رواية دماء بريئه على الطريق الفصل الأول والثاني والثالث والرابع والخامس بقلم ولاء حامد
رواية دماء بريئه على الطريق الفصل الأول والثاني والثالث والرابع والخامس بقلم ولاء حامد
الفصل الأول
في احد القرى الريفيه تجلس امراءة مع زوجها على المصطبه امام المنزل
والله يا حاج البت سمر كبرت وادورت وخرطها خراط البنات
مسعود: قصدك إيه يا وليه
نعميه: يا اخويا قصدي ان البت ان الأوان بقى انها تتستر وتروح بيت عدلها
مسعود بغلظه: اتجننتي يا وليه بنتك لسه صغار دي عيله محابتش ال 15 سنه
نعميه: يا اخويا انتا اللي قلبك روهيف دانا متجوزاك وانا أصغر منها بسنتين كنت لسه بنت 13 فيها ايه يعني وبعدين داه سلو البلد وفي الزمن داه البت ملهاش الا بيت جوزها وسترت الولايه بدري حلوه في الزمن اللي ما يعلم بيه الا ربنا داه
مسعود: بردوا بنتك غاويه علام سيبيها ومالكش صالح بيها
نعيمه: ياراجل بلاش تقويها وبعدين تروح على مصر عشان تخش الجامعه وهناك تعرف واحد مسبسب بيلعب بالبيضه والحجر يلف عليها وتجيبلنا العار
مسعود بتشتت: قصدي ايه لا طبعا بنتي متربيه وتعرف ربنا
نعيمه: يا اخويا مقولناش حاجه بس الدوي على الودان أمر من السحر وبتوع مصر دول ليهم في كل حاجه وبنتك لسه على نياتها ومتعرفش السما من العما خلينا نسترها بدري
مسعود بشرود: سيبيها على ربنا واللي ربك عايزه هايكون
نعيمه: طيب براحتك
وتركته عائده لداخل المنزل
عند سمر وهي راجعه من المدرسه برفقه مجموعه من اصدقائها مرت على قهوه بلدي يجلس عليها بعض الشباب
أحد الشباب ويدعى جمال وهو ابن أحد كبار تجار البلد لصبي القهوه
جمال: الا قولي ياض مين البت ام فستان رصاصي دي
صبي القهوه بعد ان نظر إليهم قصدك اللي لابسه طرحه بيضا وشنطه سودا
جمال: ايوه هي عليك نور
صبي القهوه: دي سمر بنت مسعود ابو شامه أبوها اللي عنده الارض البحريه اللي يمه مضرب الرز
جمال: عندها كام سنه دي
صبي القهزن: معرفش بس دي لسه صغار وباين عليها لسه في المدرسه
جمال بعد ان علم ما يريد :طيب خلاص انتا هتصاحبني روح هاتلي شيشه بسرعه
صبي القهوه: حمامه ونادى بصوت عالي وعندك واحد شيشه وصلحه لسيد المعلمين
عادت سمر إلى المنزل
سمر بحب: سا الخير يا أبا
مسعود: سا النور يا قلب ابوكي ها عامله ايه
سمر : بنتك بتطلع البريمو والسنه دي كمان هاطلع البريمو على المدرسه كلها
مسعود :ويا ترى نفسك في إيه يا قلب أبوكي
سمر: نفسي ابقي دكتوره قد الدنيا عشان اعالج الناس اللي هنا الناس هنا غلابه يا أبا ومحيلتهمش اللضا
مسعود: ربنا يكتبلك اللي فيه الخير
قطع كلامهم نعيمه : انتي جيتي يا اختي يلا يا مقصوفه الرقبه قدامي عشان تكملي تجهيز الأكل اهو تتعمليلك حاجه تنفعك في بيت جوزك بدل العلام اللي واكل نفوخك
سمر: حاضر يا أما هاغير واجي وراكي فوريره
ذهبت سمر سريعا وقامت بتبديل ملابسها الي ملابس بيتيه ورتبت ملابس المدرسه وذهب إلى والدتها وقامت بمساعدتها في تجهيز الطعام إلى أن عاد الجميع من أعماله وتجمعت الأسره لتناول الطعام الأبناء وزوجاتهم والأب والأم والأخت
بعظ إنتهاء الطعام قامت سمر لتذهب
نعيمه بصوت عالي: رايح فين يا بت صبني المواعين وشطبي المطبخ الأول
سمر: يا أما أنا ورايا مذاكره عندي بكره إمتحان في الفصل
نعيمه بشخطه: بلا علام بلا زفت خدنا ايه منه غير وجع الراس يلا يا بت اعملي اللي بقولك عليه
سمر :حاضر يا أما
وتركت امها وذهبت إلى المطبخ ونفذت ما امرتها به والدتها وظلت ساعتين تنظف الفوضى الموجوده بالمطبخ وبعد ساعتين ذهبت إلى غرفتها وقامت بتغيير ملابسها المتسخه إلى ملابس اخرى نظيفه وجلست تذاكر بجد واجتهاد لتحقيق حلمها
لا تعلمي يا صغيرتي ما يخبئه القدر لكي في جعبته
حل المساء وذهب الجميع للخلود إلى النوم ولكن بقت سمر على وضعها تذاكر بجد واجتهاد
قم مسعود في منتصف الليل ليجد غرفه ابنته مضاءه فتح الباب ليجد ابنته تفترش الارض بكتبها
مسعود بحنان ابوي: ايه يا قلب ابوكي اللي مسهرك لنص الليل
سمر: بذاكر يا أبا عندي امتحان بكره ولازم ولابد بنتك تطلع البريمو زي كل مره
مسعود: ربنا يكتبك اللي فيه الخير بس حاولي تناميلك ساعتين عشان تصحي فايقه
سمر : متخافش بنتك عفيه واستحمل يا أبا
مسعود: ربنا ييسرلك كل أمر عسير يا بنتي
سمر بإبتسامه بريئه ووش ضاحك: يارب عايزاك تدعيلي
كده بضمير ومن قلبك هاا
مسعود بهزه رأس ورضا: طول عمري داعيلك يا بت دانتي اخر العنقود وحته من قلبي يعلم ربنا يا ضي عين ابوكي ان محبتك وغلاوتك اكتر من اخواتك كمان ربنا يسعدك يا قلب ابوكي دنيا وآخره
سمر بضحكه عاليه ظهرت كل أسنانها طلعت جري في حضن ابوها: ربنا يخليك ليا وما ننحرمش منك ابدا يارب
مسعود: شدد على حضنها اوووي اووووي
يلا اسيبك تكملي اللي في ايدك وعايزك دايما رافعه رأس ابوكي انتي الوحيده دون عن اخوانك كلهم اللي غاويه علام ودامغك زي البرلنت في المدرسه
سمر بفخر: تربيتك يا أبا
مر الليل بطوله وبطلتنا الصغيره بتذاكر بضمير لحد ما رفع الجامع الكبير صوت آذان الفجر
ومعاها بدئت الحركه تدب في البيت
طلع مسعود ويتبعه نعيمه في الخروج من غرفتهم
نعيمه بشهقه عاليه وخبطه على صدرها : يالهوي البت بنت ال ..... مخموده وسايبه نور الأوضه والع طيب ويمين الله لنسر الشبشب على جتتتها نساير نساير
مسعود بعدم استيعاب: يا وليه اتهدي بقى البت تلاقيها نامت من التعب ماهي يا قلب ابوها من المدرسه تيجي تعملك شغل البيت كله انتي وحريم أولادك وتشيليها هم
تشطيب المطبخ وتدخل تكمل مذاكرتها عشان تعيد الكره دي كل يوم وصعبان عليكي في عز تعبها انها نامت والنور والع يا وليه لولا انها مولوده على ايديا لكنت قولت انك مرات ابوها مش امها ولا اتبدلت في المشتشفى خفي على البت شويا ارحمي يرحمك ربنا
نعيمه بقلبه وش: والنبي يا اخويا ما مبوظ البت دي غير دلعك فيها وآخرة العلام والمصاريف دي كلها ايه مهي اخرها بردوا مسيرها تتجوز وتروح بيت عدلها يبقى بدل الهري الفاضي تتعلم شغل البيت وتوفر الفلوس لشوارها
مسعود بعصبيه: ليه مش لاقيين اللقمه لما هاتعدي على البت القرش وفلوس ايه يا ام فلوس دي يادوب مصاريف المدرسه والبت دماغها نضيفه مبتاخدش بشلن درس بتذاكر في البيت وشغل البيت البت قشاط فيه زي البلبه فيه من كافه شي
نعيمه: سيبني انا وبنتي نصطفل
رمت كلامها وسابته وزقت الباب على بنتها
سمر بخضه: في ايه يا أما
مسعود بصدمه: انتي لسه صاحيه لحد دلوقتي
سمر: ايوه يا أبا كنت هاخلص بس اللي في أيدي وأقوم اصلي واناملي ساعتين كده قبل المدرسه
مسعود: روحي صلي يا بنتي ربنا يرضى عليكي ونامي مش بتقولي عندك امتحان
سمر :ايوه منا خلاص خلصت كنت بحل في اخر مسأله بس وهاقوم اهو
نعيمه بتلويه بوق يمين وشمال: بقى يا مقصوفه الرقبه طول الليل والنور والع وانا اقوم فاتوره الكهربا بتيجي شيئ وشويات ليه اداريه من الهانم طول الليل طيب يابنت بطني تصلي وتدخلي المطبخ تجهزي الفطار وتطلعي تنادمي على اخواتك واتستني لما يخلصوا وتشطبي المطبخ وابقى روحي يا اختي المدرسه اللي وراكي
سمر بتعب: يا أما هنام ساعتين إمبارح فضلت لبعد العشا بعشا لما خلصت المطبخ وكل واحده من حريم اخواتي كلت وطلعت شقتها
نعيمه بشخطه: هي كلمه يابت يا أما عظيم بالله احلف منتي رايحه المدرسه ولا مخطياها برجلك
سمر بدموع: حاضر يا أما
مسعود طول الوقت سامع وساكت ومره واحده: وايه كمان يا مرا بتحلي وانا واقف طرطور ولا شوال قدامك طيب يمين بالله ماهاتمد ايدها في لقمه اليوم بطوله قومي يا شملوله انتي وحريم عيالك مش عشان تريحي أولاد اخواتك تخدمي بنتي ليهم هي كلمه ومش هاتنيها قومي صلي يا بنتي وادخلي نامس وانا اللي هاصحيكي كمان ساعتين ولا تلاته توكلي على الله
وبص لمراته بحسم وشر في عنيه وانتي فزي نتوضى ونصلي فرض ربنا مع بعض مع بنتك يمكن ربنا يهديكي
على بنتك وتنادمي على حريم عيالك كل واحده تخف نفسها يا اختي بدل مهما عجلو من كتر القعده والخدمه وتجهزوا الفطار واديني قاعد منيش رايح الغيط انهارده وأما نشوف
قالهم وزق مراته من كتفها قدامه عشان تتحرك
نعيمه مشيت وهي متغاظه من جوزها اللي نصر بنتها عليها
هي شايفه زيها زي اي ام ان البنت مسيرها لبيتها وجوزها وللأسف من العقليه اللي بتفضل الولد على البنت وزاد انها جوزت أولادها لأولاد أخواتها وللأسف اللي بتدفع التمن عي بنتها لوحدها ولسه دفع التمن مخلصش ومش هايخلص بسهوله
...... يتبع فيما بعد
الفصل الثاني
مشيت نعيمه وهي متغاظه من جوزها اللي دايما ناصر بنتها عليها واقوي شوكتها طلعت اتوضت وكانت بنتها اتوضت ولبست عبايتها وحجابها الطويل ووقف مسعود إمام وخلفه زوجته وبنته وبداء في الكلام بالتكبير
ومر بعض الوقت إلى أن انتهى الجميع من الصلاه
جلست سمر بجوار والده تسبح بأذكار الصلاه
مسعود بحب: قعدت ليه يا ست البنات مش هاتقومي تنامي
سمر بإبتسامه بريئه على وشها الطفولي: هاخلص تسبيح واقوم انام بس امانه عليك تصحيني على 7 عشان الحق المدرسه ها يا أبا
مسعود شاور على عنيه: من عنيا الجوز
وقامت نعمه مخنوقه من عمايل جوزها وبنتها اللي شايفه انها على صواب في تربيه بنتها زي ما اتربت ان البنت ملهاش خروج ولما تبلغ تتجوز ومسيرها لجوزها وبيتها وبس وان التعليم ملهوش لازمه وبيبوظ الدماغ
قامت على المطبخ وكل الأفكار دي بتدور في دماغها
جهزت الأساسيات وطلعت تصحي حريم أولادها الرجاله اللي بيناموا ويصحون ياكلوا ويطلعوا وينزلوا يتغدو ويطلعوا ويطلعوا وينزلوا يتعشوا ويطلعوا وسمر قايمه بخدمه الكل حتى امها بتجبرها تطلع تنضف شققهم بحجه انهم متجوزين ومعاهم عيال وهي قاعده ومورهاش حاجه
طلعت ورنت جرس اول شقه بعد معاناه صحيت مرات ابنها الكبير مصطفي واسمها نورا
نورا بعنين مقفله وشعر يكاد يكون منكوش : خير يا خالتي حد يرن على حد من النجمه الدنيا طارت
نعيمه بعوجه بوق: قومي يا اختي انزلي معايا ايدك بإيدي على ما اصحي بقيت الحريم نجهز الفطار
نورا ببوادر صحيان: ليه يا خالتي اومال سمر فين ولا هي هاتقعد هانم واحنا نخدمها
نعيمه: سمر جوز خالتك يا عنيا حكم ومتعملش حاجه انهارده خلصي وانزلي يا اختي منك ليها مش هانفضل اليوم بطوله نناهد قصاد بعض
نورا بقلبه وش: والسنيوره بقى هاتقعد نبطط عليها جله يعني ولا إيه
نعيمه وهي بتتحرك عشان ترن شقه ابنها التاني محمود ومراته شروق: لا يا أختي خليها كلها يوم ال علام ال خدنا منه إيه غير خوتت الراس
فتحت شروق وحالها كحال نورا: خير يا عمتي في ايه ع الصبح كده
نعمه بنفس الاسطوانه: انزلي حضري معايا الفطار ومن غير لت كتير نورا تبقى تقولك اللي حصل
رمت الكلمتين وطلعت الدور اللي من فوقهم ورنت الجرس على جلال ابنها ومراته هاجر
وفتحت هاجر بنفس وضع سلايفها: خير يا خالتي في ايه الدنيا اتهدت ولا ايه
نعمه: قالت نفس الكلمتين انزلي جهزي الفطار معايا ومع سلايفك ونورا هاتبقى تحكيلك
وسابتها ورنت الجرس على ابنها الصغير حسن ومراته ليلي
فتحت ليلي وهي لابسه جلابيه ضيقه وشعرها زي زعافه السقف من خشونته وشكلها يغني عن الكلام
نعيمه بخضه: أعوذ بالله من الشيطان الرجيم إيه يا بت الشكل اللي يقطع الخلف داه على الصبح قومي يا اختي طسي وشك بشويه ميه وحطي الشارب على راسك تداري الكدش داه وانزلي مع سلايفك نجهز الفطار
واتحركت وهي بتعوج وبوقها يمين وشمال: الله يعينك يا ابني على ما ابتلاك دانا كاست اتخضيت اومال انتا اللي بتتصبح وبتتمسى بشكلها داه صحيح يدي الحظوظ لمكتكتين الروس يلا بلا وكسه
نزلت نعيمه وهي شايطه على اخرها: اومال ست الحسن والجمال فين
مسعود بهزه راس: يا وليه هو مفيش فايده فيكي بنتك زعلتك في ايه داه بيقولو البت حبيبة امها انتي ليه كرهاها كده
نعيمه بشهقه: مفيش ام بتكره ضناها بس انتي مفرعن البت دي علينا
مسعود: يا وليه حرام عليكي فين داه دي بتخدمكم كلكم من كبيركم لصغيركم ومفتحتش بوقها بتريحي بنات اخوكي واختك على حساب صحتها وراحتها ومابتقولش بم وبردوا مش سيباها في حالها عارفه يا نعيمه مش هااتحسي ببنتك الا بعد فوات الأوان البت دي ذنبها في رقبتك وعلى العموم يا ستي بنتك دخلت تريح ساعتين وهاتقوم تروح مدرستها قومي يا نعيمه قومي شوفي اللي وراكي واللي بنتك العيله شيلاه في البيت يمكن تحسي بيها
قامت نعيمه وهي بتبرطم: الله يقطع البنات وخلفه البنات ال يا مخلفه البنات يا شايله الهم للممات بلا وكسه
مر الوقت بسرعه طويله وقعد الكل على الفطار
جلال :اومال فين البت سمر محدش لمحها ولا سامعلها حس
نعيمه: نايمه يا اخويا ناااااايمه اصل الست هانم سهرانه لوش الصبح ال ايه بتذاكر
جلال: وهي المذاكره حبكت لوش الصبح يعني
مسعود: لا يا ابني اختك أمك حكمت عليها تنضف المطبخ بعد الفطار والغدا والعشاء لان كل واحد بياكل ويطلع شقته وهي بتيجي تطبخ وتغرف وتدخل تخبط المطبخ وتدخل بعدها تذاكر كفرت
جلال :لا يا حج بس يعني ساعه ولا ساعتين مش للصبح
مسعود: عندها يا ابني امتحان وقالت هنام ساعتين ولا تلاته وتقوم تروح مدرستها
هاجر بخبث: ولزومه ايه يعني يا عمي العلام غير خوات رأس ورايحه المدرسه جايه من المدرسه ووقت ضايع اقله في البيت هاتتعلم حاجه تنفعها بدل مضيعه الوقت على حاجات فارغه ومهما عملت ولا راحت ولا جت مسيرها لبيتها يعني هايخدها راجل على الجاهز
مسعود بحسم: بنتي وانا حر فيها محدش قال لابنك ميودكيش مدرسه وابوكي اصلا قعدت لأنك كنتي خايبه فيها بعد ما سقطي 5سنين في الإبتدائي انما بنتي وكمل بفخر ونفخه صدر بتطلع البريمو على كل زملاتها في المدرسه ورافعه راسي
عم الصمت المكان والكل النار شبت جواه من حمايه مسعود لسمر
مر الوقت وجات الساعه 7 الا خمسه قام مسعود ودخل اوضه بنته وبكل حب وحنان هزها بخفه: قومي يا ست البنات الساعه 7 الا خمسه عشان تفوقي كده قوام
سمر وهي بتحاول تفتح عنيها بصعوبه: اصباح الخير يا أبا
مسعود بإبتسامه: صباح النور على البنور قومي يا ست البنات يلا
قامت سمر بصعوبه ودخلت الحمام غسلت وشها واتوضت ولبست مريله المدرسه اللي هي دريل طويل بكم وواسع ولبست طرحتها وصلت ركعتين الصبح وخدت شنطتها وطلعت بصوت فرحان: أما أنا هامشي
نعيمه: غوري يا اختي في داهيه بلا هم
سمر بكسره: مع السلامه
مسعود: استني يا بت خدي دول
سمر: معايا والله ياأبا انتا بتديني كتير وانا مش بصرفه
مسعود: عدي هاتيلك شندوتش تقولي بيه متروحيش على لحم بطنك الا تسورقي في المدرسه
سمر بطاعه: حاضر يا أبا مع السلامه
سابتهم واتوكلت على الله حاضنه شنطتها وماشيه طول الطريق وشها في الارض مبترفعهوش وعدت تاني على القهوه بس كانت قافله
في البيت عند نعيمه ومسعود طلع يطل على الأرض قبل ما سمر ترجع
ونعيمه طول اليوم وهي بتعمل شغل البيت هي وحريم أولادها والكل عمال يدعي على سمر على بهدلتهم
نعيمه قعدت بتعب: يجيك ويحط عليكي يا سمر يابنت بطني اااه يا مين ينولني رقبتها وانا اطبق فيها البت عيارها فلت ال رايحه المدرسه جايه من المدرسه لما خابت واتوكست وبكره تقعد في اربيزي زي عمل الردي وتبور ومتلاقيش كلب اجرب يرضى بيها
ليلي بسم وخبث: يا خالتي مهي امي قالتلك انها عايزاها لعزت اخويا وعمي مرضيش وعزت كسيب وملو هدومه وعنده بيت لوحده غير بيت ابويا
نعيمه: منا قولت لعمك الحاج يا اختي ومرضيش
ليلي بشهقه: ليه بقى ان شاء الله ماله عزت زينه الشباب والف مين يتمني نسبه
قطع كلامها مسعود اللي دخل وسمع كلامهم: اقولك ماله من كتر عشرته البهايم بقى بيتعامل مع الكل على انهم حيوانات بيتكلم بإيده مش بلسانه اكبر منها ب 15 سنه ومطلق مرتين اكتر واحده اتحملته 3 شهور وطلعت بعاهه مستديمه
ليلي بمكابره ومدح في اخوها: والله داه راجل والراجل ميعيبهوش الا جيبه والعيب على اللي اتجوزهم مهي العاقله تعيش ولو وسط النار
مسعود: اللي يدور على جيب الراجل قبل أخلاقه يبقى جيعان وانا لا جيعان ولا بنتي يعيبها شي ولو على العقل افكرك لما جوزك مد ايده عليكي انا اللي وقفتله واتصدرتله وروحتي بيت ابوكي وخربتي الدنيا يا عاقله يا ام العقل بعد كده لما يكسر عضمك زي ما اخوكي عمل هابقى اقولك الكلمتين الخايبين اللي قولتلهم من شويه وسابهم ودخل اوضته وهو بيستغر ربنا من عمايل مراته وحريم أولاده اللي للأسف بقوا نسخها منها على الأسواء
عند سمر وصلت المدرسه وبداء الإمتحان سمت بالله وبدائت تركز وفعلا قبل مرور نص الوقت كانت خلصت الإمتحان وقعدت تراجع
جات ميس اماني جمبها: ايه يا سمر خلصتي
سمر بهزه راس: ايوه ايوه ابله خلصت داه الإمتحان سهل خالص وانا ذاكرت كل داه إمبارح والحمد لله كله طلع سهل
هزه ميس اماني رأسها بهدوء وطبطبت على كتفها :بالتوفيق انتي هايبقى ليكي مستقبل باهر وهاتكوني حاجه كبيره ان شاء الله
سمر بتمني: نفسي ابقى دكتوره علشان اعالج الناس هنا عشان المستشفى اللي هنا محدش بيهتم بالناس والناس غلابه ممعاهومش يروحو مستشفى تانيه ولابتوب مخصوص
اماني: اسعي دايما لحلمك
وسابتها وبدئت تلف في الفصل
هبه زميلته بصوت واطي بس بسبس بت يا سمر
سمر بصت جمبها: وهزه رأسها ايييه
هبه: السؤال التاني بتاع الجبر النظريه بتاعته كانت ايه
سمر كشرت وشها :مش بغش ولا بغشش حرام وحطتت وشها في الورقه
هبه بغيظ: ماااشي يا بنت ال بتترسمي عليا عشان شاطره
مر الوقت وخلصت سمر يومها وروحت البيت ومرت على القهوه وهي حاضنه شنطتها ووشها في الارض
جمال اول ما لمحها فضل باصص عليها وعنيه مفارقتهاش لحد ما اختفت
الفصل الثالث
وصلت سمر البيت لقيت ابوها قاعد على المصطبه قدام الباب وفي ايده المصحف ومنتبهه ليه جدا
سمر بحب: سا الخير يا أبا
مسعود: صدق الله العظيم
سا الفل والورد والياسمين على عيونك الحلوين هاا طمنيني
سمر بفخر :عيب عليك بنتك بعون الله محدش يقدر يغلبها قول يارب
مسعود :يارب ادخلي غيري ونامي ريحي جسمك أمك انهارده أشغال شاقه هي وحريم اخواتك
باست سمر ايد ابوها : ربنا يخليك ليا بس بلاش والنبي تقف لأمي علشان بيطلع على عيني وانتا غايب والله امي طيبه وقلبها زي الحليب بس عصبيه شويه بس من خوفها عليا والله وعارفه ان دماغها زي كل أهل البلد انها تجوزني وتسترني
مسعود: ربنا يكملك بعقلك
دخلت سمر ولقيت أمها وحريم أخواتها لأول مره في المطبخ دخلت اوضتها وحطت الشنطه وغيرت هدومها وعلقت هدوم المدرسه وطلعت لأمها
سمر بإبتسامه طفله: سا الخير يا أما اطلعي ارتاحي وانا هاكمل
نعيمه بصتلها ومردتش
نورا بخبث وتقصعه وهي ايديها في وسطها: لا وعلى ايه روحي كملي نوم ياسنيوره لحسن ابوكي يدخل يسم بدنها زي ما عمل في ليلي من تحت راسك
سمر بصدمه: من تحت راسي ليه انا عملت ايه
نورا: صحيح البجاحه يا اختي ليها ناسها
نعيمه بصت لسمر بغضب: اخفي من وشي يا جلابت المصايب وغوري في اي مصيبه تاخدك لما نخلص الطفح
سمر عنيها دمعت ومشيت مكسوره وموجوعه من أمها اللي دايما كاسره نفسها وخلتها ملطشه لكل البيت
خلصت نعمه الغدا وطلعت كل واحده تنادي جوزها واتجمعت كل العيله على الطبيله في الصاله وبداء الكل ياكل نعمه وزعت اللحمه وحطت حته كلهاوابيض لسمر
سمر بصت للحمه وسكتت لان أمها عارفه انها مبتاكلش اللحمه البيضا او الملبسه
الكل اتشغل في الأكل
مسعود بص على بنته لقلها بتاكل رز وطبيخ ومنابها راقد زي ما هو : كلي منابك يا سمر
سمر :حاضر يا أبا باكل اهو
مد ايده خده من قدامها وبص لقيه دهنه
بص لنعيمه بغضب : من أمته يا ام الرجاله وسمر بتاكل الدهن
نعيمه بتبرير: من انهارده يا حاج اهو يمكن ربنا ينفخ في صورتها وتتخن شويه بدل مهي مسلوعه وعامله زي البرص اللي مضروب بالشبشب
الكل ضحك وليلي بلؤم: والنبي يا خالتي عندك حق من هنا وجاي هانبقى نقولك يا سمر برص
سمر دموعها غلبتها ومقدرتش تبلع اللقمه اللي في بوقها
حسن بغضب: والنبي يا اختي انتي اخر واحده تتكلمي اللي ما فيكي حاجه عدله سمر من يوم يومها وهي فلقه من القمر شعر زي الحرير هااا مش طبق مش بدوده جسم زي بتوع التلفزيون مش كرش الحامل في شهر ولادتها بصلها بحب وغمزه بعينه قلب زي الفل منور على وش زي البدر سيبك منها دانا من يوم وجاي مش هقولها الا يا ليلي يا ليليه سوده كوده مالهاش ملامح
الكل ضحك لحد ما مسعود شرق وعنيه دمعت من كتر الضحك
نعيمه بضيق: مالك يا ولا ومالها بنت خالتك زي القمر وست بيت زي الفل يا اخويا يا اكشي الموكوسه بس تطلع ربعها اتجوزت أصغر من اللي قربت تعنس جاري وجابتلك الواد وجابتلك البت
مسعود بزعيق: مين دي اللي عنست يا مرا بنتك لسه ماجبتش ال 15 سنه وانتي اللي في رأسك في رأسك انتي إيه يا شيخه مبتتهديش دي بنتك ولا بنت ضرتك عرفيني امها ولا مرات ابوها كرهاها ليييه عرفيني ليييه الغل اللي جواكي لبنتك
نعيمه بخوف: مفيش ام بتكره ضناها انا عايزاها ست الناس عايزه استرها واشوفها في بيت العدل كل يوم يدق بابك عرسان أشكال وألوان وانتا على كلمه لا وبس ليه
مسعود: عشان بنتي يوم ما تتجوز تتجوز اللي يتقي ربنا فيها مش يبهدلها تتجوز اللي يصونها تتجوز اللي يعملها حساب تتجوز وهي قادره على بيت انا لما اتجوزتك صغيره مرضتش اخليكي تحبلي وتخلفي الا لما جسمك شد وبقيتي قد مسؤليه بيت وعيال فهمتي ولا اعيده من تاني كاتكو القرف سديتو نفسي
وبص لسمر بحنان قومي يا بنتي ادخلي اوضتك ريحي جسمك
سمر قامت من سكات ودخلت اوضتها اللي كل يوم تشهد على كسره نفسها من امها حضنت مخدتها اللي ياما شربت دموعها اللي بتنزل زي الشلال بسبب امها اللي المفروض تكون احن قلب على بنتها
كتمت نفسها في المعده وفضلت تصرخ لحد ما نامت من التعب والوجع
مر ت الأيام ورجعت سمر تاني تكمل شغل البيت وأمها لسه على نفس وضعها كل يوم تسم بدنها بكلمتين مالهومش اي لازمه
وقربت امتحانات اخر السنه وكل يوم جمال بقى متابع سمر من بعيد عايز يعرف كل كبيره وصغيره عنها وفي يوم عرف قرابتها بعزت ابن خالتها واتفقوا يتقابلو
عزت بفرحه : يا مليون اهلن وسهلا بسيد البلد عامل ايه يا كبير يا ابن الاكابر
جمال بنفخه ريش وخيله كدابه: نحمدو يا عزت عامل ايه
عزت: بخير وزي الفل بس ايه الشقه الغريبه دي
جمال: ماغريب الا الشيطان كنت جايلك في مصلحه لا مصلحتن الأولى هاتجيب التانيه
عزت: كلي معاك قول ولو في أيدي اعتبرها مقضيه بعون الله
جمال: بعون الله بنت خالتك
عزت بعدم فهم: مين فيهم لامؤاخذه
جمال بتوضيح: سمر بنت خالتك اللي متحوزه مسعود ابو شامه طالبها في الحلال
عزت: اللي اعرفه ان جوز خالتي قال ان البت غاويه علام
جمال: ماليش فيه مش اختك متجوزه اخوها يبقى ليك سكه اختك من نحيه وامك من نحيه وانا هاكلم ابوها
عزت بلوع: ولو مؤاخذه انا هستفاد ايه من دور الخاطبه داه منا مش ماشي اوفق راسين في الحلال
جمال بمكر: قاره البهايم اللي كنت عايز تعملها على الأرض القبليه هانعملها سوا وكمان شريك معاك بأكتر من نص رأس المال وهاتتكتب نصين شرك قولت ايه
عزت بطمع: طيب اسمع دكر الكلام لو عايزها اختي من نحيه وأمي من نحيه وأمك تزغلل عين خالتي من نحيه
عزت اشمعنى وليه مش ابوها ولا ابوها مالهوش كلمه قدام مراته
عزت :تؤتؤ جوز خالتي دماغه بلغه قديمه وخالتي ليها سككها معاه والدوي على الودان امر من السحر
جمال: استبينا بكره هفاتح الحاجه يلا فوتك بعافيه
عزت: لا والله عيب تيجي وتمشي من غير ما تاخد واجبك دي عيبه في حقي يا ابن الأصول وانتا ابو الاوصول كلها
جمال: واجبك وصل نشربه شربات ان شاء الله
عزت بطمع: اعتبره حصل
مشي جمال وطول الليل صوره سمر مش مفارقه خياله ومصدق الصبح طلع ونهاره طل
قام من سريره اول ما حس بحركه أهل البيت وان الكل صحي دخل الحمام ولبس جلبيه فلاحي واسعه وحط حرام على كتفه زي ما متعود
وطلع بعد ما سمع صوت أمه بتناديله قعد يفطر وعقله شارد
محروسه ام جمال: مالك يا ضنايا شارد واللقمه بتدخل بوقك زي الزرزور
جمال بإنتباه: ولا حاجه يا ست الكل عايزك في كلمتين بعد الفطار
مر الفطار مرور الكرام واخدت محروسه الشاي لابنها
ودخلت اوضه الجلوس : الشاي يا ضنايا في ايه بقى مخليك شارد
جمال : بفكر اكمل نص ديني
محروسه بفرحه وعين لامعه: يالف بركه يالف فرحه داه نهار نادي وبنت عمك ربيع زينه البنات ومنا وعلينا
جمال بمقاطعه: يأما بنت عمي تربيه امها والبت شوكتها قويه متنفعنيش انا عايز بنت بداره لسه قطه مغمضه مفتحتش زي العجينه اشكلها على أيدي
محروسه: شكلك حاطط عينك على حد مين اللي عليها العين والطلب
جمال بإبتسامه متداريه: بت من البلد بنت مسعود ابو شامه الصغيره
محروسه بتفكير: محروس ابو شامه السم مش غريب عليا فكرني بيها كده امها مين ولا أخواتها مين
جمال: هي بنت وحيده أخواتها اربعه مصطفي ومحمود وجلال وحسن اللي عنده الارض البحريه اللي يمه مضرب الرز وابن خالتها عزت اللي بيتاجر في المواشي
محروسه بتذكر: ايوه ايوه ايوه عرفتها بنت نعيمه بنت متولي ابو شامه بس يا ابني اللي اعرفه انهم بياخدوا منهم فيهم والبت لسه صغار دانا اخر مره وعيت ليها كانت بتلعب قدام الباب مع العيال
جمال: يلا يا أما كبرت وخرطها خراط البنات وبقت في المدرسه أهي وبيني وبينك كده احسن اربيها على أيدي ولا تقولي كاني ولا تقولي ماني ولا ليا ولا عليا
محروسه بتفكير: طيب منتا بتقول انها في المدرسه وخرطها خراط البنات يعني البت غاويه علام
جمال بلا مبالاه: وهي هاتعمل إيه بالكلام كل بنات البلد آخرهم الجواز وبيتها وعيالها
محروسه بتأييد: ماشي معاك حق بس عايز مني ايه مكملتش ابوك يروح لابوها ليه
جمال: بصي يا أما البت أبوها مش عايز يجوزها صغار وكل يوم يدق بابه الف عريس وعريس والبت الله وكيلك زي لهطة القشطه وأمها عايزه تسترها يعني دخلتها من امها وهي تلين دماغ أبوها
محروسه بضحكه: اااه الدوي ع الودان أمر من السهر والنبي منك هين يا واد ماشي انا هاروح لأمها بعد العصر واجس ميتهم واجيبلك الخبر
جمال بفخر: ايوه كده يا أما وزغللي عينها عشان تعرف تقنعه بضمير
محروسه بغمزه: متقلقش من النحيه دي خالص وحط في بطنك شادر بطيخ صيفي
جمال: مطمن يا أما طول ما انتي اللي في الموضوع مادام حطيته في رأسك يبقى هايتم هايتم
الفصل الرابع
خرج جمال يتابع مصالح العيله ومر الوقت طويل وأذن العصر وخدت محروسه بعضها لبيت أهل سمر وهي شايله زياره تقيله الحيل ووصلت متصيغه بصيغه تخطف العين من كترها خبطتت على الباب
نعيمه من جوه: بت يا سمر انتي يا مقصوفه الرقبه شوفي مين
ليلي وهي قاعده في الصاله: طلعت تنشر يا خالتي على السطوح
نعيمه : طيب افتحي وشوفي مين
فتحت ليلي اللي وقفت مذهوله من منظر محروسه : اؤمري يا حاجه
محروسه بتقييم: انتي مين يا شابه مش داه بيت الحاج مسعود ابو شامه
ليلي برفعه حاجب من تقييم محروسه ليها: ايوه هو اتفضلي
محروسه: طيب افتحي الدرفه ودخلي الحاجه دي جوه إلهي تنستري يا حلوه
ليلي بإستغراب : من عنيا ودخلت ليلي الزياره اللي كانت ماليه الرصيف ملو ومحروسه مستنياها في مدخل البيت لحد ما خلصت
طلعت نعيمه لما استعوقت ليلي:مين يا بت اللي عل الباب ومفندقه الباب على مصرعيه كده ليه بلعت باقي الكلام لما شافت المدخل متروس اقفاص وعدادي وكراتين كتير وبصت على اللي قدامها يا اهلا وسهلا يا حاجه اؤمري
محروسه بإبتسامه: ميؤمرش عليكي ظالم يا حاجه
نعيمه بإستدراك: يا ندامه من على الباب ادخلي ياحاجه داه احنا زارنا النبي
دخلت نعيمه ووراها محروسه ووراهم ليلي اللي محدش لسه عارف مين دي وايه سبب الزياره الغريبه دي كلها لحد ما وصلتها اوضه الجلوس وقعدت
محروسه وهي بتبص على ليلي بتقييم ومش متقبله ان دي عروسه ابنها لا شكلها ولا منظرها ماشي مع وصف ابنها خالص
نعيمه: اؤمري يا حاجه الأول تشربي إيه
محروسه بإنتباه: لا والله خيرك سابق
نعيمه: يا ندامتي ليه يا حاجه انتي جايه بيت بخلا ولا ايه وانتي ابو الكرم
محروسه: يبقى شاي
نعيمه: قومي يا ليلي اعملي عصير وهاتي حاجه حلوه من جوه للحاجه
ليلي بفضول بس مقدرتش تعارض: من عنيا حاضر
مشيت ليلي ومحروسه في ثانيه سألت: مين الشابه الحلوه دي
نعيمه بإستغراب: دي ليلي بنت اختي ومرات إبني
محروسه خد نفس طويل وطلعته بهدوء وكأنها كانت في سباق ويادوب خلص: ربنا يسعدهم ويهدي سرهم
نعيمه : اللهم آمين
محروسه بسرعه: بصي يا حاجه انا جيالك ورجايا ماترديني خايبه
نعيمه بخبطه على صدرها: اللي تؤمري بيه يا حاجه بس عدم اللامؤاخذه يعمي انا معرفتش انتي مين في الأول
محروسه بنفخه ريش وخايله كدابه: انا الحاجه محروسه مرات الحاج علام الشلاواني
نعيمه بترحاب حار: يالف اهلا وسهلا يا حاجه انتي تؤمري أمر صيتكم مسمع وسمعتكم شاشي ابيض من البفتا
محروسه بغرور: بصي بقى يا حاجه انا ابني جمال اسم النبي حارسه وصاينه عينه من بتك وعشان هو راجل من ضهر راجل بعت يدخل البيت من بابه واللي تؤمري بيه وزياده اه اومال ايه دي مرات الغالي
نعيمه بعيون بتلمع: وهو اسم النبي حارسه وصاينه يعني لامؤاخذه يعني في السؤال شافها فين ويشتغل ايه
محروسه بمدح: جمال زينه الشباب وماسك كل شغل ابوه والكلمه كلمته والشوره شورته بعد الحاج طبعا وليه دور كاملا في الفيلا اللي قاعدين فيها وشافها عشان النصيب لجل ما يجمعنا بيكم
نعيمه ارتاحت في قعدتها: طبعا يا حاجه النصيب مفيهاش كلام اديني بس دقيقه وجايه
وطلعت بسرعه على المطبخ: بت يا ليلي سيبي اللي في إيدك وهمي اومال على السطوح هاتي مقصوفه الرقبه وخليها تلبس فستان عدل وتيجي على اوضه الجلوس بسرعه وهيواللي تجيب العصير والحلو
ليلي بفضول: ليه خالتي
نعيمه بزغده في جمبها: اخلصي يابت وانا هاقولك بعدين اخلصي بس
ليلي بشك :حاضر حاضر واتحركت بسرعه تجري على السلم
دقايق ونزلت ليلي في ايدها سمر شدتها نعيمه من ايدها على الاوضه بسرعه وفتحت دولابها وطلعة فستان احمر في بيج جميل وطلعت الطرحه عليه:بت يا ليلي تلبسيها بسرعه خمس دقايق وتبقى فله وشمعتها قايده
ليلى هزت راسها:حاضر يا خالتي فوريره اهو
وفعلا طلعت نعيمه ودخلت عند محروسه : منوره يا اختي والنبي داه البيت فج نوره
محروسه وعينها على باب الأوضه: أومال في ن عروستنا الحلوه يا اختي
نعيمه بارتياح: دقيقه وتبقى قدامك يا اختي
كام دقيقه ودخلت سمر شايله صنيه عليها كوبايتين عصير وطبق مليان جلاش وكنافه وحطت الصنيه على التربيزه اللي قدامها
نعيمه شدتها من دراعها وقعدتها جمب محروسه : سمر بنتي زينه البنات ست بيت بريمو عليها نفس في الأكل يفوح في الشارع يجيب آخره
محروسه بتقييم لسمر: يا حلوه يا حلوه وانتي بقى لسه في العلام ولا قاعده في البيت
نعيمه بمقاطعه قبل ما سمر ترد: لاء في العلام بس هي البت اخرها إيه يا حاجه بيتها وجوزها داه سلونا وسبرنا من زمن الزمن
نعيمه: قومي يا قلب أمك روحي شوفي اللي وراكي
سمر بذهول من تغيير أمها لأول مره تمدحها بس فرحت جدا من جوها ببراءه طفله فرحانه بلبس العيد : حاضر يا أما من عنيا وسابتهم وطلعت جري على بره تغير هدومها وتطلع تكمل شغل البيت بنفس مفتوحه
محروسه بإرتياح: طيب شوفي يا حبيتي بقى الله الله على الجد والجد الله الله عليه اللي تؤمري بيه وزياده شويتين تلاته كمان اه اومال ايه هي عروسه اي حد دي عروسه سيد الرجاله المعلم جمال علام الشلاواني مش اي حد ولازما ولابد اللي تدخل بيتنا تتاقل بالدهب والمال وحتى اسألي أهل حريم أولادي وهما يقولولك بنفسهم
نعيمه بزغلله عين من الطمع والحياه اللي مستنيه بنتها: من غير سؤال يا حاجه صيتكم مسمع من شرق لغرب والكل كان بيحكي ويتحاكي بأفراحك ولا حكاوي ابو زيد
الهلالي
محروسه بفخر : طبعا وجمال كمان هايبقى اكتر شويتين تلاته داه اللي ماسك كل مصالح ابوه واعمامه والكلمه كلمته والصوره شورته
نعيمه بفرحه ظاهره وعيون بتلمع: طبعا يا حاجه داه نسبكم يتباهي بيه الملوك
محروسه كملت على نفس الطريق لما لقت نعيمه بلعت الطعم بسهوله: طيب وأبوها نكلمه أمته أن شاء الله
نعميه بهدوء وكأنها يادوب افتكرت موقف جوزها من جواز بنتهم: سيبيه عليا وانا هابلغك مش هاطول
محروسه: يبقى على بركه الله مستنيه منك البشاره
نعيمه بفرحه:طبعا اديني بس كام يوم وانا اديكي الخبر التمام
محروسه : يبقى اتفقنا يلا فوتك بعافيه
نعيمه بخبطه على صدرها: يا ندامتي ليه كده يا حاجه طيب ناكل لقمه وتذوقي طبيخ سمر ويبقى عيش وملح
محروسه: في بيتها والجايات اكتر من الرايحات
نعيمه بتصميم: لا والله داه عيبه في حقي وانتي كلك كرم
محروسه بتروي: والله يا حاجه اتأخرت والرجاله زمانها على وصول
نعميه بتفهم: طيب يا حاجه بس المره دي متتحسبش المره اللي جايه تبقى الزياره اللي على حق اللي تليق بيكي
محروسه بغرور: في بيتها يا حاجه في بيتها لما نشرب الشربات ان شاء الله
مشيت محروسه وفجاءه نورا وشروق وهاجر وليلي جم جري عليها
ليلي كانت أول واحده الفضول قاتلها: خير يا خالتي مين دي وايه سبب الزياره اللي مكلفه شيئ وشويات
نعيمه بصت على اوضه سمر علشان تتطمن: امال البت سمر فين
ليلي بإطمئنان: على السطوح غيرت وطلعت جري تكمل نشير الهدوم
نعيمه بإرتياح: طيب تمام ايدكم بإيدي نشيل الزياره دي ندخلها اوضه الخزين الأول
ليلي بفضل قاتل: يا خالتي هاندخلها بس طمنيني في إيه
نعيمه قعدت على حيلها تاني على الكنبه البلدي اللي في الصاله: دي محروسه مرات الحاج علام الشلاواني
جايه وطالبه ايد سمر لابنها
ليلي بذهول: مش دول اللي عندهم الفيلا الكبيره اللي على اول البلد
هزه نعيمه رأسها بتأييد
هاجر بصدمه: يالهوووي والله وباضتلك في الفقص يا سمر دانا اسمع عنهم حكاوي ولا حكاوي الف ليله وليله
دي البت رضا مرات ابنها جابلولها الشبكه بالكيلو غير فرش إيه وعفش ابصر إيه لا محظوظه والبخت بيجري في رجليها
نعيمه خمست في وشها: يختي سمي وصلي على النبي في قلبك
هاجر بضحكه صفرا: يا خالتي هو انا هاحسدها انا اقصد ان نسب زي داه ميترفضش وحماية زي ما انتي عارفه رافض يجوزها الا لما تخلص علام وكل اللي طالع عليه البت غاويه علام
نعيمه بشرود: انا هاجس ميته انهارده وأشوف
يلا همي منك ليها ندخل الحاجات دي قبل ما حد ييجي وياخد خبر ويسأل وانا مش عايزه حد يشم خبر إلا لما املى دماغ عمك الحاج
واتحرك الكل بسرعه يشيل الحاجات مع بعض بسرعه ودقايق طويله وكانوا خلصوا
رجعت محروسه البيت وهي مستبشره خير لقيت جمال مستنيها على نار: ها يا أما طمنيني عملتي ايه
محروسه قعدت على كنبه الانتريه في الصاله: متقلقش يا واد كام يوم وتسمع البشره بس البت الله أكبر فلقه قمر وجسمها ملبن فعلا خرطها خراط البنات واتمدد مات دي اللي هاتكيد كل حريم البيت والبيوت اللي جارنا
جمال بفخر: يعني عجبتك
محروسه: طبعا يا واد وانا مليت دماغ أمها وهي هاتتكفل بالباقي اصبر بس وشوف
جمال بدعاء بحرقه: آمين يا أما أمين
رجع مسعود و أولاده من الأرض والكل قعد ياكل ولأول مره نعيمه تهتم بأكل سمر وحطت مناب كبير لسمر: كلي يا قلب أمك كلي الا انتي هفتانه وضعفانه وكمان قايمه من النجمه لشغل البيت كلي واتقوتي يا بت
مسعود بص بإستغراب وسكت وفي سره: ربنا يهديكي عليها يارب ويحسن قلبك الحجر الصوان داه ويلين لبنتك مر الغدا مرور الكرام وكل واحد اتسحب لشقته وسمر جات تدخل المطبخ تنضفه
نعيمه: سيبي المطبخ انا هاشطبه روحي ريحي جتتك
سمر بصت حواليها واتلفتت تشوف امها بتكلم مين
سمر بذهول وفرحه: انتي بتقوليلي انا يا أما
نعيمه بفرحه: ايوه يا بت يلا روحي وانا هاخلصه
سمر فرحت جدا زدودخلت اوضتها غيرت هدومها وفرشت كتبها على الأرض تذاكر مبقاش الا أيام على الإمتحان اخر السنه
دخلت نعيمه عملت شاي بنعناع وطلعت قعدت مع جوزها على المصطبه قدام الباب: خد يا حاج شاي بنعناع من اللي وصى عليه الحكيم لقمان
مسعود خد الشاي وشرب بق لقيه مظبوط: تسلم ايدك يا حاجه
نعيمه بلؤم : عقبال ما نشرب شربات فرح سمر يارب مع ابن الحلال اللي يستاهلها يارب
مسعود قلب وشه: تاني يا وليه حرام عليكي انا قولت اخيرا ربنا حنن قلبك على بنتك وانتي اللي في رأسك في رأسك بردوا
نعيمه : يووووه يا حاج وانا قولت ايه بس دانا بدعيلها من قلبي والله مش انتا قولت مش هتجوزها الا اللي يستاهلها ويراعي ربنا فيها يمكن ربنا يستجاب دعاك ليها في ساعه اجابه واهي خدت من العلام كفايتها أهي وبقت في الشهاده
مسعود: قصره آخره الكلام داه إيه
نعيمه: ولا حاجه انا بدعيلها يمكن تكون ساعه اجابه وربنا يستجيب ويريح قلبي وقلبك عليها
مسعود شرب الشاي وسكتت ونعيمه كمان سكتت مؤقتا بس هل هايستمر السكات ولا الدوي على الودان أمر من السحر
الفصل الخامس
مر اليوم ونعيمه التزمت الصمت بس كل شويه تدعي لسمر براحه الباب وربنا يرزقها بعريس ابن حلال ومسعود يمسع ويسكت
مر 4 أيام وبدئت امتحانات سمر ونعيمه قررت تقطع جو الصمت وزي ما بيقولو تقطع عرق وتسيح دمه وتحسم الموضوع
بعد الغدا الكل سحب بعضه زي كل يوم وسمر دخلت تذاكر قدامها يوم احد بس على ماتبداء الامتحان اللي بعده
نعيمه عملت الشاي زي عادتها وطلعت قدام الباب مكان قعدت جوزها المفضله نعيمه بحسم: بقولك يا حاج انتا تسمع عن الحاج علام الشلاواني
مسعود بإنتباه: ايوه ومين في البلد ميعرفوش داه من عين أعيان البلد وسمعته زي الطبل بيتغني بيها الكبير والصغير
نعيمه بإرتياح: طيب هما أهل بيت محترمين ومرتاحين وكده يعني
مسعود: شهاده حق هما بيت كرم و المال عندهم بالشمال لو وقوفو عليه يقولو السمس ليه بتسألي وكتر اللف والدوران داه وراه ايه
نعيمه بإطمئنان: بص يا حاج من قيمه كام يوم كده جات مراته محمله شيئ وشويات وطلبت ايد سمر لابنهم وطلبت ناخد موافقتك عشان ييجي الرجاله
مسعود اتنتر من مكانه بعصبيه: وهي الحريم اللي بتتكلم في الأمور دي
نعيمه بتصحيح بسرعه: لا يا حاج ويمين الله هما عرفوا انك بترفض كل اللي يدق بابك وخافت تكسف الرجاله لو جم طلبوها فلو رفضت يبقى النفوس متشيلش من بعضها ويبقى الموضوع بين الحريم هو انا بردوا هبله عيب عليك والله دانتا كبيرنا ومفيش كلمه بعد كلمتك ولا شو بعد شورك
قعد مسعود مكانه بإرتياح تاني: قصر الكلام البت لسه صغار وغاويه علام
نعيمه :طيب يا حاج نصبر بس لما تخلص ونشوف ايه رائيك حرام ترفض عريس زي داه ابن اصل ومحترم والبلد كلها تشهد ليه ولأهله ودي فرصه متتكررش قبل ما ترفض صلي وأسأل واطقس
مسعود: سيبيها على ربنا
دخلت نعيمه وتاني يوم الصبح بعد ما مشي الكل على اشغاله نادت حريم أولادها وطلعوا شقت ليلي وحكتلهم كل اللي حصل
ليلي بتفكير: مادام مرفضش يبقى في أمل بس حتت علامها دي اللي طالعه في دماغه
هاجر: قصدك إيه ممكن يرفض
ليلي: جايز
نعيمه: لا والله العريس داه لا يمكن يطير ولا نسب زي داه يتسيب
نورا: طيب والحل
شروق: خالتي تفضل تمدح في الواد وأهله
ليلي: مش كفايه جوز خالتي عايز حاجه قويه اوي عشان هو اللي يصر ويجوزها
نعيمه : قصدك إيه يابت
ليلي بتفكير وشر: يعني ايه الحاجه اللي تخلي عمي يوافق يقعدها ويجوزها
نعيمه بعدم انتباه: انها تلعب بديلها وسمر هبله لا ليها في الطور ولا في الطحين
ليلي بتركيز: لاء الموضوع داه عايز تمخيخ على كبير
نعيمه بإستفهام: قصدك إيه يا بت
ليلي: يعني امخمخ واقولك
نعيمه : اي حاجه الا اللي يمس بنتي
شروق بتزغلله عين لحماتها: يا خالتي انتي مشوفتيش البت نسمه مرات ابنهم الوسطاني يا لهوووي دول جابو لأمها طقم دهب وهدايا تفتح صاغه ايوه والله
نعيمه بطمع: بس بردوا دي بنتي
ليلي: سا خالتي امخمخ واقولك وماتخافيش مفيش ايوتها حاجة هاتمس سمر دي بردوا مننا واللي يمسها يمس البيت والعيله كلها
نعيمه بإرتياح: طيب ماشي شوفي وقوليلي
نزل الكل وفضلت ليلي تفكر واخر ما غلبت اتصلت على اخوها
عزت: ايوه يا بت ها طمنيني
ليلي: جوز خالتك يا اخويا كا العاده دماغه جزمه بس خالتك بتحاول تلينها بس عايز زقه جامده
عزت بعصبيه وزعيق يكاد يكون جعير : ماليش فيه يا بت دانا داخل معاه مصلحه هاكل من وراها الشهد كله والهطه لهط
ليلي بتعوجه بوق يمين وشمال: مش كنت عايز تتجوزها اوام كده منتا اللي عايز تجاوزها لغيرك
عزت: لا يا أختي الحريم على قفا من يشيل بس المصلحه دي مش هاتيجي مرتين يا هبله الواد داه اللي ماسك كل مصالح وشغل وفلوس عيلته وكلمته مسموعه والمال كله تحت ايده فهمتي با ام دماغ زنخ
ليلي بطمع: طيب وانا هستفاد إيه من داه كله
عزت بنفخه ونفر: اخلصي من الاخر عايزه إيه
ليلي: نصيبك في بيت ابوك يتكتب بإسمي
عزت بزعيق: ليه يا اختي هاتجيبي الديب من ديله
ليلي: براحتك خلاص هاته انتا وليك عليا انا اللي هاقنع جوز خالتي يرفض
عزت بسرعه: بسلام بيت ابوكي الكل هيسال: ليكي عليا الشقه اللي كنت عاينها لمزاجي هاكتبها بإسمك قولتي إيه
ليلي بتفكير بسيط : اتفقنا اسمع بقا البت دي عشان جوز خالتك يوافق ملهاش الا حل واحد انه يشوف بعينه حاجه مش مظبوطه على بنته ويقول آمين
عزت بسرعه: يابنت الشياطين فعلا طيب اسمعي بقى
الواد محروس صبي القهوه على قبل المدرسه انا هاخليه كل يوم يوقفها بحجه انه بيسألها على حاجه وانتي تخلي جوزك يجيب ابوه من الطريق داه كيف وازي دي بتاعتك وهاخليه يكتب جواب حب وكلام من اللي بيضحكوا بيه على عقل البنات وانتي تحطيه في شنطه مدرستها وكام جواب تاني وكام ورده وهديه وتحطيهم في دولابها
ليلي بشر : يخربيتك داه كده حور خالتك هايموتها
عزت : متخافيش خالتك هاتبقى معانا على الخط وهاتلحقها
ليلي: يبقى كده استبينا
وقفلت مع اخوها ونزلت جري على تحت
ليلي: خالتي تعالي عايزاكي
شدت ايد خالتها ودخلت اوضتها وقفلت الباب بالمفتاح
نعيمه بخضه: في ايه يا مزغوده نشفت الدم في عروقي
ليلي بهدوء :اسمعيني بقى
وحكتلها كل حاجه دارت بينها وبين عزت ماعدا جزء مصلحتها ومصلحه عزت
نعيمه بخبطه على صدرها : يالهوووي انتي بتقولي ايه يا بت اشوه سمعة بنتي بإيدي واخلي كلاب السكك تتكلم على عرض بنتي
ليلي شدت خالتها قعدتها تاني: يا خالتي الحوار هايكون بينا جوه البيت ومحدش هايشم خبر حتى الواد بتاع القهوه مش هايعرف غير انه هايسألها كل يوم سؤال وجوز خالتي يشوفه وبس يعني ميعرفش حاجه وكملت بعد ما حست ان خالتها اطمنت وهديت يا خالتي دول أعيان البلد ويا بخت من كان العمده خاله ودول كلمتهم مسموعه في كل مكان واهانبقى مناسبين الاعيان وعيله من أكبر ناس في البلد ليها شنه ورنا
نعيمه: الحاج ممكن يموتها فيها
ليلي: انتي بقى دورك تهديه وتقنعيه بجوازها وسترها وان الحمد لله انها اتلحقت وكويس انه مرفضش وكلمتين تلينيه ونبقى ضربنا كل العصافير بحجر واحد
وافقت نعيمه تحت زن ليلي واقناعها بخطتها الجهنميه اللي محدش هايخسر فيها غير بنت لسه بريئه متعرفش من الدنيا الغدر اللي هايجيلها من اقرب الناس ليها
تاني يوم صحيت سمر وفطرت ولبست وراحت مدرستها ومشيت الرجاله على الأرض وجه عزت بعد ما اتأكد انه مفيش حد في البيت غير الحريم واتصل على أخته نزلت بسرعه
ليلي: ايه يا عزت نزلتني على ملا وشي في ايه ومطلعتش ليه
عزت: اسمعي يا ام مخ زنخ داه عقد الشقه اهو
خطفته ليلي بسرعه وبصت فيه وضحكت وطبقته وحطته في صدرها ها عايز ايه بقى
طلع من جيب العبايه بتاعته داي الجوابات والحاجات اللي قولتلك عليها
ليلي: طيب ومطلعتش ليه تديهاني فوق
عزت: عشان محدش من سلايفك يشوفني وممكن يربط الحوار ببعضه خلينا في الأمان فهمتي يا ام مخ زنخ
ليلي بتفهم: عندك حق وشروق بذات بتلمع اوكي بضمير أوي وسوسه هاتفضل تنخور لحد ما تعرف اللي فيها
عزت: طيب يلا طريقك أخضر
ودخلت بسرعه وحطت الحاجات في تحت مرتبه سمر على الواح السرير بحيث محدش ياخد باله منها دلوقتي وخلت جواب واحد بس معاها
وطلعت شقتها من غير ما حد يشوفها
في الامتحان عند سمر تعبت جدا وجالها مغص شديد
المراقبه: مالك يا بنتي
سمر بألم ووجع: بطني وجعاني اوي يا ابله ممكن اروح الحمام
المدرسه بتفهم: طبعا تعالي واخدت ورقه الاجابه من سمر ونزلت الحمام وطلعت ولسه المغص مستمر
خلصت الامتحان برغم الألم والمغص
عزت وصل المدرسه وعطي فلوس لفراشه في المدرسه
تروح لابو سمر تبلغه انها تعبانه في المدرسه ومتقولش لحد مين اللي باعتها ولو سألها تقوله الابله اللي عليها
وفعلا خدت من الفلوس وهي طايره من الفرحه وطبعت جرس على أرض مسعود
وقف عزت على جمب وضحكه خبيثه مرسومه على وشه
فلاش باك
ليلي بالليل اخوها اتصل بيها
ليلي : خير يا عوت في حد حصله حاجه
عزت :لا كلنا بخير اسمعي مني الكلمتين دول علشان محدش يشك فيا ولا فيكي الصبح حطي في اكل سمر شويه زيت خروع على ما توصل المدرسه بشويه هايجيلها مغص وانا هاروح ابعت اي فراشه من المدرسه تروح تقوله بنته تعبانه وهاخليه في الطريق يشوفها بالصدفه بعيد عني وعنك وعن جوزك خاالص
ليلي: يخرب مطنك يا بعيد دانتا الشيطان يقولك يا معلم من عنيا بس الصبح يكون معاك عقد الشقه ماشي
عزت: من عينا نفع واستنفع
نهايه الفلاش باك
عزت فضل واقف في حته متداريه يتابع كل حاجه بعنيه من بعيد لبعيد
وشاف سمر طالعه من المدرسه بعد مده بسيطه فضل ماشي وراها براحه ومن غير ما حد ياخد باله وأول ما مرت على القهوه سمعت صوت بيناديها
ست سمر ست سمر وقفت واتلفتت: ايوه انتا بتنادي عليا
محروس: ايوه ياست البنات كنت سمعت ان الحاج عايز انفار في الارض واخويا كان عايز يروح
سمر: معرفش والله تقدر تسأل ابويا او حد من الرجاله بالاذن
جات تمشي وقفها محروس: طيب لو مفيهاش اساءه أدب تسألي الحاج وتردي عليا
سمر: قولتلك تقدر تسأل حد من الرجاله وسابته ومشيت
في الوقت داه كان جه مسعود جري بعد ما سمع من الفراشه ان بنته تعبانه
وهو جاي شاف بنته واقفه تتسامر وتتكلم مع صبي القهوه اتصدم ورجع لورا حس ان رجليه مش شيلاه
مسعود لنفسه: لا يا راجل بنتك متربيه يمكن كان برساله على حاجه ولا عايز حاجه بلاش تسوء الظن في بنتك دي تربيه ايدك
روحت سمر وهي تعبانه
نعيمه: مالك يابت وشك اصفر زي الليمونه
سمر بوجع: بطني بتقطع يا أما مش عارفه مالي
نعيمه: طيب خشي ريحي وانا هاغليلك حبه نعناع ولا كراويه يريحو بطنك
سمر: حاضر يا أما
دخلت سمر تنام وهي مش حاسه غير بوجع
لا تعلمي يا صغيرتي ما تخبئه الأيام لكي في جعبتها فقد اتحدت الشياطين عليكي
نامت سمر بعد ما شربت الأعشاب اللي أمها عملتها
رجع مسعود وهو شايل هموم الدنيا فوق كتافه وشارد وعقله مش مستوعب اللي شافه
اتحط الأكل وكل العيله اتجمعت ماعدا سمر
وقعد مسعود وهو شارد شافته ليلي وفرحه غريبه اتمكنت منها بعد ما اخوها اكدلها انه شافه بنته وبلع الطعم
ليلي بمكر الأفاعي: اومال فين سمر يا خالتي
مسعود انتبه ليهم لما سمع اسم سمر
نعيمه بعدم فهم: في اوضتها جات تعبانه ووشها زي الليمونه الصفرا غليتلها تلقيمه نعناع وكرويه وشربتهم ونامت ولما تصحي تبقى تاكل
مسعود عقله هايشت فضل باصص للأكل والكل حواليه بياكل ولا هامه وصوت المعالق اللي بتخبط في الصحون بيرن يسمع حواليه من السكات اللي عامل البيت خلص الأكل وزي كل يوم كل واحد خد مراته وعياله وطلع شقته ومسعود سحب نفسه وطلع على المصطبه لما حس بنفسه بيضديق عليه وضلوعه هاتخنق قلبه من الوجع
مسعود لنفسه: اسألها طيب هاتقول إيه هاتكدب
قلبه بنتك تربيت ايدك عمرها ما تعرف الكدب
عقله وليه لاء يمكن ضحك عليها ومن كتر قسوه أمها ماصدقت حد حن عليها
قلبه بنتك بريئه يمكن كان بيسألها على حاجه
عقله لو كان بيسألها كانت جات وقالت لأبوها
قلبه وهو كان سالها عشان يعرف
عقله خلاص يراقبها ويشوف كان سؤال وموقف وعدا ولا ليهم كلام وحكاوي
قلبه ماشي بس خليك فاكر انها عمرها ما عملت حاجه غلط
غمض عنيه وتعب السنين حل عليه
طلعت نعيمه وشافت جوزها كده قلقت عليه وهي عارفه السبب بس بررت لنفسها انها بتعمل الصح عشان تستر بنتها ومتعنسش جارها
حطت نعيمه صنيه الشاي وحطت ايدها على كتف جوزها: مالك يا حاج من ساعت ما جيت وانتا شارد بيك إيه
مسعود انتبه من شروده: ها بتقولي ايه يا حاجه
نعيمه بخوف :مالك شايل طاجن ستك على راسك وزاعق إيه اللي جرا
مسعود بص قدامه وعنيه كانت هاترغي دموع بس مقدرش دموعه تنزل :ولا حاجه شكلي تعبت شويه من الغيط والشمس كانت حاميه
نعيمه شافت دموع جوزها المحبوسه واللي بتلمع زي نور اللمبه في العتمه
سكتت ومفكرتش تزود عليه ودعت من قلبها ان الموضوع يمر على خير للكل هي كل همها ان بنتها تتجوز وتستر في ضل راجل وزي ما بيقولو ضل راجل ولا ضل حيطه
مر اليوم وسمر ملازمه سريرها وتاني يوم قامت وحست انها احسن
طلعت تجهز الفطار مع أهل البيت ولما أتجمعوا على غير العاده ابوها مكانش مهتم بيها وخلصت شغل البيت وأبوها راح على الأرض وعقله شارد وباللي قعدت تكمل مذاكرتها
وتاني يوم راحت المدرسه بعد ما كل أهل البيت راحوا الغيط ودخلت الامتحان بإجتهاد حلته بسرعه وقبل نص الوقت كانت خلصت وكعادتها تفضل تراجع وتذاكر كل جزء كتبته لحد ما تطمن ان كل اجابه نموذجيه ومش ناقص فيها حرف وطلعت من الامتحان وهي فرحانه انهارده كان آخر يوم في الإمتحانات وهاتفضل مستنيه على نار النتيجه عشان ترفع رأس أبوها
مسعود في الارض مقعدش الا شويه صغيرين و ساب عياله
جلال رايح فيني يا أبا
مسعود بهم: تعبان شويه هاروح الاجزخانه اشوف حاجه للتعب
جلال بخوف فطري على ابوه: طيب انا جاي معاك
مسعود بحسم: لاء خليك مع اخواتك وانا مش هاعوق
سابه ومشي متلفتش وراه وطلع واقف قرب مدرسه بنته وفضل مستني فتره طويله لحد ما شاف بنته وكام بنت تانيين طالعين من المدرسه لقاها ماشيه وشها في الارض زي ما هي متعوده حس ان قلبه بداء يرتاح شويه لحد ما عدت على القهوه وسمعت صوت تاني استخير مسعود بعيد جمب شجره بحيث يشوفهم بس للأسف مكانش سامعهم
سمر أتلفت لمحروس: خير يا عم كل يوم توقفني الوقت دي قولتلك لو عايز حاجه أسأل الرجاله مش حريم البيت احترم نفسك بقى
محروس بخوف وحرج: طيب بصي وطلع ورقه من جيبه داه رقمي اديه لابوكي او حد من اخواتك وبالله عليكي خليه يكلمني اهو اخويا يشوف شغله يسترزق منها بدل مهو قاعد عوالي وينوبك ثواب بلاش تكوني من قطاعين الأرزاق
سمر بهزه رأس: ماشي وخدت الورقه وحطتها في الشنطه ومشيت
عزت من بعيد تابع كل اللي بيحصل وشاف جوز خالته وهو ماشي ورا بنته وبسرعه طلع تليفونه واتصل على أخته
عزت :اسمعي بسرعه أول ما سمر توصل تدخلي بسرعه هتلاقي ورقه في شنطتها فيها رقم الواد محروس خديها واحرقيها وحطي مكانها الجواب اللي معاكي فاهمه
ليلي: ماشي بس إيه اللي جاب رقم محروس مع سمر
عزت :حكي لاخته
فلاش باك
قعد عزت على القهوه: ولا يا محروس الا قولي إيه أخبار الواد حميده اخوك
محروس بغلب: نحمده على كل حال يا معلم
عزت: لسه ملقيش شغل
محروس: لا والله مع انه معاه دبلون واشتغل حبه على عربيه في الموقف وصاحب العربيه قاله بدل منتا بتقاسمني رزقي انا هاطلع عليها
ودور حني يشتغل على توكتوك كل واحد شغال في ماله
ومن يومها وهو قاعد زي الولايا في البيت
عزت بمكر: بقولك حوز خالتي سمعت انه عايز انفار للأرض وهو بيدفع كويس حاكم أرضه كبيره اوي وهو وعياله مش سادين
محروس بفرحه: بجد والنبي يا معلم طيب متكلمه ينوبك ثواب
عزت بمراوغه: لو عايز اللي يضمنلك شغله بنته سمر دي نن عين ابوها وكلمتها أمر وهي جايه من المدرسه ابقى اسألها
محروس مكدبش خبر وعمل كده ولما سمر مديتوش وش رجع لعزت وهو خايب الرجا
عزت : ولا يهمك بص اديها رقمك وخلي حد من أخواتها ولا ابوها يكلموك وانتا تقوله
محروس: طيب منا أرواحلهم واخد الواد حميده معايا
عزت بسرعه خاف لحسن لعبته تتكشف وتبوظ بسببه: يا غشيم اتصعب ليها وانه ثواب وهي هاتلين رأس ابوها
محروس بعدم فهم: عندك حق يا معلم تلسم وربنا يجعله في ميزان حسناتك
نهايه الفلاش باك
ليلي بضحك وفرحه: يخربيتك يا شيخ والله انا نفسي صدقتك
عزت :طيب يلا متتأخريش
ليلي: حمامه يلا اللحق بسرعه
وقفلت معاه وطلعت الجواب اللي كانت مخبياه في قلب هدوم عيالها المكان الوحيد اللي جوزها عمره ما دور فيه ولا حتي بيفتحه واخدت الجواب وحطته في صدرها ونزلت بسرعه
دخلت سمر البيت بفرحه ودخلت غيرت هدومها وطلعت المطبخ تشوف أمها دخلت ليلي وراها تتسحب ودخلت فتحت الشنطه بتاع المدرسه ودورت لقيت الورقه خدتها وطلعت الجواب وحطته مكانها وطلعت بسرعه قطعت الورقه ورمتها في الحمام من غير ما حد ياخد باله
مسعود حس بوجع وكسره وخذلان من بنته واللي شافه
مسعود لنفسه: الورقه دي فيها إيه
شيطانه اتملك منه وطلع جري على البيت مش منتبه لحاجه
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق