رواية على حافة الثأر الفصل السادس عشر 16 بقلم زينب ماجد حصريه
رواية على حافة الثأر الفصل السادس عشر 16 بقلم زينب ماجد حصريه
#على_حافة_الثأر
#بقلم_زينب_ماجد )
#الحلقة_16
اندارلي وهو يكلي : ليش الكاميرات مطفيات !؟
- ما اعرف منو مطفيهم ! ممطيفيتهم اني اجيت تعبانة ودا انام
- الحارس وينه !؟
- ما اعرف
ضل يراقب سجل الكاميرات يوميا بالليل هيج وقت تطفى الكاميرات
حجه : ليش دا تطفيهم هيج وقت كل يوم !؟
- ممو اني ممطفيتهم
- منو لعد ديطفيهم ؟
- دا اكولك ما اعرف بابا .
صرخ باعلى صوته : الحارس وييييييييين ؟
- دا اكولك ما اعرف ما اعرف ...
من الخوف بجيت .. ورحت للصالة
جسمي يرجف من القلق والرهبة وهو يصرخ يدور عباس ..
كمت احط ايدي على اذاني وابجي
اجا يمي : ليش تبجين
- عوفني ارجوووك
عفته وركضت وصعدت فوك
تبعني .. خفت ادخل غرفتي وعباس بيها كعدت ع الدرج وهو يكلي : هاي شبيج بنتي غير افهم .
ديحجي .. صاح الحارس مالته من جوا
: كاكا هذا عباس لكيتو
نزل اني نزلت وراه بسرعة
وقطرة دم مبجسمي كلت لزموه .. طلع ابويه لبرا اني وكفت بالباب
صعدله عباس كاله : امريني كاكا كالولي رايدني
- وين جنت
- رحت اشتري جكاير .. خلصن جكايري
- وتترك مكان حراستك وتطلع تشتري
- اعتذر منك كاكا بس اني قفلت الباب وراي والست نايمة وقافلة كلت ما اتأخر
- شمدريك قافلة البيبان
باوعلي : ليش ما قافلتهن
هي بالعادة تقفل ما ادري استاذ اعتذر
-كاميرات المراقبة ليش مطفية !
- مكان حراستك متعرف اذا جانت الكاميرااااااات مطفية لو لاااااا
- العفو استاذ الكاميرات مو اختصاصي
- اكتب بيه نقل فوراً من هالمكان ... فوراً
عقد حاجبه ومشى
وابويه حط الحارس مالته يحرس البيت وصرف عباس ..
اني دخلت جوا فورا وصعدت فوك .. بس اتنفست الراحة من عرفت عباس مدبرها وكدر يطلع لبرا ويجيهم من برا ميلكوه باللبيت
..كمت الملم منفظته بسرعة احطها بالجرارة
وادور اذا اكو شي اله ..
دخل ابويه بلا ميدك الباب فزيت وانداريتلا ..
ضل يباوع ع الغرفة .. يتأكد بنواحيها .. توجهت للـ فراش نمت وكتله : اذا كملت بابا اقفل الباب
- شديصير من وراي فيان
مجاوبته
حجه: تنامين هسه وباجر غصباً ما عليج نحجي ..
طبك الباب بقوة ..
وخرت الغطا واني احر نفس ..
كمت نزلت وجليه بسرعة .. وركضت بخفة للباب ضربت المفاتح وقفلت الباب ..
رجعت اخذت التليفون بسرعة
طلعت رقم عباس خابرت .. رن .. انطاني رفض ..
توترت
-لزمت تليفوني وامشي منا ومنا .. واباوع وانتظر منه اتصال ..
نص ساعة واني على هالحالة يلا رن ..
بسرعة رديت : الووو
- ها فيان
- شصار
- شصار يريد يفصلني
- بس كال نقل
- كال نقل .. بس رحمن كالي فصل لان ما منتبه للكاميرات
- والكاميرات منو ديطفيهم
- شبيج انت صدك تحجين يعني لو داخل البيت والكاميرات مشتعلة .. شيصير .. بس هاهية قررت باجر اني اروحله واكله ع البيني وبينج
- شتكوله اني مجرد اجا كلبي اجا يوكف دخيلك عباس اني دا اموت من الخوف
- والى متى هالخوف خلي نواجه ونعلن من شنو خايفين اثنينا كبار ومن حقنا نقرر
- بس مو هسه
- شنو المو هسه .. شمنتظرة بعد
- اقلها بس خل تخلص نتائج الانتخابات ..
- اكلج ما جاي تشوفين روحج كاعد اجرجرين واني الطايح بيها هسه شنو اني اطفر ع الحيطان بنص الليل اتفاقنا جان ننزل لبغداد ونعلن زواجنا وهاي راح يصيرلنا شهر على هالقوانة بس خل تكضي الانتخابات بس خل تكمل النتائج .. ما خلصواها بشهر هم نضل شهر
- ليش دا تصيح اني شنو بيدي
- كلشي بيدج ما تكدرين تحجين خليني احجي
- عباس الله يخليك لتصيح هشكل اني من لما اجا بابا لهسه اني جسمي يرجف كافي
بجيت ..
بدل ميهديني ويطمني
راح صايح بوجهي : دروووووحي
وقفل الخط !
انصدمت وجداً قهرني ..
مدا يقدر وضعي .. اني لو لاكية فرصة احجي ما ارفر بس الوقت كلش مو مناسب اكول لبابا على زواجي وهو ملتهي بالانتخابات وعلى وجه انتقل من الدائرة الهو بيها .
كعدت بمكاني ..
واني احس بشعور جداً سيء من كل النواحي
من نفسي وابويه وعباس والكل .. يمكن اني قصرت بحق الكل وبحق نفسي .. بس كلش دا اضعف كدام شعوري .
دخل عباس للبيت تقريبا الساعة ٤ الصبح ..
امه كاعدة متألمة من عمليتها لابسة ملف وكاعدة على كرسي الصلاة ولازمة سبحتها .. سمعت الباب انطبكت شالت راسها تباوع
شافت عباس فات كالتله : ها اعبيس يمه خير
- الله يساعدج يمه .
- يساعد بختك شني جيتك بهالوكت ؟
- ماكو شي .. خلصت واجبي وكلت ارجع
- واجبيش هذا يمه الما يخليك تلفي البيت تعرف صارلك شكثر ما بايت ابيتك يمه ؟ تجي جية الخطار .. شلونج يمه شمحتاجة الله وياج وتمشي .. شغليش هذا يمه
- يمه عليج العباس لا تلزمين هالقوانة بعلي تعبان وروحي طاكة
- جا غير اعرف منين طاكة
- شغل
- الشغل لو هاي الرگطة
- ياهي الركطة
- الاجتي تتشابك وياك بالباب بلا حيا ولا مستحى ولك يمه جوز من هالشغل وعوفه لا تفضحنا ييمه وتورطنا ..
- شوكت شفتيها شبكتني
- ذاك اليوم من اجت ليجاي بنصاص الليالي بس عفية ابني ما اطيتها مجال ونهرتها ولو تعوفها تولي وتكعد من الشغل ونفتك احنا بخير
- يمه هاي الركطة والكاعد اتطعنين بعرضها دفعت فلوس عمليتج كلها وتكاليفها وما سألت عن ربع
- اي خاطر تكوش عليك وتحطك حدر ايدك
- واني احتاج وحدة تكوش عليه يمه .. هي لو كايلتلي هلا بدون فلوس اجيها بس البنية الها مواقف زينة ليش تحجين عليها
- هاه اشوفنك ادافع عنها اعبيس شعدك وياها
- يمه اذا احجيلج هسه تعرسين فوك راسي
- لا شو احجي
- ماكو شي ما بيه حيل حجي وهوسة
- اني امك يمه لا تاخذ كلبي احجي شعدك وياها
- يمه اني عقدت عليها واتزوجتها
لطمت وجها : صخام الصخم وجهيييي يمه
- شبيج يمه لخاطر الله
فزت علياء اجتي للغرفة : خير شكو ؟
: امشي ولي نامي احجي ولك شنهي علقد عليها
علياء : عقديش شكو يمه
عباس : مو كتلج يمه مالي حيل احجي اكوم انام احسلي
- دهربتها وتريد تشرد حرام اطيح بخوانيكك وعلي اكعد حاجيني ولك شني عقدت عليها ..
- حجيي واضح عقدت عليها وصارت مرتي
- دهر الدهرك كون شني ولك انت مالك رداد والحسن اخابر عمامك اخليهم يكضونك يدكونك
- شني يمه جاهل اني شبيج انت صدك تحجين
علياء : عوف امي حاجيني شلون يعني عقدت عليها متزوجين بالسر يعني
- رايد اعلن بس هي خايفة من ابوها
- وزمو ما خافت من اتزوجت وذبت روحها بيد زلمة خايفة تحجي
- يمه اكلج اتزوجتها تكولين ذبت روحها بيد زلمة يا زلمة غير مرتي
- مرك الضيم و ضاماك البين ولك رمتيش ولك اعبيس انت رايد تجلطني خايب البت لا منا ولا من ثوبنا مفرعة لا بيها حيا ولا مستحى شنهي التزوجتها
علياء: هسه غير امي تخلينا نفتهم بعد هدت شيسكتها
- بت الاوادم ما تسمعينه يكلج عاقد عليها
- وزلمة يعقد ويا التعجبه بس مالت يخليها مرة طول عمره لا ما تناسبة ولا من ثوبه .. اصلا هي ما تشوفنا بعينها فد وحدة شايفة روحها شوفة وحاسبة العالم كله صغاري مها تجيبها تعيشها بوسطنا نحملها لو تحملنا ..
- اكلكم هسه اني وين وانتم وين .. دوخروا
راد يكوم امه لزمته : لا والله ما اعوفنك شنو نيتك بهالعقد احجي شرايد
- رايد اتزوجها ورايد اجيبها بنصكم تتحملونها تتحملونها ما تتحملونها اخذها واعزل بيها بيت وحدها
- وتعوف امك على مرة !
عفت مرتك وجهالك وصحت امي ما اعرفها تالي تعوفني على خلك وحدة ما معترفة بيك بخلك الله
- هذا قراري يمه اني اطيتج علم خاف بعدين تكليلي ليش ضميت عني ما عدي شي اضمه وهاي درتي
- ابوها ما يدري
- ما يدري
- ولو درى ولك ؟
- تتجازى هي وياه
- وتنهب بت من اهلها عفية ابني انهجم راسك يبو راسك ولك انت شجاي تخوط شجاي تخربط نازع ثوب اخلك وناسي روحك واك ما تستحي ما تخجل
- يمه .. رحمة لربج دكافي هسه اني افتك مناك تلاكيني انت
- والاكيك شنو ولك اعبيس وين راح
طب للهول نزع قميصه واتمدد يم ابن اخته وامه وكفت فوك راسه : ولو درى ابوها وبدل ما يحاسب بته اندار عليك بيش تواجهه .. غير تگل لعمامك خوالك .. تبلغهم ولك اعبيس اكعد لا تسوي المصيبة وتنام .
- يمه شگل لعمامي ماخذ مرة بالسر تعالو دافعولي
- ولو حسبك ناهب بته وتجازى وياك مو وياها شتسوي ؟ تكدرله ولك هم كلهم سيارات وواحدهم سلاحة بخاصرته وانت بطرك اخيك ومسحاته .. ولك ليش ما تستر علينا يعبيس ؟
لف راسه وهو بتهرب من حجي امه
وعلياء تجر بيها وتكلها : هسه انت تحركين بدمج عليه وهو داير شبيج دكعدي وكعتي منو يفيدج
- جا ولو اذوا ولج وين انطي وجهي وربحي بيمن بهالركطة هاااااااي ... اكعد حاجيني ولك .. اكعد
جايني بهالليل وجهه اصفر
ويكلي يمه اتزوجت
خيعوني والله بهالزواجة الكشرة
- يا يمه هسه هو مرة وتحاسبينة شبيج رجال يدبر امره
- شيدبر ولج ولو صارله شي شعدي عشر ولد .. ولج هذا لا ما يحطلي علة بكلبي ما يرتاح .
جرتها علياء من عباس اللي ما جاوبها ولا رد عليها
بس فكر يبلغ عمامه بزواجه خاف يصير ما يصير
اقلها عمامه عنده علم بهالموضوع ..
لحد الظهر ..
كعد على صوت علياء وهي تصيح على جهالها
كام من مكانه فات للدوانية .. امه ماكو
حجه : جا امي وين
- راحت لبيت خالي كتلها تانيني اخلص الغدا واجي وياج ما تانت
- امي وعرفتلها سالفة اذا ما العشيرة كلها تدري بالحسين ما يرتاح كلبها
- عباس سالفتك ما تتسولف .. هسه لو بالسر وبيناتكم كم يوم وتكضي نكول نزوة بس مو رايدها مرة فدوة لعينك هي وين واحنا وين
كعد عاقد حواجبه ..
اتصل بفيان .. مجاوبت
كام من مكانه سبح وطلع للدائرة :
فيان دخلت الدائرة الساعة ١٠
وتليفونها يدك .. ردت : الو
-الو اصباح الخير
-هلا خالة صباح النور
-عرفتيني
-بلي ام عباس
-ابني الجبير محمد سميني ام محمد
-كولي خالة
-عباس حجالي عنج
-شحجى
-كال بت تورطت بيها ولزكة ما تفك خالة شرايدة من الولد ومورطته وياج خافي الله بتي احنا ناس فقرة مالنا غير الله لا النا حيل لطلايب اهلج ولا حراسهم .. وهو ساعة شيطان توهدن وياج خالة خوما اتطيحين بركبته
-مفهمت ، منو اللي يكول لزكة
-اخذي الحجي بتي الزلمة متورط وضال مثل بلاع الموس لا يكدر يهدج ولا يكدر يشرد بروحه فكي منه بتي انت وين وهلمهتلف هذا وين شعجبج بيه حظي لو قسمتي
-عفوا حجية هالحجي ممقبول وممسموحة
-التسمحين والما تسمحين اسمعي لو ما عفتي ابني بحاله والله والثلاثة اسم الله .. لا اروح لابوج واكله كلشي واخلي طشاركم ماله والي
قفلت الخط بوجهه .. بس اختنكت هلكد ما انقهرت من كلامها ..
دخلت متضايقة للمكتب طلبت بس كهوة تعدل راسي ورفض اي احد يدخلي .. وبقيت كاعدة بالمكتب احاول الهي روحي بس كلماتها ترن باذني
اني لزكة وورطة ويريد يخلص مني !
