رواية بتاع الملامين كامله بقلم حنين منصور
رواية بتاع الملامين كامله بقلم حنين منصور
_ لو طلعلك صوت هتبقى نهايتك
جمله قالها قاطع طريق وهو بيثبتني ببتاعه كده في ايده
= انت... انت مين؟!
_ انا بتاع الملامين
ظهر عليا علامات الهبل والصدمه:
= بجد!!
رفع حاجبه:
_ هو ايه اللي بجد؟
= انت فعلًا بتاع الملامين؟
_.......
= دوختنا عليك يا راجل
_ نعم!
= اصل كل ما نقول مين يقولوا بتاع الملامين لحد ما كان عندي فضول اني اشوفك.. واديك ظهرت اهو
_ انتِ.....
= متقلقش يا ابو ملامين سرك في بير يا كبير
_ طب....
= الا قولي.. هو الملامين بكام دلوقتي
_ هو.....
= أصل ماما بتقولي انه مش مهم
_ عشان...
= مع اني شايفاه مهم اوي
_ يا بت اسكتي بقااااااا...ايه يا وليه انتِ بالعه راديو!!
قالها بزعيق فبصتله ببراءه مصطنعه:
= يعني يرضيك حماتي تاكل وشي؟
_ وهتاكل وشك ليه؟
= عشان مقدمتلهاش المحشي في طبق الملامين!
_ ما تطفح وهي ساكته...
= مش فاهمه انا ايه الحربقه دي
_ هو شحاته وبتتأمر بقا..
= شوفت يا اخويا!.. والحيله ابنها يقولي ما كنتِ بدليه بالإستانلس
_ طب ما هي فكره
= يرضيك أستغنى عن طقم الإستانلس!
_ بصراحه لا.. ده بيتعمل فيها أحلى أكل
= وخصوصًا بقا الملوخيه
_ والطشه بقا يااااه عالحوار ده
= ورغيف عيش بقى سخن
_ وحتتين بتنجان بالتوم
= واحلى عشوه
_ حصل،صحيح
= امممم
_ هو انتِ متجوزه؟
= لا
_ امال ايه السيناريوا ده؟
= في اعتبار ما سيكون يعني
_ قولتيليييي
= الا قولي.. اعمل أكل ايه لما اروح؟
_ اممم.. اعملي مكرونة العشر دقايق دي
= ايه دي يا اخويا؟
_ بصي هقولك
= قبل ما تقول.. خلينا نقعد عشان رجلي وجعتني
_ وانا كمان.. يلا
= فهمني بقا
_ بصي بتحمري بصلايه وبعدين بقا تشوحيه حبه لحد ما يدبل، خرطي فلفل الوان كده وشوحيهم برضو سوا
= تشويح بس!
_ اه ومتقطعيش الوصفه لو سمحتِ
= قول يا شيف
_ وبعدين بقا تخرطي عليهم طماطم والكميه على حسب المكرونه وبعد ما يتسبكوا كويس اديني بقا في البهارات
= بحب احط بهارات اللحمه بتبقى حادقه كده وقمر
_ ولا بتاعة الحواوشي بقا.. دي حوار
= كمل يلا
_ فالمهم حطي عليهم المكرونه بقا
= قلم ولا سوسته؟
_ سوسته!
= اه اللي هي الملولوه دي
_ هي دي اسمها سوسته!
= بتوع ايچيبت بيقولوا عليها فيوزللي...
_ سوسته أرحم
= شوفت بقا
_ خليها اسباجتي.. بتبقى تحفه
= كمل يا فنان
_ حطي بقا المايه المغلية عليها وقلّبي عشان متمسكش في بعضها بقا
= والفويل بقا
_ الله ينور عليكِ.. عشر دقايق كليها وادعيلي بقا
= شطور يا شيف.. بس عرفتها منين؟
_ أمي كل ما بتزهق يختي بتعملهالنا لحد ما المعده هتشتمنا
= ناصحه والله
_ طبعًا مش امي!
= اوعى الثقه يا جامد
_ امال!، ويلا بقا روحي عشان متتأخريش
= حاضر
وانا ماشيه لفيت وقولتله وانا بحاول افتكر:
_ هو انت مين اصلًا وكنت موقفني ليه؟
قعد يلعب في شعره وهو بيفتكر هو كمان وقالي:
= كنت ناوي أقلّبك باين
_ ودلوقتي غيرت رأيك؟
= طلعتِ هبله وصعيتي عليا
_ تُشكر يا كبير
= يلا يا ماما عالبيت
_ حاضر.. الاه
_________________
وقت على صوت ماما وهي بتصحيني:
_ بت يا حنين.. انتِ اتهبلتي ولا ايه؟
=ايه يا ماما، في ايه؟
_ عماله بتضحكِ زي الهبله ليه كده!
= أصلي حلمت
_ بإيه يختي؟
= بمكرونة العشر دقايق
_ عوّض عليا عوض الصابرين يارب..
= ان شاء الله هيعوضك.. انتِ مؤمنة بالله
_ طبعًا ومؤمنه إنه لما بيحب عبد بيبتليه
= تقصدي ايه هاا!
_ وهقصد ايه يعني؟
= تقصدي إن انا ابتلاء؟
_ لا يا قلبي فشَر
= أيوه كده
_ انتِ عدّيتِ المرحلة دي بكتير..
= حب الناس نعمة بجد..
_ طبعًا يختي امال ايه!
= ماما اعترفي وقولي الحقيقه
_ أقول ايه!
= انتِ لقيتيني فين!.. وفين أهلي؟
لقيتها بصتلي بدراما وقالت:
_ ايه ده انتِ عرفتِ؟
= عرفت ايه؟
_ اننا لاقيينك على باب جامع!
فرديت انا كمان بدراما:
= ومقولتيليش ليه!
_ خوفت على مشاعرك
= ودلوقتي مش خايفه عليها!
_ لا عادي
= اه يا قلبي..
_ معلش يا بنتي.. ان شاء الله هنساعدك انا وعمك منصور اننا نلاقي أهلك!
= بابا!
_ كان يا حبيبتي.. دلوقتي بقا عمو.. هي دي الحقيقه..
لقيت يوسف اخويا دخل وهو بيفرك عينه بنوم وبيقول:
_ بعد اذن فاتن حمامه وميرڤت أمين بارت تو نبطل دراما ونتنيل نفطر عشان جعان..
انا وماما ردينا في صوت واحد:
_ ده انت فصيل
= وايه الجديد
_ اطلع بره أوضتي
= خلاص يختي.. محسساني انها قصر مثلًا
_ اطلع بره ياض
= ياض!.. لولا اني لسه صاحي كنت علقتك يا ام 160 سنتيمتر
_ ده انا الكبيره يا ولا احترمني
= تدفعي كام؟
_ مادي حقير
= أفكووووورس
وسابنا ومشي... الولا ده غريب.. أصغر مني بـ 3 سنين وبيتعـامل معايا على اساس اني في حضانه وهو متجوز ومخلف محمد وياسمين!!
________
فطرنا بقا كالعاده قعدت انكش في يوسف وفي وسط الكلام..
كنت بكلم ماما وانا بصه ليوسف ومركزه على ريأكشنه:
_ عارفه يا ماما!
= ايه؟
_ انا انهارده خدت ثواب ختمة كاملة
فرفعلي حواجبه وقالي:
_ انتِ كذابه يا بت... ده انتِ لسه صاحيه اتقي الله
= طب والله خدتهم
_ ازاي بقا!.. كنتِ بتقرإي في الحلم!
= لا يا ظريف بعد ما قومت
_ لا والله!.. لحقتي؟
= وفي اقل من دقيقتين كمان
_ ده اللي هو ازاي؟
= في رواية مسلم:
"عَنْ أَبِي الدَّرْدَاءِ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : أَيَعْجِزُ أَحَدُكُمْ أَنْ يَقْرَأَ فِي لَيْلَةٍ ثُلُثَ الْقُرْآنِ ؟ قَالُوا : وَكَيْفَ يَقْرَأْ ثُلُثَ الْقُرْآنِ . قَالَ : قُلْ هُوَ اللَّهُ أَحَدٌ تَعْدِلُ ثُلُثَ الْقُرْآنِ"
= ده الحوار طلع بجد
_ تخيل!
= يعني انا لو كل يوم مثلًا قولتها 3 مرات كده هاخد أجر الختمه!
_ ايوه بس ده مش معناه اني أهجر القرآن.. ده تيسير من الله عشان ندخل الجنه أسرع
= ايوه عشان القرآن بيشفع لأصحابه
_ يو ار شطور
= ما انا عارف
_ الغرور يا جدع مش قادره
= حلو صح!
_ من حلاوته جابلي ضيق تنفس
وبعد ما خلصنا نقار نزلت الجامعه انا وأسماء صاحبتي...
كان أول يوم جامعه في سنه تانيه كليه..
رهبة السنه والخوف من التراكم..
وبعد اول سكشن..قعدنا وانا حاطه ايدي على وشي وبقول:
_ اسماء
= امممم
_ انا مش هعرف اراكم المواد
= شطوره
_ هي جيالي متراكمه لوحدها من غير مجهود
= هي بدايه نيله زيك
_ شششش
= بس بقا يا صيوحه هانم
_ على فكره انا....
= انتِ ايه!
_ جعانه
= صبرني يارب
_ في ايه؟.. ده نداء الطبيعه!
= نداء الطبيعه ولا نداء بطنك؟
_ الاتنين ميفروقش عن بعض المهم اني هاكل
= يلا قدامي نروح الكاڤتيريا
_ براحه.. متزوقييش
روحنا وقعدنا ناكل فعلًا... وفجأه لقينا واحد جاي علينا بيبتسم بسماجه وعدل الكرسي وقعد!
سيبت الأكل من ايدي وبصتله بقرف:
_أفندم!
= كملي أكلك
_ وانت مالك أكمل ولا مكملش
= الاه!..ده القطه طلعت بتخربش اهو
_ امشي من هنا أحسنلك
= على فكره انا معجب
_ ميفرقليش
= وعايز اتقدم
_ اتقدم خطوتين واديني قفاك وانت ماشي
= طب...
لقيت حد مسكه من قفاه ببص لقيته!..
_ ما قالتلك امشي واديها قفاك يا غالي
= انت مين؟
= انا بتاع الملامين
وضربه بوكس خلاه يفقد توازنه..
اسماء كانت بتناديلي وانا لسه مصدومة...
= حنين
_.......
= يا بت متنحه في ايه!
_ الراجل ده
= انتِ تعرفيه؟
_ اه
= ده مين؟
_ بتاع الملامين........
#يتبع
_تعرفيه؟
=اه
_ ده مين؟
= بتاع الملامين
_ نعم يختي!
= الحلم.. والاستانلس والتثبيت
أسماء عقدت حواجبها بعدم فهم ومحستش غير وهي بتجس دماغي:
_ حنين يا حبيبتي، انتِ سخنه؟
= انا فل
_ مش باين
= في ايه يختي؟
_ بتخرفي ياحنين.... انتِ بتخرفي يا ماما
= شايفاني مجنونه؟!
_ كنت فاكره كده..
= اه بحسب
_ لكن دلوقتي اتأكدت
= اه يا عود قصب انتِ
_ ها هااا.... احنا هنتريق بقا ولا ايه؟
= انا يابني!
_ لا انا
= شوفتِ بقا انك ظلماني!
_ حنين.. يلا يمشي بدل ما ارتكب أفعال غير لائقه
= احنا وصلنا لمرحلة غير لائقه!
_ شوفتِ وصلتيني لإيه؟!
= اكْمن مليش لا حبيب ولا قريب ولا غريب يعني جايين علياااا؟!
_ بعد اكْمن دي انا اتطمنت على مستقبلك
= امال يابنتي.. ده انا بشممرضه أد الدنيا
_ يا عم ارحمنا من ثقتك دي!
= دي مش ثقه
_ بجد!
= تؤتؤ.. ده غرور يا قلبي..
سمعت صوته من ورايا وهو بيحاول يكتم ضحكته:
_ من تواضع لله رفعه يا أنسه
=خير حضرتك!
_ لا ولا حاجه.. انا كنت بس حابب اتطمن ان الولا ده معملش حاجه معاكم
= لا اتطمن.. مفيش حاجه
_ انتوا كويسين يعني!
= ما قولنا تمام... هي شغلانه ولا ايه!
لقيت اسماء بتزنغزني في جنبي وبتكلمني وهي ضاغطه على سنانها:
_ حنين.. عيب كده
= انا مقولتش حاجه غلط
_ طب خلاص اسكتي... شكرًا ليك
لقيته بصلي بضيق وهو بيرد عليها:
= لا شكر على واجب... عن اذنكم
وقبل ما يمشي لف وقالي:
_ على فكره مفكيش نصيب من اسمك خالص
= ويوم ما يبقى فيا نصيب منه اكيد مش هظهره للكل
_ يعني ايه!
= يعني انت مين عشان ابقى حنيّنه معاك؟
_ عادي.. زميلك
= انا ماليش في جو الزمايل والصحاب ده.. وانت أيًّا كانت صفتك ايه انت أجنبي عني وملكش غير سلام عليكم وعليكم السلام.. وكمان لو اتقالت يعني.. واذا كان عالموقف فبشكرك عليه غير كده مفيش مناسبه للكلام بنا... يلا يا اسماء
خدت أسماء من ايديها وماشيين وسبته واقف بيجمع اللي قولته..
هتستغربوا اني ركنت حوار اني شوفته في الحلم لكن برضو.. مش هسيب فضولي يخليني أفقد عزّتي وسط الناس.. والأهم قدام نفسي...
كملنا محاضرات وبعد ما خلصنا جيت عشان امشي لقيته وقفني!!
_ ابعد لو سمحت
= انا بس...
_ ابعد من قدامي
= اديني فرصه طيب...
_ قولتلك ابعد بقا
قولتها آخر مره بزعيق من كُتر عصبيتي بجد منه ومن غباؤه!..
= انا جاي اعتذر
_ حصل خير.. خليني امشي
= انتِ ليه مش بتبصيلي!
_ وابصلك بتاع ايه أصلًا!
= على الاقل عشان بكلمك
_ بغض بصري... ابعد بقا
= طب...
_ ابعد والا هتشوف مني وش أنا وانت هنتفاجئ بيه
= لا والله!
_ انت عايز ايه!.. ما قولتلك حصل خير
= مستغربك
_ مش مهتمه اعرف السبب
= بس انا مهتم أعرّفك
كنت هزعق بجد بقا المره دي... لكن سمعت صوت بيناديني!
_ حنين... في ايه!
= يوسف!
_ في حاجه ولا ايه يا شبح!
فـ رد عليه وهو مستغربه:
= لا مفيش.. انا بس كنت جاي اعتذرلها
_ على ايه؟
قاطعته انا:
_ خلاص يا أستاذ حصل خير، يلا يا يوسف بقا
= بس انا عايز أفهم
_ مجرد سوء تفاهم
= يعني انتِ تمام!
_ اه متقلقش
= متأكده!
_ خلاص يا يوسف، لو في حاجه أكيد هقولك
= طيب.. وبعد كده يا غالي متوقفش بنت في الشارع عشان كده غلط يا حبيبي
_ انا بس كنت عايز أعتذر مش أكتر
= مينفعش تحت اي ظرف فاهم!
_ فاهم
وسبناه ومشينا...وطبعًا مفلتتش من تحقيقات يوسف معايا...
________________
"يونس"
مش عارف مالي...
هي ازاي غريبه كده؟...
مبصتليش وهي بتكلمني..
اتعصبت أوي لما وقفتها..
مبتدنيش فرصه في الكلام حتى!..
لسانها طويل حبه.. او حبتين تلاته..
بنت غريبه بجد..
هو انا بفكر فيها ليه؟..
انشف كده يا يونس..
مش انت اللي تفكر في بنت وتحلل شخصيتها بالمنظر ده..
دخلت نمت بعد تفكير تو ماتش بقا...
وتمر الأيام وانا يادوب بلمحها... بس مؤخرًا بقيت انا كمان مش ببص لأي بنت حتى وانا بكلمها...
اتكسفت من نفسي اوي بصراحه..
أصل البنت غضت بصرها عني ومفرقش معاها..
انا الراجل هيفرق معايا في ايه!
مش هيفرق معايا شكل البني آدمه اللي بكلمها..
وبصراحه موضوع مريح اوي..
لما بنت تيجي تسألني على حاجه بحكم اني الليدر بتاع الدفعه وتقولي انها جت قبل كده وانا افتكر السؤال بس مفتكرش شكلها دي حاجه تحفه..
علمتني أغض بصري من غير ما أحس حتى!...
لا وكمان بقيت مقتنع بيه..
ومع اني كاريزما بطبعي روحت سألت على دفعتها وعرفت هي في سنه كام وكمان عرفت جدول محاضراتها..
الكاريزما باينه ولا أبين اكتر!...
وفي يوم بقا كنت ناوي بجد اني اروح أكلمها واعترفلها بإعجابي...
مش عارف ايه التهور ده!...
_ ممكن اتكلم معاكِ!
= وليه!
_ محتاج اتكلم في موضوع ضروري
= مفيش بيني وبينك مواضيع
_ يا ستي اسمعيني ما يمكن يبقى في
= انا مش بصاحب
_ انا قولت نتصاحب!
= ولا برتبط
_ انا جبت سيرة ارتباط!
= وماليش في جو الاخوات ده
_ انتِ عبيطه!.. هل انتِ عبيطة؟!
= احترم نفسك.. هي مين دي اللي عبيطه؟
_ ما انتِ لو سكتي هتعرفي
= امممم..
_ انا معجب بيكِ
= خلصت!
_ خلصت ايه؟
= كلامك
_ المفروض
= سلام عليكم
_ خدي هنا
= خير في حاجه تاني!
_ هو معجب دي معلقتش معاكِ خالص
= لا
_ ولا اي ريأكشن!
= هو انا بعد ما عرفت المفروض أعمل ايه!
_ تديني رقم باباكِ
= لا
_ ليه!
= عشان انا مش عايزه؟
_ نعم يختي!
= بقولك ايه!.. انت خدت اكتر من وقتك
_ استني هنا
= سلام عليكم
وسابتني المجنونه ومشيت... جريت وراها عشان انا مش هسكت..
بس فجأه وهي واقفه عالرصيف لقيت عربيه بتاخدها غضب عنها وهم كاتمين نفسها..
ولما اتدخلت خبطوني على دماغي وخدوني معاها تقريبًا...
يادي الحظ المدوحس بجد..
اول ما فوقت كنت مربوط جنبها في حاجه شبه البدروم كده...
_ انا فين؟
= انتِ مخطـ..ـوفة باين
_ يا حزني!
= يا حزني!
_ وانت ايه اللي جابك هنا؟
= قولت اجي أغير جو حبه
_ بجد!
= انتِ بجد عبيطه بقا
_ احترم نفسك قولت
= بس بقا اسكتي
وقطع كلامنا دخول شاب كده هيئته غريبه... وأول ما حنين شافته:
_ محمد!... انت اللي عملت كده!
لقيته بيبصلها بصة انتصار كده وبيقول:
= أهلًا يا حنون
_ حنون في عينك يا بعيد
= تؤتؤ نظبط كده عشان معملش رد فعل مش هيعجبك
_ اخرس.. انت ازاي أصلًا تسمح لنفسك انك تعمل فيا كده؟
= ما انا جيتلك بالمعروف وقولتِ لا
_ ده على اساس اني كده هقول أه؟
= المفروض
_ المفرود عند المكوجي يا بابا
= انا مش فاهم انتِ واخده قلم في نفسك اوي كده ليه؟
_ واخد قلم في نفسي ليه؟.. انا فعلًا عزيزه وكرامتي فوق الكل
= اسمك حنين ولا عزيزه ما ترسي على اسم
ضحكتله بسماجه:
_ دمك سم ما شاء الله... ياريت ماتتكلمش تاني
= وانت مين انت كمان؟
_ خدوني مع الباكدج
= هو انت كيس الصلصله اللي بيتحط مع كيس المكرونه؟
_ عايز اسأل سؤال
= امممم
_ هو انت ازاي واخد كل السماجه دي لوحدك بجد؟
= من بعض ما عندكم
_ لا اعوذ بالله.. انا لو سمج كده انعزل عن العالم وامشي بمبدا لا أرى لا أسمع لا أتكلم
بصلي بضيق كده ورجع بص لحنين:
_ الا قوليلي يا عروسه
= عروسة مين يا بتاع انت!
_ تحبي كتب الكتاب يبقى دلوقتي ولا كمان شوية؟
فرديت انا:
_ ونعم الديموقراطية
= الدكتاتورية دي مش منطقي إطلاقًا
_ اه ما انا واخد بالي
فلقيت حنين بتزعق:
_ اسكت منك ليه... وانت يا بتاع انت انا مش هتجوزك ولو على موتي فاهم!
= يبقى شكلها هتبقى على موتك يا عيون البتاع
_ ولاااا.. انت ازاي مستفز كده بجد؟!
= رباااني
_ ياربي على خفة الدم دي
= هعيشك فيها طول عمرك
_ ده بعيد عن شنبك
= معنديش شنب
_ ده صيغت مبالغه بتزود الإستحاله
= بجد والله!
_ انا لا بطيقك ولا بطيق أهلك ولا بطيق صلة الدم اللي ربطانا دي
فاتصدمت انا بقا:
_ لا يا جماعه ستوب كده.. صلة ايه اللي ربطاكم دي؟
= انا والزفت ده ولاد خاله
_ تؤتؤ عيب يا حنون تقولي على جوزك المستقبلي زفت
= دي احلام العصر دي ولا ايه!
_ لا احلام الضهر عشان في العصر بصدع
= كفااايه استظراف يابن ناهد
_ عيب!.. تقولي اسم خالتك كده قدام الأغراب؟
= هو وصمة عار يعني؟
_ برضو.. مبحبش حد يقول اسم امي
= ده انا شكلي هطفح المُر بشاليمووووه
_ هسيبك تقكري حبه وجايلك
= مش موافقه
_ مش مهم.. المهم اني عايز كده
______________
"حنين"
مش عارفه اعمل ايه في الاهطل ده.. وفي وقت ما بندب حظي الاقي البيه اللي ماشي بمبدا الصم والبكم بيقولي:
_ هو مين ده؟
= ما قولنا ابن خالتي
_ وبيعمل كده ليه؟
= عشان اتقدملي ورفضته
_ ورفضتيه ليه؟
= عشان عيل متدلع كده... كل حاجه بيعوزها بياخدها.. ميعرفش يعني ايه قوامه.. بيدخن.. عيل من الآخر.. مش هديله قلبي ولا اجيب منه اطفال
______________
_ نرفزني اوي
= اه ما انا خدت بالي
_ بتتريقي؟!
= طبعًا بتتريق
_ وده ليه بقا؟
= هو ايه اللي ليه!.. هو انت مش قبل ما نتنيل قولت انك عايز رقم بابا
_ اه لما سبتيني ومشيتي
= الله ينور عليييك... فين بقا العصبيه والغيره والكلام ده؟.. ولا انت كنت واخد حوار الخطوبه ده دَخله!
_ دَخلة ايه يا حبيبتي!!.. وتتحسب عليا خطوبه؟
فبصيت بعدم استيعاب:
= تتحسب عليك خطوبه؟!. من امتى والخطوبه بتتحسب عليكم
_ مهو انا مع المساواة
= لا والله!
_ اوماال
= انت بجد ازاي مزعقتش فيه ولا اتعصبت ولا اتنيلت على دماغك؟
_ بعيدًا عن طولة لسانك لكن كان لازم أجاريه
= ليه فِكرك انه هيسيبنا مثلًا!
_ لا احنا اللي هنسيبه
= وازاي بقا؟
_ كده
لقيته رافع ايده اللي المفروض انها متكتفه، فبرقت بصدمه اللي هو "ده انت نينجا"
= انت فكيته ازاي؟
_وطي صوتك هتفضحينا
= طيب قولي
_ كنت لاقي حتت موس واقعه خدتها من غير ما حد ياخد باله
= طب فكني يلا
_ استني افكر
= تفكر لي ايه يا جدع انت!
_ قومي زعقي بره
= ازعق بره!
_ ما انتِ كده كده فضحانا فروحي قوليلهم بقا اسهل
= ياريت نبطل خفة دم وتتنيل تفكني
_ أتنيل!
= اه
_ طب شوفي مين هيفكك
= انجر يا...
_ يونس
= مش مهم
_ كمان مش مهم
= ما تنجز بقا
_ على شرط
= امممم
_ هاخد رقم باباكِ
= مش انا اللي يتلوي دراعي
_ خلاص خليكِ
= انت لو مفكتنيش دلوقتي هصوت وأقولهم انك عايز تهرب ها... عليا وعلى أعدائي بقا
_ ايه العلاقه؟
= هي بتتقال كده
زفر بضيق مني وقال وهو بيفكني:
_ يلا يختي.. ده انتِ طلعتِ وليه قادره
= اقل حاجه عندي
_ طب يلا
وهربنا من محمد بس هل اسكت؟!.
أبدًا روحت مبلغه واديتهم اوصاف المكان هتقولولي وفين الدليل هقولكم اني كنت عملاله محضر ازعاج قبل كده نيهاهاها...
احم احم... روّحت انا ولقيت يونس جاي ورايا..
_ هو انت ملكش بيت تروحله وتحل عني؟
= تؤتؤ
_ طب....
قبل ما اتكلم لقيت ماما قدامي بالإسدال وباين عليها القلق جامد..
_ انتِ كنتِ فين يا حنين قلقتيني عليكِ!
= ابن اختك خطـ..ـفني يا حاجه
_ بتقولي ايه!
= اه خطـ..ـفني وكمان روحت عملت محضر بعد ما هربت منه... الاستاذ فاكر انه هيتجوزني غصب عني..
_ لااا دي هبّت منه عالآخر
= بجد اه
لقيت يونس بيحمحم من ورايا:
_ احم احم... نحن هنا
= مين ده يا حنين؟
كنت لسه هرد لقيته قاطعني:
_ انا يونس يا قمر
= قمر مين ما تتكلم عدل
_ هو انا اتكلمت بالمعووج ولا ايه؟
= عيب كده يا حنين
_ عيب ايه يا ماما ده بيقولك يا قمر
= مهو مغلطش
_ نعم!.. طاااااايب... يا بابااااا
=ششش يا بت اسكتي
_ ششش ليه بقا ما انت كنت بتعاكس امي!
= أبوكِ أكيد بيغير على اهل بيته وكده
_ وانت خايف على زعله اوي!
= طبعًا
_ ولا على نفسك؟
بلع ريقه وقال:
= الاتنين
_ ظهر الحق
لقيت ماما بتضربني في كتفي عشان اسكت وهي بتقول ليونس:
_ وانت مين بقا يا يونس؟
= زميل حنين في الجامعه
_ وايه اللي جابك هنا؟.. هو انت ساكن قريب؟
= لا كنت بتطمن عليها انها روّحت
_ ومعلش تتطمن ليه؟.. هو انت عرفت ان ابن خالتها...
= ايوه يا حجه مهو خدني معاها لُكشه واحده
_ يا دي المرار... منك لله يا محمد، معلش يا ابني حقك عليا..
= ولا يهمك يا طنط الحمدلله انها عدت على خير..
فجأه لقيته بصلي بخبث كده...هتقولولي لاحظتي ازاي هقولكم صدفه مكنش قصدي.. وراح قايل لماما:
_ الا قوليلي يا طنط.. تعرفي مطعم قريب من هنا؟
= مطعم!
_ ايوه اصلي مكلتش من الصبح
= يا ضنايا يابني!.. لا تعالى كُل معانا
وهنا فهمت البصه دي كانت ليه... البيه داس على وتر الامومه عند امي..
_ ياكل فين؟
= قولتلك عيب
_ عادي يا طنط مش حابب اتعبك
= لا تعب ولا حاجه تعالى بس
_ بس...
= مبسش تعالى.. ده ابو حنين فوق وهيفرح بمجيّتك
فقال بنبرة انتصار:
_ وانا يشرفني اوي اني اتعرف عليه يا طنط
دقيقه واحده يا جماعه!.. ده انا مرضيتش اديه الرقم يقوم يتغدى معانا وكمان يقعد مع ابويا!!!...
لاااااا ده الدنيا احلوّت عالآخر بقا..
وطلع معانا فعلًا... مهو أصل البجاحه وقلة الأدب دي ليها ناسها...
وده ماشاء الله عليه اول ناسها... بتاع الملامين ده!
انا نسيت الحلم!... يلا مش مهم
وبعد الغدا بابا كان قاعد بيرغي معاه ولا كإنه ابنه مثلًا مش لسه معرفة ساعتين!
فلقيت الاستاذ فجأه بيقول لبابا:
_ هو حضرتك بتحب الشطرنج يا عمي؟
= اه جدًا ومحدش عرف يغلبني فيها
_ اعرف اغلبك انا عادي
= بتحلم
_ تيجي نشوف؟
= يلا ياخويا انا مبتهددش
وه وه... ده في ساعتين كسب الوالدين..
خلصوا لعب وبابا اللي كسب كالعاده..
_ قولتلك مش هتعرف تاخد مني اللعبه دي
= انا مش عايز اخد اللعبه انا عايز اخد حاجه تانيه
_ ايه هي؟
= حنين
انا كنت بشرب فشرقت.. احنا لحقنا يختااااي!
والمصيبه اني لقيت بابا وماما حبوه وكمان مرحبين بالموضوع!!
فرديت باعتراض:
_ لا
= و ليه يا حنين؟
_ مش عايزه يا بابا
= طب ما تديله فرصه الولد باين عليه محترم
_ بس...
لقيته بيقولي بصوت هادي عكس افعاله:
= اديني فرصه وانا مش هخليكِ تندمي صدقيني
قررت في اللحظه دي اطفشه:
_ بس عندي شروط
= موافق عليها
_ مش لما تعرفها!
= عرفيني بس موافق برضو
_ هنلتزم بضوابط الخطوبة... مفيش خروج لوحدنا... مفيش مكالمات بليل.. مليش في كلام الحب ده.. متتعداش حدودك في الكلام معايا... مفيش تلامس
= مفيش خطوبه
_ اهو شوفتوا... خلاص انا أصلًا كنت...
= هكتب الكتاب على طول
_ نعم!.. لا طبعًا
= يا ستي صلي استخاره وان شاء الله هترتاحي زي ما انا مرتاح كده
_ هو انت صليتها!
= ايوه بقالي اسبوع تقريبًا
_ لا والله!
= اها... هستناكِ
مشي... وعدا اسبوع كمان وانا بصلي وحاسه اني مرتاحه.. بلغت بابا بالموافقه...
_______________
يوم كتب الكتاب بعد جملة المأذون الشهيرة "بارك الله لكما وبارك عليكما وجمع بينكما في خير"
_ مبارك يا أميرتي
= الله يبارك فيك
_ بقولك ايه!
= اممممم
_ هو انتِ جايبه طقم الملامين؟
= اشمعنا!
_ عشان حماتك متاكلش وشك عشان مش حطه فيه المحشي
= انت.... انت مين!
_ ما قولتلك بتاع الملامين..
#حُنيـــــــــــــــــن
تعليقات
إرسال تعليق