رواية انتقام عاشقه البارت السابع 7بقلم سلمي تامر
رواية انتقام عاشقه الجزء السابع 7
رواية انتقام عاشقه الحلقه السابعه7كامله وحصريه
_والحمدلله ان ابننا نزل لأني مكنتش حابه اني اخلف منك بعد ما فلست
هنا ملامحه كلها اتغيرت وبصلها بغضب وحده
_اخرسي.. علياء اخرسي علشان اقسم بالله انا ماسك نفسي عنك بالعافيه ومراعي الحاله اللي انتِ فيها وانك لسه مسقطه
بس كلمه كمان ومتلومنيش على اي حاجه اعملها
ابتسمت بألم وسخرية
_ايه هتض.ربني..اصل انت خونتني ف ممكن اتوقع منك اي حاجه عادي
انتبه لكلمتها واتكلم بعدم فهم
_خونتك!..ده اللي هو امتى بقا علشان انا مبلحقش انام ساعتين على بعض اصلا من الشغل
ايه خونتك في احلامي وبعدين الكلام اللي قولتيه على اني فلست ومش عايزة تكملي معايا مانتي عارفه اني بعمل مشروع كبير وكلها مسألة وقت وهرجع احسن من الاول وكنتي بتدعميني طول الفترة اللي فاتت..انا مش مصدق كلامك ده اكيد فيه حاجه
شديت ابرة المحلول من ايديها لدرجه ان ايديها نزفت جامد وقامت وقفت بالعافيه ووقفت قصاده بغضب
_نور جاتلي ووريتني صوركم .. شوفتك انت وهي وانتوا حاضنين بعض
ها ايه تفسيرك يا فارس بيه عن الموضوع ده
فارس فهم هي ليه عملت كل ده وابتسم بسخرية
_وانتِ بقا من مجرد صور صدقتي اني خونتك صح
ياه عالثقة والعلاقة القوية اللي مش ممكن تتهد ابدا..بجد ابهرتيني يالولو..طب مفكرتيش انه ممكن يكون ملعوب علينا ونور عملت كده علشان توقع مبينا ولا مستوى تفكيرك موصلش لحد هنا ووقف
اتكلمت بغضب وصوت عالي
_الكلام ده لو هي بس اللي حضناك وانت ايدك جنبك... لكن انت كنت بتبادلها الحضن ده ، وبعدين متتكلمش عن الثقه لو سمحت
انا وثقت فيك بدل المره اتنين
اول مره لما رضيت اني اتجوزك في السر وراعيت الظروف اللي كنت محطوط فيها
تاني مره لما شوفت بعنيا صورك مع خطيبتك وقولتلي الورث ومش الورث وعديت الموضوع
لكن المرادي شايفاك في حضنها..حضن واحده كان فيه مبينكم مشروع جواز واكيد بتكنلك مشاعر
ايه بقا المفروض اعمل ايه علشان ابقى زوجه واثقه في جوزها وعظيمه
اسيبك لغاية ما تتجوزها وداخل عليا بعيالكم
_خلصتي
سأل ببرود وهو بيبص في عنيها بقوة
_اه خلصت
طلع من الاوضة ورجع بعدها بشاش وقطن ومطهر وسحبها من ايديها وقعدها عالسرير تاني واتكلم بهدوء وهو بيطهرلها جرح ايديها وبيلف عليها الشاش
_هبررلك انا ليه كنت حاضن نور للمرة الاولى والاخيرة وعايزة تصدقي براحتك مش عايزة أقسم بالله ما هتفرق براحتك برضو
اولا انا كنت مطحون في الشغل كالعاده وجالي اتصال من نور وهي بتعيط وبتقولي اقابلها في كافيه
Flash back
_فيه ايه يانور مالك طيب
نور ببكاء
_تعالى يافارس ولما تيجي هتفهم
قفل معاها وركب عربيته وراح للمكان اللي قالت عليه واول ما وصل استقبلته بعياط وانهيار واترميت في حضنه
استغرب رد فعلها ووبعدها برفق عنه وهو بيتكلم بهدوء
_ياماما فيه اي اهدي..مالك!
_انت ليه اتجوزت يافارس..انت مش عارف ان انا بحبك
اتنهد فارس وقعد عالكرسي وهي قعدت قدامه واتكلم بأسف
_نور انا اسف اني جرحتك..بس انا عمري ما وعدتك بحاجه ودايما بشوفك زي ريم اختي...انا فعلا بحب علياء ومش هقدر اتجوز واحده غيرها واتمنى تفهمي الحقيقة وتتقبليها وتبدأي حياتك مع شخص بيحبك ويستاهلك
نور مسحت دموعها واتكلمت بإبتسامه حزينه
_تمام يافارس..بس على الاقل نرجع صحاب تاني..متبعدنيش عنك بالشكل ده
_انتِ ك بنت تقبلي ان خطيبك او جوزك يبقى ليه صاحبه بنت
او انا حتى اقبل ان مراتي يبقى ليها صاحب ولد
اكيد لأ صح
ف اللي منقبلهوش على نفسنا منقبلهوش على غيرنا وحتة صحوبيتنا زي زمان دي ترجع مينفعش لأن مراتي مش هتبقى مرتاحه وبالتالي أنا كمان مش هبقى مبسوط وانا شايفها كده
لكن لو عايزاني كأخ ف عنيا ليكي ودايما هتلاقيني في ضهرك وقت ما تحتاجيني
جزيت على سنانها بعنف واتكلمت بإبتسامه مصطنعه
_تمام يافارس
قام وقف وهي وقفت ورجعت حضنته تاني
اتنهد بضيق وطبطب عليها بحنان اخوي وبعدها عنه للمره التانيه
_لازم امشي دلوقت علشان عندي شغل
Back
_ده اللي حصل..لو كنتي استنيتي شوية لحد ما ارجع من الشغل وسألتيني على حوار الصور ده كنت رديت عليكي وفهمتك كل حاجه ومكناش هنوصل للمرحله دي
عارف اني غلطت قبل كده وخطبت نور من وراكي بس صححت غلطتي دي ورديت اعتبارك وكرامتك قدام الناس كلها وخسرت عيلتي واملاكي علشانك ومهنش عليا زعلك او اني اشوف دمعه من عينك
قسما بالله ياعليا انا محبتش حد في الدنيا دي قدك
ليه بتعملي فينا كده..ليه بتوجعيني بالشكل ده
انتِ السبب انك خسرتي...
كان هيقولها ان هي السبب في موت ابنهم بس سكت ومكملش كلامه لما شاف حالتها وافتكر انها لسه تعبانه وممكن حالتها تدهور لو ضغط عليها اكتر من كده
اتكلمت بهدوء ونبرة حزينه
_سكت ليه..كمل...انا السبب في موته صح..فعلا انا السبب..انا السبب
فضلت تردد الكلمتين دول بشرود وبعدها قالتهم بإنهيار وهي بتبكي وبتضرب وشها بالقلم
_ايوه انا السبب..انا اللي غبيه ومتهورة وضيعته...انا لازم اموت زيه..لازم اتعاقب على اللي عملته
منعها بصعوبه واتكلم بغضب وخوف عليها
_علياء اهدي..علياء بس قولتلك اهدي ده قدره وعمره كده انا مش قصدي
فضلت تعيط لحد ما فقدت الوعي
راح فارس لبيت عمه واللي فتحتله مرات عمه
_نور فين
_وانت بتسأل عليها لي مش خلاص اتجوزت
_نور فين ومش هكرر سؤالي تاني
طلعت مور وهي بتخفي ابتسامتها ومتوقعه طلاقهم
_خير يا فارس فيه حاجه
ابتسم فارس ببرود واتكلم بمكر
_لأ مفيش يانور..كنت حابب اشكرك بس على اللي انتِ عملتيه معايا انا وعلياء وخلتيها تغير عليا وتدلعني الدلع ده كله
اصلك لما ورتيها الصور مصدقتش طبعا اني بخونها لأنها بتثق فيا اكتر من نفسها
بس غارت عليا لما لقيت واحده غيرها حضناني..لكن انا فهمتها اللي حصل واتصالحنا وقعدنا نضحك انا وهي عليكي وعلى اللي عملتيه
عيب والله يانور اخلاقك اللي بقيت في الارض دي
بس يلا جت بمصلحه وقربت اكتر من مراتي
باي يا بنت عمي نردهالك في الافراح ان شاء الله
وضحك بسخرية وسابها ومشي بإنتصار
اتحولت ملامحها للغضب وبدأت تكسر في البيت كله ووالدتها بتحاول تهديها
عدى شهرين على الاحداث دي وفارس كان بيتجنب علياء تماماً وبينام في اوضة تانية وهي بقيت مش بتخرج من اوضتها ومنعزلة عن الناس كلها ومحمله نفسها موت ابنهم وندمت على شكها في فارس لما عرفت الحقيقة منه
_____________
رجع من شغله في وقت متأخر كالعاده
دور بعنيه عن علياء في البيت كله وملقهاش
استغرب جدا وتوقع انها تكون راحت لأختها
لكن لمح البلكونة مفتوحه ف عرف انها جواها
اتحرك بهدوء ودخل البلكونه لقاها قاعدة على الارضيه وسانده دماغها على البلكونه وبتبص للسما اللي بتمطر بحزن ودموعها نازله مع المطر
نفخ بإنزعاج وقرب ناحيتها واتكلم بحده
_انتِ قاعدة في الجو ده ازاي وباللبس الخفيف ده..ناوية تنت.حري يعني
ملقاش رد منها ولسه على حالتها دي
اتكلم بحده اكبر
_علياء لما اكلمك تبصيلي..ادخلي جوه هتبردي
_سيبني يافارس..لو سمحت سيبني انا مش قادرة اتكلم
رجع شعره بإيده لورا بتوتر من منظرها وانحنى علشان يشيلها ومقاومتهوش بالعكس سندت دماغها على صدره وهو شايلها ومتجه ناحية اوضتهم
وحطها عالسرير بهدوء وكان لسه هيبعد لكن علياء مسكته من ايده منعته
_خليك جنبي يافارس النهاردة..انا بجد محتجالك
بص لملامحها بتوهان واللي كانت لتناديه ليها واتكلم بهمس
_انتِ جميله اوي..وشك كله برائة وجاذبية وعيونك بتشع حنان وحب...بس ورا كل ده فيه واحده قاسيه..مستعده تعمل اي حاجه علشان توجع اللي قدامها لو حسيت انه بيأذيها
مستعده تدوس على قلب حبها علشان بس تحقق انتقامها
_انا اسفه..عارفه ان الكلمه ملهاش لازمه بالنسبالك بس خلاص كفاية كده..انت عاقبتني ببعدك عني وتجاهلك ليا وده اسوء عقاب بالنسبالي
انا كان لما حاجه بتزعلني كنت بجري عليك وبحضنك واشتكيلك وكنت بتنسيني كل حاجه
حاليا انا ضعيفه ومقهورة ومحتجاك جنبي بس مش لقياك..عارفه اني السبب في كده بس خلاص كفاية يافارس
_مش بالسهولة دي ياعلياء..ياريته كان بالسهولة دي
_يعني خلاص كده !
_سيبي الوقت يداوي اللي حصل
_فارس انا في بعدك بموت بالبطيئ
كلمتها وجعته جدا وبعد عينه من عليها واتكلم من ورا قلبه
_معلش ياعلياء..انا محتاج شوية وقت علشان انسى اللي حصل.. تصبحي على خير
قام من جنبها وهي وطيت راسها بإستسلام وحزن ودموعها نزلت بصمت
عديت ثواني ولقيته لف تاني ورجع اخدها في حضنه بعنف وهي دموعها نزلت اكتر واتكلمت بأسف وهمس
_اسفه..بجد اسفه
_ششش خلاص..اللي حصل حصل واحنا مش ملايكه احنا جايين الحياة نغلط ونتعلم من اخطائنا
كفاية عياط وبعد لحد كده واهدي
_يعني هتسامحني
_هحاول..مش هكدب عليكي واقولك مية في المية مسامحك بس صدقيني هحاول
هزيت دماغها بأمل وفارس نام جنبها واخدها في حضنه وعدى اليوم على خير
________________
فاق فارس من نومه على صوت موبايله بيرن
بص جنبه لقى علياء نايمه
فتح المكالمه واتكلم بنعاس
_ايه يابابا
_فارس...الحقني يا ابني عمك هيسجني
يتبع....
انتقام عاشقه ٧
تفتكروا فيه ايه🧐
تفاعل حلو بقا والبارت طويل اهو بكتب فيه من امبارح قدروني وتفاعلوا🙂
داخلين على احداث نار🔥
بس هخلي البارت اللي جاي رومانسي 😂♥️
قولولي رأيكم في شخصية فارس وحبتوه ولا لأ
تكملة الروايه اضغط هناااااااا
تعليقات
إرسال تعليق