ادمع عيني على كد ما انقهر من المواقف اللي احط نفسي بيها
ماما كالت بس مسمعتها .. كالتلي الينزل نفسه لا يسأل ليش انهان .. اني اللي دا اهين نفسي بأيدي
دا افكر .. رن التليفون
سحبته باوعت .. عباس .. شمرته
وبقيت اشتغل .. ما مرت ساعة دخل مخلد يكولي : ست الحارس برا راد يدخل وكتله الست محابة تشوف احد .. بس يكولي كلها شي مهم
تنهدت وكتله : كوله حاليا مشغولة واصرفه .
- تأمرين ست .
طلع ثواني . عباس فات ومخلد وراه : ست ما كدرت امنعه .
- اوكي اخذ راحتك
طلع وسد الباب عليه تقربتله واني اهمس واصك على اسناني : هنا اني مو مرتك ولا هي مرجله تدفع الباب وتدخل .. اطلع فورا
- معناها تحترمين نفسج وما تصرفيني
- احترم انت بالاول واطلع
مد ايده لشعري ولزمني من راسي وجرني حيل ..
لزمت بأيده : ااااخ وخر انت شدا تسوييييي شعري
جر راسي اله بقوة وباسني بكصتي
دفعته : انت شدسوي صدك تحجي ترا اكو كاميرات
- والله ما عاد يمهني خل يعرفون طكت روحي
- عباس اطلع برا
- احترمي نفسج
- عباس لو اجا بابا لو شوان شكول وانت هنا امشييي
- طز اني. اخاف من شوان وهالموضوع لازم تنهي
- انهي وياك مو وياهم تجي يمي تبوس براسي تروح يم امك تكولها تورطت بيها لزكة مجاي اعرف اخلص منها
- اني كايل لامي هيج ؟
- من الصبح خابرتني دا تكولي هيج دا تكذب مثلاً ؟
- شتكولين
- وهي منين تعرف بزواجنا حتى تكذب
- كلت الاهلي البارحة وحجيتلهم
- ميهمني لا انت ولا اهلك .. روح
- اكولج انت عاجبج تنكتلين جلدج يحكج ؟
- لااا مد ايدك وشوف اذا تكدر
مد ايده ولزم شعري حيل وجرني : اااااخ راسي انت شبيك دوخررررر
نزل ايده من شعر ومدي ايده الثانية وحضني باثنين اديه ..
عباس عوفني
- اعوفج ماشي بس مشتاقلج
- المشتاق ميقفل التليفون بالليل ويعوفني بشعور سيء
- ترا صرت قرد بنصاص الايالي ع الحيطان من وراج وانت ما راضية شسوي ؟
- هذا ميعني تقفل الخط بوجهي وتتركني
نمت ارتاحيت وكعدت الظهر تكولي مشتاقلج واني الليل كله سهرانة من وراك ومقهورة وكملتها عليه امك .. اطلع خلي اروح ع الكاميرات.
رفع اديه اثنيهم وكام يمسح على شعري : وهسه زعلانة مني ؟
- وخر
- يعني اروح ؟
- اي روح
- ينطينج كلبج ؟
- عباس روووح حيجووون
- تمام تمام لا اتدفعين هاهية اروح يعني اروح
دنك لخدي باسني ..
راح اوكف برا انتظرج ..
- شتنتظر وهم مراقبين
دك تليفونه سحبه وهو يجاوب ويطلع ..
طلعت وراه .. وكفت عند مخلد .. روح ع الكاميرات امسح دخول عباس للمكتب
- تأمرين ست .
دخلت للغرفة واني اتنهد .. دخل شوان للغرفة
حبسن نفسي بدخوله .. باوعتله حجه : مراح تروحين للاجتماع ؟
- الساعة ٣ الاحتماع
- وهسه ١ ونص ؟
- وانت شخصك ما عندي ساعة اشوف حتى جاي دا تكولي متروح تولي لحالك شكو بيا
- لويش دا تغلطين دا اعرض عليج نروح سوا
- وشنو المناسبة بالله
دخل مخلد : العفو ست .. تممت اللي طلبتي
حجاها بصيغة لغز
باوعله شوان : وشنو اللي طلبته
رفعت صوتي : وانت شخصك اني شطلبت استاذ رجاءا لو سمحت تفضل اطلع واتركني ولا تضطرني لالافظ غير محبذة واحنا بمكان عمل
- معناها انتظرج نطلع سوا
حجاها وطلع .. باوعت لمخلد
مشكلة مشكلته يا اخي مدا يفهم ذبحني
- ست لابد تكونين حذرة الاستاذ شوان نبه وذكي جداً
ربما هذا مو من صلاحياتي وعفوا ع التدخل بس من خوفي وحرصي على حضرتج
- تقصد عباس !
اني وعباس متزوجين مخلد البيناتنا مو حرام ..
بس اللي خايفة منه شلون احجي هالموضوع لبابا دا اخلص من شوان
- مو وقت تفاتحي بهيج موضوع ولا من صالحج حاليا كل المؤشرات والنتائج تأكد فوز والدج بالانتخابات يعني هذا وقت ترسمين مستقبلج بشكل افضل ما اريد اكولج اتسرعتي بقرار الزواج هذه حياتج الخاصة وكل انسان يعرف احتياجه بس اتأني بموضوع الاعلان .
- ولو بابا اكتشف من كبل لا اكوله ؟
- ساعتها اتصرفي .. اما الان اسعي لمستقبلج .. افضل
اعلان القرار راح يخليج بعزلة عن والدج وهالشي مو بصالحج
اضافة الى هو محتاج وجودج وياه بهالفترة .
- اعرف .. شكراً الك مخلد انت انسان طيب واني اثق بيك
- اني ممنون لثقتج ست .
- اني طالعة حالياً .. كملي الشغل يمك وسلمنياه .. تمام
- تأمرين ست .
اخذت جنطتي وكمت من مكاني نزلت .. لكيت عباس واكف برا
قدمتلا مفاتيح السيارة .. ومشيت للسيارة .. صعدنا
حجه : وين
- ابيت بابا عنده اجتماع
- ما راح تفض هالاجتماعات مو فاز
- نتائج اولية نتيجة العد والفز النهائية اليوم تنعرض .
دا يحجي ودك تليفونه ، رد : ها خالي
هلا بيك .. بالشغل والله .. لا والله ما اكدر هسه
امي يمك .. ها ما طول امي يمك عرفت الموضوع خالي ما بيه نقاش عوفه .. اي ادري .. بعدين نحجي
خالي هسه اني بالشغل جاي اكلك غير اكمل واخابرك
ماشي ماشي مع السلامة
قفل الخط .. حجيت : ديريدك بموضوع زواجنا !؟
- اي
- وشحتسوي !
- شنو شسوي !؟
- اذا مقبل
باوعلي ابتسم : شبيج حبيبي ؟
- ما بيه شي دا اسألك
مد ايده اليه ليورا .. انطيته ايدي وتقربت ع الكشن اخذ ايدي باسها : منايمة يروحي ؟
- لا كلش نعسانة
- هسه احطج على كلبي تنامين وترتاحين وانعل ابو الدنيا .
- ووين !؟
-خلصي اجتماعج ويصير خير .
ترك ايدي ومد ايده على خدي كرصني خفيف ومسح على وجهي
رجعت راسي ع الكشن اللي ساند عليه ظهره .. قرص لرائد جورج مديت ودا احطه كالي : عنج حبيبي
حجيت : شوكت نكدر نصير اني وياك ببيت واحد بدون منخاف من احد ولا يشاركنا احد
- ان شاءلله حبيبتي ..
شغل رائد جورج لا ترحلين
ملت راسي حتى ارتاح واني استمع بداية الموسيقى اللي تريح النفس .. دك تليفوني .. باوعته بابا .. تركته مجاوبت
وصلني لفد مكان ..
حجيت : شدسوي
- متغدية ؟
- لا بس اخاف اتأخر ع الاجتماع
- مراح تركزين بالاجتماع وانت نعسانة وجوعانة بس خلي اجيبلج شي تاكلي
نزل جابلي لفات وبيبسي وصعد اخذ السيارة على الجسر وكفها كدام النهر وطفاها .. نزل وفتحلي الباب وانطاني الاكل .. وهو يفتحلي القوطية .. ابتسمت اكلت عجبني طعم الكص بيه حموضة كلش طيبة واللية مزيدها مكسبة .. وهو لازملي القوطية وياكل بايد وحدة ..
اكلت نص اللفة وحيل شبعت شفته هو اكل لفتين وبعده ينفض
:اكلها اني شبعت
- كمليها
- ما اكدر
حجيتها واني احاول انزل ..
اكلها بلكمة وحدة واني عربت السايد ووكفت كدام النهر الجو حيل حلو والهوى ديطير شعري .. اجا ورايا وهو يكولي : ايدج
فتحت ادية صب مي من البطل غسلت ادية ..
هو شرب المي ومضمض وتفل المي كتله : مقرف
ضحك :- تجربين
- لا ويييي قرف
- دشربي شربي
لزم راسي وشربني غصب كمت اضحك واشرب غصيت بالمي شمرته كله : يا مقرف
وضربته كام يضحك وهو يحضني ويحط ايده على كتفي ويلفني لحضنه .. ملت راسي لصدره وغمضت عيوني .. دقيقة اذا ابقى هيج انام
- سودة عليه ابويه انت لو بيدي والله ما اخليج اتعبين بس شسوي .
- لا عندي اجتماع خلي نروح حبيبي
- على راحتج .
باسني بكصتي .. انداريت بنات اثنين واكفات ليكدام ع النهر يباوعن علينا .. هو مشى للسيارة واني صعدت ورا .. وصلني لبيت ابويه .
دخلت البيت .. هوايا ناس واللي جانت ويايا بالوفد مال الامارات موجودة من ضمن الأجتماع .. وديباركون لابويه فوزه بالانتخابات ..
مجرد مدخلت الكل سلم عليه
واكو مجاملة مبالغ بيها وواضح التملق بشكل مشمئز ..
كعدت وبابا يكولي : شلون صرتي بابا
مجاوبته بس هزيت راسي
وكف شوان يمه حجه وياه ... تنهد وكاله : بعدين هسه خلي نكمل الاجتماع .
كعد بابا صار يحجي بمواضيع الشغل ويتناقشون
اني راسي صدع من قلة النوم والارهاق ..
ساعة ونص يلا كمل ..
صاروا واحد ورا اللاخ ينسحبون ..
كتله : بابا اذا مبقى شي اني لازم اروح تعبانة
- لا اكعدي لازم نحجي
- مجاي على بالي احجي .. مع السلامة
- فيااااان
تركته ورايا دا امشي لزمني من معصم ايدي وسحبني : ضيوف موجودين منريد ننشر غسيلنا مدامهم عيب اكعدي يطلعون ونحجي بهالمسخرة
- المسخرة اللي دا تحجي عنها حياتي بابا .. مناسية تهجمك البارحة ع البيت بساعة متأخرة هالأسلوب ما اقبل بيه .. ما اقبل
سحبت ايدي ..
وطلعت من البيت .. صعدت بالسيارة وعباس طلع
كمت اصيح : عجيب امره بعد كل الصار وبعده متمسك بشوان .. مدري شعاجبه بشوان حتى شايفه الرجل المبهر .. لازم نحجي
شيحجي يعني
شوان عاف زوجتااااا لازم اني ارضى بشوان لان عاف مرته ..
وكأنه انجاز وحاسبه عليه تضحيه شوكت يفهم اني ما اريد شوان
ديعاملني وكأني طفلة ..
ما كان عمري خلص واني مشايفة منه شي غير اتبع كلامه وامشي برؤيته .. مو بشر مو من حقي اعييييش
احجي ومنفعله .. شفته غير الطريق: عباس وين رايح
- للبيت
- اي بيت انت غيرت الطريق
- بيتنا
- بيتيش عباس اني راسي ديأذيني
مجاوبني
اتنرفزت .. وسكتت دا اشوف وين يريد
وصلنا لباب بيت نزل فتح الباب واجا دخل السيارة
حجيت : شنو هذا ؟
- بيت اقاربي سافر هو واهله كبل شهرين ويريدله مؤجر
- اجرته يعني ؟
- راح اخذه منه بس يتنازلي بيه شوية
- بيش ايجاره
- مو مهم نزلي
نزلت ... هو راح مدري وين ينبش طلع مفاتيح وفتح باب البيت
شكل البيت من بيوت الطرازها بغدادي قديم .. اكو حديقة صغيرة .. وحوش صغير وممر طويل على يمين البيت واكو باب خشب تدخل بيه حولي صغير بيه مرايا معلكة وتحفيات وباب الاستقبال وباب الصالة .. فتت للصالة .. بيها باب سحب جوزي مرتبط بالاستقبال
كمت اباوع : يعني شنو نكعد هنا
هو فات جو .. اكو غرفة اخشاب قديمة
حجه : نكدر ندبر نفسنا هنا بين ما اجيب غرفة جديدة .
- بس البيت واضح مترب اشون حنكعد بيه
واساسا شلون نكعد واترك بيتي
-اول وتالي راح تتركي
- بس بابا هيج حيشك اكثر
- نحجي بهالمواضيع بعدين حبيبتي ارتاحي ومددي ونامي .. وكلشي اله حل
بحجي وهو يدور بالكنتور طلع جرجف وبطانية كام يغير بالفراش ساعدته وغيرنا الفرشة .. نزعت الكعب وتمددت .. مشى هو برا .. نزعت السترة وحطيتها يمي وانداريت ..
دخل هو اني حاطة راسي كلش دايخة فتح الغطا ديغطيني
لزمت ايده : وين دا تروح ابقى يمي
دنك باس راسي واتمدد وراي
انداريت عليه وهو لفني بأديه وحط راسي على كلبه غمضت عيوني واني اكوله : هذا مكاني من العالم .
عصرني بحضنه وهو يبوسني بشعري ويكولي : نامي يبعد روحي ..
صار يمسح على راسي
يمكن ثواني هواي واني اغفى وادخل بنومتي ..
وهو يمي حسيت الجو اتلون بلون برتقالي .. ودافي وهادي .. ونمت مرتاحة حيل .
كعدت بالليل .. هو ماكو
كمت من مكاني .. رحت ادوره البيت كله مغسول حتى البرا ..
السيارة ماكو باوعت ع الطباخ .. اكو جدر ديفور .. ملكيت شي الزم وافتح القبق
سمعت السيارة فاتت ..
طلعت بباب الممر .. نزل : ها كعدتي حبيبي
- وين رحت
- جبت كم غرض للبيت
حجيتها واني افتح اديه حتى احضنه
حضني باثنين اديه حجيت : لتبتعد من عندي اموت
: شرفنص منو الصبح جانت تريد تنهي واني لازكلها
- انت اكثر واحد تعرفني كلمة الما اريدك مني يعني اريدك بكل قوتي
- يبعد قوتي وحيله
باسني وكال : يلا نتعشى
- شسويت ؟
- شوربة عدس بس هذا اللكيته باقي بالكاونتر
- وحنبقى هنانه
- معاجبج ؟
- لا بالعكس كلش حلو البيت واحسه قديم وهادئ كلش مريح للنفس
- اي زين معناها اجره ونعيش بيه
- ويخلونا
- منو ما يخلينا ؟
سكتت ..
حجه : مالج رجعة لذاك البيت بعد
- لا مو هيج عباس ممتفقين هيج
- وشتفقنا
- اكول لبابا
- شوكت ؟
- عباس الله يخليك اصبرلي تعرف هالوضوع حرج .
- اي بس اني ما كاعد اصبر بدونج اريدج يمي .. مرتي وحقي لو لا
- ليش اني ما اريد بس حبيبي مو هشكل اصبرلي بس اكمل المشروع واحجي والله
- هسه خلي نتعشى والله كريم
هو وكف بالمطبخ واني رحت لحنطتي جبت موبايلي بابا مخابرني ٥ مرات وماما مكالمتين .. خابرت ماما بسرعة .. جاوبت : الو
- الو هلو ماما وين انت
- ليش بابا خابرج ؟
- اي خابرني يسأل عنج
- شكلتيلا
- اني جنت برا كتلا ما ادري خل اخابرها وافتهم
- طيب كوليله اني عندج
- انت وين فيان
- يم صديقتي
- متأكدة عند صديقتج
- بلي
- شسمها
- متعرفيها
- شدا تحاولين تسوين من ورانا فيان
- ماما كوليله اني يمج وبس محاج تسأليني ليش هذه حياتي
- واني مو امج وتهمني حياتج بنتي شبيج
- اوكي ماما من نلتقي راح احجيلج كلشي .
- معناها باجر تجين وتحجيلي كلشي مفهوم
- تمام بس خابري لبابا كوليله لكيت فيان نايمة عندي بالبيت
- تأمرين ست فيان خليتينا نجذب ونمشي بخططج
ابتسمت : احبج ماما
- هسه حبيتيني ملعونة مريلي باجر دا اعرف مصيبتج شنو .
- تمام
قفلت التليفون كله ورحت يم عباس خلصت وقتي وياه باجمل ما يكون .. عجيب الراحة الاحس بيها وهو موجود ما احسها ولا ويا اي بشر بالعالم غيره .. احس بسكينة وطمئنينة وجو كلش يدفي شعوري ويكملني .
ثاني يوم ..
رحت للدوام .. باركولي بفوز ابويه بالانتخابات
طلعت النتائج النهائية واني ما ادري .. دخلت مكتبي
ساعة واجا بابا سمعت هوسة الموظفين جوا وهم يباركوله .
نزلت وصرت كدامه : اهلا وسهلا استاذ الف مبروك ويارب من تقدم الى تقدم
صافنحني وهو يسلم ويقرب وجهه من اذاني يكولي : وضع البارحة لازم نتحاسب عليه
ابتسمت واني اكوله : جرب تنشغل بمهامك بابا وتتركني
- امشي كدامي للغرفة
صعدت لغرفته وهو راح كعد كدام مكتبه : صارحيني فيان !؟
- بأيش ؟
- وين جنتي
- يم ماما
- وسيارتج ؟
- يم الحارس
- الحارس ما جان ابيته واتواصلنا ويا اهله كالوا بالشغل
- المطلوب بابا
- شدا تسوين من ورا ظهرييييي فيااااااااان
- لترفع صوتك عليه بابا اني مو طفلة اني عمري ٣٥ سنة
الشيب بلش يطلع براسي .. ما مجبرة اني انطي تقرير عني لاي احد .. تجيني نص الليل تتهجم عليه وتفزعني وتخليني بموقف جدا سيء كدام الحراس لان شوان فتنلك كم كلمة
خلينا متفقيييين بابا مدام انت فزت بالانتخابات ومبروك مشروعك نجح فوجودي ما اعتقد يفيدك بشي .. ياريت تقيلني من منصبي دا اترك العراق واطلع اعيش حياتي حال اخوية اتزوج اكون عائلة اعيييييش ..
اني مو آله ولا اني ربووووت
اني بشررررر اتركني بحالي وكافي تراقبني وتزقنبني بحياااااتي انت شفت حياتك واتزوجت وعشت وامي اتزوجت وعاشت وكلكم عشتوا كاعديلي ليش تحاسبوووووني ليش
مان عليه بالمنصب اللي مخليني بيه وكاعد دا تضغط عليه
وتحاسبني حتى امشي بامرك انت غلطان بابا بهالطريقة اني ما ابقى .. اني مو شوان ويتملقلك حتى ترفعه بنصب ينفعه ومن اليوم اقدم استقالتي
حجيتها وطلعت من المكتب ..
كام يصيح عليه .. تركته وراي
رحت طلبت كتاب استقاله كتبته وكملته ووقعته .. ورحتله شوان جان موجود ديحجي وياه .. حطيت الكتاب على المكتب : العفو منكم استاذ هذا كتاب استقالتي .
- فيان لتتخبلين
- موفق بمشروعك القادم أستاذ
حجيتها وطلعت من المكتب.. رحت لمكتبي
جنت دا الم وانفض مهامي .. دخل بابا وهو يكولي : : بابا اني انعزلت من منصبي الحالي كمدير عام وكتلب استقالتج ما اكدر اوقع عليه .. ابقي انت هنا بين ما ارتب وضعج مع سيادة الوزير ع المستشارية
- لترتب شي بابا اني مرايدة منك شي ..
- بنتي لا اتعبيني وتنغصين عليه فرحتي .. اني بيمن اشد ظهري اذا مو بيج
- لا شوان مكفي وموفي متحتاجني
- لا عاد تحطين راسج وياه انت بنتي شوان شنو ودا تقارنين نفسج بيه
- بابا ارجوك اتركني
ليش من حقكم كلكم تعيشون حياتكم
وتجون تنغصون عليه حياتي .. مو معقول ..
اني بشر حالي حالكم
- منو مانعج تعيشين
- انت .. دا تخنكني بابا .. وين رحتي وين اجيتي منو كالي انت هيج سريتي وشكوك وتحقيق خنكتني ..
- بابا اني خايف عليج اكو بشر تشتغل طيبتج وتحاول تصعد على اكتافج .. الكل وان حاول يوكف بجانبج ويحميج ميتعدى كونه كلب حماية .
- شكراً لنصيحتك بابا .. اني مضطرة اطلع
سحبت جنطتي ودا امشي للباب
صاح - فياااااااااااان
وكفت واخذت نفس انداريتله : نعم بابا
حجيت ودمعت عيوني ..
- مراح احاسبج بنتي ولا راح اضغط عليج بس اذا اني ابوج والي خاطر يمج انتبهي على نفسج .
- شكراً .. اكدر اروح ؟
- ديري بالج على نفسج فيان
- مع السلامة
عفته وطلعت من المكتب .. هو لحكني ..
هوسة الموظفين وشوان كلها صارت وراي .. طلع كدامي عباس اشرتله .. صاح هو على عباس .. وكفت وانداريت
قرب عباس منا وهمس بأذنه ..
ودفعه منه ومشى لسيارته .. واني مشيت لسيارتي ..
صعد عباس .. حجيت : شكالك ؟
- يكولي لو عرفت اي شي عنك مو زين لا انت ولا اهلك تخلصون مني خليها ابالك .
- جانت عندي فرصة احجي بس مكدرت ..
كل ما دا اخول انطق اكو خوف يلزم حنجرتي
هو شاك بالموضوع
- مو بس شاك متأكد .. يحتاج بس تبلغي
- لو بلغته ما اعرف ردت فعله واحس بخوف من ردة فعله .. ما اعرف اذا تفتهمني او لا
- احنا راح نبقى هيج وما ادري لشوكت .. احجي تبجين وتكولين تعبتني اسكت اتعب من وراج وما ادري وياج شلون .
- وصلني للمصرف
- شعندج ؟
- وعدت ماما اجيها
سكت وساق للمصرف دخلت ماما دا شتتغل سلمت عليها وطلبتلي كهوة وكالتلي : اي فيان شصاير
مديت ايدي اخذ فنجان القهوة وبدون مقدمات حجيتها :- اتزوجت
جمدت بمكانها : منو ؟
- اني
اندارت من كرسيها وتقربت مني : صدك لو تشاقين
شربت من فنجاني وهي شاهكة تباوعلي بصدمة
حجت : فيان لتغمين على گلبي وتكوليلي الحارس انجن
- هو ماما
- لا تشاقيين
كامت من مكانها دخلت عليها موظفة كالتلها : لحظة ماما اتركيني نص ساعة بنتي ..
طلعت الموظفة وماما قفلت الباب : شلون يعني اتزوجتي فيان
- بالامارات صار كلشي
- يعني ابوج وكت اللي جان حاس احساسه بمحله !؟ رجعتي تعبانة ومريضة وافلام هاية ماما !؟
- لا اتزوجت وبعدها اتندمت لان بابا ميعرف
- شنو مدى هالزواج كوليلي يعني بس ورق لو شنو
- زواج كامل حتى اجر بيت ودكعد نستقر واني كلش مرتاحة وفرحانة .
صفنت بوجهي : عشتو فرحانة بيا ضيم بنتي بيا مصيييبة هالإنسان ديستغلججججج
- ماما عباس ممستغلني بشي .. ووياه ما احس بشعور الاستغلال بس بشعور حلو
- لانه حيااااال كدر يلعب على عقلج وياكل براسج حلاوة فيان بنتي اصحييي
-اني لاول مرة بحياتي اصحى واسوي شي اني حابته
- عساج لا صحيتي لعد
ولطمت على رجليها وهي كاعدة وبقت تباوع بوجهي : ولج خلصو الزلم يحظي .. ولج ماكو غير هالفكر .. لا شوفه لا احوال عليمن خذيتي متكليلي
- الرجال لا بشكله ولا بفلوسه ينحب .. بشخصيته واسلوبه
هو الوحيد من بين هالعالم اللي گلبي يحط ويرتاح يمه .
-اي ليش انت بناتي كلوبجن تحط يم واحد بيه خير لا والله
- الخير عدكم بس فلوس !؟ لو جان عنده فلوس وغني جان اتقبلتوه .. لا عاد تقارنيه وتقارنيني .. اتتركوني اعيش ..
-يولي شقارنج بتي يا فلوس ولج ماما انت وين وهو وين لا من ملتج ولا يمج ولا بكرباج ولج بنتي هذا خادمج وكاعد ديتسلق حتى يملي جيوابه اليوم يحبج باجر تشوفين غير وجوه من تخلص الحاجة منج .
- ليش شوان شنو مدا يستغلني متسلق عليه حتى يوصل لابويه
- واني وافقت بشوان راضية بيييييت
- بس لو اني راضية ومتزوجاه مجان اعترضتي هشكل
- شوان دارس بنتي .. شوان كردي حاله حالج .. شوان ابن خير شوان اقاربج وتعرفي والشين التعرفي احسن من الزين الما تعرفيييي.
- واني صغيرة .. جبتيلي هيج فد سطل مكعبات وجنت اكعد بالساعات احاول اركب شي على شي حتى يكعد البيت بس جانت اكو قطعة صغيرة .. المكعبات متركب وترهم اذا ما احطها ..رغم لونها يختلف عن باقي المكعبات بس بيت المكعب بهالقطعة يكتمل وينبني ... واني اكتمل بيه ماما .. حتى لو هو غير لون واني غير لون .. اني قطعة كبيرة وهو قطعة صغيرة ومعما كان الاختلاف نتركب ونرهم ونجمل بعض باختلافنا .. ماما ارجوج اتركي موضوع الفلوس والطبقيات وافرحيلي اني فرحانة بيه
- لحد يا وقت هالفرح !؟
- مو مهم المهم اني هسه مرتاحة وفرحانة ..
- ولو اكتشفتي هو فعلا رايد يتسلق ويغير واقعه براسج شتسوي
- ما اكتشف .. لان اني رايدة اغير واقعه .. مثل ما هو غيرني .. وعالجني بوجوده ميحتاج اخذ ادوية معدئات ومضاد اكتآب .. هو كدر يحييني وينتشلني من تل هموم اني مغرقة نفسي بيه بس يمه اشوف الحياة فمو عيب اسنده واغيره اذا اني حابته .. غيره مو احسن منه وصعدوا بروسنا وشستفادينا منهم .. اقلها هذا زوجي .
- فيان هالرجال غاسل عقلج فد مرة
- امه مثلج مراضية وخابصة الدنيا لان عرفته اتزوجتي
- يا عشتو وتطول امه تلكالها جنة مثلج وتعرض وج انت شدا تسوييين بنفسج
- انت تشوفي ميناسبنا ومو من ملتنا وهي كذلك ماما الموضوع معليه بالفلوس والطبقيات هي تشوفني اني اختلف عنهم .
- تممتي زواجج منه فعليا
- اي
- يعني انطيتي نفسج بدون بدلة عرس ولا حفلة ولا اشهار ولا اهل يدرون
- جنا متفقين انو نتمم زواجنا بعد منبلغكم
- بس ميناسبه طبعا .. يخاف تكلبين عليه ولج حيال
- هو مجبرني ماما .. اني مدا احجيلج الموضوع حتى تحجين عليه .. هو صار زوجي ولو مهما كان اني ارفض اي انسان يجيب سيرته بسوء حتى لو انت ماما .. احترموا قراري واختياري واحترموني .
- موجود هو
- بلي برا
- اذا انت ممحترمته ولهسه هو خادمج شلون نحترمه احنا
- قريب راح ارتب كلشي يخص عمله ، بس الكلام هذا يبقى بيني وبينج فقط ما اريد بابا يعرف باللي صار لحد ما اني ابلغه .
حجيتها واني دا اكوم ..
كامت ويايا واتقربتلي .. حضنتني وبجت
مديت اديه حضنتها : لويش دا تبجين ؟
-جنت منتظره اشوفج عروس وافرح بيج متخيلت يجي هاليوم بس ما اشوفج غير بمكان انت متستاهلي .. جنت بانية احلام يابو احلام شاسوي وشاعزم بفرحج .. بس ..
- مو مهم كل هالامور المهم اني فرحانة ماما افرحيلي لهالشي
-دا احاول بس اني اعرف نهاية هالطريق شنو .. امشي .
طلعنا اني وياها ..
عباس برا بدون سلام كالتله : شوف هالبنية تخليها بنص عيونك ولو قصرت وياها بذرة افكس عيونك افتهمت .
باوع بوجهه واندارلي : كملتي حبيبي
اني دا اباوعلهم اثنينهم ..
حجت هي : ومو بعينك تتجاهل انت تعرف .... قاطعتها
- ماما .. ارجوج
- مدا تشوفي شلون يتجاهل ومعاجبه
-صعد بالسيارة واتجاهلها بالزايد
اتضايقت منه حيل كمت اومياها بعيوني تتركه سلمت عليها واني اكولها : لخاطري ماما كافي
- لسه كدامنا شكد راح نسكت ونتحمل لخاطرج
- ماما !
- روحي وياه واني اعرف شغلي .
مشيت افتريت وصعدت يمه .. داس بالسيارة قوي وطلع من كدام المصرف .. كمشت ايده : ضجت ؟
- منين ؟
- من ماما
- متوقع هالكلام مو مشكلة
تقربت منه بسته بكتفه وخليت راسي عليه
اخذنا للبيت .. دخلنا ودخل السيارة .. فتت للصالة اباوعها .. التخم مالتها كلش قديم فات هو ورايه يعلك بالمفاتيح .. حجيت : البيت يحتاجله تغييرات يصير لو ابو البيت ميقبل
-لا عادي على بالي كلت بس استلم راتب شوية شوية اغير باثاثه ..
- تري..... قاطعني
-ممستعجلين اتركي هسه خل نرتاح ..
رحنا لغرفتنا بدلنا ونمنا ..
العصر واني نايمة بحضنه والبردة مسدودة والجو مال الغرفة مظلم نوعا ما .. وبس صوت المروحة بالغرفة دك تليفون عباس .. اني على ايده .. شال نفسه وسحب ايده من جوايه .. اني حشرت نفسي بظهره واني نايمة .. رد .. شو كعد بسرعة
فزيت على كعدته وحطيت ايدي على ظهره : شكو
- وين هي هسسسسسه ... يلا حاي جاي
شمر التليفون وكام بسرعة كمت وياه : شكو عباس شصاير ؟
- امج رايحة على بيتنا
- وشمدليها ابيتكم
- هسه شمدليها لو كولي شحاجية وامي متخربطة
- عزاااا وامك وين هسه
لبس وطلع بسرعة من البيت .. دخيلك يا ربي
اخذت تليفوني خابرت امي .. مجاوبتني ..
كمت لبست ملابسي .. وخابرت على عباس
كالي : بعدني ما واصل
- وين حتاخذها حتى اجيك
- لا تجين ولا توصلين ابد
- ليش خلي اشوفها لامك خاف تحتاجون شي
- راح يجرحونج بالكلام ويكومون يحجون زايد ابقي بعيدة ..
- لعد راح اطلع للمنصور ارجع لبيتي
- روحي .. اكمل واخابرج
- لتنسى طمني عليها .
سديت الخط .. اخذت ملابسي .. وطلعت لبيت المنصور لان بهذا البيت مجايبة ملابسي ولا اكو مسواك .. يعني ما اكدر ابقى بيه حاليا وما اريد احيب لان عباس يتحسس ولا اريد اطلب لان نهاية شهر وراتبة بدا يخلص .. مدري خلصان ومداين ما اعرف ميكولي بهالامور .
وصلت بيتي بتكسي .. ودخلت البيت المغرب ..
استغربت بابا كان موجود .. وكاعد بالصالة .. لزمت كلبي لما شفته مقابيلي : هلو بابا
- هلا بنتي جنت منتظرج بس اتأخرتي
- كان خابرتني جنت يم ماما
- كلت ما اريد اضايقج .. بعدج مزعوجة
- لا احسن
- جيد مدام اطمنت عليج اكوم اروح ، عندج طلعة اليوم لو لا ؟
- لا تعبانة دا اريد ارتاح ليش
- هيج من باب الاطمئنان عليج . ارتاحي
شنو اجيتي تكسي
- بلي
- سيارتج والسايق وين
- واني عند ماما صار عنده ظرف فصرفته ورجعت بتكسي
- حاليا الوضع اخطر من السابق اني عندي اجتماع بالخضراء انت اخذي راحتج بابا ولو احتاجيتي شي خابريني راح اترك واحد من الحماية مالتي عندج بالباب اي شي تحتاجين بلغي .
تقربت منه ومديت اديه حواليه وحضنته وخليت راسي على صدره حضني وباس راسي .. حجيت : لو غلطت تسامحني ؟
ابتسم وكالي : لا
جنت دا احاول افتح موضوع عسى ولعل اكدر افاتحه بزواجي بس من كال لا .. سكتني ضليت اباوع بوجهه .. انسحب وهو يكولي : ديري بالج على نفسج .
فركت وجهي .. وبقيت اباوع وراه ..
ما اعرف شوكت تصير عندي جرأة واكوله ع اللي اني بيه
اعرف مراح يتقبل بس ما اعرف ردة فعله اشون ممكن تكون
صعدت لغرفتي سبحتت وبدلت وكعدت ..
رجعت خابرت على عباس .. مجاوب .. لبست بجامة وقميص حرير ونزلت جوا طلعت اكل حطيت بالمايكرو .. وطلعت فاكهة سويت عصير برتقال وكيوي .. دا احط ثلج بالكلاص .. دك تليفوني
جريت باوعته .. عباس
رديت بسرعة : ها حبيبي
- ها يابه وصلتي البيت
- اي وصلت بشر ماما اشونها
- مو زينة متأذية حيل هسه امج متكليلي شكو طلابتها وياي افتهمنا ما رايدتني رايحة على اهلي تغلط وتتأمر وتعير بيهم اهلي شعليهم فيان
- تعيرهم ليش شمسوية ماما
- مخلية شي ممسويته عركة زينة بنص المنطقة مطلعتني اني لاعب عليج هذا حجي بالله والله اطخ ابالي اروح عليها العب بيها لعب لو ما مرة
-اني هسه اخابرها والله ما ادري هيج مسويه لتضوج
- هو لتضوج شنو فيان هالوضوع لازم نخلص منه ..
- شسوي يعني قابل اني كايلتلها تروح
- باعي هاي مال يومية خضي جذعج ينخلة ترا ملينا والعباس لازم نحطهم كلهم ونبلغهم .. واولهم ابوج .. لا انت صغيرة ولا اني مرة عاقلة ومتزوجج بموافقتج قابل شمسوي ترى طكت روحي بعلي .
-حبيبي والله ردت اكول بس متجرأت
- وشوكت تتجرئين ما عندج جرأة خليني اني اروح وابلغه
- اخاف يروح يأذيك
-وجاهل اني ويأذيني طالع من فطر الكاع .. غير عدي عمام وعشيرة يسدون عين الشمس
-هسه شوف الوالدة وتنحل والله
-هسه هذا التسويف وتنحل كومي روحي لابوج وكليله الصاير وفضيها يا فيان
- هسه
-وشفرقها عن باجر
-عنده اجتماع بالخضراء مموجود
- يخلصه ويرجع وتحجيلا بس روحي البيته .
-تمام بس لتتضايق الله يخليك حبيبي
- ما متضايق منج ابويه انت اني بس اريد نفتك من هالموضوع ونرتاح راح يصيرلنا فوك الشهر واحنا لازمين كلوبنا بيدنا ما يصير
- راح احاول
- ضلي حاولي حبيبتي خل نشوف وين توصل يلا خل اروح اخابرج بعدين
- ترجع لهنانه لو تبقى يم اهلك
- خل اشوف هسه هي متأذية حيل
- تمام حبيبي اخذ راحتك
-مو تنسين روحي فيان خلصيني من هالموضوع الله يرضى عليج
-تمام
قفلت الخط منه واتنهدت ..
اتصلت بماما مرة ثانية مجاوبتني
صبيت العصير وكعدت اكل .. اتصلت اني بقيت احجي والومها .
ماما دا تكول ممعيرتهم بس تكول رحت حذرتهم بنتي متصير چنة وما اقبل تكعد ويا احد وتعيشوها مثل ما هي عايشة تحطولها خدامة لو انتم تخدموها هاي مشكلتكم بنتي مدام اخذتوها تعاملوها باللي تستحق واليقلل منها يا ويله مني
اعرف امي حاجيه اكثر من هالحجي واصلا ماله داعي لان اني كلتلها امه مثلها مموافقة بزواجنا روحتها دا تزيد الطين بلة
كملت اكلي وكمت نظفت المواعين من الاكل وحطيتهم بالغسالة مال الصحون .. وصعدت لغرفتي .. ابالي ابدل حتى اروح لبيت بابا .. بس واني دا اطلع ملابسي .. اجت بأيدي فوط نسائية .. باوعتلهم احس صار فترة طويلة ممستخدمتهم !
شوكت اخر مرة ؟
كعدت اصفن .. يمكن من قبل سفرتي مال الأمارات ب١٠ ايام تقريبا .. وسفرة الامارات تقريبا حيصيرلها اكثر من شهر معقولة كل هذا تأخير !
اني منتظمة عندي
مرات بحالتي النفسية من تسوء واخذ مضادات اكتئآب تتأخر عندي او تتقدم .. بس بايام قليلة مثلا قبل موعدها ب٥ ايام او تتأخر اسبوع ..
بس حيصير شهرين تقريبا ..
معقولة كل هذا تأخير ؟ .. ياربي معقولة حمل !
حطيت ايدي على حلكي وابتسمت : معقول
باوعت لنفسي بالمرايا .. وكمت احط ايدي على بطني
معقول اكو شي ببطني .. ويييي اطير من الفرح لو صدك
يصير عندي بيبي هنا واصير ام .. معقولة
لبست بسرعة وبدل ما اروح لبيت بابا
رحت للصيدلية جبت اختبار كشف حمل ورجعت للبيت بسرعة دا اريد اسوي الفحص .
جانت الساعة ٩
هستوني دا اريد افتح الباب شفت سيارة شوان اباب بيتي
دخلت للبيت حارس شوان والحارس مال بابا بالبيت ..
كلتله : منو هنا
-الاستاذ شوان جايج زيارة
- تمام
مشيت واني بيدي كيس الصيدلية بيه جهاز اختبار حمل دخلت من باب المطبخ خليت الكيس ع الكاونتر ورحت للصالة .. شوان كاعد
:تدخل البيت بدون استأذان
-وانت وينج حتى استأذنج
- ولما ملكيتني تدخل ؟ !
-لتكبريها حاي دا احجي وياج كلمتين
- وشنو الكلمتين !
-اني حاب نتزوج وباسرع وكت
-لاااا .. تحب اليوم
-اذا مستعدة ما عندي مانع
-اكول شوان لتضحكني اتوكل واتركني ارتاح
-اني مدا اتشاقى .. اني فعلاً رايدج
-واني ما اريدك
-مو مهم تتعودين بعدين وراح ترديني
- شنو هالثقة اليوم مفولة
- شنو اللي تريدي حتى يتم هذا الزواج
-تطلع برا بس
- بس اني رايدج
- واني ما اريدك شكد بعد لازم اعيد حتى تفتهم
- شوفي ترجعين بالحسنى خير على خير .. مترجعين
-اي
-راح اجبرج
-وشلون تجبرني بالله
-لتضطريني لهالفعل .. وافقي بالحسنى وخلينا نتفق
-شوان ليش متطلع برا وتخلصنا من تفاهتك وسخافتك ؟
حجيتها وهجم عليه بسرعة حط ايده على حلكي وصار ورايا وسحب ايدي ورا ...
بسرعة كمت ادافر من عنده
وهو يهمس باذني : دقايق تصيرين مرتي ونصحح الغلط ونتزوج لا تضوجين
سحبت ايدي الثاني وهو ضاك عليها بجسمه كمت اجر بايده من حلكي .. كام يطلع مني صوت ويرجع يصم بحلكي ..
شالني من الكاع حيل وكام يرفعني يريد ياخذني للغرفة الصغيرة اللي اتنام بيها ام غيث لما مرات تجي هنا كمت احاول ابعده عني بكل صورة مدا اكدر
دفعني للغرفة وضرب المفاتيح وحطه بجيبه .. كمت اصيح بكل صوتي ركض وهو يلزم بحلكي ووجهي واني ادفر بيه وادفع
دفعني للكاع .. نومني على وجهي جر المخدة واني احاول انجر من جواه واصيح : وينكممممممم الحكولي عوفنيييييييييي
سحب المخدة وجر شعري حيل وحط وجهي ع المخدة وجيردني من ملابسي واني اصرخ عبث صوتي مختنك بالمخدة احاول انفك من ايده اقوى مني مدا اكدر اجر نفسي منه
كمت الجي واتوسله واكوله : الله يخليك لا اوافق اوافق بس لتسوي بيه هيج
دنك عليه وهو يكلي : اني ما اذيج دقيقة وتصيرين الي
كمت اصرخ واكوله : لا تسوي هيج اني متزوجة عووووفنيب
بس ممنتبه اني شدا احجي ..
كأنما حيوان واباله شي واحد .. بمجرد ما اتقرب مني واعتدى عليه عرفني اني مو بنية .. هو هنا تحول من حيوان الى وحش
كام من عندي بسرعة وجر راسي من شعري وهو يكولي : منطيته نفسج يا عااااهرة
حجاه واني اصرخ وابجي بكل قوتي .. ضربني راشدي قوي احس خدي طار من وجهي ..
كمت اصيح وابجي اريد احد من الحراس يجي
محد منهم اتقرب وهو كام سحب الحزام مالته من البنطرون وجرني من شعري ويصرخ : بايعة نفسج اله يا رخيييييصة
سنين وني خطيبج ما خليتني حتى ابوسج ومقدمة شرفج للساقط بسهووووووولة يا كح*****
وكام عليه يضربني بكل قوته بالحزام ...... يتبع
____________
#زينب_ماجد
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق