قوي في صوره قديمه ليا انا وياسمين وش ياسمين متشخبط عليه بالقلم جامد
ليه ياسمين بوظت الذكريات والصور بالشكل ده ؟ بصيت في صورة تانيه لياسمين مع مامتها لقيتها برده مشخبطه على وشها طلعت الصور كلها ابص عليهم ياسمين مشخبطه على وشها في كل الصور ايه الجنان ده !؟
المهم اني مالقتش الاكره في الدرج ده فتحت الدرج التاني لقيت خنفسه كبيره سوداء طالعه من الدرج بتجري وكانت هتيجي على ايدي صرخت جامد ورجعت لورى ووقعت على الارض الخنفسه عماله تمشي على التسريحة ووقفت على المراية
قربت بالراحه من الدرج والنور مش جايب ايه اللي موجود جوه لانه نور ضعيف قوي انا بخاف جدا من الكائنات الصغيره زي الفيران والحشرات انا حاسه اني هنهار كمان شويه اول ما جه البرق بصيت في الدرج لقيت كيس خدته وفتحته لقيت فيه ورق فتحته لقيت حد كاتب الحقوني وهقتلك .. وهقتلها .. انتحري .. اقعدي لوحدك .. ما تكلميش حد .. مش هتعيشي .. الموت ...
جسمي كله قشعر من الكلام ماقدرتش اكمله .. هنا خلاص وصلت لمرحله اني عايزة اخرج بسرعه من الاوضه دي فضلت اخبط على الباب بكل قوتي واصرخ عارفه ان امي وابويا هيبهدلوني على الدوشه دي بس في حاجات ما يتكتش عليها
فضلت اعمل كده ودا كان الحل الوحيد اللي سبته للاخر عشان ما ازعجش حد بس ما جاش في بالي خالص ان صوتي ما يوصلهمش كان في دماغي لما اعمل كده دا مفتاح الفرج اللي هيصحيهم ويجوا يفتحولي بس ما حصلش حاجه فجأة لقيت نفسي فعلا محبوسه في اوضه مش عارفه اخرج منها وفي فار عمال يتحرك في كل حته وخنفسه كانت عالمرايه وماعرفش راحت فين دلوقتي ؟! والصور المريبه والكلام الغريب اللي مكتوب .. قربت ناحية الدولاب فتحته لقيت هدوم قديمه وريحة وحشه جدا طالعه من جوة ما استحملتش وقفلته فضلت اكح وقررت افتح الشباك برغم الهوا والمطر والبرد بس عشان كده هتخنق فتحت الشباك والهوا دخل رزع الشباك في الحيطه اتكسر .. فضلت مكاني من الخضه .. وبعدها الهوا كان ساقع جدا فتحت الدولاب تاني وطلعت الهدوم اللي جواه رميتها على الارض والريحه عماله تزيد كمكمه فجأة لقيت شئ بشع جدا صرخت ووقعت على الارض واغمى عليا ......
صحيت لقيت نفسي دايخه جسمي كله متلج من الهوا اللي داخل الاوضه بصيت ناحيه الدولاب لقيت راس الخروف المدبوح لسه جوة وانا ببصلها ومش قادره اتحرك قومت وعضمي وجسمي كله مكسر لقيت نفسي برجع كل اللي في بطني .. روحت ناحية الدولاب فتحت الضلفه التانيه لقيت هدوم كتير برده وقعتها على الارض سمعت صوت حاجه معدن خبطت على الارض مع الهدوم قلبت في الهدوم بسرعه لقيت الاكرة جريت على الباب وفتحته اخيرا ورميت الاكرة بعدها على الارض لقيت ياسمين واقفه في وشي صرخت اول ما شوفتها من الخضه
قولتلها انتي واقفه هنا من امتى ؟! قالتلي من ساعة ما دخلتي ردها قتلني بجد .. قولتلها وما فتحتليش ليه يا ياسمين وانتي سمعاني بصرخ انا كنت هموت من البرد .. قالتلي انتي اللي طلعتي اوضتي القديمه من غير ما تستأذنيني فجأة لقيت ياسمين بتحط ايدها جوة بقها كانها هتبلع صوابعها انا رجعت لورى وهي عماله تبرق وطلعت ايدها ماسكه شعر عماله تشده من جوه زورها
مسكت بقي مش قادره ارجع تاني ومش عارفه اعدي من ياسمين انزل تحت لانها واقفه قدام الاوضه وقافله الطرقه اللي بتطلع عالصاله اللي منها هنزل للدور اللي تحت .. لقيتها بتقولي الحقيني يا سارة .. بصوت ونبرة هي اللي فاكراها عن ياسمين .. انا اتاكدت ياسمين مش طبيعيه ياسمين في حاجه مسيطره عليها ، فجاه لقيت ياسمين....
يتبع ...
بيت العيلة الجزء الرابع
فجأة لقيت ياسمين ماسكه في رقبتي بتخنقني وبتصرخ في وشي اقتليني يا سارة .. اقتليني قبل ما اقتلك .. وقعنا احنا الاتنين على الارض وهي فوقي وبتخنق فيا وعماله تصرخ لقيت الاكرة الحديد واقعه جنبي على الارض مسكتها وبكل قوتي ضربت ياسمين على دماغها ما اتحركتش فضلت اضرب بكل قوتي لحد ما تقريبا عضم دماغها اتكسر وساعتها هي صرخت وبعدت عني هنا انا طلعت اجري على الصاله عشان انزل تحت لقيت ياسمين نطت ومسكتني من رجلي وقعت تاني على الارض
فضلت اضربها برجلي في وشها عشان تبعد عني وتسبني وقبل ما اقوم تمسكني تاني عشان تمنعني انزل .. لحد ما جمعت طاقتي وضربتها برجلي جامد في وشها راسها رجعت لورى بسرعه وبقوة تقريبا رقبتها اتكسرت بس انا من الخوف ما اهتمتش حصلها ايه نزلت جري على تحت وجريت على اوضه بابا وماما وخبطت عليهم وانا منهاره وبعيط ماما طلعت بتقولي مالك يا ساره في ايه انتي كويسه ؟
ومبهدله نفسك كده ليه ؟ قولتلها ياسمين عايزة تقتلني وهي فوق دلوقتي البيت كله صحي ونوروا نور الصاله .. عارفين احساس النجاة وانك خلاص بقيت في امان الاحساس ده بالدنيا كلها .. حسيت اني خلاص في حضن ماما وان مافيش حاجه هتئذيني لكن الغريب ان وقرايبي بيصحوا واحد ورى التاني لقيت ياسمين طالعه من الاوضه اللي كنا نايمين فيها عادي وبتمسح عينيها وبتسال في ايه ؟؟!
ساعتها طلعنا فوق كلنا وبصينا في الصاله اللي فوق ماكنش في حاجه والاوضه اللي كنت محبوسه فيها زي ما هي مترتبه والشباك سليم والادراج والهدوم اللي كانت بره الدولاب كل حاجه في مكانها .. استغربت جدا في ايه ؟! الكل قالي انك حلمتي بكابوس وانك بس متوتره ببص على لبسي مبهدل ولسه سقعانه من البرد اللي حسيته فوق ازاي في حلم كده قولتلهم طب تعالوا نفتح الدرج اللي فوق بابا زعقلي قالي خلاص تعالي نامي مع مامتك وانا هنام في الصاله
سكت ساعتها ومارضتش اتكلم ودخلت نمت مع ماما وعيني جت عالساعه لقيتها 3 ونص
الوقت بيمشي بطئ قوي اليوم مش راضي يخلص .. بس انا اللي حصل ده مش مريحني حاسه اني مش في امان حتى مع ماما دلوقتي .. روحت عالمطبخ وقولتلها قايمه اشرب وجبت سكينة ورجعت على الاوضه والسكينه خبيتها جوه السويت شيرت عشان لو ياسمين ظهرت بشكلها المرعب اتخلص منها بسرعه ماما فضلت تمسح على راسي وتهديني
انا وهي نايمين في نفس السرير اللي لازق في الحيطه وفي وشه الباب ماما نايمه بيني وبين الحيطه وانا نايمه على طرف السرير في وش الباب ومديه ضهري لماما ووشي للباب عشان لو ياسمين دخلت ومع الوقت بدات احس ان الموضوع فعلا خلاص وياسمين مش هتيجي تاني وماما بتمسح على شعري لقيتها بتهمس في ودني الحقيني يا سارة بصيت لماما ورايه لقيتها ياسمين صرخت وطلعت السكينه وفضلت اضربها في بطنها جامد بجنون لحد ما بابا وخالاتي دخلوا علينا الاوضه لقوني ماسكه السكينة وغرقانه دم قالولي ايه اللي انتي عملتيه ده قتلتي امك ؟!!
بصيت لقيت ماما غرقانه في دمها والسكينة في ايدي اغمى عليا .......
صحيت لقيت نفسي نايمه على الكنبة برة والساعة 12 ونص وخمسه على الاضاءة الصفرا الخفيفيه اللي جاية من اللمبه اللي جمب الحمام اخر مره فكراها كانت 12 ونص كل ده عدى في الحلم في خمس دقايق بس !!
بصيت حواليا لقيت نفسي سليمه ومافيش دم ؟؟!! هل دا كله كان حلم بصيت على السلم اللي بيطلع للدور التاني لقيت خيال اسود بيطلع جري على السلم اتخضيت وفضلت ابص حواليا فجأة لقيت باب اوضه ياسمين بيفتح وياسمين واقفه قدامي وانا قلبي بيدق جامد فجأة لقيت ياسمين بتطول رجليها بتطول ودرعاتها بتطول وشعرها بيطول وجسمها عمال يكبر بشكل مخيف وانا مش عايزة اتحرك من مكاني ومش عارفه اتحرك اكيد هو ده الجن اللي جواها اللي ساكن في البيت ومخلي كل الحاجات دي تحصل
انا خلاص تعبت.. ايه اوحش حاجه هتحصل هتقتلتني اقتليني ؟؟ انا مش خايفه اقتليني ؟؟... لقيت الكائن اللي ظهر من ياسمين ده بيبخ حاجه سودا جوه بُقي وحسيت جسمي كله بينمل صحيت لقيت نفسي نايمه على السرير في اوضه ياسمين انا ما بقتش عارفه افرق بين الحلم والحقيقه والخيال .. حاسه اني دخلت في دوامه مش هطلع منها لقيت ياسمين بصالي ومبرقه ووشها بينور من الرعد والبرق رجعت تاني لاول لحظة انا وياسمين لما كنا عالسرير بس المرة دي....
يتبع ...
تعليقات
إرسال تعليق