مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 رواية حب بالإجبار الفصل1-2-3-4-5بقلم رنا سليمان (جميع الفصول كامله وحصريه)

رواية حب بالإجبار الفصل1-2-3-4-5بقلم رنا سليمان (جميع الفصول كامله وحصريه)

_لو فاكرة ان اللي بتعمليه دا هيخليني ارجع عن قرار الطلاق تبقي غلطانة

_انا عايزة اطلق في اسرع وقت………كل الحكاية ان مينفعش ابين لاهلنا حاجة لحد ما نتطلق 

_كويس اننا متفقين علي موضوع الطلاق………اعملي حسابك بكرا هنروح عند ماما وياسمين هتكون هناك

_مش قادر تستني لحد ما نتطلق وبعدين تقابلها

_معتقدش ان دي حاجة تهمك في حاجة……….انا حُر اعمل اللي انا عايزه 

_قولتلك قبل كدة طول ما احنا متجوزين مينفعش تقعد معاها وتتعاملوا كأني مش موجودة 

_وانا قولتلك انا اعمل اللي انا عايزه في الوقت اللي انا عايزه ………..مش انتي اللي هتقوليلي اعمل اية ومعملش اية

سابني ومشي من غير ما يستني مني رد………خرج من البيت وقفل الباب وراه بعصبيه………قعدت بتعب علي السرير وبدات اعيط 

انا وياسين متجوزناش عن حُب ………بالعكس ياسين طول الوقت بيقولي انه عمره لا حبني ولا هيحبني في يوم …….. بس انا من اول يوم شوفته في وانا بحبه ……….لما جاه يتقدملي مكنتش مصدقة نفسي من الفرحة ………..بس اليوم دا اتحول من اسعد يوم في حياتي ل اسوء يوم في حياتي………في اليوم دا قالي انه بيحب واحدة تانية وانه مش عايز يتجوزني وجاه بس علشان يرضي مامته ساعتها طلب مني اني ارفضه علشان يبان قدام مامته اني انا اللي رفضت مش هو………بعدها مامته جاتلي وطلبت مني اني اوفق وانها عارفه انه بيحب ياسمين بس هي مش بتحبها وواثقة ان محدش هيحبه ولا هيخاف عليه قدي………قالتلي انها عارفة بحبي ليه من زمان و واثقة اني هقدر اسعده وان ياسمين بنت خالته لا حبيته ولا عمرها هتحبه في يوم ……….مكنتش عارفة اعمل اية……..كنت محتارة اوافق ولا ارفض ………..صليت استخارة ولقيتني بعدها بقول لبابا اني موافقه ………من يوم ما اتجوزنا وهو عمره ما عملني في يوم كويس وطول الوقت بيقلل مني ومن اي حاجة بعملها………تعبت وبقيت بدل ما انا بحاول اني اخليه يحبني بقيت عايزة الوقت يعدي علشان اطلق واطلع من حياته……….ندمت لاني وافقت علي الجواز منه وانا عارفة انه بيحب غيري

صحيت تاني يوم ………خرجت من الاوضة لقيته قاعد لابس هدومه ومستنيني 

_صباح الخير

_لسة بدري ……….بسرعة جهزي نفسك علشان نروح لماما

مردتش عليه ودخلت الاوضة تاني ……..اتنهدت وطلعت هدومي وبدات البس………نزلنا وروحنا علي بيت مامته ………اول ما شوفتها اخدتها بالحضن 

_تعالي يا حبيبتي ادخلي………اقفل الباب وراك يا ياسين

_طب حتي سلمي عليا يا امي

_مانا بشوفك كل يوم يا ياسين لكن خديجة مش بشوفها غير كل فين وفين……….خليك قاعد هنا علشان عايزة اتكلم مع مراتك شوية

دخلنا انا وهي الاوضة وقفلت الباب………قعدت جمبي علي السرير وبدات تتكلم وهي مبتسمة 

_قوليلي بقي عاملة اية انتي وياسين 

بدات اعيط……..اخدتني في حضنها وبدات تطبطب عليا

_في اية يا خديجة………مالك يا حبيبتي هو ياسين مزعلك في حاجة

_انا تعبت اوي يا ماما………ياسين طول الوقت بيقلل مني ومن كل حاجة بعملها ………طول الوقت بحاول اخليه يحبني وبحاول اتعامل معاه كويس بس لا………ياسين عمره ما هيحبني يا ماما ……….هو بيحب ياسمين وياسمين بتحبه………احنا الاتنين اللي عملناه دا كان اكبر غلط ……….انتي مكنش لازم تفرقي بينهم وانتي عارفة انهم بيحبوا بعض 

_انا لو كنت اعرف ان ياسمين بتحب ياسين عُمري ما كنت هفرق بينهم بس أنا واثقة كويس انها عمرها ما حبته ولا هتحبه………ياسمين حُبها ل ياسين حُب تملك وبس ………من وهما صغيرين مع بعض ومفيش حاجة قدرت تفرقهم عن بعض وكان جمبها طول الوقت ومعاها لكن اللي بتحب ابني بجد هو انتي يا خديجة وانا واثقه فيكي وانك هتقدري تخليه يحبك وينسي حبه ل ياسمين 

_يا ماما مينفعش ياسين مش شايفني اصلا هو عُمره ما حب ولا هيحب غيرها وجودي جمبه بيعذبني وبيعذبه وانا بجد مبقتش قادرة استحمل ……..تعبت والله 

_اللي بيحب حد بيعمل كل اللي يقدر عليه علشان يسعده يا خديجة ………بلاش تيأسي وتنزلي عن حبك ليه بالسرعة دي يا حبيبتي 

_لو كان في امل انه يحبني مكنتش هيأس يا ماما بس هو بيحبها هي وعمره ما هيفكر يحبني في يوم

_متقلقيش انا هتصرف 

_هتعملي اية

_سيبي الموضوع دا عليا وانا هتصرف

الباب خبط………فتح الباب ودخل

_ماما ياسمين وخالتو وصلوا

_طيب يا حبيبي انا جاية اهو

ابتسمت وطبطبت علي كتفي ……….خرجنا احنا الاتنين من الاوضة ……….سلمت عليهم وكنت طول الوقت قاعدة ساكتة

_مالك يا خديجة ساكتة ليه

_ولا حاجة يا طنط ………انا بس تعبانة شوية 

_اوعي تكوني زعلانة من قعدة ياسين مع ياسمين………دي ياسمين دي زي اخته بالظبط 

_لا دي خديجة عاقلة يا كريمة وعارفة كويس انهم زي الاخوات بالظبط مش كدة يا ياسين يا حبيبي 

_اه طبعا يا ماما……..الحمدلله انا شبعت 

_انت لحقت تاكل يا ياسين دي عمرها ما كانت اكلتك

_لا هي دي اكلة ياسين من ساعة ما اتجوزنا

_انتي شكلك منكدة عليه يا خديجة 

_دي خديجة دي نسمة والله تزعله ازاي بس يا ياسمين دي طول الوقت بتعمل كل اللي تقدر عليه علشان يبقي فرحان ومبسوط……..ربنا يخليهم لبعض يا رب

ابتسمت وفضلت ساكتة بعد رد ماما عليها………خلصنا اكل وقعدنا مع بعض شوية وبعدين روحنا 

_ياسين

_خير

_انا كُنت عايزة اتكلم معاك في موضوع كدة

_اتفضلي قولي علشان مش فاضي 

_احنا مش هينفع نتطلق

_لية ان شاء الله 

_علشان انا حامل

_نعم…….حامل؟!

…….يتبع……

(٢)

_انتي اكيد مش هتسيبي اللي في بطنك دا 

_انت عايزني اقتل ابني يا ياسين 

_مش احسن ما يجي علي الدنيا يلاقي ابوه وامه مطلقين وكل واحد فيهم مش طايق التاني

_لا دا انت اكيد اتجننت يا ياسين……..انا عُمري ما هقتل ابني ب ايدي

_مش بمزاجك يا خديجة……..اللي في بطنك دا هينزل بمزاجك او غصب عنك

_ياسين هو انت واعي للي انت بتقوله ……..دا ابنك اللي عايزني اموته دا

_بقولك اية انا مش ناقص حكم ومواعظ من حضرتك انا قولت الولد دا لازم ينزل في اسرع وقت

_لا انا مش قادرة اسمع منك حاجة تانية ولا بقيت طايقة اقعد معاك بعد كدة……….طلقني يا ياسين 

_هطلقك بس لما اللي قولتلك عليه يحصل الاول……..معنديش استعداد اني بعد ما اطلقك ارجعلك تاني بسبب اللي في بطنك دا

_وانت فاكر اني ممكن ارجعلك تاني بعد ما نتطلق بعد اللي انت قولته دا

_بقولك اية انا اللي عندي قولته طلاق مش هطلق غير لما اتاكد انك نزلتي اللي في بطنك دا

سابني ودخل الاوضة………قعدت علي الكرسي وبدات اعيط………مكنتش متخيلة ان دي تكون ردة فعله ………..كُنت فاكرة انه هيفرح بخبر حَملي دا ومعاملته معايا تكون احسن بس………بس اللي عمله دا خلاني مصدومة ومش مصدقة نفسي……….لاول مرة احس اني فعلا مش طايقاه ولا قادرة حتي اقعد معاه في مكان واحد ……….لاول مرة انا اللي اطلب منه الطلاق واكون عايزة اطلق وابعد عنه فعلا

عدا اسبوع وانا مش قادرة اشوف وشه ولا اقعد في مكان واحد معاه……….لقيته بيفتح عليا باب الاوضه وداخل وهو متعصب

_لسة معملتيش اللي قولتلك عليه

_للدرجة دي مستعجل اني اموت ابنك ب ايدي……..علي العموم متقلقش انا رايحة للدكتور بكرا واحدد معاه معاد

_كويس ………ورقة طلاقك هتوصلك بعد ما تخرجي من المستشفى 

الباب خبط……..سابني وخرج يفتح………اتنهدت بتعب ومسحت ب ايدي علي وشي وانا بحاول امنع دموعي انها تنزل……..فتح وكانت مامته ……….اول ما سمعت صوتها قومت بسرعة ورحتلها

_اهلاً يا ماما اتفضلي

_ بقالكم اسبوع محدش فيكم بيسأل حتي عليا قولت اجي واطمن عليكم بنفسي

_نورتي يا حبيبتي ………اتفضلي ادخلي

_طيب انا هسيبكم واروح مشوار صغير وارجع تاني

_رايح فين يا ياسين……….هو انا لحقت اقعد معاك يا ابني علشان تقولي انا ماشي

_معلش يا ماما مشوار مهم ولازم اروحه ………متقلقيش مش هتاخر

خرج وسابنا………مسكت في ايدي وقعدتني جمبها

_عملتي اللي قولتلك عليه يا حبيبتي 

ابتسمت وبصيت قدامي وبدات اتكلم

_عملت……..اول ما قولتله اني حامل فرح اوي يا ماما……..مكنتش مصدقة انه هيفرح كدة بجد من يومها وهو اتغير معايا وبقي معايا احسن من الاول

_ولسة يا خديجة يا حبيبتي………لما الحمل يبقي حقيقة ويجي ابنكم او بنتكم حياتكم كلها هتكون احسن وهيحبك وينسي ياسمين خالص

_يا رب يا ماما 

مقدرتش اقولها الحقيقة وان ابنها عايزني اقتل ابننا وانه مش طايقني لدرجة انه مش عايز يخلف مني ………..لاول مرة اكدب عليها لاني عارفة انها هتحاول بكل الطرق انها تمنع طلاقنا………بس المرة دي انا اللي مش عايزاها تعمل كدة لاني مبقتش طايقة اني اعيش معاه ولا  حابة اشوفه حتي

عدا ٣ ايام ………اكتشفت اني فعلا حامل والكذبة اللي كذبتها عليه بقيت حقيقة………مكنتش عارفة اعمل اية ولا اتصرف ازاي بس اللي كنت متاكدة منه اني فعلا مش قادرة اني اعيش معاه ولا يكون ليا ابن من شخص زي دا

بعتله رساله علي تلفوني

"انا عملت اللي اتفقنا عليه يا ريت تبعتلي ورقة طلاقي علي بيت بابا "

رد عليا برسالة 

"بليل هتكون ورقتك عندك……..اتمني منتقابلش تاني حتي ولو كانت صدفه "

بعد ما شوفت رسالته رميت التلفون علي السرير وبدات اعيط 

"ياسين "

بعتلها ورقة طلاقها علي بيت باباها……….اخيرا اتطلقنا وهقدر انا وياسمين نتجوز ……….روحت لماما علشان اقولها اني طلقت خديجة ……….اول ما شافتني سألتني عنها

_اهلا يا حبيبي………اومال خديجة فين

_انا بجد مش عارف مين فينا اللي ابنك يا امي 

_انتو الاتنين ولادي وبحبكم انتو الاتنين

_طيب تعالي يا امي علشان عايز اكلمك في موضوع مهم

_موضوع اية دا يا حبيبي 

_تعالي بس يا امي …….اقعدي 

قعدنا علي الكنبة………اتنهدت وبدات اتكلم

_ماما انا طلقت خديجة 

_طلقتها……..ازاي دي كنت بتقولي انك كنت فرحان بحملها وان علاقتكم بدات تتحسن

_حَملها اية انتي كنتي عارفة اصلا!

_ايوة……..بصراحة انا اللي قولتها تقولك انها حامل علشان معاملتك معاها تتحسن……..بس مكنتش متخيله انكم ممكن تطلقوا…….لية عملت كدة يا حبيبي دي كانت بتحبك

_هو انتي لية مصممة تمشي حياتي علي مزاجك انتي وبس لية كل حاجة لازم انتي اللي تخططي ليها……..لازم اتجوز خديجة ياما هتغضبي عليا ولازم انسي حُبي ل ياسمين لانها مش بتحبني زي حُبي ليها ولازم كمان احب الاستاذة خديجة علشان هي طيبة وبتحبني……….لية كل حاجة في حياتي انتي عايزة تكون ماشيه بمزاجك انتي بس

_للدرجة دي يا ياسين شايفني ظالمة………انا كل اللي عملته يا ابني علشان بحبك وعايزاك تكون مبسوط وسعيد في حياتك……….كل اللي عملته دا علشانك انت وبس يا ابني………كُنت عايزة اشوفك اسعد واحد في الدنيا ومحدش كان هيخليك سعيد قد خديجة لانها بتحبك………علي العموم يا ابني انا اسفه ومن انهاردة انا مش هدخل في حياتك تاني عيش زي ما انت عايش واعتبرني مُت علشان ترتاح مني

حاولت اكلمها واعتذرلها بس دخلت اوضتها وقفلت الباب عليها………قعدت علي الكرسي وانا ندمان علي طريقتي ليها ……..خرجت من اوضتها وهي بتعيط ………جريت عليها بقلق

_الحق خديجة يا ياسين………عملت حادثة ونقلوها المستشفى……….وديني لبنتي

فضلت ساكت ومش مستوعب اللي قالته ومش عارف اعمل اية

…….يتبع……

(٣)

_انتي مش قولتي انك نزلتي اللي في بطنك دا.........الدكتور ازاي بيقول انك لسه حامل

_دا اللي همك.........مش همك الحادثة اللي عملتها دي

_متغيريش الموضوع يا خديجة.........لية كذبتي عليا وقولتي انك نزلتيه

_علشان انا مش مجنونة يا ياسين علشان اقتل ابني ب ايدي..........لو انت مش عايزه ف انا عايزاه ومش هنزله واسمع كلامك ...........ومتقلقش انا مش عايزة منك حاجة انا هعرف اصرف علي ابني كويس ومش هنحتاج منك حاجة 

_مش وقته الكلام دا يا خديجة انتي لازم ترتاحي دلوقتي علشان انتي تعبانه وانت يا ياسين روح دلوقتي وبعدين تبقوا تتكلموا

_لا يا ماما انا مش همشي قبل ما نتكلم وننهي الموضوع دا

_وانا اللي عندي قولته يا ياسين.........انا مش هنزله واللي عندك اعمله 

_ماشي يا خديجة بس خليكي فاكرة اني قولتلك اني مش عايزه وانك هتنزليه بمزاجك او غصب عنك

_كفاية بقي………انت محدش همك خالص يا ياسين……….طب اعمل حساب ل وجودي حتي……….انت اتجننت علي الاخر عايز تقتل ابنك ……….ربنا بعتلك نعمة من عنده وانت عايز تخلص منها ………من امتي وانت بقيت من غير قلب كدة لا انت اكيد مش ياسين ابني اللي ربيته ……….كل دا علشان اللي اسمها ياسمين دي يا ريتها كانت بتحبك زي ما انت بتحبها……….انا كنت غلطانة لما خليتك تنجوز خديجة وقولت انك ممكن تنسي ياسمين وحُبك ليها مع خديجة………عايز تروح لياسمين اتفضل ولو علي ابنك متقلقش مش هتلمحه حتي ولا هتشوفه ………..روحلها بس خليك متأكد انك هتندم وانا مش مسمحاك ولا انا ولا الغلبانة دي

_انتي واقفة معاها ضدي

_انا واقفة مع الحق……….اطلع برا انا مش عايزة اشوف وشك تاني………وعمري ما هسامحك يا ياسين 

_ماشي يا امي بس خليكي فاكرة انك واقفتي معاها ضدي

خرج من الاوضة وقفل الباب بعصبية………قربت مني واخدتني في حضنها بدات تتكلم وهي بتطبطب عليا

_حقك عليا يا بنتي انا السبب في كل دا……….انا اللي خليتك توافقي عليه انا اسفه يا بنتي

_انا خايفه يعمل حاجة يا ماما………انا مبقاش عندي حاجة اخاف عليها غير ابني وخايفه ياخذه مني

_متخافيش مش هيقدر يعمل حاجة ولو فكر يعملك حاجة انتي او اللي في بطنك انا اللي هقف ليه ومش هسكت……..بلاش تفكري في اي حاجة ارتاحي انتي دلوقتي وبعدين نكلم 

_انا عايزة اروح……….مش عايزة اقعد في المستشفى هنا

_خليكي هنا بس انهاردة وبكرا الدكتور هيجي ويطمني عليكي وساعتها نطلب منه انك تخرجي………محتاجة حاجة اعملهالك

_لا شكرا……..عايزة انام شوية 

_طيب يا حبيبتي نامي شوية وانا هقعد هنا لو احتاجتي حاجة قوليلي

ابتسمت وهزيت راسي ب حاضر……….غمضت عيني ونمت

"ياسين "

_اية يا ياسين اتصلت بيا وقولتلي انك عايز تشوفني ضروري في حاجة ولا اية

_انا طلقت خديجة يا ياسمين 

_بجد………اخيرا يا حبيبي طلقتها ………انا بجد مش مصدقة نفسي انك اخيرا خلصت منها وهنبقي مع بعض يا حبيبي ……….بس انت شكلك مضايق لية 

_في مصيبة ………..خديجة حامل 

_حامل!………اكيد قولتلها تنزله مش كدة

_اكيد مش معملتش كدة وماما اتخانقت معايا بسببها……….انا مش عارف شكلي مش هخلص من البنت دي ابدا……….حتي بعد ما طلقتها 

_متقلقش يا حبيبي الموضوع دا هيتحل وهتخلص منها

_ازاي بس يا ياسمين هنعمل اية يعني………بقولك اتخانقت مع ماما والموضوع كبر وشكلنا كدة مش هنعرف نعمل حاجة 

_قولتلك متقلقش انا عارفة انا هعمل اية

_هتعملي اية

_مش مهم دلوقتي هبقي اقولك بعدين………المهم هتيجي تطلب ايدي من بابا امتي

_انا مُستعد اجي دلوقتي 

_طيب يلا بينا ………انا مصدقت خلصنا من اللي اسمها خديجة دي علشان نكون مع بعض 

_وانا كمان يا حبيبتي………انتي مش متخيلة انا كُنت بحلم باليوم دا من امتي 

_طيب يلا بسرعة نروح لبابا وتطلب ايدي منه 

_معنديش مانع يا حبيبتي يلا

مسكت ايديها وقومنا علشان نروح ل باباها ……….كُنت مبسوط باللحظة دي لاني كنت مستنيها من زمان

"خديجة " 

صحيت من النوم وحاولت اقوم من مكاني بس مقدرتش قربت مني وهي بتتكلم

_عايزة اية يا حبيبتي استني هاجي اساعدك 

ساعدتني اني اقوم وقعدت جمبي

_جعانه يا حبيبتي 

هزيت راسي ب لا 

_ازاي يا حبيبتي انتي مكلتيش حاجة من الصبح………وبعدين انتي حامل يعني لازم تاكلي علشان اللي في بطنك دا

_مليش نفس يا ماما والله

_طيب انا هروح اجيبلك حاجة تاكليها وتحاولي تاكلي يا حبيبتي 

_ماما

_نعم يا حبيبتي 

_شكرا علي كل اللي بتعمليه معايا………انا بجد مش عارفة اشكرك علي اية ولا اية حضرتك من يوم وفاة بابا وانتي واقفه جمبي وبتساعديني وكأني بنتك الحقيقة بتقف معايا دايما حتي لو كنت غلطانة ربنا يخليكي ليا لانك عوضتيني عن غياب امي الله يرحمها

_بتشكريني علي اية يا حبيبتي دا انتي بنتي………ربنا بعتك ليا لاني كان نفسي اخلف بنت انتي اكتر من بنتي يا خديجة واللي بعمله معاكي دا طبيعي يا حبيبتي 

_ربنا يخليكي ليا يا حبيبتي 

_ويخليكي ليا يا حبيبتي 

اخدتني في حضنها ……. قامت وقفت وبدات تتكلم

_انا هروح اجبلك حاجة تكليها عايزة حاجة تانية

_لا يا ماما شكرا

خرجت من الاوضة وقفلت الباب وراها ………بعد ما خرجت الباب خبط

اتعدلت في قعدتي وبصيت ناحية الباب

_ادخل 

اول ما الباب اتفتح ودخلت فضلت باصة علي الباب بصدمة ومش مصدقة

_ياسمين!

…….يتبع…….

(٤)

_اية اللي جابك يا ياسمين……..مش كفاية اللي حصل بسببك

_هو حد قالك اني كُنت السبب في الحادثة اللي عملتيها دي يا خديجة 

_مش بعيدة……….انتي مش حاولتي قبل كدة ولا انتي ناسيه 

_قولتلك ١٠٠ مرة مش انا اللي عملت كدة………انتي لية مصممة اني انا اللي عملتها

_بقولك اية يا ياسمين الكلام دا مش وقته……….لان انا مش هقتنع ان حد غيرك اللي عملها………يا ريت تقولي اللي عندك لاني تعبانه ومش قادرة اتكلم

_تمام……….يبقي نتكلم في المهم

_يا ريت

_بصي يا خديجة انا بحب ياسين وياسين بيحبني افتكر انك عارفة كدة كويس

_عارفة……….واعتقد دا ميهمنيش لاني اطلقت منه ومبقاش ليا علاقة بيه

_لا ليكي يا خديجة……….الكلام دا لو مكنتيش حامل بس دلوقتي حَملك دا عمل مشكلة ومخلي بابا مش موافق علي ارتباطنا دا لما عرف بحَملك 

_والمطلوب مني

_انتي عارفة كويس اللي مطلوب منك يا خديجة 

_قصدك اني انزله مش كدة

_اكيد………لو فعلا مبقتيش تحبي ياسين زي ما بتقولي تنزليه علشان تخلصي من اي حاجة تربطك بيه 

_بصي يا ياسمين انا قولت ل ياسين وهقولهالك انتي كمان ………انا اللي في بطني دا مش هنزله ولو علي موتي………وكدة كدة انا مش عايزة منه حاجة ومش هوريه وشي لا انا ولا ابنه وكلامك سواء انتي ولا هو مش هيجيب معايا نتيجة

_يعني انتي شايفة كدة يا خديجة

_ايوة……….واللي عندكم اعملوه 

_يعني دا اخر كلام عندك………تمام يا خديجة بس مترجعيش تندمي من اللي عمله……..ولو كان المرة اللي فاتت انتي اتهمتيني بحاجة معملتهاش ف المرة دي انا هعملها بجد………سلام يا خديجة 

اول ما فتحت الباب لقيت ماما في وشها 

_ياسمين……..انتي بتعملي اية هنا 

_مفيش يا خالتو انا……….انا كنت بطمن علي خديجة وبشوفها لو عايزة حاجة بس

_لا يا حبيبتي خديجة بنتي انا معاها ومش محتاجة لحد يكون معاها ………روحي انتي يا حبيبتي 

_ياسمين كانت مروحة يا ماما تعالي

سابتنا ومشيت ماما دخلت وقفلت الباب وقربت مني وقعدت جمبي

_كانت عايزة اية دي

_مفيش كانت بتطمن عليا

_بتطمن عليكي بردو……….اكيد ضايقتك بالكلام………قوليلي قالتلك اية وانا هتصرف معاها هي وفريدة اختي

_مفيش حاجه يا ماما والله متقلقيش حتي لو كانت ضايقتني بالكلام ف انا رديت عليها كويس 

_يا حبيبتي انتي لية مش عايزة تقوليلي 

_علشان والله ما في حاجة متقلقيش 

_لا حول ولا قوة الا بالله………..طيب يا حبيبتي انا جبتلك الاكل اهو يلا كُلي بقي

_مش قادرة يا ماما والله

_علشان خاطر اللي في بطنك يا حبيبتي لازم تاكلي كويس 

_حاضر

بدات اكل وهي قاعدة جمبي مستنية اني اخلص اكل

"ياسين "

شوفتها جاية من بعيد ………..جريت عليها وبدات اتكلم بسرعة 

_ها عملتي اية……..اقنعتيها 

_للاسف لا……….قالتلي ان مهما اتكلمنا اللي في دماغها هتعملوا ومش هتنزل اللي في بطنها 

_طب وبعدين هنعمل اية

_مش عارفة يا ياسين………وبابا كمان مش موافق علي خطوبتنا بسبب الطفل دا………بس متقلقش انا هتصرف

_هتتصرفي تعملي اية يا ياسمين يعني

_اكيد هلاقي حل بس سيب الموضوع دا عليا يا حبيبي متشلش هم حاجة 

_ماشي………يا رب تعرفي تعملي حاجة 

_متقلقش هعمل اللي هقدر وهنهي الموضوع دا 

_ماشي……..يلا علشان اروحك بقي

_لا يا حبيبي انا عايزة اقعد معاك شوية بلاش نروح دلوقتي 

_وانا كمان يا حبيبتي بس الوقت اتاخر……….كلها كام يوم يا حبيبتي وموضوع خديجة دا ينتهي وعمو يوافق علي جوازنا ونبقي مع بعض 

_يا رب يا حبيبي 

مسكت ايديها ومشينا علشان اروحها

"خديجة"

عدا تلات ايام………خرجت من المستشفى وماما صممت تيجي تقعد معايا علشان مقعدش لوحدي

_يلا يا حبيبتي الاكل جاهز

_حاضر يا ماما………مش عارفة اقولك ايه يا ماما علي تعبك دا

_تعب اية يا حبيبتي بس دا انتي بنتي لو مش هتعب علشانك هتعب علشان مين بس

_ربنا يخليكي ليا يا ماما………هو لسة مكلمكيش بردو

_حتي لو كلمني انا مش عايزة اتكلم معاه تاني لحد ما يعقل ويعرف ان اللي بيعمله دا غلط 

_علشان خاطري يا ماما كلميه ………انا طول الوقت حاسه بالذنب لاني السبب في خصامكم دا

_يا حبيبتي متحسيش بالذنب المفروض هو اللي يحس بالذنب مش انتي هو اللي غلط ولازم يتحمل نتيجة غلطه دا وانا مش هسامحه غير لما يعقل 

_ربنا يهديه يا رب

_يا رب يا بنتي ……….يلا بقي بلاش كلام وخلصي اكلك كله يا حبيبتي 

_حاضر

بدات اكل وهي كانت قاعدة جمبي ……….انا اكتر انسانة محظوظة في الدنيا بسبب وجود ماما في حياتي………دايما جمبي وبتقف جمبي طول الوقت …….حقيقي انا بحبها وبخاف عليها وبعتبرها امي بس انا وجودي معاها هيكون فيه ضرر كبير عليا وعلي ابني……….لازم امشي علشانه وعلشان واثقه ان ياسين مش هيسبني في حالي لحد ما ابني يموت ……….لازم ابعد واسيبهم ………غصب عني اني اسيبها من غير ما حتي اقولها بس كل دا علشان خاطر ابني ………..الساعة كانت ٢ الفجر ………فتحت باب الاوضة واتاكدت انها نايمة قفلته بالراحة واخدت شنطتي وروحت لحد الترابيزه سيبتلها ورقه علي الترابيزه ومشيت………فتحت باب الشقة رجعت بصيت علي البيت بحُزن ……….كان غصب عني اني امشي بس مكنش عندي حل غير كدة علشان احمي ابني من شر ياسمين اللي حاولت قبل كدة تقتلني واللي مش بعيد تحاول تعملها تاني ………قفلت الباب ومشيت وقررت اني ابدا حياتي من جديد بعيد عنهم

………بتبع…….

(٥)

_انا تعبت يا ياسمين……….احنا بقالنا ٥ سنين علي الوضع دا………..انا من حقي اكون اب 

_وانا قولتلك الف مرة يا ياسين اني مش مستعدة اخسر كل اللي وصلتله دا علشان اخلف 

_وانا استحملت بدل السنة خمسة علشان خاطرك وانتي بردو مصممة علي اللي في دماغك وانا بصراحة تعبت

_انا اسفه يا ياسين مش هقدر اعمل كدة لاي سبب مهما كان

_وانا كمان اسف يا ياسمين انا كمان مش هقدر اكمل معاكي بالطريقة دي………انا من حقي اني اب زي اي حد

_انت عايزنا نطلق يا ياسين 

_ايوه يا ياسمين………يظهر اني غلطت لما رميت خديجة وابني علشان حُبي ليكي

_قصدك انك ندمان علي حُبك ليا مش كدة

_مبقتش تفرق خلاص ندمان ولا مش ندمان ………انا ماشي

سيبتها ومشيت ……….خرجت من البيت وقفلت الباب بعصبية……….خمس سنين متجوزين وانا بحاول اقنعها بالخلفة واني عايز اكون اب وهي رافضة الموضوع……….بسبب نجاحها وانها بقيت موديل عظيمة مش عايزة تبوظ جسمها بسبب الحَمل و الخلفة ……..خمس سنين في خناق وزعيق كل يوم……..كُنت فاكر ان حياتنا هتبقي احسن حاجة لاننا بنحب بعض بس طلعت غلطان……….ياسمين مش زي خديجة ولا عُمرها هتكون زيها ………خديجة طول الوقت كانت بتهتم بيا وبكل حاجة تخصني سواء الاكل اللي بحبه بمواعيد شغلي كل حاجة كانت بتهتم بيها عكس ياسمين………انا اخر اهتماماتها طول الوقت نسياني ومش بتفكر غير في نفسها وبس ………..بعد ما اتجوزت ياسمين عرفت قيمة خديجة وعرفت اني عُمري ما هلاقي زيها واني خسرتها…………انا لو بس اعرف مكانها هعمل المستحيل علشان تسامحني وابدا معاها صفحة جديدة وننسي اللي فات

"خديجة"

_يزن………يلا يا حبيبي علشان نروح المدرسة 

_علشان خاطري يا ماما سبيني انام شوية 

_لما نرجع من المدرسة تبقي تنام براحتك يا حبيبي يلا لو سمحت 

_انا تعبان اوي يا ماما مش هقدر هروح المدرسة انهاردة 

_اية دا انت تعبان وريني كدة……….اه انت سخن اوي احنا لازم نروح للدكتور علشان يديك ابرة علشان تبقي كويس يا حبيبي 

_لا لا ابرة لا انا بقيت كويس اهو

_يا سلام بقيت كويس دلوقتي……..طيب يلا ادخل اغسل ايدك و وشك علشان تروح المدرسة 

_هو كل يوم مدرسة بقي انا تعبت

_سمعاك يا يزن

دخل غسل ايده و وشه………ساعدته انه يلبس هدومه……….مسكت ايده ونزلنا و وصلته لحد المدرسة وبعدين روحت علي شغلي………..خمس سنين عدوا وانا وقتي كله ما بين الشغل ويزن………بدات حياة جديدة بعيدة عن كل اللي فات………سافرت اسكندرية وبعد ما سفرت بفترة كلمت ماما وعرفتها مكاني وطلبت منها متقولش ل اي حد علي مكاني ………بعد ما عرفت مكاني جاتلي اسكندرية بقيت تقعد معايا شهر او اتنين وترجع القاهرة تاني ………بعد ما ولدت يزن بدات ادور علي شغل لحد ما لقيت شغل في شركة استيراد وتصدير……….بقيت بحاول اوفق بين الشغل ويزن……….مديري في الشغل مكانش عنده مانع من وجود يزن معايا ……….بقيت عـايشة حياتي ليزن وبس مبقاش عندي وقت اني احب حد من تاني ولا بقيت حابة الفكرة اصلا………..روحت الشركة وطلعت علي مكتب مديري وبدات اخبط

_ادخل

فتحت الباب ودخلت وقفلت الباب ورايا

_صباح الخير يا مستر معتز

_صباح النور يا خديجة

_اسفة علي التاخير 

_ولا يهمك انا عارف انك مشغول مع يزن……..هو عامل اية صحيح

_الحمدلله كويس……..دي نوت فيها كل مواعيد حضرتك انهاردة ودا الفطار 

_علطول مستعجلة علي الشغل كدة يا خديجة………ماشي يا ستي

_بعد اذن حضرتك 

_استني يا خديجة 

قام وقف وقرب مني…….بدا يتكلم وهو باصص في الارض

_خديجة هو……..هو انتي فكرتي في الموضوع اللي كلمتك فيه

_مش محتاجة افكر ……….انا قراري وخداه من زمان………انا اسفه يا مستر معتز بس انا مش موافقة 

_بس انا من حقي اعرف اية السبب

_حضرتك مش مُجبر انك تسمع حكاية تافهه زي دي

_خديجة انا قولتهالك وهقولهالك تاني وعندي أستعداد اقولهالك الف مرة………..انا بحبك يا خديجة وعندي استعداد اسمعك حياتي كلها ومش هزهق اتكلمي انا هسمعك ومش مهم اي حاجة تانية 

_تمام يا مستر معتز ……….انا واحدة اتجوزت اكتر واحد كانت بتحبه في حياتها رغم اني عارفه بحُبه ل غيري مع ذلك استحملت وقولت اكيد هيحبني مع الوقت بس دا محصلش بالعكس دا كان بيعاملني اسوء معاملة ممكن تخايلها حضرتك وبردو استحملت بسبب حُبي ليه حَملت في يزن طلب مني اني انزله وانا رفضت وحبيبته اللي كُنت بشوفها معاه واللي كانوا عايشين حياتهم وناسين اني لسة مراته وكانوا دايما بيقربوا من بعض وبيحبوا في بعض قدامي وطلبت هي كمان مني اني اموت ابني ب ايدي علشان بس باباها رفض انهم يتجوزوا وانا حامل في ابنه لحد ما هربت وسبتلهم الدنيا كلها علشان خايفه علي ابني

حاولت امنع نفسي اني اعيط ………مسحت علي وشي

_عيطي يا خديجة……….هترتاحي لما تعيطي

_لا……….ميستهالش اني اعيط علشانه………..افتكر انك عرفت السبب رفضي يا مستر مُعتز

_اللي قولتيه دا مش سبب يخليكي تكرهي الحُب وتقفلي بابه وتكوني ل ابنك الاب والام ……..خديجة انا مريت بتجربة زيك ويمكن اسوء………مراتي خانتني وانا مكنتش بحب قدها في حياتي عيشت صدمة كبيرة بس دا مش معناه اني اقفل علي نفسي باب الحُب دا واعيش نفس اللي انتي عيشتيه بالعكس لان دا مش سبب يخليكي تقفلي علي نفسك صدقيني يا خديجة………انا وانتي عيشنا تجربتين اصعب من بعض بس دا مش معناه اننا نقفل علي نفسنا ونمنع نفسنا من الحياة يا خديجة……….ارجوكي يا خديجة اديني وادي نفسك فرصة وحاولي توافقي وصدقيني انا هعوضك عن كل اللي فات

_مش هقدر 

_حاولي علشان خاطر يزن………حاولي وانا والله اوعدك اني هعوضك عن كل اللي فات يا خديجة 

هزيت راسي ب حاضر وبدات اتكلم وانا باخذ نفسك بتعب 

_دلوقتي معاد الانترفيو اللي حضرتك عامله علشان تختار الموظف الجديد 

_ماشي ابداي دخليهم وادخلي معاهم بعد اذنك 

_حاضر

خرجت لقيت كذا واحد واقف قدام الباب قربت من اول واقف علي الباب

_ممكن اعرف اسم حضرتك لو سمحت

_ياسين رافت………خديجة!

بصتله بصدمة وانا مس مصدقة نفسي ولا كُنت اتخيل اني ممكن اقابله في يوم حتي 

_ياسين!

…….يتبع……….

تكملة الرواية من هناااااااااا