رواية تزوجني و لكن الفصل الاول والثاني والثالث والرابع والخامس بقلم ندوشة حصريه
رواية تزوجني و لكن الفصل الاول والثاني والثالث والرابع والخامس بقلم ندوشة حصريه
_ازاي ي ماما عاوزاني اتجوز واحدة زي دي
الام : ومالها ان شاء الله هي مش ست زي اي ست
_لا ي ماما مش زي اي ست انا مستحيل اتجوز واحدة زي دي سيرتها علي كل لسان
الام : بقولك ي ابني بطني انا اللي اقرر انت هتتجوز مين وهتتجوزها يعني هتتجوزها
_انتي عاوزاني اتجوز واحدة الكل بيتكلم عنها
الام : الناس مورهاش غير الكلام بتتكلم علي الكل ولو قلقنا من كلامهم كدة مش هنكمل حياتنا ولا هنعيشها
_يعني انتي عاوزة ايه دلوقتي
الام : عاوزاك تسمع كلامي وتفهمه مش معني ان الناس بتتكلم يبقي كلامهم صح في اوقات كتير الكلام دا بيطلع غلط وكتير بيتظلموا وانا عارفة اسماء كويس هي جارتنا وانا عارفة اخلاقها
_اكن انا الدكتور محمد اتجوز واحدة زي دي
الام : وفيها ايه يعني لو كنت الدكتور محمد انت مش انسان زينا انا متعودتش علي قساوتك دي ي ابني الكل متعود علي طيبة قلبك والكلام اللي بيتقال عن اسماء انا عارفة مين اللي مطلعه
محمد : اخره انتي عاوزاني اعمل ايه
الام : انت لسة مفهمتش عاوزاك تتجوز اسماء هي ملهاش ضهر تتسند عليه وعاوزاك انت تكون سندها ي ابني متكسرهاش وتخليك دايما جمبها ولو حد قال عليها كلمة تقطع لسانه
محمد : خلاص ي ماما انا هتجوزها بس عشان خاطرك انتي بس
الام : ي حبيبي مسيرك في يوم تعرف اني اخترتلك صح وان اسماء جوهرة ولازم تخلي بالم منها ومتضيعهاش من ايدك انا مش هعيش لك العمر كله
محمد وهو بيبوس راسها : بعد الشر عليكي ي ست الكل انا هنزل بقي لاني اتاخرت علي المستشفي
الام : ربنا معاك ي ابني ويوقفلك ولاد الحلال
نزل محمد وراح شغله اما ( هنادي ) فراحت لاسماء واللي تبقي جارتهم خبطت علي الباب
اسماء : استني ياللي بتخبط هفتح اهو
لبست طرحتها وفتحت الباب لقت هنادي قدامها ابتسمت لها
اسماء : اتفضلي ي خالتي
هنادي : يدوبك نزل محمد لشغله وجيتلك علي طول
اسماء : تنوري البيت
هنادي : ها بتعملي ايه وفين جميلة
اسماء : انا كنت بنضف شوية وماما نزلت السوق عشان تجيب الطلبات الناقصة
هنادي : طب تعالي انا عايزاكي في موضوع مهم
اسماء : في ايه ي خالتي قلقتيني
هنادي : تعالي ي بت مفيش حاجة انا عاوزة اقولك علي حاجة بس نستني جميلة اما تيجي
في نفس الوقت الباب خبط راحت اسماء تفتح لقيتها جميلة
جميلة بغيظ : ناس تخاف متختشيش صحيح
اسماء : في ايه ي جوجو
جميلة : ي اختي الراجل اللي جابني هنا بدي له خمسة جنيه مش عجباه قال ايه عاوز عشرين جنيه
جات هنادي وهي بتضحك علي اختها اللي عمرها ما هتتغير
هنادي : في ايه ي جميلة داخلة بزعبيبك ليه
جميلة : خلاص ي هنادي ي اختي الناس مبقاش عندهم ذمة
هنادي : تعالي بس ي جميلة انا كنت عاوزاكي في حاجة مهمة
جميلة : في ايه ي هنادي انتي هتقلقيني ليه
هنادي : لا قلق ولا حاجة بس هو موضوع يخص اسماء
اسماء خافت ليكون في حاجة حصلت تاني
جميلة : عن اسماء ايه هو
هنادي : حطي الحاجات اللي في ايدك في المطبخ بس وتعالي عاوزاكي انتي واسماء في موضوع
راحت جميلة وحطت الطلبات في المطبخ هي واسماء وراحو لهنادي اللي كانت قاعدة بتبتسم
هنادي : بصي ي جميلة انا مش هلف ولا هدور انا جاية اطلب ايد اسماء لمحمد ابني
زغرطت جميلة بفرحة : ي الف نهار ابيض ي الف نهار مبروك دا يوم المني لما الاقي بنتي ومحمد في بيت واحد
هنادي : ها قولتي ايه ي اسماء
اسماء : انا مش موافقة
جميلة : ........
#تزوجني_و_لكن
#بقلمي_ندوشة
الفصل الثاني
اسماء : مش موافقة
جميلة : ليه ي اختي ان شاء الله هو محمد يتعايب في ايه
هنادي : استني ي جميلة سيبي اسماء تقول رايها
اسماء : ي ماما محمد ميتعايبش بالعكس بس انا عارفة انه مبيحبنيش وانه مصدق الكلام اللي بيتقال
هنادي : بصي ي اسماء انا مش هغصبك علي حاجة بالعكس موافقتك هي اهم حاجة محمد طيب بس مشكلته انه بيصدق كلام الناس وبيخاف منه ومسيره يعرف في يوم ان كلام الناس دا لازم يبقي موجود وانه لا بيودي والا بيجيب وانتي اللي لازم تثبتيله كدة
اسماء : انا بحبه ي هنون بس هو لا وانا خايفة انه يحس انه مغصوب عليا
هنادي : سيبيها عليا ي روح هنون باذن الله كل حاجة هتم علي خير بس انتي وافقي
جميلة : بصي ي هنادي ياختي انا معاكوا في اللي انتوا بتقولوه بس بردوا ام وبخاف علي بنتي وانا عارفة ان محمد طيب ومش هيزعلها ابدا وان هو اللي هيحافظ عليها من بعدنا
اسماء : بعد الشر عليكم
هنادي : ها ي اسماء ايه رايك
اسماء : موافقة بس انا خايفة
هنادي : بصي ي بنتي انا اختارتك انتي مش عشان بنت اختي لا انا اختارتك لاني عارفة اخلاقك وانا اللي مربياكي وعارفة ان الكلام اللي بتقال دا مش حقيقي وان ابن عمك هو اللي طلع الكلام دا انا معاكي دايما ومصدقاكي وانتي لازم تخلي محمد هو كمان يصدق لانه لو صدق ان دا كدب هو اللي هيبقي سندك وهياخد حقك
اسماء : انا هعمل اللي عليا وهسيب الباقي علي ربنا
جميلة : ونعم بالله هو محمد هييجي امتي عشان نتفق غبي كل حاجة
هنادي : هو بييجي من الشغل علي بالليل كدة وانا عازماكم علي العشا النهاردة اهو نتعشي مع بعض وبالمرة نتكلم في الموضوع دا
جميلة : طب يلا دلوقتي عشان نخلص شغلنا
قعدوا كلهم مع بعض وكملوا شغلهم عدي الوقت وجه الليل كانوا التلاتة في بيت هنادي بيخلصوا طبخ خبط الباب وراحت اسماء تفتح لاقته محمد
دخل محمد من غير ما يبصلها واتجاهلها تماما وهي زعلت من كدة دي معاملته معاها من وقت ما صدق كلام ابن عمها بقي بيتجاهلها
طلعها من سرحانها صوت هنادي من المطبخ : مين ي اسماء اللي بيخبط
اسماء بصوت عالي عشان تسمعها : دا محمد ي هنون
هنادي : طب تعالي يلا
دخلت لهم المطبخ وهي باين عليها الزعل اول ما شافتها هنادي عرفت ايه السبب
جميلة : خدي الاطباق دي ي اسماء حطيها علي السفرة
اخدت اسماء الاطباق ومثلت هنادي انها بتساعدها وطلعت برة معاها
هنادي وهي بتطبطب علي اسماء : متزعليش ي سوسو انتي عارفة انه تعبان بس
اسماء : انا عارفة هو بيتجاهلني ليه انا حاولت افهمه ان حسن كداب وان مفيش حاجة حصلت ما بينا بس هو مش راضي يصدقني ومرضيش يسمعني
هنادي : كل حاجة بتاخد وقتها وبتتصلح وبترجع زي الاول اهدي انتي بس وان شاء الله محمد هيعرف الحقيقة
اسماء : يارب
جميلة بصوت عالي : اسماء هنادي تعالوا يلا
دخلوا المطبخ وهما بيبتسموا عشان متحسش بحاجة
جميلة : بتعملوا ايه دا كله يلا ساعدوني زمان محمد جعان وعاوز ياكل
هنادي : كنا بنحط الاطباق ومحمد زمانه لسة بيغير هدومه
جميلة : ايدكم معايا بسرعة عاوزين نجهز السفرة
طلعوا وحطوا الاكل وراحت هنادي تنادي لمحمد خبطت علي الباب ودخلت لقت محمد قاعد
هنادي : يلا ي محمد عشان تاكل
محمد : مليش نفس ي ماما
هنادي : ايه الكلام دا ي محمد انت مكلتش من الصبح
محمد : انا عاوز انام ومليش نفس
هنادي لحظت حزنه قعدت جمبه علي السرير
هنادي : ايه اللي مزعلك ي ابني
محمد : انت عارفة ايه اللي مزعلني ي ماما
هنادي : ي ابني انسي بقي انت موهوم كلنا حاولنا نقنعك ان مفيش حاجة حصلت ابدا
..........
#تزوجني_و_لكن
#بقلمي_ندوشة
الفصل الثالث
محمد : واصدق ازاي وانا شايفهم بعينيا انا كان استحالة اتصور انها كدة حاولت اكدب عيني بس مقدرتش
هنادي : ي ابني افهم بقي هما كانو عاوزينك تشوف الحاجة اللي هما عاوزينك تشوفها بس والله ما حصل حاجة وعاوزاك تعرف ان بطريقتك دي هتخسر اسماء وهتندم ووقتها الندم مش هيفيد
محمد : لو سمحت ي ماما انا مش عاوز اتكلم في الموضوع دا
هنادي : مش هنتكلم بس قوم معايا عشان تاكل احنا عاملين الاكل اللي بتحبه ومش عاوزة اسمع كلمة مليش نفس انت لو مكلتش انا مش هاكل
محمد : حاضر
هنادي : ايوة كدة اطلع قدامي يلا
طلعوا من الاوضة وكانت جميلة واسماء مستنيينهم
جميلة : دا كله دا احنا فكرناكم نمتوا
هنادي : معلش يلا دلوقتي بقي بسم الله
قعدوا يتعشوا وطول الوقت كانت اسماء بتبص لمحمد واللي كان متجاهلها ومركز في الاكل بس وجميلة وهنادي اللي بيتكلموا خلصوا اكل وشالوه
هنادي : بص بقي ي محمد احنا هنتفق علي كل حاجة تخص الفرح
محمد : انا داخل انام وانتو اتفقوا براحتكم
هنادي : محمد اقعد مكانك احنا هنتكلم جمع
في الوقت دا الدموع اتجمعت في عين اسماء لانها اتاكدت من رفضه ليها وانه مغصوب
قعد محمد وهو متعصب لانه مش عاوز الجوازة من الاول بس دا كله عشان مامته وعشان ميزعلهاش
هنادي : بصي ي اسماء احنا بكرة باذن الله هننزل نجيب الشبكة وتختاري اللي انتي عاوزاه
جميلة : ومالوا ياختي بس مش ملاحظة ان بكرة دا يبقي بسرعة
هنادي : لا سرعة ولا حاجة ومتقلقيش ي جميلة انا مجهزة نفسي لليوم دا وهو انا عندي كام اسماء
اتاثرت اسماء وراحت حضنتها وهنادي بادلتها الحضن
محمد : خلاص مش اتفقنا انا هدخل انام
دخل وسابهم من غير ما يسمع ردهم ودا اللي غاظ هنادي
هنادي وهي بتحضن اسماء : استحملي ي حبيبتي وهو هيتغير بس انتي ادعي ان ربنا يهديه ويصدق بقي
جميلة : هنادي عندها حق كلنا عارفين انه بيحبك ومش هيقدر يبعد عنك اكتر من كدة
اسماء : لا ي ماما قدر انه يبعد والحب اللي ما بينا اختفي ودا كان زمان
جميلة : ربنا يصلح حالكم يلا احنا دلوقتي عشان الوقت اتاخر
هنادي : تمام بس تصحي بكرة ي اسماء وتجهزي نفسك ولو علي محمد انا هصحيه غصب عنه
اسماء : بس هو عنده شغل وممكن ميقدرش
هنادي : هو الواحد بيخطب كام مرة هيفضي نفسه غصب عنه قال شغل قال روحوا انتو ارتاحوا وكل حاجة هتمشي صح
ودعوا هنادي وروحوا بيتهم دخلت اسماء الاوضة وهي فرحانة وزعلانة في نفس الوقت فرحانة انها اخيرا هتتجوز اللي هي بتحبه وزعلانة ولانها حاسة انه مغصوب علي الجوازة
رجعت بذاكرتها لتلات سنين وهي كانت قاعدة مع محمد وكانوا في قمة سعادتهم وقتها ومكنتش تعرف انه هيكون آخر مرة تقعد معاه وهي مبسوطة
من تلات سنين كانت قاعدة في الجامعة مع محمد وهي متضايقة
محمد : حبيبتي متدايقة ليه
اسماء : انا زهقت ي محمد مش عاوزة اكمل تعليم ومش عاوزة اجي الجامعة تاني
محمد بضحك : ليه بس
اسماء : يعني انا اصحي كل يوم بدري وطول النهار في المحاضرات ودايخة من دا لدا وتقولي ليه
محمد وهو بيمسك ايدها : اتجدعني انتي كدة وكلها سنة وهتتخرجي وبعدها علي نتجوز
اسماء بفرحة : بجد ي محمد
محمد : بجد ي روح محمد انتي في سنة تالتة يعني قدامك رابعة وبعدها تشتغلي في البيت ي حبيبتي
اسماء : ياه بجد انا فرحانة اوي
محمد : يلا انتي دلوقتي ادخلي المحاضرات وانا هبقي آجي اخدك
رجعت للحاضر المؤلم هو من اليوم دا وهو بيتجاهلها بسبب الموضوع اللي حصل كان سوء تفاهم وهي حاولت تصلحه بس هو مش قابل في الاخر نامت علي امل انه يتغير ...........
#تزوجني_و_لكن
#بقلمي_ندوشة
الفصل الرابع
تاني يوم صحيت اسماء وهي مبسوطة من اللي هيحصل صحت جميلة وحضرت الفطار لهم قعدوا يفطروا وفي الوقت دا الباب خبط قامت اسماء تفتح لقتها هنادي
هنادي بفرحة : عاملة ايه ي عروسة
اسماء : اهلا ي هنون تعالي كنا بناكل
جميلة : مين ي اسماء
اسماء : دي هنون ي ماما
هنادي وهي بتدخل : عاملة ايه ي جوجو
جميلة : تعالي ي هنادي حماتك بتحبك يلا افطري معانا
هنادي : لا انا سبقتكم وجيت اشوف بتعملوا ايه
جميلة : اختاري انتي مع اسماء الفستان اللي هي هتلبسه لو مش هنتعبك يعني
هنادي : اخص عليكي ي جميلة اسماء دي بنتي وهتبقي مرات ابني كملوا انتو اكل وانا هدخل جوة الاوضة بتاعتها وابقي ادخليلي ي اسماء
اسماء : حاضر
دخلت هنادي اوضة اسماء واللي دخلت لها بعد فترة قليلة
اسماء : ها قوليلي بقي ي هنون البس ايه
هنادي : بصي في هنا فستان تحفة ينفع للخطوبة
اسماء : انهو دا
هنادي وهي بتمسكه : هو دا حلو صح
اسماء : حلو اوي شكله جنان
مسكته اسماء وهي مبسوطة بيه كان فستان لونه وردي ضيق من فوق ومطرز باللؤلؤ ونازل برقة وانسياب من تحت
هنادي : يلا بقي ادخلي البسيه وعشان تجهزي نفسك
اخدته اسماء ولبسته وطلعت وهي بتدور بيه وهي مبسوطة اوي دخلت جميلة عليهم واول ماشافت اسماء زغرطت بفرحة
جميلة : بسم الله ماشاء الله ايه الجمال دا ي بت ي اسماء
اسماء : يعني عجبك ي جوجو
جميلة : اكيد شكله تحفة عليكي هياكل منك حتة
هنادي : بطلوا كلام ي جماعة وجهزوا نفسكم يلا وانا هروح البس انا كمان
جميلة : مع السلامة ي حبيبتي
طلعت هنادي وراحت علي بيتها واول ما دخلت لقت محمد قاعد ولسة مجهزش
هنادي : انت قاعد كدة متقوم تجهز نفسك وتلبس كدة هنتاخر
محمد : انا مش عاوز البس ولا عاوز آجي
هنادي : يعني ايه ي محمد ليه دا كله
محمد : لاني مش موافق علي الجوازة دي من الاول
هنادي : حرام عليك ي محمد انت بقيت قاسي كدة امتي انت نسيت اسماء حبيبتك ونسيت حبك ليها
محمد : ايوة ي ماما كل حاجة هي اللي خليتني انسي انا مكنتش اتوقع انها تعمل كدة وانتو عارفين اني مش موافق وبردوا مصممين علي الموضوع دا
هنادي : ي محمد انا زهقت من كتر ما قولتلك ان اسماء معملتش حاجة انت لو كنت بتحبها صحيح مكنتش تصدق كلام ابن عمها دا ابدا
محمد بصوت عالي : انا لو كنت سمعت الكلام دا مكنتش في حياتي اصدقه بس انا شوفت بعيني وانا مش هكدب عينيا واصدقها
هنادي : محمد انا مش هقولك دلوقتي غير انك تقوم تلبس وتجهز لان انا مش هقبل انك تكسر فرحتها لمجرد ان دماغك دي مش مصدقة حاجات محصلتش
محمد : ماشي ي ماما انا هلبس بس اوعي تنسي انك انتي اللي اختارتي كدة
دخل محمد وساب هنادي اللي زعلانة علي بنت اختها واللي في مقام بنتها زعلانة من عمايل ابنها فيها وعارفة ان اسماء مظلومة بس هو مش مصدق حد وبتدعيله بالهداية دخلت هي كمان عشان تجهز نفسها
بعد وقت قصير كان الكل جهز وراحت هنادي لبست جميلة وخبطت فتحت جميلة الباب لها
هنادي : ها جهزتوا واللا لا
جميلة : خلصنا لحظة بس اسماء جاية اهي
طلعت اسماء واول ما محمد شافها انصدم .........
#تزوجني_و_لكن
#بقلمي_ندوشة
الفصل الخامس
طلعت اسماء واول ما محمد شافها اتجمد في مكانه وسرح في جمالها بس اتمالك نفسه وبصلهم من غير ما يظهر اي ملامح علي وجهه
هنادي : ايه رايك ي محمد
محمد : زي كل يوم ايه الجديد
زعلت اسماء والدموع اتجمعت في عيونها قربت جميلة منها بسرعة وهمست
جميلة : معلش ي سوسو انتي عارفة محمد مبيعبرش ابدا عن اي حاجة
هنادي بغضب من برود ابنها : يلا عشان منتاخرش
جميلة : يلا
نزل الكل وركبوا العربية وبعد فترة وصلوا للمحل اللي هيجيبوا منه الشبكة دخلوا المحل والكل مبسوط ما عدا محمد
هنادي وهي بتشاور علي خاتم جميل : ايه رايك ي اسماء
اسماء : تحفة اوي ي هنون
هنادي : ها ي محمد عجبك
محمد : وهو انا اللي هلبسه عشان يعجبني
جميلة : هو عجب العروسة يبقي اكيد هناخده
اسماء وهي بتداري زعلها : عجبني اوي
بعد مدة كان الكل خارج من المحل ركبوا العربية وروحوا وصلوا البيت ودخلوا
هنادي : باذن الله هنلبس الشبكة بالليل ايه رايك ي محمد
محمد : انا مش عارف انتو عاوزين تعملوا زفة علي الفاضي ليه كنا لبسنا الدهب في المحل وبعدين راي ايه هو انا ليا راي في الجوازة دي
اسماء بابتسامة حزن : ايوة ي خالتي محمد عنده حق ليه الهيصة دي احنا نلبسها سكيتي وخلاص
جميلة : يعني ايه ي اسماء دا انتي بنتي الوحيدة وعاوزة افرح
اسماء : ي ماما كله مصاريف علي الفاضي وانا مش عاوزة حد ييجي لاني مش هتحمل الكلام اللي هيتقال
قالت اسماء كدة ودخلت الاوضة بتاعتها علي طول وهي بتعيط والكل كان بيبصلها بحزن ماعدا محمد اللي تفكيره انها بتمثل عليهم
هنادي بغضب من ابنها : طب احنا هنستاذن دلوقتي وبالليل باذن الله هنلبس الدهب يلا ي محمد
جميلة : ربنا يتممها علي خير
خرجت هنادي هي ومحمد من الشقة واول ما دخلوا بيتهم كان محمد داخل اوضته
هنادي بغضب : استني ي محمد
محمد : في ايه ي ماما
هنادي : انت ايه ي اخي ليه بتعمل فيها كدة ليه بتكسر بخاطرها انت اتغيرت ي محمد وانا مبقتش اعرفك مش هي دي اسماء حبيبتك اللي انت مربيها واللي كنتو ناوي تتجوزها ايه اللي حصل دلوقتي انت بقيت قاسي عليها وعلينا وعلي نفسك انا زهقت من عمايلك واسماء متستحقش كدة ليه بتعمل فيها كدة
محمد بعصبية : كلكم عارفين اني مش قابل الجوازة دي واني مش عاوز اشوفها قدامي والكل بردوا عارف ايه اللي حصل من تلات سنين ومش هشرح لحد اللي انا بعمله ومتقوليش ليا محصلش حاجة انا شايفهم بعيني وصدمتي فيها كانت صدمة كبيرة ولحد دلوقتي مش مصدق ان اسماء اللي انا مربيها تعمل كدة انا مش هسامح ابدا ولو مش عاجبكم نلغي الجوازة ودا اللي عندي
هنادي : انا مبقتش قادرة اوضحلك وابررلك بعد كدة ادخل علي اوضتك ي محمد واللي عاوزة اقولهولك ان بسبب عمايلك دا هتخسر كتير ومن ضمنهم اسماء اللي لو خسرتها هتندم طول عمرك بس الوقت هيكون فات هي مستحملاك ومستحملة معاملتك لها طول التلات سنين اللي فاتوا لكن هتيجي في يوم مش هتلاقي اسماء والا هتلاقيني انا كمان ودلوقتي اتفضل علي اوضتك
دخل محمد الاوضة وهو متعصب من اللي بيحصل حوله اما هنادي فقعدت مكانها وهي خايفة من اللي هيحصل لانها عارفة ابنها وان محدش بيجبره علي حاجة وانه اكيد بيخطط لحاجة في دماغه .........
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله1 اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق