رواية حكاية وعد الفصل الرابع والسابع والثامن والتاسع بقلم ملك محمد حصريه في مدونة موسوعة القصص والروايات
رواية حكاية وعد الفصل الرابع والسابع والثامن والتاسع بقلم ملك محمد حصريه في مدونة موسوعة القصص والروايات
#حكاية_وعد (7)
"نهار يوم جديد"
وعد صحيت بدري ولبست ملابس شيك من ال زين جابهوملها علشان تروح بيهم الشركه وكانت ف كامل اناقتها
خرجت من اوضتها وهي بتبص ف الشنطه كان زين كمان خارج من اوضته وبيبص ف ساعته خبطت فيه
زين رفع وشه لقاها بص بذهول على ملامحها وجمالها ال كل يوم بيشوفها احلى من اليوم ال قبله
وعد : مش تفتح يااخ انت اعمى
زين : تعرفي انك حلوه طول مانتي ساكته اول لما بتتكلمي بتضيعي كل حاجه بلسانك ال عايز قطعه داه
وعد : بقى كدا يعني المشكله كلها طلعت ف لساني
زين : لا متقوليش هو انتي لسه عارفه
وعد : وعد خلاص من هنا ورايح مش هتكلم ابدا
زين : عيني ف عينك كدا
وعد قربت منه وبرقت ف عينه
زين زق دماغها بصباعه لورا وقالها
: احفظي حدودك يابت انتي
وعد شاورتله وهي كاتمه بوئها
زين بفرح : طب دا حلو اوي ياريت بقى تفضلي على كدا يومين تلاته
وعد : تمام
وبعدين افتكرت انها مفروض متتكلمش راحت كاتمه بوئها
زين ضحك وقال : مش هتقدري انا عارف
راح ع العربيه وركب ووعد راحت وراه وركبت هي كمان
زين وهو سايق : اول مره تصحي بدري يعني وكمان جاهزه ومتشيكه
وعد لسه هتفتح بوئها افتكرت انه قالها متتكلميش راحت قاعده ساكته
زين : اه انتي اتخرستي مش كدا طب ع فكره بقى دي فكره حلوه اتمنى تفضلي كدا ع طول
وعد ساكته
هدوء دقائق
زين : الشياكه دي كلها علشان كريم صح
وعد ساكته
زين : ع فكره هو حتى لو شافك حلوه عمره ماهيبص ليكي تاني وبصراحه عنده حق يعني هيسيب حسناء ال هي رقه ودلال وجمال ويبصلك انتي معتقدش لأ
وعد كاتمه غيظها وساكته
زين : عارف ان لسانك هيتشل دلوقتي لو منطقش اتكلمي اتكلمي انا سمحتلك بالكلام خلاص
وعد ساكته بردو
زين بدأ يدايق
: هو في اجتماع النهارده ف الشركه
وعد ساكته
زين : انتي عنيده اوي ودماغك ناشفه تعرفي نفسي امسك دماغك افشفشهالك
وعد ساكته
زين : قولتلك اتكلمي خلاص متبقيش مستفزه
وعد ساكته
زين بعصبيه وقف العربيه وقالها : لو متكلمتيش هعمل حاجه مش هتعجبك
وعد بثبات قاعده ساكته
زين بمكر : بقى كدا طيب ابقي وريني عنادك دا آخره اي
وراح مقرب عليها علشان يبوسها
وعد اتفاجئت لما قرب منها وراحت مصرخه وحاطه أيدها ع وشها وقالت
: خلاص خلاص اتكلمت اهوه
زين بكبرياء رجع لمكانه وابتسم وقال
:متبقيش تعنديني تاني ها
وعد بعصبيه : انت واحد منحرف لو قربت مني تاني هزعلك
زين ببرود : ششش انتي اخرك لسان
وعد بعصبيه : طب اعملها تاني كدا يازين وقرب مني وصدقني هزعلك
زين : اولا طول ماحنا بره البيت اسمها زين بيه واياكي اسمعك بتقولي زين دي ف الشركه ابدا
وعد ببرود : حاضر يازين
زين بعصبيه : انت بتدايقيني بقى
وصلوا الشركه وهما الأتنين مش مبطلين عناد ف ومدايقه ف بعض
نزلوا من العربيه كان كريم كمان لسه واصل ونزل هو كمان من عربيته
وعد وهي بتخانق ف زين
: انا بكلمك متسبنيش وتمشي
زين بص لقا كريم قالها
: كريم جالك اهوه اجري اترمي تحت رجله وعيطي
وعد بصت وراها لقت كريم جاي من ناحية عربيته
زين سابها ومشي لقدام بيبص وراه ملقهاش لقاها واقفه بتبص على كريم
راح راجعلها وماسك أيدها وعينه ف عين كريم واخدها معاه ع فوق
دخل مكتبه هي ف ايده
وعد بتعجب : هو انت اخدتني معاك ليه ومخلتوش يشوفني مع اني لابسه ومتشيكه علشان عايزاه يشوفني هو مش دا جزء من الخطه
زين بتعجب هو كمان : مش عارف بجد مش عارف انا جبتك من قدامه ليه
وعد بتعجب : شكلك كنت سرحان
زين بضيق : وعد روحي ع مكتبك
وعد : طب ولو مروحتش
زين بعصبيه : انا مبهزرش دلوقتي روحي على مكتبك يلا
وعد خرجت وهي بتكلم نفسها
: ماله داه شويه يهزر وشويه يتعصب دا مجنون رسمي
زين ف مكتبه قعد ع الكرسي يفكر
: انا ليه محبتش كريم يشوفها واخدتها من قدامه بدون مااحس
اكيد في حاجه غلط
بره حسناء جت لوعد ع المكتب
وعد بتعجب : حسناء
حسناء : اه انا ممكن ادخل لزين ولا مش فاضي
وعد: اه طبعاً ادخلي انتي محتاجه تستأذني دا اخوكي
حسناء : بس بردو انتي السكرتيره لازم ناخد اذنك
وعد بتوتر : لا لا مش اوي كدا اتفضلي ادخلي
دخلت حسناء على زين
زين بتعجب : حسناء
حسناء قعدت ع الكرسي : هو يوم التعجب النهارده ولا اي ايوا انا
زين : بتعملي اي هنا
: نقلت ملف شغلي للفرع هنا اتمنى متكونش مدايق
زين فهم فقالها : اه قولتيلي لا ابدا وهدايق من اي يارب تتبسطي معانا هنا
: هتبسط متبسطش ليه كفايه اني هشوف خطيبي كل دقيقه
زين : ابقي خلي بالك منه كويس
________________
بعد مرور الوقت خرج زين من مكتبه
لقى الموظفين متجمعين وبيقولوا انهم هيخرجوا سوا النهارده يسهروا مع بعض
واحد قال لزين
: هتيجي معانا يازين بيه
زين : لا
وعد قربت منه وقالتله انا عايزه اروح معاهم
زين بذهول : انتي مجنونه دول بيسهروا ف ملهى ليلي ف تركيا الموضوع مختلف عن مصر انتي فاكراهم رايحين يشربوا عصير قصب
وعد : عشان خاطري عايزه اروح لأن كريم وحسناء رايحين
زين : لا الحاجات دي انتي لسه صغيره عليها وبعدين حسناء رايحه مع خطيبها حضرتك هتروحي مع مين
وعد : معاك
زين : مستحيل
____بقلم ملك محمد__________
"في مكان السهره اتجمعوا الموظفين كلهم على طاوله واحده والكل عمال يضحك
الا زين قاعد مدايق ومش عاجبه القعده
وعد منزلتش عينها من على كريم وكريم بيهزر مع حسناء وزين باصص على وعد ولفي بينا يادنيا
زين بضيق: انا زهقت ممكن نروح
وعد : خلينا شويه انا عايزه اشرب م ال هما بيشربوه هناك داه
زين : بس يابابا
وعد : متعملنيش ع اني عيله صغيره انا انسه وعايزه اشرب زيهم
زين : هو انتي فاكراهم بيشربوا عصير قصب
وعد : لا انا عارفه انهم بيشربوا منكر
زين مقدرش يمسك نفسه وضحك
: وانتي عايزه تشربي منكر زيهم
وعد: لا انا عايزه اجرب بس
زين حط كوبايه قدامها وقالها جربي
وعد بفرح : بجد
زين : اه اتفضلي ياانسه وعد ياكبيره ياعاقله
وعد : شكرا شكرا
ومسكت الكوبايه وغمض عيونها وبتاخد اول رشفه برعب اول لما داقتها قالت بذهول
: اي دا دي طلعت شبه المايه
زين : برافوا طلعتي عندك حاسة تزوق خرافه
وعد شربة الكوبايه وخلصتها وقالتله
: علشان تعرف اني قويه بس
زين :لا مانا عارف اجبلك تاني
وعد بلهفه : اه اه هات كتير
زين وهو كاتم ضحكته صبلها كمان كوبايه
وعد تشرب وتقول : دي طعم المايه بالظبط بقولك
زين : اشربي اشربي دانتي طلعت بنت ملكيش حل
وعد : اي دا انت مش الشرقيه ياستا
زين : ايوا طالما وصلنا للشرقيه يبقى ال بتشربيه عمل مفعول كملي كملي
وعد : لا خلاص مش قادره
زين : ولو لازم تخلصيها كلها
وصبلها اخر كوبايه ف القزازه
وعد وهي بتشرب وعامله نفسها سكرانه وعايشه الدور ع الآخر
زين : شايفاني كام دلوقتي
وعد حولت عيونها : شايفاك اربعه
زين بضحك : برافوا برافوا استمري لحد ماتشوفيني 10
حسناء فجأه عطشت فبصت ناحية زين وقالتله
: ممكن قزازة المايه ال ف ايدك
زين وهو بيبص لوعد : للاسف خلصت في ارنب شربها
وعد اتعدلت وبصتله بصدمه وبصت للكوبايه ال ف ايدها
: لا بتهزر
زين بضحك : تؤ تؤ
وعد نزلت بوشها لتحت وخبت نفسها بين شعرها من الكسوف
زين همس ف ودانها وقالها
: متتكسفيش اطلعي كملي شرب في قزازه تانيه جت اهيه
رفعت عيونها وبصتله من تحت بغيظ
زين : يخربيت نظرتك اي هتاكليني مش انتي ال عايزه تدوقي قولت ادوقك بس بصراحه عندك حاسة تزوق فظيعه ازاي حسيتي انها طعم المايه دا انجاز
وعد راحت ماسكه ايده وحسست عليها بالراحه و بصتله بابتسامه عريضه
زين بتعجب : هو في اي
راحت موطيه وعضاه
زين : ااااا يامجنونه
وعد بإبتسامه مصطنعه
: علشان تخليني مسخره قدام الناس تاني انا هعرفك مين الأرنب
كريم بص عليهم بضيق وقال
: واضح انكوا واخدين على بعض جدا زين عمري ماشوفته بيهزر مع حد بالطريقه دي
حسناء : يابني زين من يوم ما وعد جت البيت وهو انسان تاني خالص داحنا كنا قربنا ننسى بيضحك ازاي ودلوقتي ابتسامته مبتفرقش وشه
زين وهو بيبص على وعد وحاتط ايده ع خده
: مش عارف عملت فيا اي خطفت قلبي خطف
وهو من تحت التربيزه حاتط رجله على رجلها وعمال يدوس عليها
وعد وهي بتداري وجعها وبتمثل انها عشقانه
: انا بقى انت مختطفتش قلبي بس دانت خطفتني كلي انا مش قادره اتخيل اني ممكن ارجع مصر واسيبك
زين بهيام : لا ارجوكي متسبنيش خليكي هنا معايا وانا اجبلك مصر لحد عندك
وعد من تحت سنانها : اصل مصر دي بتاعت ابوك
زين رفعلها حاجبه( ال هو لمي الدور)
وعد بهيام : ياااه للدرجادي انت ممكن تعمل المستحيل علشاني مش عارفه اقولك اي بصراحه
وبعدين وطت عليه وقالت من تحت سنانها بهمس
:رجلي فرمتها يازفت
زين بهمس : علشان تبقي تعضيني حلو
كريم بذهول : هما شربوا كتير ولا اي الواحد حاسس انه هيرجع من كم المحن ال شايفه قدامه
حسناء مقدرتش تكمل السهره وحست انها تعبانه استأذنت منهم وقالت مش قادره اقعد اكتر من كدا انا همشي
زين استغل الفرصه وقالها
: قوم ياكريم وصلها
كريم بضيق : اه تمام ماشي
حسناء حبت تعرف زين انها بتثق ف كريم فقالتله
: لا خلي كريم انا هروح لوعدي
كريم فرح وقالها : ابقي طمنيني عليكي لما توصلي
وعد مبهوره بالحاجات ال شايفاها
زين : كفايه بقى ويلا علشان نروح
وعد وطت عليه وقالتله
: طول ما كريم موجود انا موجوده انت ناسي اننا بنعمل دا كله علشانه
زين بضيق: لا مش ناسي يامهزئه ويارب يعبرك علشان اخلص منك
كل ال ع التربيزه قاموا وفضل زين ووعد ووكريم
وعد وطت على زين وقالتله
: ممكن تقوم وتسبنا انا وهو لوحدنا دي فرصتي وحسناء مش هنا
زين: اي هتعمليله مشهد اغراء علشان يعبرك ومش عايزاني اتفرج
وعد بعصبيه : بس يامنحرف قوم يلا
زين : مش قايم خديه وامشي انتي من هنا
وعد بضيق : بقى كدا طب ماشي
وقامت من ع التربيزه وقفت بعيد
كريم وزين قاعدين عينهم ف عين بعض
كريم : معقوله بتحبها بجد
زين ببرود : ماقولتلك كل شئ جايز
كريم : بس انا وانت وكلنا عارفيين ان وعد مش مناسبه ليك
زين : اخليها مناسبه اي المشكله
كريم : ال انت بتعمله غلط يازين قولتلك رجع وعد مصر وكفايه لعب وعد صغيره مش فاهمه حاجه
زين بسخريه : يعني انا بلعب وانت حضرتك كنت بتعمل اي لما وعدتها بالجواز وسبتها
كريم : هتجوز بنت مبحبهاش
زين : خلاص يبقى تسكت
كريم قام بعصبيه من ع التربيزه وراح ناحية وعد
: عاجبك ال بتعمليه داه
وعد ببرود : بعمل اي
كريم : لفك مع زين وقعادك ف بلد مش بلدك وسايبه والدتك هناك لوحدها وهي تعبانه
وعد : دا شئ ميخصكش خليك ف نفسك اظن انا مديقتكش ف حاجه
كريم : وعد بصي ف عنيا انا كريم ابن عمك ال بتسمعي كلامه ع طول ومتقدريش تقوليله لا ع حاجه اي ال غيرك كدا
وعد بصت ف عيونه وركزت حنت لأيام زمان وافتكرت كله حاجه كانت بينهم
كريم : لسه بتحبيني مش كدا
وعد وهي سرحانه ف عيونه
: انت بتحبني ؟
كريم مد ايده علشان يمسك ايدها ولسه هيتكلم
زين كان بيراقب الموقف من بعيد ومستحملش يشوفه ماسك ايدها
راح عليهم وشد ايدها من ايده واخدها معاه ع بره
وعد بعصبيه : اي ال انت عملته دا كان لسه هيعترف انه بيحبني
زين بعصبيه : الوقت اتأخر لازم نروح
وعد بضيق : يعني مقدرتش تستحمل دقيقه واحده كمان
زين سابها بدون ما يرد وراح ناحيته عربيته وركب
وعد فتحت الباب وركبت وهي متعصبه وقالتله
: انت مبتردش عليا ليه انا بكلمك
زين ساق العربيه بسرعه وملامحه باين عليها الغضب
وعد بعصبيه : ع فكره انا بكلمك ممكن افهم اي شدتني من قدامه ليه
زين وقف العربيه ع جمب وقلها بعصبيه
: معنديش اجابه لأسئلتك هتقعدي ساكته ولا تتفضلي تنزلي
وعد بحزن : يعني اي انزل هو مش انت وعدتني ترجعلي كريم
زين بعصبيه : كل شويه وعدتني وعدتني انا زهقت من الحوار داه وزهقت منك انتي من يوم مادخلتي حياتي وانا حاسس انها بقت مقلوبه بعمل حاجات غريبه ومش عارف بعمل كدا ليه انا مبقتش فاهم نفسي بسببك
وعد مصدومه من كلامه
زين : فيها اي يعني لما سابك وراح حب اختي ما كل واحد حر انتي هتجبريه يحبك يعني انتي لو عندك كرامه فعلا كنتي رجعتي مصر من وقتها انما انتي.....
وعد قاطعته والدموع مجمعه ف عنيها
: بس خلاص انا اسفه ليك على اي حاجه عملتها
وفتحت باب العربيه ونزلت
زين : احسن بردو انا كان نفسي اخلص منك واتمنى مشوفكيش تاني ف حياتي
وساق عربيته ومشي وهو متعصب
يتبع ........
Malak_mohamed
#حكاية_وعد (8)
زين بعصبيه وهو سايق
: اي ال حصلك يازين حتة بنت زي دي تشقلب دماغك وبعدين فيها اي لما مسك ايدها يعني مانت كنت عايز توصل لكدا اي ال دايقك وخلاك تقوم تشدها منه
وبعدين قال لنفسه بتنهيده
: اعترف انك حبيتها ياغبي مفيش تفسير لل انت عملته غير داه
ولف بالعربيه بسرعه ورجعلها
وقف العربيه ونزل لكنه اتفاجئ لما ملقهاش موجوده
بص حواليه كتير وبردو ملقهاش الخوف دب ف قلبه واترعب لحسن يكون حصلها حاجه
فضل يجري ف الشارع بخوف ولهفه
شاف من بعيد عربية اسعاف وعربية شرطه وناس كتير ملمومه
قرب منهم بخوف وزق الناس ودخل وسطهم لقى جسه مرميه ع الأرض ومتغطيه كلها
والناس عماله تقول :
Ah haram, o hala genç
الترجمه ( ياحرام دي لسه صغيره)
نزل ع الأرض بركبته والدموع اتجمعت ف عنيه وقلبه كان هيتخلع من كتر الدق
رفع الملايه من على وشها اتفاجئ انها مش وعد
اختلطت مشاعره بين الصدمه والفرح والحزن وكل حاجه قام من ع الأرض وهو بيقول لنفسه
: لا انا فعلا بحبها
فضل يدور عليها كتير ملقهاش
رجع لعربيته والحزن ماليه
فجأه بيسمع صوت بنت بتعيط ع جمب ف الضلمه
جري ناحية الصوت وقال بذهول
:وعد
وعد لفت وشها وبصتله وقامت من ع الأرض وهي بتقول
: عايز اي
بلهفه شدها لحضنه وفضل يحضن فيها جامد ويملس بإيده ع شعرها وهو بيقول
: انا اسف اسف بجد مش هسيبك تاني
وعد شدة نفسها بعيد وقالت ببكاء
: انت كداب وكلكوا كدابين ومحدش بيوعد بحاجه وينفذها انا مش عايزه مساعدت حد خلاص
زين : وعد اسمعيني
وعد ببكاء : مش هسمعك انا عشت عمري كله بسمع الناس محدش فكر يسمعني مره انت كان عندك حق لما قولت اني وحدها معندهاش كرامه
زين : انا مقصدتش كدا
وعد : لا قصدت وفعلا عندك حق انا واحده معندهاش كرامه بس عايزه اقولك حاجه واقول للدنيا كلها تخيل شخص فضلت سنين تحب فيه وتبني ف احلام ورديه معاه وفجأه اختفى اختفى الحب واختفت الأحلام واتهد دا كله فوق دماغك صعب تسيبه وتمشي بسهوله لازم تحاول تبني ال اتهد تاني ع الأقل تبقى عارف انك عملت ال عليك وتمشي وانت عارف انك مش راجع
زين : بس انتي عملتي ال عليكي كفايه بقى لحد كدا
وعد : لا معملتش لسه وكان كل حاجه ماشيه تمام وكان لسه عندي أمل لحد مانت جيت شدتني منه واخدتني وف الآخر اتعصبت علشان بقولك عملت كدا ليه
زين بعصبيه : عملت كدا علشان بحب....
وبعدين سكت مكملهاش
وعد : علشان بتحب اي
زين هدي وقالها : علشان بحب ادايقك
وعد بعصبيه وبكاء : دا مش وقت هزار يازين
زين قرب منها ومسحلها دموعها من على خدها وقال
: انا اسف حقك عليا مش هزعلك تاني صدقيني بس يلا نروح دلوقتي
وعد ببكاء رجعت لورا بعيد عنه
: انت شخص مش متزن اوقات تكون كويس معايا واوقات تانيه بتكون شخص قاسي وحد معرفوش
زين : عندك حق ف دي انا مبقتش فاهم نفسي
وعد : انا خلاص قررت مروحش الفيلا تاني
زين : يعني اي هتفضلي ف الشارع
وعد : ملكش دعوه بيا امشي يلا
زين : يلا نروح ياوعد بطلي عناد
وعد سابته وراحت قعدت ع الرصيف وربعت ايدها وضمتها لصدرها بحركه طفوليه وقالت
: مش مروحه اتفضل امشي وسبني
زين بعصبيه : اي شغل العيال داه يابنتي انجزي خلينا نمشي الوقت اتأخر
وعد : لا مش انت قولتلي انك زهقت مني واني من يوم ما دخلت حياتك شقلبتها
زين : ايوا دي حقيقيه انتي بلوه ياوعد
وعد بغيظ وعصبيه : انت واحد مستفز امشي من قدامي بدل ماارتكب جريمة قتل
زين استوعب ال قالها قال يصحح كلامه
: قصدي كنت متعصب وقتها اي مينفعش اتعصب
وعد : لازم تتعود ازاي تتحكم ف اعصابك خصوصاً لما تتكلم مع بنت
زين : لما ابقى اتكلم مع بنت بقى انتي بنت
وعد بنرفزه : امشي بقولك امشي
زين ابتسم : مش قادر مديقكيش حقيقي بس انتي ست البنات ممكن تقومي يلا
وعد : قولت لا
زين : بقولك قومي
وعد : بقولك لا
زين بعصبيه : تصدقي انا غلطان انا اساسا مش عارف انا واقف اتحايل عليكي ليه ماتتنيلي
وعد بغضب : شوفت ظهرت على حقيقتك ازاي
زين : ششش انا ماشي خليكي قاعده
وسابها ومشي بس قلبه مقدرش
فجأه وهو ماشي راح لافف وشه ورجعلها وشالها من ع الأرض غصب عنها
وعد بصراخ : نزلني يامنحرف
زين بعصبيه : اتهدي بقى بدل مااوريكي الإنحراف بجد
وخدها وداها للعربيه وركبها
وعد : نزلني
زين بعصبيه : بقولك اي اقعدي ساكته كدا علشان مزعلكيش
وبعدين بصلها بحده
هزعلك بجد
وعد خافت وقعدت ساكته
"وصلوا الڤيلا ولقوا كل ال ف البيت نايم "
زين : روحي ع اوضتك يلا
وعد : دا ع اساس اني هروح ع اوضتك يعني
زين : يخربيت لسانك
وعد سابته ومشيت
زين : اه صحيح بكرا مفيش شغل نامي براحتك
وعد : طيب
وكملت طريقها
زين : جعانه
وعد بصتله بتعجب : لا
لسه هتمشي
زين لحقها
: وعد
وعد بتعجب : نعم
زين افتكر مشهد الحادثه ال كانت ع الطريق قرب منها وقال
: مش عارف بس ممكن تاخدي بالك من نفسك
وعد حطت ايدها على دماغه
: انت سخن
زين وهو باصصلها بعشق : تقريباً كدا
وعد : طب ادخل نام وهتبقى كويس انا داخله اوضتي
وسابته ولسه هتمشي
زين : وعد
وعد بصتله بتعجب : في اي تاني
عينها جت ف عنيه سرح فيها شويه وقال
: جتك داهيه ف حلاوتك
وعد بذهول : ها
زين : اجري امشي يلا بقالك ساعه موقفاني ع الباب مش حاسه اني تعبان اي الناس ال معندهاش دم دي
وعد بعصبيه : انا ال .....
سابها بتتكلم ودخل اوضته
وعد بتعجب : دا اتجنن باين
دخلت اوضتها واترمت ع السرير افتكرت كريم وهو لسه هيعترف انه بيحبها بس زين بوظ كل حاجه
خدت نفس وحطت ايدها تحت خدها واتخيلت كريم وهو بيعترف بحبه ليها وفضلت تتخيل ف حياتها معاه
____بقلم ملك محمد ________
زين هو كمان دخل اوضته وفضل يفكر ف وعد
افتكر انها اكيد دلوقتي بتفكر ف كريم اتعصب وراح قايم من ع سريره وشد قلم وطلع البلكونه ورمى القلم ف بلكونة وعد
وعد فجأه بتسمع صوت حاجه وقعت ف البلكونه
طلعت بصت ع الأرض لقت قلم مسكته ورفعت وشها بتبص حواليها تشوف مين ال رماه لقت زين واقف وبيبتسم
وعد وهي ماسكه القلم : اي دا بقى ممكن افهم
زين ببرود : دا قلم بتاعي
وعد : ياراجل بجد
زين ببرود : اه بجد حتى أساليه
وعد: طب ممكن اعرف القلم بتاعك اي ال جابه عندي
زين : يمكن وحشتيه
وعد : نعم هوحش قلم ليه
زين : قولي لنفسك واعترفي ياهانم عملتي اي ف القلم شقلبتي حاله كدا وخلتيه مش عارف هو بيعمل اي دا بقى كل اما يغمض عينه يشوفك زي ماتكون لعنه وحطت عليه
وعد بذهول : دا كله انا عملته ف القلم
زين : ليه هو في قلم بيحب انتي اتجننتي
وعد بذهول : مش انت ال بتقول
زين : وانتي اي حد يقولك اي حاجه تصدقيها ارميلي القلم تاني وادخلي نامي انتي أساساً مبتفهميش
وعد : زين قول عايز اي ع طول دماغي لفت معاك
زين : عايز اقولك متفكريش كتير ف وهم مش هيتحقق في حاجات ممكن تكون حقيقه قدامك ع طول فكري فيها
وعد بتعجب : مش فاهمه
زين : مانا عارف روحي نامي يلا وبلاش تزعجيني تاني
وسابها ودخل اوضته
وعد بتعجب وهي باصه للقلم
: هو زين ماله النهارده ممكن يكون كتر ف الشرب
دخلت اوضتها اخدت شاور وغيرت هدومها ونامت
وهي حاطه دماغها ع السرير قالت
: مفيش شغل بكرا اخيرا هنام براحتي
_____بقلم ملك محمد________
"نهار يوم جديد"
باب اوضة وعد بيخبط
: وعد وعد قومي عندنا حفله
وعد نايمه ف سابع نومه
تميم بتعجب : بقالي ساعه بخبط عليها جرالها اي دي
تمام خرج من اوضته وهو معدي عليه قاله ببرود
: هاتلها زين هو ال بيعرف يتعامل مع الكائنات الغريبه دي
تميم بتعجب : زين !
دخل على زين اوضته ورمى نفسه فوقه وهو نايم
زين بعصبيه : ياغبي بتعمل اي ع الصبح
تميم وقف وقاله : قوم صحي وعد بقالي ساعه بصحيها ممكن تكون جرالها حاجه
زين ببرود شد الغطا عليه : اطمن تلاقيها نايمه هي نومها تقيل
تميم : طب قوم صحيها
زين وهو مغمض عينه : وانا مالي ماتصحيها انت
تميم : يعني لو دخلت عليها الأوضه مش هتزعق
زين وهو مغمض : لا اتفضل اخرج واقفل الباب
تميم خرج رايح لأوضة وعد
زين استوعب ال قاله نط من ع السرير راحله وهو لسه حاتط ايده علشان يفتح
زين : حيلك انت بتعمل اي
تميم : اي ف اي مش انت قولتلي روح صحيها
زين : وانت اي حد يقولك اي حاجه تصدقها
تميم تنح من كلامه
زين : اتفضل يلا ع تحت انا هصحيها
تميم : واشمعنا انت تدخل عليها الأوضه عادي وانا لا
تمام كان معدي داخل اوضته تاني فقالهم ببرود
: قولتلك علشان زين الوحيد ال يقدر يتعامل مع الكائنات الغربيه دي
وقام سايبهم وداخل
زين : اهوه شوفت انا الوحيد ال اقدر اتعامل معاها اصل انا مروضها لأنها أساساً كائن متوحش ممكن يهجم عليك ف اي وقت
تميم : انت بتهبد وعد مفيش ارق منها انا داخل اصحيها
زين : ارق من سيلا يعني
تميم جاب ورا
: لا مش ارق منها طبعاً
زين : طب اتفضل ع تحت يلا علشان كلمه كمان هوصلها المعلومه الجميله دي
تميم بغيظ : بارد
وقام سايبه ونزل
زين وقف قدام الباب عدل شعره ورتب هدومه وفتح الباب ودخل
وعد كانت ف سابع نومه قرب منها بلطف وقعد ع طرف السرير وفضل مركز ف ملامحها وهي نايمه
: وانتي نايمه ال يشوفك يقول ملاك انما عليكي لسان يتفاتله بلاد بصراحه
وبعدين قال بهمس ف ودانها
: وعد قومي
وعد ف عالم تاني
زين شال شعرها بلطف من على عنيها وحسس بإيده ع خدها وهو بيقول
: مش عارف عملتي فيا اي شقلب حالي كدا دا مفيش بنت قدرت تحرك مشاعري ناحيتها زيك
وعد نايمه
زين بلطف وهو بيملس ع شعرها : وعد
وعد وهي مغمضه عيونها افتكرت انها بتحلم قالت بهدوء
: كريم حبيبي انت جيت
زين اتعصب لما سمع اسم كريم
راح شايل كوباية المايه ال جمبها ودلقها عليها وهو بيقول
: ابقي خلي كريم ينفعك
قامت بفزع : اي دا في اي انا بغرق
زين بضيق وهو بيكز ع اسنانه من الغضب : ايوا وخدي بالك في سمكة قرش هتاكلك دلوقتي
وعد ركزت لقت زين هو ال دلق عليها المايه
كانت قاعده ع السرير وشعرها وهدومها غرقانه
وعد بعصبيه وصراااخ
: زييييييين
زين طلع يجري منها
وعد بعصبيه : وربنا مانا سيباك
نزل زين بسرعه وهو بيضحك وبيقول
: في جاموسه هربانه ياجدعان
وهي نزلت وراه
الكل كان متجمع تحت ع سفرة الفطار بصوا عليهم بإستغراب
والدته: هو في اي مالهم دول ع الصبح
الكل كان بيضحك ع شكل وعد وهي غرقانه مايه وبتجري ورا زين
تميم : دي فعلاً طلعت كائن غريب يصعب التعامل معاه
وعد بغضب : وربنا ماهسيبك يازين
زين خرج ع الجنينه بسرعه
وعد بعصبيه جريت وراه : تعالى هنا بقولك
زين بضحك وقف مكانه بثبات
وعد قربت منه لقته هو ال بيقرب عليها قالت بتوتر
: اي ال انت عملته فيا داه
زين فضل يقرب منها وهي ترجع لورا
: هو انا لسه عملت حاجه
وعد بخوف وهي بترجع لورا : انت اوقات نظراتك بتكون مرعبه كدا ليه
زين بحده وهو بيقرب منها : اصل انا أساساً بخوف بس انتي الوحيده ال مبتخفش مني
وعد بترجع لورا : وانا هخاف منك ليه يعني
زين : طالما مش خايفه بترجعي ليه لورا
وعد بتوتر : علشان عارفه انك واحد منحرف وممكن تعمل اي حاجه
زين بضحك وهو بيخوفها : بوسه واحده بس
وعد بخوف وهي بترجع لورا : اياك تقرب مني بقولك اهوه
وهوب كانت هتقع ف حمام السباحه بدون ماتاخد بالها
زين لحقها ومسك ايدها بص ف عيونها هدوء ثواني
قالها: وعد عايز اعترفلك بحاجه
وعد بصتله بتعجب وقلبها بيدق جامد
زين : انا ال قتلت موفاسا
وراح سايب ايدها راحت واقعه ف حمام السباحه
وعد : ااا
بصتله بصدمه وهي ف وسط المايه
زين نزل وسند ع ركبته وقالها
: النهارده في حفله ف الڤيلا عايزك احلى واحده وسطهم
وغمزلها ومشي
وعد بغضب وعصبيه : ياحيوان
زين وهو ماشي : قولتلك لسانك دا هقطعهولك
دخل جوه
تميم : فين وعد
زين : بتعوم شويه
تميم بتعجب : بتعوم
وعد طلعت من حمام السباحه ودخلت ع جوه
الكل بص عليها وضحك
زين بإبتسامه : تعالي تعالي متتكسفيش
وعد حاطه وشها ف الأرض وكلها مايه
مديحه : هو انتي كنتي بتعومي فعلاً
زين رد هو وقال
: اه ياماما وعد بتحب تقوم الصبح ترمي نفسها ف حمام السباحه وتعوم شويه
حسناء بضحك: بتعوم بهدومها
الكل ضحك
وعد بصتله من تحت بغيظ وبنظرة توعد
زين : بتبصيلي كدا ليه انا مالي هما ال بيضحكوا
جده : اطلعي يابنتي غيري هدومك علشان متاخديش برد
وبصلهم وقال
بتضحكوا ع اي يلا كل واحد يقوم يشوف وراه ايه النهارده الحفله ولا نسيتوا
طلعت وعد فوق تغير هدومها
وزين كمان طلع يغير هدوم النوم ال كان لابسها
بعد مده خرجت م الأوضه بعد ماغيرة وهي متغاظه من زين وعماله تبرطم
زين هو كمان كان خارج من اوضته قابلها وهي نازله افتكر انها هتتخانق معاه علشان سابها تقع ف حمام السباحه قالها
: متحاوليش تطولي لسانك ها
وعد كانت مدايقه منه اوي فمرضيتش تكلمه
زين استغرب لما مكلمتوش وعرف انها زعلانه منه
عايزه تعدي يجي يقف قدامها
تروح ع اليمه التانيه علشان تعدي يروح يقف قدامها فضل يتحرك معاها وواقف قدامها يدايقها
وعد بعصبيه : ممكن بعد اذنك تعديني
زين بتعجب : وعد بتقول ممكن وبعد اذنك الأتنين لا دانتي زعلانه بجد بقى
وعد بضيق مرضيتش تبصله وقالت: عايزه اعدي
زين وسعلها وقال : ماتعدي انا ماسكك
وعد جت تعدي
راح واقف قدامها تاني
وعد بضيق : هنفضل كدا كتير
زين بإبتسامه : زعلانه مني ليه
وعد بحزن : انا مبحبش حد يضحك عليا واكون مسخره زي مانت عملت فيا من شويه
زين بنظره تخطف القلب : انا اسف
وعد اتصدمت لما قال اسف رفعت وشها وبصتله بذهول وقالت : ها
زين بإبتسامه : ال سمعتيه وتعالي يلا علشان نشوف ترتيبات الحفله
ومسكها من ايدها أخدها معاه ع تحت
وعد ابتسمت ومشيت معاه
وصلوا تحت لقت الكل متجمع بيظبطوا ف الفيلا
وعد بتعجب : هي حفلة اي دي
زين : الفرع الرئيسي بتاع شركتنا ال جدي وماما ماسكينه وقع عقد مهم امبارح واحنا لما بتحصل حاجه زي كدا بنحتفل
وعد : اها وبعدين بصت لجد زين وقالتله
: مبروك ياجدو
اسماعيل بيه : الله يبارك فيكي يا وعد دا وشك بس هو ال حلو علينا
زين برخامه مسكها من خدودها وبصلها
: لا فعلاً عندك حق وشها حلو يا جدو
وعد شدة ايده من على وشها
والدته : ممكن تبطل مرقعه يازين بيه وتشوف هتبعت مين م الخدم يجيب الحلويات ال انا حجزتها
تميم قال بسرعه : لا لا متخليهوش يبعت حد هروح انا ووعد
وعد بفرح : فكره حلوه انا فعلاً عايزه اخرج
زين : بس يابابا تخرجي فين انتي لو خرجتي مع تميم احتمال تتوهي منه دانتي متعرفيش اليمين من الشمال
وعد : ليه هو انا عيله زيك
تميم : سيبك منه ياوعد دا بني ادم بارد يلا احنا
مشيت وعد مع تميم زين كان واقف بيبص عليهم اتنهد وقال : امري لله دايما متشحطط وراها كدا
راح لحقهم وقال لتميم
: مفتاح العربيه كدا بعد اذنك
تميم : وانت عايز مفتاح العربيه ليه
زين : علشان هروح انا
تميم : محدش هيروح غيري
زين طلع موبايله وقال ببرود وهو بيقلب فيه
: فين نمرة سيلا فين النمره
تميم : انت بتعمل اي
زين راح فاتح الكاميرا وواخد صوره لوعد مع تميم وقاله
: ولا حاجه انا بس هقول لسيلا انك بتقولها صباح الخير
تميم بعصبيه اداله المفتاح وقاله
: بني أدم مستفز
وسابهم ودخل جوه
زين لبس نضارته
: اركبي يلا
وعد : هه ديكتتاور من الدرجه الأولى
وبعدين ركبت معاه
___________
في منزل كريم والده فضل يرن كتير
كريم رد عليه
والده بغضب : مبتردش ليه عليا انا بقالي كام يوم برن عليك
كريم : اسف يابابا الشغل واخد كل وقتي
والده : وعد فين ازاي متكلمش امها لحد دلوقتي دي هتتجن عليها
كريم اتنهد وقرر يقوله الحقيقه لسه هيتكلم لقى نفسه مش قادر فقاله
: وعد كويسه اطمنوا عليها
والده : طب هي فين
كريم : ف الحمام
والده : لسه مخرجتش م الحمام من آخر مره كلمتك هي عامله اقامه جوه ولا اي
كريم بإرتباك : اكيد لا يابابا خلي مرات عمي تطمن عليها هي كويسه
وبعدين مثل ان الشبكه بتقطع وقفل
قال لنفسه بعصبيه
: مش عارف اقولهم اي او اجبهالهم ازاي انا كنت عايز وعد ترجعلهم وتقولهم هي وانا اريح دماغي هنا من الدوشه دي كلها
#حكاية_وعد (9)
زين اخد وعد وراحوا يجيبوا حلويات الحفله
ف المحل
المسؤل : Zain burada tek başına hoşgeldin hoşgeldin dükkânı yaktın
زين : Çok teşekkürler
وعد بإنبهار : واو اي الحلويات دي كلها
زين : حلوه
وعد وهي بتبلع ريقها : جدا
زين : شاوري ع اكتر قطعه عجبتك فيهم
وعد بفرح : دي
زين ببرود : طب كويس كدا مش هنجيب منها
وعد بغيظ : هه بارد
زين ابتسم وراح ناحية البائع وطلب منه قطعه من ال عجبت وعد
قعدوا ع الترابيزه
وعد بتعجب : احنا قاعدين ليه
زين : لقيت نفسي فاضي قولت اقعد شويه
وعد : انت بتتريق
زين : مانتي اسئلتك مش منطقيه ناس قاعدين ف مطعم الأكيد انهم قاعدين علشان ياكلوا يعني
وعد بفرح : اي دا بجد
زين : ايوا
جه النادل وقدم الحلوى قدامها والعصير جمبها ومشي
وعد بإبتسامه: جبتهالي بردو
زين : عيله غلبانه وصعبانه عليا اعمل اي بقى كلي كلي
وعد بدأت تاكل وهي بتقوله
: تعرف انك مستفز ورخم وكل حاجه بس بحسك حنين
زين بإبتسامه : انا مش حنين مع اي حد
وعد : امال بحسك حنين معايا ليه هو مش دايما يعني
زين : علشان انتي مش اي حد
وعد : ازاي يعني
زين : انتي اتنين تلات حاجه كدا
وعد وهي بتاكل : انت متعرفش تقول جملتين ع بعض من غير هزار
زين : تعليمك
وعد بتاكل وساكته وزين بيبص عليها
: هتفضل باصص ليا كتير تاخد حته
زين : طول مانتي قدامي انا ببقى مبسوط
وعد بتعجب : ليه هو انا بزغزغك
زين : عارف مش هتفهمي خليكي ف الأكل انتي
وعد كملت آكل
زين وهو باصص ليها بإبتسامه
: وعد هي اي مواصفات فارس احلامك
وعد لسه هتتكلم....
زين : لو جبتي سيرة كريم هاخد منك الحلويات واروحك انا بسألك سؤال عام وكأنك محبتيش قبل كدا
وعد : امممم بص هو اهم حاجه يكون حنين ويخاف ع زعلي بس قاسي وشخصيته قويه
يكون دمه خفيف بس تقيل ف نفسه كدا تافه بس عليه عقل يوزن بلد ويكون مؤدب بس منحرف و ....
زين تنح : ها
وعد : مالك
زين : انتي عايزه واحد عنده انفصام شخصيه مش انسان عادي بقى
وعد بتعجب : ليه دي مواصفات عاديه اي بنت بتحلم بيها
زين : ياسلام طب مش عايزاه بيطير بالمره
وعد : انت بتهزر طب مش مكمله
زين : طب المواصفات ال قولتيها دي موجوده ف مين اكتر أنا ولا كريم
وعد : بصراحه بصراحه موجوده فيك انت
زين الفرحه بانت على ملامحه وقالها : تمام يبقى مفروض تحبي مين
وعد بلامبالاه : كريم طبعاً
زين بعصبيه : قومي ياوعد علشان لو قعدت معاكي اكتر من كدا ممكن يجرالي حاجه
وقام حاسب ع الكيك واخدها وخرج
الحلويات ال كانت والدته حاجازها اترصت ف صندوق العربيه وهما ركبوا علشان يروحوا
وعد: زين هو انا فعلاً معنديش كرامه زي مانت قولت امبارح
زين : ايوا
وعد بحزن : اه تمام
زين : ع فكره انا كمان زيك مهزء
وعد بتعجب : ليه بتقول كدا
زين: علشان قلبي دق لواحده بتحب واحد تاني
وعد بصدمه : بجد انت بتحب زي
زين وهو سايق وباصص قدامه : مش عارف لحد دلوقتي مش قادر احدد
وعد : في حد مش عارف يحدد اذا كان بيحب او لا
زين : الموضوع معقد شويه ولو انا بجد بحبها هيبقى حبي ليها مش ف صالحها
وعد بذهول : ليه بقى انت هتعذبها
زين : لو بجد بحبها مش هقدر اشوفها مع حد غيري ووقتها هاخدها ليا غصب عنها وانا مش عايز كدا انا عايزها تحبني
وعد بحزن : يعني انت بتعيش نفس تجربتي وبتحب حد مش ليك بس انت مش عايز تقول
زين : هي مش نفس تجربتك هي نفس خبتك ال احنا فيه دا اسمه خيبه
وعد : ومن امتى الحب بقى خيبه دا احلى احساس ف الكون حتى لو ال بتحبه مبيحبكش كفايه انك تشوفه مبسوط
زين : علشان انتي بنت تفكيرك مختلف عني انا كراجل لو بحب بنت هاخدها حتى لو غصب عنها وتعيش معايا ف حجيم ولا اني اشوفها مبسوطه مع راجل غيري
وعد : بصراحه انا خوفت ع البنت ال بتحبها طب في أمل تنسى ال بتحبه
زين : أديني بحاول من بعيد ياكش تحس هي بس وتاخد بالها من ال بيحبها وتبطل جري ورا ال سابها ف الشوارع
وعد : هي مين دي انا اعرفها
زين : تعرفيها منين دي بنت تركيه مش مصريه مليش ف الكائانات المصرية انا بحب المستورد
وعد : هه انت تطول تتجوز مصريه داحنا قمر
زين : قمر بالستر صحيح انا زي ماقولتلك عايزك احلى واحده النهارده
وعد : اشمعنا يعني علشان كريم يشوفني
زين بعصبيه : يحرق كريم انا مالي وماله دلوقتي انا عايزك حلوه عشاني انا
وعد بتعجب : ها
زين بصلها بحده : سمعتي الكلام
وعد بتوتر : سمعته سمعته حاضر
بعد مده من الوقت وصلوا البيت
والدته : انتوا كنتوا فين دا كله اتأخرتوا اوي
زين : الأرنب بتاعي كان جعان قولت أكله
تميم : انت مربي ارنب
زين بص على وعد : اه وخد بالك علشان بيعض جامد
وحط ايده على بوء وعد راحت عضاه
زين : شوفت بيعض ازاي
حسناء : يلا ياوعد اطلعي البسي وجهزي نفسك الوقت خلاص
زين غمزلها وقال : احلى واحده ها
وسابهم وطلع ع أوضته يجهز نفسه
______ بقلم #Malak_mohamed
دخلت وعد أوضتها اخدت شاور وعملت شعرها بالمكوى وفردته ع ضهرها شعرها طويل وناعم شبه شعر الأميرات
وبدأت تحط ميكب
حطت ميكب خفيف مش عملت تشطيب دهانات مكياجها كان هادي وقمر خلصت وفتحت دولابها تختار فستان يليق ع الحفله
طلعت احلى فستان من الهدوم ال زين جابهوملها وحطته ع السرير علشان تلبس
فجأه الباب بيخبط دخلت حسناء اول لما شافت وعد لقتها جميله جدا احلى منها بكتير الغيره دبت ف قلبها لأن كريم هيبقى موجود ف الحفله
حسناء : اي القمر داه
وعد بكسوف : انتي احلى طبعا
حسناء قعدت ع السرير : اي دا انتي لسه ملبستيش الفستان
وعد : اه كنت لسه هلبسه
حسناء : الا صحيح ياوعد هو انتي لسه مجبتيش الباسبور
وعد : زين قالي ملكيش دعوه بالحوار داه هو هيخلصه ولما يطلع الباسبور هو هيجبهولي
حسناء : اها
وعد ؛ في حاجه ولاي
حسناء: اتآخرتي اوي يعني وكان مفروض ترجعي مصر من زمان
وعد بإحراج : اه فعلا عندك حق عارفه اني متقله عليكوا هنا انا اسفه
حسناء : لا ابدا ولا يهمك وقامت بمكر شدت المانكير بدون ماوعد تاخد بالها ودلقته ع الفستان
وخرجت وهي بتقولها : متتأخريش ها
وعد شدت الفستان علشان تلبسه لقته متبهدل عرفت ان حسناء ال عملت كدا
: بقى كدا. ياخطافة الرجاله طيب انا هوريكي ومش همشي من هنا الا وكريم معايا
عدى الوقت ووعد قاعده ف اوضتها جمب الفستان
بدأت الحفله تبدأ والمدعوين يوصلوا
وعد بتكلم نفسها بحزن : محدش هيفرق معاه حضوري خليني هنا وخلاص
نزل زين لتحت بص عليها ف كل مكان ملقهاش
سأل حسناء
: هي وعد فين
حسناء : معرفش مشوفتهاش
طلع زين لفوق جري وخبط ع الباب
وعد كانت واقفه ف البلكونه : ادخل
زين فتح ودخل لسه هيتكلم لسانه وقف من جمالها قال بتوتر
: انتي انتي بتعملي اي هنا
وعد بحزن : الحربايه اختك بهدلتلي الفستان ال هنزل بيه علشان متخلنيش انزل
زين قرب منها وهو مذهول من جمالها
: هجبلك احلى منه حالا اطمني
فتح فونه واختار احلى وافخم فستان وحجزه وطلب توصيله للفيلا
زين : ربع ساعه بالكتير هيكون هنا
وعد وهي باصيه ناحية الجنينه بحزن : مش مهم انزل خلاص
زين لف وشها ليه
وهو بيشيل شعرها من على عنيها
: مهم عندي انا
وعد شالت ايده لبعيد وقالتله
: تعرف انك متقن جدا لعملك يعني مفيش اي حد شايفنا وبردو بتمثل انك بتحبني
زين : بمثل !
وعد : اه مش دا اتفقنا صحيح كريم جه ولا لسه
زين وهو بيقرب منها : وعد حاولي تنسي كريم
وعد بتعجب : ليه انت مش هتنفذ وعدك ليا
زين قرب منها وشدها لحضنه جامد وبص لعنيها بهيام
: الموضوع طلع صعب
وعد وهي بتشد نفسها لبعيد : اي ال انت بتعمله داه سبني يازين
زين بحده وهو حاضنها : مبقتش قادر خلاص انا عايزك ليا انا حبيني ياوعد
وعد بصدمه : انت بتقول اي انت اتجنت ابعد عني
زين : بقولك بحبك
وعد : زين انت كويس
زين همس ف ودانها وقالها
: كريم واقف تحت بيبص علينا اهدي بقى
وعد بصت لتحت لقت كريم نازل من عربيته وواقف بيبص عليهم
بعد ما كانت بتشد نفسها لبعيد هديت وقالتله
: وقعت قلبي انا افتكرتك بتتكلم جد
زين وهو باصص ف عيونها
: مين عارف بتكلم بجد ولا هزار
وعد : سبني بقى انا كدا مش مرتاحه ومتشدنيش ليك تاني حتى لو بتمثيل
زين سابها من ايده وقالها
: انا بحب اكون متقن لعملي
وعد بعصبيه : مثل براحتك بس بدون لمس تمام
زين بنظرة إنحراف : بحب استغلال الفرص
وبعدين سابها ف البلكونه و دخل جوه رمى نفسه ع السرير
وعد دخلت وراه : انت نايم ع سريري ليه
زين ببرود : تعالي ف حضني وانا اقولك
وعد بنرفزه : انت منحرف فعلاً اتفضل قوم يلا انزل تحت
زين : تصدقي انا نسيت ان في حفله تحت
وقام من ع السرير بص ف المرايه ظبط شعره وقالها
: الفستان ع وصول مستنيكي تحت ها
وراح غامزلها ونازل
قفل الباب وراه
وعد وقفت قدام المرايه وقالت لنفسها
: هو انا ليه حسيته بيتكلم جد وانه بيحبني
معقول زين يكون ممثل محترف ومخبي عليا دانا شويه كمان كنت هصدقه
بعد مده من الوقت الفستان وصل
كان فستان ازرق فاتح شبه فستان سندريلا هادي وجماله ف بساطته
وعد لبسته ونزلت كان كل المدعوين تحت وهي نازله ع السلم لفتت انظار الكل
وكلهم بصوا عليها وانبهروا بجمالها وقلبت الحفله كلها وخلت الناس تفضل تسأل مين دي
زين اول لما شافها ابتسم وقرب منها ومسك أيدها ونزلها من ع السلم زي الأميرات
حسناء بغيظ وقفت تكلم نفسها : جابت الفستان داه منين
كريم وقف متنح لما شافها وقال لنفسه
: معقوله انا سبت دي
وعد بخجل بعد مانزلت السلم : زين هي الناس كلها بتبص عليا كدا ليه
زين : علشان خطفتيهم بجمالك
وقفت هي وزين مع بعض تميم راح ناحيتهم وف ايده سيلا
تميم : وعد دي سيلا ال حكتلك عنها
وعد سلمت عليها وقالت : حلوه اوي حبيبتك بس انا مش عارفه اكلمها اقولها اي مبعرفش تركي
سيلا : انت احلى وعد
وعد اتصدمت
تميم بضحك : معرفها مصري متقلقيش
زين : يلا كدا خد حبيبتك واسرح
تميم بغمزه : ماشي ياعم الله يسهلوا
زين رفعله حاجه
تميم : ماشي اهوه متزوقش
وعد : مش عارفه انا متوتره كدا ليه هو انا بجد شكلي حلو يعني كريم ممكن يرجع يفكر بيا
زين بضيق : يادي زفت كريم ركزي معايا انا بعد اذنك
وعد شافت حسناء وكريم جايين ناحيتهم قالت
: جاين ناحيتنا اهم
حسناء بغيظ : اي الجمال دا ياوعد طالعه قمر
وعد بغيظ : الشكر لزين هو ال جابلي فستان بعد ما المانكير كب نفسه ع الفستان
كريم بيبص لوعد ومبيتكلمش زين لاحظ داه راح مادد ايده وماسك ايد وعد وابتسم وكأنه بيقوله دي بتاعتي
كريم بخبث : واضح انكوا بقيتوا قريبين من بعض جدا مش ناويين تسمعونا خبر خطوبتكوا قريب
وعد سمعت كلمة خطوبه راحت شاده ايدها من ايد زين بتوتر وهي بتقول
: ههه لسه بدري ع الموضوع داه
كريم ابتسم وبص لزين بسخريه( ال هو مستحيل تحبك )
حسناء وهي بتبص لوعد بغرور : صحيح جهزوا نفسكوا علشان في مفاجأه هنعلن عنها حالا انا وكريم
كريم بإستغراب : مفاجأة اي
حسناء مسكت ايده واخدته ومشيت لبعيد وقالتله
: هنعلن عن حفل جوازنا ال هيكون الأسبوع الجي
كريم بصدمه : بس احنا متفقناش ع الموضوع داه
حسناء : مش لازم نتفق انا اتفقت واخدت قرار يا إما تبقى لسه بتحب وعد
كريم : مبحبهاش قولتلك
حسناء : يبقى خلاص هنعلن عن فرحنا النهارده قدام الكل
كريم سكت بضيق
وعد واقفه مع زين بتبص عليهم قالت لزين
: تفتكر مفاجأة اي
زين : ا...
وعد قاطعته : يمكن هينفصلوا خلاص وهيقول انه بيحبني انا
زين بصدهه : دا شكل اتنين هينفصموا اي الطموح داه
وعد : لما ببص ف عينه بحس انه لسه بيحبني بس في حاجه منعاه يعترف بداه
زين بضيق : تهيئات ابقى اتغطي كويس
وعد : انت مفيش مره تشجعني
زين : هشجعك ع الوكسه ال انتي فيها
فجأه بيجي رجل اعمال وبيطلب زين دقيقه
زين بيقول لوعد جايلك ع طول متروحيش ف اي مكان
حسناء كمان والدتها بتطلبها دقيقه فبتمشي وبتسيب كريم
كريم بيستغل الفرصه ان وعد لوحدها وبيروح ناحيتها وهو ف ايده كاس (اعتبروه كاس عصير ◕‿◕
وعد بتتفاجئ بيه جي ناحيتها بتعدل فستانها وتظبط شعرها
كريم بنظره خبث : طالعه قمر كنتي مخبيه دا كله فين
وعد بغرور : طول عمري قمر انت ال مكنتش واخد بالك
كريم اخذ رشفه من الكاس وقالها
: تعالي معايا عايزك
وعد بتعجب : عايز اي
كريم : اول مره اقولك تعالي معايا تقولي عايز اي طول عمرك بتمشي ورايا بدون كلام
وعد : دا كان زمان
كريم : يعني مش هتيجي
وعد بتردد : ماتقول عايز اي
كريم : عايزك ف كلمتين بعيد عن هنا ولا مش من حقي
وقام ماشي قدامها علشان عارف انها هتروح وراه
وعد افتكرت انه هيعترف بحبه ليها فبصت حواليها يمين وشمال ملقتش حد بيبصلها وزين مش واخد باله راحت ماشيه وراه
كريم ركب عربيته ووعد ركبت معاه ومشي بالعربيه لقدام شويه وركن ع جمب
وعد : ممكن اعرف في اي
كريم قرب منها بحب وملس على شعرها وهو بيقول
: طالعه بتاخدي العقل
وعد بتوتر رجعت براسها لورا
كريم حط ايده على شفايفها وهو بيقول
: وعد كبرت وبقت في كامل انوثتها وانا مش واخد بالي كنت فاكرك لسه وعد العيله الصفيره
وعد شالت ايده بتوتر : في اي ياكريم
كريم لسه هيقرب منها
وعد حطت ايدها ع وشها وصرخت
كريم : خلاص خلاص في اي انا معملتش حاجه
وعد : رجعني الفيلا
كريم : هرجعك بس كنت عايز اقولك والدتك تعبانه جامد وهناخد كام صوره لينا مع بعض وابعتهالهم علشان تطمن عليكي
وعد دموعها اتجمعت ف عيونها : ماما مالها
كريم : والدتك المرض ذاد عليها ونفسها تشوفك موافقه نتصور كام صوره علشان تطمن عليكى
وعد : موافقه
كريم فتح كاميرا الفون وبدأ يلتقط الصور ليهم مع بعض
اخدها ف حضنه وقالها تبتسم علشان محدش يشك ف حاجه
قرب منها علشان يبوسها ف خدها
وعد رجعت لورا بخوف
كريم : متخفيش دا علشان الصوره
واخد الصوره وهو بيبوسها ف خدها
اخد صور كتير ليهم وقفل موبايله وقالها بغمزه بقولك اي تيجي نطلع ع شقتي
وعد بصدمه :لدرجادي انا رخيصه عندك
كريم : مانتي طول اليوم مع زين جت عليا يعني
وعد كانت مصدومه من كلامه ومش عارفه تتكلم قالت بحزن
كريم وصلني الفيلا تاني بعد اذنك
كريم شغل العربيه واتجه نحو الفيلا وهو بيقولها
: هنزلك بعيد وهتدخلي انتي الاول علشان محدش يشك ف حاجه
مشي بالعربيه وقبل مايوصل الفيلا نزلها اخدت باقي الطريق مشي ووصلت قبله
لسه داخله الفيلا والدموع نازله ع خدها
فجأه تلاقي ال بيمسك ايدها
رفعت وشها لقت زين
قالها بحده وعروق وشه باينه من الغضب
: كنتي فين
يتبع ..........
بقلم # Malak_mohamed
لمتابعة باقى الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق