رواية عشق الروح الفصل التاسع والعاشر بقلم نور عزام
رواية عشق الروح الفصل التاسع والعاشر بقلم نور عزام
الحلقة التاسعة
انقضي اليوم و شروق في غايه السعاده و آسيا سعيده لسعاده صديقتها
اول ما فعلته ما ان وصلت المنزل هو انها هاتفت آدم
-لا سيندريلا كده باظت خاااالص , دي مواعيد ؟!!
آسيا (ضاحكة ) : معلش الفيلا بعيد و علي ما جينا بقي و كده
آدم : اهم حاجة انبسطي ؟؟
آسيا : جدا جدااا
آدم : الحمد لله , احكي لي بقي عملتوا ايه
آسيا : مفيش يا سيدي كنا في الكوافير الصبح و بعدين أيمن جه اخدنا و روحنا الفيلا , كتبوا الكتاب و كانوا عاملين حفله صغيرة كده , رقصوا سلو و اتصورنا و اتعشينا , بس
آدم (بغصب) : و انتي رقصتي ؟؟!
آسيا (ضاحكة) : ايوة مع بابا و بعدين سيبته لماما رقص معاها شوية
آدم : ممممممممم
آسيا : شروق كانت طالعه قمر ما شاء الله
آدم : ربنا يسعدها , بس مفيش قمر غيرك
آسيا (بخجل) : ميرسي
استمرت المكالمة اكثر من ساعة يتحدثون عن شروق و عقد القران و عن انفسهم طفولتهم و احلامهم , اصبحت تتحدث معه عن كل شئ
آسيا ( بصوت ناعس ) : آدم احنا مش هنام ولا ايه
آدم : عاوزة تنامي ؟؟
آسيا : جدا
آدم : طيب هقولك اخر حاجة و بعدين نامي براحتك
آسيا : يا آدم حرااام عليك بقي كل ده و لسة مقولتش حاجة
آدم : ايوه
آسيا : طب قول
آدم : آسيا انتي خليني لحياتي معني , بقي ليها طعم , بقيت بحس بالسعاده لمجرد اني اسمع صوتك , من غيرك ببقي ضايع اوي , انتي غيرتي حياتي .. اوعديني انك عمرك ما هتبعدي عني مهما حصل ..
ظلت صامته لفترة تحاول إستيعاب كلماته , راق لها اول جزء من الكلام و اقلقها كثيرا الجزء الاخر .. " اوعديني انك عمرك ما هتبعدي عني مهما حصل "
ظلت هذة الجملة تتردد في عقلها كصدا الصوت , غامض , دائما ما تشعر إنه يخفي شيئ عنها , تحاول تكذيب إحساسها و شكوكها , لكن ها هو في كل مرة يثبت لها العكس
آسيا (بدهشه) : انت ليه بتقول كده ؟!
آدم : خايف..
آسيا : من ايه ؟!
آدم : من انك تبعدي عني في
في يوم
آسيا : و انا ايه اللي يخليني ابعد عنك ؟!
آدم : يا آسيا عاوز اطمن , اوعديني بقي
آسيا : آدم انت هتتخلي عن غموضك ده امتي ؟!
آدم : مش غموض ولا حاجة
آسيا : امال ايه ؟!! ايه اللي عندك يخليني ابعد عنك ؟؟!
آدم : عندي قلب اتكسر 100 مرة يا آسيا خلاني ابقي دايما خايف و قلقان من اني اخسر الناس اللي بحبهم
"الناس اللي بحبهم" ظلت هذة الجملة تتردد بداخلها
احقا يعنيها ؟!!
آدم : روحتي فين
آسيا : سرحت في كلامك
آدم : انهي جزء في كلامي بالضبط
آسيا (مغيره للموضوع) : عندك قلب اتكسر 100 مرة ليه ؟؟؟
آدم : حبيت ناس ميستهلوش , بتعشم اوي و بتخذل كل مرة
آسيا (بهدوء) : و انا مش هخذلك يا آدم
آدم : وعد ؟؟
آسيا : توعدني انت كمان بحاجة الاول
آدم : إيه ؟؟
آسيا : تحكي لي كل حاجة عنك انت مخبيها
آدم : انا مش .....
قاطعته بحده
آسيا : متقولش مش مخبي , لا مخبي يا آدم..مخبي !
تنهد بضيق
آدم : اوعدك قريب هتعرفي كل حاجة انتي عاوزه تعرفيها
آسيا : و انا وعد مش هخذلك
--------------------------------------------------------------
-شروق يااا شروووووق
شروق : في اييه يا بنتي ؟؟!! انتي بتنادي علي عيل تايه ؟!!
شيرين : موبايلك بيرن بقاله ساعه
شروق : مش قادره تجيبيهولي المطبخ يعني
امسكت بهاتفها وجدت أيمن المتصل
اجابته علي الفور
شروق : الو
أيمن (بغضب و صوت عال ) : انتي فيييييين ؟؟؟؟!!!!! سنه علي ما ترررردي ؟؟!
شروق (بذهول) : ايه يا أيمن ؟!! مش مستاهله الزعيق ده كله !!! كنت في المطبخ و مش سامعه الموبايل بس
أيمن (بغصب) : موبايلك يبقي علي طووول في ايدك بعد كده , فاهمه ؟؟؟
شروق (بضيق) : حاضر
أيمن (و قد هدأ قليلا) : هعدي عليكي الساعة 7 تبقي لابسه و جاهزه
شروق : هنروح فين ؟؟؟
أيمن : لما تبقي خارجه معايا المفروض متسأليش فين
شروق (بضيق) : ليه يعني ؟!! مش لازم اعرف هروح فين ؟؟!
أيمن : لا مش لازم , طالما معايا يبقي مش لازم تعرفي , انا جوزك لو كنتي نسيتي , اجهزي و 7 هعدي عليكي , سلام
اغلق دون ان يسمع ردها
تأففت بغضب و ضيق
شيرين : مالك يا بنتي ؟؟؟
شروق (بضيق) : مفيش , انا داخله اكمل الاكل
وقفت امام البوتجاز تقلب الطعام بشرود , تغير كثيرا أيمن
مر شهر منذ ان عقد قرانهم و كل يوم تكتشف فيه صفه جديده صادمه بالنسبة لها !!
كانت تعلم إنه متقلب المزاج لكنها صدمت من عصبيته الزائده و تحكمه المبالغ فيه في جميع الامور و اكثر ما يؤلمها حقا هو محاولاته المستمرة لإلغاء شخصيتها , يريدها ان تنصاع لجميع اوامره دون نقاش ! لا يهتم الي رأيها طلاقا , يتعامل معها كادمية يحركها كيف ما شاء وقت ما شاء !!
تتعجب حقا كيف له ان يكون قد عاش في امريكا بلد التحرر و التحضر كل تلك السنوات و نهايه المطاف يتعامل مع زوجته بتلك الطريقة !!
انهت الغداء و تناولته دون شهيه مع والدها و شقيقتها ثم ذهبت لتبدل ملابسها و انتظرت أيمن الي ان اتي لاصطحتبها
في السيارة ..
أيمن : مالك ضاربه بوز ليه ؟؟؟
شروق : مفيش
أيمن (بتنهيده) : مالك يا شوشو ؟؟؟
شروق (بغضب) : انت خليت فيها شوشو ؟؟!!
أيمن : ليه بس و انا عملت ايه ؟؟!
شروق (بنفاذ صبر ) : انا زهقت و تعبت يا أيمن من زعيقك و عصبيتك اللي علي الفاضيه قبل المليانه دي !!! حتي في الشغل بقيت بتزعق لي !! ده انت و احنا مفيش بينا حاجة مكنتش بتعمل كده , جاي دلوقتي بعد ما بقيت مراتك تزعق لي بالشكل ده !!
أيمن : انتي مكبره الموضوع ليه , انا ببقي بلفت نظرك لحاجات معينه بس و زي ما بعمل مع غيرك بعمل معاكي , ولا عاوزاهم يقولوا انك عشان بقيتي مراتي خلاص هعملك معامله مختلفة , انا مبحبش كده يا شروق الشغل شغل , و الشركة الفترة اللي فاتت دي مشاكلها كتير و انتي مبقتيش مركزة في شغلك زي الاول
شروق (بصدمه) : انا يا أيمن مش مركزة في شغلي ؟!!
أيمن : ايوة , في الاول كنتي مركزة عن كده و سريعه عن كده , القضايا بقت بتاخد معاكي وقت كتير في دراستها
شروق : اعملك اييه قضايا شركتك اللي معقدة و مكلكعه
أيمن (ضاحكا) : كله متوقف علي شطارتك يا متر
شروق : علي فكري انا شاطرة في شغلي بشهاده كل الناس
أيمن : مش باين
شروق (بغصب) : مستفززز
أيمن (ضاحكا) : خلاص يا ستي بهزر , انتي احلي و اشطر محاميه في مصر
ممكن تتفضلي تنزلي بقي
شروق (بدهشة) : هنا فين ؟!
أيمن : انزلي و بطلي اسئلة
ترجلت من السيارة و هي لا تفهم شئ مما يدور حولها
شروق : ايه اللي جايبنا هنا ؟!!
أيمن : هنركب يخت
شروق (بدهشة ) : ايه يخت !!! دلوقتي ؟؟!
أيمن : ايوة , و فيها ايه ؟!
شروق (بخوف) : اصل احنا بالليل
أيمن : و هو اليخت مش بيتركب غير بالنهار ؟!
شروق : بلاش يا أيمن
أيمن : بلاش ليه ؟؟!
شروق (بخوف ) : انا بخاف
أيمن (بحده ) : بتخافي من اييه بالضبط , هو كل حاجة بخاف بخاف !!! ما انا معااااكي
و دون كلمه اضافيه حملها الي داخل اليخت
كانت تشعر بخوف شديد
أيمن : يا بنتي انتي مالك ماسكة فيا زي اللي قافشه في حرامي كده ؟؟! سيبي الشميز بهدلتيني
شروق : ما انا اللي قولت لك بلاش انت اللي صممت
أيمن : انا اللي استاااهل , كنت فكرت هتنبسطي
سيبي هدومي بس و بصي حواليكي شوفي المنظر حلو ازاي و الجو تحفة
افلتت يدها و اعتقل هو خصرها النحيل و وقوا في مقدمه اليخت
أيمن : خلاص بقي اهدي , انا معاكي خايفه من ايه
شروق (بخجل) : خلاص مش خايفه
داعب الهواء خصلات شعرها و جعله يتطاير , مما اضفي عليها مظهرا رائعا
شروق : بتبص لي كده ليه ؟؟
أيمن (بابتسامه) : مراتي و ببصلها , فيها حاجة
شروق (بخجل) : لا
أيمن (بتنهيده) : هتوحشيني يا شوشو
شروق (بحيره) : هوحشك ليه ؟!
انت هتروح فين ؟!
أيمن : مسافر بكرة
شروق (بحزن) : هغيب كتير
أيمن : لا ان شاء الله مش هتأخر
تعالي نقعد
اجلسها و جلس بجانبها و احاطها بذراعه
شروق : متطولش يا أيمن بليز
أيمن : حاضر يا حبيبتي , متقلقيش
شروق (مبتسمه) : انت عارف ان دي تالت مره تقولي فيها حبيبتي من ساعه ما اتجوزنا
أيمن (ضاحكا) : انتي بتعديهم لي
شروق : ايوه عشان مش بتقولها كتير , عارف انا نفسي في ايه
أيمن : في ايه
شروق : نفسي تغير طريقتك معايا شوية
أيمن (بضيق) : ازاي يعني
شروق : يعني تبطل العصبيه دي تاخد و تدي معايا كده في الكلام بلاش كل حاجة تبقي اوامر كده
أيمن : انا جوزك و طبيعي تسمعي كلامي
شروق : و انا مقولتش مش هسمع بس لازم نتكلم مع بعض و نتناقش , انت مش بتديني فرصة اتكلم معاك , بليز يا أيمن حاول تغير اسلوبك معايا شوية عشان خاطري
أيمن (بعدم افتناع ) : ان شاء الله
قضوا بعد الوقت في اليخت ثم تناولوا العشاء في احد المطاعم الشهيرة و اوصلها للمنزل علي وعد ان يكون علي اتصال دائم بها طيله فترة سفره
---------------------------------------------------------------
استيقظت سميرة لتصلي الفجر وجدت نور غرفة إبنها مازال شاعلا
طرقت الباب و دخلت
سميرة : انت لسة صاحي يا معتز
معتز : ايوة يا ماما مش جاي لي نوم
توجهت الي فراشه و جلست امامه
رتبت فوق كتفه بحنان
سميرة : آسيا بردو ؟؟
معتز (بتنهيده ) : نفسي تديني فرصة اثبتلها انا بحبها قد ايه
سميرة : يا حبيبي إنساها و شيلها من دماغك بقي
معتز : حاولت كتير و مش قادر
سميرة : يا ابني انت بتتعب قلبك علي الفاضي كده
معتز : نفسي افهم هي مش قبلاني ليه , فيا ايه مش عاجبها , ليه دايما بتصدني , انا نفسي تديني فرصة بس , فرصة واحده
سميرة : معتز فوق لنفسك كده , و متخليش حاجه تكسرك , انت زي الفل مفيش فيك عيب , بص لحياتك و ان شاء الله ربنا هيرزقك بواحده تستاهلك و تبادلك الحب و المشاعر , قلوبنا مش بإدينا يا ابني
معتز (بتنهيده) : صح قلوبنا مش بإدينا
سميرة : قوم يلا اتوضي و صلي الفجر و ادعي ربنا انه يهديك و يريح قلبك
قبل يد والدته في حنان
معتز : حاضر يا ست الكل
--------------------------------------------------------------
آسيا : مالك يا شوشو
شروق (بضيق) : مفيش
آسيا : أيمن بردو ؟؟
شروق (بحزن) : بقاله 3 ايام مسافر , مفكرش يكلمني فيهم غير مرتين مع إنه قبل ما يسافر وعدني انه هيبقي علي اتصال بيا دايما
آسيا : طب ما تكلميه انتي
شروق : لا خليه بقي لما يبقي يفتكر انه متجوز يبقي يكلمني
آسيا : والله مجنونه , يا بنتي جايز مشغول
شروق : مش قادر حتي يكلمني 5 دقايق يطمني عليه و لا يسأل عليا و لا اي حاجة
آسيا : معلش منعرفش ظروفه , كلميه و بلاش عند
انا لازم اقوم اروح بقي
شروق : ليه خليكي قاعده معايا شوية
آسيا : كفايه كده انتي عارفة ان بابا بيقلق لما بتأخر , ممكن ننزل بكرة شوفي كده و قولي لي
شروق : اوكي هشوف و اكلمك بالليل
عادت الي منزلها و اول ما فعلته ما ان اغلقت باب غرفتها عليها انها هاتفت آدم تطمئنه عليها
-وحشتيني..
نظرت الي الهاتف بذهول كأنها تتأكد من انها قامت بالاتصال بالرقم الصحيح
آسيا : آدم.. مالك ؟!
آدم : بقولك وحشتيني
آسيا (بخجل) : انا نزلت ساعتين و رجعت يعني
آدم : و انتي مستهونه بالساعتين دول
آسيا : آدم انت مالك النهارده ؟!!
آدم : مالي ؟!
آسيا : متغير كده و كل كلامك غريب
آدم : تقدري تقولي قررت ابقي صريح معاكي شوية اكتر
آسيا : مش فاهمه !
آدم : يعني انا دايما بكلمك عن مشاعري و اللي حاسس بيه بس مخبي عنك اهم احساس انا حاسه بقالي فترة و خلاص مش قادر اخبيه اكتر من كده
آسيا : انا مش فاهمه حاجة ! احساس ايه ؟!
آدم : احساس اني بحبك يا آسيا...
-----------
هوباااا القصه ابتدت كداااا
الحلقة العاشرة
عادت الي منزلها و اول ما فعلته ما ان اغلقت باب غرفتها عليها انها هاتفت آدم تطمئنه عليها
-وحشتيني..
نظرت الي الهاتف بذهول كأنها تتأكد من انها قامت بالاتصال بالرقم الصحيح
آسيا : آدم.. مالك ؟!
آدم : بقولك وحشتيني
آسيا (بخجل) : انا نزلت ساعتين و رجعت يعني
آدم : و انتي مستهونه بالساعتين دول
آسيا : آدم انت مالك النهارده ؟!!
آدم : مالي ؟!
آسيا : متغير كده و كل كلامك غريب
آدم : تقدري تقولي قررت ابقي صريح معاكي شوية اكتر
آسيا : مش فاهمه !
آدم : يعني انا دايما بكلمك عن مشاعري و اللي حاسس بيه بس مخبي عنك اهم احساس انا حاسه بقالي فترة و خلاص مش قادر اخبيه اكتر من كده
آسيا : انا مش فاهمه حاجة ! احساس ايه ؟!
آدم : احساس اني بحبك يا آسيا
صدمة ! , شعرت لوهله ان الهواء انحسر عن رئتيها و نبض قلبها توقف و ما لبث ان عاد و خفق بجنون
"بحبك يا آسيا"
ظلت هذة العبارة تتردد بداخلها و هي تشعر بإنتفاضه في جسدها كلما تكررت حروفها من جديد
شعر بها و بإضطراب انفاسها
آدم ( بصوت هادئ) : حبيبتي
آسيا (و قد افاقت من صدمتها قليلا ) : آدم انت بتقول ايه ؟!!!
آدم : بقول اللي حاسس بيه
آسيا (بصدمه) : يعني انت.....ازاي ؟!!
آدم (بهدوء) : انتي جميلة اوي يا آسيا , جميلة لدرجة ان مينفعش حد ميحبكيش اصلا
آسيا (بخجل) : آدم ...
اسكتها قائلا برقه
-عارفه انا يوم ما طلبت اشوف صورتك طلبتها عشان كنت عاوز اشوف فيها حاجه واحده بس
آسيا : ايه هي ؟!
آدم : عنيكي ! كنت عاوز اشوف عنيكي اوي , و لما شوفتهم شوفت فيهم برائة اطفال , شوفت فيهم جمال و سحر آسروني , شوفت فيهم حيره و ضياع مش عارف ايه سببهم
آسيا ( بدون وعي) : انت
آدم (بدهشة ) : انا ايه ؟!
آسيا : انت سبب حيرتي و ضياعي من ساعة ما عرفتك
آدم (بصدمة) : انا يا آسيا ؟!! طيب ليه ؟؟!
آسيا : شقلبت لي حياتي و بسببك اضطريت اكدب و اخبي و اعمل تصرفات انا مش راضية عنها !! انا قولت لك قبل كده انا طول عمري كنت عاقلة , خلتني متهوره و مجنونة , خليتني لاغيت عقلي تماما , عشان انا لو رجعت فكرت بعقلي شوية صغيرين بس هكتشف ان اللي احنا بنعمله ده اسمه عك
آدم ( بنفس الصدمة) : انتي بتقولي لي انا الكلام ده ؟؟!!
عك ليه يا آسيا , انا عمري ما اتعديت حدودي معاكي في الكلام
آسيا (بحده) : كلامناااااا ده اصلاااااا غلط كله غلط في غلط و جاي تكمل عليا دلوقتي و تقولي بحبك !!! طب ازاي قولي ؟!!!
خارت قواها و قالت بصوت ضعيف سمعه بصعوبه
-انا تايهه اوي , مش عارفه المفروض اعمل ايه مبقتش عارفه الفرق بين الصح و الغلط
آدم : آسيا صدقيني انا عمري ما قصدت اكون سبب في حيرتك و تعبك , انا مستحيل اعمل حاجة تأذيكي , انا مش طالب غير قربك , خليكي قريبه مني يا آسيا و اوعي تبعدي , انا روحي بقت متعلقه بيكي , بقيتي الهوا اللي بتنفسه
آسيا : انا مش قادره استوعب و لا اصدق اللي بتقوله ! طب المطلوب مني ايه ؟؟؟ اقولك و انا كمان ؟؟ آدم انا....انا معرفش عنك غير اللي انت بتحكيه و انت مبتحكيش كل حاجة اصلا , انت بتحكي اللي حابب تقوله بس مش اللي انا عاوزه اسمعه
آدم : قولت لك واحده واحده و انتي هتعرفي عني كل اللي انتي عاوزاه و هخليكي تشوفيه بنفسك
آسيا (بغضب) : اللي هو امتييييي ده ؟؟؟؟!!! انت عارف احنا بنتكلم بقالنا قد ايه ؟!! مش هفضل اتكلم مع المجهول كتير كده يا آدم !!
آدم : طيب ممكن تهدي و نتكلم براحه , اولا انا مطلبتش منك تقولي لي انا كمان بحبك , انا بكلمك عن احساسي انا زي ما اتعودت اتكلم معاكي دايما , انا مش عاوزك تقولي حاجة مش حساها يا آسيا , انا صارحتك عشان انا تعبااان و مش قادر اخبي احساسي جوه قلبي و اقفل عليه اكتر من كده , انا عارف انك لسة محتاجة مني وقت و مجهود عشان اقدر اخليكي تحسي اي حاجة من ناحيتي و انا صابر و هصبر بس لازم تبقي عارفه اللي في قلبي من ناحيتك جايز ده يساعدني في مهمتي شوية , ثانيا بقي انا بالنسبة ليكي مش مجهول زي ما بتقولي , مش عارف هتصدقيني ولا لا لو قولت لك انك اقرب حد ليا
آسيا : انت عارف انا ايه اللي تاعبني ؟؟
آدم : ايه ؟؟
آسيا : إحساس الضياع اللي انا فيه !! انا مش عارفه احدد انا ايه شعوري بالضبط من ناحيتك ! مش عارفه احدد ليه انا ببقي مبسوطة و مرتاحه و انا بكلمك , مش عارفه ليه رغم اني عارفه ان كلامنا بالطريقة دي غلط مش قادره اوقفه !! انا مش عارفه انا المفروض اعمل ايه ؟؟!!
آدم : اقولك انا
آسيا : قول
آدم : سيبي الوقت و المواقف بينا هي اللي تحددلك احساسك ايه من ناحيتي و بعدها .......
صمت قليلا ثم اكمل
آدم : بعدها وعد هتبقي كل حاجة واضحه قدام عنيكي و انتي عليكي الاختيار ,بس ارجوكي اديني شوية وقت كمان اقدر فيه ادخل جواكي
آسيا : انت عاوز تعلقني بيك يا آدم
آدم (ضاحكا بخفوت) : عاوزه تفنعيني انك لسة متعلقتيش يا آسيا
آسيا (بخفوت) : اتعلقت..للأسف اتعلقت اوي
--------------------------------------------------------------
في ولاية نيويورك الامريكية ..
يجلس أيمن في احدي البارات الشهيرة , يحتسي كؤوس الخمر كأس تلو الاخر الي ان اصبح في حاله سكر شديدة
اقتربت منه إحدي الفتايات و عانقته من الخلف بحميميه ,التفت اليها ينظر لها برغبه شديدة و استقام واقفا , حاوطها بذراعه و سار بها خارج البار و هي تضحك بخلاعه الي ان استقلا سيارته و انطلق بها نحو منزله
--------------------------------------------------------------
في تلك الاثناء كانت شروق تحاول الاتصال به لتخبره انها تريد الذهاب مع آسيا لحفل عيد ميلاد إحدي صديقاتهم لكن كالعاده ما من مجيب علي اتصالاتها
زفرت بضيق و القت بالهاتف فوق الاريكة بعنف و توجهت الي غرفه والدها
شروق (بغضب) : بابااا
محسن : بسم الله الرحمن الرحيم ! مالك يا بنتي في ايه ؟!
شروق : انا نازله مع آسيا هنروح عيد ميلاد واحده صاحبتنا في كافية في المهندسين
محسن : قولي لجوزك
شروق : بكلمه مش بيرد , مش هفضل انا قاعده مستنيه اما يتكرم عليا و يرد علي موبايله
محسن : جايز مشغول ولا مش سامعه , مينفعش تخرجي من غير ما تقولي له
شروق : انا كلمته 100 مرة و هو اللي مبيردش , مش ذنبي بقي
محسن : طيب حاولي تكلميه تاني و اهدي شوية
شروق (بضيق) : يا بابا انا زهقت بقي ده من ساعة ما سافر و هو راميني ولا بيسأل فيا و يوم ما بيكلمني بيبقي 5 دقايق يقولي ازيك عامله ايه و يقفل
محسن : معلش يا شروق الراجل مشغول و مش فاضي الله يكون في عونه الحمل كله بقي عليه لوحده دلوقتي رفعت مبقاش بيقدر يتابع الشغل زي الاول
شروق : و انا كمان مخنوقه و عاوزه اخرج
محسن : خلاص يا شروق روحي و خلي موبايلك معاكي لو أيمن كلمك في اي وقت و متتأخريش
شروق : احنا لسة بدري متقلقش
--------------------------------------------------------------
-ماماا انا نازله , شروق تحت اهي
سمية : اوكي يا حبيبتي ,خلي بالك من نفسك
هبطت الدرج و استقلت سيارة صديقتها
شروق : يا اهلا يا اهلا
آسيا : اتأخرتي ليه ؟
شروق (بضيق) : مفيش كنت بحاول اوصل لأيمن عشان اقوله اني خارجة
آسيا : و بعدين ؟
شروق : مبيرودش
آسيا : مممممممممم معلش جايز مشغول
شروق : مشغول مش مشغول براحته بقي
آسيا : يا بنتي افردي وشك ده بقي اكيد مشغول و اول ما يفضي هيكلمك
وصلوا الي الكافية و ترجلوا من السيارة
قضوا وقت ممتع الي ان تقدمت منهم صديقتهم سارة
سارة : يا جماعة اعرفكوا طارق صاحب هشام , هو اينعم جيه بعد ما طفينا الشمع و اكلنا التورتة بس معذور الدنيا كانت زحمه
طارق (ضاحكا) : كفايا سياح بقي و بعدين خطيبك هو اللي أخرني والله
سارة : هشام !! اخرك ازاي بقي و هو هنا من بدري ؟!!
طارق : اصل البية نسي الهدية اللي كان جايبهالك في البيت و انا اللي روحت جيبتها
اقبل هشام عليهم وجد الجميع في حالة ضحك شديدة
هشام (بدهشة) : مالكوا مسخسخين كده ؟!! ما تضحكوني معاكوا
شروق (ضاحكة) : اصل صاحبك سيحلك و فضح الدنيا
هشام : عملت ايه يا طارق الله يفضحك
طارق : انا !! معملتش حاجة خالص
سارة : كده تنسي هديتي في البيت يا باشمهندس ما انت لو مركز في عيد ميلادي زي ما انت بتركز في لعب البلاي ستيشن كده مكنتش نسيت هديتي و انا بردو استغربت طفينا الشمع و اكلنا التورتة و مفيش لا هدية و لا اي حاجة
هشام : الله يخربيتك يا طارق
طارق (ضاحكا) : البس يا معلم انا هروح اكل من التورتة اوعي تكونوا كلتوا نصيبي
سارة : كلنا التورتة كلها و مسيبنالكش حاجة
طارقة : بقي كده ؟!!! دي هديتك معاياا خلاص انسيها بقي
هشام : تنسي مييين يا عم ده تاكلك و تاكلني , هات هاات
اضفي طارق جو من المرح جعل الجميع في حالة ضحك مستمرة
--------------------------------------------------------------
هم الجميع بالرحيل و استقلت شروق و آسيا السيارة
شروق : اوووووف مش بتدور
آسيا : ييييييييه و ده وقته
شروق : مش عارفه مالها كانت كويسة
رأوا طارق قادم من بعيد بعد ان ابطل محرك سيارته
طارق : في حاجة يا بنات ؟؟
شروق : العربية مش راضية تدور
طارق : طب وريني كده
حاول طارق كثيرا لكن كل محولاته باتت بالفشل في ان يجعل السيارة تدور مرة اخري
طارق : مش راضية تدور , سيبيها هنا و تعالوا اوصلكوا و نبقي نبعت حد ياخدها
آسيا (بإحراج) : مش عاوزين نتعبك
طارق : لا تعب ولا حاجة , اتفضلوا
استقلت آسيا و شروق سيارة طارق و قاموا بتوصيل آسيا اولا و لم يتبقي في السيارة سوي طارق شروق
طارق : قولي لي انتي بتشتغلي ولا بتدرسي ؟؟؟
شروق : لا انا خريجة حقوق , بشتغل في شركة OutLook للدعايا و الاعلان لو تعرفها
طارق : اه طبعا اعرفها دي معروفة اوي مع ان مبقلهاش كتير في مصر , انتي بتشتغلي في الشؤون القانونية اكيد صح ؟؟
شروق : ايوة
طارق : ربنا يوفقك , و انا يا سيتي خريج تجارة و بشتغل في ال HSBC
شروق (ضاحكة) : بنك
طارق : اه ماله البنك
شروق : مالوش بس الصراحه شكلك ميديش علي بنك ابدا
طارق (ضاحكا) : عشان مجنون يعني يا سيتي كل مكان و ليه طريقة التعامل اللي تليق بيه انا في الشغل ببقي شخصيه تانية خالص
شروق : كويس انك بتعرف تفصل كده
طارق : انتي مرتاحه في شغلك ؟؟
شروق : اه الحمدلله
طارق : اصلي بسمع ان صاحب الشركة مسلم كل حاجة لأبنه و لبنه صعب اوي في شغله ممشي الناس كلها علي عجين ميلخبطهوش
شروق (بضيق) : ايوة فعلا هو أيمن صعب في الشغل شوية بيحب شغله جدا
بس في حياته الشخصيه مش كده
قالتها كاذبه كأنها تحاول اقناع نفسها ان تك هي الحقيقة
نظر لها طارق بدهشة , كيف لها ان تعرف عن حياته الشخصية ؟!!
شروق : أيمن يبقي جوزي علي فكرة
طارق (بدهشة) : جوزك !!! انا.. انا اسف مش قصدي حاجة..
ثم نظر بطرف عينه الي يدها اليسري
- انا حتي مأخدتش بالي من الدبلة في ايدك
شروق : لا محصلش حاجة ولا يهمك
اوصلها الي منزلها
شروق : ميرسي اوي معلش تعبتك
طارق : لا تعبتيني ولا اي حاجة و متقلقيش علي العربية انا هبعت حد يجيبهالك
شروق (بابتسامه) : ميرسي اوي يا طارق
--------------------------------------------------------------
صعدت الي شقتها وجدت والدها و شقيقتها يشاهدان التلفاز
شروق : السلام عليكم
محسن : وعليكم السلام و رحمة الله و بركاتة
شيرين : جيبتي لي حاجة اكلها معاكي
شروق : لا مجبتش حاجة و انتي علي طول همك علي بطنك كده
محسن : جوزك كلمك ؟؟
شروق (بإبتسامة ساخرة) : لا و لا الهوا , عن اذنكوا هدخل اغير هدومي
دلفت الي غرفتها و سمعت رنين هاتفها
- ايوة يا آسيا
آسيا : ايوة يا شوشو روحتي ؟؟
شروق : اه لسة واصله اهو
آسيا : طارق ده جدع اوي
شروق (ضاحكه) : فقري يخربيته ضحكني ضحك
آسيا : صاحب هشام عاوزاه يكون ازاي يعني
شروق : علي رأيك كلهم مجانين
آسيا : أيمن كلمك ؟؟
شروق ( بضيق) : يادي أيمن .. لا مكلمنيش و مش هيتكلم
آسيا : ليه يا بنتي كده هتلاقيه مشغول بس و راعي فرق التوقيت كمان
شروق : عادي يا آسيا بقي بقولك ايه متعكننيش عليا انا مصدقت فكيت
آسيا : خلاص خلاص انا كنت بطمن انك وصلتي بس
--------------------------------------------------------------
اغلقت مع صديقتها و فتحت اللاب توب الخاص بها وجدت طلب صداقة من آدم
قبلته و هي تبتسم بسخرية
وجدته اون لان
آسيا : بقي كل دة و مكنتش لسة عملتلي ادد يا عم المتخفي
آدم : هههههههههههههههههههه قولت معملش ادد لا تقفشي مني ولا حاجة بس خلاص بقي
و بعدين تاني متخفي
آسيا : ما انت اكاونتك مش باين له ملامح !! لا اسم و لا صورة ولا اي حاجة
آدم : هههههههههههههههه تمويه تمويه
آسيا : لا بجد انت معندكش غير الاكاونت الغريب ده ؟!
آدم : كان عندي واحد تاني بس قفلته
آسيا : ليه ؟
آدم : يعني كنت بحس بجو fake اوي كده و مجاملات فاضية و ناس لابسة 100 وش فكرت دماغي و قفلته
آسيا : مممممممممممممم طيب و الاكاونت ده مش عليه حد ؟؟؟
آدم : كام حد من صحابي بس
آسيا : ولاد ولا بنات ؟؟ انت حتي قافل ال friends !
آدم : انتي بتغيري ولا ايه ؟!!
ارسلت له وجها غاضبا
آدم : هههههههههههههههههه خلاص خلاص بهزر , لا ولاد يا ستي مفهوش بنات خالص
آسيا : ممممممممممممممم
آدم : مكلمتنيش ليه اول ما رجعتي ؟؟
آسيا : كنت بكلم عمر اتصل بيا اول ما روحت
آدم : طيب كويس كان بقاله مده مكلمكيش
آسيا : وحشني اوي اصلا قال هينزل قريب
آدم : ان شاء الله , قولي لي
آسيا : مممممممممممم
آدم : اسمها نعم بطلي مممممممممم دي بكرهااا
آسيا : ههههههههههههههه خلاص بلاش , نعم
آدم : احكي لي عملتي ايه في عيد الميلاد
آسيا : مفيش شوفنا صحابنا بقالنا كتير مشوفناهمش و ضحكنا و هزرنا في واحد صاحب هشام خطيب سارة مسخرة موتنا من الضحك و كتر خيره اتقذنا و روحنا البيت عشان عربيه شروق عطلت
لم يرد عليها
همت بالكتابة له من جديد الا انها وجدته يتصل بها علي هتتفها
آسيا (بدهشة) : ايوة يا آدم
آدم (بغضب) : ضحكتي و هزرتي و موتك من الضحك و كمان روحك ياااااا مشاااااء الله
آسيا (بذهول) : انت بتكلمني كده ليه ؟!!!
آدم (بصوت عالي ) : عشان انتي بتستهبلييييي
آسيا (محذره) : آددددم خد بالك من كلااامك
صمت و طال صمته
تسرب القلق الي قلبها
آسيا (بهدوء) : آدم
اجابها بصوت مذبوح
- نعم يا آسيا
آسيا (بدهشه لنبرة صوته) : حصل ايه لكل ده ؟!!
آدم (بضيق) : مفيش يا آسيا انا اسف اني اتعصبت عليك بس..انا...
آسيا : انت ايه ؟؟؟
آدم : انا مش عارف ده من حقي دلوقتي ولا من حقي اصلا ولا لا بس.. انا بغير اوي يا آسيا !! اووي.. فوق ما تتصوري
لم يري تلك الابتسامه التي ارتسمت لا إراديا فوق شفتيها
آسيا : من ايه ؟؟
آدم : من الهوا !
آسيا : انا بتكلم جد
آدم : و انا بتكلم جد
آسيا : هوا ايه ده ان شاء الله
آدم (بتنهيده) : عندك استعداد تسمعي اني بحبك تاني ؟؟؟
آسيا (بخجل) : احنا هنرجع للموضوع ده تاني
آدم : بحبك يا آسيا و بغير عليكي و حتي لو مش حقي بس ارجووكي راعي شعوري , ممكن ؟؟
آسيا (بإستسلام) : ممكن
آدم : طيب وريني صور النهاردة
آسيا : يخربيت الصور اللي عملالك جنان دي
آدم : عيني بتحب تشوفك
آسيا : احم لا كده مش هينفع بص .. انا هبعت لك صورة واحده علي الواتس اوكي
آدم (ضاحكا) : خليهم اتنين طيب
آٍسيا : لا واحده و يلا اقفل بقي عشان ماما بتناديني عشان نتعشي
آدم : هكلمك تاني بليل اسمع صوتك قبل ما تنامي
آسيا : ماشي , يلا اقفل بقي
آدهم (ضاحكا) : ماشي سلام يا سيندريلا و متنسيش الصورة
اغلقت معه و قلبها يخفق بجنون كاد ان يحطو اضلعها
" عيني بتحب تشوفك "
امسكت بدفترها الوردي و خطت فيه كلمات خرجت من صميم قلبها ..
" تعلقت بك.. تعلقت بشخص مجهول.. غامض.. يخيفني غموضك..يروق لي وجودك بجانبي..يريحني قربك.. ينتسم لك قلبي و ينبض بعنف كلما سمع صوتك ! سرقتني مني و لا اعلم كيف .. لا اعلم و لا ادرك حقا .. لكن الشيء الوحيد الذي اعلمه هو ان قلبي اصبح يحب ان يدق لك انت .. وحدك "
يتبع
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق