رواية عشق الروح الفصل الثامن 8بقلم نور عزام
رواية عشق الروح الفصل الثامن 8بقلم نور عزام
الحلقة الثامنة
اوصلتها شروق الي منزلها , دلفت الي حجرتها , همت بتبديل ملابسها لكنها سمعت رنين هاتفها
نظرت الي الشاشة وجدته "آدم"
اجابته علي الفور
آسيا : ايوة يا آدم
آدم : انتي فين ؟!! و اتأخرتي كده ليه ؟!!
آسيا : انا في البيت اهو لسة داخله , كنت هغير هدومي و اكلمك
آدم : اصلي قلقت لما اتأخرتي , المهم عملتوا ايه ؟؟
آسيا : مفيش اشترينا كل حاجة الحمدلله
آدم : جبتي فستانك ؟؟؟
آسيا : ايوون
آدم : لونه ايه ؟؟
آسيا (ضاحكه) : اشمعني
آدم : قولي بس
آسيا : ازرق
آدم : اكتر لون بحبه
آسيا : و انا كمان
صمت طويلا ..
آسيا : ادم ! مالك سكت ليه ؟؟
آدم : عاوز اقولك حاجة بس خايف تفهميني غلط
آسيا (بقلق ) : لا قول
آدم : آسيا انا نفسي اشوفك اوي , و اكيد انتي كمان نفسك تشوفيني مش كده ؟؟
آسيا ( بإرتباك) : ازاي يعني مش فاهمه ؟!!
آدم : يعني.... انا هبعت لك صورتي و انتي تبعتي لي صورتك , نفسي اشوفك يا آسيا !!
شعرت برجفه في اوصالها و صمتت تماما
آدم : آسيا..
آسيا (بتنهيده) : نعم
آدم : ضايقتك ؟
آسيا (بإرتباك) : لا ...بس..فاجئتني يعني
آدم : مش حاسه ان نفسك تشوفيني ؟؟
آسيا (بتردد) : نفسي بس....
آدم : خايفه من ايه ؟؟
آسيا : مش عارفه !
آدم : خايفه مني يا آسيا ؟؟!
لم يجد منها رد
تنهد بضيق ..
آدم : معقول خايفه مني يا آسيا , بعد ده كله ! انتي بقالك شهور بتتكلمي معايا و خلاص عرفتي عني كل حاجة , حكيت لك حتي عن كل حاجة جوايا مش ظاهره عن احساسي بكل حاجة حواليا , بقيتي بتشاركيني في كل حاجة في حياتي اي اختيار بشاركك فيه , ازاي بعد كل ده و لسه خايفه مني ؟!! معقول لسه مش واثقه فيا ؟! طب ليه ؟!!
آسيا : مش مسأله ثقه يا آدم
آدم : امال ايه ؟؟!
آسيا : بص يا آدم انا طول عمري عاقله و بحكم عقلي في كل تصرفاتي , عمري ما كنت مجنونه ولا متهوره , بس....
آدم : بس ايه ؟؟
آسيا : بس معاك بعمل كل حاجه عكسي !! عكس طبيعتي , عكس شخصيتي , انا عمري ما خبيت , عمري ما كدبت , عشانك و عشان علاقتي بيك اللي مش لاقيه ليها وصف دي اتصرفت تصرفات كتير غريبه عليا , تصرفات مجنونه و متهوره ! ساعات بحس اني مبقتش انا
آدم : بس انا مقولتلكيش تخبي ولا تكدبي يا آسيا
آسيا : لازم اخبي و اكدب يا آدم , امال هقول ايه ؟! واحد لاقاني صدفه علي النت و كان حاسس انه هيرتاح في الكلام معايا و انا كمان ارتحت له و بقينا بنتكلم علي طول !! دي تصرفات بني آدمين عاقلين بذمتك ؟!!
آدم : مش لازم كل حاجه نحسبها بالعقل و المنطق يا آسيا , انا عشت طول عمري عاقل و بتصرف تصرفات بني آدمين عاقلين , عمري ما حسيت بالسعاده اللي انا حاسس بيها دي غير..من ساعه ما عرفتك و قبلي تكلميني
آسيا : و انا كمان مبسوطة بس ...
آدم : بس ايه ؟؟
آسيا : اللي اعرفه و اتربيت عليه ان الحاجة اللي مقدرش اعملها في النور و قدام الناس تبقي حاجة غلط
آدم : كلامك معايا غلط يا آسيا ؟
آسيا : العلاقه كلها غريبه من الاول , انا بحاول مفكرش كتير عشان متعبش بس... انا مش مرتاحه كده يا آدم .. مبسوطة منكرش .. بحب اتكلم معاك .. بحب اسمعك , بس... مش مرتاحه
آدم : طيب ايه اللي يرضيكي ؟؟
آسيا (بحيره) : مش عارفه !
آدم : انتي ندمانه انك قبلتي تكلميني يا آسيا ؟؟
آسيا (بدون تردد ) : لا
آدم : طب بتثقي فيا ؟؟
آسيا : نفسي ..
آدم : يبقي لسه !
آسيا : آدم انا اعرف عنك كل حاجة اه بس من خلالك ! من خلال كلامك انت , نفسي اشوف بنفسي اعرف بنفسي , بس مش عارفه ازاي !
آدم : طيب ممكن تمشي معايا خطوه خطوه و انا هوصل بيكي ل اللي انتي عاوزاه في الاخر
آسيا : مش فاهمه !
آدم : يعني سيبي كل حاجة لوقتها احنا عرفنا كل حاجة عن بعض خلينا نشوف شكل بعض دلوقتي و واحده واحده انا هدخلك في حياتي بالصورة اللي انتي طالباها و هخليكي تعرفي و تشوفي عني كل حاجة بنفسك
آسيا : كلامك بيخوفني
آدم : بالعكس انا بطمنك !
آسيا : علي قد ما انت بقيت كتاب مفتوح قدامي علي قد ما بحسك غامض !
آدم : اصبري معايا و انتي هتعرفي كل حاجه بنفسك صدقيني
آسيا : حابه اصدقك !
آدم : و انا حابب انك حابه بس نفسي تبقي مقتنعه
آسيا : طيب انت عاوز ايه دلوقتي ؟؟
آدم : عاوز اشوفك , ابعتي لي الصورة علي الواتس , اوكي ؟؟
آسيا (بقلق) : و انت ؟؟
آدم : هبعت لك طبعا , هبعت دلوقتي اهو اول ما نقفل
آسيا : طيب
اغلقت معه و ظلت تنظر الي الهاتف في توتر الي ان سمعت صوت النغمه المخصصه ل ال "WhatsApp"
و بأيدي مرتعشه فتحت الصورة و شهقت بصدمه !!!
نعم اخبرها كثيرا إنه وسيم و ان الفتيات تتباهي بإصطحابه معها الي اي مكان لكن ...
لم تتوقع إنه بكل ذلك القدر من الوسامه !!!!!
يا الله كيف لإنسان ان يتمتع بكل ذلك القدر من الوسامة و الجاذبيه !! وسيم الي درجه متعبه !!!
لأول مره تشعر آسيا بإنعدام الثقه !! هي ليست بذلك القدر المفرط من الجمال , نعم تعلم انها جميله و الكثيرون اخبروها بذلك و تري نظرات الإعجاب في اعين الفتيات قبل الشباب لكن.......لأول مرة تشعر انها ليست جميلة بذلك القدر كي تتناسب مع وسامته المبالغ فيها !!
افاقت من شرودها و افكارها علي صوت نغمه ال WhatsApp مرة اخري و آدم يسألها عن صورتها
شعرت بتوتر شديد و اخذت تبحث علي صورة لها في هاتفها , كل الصور اصبحت لا تروق لها ! لا تعجبها اي صورة , مر اكثر من 10 دقائق و هي تبحث عن صورة مناسبة الي ان عثرت علي واحده اخيرا و بعد تردد كبير قامت بإرسالها , ليأتيها إتصال منه فور وصول الصورة
آسيا (بقلق) : ايه يا آدم ؟!
آدم : مين اللي بعتي لي صورتها دي ؟!
آسيا (بخوف) : انا !! هو في حاجة ؟!
آدم : طبعاا في !
آسيا (و قد إزدادت نبضات قلبها ) : في ايه ؟!!
آدم : في انك احلي بنت شوفتها و هشوفها في حياتي
آسيا (بتنهيده إرتياح ) : حرام علييييك يا اخي ... خضتنيييي
آدم (ضاحكا) : لا بجد , انتي ازاي حلوة كده ؟!
آسيا (بغير تصديق) : بجد ؟!!
آدم : طبعا بجد ! انتي مش بتشوفي نفسك في المرايه ولا ايه ؟!!
آسيا : و بالنسبة ليك ايه ؟!
آدم : ايه ؟؟
آسيا : يعني متفقناش علي كده !
آدم (ضاحكا) : هو ايه ده ؟!
آسيا : " اقول له ايه ده يا ربي بس , بعد الصورة اللي شوفتها دي كده الكلام معاه بقي خطر !! "
آدم : روحتي فيييين ؟؟؟
آسيا : معاك اهو
آدم : هو انا ليه حاسك مصدومه كده !
آسيا : ها !! لا مش مصدومة ولا حاجة
آدم : طيب ايه رأيك فيا ؟؟
همت بالرد عليه لكنه قاطعها
آدم : مش عاوز رأيك فيا بعينك يا آسيا , عاوزه بقلبك !! كل الناس بتشوفني بعنيها إلا انتي الوحيده اللي عاوزك تشوفيني بقلبك و بس
آسيا (بإرتباك ) : انا ... آدم انا حاسه كلام كتير اوي مش عارفه اقوله , مش عارفه اعبر عنه
آدم : اللي حساه ده ضدي ولا في صالحي
آسيا : لا في صالحك
آدم : و انا هستني اللحظة اللي تقدري تقولي لي فيها كل اللي جواكي , عشان انا عاوز اللي جوه قلبك بس مش اللي شايفاه بعينك..
--------------------------------------------------------------
تم تحديد موعد عقد قران أيمن و شروق بعد اسبوع في فيلا التجمع الخامس التي يملكها أيمن
--------------------------------------------------------------
و مرت الايام سريعا الي ان جاء اليوم الموعود
كانوا قد انتهوا من كافه التحضيرات الخاصة بالحفل الصغير المقام في الفيلا احتفالا بهذة المناسبة السعيدة
و لم تترك آسيا شروق ولا لحظة من بداية اليوم حتي انتهي الفتاتان من ارتداء ملابسهم
عند الكوافير ..
آسيا : شوشو موبايلي بيرن هرد برة و اجيلك عشان الصوت بس
ثم وجهت كلامها الي الكوافيرة
-لو سمحتي خففي لها الروج ده شوية و بلاش تكتري في الميك اب
شروق : انتي رايحه فين و سايباني دلوقتي ؟!
آسيا : 5 دقايق بس هرد و ارجع لك علي طول و شيرين معاكي اهي
خرجت من الكوافير و وقفت في احدي الزوايا و اجابت علي الهاتف
آسيا (بصوت خفيض) : ايوة يا آدم
آدم : لبستي ؟؟
آسيا : انت مكلمني عشان تسألني عن كده !
آدم : ايون
آسيا (ضاحكة) : ايوة لبست
آدم : طيب عاوز اشوفك
آسيا : نعم !
آدم : صوري نفسك دلوقتي و ابعتي لي الصورة علي الواتس , يلا بسرعة
آسيا : انت جرالك ايه ؟! اخدت علي موضوع الصور ده اوي
آدم : يلا يا آسيا اخلصي بقي , ابعتي لي الصورة دلوقتي , هموت و اشوفك بالفستان
آسيا : طيب حاضر , اقفل بقي
اغلقت معه و قامت بإلتقاط صورة سريعه و ارسلتها له
اتاها اتصال فور وصول الصورة
آدم : فين باقي الفستان ؟؟
آسيا : و ده هجيبه كله ازاي يعني و انا اللي مصوره نفسي !
آدم : مش عارف
آسيا : اقفل يا آدم شكلك فاضي , انا كده شروق هتموتني اتأخرت عليها
آدم : آسيا....
آسيا (بنفاذ صبر) : مممممممم
آدم : شكلك قمر
آسيا (بخجل) : طيب اقفل بقي بجد اتأخرت
آدم : هستناكي تكلميني بالليل , اوعي تتأخري عن الساعة 12 يا سيندريلا
آسيا (ضاحكة) : حاضر ربنا يسهل , اقفل بقي
اغلقت معه و هي تشعر بسعاده غامرة مصدرها "هو" كالعاده !
--------------------------------------------------------------
وصلت جميع السيارات الي الفيلا
بدت شروق فاتنه بفستانها الذهبي اللامع و أيمن بدا وسيما جذابا بحلته الرسمية السوداء و قميصه ناصع البياض , و قد تخلي عن رابطه عنقه
اما آسيا دائما ما يروق لها اللون الازرق بدت ساحرة في ذلك الفستان الذي اظهر جسدها الرشيق بصورة خلابة
تم عقد القران وسط فرحه غامرة من الجميع
اختلي أيمن بعروسة بعد عقد القران في حديقة الفيلا
أيمن ( و هو يقبل يدها برقه ) : مبرووك يا مراتي
شروف (بخجل شديد ) : الله يبارك فيك
أيمن : الفستان يجنن عليكي
شروق : بجد عجبك ؟؟
أيمن : تحفه , ممكن تغمضي عنيكي
شروق (بدهشة) : ليه ؟!
أيمن : لما اقول الكلمة تتسمع من اول مرة , غمضي
انصاعت لطلبه
اخرج من جيب بدلته علبة صغيره بها خاتم ماسي رقيق
أيمن : فتحي عنيكي
شروق (بإنبهار ) : وااااااااااااااو
أيمن : عجبك
شروق : يجنن
امسك يدها برقه و البسها الخاتم ثم قبلها
أيمن : انتي اللي تجنني
--------------------------------------------------------------
انقضي اليوم و شروق في غايه السعاده و آسيا سعيده لسعاده صديقتها
اول ما فعلته ما ان وصلت المنزل هو انها هاتفت آدم
-لا سيندريلا كده باظت خاااالص , دي مواعيد ؟!!
آسيا (ضاحكة ) : معلش الفيلا بعيد و علي ما جينا بقي و كده
آدم : اهم حاجة انبسطي ؟؟
آسيا : جدا جدااا
آدم : الحمد لله , احكي لي بقي عملتوا ايه
آسيا : مفيش يا سيدي كنا في الكوافير الصبح و بعدين أيمن جه اخدنا و روحنا الفيلا , كتبوا الكتاب و كانوا عاملين حفله صغيرة كده , رقصوا سلو و اتصورنا و اتعشينا , بس
آدم (بغصب) : و انتي رقصتي ؟؟!
آسيا (ضاحكة) : ايوة مع بابا و بعدين سيبته لماما رقص معاها شوية
آدم : ممممممممم
آسيا : شروق كانت طالعه قمر ما شاء الله
آدم : ربنا يسعدها , بس مفيش قمر غيرك
آسيا (بخجل) : ميرسي
استمرت المكالمة اكثر من ساعة يتحدثون عن شروق و عقد القران و عن انفسهم طفولتهم و احلامهم , اصبحت تتحدث معه عن كل شئ
آسيا ( بصوت ناعس ) : آدم احنا مش هنام ولا ايه
آدم : عاوزة تنامي ؟؟
آسيا : جدا
آدم : طيب هقولك اخر حاجة و بعدين نامي براحتك
آسيا : يا آدم حرااام عليك بقي كل ده و لسة مقولتش حاجة
آدم : ايوه
آسيا : طب قول
آدم : آسيا انتي خليني لحياتي معني , بقي ليها طعم , بقيت بحس بالسعاده لمجرد اني اسمع صوتك , من غيرك ببقي ضايع اوي , انتي غيرتي حياتي .. اوعديني انك عمرك ما هتبعدي عني مهما حصل
يتبع
تكملة الرواية من هنااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق