مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 رواية عــروس الجبـــايــش الفصل الاول والثاني والثالث والرابع والخامس بــقلم يـــاســـة الموسوي 

رواية عــروس الجبـــايــش الفصل الاول والثاني والثالث والرابع والخامس بــقلم يـــاســـة الموسوي 

اما الأن الارض ارضي والمدار مداري 

والمكان مكاني والزمان زمانـي 

وبسم رب البدايات ينطلق المشوار  

المكان قضاء الچبايش المحافظه ذي قار

الـزمـان 2006 فتحنا الباب ودخلنا بهدوء گعدنا واحنه نسمع بدايـة الروايـة على للسان بطلتنا يُمـن 

يمُن اسمها يُمن وين اكو بالچبايش وحده اسمها يمُن اهوو بدأت سوالف الاسماء 

مسميتها يُمـن وهـي من الچبايش ؟؟ 

 

هدوء ايها الاحبـه ودعوا المسميات جانباً وفي الايام القادمـة نكشف لكم جميع المعاني اما الان التزموا الصمت رجاءً ودعونا نستمع الى بطلتنا وهي تسرد لكـم الـروايـة وتقـول 

-- صار علينا الليل و الصنطه بكل المكان هستوني غفيت و طب عمي مثل كل يوم

 و بدأ بسوالفه الاكرها واكره روحي وياها

غمضت عيوني حيل ولزمت الغطا قوي وارجف من الخوف وانا اسمعه و احس بيه

 كل يوم وكل ليلة اعيش وياهم هذا 

 هاي اللعبان نفس واسمعهم واسمع صوت أمي وبواچيها وصوت غلط ونعايل عمي عليها وعلى ابوي المرحوم 

من وره سوالفه هاي انحرمت من طفولتي وصرت اعرف كل سالفه فتحت عيوني على سوالف اكبر من عمري المفروض ما اعرفها ولا اشوفها ولا واحد يحچي بيها يمـي بسببه كرهت الزلم والناس وكل الدنيا 

كامت امي تبچي مثل كل يوم وانا من الخوف مغطيه وجهي ومغمضه عيوني قوي و ساده إذانتي ما اريد اسمعها ولا اريد اسمعه كافي تعبت من هذا الوضع تعبت الله ياخذه وياخذني وياخذ شكو واحد مثله 

جانت تبچي و تتوسل بيه يعوفها وهو ما يرد عليها ولا عبالك بـني أدم يطلب من عنده الرحمة مثل الحيـوان 

بچت توسلت غلطت عليها وضربته لحد ما صارت رگعه قوية براسها بالگاع وراها صار الهدوء سيد المكان هنا عرفت انتهى

 كل شيء جان كل يوم يضربها براسها ضربه قوية و يگوم يطلع من غرفتنا الغرفته الثانية ينام بيها

كل يوم ادعي عليه ما يصبح ولا يشوف الصبح بعيونه بس دعائي ما جاي يستجاب ولا جاي ينقبل اللي اعرفه دعوة اليتيم مستجابة بس أنا ليش مجاي يستجاب دعائي ولا يستجاب دعاء أمي صار سنتين  على هذا الحال وهذا الوضع تعبنا

و تحملنا فوك طاقتنا لشوكت نضل هيج 

بقيت جوه الغطاء وضامه بچيتي ما اريدها تدري بيه گاعدة كافي الظيم الهيّ بيه جنت اسمعها تبچي وراها لملمت روحها

 و لبست وطلعت من الغرفـة 

شمرت الغطاء و ذبيت حسرة طويلة جانت خانگتني ذابحتني واگفه بنص بلعومي 

درت وجهي اباوع الاخوي نايم ما يحس ولا يعرف شي تمنيت ارجع بعمره ما اعرف ولا افهم ولا احس تمنيت ارجع بهاي اللفه

و هذا الگماط تمنيت ابوي ما مات ولا عافنا ولا انجبرنا على هاي العيشة وهذا الحياة

مرت ربع ساعه وانا عيوني على اخوي  ودموعي تجري لحد ما حسيت عليها طبت للغرفه غمضت بسرعة 

اجت عليه جرت الغطاء و غطتني عدل

و باستني بخدي ورجعت تمشط بشعرها وراها تمددت بيني وبين اخوي بس شميت ريحتها و حسيت بدفو حظنها غفيت ما صحيت بعد غير على صوت الديج يعوعي وصوت جدتي تصيح على أمي تريدها تگعد 

فزت امي لبست حجابها وطلعت تركض تخاف لا تنطك من عمي وجدتتي 

من هاي الفجرية يبدأ يومنا الطويل من اجينا لهاي الساعه اليوم يبدي عندنا قبل لا يطلع الضوء و يخلص بعد صلاة العشاء 

بيتنا او بيت جدي بالاصح عبارة عن غرفة بصف غرفه والبيبان بطاطين والسكف طين و سعف و الحمام والمطبخ بصف الغرف 

و داير مداير البيت مبني بطين مثل السياج يعزل بين الشارع وبين الغرف جان مفتوح والهواء والبرد والحر يلعب بينا و بحالنا وبحوالنا

عايشين بهذا البيت اربع عوائل كل عائله بغرفة و جدتي تنام بالمطبخ خاف واحد 

ياكل لو واحد يشرب وما تدري بيه 

نسوان عمامي يگعدن من صباحيات الله وحده تخبز وحده تطلع بالحلال وحده تطبخ وحده تنظف و عمامي الاربعة يطلعون بالزرع وجدتي تستلمها من الساعة بثمانية الصبح لحد الوحده الظهر 

تسوي دوه مال عرب للجهال و تسوي سحورة للنسوان الزعلانه والتريد تزوج والتريد تشيل ومن تخلص من سحورتها تگعد تشتغل بالليف و المكانيس تحوك 

أمي تگوم وياهن للشغل وانا ابقى گاعدة يم اخوي ساعه اغسله ساعه ابدله ساعه افتح الاعبه حايرة بيه اجيبه منا وارجعه منا مجبورة بيه لان امي ممنوع اطب للغرفة مالتها بالنهار لازم تخلص كل الشغل يلا واذا بچى اخذه واطلع ادور عليها بيا زرع بيا هيمة رايحة تشتغل انطيه الها  ترضعه وارجعه للغرفة

صار وكت الغده حظرت عمتي كلثوم مرت عمي غـازي الاكل واخذته للزرعة الاعمامي يتغدون و عمتي  ميسون مرت عمـي نـاهي 

صبت النا بالحوش التمينا النسوان والجهال بسفرة وحده وجدتي توزع بالخبز وكلمن ماعونه گدامة اليخلص ماعونه بعد ماله حصه غصباً عليه يسكت و يگوم حتى لو بعده جوعان 

خلصنا الغده و امي لزمت اخوي وانا رحت الشغلي جنت اشتغل انا وبنات عمي ولد عمي الصغار نلم سعف الجدتي و نرجع ناخذ الليف والمكانيس نبيع بيهن وين نروح وين نمشي نطر الدرب طر بعد شوي ونوصل للولاية ومن نرجع رجلينه صايره خيوط من التعب وكون من نرجع بايعين كل العدنا والما بايع ينطگ بالعوجيه وينام بلا عشة هذا عقابه 

بعنا الليفات والمكانيس و رجعنا جايبين السعف لگينا عمامي جاين من الزرع 

وكل واحد مرته گاعدة بصفه بس امي گاعدة بالطرف البعيـد ما تگعد يم عمي غـازي ولا هو يگعد يمها ما ادري ليش حتى ما يباوع عليها ومرته كلثوم الكل بالكل 

بس بالليل يجي علينا بالنهار ما يشوفنا شوف 

صار سنتين من اجينا يمهم و طول هاي السنـتين ولا واحد احترمنا ولا واحد قدرنا وره ما مات ابوي جابنا عمي يمهم و من اول يوم طبينا هنا حطن نسوان عمامي  شروط على امي لا تگعد يم ازلامهن ولا توصل يمهم 

جانت أمي حامل الها شهر ونص بـ اخوي 

ولازمه عده ضلت بغرفتها لا يشوفونها ولا تشوفهم لحد ما جابت اخوي وخلصت عدتها ويا الجياب 

اتذكرت شلون و وره ما جابت امي أخوي بشهرين شلون اجت جدتي اخذتها وياها وراحت وين ما ادري مشت بيها لحد المغرب يلا اجن ومن اجن جانت امي ميته من البچي وعيونها مورمه وحتى صوتها رايح سألتها شبيج ما ترد عليه بس حاطه أخوي بحظنها وتبچي 

ثاني يوم بالليل اجه عمي علينا للغرفه جنت نايمة بس فزيت على صوت امي وبچيها بصوت عالي و تغلط عليه وتنعل بيه 

فزيت خايفه شيريد من امي وليش امي تغلط عليه بسرعه گمت عليه وبقيت ادفع بيه وابچي اريده يطلع ويعوفها ليش جاي يطگها ما مسويه شي جانت نايمـة

ومن دافعتلها وجريته منها كضني موتني موت بالصونده كتلني ملخني تملخ وعلى صوتي كلهم اجوا يركضون ومن مرته تسأله ليش يطكني ردلها جانت طالعه بالزرع نص الليل 

امي ما حچت شي بس تبچي و جدتي اجت عليه وگرصتني من خاصرتي حيل وتكول 

سعـدية :-  فلك الصابج ولج يا المدولبه شطلعج بالزرع نص الليل اليوم اموتج 

اخذتني من بينهم ومشت بيه للمطبخ ونزلت البطانية علينا سدت بيها الباب 

وطگتني على وجهـي حيل وگالت

-- شوفي ولج عمج اخذ امج مره وغصباً عليج وعليها ترضن بيه وتسكتن ويو گلتن لاع وحات ابوي اخليه يثرمجن ويذبجن للسمج 

يـُمـن :- شني اخذها مره تزوجوا ؟ 

سعـدية :- اي عرسوا وصارت حرمته ويو سمعت عمتج كلثوم بالخبر هذا احش زردومج حش تنجبين وتسكتين وما تتدخلين بسوالف الكبار ويو اجه عمج عليكم للحجره غمضي عيونج وسدي ذأنج سمعتي يو لاع

ما رديت عليها بس صفنت جرتني من راسي حيل وعتتني قوي وتگول 

-- بنت الـ... سمعتي يو لااع

-- اي 

-- يلا نامي هنا اليوم خلي عمج يتونس

 بـ امج الـ... 

رجعت الفراشها نامت وانا اجيت گعدت بصف الطباخ و دموعي عشرة عشرة ابچي على امي وعلى روحي مرت الساعه والساعتين والثلاثه والبيت صنطه ولا صوت بيه لحد ما صار وكت الصلاة اجت امي ادور عليه لگتني على گعدتي والدموع تصب لزمتني من ايدي وگومتني بلا صوت 

طببتني الغرفتنا و گالـت

شهيناز :- جدتج وفت و كفت وحچتلج كل شيء ما يحتاج احچي بعد 

-- صدك تزوجتي عمي

-- اي 

-- ليش اخذتيه 

-- غصباً عليه مجبورة حتى احميكم مجبورة احمي روحي واحميكم

-- ومرته إذا درت تموتج حلال

-- لا ما تدري انتِ لا تحچين وهي ما تدري 

يمـن انتِ صرتي جبيرة وفاهمه لازم تعرفين أني ما اريده ولا احبه ولا راح احبه بيوم من الايام واول واخر راح اتخلص منه بس بالوقت الحاضر مجبورة اتزوجه واتقبله الخاطر أخوج 

-- ليش مجبورة مو صار سنه من اجينا هنا محد بيهم جبرج على عرس كل عمامي ما يباوعون عليج ولا يحجون وياج 

-- اكو شغلات ما اگدر احچيلج عليهن صعبه احچيلج واشرحلج بس ثقي بيه وتأكدي عمامج وجدتج كلهم ظلموني وطعنوني وحتى اخوج يـوسف گالوا عليه مو أبنهم ابن حـرام ومحد قبـل يسجله والهسه ضال بلا سجل صار عمره شهرين ولحد الان ما مسجل بالنفوس 

-- ليش ما مسجل وابوي وين راح غير هو ابنه روحي انتِ وسجليه بـ اسمج واسم ابوي

-- اني وابوج ما عقدين محكمه ما تشوفين حتى انتِ مسجلينج بـ اسم عمج غـازي ومرته واخوج هسـه نفس وضعج راح اسجله بـ اسم عمج ومرته 

-- و راح نضل هيج لا هويه ولا حسب ولا نسب بيد الناس وبـ اسم الناس 

سكتت ما جاوبتني عافتني و گامت الاخوي ترضع بيه وانـا رحت الفراشي تغطيت وبچيت بچيت ونمـت وثاني يوم مثل كل يوم كل واحد يحير بشغـله 

وانـا وبنات عمـي طلعنا نبيع بالليف والمكانيس ومن كملنا مرينا جبنـا السعف 

واجينا بوكتها انا ما بعت محد اشترى مني وطول الطريق جنت خايفه من جدتي راح تكتلني ومن طبيت وشافتني ما بايعه گطعتني تگطع عض وكرص وبالعوجيه مالتها على ظهري وراها انحرمت من العشة اكيد  

گوه فرغتني امي منها و اخذتني للغرفه ابچي وهي تباوعلي وساكته بيومها حتى هي ما تعشت بقت گاعدة وايدها على خدها شويه وگلت الها 

يُــمن :- يماا انا جوعانه

شهيناز :- سودة بوجهي عسا ربي ياخذهم يخلصنا منهم 

 بقت گاعدة وتباوعلي وراها گامت طلعت من الغرفه بقت بالعشر دقايق برى انوب رجعت تركض طبت و نزلت البردة وراها مدت ايدها بصدرها طلعت خبزة مسويتها لفه وحاطه بيها شيفين طماطـه انطتنياها 

اخذتها من ايدها واكلتها ميت من الجوع 

وبس اكل نمت واني گاعده من گد ما تعبانه ولليل ورجع عمي مره ثانية ونفس المعانات من يتأكد من مرته نامت يجي 

و من يجي امي تموت وانا اموت وياها

ويجي اليوم الثاني و نعيشه مثل القبله ويجي الثالث مثل الفات وهيج حياتنا لا احترام لا تقدير و لا راحه الجوع والفگر كاتلنا و الضيم يا حالنا لحد ما بيوم اجى عمي مثل عادته

بس طب علينا وراه بشوية وجفتت علينا مرته علينا ثاري مراقبته وهو ما يدري 

هي شافته بغرفتنا بالليل لو تخبلت  زفته

 و زفت امي بنص الليل هذيج الزفه خلت الدنيا كلها سمعت و درت و انوب رجعت تريد تلوح امي واطگها وهذا الغلط والافشار و تصرخ وتصيح اليوم اكلها بسنوني والله اكلها بسنوني 

انا ماخذه الزاوية وابچي واخوي گعد من نومه على الصوت يبچي عمي يريد يسكتها ماكو ما تسكت تخبلت طاح بيها وطگها 

بس طگها سكتت بعد ما طلع صوتها افترت وطلعت و  وگفت بعتبت الباب و گالت الامي 

كلثـوم :- اي يا بنت الشوارع يصير خير وجف غـازي اخذه من عافيتج و انا بنت أمي وابوي 

اول ما طلعت گام عمي على امي و شبعها كتل ركع بالحايط وبالگاع و دفرات

و راشديات گمت احاميلها طبگني وياها 

وموتنا موت ما خله شي صحي  بينا وعافنا مجنزات بالگاع وطلع 

گامت امي تسحف سحف و جرتني عليها 

لمت شعري و مسحت وجهي و حظنتني وحظنت اخوي ونومتنا و نامت بنصنا لحد ما طلع الصبح وياريته ما طلع ولا شافنه نوره

بس طلعوا عمامي للزرع جدتي و عمتي كلثوم لزمن امي و سحلنها من شعرها طلعنها من الغرفـه يسحلن بيها لحـد ما وصلنها للحلال ربطنها هناك و باقي نسوان عمامي وياهن 

خلنها مربوطه من الساعه سته الصبح لحد ما سلمت الشمس لا اكل ولا شرب مربوطه بنص الحلال وكل شوية تروح وحده منهن اطگها وترجع و اخوي اخذنا مني و طلعني ابيع المكانيس واجيب السعف 

رحت وطول الدرب دموعي تصب على امي هسه فتحوها انطوها اكل طگوها لحد ما رجعت وامي بعدهي مربوطة يم الحلال

 و اخوي يصرخ وحده بالغرفـه محد يمه 

اخذته غسلتله و بدلت هدومه و فورت مي دافي وحطيت بيه شوية شكر بكت خاشوكة الشكر بوك بدون ما تشوفني جدتي 

شربته وهو سودة عليه يشرب سريع ميت من الجوع وقبل لا يرجعون عمامي راحن فتحنها وجابنها يسحلن بيها مثل ما اخذنها من شعرها شمرنها بالغرفـه و مشن 

اجيت عليها شبكتها وابچي و هي تبچي بلا صوت بس اجتافها تتحرك اخذت يوسف من ايدي ورضعته اباوع الها تعصر بروحها عصر تريد حليب ينزل منها ماكو يابس من الضيم والجوع 

من ناموا و بعد ما طلع صوتهم رفعت راسي شفت امي واخوي نايمين حالهم من حال الناس بس امي لامه رجليها على بطنها ومبين بيها الوجع حتى وهي نايمـه 

گمت على طراف اصابعي مشيت للمطبخ 

جدتي نايمـة بيه خاف احد ياكل لو يشرب 

فتحت جدر الخبز اخذت خبزتين

و طماطية و خيارتين وطلعت امشي نفس ما طبيت بطرف اصابعي وبس عبرت عتبت المطبخ طگيتها بركضه الغرفتنا گعدت امي على طبتي مرعوبـه 

شهيناز :- اسم الله شبيج 

يُمـن :- مابيه جبتلج اكل گعدي اكلي

شهيناز :- منين جبتي 

حچت هيج و گعدت تسند بروحها گوه ما تگدر مكسراتها تكسر الله لا يرضا عليهن

يـمن :- من المطبخ يلا اكلي بسرعة لا يجون 

باوعتلي و بچت بلا صوت گمت عليها بستها بخدها رجعت باستني و باست ايدي وجرت الخبزه سوتلي لفه وحطتها بيدي 

يُـمـن :- انا ما اريد هذا جبته الج انتِ ما ماكله من البارحه

شهيناز :- وانتِ اكلتي لو لا

سكتت ما رديت لان انا هم ما ماكله حرمني اليوم من الاكل حالي من حال امي و حتى اخوي خلنا لوحده لا حليب ولا مي 

من شافتني ساكته جرتني الحظنها و بقت تاكل لگمه و الگمه الثانية تحطها بحلگي لحد ما سدينا جوعنه صدگ ما شبعنا بس المهم طب بـبطنا اكل و هذا نعمه وبركة

و الف الحمدلله 

بيومها عمي ما اجى ولا تقرب على غرفتنا 

يخاف لا مرته هم تلگفه وتعاركه و ثاني يوم نفس الوضع بس طلعوا عمامي اجن على امي كتل و رفس وعض و اخذنها ربطنها لا اكل ولا شرب 

ويوم يجر يوم لحد ما مرت ثلاث ايام حال الضيم يا حالنا والياتنا وليه امي وحده وهنّ خمسه باقيات يدگن على امي وعليه وگاطعات من يمنا الاكل والشرب عود انا بالليل اطلع بالبسكوت ابوك اكل من المطبخ و ناكله  

جنت اجيب لو خبزه وخضره لو خبزه وطماطه لو خبز ومي وهيج مخلصينها بالضيم وياهن

واليوم وره ما اكلنا وكملنا اجيت انمطلت بفراشي وامي گاعده تباوع علينا انا واخوي لا حول ولا قوة بقت مده طويله صافنه علينا وراها گالت

شهيناز :- كله الصار بيه استاهله هاي حوبت امي وابوي و اخوتي هاي شارتهم وكسرتهم جاي تطلع بيه جنت مدلله عدهم و شحده اليرفع صوته عليه شحده اليگول ولج ابوي يكتل سلف الخاطري لبست احسن لبس واكلت احسن اكل 

و عشت احسن عيشة بزر الگعده و حاير بيه ياخذني ويجيبني بيده للمدرسة و امي تجيب و تحط بس كون ارضا عليهم لحد ما طبيت للكلية و شفت ابوج وحبيته وحبني 

صفنت عليه مستغربة يعني عدها اهل يعني اهلها عايشين چا ليش هذا حالنا ليش ما نروح الهم و نشرد عدهم وليش ولا مره شفتهم ولا اجونا لا قبل ولا هسه سألتها بهمه 

يُـمـن :- يعني عندج اهل 

شهيناز :- اهل من اهل مالهم مثيل 

-- چا ليش هنا احنه و متحملين هذا الضيم ليش ما نروح الهم ونگعد عدهم

-- ما يصير

-- ليش ما يصير مو تگولين خوش اهل ويحبونج 

-- اي بس هذا الحچي گبل لا العب بذيلي و اكسر رؤسهم

-- ليش شسويتي 

-- حبيت ابوج و متت عليه وهو حبني

و مات عليه اجى خطبني مره واثنين وثلاثه وعشرة وعشرين بس ابوي كل ما يجي يطردة من الباب و من يروح يرزلني شلون واحد مثله يخطبني و اني الغالية المدلله جدج جان ينكز منه ما يريده يگلي بوية شيوديج للچبايش بوية تموتين هناك ولج بـوية الزلمة على گد حاله يا دوب مدبر اكله وشربه ولج بوية انتِ بصراوية بزر دلال ما يرهملج غير الدلال انتِ بنت عز وجا العيشه هناك ما تحملينها

جنت من يحچي هيج انط من البچي واگول ما اريد الدلال اريده هو ويرجع يگلي ولج بوية هذا الزلمه بطرك البطرون وگاعد بالاقسام الداخليه يوم ياكل ويومين يضل جوعان بس ما اقنع ولا ارد 

جنت  اشتريله واجيبله كل ما اجي للدوام اگول خطيه اهله بعيد اني اساعدة ما جنت افكر عدل ولا افتهم ، بالوكت الضايع يلا عرفت اهلي يردون مصلحتي و هاي القسمة مو قسمتي وهاي الحياة مو حياتي جنت ابچي دم اريد بس ابوي يقبل حتى اتزوجة دگيت رجل اله اتزوجة و من شافتي مو ادمية طاح وبطلني من الكلية وگعدني بالبيت 

اني بطلت وبعد ما شفت ابوج واني تخبلت لحد ما بيوم اظلم ركب الشيطان براسي ولميت هدومي وشردت من اهلي وهمّ نايمين جانت دنيا الظهر و الناس كلها مهوده ونايمة اخذت تكسي و اجيت للكلية و وديتله خبر اني بالباب متانيته طلع

و شافني و عرف بيه جاية عليه شاردة طار طير

الله يرحمة عقله طلع اصغر من عقلي ما گال لا يا بنت الناس غلط هذا الشي رجعي الاهلج واكو رب يحل سالفتنا بس شافني اجيته كيف واخذني واجى بيه هنا البيت جدج بالچبايش و من اول ما طبينا البيتهم جان جدج ابو عايش وبعده بحيلة بس سمع بيه شاردة وهو ناهبني طيح وطردنا اثنينا و خلينا نفتر بالشوارع حايرين بروحنا

صار الليل علينا و احنه بالشارع ماكو مكان انام بيه ابوج من شاف الوضع خرب گال تعاي رجعي الاهلج وين اگعدج شلون تضلين بالشارع 

بچيت و ملخت روحي شلون ارجع الاهلي شلون اطب عليهم يموتوني اليـوم 

سكت عني و وگف محتار وره شوية گال تعاي نروح للشيخ يعقدلنا رحنا الشيخ من معارف ابوج وعمامج عقد النا و بنفـس الساعه طلعنا البغداد حتى لا احد يندل دربنا بعد 

شلون عشت بغداد وشلون عاش ابوج 

الله وحده يعلم اخذنا الشوارع اول يومين گمنا انام  على الرصيف و بين الفروع لحد ما ابوج خابر على رجال من اعمومته عايش  بــبغداد الرجال الله امكنه وعنده خير من الله حچاله الوضع طاح عليه وتوسله يساعدنا و الله ينطيه العافية

الرجال بس سمع بسالفتتا بنفس اليوم جابنا على واحد من معارفه عنده عمارة بيها فرن مال صمون شغلوا ابوج بالفرن

 و بنفس العمارة اكو مخزن صغير بگد هاي غرفتنا شال مفتاح المخزن و حط بيد  ابوج و گاله نظفه واگعد انتِ وعائلتك بيه لحد ما الله يسهل عليك و ترتب وضعك 

بيومها جن ملكنا الدنيا والبيها يافرحتنا لگينا مكان يسترنا گمنا على المخزن استلمنا غسل لحد ما طلعنا يلمع لليل

و اجى الزلمه أبن عم أبوج جايب فراش

 گال هذا الفراش مشوا بيه روحكم لحد ما الله يسهل عليكم وشال فلوس وانطاهن الابوج 

ابوج ما قبل ياخذهن بس الرجال الله يوفقه حلف يمين عظيم ما يرجعهن ويعتبرهن هديـة 

عشنا بالمخزن ثلاث سنوات وبطرك الفراش الجابة الزلمه و بوفيه من حديد لگيناها ويا الزباله الجانت بالمخزن اخذناها صبغناها وحطينا هدومنا بيها 

بهاي الثلاث سنوات ما اشتريت شي غير بس طباخ ابو عينين صغير و قنينه غاز اكلني الجوع والضيم و القهر ضيعت روحي وشبابي و دراستي ومستقبلي و اهلي بس جنت ارد على روحي واگول استاهل وحيل بيه و عسا كلمن تاخذ نفس دربي يصير بيها الاتعس من العشته 

يُـمـن :- حچت هيج وحطت ايدها على وجهه وماتت من البچي وانا ابچي وياها رجعت مسحت دموعها و كملت حچيها

شهيناز :- اشتغل ابوج بالفرن من الساعه بالسته الصبح لحد الساعه بالثنتين الظهر 

يجي يتغده وهو واگف و يروح يشتغل شغله ثانية بكهوة ويجيب الفلس على الفلس ينطيناه اضمه لحد ما لمينا جم فلس وفتح بيهن محل مال حلاقـه جان يعرف يحلق لان بالاقسام الداخليه متعلم بجماعته وهيج صار  يروح للفرن الصبح والعصر يفتح المحل وبالليل ساعتين يروح للگهوة والله رزقنا وفتحها علينا والزلمه گرايبة ما عايفنا كل اسبوع يجي جايب المسواك اشكال اللوان 

وكل هاي السنوات اني بدون خلفه لحد ما قبطت ثلاث سنين وشهرين يلا صرت  حامل تفاجأت بالحمل وفرحت بيه لان اجه من الله لا على البال ولا على الخاطر

 و ابوج من سمع بيه حامل گال مادام الله رزقنا بجاهل بعد ما انضل هنا بهذا المخزن راح اشوفلي بيت صغير ونأجره

 شو عندي شغل خير من الله ليش اخلي ابني يجي يعيش بمخزن وينظلم مثل ظلمنا

طلع يدور على بيت للأجار بنفس المنطقه قريب من محله والفرن يومين ولگه بيت صغير على گدنا صدك بنيانة تعبان بس اهون من المخزن أجرنا و شلنا بيه وهنا يلا اشتريت كنتور و مراية و طباخ وگمت كل شهرين ثلاثه اجيب حاجه للبيت لحد ما أثثت بيتي وكملته من كل شي

ومن وصلت الشهري ضاگت بينا الدنيا ما عدنا عقد بالمحكمة وشلون نجيب جاهل بلا مستمسك ابوج جرب حظه وراح الاهله من بعد هاي السنين الطويلة بس يسويها الحظ ومن يروح يلگه ابوه ميت وعمي غازي صاير الكل بالكل 

حزن على ابو و بچى گام الليل ما ينامة يگول مات وهو ما راضي عليه لحد ما بيوم جنه گاعدين نتغده واندك بابنا گام يشوف ياهو هذا الجاينه تفاجأنه بـ عماج غـازي وناهـي جايين علينا

طار بيهم و طببهم فرحان بجيتهم ويسأل بيهم شلون اجو و شلون اندلوا وهم يردون من زمان نندل مكانك بس ما نگدر نچي ابونا ما يرضا

بيومها اجوا يردون اخوهم يرجع يعيش گالوا گبل ابونا ما يرضا بيك بس هسه الوضع اختلف وابونا راح الدار حقه وانتَ اجيت علينا وگلبك يمنا تعال ارجع يمنا وخلي عائلتك ويا عوائلنا

هو كيف وطار طير بس اني ما رضيت اروح گلت بـبيتي و گاعدة ومرتاحه ما اروح الغير مكان و ابوج سودة عليه فقير ويحبني من شافني ما راضية اروح للچبايش طاح وبطل ورد عليهم بيتي وشغلي مرتاح هنا بس اريدكم تساعدون اسوي مستمسكات للجاهل لان ما عاقد بالمحكمة اني 

غـازي دگ صدره وتكفل السالفه و لان ماكو لا عقد ولا مستمسكات عندي طحنا وسجلناج بـ اسم غـازي وكلثوم وهاي الفكرة جانت فكرة عمج لان ماكو حل ثاني غيرها حتى نثبت وجودج بالحياة 

وهيج يايمه اجيتي للدنيا بـ اسمهم بس جيتج جابت كل الخير علينا واول شي صار وره جيتج فتح ابوج اسواق و حط بيها عامل و المحل مال الحلاقة هو يشتغل بيه و الخير گام يصب من كل زاوية هنا ابوج گام يودي الامه والاخوته و يجمع ويلم

و انتِ كبرتي و عشتي مدلله بجاله واني من شفت الدنيا شلون تعدلت وياي گلت الحمدلله هسه خليني التفت البنتي

و اعوض بيها الراح من عمري واحقق احلامي بيها وشديت حيلي على دراستج لحد ما خلصتي السادس أبتدائي و عماج دگوا رجل ما يرضون بعد اداومين وأبوج فقير كلش وهددو إذا داومتي يكتلونج

الله يرحمه سكتهم وگالهم بطلت بعد ما ادوم و مشى بمعاملة التوسطه مالتج بالبسكون منهم بس ما لحگتي اداومين لان طاح بساع بساع وتمرض بمرض لا على البال ولا على الخاطر 

جان يصخن لليل ونهار و لا يحرك ايد ولا يحرك رجل نايم ويوون هنا عمامج اجوا

 و گعدوا يمنا لان ياخذونه للمستشفى

 و يرجعونا تذكرين

-- اي اتذكر جنت ابچي اريد ادوم و ابوي جان يسكتني ويگول هسه اصير زين

و عمامج يرجعون للچبايش و انا ارجعج للمدوسة لا تبچين 

-- ولا صار زين ولا گام الحيله ولا رجعج للمدرسة طاح بفراشة وبعد ما گام ضل

خمس اشهر و عشرين يوم هو نايم بفراشه ويوون وهنا فجأة طلعت حامل واني ما محسبه حسابي وحتى مو وكته بس بعد رزق ربي هذا

و وره ما دريت بروحي حامل بـ اسبوع ربي اخذ امانة ابوج وراح الدار حقه وعافني وعافج تحت رحمة عباد الله  

رجعت تبچي بقهر وانا ابچي وياها   

شهيناز :- العفت امي وابوي الخاطرة عافني وحيده بهاي الدنيا وراح بعد ماله رجعه عافني بيد الذيابة كل واحد ينهش بيه من صفحة 

حضنتها قوي رجعت حطتني بحظنها

و بقت تطبب عليه نمت بحظنها و انا اتذكر شلون مات ابوي وشلون راح وعافني اتذكر التفاصيل بكل وضوح و دموعي تصب اتذكر شلون شالوا من البيت و شلون شيعوا وشلون امي تخبلت عليه 

اتذكر حنانه عليه وعلى امي دلالي ودلالها 

ضحكته الحلوة وياي و ياها بيتنا جيرانا 

غراضنا هدوئنا استقرارنا كلهن راحن 

وياه 

غمضت عيوني قوي الهنا وبس بعد ما اريد اتذكر شلون اجوا اخذوني من ايدي امي 

وخلوها تركض وراي بالشارع مثل المخبلة

ورجع عمي غـازي طببها للبيت و گالها بصوت ما انسى طول عمري 

غازي :- إذا تردين بنتج لبسي و تعاي وياها

 

شهيناز :- وين اجي وياها خوية بيتي هنا وغراضي

-- هذا مو بيتج هذا بيت الوادم وباجر يوگفون عليج يردون اجار منين تنطينهم 

-- الاسواق والمحل يشتغلن وادفع منهن الله يخليك عوف بنتي والله ما نطلع من البيت لا اني ولا هي ولا احد يشوفنا والله احافظ عليها بروحي بس عوفنا هنا عايشين

-- المحل مأجر والاسواق مأجره ومالكم حصه بيهن باجر الوادم تريد أجارهن منين تجيبين لمي هديماتج وتعاي ويانا هناك معززه مكرمة 

سكتت امي ودموعها تصب وهو واگف ويباوع متانيها تجي من شافها ساكته رجع يگول 

-- انا العليّ بريت ذمتي و گتلج تعاي معززه مكرمة وانتِ بكيفج بعد 

-- وين اگعد وين اعيش خوية كلكم محرمين عليه و بنتي حديثة و وليداتكم شباب شلون نگعد بنصكم حتى الله ما يرضاها

-- ابنيتج ابنيتنا و وليداتنا ستر وغطا عليها 

وانتِ عرضنا وشرفنا وما عاش اللي يحطج بالحرام يو ردتي ابنيتج و اشتريتها انا راح اشتريج و احافظ عليج وبس تخلص عدتج اجيب المؤمن يعقدلنا سوى وهيج بعد لا تحيرين بالحرام والحلال ولا تبعدين على بتج

لطمت امي على وجهها و ملخت روحها وطردته و طگته و هو من شافها وشاف ردها جرني و اخذني وياه و امي ضلت وراي مثل المخبلة ادگ و تلطم بس ما لحگت بينا 

لحد وما وصلت للچبايش اباوع على الناس لا مني ولا من ثوبي لا اشبهم ولا يشبهوني صدك أبوي منهم وامي من البصرة بس ما عايشه هنا ولا شايفه هاي العيشه صدك عايشة بمنطقه شعبية بس تعتبر مدينة مو وقرية واحسن بالف مره من القرية هاي  لبسهم گعدتهم سوالفهم اكل شربهم كلها غريبة عليه 

بقيت يومين انا عدهم وبهاي اليومين نشفت دموع عيني من البچي على امي وكل ما بچيت تگوم عليه جدتي اطگني وتصيح 

-- تبچين على ميمتج الناهبة ولج موتت ابني وحرمتني منه سنين طويلة وتالي شمرتج عليه وراحت (...) لا تبچين يبنت الناهبة لا تبچين

وتبقى تعد وتصف بالفشار عليه وعلى امي 

لحد ما مر اسبوع كامل و انا يمهم وراها 

اجت امي وراي 

جبروها وكسروا ظهرها بيه وقبلت بعمي  ياخذها مره وره ما تجيب وتخلص عدتها راحت ايام واجت ايام والسالفه مسدوده محد يفتحها وانا نسيتها وعبالي همّ نسوها لحد ما جابت وصار اللي صار ومن هذاك اليوم لليوم أنا عايشة بالچبايش و هذا حالي ويا بيت جـدي 

   

يتبع...... 

#عــروس_الچبـــايــش 🌼

بــقلم يـــاســـة الحلقـة (2)

كـ طفل هرول الى أمه  باكيـاً لتحتضنه 

فتلقى صفعـه ليگف عن البكاء 

هـكذا صفعتـني أمي عنـد ما هلولت 

اليها اشكو خذلان الزمـان 

........................... 

يُمــن :- كملت امـي كلامها و مسحت دموعها ورجعت حضنتني و مسحت دموعي وتگول 

كافي لا تبچين راح نخلص منهم وعد راح نخلص

يُـمن :- شوكت نخلص شوكت تعبت انا لليل ونهار جوعانه لا اللبس لا اكل لا انام مثل البنات تعبت اريد ارجع البيتنا اريد ارجع مثل قبل اريد ابوي يگعد ويشوفني ليش عافني وراح ويدري بـ اهله ما يرحمون ليش عافني يمهم 

گمت ابچي بصوت عالي و امي حاضنتني

و تبچي وياي سمعنا صوت عمـي يگح بصوت عالي بسرعه سكتنا اثنينه

ضميت روحي بحظن امي و غمضت عيوني بتعب غمضت عيوني على امل ينصلح الحال بس اللي صار عكس ما تمنيت 

أسبوع كامل يكتلن بـ امي ويربطنها وگاطعات عليها الاكل توصل للموت يله يعوفنها أسبوع كامل انا ابوك الاكل واجيبه و اوكلها ما خلن بيها عظم صاحي من الكتل عذبنها عذاب الله ما يرضا بيه لحد ما انتهت

وره أسبوع من المشكلة الصارت أخوي صخن وگام بس يبچي لليل ونهار يصرخ جدتي تجيب وتشربه بدوه العرب وأمي لليل بطوله تسويله كمادات وماكو ما يفيد يصرخ ومحد ياخذه للدكتور لحد صار ازرك ويبس حلگه وانطگع نفسه يلا اخذوا امي وعمي نـاهي يركضون بيه للمستشفى 

بقى يومين بالمستشفى الاوكسجين ماله ضعيف والصخونه تزيد ما تنقص شگد حاولوا وياه بس ماكو فايدة لحد ما راح الرحمة ربه طير من طيور الجنه 

رجعت أمي للبيت وحده ثانية لا وجهه لا شعر لا عيون كل شي بيها متغير مزورگ من گد ما داگه ولاطمه 

فاتحه ما سوو لان طفل وامي بغرفتنا تبچي من الصبح لليل وانا ابچي وياها 

وما اعرف اسوي شي واسكتها وبنفس الوكت ميته على اخوي احبه وكلش متعلقه بيه واكثر وگتي وياه 

عدت عشر ايام على وفاة أخوي وامي كل ما جالها تتعب وتتغير اكثر والدمع ما فارك عينها لحد ما رجع عمي يجي علينا بالليل 

اول يوم اجانه وره الوفاة امي طردته وضربته وسبته وهو خاف لا مرته تسمع 

بسرعه طلع بس ثاني مره اجانه لا ما گدرت عليه لان گتلها وطگ راسها بالگاع

وانا جنت جوه الغطا اسمع وابچي خنك 

وثاني يوم امي من گعدت باقيه بس تصفن 

وبالها مو وياها وكل شويه تباوعلي وتبچي وتمسح دموعها لحد لليل وبعد انتهى 

عدها الأمر وقررت واخذت قرارها النهائي

من تأكدت من الكل الكل نام و گامت من مكانها وهي تخطي خطوه مصيريه انا بوكتها صح جنت مغمضه بس ما نايمة بيومها چن گلبي يعلم و روحي تحس بيها

اباوع عليها من جوه الغطا گامت تلم بهدومها انصدمت ليش جاي تضم هدومها بهاي الجنطة الصغيرة وين تريد تروح معقوله تريد تشرد واخيراً راح تاخذنا وياها ونخلص منهم 

بقيت اباوع الها من جوى الغطا شلون لمت هدومها ولبست ورجعت ضمت الجنطه بالكنتور و سدت باب الكنتور انوب گامت مدت راسها برى الغرفة تشوفهم خاف احد گاعد

 هنا تأكد راح تروح وحدها وما تاخذني وياها احس گلبي صار يدك سريع والدمعه و وگفت بطرف عيني يعني راح ابقى هنا وحدي وهي تروح وتعوفني 

رجعت غطيت روحي ومتت بچي چنت ابچي بدون صوت حتى نفسي گاطعته ما اريدها تسمع خاف تسمع و تدري بيه گاعدة هي تعبت خليها تروح وتخلص منهم

رجعت طبت مره ثانية للغرفه و ادور يمنى ويسرى تخاف أسمعها و اگعد اباوع عليها شلون تلبس بحجابها سريع واديها ترجف

 و صوت دگات گلبها يوصل يمي و گعت دمعتي و ايدي صارت على حلگي اضم شهگتي ما اريدها تسمع صوتي وتبقى اريدها تروح وتخلص اريدها ترتاح

كافي هيّ تعبت وانا تعبت 

بقيت اباوعلها شلون فتحت الكنتور

و طلعت جنطتها الصغيرة  و سحبتها بحركة سريعـة لبستها و اجت عليه بهدوء نصت و سحبت الغطاء من عندي غمضت عيوني قوي و گلبي يدگ سريع احسه راح يطلع من مكانه اريد اروح وياها ما اريد ابقى هنا بس مو بيدي مجبورة ابقى مجبورة اكبر قبل أواني و اتحمل هذا القرار الصعب و المؤذي

باستني بجبيني و شمتني من وجهي حسيت بدمعتها و گعت فوك وجهي ورها همست قريب من مسمعي 

شهيناز :- أذا بقيت هنا راح اخسر نفسي 

و اخسرج للأبد لازم اروح لازم انهزم بس وعد راح ارجع اخذج وعد راجعتلج وما اعوفج و راح ترجعين الحظني من جديد 

و راح نخلص منهم بس انتظريني ارتب وضعي حبيبتي وكل الدنيا لا تتوقعين اتنازل عنج بيوم من الايام 

كملت كلامها و رجعت غطتني و رفعت روحها من عندي و طلعت من الغرفـة تركض

سحبت الغطاء وغطيت كل وجهي وبچيت

وانا خانگه روحي ما اريد احد يسمع صوتي

ما اريدهم يگعدون ولا اريدهم يحسون عليها طلعت لايرحون يرجعونها من جديد جنت رايده راحتها ما فكرت براحتي ولا فكرت بمصيري فضلتها على روحي 

و فضلت روحها عليه وكل هذا اكتشفته بعد فوات الأوان 

مر وقت طويل و انا جوى الغطاء ابچي 

وراها دخل عمي مثل كل يوم يدور عليها اسمعه يتحرك بحركات جنونينه بداخل الغرفة هاي الغرفة اللي شهدت على كل عذابها وعذابي  وراها صاح بصوت عالـــي شهيناااااااااز 

صوته زرف گلـبي من الخوف و فزز كل النايمين طفرت من مكاني ارجف من الخوف كل جسمي يختض اجى عليه جرني من شعري قـوي و يگول 

غـازي :- امج ووووين امج ويييين 

ما اجاوب بس ابچي و اهتز من الخوف 

رجع جرني اكثر وضربني راشدي ومن شافني ساكته ما ارد بقى يضرب بيه راشدي وره راشدي دخلوا عمامي و نسوانهم وجدتي يركضون على صوته وهو تخبل يسألونه شبيك شكو گام من مكاني

و اشتغلني دفرات كل دفره يدفرنياها احس عظم من اعظامي ينكسر بيها

 انتهيت بيده موتني موت يردون يخلصوني من جوى اديه ماكو فقد وجرم بيه اجرام 

 جان متخبل ويدفر بيه ويفشر على امي ويسب بـ ابوي وبعشيرتي وبعشيرة امي 

گوه جروه مني گعد بالگاع ويلطم على راسـه وجدتي  تلطم وياه عمامي من سمعوا انخبصوا وطلعوا يركضون بلكي يلحگون عليها انوب جدتي گامت من مكانها وتگله

سعـدية :- خلها تولي شردتهم هو ياهو يدري بيك ماخذها مره الوادم كلها تدري حرمه اخوك وگاعده عدنا يو سعلو عليها انگلهم عافت بزرتها و ردت الاهلها گوم لا تلطم مثل النسوان على وحيده دايحه 

گام طلع والباقين كلهم طلعوا وراه من الغرفه و عافوني طايحه بالگاع لا احرك ايد ولا احرك رجل  

وراها ما كمت اشوف بعيوني و حسيت  غواش و ظل اسود صار بكل المكان وراها رحت بغير عالم ما حاسه بشي يمكن فقدت الوعي يمكن متت والله حيياني لحد الصبح و انا هاي نومتي 

فزيت على دفرات عمي غـازي و صوت الباقين جان يدفر بيه بكل قوته ويگول

 وين راحت 

ما اگدر ارد ولا اگدر ادافع على روحي من شافني ساكته عباله اندل مكانها وساكته ما ادليهم تخبل عليه بالزايد و الطگه مالته صارت تعادل ميه طگه الدم گام يجري ما ادري من حلگي من خشمي من وجهي من گصتي گمت ما اشوف الگدامي من گد ما انترس وجهي دم 

جروا عمامي وطلعوا وهو متسودن ينكز جدتي اجت عليه ولزمتني من شعري و رگع ركع و انوب دنگت عليه وعضتني بزندي جسمي تخدر ما گمت احس بيه غمضت عيوني لا حول ولا قوة مستسلمة للظالمين 

للعصر ورجع ربطني بالشباك و فتح الشباك 

و كتلني كتل موت ورجع طلع مره ثانية

 

اكل ماكو شرب ماكو اسبوع كامل هذا حالي انا والميت سوى بالليل من ينامون تجي فطيم بنت عمي نـاهي جايبه مي 

و اكل بالبوكة توكلني وانا مربوطه وتشربني مي وتروح تركض خاف واحد يشوفها

حمام ماكو محد ياخذني كمت ادرر على روحي و ريحتي وريحة الغرفـة صارت تكتل 

اسبوع كامل حالي حال الحيوان مربوطة محد يفوتلي ولا احد شايف حالي بس فطيم تصير اصغر مني تجي توكلني 

و تشربني بسكوت منهم ومن ريحتي طلعت گامت ما تتقرب مني من بعيد تشمر الاكل وتروح ابقى انا اتصارع ويا الخبزه لحد ما اكلها 

وبيوم من الايام احس بطني ذبحتني اريد حمام ما اتحمل بعد ما اگدر اقاوم اكثر بچيت بصوت عالي يا ناس يا عالم يا اهل الرحم رحموا حالي من سمع عمي صوتي اجى عليه وجن جان ناسيني وذكرته بيه   طبلي بصونده وين اكو مكان بجسمي وين اكو عظله صاحيه وگفها من گد ما طگني  

تقيأت و طلعت بطني على بلايه ما اسيطر عليها من گد ما جرم بيه وراها عافني وطلع 

وضعي الكافر يعطف عليه المجرم ما يسوي سوايتهم مجرمين كافرين ظالمين ماكو ذرة رحمة بگلبهم الموت اهون عليه من كل هذا الجاي اعيشه لو ميته لو شاردة وراها ولا هذا حالي 

كرهتها و حقدت عليها و كرهت اسمها وشكلها وصوتها كرهت ابوي الجابني للدنيا و عافني بنص اهله وراح كرهت روحي كرهت العالم حقدت على الكل و بداخلي احس روح اجرامية اذا هدوني هسه اكتلهم كلهم واخلص منهم 

فقدت و انا بهذا الحال والصبح فزيت على صوت جدتي تركع بيه بعكازتها وساده خشمها بالشيلة 

سعدية :- موت الكلفج و كرف أميمتج

يا الخايسة يا بنت الخايسة احتركت روح الخلفتج على هاي الخيسـة

تحچي و تركع بيه بعكازتها رجعت صاحت على عمتي كلثوم طبت شاده خشمها بالربطه و مطلعه بس عيونها فتحتني من الربط و جدتي تگول 

سعدية :- شيلي خيستج وطلع تشطفي  كون ان شاءالله تشطفتي بالمغيسل وينج يا ام البنين يوم الاشوفج نايمة على دجه المغيسل و يغسلون بيج وبـ اميمتج ام الزلم الله يعلم بيا حظن هسه وشمرتج عليه 

طلعن من الغرفة وانا حرت شلون اگوم وشلون امشي واطلع نزعت هدومي كلها ورحت للكنتور طلعت عباتي لفيت روحي بيها و اخذت هدوم و مشيت للحمام وجهال عمامي يصفكون وراي

( ام.. ام... عرس عليج الگصاب)

اخذوني للحمام زافيني وانا الدموع عشرة عشرة طبيت و ترست الطشت و بقيت افرك بروحي بصابون الركي انوب لا يوغف ولا ينظف افرك بروحي وابچي من كل گلبي ساعة كامله بالحمام لحد ما جدتي شالت البردة عليه وتگول

سعدية :- راح يزفونه عليج يالمسعدة يبنت المسعدة خلصتي الاميه بنت الچلبه طلعي لا اخليهم يطلعون جنازتج اليوم 

بقيت احطت اديه على مناطقي الحساسة استحي منها وهي تسويلي حركة بصبعها والايد الثاني تعض عليها وتگول 

-- هاهو هاهو يزموو تستحي بنت الشريفة تستحي بنت الناهبة 

راحت وانا لميت شعري ولبست وطلعت 

لگيتها واگفتلي بالباب بس شافتني گالت 

-- جري الفراش واخذيه غسلية بالجرف بساع يوم اللي يغسلونج بعلي 

طبيت للغرفة طبگت الفراش و جريته للجرف اغسل بيه و روحي تطلع من الريحة والمنظر و دموعي عشرة عشرة واتحسب عليهم واحد واحد بالاسم حتى امي تحسبت عليها بعدني مدنگه اغسل

و سمعت صوت فطيم اجت تركض هي أسمها فاطمه بس اهلها يصيحون عليها فطيم اجت تركض من بعيد وتصيح  

يمن ولج يُـمن ولجججج يُـمن 

رفعت راسي اباوع شبيها وصلت يمي فحطانه من الركض حطت ايدها على گلبها تلهث 

يـُمن :- شبيج شكو 

فاطمة :- جدتي تگول خل ترد بسرعة

-- بعدني ما مكملة 

-- ولج اجوانا اهل بغداد وتگول بسرعه خل تجي 

-- ياهم هذول شعدهم جايين

-- غير عمامنه ولج افندية يشحلاتهم حتى الشايب مالهم ريحته تخبل و ترد الروح 

-- خل اكمل واجي

حچيت هيج و رجعت اغسل وهيّ عافتني

و رجعت تركض بقيت انا اكمل بالفراش والجرجف و المخاد بس هدومي ذبيتهن بالبسكوت لا تشوفهن جدتي

ساعه يلا كملت شلتهن وهن ينگطن مي احس ظهري طك و انا منا خاوية من الكتل والجوع اخذتهن وين انشر الفراش شريتهن ورجعت للبيت هدومي منگعه وحيلي مهدود وجهي مشوه من الكتل بس طبيت لگيت الكل گاعد بالحوش

 و صوتهم و سوالفهم يم الباب توصل ويا ما فتحت الباب صاروا بوجهي باوعوا عليه مصدومين من شكلي 

دنكت راسي وتعديهم و مشيت بدون ما اسلم صاح عمي غـازي هاي يُمـن بنت المرحوم واحد من الخطار گال 

حاكـم :- يا هلا بابا حبيبتي شلونج 

درت اباوعله رجال لابس بنطرون وقميص ما عنده شعر ولا لحيه املس تارس بس شكله بيه قبول باوعلي وابتسم ما جاوبت ولا انطيت اي ردت فعل درت وجهي

و كملت طريقي گام عمي غـازي من مكانه وجرني من ربطتي و يگول 

--ولج مو يسلم عليج عليش ما تردين 

گام وراه الرجال  يگول 

حـاكم :- هاها على كيفك بعد اخوك كول 

يا الله 

غـازي :- ما تعرفها شني هاي خلني عليها بنت امها وعندك لحساب 

حاكـم :- گول يا الله الابنية مالها ذنب بعملة امها بعدين ابوها جان طيب ما اقبل تعاملها هيج الخاطري

غـازي :- يخوية انتَ زلمه خلصت عمرك بالغربة ما صالك جم سنه من رديت وهذني ما تعرفهن انا الاعرفهن واعرف سوالفهن

-- يا غربه ترى اربع سنوات ونص اني اجي الابوها واگعد وياه ويگعد وياي وامها انسانة طيبة ما بيها اي غلط وما صار غير كم سنه من سافرت وما شفتهم بعد اكيد صار سوء فهم بينكم وزعلت امها وراحت هسه اترك الابنية و خلينا نحچي بالتفاهم ما يصير هيج بعدين شنو هذا الاثر البيها ضاربينها وهي بهذا العمر 

سعديـة :- يعمه خوفك من هذا العمر يودنك للشط ويرجعنك عطشان عليمن تطلع على اميمتها الناهبة نهبت گبل

و هسه ردت نهبت وخلتها عليه احير بيها هسه خلك منها خله يعيد ترباتها من جديد

نزلت راسي للگاع دموعي بعيني ما اگدر ارد 

الرجال هز راسه ما عاجبه الوضع وسحب عمي من عندي و گال 

-- روحي ارتاحي بابا 

مشيت سريع للغرفـة گعدت بالزواية

و حطيت الخاولي بحلگي وابچي بكل قوتي

اسمع صوتهم وسوالفهم وشلون جاي يتوعدون الامي گدامه  هذا اليذبح وهذاك اليصلخ وهذا اليشنق و الغلط والحچي ما يلبس عليه ثوب ما گالوا شردت من ظيمنا ولا گالوا جان متزوجها عمـي كل الحچوا للناس عافت بنتها و شردت مدري وين 

شويه وطبت جدتي عليه گرصتني وگومتني اشتغل وياهن لگيت الخطار رايحة للزرع ويا عمامي و بس نسوان عمامي باقيات يطبخ جدتي گالت

-- تغسلين الحوش تخلينه يلهث گبل لا ترد الوادم وتفرشين الگاع يلا بساع

 گمت على الحوش غسلته واديه ترجف الحاجه تطيح مني دنكت مسحته ورجعت فرشت الفراش بعدني افرش و طبوا من جديد 

بيومها باتوا عدنا الزلمه وأبنه الفهمته عنده گاع بطراف الناصرية و جاي يبيعها ومر علينا يشوفنه وجدتي ما قصرت حجتله كل شي على امه بس ما گالتله عمي جام متزوجها 

ضليت گاعدة بالغرفه لحد ما ناموا كلهم طلعت امشي على كيفي جوعانه اريد شي اكله من الصبح الهسه ما ماكله بطني احسها جاي تتگطع جنت امشي على طرف اصابعي واتلفت منا ومنا بعدني ما واصله للمطبخ و واحد حط ايده على جتفي ويگول 

رائـف :- وين رايحة 

فزيت بكل قوتي ونشغت گلبي طلع من مكانه اريد اسيطر على رجليه ماكو وحده اطگ بوحده باوعتله الولد نفسه أبن هذا الرجال اريد انطق وارد ماكو انربط اللساني رجع گال

رائـف :- وين رايحة نص الليل تمشين على اصابعج تردين تنهزمين شنو ؟ 

هزيت راسي لاا وايدي على گلبي 

رائـف :- لعد وين رايحه بهذا الوقت وبالطريقة هاي 

-- ياهو مالتك انتَ 

-- شنو ياهو مالتك احچي عدل لا اگعد عمج عليج  

-- لا لا عليك الله لا تگعده والله رايحه للمطبخ والله 

-- وهيج بالبوكه ترحين للمطبخ 

ما جاوبته رجع يگول

-- ولج بس لا تردين تنهزمين مثل امج 

-- لا والله لا 

-- لعد ليش هيج تمشين احچي عاد راح اگعدهم

-- والله رايحه للمطبخ و الله 

-- شعندج بالمطبخ بس لا تردين تنتحرين

-- لاا لا اريد اكل جوعانه

تغيرت ملامح وجهه مستغرب الموضوع بس ما علق سكت و بقى واگف صافن بحالتي وانا واگفه اخاف اخطي خطوة وحده ويروح يگعد عمي عليه من شافني واگفه گال 

رائـف :- روحي اكلي 

يُمـن :- لا ما اريد بعد 

حچيتها و ركضت للغرفة جريت البطانية

و غطيت روحي ونمت للصبح ثاني يوم الصبح جنت اسمعهم يحچون على امي يگلون بس نلگاها نكتلها حلال دمها انهدر بعد والرجال يرد 

حاكم :- مالكم حق المرآة عود زوجة أبنكم المرحوم بي حق تقتلونها

غـازي :- ام واولادنا ولزوم نغسل عارنا

-- وإذا ام اولادكم المرآة عدها أهل حتى لو على خلاف وياهم أو تاركتهم من زمن طويل بس هذا ما يعني تاخذون هيج قرار ابنكم مات وهي انطتكم بنتكم وراحت الحال سبيلها وانتهى الموضوع 

سديت إذاني ما اريد اسمع كافي راح اموت فوگ هذا الظيم كله العار راح يضل ملاحگني طول عمري  

صاحت جدتي عليه طلعت ويا عمتـي شمياء مرت عمي هـاني نخبز هي تخبز بتنور الطين وانا اشيل الها واشلع الخبز المستوي اجت فطيم علينا تركض وتگول 

-- جدتي تريد يُـمن بسرعه تگول تعوف من ايدها وتجي ركض 

عفت من ايدي ورحت وياها اسأل بيها

--شكو شتريد مني وهي ترد ما ادري

لحد ما وصلنا لگينا جدتي واگفه متانيتنا بس وصلت يمها لزمتني من زندي واخذتني الغرفتنا و نزلت البرده و تگول 

سعديـة :- خيبة يبنت الناهبة صدگ لو گالوا حظ العواهر جواهر وحظج گعد ينت ( الـ ..) 

سكتت والخنگه بروحي واگفه ما رديت رجعت گالت

-- خيبه يالمدوهره حاكـم خطبج الابنه المثقف 

يُمـن :- شني يا حاكم يا أبنه

-- حاكم أبن عم اولادي الزلمة الفاهم الدارس المثقف الخلص عمره كله يدرس انجليزي هو وعايلته اليوم خطبج الابنه وراح ياخذج غاد البغداد وياه

صفنت قصدها هذا الرجال البغدادي زين منو ابنه و شنو خطبني انا ويني وين العرس رجعت گالت 

-- گعدي هنا بعد لا اطلعين لحد ما اندهه عليج 

بقيت بمكاني و داخله بحاله صدمة

 يا عرس هذا تخبلوا ويني وين العرس عمري ١٤ سنه لا مو ١٤ يمكن طبيت بالـ١٥ لا بعدني ما طابه ما ادري طبيت هسه طبيت بعدني المهم انا بعدني صغيرة وين وين هاي السوالف

لا ما اريد اعرس ويسوي بيه مثل ما عمي يسوي بـ امي  لا لا ما اريد ما اريد اكتل روحي ولا اعرس 

بقيت بالغرفه و اطگط بـ اصابعي و اكل 

بـ اضافري وادعي ما يصير ويرجعون البيتهم وما اعرس 

ساعه تجر ساعه لحد ما صار الليل لا واحد جايني ولا واحد شايفني واخاف اطلع خاف جدتي اطگني گالت لا اطلعين والاكل ما اكلت غير وجبه وحده وضليت كاتلني الجوع اجيت تمددت اريد انام طبت فطيم بسرعة گعدت اسأل بيها 

يُـمـن :- شني السالفه جدتي تكول راح تعرسين 

فاطمة :- خيبه اي خطبج عمي حاكـم الابنه رائـف خب بخت راح ترحين البغداد 

-- ما اريد لا ما اريد

-- خب شوف هاي المتعافية هو انتِ ياهو الياخذج وره عملت امج حمدي ربج وصلي ركعتين شكر راح تعرسين والمن الواحد مثل رائـف المثقف الدارس شحلاته والله خوش قسمه بالعافية عليج 

بقيت ابچي رجعت تگول

-- ولج بغدادي بغدادي وجان مسافر بغير ولاية امداج  

ما ارد عليها بس ابچي رجعت تگول 

-- مو وجه نعمة وحقه ما يرضا بيج هو وين وانتِ وين 

-- يعني هو ما راضي بيه 

-- اي ما راضي ابو خطبج غصباً عليه

-- ياهو گالج

-- انه سمعته يتعارك وياه ابو 

-- شيگله 

ما راضي و يگله ما اريدها وعمي يتوسل بيه وحتى باسة براسة و هو ما راضي ويگول 

-- مستحيل اقبل مستحيل شلوون هيج 

تحرجني گدامهم شلوون 

حاكـم :-  أبني الخاطري لا تفشلني گدام عمومتك انطيتهم كلمه لا تكسر كلمتي 

-- يااابة لا تخبلني من بعد هذا التعب التعبانه على نفسي أخذ وحده حتى ما تعرف تكتب أسمها شلون تقبلها انتَ فهمني 

يُـمـن :- ياا شمالني ما اعرف اكتب اسمي انا هم درست بس ابوج وعمامج بطلوني

فاطمة :- ولج اقبلي و امشي وياهم عيشي غاد اخيرلج هنا يموتونج ما يرحمون حالج من بعد عملت امج ويو ما تزوجتي رائـف راح يزوجونج الغيرة يخافون لا تنهبين مثل امج عاد هذا حلو و نظيف و دارس ومثقف

و عدهم خير من الله سمعت  عمي حاكم گبل مساعد ابوج بالشغل والبيت وانوب طالع برى العراق وصار سنتين ما ادري ثلاثه من ردوا البغداد 

سكتت ما ارد وبس أبچي رجعت گال

-- يلا خل اروح لا امي تشوفني و تموتني اجيت اگلج اقبلي وخلصي من عمي

و جدتي وسحورتها ترى تشردج بـ ليلة ظلمة مثل ما شردت امج 

طلعت فطيم من الغرفة وانا بقيت گاعدة

و صافنه بزماني وين يريد بيه جاهل مسلوبة الارادة لا حول ولا قوة بيومها ما نمت لحد ما طر الفجر و صاح الديج سمعت جدتي وعمامي گعدوا للصلاة يصلون بدون مستحى من الله

 يصلون وهم ظالمين يصلون وهم كفار الكافر مو بس الما يؤمن بالله لا الكافر الظالم الكافر الما يرحم الكافر الما يخاف ربه الكافر الياكل حرام ويجور ويظلم اليتيم 

خلصوا صلاتهم و راها صار صوت سوالف 

بالحوش وصوت طگطگه المواعين و ريحة الجاي والبيض طبت بخشمي وانا ميته من الجوع بطني طابگه على ظهري من الظيم 

تمنيت اگوم واكل وياهم واسد جوعتي بس اخاف اطلع ويطگوني بقيت التلوه بجوعتي لحد ما انشالت البردة و طبوا عمـي غـازي وجدتـي فزيت خايفـه منهم 

غـازي :- گومي لمي ثيابج حتى ترحين وياه زلمتج 

ردت ارد ما گدرت وگفت الكلمة بلعومي 

وغصه ذبحتني ذبح رجع گـال

-- راح يگطع عليج مهر و ياخذج البغداد تجرين عدل و حسج ما يطلع تخدمينهم وتمشين بشورهم شيگولون ردي بـ حاضر ويو سمعت معليه حسج على وحيد يو مرادده وحيد منهم يو مضيجه خلك زلمتج و ما راده عليه يو مگصره بحگه تشوفين ادية هاي و روح ابوي وابوج ادفنج بيهن وانتِ عدله 

سعـديـة :- لا تتبكبكين حمدي ربج وشكرية رضا بيج و راح يستر عليج من بعد عملت اميمتج يلاا گومي جلفي خيستج و طلعي للوادم يردون يردون البغداد 

كملوا حچيهم وطلعوا بدون ما ارد عليهم بحرف بدون ما ياخذون رأيي گمت طلعت هدومي ولميتهن بجرجف صغير وشديتهن مثل البكشه ما عندي جنطه هي جنطه وحده واخذتها امي وراحت 

رديت گعدت بالگاع و دموعي تهل ساعه ساعتين وردت جدتي عليه لبستني ربطتي وطلعتني لگيتهم جايبين شيخ گعدت بالزواية و جدتي وعمامي گاعدين و الزلمه وابنه وياهم الولد مغضب و وجه ينكط شر ما راضي بيه ولا رايدني بس انجبر من ابو 

عقدلنا الشيخ بساع بساع ما طول وراها جدتي هلهلت و صفكت بــ اديها وتگول

العين البارده كل الهلا بيها والعين الحارة الحمزه يطفيها وعمامه وانطوه مره والشامت يرجع ليورة 

نزلت راسي وطاحت دمعتي بحظني مسحتها بربطتي و الزلمه اجى عليه حبني براسي

و گومي وياه متت من البچي صفيت وياه جدتي گلت الها جده ما اريد ما خلتني اكمل كلامي  بسرعة كرصتني بخاصرتي شلعت لحمي فزيت موجوعه ورحت بعيد منها رد الزلمه گال

-- يلا بابا گولي يا الله 

طلعنا و عمي باهـي شايل بكشتي وصلني للسيارة بيها و باقي العائلة يمشون ورانا زافينا جدتي تهوس والنسوان يصفكن 

تعمدن يسمعن الوادم انا انزفيت 

صعدت بالسيارة لوره و الزلمه بلگدام والولد يسوق اول ما حركت السيارة صار صوت فشك عمامي رموا الولد هز ايده

و باوع الابو ويسوي بشفايف حركة ما عاجبة الوضع 

مشينا بالسيارة محد يحچي الزلمه ساكت والولد ينافخ وانه ابچي بلايه حس لحد ما طلعنا من الچبايش 

يتبع.... 

#عــروس_الچبـــايــش 🌼

بــقلم يـــاســـة الحلقة (3)

كـ نجـوماً سـرمديـة

لا نلـمع الأ فـي الظلام الدامـس

............................... 

يُمــن :- مشينا بالسيارة محد يحچي الزلمه ساكت والولد ينافخ وانا ابچي بلايه حس لحد ما طلعنا الچبايش دموعي ضلت تنزل عشرة عشرة تگول اليوم ابوي مات 

طول الدرب الدمعه الما بطلت احس بروحي انسلبت مني لا اكل ولا شرب ولا نوم وبس بچي و نعاوي الزلمه دار عليه

و گال

حاكـم :- ليش البچي بابا لا تبچين كافي انتِ أمانه الله ورسوله يمي وان شاءالله ما اقصر وياج واحطج بعيوني الاثنين من هاي الساعه وانتِ وحده من بناتي لا تبچي حبيبتي سكتي 

مسحت دموعي بربطتي و بس النشغه تطلع رد يحچي وياه ابنه يطبگ على مطعم طبگ للمطعم وفتح الباب نزلني ورد يحچي وياه ابنه ينزل ويانا بس الولد ما يرضا 

و يگله 

-- ما اشتهي يابة عوفني رحمه الروح امك وابوك 

سكت منه واخذني من ايدي للمطعم 

گعدت مكسورة مذلوله اباوع بالوجه دمعتي بطرف عيني گعد گبالي مبتسم ويگول 

حاكـم :- شنو تردين اكل طلبي لا تستحين شنو مشتهيـه 

يـُمـن :- ما اريد شي اريدك سالم 

-- يسلمج الله بابا بس لازم تاكلين ما تريگتي والبارحه ما شفتج تعشيتي ميصير تبقين بدون اكل 

سكتت و نزلت راسي بلايه ما ارد رجع گال 

-- انزلج كباب 

ما اجاوب ساكته صاح الولد و طلب كباب

و تكه وببسي جابوا گبالي وانا شميت الريحة وانا روحي ذابت ضليت ارجف رجيف حط الخبزة گبالي و گال يلا بسم الله 

مديت ايدي واكلت ارجف من الجوع اريد اللزم روحي ما اكدر كل شوية اكول هاي اخر لگمه زحمه من الزلمه وارد اكل غيرها واكول اخر وحده لحد ما خلصت ماعوني وهو ابتسم وحط ماعونه گبالي تشكرت منه وما رضيت امد ايدي عليه استحيت هسه شيـگول عليه 

نزل جاي اليه واله وشرب جكارة و اخذ جاي ثالث الابنه و طلعنا وصلنا للسيارة لگينا يخابر من شافنا اجينه سد نقاله

و اخذ الجاي من ايد ابو بله ما يحچي شغل ومشى ايد يشرب بيها جاي وايد يسوق 

بعد انا من شبعت احس هودت

و استقريت وعيوني نعست ما اگدر افتحهن الليل كله ما نايمة غصب عني استسلمت ونمت ما فزيت غير على صوت الهورنات و صوت الولد يگول 

-- انعل ابو الحط بيدكم سيارات 

حاكـم :- لا تغلط على الناس عيب

رائـف :- هذول مو اوادم حيوانات شوف شلون يمشون بالرون 

-- سوق وانتَ ساكت 

درت وجهي هاي بغداد وصلت الها 

جنت عايشة هنا كبرت وربيت بيها صار سنتين من مشيت للچبايش بس ما جنهن سنتين عبالك عمر طويل غيرتني الچبايش من ساسي الراسي تطبعت بيها وصرت حالي حال اهلها باللبس والحچي اليشوفني ويشوف حالي يگول بعمرها ما شافت الحضر وخلصت حياتها كلها بالريف 

بقينا بالساعه نمشي ويا الازدحامات يله وصلنا البيتهم عين الحارة باردة البيت حلوة ويرد الروح من برى بس ما ادري من بطنه شني حلو مر الله اعلم عاشر وشوف يگلبي لا تحكم على المظاهـر

نزل الولد دگ الباب ورجع صعد شوية

و انفتح الباب على وسعه طبب السيارة بنص البيت شفت ابنية لابسه برموده زيتونية واگفه وره الباب ، صفنت متفاجأة علينا و عيونها طبت بنص السيارة تباوع عليه وعلى أبوها 

نزل الزلمه و هي اجت تركض حظنتها باسها براسها و حظنها بـ اثنين اديه وانا فتحت الباب ونزلت باوعتله مستغربه وردت تگول الابوها 

هالـه :- باباتي حبيبي مشتاقتلك 

حـاكم :- روحي بابا اني مشتاقلكم شلونج

هاله :- زينه منو هاي الابنية

حچت هيج وتباوعلي رد الزلمه ضحك ويگلها 

-- هاي يُـمـن بنت عمج هادي

هاله :- اهلاً وسهلاً حبيبتي 

يُـمـن :- هلا بيج حبيبة 

أبتسمت و تباوع الابوها و اخوها النزل وتعدانا و طب للبيت شايل الدنيا على راسه ركضت وره لزمته من ايده وتگله

--  ليشش متسلممم ممشاقلي  

رائـف :- مالي خلگج وخري من عندي 

جر ايده منها وطب والابنية ظلت بصدمتها 

اخذني الزلمة من ايدي و طببني للبيت لگينا ابنية ثانيـة شابـة و ولد اضن اصغر من رائـف العريس و امهم تصير بگـد عمتي كلثوم بس شني هي مره وعمتي مره تهي بهي يا حلاتها ويا لبسها ويا ريحتها لابسـه دشداشة كلها تطريز و شايله شعرها كباية و الشعر اسود وبيه خصل من الشيب والادين والرگبه متلتله بالذهب 

الكل يباوع عليه بستغراب ياهو انا وشعدي جاية عليهم الزلـمه حطني بنص الهول مالهم و گال بصوت عالي و واضح 

هاي يُـمـن بنت المرحوم هادي ابن عمي

و زوجة رائـف وچنه هذا البيت 

يُـمـن :- المره سمعت انا مرت ابنها بساع دگت على صدرها و تگول

بديعـة :- عزاا العززاني حاكـم شنو هذا الحچي لا تشاقى

حاكـم :- بديعـة هاي يُـمـن مرت رائـف عينج عليها و حسبيها حسبه البنات

بديعـة :- شنو هذا الحچي بيكفكم تقررون و اني رجل كرسي بالبيت

حاكـم :- الولد اخذ قرار وانتهى الموضوع

رائـف :- يا قرار الاخذته يابة يا قرار مو صدگت وتريدني اصدگ وياك گتلك قبل وارجع اعيدها هسه گدامها وگدام الكل اني لا اريدها ولا متقبلها من الاساس من كل عقلك جايبلي وحده من الچبايـش ترى اني سكتت هناك احتراماً الك و صار اتفاق بيني وبينك ما احسبها مره لو اعرف اموت لا تفر الموضوع عليه

بديعـة :- شنو هذااا اللعب اذا مرايدهااا شكووو جايبها وجاااي

رائـف :- موو اني ابوي الجابها ابوي الورطني بيهااا خلي حير بيها 

-- لكم تردون تجلطوني شنووو هاي الحزوره وين عايشين احنه جايبين وحده مدري منين ما منين وتگولون عقدنا عليها انوب تتعاركون بيناتكم واحد يشمرها براس الثاني تخبلتوا

حاكـم :- هاله بابا اخذي يُمــن بغرفتكم ترتاح تعبانة من الطريـق 

اجت هاله عليه اخذتني وهي مصدومة بس ترمش ما تحچي صعدتني فوط الغرفتهن هي واختها طبيت للغرفه و انا يا دمعه صبي ولا تنشفين

جوه الدنيا احتركت و صوت عمي يصيح ويغلط عليهم وصوت المره لعبت جوله والولد يصيح بصفحة والزلمه بصفحه

و المره بصفحه احتركت الدنيا حرك وين يلا سكتوا ورها صارت رگعه بالباب قويه انا فوگ وسمعتها انوبينه صوت السيارة اشتغلت اضن الولد طلع من البيت مختاض

گعدت بالگاع و ايدي على خدي دموعي تطيح وارد امسحها والابنية واگفه بلايه حس بس تباوع مصدومة انفتح الباب وطبت اختهم الثانيـة نفس الشي ما تحچي گعدت على جربايتها و تباوع عليه وين ضلت على هذا الحال اخر شي گالت

غـادة :- لااا بعد ما اگدر اتحمل فهميني الموضوع شلون هيج تزوجتوا وشلون اهلج انطوج بدون مراسيم زواج و اخوية ميريدج و ابوية الخاطبج عفيه ترى دخت فهميني

رفعت راسي باوعتلها لابسه دشداشه گصيفه و ضافره شعرها گصيبه صفح 

و تشبه امها مرتبة و حلوة

يُـمـن :- علمي من علمج لا ادري ولا فاهمه السالفه جدتي وعمي اجوا گالوا راح تعرسين وترحين ويا رجلج ولبسوني 

و جابوني

غـادة :- هاي شنو وين اكو هيج 

هاله :- لعد امج ابوج وينهم

يُـمـن :- ابوي ميت و امي ما ادري عنها عافتني وهجت 

وحده باوعت للثانية وسكتن مني بعد ما سألن شوية و نسمع واحد يصيح غـاااادة هاااله ويننننجن لحگواا اميييي راح تموت

فزن البنات يركضن نزلن من الدرج وانا نزلت اركض وراهن لگينا المره طايحة بالگاع و ابنها الصغير حاطها بحظنه 

و يمسح على صدرها وهي ما تحچي بس مغمضه و عمي المسكين انخبص بيها يروح منا ويجي منا و البنات بقن يبچن على أمهن

واثــق :- خابرو رائـف يجي بسرعه لكم امي راح تموت  

گامت هاله تركض خابرت عليه ما يجاوب كتبتله رساله امي تخربطت تعال بس وصلت الرساله خابر يسأل مخبوص وهي ترد عليه تبچي عشر دقايق همّ حايرين بيها يغسلون بوجهها و يبوسون بيها و هي مغمضه لحد ما طب رائـف يركض ويصيح وينها شبيهااا دنگ عليها و يبوس بيدها ويگول

-- يوم حبيبتي شبيج شيوجعج 

بعده يحچي وياها وطب واحد يمشي وراه شو هذا جفت لا احم ولا دستور والبنات بلايه حجابات و هدومهن گصايف ياهو هذا اخوهم الثالث لو شني السالفه چا شگد همَ تقرب عليها و لزم ايدها و يگول 

بـُـرهـان :- خاله خاله تسمعيني 

هيَ من سمعت صوته فتحت عيونها وتگول 

هواء هواء اريد هواء 

فزوا يتراكضون يعلون بالبنكه و يفتحون بالبيبان وهي تصيح هواء اختنگت 

بُـرهـان :- بس وخروا منها ما بيها شي 

رائـف :- وجهها اصفر صاير 

حاكم :- ساعدنها تروح للغرفة يله بناتي 

گومنها البنات للغرفه و الولد راحوا وراها متخبلين على امهم والولد الثالث بقى واگف ويباوع على عمي وضحك  و هز براسه وعمي وگعد على الكرسي و يگول 

-- شفت خالتك و سوالفها ما تكبر لا والله 

بُـرهـان :- تدلل عليكم 

رجع باوعلي وابتسم و گال

-- هاي عروستنا مـو  

-- هاي يُمـن الحلوة الحبابة اني متأكد عقلها اكبر منهم كلهم وراح تحتويهم كلهم بس تحتاج شوية صبر مو هيج عمـو 

-- آن شاءالله 

حچيت هيج و افتريت وصعدت فوك ما طبيت الغرفـه البنات بقيت گاعده يم الباب استحي اطب وحدي غرفتهن بيها خصوصياتهن زحمه 

وين ضليت گاعدة هاي الگعدة وخدي لحد ما صعد رائــف لگاني مبسطه بالگاع بسرعه گمت وگفت باوعلي من فوك ليجوه و يگول 

-- شوفي يا بنت الناس عقدت عليج وجبتج هنا بس لا انتِ زوجتي ولا اني زوجج كل  واحد بينا خليه بعيد عن الثاني ما اريد أأذيج بكلمة ولا بتصرف خليج بعيدة عليه وكفيني شرج وتكفي شي ابوي ورطني بيج وجبتج هنا لان عمامج ناوين يكتلونج يعني سويت فضل عليج ونقذت حياتج هسه الاريده منج توگف هاي الزينه بعينج وتحترمين نفسج و تبتعدين عني ولا اني بيج ولا انتِ بيه لحد ما اشوف شلون احل الموضوع واخلص منج واخلصج منهم فهمتي لو لا فهم ولا علم 

ما جاوبت نزلت راسي للگاع وهو فتح وحده من الغرف و طب بيها وسد الباب وره حيل صعدن البنات لگني واگفه غـادة فاتت للغرفة بدون ما تحچي وياي بس هاله طببتني وبقت تحچي عليه شلون واگفه هنا و ما طابه للغرفـة مرتاحه طببتني و تگول گعدي ارتاحي 

گعدت بالگاع وحايرة بزماني عود صدگ هذا الصار و صرت ضحية امي و انكسر ظهري بهذا العرس الزلمه ما يريدني و امه ما تريدني واهلي ما يردوني وين امشي بروحـي يربي وين يريد بيه زمانـي 

ضليت گاعدة وايدي على خدي و گلبي واج نار وحسره ها كبرها بصدري البنات كل وحده كاضه دفترها وتقرأ وانه گاعده گبالهن و صافنه شوية وگامت غـادة نزلت 

وراها صاحت على هاله مشت هاله تشوف اختها و انا بعدني على گعدتي ربع ساعـه وردت هاله صعدت وتگول

-- امـي تريدج 

گمت وياها نزلت الغرفة امهم اول ما طبيت باوعتلي ما عجبتها و روحها لعبانه مني وگالت 

بديـعة :- اسمج يُمـن 

-- اي 

-- شگد عمرج 

-- يو ١٤ يو ١٥ 

-- حزوره هيَ 

-- ما ادري ما اعرف 

-- اكيد اميه لا تقرين ولا تكتبين 

-- لا اعرف اقرأ واكتب 

-- شنو طالبة 

-- لا خلصت السادس أبتدائي و بطلت 

-- شوفـي عيوني اللي صار غصب عني وعن ابني وحاكم داك صدره الاهلج وماخذج منهم حتى لا يقتلونج و اني مو ظالمة حتى اقبل ابنية بعمرج تنقتل بدون سبب بس بنفس الوقت ما اقبل بوحده مثلج زوجة الابني وجنه بيتي راح تبقين هنا لحد ميرتب ابو رائـف الموضوع ويا اهلج و يرجعج هسه الاريده منج تگعدين بـ احترام حتى نحترمج حدودج ما تتجاوزيها و الخطوط الحمر ما تتعديها بناتي متتقربين منهن ما احـب يتطبعن بطبعج و ابني لا تحاولين وياه لان محد يتأذى غيرج عوفيني ساكته عنج و متحمله وجودج بيتي لحـد ما تنتهي هاي المهزله مفهوم 

الچان الحايط يتحرك و يحچي تحركت وحچيت بقيت منزله راسي و الذل ذبحتي ذبح تمنيت اشوف امي هسه و اگلها ليش هيج سويتي بحالي ليش هيج ضيعتني ليش 

بديعــة :- البنات بدأ دوامهم و ميگدرون يشتغلون بعد وانـي تعبان شغل البيت منا وجاي عليج ماشي 

هزيت راسي بله ما ارد 

بديعـة :- الاكل متوصلين يمه اني اطبخ انتِ نظفي و غسلي مواعين وبس

نفس الشي ما ارد بس اهز براسي 

-- يله روحي ويا هاله الغرفتج وممنوع كلمة وحده تطلع برى هاي الغرفة هذا الكلام يبقى بيني وبينج 

طلعت من يمها لگيت هاله واگف باب الغرفه متانيتني بس شافتني گالت 

-- شنو رادت ماما من عندج 

-- گالت خل هاله تاخذج الغرفتج 

-- يا غرفـة 

-- ما ادري هيَ گالت

-- دقيقة اشوفها 

راحت طبت الامها شوية وردت طلعت گالت تعاي رحت وراها اكو بنهاية البيت من صفحة الدرج غرفـة مقفوله فتحتها وطبينا بيها الغرفـه بيها خانات كبار المنيوم وبرده معلگه و الباقي فارغ 

هاله :- هاي الغرفه بيها المفارش والغطوات وملابسنا الشتائية ضامينهن بهذول الخانات و منا وجاي حتنامين بيها يعني صارت غرفتج لان ماكو غيرها فوك بس مالتنا والولد كل واحد غرفته وجوه بس هاي وغرفه بابا وماما والأستقبال 

ما احچي ساكته وبس اباوع رجعت ابتسمت مقهورة وتگـول

-- لا تضوجين يا عمري اني اشوفها افضلج تگعدين هنا وحدج تاخذين راحتج اكثر لان بغرفتنا جنتي متضايقه صح هي بيها هذول الخانات الكبار بس والله نظيفه ومرتبه شوفي حتى بردتها بين فتره وفتره نبدل

-- لا ما ضايجة هيج احسن انعم الله عليكم حلوة الغرفه نعمه من الله 

-- حبيبتي الله ينعم عليج ، باعي هذول الخانات يمج طلعي المفرش اللي يعجبج وفرشي ونامي عليه و اخذي راحتج نزعي حجابج شعرج هيج يتعب من الحجاب من اجيتي الهسه لابسته واني حروح ويا غادة نحضر العشة واي شي تحتاجين بس صيحي عليه 

-- ريتج سالمه 

راحت هاله وسدت الباب وراها وانا فتحت الخانات ادور بيها باوعت الفراشات مطبگه و المخاد و لحف ريحتهن ترد الروح ما ادري بيمن غاسلينهن اخذت دوشك

و مخده وجرجف فرشتهن بالگاع و ذبيت ربطتي و تمددت جسمي كله يون عليه وراسي چن زفه بيه الله لا ينطيج يا سعدية ولا يخليك يا غـازي الله لا يسامحج يا يمه 

شويـة واجت هالـه جابت صينية بيها عشة وگعدت وياي تاكل وتگول 

-- بابا گال اكيد تخجل تطلع اليوم فـ جبت العشة واجيت اتعشه وياج 

اكلنا انا وياها وطلعت وياها غسلت ورجعت تمددت و حطيت اديه على عيوني وغمضت متعوبه وگلبي هلگد شايل قهـر بساع رحت بسابع نومه ما گعدت غير وجه الصبح صوت المؤمن يقرأ قران ضليت گاعده واسمعه و روحي تفرفح اريد اصلي بس شلون اطلع استحي خاف گاعدين و ما يرضون اطلع 

جبتها منا رديتها منا ما گدرت بعد بس صاح الله اكبر فزيت من مكاني واگول الله اكبر الله اكبر حي على الصلاة حي على الصلاة اللهم صل على محمد وال محمد 

حطيت ربطتي على راسي وطلعت محد گاعد الضوء طافي تذب الابره تسمع صوتها مشيت على كيفي للحمام غسلت وتوضيت و طلعت صار بوجهي عمي حاكـم بس شافني فز وراها ضحك وگـال

حاكـم :- صباح الخيـر

يمـن :- صباح العافية

-- ليش گاعدة هيج وقت رجعي نامي حبيبتي الدنيا ظلمة هنا ميگعدون هيج وقت

-- گعدت اصلي 

-- هاا الله يتقبل 

-- چا ما يگعدون الولد والبنات للصلاة 

هز راسـه و يگـول 

-- من جنت صغير ابوي الله يرحمة يگعدنا الصلاة الصبح والما يگعد يطگه ويگله گوم ولك لا يبول بليس بـ اذنك ومن هذاك اليوم الهذا اليوم اني اگعد الصلاة الصبح اخاف من بليس اله عائلتي لا فادت بوله بليس لا فادت غضب الله جربت كل الطرق وياهم وما يگعدون خليهم هم وربهم اني العليَ نصحت وحچيت و كل لشه تتعلگ من كراعها ، روحي صلي بابا ورجعي كملي نومتج لا تبقين گاعدة 

رحت للغرفـه دورت على سجادة و تربة ماكو طلعت لگيته ماد سجادته بس بعده ما مصلي 

يمـن :- عمي 

حاكـم :- ها حبيبتي 

-- اريد سجادة وتربة

-- هاي الخانه تلگين بيها اخذيلج سجادة وتربة وقران بدل ما ضالات مهجورات 

رحت للخانه مال التفزيون فتحتها طلعت السجادة والتربة والقران بسته وحطيته على راسي و مشيت الغرفتي مديت سجادتي وصليت 

انه صدگ اصلي واصوم ولابسه ربطه

و استحي و اخاف ربي بس ديني مو كامل صلاتي مو مضبوطه تجيني ساعات اتهاون بيها واصليها متأخره وساعات انساها

و تروح عليه و ثاني يوم اصليها قضاء ما في الذمه بس اليوم من مديت سجادتي

و صليت و وره ما خلصت صلاتي سجدت الربي وبچيت اشكي حالي ضليت ساجده وابچي واحچي ويا الخلقني واشيكله ضعف حالي و ظلم الناس الي حچيت اليوجعني اله بلايه ما استحي حچيت بلايه ما اتردد حچيت بلايه ما احس ثكلت عليه احسيته يسمعني و حسيت براحه حسيت بـ امان الغرفه هاي ما جنها خاليه لا حسيته موجود بيها و يسمع شكوتي ويهون عليه 

بـ أمانه وقربة مني

رفعت راسي واگول

-- يوم لا ينفع مالاً ولا بنون الا من اتى الله بقلب سليـم ياربي وانا بالدنيا محد نفعني لا اب ولا ام ولا عم ولا اهل چا بالاخرة شلون ياهو ينفعني ياهو الياخذ بيدي ربي وسيدي ومؤلاي انخلقت وحيده و اموت وحيده وبين وحدة الدنيا وحدة الأخر انتَ القريب المجيب ثبتني على الهداية والصلاح

و قربني منك و حببني بالتحبه و التشوفه صح ربي وسيدي ومؤلاي لا تهد ايدي انتَ السند والعون والقوي وانا اوعدك ما اعوفك ولا اتبعد عنك بس لا تبعدني عنك وخليني قريبة منك بكل وكت 

دنكت حبيت التربـة و گمت لميت سجادتي و حطيتها على الشباك شفت الشباك يطلع على الحديقة الخلفية ضليت رافعه البرده وفاتحه الشباك واباوع الحديقة صغيرة تصير بظهر البيت بيها كراسي ثلاثه و طبله صغيرة ونركيلة ملفوفه بصف الكراسي 

ضليت گاعدة واباوع فوك الساعتين كل شي ما اسوي بس صافنه على الزرع شلون يتحرك من الهواء اخر شي سمعت صوتهم اضن يردون يرحون الدواماتهم 

ساعه وهم يتحركون ويسولفون وراها صار هدوء بالبيت واجاني صوت امهم واگفه وره الباب و تصيح عليه تريدني اطلع لبست ربطتي وطلعت 

بديعـة :- يلا عيني صح النوم عدنا شغل روحي تريگي حتى تخلصين شغلج 

عافتني ومشت وانا رحت للمطبخ الاكل على الميز والجاي بعده حار صبيت جاي

و گعدت اكل الصمون الحار يرد الروح والاجبان شتشتهين يا روحي اكلت اكل مال ملاهيك ميته من الجوع وبن لاگيه هيج اكل عد سعدية لو عد غازي اكلت

و شربت جاي وگمت لميت الاكل وغسلت المواعين و طبيت للهول نظفته كله ومسحت التخم والبلازمه و رجعت للحولي نفس الشي وهي گاعده وبيدها الريموت بس عينه بالتفزيون وعين عليه شلون اشتغل 

بس كملت الحولي گالت

-- نظفي الفوك وياج بس لا تفوتين للغرف

ما گلت باطل شلت وصلتي و سطلي

و المعطرات اشكال الوان وصعدت نظفت الصاله والممر و مسحت التخم الفوك

و البيبان مال الغرف والحمام و نزلت على الدرج 

كملت الجوه و طلعت للبره غسلت الحوش و رشيت الزرع وغسلت الكراسي مال الحديقة الخلفية وشلت النركيلة غسلتها ورجعتها بمكانها 

احس اديه تگطعت و ظهري طگ بالنص من التعب، طلعت هيَ وگفت بـباب المطبخ و صاحت عليه باوعت الها الهث من التعب 

بديعـة :- كافي بعد عاشت ايدج فوتي ارتاحي 

لفيت الصوندة و رجعتها المكانها وطبيت 

بديعـة :- فوتي سبحي و نامي بعد ما عدنا شي

طبيت الغرفتي اخذت دشداشتي المطگعه 

و هدومي الداخليه مخيطتهن الف خياط 

و مشيت للحمام جنت توني غاسلته

و ريحته ترد الروح واشكال الغسولات والشامبوات معلگات فتحت الدوش

و طبيت جوى المي احس التعب يطيح

 ويا المي غسلت راسي بالشامبو وجسمي بالغسول وحجرت رجليه بالمحجارة اول مره احس بروحي نظيفـه وسابحه سبحه صحيحه ساعه گامله جوه المي اغسل بروحي ما مصدگه بالدوش والشامبوات والغسولات التخبل لو ما عيب من المره چا ضليت للعصر بالحمام بس استحيت وطلعت اول ما طلعت 

صاحت هذا مشط على الميز اخذيه الج  اخذت المشط وطبيت الغرفتي مشطت 

و لميت شعري و تمددت بفراشي شفت روحي انه بخير وين صرت اليوم وين جنت امس خليه لا يريدني ولا يقربني انا هم ما اريد العرس بس كون اضل عدهم ميخالف اشتغل واخدم احلل لگمتي واسكتهم عني المهم هسه انا بخير إذا بقت هيج حياتي 

نعمه وبركة شو البيت يخبل والاكل يخبل و عندي غرفه انام بيها واگعد بيها احسن الف مره لا احسن بمليون مره من ضيم سعـدية والجوع والظلم مال غازي

و الفراره مال البيع بالشوارع 

غفيت وانا اردد الحمدلله الحمدلله ساعه و سمعتها تصيح عليه گمت طلعت والربطه فوك راسي لگيتها تسوي بالزلاطه 

بديـعة :- ما عندج غير هاي الملابس 

يُــمـن :- لا عندي  

-- هم هيج خراگين لو مرتبات 

سكتت ما رديت من شافتني ساكته گـالت 

-- بسيطه عود نشوفلج ملابس جديدة المهم هسه حظري المواعين الاولاد على جيه 

رحت حظرت المواعين والخواشيك

و رجعت توضيت وصليت الظهر و طلعت للمطبخ لگيتها رايحه الغرفتها بقيت گاعده على الكرسي متانيتها اندگ الباب گمت فتحته طبت هاله 

هاله :- هلاوو

يُـمـن :- هلا بيج الله يساعدج 

-- شنو الغده ميته جوع

--  والله ما ادري امج طبخت  

-- گولي عمه خاله لا تكولين امج ترى ماما من تسمع هيج تزعل عليج 

حچت هيج وطبت بعدني ما ساده الباب

و طب وراها واثـق  

واثـق :- شنو الغده 

ضحكت شمالهم جاين مجاعه 

واثـق :- ليش تضحكين اكو شي يضحك

-- لا بس هاله هم طبت تسأل جوعانه وضحكت العفو مو عليك 

ما جاوبني عافني و طب فشلت من روحي هسه انا شبيه اضحك بوجهه اعرفه يعرفني حاجيلي نكته حتى فتحت حلگي شگد عيب هسه شيگول عليه 

صاحت عمتي بديعـة يُـمن شغلي النار على الاكل بين ميبدلون شغلت النار و گعدت اندگ هورن مال سيارة طلع واثـق فتح الباب طبت للبيت سيارة رائف هو بسوق وياه ابنية گاعدة بالصدر 

واثـق من شافها ضحك و دار وجهه يباوعلي مرتبك و هي نزلت باسته و اجت تمشي و رائـف بمشي وراها  و وجهه مخطوف وصلت يمي صفنت وتباوع للولد وراها گالت 

أديان :- هلاو 

يُـمـن :- هلا بيج 

طبت للبيت و عيونها عليه وعليهم وهمَ يمشون وراها وجوهم صفر شني السالفه ما ادري رحت وراهم شفت عمتي فرحت بجيتها و فتحت اديها الها و الابنية حظنتها 

و وحده تبوس بالثانيـة گعدت قريبة عليها وعمتي فرحانه بيها والابنية باوعت عليه

و تگول خاله منو هاي الابنية هنا عمتي تذكرني يمكن جانت ناسيتني المره صارت صفره و حارت بروحها بقت تبلعم وين يله گالت الها 

-- هاي بنت ابن عم عمج حاكـم 

-- ها اهلاً وسهلاً شعجب جايتكم اشو مگلت يمكم خطار 

رائـف :- راح من بالي 

حچى هيج و راح گعد و واثـق گعد بصفه نزلت هاله من فوك مبدله ملابسها بس شافتها ردت فعلها مثل الباقين خافت وتوترت گامت الها باستها وحظنتها وهاله تردلها بس عيونها عليه 

بديعـة :- يمـن صبي الغده 

واثـق :- لا ننتظر ابوي 

-- ابوك يتأخر اتصل و گال تغدوا

أديان :- لعد وين غادة 

بديعـة :- بين منرتب الغده هي تجي يله يُمـن استعجلي 

حچت هيج و أشرتلي براسها رحت للمطبخ و هيَ اجت وراي صارت قريبة مني وهمست بهدوء لا واحد يسمعها

بديعـة :- ممنوع تفتحين موضوع مهرج على رائـف گدام أديان مو بس أديان اي مخلوق خارج عائلتنا ميعرف بالموضوع هذا فهمتي 

هزيت راسي بدون ما اجاوب و درت اصب بالتمن وهي راحت صبت المركة و صاحت عليهم گعدوا على الميز يتغدون و انا رجعت للغرفة ما گعدت وياهم اسمع ضحكهم وسوالفهم وغادة اجت وياهم ساعه و طلعت بعدهم گاعدين بالصاله يشربون جاي والمواعين بعدهي بمكانها على الميز كفيتهن وغسلتهن و صبيت تمن وفوگاه مرگـه و گعدت اكل بالمطبخ طلع هـوَ بيده نقاله يخابر ومن كمل مخابره ورجع جنت بعدني بمكاني اكل

و گف يمي و گال 

-- أديان بنت خالتي و حبيبتي و ما بقي شي و اخطبها ان شاءالله موضوعج مينفتح گدامها و اذا سألتج شعندج هنا گولي مريضة وعدنا مشاكل عائليه بالبيت

و دزوني هنا لحد ما تنحل المشاكل لان يخافون عليه مفهوم 

ما جاوبته مدنگه والخاشوكه بيدي رجع گال مو احچي وياج سمعتي 

رفعت راسي عليه جان مدنك عليه ويحچي بهمس ما يريدها تسمع صارت عيني بعينه وهاي اول مره عيوني هيج تصير بعيونه 

اباوعله و يباوعلي بدون ما ارد بقيت اباوعله و عيوني تجمع بيها الدمع بلعت ريگي ما اريد ابچي لا عليمن ابچي انا قوية ودمعتي منا وجاي غالية ما اطيح برخص رديت 

يُـمـن :- ليش هو اكو شي ثاني غير هذا الحچي صدك اهلي عدهم مشاكل عائلية وبس تخلص ارجع لا تشيل هم غير هيج ما راح احچي 

دار وجهه من عندي باوع للصاله ورجع يباوعلي و يگـول 

-- و شوكت ترجعين 

-- من اطلگني

-- اذا طلگتج يكتلونج

-- الله واحد والعمر واحد والمكتوبلي لا انا ولا انتَ نغيره 

ما جاوبني عافني وراح يمهم رجعت كملت اكلي و شلت ماعوني غسلته و رجعت اريد اروح للغرفـه صاحت عليه حبيبته

-- يُـمـن تعالي گعدي نشوفج نتعرف عليج 

-- عذريني حبيبة مريضة و ما اگدر اگعد 

-- سلامتج شبيج 

-- مرض ماله دوه اسم الله عليج 

عفتها و رحت الغرفتي قفلت الباب عليه 

بعد ما طلعت لليل وهيَ يمهم سمعت عمي اجى و سودة عليه سأل عليه اول ما طب گالوله نايمة أذن المغرب فتحت الباب وطلعت لگيت الولد نفسه الاجه امس

و بعد وياه مره تطلع اكبر من عمتي بديعـة بس تشبها گلت السلام عليكم ردو السلام تعديهم ومشيت للحمام توضيت و رجعت 

للغرفـه صليت و كملت و گعدت استغفر 

دگت الباب هاله و طبت 

هاله :- يُـمـن خاله لميعـة و ابنها ب وبُـرهان حيبقون للعشاء و أديان همات هنا وخاله سميعة ام أديان جايه بالطريق

 فـ الولد قررو يسون مشاوي برى بالحديقة و ماما تگول خل تجي تساعد

طبگت سجادتي و گمت واگول صار 

هاله :- بس بالاول اخذي هذول ماما دزتهم 

يُـمـن :- شني هذول

-- ملابس 

-- منين 

-- من عندي 

حچت وهي مستحيه مني وتگول

-- باعي والله نظيفات وجديدات اختاريتلج احلى شي عندي والله ماما مو قصدها شي بس تحب تشوفج اطلعين حلوة هي ناوية تشتريلج باجر بس اهلها اجوا اليوم قبل لا تروح للسوك ودزتلج هذول 

-- لا تبررين حبيبة انا ما اكش منج ولا اكش من اي بشر گلبه نظيف مثل گلبج انتِ اختي 

أبتسمت و اجت باستني و تگول

-- والنبي حبيتج من اول ما شفتج انتِ كلش حبابة

-- انا هم احبج والله حسبتج اختي

-- تمام لعد بدلي وتعالي وها ما دامني اختج اريد اطلب منج طلب 

-- عيوني الج

-- تغيرين لفت الحجاب هذي اني من يمي اختنكت 

-- هههه شلون الفه هي ربطه ما تنلف غير لفه

-- حجيبلج شال واجي

طلعت تركض و انا بدلت هدومي بهدومها جايبتلي بجامة و القميص مالها طويل حد وحد ويا الركبة لونه سمائي فاتح وبيه ضربات نيليه طبت تضحك بيدها حجاب 

هاله :- جبتلج اكثر حجاب احبه 

اخذته منها و لبسته ما رضت على لفتي هي لفته الي من جديد و طلعنا اني وياها لگيتهم گاعدين بالصاله عمي بس شافني ابتسم فرحان بيه و عمتي هزت راسها بالقبول جني عجبتها و المره خالتهم تباوعلي والضحكة تارسه وجهها 

صاحلي عمي رحت عليه بسته براسه

و گعدت يمـه 

هاله :- شوف بابا شلون طالعة كيكه تجنن والنبي  

حاكم :- ههه هي كيكه من زمان 

واثـق :- كيك صنع رباني لا صالون ولا حمره وكحله 

غـادة :- شقصدك ولك 

واثـق :- ليش ضجتي منو يمج مو هاي أديان تقبلت الموضوع بروح رياضية 

أديان :- هههه ايااا حقيررر 

رائـف :- يلا جهزولنا الاغراض حتى نشوي 

حچه هيج وگام گالت عمتي

بديعـة :- يمـن قطعي اللحم والمعلاك بالعجل 

گمت للمطبخ جايبين لحم ومعلاك خير من الله كصصته و ملحته و طلعت حظرت المنقله والفحم اندل مكانهن الصبح من نظفت لگيتهن بالحديقة الخلفيـه شغلت المنقلـه وشيشت اللحم و المعلاك طلعوا لگوني محظره كل شيء و واكفه متانيه النار تخف حتى اشوي 

واثـق :- يابة شلون أبنية معدله شكراً تعباج 

رائـف :- جيب الكراسي من يمك  

بعده واثـق هسه دار يجيب الكراسي

و جفتت علينا كومه ناس ام أديان و اخت بُـرهـان و بعد ولد اثنين شباب اخوان أديان وابوها وابو بُـرهـان والبيت انكلب كلاب 

فرشوا بالحديقة والتموا البنات بصفحة والنسوان الاكبار بصفحة والزلم بصفحة والشباب يشون و الضحك والسوالف بكل مكان حبيت الاجواء و غيرت من نفسيتي شويـة بس ما شاركتهم بشي ولا حچيت ويا احد ولا اختلطت ويا احد گعدت بالزواية البعيدة واباوع عليهم 

بس اكو واحد من أخوان أديان ما شال عيونه مني وين ما اروح يباوعلي وكل ما ارفع راسي الگاه صافن عليه كلش ضوجني بس سكتت گلت اضن هم عادي عدهم 

و مالهم قصد بيها لان بناتهم ضحك وسوالف وبلايه حجابات گاعدات يمهم 

فرشو سفره طويله و رتبنا الاكل بيها والمقبلات والصمون والببسي وهذيج الگعده الحلوة گـالت عمتي  

لميـعـه :- شنو شـصار على هاي الأبنية المشيتوا عليها 

سميعـة :- والله ما عجبته يگول مو حلوة

واثـق :- صدگ تشبه رجليـن نهلـه المخبلـه

سميعـة :- بعد هذا نـؤفل لازم يحط عيب لو ملكه جمال لازم يطلع بيها شي وما تعجبه

رائـف :- وانتَ ويـن شفت رجليها وحكمت

نـؤفل :- غير لابسه بجامه و رجليها جنهن اصبعي الصغير 

بديعـة :- والله اني اگول انشوفلك وحده من الاقارب افضل ما تروح تجيب غريبة عاد من عدنا وبينا نعرفها وتعرفنا هذا افضل حل 

نـؤفل :- بصراحه انـي يمكن لگيت العروس وقتنعت بيها هههه 

بُـرهـان :- يا صلاة محمد اي بله ومنو هاي سعيدة الحظ اللي اقتنع بيها الأستاذ نؤفل من بعـد كل هذا البحـث 

نؤفل :- هههه شو خجلت 

كلهم ضحكوا عليه هو يصير اخو أديان الجبير وأبن سميعـة خالـه رائـف ، رجعوا سكتوا وره شويـة گـال 

نـؤفل :- اگول عمووو إذا اخطب منك مره تنطيني 

غـادة :- ايععع بس لا اني 

نـؤفل :- ايع بعينج عابت الشكلج اني اكلبج 

هاله :- لا تگول اني وداعت امي انتحر 

نـؤفل :- شوف هاي الثانية مصدگه روحها 

واثـق :- بس لا اني يمااا دخيلك ربي جنت شاك بيك مو راحه من زمان وطلع شكي بمحله

كلهم ضحكوا وانا ابتسمت ونزلت راسي رجع الولد يگول 

-- لا يابة اني اريد اخطبت خطاركم يُـمـن اسمها موو 

يتبع ...... 

#عــروس_الچبـــايــش 🌼

بــقلم يـــاســـة الحلقة (4)

تعود أن تخيط جروحـك من الداخل بنفسك 

فلا أحـد يعـرف حقيقـة وجعك 

وشدتـه كمـا تعـرفهـا أنتَ 

أي يـد أخرى تلمـس جـروحك 

قـد توجعهـا أكثـر رفقـاً بنفسك

................................. 

يُـمن :- بس گال هيج هاله شرگت بالبسي و واثـق گاعد بصفها طبطب على ظهرها ويگول

-- اسم الله اختي حقج حقج الموضوع صعب بس شنسوي نتقبله بروح رياضية

جان يحچي ويضحك و يباوع على رائـف

الكل سكت مصدوم والولد شكله تحول من الشقى للجد من حچاها جان يضحك بس هسه صارت صدگ اريد اتنفس ماكو احس اختنكت من الموقف الانا بيه جوز همَ عدهم عادي بينهم الشقى والضحك

و الميانه الزايده بس انا اول مره انحط بيهج موقف متت بدمي

نـؤفل :- ترى مو شقى والله احچي صدك مو جاي ادور على بنت حلال بعد ليش اروح ادور بعيد ما دام عمي عنده هيج اقارب حلوة و صغيرة و حبابة شـريد اكثر

حـاكم :- الابنية مخطوبه

نـؤفل :- لااا المن

-- قارين فاتحتها سد الموضوع حبيبي

سكت والكل سكت وياه وانا انگطع عليه الهوى متت من الخجل بعد ما اكلت شي بسرعـه گمت طبيت الغرفتي و سديت الباب ساعه تقريباَ وسمعت صوت قريب على شباك غرفتي

رشيـد :- ليش هذا الاستعجال حرجت نفسك وحرجتنا وياك 

نـؤفل :- شعرفني مخطوبة شفتها حلوة 

و مرتبه وتشتغل بلا صوت واني ناوي اتزوج كلت اللي نعرفه احسن من الما نعرفه وعلى عرف عمي حاكـم عـود

-- اي بس مو گدام الكل جان حچيت بينك وبينه 

-- صارت بعد و استعجلت شوية

-- مو شوية استعجلت هوواي 

-- اي ديله كاافي لا تلح كتلك استعجلت 

-- فوگاها تصيح عليه 

-- اجوا الولد اسكت 

صار صوت الولد الباقين قريب يم الشباك و ريحة النركيلة گامت تفوت بخشمي اسمع سوالفهم بوضوح و ضحكتهم بـ أذني سطروني سطر اريد انام ماكو مدري شيلعبون وكل شوية واحد منهم طافر وصايح انتَ تزغلط والثاني يرد لا تغش 

فوك الـ12 و همَ بعدهم يلعبون معدتي ضلت تگلب من الريحه مال النركيلـة 

اخـر شي سديت خشمي بالربطه و حطيت المخده فوك راسـي و غمضت عيوني گـوه نمت 

والصبح نفس الشي يرحون الدوامهم وانا استلم البيت تنظيف وتعزيل و عمتي بديعـة گاعده وتراقبني أسبـوع مر على جيتي هنا وحالي مثل ماهو من الشغل للغرفه ومن الغرفه للشغل ويومـيه أحمد ربي واشكر على النعمه الانا بيها وين جنت وين صرت 

صدگ اشتغل واتعب بس خلصت من ضيم عمي وجدتي هنا اكل اشكال والوان و انام بمكان نظيف وعمـي حاكـم يموت عليه 

ضليت هيج عايشـة وماكو شي جديد الشي 

الشي التغير بهاي الايام واثـق ضل يسولف وياي و يشاقيني وانا استحي منه ارد على گد السؤال والجواب و اگوم اروح الغير مكان استحي اضل يمه 

و هاي اليوم العصر گمت للمطبخ لگيت الفواكه على السنك بالعلاليك محد ضامها وگفـت اغسلها بالسنك وارجع اضم بالثلاجة طلعت عمتي من الغرفة مالتها مبدله صاحت على البنات نزلن مبدلات مثلها اجت عليه وتگـول 

بـديعـة :- رايحين للسوك عينج على البيت 

هزيت راسي بله ما احچي و هي والبنات طلعن اخذهن واثـق يوصلهن للسوك  ضليت بس انا وعمي نايم بغرفـته  

مشيت للبلازمـه شغلتها وضليت اكلب بلكي اشوف شي حلو ماكو كلها اخبار اخر شي لگيت الفارة والبزون گلت خل اباوع فارة وبزون احسن من ما اگعد وحدي عادي اخلص وكت بيها

بعدني هسه گعدت و سمعت صوت باب المطبخ انفتح درت وجهي اشوف ياهو هذا شفت رائـف طب تعداني ومشى ما جنه يشوفني صعد فوك شوية ونزل مبدل هدومه و يصيح يوم يوم رديت عليه وانا گاعدة

-- مو هنا راحت هيَ والبنات

-- وين راحت 

-- للسوك 

عافني و راح للمطبخ اسمعه فتح الثلاجه ورد فتح الكاونتر ونوب صوت المجمده انرگعت قوي ضليت بمكاني ما گمت خاف اگـوم ويفشلني اخر شي هو اجى و گعد بالكرسي الگبالي والنقال بيده يخابر 

-- وين انتن 

-- شوكت ترجعن

-- واني شاكل هسه 

-- يلااا فضنهاااا معدتي موتتني 

سده منهن و ينافخ اجيت اگوم اسويله اكل بس خفت يفشلني وما ياكل مني 

و عمتي ما ترضا انا اوصل للطبخ تلعب روحها مني مدري شني عفته و گمت للغرفـه شوية و اندك باب الغرفه صحت 

-- منو

رائـف :- هاي امي تريدج 

گمت لبست ربطتي وفتحت الباب عبالي اجت من السوك لگيته واگف و بيده النقال انطانياه وراح حطيته على إذني 

و حچيت

-- الو

بديعـة :- ها يُـمـن 

-- هلا عمه 

-- رائـف جوعان واذا مياكل معدته تأذيه تعرفين تسوين اكل سريع  

-- اي اعرف 

-- ماشي لعد شوفي شنو موجود و سويله شي سريع لا تتأخرين 

-- صار 

قفلته منها و رحت لگيته راجع بالصاله گاعد و ايده على معدته حطيت نقاله على الطبله و رحت للمطبخ فتحت المجمده طلعت لحم مثروم حطيته بكاسة وفوكاه مي حار اريده يموع وبين ما يموع گصصت بتيته و شغلت النار على التاوه

ثرمت راس بصل و شوية كرفص و بتيتايه وطماطيه ماع اللحم غسلته و حطيته فوك الحشو و حطيت فلفل حار و خاشوكة صغيره مال معجون و شوية كجب و شوية ملح وطحين وعجنته صار كباب عروك ريحته تخبل طلعت البتيته وگليت الكباب 

بين ما يستوي ثرمت زلاطه ناعمه صفطتهن بالصينية و جبتها واجيت للصاله حطيتها گباله بله ما احچي وياه رفع راسه باوع للاكل و رجع يباوعلي حتى شكراً ماگال وغصباً عليه تقبل الاكل مبين معدته توجعه كلش ورضا مجبور 

عفتـه و مشيت الغرفتي بعد ما طلعت منها لحد ما سمعتهن اجن وعمتي تصيح عليه لبست الربطه وطلعت 

بديعـة :- هاي العلاكة مالتج اخذيها 

يُمـن :- انعم الله 

اخذت العلاگه و طبيت الغرفتي فتحتها جايبه هدوم هواي اكثر من قطعه

و حجابات وداخليات وسيت حلو مال طلعه فرحت بيهم فرح جن نزلن عليه من السماء لميتهن و طلعت اتشكر منها زحمه جايبه كل هاي الغراض وما اشكرها لگيتهم كلهم بالصاله و عمي گاعد وياهم 

يُـمـن :- مشكورة عمه على الغراض الله يزيد خيرج

بديعـة :- بالعافيـة

واثـق :- باعي هو منو اخذ عمتج للسوك بالسيارة 

ضحكت ورديت 

-- انتَ

-- حلوو لعد ما دام اني اخذتها و جابتلج غراض ما تروحين تسويلي كباب مثل هذا المسويته الـرائف

حچى هيج ورفع الكبابية ابتسمت ورديت

-- اي من عيوني 

مشيت للمطبخ شغلت النار اجت وراي عمتي و گفت تباوع شوية و گالت عمج جوعان حسبي حسابه وياج 

-- اي صار البنات هم ياكل 

-- ما ادري 

گعدت على الميز وتباوع عليه هاي المره حاطينها مراقبة على تحركاتي حتى من تباوع اتخربط وما اعرف اشتغل رجعت گالت 

-- كثري خلي البنات يتعشن فد مره 

طلعت بتيته و گليت طماطه والكباب

و سويت بيتجان وهي ثرمت الزلاطه 

و صفطتهن علي الميز و رحت صحتهم التموا كلهم ما عدى رائف ما اجى جان هسه ماكل

تعشوا و انا گاعدة وياهم و عمو و واثـق يمدحون بالكباب واكلوا بلايه خبز 

عمتي جانت تاكل بس زلاطه ومن شافتهم يمدحون والبنات هم گالن طيب و عاشت ايدج اباوع الها مدت ايدها واخذت وحده اكلت منها شوية وانوب كملتها و بقت تاخذ من الماعون وتاكل فرحت من شفتها اكلت من اكلي معناها ما تلعب روحها مني

كملنا الاكل شلنا المواعين انا وهاله غسلناهن و سوينا جاي بين ما كفينا المطبخ اخذت انا الجاي الهم و طبيت الغرفتي ساعه و سمعت الولد اجو وبدأت سهرتهم و ريحة النركيله وصوتهم العالي گمت رفعت البرده شوية شفت واثـق

و ولد خالته سميعـة هذول صحبانه الروح بالروح  يوم هو يسهـر عدهم ويوم همَ يجون يسهرون عدنا 

رجعت المكاني وراسي احسه طبل اريد انام ما اگـدر لحد ما خلصت سهرتهم يلا نمت 

ثاني يوم صادف جمعـة عمتي گالت ما دام عطله والبنات ويانا خلينا نسوي حمله على البيت و نغسل البردات والسيراميك 

غـادة ما قبلت تشتغل و سوت الها زعله ويا واثـق شلون يگلها الزرافـه طبت الغرفتها ما طلعت وبس هاله بقت وياي 

نزلنا البردات حطتهن هاله بالغساله وانا صعدت على الدرج سعفت الحيطان ومسحت البنكات وعمتي فوك راسنا تشرف علينا 

ثلاث ساعات احنه نشتغل ما خلينا شي يعتب علينا هالـه تشتغل وياي خطيه بس 

اديها بايده الشغله التخلص بدقيقه تخلصها بنص ساعه و ام النص ساعه بساعتين ما اعتمدت عليها بس ساعدتني انعم الله عليها 

خلصنا كل البيت بقت بس غرفتي عمتي گالت فوتن فد نوب مسحن البنكه وسعفنها و انا صرت معدله و گلت الهاله روحي بعد انا اكملها بسرعه  راحت تعبانه

وانا حطيت الدرج وبديت اسعف بالحايط كملت الحايط وصعدت للبنكه مسحت اول ريشه ودنكت اريد اغسل الوصله ويا ما دنكت اختل توازني ودخت اريد اسيطر على روحي ماكو بساع انجبحت وطحت طيحتي صارت على وجهي و رجلي اليمنى افترت وصارت جواي رفعت روحي الدم يصب بس منين ما ادري و رجلي شلون الواحد و شالها وشمرها من مكانها احس روحي طلعت 

على صوت الرگعه وصوت صرختي اجوى يتراكضون طبوا لگوني اصب دم هاله  

و واثـق تخبلوا خطيه وعمتي تسأل شبيك شكو رائـف اجى وراهم على الصوت شاف حالتي الولد مالت الله من شاف الـدم 

و شافني اصرخ من رجلي دنگ عليـه يسأل 

-- شبيج شو اشوف شبيج 

هاله جابت كلينس مسحت وجهي طلع الدم من حنجي بقت حاطه الكلينس  ولازمتني وانا روحي شاطت من رجلي ابچي بدموع يمدونها اصرخ يرجعونها اصرخ اخر شي عمتي گالت هاي انكسرت ممعقوله كل هذا الوجع اخذوها للمستشفى 

گومتني هاله ما اگدر احطها بالگاع طلعت روحي مني رائـف من شافها كلش الحاله تقرب مني و سندني يريد يمشيني چا غير احطها بالگاع وامشي عليها ماكو انتهيت خطوه ما اگدر اخطي حطوا عليه جبة عمتي يردوني امشي وانا اصيح ما اگدر ما اگدر

واثـق طگ ويا رائـف ويگله ما تگدر تمشي لو تشيلها وتطلع لو توخر منها خليني اشيلها بمكانك 

رائــف بلايه ما يرد عليه دنگ عليه وشالني وطلع بيه صعدني بالسيارة و يگول العمتي ما ترحين 

-- لا وين اتحمل ريحة المستشفى اخذ غادة وياك

غـادة :- وين اعرف بهاي السوالف اني 

واثـق :- جيب السويج گاعد تعزم بيهن وهنَ يتعايرن والابنية ماتت 

جر السويج من رائـف وصعد شغل السيارة فتح رائـف الباب وصعد بصفه اخذوني اثنينهم للمستشفى وبس وصلنا جابلي واثـق كرسي متحرك گعدت بيه واخذني يدفع بيه سوولي اشعه طلع كسر بسرعه جبروها و انطوني مسكن ورجعنا 

دموعي تصب ما توگف وانوب ابچي خنگ احس روحي طلعت ما جنت ابچي من كسر رجلي  لا ابچي من كسرت روحـي وخـاطري وهضيمني 

واثـق :- لا تبچين يمعودة واذا مات رجلج كلنا على هذا الطريق فدوة الج جلب ومات 

رائـف بسرعه سطره على راسـه هو ضحك ويرد 

-- شبيك اخذتها عليك اني احچي على زوجها انتَ شعليك 

-- تنجب ولا تصير ظريف 

-- اهووو راح يعيش الدور براسي انتَ شعليك اخوي حبيبي اني احچي على زوجها المستقبلي اقصد الي راح يعلن ويعترف بيها گدام الناس 

فتح الجام رائـف بدون ما يرد بقى يدخن رجع واثـق يگول 

-- كافـي يا حلوة يا قشطه يا عسل يا مربه يا كاهي يا كيمر السده تروحلج فدوك سميعة لا تبچين دموعج غسلن ديانه حداد 

رائـف ضحك وهز راسـه و هذا رجع يكمل 

-- يربي شوب شوب 

ضحك رائـف بصوت عالي و هز ايده وهذا باوعله ورجع يضحك و يهفي ويصيح شوب شوب وانا اطرش بالزفـه ما مفتهمه شكو

رائـف :- ههههه كافي لحيت  

واثـق :- شوبك ابن عمي مانك مشوب 

-- ههههه مشوب وابوي مسموط بس كافي لا اطيح حظك 

ضحك و طبگ گاله رائـف شكو وگفت رد

-- اريـد مي الشوب موتني عطش 

نزل للأسوق يشتري واحنه بقينا بالسيارة تأخر ماكو ما رجع حطيت راسي على الجام وغمضت عيوني لحد ما رجع خطيه جايب عصير انطانياه وشغل ومشى

بعدنا ما طابين للفرع و دگ عمي على رائف يسأل من طحت جان طالع رايح الصاحبة اضن هسه يلا دره جاوبه رائـف صبوها طلع عدها كسر وهسه راح نطب للفرع وصلنا

وبس وصلنا للبيت بعدني ما نازله دگ نقاله نزل راح يجاوب بعيد علينا و رائـف ساعدني انزل استحيت الزمه گالي 

-- اني اخوج انطيني ايدج 

انطيته ايدي ساعدني انزل هسه مشاني وطلعت هاله و عمي اجت عليه لزمتني 

و تتحمدلي بالسلامة وعمي باسني براسي ميت من القهر عليه 

طبيت عمتي تحمدلي بالسلامة و غادة نفس الشي طببتني هاله الغرفتي وساعدتني انام بمكاني وعمي وينا طب ويگـول

حاكـم :- شلون تگدر تگوم وتگعد صعب عليها بالگاع تحتاج جرباية 

هالـه :- من الاول المفروض تجيبون جرباية هنا شلون تنام بالگاع اصلاً

ما جاوبها عمي طلع وهي بقت يمي رجعت عمتي اجت و تگول غير تنتبهين شجاج

يا امي زين عدت هيج لو مكسور بيج شي قوي شلون 

رجعت طلعت وهاله هم طلعت گالت ارتاحي وانا بس طلعن بسرعه نمت من المسكن الماخذته ما گعدت غير على صوت هالـه تگعد بيه فتحت عيوني بتعب واكو وجع قليل بيها گـالت  

هالـه :- گومي شوية دنريد نفوت الجرباية 

يُـمـن :- جربايتيش 

-- بابا جابلج وحده انطيني ايدج 

ساعدتني رحت للجهه الثانية و واثـق طبب الجرباية للغرفـة عمـي جايب حديد ام النفـر طببها ويگول

-- منها للرجل الصالح 

عمي ضحك و هاله ردت

-- هو الرجال موجود بس مو صالح مع الاسف

واثـق :- نصلحه ونصلح امه وياه ها يابة شتگول

-- الله وايـدكم الكم مني احلى هدية

-- سيارة وبندقية

عمو طگه على معلبته ويگله 

-- اكبر طايح حظ بالعالم

اجى شال دوشگي من الگاع وحطه فوك الجرباية صار فت عليها و ندگ علي المخده حطاها فوك الدوش وباوعلي يضحك ويگـول

-- هسه لو متزوجتني مو احسن من هذاك الغثيث حتى المخده عدلتها الج بعد شتردين

دخل رائـف ويا كلامه باوعله بنظره انا من يمي خفت وهذا ضحك ويگول

-- هلا بالغثيث ابن الحلال بذكرى

رائـف :- صاير تسملت كلش هواي احترم نفسك احسلك 

واثـق ضحك وطلع من الغرفـه و رائـف باوعلي خازرني عبالك انا الچنت احچي هاله لزمتني من ايدي و تگول

-- حبيبتي ما تستاهلين يا وردة البيت انتِ بيه ولا بيج 

-- اسم الله عليج 

-- يله ارتاحي 

گعدت علي الچرباية وعمي أشر الهاله  طلعوا و رائـف تقرب عليه  و يگول

-- بدون ميانه زايده وياهم كلها يوم يومين ورايحة ما يحتاج الهاي الميانه والعلاقه المالها داعي 

-- حتى لو رحت يبقون اهلي وعمره الاظفر ما تبرى من اللحم 

باوعلي ما عاجبته وراها عافني وطلع عدلت روحي ورجعت تمددت لليل واجت هاله جايبه لفه جايبين كباب شوي من برى وياها قوطية ببسي  

وهيج خلص اسبوع كامل اطلع من غرفتي بس بوكت الحمام و اكلي تجيبه هاله للغرفه بحيث احس بروحي سمنت

و صارت بيه روح اكل اكل زين واشرب بالعصاير الطبيعية وارجع ليورة و تلليل ونهار نايمة ردت روحي وعمرت من الدلال

بهذا الاسبوع أديان اجت مرتين وبهاي المرتين عمتي تجيني للغرفه تگول ممنوع تطلعين لان ما تعرف بيج هنا عبالها رحتي

و واثـق و ولد خالته يوميه يگعدون بالحديقة تعودت على سوالفهم و هوستهم صح يضوجون ودوخـه بس بعد شأسوي بيتهم هذا وانا الخطار ولازم اتقبل دوختهم وتعلم عليها 

مره وحده رائـف و بُرهـان گعدوا بس مالهم صوت ابد هادئين بس ريحة النركيلة توصلني هنا رائـف بعد لا شفته ولا شافني وكل واحد بعالمه عايـش 

لحد ما خلص الاسبوع وصار موعد الدكتور لازم يشوف رجلـي على اساس واثـق وهاله يرحون وياي و گفت ابدل من بعد ما جابولي جبه جديدة خاصه بيه اروح بيها للدكتور لان هدوم الطلعة الجابتهن عمتـي بنطرون وما اگدر اللبس بنطرون من رجلي مصبوبه وگفت اللبس بيها و اسمع صوت رائـف يگول 

-- لا اطيح حظ حيوان انجب احسلك 

حاكـم :- هاي گدامي وتغلط على اخوك اشو صاير فد مره انتَ 

رائـف :- اني لو هوَ ما تگله يحترم نفسه اشو فد مره ماخذ وجه شافني ضحكت بوجهه

-- شمسوي ويحترم نفسه انتَ احترم نفسك واحترم المقابيلك اخوك ما غلط بحقك بالعكس جاي يسوي زين وياك

-- خلي الزين يفيده ولا يدخل بيها 

-- بنت عمه و عرضه و غريبة هنا مالها احد وجاي يساعدها شعليك انتَ

-- شنو شعليه شبيك يابة

-- مابيه شي انتَ المعليك بيها ولا تتدخل بيها وكافي بعد سد الموضوع غـادة روحي شوفي يُـمن وين صارت وانتَ واثـق روح شغل السيارة تأخرتوا على الدكتور

فتحت الباب غادة و روحها طافره وتگول من وره خشمها 

-- يلاا منتظرينج 

اجت وراها هالـه ساعدتني طلعت وعمي بس شافني گال 

-- يلا بابا واثـق ينتظركم بالسيارة 

طلعنا انا وهالـه واثـق مشغل السيارة بنص الحوش وگاعد بيها صعدت انا وره و هاله گعدت يمه بعده ما ماشي واجى رائـف فتح الباب على واثـق وگاله

-- انزل 

-- ومنو ياخذها إذا نزلت

-- اني اخذها انزل يلااا

نزل وهو يضحك ويگول 

-- اووي عصبي ما يتحمل يلاا هالـه اخوووتي العزيزة نزلي عوفي اخونا العزيز يروح وياها وحده 

هالـه ما صدگت گالها نزلي فتحت الباب ونزلت متت من القهر هسه انا هيج باقية حمل ثكيل على الناس انوب گاموا يتعاركون من وراي باوع عليها وصاح بصوت عالي  

رائـف :- ويننن رايحة

هالـه :- ما اروح بعد ما بيه حيل 

دخلت تركض وهو سد الباب بكل قوته واجى عليه فتح بابي ويگول

-- نزززلييي

-- وين 

-- گعدي هنا عيني ست ترى اني مو سايق عندج يلااا لعبتيهاا النفسي 

حاولت انزل ما گدرت وحدي مد ايده نزلني ويگول استغفرالله استغفرالله صعدني بالصدر وسد الباب بكل قوته و رجع صعد شغل ومشى وانا الله ذب عليه دموع وهو ساكت ما يحچي بنص الطريق و گال

-- ما شبعتي بچي ما مليتي شكووو عليمن تبچين شكوووو 

ما ارد بس اناشغ رجع يگول 

-- استغفرالله استغفرر اللله شبيج بابا شبيججج

ما احچي ولا ارد رجع سكت وشوية و گال

-- تردين واثـق ياخذ يعني هذا البچي كله لان ما جابج هوَ لو شنو الفلم فهميني 

ما احچي ساكته رجع صاح 

-- ما ترديييين خسره احچي ردددي 

ما اجاوب ولا ارد ولا اباوعله خلصتها ساكته من شافني ساكته تخبل بقى يغلط على روحه و يسب بيها ويگول 

-- صوجي اني الجبتها النفسي اني الورطت نفسي استاهل حيل بيه اني شكووو بيج يكتلونج يذبحونج شكووو خربت حياتي بيج شكووو فوگاهااا متجاهلتني ستتت الحسن والجمال تنزلي نزلي من خرررب حظي الگ.... 

فتحت الباب اريد انزل اجى يساعدني سحبت ايدي من عنده رفع حواجبه اثتينهن و يگول 

-- لااا بلااا وشلون تنزلين وحدج

ما اجاوب مجلبه بالباب واحاول انزل وحدي رجع سحب ايدي بعصبيه ويگول 

-- مو وكت الطنگورة بالشارع احنه جيبي ايدج

غصب عني قبلت ونزلت سانده روحي عليه 

دخلنا للعيادة سجلتني السكرتيرة انطاها اسمي وعمري و اجى گعد بصفي و يدخن 

گالت السكرتيرة

-- العفوو اخي ممنوع التدخين 

گام طلع بدون ما يرد وانا بقيت و حدي گاعده گبالي مره عجوز وياها ابنية سألتني شبيها رجلج وشلون انكسرت جاوبتها طحت من الدرج اكو ولد گاعد بالصفحة الثانية صاب ايده مثل ما صابين رجلي الظاهر وهيَ مصبوبه توجعه باوعلي و گال هم تأذيج 

-- لا 

-- اشو اني ايدي الليل ما انامة منها 

رائـف جان واگف بالباب بسرعه طب ورد بمكاني

-- من تدخل للدكتور گله احنه ما نشتغل  اشعة وسونار  

-- اعتذر اخي مو قصدي والله 

ما جاوبه دار وجهه من عنده و السكرتيرة مو شافته حامي ويدور مشاكل صاحت اسمي دخلتني دخلنا للدكتور فتحها و رجع جبرها مره ثانيه وگال 15 يوم و تعالوا نفتحها طلعنا محد بينا يحچي بس صعدنا بالسيارة دگ نقاله رفضه رجع مره ثانية دگ استغفر و رفضه اجته رساله قرأها ورجع هاي المره هو خابر صوت التليفون واضح و اسمع كل شي جانت أديان هي تخابر 

رائـف :- الوو

أديان :- هلاو حبي ليش دا ترفضه 

-- عندي شغل

-- شغل شنو منتظرتك صار ساعه وينك 

-- گتلج عندي شغل 

-- يعني متجي

-- ما ادري اشوف 

-- شنو تشوف من كل عقلك صار ساعه مبدله ومنتظرتك وتگول شغل واشوف

-- مالللي خلگج مالللي خلگج امشي ولييي من وجهي 

حچى هيج وقفله بوجهها رجعت ادگ رد عليها و يگول

-- شترررديننننن 

-- شبيييك

-- لا تصيحين قز القرططط

-- انتَ دا اتصيح مو انييي

-- شترررردين 

-- متجي 

-- لاااا 

-- شكو شبيك

-- ماكووو شي شگد تلحييين 

-- شبيك عمري 

-- لا تتنغوصين ما اجي عندي شغل يلا ولي

-- وين انتَ بس فهمني

-- ويا صديقي بالدكتور 

بعده هسه كمل جملته وجان تجيني العطسه و اعطس وعطستي الله گالبها اجيييي باوعلي مصدوم واجاني صوتها تگول

-- منووو هاي وين انتَ 

فصله بوجهها و يباوعلي و يگول

-- شيسمونها هاي 

ما جاوبته درت وجهي رجع يگول

-- مووو احچي وياااج ليششش ما تردين 

نفس الشي ما ارد بقى يشيل يروحه ويرگعها لحد ما وصلنا ما بقى واحد بالشارع ما سبه وما غلط عليه حتى اليمشي على الرصيف غلط عليه بدون سبب 

وصلنا للبيت عافني بالسيارة ونزل طب للبيت حاولت انزل ما گدرت طلعت هاله ساعدتني بس طبيت عمو گال

-- هاا بابا شلونج بشري

-- الحمدلله زينه 

هو جان يريد يصعد على الدرج بس سمعني رديت على عمـي دار باوع عليه وحچى بعصبية 

رائـف :- ما شاء الله هسه نطقت الخرسة طلعتتت تحچي والله زين واني عبالي صابين اللسانها ويا رجلها 

بديعـة :- شكوو 

ما رد عافها وصعد رجعت سألتني شكوو جاوبت

-- ماكو شي 

-- ليش هيج ضايج شنو الموضوع 

عمتي من تعاركوا الولد ما جانت موجودة رايحه البيت اختها لميعة يصيرون بالفرع الثاني لو تدري متعاركين من وراي چا حطتني وكتلتني رديت 

يُـمن :- ما ادري 

حاكـم :- روحي الغرفتج بابا موزين عليج الوگفـه 

اخذتني هاله للغرفه اول ما فتنا گالت

-- بس لا زعلتي من عندي

-- لا 

-- شوفي والله هذا اتفاق يعني اني وبابا 

و واثـق مسوين خطه على رائـف وشكلها جابت نتيجة ههههه

-- شوفي هاله انا استحي احچي وياه عمي هذا الحچي بس والله مالها داعي هاي السالفه الزلمه ما يريدني و انعم الله عليه رضا وجابني هنا لا تحملونه فوگ طاقته اخوج بگلبه وحده و انا مو چبيرة بخت اخرب حياته وياها هو يحبها وهي تحبه وحرام عليه اطب بنصهم و اخربهم 

--  صح زواجكم غلط ومحد قبل عليه بس من تعرفنا عليج وعاشرناج وشفناج تمنينا هذا الزواج يتم و تصيرون واحد للثاني من حق وحقيقي انتِ ورده وتستاهلين كل الخير وحرام تنظلمين وتفوت ايامج هيج 

-- كلمن وقسمته من الدنيا وانا هاي قسمتي الحمدلله وضعي اليوم مو مثل وضعي امس وهذا كله نعمة من رب العالمين عليه ما اريد اطمع خليني اباوع على گد شوفي و اكيد الله ينطي للوادم على نياتهم وانا نيتي صافية و عطيته جايتني لا محاله 

-- ونعم بالله 

ابتسمت و طلعت من الغرفـه ذبيت الجبه

و الربطه و نمت لليل فزيت المؤمن مأذن گمت اريد اصلي فتحت الباب وطلعت والعكازة بيدي عمي جابها ثاني يوم الطحت 

وصلت للصاله اريد اروح للحمام بس انصدمت من شفت أديان گاعده حرت شلون ارد لا بيه اضم روحي ولا بيه اضل 

هي فتحت عيونها من شافتني و گالت

-- هااي شنو بعدج هناا

بديعـة :- لا اليوم اجت خطيه رجلها مكسورة وجابوها للدكتور 

أديان :- منو جابها مدا اشوف احد

-- راحوا عدهم شغل شوية ويجون

-- ها صحة وعافية عيوني

-- الله يسلمج 

رحت للحمام توضيت و رجعت للغرفه صليت هسه خلصت الصلاة و اسمع صوت بچي عالي وصوت عمتي تحچي و واثـق يگول مو قصدي والله ما انتبهت أديان هناا وراها صوت الباب نسد حيل وعمتي تغلط على واثـق و هو يگول شمدريني بيها هنا اشم ايدي 

رائـف :- لااا تدري ومتقصد تسوي هالحركات هاي ارتاحيت هسه موو

واثـق :- شكووو اگلك ما ادري بيها هناا 

بديعـة :- وانتَ شكوو تدخل تحچي هذا الحچي شنوو المناسبة 

-- اشاقه شبيكم ترى ما صارت وبعدين واذا ما عرفت يطبها مرض قابل جذب يُـمن مو جنتنا و زوجة رائـف لشوكت تبقون ضامين الموضوع عليها

حاكـم :- يله كافي روح الغرفتك صايرين فد مره مو أوادم 

-- لكم حنجلط شكول الاختييي هسه شكول ليش هيج سويتوا بيه 

هاله :- ماما ميحتاج تأذين نفسج عادي قابل أديان زوجته لو خطيبته عود يريد يخطبها بالمستقبل

-- انجبي انتِ انجبي لا تتدخلين 

ما سمعت صوت احد بعد وراها شويه 

و انفتح باب غرفتي و طبت هاله تضحك سألتها

-- شكو

-- واثـق خربها وگعد على تلها

-- سمعت اسمي شني السالفه

-- واثـق راسلني گال شنو عشانا گتله أديان عدنا حنجيب من برى گال ماشي اجيت اشو هذا دخل من المطبخ يغني مرت اخوي الغالية يُـمن جنتنا مرت الچبير بدونج محد يسويلنا عشة وينج يُـمن أخوي باقي بالظيم  بدونج ، و هاي سمعت لو تخبلت وهو سوى روحه مصدوم من شافها على أساس جان يشاقـه اللوتي  

-- لااا خطيه

-- وانتِ مو خطيه 

-- لا مو خطيه لان انا الرضيت بهذا الوضع وانا الاجيت وهو ما رايدني ولا جابرني هذا الوضع انا المشيت بيه ومجبورة اتقبله واسكت 

-- لا غلطانه هذا الوضع صار لازم يتغير ومنا وجاي لازم تغيرن كل تفكيرج و صار لازم تشغلين عقلـج و تسحبين أخوي الصالحج وتنهـين كل هذا الموضوع 

يتبع....

#عــروس_الچبايــش 🌼

بقــلــم يــاســة الحلقة (5)

هناك نوع من التعب لا يشبة الارهاق

الجسدي 

إنـه تعب الـروح

حين لا تقدر على شرح ما يؤلمك 

فتكتفـي بالسكـوت 

وتبتسـم كـي لا يسألك أحـد 

........................... 

يُمـن :- عفـيه هال لا تسويلي طلايب والله انا هيج مرتاحه وهو ما يريدني وبس يصيح عوفيني هيج احسلي  

هالـه :- لا تصيرين غبيـه مع أحترامي طبعاً بس لازم تفكرين بنفسج يعني تبقين هيج مركونه و تالي ياخذج يرجعج هناك بالچبايش و ترجعين تحت رحمـة بيبيتج شوفي ترى بابا حچالنا كُلشي وشلون جانوا ضاربينج و حتى مقررين يقتلونج حلال

و يدفنونج اخاف هم تنهزمين مثل امج بس بابا طلبج الرائـف و نهى موضوع القتل 

منا وقيسي من كل عقلج إذا رجعتي مطلقه راح يرحمونج 

سكتت ما رديت بس حچيها كله صدگ اليوم ساكت عني و عايفني بذمته باچر ياخذني ويردني على عمامي حرام يموتوني

و يگصون من لحمي ويطبخونه ويتغدون بيه 

بيومها فكرت هواي وكل ما اگـول خل ابدي اتقرب منه ومن عمتي ارجع واگـول

لا خليني هيج بعيده ومحافظه كرامتي ومرتاحه 

الهناك و سمعت صوت رائـف وبُــرهان اجوى گعدوا و ريحة النركيلة طبت بخشمي اسمع بُـرهـان يگـله

-- وشلون راح تحلها ويا أديان و أمها 

رائـف :- والله ما ادري تعبت وتبهذلت ابوي ورطني وخرب حياتي فهمني شلون اخلص من هاي الورطه الوگعت براسي

-- طلگها شنو الجابرك مدا افهم

-- يكتلونها اهلها

-- ادري شمسوية ويكتلونها وين عايشين احنه غابة لو شنو

-- غير امها شردت مدري وين

-- وهي شنو ذنبها بـ امها والله خطيه ترى طفله حرام عليهم 

-- واني الهذا السبب سكتت و قبلت اجيبها هنا خفت اشيل ذنبها وهي مالها ذنب بسوالف أمها

-- زين أنتَ إذا حچيت وياها و اتفقت على كل شيء من الاول بعد ليش حاير 

-- إني اتفقت ويا يُـمن ما اتفقت ويا أديان والمشكلة هسه بـ أديان شلون اقنعها اني ما عندي شي ويا يُـمـن و مجرد شهر شهرين و ترجع البيت اهلها وينتهي الموضوع 

-- تريد احچي ويا أديان وافهمها اكيـد هسه ما تقبل تسمع منك لان مقهور خليني اني افهمها وبعدين رتب وضعك وياها

-- ياريت تفهمها وتخلصني لان تعبت

يُـمـن :- سحبت الغطا و غطيت روحي واگول تهييي بهييي وانا جايـه اتلزك بيه

واريد ادخل بسباق وياه حبيبته شجاني

اله تخبلت اخرب بينهم تشوف شلون ميت عليها و يريدها بس تعرف انا شني بالنسبه اله 

نمت وانا بگلبي هاگـد هم و قهر و قررت بعد ما اطلع ولا اشوفه وجهي وبس تجي أديان اروح عليها واسولفلها كل السالفه 

مرت عشـر أيام وعمتـي متخبله و ما تشوفني شوف شوف تصيح وتهوس و كل شوية وتخربطت و حاروا بيها و رائـف ما لافي للبيت وبيوم اليجي للبيت يبقى يتعارك وياه عمي وتگب بينهم و تالي يطلع ومن يطلع هاي لنكتبت عليه عمتـي تشوفني نجوم الظهـر

خلصن العشر أيام وصارن الاسبوعين واخذني واثـق فتحت رجلي ورجعنا، وبعدنا هذا حالنا البيت جحيـم وعمـتي شادة وياي ويا البنات ويا البيت كله وهو ما يجي للبيت غير ساعه وحده والساعه اليجي بيها يهرج البيت هرج يتعارك حتى ويا الحيطان والبيبان صار بيتهم جحيـم من وره جيتي  

جنت بالساعه اليجـي بيها اطب للغرفه ما اشوفه روحـي وما اطلع لحد ما يردون شي يله هنا جان البيت كله عليه و بـ اخر فترة عمتي من شافتني شلون نظيفه واعتني بالبيت وبالغراض شمرت حتى الطبخ عليه سألتني اعرف اخبز لو لا وانا الفطيرة گلت اي اعرف روحي و جيبي تنور ورتبيه وخلتني اخبز يومـية بختصار خدامـه عايشة يمهم بس هذا كله اهون من عيشتي يم بيت جدي وظيمهم

هنا صح اشتغل واتعب وعمتي تجيلها ساعـة تتخبل  واكو مشاكل صارت من وره گعدتي عدهم بس هاي كلها تهون عليه لان عمي يحبني و هالـه تساعدني وتحبني وتگعد يمي تحجي وتنصح و واثـق نفس الشي يحترمني ويقدرني و ما يدخل للبيت اذا ما جايبلي حلويات وياه 

و اليوم گعدت مثل كل يوم عجنت

و طبخت وطلعت غسلت الحوش بعدني هسه دنگت امسح بيه انفتح الباب و طب رائـف وياه أديـان و گفت والوصله بيدي اباوع عليهم هو من شافني توتر و شكلـه انگلب وهي اجت عليه تمشي بهمه وصلت يمي 

و گالت

أديـان :- ديري بالج ترفعين راسج ليفوگ ركبتج اكسرها تشوفينه هذا مالتي اني احبه ويحبني و داعته وداعت كل ساعه مرت بعمري واني احبه اسوي بيج جريمـة طول عمرج تبقين تذكرينها خلي بالج انتِ هنا خدامة وبس وهذا مكانج هنااااا 

حچت هيج وأشرت على حذاها أبتسمت وانا احاول اصير قوية وراها اخذت نفس ورديت 

يُـمـن :- صدگ الدنيا ظلمتني و اخذت اهلي مني ورجعت ظلمتني و جابتني شمرتني هنا وصدگ قبلت واستسلمت مجبورة لان ما عندي مكان ثاني اروح اگعد بيه بس لا تتوقعين اقبلج تتجاوزين حدودج وياي لان انا ما متجاوزه حدودي وياج ولا ويا اي بشر هنا و حبيبج هذا التحجين عليه هو رجلي و انا اولى بيه منج گدام الله و الناس ولو اريده لا انتِ ولا الاكبر منج تمنعني منه بس انا ما اريده ولا افكر بيه ولا بالي اصلاً ريحي بالج و عيشي حياتج طبيعي لا تتمرضين و تموتين ناقصة عمر وانتِ بعز شبابج 

حچيت هيج وعفتها ومشيت اريد اطب جوه هي سمعتني هيج گلت وهي تخبلت ركضت وراي و جرتني من حجابي طيحته منه و جلبت بالگصيبه مالتي لفتها على ايدها و دارتني عليها تضرب بيه بكل قوتها اضافرها كل اضفر شطول تگول اضافر چلب خرمشت وجهي تخرمش

رائـف جرها مني وانا ما انطيت اي ردت فعل كل السويته وره ما وخرها طبيت جوى الغرفتي وقفلت الباب و گعدت بالگاع واخذ نفس قوي و ازفره

متت الخنگه موتتني اريد ابچي اريد اصيح اصرخ ما اگدر دمعتي صارت عزيزة وما قبلت اطيح

بقيت هيج و وجهي اكلني اكل يحرك بيه من گد ما خرمشتني قوي اسمع صوت بچيها بالصاله و عمتي تسكت بيها وترد

بديعة :- تروحلج فدوة خل تولي هسه هي ما سوتلج شي انتِ كتلتيها وبردتي گلبج گافي لا تبچين بعد 

أديـان :- خاله مسمعتي كلامها وياية تگول لو اريده لا انتِ ولا الاكبر منج تمنعني خاله عوفيني اموتهاا الوصخه القذرة هذي من

يا مزبله جبتوهاا عليه 

-- تولي يـوم تروحلج فدوة هي واهلها انتِ دا اتگولين من الزباله جايه بعد شكو تضوجين نفسج بيها 

-- رائـف سمعتها للكلبه شتگول سمعتتت شلون ترد عليه 

رائـف ساكت ما يجاوبها رجعت تحچي بصوت عالي 

-- لووو اني لو هي هسه تختاررر هسسسه

نفس الشي ماكو ما اسمع صوته ما يرد بقت تبچي بصوت عالي و تگول خاله شوفي ساكت عاجبه الموضوع لو ما عاجبه جان رد 

-- احچي رددد ليششش ساكتتت رد انتَ وعدتني اطلگها احچي عااااد 

رائـف :-  اخخخ ربي ااخ منين اتلگاها منج من بنت المعدان الوگعت على راسي وراس الخلفني 

-- يعني شنوو انتَ ومو واعدني 

-- واني ما ناكر بس انطيني صبر لحد ما تخلص المده المتواعد ويا أبوي بيها 

-- والله ولا انتضر دقيقه من بعد صبر هاي السنين كلها تروح تجيب وحده من الچبايش وتجيني أختار لو اني لو هــي 

-- شختار شبيج مو فهمتج مو حچيت وياج ما عندي شي وياهااا حالها حال هاله وغادة عندي

-- وشكووو تعوفهاا حالها حال هاله وغادة طلگها تولي البيتهم طلگها ترجع للزباله الاجت منها

-- يكتلونها بس اطلگها

-- يطبها مرض معليه هسه اطلگها معليه ماا ماا

سكت ما جاوبها رجعت تحچي وياه وتبچي وعمتي مأيدتها وهو ماله اي صوت اخر شي سمعت خطواته صارت على الدرج وصوت بجيها رج البيت رج وعمتـي تصيح عليه تريده ينزل ما جاوب اي وحده بيهن عافهن وصعد الغرفته

هو صعد وهي هجمت على غرفتي بقت تدفر بالباب تريد تفتحه حتى تكتلني ساعه كامله واگفه على الباب ادفر و تغلط وتفشر عمتي حچت وياها رادتها تسكت ماكو بيومها اكتشفت عدها قابلية مو طبيعيه بحيث نفس الصوت ونفس الدفره ونفس الوگفه لا ملت ولا استقرت اخر شي سمعت عمتي تگلها 

-- يمه شگد تلحين شنو هاي القابلية اروح

و اعوفج شكو مدوخه نفسي وياج لعبتيها النفسي اووي 

-- وين ترحين تعااالي وياي اني بنت اختج 

-- عوذه منج ومن اختي شگد عنودية كافي دخت ما اتحمل هيج هوسه بسسس 

عمتي راحت وهي بقت بــباب غرفتي يابة سطرتني سطر تعيط و تدفر بالباب وتغلط اذا اگول ساعه كامله ما ابالغ بدون انقطاع بدون ملل لا رائـف ولا عمتي ما سمعت صوتهم بعد عافوها وحدها وين يله سمعت صوت اخوها نؤفل يحچي وياها ما ادري شلون اجى يمكن خابروا يجي ياخذها اسمعه يتوسل بيها تروح وهي ما تقبل اخر شي صاح بيها قوي واخذها غصب عنها 

بس راحت اجيت تمددت بفراشي يمه راسي يمه اذني يمه معدتي يمه بطني مدري شصار بحالي مخبله بيها خيط مو صاحيه شديت راسي و غمضت عيوني احس جمجمتي طلعت من مكانها غفيت من گـد ما تعبت من صوتها وانا نايمة وبعده صوتها بـ اذني خبلتني المخبله بحظج يا جده وبختج كون آن شاءالله 

للعصر يلا گعدت اسمع صوت البنات

و واثـق اجوا الصبح جانوا بيت خالتهم لميعـة راحوا يتغدون نعلت الشيطان وگمت ما مصليه الظهر و العجين ما خبزته نسيته اريد اطلع واخاف من عمتي خاف تسويلها هوسه بقيت صافنه ويا روحي وحايره اخر شي گلت يلا شتريد تحچي اكثر من حچي بنت اختها شو ما خلت شي يعتب عليها ما حچته 

لبست ربطتي و طلعت گاعدين بالصاله وعمتي شاده راسه بـ شال ولازمه كوب الكهوة تشرب والبنات و واثـق نفس الشي يشربون گهوة بس شكلهم ما عدهم خبر بالموضوع يمكن ما حچت الهم عمتي

سلمت عليهم ورحت للحمام غسلت وتوضيت ورجعت صليت و استغفرت ربي

و بقيت اردد بالصلاة البراهيمية ميه مره

اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ. اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ". 

خلصت الصلاة و طبگت سجادتي وگمت  طلعت للعجين لگيته مختمر ونازل من المعجنه لميته و دولجته و طلعت للترك حاطين التنور بيه شغلته و بديت اخبز اجت هالـه و گفت يمي ما تتقرب يم  التنور تخاف بس هيج واگفه يمي تسولف وياي شافت وجهي فزت وتگول

-- شبيه وجهج 

-- خرمشني الچلب 

-- يا كلب

-- عدكم چلب مسعور و فوگاها مخبل يمه الله يساعد الناس العايشة وياه 

-- هههه شكو شـداتحجين مدا افهم

-- عوفيني احچي وحدي معليج بيه 

-- وجهج شبيه منو وياج 

-- گتلج الچلب المسودن خرمشني 

-- وليش خرمشج الكلب المسودن بله

حچت هيج وتجتفت و رفعت حواجبها شكلها فهمت قصدي 

يُـمـن :- تعارك وياي على العظم ما يدري بيه ما احب العظام والزفرة 

هالـه :- هههههههه 

مديت ايدي بالتنور طلعت الخبزة ودرت اريد احطها بالگاع لگيت رائـف واگف وهاله  تباوع عليه وميته من الضحك غلست درت وجهي منهم اخذت خبزه ادگ بيها هو دنگ للگاع اخذ نص من الخبزه 

و رجع رفع راسه باوع الهالـه ويگول 

-- اليوم عظم الچلب وزفرته باچر اصير اني الچلب بشحمه ولحمه 

هالـه :- هههه لا محشوم 

ما جاوبها اخذ الخبزه وراح و هاله موتت روحها تريد تعرف السالفه حچيت الها كل شيء ردت

-- بس اكتشف شي مفيد من بعد بهاي المشكلة

-- اي امج ما تتحمل حتى اخواتها المهم هدوء بالبيت وهذا هو 

-- هههه لا ولج غبيه مو ماما

-- چا شني

-- رائـف

--شبيه

-- گلبه گايم يتحرك شوية 

-- تروحي جيبي گلبه وتعاي خل احطه بالتنور گبل لا يتحرك حركة غلط و أديان تسوي شي ما يخطر على البال 

-- شبيج والله 

-- يحفظكم الله 

طلعت الخبزة وطفيت التنور لميت الخبز وطبيت للمطبخ لگيته گاعد على الميز مدنگ وحاط اديه على راسه بس شافنا اجينا رفع راسه باوع عليه و گـال

-- سويلي جاي 

بدون ما ارد نزلت الخبز على الميز

و سويت جاي وراها رحت للحمام غسلت وجهي و اديه و نكتت هدومي من الطحين 

و رجعت للمطبخ ضميت الخبز بالحافظه مالته و حظرت الكلاص وصبيتله وحطيته يمه بدون صوت رجعت اريد اروح الغرفتي عمتي گالت حظري العشة

-- الدنيا عصر بعد وكت 

-- لا اني ولا رائـف متغدايين شلون يعني نموت من الجوع 

واثـق :- يخسى الجوع ست بديعـة بس لا تصيحين وتعصبين على مشمشاية ما اقبل

-- مشمشاية منو هاي انوب 

-- لا لا لا كل هذا الجمال الگدامج وما عرفتي مشمشاية منو 

هزت ايدها ما عجبها و انا رجعت للمطبخ جدر الغده بعده بكبره محد اكل منه عمي معزوم يم صاحبه والبنات و واثـق تغدوا بيت خالتهم وهذول انسدت نفسهم من العركة اجيت شغلته حميته بعده گاعد على الميز شافني شغلته گـال 

رائـف :- سوي غير شي ما اريد تمن ومركة 

طفيته و رحت للثلاجـة طلعت بتيته

وطماطه وفلفل اخضر گلت خل اسوي تبسي بعدني احظر و طب نـؤفل بس شافني ضحك و صاح بصوت عالي 

-- يااااابة هلااااا 

هسه ابتسمت اريد ارد عليه سبقتني رائـف وردله بمكاني 

-- هلا بيك 

نؤفل :- ههههه سلمت عليها مو عليك

-- اختك هدأت لو بعدهي طابگه فيوزاتها

-- عفتها نايمه طگت الها حبايتين فاليوم وانسطرت 

-- الله يهديها ويعقلها

-- شوكت تخطب ترى ملينا

-- اعتقد خاطب و قاري فاتحتها مو كل خمس دقايق اخطب 

-- هذا الحجي بعد ميصرف تعال اعقد واتزوجوا وخلصونا 

درت وجهي على الطباخ واحس انقهرت العالم كلها تدري انا مفروضه عليه فرض ومشموره عليه شمر حتى مالي عين اباوع على الناس حسبي الله ونعم الوكيل بيكم

يا عمامي هذا الولد جان ما يـدري اكيد وره ما درت اختـه سمع هو بالسالفه وراحوا بررو الهم هاليحچي هذا الحچي گـدام ويگول تعال اخطب 

اجى واثـق على صوت نـؤفل سحب كرسي وياهم و گعد مبتسم نؤفل رجع ضحك ويگول

-- شكوو شبيك فرحان

واثـق :- بعدين احچيلك 

-- لاا هسه 

-- لااا بعدين مفاجأة

رجع دار عليه و يگول 

واثـق :- اي مشمشه شجاي تسوين 

رائـف :- عوف قندرة و گوم بدل للسيارة دهن واخر مره تطلع بيها و القران احطك جوى التاير اذا شفتك صاعد بيها 

واثـق :- لا تغلط على مشمشة ما اقبل هاي الجميلة مالتنا جاي تسويلنا اطيب اكل بالدنيا مو هيج 

باوعتله وابتسمت بس القهر بـروحي يمشي  بعدني ما راده رجع يگول

واثـق:- تشـوف الخلقـه شلون تريح العين قابل مثل أخت هذا جنها صخلـه 

نـؤفـل :- ديله على اساس اخواتك جميلات المنطقـه كل وحده بوزها جنه بوز ابو العرس

-- المهم بنت عمـي حلوة مو مثل بنات خالاتك 

-- عليمن طالعه بنت عمك حلوة اشو ابوك مو حلو 

-- عليه هههه

-- ههههه بس اختـي احلى منها

-- ههههه يابـة إذا أختك احله من مشمش هسه اگوم احرك روحي بطاوة الزبت 

نؤفل :- هاا مشمش ادلعونها حلو والله يلوگ الها 

-- اي قابل مثل أختك ادلعونها رحيـم 

-- هههههههه انجب ترى ما اقبل تحچي عليها 

-- يُمـن بشرفج منو احلى اني الزلمه الوجهي متروس شعر وخشمي شكبره لو أخت هذا اللي النهار كله تعدل بروحها

باوعتله وضحكت واخوها يضحك رجع واثق لح اله اگول ياهو احلى اشاقيت وياه ورديت انتَ و رائـف عبالك جان متاني مني الكلمة والزله حتى يگـوم يفرغ قهر حچيهم بيه 

بسرعه گام من مكانه و اجى عليه لزمني من راسي قوي وقرب وجهي على الطاوة وهي تفور بالزيت احرورته لسعت وجهي غمضت عيوني گلت خلص راح يحط وجهي بالزيت لازمني بكل قوته وبحركة اعصاب ويگول

رائـف :- راسج احطه بالطاوة اذا مره ثانية جبتي إسمها على للسانج  

واثـق و نؤفل گاموا عليه سريع سحبوا من عندي و انا گعدت بالگاع من الهبطه احس نص عمري راح من الخوف گلت خلص احتركت وتشوهت 

واثـق :- شبيييك وياهاا شوكت تجاوزت هي فتحت حلگها حچت جابت طاري قندرة شبييك 

رائـف :- انتَ وخر من وجهي احسلك 

-- لا اشو ما اوخر و اريد اشوفك شتسوي

نؤفل :- گولوا يا الله يمعودي واثـق شبيك اخوك الجبير هذا كافي 

-- جبير على روحه مو على ابنية لا حول ولا قوة مو كافي مشغلينها خدامة من الصبح لليل وهي ما تفتح حلگها وتحچي انوب يجي يضربها الخاطر قندرة 

نـؤفل :- اشو مگابلني وتغلط على اختك 

-- انعل ابوك لا ابو حتى اختك ما مشاقي وياكم اني كااافي ما جايبين الابنية نعاقبها بسسس خافوا الله بيها لا تحجي ولا تشتكي ولا الها صوت ولليل ونهار تشتغل ظهرها مكسور مشوفينهاا المرر الخاطر ست أديان زعلانه شايفينها ما عدها اهل يردون يولونهاا 

رائـف سكت بعد ما حچى و واثـق جرني من ايدي قوي و گومني من الگاع ويگول 

-- روحي لبسي انعل شرفي اذا عفتج ساعه يمهم بعد 

عمتي والبنات اجن على صوته و هو اخذني يسحل بيه طببني للغرفه و يگول هسه تلبسين هسههه مالج گعده يمهم الظلام هذول طبت عمتـي وره وتگول

-- وين ماخذها شكو شبيك 

-- ماخذها ارجعها الاهله يكتلونها ويخلصونها منج ومن ابنج 

-- منو محاجيها اشو هسه گعدت من النوم

-- اي نوم العافيه عود 

-- اگعد و معليك بيها لا تصير حنين 

-- لبسسسسي 

هو يحچي محترك وانا صفنت وياه روحي صدگ هسه شني عيشتي هنا على الگمه هم حياة هاي خليني اموت واخلص خليه يرجعني الاهلي يكتلوتي و اخلص من هاي الدنيا عاد هذولاك اهلي اله هذول الغربة حاطيني جسر للطيبين يدوسون عليه 

لبست جبتي و طلعت وياه و عمتي ورانا تحچي عليه و تصيح عليه

-- شبيك واثـق اشو انتَ ما تحترم مو احچي وياك اوگف 

وهو ما يرد عليها لازمني من ايدي بس طلعنا لگينا رائـف واگف بـباب الصاله بس شافنا طلعنا گـال

-- اكلت (..) كلش هووواي صار ساعه عايفك تاكل (...) احترم نفسك احسلك

-- اذا انتوا ما تخافون الله وما عدكم رحمه بگلبكم و ظلام اني رجال اخاف الله و باجر يسألني من شفت عبدي اليتيم ينظلم گدام عينك ليش سكتت ليش ما دافعت عليه شگله ، شوف رائـف انتَ اخوي وعلى عيني 

و راسي واني احترمك واقدرك و احبك بس مصختها كلش مصختها صار اربع اشهر من اجت الابنية هنا لا سمعنا صوتها ولا حچت ولا أذت احد و خادمة الكل و محترمة الكل وما عدها كل قصور و انتَ وامك مشوفينها الظيم و مسوين فضل عليها بهاي الغرفة النايمة بيها الهنا وبس راح ارجعها الاهلها و خلي تخلص منكم وخلصوا منها ورجعوا الحياتكم الطبيعية  

-- وبصفتك منو وهيج محترك عليها وادافع الها كل هذا الدافاع و ترجف هذا الرجف

-- بصفتي أبن عمها ودمها من دمي

و عرضي و وحده من اخواتي و يتيمة

و اجت امانه عدنا وطفله لا حول ولا قوة 

وما اقبل اي مخلوق يأذيها 

-- كافي خرطت هواي وانتِ امشي الغرفتج احسلج

-- لاا ما تمشي ومالك اي شي يمها ومو من حقك تأمرها 

-- مو من حقي شنووو مرتي هاي كافي واثـق ما اريد اضربك لا تخليني اتجاوز عليك واضربك احترم نفسك احسلك

-- لا مو مرتك ولا الك يمها شي يمها عود عود جايبيلكم شيخ كلك مجذب عليكم

و عاقد الكم وفضت وراحت 

-- امشي الغرفتج اخر مره اگولها 

يُـمـن :- لا ما امشي انا هم تعبت ما اتحمل بعد اريد ارجع البيتنا 

رائـف :- اي ست مشمشة يا بيت هذا الترجعيله ترجعين السعـدية تموتج من الجوع لو الناهي يحط طلقه براسج

و يشمرج بجيس زباله

-- عسا ما يدفنوني وانا عدله كافي بعد ما اريد ابقى هنا ونعم الله عليك صار اربع اشهر متحملني ومسجلني بـ اسمك كثر خيرك والله يستر على خواتك ما قصرت بس انا بعد ما اريد رجعوني للزباله الاجيت منهاا 

-- راح اصعد فوگ و حق كتاب الله وسنة رسوله اذا نزلت ولگيتج معتبه عتبة الباب 

احط طلقه بيج وطلقه بهذا الساقط الخبلج و طلع عينج 

عافنا و صعد و واثـق باوعلي و يگول يلا 

خفت عليه لا يروح يتضارب ويا اخو بقيت واگفه من شافني واگفه جرني من ايدي واخذني طلعني برى 

يُـمـن :- اوگف ما اروح

واثـق :- انجبي ولا صوت 

-- يكتلك

-- جبان ما يسويها 

-- مو وكت شقى ما اريدك تخرب ويا اخوك من وراي

-- دمشي شگد فطيرة 

-- واثـق بس اوگف اخوك هذا لا تخرب ويا

-- خل يولي صار قديم اريد ابدله

اخذني برى البيت و نؤفل يمشي ورانا ويگول

-- وين ماخذ الابنية تگعد لا يكتلونها اهلها

-- اكرمنا بسكوتك 

-- لا تصير ارعن مو قبل شوية خوش انطيت محاضره لا تخربها و ترجع الابنية والله يحاسبك من صدگ 

ما يجاوبه ساكت خلصنا الفرع و فتنا بالفرع الثاني ثاني بيت على جهه اليمين

و گف يمه ودگاه

نـؤفل :- شعندك جاي البيت خالتي

واثـق :- مشتاقلها

فتح الباب بُـرهان اول شي ابتسم و من شافنا وجوهنا تتطلاطم  تغيرت ملامح وجهه وگال  

بُـرهان :- شكو يا ستار 

واثـق :- خطار جايين دوخر شطولك 

دفعه وفات بقيت انا بالباب استحي اطب رجع الولد يگول

بـُـرهان :- تفضلـي 

طبيت وراه و ميته من الخجل اديه احسهن صارن قطعه مال مي طبينا للصاله المره گاعده تباوع اخبار و الابنية تقرأ گامت من مكانها وضحكت وتگول 

ريــام :- اهلاً وسهلاً 

لميعـة :- اهلاً يوم تعالي فوتي تفضلي 

يُـمـن :- السلام عليكم 

لميعــة :- وعليكم السلام هلاو ماما هلاو بيج 

واثـق :- لميعـة الحب والحرب جاين زعلانين اني ومرت اخوي يمج ضمينا اليوم و باجر نرجع البيتنا 

لميعـة :- ههههه ويامن متعاركين 

-- ويا الما يخافون من الله ظلام لميعـة ظلام 

بُـرهان :- الله على الظالم كل شي ولا الظلم ما نقبل شكلها حمت فد مره هههه

نـؤفل :- بصراحه غير رائـف غلطان من السماء للگاع و اني شفت بعيني محد گالي

واثـق :- الله يحفظ عيونك ان شاءالله 

لميعـة :- شكو شنو الموضوع 

واثـق :- اريد ارجعها الاهلها وما اعرف شلون 

بُـرهان :- شنو ترجعها ابوك وين رائـف وين شنو الموضوع 

ريـام :- دقيقة يعني يُـمـن جاية اليوم تبقى يمي مووو

واثـق :- اذا ما بيها ازعاج

-- يبووو يگول ازعاج غير طايرة من الفرح بيها گومي حبي وياي بغرفتي نگعد 

اخذتني وياها الغرفتها فوگ و همَ بقوا گاعدين يحچون اول ما فتنا للغرفـه سألتني شكو حچيت الها سالفتي من الاول للأخير 

ريـام :- والله غير الصدك كلنا تفاجأنه من سمعنا بـ رائـف متزوجج لان من الصغر وهو الاديان و أديان اله و قارين فاتحتهم

و منتهي موضوعهم يعني الخبر صدمه النه كلنا و أديان حقها من تتمشكل وياج خلي نفسج بمكانها الانسان اللي تحبينه من طفولتج و خاطبج والكل يعرف فجأة يجي  متزوج عليج شنو ردت فعلج 

يُـمـن :- انا ما لمتها ولا راح الومها وحقها وما الي عين احچي وياها بس الصار مو 

بـ ايدي و انجبرت وانظلمت وفوگ هذا كله انا الولد ما عندي شي وياه و لا هو عنده شي وياي اصلاً ما يطيقني ولا يحب يشوفني وهي تدري بكل شيء بعد عليمن تضيج خلگها وتتعارك وياه انا مره شهر شهرين وحالين سالفتي ومرجعيني الاهلي 

-- ما اعرف بعد والله المهم هسه اليوم اخذي ريست من التفكير والقهر والشغل وخلينا نتونس اني وياج وراها عود سهله تنحل هاله تحچيلي على وضعج ببـيتهم وتعبج بالشغل و خاله مدا ترحم بحالج بس خطيه مطالع بيدها شي همزين صارت هذه المشكلة حتى ترتاحين كم يوم 

سكتت ما رديت بقيت يمها بالغرفـه تسولف وياي و تعرفني عليها وعلى امها وابوها و اخوها وشـتدرس و شـتحب گلبي ارتاح الها و اعصابي بردت و اندمجت وياها من گد ما حبابه و سوالفها حلوة لحد الساعه بالسبعـه احنه گاعدين نسولف وراها طلبت منها اروح للحمام اتوضى اريد اصلي گمنا اني وياها توضينا ورجعنا الغرفتها صلينا دگ نقالها ردت طلع واثـق سلمت عليه و جابته انطتنياه جاوبته گال

واثـق :- شلونها الاخبار

يُـمـن :- الحمدلله

-- اني عندي شغل و رحت وصيت خالتي عليج لا تضوجين

-- يا شلون اضل يمهم زحمه 

-- لا مو زحمه هذول احسن من عائلتنا أأمن عليج يمهم اكثر من ما أأمن عليج بيتنا

-- لشوكت اضل هنا رجعني الاهلي

-- بس يرجع ابوي و نحل الموضوع اليوم ابقي يم ريـام 

-- عيب والله استحي

-- منين تستحين من ريـام القزم لو من اخوها الطويل برگبتي اذا استحيتي منهم بس اليوم شدتها 

ضحكت و ريـام صاحت مناك 

-- كلش انطيناك مجال لا تتنمر استحي على نفسك 

-- ريـام الحب والحرب شعندي غيرج

-- حچي يفيدك زعلت بعد

-- لاااا اموووت وامي تحطج وتكتلج 

-- ههههه

-- ديري بالج على يُــمـن ما اوصيج

-- بعيوني 

قفلته منه و رجع دگ بـ ايدي باوعت مكتوب (صديقـي الجميل) انطيته الها طلع اخوها جاوبته ما سمعت شيريد منها بس ردت عليه يلا اجينا سدته منه و گالت 

-- يلا ننزل نتعشة

-- ما اشتهي بالعافية 

-- الله يعافيج عيوني هذا الحجي ميمشي يمنا عدنا قوانين ممنوع الاكل ينصب ومننجمع عليه

-- والله ما اشتهي 

-- گومي يا عيني هسه منو يستاهل تسوين اضراب الخاطرة

-- مو اضراب بس ما اشتهي

-- اروح اگول الماما عليج احسن شكلج متعبه ومتاخذين الحچي 

نزلـت وانا ضليت گاعدة ماكو ثواني

و اسمع صوت امها تصيح يُـمـن يُـمـن استحيت متت شلون بيه يربي اضل بالبيوت افتر الوادم تحير بيه بحظج يا جده و بختج

گمت ونرلت يمهم لگيتهم حاطين صينية صغيرة بيها اكل من برى وگاعدين عليها الام واولادها بس ابوهم ماكو 

لميعـة :- يلا ماما تعالي تعشي

يُـمـن :- بالعافية خاله ما اشتهي

-- ميصير حبيبتي انتِ ضيفتنا وما متعشاية وهذا اقل من واجبج تعالي ماما تفضلي

بـُرهان :- إذا خجلانه مني اگوم 

-- لاا لا اكل بالعافية 

-- تعالي لعد 

اجيت گعدت يمهم و انا ميته متمنيه الگاع تنشك وتبلعني محد بيهم يحچي عائله هادئه و مريحين مالهم صوت ابد كمل الولد اكله و گام حط الجاي على النار 

و الام كملت اكلها و وراحت حضرت اكلاص الجاي و اخذته وراه ابنها 

بقينا بس انا و ريـام انا شبعت بس بقيت گاعدة يمها هيَ ساعه كامله حاطه الصينية

و تاكل شوية شوية جنها لگمات بلبل

اندگ الباب طلع الولد من الغرفه وراح يفتحه عشـر دقايق ورجع طب وياه رائـف انا شفته وانا گلبي صار دمام ما ادري من الخوف مدري منين باوعلي گاعدة على الصينية ما عجبه الموضوع بس ما حچى شي گعد على القنفه بدون صوت 

ريـام :- مساء النور هلااا سلم عـاد احترمني

رائـف :- هلا بيج شلونج 

بُـرهان :- ريوم حبيبتي اذا گملتي سوي الرائـف جاي 

أشر الها براسه بسرعه فهمته و شالت الصينية و گامت گمت وراها گوه امشي وصلنا للمطبخ حطت الصينية على السنك و باوعتلي وتگول

-- جاي عليه روحي شوفيه

-- ما عندي شي وياه 

-- حتى لو ما بينكم شي روحي شوفي احتمال جاي يعتذر لان تجاوز عليج 

-- لا ما اروح 

-- ههههه بيج شوية من طبع اخوية وأبويـة

-- شني

-- عناد و راس يابس هههه يبـو إذا گالو لا انتهت 

-- لا مو عناد بس الزلمه ما عندي شي وياه وهو ما رايدني و بعد ما دام طلعت من بيتهم خليني انهي هاي السالفه كلها ولا  احجي و لا افتح مواضيع 

-- رائـف صح عصبي بس گلبه طيب وحنون والله وهسه تلگينه ندمان لان تصرف هيج وياج و اجى وراج يعتذر حتى لو ماكو علاقه بينكم 

سكتت ما جاوبت صبت جاي وانطتنياه تريدني اخذه 

يُـمـن :- لا ما اوديه 

ريـام :- لا تحجين شي بس انطيه الجاي

-- والله ما اروح شني زعلان و... مصتلح 

-- هههههههه عزاااا شنو هالمثل هذا 

بُـرهان :- احم 

درنا اثنينه عليه وانا وجهي صار طماطية يمه سمعني شگد عيب وين اطم روحي يربي گال 

-- رائـف يريد يحچي وياج 

من الفشله ما رفعت عيني بعينه ولا حچيت كلمه ولا اعترضت بسرعه رحت طبيت للصاله لگيته گاعد والجكارة بيده وگفت بمكاني وهو باوعلي وراها گال

-- روحي لبسي نرجع للبيت 

-- ما ارجع اريد اروح الاهلي

گام من مكانه واجى عليه صار قريب كلش

و يگول

-- يا بنت الناس اني لا احبج ولا ميت عليج ولا اريدج ولا تعيشين اللحظة براسي وتبقين تتعززين اجيتج مجبور لان انتِ بذمتي و ما اگدر اعوفج تنامين بغير بيت 

فـ امشي لبسي و تعاي يلا

-- واثـق گال يرجعني الاهلي

-- ترى خبصتيني اهلي واهلي متگوليلي منو اهلج وينهم اهلج مصدگه روحج عندج اهل انتِ لو عندج اهل ما اتورط بيج فضيهاااا عااااد 

بلعت ريگي من القهر مو حچي يحچي تگول سم جاي يسمم بيه حرف واحد ما نطقت رحت بوجهي فوك الغرفه ريـام لبست جبتي ونزلت لگيت خالـه لميعة

و ريام بالصاله و دعتهن وهنَ يودعن بيه 

و خالتي تگول هذا بيتج وانا امج شوكت ما تجين هلا بيج وصلتني للباب تودع بيه هي و ريام ورجعن

طلعت هو واگف بالشارع و بُـرهان يمه بس شافني طلعت تسالم ويا بُـرهـان ودعه

و مشى گدامي هو يمشي وانا وراه والدمعه بطرف عيني مختنگه ومقهورة و گلبي يفور لا هو يحچي ولا انا تحچي لحد ما وصلنا للبيت قبل لا يفتح الباب باوعلي وگال

-- تشوفين هذا الباب مره ثانية اذا عتبتيه اكسر رجلج 

يتبع ....

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا