مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

رواية عــروس الجبـــايــش الفصل الرابع والثلاثون 34 بــقلم يـــاســـة الموسوي 

رواية عــروس الجبـــايــش الفصل الرابع والثلاثون 34 بــقلم يـــاســـة الموسوي 

#عــروس_الچبـــايــش🌼34

#بــقلم_يـــاســـة 

#الحلقة_34)

ينفتح شباج السجن بس ما يفوت نجمة

أنتَ الكتاب الحافظة ولليوم ما مفتهمه 

ما اريد يبقى بخاطري وما اريد إحس بذنبك

واتمنى أوصل مرحلة لا اكرهك ولا أحبك

انا اعشك بخوف وحرص

مو مال احط روحي بشخص

عنده الأحبك كلمة 

.......................... 

يُـمن :- صار كلش قريب من المكان الگاعدة بيه ضليت على گعدتي والصدمة مالتي ما اگدر اشرحها وگلبي طلع من صدري جسمي رجف شيسوي جاي دخيلك يا ربي اريد بس اسيطر على رجفه جسمي ماكو متت مدري خايفه مدري متفاجأة مدري مشتاقتله ما ادري شصار بحالي

تعدنا ومشى تقريباً خطوتين او ثلاثة ورها وگف وكلهم وگفوا وياه رجع التفت عليه

و باوعلي بنظره سريعة ورجع دار وجهه وكمل طريقة

شلون شافني من بين هاي الناس كلها ما ادري وليش تعداني اول مره انوب رجع  باوعلي بسرعة ودار وجهه هم ما ادري

إحس بطني مغصتني وگلبي طاح بين إدية

حطيت إدي على بطني اريد المغص يخف

گـالت ورود

-- يا ستار يا رب شكو شعدهم اليوم

هديل :- ما ادري الله اعلم 

-- شفتن هذا الضابط مالهم  شو دار يباوع علينا 

-- اي شفته عبالك شلون المشبه علينا

-- اي صح

-- ولجن بس لا نطلع مطلوبين هههه

-- برد شرج يا ستار يارب 

هديل :- يُـمن شو وجهج صار أصفر بيج شي

-- لا ما بيه بس متوترة من الأمتحان وشفت الضباط و زاد التوتر عندي هبطت من المنظر 

ورود :- حتى أني والله خفت الله يستر، هسه يلا گومن للقسم بين ما نوصل يبدي الأمتحان

گمنا للقسم نمشي والطلاب صار عدهم حديث الساعة جيت الضباط وكلها تسولف بالموضوع وتسأل عن السبب لحد ما طبينا القاعتنا گعدنا كل وحده بمكانها

گلبي يدگ وعيوني تحرگني مدري شبيه معقوله مشتاقتله لو خفت منه ليش هيج صاير شكله يعني هوَ من زمان هيج شكله هيبة وانا ما منتبها عليه لو لان كلها تمشي وراه لو لان صار هواي ما شايفته وفات بالزي العسكري بس انا شايفته من زمان بهذا الزي ليش هسه تفاجأة بيه لزمت رگبتي امسح عليه إحس اختنگت وما اعرف شأسوي 

فات علينا بُـرهان سلم وگعد على المكتب وگال الكم خمس دقايق راجعوا الموضوع حتى اوزع عليكم الاسئله ، بوقتها جان عدنا أمتحان من عشرة بالمادة الياخذنا بيها بُـرهـان ، گام يوسف سأله 

-- أستاذ شكو ليش الجيش جايين للجامعة خو ماكو شي

-- يا جيش

-- الجيش العراقي قبل شوية فاتت مجموعة واستقبلهم العميد وصعدوا بالعمادة فوگ 

-- ما اعرف والله جنت ما موجود هسه فتت للجامعة وگبل عليكم اجيت 

-- خاف اكو شي مو زين صاير

-- اكيد لا بس احتمال زيارة روتينيه لا اكثر ولا اقل

رجع يوسـف گعد و بُـرهـان طلع نقاله ما ادري شكتب بيه وراها گال يلا انتهى الوقت شيلوا الملازم

نزلنا ملازمنا والكتب بالگاع وصاح على يوسف اجى وياه و افتروا علينا وزعوا الاسئلة

لزمت الاسئلة جايب سؤالين بس واثنينهن قريتهن وحافظتهن مثل أسمي دنگت اريد احلهن ما اتذكرتهن طارن من راسي

استغفرت ربي وقريت الفاتحة الام البنين حاولت بكل الطرق اتذكر ماكو انمسحن مسح من دماغي

نزلت راسي على فوگ الرحله وغمضت عيوني واردد لا حول ولا قوة الا بالله، نفس الشي ماكو اصلاً مو بس هيج حتى أسمي من كتبته خربطت بيه من گد ما متوترة من جيت منـاف مو عاد اتذكر الاجوبة

و الأمتحان

الوقت جاي يمشي وراح يسحب من عدنا الاوراق وانا بعدني كلشي ما مجاوبة احس ضاع عليه الأمتحان وبعد ما الحگ اكتب الاجوبة گمت ابچي

وعبالك جنت مختنگه و لگيت حچه ابچي عليها بقيت اناشغ مناشغ ما اريد صوتي يطلع بس بُـرهان انتبه عليه واجى سألني

-- ليش تبچين شبيج

-- ما اتذكر الاجوبة

-- شنو ما قارية

-- لا قارية وحافظتهن مثل اسمي بس ما جاي اتذكرهن نسيتهن 

-- هدي نفسج لا تتوترين وصلِ على النبي

-- ما اتذكر استاذ

حچيتها وحطيت إديه على وجهي ميته بچي رجع گال

-- گولي يا الله ما مستاهله كل هذا البچي عوفي اعيدلج الامتحان باچر مو مشكلة كافي مسحي دموعج 

ما رديت شي بس مسحت وجهي وراها افتر عليهم سحب الاوراق منهم و طلع اول ما طلع گامت يُـمن سلطان اجت وگفت  يمي و گالت بصوت ناصي محد يسمع غيري انا و ورود و هديل جنه گاعدين صفه 

-- اي عاد أستاذ بُـرهان كلشي ولا دموعج الحلوة يأجل الأمتحان وابو الأمتحان الخاطر ما تضوجين ست يُـمن حبيبة القلب والروح هههه و الله زين انوب تحچي عليه 

ما جاوبتها ابد وهيَ افترت وطلعت من القاعة بين ما اجى غير أستاذ يلا رجعت طبت 

بيومها ما گدرت اخلص الدوام كله بس خلصت المحاضرة الثانية خابرت على عباس اجاني و طلعت للبيت سألتني امي شبيج ليش راجعه من وكت رديت راسي يوجعني 

ما حچيت الها شي لان ادري بيها بس تسمع بيه جاي للجامعة تسويها هوسه واحتمال تروح عليه وتعاركة گلت ليش احچي شو هوَ لا اجاني ولا وصل يمي ولا حتى حچى وياي جوز عنده مهمه جوز واجبه جبره يجي شكو بعد اخذها على روحي واكبر السالفه 

ثاني يوم من داومت شفت ريـام أخت بُـرهـان واگف بـباب القسم مالتنا اول مره ما عرفتها بعدين يلا لان متغيرة وصايرة كلش حلوة اول ما شافتني ضحكت واجت عليها باستني وانا رجعت بستها

ريـام :- عزااا شگد مشتاقلج 

يُـمن :- انا اكثر الله شاهد 

-- شنو هاي صايرة تجننين كبرانه وحليانه  اكثر من قبل شتاكلين عيني عسل خو ما عسل 

-- عيونج الحلوة والله و انتِ ما شاء الله عليح صايرة تخبلين 

-- شلونج اخبارج 

-- الحمدلله انتِ شلونج خالتي شلونها

-- الحمدلله زينين ، بشريني شخبار الدراسة

-- زينه نوعاً ما

-- الله يساعدج صح شوية بيها صعوبة بس انتِ لان بطلة وشاطرة تحسينها زينه 

-- جوز صحيح لان أنا شاطرة بس ابشرج البارحة ما جاوبت بـ أمتحان اخوج 

حچيت هيج وضحكت ردت 

-- هههه إذا على أخوي كلش سهله ومحلوله لان يعرف بيج شاطرة ومجتهدة كل مره يذكرج شلون تعبانة على دراستج ونفسج 

-- الله يحفظه ورده أستاذ يُـرهان

-- حبيبتي والله شگد مشتاقة نسولف ونگعد 

--  انا اكثر والله ، شعحب اليوم هنا

-- صار اكثر من مره اجي بس ما اشوفج مره گال بُـرهان مريضة والمره الثانية جانت عندج محاضرة وما گدرت انتظرها تخلص لان عندي شغل ومره دورتج وما لگيتج 

-- ولا ادري والله زين شعجب تجين هنا

-- قدمت على الماجستير وجاي اراجع 

-- ها زين الف مبروك 

-- الله يبارك بيج حبيبتي يوم تخرج ونفرح بيج

-- الله يسلمج رحم الله والديج 

-- يلا حبيبتي فوتي المحاضرتج اخرتج إني بس حبيت أسلم عليج 

-- حبيبتي سلميلي على خالتي

-- الله يسلمج 

طبيت جوى وهيَ راحت خلص اليوم كلش طبيعي ماكو اي شي يذكر لحد قبل المحاضرة الأخيرة جان عدنا بُــرهان وعلى أساس يمتحني بس ما امتحني سكت عن الموضوع وأنا ما گدرت اسأله گدام الطلاب 

لحد ما خلصنا المحاضرة وطلع طلعت وراه صحت عليه أستاذ وگف ودار عليه

ويگول 

-- اهلاً يُـمن تفضلي

-- ما امتحنتني 

-- الأسبوع الجاي عدكم أمتحان جديد شدي حيلج بيه 

-- چا بهذا الأمتحان ما راح تحسبلي درجة عليه

-- راح احسب درجة الأمتحان الجاي للأثنين شدي حيلج عليه واقري زين حتى تحصلين درجة زين 

أبتسمت ورديت

-- شكراً 

-- العفو 

افتر و راح اول ما راح درت وجهه الجهة القاعة شفت هديل واگف قريب علينا بس شافتني باوعت عليها اجت بسرعة و تگول

-- شنو راح ينطيج درجة بدون أمتحان

-- اكيد لا بس الأمتحان الجاي راح يحسبه الي مال أثنين

-- اي كلش زين لعد شدي حيلج 

-- ان شاءالله

طلعنا ورود ويانا تمشينا ثلاثتنا سوى نريد   نرتاح كم دقيقة لان المحاضرة الأخيرة عدنا دكتور بهاء، ويا ما نزل بعدنا ما طالعين شفت منـاف واگـف بـباب القسم هوَ وبعد ويا اثنين ولد بس هاي المره لابس مدني يعني ما لابس عسكري اول ما شفته من الخوف والتوتر عثرت بس الحمدلله سيطرت على روحي وما طحت دار وجهه وباوع عليه و گـال بصوت واضح 

-- الله 

اجيت ابچي من الرهبه الانا بيها ما عرفت شأسوي ولا وين اروح و وين اشرد منه  طلعت مني فعل لا أرادية و لزمت ايد ورود قوي احاول اسند روحي عليها حتى لا اطيح مره ثانية لان رجلية ترجف ما بعد ما اسيطر عليهن هيَ باوعت عليه مستغربه خوفي ورجفتي سألتني

-- شبيج 

-- طلعيني حبابة راح اوگع 

لزمتني من إيدي ومشت بيه تعدينا من يمهم وإني ما بقت اية ما قريتها بس كون ما يوگف بطريقي گدام الناس و يوگفني

اول ما مشينا منهم مسافة گالت هديل

-- هذا الولد طالب لو أستاذ جديد اول مره اشوفه

ورود :- يا ولد

-- هذا الواگف بباب القسم الگال اليُـمن الله 

-- ما ادري والله بس يمكن إني شايفته مدري مشبها عليه 

-- لا وين شايفته إني اول مره اشوفه هنا

-- ما ادري بعد بس اعتقد شكلة مو غريب عليه عزااا هذا مو الضابط اللي اجى البارحة لا واحد يشبها

-- ما اعتقد جوز يشبها

-- يمكن ما ادري بعد ، يُـمن شبيج ليش هيج ترجفين

-- ما بيه شي 

-- لعد ليش ترجفين و وجهج صار أصفر

-- يمكن هبط ضغطي 

-- تعاي گعدي ارتاحي بين ما اجيب مي واجي 

راحت ورود تجيب ماي وانا وهديل گعدنا 

بعدنا هسـه گعدنا ما حسيت غير منـاف صار فوگانا رفعت راسي عيني صارت بعينه وإحس گلبي يرجف گبل جسمي بسرعة گال الهديل 

-- بلا زحمه ممكن تتركينا دقيقة

هديل گامت من المكان بنفس اللحظة وهوَ گعد گبالي رجليه ماتت اريد اتحرك ما اگدر دمي نشف عيوني گامت تحرگني باوع عليه وطول بنظرته وعيونه تلمع و وراها گال

-- اخ يابة شگد مشتاقلج 

بسرعة بچيت ليش بچيت ما ادري يمكن انا هم مشتاقتله وما ادري بروحي طلع كلينس باكيت صغير من جيبه وسحب وحده منه وحطاها گبالي گمت من مكاني لزم ايدي قوي 

درت وجهي اباوع منا ومنا اخاف الطلاب تشوفني وانا من غير عرس مزفوفه رجع گال

-- گعدي بس دقيقة وحده 

-- منا الطلاب الله يخليك لا تسويلنا سالفه

-- بس دقيقة احچي وياج حبابة 

-- ما عندي حچي وياك اللي بينا منتهي من زمان

-- منو يگول منتهي إذا يمج انتهى يمي ما انتهى لحظة وحده، يُـمن إني أسف واعتذر غلطت بحقج وأذيتج وكسرت خاطرج بس والله ما جنت متمني توصل بيناتنا بهاي الطريقة بس اجتني ساعة شيطان وعقلي ما حسب للموضوع صح و مشيت وره گلبي وخسرتج 

-- عندي محاضرة من رخصتك

-- حچيت ويا الدكتور وگال لا تحضر عادي بس گعدي دقيقة الله يخليج 

رجعت گعدت و اباوع عليه وراها گتله

-- تذكر من گتلك أنا تعبانه ورديتلي راح اشيل التعب منج واصيرلج سند وامانج 

واعوضج واحمج و و و إلى ماله نهاية 

--  لا ما نسيت وإني عند وعدي اليوم باچر وقبل سنه وبعد الف سنه وما قصرت بحقج بس الموضوع مو بـ ايدي مشكلتي كلش صعبة وما اگدر اسيطر على نفسي تدرين ليش لان اخاف اخسرج اخاف تروحين مني اغار عليج ما اريد احد يشوفج غيري ولا تحچين ويا غيري ولا تضحكين ويا غيري اي إني اناني وكلب ابن كلب بس أحبج واموت عليج 

-- الحب وحده ما يكفي واللي سويته وياي ما اگدر انسى

-- ولا إني اگدر انسى وداعتج كل للحظة عشتها وياج بهذيج الساعة محفورة بعقلي وبگلبي تدرين من اتذكرج شيصير بيه هيج احس قشعريرة تصير بكل جسمي والله العظيم صار سنه نوم ما انام تعبت وعيونج تعبت 

شلت الكلينس من الميز ومسحت عيوني ورجعت رديت 

-- انا وياك طريقنا مسدود وما نرهم بيوم من الأيام لان انتَ من الأصل صعب وبنفس الوكت ما تگدر تتخلص من الماضي وعندك عقدة من النسوان وما

تثق بيهن ولا تستنظفهن ولا تصدگهن 

-- صح تلعب نفسي منهن بس مو منج لان انتِ الوحيدة الابوسج من كل مكان واكل من نفس خاشوكتج واللزمج و اگعدج بحظني واشمج و حظنج وانتَ الوحيدة العشت وياج شعور العلاقة الزوجية وحبيتها و ذبت بيه من بعد سنوات طويله جنت مخلصها مشمئز وكارها  ولعبانة  نفسي منها ومن كل جنس حواء صح الصار غصب عنج و كرهتيني بسببه وخسرتج بسببه بس والله العظيم على الرغم من كل اللي صار عرفت أنتِ دواي الوحيد وعلاجي الشفيت بيه من بعد سنين المرض الطويلة يُـمن جاي اشوفج النظيفة الوحيدة بهذا المجتمع القذر  الله يخليج كافي تعبت 

بقيت ساكته ما ادري شگول ضاع الحچي مني وتخربط وضعي رجع هوَ يگـول

-- حتى الأنبياء غلطوا والله انطاهم فرصة للتوبة وسامحهم وانتِ اعرفج تنگطين طيبة وحنينه ما معقوله تقسين عليه كل هاي القسوة وما تسامحيني مو كافي سنه كامل فراك وجفه و عقاب حرام عليج 

-- وشنو اللي تغير بهاي السنه بطلت تشك بطلت تغار غيرة مالها مبرر ؟ 

-- جربي وشوفي 

استغفرت ربي ودرت وجهي اباوع ورود وهديل گاعدات بالجهه الثانية هوَ باوع للمكان الاباوع عليه وگـال

-- ورود حبابة وصديقتج من اول السنه

و من عائله بسيطه مالها زايده ناقصة وهديل صار فترة قليله اجت نقل من الشعبة الثانية واول ما اجت صادقتج ودخلت بينج وبين ورود ما فكرتي شنو سبب نقلها وليش صادقتج بس انتِ وصارت مقرب منج كل هذا القرب 

باوعتله مصدومة ورجعت اباوع للبنات شنو هاي يعرف ورود ويعرف هديل وشوكت انقلت وشوكت اجت فتحت عيوني متفاجأة  أبتسم ورد

-- فدوة للعيون الحلوة المشتاق الهن 

-- وين تعرف البنات وشنو قصدك بخصوص هديـل

-- قصدي واضح 

-- لا مو اضح ما فهمتك

-- ما فهمتي لان انتِ طيبة وعلى نيتج عبالج الناس كلها مثلج شوفي يا عمري خليني اعترف اعتراف واحرك كل اوراقي ما دام شكلج بيج مجال ترجعين وگلبج شكلة تحرك وحن 

حچى هيج وضحك درت وجهي من عنده ما اتحمل اشوف ضحكته لان شكلي راح 

انسحل واعترف طلعت احبه ومشتاقتله ومشتاقه الضحكته وسوالفه والهسه ما ناسيته 

منـاف :- من اول يوم انفصلنا وإني ما عايفج ابد امتحاناتج يومية اجي اوگف قريب على المدرسة واشوفج من طبين ومن اطلعين واعرفج من وجهج إذا مجاوبه لو لا حتى بيوم الرياضيات طلعتي ضايجة و گفتي تحچين ويا امج بعصبيه خمنت من شكلج وحركاتج جاي تحچين على التربية لان جايبين الأسئله صعبه وامج باستج تهدي بيج مو صح 

أبتسمت ورفعت ايدي حكيت خشمي سريع ما اريده يشوفني بهذا المنظر أبتسم ورجع گال

-- وراها طلعتي معدل زين وطلعلج هندسة بس ما ردتي هندسة واجيتي هنا واني من عرفت اجيت قبلج شفت الوضع الاساتذة الدكاترة العميد وطلعوا اغلبهم عرف بس المفاجأة الكبرى طلع دكتـور بهاء صديقي من زمن طويل وبالاصل جانوا جيرانه وشالوا قبل كم سنه وانقطعت اخبارة عنـي ومن اجيت هنا لگيت 

-- دكتور بهاء صديقك

-- اي ، ومن داومت ما گدر ياخذكم بالكورس الاول انطيته أسمج و وصيته عليج وره فترة اجاني گال انتَ عزيز عليه وصعب عليه احچيلك هذا الشي بس لازم تعرف ويصير عندك خبر بالموضوع لان انتَ بمثابة اخوي وصديقي الابنية الوصيتني عليها طلعت مو راحه وعليها علامة اكس 

بوقتها تخبلت شنو اكس شنو مو راحه اجيت ابچي اله شوية 

رجع سكت انوب ضحك واستغفر وراها كمل كلامة 

-- المهم گتله متوهم وين اكو هيج ردلي لا والله ما متوهم الابنية معروفه بالجامعة ومجطله ويا كذا أستاذ ودكتور وطالب

بيومها تخبلت وكل شوية اگول مستحيل حبيبة گلبي واعرفها كلش زين ما تسويها هيَ تستحي من خيالها ما معقوله 

مستحيل طلبت منه يتأكد من جديد راح ورجع وره يومين گال متأكد والابنية حتى حجاب ما لابسه ويسمونها ام شعر الأحمر هنا انسطرت سطره دخيلك يا الله ذبت الحجاب وانحرفت الأبنية باخر عمرها چا والصلاة والصوم لاااا راخ اتخبل زين إني بين فتره وفتره اوگف انتظرج من طلعين من البيت واشوفج بالحجاب صح ذبيتي العباية بس ملابسج مرتبه ومستورة وحجابج براسج مستحيل قابل من تفوتين للجامعة تتشلتحين لا ما اصدگ

-- هههههه

اول ما ضحكت باوعلي وأبتسم بقى مده طويلة يباوعلي خجلت وتوترت من نظراته درت وجهي منه رجع گال

-- فدوة للضحكة الحلوة الاموت عليها وعلى صاحبتها وداعت شكلج وملامحج وهدوئج و برأتج اموت عليج

ما رديت بقيت ساكته وهوَ رجع يكمل كلامه ويگول

-- وره ما گال شعرها أحمر وما لابسه حجاب عاد إني گتله مستحيل مو هيَ تأكدلي من اسمها الثلاثي و انطيته أسمج الثلاثي ساعة ورجع خابرني گال طلعت مو هيَ رديتله اي ادري مو هيَ ومستحيل بيوم من الايام تصير مثلها

المهم هنا هوَ ما حان ياخذكم وراها باشرتوا بالكورس الثاني واخذكم جان يحچيلي شلون انتِ شاطرة وحبابة ومالج صوت ولا عندج صديقات ولا وكل الدكاترة والاساتذة الياخذونج يمدحون بيج جنت منبه عليه ما يركز ويا حتى لا احد ينتبه ويروح وينبهج ويحذرج منه وتالي تبقين تخافين من عنده گتله عاملها حالها حال الطلاب العندك لحد ما صارت مشكلتج ويا يُـمن الساقطة بيومها خابرني من رجع من الدوام وحچالي يابة شصار بحالي احس گبيت وطفيت ولو لازمها بساعتها اله ارفعها فلقه من شعفتها الحمرة

أبتسمت بدون ما ارد رجع گال

منـاف :- عاد گال فصلوها لا يضل بالك والابنية يُـمن غازي حبابة وما بيها اذية وما تسوي الغلط وبخصوص أستاذ بُـرهان يگول من معارفي وما عندي شي وياها وتخربطت و وصلتها للبيت 

سكت شوية وسحب باكيت الجكاير طلع جكارة شغلها واخذ منها نفس طويل وزفره ليفوك وراها گـال

-- بصراحه الوضع قلقتني مال معارفي

و وصلتها وساعدتها هذا ما يصرف يمي اليوم معارفي باجر تطير مني حرت شلون اعرف تحركاتج الخاصة بله هسه العامة مسيطر عليها الخاصة شلون ما ادري 

حچى هيج وضحك ودار وجهه للجهه الگاعدات بيها البنات ما لگاهن انوب باوع عليه و گال

-- راحت 

-- منو 

-- المساعد السري هههههه

-- منو قصدك

-- هديل 

-- الله عليك

هز راسه وهوَ يضحك ويگول

-- بيومها رحت البهاء بالساعة بالوحدة بالليل البيتهم گعدته من النوم وگتله

دبرني

ردلي 

-- شدبر شبيك منـاف الساعة بالوحدة بالليل تخبلت 

-- راح اموت احس گلبي يوجعني راح تروح مني 

-- روح ارتاح وسهلة إني ارتب الموضوع 

رجعت بوجهي للدائرة هذا الاسم مار عليه بس وين ما اتذكر طلعت كتاب الدعوة مالتج لليوم محتفظ بيه بالمكتب مالتي 

راجعت الاسماء الموجودة بالدعوة ما دام هذا الاستاذ يگول من معارفي وأسمه مار عليه من قبل معنى من طرف طليقج لان امج ما عدها احد حسب ما اعرف اهلها كلهم متوفين و عمج هاشـم اعرفه واعرف كل اقربائه إذن هذا الأستاذ لو واحد من اهلج يعني عمومتج اللي بالچبايش وجاي هنا يدرس لو واحد من اقارب طليقج عادت من طلعت الكتاب و راجعت الاسماء لگيت اسمه ويا الشهود هنا صفنت صفنه بحيث للصبح ما شلت راسي من الكتاب وداعتج للفجر مثبت اديه على وجهه ومگابل الاسم وگاعد اخر شي رفعت راسي لگيت رگبتي مشنوطه 

-- هههههه

-- اريد الله لا يحرمني من هاي الضحك ما اريد شي ثاني 

-- وبعدين 

-- هههههه ، بعدين اول ما راح بهـاء للدوام خابرته گال اليوم ما جاية هنا گلت بطلت

و بعد ما ادوم ادري بيج ما تتحملين هيج كلام رجع بهاء گال

-- راح انقل وحده من البنات يمها بالقاعة وهيَ تجيب معلومات كامله عنها

-- ما اعتقد لان هيَ ما تسوي علاقات راح تخلص السنه وما عدها غير صديقة وحده 

-- زين خلينا نشوف صديقتها 

-- لااا دير بالك 

-- لعد شنو الحل 

-- ما ادري دبر الموضوع بقت يمكن 

گال سهلة و الليل رجع خابرني وحچالي 

ناقل وحده من البنات بنفس القاعة مالتكم خفت لا تعرفين بالموضوع وتنلاص عليه أكثر رجع گال

-- لا تخاف هاي الابنية وحده من الطالبات اللي اعرفهن زين واگدر اعتمد عليها لان الابنية اهلها بالمحمودية و حالتهم كلش تعبانه وگاعدة ويا خالتها وبيبيتها جربت عرضت عليها مبلغ مقابل المساعده گالت راح تساعدنا بس ما تريد فلوس تريدني اساعدها بالدرجات وبصراحة هيَ زينه يعني شاطر حتى لو ساعدتها ما راح يأثر لذلك وافقت وهذا كله الخاطرك

-- ممنون منك هاي وگفتك ما انساها طول العمر

-- تدلل أبو فهـد الغالي 

يُـمن :-  يعني هديـل جاسوسة عندك

-- لا مو هيج بس تگدرين تگولين صديقة لجميع الاطراف هههههه

-- تمام وبعدين 

-- منا وگامت هديل توصلي المعلومات كامله بس اكثر الوقت تشكي منج تگول ما تحچي وساكته وما تشارك تفاصيلها وياي عاد إني ما تفاجأت لان اعرف بيج شلون سايلنت وكل وقتج لا اسمع ولا ارى ولا اتكلم  

--  زين والله كل هذا صاير وانا ما ادري 

-- حبيبتي انتِ مطفيه وين تدرين 

-- زين و تميـم شلون تصالحتوا 

-- رحت عليه للدوام وصالحته وهذا كله الخاطر ست البنات شأسوي يعني 

-- وشلون قنعته لان اخر مره حچى وياي جان متعاطف وياك ويحاول يفوت بيناتنا واسطة خير 

-- حچينا إني وياه هواي واكو مواضيع شبابية متعرفينها انتَ اتفقنا عليها وحچينا بيها وصفت بيناتنا الأمور

بقيت ساكته وهوَ سكت ويباوع عليه وراها گال 

-- هسه شگلتي كل هذا التعب الأنتظار ما معقوله ما استحق فرصه 

-- ما ادري 

-- فرصة أخيره وإذا شفتيني بعدني بنفس طبعي الج حق تعوفيني وبعد ابد ما اتقرب يمج 

بقيت ساكته ما جاوبت رجع گـال

-- بس فكري شگد إني أحبج وشگد اتمناج والله ماكو احد بالدنيا يحبج بگد ولا اكو احد يخاف عليج بگد 

نفس الشي ساكته ما ارد رجع گام من مكانه و گـال

-- يلا گومي فوتي للمحاضرة 

-- خلصت المحاضرة قابل منتظريني 

-- زين لعد گومي اوصلج للبيت

-- لا أنا ارجع بالخط 

-- تمام براحتج اتصلي على الخط يجي عليج 

طلعت النقال و دگيت على عباس هوَ جان واگف اول ما گلت الو رجع گعد هنا تأكدت ميه بالميه ما يگدر يتغير ولا يگدر يتخلص من هذا المرض بس سكتت وما حكمت من على الموقف صح مبين عليه بس مع ذلك ما حچى شي ولا علق الهذا السبب سكتت ، جاوبني عباس گتله 

-- هلاو عباس 

-- هلا خيتي هلا بيج

-- إني كملت وين انتَ 

-- ربع ساعة واوصل

-- تمام 

قفلته من عنده وضميت النقال رجع سألني

-- شوكت يوصل

-- ربع ساعة 

-- گومي للكافتريا نتغده

-- لا شكراً ما اريد

-- نشرب گهوة

-- لا ما اريد

-- جاي 

-- شكراً ما مشتهيه شي

-- مي 

-- ما اريد 

-- لا تردين شدعوة عاد هيج صايرة صلِ على النبي 

-- اللهم صل على محمد وال محمد 

حچيت هيج ودرت وجهي اباوع على الطلاب شفت طلاب قاعتي طلعوا معناها خلصت المحاضرة إحس معدتي تقلصت شافوني وراح يسولي حجايه ياربي، گتله

-- طلاب قاعتي طلعوا وكلهم جاي يباوعون علينا 

-- وشنو المشكلة إني اريدهم يباوعون ويشوفونا ويشبعون شوف 

-- راح يسولهم حجاية عليه وأنا بلا عرس مزفوفه 

رفع حواجبه اثنينهن وشكلة مدري شلون صار ورد

-- شنو قصدج ؟ 

-- هاي يُـمن وين ما تروح تحچي عليه 

-- شتگول 

-- مو على أساس تعرف كلشي عني شعجب ما تعرف شتگول عليه

-- اللي اعرف حچت بموضوع بُـرهان وراها شمرت الها كم كلمها وبعدين سكتت

و نسدت السالفة لو اكو شي ثاني إني ما اعرفه 

-- دكتور بهاء بـ اخر فترة صار يساعدني هواي و يتساهل وياي فـ هيَ گامت وين ما تگعد تگول عندي علاقه ويا دكتور بهاء وأستاذ بُـرهان نفس الشي يعني يقدرني ويحترمني وهيَ نفس الموضوع تكرره على أساس أنا عندي شي وياهم اثنينهم 

-- وهو صدگ بُـرهـان جاي يميزج عن الباقين 

باوعت عليه وأبتسمت وهزيت راسي بسرعة ردلي

-- لا تفهمين غلط يعني سألت هيج عادي حتى افهم ليش يعني جاي تگول عندج علاقة بيه قصدج هوَ صدگ يميزج عنهم لدرجة خلاها تحچي هذا الحچي 

-- لا يميزني ولا شي بس يحترمني وما يحترمها وهذا الشي هوَ اللي زاعجها 

بعدني نحچي بيها وما انحس اله اجت بشحمها ولحمها فوگانا وگفت والضحكة والمواعه فد شي لعبان نفس و گالت 

-- هلاوو 

رفعنا راسنا اثنينا عليها متفاجأين انا سكتت وإحس راح ابچي ياربي انفضحت وهاي الحقيرة تقصدت تجي وتشوفني روحها حتى تلزم عليه لزمه بس مـناف الظاهر يعرف شكلها ويعرف كلشي عنها بسرعة رد عليه 

-- هلا يابة تفضلي محتاجة شي 

-- لا بس جنت طالعة للبيت وشفتكم گاعدين حبيت اسلم عليكم  إني يُـمن سلطان زميلة يُـمن غازي بنفس الشعبة 

-- اهلاً وسهلاً تشرفنا 

-- وحضرتك منو أستاذ جديد عدنا

-- لا إني الـ... منـاف خطيب يُـمن زميتلج اللي وياج بنفس الشعبة  

عدلت وگفتها و شكلها هبطت وراها ردت 

-- اهلاً وسهلاً بيك أعتذر زعجتكم بس حبيت اسلم عليكم 

-- بالعكس فرصة سعيدة شفتج وتعرفت عليج لان يُـمن حچتلج عنج وجنت كلش حاب اشوفج بس ما صارتلي فرصة اجي هنا واشوفج 

هزت راسها مبتسمة برتباك وراها استأذنت وراحت اول ما راحت گتله

-- ليش تگول خطيبي 

-- وليش ما اگول انتِ مو خطيبتي وحبيبتي وزوجتي 

حچى اخر كلمة وغمزلي رديت

-- لا  مو خطيبتك ولا زوجتك 

-- بس حبيبتي مو 

-- منـاف أمي إذا عرفت بگعدتي هاي وياك وكلامك هذا تذبحني وتذبحك 

-- هههههه عاد شهيناز دوله وعلم عود ما تسويها لا والله تسويها وتسوي ابوها 

درت وجهي ضايجة وخايفه من امي بنفس الوقت رجع گال

-- تدرين شمسوية بـ اهلي بيوم المشكلة 

الحمدلله ما جنت موجود بالبيت جان كتلتني بدون تحذير 

-- لعد شعبالك تايهتلك اصلاً جانت ناوية تروح الدوامك وتخزيك هناك بس عمي ما خلاها 

-- هههههههه 

-- على شنو تضحك

-- بصراحه إني احب الاكشن ليش عمج ما خلاها تجي چان رفعت بيها تقرير أربعة أرهاب هيَ وعمج وتميم واخذتج بنفس اليوم عـروسة حلوة بيتي وجان صارت هسه عدنا أبنية تخبل تشبهج أخت الفهودي 

-- ممكن اسألك سؤال

-- كله اجوبه گولي يروحي 

-- شلون انطاك گلبك تگول للناس هيَ انطتني المفتاح وهاي مو اول مره تصير بيناتنا علاقـة

سكت ما رد وراها اخذ نفس طويل وزفره وثبت اديه على الطبله ودخلهن وحده بوحده ونزل راسه ورد

-- مو إني هذا أبوي رد يكحلها عماها وما ادري بيه من حاچي هذا الحچي ومن عرفت كسرت الدنيا ورجعت خابرت شكو واحد انحچى يمه هذا الحچي وبريت موقفج گدامهم 

-- زين ليش هيج يگول عليه مو أنا احبه وأحترمه 

-- هوَ هم يحبج ويحترمج بس ما عرف يتصرف وگال هيج حتى لا عمج يسويها سالفه دوسه بيت ما دوسه بيت 

-- ويطعني بشرفج حتى لا عمي يسوي سالفه دوسه بيت عليكم

-- لا مو هذا القصد وما عاش اللي يطعنج يشرفج انتِ اشرف وحده مرت عليه وعلى الخلفوني بس هوَ حسبها من باب إني وياج عاقدين والكل يعرف انتِ زوجتي على سنه الله ورسوله عباله إذا صارت بيناتنا علاقة ماكو لا عيب ولا حرام 

-- منو انطاك المفتاح 

أبتسم ودار وجهه حاير يجاوب لو لا رجعت سألته من جديد

-- منو انطاك المفتاح زهراء

-- لا إني اخذته

-- منـاف 

أبتسم ورد

-- حبيبة گلب منـاف 

-- زهراء انطتك المفتاح مو هيج

-- اي بس هيَ ما عليها والله إني ورطتها 

-- شگد حقيرة لعد 

ضحك ورد 

-- لا تغلطين على اختي 

-- تروح من وجهي انتِ واختك 

-- ههههههههه ولج صاير اللسانج طويل 

-- هاي مو أنا هاي نتائج عمايلكم وياي

-- هسه مو امج كتلها ونعلت والديها ورجلها رجع كتلها واخذت الها مدري شگد زعلانه وامي يوميه تحط الها ثلج لعيونها وعصارة الوجهها من گد ما مزورتها شهيناز ومشوها وجهها بظافرها بعدين شنو سالفه الخاميش انتِ وامج بزازين خو ما بزازين أسبوع كامل إني مغطي رگبتي بعصابه استحي اطلعها بالدوام وخدي منو يسأل اگله انجرحت بمكينة الحلاقة 

-- اي تستاهلون حتى مره ثانية ما تغلطون بحقنا 

سحب ايديه ويباوع على اظافري وراها گال

-- لج هسه ترحين منا گبل تقرضي اظافر الـ...  هاي فهمتي لو الچذبة عبرت مره على الضباط مره ثانية ما تعبر عليهم 

-- لازم ناوي تتعدى حدودك مره ثانية 

-- بصراحة اتمنى بس ما اسويها واعيش وياج نفس الإحساس ونفس الشعور التوبة والله منا لحد الزواج حتى أيدج ما اللزمها

درت وجهي منه وبنفس اللحظة رمشلي عباس شلت جنطتي وگفت گام هوَ وگف وياي وگال اوصلج للباب رديت 

-- لا 

-- على راحتج راح اشوف بهاء قبل لا اطلع ديري بالج على نفسج 

حچى هيج بس چذاب ما راح البهاء مشى وراي لحد ما طلعت وصعدت بالسيارة بعدنا ما متحركين وشفت دكتور بهـاء طلع وگف يمه 

رجعنا للبيت وابد ما جبت طاري الامي خفت منها وبنفس الوكت بعدني اريد افكر واشوف نفسي واشوفه صدگ تغير لو بعده نفس ما هوَ بهذاك الوكت يلا احچيلها الامي

لليل خابرتني ورود تسأل منو هذا وشكو 

گتلها باچر احچيلج مو مال تليفون، وره ما خلصنا صلاة المغرب والعشة اندگ الباب 

راحت أمي تفتحه سمعت صوت مـراد فات بسرعة لبست حجابي بس تفاجأت من شفته جاي هوَ و زهراء 

امي استقبلتهم بس من وره خشمها ما گدرت اطردها لان مـراد جاي وياها وانا اول  شفتها فاتت خرطت العافية گلت هذا اخوها وداعها تعتذر وتبدي صفحة جديدة بس تروح بس تحچي گدام امي وتگول گعدوا وحچوا بيناتهم 

اجت عليه باستني وتعتذر لان صارت مشاكل واهلها حچوا عليه ومنـاف تجاوز حدودة وياي بس لحد هسه بعدهي مصره مو هيَ الماخذه المفتاح غلست من الموضوع الخاطر مـراد ما تدري بـ اخوها اليوم اعترف عليها وعلى جميع العائله 

گعدت يمنا و خايفة ومتوترة وحتى مراد متوتر لحد ما اجى عمي والظاهر عمي عنده علم بجيتهم علينا يمكن مـراد منطيه خبر لان اجى جايب عشة وياه وحاسب حسابهم ويانا 

گمت للمطبخ احظر بالعشة رجع اندگ الباب رحت اشوف منو طلع تميم أبتسمت وفتحتله كملت السبحة اليوم جاي يشرهم على الحبل اول ما فات گال

-- زهراء هنا مو 

-- ههههه اي

-- كلش حلو 

-- لا عيب من مـراد خطية لا تحرجة

-- امشي لج عايف عبير بيت اهلها منتظرتني وجاية حتى اشوف اخر التطورات وتگولين عيب من مـراد

فات وأنا وره اضحك بقيت بالمطبخ احضر بالاكل واسمعه طب عليهم ويگول

-- حييي الله من زارنا 

مـراد :- ههههه الله محييك 

-- شلونج مرت أخوي

-- هلاو أبو علاوي شلونك

-- هسه صرت زين من شفتج يم خالتي 

و گاعدات مثل الحبايب عين الله عيلجن 

هاشـم :- ان شاءالله احباب واهل وعائلة وحده بس أنتَ اطلع من الحمرة 

-- مع الأسف عليك أبو تميم معقولة هيج تحچي وياي 

شهيناز :- ابو علاوي زلمتي المعدل والله إني ما اقبل احد يحچي عليك 

-- خالتي الصاكه شكراً جاي تخجليتي 

اجيت انا جبت الاكل و گعدنا كلنه بسفرة وحده اول ما بدينا ناكل گال تميم 

-- اي زهراء لحد هسه ما گلتي شنو بيج ولد أبنية

-- ما مبين الهسه

شهيناز :- شعجب الهسه ما تعرفين الجنس حسب ما اعرف انتِ بالثامن يمكن ما اعرف فتى بشهرج 

-- اي خاله بس أخر مره رحت للدكتورة گالت ساد رجليه و ما واضح شنو جنسه

-- خير ان شاءالله المهم الخلقة التامة 

تميم :- إذا ولد سموا منـاف المعقد 

حچي هيج وشال ادية وحطها يمه راسه ويأشر عود مخبل وكمل كلامة ويگول

-- وإذا ابنية يُـمن الجميلة حتى إذا طلع ولد وسمينا منـاف كل ما نشوفه نتذكر أخوج وننعل الساعة السودة العرفنا بيها وإذا ابنية وسميناها يُـمن اخوج كل ما يشوفها يموت سبع موتات بالساعة 

أنا أبتسمت ونزلت راسي و هيَ بقت ساكته ما ردت وامي ضاجت لان ذكرة گدامي ما تريد الموضوع ينفتح يمي بس عمي جاوبه

-- اشو انتَ ما عندك صاحبة مو البارحة جان خوش ولد بس شوية عصبي ومار بتجربة صعب والله يساعدج 

-- حچي الليل يمحيي النهار 

شهيناز :- ليش ما جبت عبير وياك

-- بيت اهلها من اطلع منكم اروح عليها

رجعنا سكتنا وهمَ حسوا على امي غيرت الموضوع و فهموها ما تريدهم يحچون يمي بهذت الموضوع لحد ما خلصنا عشة 

و شلت السفرة وجبت الجاي 

تميم شرب جاي و طلع طلعت وراه وصحت عليه وگفنا بالحوش وانا اجيت يمه و گتله

-- البارحة منـاف اجى للجامعة هوَ ومجموعة من الجنود بـ اللبس العسكري ما اعرف شعدهم بس لا حچي وياي ولا وصل يمي واليوم رجع اجى بس اليوم لابس للبس مدني عادي وحچى وياي 

-- شحچى 

-- يريدني ارجعله

-- وانتِ شنو ردج وقرارج

-- ما ادري حايرة و اخاف ارجعله وانطيه فرصة وهاي المره اروح بيها 

-- جربيه قبل لا تنطيه الموافقه 

-- شلون يعني 

-- خلي يجي مره واثنين وثلاثة للجامعة ويشوفج ويشوف الوضع هناك إذا شفتيه متغير وعنده الموضوع عادي ما يدقق ويتنرفز من اقل شي معناها صدگ تغير وإذا اعصابة مشدودة و يحاول يماشي الوضع ويمثل هوَ متقبل لا هنا صرفي نظر عن الفكره كلها وسديها وياه من الأخير

-- هوَ هيج جاي افكر بس وأمي

-- شبيها امج 

-- إذا سمعت التقي بيه تلعب بيه لعب

-- ومنين تعرف قابل حاطه جواسيس عليج

-- لا بس انا ما اگدر اسوي هيج سوالف من وره ظهرها خطيه ثاقة بيه ومأمنه بيه شلون اكسرها واخونا الثقـه

-- يُـمن أنتِ كلش حبابة ومؤدبة زيادة عن اللزوم ليش ما تزوجيني وتخلصين من التفكير الزايد والفرص الزايدة اللي تردين تهدرينها 

-- ههههن مو صوجك صوجي أنا احچي وياك 

عفته وطبيت وهوَ ضحك وطلع ، اجيت گعدت يمهم يحچون لگيتهم يحچون مواضيع عادية وشكلها امي هدأت من ناحية زهـراء وتسولف وياها عادي مو مثل اول ما اجتوا ضلينا نحچي مواضيع عادية لحد ما راحوا 

و ثاني يوم بدلت و رحت للجامعة خلصت اول محاضرتين وطلعنا ريست انا و ورود

هديل اليوم غايبة ما جاية سألتني ورود على البارحة سولفت الها كل قصتي رجعت گالت

-- الله عليج يُـمن صار سنه إني وياج سوى وما خليت سالفه ما سولفتها يمج وانتِ ضامه عليه هيج موضوع 

-- ما ردت احد يعرف بيه منفصله اكثر من مره الناس ما ترحم والولد ما يصدگون يسمعون كلمه على ابنية يسونها حقل تجارب و كل شوية يجيها واحد يعرض روحه عليها 

-- حقج و الله يساعدج على كل المريتي بيه بس مع ذلك اني اشوف انطي فرصه المنـاف من كلامج عنه مبين كلش يحبج 

-- الله كريم

-- وهاي هديل البـ... خل تجي باچر  اله اطيح حظها

-- عوفيها تولي المهم عرفت منو دازها وهذا هو 

-- حتى لو لازم تترزل وتنشحت بعد ما تمشي ويانا طايحة الخظ اليوم باعتج المنـاف باچر تبيعج الغيرة هيج نماذج ما ينثق بيهن كلشي يسون 

سكتت لان كلامها صحيح وراها گمنا رجعنا عندنا محاضرة الأستاذ بُـرهان اول ما طبينا طب ورانا سلم على الطلاب و بدأ يشرح موضوع جديد بس اليوم مبين عليه ماله خلگ وضايج ضوجه الله وحده يعلم بيها

كل الطلاب انتبهت عليه بحيث من بدأت السنه لليوم هاي اول مره هيج يفوت ضايجة وماله خلك وحتى أعصابة ما مسيطر عليهن اول مره يعلي صوته ويرزل واحد من الطلاب هيج بهذا بصوت عالي 

الولد بوقتها دگ نقاله وهوَ سمع النقال يدگ لو لعب بيه جوله من صدگ اليوم طابگات عنده الكل تفاجئ بيه حتى بقينا ساكتين بدون صوت لحد ما خلص محاضرته بقى گاعد ما طلع گاموا الطلاب يطلعون واحد وراه واحد گمت انا حالي من حالهم اريد اطلع گال بصوت عالي بحيث الطلاب البعدهم ما طالعين كلهم سمعوا 

-- يُـمن ابقى دقيقة احچي وياج بلا زحمه عليج 

درت وجهي اباوع للطلاب ورجعت اباوع الورود متفاجأة لحد ما فرغت القاعة اجى عليه باوعلي وگال

-- يُـمن 

-- نعم أستاذ 

-- شنو اللي بيني وبينج 

-- شنو قصدك 

-- جاي اسألج ردي على السؤال مو ترجعين تجاوبيتي بسؤال ثاني 

-- ما بينا شي شبينا يعني انتَ أستاذي وانا طالبة يمك 

-- تمام إذا هيج الحچي ليش البارحة خطيبج بجيني و يهددني يريدني ابتعد منج وما اتقرب عليج واشيلج من راسي وما افكر بيج حتى بالحلم وإذا ما نفذت كلامة يحط بيه عبوة و يفجرني باب الجامعة 

يتبع........ 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا