رواية احببت مجنونة الجزء 5 (عشق بالخطأ) الفصل السادس عشر 16بقلم نجمه براقه جديده وحصريه

رواية احببت مجنونة الجزء 5 (عشق بالخطأ) الفصل السادس عشر 16بقلم نجمه براقه جديده وحصريه

P16

تاني يوم

#زين

امبارح رجعت متأخّر من عند عمي مراد ونسيت اعدي علي التصليح اجيب الاب توب ولما وصلت البيت وقفت في البلكونة شويه وانا ببص علي بلكونة نسمه،، لقيت النور مطفي وشكلها نامت، ف روحت علي سريري ونيمت وصحيت الصبح، روحت اشتريت خاتم علشان اطلب ايدها وبعدها روحت جبت الاب توب ورجعت البيت حطيته علي الشاحن علشان كان فاصل.. وطلعت في البلكونة تانى يمكن اشوفها وبعد انتظار شوفتها راجعه هي وباباها بالعربية وبعد شويه باباها خرج تاني، وانا رجعت اتصل بيها وابعتلها رسايل، وبعد دقايق لقيتها طالعه في البلكونة وفي ايدها التليفون

زين _ قلقتيني عليكي

نسمه _ مكنتش قادره اتكلم مع حد

زين _ ليه يا نسمه

نسمه _ حاسه اني غلطت كتير وبحمل بابا حمل فوق حمله بتهور*ي ده

زين _ ايه اللي حصل تاني

نسمه _ قولتله علي موضوع الفيديوهات

زين _ طيب ليه قولتيله،

نسمه_ كان لازم يعرف مني قبل ما يعرف من بره

زين_ ومين كان هيقولو

نسمه _ اكيد هيعرف

زين _ مش اكيد... بس مش مشكله اذا كده هترتاحي

نسمه _ ربنا يسترها

زين _ انتي ليه خايفة كده، هو مش هيتعرضلك تانى

نسمه _ بردو هيسكت بسهوله دي

زين _ ايوه، بس انتي بطلي قلق من غير داعي وتعالي عاوزك

نسمه _ عاوزني فين

زين_ عندي

نسمه _ لا بلاش

زين _ يلا هستناكي تحت

نسمه _ مش هقدر

زين _ يلااا

نسمه _ طيب في ايه

زين _ لما تيجي هتعرفي

نسمه _ ماشي

قفلت معاها ونزلت تحت فتحت الاب، وشغلت موسيقى، وبعدين فتحت الباب واستنيتها وراه

#نسمه

طلعت من اوضتي ولقيت ماما خارجه، استنيتها تمشي، وبعدين روحت لزين ولما وصلت لقيت الباب مفتوح،

نسمه _ زين.... انت فين

زين يطلع قدامها فجأه _ Booo.. I'm here

نسمه بفزع _ ياشيخ حرام عليك خضتني

زين _ ههههه قلبك ضعيف

نسمه _ هو في كده

زين بإبتسامة _ تعالي اتفضلي

نسمه _ مش هقدر دلوقتي، بابا يمكن يرجع في اي وقت

زين يمسك ايدها ويدخلها _ خمس دقايق

نسمه _ زي الخمسه اللي قبل كده؟

زين بإبتسامة _ ايوه

نسمه _ طيب في ايه

زين يطلع علبة فيها الخاتم ويفتحها قدامها _ تتجوزيني

نسمه بإبتسامة _ دا وقته تفتكر

زين _ انسب وقت

نسمه _ مش هينفع اقول رايي دلوقتي، ممكن تستنا يكون المشكله اتحلت

زين _ نسمممه بربك بلاش القلق الزيادة ده، خلاص المشكله اتحلت قلقانه من ايه

نسمه _ اتحلت ازاي يعني، ماهو اكيد هيعمل حاجه تانيه لو متقبضش عليه

زين _ انسي انا بأكدلك انه مش هيعمل حاجه تانى

نسمه _ ربنا يستر بقا.. اهم خدو اقوالي والاكونت بتاعه وان شاءلله يمسكوه

زين _ هما مين دول

نسمه _ مباحث الانترنت، لسه جاية انا وبابا من هناك

زين _ ليييه يابنتي، ما خلاص المشكله اتحلت ليه تدخلو البوليس تاني

نسمه _ اتحلت ازاي

زين _ هي اسراء مقالتلكش

نسمه _ قالتلي علي ايه

كان لسه هيجاوبني، لكن قطع كلامه دخلت بابا والبوليس

سليمان يروح يشدها من ايدها _ انتي ايه اللي جابك هنا

نسمه بلخبطه _ انا انا كنت

الظابط _ انت زين قابيل

زين بحيره _ ايوه انا، في ايه

الظابط_ اقبضو عليه

نسمه _ هتقبضو عليه ليه.. في ايه يا زين

زين _ معرفش،. في ايه يا حضرت الظابط

الظابط _ انت متهم بابتزاز بنت الدكتور سليمان، ونشر فيديوهات خاصه بيها بدون ازن منها

زين _ ايه اللي حضرتك بتقوله ده لا مش انا طبعا

سليمان يضربه بالقلم _ انت!.. بس الغلط مش عليك،.. الغلط علي بنتي اللي بتجيلك البيت وبترقص معاك،،، قدااامي

زين _ يادكتور استنا الكلام ده محصلش انت فاهم غلط

نسمه _ بابا اسمعني، زين مش ممكن يعمل كده

الظابط _ هات يابني الاب توب ده

زين _ لا محدش يلمسه

الظابط _ اخلص يابني

زين يحدث نفسه بخيبه _ لو شافو الفيديوهات هلبسها بجد ونسمه كمان هتصدق

الظابط يفتح اليو تيوب ويوريهم الفيديوهات المنشوره

نسمه بصدمه_ ايه ده

زين _ مين اللي عمل كده... انا منشرتش الحاجات دي

الظابط يفتح الفيسبوك _ ودا مش نفس الحساب اللي بتبتزها بيه... شوفي انتي كده،،، هو ولا مش.هو

نسمه بدموع _ هو

زين _ انا معرفش جه عندي ازاي، نسمه اوعي تصدقي، اقسملك ما انا

نسمه بدموع _ لما ملقتش فايده منى، عملت كده علشان تجبرني اشتغل معاك صح... طيب ليه

زين _ محصلش يا نسمه صدقيني مش انا... دكتور صدقني انا امبارح دافع الفلوس اللي طلبها الولد ده

سليمان _ شوف شغلك يا حضرت الظابط، مستني ايه

زين يبعد ايديهم عنه _ لا استنو... نسمه، مش انا واسألي اسراء هتقولك اللي حصل انا مكدبتش عليكي Please believe me

نسمه تسيبه وتمشي

زين _ نسمه اسمعيني،،، دكتور صدقني مش انا

الظابط _ هاتوه

رجعت البيت و وقفت في البلكونة وشوفته هما ومكلبشينوه وبياخدوه معاهم، ولما شافني حاول يفلت منهم، وبقا يزعق و يقولي مش انا، وأنا رجعت ورا الحيطه واتداريت منه

مشكتش فيه ثانيه واحده ان هو اللي بيعمل كده معا ان الفيديوهات مارحوش لحد غيره،،، معرفش ازاي قدر يمثل عليه كده وازاي انا صدقته

بعد شويه بابا دخل عندي الاوضه ولقاني ببكي وقبل ما اتكلم ضربني بالقلم

نسمه ببكاء _ بابا

سليمان _ ولا كلمه،

ساميه تيجي من بره وتسمعهم _ في ايه سليمان

سليمان بعصبيه _ لو طلعت من الاوضه دي تانى، هحاسبك انتي

ساميه _ ايه اللي حصل فهموني.. في ايه يا نسمه

سليمان _ بتروح للمغنواتي في بيته وبتتصور معاه والاستاذ ناشر فيديوهات ليها على اليوتيوب، شايفه تربيتك

نسمه ببكاء _ متصورتش معاه واللهى

سليمان بعصبيه _ امال الفيديو اللى بترقصي معاه فيه ده معناه ايه

ساميه _ صح الكلام دا يا نسمه

نسمه ببكاء _ معرفش صورنا ازاي انا مكنتش اعرف انه بيصور

سليمان يضربها بالقلم _ وتروحيلو بيته وترقصي معاه ليه

ساميه تحضنها _ سليمان مش كده

سليمان _ من النهارده مش هتطلع من اوضتها، لغيت ما ا جوزها لأول عريس يجيلها.... هه عريس الظاهر اني خرفت. وهو حد هيتقدملها تاني بعد كده

#مريم

كنت قاعده في الجنينة وبفكر اوصل ازاي لتسجيلات الكاميرات اللي في ال Nightclub لغيت ما جه فريد، ولما شوفته فكرت اطلب منه هو الفلوس، بس كنت محرجه منه ومش عارفه هطلبهم منه ازاي

فريد _ قاعده لوحدك ليه

مريم _ بشم شويه هوا، حضرتك عامل ايه

فريد _ كويس.. مالك بقا

مريم بتنهيده _ مش مرتاحه ياعمي

فريد _ ياسر زعلك؟

مريم _ ياسر مصمم انه مغلطش معايا ومش هيعترف غير بدليل

فريد _ هو شكله كان سكران ومش حاسس بالي بيعمله، اعذريه

مريم _ هو قالي ان في الليلة دي جالك البيت قبل ما يروح الشقه ... صح الكلام ده

فريد _ صح هو جه علي الساعه واحده كده واتخانقت معاه ومشي

مريم _ اتخانقت معاه ليه

فريد _ كان جاي شارب، ومبوظ سمعتنا بسبب البنات اللى بيسهر معاهم كل يوم

طيب ازاي رجع البيت الأول، يعني هيكون وداني الشقه ورجع لهنا وبعدين رجعلي تاني ولا ايه،، مش فاهمه حاجه

فريد _ مالك

مريم _ ممكن اطلب من حضرتك طلب

فريد _ اكيد

مريم _ محتاجه خمسين الف جنيه

فريد _ خمسسين الف... ليه

مريم _ اوعدك هردهملك في اقرب فرصة

فريد _ مش علشان ترديهم او لأ ، انا عاوز اعرف عاوزاهم ليه

مريم _ عاوزة اشوف تسجيلات الكاميرات اللى فى ال Nightclub والمدير طالب خمسين الف

فريد _ هتعملي ايه بتسجيلات الكاميرات

مريم _ معرفش، بس ممكن اعرف اي حاجه اثبت بيها ل ياسر ان هو اللي عمل كده

فريد _ خلاص سيبيلي انا الموضوع ده

مريم _ هتعمل ايه

فريد _ انا هجبلك التسجيلات

مريم _ بجد

فريد _ بجد

مريم _ انا. متشكره اوي

فريد _ بس قوليلي، ناويه علي ايه بعد ما تثبتيلوه

مريم _ هيطلقني

فريد _ انا مش موافق

مريم _ عمي انا مش هقدر اعيش معاه بعد اللي عمله معايا،

فريد _ حاولي تحبيه، انتو نصيبكم تكونو مع بعض

مريم _ لا انا ولا هو متقبلين ده

فريد _ كنت عارف انكم بتمثلو عليه من كام يوم، بس رغم كده بقا عندي امل انكم ترتاحو مع بعض

مريم _ عمرنا ما هنرتاح وانا عمرى ما هقدر احبه وانا عارفه ان هو اللي اذاني

فريد _ علشاني انا ادي لنفسك فرصه، وانا متأكد انك هتحبيه، وهو كمان

مريم _ خلينا بس ندور علي اي دليل واثبتله كلامي وبعدين نتكلم في الموضوع ده

فريد _ تمام، وانا هساعدك بس بشرط

مريم _ هو ايه

فريد _ متسبيش هنا قبل سنه

مريم بذهول _ سنه! ... عاوزني اقعد مع ياسر سنه كامله، اذا كنا مش طايقين بعض في الشويه اللي بنقعدهم فوق ، هنستحمل سنه

فريد _ عشان خاطري

مريم _ ارجوك ياعمي، بلاش، انا مش هقدر

فريد _ مليش خاطر عندك يعني

مريم _ ليك طبعا وربنا يعلم بس دي حاحه فوق احتمالي

فريد _ اتحملي، هي سنه واحده بس

بقا يحاول معايا وانا في الاخر وافقت وانا مش عارفه هعيش ازاي معاه سنه كامله وانا بكرهو...

بعد ما خلصت كلام معاه طلعت الاوضه ومليت البانيو وقعدت جوه

#ياسر

رجعت البيت ودخلت الاوضه وملقتهاش هناك، ف قلعت الجاكت والساعه وانا وداخل الحمام قلعت التيشرت، وفجأه لقيتها في البانيو، ف قفلت الباب وطلعت تاني، وبعد شويه طلعت وهي لابسة البورنص

مريم بعصبيه _ انت ازاي تدخل الحمام من غير ما تخبط

ياسر _ انا حره، وصوتك ميعلاش عليه مره تانيه

مريم _ مش حر، طول ما انا هنا، تخبط قبل ما تدخل

ياسر _ اهدي علي نفسك شويه، وركزي في الفترة اللي بقيالك... كلها يومين

مريم _ دا همك

ياسر _ ايوه،

مريم _ ماشي بس لغيت ما ينتهو اليومين دول تخبط قبل ما تدخل

ياسر ببرود _ اوك نصبر يومين كمان مش هيجرا حاجه، بس اعملي حسابك، انك هتروحي الشقة مش هيحصل حاجه هنا

مريم _ وكأنك متأكد اني مش هقدر اثبت عليك حاجه

ياسر _ اها، مش هتقدري عشان مفيش اي اثبات

مريم _ تمام، هنشوف

ياسر يروح نحية الحمام ويقف جمبها ويبتسم ببرود _ يووومين... تشاوو

#مريم

مبقاش قدامي غير تسجيلات كاميرات ال Nightclub وجاره اللي في الشقه، ودا مسافر ومش عارفه اوصله ازاي.... لو مقدرتش اجيب اثبات وحصل اللي عايزة انا هموت نفسي، احسن

#سيف

كنت قاعد في الاوضه مستني مسك ترجع وبعد وقت رجعت وقفلت وراها الباب بسرعه وجت تجري نحيتي وهي متوتره

مسك _ زين يا سيف

سيف _ مالو زين

مسك _ قبضو عليه

سيف _ انتي بتقولي ايه

مسك بدموع _ قبضو عليه، بتهمة ابتزاز واحده ونشر فيديوهات علي اليوتيوب، انت لازم تروحلو

سيف _ امتي ده وازاي طيب

مسك _ معرفش، اهي الاخبار ماليه الانترنت، المهم تروحلو دلوقتي وتخرجوه.. زين ميباتش ليله في السجن

سيف _ طيب اهدي دلوقتي، خليني اتصل بحد يفهمنا في ايه

مسك _ اتصل ب نبيل مدير اعماله

سيف _ تمام

اتصلت ب نبيل، وقالي اللي حصل ، ولما سالته اذا كان زين عمل كده فعلاً، قالي هو بينكر وبيقول انه ملهوش علاقه بالموضوع، .. قفلت معاه واتصلت عشان احجز علي اول طياره، لقيت مفيش طيران النهارده

مسك _ طيب وبعدين .. انت لازم تنزل وتشوفه

سيف _ مفيش طيران النهارده، بس انا هتصرف متقلقيش

مسك بدموع _ بسرعة طيب

سيف _ خلاص روقي انا هبعتله محامي

مسك _ هات التليفون لحظة

سيف _ هتعملي إيه

مسك _ هات بس

#زين

مفيش غير اسراء هي ورا كل ده، مفيش حد دخل عندي غيرها في وقت نشر الفيديوهات، وكمان مقالتش ل نسمه اني حليت المشكله، ومش بعيد تكون هي اللي متفقه مع الولد ده

كنت قاعد مع شوية ناس شكلهم غريب وكلهم مركزين عليه وكل شويه يمسكو في التيشرت ويسألوني اذا بتاعي ولا لأ ، ومنهم واحد جايبلي سيجاره وبيقولي ولع.. وبعد شويه كانو هيضربوني، بس جاتني العنايه الألهيه، والعسكري طلعني و وداني عند الظابط، ولما روحت لقيت عبقرينو ومياده هناك

عبقرينو يحضنوه _ عامل ايه

زين _ مش كويس

مياده _ متقلقش هتخروج بأذن الله

زين _ ياريت، انا اتخنقت جوه

الظابط _ اسيبكم شويه مع بعض

طلع الظابط وانا قعدت معاهم

عبقرينو _ فهمنا ايه اللي حصل

حكتله كل اللي حصل

مياده _ يعني انت شاكك ان البنت صحبتها دي هي اللي عملت كده

زين _ مفيش غيرها

عبقرينو _ اسمه ايه الحساب اللي حصل منه الابتزاز

زين _ قاهر القلوب

عبقرينو يقلب في التليفون وبعدين يورهولو _ مين في دول

زين يقلب في الصفحات _ اهو، هو ده

عبقرينو _ تمام، بص مش عاوزك تقلق، انا هتعامل مع موضوع الصفحه، والمحامي يشوف شغله في الباقي

زين _ هتعمل إيه ماهي اكيد عملت تسجيل خروج من كل الاجهزة وكمان الفيديوهات كانو عندي يعني التهمه لبساني

عبقرينو _ متشغلش بالك انا ليه تصرف، بس قولي

زين _ ايه

عبقرينو _ انت ازاي اتصورت وانت بترقص معاها، شكلها مكنتش تعرف

زين _ انا اخدته من تسجيلات الكاميرات اللي في البيت

عبقرينو _ وموصل الكاميرات دي علي ايه

زين _ الاب توب والفون

عبقرينو بإبتسامة _ اه، طيب بسيطه مش عاوزك تقلق، ماشي

زين _ مقلقش ازاي بس

عبقرينو _ سيف باعتلك محامي شاطر هيعرف يطلعك بسرعه وانا كمان هكون معاك

مياده بإبتسامة _ طالما اندومي قالك هكون معاك يبقا كفاره مقدمآ

عبقرينو بقرف _ ممكن تسكوتي

مياده _ لا بقا مش هسكوت هو في البيت و هنا كمان

عبقرينو _ مياااده انا على اخرى منك

مياده بنرفزه _ بلاش تحكمات ذكوريه دكتتوريه بقا

عبقرينو _ انتي هتسكوتي ولا

زين _ بااس انتو جاين القسم تتخانقو

عبقرينو _ مش بتعرف تختار المواقف اللي تستعبط فيها

مياده _ بقولك طلقني انا مش طايقه العيشة معاك

عبقرينو _ مياااده روحي وانتي

الظابط يدخل _ في ايه هنا

زين بهمس _ ايه جابكم

عبقرينو بهمس _ مسك اتصلت بيه وقالتلي اجيلك وهي شبطت....

بعد ما مشيو جه المحامي واتكلم معايا، وبعدين الظابط حقق معايا تانى وقولتله كل اللى حاجه، وبعدين طلب من واحد زميله يجيب اسراء

#اسراء

بعد ما خلصت كل حاجه وعرفت ان زين اتمسك ونسمه اتجرست، فتحت اليوتيوب عشان اتفرج على الفيديوهات اللي نشرتها، وكنت مبسوطه اني وقعتهم وكسبت من وراهم كتير بس بسرعه ضاع احساسي بالفرحة لما ركزت ان فيديو الرقص بتاعها معاه متصور من مكان عالي، يعني متصور من كاميرات مراقبه بتسجل صوت وصوره، وساعتها اكتشفت اني غبيه وتقريبا كده ضيعت نفسي، لا تقريبا ايه ده انا اكيد ضيعتها و وديتها في داهيه،.. انا كلمت حسام علي حساب قاهر القلوب عند زين ونقلت الفيديوهات من الاب للفلاشه عنده بردو، وغير نشر الفيديوهات، كله عنده، ولما خلاص اقتنعت اني هروح في داهيه طلعت وروحت ل حسام علشان يقولي اعمل ايه

تكملة الرواية من هناااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل

متابعه لصفحتنا على فيس بوك هنااااااااااا

الرواية كامله الجزء الأول1 من هناااااااااا

الرواية كامله الجزء الثاني2 من هناااااااااا

الرواية كامله الجزء الثالث3 من هناااااااااا

الرواية كامله الجزء الرابع4 من هناااااااااا

الرواية كامله الجزء الخامس5 من هناااااااااا

مجمع الروايات الكامله اضغط هناااااااا