رواية القصيره والمهندس بقلم حنين منصور
رواية القصيره والمهندس بقلم حنين منصور
_بقا انا 150 سم تعمل فيا انا كده؟
= اهدى بس يا يونس
_ أهدى ايه يا ماما!.. دي بهدلتني
قالتلي وهي بتحاول تكتم ضحكتها:
= ما انت برضو مكانش ينفع تكلمها بالطريقه دي
_ طريقة ايه؟
= يونس.. انت مش واخد بالك انك شوفت نفسك عليها!
_ انا مقولتش حاجه غلط
= والله!
_ انا مقولتش غير اني مهندس ولازم تتكلم معايا باحترام اكتر
= لا والله!
_ في ايه يا ماما؟.. انتِ معايا ولا معاها؟
= انا مع الحق.. خليت البنت تنزل من بيتها في عز الليل متعصبه بسببك
_ هي اللي دايمًا متعصبه
= وعرفت منين بقا؟
_ حصل كذا موقف قدامي
= ده انت مركز بقا في تصرفاتها!
_ انا.. لا أبدًا.. بتبقى صدف مش أكتر
= صدف اه
_ في ايه يا ماما؟
= مفيش يا عين امك مفيش
_ اعمل ايه فيها ام شبر ونص دي!
= تتهد ومتقربلهاش..
_ نعم!
= سمعتني!
_ يا الله... انا داخل
= مع السلامه
______________
أهي دي يا عزيزي القارئ أمي.. جيشي الوحيد..
هفهمكم عشان شكلكم متسوحين ومش فاهمين حاجه..
بصوا... أنا اسمي يونس.. بشتغل مهندس.. بحكم شغلي بتعامل مع ناس كتير في البيئة المحيطة بالمبنى المسئول عنه بما اني معماري وكده..
فالمهم يا عزيزي القارئ.. في وسط الشغل كانت الساعه تقريبًا 11 بليل.. في وقت وانا بدي التعليمات بقا والعمال شغالين ألاقي علبة كانز كده داخله عليا وهي متنرفزة:
_ انت يا أستاذ
=......
_ انت يا أخ
= هو انت مبتردش ليه؟
_ لما تناديني عدل
= امال انا بناديك ازاي؟
_ انا بشتغل ايه!
= مشوفتش بطاقتك عشان اعرف
_ سينس الإستظراف ده عندك من زمان؟
= ببقى ظريفة مع المغرور
_ يعني انا مغرور!
= انا مقولتش حاجه
_ لا والله!
= ايوه.. عايزني اقولك ايه يعني؟
_ ايه مش شايفه؟
= في ايه؟.. ما بني آدم زي بقيت البني آدمين!
لقيت حد من العمال بيناديني:
_ يا بشمهندش يونس
= ايوه يا عم محمد
_ خلاص باقي الصبه الأخيره
= طب خلاص كفايه كده انهارده
فلقيتها هي بترد بسخرية:
_ لا.. كتر خيرك بجد
= شكرًا
_ شكرًا على إيه انت فاكرني بشكرك بجد؟
= أمال ايه؟
_ انا بتتريق حضرتك
= وتتريقي بتاع ايه أصلًا!
_ بتاع ازعاج!.. بتاع دوشه وفوضى من بدري واحنا مستحملين
= نعمل ايه يعني؟
_ تراعوا الناس اللي نايمه
= مهو ده شغلنا برضو
_ يا محترم في وقت للشغل.. الساعه 11 ونص دلوقتي واحنا في الشتاء
= يعني ايه في الشتاء؟
_ يعني العشاء بتأذن الساعه 6 حضرتك والكل بينام بعدها من البرد
= وشغلي!.. أسيبه يعني عشان حضراتكم تناموا!
_ لا تشتغل لحد نص الليل وكلنا منعرفش نشتغل تاني يوم بسببك
= وانتِ مش هتعرفي تشتغلي بسببي ليه ان شاء الله!.. هو اي تلاكيك لقلة الضمير؟
_ هو مش الناس بتتنيل تنام عشان تصحى تاني يوم فايقه لشغلها!..
= عادي يعني
_ ده على اساس انك فايق دلوقتي بسبب الطاقه الشمسيه مثلًا
= انا حاجه تانيه
_ وده ليه بقا ان شاء الله؟
كنت لسه هرد لكن قاطعتني:
= اااه أصل انت مهندس
_ بالظبط كده
= انتم منكم لله
_ ليه كده!
= قالّين راحتنا بكل الطرق.. كل جمله بتقولوها مبتخلاش من انكم مهندسين.. واخدين مقلب في نفسكم جامد الا من رحم ربي... حاطين مبدأ انكم مفيش زيكم اتنين
_ طب ما دي الحقيقه!
= يا ولي الصابرين يارب!، اسمع يا بن الناس لازم تفهم انك زيك زي اي حد هنا.. متعلم وتعبت في دراستك على راسي لكن الكل تعب.. انت مش محور الكون لا انت ولا المهنه بتاعتك اللي فاكر انها الأصل في أي حاجه.. ومش كل شويه تعرفونا انكم مهندسين قرفتونا بجد!
مشيِت وسابتني بعد ما ادتني الكلمتين دول.. بقا انا اتبهدل بالمنظر ده؟!
روّحت حكيت لأمي من كُتر النرفزة وكان ردها اللي انتوا شوفتوه من شويه ده..
انا مش فاهم هي متنرفزه كده ليه؟
كل ده عشان النوم!
مع انها تلاقيها قاعده في البيت طول النهار زي البط البلدي..
لقيت امي بتقول:
_ بط يا بتاع بطنك!
= بتقطعي سردي في الاسكريبت ليه يا ماما؟!
_ انت اللي بتفكر بصوت عالي
= بقا الغلط فيا يعني!
_ امال فيا يا بشمهندس؟
= لا طبعًا... انا الغلطان.. انتِ وعلبة الكانز دي صح وانا اللي غلط
_ بطل تتريق عليها.. يمكن نصيبك يقع في واحده قصيره
= لا ان شاء الله هتبقى مناسبه لطولي
_ هو انا هتلاقي حد يناسب طولك ده؟.. ده انت أد فردة الدولاب
= شكرًا يا ست الحبايب
_ عفوًا يا أخويا...
نمت بقا.. مهو اصلي كنت محتاج انام بشكل لا يوصف.. قومت على وقت الفجر صليت وسبّحت حبه ونزلت تاني عالشغل عشان نلحق نخلص..
الشارع كان هادي..
نسمة هوا باردة..
ضوء بسيط..
صوت عصافير..
ورق الشجر بيمشي مع الهوا..
ورجلي واخداني وسرحان..
جو زي ده محتاج ايه!
كوباية شاي بالنعناع..
قعده حلوه..
حد بنحبه نحط راسنا على كتفه وننسى هم الدنيا..
النقشبندي في الخلفيه..
وخلاص كده..
سلامًا على الدنيا وما فيها بقا..
يا بخت اللي في ايده ينفذ كده
لما وصلت الموقع لقيت عم محمد قاعد بيقرأ قرآن في المكان اللي بنصلي فيه.. ألقيت السلام ورده عليا ورجع كمل:
_ يلا يا عم محمد نبدأ؟
= معلش يا بشمهندس هستأذنك في ربع ساعه كمان
_ اشمعنا!
= عشان بعد ربع ساعه الشروق هيبدأ
_ مفهمتش
= عايز اخد ثواب الحج والعمره يعني
فضحكت وقولت:
_ هتاخدهم ازاي وانت قاعد معايا يا راجل يا طيب؟
= والله ده انت اللي طيب يا بشمهندس.. انا ممكن اخد ثوابهم وانا قاعد جنبك عادي صدقني
قعدت جنبه باهتمام:
_ لا ده انت كده تفهمني بقا
ضحك بلطف كعادته:
= هقولك يا سيدي.. بس صلي على حبيبك الأول
_ اللهم صلِّ وسلم وبارك على سيدنا محمد
= حبيبك بقا قال ايه!
قال.. "مَن صلى الفجرَ في جماعةٍ ، ثم قَعَد يَذْكُرُ اللهَ حتى تَطْلُعَ الشمسُ ، ثم صلى ركعتينِ ، كانت له كأجرِ حَجَّةٍ وعُمْرَةٍ تامَّةٍ ، تامَّةٍ ، تامَّةٍ"
_ بالله عليك؟
= شوفت هينفع وانا قاعد معاك عادي اهو
_ ده انا طلعت محروم من حاجه عظيمة بجد
طبطب على كتفي وقال بحب:
= طالما عرفنا واحنا عايشين يبقى لسه الفرصه في ايدينا
_ عندك حق
= سبني بقا اكمل الاه
_ اتفضل خلاص اهو..
فضلت قاعد بتأمله وهو بيقرأ... أد ايه هو راجل هادي وصوته كمان حلو..
لحظة!
طب ما انا صوتي حلو!
بس مجربتش انتفع بيه في التلاوه
بجد انا قليل أدب
بجد يعني...
ووسط ما انا قاعد افكر..
لقيتها نازله..
هي الشبر ونص بتاعة امبارح دي..
غضيت بصري عنها وفضلت زي ما انا لحد ما قطع شرودي صوتها وهي بتكلم حد بعصبيه..
هي ايه البت دي بجد؟
كل ما اشوفها تبقى بتتخانق ومتعصبه؟..
مكتوب على دماغها عصبيه كده!
لقيتها بتقول:
_ قولت لحضرتك مش محتاجه مساعده واتفضل امشي
فرد عليها اللي كان واقف ده:
= ليه بس يا قمر؟.. ده انا حتى اقدر اساعدك في حاجات كتير
حاولت تمشي لكن كان بيسد عليها الطريق..
مقدرتش اسكت وروحتلهم..
_ في حاجه ولا ايه؟
= الاستاذ ده مش راضي يخليني امشي
وجهت نظري ليه وانا بقوله:
_ خير يا غالي في حاجه؟
= وانت مين يا اخويا!
_ ويخصك في ايه!.. انت عايز ايه منها!
= عايز القرب
لقيتها بترد عليه بغضب:
_ يا تك قِربه سخنه سلخت لسانك اللي عايز قطعه ده
= الللاااا احنا هنلبخ ولا ايه؟
حاولت اعدي اليوم عشان هي شكلها متأخره وانا كمان..:
_ خلاص حصل خير واتفضل يلا
= اخرج منها انت بس يا غالي
_ واخرج منها ليه؟
= وتتدخل في الحوار ليه من اساسه؟
_ خطيبتي واتدخلت في حوار يخصها ليك شوق في حاجه؟
= بس هي مش لابسه دبله
_ هلبسهالها قريب ملكش فيه انت
= بس..
_ ما خلاص بقا كفايه كُتر كلام ملوش لازمه
= ماشي يا اخويا.. ربنا يتتملك على خير
_ تسلم يا حبيبي.. يلا زق عجلك
وبعد ما مشي راحت متعصبه عليا برضو!..
الله!
هي البت دي مبتتهدش؟!
_ انت ازاي تقول انك خطيبي؟
= وايه المشكله!
_ انت كدبت
= عندك حق.. انا كدبت ولازم أصلح اللي عمته
_ وازاي ده؟
= هخطبك بجد….
#يتبع...
= عندك حق.. انا كدبت ولازم أصلح اللي عملته
_ ازاي؟
= هخطبك بجد
لقيتها بصتلي بصدمه كده وبعد كده رجعت ريمه لعادتها القديمه وراحت متعصبه عليا برضو...
يبقوا فكروني لما نتجوز أبقى اربطها في رجل الكنبه!
دقيقه!.. هو انا قولت نتجوز صح؟..
انا مش عارف ليه عملت كده!
بس كنت عايز اعاقبها..
وجوازي منها هيبقى أكبر عقاب ليها..
راحت قالتلي:
_ نعم!
= ايه؟
_ تخطب مين؟
= هو انا بكلم حد غيرك هنا؟
_ ومين قال اني هوافق؟
= هتوافقي
_ كفايه غرور بقا
= مش غرور على فكرة.. دي ثقه في النفس
_ امممم
= هاتي رقم باباكِ بقا
_ لا
= ده اللي هو ليه يعني؟
_ هو كده... انا مش موافقه
= هتوافقي قولتلك
_ وانا قولتلك مش موافقه.. وابعد عن طريقي بقا عشان اتأخرت
= انتِ.....
مدتنيش حتى فرصه اني اتكلم وسابتني ومشيت!!!...
طب لما نتجوز يا شبر ونص...
صبرك عليا...
احم... هو انا اتدبست؟
او... او ايه بجد؟
انا عملت كده ليه!
ليه طلب اتجوزها مع اننا كنا بنتخانق امبارح؟
ليه شداني ليها بالرغم من انها مش طايقه نفسها ولا طيقاني؟
ليه حاسس اني عايزها هي!
يا ربنا....
ايه اللي بيحصلي ده!!
مش هسكت برضو.. لازم اجيب الرقم...
لما لفيت لقيت عم محمد ورايا!
يا خبر ازرق!!
هو شافني وانا بتساب كده وبترفض؟
يا فضيحتشييي..
فلقيته بيبصلي وبيبتسم..
وجاي يطبطب على كتفي، فقولتله بتوتر:
_ هو انت هنا من امتى يا عم محمد؟
= اتجوزها يابني.. حنين بنت حلال وتستاهل
_ هي اسمها حنين!
= ايوه
_ ولا باين عليها
= حنين يابني اتربت انها بره البيت راجل زيه زينا كده.. اللي شافته مش قليل ويخلي العيل اللي في حضانه يفكر كإنه بينه وبين القبر شعره..
_ ده انت تعرفها جامد بقا
= حنين بنت أعز صاحب ليا
_ بجد!
= ايوه تصدق
_ لا ده انت تقعد بقا وتحكيلي عنها
= ده انت شكلك واقع على بوزك بقا
_ لا انت فهمت غلط
سكتت بحظة وبعدين كملت:
= هو باين أوي يعني؟
لقيته ضحك وقالي:
_ مش باين اوي.. بس باين انك فضولي ناحيتها
= دي حقيقه
_ طب قولي بقا
= امممم
_ عايز تعرف عنها ايه؟
= كل حاجه وأي حاجه
_ اممم طب بص..
بصتله باهتمام فـ كمل:
_ هي اسمها حنين... بتشتغل تمريض في مستشفى.. عندها أخوها يوسف.. أبوها صاحبي الروح بالروح.. هي بنت حنيّنه اوي شبهك
وقفتني تخر كلمة:
__شبهي!
= ايوه شبهك.. انت مستغرب ليه؟
_ أصل يعني... أصل انا دايمًا بتعامل معاكم عادي
= بس جواك حنيّة الدنيا
_ انت عرفت ده منين؟
= عادي.. من نظرتك للطفل اللي البلونه بتاعته طارت وروحت راضيته.. والقطه اللي لقيتها بتنونو روحت جبتلها أكل ومايه.. والخناقات اللي دايمًا بتنصر فيها المظلوم.. والست الكبيره اللي لما كانت شايله أكتر من طاقتها روحت ساعدتها وفضلت معاها لحد ما ركبت المواصله بتاعتها
بصتله وانا في حالة صدمه اللي هو... ايه ده!!!
_ هو انت لاحظت كل ده!
= كانت صدف ولا اقولك... مفيش حاجه اسمها صدف
_ ازاي؟
= كل حاجه يا بشمهندس بمعاد.... المقابلات والرؤيه للمواقف.. حتى الناس اللي بنقابلهم.. عمر مقابلتنا ليهم ما كانت صدفه.. في اللي بنتعلم منهم درس وفي اللي بيسيب جوانا اثر حلو
_ كلامك حلو اوي يا عم محمد
= تسلم يا حبيبي
_ كمل بقا..
= اه نسيت.. هي شايله المسئولية من صغرها.. بتحب الهزار دايمًا مع انها جواها جبال من التعب ومش عارفه تشاركه ولا تتكلم عنه.. ولو انت بجد عايز تتجوزها في حاجات لازم تتاكد انها عندك الأول
_ اللي هي ايه؟
= تكون حنيّن عليها اكتر من اي حد..
قلبك ليها هي وبس وملهاش جيران فيه..
متسبهاش لدماغها مهما حصل..
لو لقيتها ساكته تحترم سكوتها..
متسبهاش متعصبه..
_ دي على طول متعصبه يا عم محمد وبتخانق دبان وشها
فضحك جامد وقال:
= يابني هي شايله الهم فوق دماغها وحاطه مليون حاجه تعملها في يومها.. فطبيعي لما يحصل حاجه بتطلع خنقتها فيها
_ ربنا يستر.. شكلنا مش هنعمر
= بالعكس.. انتوا أكتر اتنين هتعمروا ان شاء الله
_ اشمعنا؟
= عشان زي ما قولتلك.. حنين شبهك يا يونس
_ ادعيلي توافق عليا بس
قالي وهو بيقوم من جنبي:
= لو عرفت تبقالها السند.. هتوافق صدقني
_ يارب
كان هيمشي فوقفته:
= عم محمد
_ نعم
= هاتلي رقم والدها الله يرضى عنك
_ عنيا يا بشمهندس
= تسلملي عنيك
دي طلعت حوار بقا..
غريبه..
بس يمكن هي دي...
اللي هتخرج معايا في عز البرد في الشارع..
اللي هتقعد معايا في البلكونه واشكيلها همي..
اللي هتشاركني كوباية الشاي بالنعناع..
اللي هتشغل النقشبندي وتتفرج معايا على السماء...
يارب توافق..
________________
روّحت حكيت لماما واللي حصل كالآتي..
لقيتها بتجس دماغي:
_ يونس ياحبيبي.. انت سخن!
= سخن ايه بس يا ماما!
_ يبقى عندك فصام.. ااه انا اصلا كنت شاكه
= يا...
_ انت مش على بعضك بقالك فتره
= طب....
_ انا من الصبح هوديك لدكتور نفسي
= يا حجه اهدي كده واسمعيني.. انا معنديش فصام
_ تبقى شارب حاجه
= شارب حاجه!
_ افتح بوقك يلا وقول ااااه
= نعم!
_ بقولك قول ااااه
= اااااه ياني يما..
_ متجودش من عندك
= يا ماما اهدي بقا
_ اديني هديت
= انا هتجوزها بجد
_ هو مش انت يا ولا امبارح قعدت تتريق عليها وبتخانق دبان وشك بسببها
= احم.... بيقولك...
_ هو مين اللي بيقول؟
= معرفش... هو بيقول وخلاص
_ انجز
= بيقولك ما محبه الا بعد عداوة
_ يا رااجل!!
= عيون الراجل
_ اتلم يا ولا
= يلا بقا
_ يلا ايه؟
= جهزيلي الاوتفيت اللي هروح بيه بكره
_ هي المقابله بكره؟
= اه
_ بالسرعه دي؟
تدلت اللياقه وانا بقول بثقه:
= طبعًا.. هو انا اي حد ولا ايه؟
_ خِف غرور شويه لحسن البنت تطفش منك
= انا متسابش بقولك
_ هنشوف ياخويا
_____________
وتانر يوم روحتلها بليل ولما سابونا..
_ احم...
= نعم
_ على فكره احنا قاعدين نتكلم
= واتكلم أقول ايه طيب!
_ مش عارف
= ولا انا
_ طب بقولك ايه؟
= ايه!
_ هو انتِ بجد مش موافقه!
= كنت... بس عم محمد قعد يكلمني عنك
_ انا بقول اني مليش غيره حبيبي عم محمد ده
= يا راااجل
_ افكوووورس
فلقيتها ابتسمت على طريقتي.. بدات احس براحه أكتر..
اتكلمنا وفهمنا بعض وادينا اهو يا عزيزي يوم كتب كتابنا...
"بارك الله لكما وبارك عليكما وجمع بينكما في خير"
روحتلها وانا عيوني عليها واد ايه هي مكسوفه وايديها احمرت من كتر فركها فيها من التوتر...
_ مبارك عليكِ
= الله يبارك فيك
_ بقولك ايه؟
= نعم
_ هو انتِ عيونك دي حقيقيه؟
= نعم!
_ أصلها غريبه
= مالها!
_ بتسحبني ليها زي السجان
= بقولك ايه... انا.. انا مبعرفش ارد
_ اه ما انتِ مش فالحه غير في الخناقات والعصبيه..
= نعم ياحبيبي.. نعم ياخويا.. معترض ولا حاجه!
_ اهي.. روح محمود صاحبي طلعت اهي
= انت اللي بتضطرني وانا أصلا هاديه
_ وانتِ ايه يا عنيا!
= هاديه بقولك
_ اه اه... هاديه
وبعد دقيقتين لقيتني ماسكها من قفاها:
_ بقا انا تقوليلي قرفتونا بجد!
= مهو انتوا يسطا مش سايبين الواحد في حاله
_ ومعتمد عالطاقه الشمسيه ها!!
= وماله ياخويا دي حتى طاقه متجدده
_ ومغرور صح؟
= أصلًا ده التايب بتاعي
_ ومش موافقه عليا
= عيله يا هندسه ومتاخدش على كلامي
_ يلا امشي قدامي
= على فين؟
_ هوديكِ محل نقابات عشان هتلبسي النقاب دلوقتي
= وليه!
_ الملامح دي انا بس اللي اشوفها.. مش هفرح لما الاقي كمان شويه حد جاي يخطبك مني
لقيتها ضحكت ودخلت اوضتها ودقيقتين وكانت جايه معاها شنطة..
_ ايه ده!
طلعته من الشنطه وكان نقاب!
= كان نفسي البسه من زمان بس مكانش في فرصه لكن دلوقتي خلاص بقا عندي كل حاجه
_ تقصدي ايه؟
= أقصد حبيب عيوني الهندسة..
#حُنيـــــــــــــــــن
تعليقات
إرسال تعليق