رواية بيت المجانين الفصل السادس والسابع والثامن والتاسع والعاشر بقلم دعاء عادل
رواية بيت المجانين الفصل السادس والسابع والثامن والتاسع والعاشر بقلم دعاء عادل
الحلقه السادسه
رواية / بيت المجانين
💗💗💗💗💗💗💗💗💗💗💗💗💗💗💗
سالى بعصبية : انا عايزه اعرف دلوقتى مين الناس دى وانت بتعمل معاهم ايه هناااا
ماهر : طب اهدى وانا هفهمك كل حاجة
سالى : بلا اهدى بلا زفت انا من الاول وانا حاسه انك عامل مصيبة
ماهر : طب ادخلى يا سالى وبلاش فضايح قدام الباب الناس هتسمعنا
خالد يهمس لـ على : هى مين دى ؟
على : مادام بتزعقله كده تبقى حاجة من اتنين يا الحكومه يا المباحث
سالى : هو انا فى الناس ولا فى البيه خطيبى ال طلعت مش عارفه عنه حاجه
على : اهى طلعت المباحث
ماهر : مهو انتى لو تهدى وتدخلى انا هعرفك كل حاجة
على يهمس لـ خالد وبوسى : بقولكم ايه تيجو نطلع عليه شوية من ال بيعمله فينا
بوسى : وماله
خالد : هنعمل ايه ها
على : امشو بس انتو على الخط بالذات انت يا غبى احم احم .... انا اقول لحضرتك يا هانم انا على وده خالد اخوات بوسى مرات دكتور ماهر
ماهر : اييييييييييه
سالى : مرات مييييييييييييين يااا عمممممممر
بوسى : اه اه انا مرات ماهر
ماهر : ماهر مين يا بنت المجنونه سالى سالى سيبك منهم دول مجانين
سالى بتريقه : مجانين
ماهر : والمصحف مجانين
يجرى خالد يجيب النونو ويجى بسرعه :
خالد : ايه مجانين دى يا دكتور مش عيب تقول كده على اهل مراتك
ماهر : حتى انت يا اغبى مخلوق على وش الارض
خالد : بس يا ابلة دى مراته وده ابنه خدى ابنك يا اختى
بوسى : حبيب ماما انت تعالا يا روحى شبه ماهر الخالق الناطق حتى شوفى
ماهر : يا جزم يا ولاد الجزم سالى والله ده كله كدب
سالى : كدب يا كداب يا نصاب متجوز ومخلف وداير تضحك على بنات الناس
على : بتضحك على بنات الناس يا ماهر تؤ تؤ تؤ
خالد : شوفت ابوك يا جميز طلع بيعرف بنات على امك
بوسى : كده بردو يا ماهر بتخونى طب طلقنى
سالى : لا ياختى يطلقك ليه خلهولك , دبلتك اهى يا استاذ مش عايزه اشوف وشك تانى ده انا هخلى اهلى يطلعو عنيك يا كداب يا بتاع الستات
ماهر : يا سالى افهمى بس دول التجربه ال شغال عليها دول كدابين يا سالى افهمى بس
سالى : اوعى اشوف وشك تانى انت فاهم يا ابو جميز , فى حد يسمى ابنه جميز
تخرج سالى من البيت وترزع الباب وراها وماهر يفضل واقف مكانه دقيقه ويلف يبص على خالد وعلى وبوسى :
ماهر : انا ,, ابو جميز يا ولاد الكلب
ويطلع ماهر يجرى ورا خالد وعلى وبوسى :
ماهر : اجرو اجرو هتروحو منى فين
على بيجرى : انت زعلان ليه ده احنا عملنا فيك خدمه والله
ماهر يجرى وراه : خدمه يا واطى
خالد بيجرى : ياعم ده صوتها عالى وبتزعق دى تخوف ياعم الله
ماهر يجرى وراه : وانت مال اهلك وبعدين من امتى الذكاء ده نزل عليك يا غبى يا غبى
يجرى وراهم لحد ما يمسك بوسى من شعرها :
ماهر : وانتى يا سرمة قديمة انا انا ابو جميز
بوسى : ماله جميز مش احسن ما تكون ابو زعيزع
تطلع تجرى :
ماهر : بقى كده طيب طيب ورحمة امى لا اوريكم ايام سوده يا انا يا انتو فى البيت ده
_____________________
بعد كام يوم ... ماهر قاعد بيحاول يتصل ب سالى وهى مش بترد عليه ... خالد وعلى قاعدين بيتفرجو عليه وبوسى شايله النونو وبتلعب معاه :
على : مادام مش عايزه ترد عليك سيبك منها
ماهر : تعرف تخرس مش عايز اسمع صوت حد فيكم
بوسى : دكتور دكتور
ماهر : قولت مش عايز اسمع صوت حد
بوسى : الولد سخن اوى
ماهر : ايه
يقوم ماهر من مكانه ويلمس النونو يلاقى حرارته عاليه :
بوسى : ماله
ماهر : لا الحرارة بالنسبة لـ الاطفال حاجة عادية انا هروح اجبله حاجة تنزل الحرارة
خالد : ورينى كده يا بوسى , يا عينى ده سخن اوى معلش يا صغنون
على قاعد بيبص عليهم بقلق لكن من غير ما يتكلم .. بعد شوية ماهر يجى ومعاه دواء اطفال :
ماهر : هاتيه يا بوسى عشان اديله الدواء ,, دلوقتى السخنة تروح
يعدى اليوم ويجى الليل وماهر يروح بيته وخالد يطلع ينام وبوسى تفضل قعده مع النونو .. شوية وتسيبه نايم على الكنبه وتدخل المطبخ .. على طالع من البلكونه يلاقى النونو نايم لوحده على الكنبه يقرب منه ويشيله براحه :
على : ايه يا صغير انت لسه عيان سلامتك يا حلو انت عارف انا مش بكره العيال الصغرين انا بيعصب عليا العيال الصغرين انت دلوقتى عايش ولا على بالك حاجة بتصحى عشان تنام وتنام عشان تصحى لكن لما تكبر هتقول ياريتنى فضلت صغير الدنيا مش حلوه اوى زى ما انت فاكر زى ما انا كده مش وحش اوى زى ما الكل فاكر
يرجع على يحط النونو تانى على الكنبه ويلف عشان يمشى يلاقى بوسى واقفه وباصه عليها :
على برتباك : ااا انتى كنتى فين ؟
بوسى : كنت بعمل لبن لـ نونو
على : طب ابقى خديه معاكى بعد كده ده كان هيوقع من على الكنبة وانا لحقته
بوسى : بس هو لسه صغير ومش بيتقلب
على : انتى هترغى معايا ولا ايه اوعى اوعى كده من وشى
يمشى على بسرعه ويبسب بوسى واقفة بتبص عليه
_____________________
ماهر فى بيته اخيرا سالى ردت عليه :
سالى : ايه عايز ايه انا غلطانه انى مغيرتش رقمى
ماهر : يا سالى بس اسمعينى
سالى : عايزنى اسمع ايه اكتر من ال انا سمعته
ماهر : اسمعينى بس دول التلات مجانين ال انا مسؤل عن عالجهم
سالى : لا والله
ماهر : اه والله لو مش مصدقه انا ممكن اوريكى الملفات بتاعتهم
سالى : والكلام ال كانو بيقولوه
ماهر : مجانين يا سالى وبيعملو مقلب فى الدكتور بتاعهم لو عايزه هخليهم يقولو الكلام ده ليكى بنفسهم
سالى : والبيت ال حضرتك كنت فيه
ماهر : ده لازوم التجربة ال بعملها عليهم بس ماكانش ينفع اقولك دى تجربة سرية
سالى بدلع : ايه ده يعنى انا ظلمتك
ماهر : اه ظلمتينى اوى اوى كمان يا ظالمة
سالى : تستاهل ما انت لو كنت ماشى معايا صريح ماكانش كل ده حصل
ماهر : سالى انتى ليه بتحبى تبوظى كل لحظه حلوه لينا
سالى : هو انا شايفه معاك لحظات حلوه ولا وحشه حتى مش كفاية طلعت عايش لى مع شوية مجانين وقال تجربة قال بلا خيبه
ماهر : تصدقى بالله
سالى : لا اله الا الله
ماهر : انا استاهل ضرب الجزمه عشان كلمت جزمه زيك , اقفلى يا جزمه
_____________________
بعد ايام ... خالد قاعد مع على فى اوضته :
خالد : ياعم بقى انت شغال تغلبنى
على : يا ياخى اتكسف على دمك مش كفاية مغلوب فى السلم والتعبان
خالد : ما انت ال بتغلبنى
على : بس يا خالد بس انا غلطان انى بلعب معاك اصلا قوم من هنا
خالد : اروح فين
على : روح اقعد مع بوسى
خالد : ياعم بوسى نيمت جميز ونامت جنبه من ساعات كتير اوى , تيجى نلعب بلي
على : !!!
_____________________
بوسى طالعه من اوضتها نص نايمة تخبط فى الكرسى وبعدين تخبط فى الترابيزه وبعدين تخبط فى الحيطه وتوقع على الارض ... تقوم من على الارض تبص تلاقى شباك الصاله بيتفتح براحه اوى وواحد بيدخل منه ويوقف فى نص الصاله ويبص حواليه تلف بوسى براحه وتروح تدخل الاوضه ال قاعد فيها خالد وعلى وتقعد جنبهم :
بوسى : فى حرامى فى الصاله
خالد بخوف : اييييه حرامى
على : ههههههههه يا جبان حرامى ايه بس دى بوسى بتخرف كالعاده
وفجأه يدخل واحد عليهم ماسك فى ايده سكينة :
_ ماحدش يتحرك من مكانه اللى هيتحرك هخلص عليه
على وخالد : حرااااااااااااااامى
بوسى : مش قولتلكم
💗💗💗💗💗💗💗💗💗💗💗💗💗💗💗
تعالوا اتجمعوا هنا.. ايه رايكم في الرواية دي؟؟
علقوا هنا ب 10 ملصقات
الحلقه السابعه
الحرامى خارج من الاوضة بضهره وهو بيشاور بأيده :
الحرامى : اطلعولى انتو التلاته
يطلع خالد وعلى وبوسى من الاوضة وهما رافعين ايديهم لفوق :
الحرامى : يا حلوتكم .. عارفين ما اسمع صوت حد فيكم
على : بقولك ايه شوف انت عايز تسرق ايه وخلصنا وامشى
خالد بخوف : اه والنبى ياعم امشى امشى هوف هوف
بوسى : هوف ؟! هووووووف
الحرامى : هطير انا كده يعنى , فين الفلوس
يبص التلاته لبعض ويرجعو يبصو له :
على : فلوس ايه ؟
الحرامى : انت هتستهبل عليا فين الخزانه
على : كمان خزانه
خالد : خزانة مين ياعم
الحرامى : ااااه شكلكم هتتعبونى
يلف حواليهم وبعدين يقرب لـ بوسى :
الحرامى : حلوه المزه ال معاكم دى
على : هو انت جاى تسرق ولا تخطب , ابعد عنها احسن لك
الحرامى : هههه ايه هى المزه تبقى الوزه بتاعتك ولا ايه
بوسى : ... ؟!
على : وزه ومزه فى جمله واحده ولمين لـ بوسى
خالد : يا سبحان الله بوسى بتتعاكس
الحرامى يمسك بوسى جامد : انتو هتشتغلونى بقولكم ايه لو مطلعتوش الفلوس هخلص عليها قدامكم
بوسى : هما يطلعو الفلوس وانت تخلص عليا وانا طيشه كده فى النص
_____________________
ماهر قاعد فى البيت بيكلم سالى فى التلفون :
سالى : حبيبى هو التجربة ال انت شغال عليها دى لسه فاضل عليها كتير ؟
ماهر : لسه والله يا سالى والمشكله ان مفيش فيها اى تطورات حالتهم زى مهى
سالى : طب الا قولى صحيح هما ليه كده يعنى هما اتولدو كده ولا حصلت لهم صدمه ولا ايه
ماهر : مفيش حد بيتولد مريض نفسى اكيد فى ظروف خلتهم كده مهو انا لو اعرف اللى حصل ليهم اعرف اقدم ليهم العلاج اسرع واحسن لكن هما التلاته مش عايزين يرجعو للماضى مش عايزين يتكلمو حتى التجربة واخدين انها لعبه مش علاج ساعات بحس انهم مش عايزين يتعالجو اصلا
سالى : هو فى حد بيحب يبقى مجنون ده العقل زينه
ماهر : بس فى ناس بتتمنى تبقى مجنونه عشان تعرف تعيش
سالى : اه لا واضح ان العلاج هيطول اوى وانا هفضل مستنية كتير اوى اوى
ماهر : مستنية ايه يا سوسو
سالى : مستنية اتنيل واتجوزك يا عيون سوسو هتتجوزنى امتى ياض
ماهر : طب بذمتك بعد ياض دى هيجلى نفسك اتجوزك , مره واحده خليكى رقيقه للاخر
سالى : يعنى مخطوبه لك من اربع سنين وكل سنه نأجل الجواز عشان خاطر شغل وأبحاث سعادتك وسيبنى وقاعد مع تلات مجانين وفى الاخر تقولى خليكى رقيقه قال رقيقه قال
ماهر : تصدقى فعلا انا الغلطان تقريبا بيقى لازم نختم انا وانتى المكالمه بشتيمه , ابو شكلك حتى اقفلى
يقفل ماهر مع سالى ويقوم يوقف فى البلكونه .. يلاقى نور بيت المجانين منور :
ماهر : ايه ده التلاته بهايهم لسه صاحين لحد دلوقتى , نامو نامت عليكم حيطة خرسانة مسلحة
_____________________
على كنبة قاعد على وخالد ماسك فيه بخوف وبوسى قعده جنبهم والحرامى واقف قدامهم :
الحرامى : بردو مش عايزين تنطقو
على : ننطق بأيه
خالد : بص يا عمو الحرامى انت قولنا عايزنا نقول ايه واحنا نقول على طول
الحرامى بزعيق : تانى تانى ,, فين الفلووووس
بوسى : هو انت عليك عفريت اسمه فين الفلوس
على : ابو الفلوس ل ابو اللى اخترعها ,, مفيش فلوس هنا يا اسطى معانا 3 جنيه تاخدهم وتمشى
الحرامى : 3 جنيه مييين ,, فين الـ 5 مليون جنيه
بوسى : !!! قول والله
خالد : ها , مين , فين , امتى ؟!
على : خ خ خمسه مليون خمسه وخميسه عليك
الحرامى : هاااا هتتكلمو ولا اخلص عليكم
على : هو انت عايز تخلص علينا وخلاص براحه بس مفيش هنا خمسات ولا مليونات ولا حاجات من ال بتقول عليها دى
الحرامى : والمفروض انى اصدق
خالد : الله واحنا هنكدب عليك ليه احنا كلمنا كلمة شرف
الحرامى : والنبى ياخويا وفين فريد شوقى بقى , وانتى كمان مش عايزه تقولى حاجة
بوسى : وانا ليا كلمة بعد كلمتك ياابو محمود
الحرامى : طلعو الفلوس واخلصو انا العنوان ال معايا بيقول ان الفلوس هناا
على : العنوان !
بوسى : بيقول !
خالد : الفلوس هنا !
الحرامى : اااه انا وزميلى سرقنا بنك انا هربت وهو أجر البيت ده وحط الفلوس فى خزانه هنا وبعت ليا العنوان وفى الطريق لـ هنا عرفت انه أتقبض عليه وانا جيت اخد الفلوس قبل ما يعترف على مكانها
على : هو قالك العنوان ايه ؟
الحرامى : شارع الزهور بيت رقم 15
التلاته يبصو لبعض وهما بيضحكو :
الحرامى : ايه ده انتو بتضحكو ليه ؟!
على : تعرف يا خالد
خالد : ايه
على : طول عمرى فاكر انك اغبى واحد انا شوفته فى حياتى سبحان الله طلع فى اللى اغبى منك
خالد : اه والله الحمد لله
الحرامى : هو ايه ده
التلاته يقومو يقفو الحرامى يتخض ويرجع خطوه لوراه :
على : هو ازاى صاحبك أجر البيت وبعت لك العنوان واحنا قاعدين فى البيت ده من شهر
الحرامى : هاااااا
على : والعنوان ال معاك بيت رقم 15 وده بيت رقم 10 شوفت الصفر 5 ازاااى
الحرامى : الله الله الله هو انا غلط فى العنوان ولا ايه اصل الدنيا كانت ضلمه
خالد : اه غلط ومطلعتش انا بس ال غبى
بوسى : غبى اااه عشان كده وزه ومزه يا حمار
الحرامى : لا بقولكم ايه العنوان غلط نعتذر عن سوء الفهم يا حلو منك له وهاخد بعضى وامشى لكن غلط لا بدل ما اتهور عليكم اه انا مجنون
على : هههههههه اهلا يا زميل ,, هجوووووم
يجرى على وخالد على الحرامى على يخطف السكينه ال كان ماسكها من ايده وخالد يركب فوق ضهره ويفضل يضرب فيه وتيجى بوسى بكل هدوء تشيل فازه وتكسرها على دماغه يوقع على الارض :
بوسى : هو مات
خالد : قتلتيه يا بوسى
على : لالا لسه عايش اهو بيتنفس ,, هنعمل ايه دلوقتى
خالد : دكتور ماهر
على : ماانت بتعرف تفكر اهو
يطلع التلاته يجرو من البيت وهما بينادو على ماهر لحد ما يوصل بيته ويفضلو يخبطو عليه جامد :
خالد على بوسى فى صوت واحد : دكتور ماهر دكتور ماهر دكتور ماهر
ماهر يفتح الباب : ايييييييه فى اييييييييييييييييييه
التلاته فى صوت واحد : فى حرامى دخل علينا بالغلط واحنا ضربنه
ماهر : حرامى وضربنه ودخل علينا بالغلط ,, ربنا ياخدكم
_____________________
بعد ساعه كان البوليس جه ومسك الحرامى والظابط عمل المحضر وماشى :
ماهر : انا متشكر جدا جدا يا فندم
الظابط : على ايه ده شغلنا بس بعد كده اقفلو الشبابيك كويس بدل ما يتكرر الموضوع ده تانى
ماهر : ان شاء الله متشكرين جدا لحضرتك
الظابط : العفو لا شكر على واجب عن اذنك
ماهر : مع السلامه
يمشى الظابط ويدخل ماهر البيت ... على قاعد وجنبه خالد وبوسى بتكنس الارض من باقى الفازه المتكسره
ماهر : هو فين الولد الصغير
خالد : جميز ده نايم
ماهر : هو انتو خلاص سمتو جميز منكم لله حتى العيل الصغير مترحمش منكم ,, وايه ال انتو عملتوه فى الحرامى ده
على : نحن رجال افعال لا اقوال
ماهر : لا والله طب يا رجال ابقو اقفلو الشبابيك كويس وبطلو الهبل ال انتو فيه ده
على وخالد يبصو لـ ماهر ويقومو يمشو ويسبوه :
ماهر : ايه الطناش ده ماشى ماشى وانتى يا ست بوسى
بوسى : ايه
ماهر : ايه جاتك اوه هو الولد كل ال حصل ده وهو نايم خالص كده ايه اخد منك البرود من القعده معاكى
بوسى : امسك المكنسة دى
يمسك ماهر المكنسة وتروح بوسى واخده بعضها وماشيه :
ماهر : بت يا بوسى
بوسى تشاور بأيدها : نفض
ماهر : انفض هى وصلت لـ نفض اقول ايه غير منكم لله صبرنى يااارب على التلات اغبياء دول ,, ده حتى الحرامى طلع غبى
💗💗💗💗💗💗💗💗💗💗💗💗💗💗💗
علقوا هنا بمتابعة
الحلقه 8
ماهر : اخرسو بقى اخرسو
على : اسمع بس انت الكلام وادخل شمال
خالد : شمال ايه كده الشيطان يدخل معاه
على : ازاى يعنى ؟!
خالد : مش لو أكل بالشمال الشيطان ياكل معاه يبقى لو دخل شمال الشيطان هيدخل معاه بالعقل كده
ماهر : سكتو الواد ده
سالى : انا ال استاهل انى سمعت كلامك منك لله يا مااااااااااااهر
ماهر : ودنى يخرب بيت صوتك طرشتينى
بوسى : هى مش دى نفس الشجره ال شوفنها من شوية
ماهر : اه كده يبقى احنا بنلف حوالين نفسنا بشرة خير يا جماعه .. احنا توهناا
_____________________
قبل كام ساعه ... ماهر داخل بيت المجانين لاقى التلاته قاعدين جنب بعض وأيدهم على خدهم :
ماهر : يا ساتر يارب يا ترى قاعدين فى جنازة مين
خالد : والنبى يا دكتور بلاش تريقه الواحد نفسويته مش ناقصه
ماهر : نفسويته ايه نفسويته دى , فى ايه يا على
على يبص له ويتنهد : هاااااااااااااااااااا
ماهر : يااااه لدرجة دى الصراحه انا خايف اسأل بوسى اذا كان على قالى هاااا امال بوسى هتقول ايه
بوسى تقوم : حاضر يا جميز جايه
ماهر : هو جميز عيط انا مش سامع عياط ,, مالكم فى ايييه ؟
على : زهقنا
خالد : اتخانقنا
بوسى شايله جميز وجايه : حتى جميز زهق
ماهر : ياسلااااام ومن ايه زهقتو ان شاء الله
على : من الحبسه ال احنا فيها دى
خالد : احنا متفقناش على كده
ماهر : امال اتفقنا على ايه انتو هنا للعلاج مش فسحه
بوسى : ده كده المستشفى احسن
على : ايوه على الاقل كنا بنتمشى فى الجنينة
خالد : بنشوف العيانين والدكاتره
بوسى : كنا بنخنق فى الدكاتره ونجنن فى المدير
على : لكن هنا احنا قاعدين وشنا فى وش بعض حتى فى الاول كنا بنتخانق ونتسلى بالخناق دلوقتى حتى الخناق زهقنا منه
ماهر يقعد : اممممم يعنى يوم ما تتفقو على حاجة تتفقو عليا انا , وايه المطلوب بقاااا
خالد : عايزين نتفسح
على : نشم هوا
بوسى : ... نتفسح ونشم هوا
ماهر : يا صلاة النبى ,, بس تعرفو انتو لـ اول مره معاكم حق ثوانى وجاى
يقوم ماهر ويوقف فى مكان بعيد عنهم ويطلع التلفون ويتصل بـ سالى
_____________________
سالى : الو
ماهر : ايوه يا سوسو وحشتينى
سالى : ليه ؟
ماهر : يسد نفسك يا بعيده اقولك وحشتينى تقولى ليه
سالى : لا قصدى يعنى ايه المناسبه مهو انت مش بتقولها غير فى المناسبات
ماهر : بقولك ايه من غير قلة ادب ايه رأيك نشوف بعض النهارده ونخرج شوية
سالى بفرحه : لا بتتكلم بجد
ماهر : اه طبعا
سالى : نص ساعه واكون جاهزه ومستنياك
ماهر : ماشى يا عمرى بس هو فى حاجة
سالى : حاجة ايه ؟
ماهر : اااا ااامممم مش هنخرج لوحدنا فى ناس هتخرج معانا
سالى : ايوه ناس مين بقى
ماهر : امممم ااااه خالد وعلى وبوسى
سالى : نععععععم خالد وعلى وبوسى
ماهر : وجميز
سالى : كمان جميز
ماهر : امال يعنى هنسيبه فى البيت لوحده ده صغنون يا سوسو
سالى : ...!!
_____________________
بعد ساعتين يكون ماهر قاعد مع سالى فى جنينة نادى كبير وجنبهم قاعد على وخالد وبوسى شايله جميز :
ماهر : اعدلى وشك بقى
سالى بتبريق : تعرف تسكت يا ماهر
ماهر : بسم الله الرحمن الرحيم حاضر يا معلم هسكت
على : احنا هنفضل قاعدين كده يعنى
خالد : انا جبت معايا كوره يلا نلعب
ماهر : اه اه روحو العبو
يقوم خالد وعلى يبعلبو كوره وماهر يبص لـ سالى ويغمز لها :
ماهر : بوسى
بوسى : ايه
ماهر : شايفه الشجره ال هناك دى
بوسى : اه
ماهر : روحى اقعدى تحتها انتى وجميز فى الضل
بوسى : انا مرتاحه هنا
سالى : هى مرتاحه هنا
ماهر : خلاص خليكى مرتاحه هنا
_____________________
على : شوط يا خالد
خالد : اشوط
على : شوط يابنى
خالد : اشوط يعنى
على : يا خالد شوط الله يخرب بيتك
خالد : خلاص انت حر
يشوط خالد الكوره تيجى فى بطن على :
على : اااااااه يا احول انا بقولك شوط فى الجون مش فى بطنى
خالد : خلاص خلاص معلش هشوط فى الجون
على : طب يلا شوط
خالد : اشوط
على : ايوه يلا شوط
خالد : هوب
يشوط خالد الكوره تيجى فى عين على :
على : ااااااه شوط فى الجون يا فالح اااه يا عينى
_____________________
سالى قعده تبص لـ ماهر بغيظ وتبص لـ بوسى وترجع تبص لـ ماهر :
ماهر : يا بوسى قومى اقعدى هناك احسن
بوسى : هنا حلو
ماهر : يا بوسى الواد الشمس اكلته
بوسى : بجد
ماهر : ااه روحى اقعدى بيه فى الضل يا ماما
بوسى : خلاص ماشى
تقوم بوسى ويفضل ماهر وسالى باصين عليها لحد ما يتأكده انها مشيت بعيد يروحو باصين لبعض :
ماهر : وحشتينى اوى يا حبيبتى
سالى : وانت كمان وحشتنى اوى يا حبيبى بقالى كتير مخرجتش معاك
ماهر : عارفه يا قلبى انا ....
بوسى : احم احم
يبصو الاتنين لـ بوسى بعيظ :
ماهر : فى ايه يا بوسى
بوسى : تعالو اقعدو معايا
ماهر : لييييييييييه
بوسى : مش عايزه اقعد لوحدى وبعدين هو انتو عايزين الشمس تاكلكم
سالى بصوت واطى : مش عايزه تقعدى لوحدك ولا خايفه تدوبى من الشمس يا تلج
_____________________
بعد ساعات من لعب الكوره اللى خالد دمر النادى بيه عشان شاط الكوره فى التربيزات والكراسى والناس وفى على وبعد ما ماهر معرفش يتكلم كلمتين مع سالى بسبب بوسى اللى لزقت ليهم خرج الكل من النادى عشان يروحو وركبو عربية ماهر ... بوسى وخالد وعلى ركبو ورا وسالى ركبت جنب ماهر :
خالد : كانت فسحه جميلة بصراحه
ماهر : اه جميله جدا النادى ادمر والناس اتعورت وعلى احول وكله بسببك يا خرب مستعجل انت
على : انا الحق عليا ال قولت العب مع الحماااار ده
بوسى : انا قعدت ومعملتش حاجة يا دكتور ومتحركتش من مكانى صح
سالى : يااختى ياريتك كنتى اتحركتى يا سااااتر ولا سى جميز بتاعكم ده وعياطه فرج علينا الناس كلها
على : اه يا عينى اه منك لله يا خالد يا غبى وهتفضل طول عمرك غبى
خالد : بقولك ايه ياعم بلاش شتيمه اه هو انتو كل شويه هتشتمو فيا
على : ده انا اشتم فيك ونص بعد ال انت عملتو فيا
خالد : وانا بقى مش هخاف منك وهشتمك
على : طب لو جدع اشتم
خالد : اه هشتم بس يا على يا يا قليل الادب
على : ... ؟! تصدق انك هتتضرب
يمسك على فى خالد عشان يضربه :
ماهر وهو سايق : بس بس بسسسس سيبو بعض سيبو بعض
يبص ماهر عليهم عشان يسكتهم دركسيون العربيه يفلت من أيده :
سالى : حاسب يا ماهر حاااسب
يلحق ماهر الدركسيون لكن العربيه تخرج من الطريق وتلف وتدخل فى طريق جانبى نازل زى المنحدر وتنزل المنحدر لحد الاخر يقدر ماهر يوقف العربيه فى الاخر والكل ينزل منها :
ماهر : 1 2 3 الحمد لله كاملين حد فيكم حصله حاجة ؟
سالى : بقى تشوف المجانين كاملين ولا لا وتنسى خطيبتك
ماهر : اه يا حبيبتى معلش 4 كده كاملين
بوسى : وجميز
ماهر : اه وجميز 5 اخرسو بقى كلكم الله يخرب بيتكم خلونى اشوف هنطلع من هنا ازاى
خالد : يا سلام من مكان ما دخلنا
ماهر : يعنى غبى واعمى المنحدر نازل كده والعربية نزلت منه ازاى هنطلعها مفيش غير اننا نشوف طريق من هنا يطلعنا على الطريق الرئيسى الحمد لله ان العربية لسه شغاله يلا اركبو
سالى : انا من الاول حاسه انها خروجه سوده
يركب الكل العربيه ويسوق ماهر ويبدء يدور على طريق يخرج منه
_____________________
بعد 3 ساعات :
على : ادخل شمال
خالد : ادخل يمين
سالى : اه يا دماغى صدااااع
جميز : اوعاا اوووعااا اوعاا
بوسى : جميز بيعيط
على : ادخل شمال
ماهر : اخرسو بقى اخرسو
على : اسمع بس انت الكلام وادخل شمال
خالد : شمال ايه كده الشيطان يدخل معاه
على : ازاى يعنى ؟!
خالد : مش لو أكل بالشمال الشيطان ياكل معاه يبقى لو دخل شمال الشيطان هيدخل معاه بالعقل كده
ماهر : سكتو الواد ده
سالى : انا ال استاهل انى سمعت كلامك منك لله يا مااااااااااااهر
ماهر : ودنى يخرب بيت صوتك طرشتينى
بوسى : هى مش دى نفس الشجره ال شوفنها من شوية
ماهر : اه كده يبقى احنا بنلف حوالين نفسنا بشرة خير يا جماعه .. احنا توهناا
سالى : توهناااااااااا بقولك ايه ماليش دخل روحنى يا مااااااااااهر
ماهر يوقف العربيه : وانا يعنى لما اطرش هعرف اروحك مبسوطين يا تلات كوارث كل ده بسببكم
على : ايوه كل حاجة احنا مش كده
خالد : احنا ذنبا ايه انك مش بتعرف تسوق الله الله
ماهر : عارفين لو مسكتوش
وهو بيزعق فيهم يلاقى رأس دخلت له من شباك العربية :
_ انتو مين
الكل : ااااااااااااااااااااااااااه
_ شوفتو عفريت
ماهر : يخرب بيتك ياعم قطعت خلفى
سالى : كماااان يا فرحتى
_ انتو ايه اللى جبكم الحته المقطوعه دى
ماهر : احنا تايهين يا حاج متعرفش الطريق الرئيسى من فين
_ اه ادخل شمال فى يمين وامشى على طول هتلاقى الطريق الرئيسى قدامك
ماهر : ..... !!!
_____________________
بعد ساعه ... سالى نزله من العربيه قدام بيتها :
سالى : بقولك ايه لا عايزه اخرج معاك ولا اشوفك ولا حتى اسمع صوتك لحد ما تخلص من التلاته دول ,, انت فااااااهم
ماهر : فاهم فاهم ارحمى ودانى بقاااااااااا
سالى : انت بتزعق لييييييييييه
ماهر : ما انا طرررشت
سالى : اووووف
تمشى سالى ويسوق ماهر على البيت :
ماهر : عارفين من تقول فسح تانى او خروج هخرجكم على المشرحه مفهوم
خالد : ياعم دى قعدت البيت احسن بلا خروج بلا نيله
على : مهو كله بسببك انت من ساعة ما شوط الكوره فى وشى والخروجه باظت يا حمار
خالد : بلاش شتيمه يا على لحسن هشتمك
على : لو جدع اشتم انا اصلا هديك بالجزم
ماهر : بطلو خناق بطلو خناااااق
خالد وعلى : حااااسب الشجره
تخبط العربية فى شجره :
جميز : اوعااا اوعااا اوعاااا
بوسى : جميز بيعيط
ماهر : حسبى الله ونعمه الوكيل
💗💗💗💗💗💗💗💗💗💗💗💗💗💗
تدووووووووم عليكم الضحكايه حبايبي
التفاعل بطئ جدااااااا
علقوا هنا بخمس ملصقات
الحلقه 9
بعد فتره .. ماهر قاعد مع خالد وعلى وبوسى قاعد على كرسى وهو باصص على ال بيعملوه خالد بيضرب علي ضربه خفيفه على كتفه ويطلع يجرى يقوم علي طالع يجرى وراه وماسكه مموته ضرب وبوسى قعده على جنب مش باصه عليهم اصلا واخده جميز فى حضنها عشان ينام ودقيقه تنام هى .. يحس ماهر انه مدايق ومخنوق يقوم يطلع بره البيت خالص ويقعد قدام الباب وهو بيفكر :
ماهر فى سره : وبعدين عدا اكتر من شهر ونص الوقت بيجرى ومش فاضل كتير والتجربه تخلص ومفيش اى تحسن حصل واحد جبان خايف من خياله واحد عصبى مش طايق حد ده غير الهانم اللى قعده كأنها مش قعده الدنيا تتقلب حواليها وهى مش فى دماغها والمفروض ابعت التقرير لـ مدير المستشفى واقوله التطورات طب ابعت له اقوله ايه مفيش اى تطورات
وهو قاعد بيفكر يلاقى تلفونه بيرن يبص على الاسم يلاقيه مدير المستشفى :
ماهر : نهار اسود انت بتيجى على السيره ارد ولا لا يعنى ههرب منه ماانا لازم ارد عليه ... احم احم الو
المدير : ايوه يا ماهر ازيك
ماهر : الحمد لله يا فندم حضرتك عامل ايه
المدير : انا كويس ,, هاا ايه الاخبار عندك
ماهر : الله اكبر .. اه اه يا فندم الحمد لله كله تمام وزى الفل
المدير : طب كويس امال فين التقارير ده انا مستنيها من اسبوع
ماهر : الله هو كان داخل فى دماغى ولا ايه .. اصل يعنى يعنى التقرير انا يعنى لسه بكتبه واول ما اخلصه هبعته لحضرتك على طول
المدير : امممم واخبار زفت وطين ونيله ايه وايه درجة التغير اللى وصلو ليها
ماهر : ياعينى ده طيب اوى .. بص يا فندم من الاخر ومن غير لف ودوران مفيش اى تغير حصل فى الحالات اه بقى ماانا مش هكدب
المدير : انا كنت حاسس , هو فاضل على التجربه قد ايه ؟
ماهر : بالظبط شهر و 15 يوم
المدير : شيل شهر يفضل 15 يوم 15 يوم يا ماهر لو محصلش تغير التجربه هتتلغى بالكامل
ماهر : ايه 15 يوم !! ليه بس كده يا فندم , طب خلينى اكمل لحد الاخر وانا اوعدك ان ..
المدير بحزم : ال تعرف تعمله فى 3 شهور هتعرف تعمله فى 15 يوم وبعدين مهو احنا داخلين على الشهر التانى اهو ايه اللى حصل ايه اللى اتغير , اسمع انت لما قولتلى على التجربه دى انا وفقت مع انى مش مقتنع بيها عملتلك ميزانية للمصاريف وأجرت البيت وخرجت تلات مجانين من المستشفى على مسؤليتى الشخصيه لكن تيجى تقولى مفيش تغير وزى ماهما ده انا المفروض دلوقتى كنت قولتلك هاتهم وتعالا والغى كل حاجة
ماهر : بس يا فندم ..
المدير : من غير بس هما 15 يوم واسمع اهليهم سألو عليهم وعرفو موضوع التجربة وجاين يشوفوهم
ماهر : ايييييه لالالالا مينفعش خالص الا اهليهم مش هينفع
المدير : يعنى ايه مش هينفع
ماهر : يا فندم المريض النفسى مينفعش يشوف اهله خالص وخصوصا وهو فى فتره علاج هو انا اللى هقول لحضرتك
المدير : انا عارف انا بعمل ايه التلاته دول لازم يتحطو فى موجهه حقيقيه
ماهر : يا فندم الله يخليك لو حد فيهم مرضه بسبب اهله وشافهم حالته هتسوء وترجع ألف خطوه لورا
المدير : ده على اساس انها اتقدمت صح
ماهر : ................
المدير : بكره الصبح أم خالد هتيجى له وتقعد معاه بلغه بكده .. سلام
ويقفل المدير السكه قبل حتى ما يسمع رد من ماهر :
ماهر بعصبيه : ابوك وابو ال جابك ياخى هتبوظ كل ال بعمله
_____________________
فى البيت خالد بيجرى ورا بوسى عايز ياخد منها جميز :
خالد : يا بوسى هاتيه بقى
بوسى : لا
خالد : الله مهو على طول معاكى هاتيه العب معاه شويه
بوسى : انت غبى ممكن تعلقه فى المروحه على اساس انها الملاهى
خالد : لالا انا عارف انه صغير مش هعلقه فى المروحه
بوسى : امال هتعمل ايه
خالد : هحطو فى الدولاب واقوله ده بيت الرعب يا حبيبى
بوسى : .. !!
يدخل ماهر ويوقف يبصلهم شويه :
ماهر : هو ده اللى انتو فالحين فيه انا اتعب ودمى يتحرق وانتو بتلعبو
على : فعلا اتنين اغبياء
ماهر : اتنيل انت كمان .. خالد
خالد : والله ما انا ال اكلت الفرخه اللى كانت فى التلاجه دى بوسى
بوسى : ده علي
على : ده جميز
ماهر : يشفى الكلاب ويضركم مش هقولك غير كده هو انا لسه اتكلمت اصلا .. خالد ولدتك جايه تزورك بكره
خالد يبرق ويتنح ووشه يعمل الوان الطيف :
خالد : قول والمصحف
ماهر : والمصحف
خالد : لوولولوليييييييي
دييب .. خالد يوقع
_____________________
تانى يوم الصبح :
على : يابنى اطلع
خالد : مش طالع
بوسى : يعنى هتفضل تحت السرير اليوم كله
خالد : اه لحد ما امى تمشى
على : بس الدكتور ماهر قال انك لازم تسلم عليها وتتكلم معاها
خالد : ايه اسلم عليها واتكلم معاها الاتنين
بوسى : اطلع بقى
خالد : مش طاااالع طب اقولك يا بوسى روحى هاتلى ازازة ميه و 18 20 سندويش لحد ما اليوم يخلص
على : وانت يكفيك ازازة ميه 20 سندويش طول اليوم ده انت ولا يكفيك اكل الجيش التالت بحاله
خالد : خلاص مش عايز ولا اكل ولا شرب بس سبونى مستخبى تحت السرير الله يخليكم
بوسى : وهو انت مستخبى ليه اصلا
خالد : مستخبى ليه بتسألينى مستخبى ليييه ليكى حق ماانتى متعرفش امى وصوت امى وضرب امى يا نهار اسود على امى
يدخل ماهر عليهم ماهر :
ماهر : خالد اطلع وبطل استهبال ولدتك وصلت ومستنياك
خالد بخوف : امى امى امى جات امى جات استخبى فين استخبى فين
على : ماانت مستخبى اهو يا اهبل
_____________________
بعد شوية قدر ماهر يقنع خالد انه يطلع يسلم على ولدته .. ست ضخمه على وشها ملامح الغضب من غير سبب ال يشوفها ممكن يفتكرها بتشتغل سجانه فى سجن الرجال مش النسأ كمان .. طلع ليها خالد وهو بيترعش ويقرب منها براحه :
خالد بتوتر : از ازيك يا ماما
أم خالد بزعيق : انا افضل مستنياك كل ده يا زفت
يجى خالد يجرى يمسكه خالد ويرجعه مكانه :
خالد : معلش معلش يا ماما
أم خالد : اقعد
خالد : حاضر
يقعد خالد جنب أمه وهو خايف :
أم خالد : انت اخبارك ايه دلوقتى
خالد : ال ال الحمد لله
على وبوسى واقفين بيتفرجو من بعيد :
على بهمس : دى ام خالد دى ام خالد دى ابو خالد يا جماعه
بوسى : اكيد الست دى مش مولوده زى باقى الناس
على : امال مصنوعه
بوسى : تؤ دى اكيد مهجنه فى صوبه مع انثى ديناصور
أم خالد تبصلهم : مين البت ال شبه السحليه اليتيمه دى
على : هههههههه كلمى يا سحليه
أم خالد : والواد ال شبه الضفدعه الارمله ده
بوسى : ههه ضفدعه
ماهر : بوسى على تعالو سلمو على أم خالد
يقربو الاتنين يسلمو عليها ويقعد بسرعه جنب ماهر :
خالد : دول زمايلى يا ماما
أم خالد : ااااه على فكره انا اخد أذن من دكتور ماهر انى اقعد معاك يومين
خالد : تقعدى فين حضرتك
أم خالد : هنا فى البيت ده
خالد : يومين ؟
أم خالد : ايوه
خالد : معايا
أم خالد : قولت ايوه
خالد : هه ههه ههه هههههههههههههه
ديب
💗💗💗💗💗💗💗💗💗💗💗💗💗💗
علقوا هنا بخمس ملصقات
الحلقه 10
خالد قاعد متربع على السرير وعامل يتحرك لـ قدام ووراه فى توتر وعلى وبوسى قاعدين جنبه :
على : ما تهمد بقى خيلتنا
خالد : امى هتقعد معايا يومين بحالهم يالهوى
على : يابنى دى مامتك عيب كده هى صح مرعبه وشبه استفان روستى ودخلت كده هجم علينا زى الهكسوس بس بردو اسمها مامتك عيب عيب
خالد : اهئ اهئ مهى المشكله انها امى اهئ
بوسى : خالد هو انت بتخاف منها كده ليه ؟
خالد : هههه بخاف منها كده ليه ههههه هههههههه اهئ اهئ اهئ , زمان فى بيتنا كان عندنا برطمان مخلل وانا كنت صغير بلعب خبط البرطمان وقع اتكسر عارفين عملت فيا ايه
على وبوسى : ايه ؟!
خالد : جابت حبل وربطت ايدى ورجلى ودخلتنى فى دولاب الهدوم زى شكارة الرز الفلاحى وقفلت عليا ساعتين بحالهم وقالتلى دى عقابك عشان تبطل تنطيط
على : هاااار اسود
خالد : لا دى على كده حاجة بسيطه يا جماعه انا امى استاذه فى التعذيب كان المفروض يشغلوها فى معتقل جوانتانامو وانتو تقولولى خاف منها ليه غطونى وصوتو غطونى وصوتو
بوسى : يالهوووووووى
خالد بفزع : ايييييه فى ايه
بوسى : مش انت ال قولت صوتو
_____________________
فى الصاله ماهر قاعد مع أم خالد :
ماهر : لازم فى اليومين اللى حضرتك قعده فيهم مع خالد تحاولى تعامليه معامله خاصه جدا زى ما فهمتك
أم خالد بغرور : هو انت هتعلمنى اتعامل مع ابنى ازاى
ماهر : يا فندم ابن حضرتك دلوقتى مريض وانا الدكتور بتاعه وعارف انا بقولك ايه انا وفقت انك تقعدى معاه اليومين دول عشان يمكن وجودك معاه يحسن من حالته
أم خالد : اممم فعلا هو لازم يتحسن شويه
ماهر فى سره : يامه ايه الوليه دى ربنا يستر
أم خالد : فين اوضتى ؟
ماهر : نعم !
أم خالد : اوضتى , الاوضه اللى هقعد فيها اليومين دول
ماهر : الحقيقه هو البيت تلات اوض بس ف حضرتك بقى تقعدى مع خالد فى اوضته
فى الوقت ده يكون خالد وعلى وبوسى جاين ويسمعو كلام ماهر مع أم خالد :
خالد : ايه لالالالا
ماهر : لا ايه انتو من امتى هنا
أم خالد بصوت عالى : انت بتزعق ليه يا ولد
خالد برتباك : اااا اصل اصل يا ماما حضرتك عارفه انا نومى وحش اوى ومش حلو خالص وحضرتك مش هترتاحى فى النومه جنبى يعنى
أم خالد : وغبى مين قالك انى هنام جنبك يا غبى
ماهر : احم
خالد : ههه الحمد لله قصدى يعنى امال حضرتك هتنام فين ؟
أم خالد : انا هنام فى اوضك وانت تشوفلك حته تنام فيها اقولك نام فى اوضت زميلك اللى جنبك ده
على : نعععععععم
أم خالد بنظره مرعبه : فى حاجه
على : هاا لا خالص
ماهر : طيب انا همشى بقى وهاجى اشوفكم بكره الصبح
يمشى ماهر والتلاته يبصو لبعض ويبصو لـ أم خالد :
أم خالد : خالد
خالد : ن نعم نعم يا ماما
أم خالد : انا عايزه انام شوية فين الاوضة
خالد : من هنا يا ماما اتفضلى
جميز : اووعاااا اووعااا اوعااااااا
أم خالد : ايه ده ايه الصوت ده هو فى عيال هنا
تروح بوسى تشيل جميز وتجيبه :
بوسى : ده جميز
أم خالد : جميز مين ان شاء الله ولد يا خالد
خالد : والمصحف ماابنى ده نونو صغير كان قدام باب البيت صعب علينا
أم خالد : امممم طب سكتوه انا مش بحب الدوشه
على : سكتيه يا بوسى دى ممكن تاكله
بوسى : اكتم يا جميز لا تاكلك
_____________________
تانى يوم :
على : ابو نومك ياخى كسرت ضهرى
خالد : معلش بقى يا علوه يومين ويعدو
تخرج أم خالد من الاوضه وتبصلهم :
أم خالد : ههه من امتى بتصحى بدرى يا فاشل
خالد : هى عليا ولا عليك
على : ده على اساس انها امى انا عليك طبعا
خالد : ما انا خلاص اتعلمت اصحى بدرى يا ماما
أم خالد : اممم فين الفطار
خالد : الفطار فين الفطار فين
على : اه الفطار فين يااا بوووسى
بوسى وهى نص نايمه : صباح الخير اااه
أم خالد : انتى يا بنت
بوسى تبص حواليها : انا
أم خالد : هو فى هنا بنت غيرك
على : لا بصراحه هو مفيش هنا بنات اصلا
بوسى : نعم
أم خالد : مش المفروض تصحى من بدرى وتحضرى الفطار وتشوفى وراكى ايه تعمليه
بوسى : انا ؟!
أم خالد : اه طبعا انتى بنات اخر زمن خايبه
على : هى اصلا مش بنات هى مدامات المدام مطلقه
أم خالد : كمان ااااه اكيد عشان كده اطلقت واحده خايبه متنفعش فى بيت ده ربنا ريح جوزك منك انا بكره البنات ال متعرفش تعمل حاجه فى حياتها غير النوم والاكل
بوسى : انا ؟!
خالد بخوف : ماما يعنى هو كده يعنى متهيألى حضرتك يعنى كده ميصحش وعيب كده
أم خالد : انت بتقول ايه يا ولد
خالد : انا مش بقول حاجة
أم خالد : انت بتقولى ايه اللى يصح وايه اللى ميصحش يا فاشل يا غبى يا حمار يالى مش نافع فى حاجة
بوسى من غير ما تحس : ايه الست المفتريه دى
أم خالد تبصلها : انتى قولتى ايه ؟!
خالد وعلى : ضيعت نفسها
تقرب أم خالد من بوسى يروح خالد وعلى كل واحد فيهم يجرى فى ناحية :
أم خالد بغضب : عيدى اللى قولتيه تانى كده
بوسى تبص شمال ويمين متلاقيش حد فى المكان غيرها :
بوسى : ابنك ده واطى وعايز يتربه
وقبل ما أم خالد ترد يدخل ماهر اول ما بوسى تشوفه تروح تجرى من قدام أم خالد :
ماهر : صباح الخير
اول ما خالد يسمع صوت ماهر يطلع من ورا الكنبه هو وعلى :
خالد : دكتور دكتور
ماهر : ايييه فى ايه على الصبح
خالد : دكتور لو سمحت انا مش عايز زيارات من حد ومش عايز حد يقعد معايا
أم خالد : اييييييييييه انت بتقول ايه يا زفت
خالد يستخبى ورا ماهر :
خالد برعب : قولت قولت اننن انى مش عايز حد يزرنى ولا يقعد معايا وووو وبصراحه انا عايزك تمشى
أم خالد : يا كلب يا قليل الادب دى طريقه تكلم بيها أمك بعد ما تعبت فى تربيتك
خالد : ووو وهى فين التربيه دى ده انتى ربيتى لى الرعب وكل شويه تقولى يا فاشل يا فاشل
ماهر : بس بس كفايه كده لو سمحتى يا فندم تتفضلى
أم خالد بزعيق : انت بتقول ايه انت كمان انت هتاخد على كلام الولد الغبى ده اللى مش عارف حتى مصلحته فين ولا عارف هو بيقول ايه ده طول عمره مش بيعرف يعمل حاجة فى حياته ابدا
ماهر : يا هانم الكلام ده غلط يتقال مينفعش كده
خالد يطلع من ورا ضهر ماهر :
خالد : انا ال غبى ومش بعرف اعمل حاجة ولا انتى ال عمرك ما قولتى لى على حاجة كويس مهما كنت اعمل كنتى تقولى وحش زفت خلتينى ادخل كلية الشرطه غصب عنى وانا مش بحبها كل حاجة كنت بكرها انتى كنتى بتخلينى اعملها غصب عنى كفاية ظلم بقى انا مش هفضل خايف اتكلم طول عمرى انا كبرت كبرت على كل حاجة كبرت على الخوف منك كبرت على الضرب والشتيمه ارحمينى بقى هتعملى فيا ايه اكتر من كده هتوصلينى فين اكتر من انك وصلتينى لمستشفى المجانين
ماهر بتأثر : اهدى يا خالد يا على يا بوسى خدو خالد وروحو اقعدو جوا
بوسى وعلى يخدو خالد ويمشو
____________________
قدام باب البيت وقف ماهر بيسلم على أم خالد وهى ماشيه :
ماهر : مع السلامه يا فندم
أم خالد : انا مش فاهمه ازاى الولد ده قدر يتكلم معايا كده ده انا ربيته احسن تربيه
ماهر : يا هانم احب اقولك انك تربية حضرتك كانت غلط عمر ما التربيه كانت بالضرب او بالزعيق او بتحطيم المشاعر مع الاسف كتير اوى بيفكرو ان دى التربيه الصح ميعرفوش ايه اللى ممكن تعمله الشده والقسوه وايه اللى ممكن توصل ليه فى الاخر .. بس بصراحه انا مبسوط اوى انك جيتى ومبسوط من الكلام ال قاله خالد كده هو بدء يتعالج فعلا وال حصل النهارده ده اول خطوه ليه على طريق العلاج
أم خالد : بس بس انا عندى ليك طلب يا دكتور
ماهر : اتفضلى
أم خالد : لما تبقى تتكلم مع خالد ابقى قوله انى ماكانش قصدى انى اعمل فيه كل ال هو قاله ده انا بس كنت عايزاه يطلع راجل محترم يمكن ربيته غلط بس ده من خوفى عليه وعلى مستقبله
ماهر : انا فاهم وعارف ده كويس .. مع السلامه يا هانم
أم خالد : مع السلامه
تمشى أم خالد ويوقف ماهر شويه باصص عليها :
ماهر : والله كويس فكرة المدير جات بفيدة بس يا ترى هتيجى بفيدة مع على وبوسى ولا هتيجى بكارثه
_____________________
على وبوسى قعدين كل شويه يبصو لبعض ويبصو لـ خالد اللى سرحان وكأنه مش معاهم :
على : هو ماله متنح كده ليه ؟
بوسى : تكون الصدمه لحست دماغه اكتر مهو ملحوس
على : خالد وله يا خالد رد علينا يالا
بوسى : خالد هو انت سمعنا ؟
خالد : امممم
على : امال مالك عامل شبه المساطيل كده
خالد : بفكر
على : يا نهار اسود ومش فايت الحقى
بوسى : ايه !!
على : خالد بيفكر
خالد : انا دخلت فى امى شمال صح
بوسى : شمال وبس
على : ههه ده انت تقريبا طلعت غل السنين كله
خالد : الله طب ما جامد اهو وكويس امال بتقولولى غبى وجبان ليه لا بقى ده انا من هنا ورايح افرد نفسى عليكم كده
على : تفرد نفسك على مين ياض
خالد : ايه يا علوه الواحد ميعرفش يهزر معاك
على : ايوه كده اتعدل
_____________________
بعد يومين :
بوسى قعده على الكنبه فى الصاله وشايله جميز بتلعب معاه تسمع الباب بيخبط تحط جميز على الكنبه وتقوم تفتح .. تلاقى واحد واقف قدامه باين عليه التوتر والقلق :
_ مساء الخير
بوسى : مساء النور
_ انا اسمى حسن عبد الحميد
بوسى : افندم حضرتك عايز ايه ؟
حسن : عايز ..........
💗💗💗💗💗💗💗💗💗💗💗💗💗💗
تعليقات
إرسال تعليق