رواية ملاك الادهم الفصل الثامن والتاسع للكاتب عادل عبد الله
رواية ملاك الادهم الفصل الثامن والتاسع للكاتب عادل عبد الله
الحلقة الثامنة
تمارا : مالك يا بنتي فيه ايه ع الصبح ؟
شيرين " تضحك " : يارا عز الدين .
تمارا : مين ؟؟
شيرين : بقولك يارا عز الدين .
تمارا : مين دي ؟؟
شيرين : مرات أدهم ابن عمك .
تمارا : يارا ؟!!!
شيرين : ايوه ملاك مرات ادهم اسمها الحقيقي يارا .
تمارا : أنتي عرفتي ازاي ؟
شيرين : فضلت ابحث بصورتها لحد ما وصلت لأكونت تبعها وعليه صورتها .
تمارا : أنتي متأكدة ؟
شيرين : عيب عليكي ، ده انا اختك شوشو اللي لما تحط حاجة في دماغها لازم توصلها .
تمارا : وناوية تعملي ايه يا ست شوشو ؟ هتقولي لأدهم ؟؟
شيرين : تؤ ، مش دلوقتي .
تمارا : أومال امتي يا شوشو ؟؟
شيرين : لما اعرف كل حاجة عنها الأول بعدين اقول لأدهم .
تمارا : ده أنتي طلعتي مش سهلة ابدا يا شيرين !!
شيرين : عايزاها تخطف مني ادهم واقف ساكته ؟!!
تمارا : ادهم كان قدامك ، كنتي ساكتة ليه ؟؟
شيرين : ادهم طول عمره مهتم بشغله وبس و عمره ما فكر في الحب والكلام ده ، وانا حاولت ألفت انتباهه كتير وكان في تفكيري أنه اول ما ينوي يتجوز أكيد أنا هكون العروسة المناسبة له ومش هيفكر في غيري .
تمارا : وحصل واتجوز واحدة تانية ، المفروض تشيليه بقي من تفكيرك و تنسيه .
شيرين : مستحيل ابدا ، ادهم ده ملكي لوحدي زي ما قولتلك قبل كده ومش هتنازل عنه ابدا .
في المستشفي
ذهبت هاجر وبصحبتها تمارا و شيرين ومعهم ملاك الي المستشفي .
بمجرد دخولهم غرفة ادهم جرت ملاك اليه ....
ملاك : وحشتني اوي يا ادهومتي .
ادهم " بصوت منخفض " : احم احم ، قولنا بلاش ادهومتي دي قدامهم .
ضحكت ملاك : وحشتني يا حبيبي معرفتش انام البارح وانا بعيدة عنك .
ادهم : وانتي كمان وحشتيني اوي .
ثم وجه كلامه لوالدته قائلا : ازيك يا ماما عاملة ايه ؟
هاجر : ازيك انت يا ادهم يا حبيبي عامل ايه دلوقتي ؟
ادهم : الحمد لله احسن ، تعبتي نفسك ليه ؟ ده انا خارج النهاردة من المستشفي .
هاجر : تنور بيتك يا حبيبي .
تمارا : حمدلله ع سلامتك يا ادهم يارب تكون بقيت احسن .
ادهم : الله يسلمك يا تمارا .
تمارا : ده نور اخوك كان هيجيلك النهاردة وهو راجع من الجامعة .
ادهم : لأ ، اتصلي بيه وطمنيه اني هخرج النهاردة واروح البيت .
شيرين : ايه يا ادهم مفيش ازيك يا شيرين ؟! ولا من لقي احبابه ؟!!!!
ادهم : ازيك يا شيرين ، ازاي تقولي كده !! ده انتي بنت عمي وزي اختي بالظبط .
تحترق شيرين غضبا ولكنها تحاول اخفاء ذلك فتبتسم ابتسامة خادعة وتقول : طبعا لما ترجع البيت لازم نقعد مع بعض كتير .
ادهم : باذن الله .
شيرين : فاكر يا ادهم زمان لما كنا نقعد نلعب مع بعض طول اليوم ؟
ادهم : ايوه .
شيرين ' تضحك ' : فاكر كنا بنلعب ايه ؟
ادهم : اكيد مش فاكر ، احنا اكيد كنا صغيرين اوي .
شيرين : بس انا فاكرة ، كنا بنلعب عروسة وعريس .
وقعت الكلمة عليهم جميعا كالصاعقة ووقفوا جميعا صامتين !!
بينما نظرت ملاك لأدهم بغيظ وتوعد !!
ادهم " يبتسم " : انا مش فاكر بس احنا كنا عيال صغيرين .
شيرين : مكناش صغيرين اوي .
ملاك " بسخرية " : طيب يلا نشوف الدكتور علشان ناخد منه اذن الخروج ولما نروح البيت تسترجعوا ذكريات الطفولة براحتكم !!
في فيلا عز الدين
جودي : ايه يا ماما الاعلانات اللي عملتيها دي كلها ؟!
نجلاء : علشان نلاقي اختك .
جودي : ده احنا اتفضحنا يا ماما !!
نجلاء : اتفضحنا ليه ؟ علشان مش ساكتين و بندور عليها ؟!! اللي فضحنا بجد اختك اللي هربت ليلة خطوبتها .
جودي : زمايلي كلهم بيتصلوا بيا ومش عارفة ارد عليهم اقولهم ايه !!
نجلاء : سيبك من لعب العيال ده ، تردي عليهم او مترديش انتي حرة ، المهم عندي ان اختك ترجع .
يدخل اليهم فجأة جاسر ....
جاسر : مالكم صوتكم عالي ليه ؟
نجلاء : الهانم اختك زعلانة علشان الاعلانات اللي عملناها وبتقول اتفضحنا .
جاسر : ازاي يا جودي ؟ انتي مش خايفة علي اختك و عايزاها ترجع ؟
جودي : وهو ده اللي هيرجعها ؟؟!
جاسر " بخبث " : انتي اكيد عارفة مكان يارا ؟؟
جودي : لأ طبعا وانا هعرف ازاي ؟
جاسر : تكون يارا اتصلت بيكي. مثلا !! او بعتتلك رسالة !!
جودي : ياريتها تتصل واطمن عليها .
نجلاء : لو يارا اتصلت بيكي وعرفتي مكانها وخبيتي عليا مش هقولك انا هعمل فيكي ايه !!!
جودي : يا ماما صدقيني انا معرفش اي حاجة عن يارا من الليلة اللي مشيت فيها من هنا ولحد دلوقت .
بعد يومين وقت الافطار صباحا
في قصر الفيومي
يجلس ادهم مع يارا في حديقة القصر بعد الأفطار ، ولكن يبدو علي ملاك الأنزعاج !!
ادهم : مالك يا ملوكة ؟ شكلك متضايقة من حاجة !!
ملاك : ويهمك اوي ؟؟
ادهم : طبعا انتي عارفة اني بحب اشوفك علطول سعيدة .
ملاك : لأ مش مهم بقي ، اهم حاجة الاستاذة شيرين بنت عمك تكون انت وهي مبسوطين ومش مهم ملاك !!
ادهم : ليه بتقولي كده يا قلبي ؟! ده شيرين دي زي اختي نانسي بالظبط .
ملاك : زي اختك !!! بأمارة ما هي لازقة جنبك ليل ونهار وبتفكرك لما كنتوا بتلعبوا عروسة وعريس ؟؟!!
ادهم : انا مش فاكر اي حاجة من اللي هي قالتها اكيد كنا عيال صغيرين !!
ملاك : علفكرة لو فيه مشاعر بينكوا وبتحبوا بعض يعني انا ممكن اختفي من حياتك خالص .
ادهم : انتي اتجننتي يا ملاك ؟! مستحيل ابدا يا ملاك ده انتي روحي وقلبي وعمري انتي اول واخر حب في حياتي .
ملاك : بجد يا ادهومتي ؟؟
ادهم : بجد يا روح ادهومتك .
وعلي الجانب الاخر يجلس الأب عامر مع الجد سليمان الفيومي الذي يوبخه ..
سليمان الفيومي : انا زعلان منك يا عامر .
عامر : ليه با حاج ؟ انا مقدرش علي زعلك ابدا وانت عارف .
سليمان : مش انت لوحدك ، انا زعلان منكم كلكم .
عامر : ياااه !! للدرجادي !! ليه يا حاج ؟ ايه اللي حصل !!
سليمان : معاملتكم لمرات ادهم مش عجباني .
عامر : ازاي يا حاج ؟
سليمان : كلكم بتعاملوها وكأنها واحدة غريبة وده اكيد مأثر عليها ، حتي ادهم لاحظت انه متضايق من كده بس لسه مش عايز يتكلم .
عامر : يا حاج اكيد جواز ادهم منها بالطريقة دي عامل فجوة بينا وكمان متنساش اننا منعرفش عنها حاجة ، هي مين وبنت مين وفين عيلتها ؟ كل الحاجات دي هي اللي مخليانا مش قادرين نتجاوب معها علشان نعاملها علي انها واحدة مننا .
سليمان : لا يا عامر انتوا معندكوش حق في كده ، البنت واضح عليها انها بنت ناس ومحترمة ومؤدبة وفوق كل ده بتحب ادهم وادهم بيحبها واحنا كأهل ادهم هنكون عايزين ايه اكتر من كده !!!
عامر : حاضر يا حاج هقولهم يغيروا معاملتهم معها .
سليمان : لازم يا عامر يغيروا معاملتهم مع البنت ، انت عارف ادهم غالي عندي ازاي ومينفعش اشوفه متضايق كده !!
عامر : حاضر يا حاج .
تأتي نانسي فجأة وتهرول الي ادهم وملاك ...
نانسي : صباح الخير يا ابيه ادهم ، صباح الخير يا ملوكة .
ادهم : صباح النور يا نانسي .
ملاك : صباح الفل يا حبيبتي .
نانسي : بعد اذنك يا ابيه ممكن اخد منك ملوكه شوية ؟؟
ادهم : فيه حاجة يا نانسي ؟
نانسي : أيه يا ابيه !! انت عايزها تفضل قاعدة جنبك كده علطول !! انا نفسي اقعد معها شوية .
ادهم " يضحك " : ماشي يا ننوسة خدوا راحتكم انا هروح اقعد مع بابا وجدي .
ملاك : طيب استني اسندك تروح تقعد معاهم .
ادهم : لأ ، انا هسند علي العكاز ده .
جلست نانسي مع ملاك يضحكون بينما يذهب ادهم الي جوار والده وجده .
نانسي : انتي حلوة اوي يا ملوكه .
ملاك : انتي اجمل يا ننوسة .
نانسي : انا اخت ابيه ادهم الصغيرة واصغر واحدة في العيلة وكلهم بيحبوني اوي بس بيقولوا عليا شقية .
ملاك " تضحك " : انتي لذيذة اوي وشقية فعلا .
نانسي : كلميني بقي عن نفسك يا ملوكه علشان نبقي اصحاب .
ملاك : انا مش فاكرة اي حاجة قبل الحادثة ، كل اللي اعرفه ادهم اللي قالي عليه اسمي واني مراته .
نانسي : وقالك ايه عن باباكي ومامتك وعيلتك ؟؟
ملاك : كل اللي عرفته ان بابا وماما ماتوا واخواتي مسافرين بره .
نانسي : يا حبيبتي !! انا من النهاردة اختك وصحبتك وكل حاجة.
داخل القصر
تأتي شيرين وتبدو علي وجهها سعادة بالغة !!
تمارا : صباح الخير يا شوشو .
شيرين : صباح الورد والفل والياسمين وكل حاجة حلوة .
تمارا : فيه ايه ؟ صاحية مبسوطة وفرحانة اوي النهاردة !!!
شيرين : صحيت من النوم علي اسعد خبر في حياتي .
تمارا : خير فيه ايه ؟
شيرين : مش هينفع اقول ، انا هخليكي تشوفي بنفسك !!!
الحلقة التاسعة
شيرين : صحيت من النوم علي اسعد خبر في حياتي .
تمارا : خير فيه ايه ؟
شيرين : مش هينفع اقول ، انا هخليكي تشوفي بنفسك !!!
ثم فتحت هاتفها واعطته لها وقالت : بصي شوفي الاعلان ده وانتي تعرفي .
تمسك تمارا الهاتف وتري صورة " ملاك " في اعلان وتقرأت احد الاعلانات التي اطلقتها نجلاء !!!
تمارا " تقرأ الاعلان " : " مكافأة مالية قدرها مائة ألف جنية لمن يدلي بأي معلومات عن مكان تواجد الانسة يارا عز الدين " .
شيرين : ايه رأيك في الخبر ده بقي ؟ من حقي افرح ولا لأ ؟!
تمارا : اكيد انتي فرحانه علشان هتعرفي توصلي لأهلها ؟
ثم ثضحك وتقول : ولا فرحانة علشان الميتألف جنية ؟
شيرين : لا طبعا أنا فرحانة علشان هوصل لأهلها وكل حاجة هتنكشف .
تمارا : لكن فيه حاجة اكيد مش لاحظتيها !!
شيربن : ايه هي ؟؟؟
تمارا : المكافأة الكبيرة دي معناها ان اهلها ناس اغنيا مش فقرا زي ما كنتي متوقعة !!
شيرين " تضحك بصوت عال " : وانتي يا حبيبتي مش لاحظتي الملحوظة الأهم .
تمارا : ايه هي ؟؟؟
شيرين : مكتوب في الأعلان " الانسسسسسة " يارا !! اخدتي بالك من كلمة الانسة دي ؟؟؟
تمارا : انسة !!!!
شيرين : ده معناه ان الانسة يارا او " ملاك " مش متجوزة ادهم بيه وهما الاتنين بيضحكوا علينا وبيستغفلونا .
تمارا : او يمكن يكون كلام ادهم حقيقي وبعد الحادثة فقدت الذاكرة وادهم اتجوزها فعلا وميعرفش حاجة عنها وعن اهلها .
شيرين : حتي لو متجوزين جوازتهم هيكون محكوم عليها بالفشل بمجرد اهلها يعرفوا مكانها و يوصلولها .
تمسك شيرين هاتفها وتبدأ في الأتصال بالرقم المذكور في الاعلان .
تمارا : انتي بتتصلي بيهم ؟؟؟
شيرين تضحك : أيوه .
تمارا : طيب افتحي الاسبيكر عايزة اسمع المكالمة ....
في احد النوادي الاجتماعية
تجلس نجلاء مع بعض صديقاتها ثم تسمع صوت نغمة هاتفها .
تنظر لشاشة الهاتف فتجد المتصل رقم غريب فتبدأ في الرد .....
نجلاء : الوو .
شيرين : الو ، انا بكلمك بخصوص الاعلان الموجود علي السوشيال ميديا .
نجلاء " بلهفة " : أيوه ، أنتي تعرفي مكان يارا ؟؟
شيرين : ايوه عارفة مكانها .
نجلاء : قوليلي بسرعة يارا فين ؟؟
شيرين : بالراحة عليا يا مدام هقولك بس لما نتكلم الاول .
نجلاء : من غير ما تتكلمي حقك محفوظ ولو عايزة اكتر من الفلوس المكتوبة في الاعلان معنديش مانع .
شيرين : مش قصدي ، انا اخر حاجة افكر فيها الفلوس .
نجلاء : اخر حاجة تفكري فيها !!!! اومال هنتكلم في ايه ؟
شيرين : قبل ما اقولك اي معلومة عنها لازم الأول اعرف انتي مين ومكانك فين وكل حاجة عنك وعن باقي اهلها .
نجلاء : وده يهمك في ايه ؟!! المفروض انك تدليني علي مكانها وتأخدي مكافأتك وانتهي الكلام .
شيرين : ما انا قولتلك يا مدام انا الفلوس بالنسبالي اخر حاجة اهتم بها .
نجلاء : وعايزة تعرفي كل حاجة عني ليه ؟
شيرين : مش يمكن تكونوا مش اهلها ، وانتي عارفة الحاجات اللي بنسمعها الايام دي ممكن تكونوا تجار اعضاء او اي حاجة من النوع ده .
نجلاء : واحنا لو تجار اعضاء هنعمل اعلان ليه ؟!! وعموما اطمني احنا اهلها وناس محترمين جدا ومعروفين كمان .
شيرين : بردو معلش لازم أتأكد الأول .
نجلاء : وهتتأكدي أزاي بقي ؟؟؟
شيرين : انتي تقوليلي عنوانك وأتأكد من شخصيتك وبعدها اقولك مكانها فين .
نجلاء : أنتي فعلا عندك معلومات عن يارا ولا بتتسلي وبتلعبي بأعصابنا ؟؟
شيرين : لا يا مدام متقلقيش انا عارفة مكانها وهقولك عليه لكن زي ما قولتلك لما أتأكد من شخصيتك الاول .
نجلاء : مفيش مشكلة هقولك العنوان لكن لو اكتشفت انك بتلعبي باعصابنا هيكون لينا رد فعل تاني .
في قصر الفيومي
تنتهي المكالمة وتنظر تمارا لشيرين بتعجب وتسألها : مين اللي رد عليكي ؟
شيرين : صوت واحدة كبيرة ممكن تكون مامتها .
تمارا : و ناوية تعملي ايه يا شوشو ؟
شيرين : متستعجليش هتشوفي اختك هتعمل ايه .
تمارا : لأ انا لازم افهم واعرف الأول هتعملي ايه .
شيرين : هتعرفي كل حاجة في وقتها .
تمارا : انا خايفة عليكي اوي يا شوشو .
شيرين : خايفة من ايه يا قلبي ؟؟
تمارا : خايفة عليكي تتورطي مع الناس دي ويسببولك مشكلة كبيرة .
شيرين : لأ متقلقيش علي اختك يا حبيبتي .
في مكان اخر داخل قصر الفيومي
عامر : اسمعي يا هاجر ياريت تغيري من معاملتك شوية مع ملاك
هاجر : ليه بتقول كده ؟ هي اشتكتلك ؟
عامر : لأ هي مش اشتكت لكن الحاج هو اللي كلمني وزعلان من معاملتنا للبنت وانتي عارفة الحاج اي حاجة تخص ادهم بيهتم بها ازاي !!
هاجر : يبقي اكيد البت دي اشتكت له .
عامر : لا لا متظلمهاش ، ولا ملاك ولا ادهم اتكلموا ، الحاج اللي لاحظ وكلمني ، وياريت تنبهي علي باقي العيلة كمان يحسنوا من معاملتهم لها .
هاجر : انا البت دي كل ما اشوفها ببقي هتجنن ازاي قدرت تضحك علي ابني وتتجوزه بالسهولة دي !!!
عامر : ادهم ابنك مفيش حد يقدر يضحك عليه وانتي عارفة كويس دماغه توزن بلد ، كل اللي حصل ان ادهم وقع في حبها وانتي عارفة الحب ملوش كبير !! وبعدين دي حياته يا هاجر وهو حر فيها ، ابنك مش صغير .
هاجر : حاضر يا عامر هعاملها كويس .
عامر : وتنبهي علي باقي العيلة بنفس الكلام ، انتي عارفة الحاج وزعله !!
هاجر : حاضر يا عامر ، خلاص فهمت .
في النادي
تنتهي المكالمة بين شيرين ونجلاء ثم تتصل نجلاء بعدها بأبنها جاسر ....
نجلاء : انت فين يا جاسر ؟
جاسر : انا في الشغل .
نجلاء : طيب تعالالي حالا انا مستنياك في النادي .
جاسر : ليه فيه ايه ؟
نجلاء : لما تيجي هتعرف ، متتأخرش يلا تعالي بسرعة انا مستنياك .
بعد قليل ...
جاسر : خير يا ماما جبتيني علي ملا وشي ليه ؟
نجلاء : فيه واحدة كلمتني وقالتلي انها تعرف مكان يارا .
جاسر " بلهفة " : بتتكلمي جد ؟؟
نجلاء : ايوه .
جاسر : وهي فين ؟؟
نجلاء : لسه مقلتش مكانها .
جاسر : ليه ؟؟؟
نجلاء : انا مش مرتاحة للبنت اللي كلمتني دي يا جاسر وحاسة انها وراها لعبة عايزة تلعبها علينا .
جاسر : ليه ؟
نجلاء : البنت مرضيتش تقول مكان يارا فين وفضلت تسألني عن عنوانا واذا كنا اهل يارا فعلا ولا لأ !! وكلام كله يقلق مش كلام واحدة عايزة توصلنا لمكان يارا وتاخد المكافأة !!!
جاسر : يبقي مترديش عليها تاني وكأنها متصلتش بيكي من الاساس .
نجلاء : ولو البنت دي طلعت فعلا تعرف مكان يارا اضيع فرصة أننا نوصلها من ايدينا ؟!!!
جاسر : انا كده احترت معاكي !! مادام قلقانة من البنت دي كده سبيهالي وانا هقابلها واتصرف معها .
نجلاء : هتعمل ايه معها ؟؟
جاسر : هاتي رقمها و أنا هتصرف .
في قصر الفيومي
تسمع شيرين نغمة هاتفها وتجد رقم غريب !!!
شيرين : الوو
جاسر : مساء الخير .
شيرين : مساء النور ، مين معايا ؟
جاسر : انا جاسر خطيب يارا .
شيرين " بذهول " : خطيبها !!!
جاسر : ايوه خطيبها .
شيرين " تحاول استيعاب الموقف " : اهلا وسهلا ، خير ؟
جاسر : انا عرفت انك بتقولي انك تعرفي مكان يارا .
شيرين : ايوه اعرف هي فين .
جاسر : ياريت تقوليلي يارا فين ومتقلقيش من ناحية المكافئة حقك محفوظ وبزيادة .
شيرين : تمام انا بس عايزة فرصة يومين وهقولكم هي فين .
جاسر : وليه نستني يومين ؟! احنا فيها قوليلي مكانها ومكافأتك تاخديها بعد نص ساعة من دلوقتي .
شيرين : لأ معلش اديني فرصة يومين مش أكتر .
جاسر : طيب ممكن نتقابل احسن ؟
شيرين : مين اللي يتقابل ؟
جاسر : انا وانتي .
شيرين : والسبب ؟؟
جاسر : علشان نعرف نتكلم احسن من كده .
شيرين : اوكي معنديش مانع .
جاسر : انتي منين ؟
شيرين : انا من اسكندرية .
جاسر : يبقي كمان ساعتين نتابل عندك في اسكندرية ؟؟
شيرين : اوكي .
بعد ساعتين ونصف في احد مطاعم الاسكندرية المطلة علي البحر ....
تصل شيرين للمطعم وتجد شاب وسيم تبدو عليه علامات الثراء الفاحش !!
شيرين : مساء الخير .
جاسر : مساء النور ، اتفضلي ارتاحي .
تجلس شيرين في مقابلته فيبتسم جاسر ويقول : واضح من مظهرك انك مرتاحة ماديا واهلك ناس اغنيا والموضوع بالنسبالك مش موضوع فلوس .
شيرين : واااااو ، برافو ، زي ما واضح عليك انت فعلا ذكي جدا .
جاسر : طيب نتكلم علطول واسمع طلباتك .
شيرين : انا عايزة اعرف كل حاجة عن ملاك سوري قصدي يارا .
جاسر : ملاك !!! ملاك مين ؟
شيرين : قصدي يارا .
جاسر : انتي قولتي الأول ملاك وبعدين قولتي يارا !!
شيرين : سوري اتلخبطت في الاسم .
جاسر : ويهمك في ايه تعرفي عنها اي حاجة ؟!!
شيرين : موضوع يخصني انا .
جاسر : وانا لازم اعرف انتي ليه مهتمة بيارا بالشكل ده !!
شيرين " تضحك بخبث " : عايزة اجوزها لأخويا .
جاسر " بسخرية " : الظاهر ان سمعك تقيل شوية !! انتي مش سمعتيني بقولك في التليفون ان يارا خطيبتي ؟!!
شيرين : سمعتك بتقول انها خطيبتك لكن مش مراتك !!
جاسر : تقدري تعتبريها مراتي .
شيرين : ياااه !! للدرجادي كنتوا بتحبوا بعض اوي كده ؟!!!
جاسر : بنحب بعض جدا جدا فوق ما عقلك يتخيل .
شيرين : للأسف انا عندي خبر هيصدمك .
جاسر : يارا حصلها حاجة ؟؟
شيرين : ايوه يارا اتجوزت .
يقف جاسر غاضبا : بتقولي ايه ؟؟؟ مش ممكن !!!
شيرين : هي دي الحقيقة ، يارا اتجوزت .
جاسر : انتي بتتكلمي جد ولا دي لعبة بتلعبيها علينا ؟؟
شيرين : وهلعب عليكم ليه !! الحقيقة انها فعلا اتجوزت .
جاسر " بعصبية " : هي فين ؟؟ واتجوزت مين ؟؟ اتكلمي .
شيرين : اهدا واقعد علشان نعرف نتكلم ونلاقي حل .
جاسر : حل ايه !!! انتي لازم تقوليلي يارا فين واتجوزت مين وازاي ؟؟
شيرين : بقولك اقعد علشان نعرف نتكلم .
جاسر : اهو قعدت ، انطقي بقي هي فين واتجوزت مين ؟
شيرين : يارا خطيبتك اتجوزت ادهم الفيومي ابن عمي .
جاسر : ادهم الفيومي رجل الاعمال ؟؟
شيرين : أيوه .
جاسر " بعصبية " : يارا اتجوزت ادهم الفبومي ؟؟
شيرين : بص يا استاذ جاسر زي ما يارا تهمك جوزها ادهم ابن عمي كمان يهمني جدا .
جاسر : قصدك انك بتحبي ادهم ابن عمك ويارا أخدته منك ؟؟
شيرين : انا قولت عليك من اول لحظة انك ذكي جدا .
جاسر : قصدك ان مصلحتنا واحدة ؟
شيرين : بالظبط كده .
جاسر : والمفروض هنعمل ايه دلوقتي ؟
شيرين : ده بقي اللي هنرتبه مع بعض علشان خطيبتك اللي بتحبها ترجعلك و ابن عمي حبيبي يرجعلي .
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق