رواية بيت المجانين الفصل الحادي عشر والثاني عشر والثالث عشر بقلم دعاء عادل
رواية بيت المجانين الفصل الحادي عشر والثاني عشر والثالث عشر بقلم دعاء عادل
بوسى : افندم حضرتك عايز ايه ؟
حسن : عايز .... هو حضرتك عايشه هنا لوحدك ؟!
بوسى : ها لا ااا اخواتى عايشين معايا , هو انت عايز ايه
حسن : عايز اتكلم مع حضرتك ومع اخوات حضرتك فى موضوع مهم ممكن ادخل
بوسى تبص حواليها شوية وبعدين تسمح لـ حسن انه يدخل .. اول ما يدخل الصاله يشوف جميز نايم على الكنبه يجرى عليه ويشيله :
حسن : نادر وحشتنى يا حبيبى
بوسى تقرب وتاخده منه بسرعه :
بوسى : ايه ايه ياعم انت نادر مين وازاى تمسك الولد كده هى سايبه
حسن : يا فندم ماهو ده ال جاى اكلم حضرتك فيه , ده نادر ابنى
بوسى : هااا
_____________________
ماهر نايم فى بيته يرن تلفونه يقوم بالعفيه ويبص على الاسم يلاقى سالى :
ماهر : الو
سالى : تصدق انك جبت اخرك معايا
ماهر : اصتبحنا واصتبح الملك لله
سالى : بالمره انطق بالشهاده عشان انا ناويه اخلص عليك
ماهر : فى ايه يا سالى يا سالى ارحمينى يا سالى عشان خاطر ربنا يا سالى
سالى : اكتر من 10 ايام لا ترفع تلفون عليا ولا اشوف وشك ياخى ده انا قربت انسى شكلك
ماهر : مش فى شغل ده انا ربنا ال يعلم بيا الايام دى ده انا بلف حوالين نفسى
سالى : يادى الشغل هو الشغل ده مش هيخلص ولا مخلينى حاسه انك هتجيب الديب من ديله هتعمل اللى ماحدش عمله
ماهر : طب بذمتك انتى ما تجيبى الاحباط واليأس يا سالى انتى المفروض تدفعينى الى الامام
سالى : انا هدفعك من البلكونه عايزه اتجوز يا ناس عايزه اتجوز ده انا خللت جنبك خلاص هعنس
ماهر : الحقيقه يا سالى يعنى انا شايف ان احنا لازم نعيد التفكير فى موضوع الجواز ده
سالى : نعم ياخويا بعد اربع سنين خطوبه رمينى جنبك احمد ياااا عممممممممممر
ماهر : طب انا راضى ذمتك فى دكتور محترم زيى يتجوز واحده ردحه زيك
سالى : عارف يا ماهر لو طلعت بتتكلم بجد انا هاجى اقطعك حتت واعملك مع صنية بطاطس فى الفرن
ماهر : نهار اسود خاطب واحده من المجزر
وهما بيتكلمو ماهر يلاقى التلفون الارضى بيرن يبص على الرقم يلاقى رقم بيت المجانين :
ماهر : اوووف سالى انا هقفل دلوقتى ورجع اكلمك بعدين
سالى : رايح فين ؟
ماهر : البيت التانى بيتصل
سالى : بيت ايييييييه بيت تانى انت اتجوزت عليا
ماهر : مش لما اتجوزك انتى الاول ده بيت المجانين اقفلى بقى خلينى اشوف عايزين ايه
يقفل ماهر مع سالى ويرد على التلفون الارضى :
ماهر بملل : الو
خالد بصوت عالى : الحق ياااااا دكتووووور
ماهر : ايييييييه
خالد بيتكلم بسرعه : الحق يا دكتور الحق ابو جميز جيه وعايز ياخد جميز وبوسى مش عايزاه ياخده وضربته بالمكنسه على دماغه وعلى بيحجز ومش قادر عليها وجميز بيعيط وانا مش عارف اعمل ايه وتعالا بسرعه عشان الدنيا مولعه
ماهر : ربنا ياخدكم ربنا ياخدكم ربنا ياخدكم .. انا جاى انا جااااااااااى
يطلع ماهر يجرى من بيته اول ما يوصل لـ بيت المجانين يلاقى الباب مفتوح يدخل يلاقى على ماسك بوسى وبوسى عايزه تضرب حسن وحسن دماغه بتنزف دم وجميز على الكنبه بيعيط وخالد واقف بيتفرج والكل بيزعق :
ماهر بصوت عالى : ايه فى ايه ؟!
_____________________
بعد 10 دقايق .. خالد وعلى قعدين جنب بعض وبوسى قعده على كرسى لوحدها وشايله جميز وماهر قاعد جنب حسن وبيمسح له الدم ال على دماغه :
ماهر : احنا اسفين جدا يا استاذ حسن
حسن : حصل خير بس انا مش فاهم هى عملت معايا كده ليه انا كنت بكلمها بهدوء
ماهر يبص لـ بوسى ويرجع يبص له : اسفين مره تانيه بس ممكن تفهمنى الموضوع ايه بالظبط
حسن بتوتر : انا انا بشتغل مهندس بترول بسافر فى حتت كتير فى الصحراء بحكم شغلى طبعا .. فى مره كنت مسافر لموقع شغل كان جنبه قبيله من البدو وهناك شوفت ريانه بنت بدوية حبيتها وطلبتها للجواز لكن اهلها رفضو وقالو ان بنات البدو مش بيتجوزو من بره القبيله .. ف اتفقت معاها على الهروب فعلا هربنا واتجوزنا وعشنا مع بعض احلى ايام لكن السعاده مش بتفضل على طول .. ريانه ماتت وهى بتولد نادر ابننا
خالد وهو متأثر : الله يرحمها اهئ اهئ
على : انا شوفت الفيلم ده قبل كده
ماهر : هشش .. اتفضل كمل
حسن : بعد ايام من وفاتها وصلتنى اخبار ان اهلها عرفو طريقى وانهم جاين يقتلونى انا وابنى
ماهر : يقتلو ابن بنتهم ؟!
حسن : فى نظرهم الولد ده عار على القبيله وامه عملت جريمة لما هربت معايا ولازم اى حاجة من ريحتها تختفى تفكير قديم جدا لكن لسه فى ناس بتفكر بيه .. ف قررت انى اروح اتفاهم معاهم لكن خوفت اخد نادر معايا وفى نفس الوقت مش عارف اسيبه فين لأنى ماليش حد ابدا ولدى وولدتى متوفين وماليش اخوات هسيبه عند مين ومش بعيد لو سبته عن حد معرفه يوصلو له قبل ما انا اوصل ليهم واكيد مش هسيبه فى ملجأ
ماهر : عشان كده سبته قدام باب البيت
حسن هز رأسه بـ اه :
ماهر : طب ازاى ما خوفتش يكون البيت ده فى ناس وحشه او مجرمين او اى حاجة .. يعنى مخوفتش على ابنك
حسن : اكيد خوفت وقلبى كان هيوقف فى كل دقيقه بعيد عنه لكن يا استاذ القطه لما بتخاف على عيالها بتاكلهم يمكن الموضوع غريب ويمكن ماحدش فيكم يصدقنى لكن انا عملت كده من خوفى عليه
علي باصص على خالد ال عمال يعيط زى العيال :
علي : مالك يالا
خالد : اهئ اهئ اهئ حكاية مأثره اوى عاااااااااااا
حسن : انا معايا شهادة ميلاد نادر وكل الاوراق ال بتأكد كلامى .. اتفضل
ماهر ياخد الورق من حسن ويقراه :
ماهر : فعلا كلام حضرتك مظبوط
حسن : انا اتصلحت مع اهل مراتى الله يرحمها وكل حاجة بيقت كويسه الحمد لله وجيت عشان اخد نادر .. بس الهانم دى رافضة انى اخد ابنى وحضرتك شايف هى عملت فيا ايه
ماهر : اه معلش انا هتصرف دقيقه بس .. بوسى تعالى انا عايزك
يقوم ماهر يدخل اوضه من الاوض وتقوم وراه بوسى وهى لسه شايله جميز :
خالد : استاذ استاذ
حسن : ايوه
خالد : ما تتجوز بوسى وتاخدها معاك وانت ماشى
حسن : نعم ؟!
على : اه دى بتحب جميز اوى قصدى نادر اهو نخلص منهم هما الاتنين ونرتاح
حسن : .. !!
_____________________
فى الاوضه بوسى قعده على السرير وماهر قاعد جنبها :
ماهر بهدوء : بوسى انا عارف انك حبيتى الولد اوى بس احنا من الاول عارفين انه له اهل وعارفين انهم اكيد كانو فى يوم من الايام هيجو ياخده وانه اصلا ماكانش هينفع يفضل هنا على طول عشان اصلا انتو مش هتقعدو هنا على طول .. احنا اخدنا بالنا منه فتره لكن ابوه جيه وعايز ياخده ولازم ياخده عشان احنا مش اهله
بوسى تبص لـ ماهر دقيقه وبعدين تديله جميز ياخده منها ويطلع بيه لـ حسن وهى تطلع وراه :
ماهر : اتفضل يا استاذ حسن ابن حضرتك
حسن : يا حبيبى سامحنى يا نادر انا عملت كل ده عشان خاطرك
ماهر : ربنا يخليه ليك
حسن : انا مش عارف بجد اشكركم ازاى
ماهر : لا شكر على واجب خد بالك منه ومن نفسك
حسن : متشكر متشكر اوى اوى عن اذنكم
حسن ياخد جميز ويمشى وخالد وعلى يقفو على الباب يشاور له وهو ماشى وبعدين يدخلو :
خالد : جميز مشى اهئ اهئ اهئ والله هيوحشنى عااااااااااااااااااا
على : ده ايه الهدوء ده واخيرا خلصنا من الدوشه والعيط ال فى نص الليل
خالد : اه يا عديم المشاعر اهئ
على : بس ياض يا اهبل انت
ويمشو الاتنين وماهر باصص عليهم وبضحك وبعدين يبص لـ بوسى ال قعده على الارض وساكته يقرب منها براحه ويقعد جنبها :
ماهر : انتى زعلانه صح
بوسى تبصله وترجع تبص قدامها تانى :
بوسى : لا مش زعلانه
ماهر : هممم يعنى جميز مش هيوحشك ؟!
بوسى تلف وشها : لا
ماهر : طب ولما هو مش هيوحشك ولما انتى مش زعلانه مكشره كده ليه
بوسى بدموع محبوسه : اصل طلع اسمه نادر وانا مش بحب اسم نادر .. جميز احلى
ماهر : هههههههههه يخرب بيت عقلكم انتو التلاته جننتونى ههههههههههه
_____________________
بعد كام يوم .. خالد وعلى قاعدين قدام بعض بيلعبو كوتشينه على الارض وبوسى نايمه على الكنبه وشعرها كله نازل على وشها :
خالد : خمس
على : ها ها ها ولد
خالد : لا ياعم بقى انت عشاش
على : وله لم لسانك
خالد : انا ملت انت كمان ملت ؟
على : ملت وبس
خالد : طب تعالا نعمل حاجه نتسلى بيها
على : نعمل ايه ؟
خالد : ناكل
على : دى التسليه الحديثه يعنى ولا ايه .. مش فالح غير فى الاكل
خالد : الله ما انا جعان
على : صحى امنا الغوله دى تعملك اكل
بوسى ترفع رأسها مره واحده : انا امنا الغوله
خالد وعلى : اااااااااااااه
بوسى تنزل تقعد جنبهم على الارض :
خالد : حرام عليكى قطعت الخلف
بوسى : الحمد لله .. احسن ما تخلف لينا عيال شبهك
على : هههههه اول مره تقولى حاجة صح
خالد : ليه ان شاء الله ده انا شبه توم كروز
بوسى : صح بعد ما حنطوه وبعتوه المتحف المصرى
على : ههههههههههههه عسل وهى صاحيه من النوم خليكى نايمه على طول
فجأه باب البيت يخبط جامد .. يتنفض التلاته من مكانهم ويروحو عند الباب :
على : يا ترى مين ال بخبط
بوسى : افتح وشوف مين بدل ما الباب عمال يخبط كده
خالد : لا ياعم اوعى تفتح لا يكون سفاح جاى يقتلنا
على : ده انت خيالك مريض وهو السفاح هيخبط الاول يا ناصح .. اوعو كده انا هفتح
يروح علي ناحية الباب وخالد وبوسى واقفين وراه .. واول ما يفتح الباب التلاته يتنحو :
خالد : يا حلاوه
على : صلاة النبى احسن
💛💛💛💛💛💛💛💛💛💛💛💛💛
علقوا هنا ب متابعة
الحلقه 12
يروح علي ناحية الباب وخالد وبوسى واقفين وراه .. واول ما يفتح الباب التلاته يتنحو :
خالد : يا حلاوه
على : صلاة النبى احسن
قدام الباب تكون واقفه بنت تقريبا فى العشرينات بشرتها بيضاء وشعرها اصفر دهبى وعنيها زرقاء ولبسه جيب فوق الركبه حمرا وبلوزه بيضاء ضيقه ربع كوم مكتوب عليها بالاحمر كلام انجليزى ... على وخالد يفضلو باصين عليها ومتنحين بوسى تبصلهم بستغراب وترجع تبص للبنت وترجع تبصلهم :
بوسى : لا والله
على يزق بوسى على جنب ويقرب ناحيه البنت :
على : امرك يا قمر
البنت بتوتر : لو سمحت انا فى خطر دخلنى ربنا يخليك خبينى بسرعه وبعدين هفهمك على كل حاجة
على : ايه لالالا اتفضلى اتفضلى طبعا
بوسى : تتفضل فين ؟!
على يزق بوسى : اتفضلى يا مدموزيل
بوسى تقرب من خالد : خالد هو على اتهبل
خالد يزق بوسى ويروح ورا على :
بوسى : انا بقيت ملطشه ولا ايه
تروح بوسى تقعد جنب على وخالد ال باصين على البنت لحد ما تبدء تتكلم :
البنت : انا اسمى ريم
خالد : هههه الله
على : عاشت الاسامى
ريم : انا انا هربانه من جوز ماما
على : يا خبر ليه ؟
ريم بتأثر : ده راجل شرير بيضربنى ويعذبنى مورينى ايام سوده واخر ما زهقت وتعبت قولت هروح اقعد عن عمى رفض وحبسنى فى الاوضه روحت نزلت من الشباك فى نفس الوقت كان داخل الاوضه شافنى طلع يجرى ورايا فضلت اجرى منه لحد ما لاقيت نفسى قدام بيتكم
خالد : اهئ اهئ مسكينه
على : راجل مش كويس خاااالص خالص يعنى
بوسى : يا سلااااااااااااام .. طب وهو يعنى مامتك فين فى كل ده
ريم بدموع : مامى ماشيه ورا كلامه يقولها يمين تقوله حاضر يقولها شمال تقوله حاضر انا مش مهمه عندها خالص
وتبدء تتأثر وتعيط :
على : لالالالالا بلاش عياط امال
ريم بتمسح دموعها : انا مش عارفه اطلب الطلب ده ازاى بس هو ممكن اقعد عندكم لحد بكره بالليل يكون جوز ماما تعب من التدوير عليا وبكره بالليل هاخد بعضى واروح عند عمى واعيش معاه
خالد : هييييييييييييييييه
بوسى : لا طبعا مينعـ ......
على يحط ايده على بوق بوسى : طبعا ينفع ده انتى هتنورى
ريم : والمدام بتاعتك مش هتدايق
على يرمى بوسى بعيد : مدام مين دى ماحدش يتجوزها اصلا قصدى دى مش مدام حد فينا دى اختنا احنا تلات اخوات
بوسى : لا احنا تلات مجانـ .....
على يحط ايده على بوق بوسى تانى : هتنورى اخر نور انا علي وده خالد
خالد بهبل : ايوه انا خالد هههههه
ريم : والهانم ؟
على يرمى بوسى على جنب : لا دى مش مهم دى تبع شركة اونكس .. انتى هتقعدى فى اوضة خالد بقى وخالد هيقعد معايا اتفضلى اتفضلى
ياخد على ريم على اوضة خالد وخالد يمشى وراه وتفضل بوسى واقفه بتبص عليهم :
بوسى : اونكس !!
_____________________
ماهر قاعد فى البيت متربع على الارض وحاطط ايده على خده :
ماهر : 9 ايام فاضل بالظبط 9 ايام وكل حاجة تخلص والوحيد ال اتحسن خالد واتحسن ربع سنتى ورجع زى ما كان يا خايبتى فينك يامه
فى نفس الوقت الباب يخبط :
ماهر : لحقت امى جات ايه السرعه دى
يقوم ويفتح الباب يلاقى بوسى قدامه يروح فاقل الباب تانى تروح مخبطه تانى يفتح :
ماهر : عايزه ايه سبونى فى حالى قاعد فى ساعة تأمل
بوسى : يعنى الحق عليا ال جايه اقولك على المصيبه ال عملها على وخالد
ماهر : وايه الجديد فى الموضوع ما انا من يوم ما شوفتكم وانا المصايب نازله عليا ترخ .. عملو ايه
بوسى : فى واحده هربانه خبطت علينا وقالت خبونى من جوز امى راحو هما خبوها من جوز امها وقالو عليا انى من اونكس
ماهر : ايه البيت ده ال مهرب ابنه يحطه قدام الباب ال هربانه تيجى قدام الباب هو باب البيت ده فيه مغناطيس بيشد الكوارث .. قدامى قدامى اشوف المصايب ال مش بتخلص دى
يروح ماهر مع بوسى على البيت ويدخل وهو متعصب وبيزعق :
ماهر : انتو يا زفت منك له تعالو هنا
يجى خالد وعلى بيجرو ويقفو قدام ماهر :
ماهر : ايه ال انتو عملتوه ده ازاى تخبو واحده فى البيت هو خلاص بيقى بيت الامه ازاى تعملو كده
بوسى : وقالو عليا من اونكس
على : يا سلام طب ما جميز قعد هنا اكتر من شهر اشمعنى بقى
خالد : اه اشمعنى بقى
ماهر : ده كان ظرف خاص ثم ازاى اصلا تتصرفو كده من غير ما تقولولى البنت دى لازم تمشى حالا
وهو بيزعق تخرج ريم من الاوضه :
ريم برقه : هاى
ماهر يبصلها ويثبت زى تمثال الشمع .. تروح مقربه منه وتوقف قدامه :
ريم : سورى بس الصوت كان عالى وانا سمعت كلام حضرتك غصب عنى انا عارفه انى وجودى مدايقكم بس والله همشى بكره بالليل على طول دى خدمه مش هنساها لحضرتكم ابدا
ماهر : هااا احم احم لالالا م م مفيش مشاكل مادام لحد بكره بالليل بس عادى
بوسى : عادى كده دول ماخدوش أذنك
ماهر : عادى يا بوسى هما صغيرين يعنى مش هيعملوها تانى
بوسى : دول قالو عليا من اونكس
ماهر يبصلها : يا ماما انتى مش من اونكس انتى من باته روحى يا بوسى ولا اقولك .. غورى يا بوسى
تمشى ريم بدلع وتدخل الاوضه وعلى وخالد وماهر يقفو جنب بعض باصين عليها :
على : يا نهار اسود هو فى ستات حلوه كده دى بتاكل ايه عسل ومربى
خالد : قمر قمر قمر يخرب بيت كده
ماهر : ده انا طلعت خاطب صندل
_____________________
تانى يوم الصبح ... بوسى صحيت من النوم لاقيت فطار شيك على السفره وورد فى الصاله وعلي واقف قدام مرايا كبيره فى الصاله بيعدل فى هدومه وخالد ماسك مشط وعمال يسرح فى شعره :
بوسى : هو العيد جيه وانا مش عارفه
على : يا ساتر انتى صحيتى
خالد : صحيت لالالا روحى نامى تانى روحى هوف هوف
بوسى : كده انا هشتكى لـ دكتور ماهر
يدخل ماهر من الباب مبتسم ولبس بدله شيك جدا :
ماهر : صباح الخييييير
بوسى : يا خسارة الرجاله
تخرج ريم من الاوضه وهى مبتسمه وتهمس برقه :
ريم : صباح الخير عليكم
خالد وعلى وماهر : يا صباح الفل
بوسى : صباح الزفت
خالد : شوفى شوفى انا حضرت لك الفطار
على : فطار ايه انتى فاكرها بتصحى على الاكل زيك تعالى يا قمر شوفى الورد ال جبته عشان يصبح عليكى
ماهر : ايه ال انتو بتعملوه ده .. اتفضلى اقعدى يا برنسس
بوسى : لا اله الا الله دى فره وجات فى التلاته ... انتو بتعملوه معاها كده ليه
ماهر يقرب من بوسى : انا اقولك دى حاجة كده انتى ماتعرفيش عنها اسمها انثى لازم تتعامل كده فهمتى يا غوله
سالى : وحياتك امك
ماهر برعب : سالى
سالى : اه يا خويا سالى بقيت بتعرف تعاكس ده انا بقالى اربع سنين معاك عمرك ما عملتها معايا
ريم : ايه ده مين دى
ماهر : قدرى الاسود
سالى : ده انا هوريك السواد على حق
خالد : طنط هو انتى دخلت ازاى
سالى : الباب مفتوح يا ناصح والبت المهروشه بوسى هى ال اتصلت بيا وقالتلى على عمايل البيه الدكتور .. طنط ؟!
ماهر : الله يخرب بيتك هقلع عنيكى من مكانها استنى عليا
بوسى : باته واونكس هااا
ريم : لالالا ايه ده انا همشى بقى
على : تمشى ليييييييييه سيبك من كل ده انتى بتحبى الورد الاحمر ولا الابيض الحلو يا حلو انت يا حلو
ريم : خلاص يا هانم انا همشى اصلا
سالى : ودى تيجى تمشى قبل ما تخدى هديتك تعالى لى يا حلوه ده انا هخلى وشك شبه قفاكى
سالى تمسك ريم من شعرها وتنزل فيها ضرب :
ماهر : يا سالى سيبها دى رقيقه مش قدك
على يقرب لـ ماهر : هو انت خاطب هرقل
ماهر : والله دى ال لاقيتها بقى اصله كان جمعه وزى ما تقول كله كان قافل وكده يعنى
على : اه انا فاهم فاهم
ماهر : اه .. يا نهار اسود البت هتموت فى ايدها
ريم : اااااااااااه سبينى متوحشه سبينى
خالد : عااااااااااا يوم ما اجى اكلم مزه خطيبتك تاكلها اهئ اهئ اهئ عاااااااااا
وفجأه :
_ كله يوقف مكانه ماحدش يتحرك
كلهم يبصو ناحية الباب يلاقو اتنين ظباط وعساكر واقفين قدامهم :
ماهر : اوبااا هى وصلت للبوليس .. بت يا بوسى
بوسى : مش انا المره دى هو جيه لوحده
الظابط : والله ووقعتى يا شاطره
خالد : ايه ده الظاهر خطيبتك تخصص اجرام من زمان وانت مش عارف
ماهر : لا المشكله انى عارف
الظابط يقرب من ريم ويمسكها : يلا قدامى
على : ايه ده ايه ده هو حضرتك واخدها فين
الظابط : واخدها فين واخدها السجن الهانم دى مطلوبه فى 5 قضاياه نصب وانتحال شخصيه
الكل : هااااااااااااااا
الظابط : وامبارح كنا بنجرى وراها عشان نمسكها وللاسف هربت مننا والنهارده عرفنا من واحد من الجيران ال جنبكم انه شافها داخله هنا
على : نصابه فى الاخر طلعتى نصابه يا ريم
الظابط : ريم مين دى اسمها فتحيه العمشه
على : قلبى
الظابط : يلا معايا
ريم : معلش بقى يا خويا منك له له اكل العيش
الظابط : يلا يا بت
ريم : معاك اهو يا باشا
بوسى وهى داخله الاوضه : هاهاهاهاهاهههههههه
سالى : كمان طلعت مفضل عليا نصابه
ماهر : الفرن جاهزه عشان تحطينى مع صنية البطاطس ولا لسه هتجهزيها
خالد : لالالا لا تكذبى اهئ اهئ اهئ يا بنت الكدابه
على : دكتور دكتور دكتور
ماهر : ايييييييه ما تسبنى فى المصيبه ال انا فيها
على : تقريبا ده مابقاش بيت ده بيقى السوق العربيه المشتركة
ماهر : ليه ؟
على : مش شايف الناس ال جات دى ولا ايه
يبص ماهر على الباب يلاقى راجل وست كبار فى السن وهو عارفهم كويس :
ماهر : يااا .. يا بوسى
💛💙💛💙💛💙💛💙💛💙💛💙💛💙💛
علقوا هنا بمتابعة
الحلقه 13
يبص ماهر على الباب يلاقى راجل وست كبار فى السن وهو عارفهم كويس :
ماهر : يااا .. يا بوسى
تطلع بوسى بتضحك من الاوضه لكن اول ما تشوف الراجل والست تكشر :
ماهر : ولدك وولدتك جوم يا بوسى
بوسى تبصله ومتردش :
ماهر : اتفضل يا استاذ محمد اتفضلى يا هانم انا هسبكم مع بعض شوية .. يلا يا خالد انت وعلى ادخلو جوا تعالى معايا يا سالى
على وخالد يمشو وماهر ياخد سالى ويمشى ... وتفضل بوسى مع ابوها وامها فى الصاله براحه تيجى بوسى على كنبة وتقعد وعلى الكنبه ال قدامها يقعد ابوها وامها :
أم بوسى : ازيك يا حبيبتى وحشتينا يا بوسى
أبو بوسى : عامله ايه دلوقتى يا بنتى
بوسى : ...............
_____________________
فى البلكونه واقف ماهر مع سالى :
ماهر : يا سالى خلاص بقى يا سالى
سالى : بتعرف تقول كلام حلو وتغازل هاا امال مش بتعمل معايا كده ليه
ماهر : يا حبيبتى وهو انتى مديانى فرصه مره عايزه ترمينى من البلكونه ومره عايزه تعملينى صنية بطاطس هو انتى مش بتسمعى عن حاجة اسمها رقة
سالى : رقة يا عديم الرقة يا ابو عين زايغه اه يا نارى ياما نفسى اعملك كفته واتاجر فيك بالكيلو
ماهر : شوف شوف بكلم جزار فى المدبح
سالى : ولا ايه يوم ما تعاكس تعاكس نصابه لا دكتور دكتور يعنى
ماهر : الله هو يعنى الدكتور ده فى دماغه جهاز كشف الكدب
سالى : بس تستاهل عشان تتعلم الادب بعد كده
ماهر بصوت واطى : بقى المزه دى القمر دى تطلع نصابه على كده سالى ممكن تكون خُط الصعيد
_____________________
فى اوضة علي خالد قاعد على الارض وعلي قاعد على السرير :
خالد : اهئ اهئ اهئ اهئ عاااااااااا
على : ما تخرس يالا
خالد : لو سمحت سبنى فى حالى أنى مصدوم
على : يا شيخ اتنيل عادى يعنى المظاهر خداعه
خالد : مظاهر مين دى كمان ده ايه اليوم ده
على : لا بقولك ايه هى مش ناقصة اكتم واسكت خالص
خالد : سكت ... الا قولى صح يا على هو انت ماحدش هيجيلك ؟!
على : حد زى مين
خالد : يعنى انا امى جاتلى وبوسى ابوها وامها اهم جوم ليها وانت ماحدش هيجيلك
على : ههه مين بقى يجى اخ متجوز وعايش فى الامارات والاخ التانى بيدرس فى لندن وابويا متجوز وعايش مع مراته وولاده التانين وامى ميته مين هيسأل على واحد بقاله اربع سنين مرمى فى مستشفى المجانين واحد مجنون مالهاش اهميه عند حد .. كل واحد عنده حياته ومشاغل حياته ومشاكل حياته ماحدش فاضى لحد
خالد : خخخخخخخخخخخخخ
على : انت نمت يالا
خالد : ها لالا انا صاحى اهو انا صاحى خخخخخخخخخخخ
على : واطى ضيعت اللحظه المؤثرة
_____________________
فى الصاله بوسى قعده مع ابوها وامها ساكته مش بترد عليهم :
أبو بوسى : يا بنتى انتى عامله كده ليه هى دى ازيكم ال المفروض تقولها لينا
أم بوسى : كده يا بوسى
بوسى : .....................
أبو بوسى : طب انتى مش بتردى علينا ليه انا عايز افهم
بوسى بهدوء : انتو جاين ليه
ابوها وامها يبصو لبعض ويرجعو يبصو لها :
أبو بوسى : يعنى ايه جاين ليه
بوسى بنفس الهدوء : يعنى جاين ليه
أم بوسى : جاين نشوفك يا بوسى نطمن عليكى
بوسى : اااااه نطمن عليكى ماشى وماله
أم بوسى : ايه ده يا بنت انتى بتريقى وايه الطريقه البارده ال بتتكلمى بيها دى
أبو بوسى : واحنا ال كنا فاكرين ان العلاج جاب معاكى نتيجه لكن انتى زى ما انتى وبرود الاعصاب ال فيكى ده بيزيد مش بيقل
بوسى تقوم من مكانها براحه وتلف توقف فى وشهم بالظبط وبعلو صوتها :
بوسى : امال انتو عايزين اييييييييييييه
ابوها وامها يبصو لها بصدمه وماحدش فيهم ينطق :
بوسى : يعنى زمان كنت عصبية وبيصعب عليا نفسى من اقل حاجة بقيتو تقولولى اهدى هدى اعصابك خليكى بارده شوية عشان تعرفى تعيشى وتمشى امورك كل الناس حواليا كانو يقولولى هدى اعصابك اسيب الجامعه غصب عنى وهدى اعصابك اتجوز واحده مش طايقه وهدى اعصابك يعاملنى معامله زى الزفت وهدى اعصابك يخونى وهدى اعصابك فى كل حاجة كنتو تقولولى عادى بتحصل مافيهاش حاجة يا شيخه كبرى مخك .. هدى اعصابك كبرى مخك خلى اعصابك بارده وطنشى طبعا ما انتو بتتكلمو من غير ما تحسو بتتكلمو وخلاص متعرفش ال الواحد حاسس بيه وبيحرق فى قلبه ايييه خلت اعصابى هاديه اهو زعلانين ليه بردو مش عاجبكم امال عايزين ايه عايزين اييييييييييييه
أبو بوسى يقوم ويقرب منها : خلاص يا بوسى اهدى بس شويه
بوسى بزعيق : اوعى ابعد عنى ماحدش يقولى اهدى ولا حد يقرب لى
أم بوسى : يا بنتى كفايه كده ايه ال حصل لكل ده
بوسى بصوت عالى : يا دكتور ماهر يا دكتور ماااااااااااااااهر
يجى ماهر بيجرى هو وسالى وخالد وعلى ال طلعو على صوتها :
ماهر : فى ايه ؟!
بوسى بعصبيه شديده : خليهم يمشو خليهم يمشو مش عايزاهم خليهم يمشو
أبو بوسى : ليه كده بس يا بنتى
ماهر : لو سمحتو امشو دلوقتى
بوسى تتعصب اكتر واكتر وتبدء تدبدب فى الارض برجلها جامد :
سالى : الحق يا ماهر
ماهر يمسكها : بوسى بوسى خلاص خلاص هما هيمشو
فجأه تترمى وتجى لها حالة تشنجات شديده ماهر يمسك ايدها جامد ويقول لـ سالى تمسك رجلها دقايق تعدى قبل ما تهدء وتغمض عنيها
_____________________
بوسى نايمه على السرير وماهر قاعد على طرف السرير بيديها حقنه وعلي وخالد وسالى واقفين جنبو :
ماهر : هى كده هتفضل نايمه انتو الاتنين ماحدش فيكم يقرب لها بالذات انت يا خالد عرفك غبى وممكن تحاول تصحيها عشان تعملك الاكل
خالد : لالا انا هخليها نايمه بلاش اكل النهارده
ماهر : انا ماشى لو حصلت حاجة اتصلو بيا .. يلا يا سالى
يخرج ماهر من الاوضه يكون أبو وأم بوسى لسه موجودين وقعدين فى الصاله :
أبو بوسى : فى ايه يا دكتور ايه ال حصلها
ماهر : مفيش حاجة دى نوبه جالتها بسبب العصبيه الزياده بتحصل ساعات عادى
أم بوسى : بقى يوم ما نيجى نشوفها يحصلها كل ده
ماهر : معلش بردو متنسوش ان مريضها صعب وقوى وفيه تغيرات كتير .. اتفضلو دلوقتى وانا هبقى اتصل اطمنكم عليها
يمشى أبو وأم بوسى ... وماهر ياخد سالى ويروح على بيته
_____________________
يدخل ماهر البيت وهو متعصب ومدايق وعلى اخره ويروح على اقرب كرسى ويقعد تقرب منها سالى بهدوء وتقعد جنبه :
سالى : مالك دلوقتى ايه ال حصل
ماهر : مالى كل ال عملتو راح انا قولت من الاول للمدير مش هينفع يتحطو فى موجهه مع اهليهم المريض النفسى 80 فى الميه بيكون مرضه بسبب اهله ... قولت من الاول ان ممكن يحصلهم انتكاسه حمدت ربنا ان ده محصلش مع خالد اهو حصل مع بوسى والمشكله ان مرض بوسى متغير ممكن يقلب من برود اعصاب لحالة صرع
سالى : ماهر متعملش فى نفسك كده ان شاء الله مش هيحصل حاجة
ماهر : خلاص يا سالى مفيش فايده فاضل اسبوع وكل شئ يخلص مفيش حد فيهم حالته اتحسنت بالعكس اتنيلت زياده بعد شهرين ونص ارجعهم المستشفى وهما كده لقبى الجديد هيكون الدكتور الفاشل دكتور فاشل بكل معنى الكلمة
سالى : يا حبيبى انت عملت ال عليك واكتر كنت هتعملهم ايه يعنى انت مش السبب فى ال هما فيه عشان تعمل فى نفسك كده
ماهر : كان نفسى يتعالجو ويخفو ويرجعو لحياتهم كان نفسى بجد اعرف اساعدهم
سالى تطبطب على ماهر وتفضل قعده معاه بتحاول تخفف عنه حزنه على التجربة ال فشلت حزنه على حلمه ال كان نفسه يتحقق ... لحد ما تفوت ساعات والليل يدخل :
ماهر : هى الساعه كام دلوقتى ؟
سالى : يا نهار دى الساعه داخله على 11
ماهر : ايه ده انتى اتاخرتى اوى هغير هدومى دى واجى واوصلك
سالى : ماشى
يدخل ماهر الاوضه عشان يغير هدومه وسالى تفضل تلف فى الصاله وتتفرج على التحف ال فيها وبعدين تروح عند الشباك تفتحو وتوقف فيه ... وهى بتتفرج من الشباك عنيها تيجى على بيت المجانين فجأه تبرق جامد وبأعلى صوت عندها :
سالى : مااااااااااااااااااااهر الحق يا ماااااهر
تعليقات
إرسال تعليق