رواية حنين ويونس كامله بقلم حنين منصور
رواية حنين ويونس كامله بقلم حنين منصور
_قربي تعالي...
=لا انت غدار وملكش أمان
_ بقولك قربي
= وانا اضمنك منين؟
_ انجزي يا حنين بدل ما أطلع عليكِ القديم والجديد
= يوسف براحه ماشي!
_ مقدرش أوعدك
= يختاي عليا
_ قربي يابت هنا
مشيت بخطوات بطيئة زي الكتكوت المبلول كده مفيش فرق بنا...
= اهو
راح ماسكني المسكه المعتاده لحرامي الغسيل..
_ ايه يا جدع ما براحه
= هو انا مش قولت مليون مره هدومي ماتتلبسش!
_ سؤال..
= اممممم
_ أنا عمري سمعت كلامك؟
= لا
_ أمال ليه متفاجئ دلوقتي؟، أنا مش فاهمه
قعد يحركني شبه فردة الشراب في ايده قدام وورا..
= يا عمنا ما براحه هو انا بتنشف فردة شراب غصب عنها! ده مش اسلوب يعني
_ ليكِ عين تقاوحي؟
= عندي عنين اتنين مش شايف؟
_ صبرني يارب
=سبني بقا يا جدع واحترم اني اختك الكبيرة مش كده
_ على حسب
= نعم يخويا!
_ اييه!.. حقي ولا مش حقي؟
= لا مش حقك
_ طب يبقى شوفي هتفلتي ازاي بقا، خليكِ متعلقه كده
= سبني بقا ياللي منك لله فرهدتني
_ هتروحي تعمليلي كوباية شاي
= طيب
_ والتيشرت اللي انتِ لابساه ده يتغير ويتغسل ويتكوي
= طيب
_و...
= ما خلاص يا جدع، هو انت شايفني مصباح علاء الدين قدامك؟
_ بتزعقي؟
= أنا!
_ حاسك بتزعقي
= أبدًا يا غالي
_ يعني مش بتزعقي؟
= يووه بقا، قولت مبتزفتش، حل عن نفوخي بقا
سابني واخيرًا فبرطمت بصوت واطي..
_ ياتك ضربه في معاميعك
= بتقولي ايه؟
_ ان شالله تتفوق في تعليمك
= اه بحسب
_ حسبتك آله حاسبة مفيهاش أزرار
= ايه!
_ ريحتك ولا ريحة الأزهار
=اممممم
_ ربنا عالظالم والمفتري
= نفسي أفهم بتبرطمي تقولي ايه؟
_ قفاك خلع التيشرت وجري
ده اخويا يوسف، أصغر مني بـ 3 سنين بس بيتعامل معايا بالعكس..
_ حنين
= نعم
_ انتِ زعلتِ مني؟
= وازعل ليه؟
_ عشان مسحت بكرامتك الارض
= لا انت ممسحتش بكرامتي الارض ولا حاجه
_ بجد!
= انت دشملتها خالص، أنا مبقيتش شايفاها أصلًا بسببك
_ ياه!
= شوفت!
_ يعني زعلانه؟
= اه
_ طب واللي يخرجك
= مش عايزه اخرج
_ هناكل كريب
=...
_ هشربك عصير توت
=....
_ هوديكِ المكتبه طيب
= بجد والله!
_ يعني هي المكتبه اللي فرقت معاكِ؟
= لا طبعًا بس كنت عايز أشوف العرض آخره إيه؟
_ والله!
= طبعًا، أنا في الإستغلال منعديش يما ارحميني
_ طب يلا قبل ما أغير رأيي
= فوريرة
وطبعًا وافقت عشان ده أخويا حبيبي مش عشان عروضه مغرية لا إطلاقًا!..
لبست فستان بني ونقاب بيچ وكان شكلي تحفة!..
طلعتله وانا متحمسه وبسأله:
_ ايه رأيك؟
= وحش، روحي غيريه
_ نعم!
= بقولك وحش!
_ بس انا حباه وشكله حلو
= لا
_ يعني ايه يا يوسف؟
= يعني تروحي تغيريه
_ ولو مغيرتوش؟
= يبقى مفيش نزول
_ خلاص يبقى مفيش نزول
دخلت وانا مصدومه من كلامه ده بجد، ازاي قدر يقولي كده ويجرح مشاعري بالمنظر الزفت ده؟!..
قعدت أعيط بحُرقه، طول عمري كان نفسي يكون حنيّـن أكتر من كده ويدلعني عشان انسى القرف اللي بشوفه في الشغل والجامعه لكن ازاي؟، كل مره بيكسر مقاديفي كده..
سمعت صوت الباب بتاع الشقه بيتقفل عرفت ساعتها انه نزل لان مفيش غيري انا وهو... من ساعة ما ماما وبابا سافروا لشغلهم بره مصر واحنا قعدنا هنا ومرضيناش نروح معاهم، قعدت أعيط أكتر لانه هان عليه يسيبني كده مكسور بخاطري وقلبي واجعني منه ومن الدنيا..
ومن كُتر العياط نمت، صحيت لقيته قاعد قدامي وعنيه حزينة أوي، فقمت بقلق:
_ مالك؟، حصل معاك حاجه؟
= أنا آسف
_......
= أنا مكنش قصدي أقول كده، أنا بس من كُتر ما شكلك كان حلو مش عايز حد يشوفك كده، عايز أخبيكِ من عيون الناس المريضه اللي مش بترحم، بس كالعاده بغبائي وصلتلك الموضوع بشكل مقرف
_ خلاص حصل خير
= لا محصلش خير، مكنش ينفع أقولك كده، أنا بجد آسف
_ وايه المشكله لما انزل بحاجه شكلي بيها حلو؟، انا مش همنع الناس تبصلي، ولو عالمرضى فبالتجاهل كل حاجه بتتحل، مينفعش عشان خايفه من رد فعل معملش الفعل، طالما مش بعمل حاجه غلط او حرام يبقى خلاص
= عندك حق
_ طب ايه!
= ايه؟
_ ايه انت؟!. هو انت مش هتخرجني؟
= ها!..
_ ااااه، قول كده بقاااا، شكلك عايز تهرب من عزومة الكريب والعصير ومشوار المكتبه، لا ده بعينك ياحبيبي
ضحك على روح الشرشوحه اللي طلعت من جوايا دي... بس اعمل ايييه؟، بيطلعني عن شعوري وانا جوايا ست مؤدبة!..
= طب يلا بس عشان منتأخرش
_ ولا نتأخر، احنا ورانا حاجه؟
= احنا عندنا جامعه بس!
_ ولا كإني سمعت حاجه
= هو انتِ مش عندك امتحان بكره باين؟
حطيت ايدي على كتفه بالعافيه بسبب فرق الطول اللي بنا وقولت بثقه:
_ يوسف ياحبيبي انت ازاي في أولى جامعه ولسه مش فاهم؟
= مش فاهم ايه؟
_ ان الامتحاناا بتعدي بالبصمجه
= والمذاكره؟
_ لا دي حاجه مش ضروريه
= بجد والله!
_ أفكوووورس يا ولا
خرجنا بالفعل وروحنا مطعم أنا وهو بنحبه اوي وطلبنا الأوردر.. كان يوسف واقف بره بيتكلم في الفون وانا قاعده عالترابيزه بتفرج عالناس اللي رايحه وجايه دي...
وفي لحظه سرحت...
بقا كل الناس دي ربنا عالم بيهم!
دول كتير أوي،
أطفال ورجال ونساء وكبار سن وكل واحد له حلم مختلف،
اللي عايز يطلع عمره،
واللي بيدور على شغل،
واللي بتفكر في العريس اللي جالها،
واللي قاعد نفسه في عجله،
والعصافير والحيوانات والحشرات.... يا الله!
كل دول ربنا سامعهم وعالم بيهم، لا وكمان بيستجيب!
كل دول ربنا حاطط ليهم قدر يليق بقلوبهم وحاجات حلوه بعدين وابتلاءات؟
كل دول ربنا بيهدي فيهم ناس وبيبعت ناس لناس تانيه عشان يتوبوا؟..
وقطع تفكيري صوت حمحمه ببص لقيت شاب غريب معرفوش...
_ أيوه يا فندم؟
= هو حضرتك الأنسه حنين؟
_ ايوه انا، مين حضرتك؟
= انا يونس صاحب يوسف أخوكِ
_ أه أهلًا بيك، في حاجه ولا ايه؟
= لا أبدًا أنا بس استأذنت يوسف إني أسيب لولي معاكِ بس نص ساعه هروح مشوار ضروري وراجع، ده لو معندكيش مانع
ببص على ايده لقيته ماسك بيها طفله حوالي 6 سنين، شكلها اللهم بارك خطف قلبي، فرديت وانا ببصلها بابتسامه:
_ لا مفيش مشكله، تقدر تسيبها
= بجد شكرًا ليكِ
_ لا شكر على واجب
لقيته نزل لمستوى لولي:
= طبعًا لولي بنوته شطوره مش هتتعب طنط معاها صح؟
_ يونس، انت هتسيبني زي بابا؟
حضنها وشكله باين عليه الحزن:
= لا يا قلب يونس، انا بس رايح مشوار صغير وبعدين مش انتِ عارفه يوسف صاحبي وبتحبيه؟
_ ايوه
= دي بقا أخته، وان شاء الله هتحبيها هي كمان
_ مش هتتأخر صح؟
= لا يا عيوني فوريره وراجعلك
_ ماشي..
وسابها معايا ومشي، هي كانت ساكته وسرحانه كده قولت اقطع الصمت..
= انتِ اسمك الحقيقي لولي؟
_ لا انا اسمي ليلى، لولي ده الاسم اللي يونس طلعه عليا
= بس انتِ شكلك عسول أوي ياحبيبي
_ وانتِ كمان
= يا بكاشه، ده على أساس انك شايفه مني حاجه؟
_ لا بس حاسه يعني
= هو انتِ زعلانه؟
_ لا
= طب متضايقه؟
_ لا
= أمال ليه عامله بوز أطول من برج خليفه كده؟
_ والله!
= ايه رفعت الحاجب دي يا جدع؟
_ أقل حاجه عندي
=هسألك سؤال وتردي بصراحه؟
_ اسألي
= انتِ عندك كام سنه؟
_ 6 سنين و3 شهور و14 يوم
= كمان عداهم باليوم!
_ طبعًا مش عمري
= اعترفي انك مش واحده مطلقه في جسم طفله
_ الخطه انكشفت
= وه!
_ بتفرج على كرتون كتير وبحب اتكلم زيهم
= انتِ كده بتتكلمي زي ام سماح بتاعت الجرجير ياحبيبي
_ مش فارقه كتير
= وبتحبي تتفرجي على كرتون ايه؟
_ ليلو وستيتش
= وانا كمان
_ وبحب برضو سندريلا والجميله والوحش
= طب وريبانزل!
_ مش أوي
= ليه ده شعرها الدهبي جميل اوي
_ شعري احلى منها على فكره
ضحكت عليها بجد عسوله وقولت بتأكيد:
= طبعًا طبعًا، بقولك ايه
_ايه؟
= تيجي نطلب وافل؟
_ يلا بينا
= عايزاه بصوص ايه؟
_ الفراوله وانتِ
= البستاشيو..
_ لا انتِ عندك حساسيه
= أيوه بس... دقيقه!. انتِ عرفتِ منين اني عندي حساسية؟..
_... يتبع
_وانتِ عرفتِ منين اني عندي حساسية؟
= ها!.. مهو.. مهو أصل يوسف كان قايللي متخليهاش وانا مش موجود تطلبه عشان عندها حساسيه
_ بقا كده!
= امممم
_ منك لله يا يوسف
= ليه بس كده؟
_ بيمنعني عن الحاجات اللي بحبها
= عشان هتإذيكِ
_ يعني انتِ عارفه إن المنع من حاجه بتحبها بيبقى الأحسن لينا؟
= اه أكيد
_ تخيلي بقا نبقى نفسنا في حاجه وقاعدين ندعي بيها ونقول يارب حققهالي، دي أمنية حياتي، وفي الآخر الحاجه دي متبقاش لينا وتروح لغيرنا
= بتوجع دي
_ أوي أوي، بس عارفه ايه اللي بيصبرني انا شخصيًا؟
= ايه؟
_ اني بفضل هادية، ساكته مع إن ممكن يكون الهدوء ده غلط بشكل مرعب، بس قلبي بيبقى بيعيط عشان كان نفسه في حاجه ومخدهاش، وبعدين بقا ربنا يدينا حاجه أحلى كإنه بيقولنا انتِ تستاهلي الأحلى من اللي انتِ طالباه، طلبك ده كان قليل عليكِ او كان هيإذيكِ في مره
= يعني عشان كده دعوتنا بتتأخر؟
_ أيوه بالظبط ياحبيبي..
=أيوه بس يونس قالي إن بالإلحاح ممكن تتحقق بسرعه
_ بس هل انتِ عارفه هي خير ولا لا؟
= لا
_ يبقى نقول اللهم إني اسألك من الخير كله عاجله وآجله ما علمتُ منه وما لم أعلم، واصرف عني من الشر كله عاجله وآجله ما علمتُ منه وما لم أعلم
= بس انا مش هعرف احفظه بسرعه
_ ولا يهمك ياحبيبي هبقى اكتبهولك
= اشطااا..
وساعتها جه يوسف وقعد لولي على حجره وقالها بلطف غريب:
_ لولي حبيبتي عامله ايه؟
= فل يا چو وانت؟
فاتدخلت انا بسؤالي:
_ يابنتي قولي بصراحه، متأكده انك 6 سنين؟
= ايوه
_ أمال ايه أفعال الستات الكبار دي؟
= عادي ياحنين، لولي بتلقط أي كلمه بتتقال قدامها
_ رادار يعني
ضحك على تشبيهي:
= حاجه زي كده
والأوردر جه وكلنا ومشينا عشان نروح المكتبه...
_ ها يا حنين، اختاري
= محتاره يا يوسف
_ حادي بادي يلا
= بديهي يعني
_ ربنا يصبرني
= ويرزقك ببنت سكره كده زيي
_ لااااا، كله الا دي
= والله!
لولي لما لقيتني رفعت جواجبي قالت ليوسف:
_ البس يا معلم
= بقا انت مش عايز تتجوز واحده زيي؟
_ اه... لا... قصدي انتِ مينفعش يبقى في نسخ منك
= ده ليه بقا ان شاء الله
_ عشان الدنيا هتخرب
= نعم!!
_ قصدي عشان الهديه مش بتتكرر
= بتحاول تصلح ما أفسدته وأحب اطمنك
_ الحمدلله
= مفيش حاجه اتصلحت وهتجبلي الروايتين
_ كده هنشحت يا حنين
= عشان تبقى تمسك لسانك يا عيون حنين
_حسبي الله ونعم الوكيل يا شيخه
= في مين يا يوسف!!
_ في كل ظالم يا حنين، في كل ظاااالم
= اه قولتلي...
وانا في المكتبه قاعده ماسكه الروايه وجنبي لولي ماسكه قصه للأطفال وكنا منسجمين جدًا لحد ما يوسف فونه رن، وبيقول جاله مشوار مهم.. فاضطر يروحنا انا ولولي بيتنا لحد ما هو ويونس اخوها ييجي، وبعد ما وصلنا بشويه..
_ لولي
= نعم
_ انا زهقانه
= وانا كمان
_طب ايه؟
= ايه؟
_ ايييه؟
= في اييييه يا طنط؟
_ بقولك ايه متقوليش طنط دي تاني
= امال اقولك حنين عادي كده؟
_ لا تقوليلي حنونة
= أدلعك؟
_ مش انا بقولك لولي، يبقى تقوليلي حنونة
= اتفقنا
_ تيجي ندخل نعمل كيكة سوا؟
= بالشيكولاته؟
_ عنيا
= يلا بيناا
_ هدخل أغير وارجعلك
_________________
"لولي"
اول ما دخلت، فتحت الفون بتاعي وقولت بهمس عشان متسمعيش..
_ تم الجلوس مع الهدف والذهاب لعمل كيكة شيكولاته
= الله!.. طب ماتسيبولنا
_ششش، دي بتاعتي انا والهدف بس
= نعم نعم!.. طب واحنا!
_ هاتولكم هوهوز ولا حاجه
= مقاطعه!.. مستحيل
_ أيوه صح
= يعني مش هتسيبولنا من الكيكه؟
_ بطلوا قَر بقا يباي
= اعملي شغلك يا حضرة الظابط لولي
_ تمام يا فندم، بس بعد ما الكيكة تتاكل
= برضو!..
_ يرضيك أسيبها؟
= يرضيكِ مخدش منها؟
_ اه يرضيني عادي
= ماشي ماشي، يبقى شوفي مين اللي هيوديكِ يوم الجمعه تلعبي مع البغبغان
_ واروح للبغبغان ليه وانا معايا نسخه منه
سمعت يوسف وهو بيضحك وبيقول:
_ هوب هوب، أين جبهتك انا لا اراها
= بقا كده يا لولي!
_ خلاص يا يويو متزعلش
= خلاص يلا، شوفي الهدف بدل ما الخطه تبوظ
________________
"حنين"
دخلت غيرت هدومي، كنت سامعه همس كده كإنها بتتكلم في فون، بس لما طلعت مكانش فيه فون وكانت زي ما هي..
كنت لابسه بيجابة سودة عليها فراشات ورافعه شعري بكحكه عشوائية كده وطلعتلها بره..
اول ما شافتني فتحت بقها..
_ هو انتِ اللي كنتِ لابسه النقاب من شويه ولا واحده صاحبتها ولا ايه؟
ضحكت على استغرابها الطفولي ده:
= لا انا حنين اللي كنت لابساه من شويه
_ انتِ شكلك غريب اوي
= يعني حلو؟
_ تحفه
= دي عيونك ياحبيبي.. يلا بينا
_ يلا بينا..
بدأنا نعمل الكيكة وكنت مبسوطه اوي وانا بعملها مع لولي، اكتشفت انها شبهي وبتعمل زيي في حاجات كتير ودي حاجه ريّحتني بزيادة..
الكيكه دخلت الفرن وخرجنا انا وهي نقعد شويه في الصاله..
حسيت انها عايزه تقول حاجه بس مش عارفه تبدأ منين..
_ هو انتِ عايزه تقولي حاجه؟
= هو باين عليا اوي كده؟
قولت بضحك:
_ يعني
= احم احم....
_ قولي عادي اللي انتِ عايزاه
= هو انتِ دايمًا كده؟
_ كده اللي هو ازاي؟
= لطيفه كده يعني!
_ وضحيلي قصدك ياحبيبي
= يعني مش بتضحكي كده وتهزري عشان دي أول مقابله بنا بس!
_ ليه بتقولي كده؟
= أصل انا خايفه اتصاحب عليكِ أكتر فتتغيري
_ هو حد عمل كده معاكِ قبل كده؟
= أيوه
_ مين؟
= يونس
_ أخوكِ!
= أيوه، كان بيقعد معايا كتير نلعب سوا ونهزر بس دلوقتي بيمشي كتير ويسيبني مع أم أحمد وابنها
_ مين ام احمد وابنها دول؟
= دول جيراننا، بس انا مش بحب الولا احمد ده
_ ليه بس؟
= بيقعد يغلس عليا كده وبيحب يعصبني
_ انا صحابي بيعملوا معايا كده
= بيغلسوا عليكِ؟
_ لا بيحبوا يعصبوني
فضحكنا وبعدين كملت:
= كنت بحب اقعد مع يونس أوي بس هو بقا بيسبني كتير
_ مهو ياحبيبي أكيد وراه شغل صح؟
= صح
_ طب ما هو بيشتغل عشان يجيب للولي كل اللي هي عايزاه
= بس انا عايزه اقعد مع حد يقعد يلعب ويهزر دايمًا ومايبعدش
_ يبقى تعاليلي في يوم الأجازه نلعب ونهزر ونخرج كمان
= بجد!
_ طبعًا، بس متقوليش ليوسف عشان نبقى نخرج براحتنا من غير ما يقعد يسربعنا
= صح
وفجأه الباب خبط.. لبست الإسدال وفوقيه النقاب بسرعه ولما فتحت لقيته..
_ انت عايز ايه؟
= عايزك
_ قولتلك لا
= اديني فرصه
_ لو سمحت امشي
= ولو ممشيتش؟
_ هطلبلك البوليس
= عقبال ما ييجي تكوني انتهيتي
_ اطلع بره..
= لا مش هطلع..
قرب جامد بشكل يخوف.. ولولي كانت مستخبيه ورا الستاره، حاولت اشغله عنها عشان مايإذيهاش..
كان واقف قدامي ونظراته تخوف وانا مغمضه وبدعي في سري..
وفجأه سمعت صوت حاجه بتقع عالأرض ببص لقيت..
#يتبع...
وفجأه سمعت صوت حاجه بتقع عالأرض ببص لقيت كتلة القرف اللي اسمه مازن ده واقع عالأرض..
ببص وراه لقيت طنط أو سماح.. وأم مازن!
كان في ايديها شومه وانا لسه في حالة صدمة.. لقيت لولي بتجري عليا وهي بتعيط:
_ حنين.. انا خايفه
= متخفيش ياحبيبي انا معاكِ اهو
فـ اتدخلت طنط ام مازن وهي بتقولي بنبرة اعتذار:
_ حقك عليا يا بنتي، انا اللي معرفتش أربي
=انتِ ملكيش ذنب
_ ذنبي إني ربيته على إنه لما يعوز حاجه ياخدها حتى لو مش بتاعته
= خليه يبعد عني لو سمحتِ، انا مش حِمل كل ده
_ حقك عليا والله، احنا هنعزل من هنا خالص ووعد مني مش هيقربلك
فهزيت راسي بهدوء وفي نفس اللحظه كان يوسف جه هو ويونس..
اول ما يوسف لمح مازن عالأرض جري عليا وبصلي بقلق:
_ حنين.. انتِ كويسه؟
= اه كويسه
_ الزفت ده كان بيعمل ايه هنا؟
فلولي ردت عليه وهي لسه بتعيط:
=الوِحش ده كان شكله يخوف أوي يا يوسف، وكان بيقولها انا عايزك
يوسف بان عليه الغضب ودخل ضرب في مازن من غير ما يسمع من حد..
_ خلاص يا يوسف بالله عليك
= خلاص ايه يا حنين!. ازاي يتجرأ وييجي لحد هنا لا وكمان يقولك انا عايزك وعايز يتهجم عليكِ؟
_ بالله عليك خلاص، هو خلاص كده كده هيمشي من الشارع خالص
= يكون أحسن عشان لو لمحت ضله بس مضمنش رد فعلي ساعتها
مامت مازن مكانتش قادرة تدافع عن ابنها، شوفت في عنيها الحسره على عمرها اللي ضاع في تربيته.. فيوسف قوّمه بالعافيه وهو بيقول لمامته:
_ ابنك عندك اهو.. وبقولك انا مش هحترم حد لو لمحته تاني تمام!
فاتكلمت انا بحدة:
= يوسف!.. هي ملهاش ذنب
_ ذنبها الفشل في تربية تخلي واحد زي ده يتهجم على بنات الناس في بيوتهم
= قولتلك خلاص
_ لا يابنتي هو عنده حق، انا اللي فشلت في تربية ابني.. كنت فاكره اني لما اديله كل اللي هو عاوزه من صغره انه يطلع عينه مليانه وشبعان، ونسيت أعلمه إنه يبقى راجل، يقف في صف الحق ولو على روحه، بس هعمل ايه بقا!
= معلش يا طنط، ربنا يهديه هو وكل اللي زيه
فـ يونس بصلي باستغراب بعد ما مشيوا:
_ بعد كل ده وبتدعيله؟
= مفيش في ايدي حل غير كده
_ لا في، انك تحبسيه
فجه صوت لولي:
= ايوه عشان هو شرير ولازم يتعاقب
فقعدتها جنبي وانا ىملس على شعرها:
_ لولي ياحبيبي، لو في ايدك انك تسامحي متتردديش، قلوب الناس مليانه وجع واوقات بتطلعه في تصرفات غصب عنهم فلازم نسامح
فجه صوت يونس:
= بس مش على حساب كرامتك
_ ومال الكرامه بالتسامح؟
= لا طبعًا في علاقه كبيره بينهم، لو انا فضلت اسامح نفس الشخص وارجع اتعامل معاها تاني عادي اكتر من مره على أخطاء انا نبهته عليها فـ دي قلة كرامة
_ ما يمكن اكون باقيه عالعشرة
= في الحالات دي مفيش حاجه اسمها عشرة
_ ازاي يعني؟
= لان الأغلب بقا بيفكر في نفسه وفي راحته هو وبس
_عندك حق
= يبقى لازم نفكر في ردود أفعالنا مهما كانت
_.....
________________
"يونس"
كانت ساكته وهادية، بتحاول تثبت انها تخطت اللي حصل بس هي في الحقيقه مرعوبة، كان لازم نمشي ونسيبها يمكن مش حابه تحكي في وجودنا
= يلا بقا يا لولي نمشي
_ لا خليني قاعده مع حنونة شويه
= حنونة!
_ أيوه هي قالتلي أدلعها
همست في سري بس الصوت مسموع للولي:
= يا بختك
فهمست هي كمان بصوت مسموع ليا:
_ لم نفسك ياحبيبي، بدل ما اقولها كل حاجه
= احنا مفيناش من كده
_ يبقى تتقل كده
= حاضر
مش عارف انا ليه سمعت كلامها، حسيتها أمي اوي مع انها شبر ونص أساسًا..
= طب يلا نمشي بقا
_ بس انا عايزه اقعد معاها
= بس هي تعبانه ومحتاجه ترتاح، هبقى أجيبك في يوم تاني
شوفت ملامحها لما قولت آخر جمله، كانت زعلانه!
معقوله زعلانه!... دي مكانتش طايقه تيجي معايا الكافيه..
كنت بفكر في زعلها من يوم واحد انها هتسيبها، أمال انا اعمل ايه اللي صابر بقالي سنه!
قطع تفكيري صوت حنونة.. قصدي حنين وهي بتقول بحنيه ولطف:
= ممكن تخليها تبات معايا!
_ بس يعني...
= وافق يا يونس بقا
_ مينفعش يا لولي، أكيد تعبانه ومحتاجه ترتاح
= هرتاح أكتر وهي معايا، متقلقش عليها
كنت ببصلهم هم الاتنين بحيرة، فـ رد يوسف:
_ يلا بقا يا يونس وافق، يمكن يتهدوا شويه وهم مع بعض
فـ ردت حنين عليه:
_ يا تك هدّه يا بعيد
= انا خلاص كده اتطمن عليكِ
_ اشمعنا!
= لسانك رجع لأصله، أطول منك مرتين
_ طب عدي ليلتك يا يوسف بدل ما اعمل رد فعل مايعجبكش
= عايز اشوف هتعملي ايه يعني؟
_ بس كده!.. دقيقه واحده
دخلت وطلعت ولقيت في ايديها شاحن وراديو صغير وبتديهومله
= خد، ويلا اطلع بره مع صاحبك
_ مش طالع
= بقولك اطلع
_ وانا بقولك مش طالع
= حلو اوي.. هاتي فوني كده يا لولي
وفعلًا لولي راحت تجيب الفون..
فيوسف سأل بترقب:
_ انتِ هتعملي ايه؟
= ولا حاجه، كنت هلغي المعاد اللي حددته مع والد مريم
_ على فكره مابتهددش... ايده ده ثانيه!.. مريم مين اللي حددتي مع ابوها معاد؟
= هو في مريم غيرها ولا ايه؟
_ احنا هنهزر ولا ايه؟
= ولا بهزر ولا حاجه، كنت هقولك بس ياخساره،هلغي كل حاجه عشان سيادتك مش راضي تخرج واقوله معلش يا عمي كل شيء قسمة ونصيب
= نعم يختي!!.. لا طبعًا
_ وايه اللي يمنعني؟
= انا اخوكِ حبيبك
_ مش فارقه
= هجيبلك شيكولاته وروايات
_ قديمة
= هوديكِ المكتبه كل يوم
_ هبقى اروح مع مريم ياحبيبي
= انتِ عايزه ايه دلوقتي يعني؟
لولي بقا في اللحظة دي ردت هي وخرجت روح الشرشوحه اللي جوها:
= مهي قالتلك تخرج بره يا بتاع مريم
_بتاع مريم!
= اممم بتاع مريم
_ بقا كده يا لولي!
= قولتش انا حاجه غلط؟
_ لا بصراحه
= يعني بتعترف
_ حصل
= يبقى تطلع بره
_ مش طالع
= الغي يا حنونة
_ أمر جاري تنفيذه يا عيونها
فلقيت يوسف ماسك ايدي وبيشدني...
_ في ايه يابني؟
= انت مش سامعها طرداني معاك!
_ ما انت كنت رافض
= كله الا مريم يا عم انا ماصدقت
_ اكتر حاجه بحبها فيك يا چو الثبات عالمبدأ
= انت خدت بالك!
_ ده عم علاء بتاع الكبدة واخد باله
= دي السمعه سابقه بقا
_ طبعًا
لولي بقا راحت مسقفه بإيديها كده ولا واحده معدية التلاتين مش طفلة..
= يلا يا حبيبي منك ليه بيتك بيتك، عايزين ننام
فلقيت يوسف بيقولي:
_ انت بتطرد خد بالك!
= ده على أساس انت اللي ماسكين فيك يعني!
_ طب يلا عشان حاسس اني بتهزأ
= متحسش ياحبيبي
_ الله يطمنك
= انت تدخل على مرحلة التأكيد على طول يا غالي
_ هي دي الصحاب
= عندك شك ولا ايه!
_ افكووورس نوووت
__________________
"حنين"
_ لولي ممكن طلب؟
= نعم
= ممكن حضن!
_ انتِ بجد عايزه تحضنيني!
= أيوه مستغربه ليه؟
_ اصل انا اللي دايمًا بطلبه وكده
= انا محتاجه حضنك الصغنون عشان انا تعبانه
_ مالك!.. انتِ كويسه؟. نروح لدكتور طيب!.. ايدك اللي وجعاكِ ولا رجلك ولا ايه!
قعدت أملس على شعرها بهدوء وانا بطمنها:
= اهدي ياحبيبي، انا جسمي مش واجعني
_ أمال ايه اللي واجعك؟
شاورت بإيدي على قلبي:
= ده اللي واجعني
_ وانا كمان ده واجعني
= ليه يا لولي؟
_ قولي انتِ الأول
= انا قلبي واجعني عشان خايفه على مرهقه
_ خايفه من ايه، مش الشرير مشي!
= مش عشان الشرير
_ امال عشان ايه؟
= عشان الدنيا دي وحشه أوي يا لولي، بحاول ابقى فيها جامده ومحدش قادر يخوفني وانا من جوايا مرعوبه..
لقيتها جت حضنتني وجامد أوي فسألتها:
= انتِ بتدوسي عالحضن كده ليه ياحبيبي!
_ هي حاجه مضايقاكِ؟
= لا بالعكس أنا مبسوطه بيها أوي
_ أصل يونس كان دايمًا يقولي، لو اللي قدامك تعبانه ومش عارفه تهوّني عليها احضنيها جامد عشان الحنيّه بتوصل من القلب للقلب
= عنده حق، أخوكِ ده بيفهم
_ طبعًا مش أخويا!
= أيوه يا جاااامد، قوليلي بقا
_ اممم
= انتِ قلبك واجعك ليه؟
_ عشان برضو خايفه
= من ايه يا عمري؟
_ يونس عايز يتجوز
= وايه اللي يخوف في كده؟
_ هيحبها ويسبني لوحدي
= وانتِ ايه اللي عرفك انه هيسيبك؟
_ مش عارفه، بس حتى لو فضلت معاه مش هيحبني زي دلوقتي
= انتِ فاهمه غلط ياحبيبي، أخوكِ حقه يتجوز عشان يعمل عيله صغيره كده حلوه،ومش هيسيبك عشان انتِ أخته وحته منه
_ طب ما ممكن اللي يتجوزها دي متبقاش عايزاني
= ان شاءالله هتحبك اوي زي ما انا حبيتك كده
_ انتِ حبتيني أوي؟
= أوي أوي، افرحي كده لأخوكِ، خليه يتجوز ويجيب اطفال يقولولك يا عمتو
_ ان شاء الله ياحبيبي
= يلا ننام بقا
_ يلا...
____________________
وعدا اليوم، جيت بليل قعدت في البلكونه ببص للسما كعادتي وانا رامية كل همومي على جنب ومشغله النقشبندي بصوت عالي من هدوء الليل وصوت الشجر ونسمة الهوا، لا لا حاجه تانيه بجد..
لقيت يوسف جه قعد جنبي:
_ حنونة
= عيونها
_ جايلك عريس
= وبعدين
_ هتقابليه بكره
= اشطا
_ مش متحمسه يعني!
= مش هتحمس غير لما ييجي اللي يجاوب على كل الأسئلة بتاعتي
_ ان شاء الله هتلاقيه
________________
وجه وقت الرؤية الشرعية... ويوسف سابنا عشان نتكلم لوحدنا، كنت طول الوقت باصه في الأرض..
_ احم احم....
= ايوه
= على فكره انتِ المفروض تبصيلي
لقيت ان الصوت ده مش غريب عليا!.. وه!.. ده يونس
_ يونس!
= ايوه هو بشحمه ولحمه
_ انت ايه اللي جابك!
= ايه قلة الذوق دي؟
_ احم... مقصدش بس..
= بهزر معاكِ، مش واكل معاكِ إن انا العريس؟
_ ليه؟
= ليه ايه؟
_ ليه انا!
= القلوب مش بنعرف نتحكم فيها، هي بتطلب واحنا بننفذ
_ بس يعني... ازاي؟
ودخلت لولي الأوضه وهي بتجري عليا:
_ حنونة
=هو انتِ كنتِ عارفه ان يونس جاي انهارده يتقدملي؟
_ كلنا عارفين ما عدا انتِ أصلًا
= لا والله!
_ هفهمك.. الحكاية وما فيها..
= احم... ايييه يا لولي ياحبيبتي مش عايزه تروحي تقعدي مع يوسف شويه؟
_ لا انا عايزه احكيلها
= مفيش حاجه تتحكي ياحبيبتي، روحي بس الله يباركلك
ضيقت عيوني بشك وقولتله باعتراض:
_ لا انا عايزاها تحكي
= الحكاية وما فيها إن الولا أخويا ده واقع بقاله سنه، أصل بصي.. هو مكنش معاه فلوس فقعد يحوّش عشانك، وطول الوقت بيراقبك من بعيد لبعيد وبيتطمن عليكِ من الولا چو اللي متلقح جوه ده، قعدتنا في الكافيه كان قصد عشان نتعرف سوا واني احبك عشان هو يعرف ييجي..
وانا بصتله برفعة حاجب اللي هو "لا والله!"، فيونس بصلي بتوتر وبعدين بص للولي بغضب
_ امشي يا لولي، منك لله يا بعيده فضحتيني
= الاه، مقولش الحقيقه يا يويو!
_ اتنيلي انتِ ويويو في جنب بقا
= ليه بس كده يا غالي!
_ كشفتي الخطه كده من قبل أول قلم حتى
= حنونة مننا وعلينا برضو
_ اتنيلي بقا
وطلعت لولي بعد ما عكت الدنيا، وانا بضحك في سري على منظره، فلما لاحظ ده:
= اضحكِ يختي اضحكِ
_ حقي ولا مش حقي!
= حقك يا ستي، ها قولتي ايه؟
_ في اييه؟
= حنين هو انتِ عندك خال اهبل!
_ ليه الغلط ده طااه!
= طااه!.. من الواضح اني اتدبست
_ لا وعلى ايه، وانا ميرضينيش.. اطلع بره
= بره فين يا حجه، انا فيها لَخفيها
_ اللااااا، في روح عربجي بتطلع اهي
= وسرسجي لو حابه
_ قفشتك، انا محبش اتجوز سرسجي
= بس في الأغلب ببقى شيخ مؤدب متربي سبع مرات
_ وايه كمان!
= قمر ومتسابش
_ اممم
= حليوه ودمي خفيف
_امممم
= ماليش ماضي وقلبي نضيف
_ امممم
= بالله عليكِ وافقي، مش هتندمي..
_ ولو ندمت!
= عاقبيني
_ ولو اتوجعت!
= عاتبيني
_ ولو اتخذلت!
= ولعي فيا
_______________
_ وبس كده يا ستي!
= ووافقتي كده؟
_ ايوه
= بالسرعه دي؟
_ مهو اللي متعرفيهوش بقا ان انا كمان كنت بحبه بس بيني وبين نفسي
= وه وه!
_ يونس كنت دايمًا بشوفه مع يوسف اخويا، محترم ودمه خفيف، يوسف بيقعد يحكيلي عنه لدرجة اني حبيته، فـ كنت بدعي بيه انه لو خير ليا ييسره ولو شر يبعده،واديني اهو بقيت معاه وجيتِ انتِ، وبصراحه انا كنت طايره من الفرحه طول ما انا قاعده مع لولي..
فجت لولي بحماستها المعتادة:
= سمعت اسمييي
_ اه ياحبيبي، كنت بحكيلها حكايتنا
= بس ايه رأيك يا بت يا سجده في دور عمتك
_ تحفه يا عمتو
= عيون عمتو كده كده
_ طب بقولك ايه!، تعالي ننزل نجيب كاندي
= يلا بسرعه
قولتلهم وهم نازليه بصوت عالي:
= هاتولي معاكم
فجه يونس بابتسامته المعتادة:
_ ملوش لزوم يجيبولك
= ليه كده!
_ عشان انا جايب ليا وليكِ
ووراني شنطة مليانه كاندي ليا وليه فعلًا.. وعدت الليله السعيده اللي مش عارفه هي رقم كام من ساعة ماعرفته..
وبس كده... توته توته فرغت الحدوته..
تعليقات
إرسال تعليق